Zefaniah
1 Iei än ewe SAMOL kapas a tori Zefaniah, nöün Kushi we mwän. Kushi i nöün Kedaliah, Kedaliah i nöün Amariah, nge Amariah i nöün Hezekiah. Ätei a angei ei poraus lupwen än Josiah nöün Amon we mwän a kingen Judah:
Köpwüngün unusen fönüfan lón Ränin ewe SAMOL
2“Ngang üpwe unusen ässaaló mettóch meinisin seni wón fönüfan,” ewe SAMOL a osomänetiw.
3“Ngang üpwe ässaaló aramas me maan; ngang üpwe pwal ässaaló ekkewe maansüüsün fän läng me ekkewe ikenen leset - pwal ekkewe uluulun önümwäl mi popuw pwe ekkewe aramasingaw repwe chepetek. Lupwen ngang üpwe arosaló aramas meinisin mi nóm wón fönüfan,” ewe SAMOL a osomänetiw,
4“ngang üpwe eitiewu peii pwe üpwe öpwüngü chón Judah me chókewe meinisin mi nóm lón Jerusalem. Ngang üpwe ääraló seni ei leeni iteiten lussun minne mi chüen fis seni mwirimwirin ewe angangen fel ngeni ewe önü Baal. Ngang üpwe pwal tölawu iten ekkewe souasór chón lükün mi angang ngeni ewe önü Baal me ekkewe souasór mi fel ngeni önümwäl o nofiti fengeni ar angangen fel ngeni Kot me fel ngeni pwal ekkóch kot -
5ngang üpwe pwal ääraló chókana mi chappetiw wón ungen ekkewe imw pwe repwe fel ngeni akkar me maram me ekkewe füü, üpwe pwal ääraló chókana mi fel ngeniei o föüni itei ngang ewe SAMOL lón ar pwon fän ökköpöl, nge ra pwal föüni iten ewe önü Molek lón ar pwon fän ökköpöl,
6ngang üpwe ääraló chókana mi kulsäfäl seni ar tapweló mwiri ngang ewe SAMOL o resap küttaei ngang ewe SAMOL, resap pwal angei öüröürer mereei.”
7Öüpwe üütä fän mósónósón me fän mesen ewe SAMOL KOT, pün ränin ewe SAMOL a arapoto. Ewe SAMOL a fen amollätä ew asór; iei ewe ränin ninni mi lapalaap fäniten nöün kewe aramas, i a fen pwal filätä ekkewe chón niireló.
8“Mwirin, epwe fis pwe lón ewe ränin ngang ewe SAMOL üpwe ääni ewe asór, ngang üpwe öpwüngü ekkewe meilap me nöün ewe kingen Judah kewe mwän, pwal chókana meinisin mi üföüf üföüfen ekis ren ar ra angei öörünien chón ekis.
9Lón ena ränin, ngang üpwe öpwüngü chókewe mi chóóni än ekkewe chón lükün angangen fel ngeni önümwäl, pwal chókewe mi soolä o nii aramas pwe repwe amasowa imwen ar kewe samol ren minne ra liäpeni.”
10“Lón ena ränin,” ewe SAMOL a osomänetiw, “ew pwuchöör epwe feittä seni ewe Asamen Iik, ew ngüüngüres epwe feittä seni ewe kinikin mi fö me lón ewe telinimw pwal ew chopwun och mettóch mi tä mi chopwummóng epwe feitto seni wón ekkewe chukutekisón.
11Öüpwe ngüüngüres ämi ekkewe mi imweimw lón kinikinin ewe telinimw me fan; iei ewe leenien amöömö me kamö pisek, pün ekkewe chón amöömö meinisin repwe rosoló, meinisin ekkewe mi kiloni silifer repwe äreló.
12Lón ena fansoun, