Zekariah
Ew kökköön liwinsäfäl ngeni ewe SAMOL
1 Iwe, lón ewe awalüwen maramen ewe oruuwen ierin än Darius nemenem, än ewe SAMOL kapas a tori ewe soufós Zekariah nöün Berekiah we mwän, nge Berekiah nöün Iddo.
2Iwe, iei ei poraus Kot a tiini ngeni Zekariah pwe epwe üreni ekkewe aramas: “Ewe SAMOL a fókkun soong ngeni ämi kewe leewo. 3Iei minne, kopwe üreni ekkewe aramas: Iei meet ewe SAMOL mi Unusen Manaman a apasa: ‘Öüpwe liwinsäfäl ngeniei, iwe, ngang üpwe liwinsäfäl ngeni kemi,’ ewe SAMOL mi Unusen Manaman a apasa. 4Öüsap usun ämi kewe leewo, iir chókewe ekkewe soufós melóóm ra esile ngeniir: Iei meet ewe SAMOL mi Unusen Manaman a apasa: ‘Öüpwe kul seni ämi kewe lapalap mi ngaw me ämi kewe föfför mi ngaw.’ Nge iir resap öüselingaei ika älleasochis ngeniei, ewe SAMOL a osomänetiw. 5Iwe, ikafaiir ämi kewe leewo iei? Nge ifa usun nöümi kewe soufós? Ra manaw tori feilfeilló chök? 6Nge ifa usun, äi kewe kapas me äi kewe öllük ngang üwa ngeni neii kewe chón angang ekkewe soufós, resap küüw ämi kewe leewo?
Iei minne, iir ra ekieksäfäl o apasa: ‘Ewe SAMOL mi Unusen Manaman a föri ngeni kich meet a fichiti ach kewe lapalap me ach kewe föfför, usun chök i a öpwüngaló pwe epwe föri.’ ”
Emön mwän leiin ekkewe irä iter mörtöl
7Iwe, lón ewe rüwe me rüwänüwen ränin ewe engol me ewin maram, iei ewe maram Shebat, lón oruuwen ierin än Darius nemenem, än ewe SAMOL kapas a tori ewe soufós Zekariah nöün Berekiah we mwän, nge Berekiah nöün Iddo. Iwe, iei ewe poraus:
8Lón ew pwinin a wor och künäei. Nengeni, ngang üwa küna emön mwän mi waawa emön óris mi par, a üütä leiin ekkewe irä iter mörtöl lón ew leemól mi wääkükkün. Iwe, lükün sökürün ätewe, a pwal wor emön óris mi par, emön mi önüpwül me emön mi pwechepwech nge mi wor chón waawa ra nóm wóór.
9Mwirin, ngang üwa eiis o apasa, “Meet wewen ekkeei óris, äi samol?” Nge ewe chón läng mi kapas ngeniei a pölüweni o apasa, “Ngang üpwe pwääri ngenuk meet wewen ekkeei óris.”
10Mwirin, ewe mwän mi üütä leiin ekkewe irä iter mörtöl a äwewe ngeniei o apasa, “Ikkeiir ekkewe óris ewe SAMOL a tiiniireto pwe repwe fätälfeil o sacheei leemelen unusen fönüfan.”
11Mwirin, chókewe mi waawa ekkewe pwal ekkóch óris ra esilei ngeni nöün ewe SAMOL we chón läng mi üütä leiin ekkewe mörtöl o apasa, “Äm aia fätälfeil o sacheei leemelen fönüfan o küna pwe unusen fönüfan a mósónósón o nóm lón kinamwe.”
12Mwirin än nöün ewe SAMOL we chón läng a rong ei, a ääni ei iótek o apasa, “Äi SAMOL mi Unusen Manaman, epwe ifa üküükün langattamen fansoum óm kopwe ömwöchü óm ümöümöch seni Jerusalem pwal seni ekkewe telinimwen Judah, en ka soong ngeniir lón ekkeei üküükün fiik ier?”
13Iwe, ewe SAMOL a ääni kapas pweteete me kapasen ouruur ngeni ewe chón läng mi kapas ngeniei.
14Mwirin, ewe chón läng mi kapas ngeniei a apasa, “Kopwe arongafeili ei kapas: Iei meet ewe SAMOL mi Unusen Manaman a apasa, ‘Ngang üwa fókkun luukommóng lón äi tong fäniten Jerusalem me Zion,
15nge ngang üwa fókkun soong ngeni chón ekkewe mwüü mi meefi pwe iir ra nónnómöch. Pün ngang üwa chök ekis soong ngeni neii kewe aramas, nge iir ra esselükaló ar efeingawer lap seni öüküükün minne ngang üwa ekieki.’
16Iei minne, iei meet ewe SAMOL a apasa: ‘Ngang üpwe liwinsäfäl ngeni Jerusalem fän äi tong enlet. Iwe, imwei epwe köüüsäfälitä ikenan. Iwe, efóch selin öüküük epwe keitiló wón Jerusalem pwe epwe försäfäl,’ ewe SAMOL mi Unusen Manaman a osomänetiw.
17“Kopwe pwal sópweló le esilefeili pwe iei meet ewe SAMOL mi Unusen Manaman a apasa: ‘Äi kewe telinimw repwe ursäfäl ren wöw, nge ngang ewe SAMOL üpwe echipasäfäli Zion o filisäfälietä Jerusalem.’ ”
Ekkewe fófóch mächään maan me ekkewe fömön chón föri pisek seni mächä
18Mwirin, ngang üwa nennetä nge üwa küna pwe a wor fófóch mächään maan. 19Iwe, ngang üwa eisini ewe chón läng mi kapas ngeniei, “Meet wewen ekkeei mächään maan?”
Nge i a pölüweni o apasa, “Ekkeei mächään maan ra eliosunätä ekkewe mwüün fönüfan ra atoropasafeili chón Judah, chón Israel me chón Jerusalem.”
20Mwirin, ewe SAMOL a pwääri ngeniei fömön chón föri pisek seni mächä. 21Iwe, ngang üwa eiis, “Meeta ekkeei fömön chón föri pisek seni mächä ra feitto pwe repwe föri?”
Nge i a pölüweni o apasa, “Ekkewe fófóch mächään maan ra eliosunätä ekkewe mwüü mi maun ngeni chón Judah o atoropasafeiliir leiin ekkewe mwüün ekis, iei minne esap wor emön aramas a tongeni chimwetä, nge ekkewe chón föri pisek seni mächä ra feitto pwe repwe eniwokkusu ekkewe mwüü o ataetiw mächään ekkewe mwüü mi etekiatä mächäär kewe le üüngeni ewe fönü Judah o atoropasafeili aramasan.”
Emön mi kömwöch efóch selin öüküük
2 Mwirin, üwa nennetä, nge üwa küna emön mwän a üütäló mwei fän efóch selin öüküük mi nóm lepöün. 2Iwe, ngang üwa eisini, “Ia kopwe feilló ie?”
Nge i a pölüweni o apasa ngeniei, “Ngang üpwe feilló pwe üpwe öükü Jerusalem, pwe üpwe pii ika ifa üküükün chöölapan me ifa üküükün langattaman.”
3Lón ei fansoun, ewe chón läng mi kapas ngeniei a feilló seniei, nge pwal emön chón läng a feitto ren pwe epwe chuuri, 4o apasa ngeni: “Kopwe ssääló fän ei poraus ren enan ölüwöl mi kömwöch ewe selin öüküük o üreni, ‘Lón ew fansoun, Jerusalem epwe ew telinimw esap wor tittin pwokiten epwe epwe fókkun ur ren chómmóng aramas me maan repwe nóm lón. 5Pün pwisin ngang wón inisi üpwe ew tiit ekkei pwellin ünükkün Jerusalem pwe üpwe tümwünü,’ ewe SAMOL a osomänetiw, ‘iwe, ngang üpwe nóm lón ewe telinimw pwe an ling.’
6“Öüpwe feitto! Öüpwe feitto! Öüpwe süüseni ewe fönü efeng,” ewe SAMOL a osomänetiw, “pün ngang üwa atoropasa kemi ngeni ekkewe rüwänü itiitin äsäpwäälin fän läng,” ewe SAMOL a osomänetiw.
7“Öüpwe feitto, ämi chón Zion! Öüpwe sü ämi ekkewe mi nóm lón Babylon!” 8Pün iei meet ewe SAMOL mi Unusen Manaman a apasa: “Mwirin än ewe Emön mi Ling a tiinieiló pwe üpwe öpwüngü chón ekkewe mwüü mi angealó wöwümi fän pöchökkül - pün iö a attapa kemi, usun chök nge a attapa chóchchólun lón mesan - 9ngang üpwe fókkun öüüw peii mi manaman pwe üpwe öpwüngüür pwe chókewe iir ra nöünir amanaw repwe angei pisekir fän pöchökkül pwe liäpeer. Mwirin, ämi öüpwe silei pwe ewe SAMOL mi Unusen Manaman a tiiniei.
10“Öüpwe mweireir o pwapwa ämi chón Zion, pün ngang üpwe feitto o ngang üpwe nónnóm leiimi,” ewe SAMOL a osomänetiw. 11“Lón ena fansoun, aramas seni ekkewe mwüü mi chómmóng repwe feitto reei o chuungeniei ngang ewe SAMOL. Iwe pwal iir repwe wiliti neii aramas. Ngang üpwe imweimw leiimi lón ämi we telinimw, mwirin, ämi öüpwe silei pwe ewe SAMOL mi Unusen Manaman a tiinieito reemi. 12Iwe, ewe fönü Judah epwe ina inetin ewe SAMOL me lón ewe fönü mi pin. Iwe, i epwe pwal chök filisäfäli Jerusalem pwe ina pwisin an telinimw. 13Ämi aramas meinisin öüpwe mósónósónóló me fän mesen ewe SAMOL, pwokiten i epwe fókkun pwäätä o toowu seni lón leenian mi pin.”
Ekkewe üüf mi limöch fäniten ewe Souasór mi Lap
3 Mwirin, ewe SAMOL a öküna ngeniei Joshua ewe souasór mi lap a üütä fän mesen nöün ewe SAMOL we Chón Läng, nge Satan a üütä peliifichin Joshua pwe epwe ettipisi i. 2Iwe, ewe SAMOL a apasa ngeni Satan, “Ewe SAMOL epwe öpwünguk, Satan! Ewer, ewe SAMOL mi fen filätä Jerusalem epwe öpwünguk! Ifa usun, sap ei mwän a wewe ngeni efóch weesen ekkei emön a cheerawu seni lón ew ekkei?”
3Lón ei ótun, Joshua a üföüf üüf mi limengaw lupwen a üütä fän mesen ewe chón läng. 4Iwe, ewe chón läng a üreni chókewe mi üütä me mwan, “Öüpwe pwilitaló ekkewe üüf mi limengaw seni ätei.”
Mwirin, a säp ngeni Joshua o apasa, “Nengeni, ngang üwa fen angei senuk óm tipis. Iwe, iei üpwe öüföüfa ngenuk üüf mi fö o fich ngeni fansoun chuulap.”
5Mwirin, ngang üwa apasa, “Öüpwe eimweimwätä wón möküran ew akkaw mi limöch.” Iwe, ra isettä ew akkaw mi limöch wón möküren Joshua o öüföüfa ngeni ekkewe üüf mi limöch, nge nöün ewe SAMOL we Chón Läng mi üütä ünükkün.
6Iwe, nöün ewe SAMOL we Chón Läng a ngeni Joshua ei kapasen ölükülük o apasa: 7“Iei meet ewe SAMOL mi Unusen Manaman a apasa: ‘Are en kopwe manaweni manawen älleasochis ngeniei o tilikken le öpwönüwetä minne mi öüchchea ngeni meet ngang üwa ewiisa ngenuk, mwirin, en kopwe nemeni imwei o wiisen tümwünü äi kewe leeni ünükkün imwei, iwe, ngang üpwe ngenuk ew leeni pwe kopwe nóm lón me leiin chókeei mi üttä ikeei.
8“ ‘Kopwe öüseling, en ewe Souasór mi Lap Joshua, en me chiechiom kana souasór mi móót fän mesom, ämi ekkewe mwän öüwa och minen esissil fäniten ekkewe mettóch repwe war: Ngang üpwe awarato neii we chón angang, itan ewe Palan. 9Nengeni, ngang üwa isettiw ewe faaw fän mesen Joshua! A wor füüföw föün maas wón ena eföü chök faaw. Nengeni, ngang üpwe chipweii och mak wón ei faaw,’ ewe SAMOL mi Unusen Manaman a apasa, ‘iwe, ngang üpwe amóieló tipisin ei fönü lón ew chök rän.
10“ ‘Lón ena rän, iteiten emön me emön leiimi epwe kökköörato en me chón órun pwe epwe móót ren fän an irän wain me an irä fiik fän kinamwe,’ ewe SAMOL mi Unusen Manaman a osomänetiw.
Ewe leenien etittin kolt me ekkewe rüofóch irä olif
4 Mwirin, ewe chón läng mi piin kapas ngeniei a liwinsäfälito o föngünieitä, usun nge ngang emön aramas mi möür. 2Iwe, ewe chón läng a eisiniei, “Meet ka küna?”
Nge ngang üwa pölüweni o apasa, “Ngang üwa küna efóch leenien etittin mi för unus seni kolt nge a wor ew sepi mi nóm wón ülün we. A wor fisuw lamp wón ewe leenien etittin, a pwal wor füüfóch paip mi itiwu seni lón ewe sepi, nge efóch me efóch kewe paip a itilong lón ew me ew kewe laam. 3Iwe, üwa pwal küna pwe mi wor rüwofóch irä olif mi üütä ünükkün ewe leenien etittin. Efóch a nóm peliifichin ewe sepi, nge ewe pwal efóch a nóm peliimöngün.”
4Mwirin, üwa eisini ewe chón läng mi kapas ngeniei, “Meet ekkeei, äi samol? Ifa weweer?”
5Nge i a pölüweni o apasa, “Ifa usun, kosap silei meet ekkeei mettóch?” Iwe, ngang üwa pölüweni o apasa, “Apwi, äi samol.”
6Ina pwata, i a apasa ngeniei, “Iei ewe kapas än ewe SAMOL ngeni Zerubbabel: ‘Esap fis óm angang ren pöchökkül, esap pwal fis ren manaman, nge epwe fis ren Ngüni,’ ewe SAMOL mi Unusen Manaman a apasa.
7“Itä kan meet en enan chuuk mi tekia? En kopwe wiliti ew leeni mi sóssónöch me mwen Zerubbabel. I epwe öüüwsäfälietä ewe imwenfel, nge lupwen epwe amasalong ewe ömwüchchülón faaw mi öüchchea lón leenian, ekkewe aramas repwe mweireir o apasa, ‘Kot epwe efeiöchüw! Kot epwe efeiöchüw!’ ”
8Mwirin, än ewe SAMOL kapas a pwal toriei. A apasa:
9“Pöün Zerubbabel a fen popuetä le fótuki lóngólóngun ei imwenfel; iwe, pöün epwe pwal äwesaló. Mwirin, öüpwe silei pwe ewe SAMOL mi Unusen Manaman a tiinieito reemi ämi ekkeei aramas.
10“Pün iö a esiita ewe rän lupwen ewe angang a poputä nge a chök kükkün epwe pwapwa lupwen epwe küna pwe ewe selin äwenewen a nóm lón pöün Zerubbabel?”
Iwe, ewe chón läng a apasa: “Ekkeei fisuw leenien etittin ra eliosunätä ekkewe fisu mesen ewe SAMOL mi nennefätäl wón unusen fönüfan.”
11Mwirin, ngang üwa eisini ewe chón läng, “Meet wewen ekkeei rüwofóch irä olif üwa küna pwe ra nóm peliifichin me peliimöngün ewe leenien etittin?”
12Iwe, ngang üwa pwal eisinisäfäli o apasa, “Meet wewen ekkewe rüwofóch palen irä olif mi umwuum uwaar üwa küna pwe ra nóm ünükkün ekkewe rüwofóch paip mi för seni kolt ewe ia ewe apüra a pwuupwu lón?”
13Iwe, i a pölüweni o apasa, “Ifa usun, kosap silei ika meet wewen ekkeei mettóch?” Nge ngang üwa apasa, “Apwi, äi samol.”
14Ina minne, i a apasa, “Ikkeiir ekkewe rüwömön mwän mi kepit pwe repwe angang ngeni ewe Samolun unusen fönüfan.”
Ewe taropwe mi ääs
5 Iwe, üwa pwal netäsäfäl o üwa küna echö taropwe mi ääs.
2Iwe, ewe chón läng a eisiniei, “Meet ka küna?” Nge ngang üwa pölüweni o apasa, “Ngang üwa küna echö taropwe mi ääs, üküükün langattaman rüwe mwalü, nge üküükün chöölapan engol mwalü.”
3Mwirin, ewe chón läng a apasa ngeniei, “A mak lón ei taropwe ewe önümamaw epwe feittiw wón unusen ewe fönü; pün meet a makketiw wón epeek ewe taropwe, a apasa pwe iteiten emön me emön chón soolä epwe kääriló seni ewe fönü, nge meet a makketiw wón pwal epeek ewe taropwe, a apasa pwe iteiten emön me emön mi ökköpölmwääl epwe kääriló seni ewe fönü. 4Pün ewe SAMOL mi Unusen Manaman a osomänetiw, ‘Ngang üpwe tiinato ewe önümamaw pwe epwe tolong lón imwen ewe chón soolä, pwal lón imwen ewe mi föüni itei le ökköpölmwääl. Iwe, ewe önümamaw epwe nómwóló lón ewe imw tori epwe unusen taaló - ekkewe mwo föün me irän ewe imw nge repwe taaló.
Ewe fefin lón ew chüük
5Mwirin, ewe chón läng mi piin kapas ngeniei a feitto o apasa ngeniei, “Kopwe netä o nengeni meet ei mettóch a pwä me fän läng.”
6Iwe, ngang üwa eisini, “Meet ei?” Nge i a pölüweni o apasa, “Iei ew chüük fäniten öüküük föün wiit.” Iwe, a pwal sópweló le apasa, “Ei chüük a ur ren tipisin ekkewe aramas leemelen ewe fönü.”
7Mwirin, öppüngün ewe chüük we mi för seni ew talent piloom a sukkutä, nge a wor emön fefin mi mómmóótöchüló lón ewe chüük. 8Iwe, ewe chón läng a apasa, “Ewe fefin a esissilätä föfföringaw.” Iwe, ewe chón läng a tiinsäfälielong ewe fefin lón ewe chüük o a öppüngätiw wón ewe chüük öppüngün we mi för seni ew talent piloom.
9Mwirin, ngang üwa netä o üwa küna rüwömön fefin ra ääsito reem fiti pööpön ewe äsäpwääl. A wor pöükässiir mi wewe ngeni pöükässin ewe mächchäng itan örö. Ra ääsito o ekiietä ewe chüük o ässiló fän lón äsäpwääl.
10Mwirin, ngang üwa eisini ewe chón läng mi piin kapas ngeniei, “Ia ra uwealó ie ewe chüük?”
11Iwe, i a pölüweni o apasa, “Ra uwealó ngeni ewe fönü Shinar pwe repwe öüüwetä ew imwenfel fänitan. Lupwen ewe imwenfel epwe mollotä, repwe isenätiw ewe chüük ikenan lón pwisin leenian.”
Ekkewe fófóch wóóken
6 Iwe, üwa pwal netäsäfäl o üwa küna fófóch wóóken ra feitto seni lefiilen ruu chuuk, nge ekkewe chuuk ra chuuk piraas. 2Iwe, ewe äefóchun wóóken a wor óris mi par ra lukii, ewe örüwofóchun wóóken a wor óris mi chól ra lukii, 3ewe öülüfóchun wóóken a wor óris mi pwech ra lukii, nge ewe afófóchun wóóken a wor óris mi tiketik ra lukii. Iir meinisin ra fókkun pöchökkül. 4Iwe, üwa eisini ewe chón läng mi piin kapas ngeniei, “Meet wewen ekkeei wóóken, äi samol?”
5Nge ewe chón läng a pölüweni o apasa ngeniei, “Ikkeiir ekkewe fömön ngüün seni läng mi ükküütä fän mesen ewe Samolun unusen fönüfan. Ra toowu pwe repwe föri an angang. 6Ewe efóch wóóken ekkewe óris mi chól ra lukii a feilló ngeni ewe fönü efeng, ewe efóch wóóken ekkewe óris mi pwech ra lukii a feilló ngeni lotow, nge ewe efóch ekkewe óris mi tiketik ra lukii a feilló ngeni öör.
7Lupwen ekkewe óris mi fókkun pöchökkül ra feiliwu, ra fókkun pächchew ar repwe feilló pwe repwe fätälfeil o sacheei leemelen fönüfan. Iwe, ewe SAMOL a üreniir, “Öüpwe feilló raunei leemelen fönüfan.” Ina minne ra mwittir feilló raunei leemelen fönüfan.
8Mwirin, ewe SAMOL a kökkööriei o apasa, “Nengeni, ekkewe óris mi feilló ngeni ewe fönüwen efeng ra ächääi än Ngüni soong me ikenan.”
Epa mwärämwär fäniten Joshua
9Iwe, än ewe SAMOL kapas a pwal toriei o apasa: 10“Kopwe angei ewe silifer me kolt seni Heldai, Tobijah me Jedaiah ina repwe feitto seni ekkewe chón Sus mi ooló lón Babylon. Lupwen repwe war, kopwe feilló chuuriir me lón imwen Josiah nöün Zefaniah we mwän. 11Iwe, kopwe angei ewe silifer me ewe kolt o föri epa mwärämwär. Mwirin, kopwe isenätä ewe mwärämwär wón möküren ewe souasór mi lap Joshua nöün Jozadak we mwän. 12Iwe, kopwe üreni pwe iei meet ngang ewe SAMOL mi Unusen Manaman üwa apasa: ‘Nengeni, iei i ewe mwän itan Ewe Palan. I epwe öpwükawu palan seni lón leenian pwe epwe öüüwsäfälietä än ewe SAMOL we imwenfel. 13Ewer, i ewe epwe öüüwsäfälietä än ewe SAMOL we imwenfel. Iwe, i epwe ääni lingen emön king o epwe móót wón an leenien móótun king pwe epwe nemenem. Nge i epwe pwal föri wiisen emön souasór seni an leenien móótun nemenem. Iwe, epwe wor tipeew fengen lefiilen ekkewe ruu wiis.’ 14Iwe, repwe uwalong ewe mwärämwär lón än ewe SAMOL we imwenfel pwe epwe och pisekin ächchem fäniten Heldai, Tobijah, Jedaiah me Josiah nöün Zefaniah we mwän. Ei mwärämwär epwe ächchema ngeniir pwe än ewe king manaman a feitto seni Kot. 15Iwe, chómmóng aramas repwe feitto seni ekkewe fönü mi toowaw pwe repwe älillis le öüüwetä än ewe SAMOL we imwenfel, iwe ämi öüpwe silei pwe mi enlet pwe ewe SAMOL mi Unusen Manaman a tiineito reemi. Ekkeei mettóch meinisin repwe fis are öüpwe tilikken le älleasochisi ewe SAMOL ämi we Kot.”
Pwüng me Tong ra mwirinnö seni öchüün
7 Iwe, lón örüwänüwen ierin mwüün King Darius, än ewe SAMOL kapas a pwal tori Zekariah lón ewe örüwänüwen ränin ewe ettiuwen maram, iei ewe maram Kislev. 2Lón ena fansoun, ekkewe aramasen Bethel ra tiinaló Sharezer me Rekem-Melek, fiti fengen me ekkóch mwän pwe repwe tungór ngeni ewe SAMOL pwe epwe ümöümöch ngeniir. 3Ra feilló ren ekkewe souasór lón imwen ewe SAMOL mi Unusen me ekkewe soufós o eisiniir ei kapas eiis, “Lón chómmóng ier, äm aia pwärätä äm letipeta fäniten taalón ewe imwenfel. Lón ewe elimuen maram iteiten ier äm aia awora ew fansoun mi öüchchea fäniten äm aipwe kechiw me öchüün. Ifa usun, äm aipwe chüen sópweló le föri ei?”
4Mwirin, ewe SAMOL mi Unusen Manaman a kapas ngeniei o apasa, 5“Kopwe feilló o üreni ekkewe souasór me ekkewe aramas meinisin mi nóm lón ei fönü ei poraus: ‘Lupwen öüwa öchüün me letipeta lón ewe elimuwen maram me ewe efisuwen maram lón ekkewe fiik ier, ifa usun, ämi öüwa wesewesen öchüün fänitei? 6Pwal lupwen öüwa mwöngö o wün lón ämi kewe fansoun chuulap mi pin, ifa usun, öüwa pwal föri fänitei? Apwi, ämi öüwa föri pwisin fänitemi chök. 7Ifa usun, sap ikkeei ekkewe kapas ewe SAMOL a esile ngeni kemi meren nöün kewe akkomwen soufós melóóm, lupwen Jerusalem a wöw o uren aramas, a pwal chüen wor chómmóng aramas ra nóm lón ekkewe telinimw mi nóm pwellin ünükkün, pwal lón ewe fönü Nekev me lón ewe fönü lotow mi maasies?’ ”
8Iwe, ewe SAMOL a pwal kapas säfäl ngeni Zekariah pwe epwe üreni ekkewe aramas: 9“Iei meet ewe SAMOL mi Unusen Manaman a apasa: ‘Öüpwe ääni enletin öpwüngüwen, öüpwe kirekiröch o ümöümöch fengen lefiilemi. 10Öüsap eriäfföwü ekkewe fefin mi määseniir pwülüweer ika ekkewe mi määsen, pwal ekkewe chón ekis me ekkewe chón wöwingaw. Öüsap mwo nge ekieki lón letipemi pwe öüpwe föri föfför mi ngaw fengen lefiilemi!’
11“Nge iir resap mochen öüseling; lón ar üleförea, ra kulluw sökürüür o pineló selinger pwe resap tongeni rongorong. 12Iir ra fókkun öpöchökkülaló letiper pwe a pöchökkül usun föüchól o resap mochen öüseling ngeni ewe öllük ika ngeni ekkewe kapas ewe SAMOL mi Unusen Manaman a tiin ngeni Ngünün we, nge ekkewe akkomwen soufós ra esile ngeni ekkewe aramas. Iei popun ewe SAMOL mi Unusen Manaman a fókkun soong.
13“ ‘Lupwen ngang üwa kökköriir, iir resap mochen öüseling; ina minne, lupwen iir repwe kööriei, ngang üsap mochen öüseling,’ ewe SAMOL mi Unusen Manaman a apasa. 14‘Ngang üwa atoropasafeiliir ren ew ewiniär leiin ekkewe mwüü ia iir ra chón ekis ie. Iwe, fönüwer a chök nóm nge a pöön me mwirin ar ra toowu seni, esap wor emön aramas epwe tongeni pwereló lón. Iei usun ra föri pwe ewe fönü mi mwirinnö a wiliti ew fönü mi pöönüló.”
Ewe SAMOL a pwon pwe epwe efeiöchü Jerusalem
8 Mwirin, än ewe SAMOL mi Unusen Manaman kapas a pwal torisäfäliei.
2Iwe, iei meet ewe SAMOL mi Unusen Manaman a apasa: “Ngang üwa fókkun luukommóng fäniten Zion; ngang üwa fókkun soong pwokiten äi luukommóng wón.”
3Iwe, iei meet ewe SAMOL a apasa: “Ngang üpwe liwinsäfäl ngeni Zion o imweimw lón Jerusalem. Mwirin, Jerusalem epwe iteni ewe Telinimw mi Ölükülük, nge chuki we ngang ewe SAMOL mi Unusen Manaman epwe iteni ewe Chuuk mi Pin.”
4Iei meet ewe SAMOL mi Unusen Manaman a apasa: “Epwe pwal fis säfäl pwe epwe wor chinlap mwän me chinlap fefin repwe fätäl lón ekkewe alen Jerusalem fän wókuur wókun chinlap o repwe móót fengen lón ekkewe leenien emwiicheich lón ewe telinimw. 5Iwe, ekkewe alen ewe telinimw repwe ur ren äät me nengngin repwe kukkunow ikenan.”
6Iei meet ewe SAMOL mi Unusen Manaman a apasa: “Meinisin ei epwe usun nge mi weires ngeni ekkewe aramas mi chüen manaw lón ei fansoun me leiin neii kewe aramas. Nge ifa usun, öüwa ekieki pwe epwe pwal weires ngeniei?” ewe SAMOL mi Unusen Manaman a osomänetiw.
7Iei meet ewe SAMOL mi Unusen Manaman a apasa: “Öüpwe fókkun silei pwe ngang üpwe amanawa neii kewe aramas seni ekkewe fönüwen öötiw me lotow. 8Ngang üpwe eliwinisäfäliireto pwe repwe imweimw lón Jerusalem fän kinamwe; iir repwe neii aramas, nge ngang üpwe nemeniir fän ölükülük me pwüng pwe ngang ar Kot.”
9Iei meet ewe SAMOL mi Unusen Manaman a apasa: “Öüpwe rongorong ekkeei kapas, ‘Öüpwe öpöchökküla pöümi pwe ewe angangen köüsäfälin ewe imwenfel epwe wes.’ Iei pwal meet ekkewe soufós ra apasa, iir ekkewe mi nóm lupwen lóngólóngun än ewe SAMOL mi Unusen Manaman we imwenfel a förütä. 10Me mwen ewe angang wón ewe imwenfel a poputä, esap wor möön än emön aramas angang ika än emön maan angang. Esap pwal wor emön aramas a tongeni föri an angang fän kinamwe pwokiten chón opwutan, pwokiten ngang üwa föri pwe emön me emön aramas epwe üüngeni en me chón órun. 11Nge iei, ngang üsap föri ngeni ekkeei lussun aramas mi chüen manaw usun minne ngang üwa föri me lóóm,” ewe SAMOL mi Unusen Manaman a osomänetiw.
12“Ekkewe pwikil repwe määröch, ekkewe irän wain repwe uwa, ewe pwül epwe ämäärätä minne a fót wón, nge läng epwe öpüngätiw üüt. Ngang üpwe ngeni ekkewe lussun aramas mi chüen manaw ekkeei mettóch meinisin pwe iir repwe älemiwiri. 13Usun chök ämi, chón Judah me chón Israel, öüwa fen och minen óttek me leiin chón ekkewe mwüü, iei usun ngang üpwe amanawa kemi o ämi öüpwe och feiöch. Iei minne, öüsap nuokkus, nge öüpwe öpöchökküla pöümi o sópweló ämi angangen öüüwsäfälietä ewe imwenfel.”
14Pün iei meet ewe SAMOL mi Unusen Manaman a apasa: “Usun chök äi üwa öpwüngaló lón äi ekiek pwe üpwe awarato feiengaw wóómi nge üsap ääni tong lupwen ämi kewe leewo ra asoongaei,” ewe SAMOL mi Unusen Manaman a apasa, 15iwe iei ngang üwa öpwüngaló lón äi ekiek pwe üpwe föri minne mi mwirinnö ngeni Jerusalem me Judah. Iei minne, öüsap nuokkus. 16Nge ikkeei ekkewe mettóch ämi öüpwe föri: Öüpwe kapas enlet fengen lefiilemi o atoowu pwüngün köpwüng mi let o pwüngüöch lón ämi köpwüng; 17öüsap ääni rawangaw ren ämi öüpwe efeiengawa fengeni kemi lefiilemi, öüsap efich ämi öüpwe ökköpölmwääl. Püng ngang üwa opwut ekkeei föfför meinisin,” ewe SAMOL a osomänetiw.
18Än ewe SAMOL mi Unusen Manaman kapas a pwal torisäfäliei.
19Iwe, iei meet ewe SAMOL mi Unusen Manaman a apasa: “Ekkewe ränin öchüün me fansoun letipeta ämi öüwa ääni lón ewe örüwänüwen maram, elimuwen maram, efisuwen maram me äengolun maram repwe wiliti fansoun pwapwa me meseik, pwal ränin chuulap mi apwaapwa fäniten chón Judah. Iei minne öüpwe sani let me kinamwe.”
20Iei meet ewe SAMOL mi Unusen Manaman a apasa: “Epwe war ew fansoun pwe chómmóng aramas seni ekkewe mwüü me aramasen chómmóng telinimw seni unusen fönüfan repwe sääito ngeni Jerusalem, 21iwe, ekkewe aramas seni ew telinimw repwe feilló ren chón pwal ew telinimw o apasa, ‘Öüsipwe feilló Jerusalem iei chök pwe sipwe tungórei ewe SAMOL o küttä ewe SAMOL mi Unusen Manaman pwe epwe efeiöchü kich o ümöümöch ngeni kich. Pwisin äm aipwe feilló.’ 22Iwe, chómmóng mwiichen aramas me mwüü mi pöchökkül repwe feitto Jerusalem pwe repwe kütta ewe SAMOL mi Unusen Manaman pwe repwe tungór ngeni pwe epwe ümöümöch ngeniir.”
23Iei meet ewe SAMOL mi Unusen Manaman a apasa: “Lón ekkana rän, engol mwän seni ekkewe aramas mi sókkóló ar kapas me ekkewe mwüü repwe kömwöchünnüküló leppwülün üfen emön chón Sus o apasa, ‘Kose mochen kopwe mwüüt ngeni keem pwe aipwe fitikemi, pwokiten äm aia rong pwe Kot a nóm reemi.’ ”
Kot a öpwüngü ekkewe chón opwuten Israel
9 Ew kapasen oosuni fäniten köpwüng:
Iei än ewe SAMOL kapasen köpwüng ngeni ewe fönü Hadrak me ewe telinimw Damaskos, pün mesen aramas meinisin pwal mesen chón ekkewe einangen Israel meinisin ra netä ngeni ewe SAMOL pwe epwe älisiir.
2Ei kapasen köpwüng a pwal wenengeni ewe telinimw Hamath mi arap ngeni Damaskos. Ei kapasen köpwüng a wenengeni chón Tayer me chón Sidon, inamwo ika iir ra fókkun tipächchem me silelap.
3Tayer a öüüwetä fänitan ew tiit mi pöchökkül. Ekkewe aramasen Tayer ra ioinifengeni chómmóng silifer iei minne a usun chök pwül mworomwor nge kolt a usun chök pwakaken lón ekkewe aal.
4Nge ewe SAMOL epwe angei seni Tayer pisekin meinisin. Epwe ataeló an nemenem wón ewe mataw, nge ewe telinimw epwe karaló ren ekkei.
5Lupwen aramasen ewe telinimw Ashkelon repwe küna pwe Tayer a taaló, repwe uren nuokkus; ekkewe aramasen Kaza repwe chechchech ren ar nuokkus mi lapalaap, pwal än ekkewe aramasen Ekron apilüköch epwe taaló lupwen repwe küna pwe ei a fis. Kaza epwe ooló o an we king epwe mäló, nge Ashkelon epwe pöönüló.
6Chón ekis repwe asóói ewe telinimw Ashdod. Iei usun äi üpwe ataeló än chón Filistia lamalamtekia.
7Resap chüen ochooch fituk mi chüen chök wor chcha lón ika mwöngö sakkopaaten mwöngö mi enniopwut mereei. Ekkewe chón Filistia meinisin mi chüen manaw repwe fel ngeniei o pacholong lón tettelin neii aramas. Iwe, repwe usun chök nge pwal iir ew eterenges mi fö lón Judah. Iwe, ekkewe aramasen Filistia mi nóm lón Ekron repwe chuungeni neii kewe aramas, usun chök ekkewe chón Jebus.
8Nge ngang üpwe pwisin mammasa äi we imwenfel o tümwünü seni ekkewe mwiichen sounfiu än ekkewe chón opwut. Esap chüen wor chón ekis repwe eriäfföwü neii kewe aramas o tolong lón fönüwer, pün pwisin ngang üwa mammaser.”
Än Zion we King epwe war
9Ämi aramasen Zion, öüpwe pwapwa chapwüür. Ämi aramasen Jerusalem, öüpwe akkapwas fän pwapwa. Nengeni ämi we king a feitto reemi, i a pwüng o pwora, a tipetekisón o waawa emön dongki, wesewesen emön liäliföön dongki, nöün emön maanün angang.
10Iwe, ngang üpwe ömwökütaló ekkewe wóókenin maun meinisin seni Efraim me ekkewe órisin maun seni Jerusalem, iwe, ngang üpwe ataeló ekkewe pisekin maun meinisin ra aea lón maun. Ämi we king epwe awora kapasen kinamwe ngeni chón ekkewe mwüü. Öüküükün chöölapen an nemenem epwe seni mataw tori mataw, pwal seni ewe Chaanpwuupwu Eufreitis tori ekkewe leesópwun fönüfan.
11Nge pwal fänitom en Jerusalem, pwokiten äi we pwon ngenuk mi ölükülük ren chcha, ngang üpwe angasaló noum kewe aramas mi föötek lón ew pwaang esap wor kólik lón, pwe repwe toowu seni ar ooló.
12Öüpwe liwinsäfäl ngeni ämi kewe leeni mi pöchökkül tittin, ämi ekkewe chón ooló mi witiwit fän ämi apilüköch. Ngang üwa pwon ngeni kemi lón ei rän pwe ngang üpwe liwinisäfäli ngeni kemi ruu feiöch fäniten ew me ew ämi kewe feiengaw.
13Judah epwe neii esefich nge Efraim epwe neii föün esefich. Jerusalem epwe neii ketilas. Ngang üpwe ächewechewa neii ketilas ngeni ekkewe chón Kriis usun emön sounfiu mi pwora.
Ewe SAMOL epwe pwä
14Mwirin, ewe SAMOL epwe pwääto ngeni nöün kewe aramas. Iwe, i epwe esefichaló nöün kewe föün esefich usun inefi. Ewe SAMOL KOT epwe ettiki ewe rappwa. I epwe maun ngeni chón opwutan kana usun ew mölümölün mi feitto seni ewe fönüpöön mi nóm öör.
15Iwe, ewe SAMOL mi Unusen Manaman epwe tümwünü nöün kewe aramas usun ew leenien eppetin feiengaw lón maun. Iir repwe okkufu o niieló chón opwuter kana ren föün öünüün. Repwe arükak lón maun, usun chök nge iir mi sakaw ren wain o repwe niieló chón opwuter kana. Repwe ureló ren chcha usun ew sepi mi ur ren chcha, repwe chöchchön ren chcha usun lepwokuukun ewe róngen asór.
16Lón ena fansoun, ewe SAMOL ar we Kot epwe amanawa nöün kewe aramas, usun emön chón masen siip a amanawa nöün pwiin siip seni feiengaw. Iwe, repwe molupolup me lón fönüwan, usun molupolupen faaw öüchchea me wón epa mwärämwär.
17Epwe le ifa me amwaraaren me lingen mettóch meinisin! Ekkewe ölüwöl repwe feffeitä ren chómmóngun föün wiit nge ekkewe föpwül repwe feffeitä ren wain mi fö.
Kot epwe äfälli chón Judah
10Öüpwe tungórei ewe SAMOL pwe epwe öpüngätiw üüt lón fansoun leres; pün ewe SAMOL i ewe mi föri ekkewe kuchun mölümöl. I a fangoto püngün üüt ngeni aramas pwal ngeni iteiten irän lón ekkewe tännipi.
2Ekkewe uluulun önüün leimw ra awora öüröür mi mwääl, ekkewe soupwe ra oosuni minne mi chofona, nge ekkewe chón äwewei tan ra ääni kapasen echipechip mi pöön. Iei minne, neii kewe aramas ra chök mwälechfeil usun ekkana siip mi mwälecheló pün esap wor ar chón mas epwe tümwünür o emmweniir.
3Ewe SAMOL a apasa, “Ngang üwa fókkun soong ngeni nöümi kewe chón masen siip, ngang üpwe öpwüngü ekkeei souemmwen; pün ngang ewe SAMOL mi Unusen Mananam üwa war pwe üpwe tümwünü neii pwiin siip iir ekkewe chón leimwen Judah. Ngang üpwe föri pwe repwe pöchökkül o ling usun emön órisin maun lón maun.
4Ewe föün lepwokuuku epwe feitto seni Judah, ewe chüüfölün imw mangaku epwe feitto seni i, ewe esefichin maun epwe feitto seni i, ekkewe sounemenem meinisin repwe feitto seni i.
5Iir meinisin repwe wewe ngeni sounfiu mi pwora lón maun, repwe pwuurätiw fän pachapacher chón opwuter kana lón pwakaken ekkewe aal. Repwe okkufu chón opwuter kana mi waawa óris, pwokiten ewe SAMOL a nóm reer lupwen ra maun.
6Ngang üpwe öpöchökküla chón leimwen Judah o amanawa chón leimwen Josef. Ngang üpwe eliwinisäfälir seni ar ooló fän kinamwe o echipeer, pwokiten ngang üwa tongeer. Repwe usun chök nge ngang usap pöütiireló, pün ngang ewe SAMOL ar Kot, ngang üpwe rongorong ngeni ar siö.
7Mwirin, chón ewe einangen Efraim repwe usun chök sounfiu mi pwora. Leluker epwe pwapwa usun chök lupwen ra wün wain. Nöüür kana repwe küna ei o repwe uren pwapwa, leluker epwe ingemwareitiei ngang ewe SAMOL.
8Lupwen ngang üpwe okkouwäriir, repwe mwittir feitto, pün ngang üwa wesewesen amanawer. Iir repwe chómmóngoló usun me mwan.
9Inamwo ika ngang üwa atoropaser leiin chón ekkewe mwüü, nge iir repwe chechchemeniei me lón ekkewe fönü mi toowaw. Iir me nöür kewe repwe manaw o repwe liwinsäfäl ngeni Israel iei poputän fönüwer.
10Ngang üpwe emmwenisäfälireto seni ewe fönü Egypt o uweiireto seni Assyria. Iwe, ngang üpwe atolongasäfälir lón Kilead me Lebanon, tori esap chüen naaf leeni fäniter meinisin.
11Ngang ewe SAMOL üpwe ölüwai nóónón ewe mataw pwe ekkewe aramas repwe pwereló lón ewe matawen riäfföü; pün nóónón lón ewe mataw epwe köüüló, löölön lón ewe chaanpwuupwu Nail epwe pwasatä. Üpwe ataeló än Assyria lamalamtekia o äwesi än Egypt nemenem.
12Ngang ewe SAMOL üpwe föri pwe neii kewe aramas repwe pöchökkül lón äi manaman. Iwe, repwe feilló ekis meinisin ia ra mochen fän äi pöchökkülen nemenem,” ewe SAMOL a osomänetiw.
Israel epwe pöönüló
11En Lebanon, kopwe suuki asamom kana, pwe ewe ekkei epwe kenaló óm kewe irä sedar.
2Ämi ekkewe irä saipres, öüpwe ngüüngüres, pün ewe irä sedar a turuló, ekkewe irä mi pöchökkül ra taaló. Ämi ekkewe irä ook lón Bashan öüpwe ngüüngüres, pün ewe wöllap mi malüül a pöküpökütiw.
3Öüpwe öüseling ngeni än ekkewe chón masen siip ngüüngüres, pün ar kewe leenien fetil mi mwirinnö fäniten nöüür kewe maan ra taaló. Öüpwe öüseling ngeni wörüwörün ekkewe laion, pün ewe wöllapen Jordan a taaló!
Rüömön Chónmasen siip
4Iei meet ewe SAMOL äi we Kot a apasa: “Kopwe feilló o tümwünü ekkewe pwiin siip mi ammol ngeni ar repwe ninniiló. 5Ekkewe chón mööniir repwe chök niireló, nge resap köpwüng ren. Nge chókewe mi amöömöló ekkewe siip repwe apasa, ‘Öüsipwe mwareiti ewe SAMOL, pün sia pisekisekiló.’ Pwisin ekkewe mwo chón masen siip nge resap ächchika nöüür kewe siip. 6Iwe, epwe chök pwal iei usun, pün ngang üsap chüen tongei ekkewe aramas mi nóm lón ei fönü,” ewe SAMOL a osomänetiw. “Nengeni, ngang üpwe mwüütätä pwe emön me emön aramas epwe nóm fän en me än chón órun nemenem, pwal fän än ar king nemenem. Iwe, ngang üpwe mwüüt ngeniir pwe repwe ataeló ewe fönü, nge ngang üsap chimanüw emön seni lepöüür.”
7Iwe, ngang üwa wiliti ewe chón masen ewe pwiin siip mi ammol ngeni ar repwe ninniiló, wesewesen ewe pwiin siip mi riäfföü. Mwirin, ngang üwa angei rüwofóch wóók wókun chón masen siip. Efóch üwa eita ngeni Ümöümöch, nge ewe efóch üwa eita ngeni Fööföfengen. Iwe, ngang üwa fóóleni ewe pwiin siip. 8Iwe, lón ew chök maram ngang üwa niieló ekkewe ülümön chón masen siip.
Ewe pwiin siip ra opwut ngang, nge ngang üsap chüen tongeni engngiló ngeniir. 9Iwe, ngang üwa apasa ngeni ewe pwiin siip, “Ngang üsap chüen nöümi chón mas. Üpwe chök likitaló ekkana repwe mäló pwe repwe mäló. Üpwe chök likitaló ekkana repwe ninniiló pwe repwe ninniiló. Nge ekkana lussun mi chüen manaw repwe pwisin ocheifengeni fituker.”
10Mwirin, ngang üwa angei wóki we itan Ümöümöch o kupii. Ren ei, ngang üwa ataeló pöchökkülen ewe pwon ngang üwa ääni ngeni chón ekkewe mwüü meinisin. 11Iwe, lón ewe ränin a taaló pöchökkülen ewe pwon. Iwe, chókewe mi kamö me amöömö siip mi nennengeniei ra silei pwe iei än ewe SAMOL kapas.
12Mwirin, ngang üwa üreniir, “Are öüwa mochen, iwe, öüpwe ngeniei liwini; ese lifilifil ika meet öüwa ekieki pwe ina öüchcheai. Nge are öüsap mochen, iwe, öüpwe chök anómwu.” Ina pwata ra älleanawu ngeniei liwini, üküükün iliik föün mooni silifer.
13Iwe, ewe SAMOL a apasa ngeniei, “Kopwe móneelong ewe silifer ren ewe chón för sepi seni pwül.” Iei ewe liiwin ra ekieki pwe a fókkun mwirinnö pwe ina üküükün öüchcheai. Iei minne, ngang üwa angei ekkewe iliik föün mooni silifer o móneerelong ren ewe chón för sepi seni pwül lón imwen ewe SAMOL we.
14Mwirin, ngang üwa kupii örüwofóchun wóki we itan Fööföfengen. Ngang üwa föri ei pwe epwe pwääló pwe ewe fööföfengen lefiilen Judah me Israel a taaló.
15Mwirin, ewe SAMOL a apasa ngeniei, “Kopwe angei ekkewe pisek emön chón masen siip mi umwes a pippisek. 16Pün nengeni, pwe ngang üpwe ngeni chón ei mwüü emön chón masen siip mi fö esap tümwünü ekkewe siip mi nóm lón feiengawen mäló. I esap tongeni kütta ekkewe mi toropasfeil, esap föri minne ekkewe mi feiengaw repwe chikarsäfäl ren, esap pwal amwöngöni ekkewe lussun mi chüen manaw. Iwe, i epwe fen ocheei fituken ekkewe mi öümanaw nge ükkün pachapacheer chök epwe likiti.
17“Feiengawen ei chón masen siip mi lamwotongaw, mi likitaló neii pwiin siip. Amwo itä ketilas epwe pöküw pöün me peliifichin mesan! Amwo itä pöün epwe fókkun pwasaló, nge peliifichin mesan epwe unusen chuunoló!”
Ekkewe chón opwuten Jerusalem repwe rosoló
12Ew kapasen oosuni: Iei än ewe SAMOL kapas fänäsengesin Israel.
Ewe SAMOL ewe mi emeresaló ekkewe läng, ewe mi föri lóngólóngun fönüfan, pwal ewe mi ouluulu ewe ngünün aramas me lón aramas, a apasa: 2“Ngang üpwe föri pwe Jerusalem epwe wewe ngeni ew kapen wain mi efisätä än chón ekkewe mwüü mi nóm ünükkün repwe taroporopfeil. Chón ekkewe mwüü repwe feitto o pwellieló Judah fän ar pisekin maun, pwal ina chök usun ren Jerusalem. 3Nge lón ena fansoun, lupwen chón ekkewe mwüün fönüfan meinisin repwe mwuufengen pwe repwe maun ngeni Jerusalem, ngang üpwe föri pwe Jerusalem epwe wewe ngeni eföw faaw mi fókkun chou esap tongeni mwöküt ren chón ekkewe mwüü meinisin. Chókewe meinisin mi sótuni ar repwe ömwökütü ewe faaw, repwe pwisin efeiengawer. 4Lón ena fansoun, ngang üpwe eniwokkusu nöüür kewe óris meinisin pwe repwe rüükö. Chókewe mi waawa ekkewe óris repwe umwesiló,” ewe SAMOL a osomänetiw. “Ngang üpwe afóta mesei wón ekkewe chón Judah o mammasafichiir, nge ngang üpwe ochunna mesen ekkewe óris meinisin nöün chón ekkewe mwüü. 5Mwirin, ekkewe souemmwenin Judah repwe pwisin öpöchökkülätä letiper o apasa, ‘Ekkewe aramasen Jerusalem ra pöchökkül, pwokiten ewe SAMOL mi Unusen Manaman i ar Kot.’
6“Lón ena fansoun, ngang üpwe föri pwe ekkewe souemmwenin Judah repwe wewe ngeni ew ekkei leiin och ioien mwüüch, repwe wewe ngeni efóch tööl mi nget me leiin pinükün wiit. Repwe arosaló chón ekkewe mwüü meinisin mi nóm pwellin ünükküür, nge chón Jerusalem repwe imweimwsäfäl lón pwisin leenier me lón Jerusalem fän kinamwe.
7“Iwe, ngang ewe SAMOL üpwe ewilla ekkewe aramasen Judah akkomw me mwen ekkewe aramasen Jerusalem, pün ekkewe aramas mi nóm lón Jerusalem me ekkewe mwirimwirin David resap tongeni eingeing pwe iir ra mwirinnö lap seni ekkewe pwal ekkóch aramas mi nóm lón Judah. 8Nge lón ena fansoun ngang ewe SAMOL üpwe peni ekkewe aramas lón Jerusalem, pwe chókewe mi fókkun apwangapwang me leiir repwe pöchökkül usun chök David. Iwe, ekkewe mwirimwirin David repwe emmweniir usun chök Kot, usun chök nöün ewe SAMOL chón läng mi akkomw mweer. 9Pün lón ena fansoun, ngang üpwe arosaló chón ekkewe mwüü meinisin mi maun ngeni Jerusalem.
Ngüüngüres fäniten ewe emön iir ra posuw
10“Iwe, ngang üpwe niinätiw wón ekkewe mwirimwirin David me ekkewe chón Jerusalem emön ngünün ümöümöch me ngünün iótek. Iwe, repwe nennengeniei ngang ewe emön iir ra posuw o repwe ngüüngüres ren ar letipeta, usun emön mi ngüüngüres fäniten mälón nöün älemön, repwe kechiwengaw usun emön mi letipeta fäniten mälón emön nöün mwännichi. 11Lón ena fansoun ewe letipeta me ngüüngüres lón Jerusalem epwe fókkun lapalaap, usun ewe ngüüngüres mi fis lón Hadad Rimmon me lón ewe maasiesin Mekiddo. 12Ewe fönü epwe uren ngüüngüres, pün ew me ew ekkewe eterenges repwe en me ngüüngüres wón en me an. Ekkewe mwän seni familien mwirimwirin David repwe ngüüngüres wón ar, nge pwülüwer kewe wón ar. Ekkewe mwän seni familien mwirimwirin Nathan repwe ngüüngüres wón ar, nge pwülüwer kewe wón ar. 13Ekewe mwän seni familien mwirimwirin Levi repwe ngüüngüres wón ar, nge pwülüwer kewe wón ar. Ekkewe mwän seni familien mwirimwirin Shimei repwe ngüüngüres wón ar, nge pwülüwer kewe wón ar. 14Pwal ekkewe mwän seni ekkewe lussun eterenges meinisin repwe ngüüngüres wón ar, nge pwülüwer kewe pwal wón ar.
Limelim seni tipis
13“Iwe, lón ena fansoun, epwe wor ew pwuachchen kólik mi fö epwe suuk fäniten ekkewe mwirimwirin David me ekkewe pwal ekkóch aramas mi nóm lón Jerusalem. Ewe pwuchchen kólik epwe fäniten an epwe limetaló ar tipis me ar limengaw.
2“Lón ena fansoun, ngang üpwe ääraló iten ekkewe uluulun önümwäl seni ewe fönü, pwe esap chüen wor emön epwe chechchemeniir,” ewe SAMOL mi Unusen Manaman a osomänetiw. “Ngang üpwe pwal ösüüweló seni ewe fönü ekkewe soufós chofona me ekkewe ngüün mi limengaw mi etipetiperetä. 3Iwe, ika emön a chüen sópweló le ääni kapasen oosuni, saman me inan, ekkewe mi nöünätiw ätei, repwe üreni, ‘Kopwe fókkun ninniiló, pwokiten en ka apasätä kapas mi chofona lón iten ewe SAMOL.’ Lupwen i epwe ääni kapasen oosuni, pwisin saman me inan repwe posuw.
4“Lón ena fansoun, emön me emön soufós epwe sääw ren pwisin künäan me an kapasen oosuni. I esap chüen üföüf üfen soufós mi för seni ünöünen maan pwe epwe otupwu aramas ren an kapas chofona i a eita ngeni pwe kapasen oosuni. 5Nge i epwe apasa, ‘Sap ngang emön soufós. Ngang emön chón atake, pün ngang üwa manaw seni angangen lefönü seni chök leölüwöli.’ 6Nge ika emön epwe eisini ätewe, ‘Meet popun ekkeei kinas lón pöum?’ Iwe, ätewe epwe pölüweni o apasa, ‘Ikkeei kinasei me lón imwen chiechiei kewe.’
Ewe chón masen siip epwe ninniiló, ekkewe siip repwe toropasfeil
7“En ketilas, kopwe pwök o fiu ngeni neii chón masen siip, i ewe mwän mi üütä arap ngeniei,” ewe SAMOL mi Unusen Manaman a osomänetiw. “Kopwe niieló ewe chón masen siip, pwe ekkewe siip repwe toropasfeil. Iwe, ngang üpwe öpwüngü ekkewe appanen siip.
8Lón unusen ewe fönü,” ewe SAMOL a osomänetiw, “ruu naülüngätin aramas repwe feiengaw o mäló; nge ew naülüngätin repwe manaw.
9Mwirin, ngang üpwe atolonga ewe ew naülüngätin aramas mi chüen manaw lón ekkein riäfföü; ngang üpwe limetiir usun emön a limeti silifer lón ekkei, ngang üpwe testiniir usun emön a testini kolt lón ekkei. Mwirin, iir repwe kööri itei, nge ngang üpwe pölüweniir. Ngang üpwe apasa, ‘Ämi neii aramas,’ nge iir repwe apasa, ‘Ewe SAMOL i ach Kot.’ ”
Ewe SAMOL epwe war o nemenem
14Nengeni, a arapoto ew ränin än ewe SAMOL öpwüng lupwen ekkewe chón opwutakemi repwe angei pisekimi fän pöchökkül pwe choon wókuur o eineti me fän mesemi.
2Ngang üpwe ochufengeni chón ekkewe mwüü meinisin pwe repwe feitto o maun ngeni Jerusalem; repwe liäpeni ewe telinimw o ataeló ekkewe imw, repwe pwal achoomanawei ekkewe fefin. Esópwun chón ewe telinimw repwe ooló, nge ekkewe lussun aramas repwe chök nómwetiw lón ewe telinimw mi taatakis. 3Mwirin, ewe SAMOL epwe feitto o maun ngeni ekkana mwüü, usun lupwen an fiu lón ew ränin maun me mwan. 4Lón ena fansoun, pecheen repwe pwuutiw wón ewe chukun Olif, mi nóm öötiwen Jerusalem. Iwe, ewe chukun Olif epwe mök fesen lón ruu kinikin seni öötiw tori lotow o epwe efisätä ew leemól mi chöölap. Epeek ewe chuuk epwe mwöküt ngeni efeng, nge ewe epeek epwe mwöküt ngeni öör. 5Nge ämi öüpwe aleni ewe leemól le sü, pün üküükün langattamen ewe leemól mi fis lefiilen chuki we epwe tori Azel. Ewer, öüpwe sü usun ämi kewe leewo ra sü ren ewe chechchechin fönü mi fis lón fansoun mwüün Uzziah ewe kingen Judah. Mwirin, ewe SAMOL äi we Kot epwe war, nge ekkewe chón pin meinisin repwe fiti i.
6Lón ena fansoun, esap wor saram, esap fis patapat ika wor ais. 7Epwe ew rän mi sókkóló, epwe ew rän ewe SAMOL chök a silei. Esap wor rän ika pwiin. Lupwen epwe tori lekkuniólupwin, nge epwe chök saram.
8Lón ena fansoun, ewe kólikin manaw epwe pwuupwufóchófóch seni Jerusalem. Ewe pwuupwu epwe keang fesen, ew kinikin epwe pwuuló ngeni ewe mataw mi nóm peliöötiw, nge ew kinikin epwe pwuuló ngeni ewe mataw mi nóm pelilotow. Ei kólik epwe pwuupwu lón fansoun pwichikkar me lón fansoun patapat.
9Iwe, ewe SAMOL epwe king wón unusen fönüfan. Lón ena fansoun aramas repwe silei o fel ngeni ewe chök emön SAMOL, pwal itan chök ewe it repwe fel ngeni.
10Iwe, unusen ewe fönü ünükkün Jerusalem epwe siiwil ngeni ew fönüpöön, seni Keba tori Rimmon mi nóm öör. Nge unusen ewe telinimw Jerusalem epwe köüüsäfälitä, seni ewe Asamalapen Benjamin tori ewe Äewin Asamalap (iei ewe Asamalapen Pwokuuku), pwal seni ewe Imw mi Tekia än Hananel tori än ewe king kewe leenien üchüüch föün irän wain. 11Aramas repwe mwöküt ngeni ewe telinimw o nóm ikenan. Esap chüen wor chón opwuter repwe feitto pwe repwe niireló. Jerusalem epwe nóm lón kinamwe.
12Nge ewe SAMOL epwe öpwüngü chón ekkewe mwüü mi maun ngeni Jerusalem. I epwe awarato wór och samwaw mi fókkun ömmösök pwe epwe efeiengawer. Epwe iei usun ei samwaw: Ünüchchen ekkewe aramas epwe poputä le kirowló nge iir mi chök chüen manaw. Föün meser repwe kirow me lón leenier, nge chönnaweer repwe kirow me lón aweer. 13Lón ena fansoun, ewe SAMOL epwe awarato wón ekkewe aramas fitikoko me nuokkus wätte. Emön me emön mwän epwe turufi pöün chón órun o repwe pwisin fiu fengen lefiiler. 14Ekkewe mwo pwal chón Judah nge repwe maun ngeni chón Jerusalem. Ei epwe wesewesen fis lupwen ekkewe mwiichen sounfiu seni ekkewe mwüü meinisin repwe pwellieló ewe telinimw Jerusalem. Wöwün chón ekkewe mwüü mi nóm ünükkün repwe ooló, chómmóng kolt, silifer me üüf. 15Ewe samwaw mi ömmösök epwe pwal tolóng lón leenien ekkewe chón opwuter.
Iwe, ei samwaw epwe üri nöüür kewe óris me donkgi upwun wón óris, pwal nöüür kewe kamel me dongki. 16Mwirin, ekkewe lussun mi chüen manaw seni leiin chón ekkewe mwüü meinisin mi maun ngeni Jerusalem repwe feittä iteiten ier pwe repwe fel ngeni ewe King, ewe SAMOL mi Unusen Manaman o repwe fiti ächechchemen ewe Chuulapen Likachooch.
17Nge ika ew mwiichen aramas me wón fönüfan resap mochen feilló Jerusalem pwe repwe fel ngeni ewe King, ewe SAMOL mi Unusen Manaman, esap wor üüt epwe püngütiw wóór. 18Are ekkewe aramasen Egypt resap mochen feittä pwe repwe fiti ewe Chuulapen Likachooch, esap wor üüt epwe püngütiw wóór. Ewe SAMOL epwe awarato wóór ewe mätter i epwe efeiengawa ngeni chón ekkewe mwüü resap mochen repwe feittö pwe repwe fiti ewe Chuulapen Likachooch. 19Epwe iei köpwüngün Egypt me köpwüngün chón ekkewe mwüü meinisin resap mochen feitto Jerusalem pwe repwe fiti ewe Chuulapen Likachooch.
20Lón ena fansoun, epwe chipw ei kapas, “A PIN FÄNITEN EWE SAMOL” wón ekkewe peel fän üwen ekkewe óris. Iwe, ekkewe napeen kuk mi nóm lón imwen ewe SAMOL we repwe pin usun chök ekkewe sepi mi pin mi nóm mwen ewe róngen asór. 21Iwe, iteiten nape lón Jerusalem me Judah repwe pin fäniten ewe SAMOL mi Unusen Manaman. Iwe, epwe mwüümwütä ngeni meinisin mi feitto pwe repwe fel ar repwe aea ekkeei nape le kukuw fituken ar kewe mönün asór. Iwe, lón ena fansoun, esap chüen wor emön chón Kanaan repwe kamö me amöömö mettóch lón imwen ewe SAMOL mi Unusen Manaman.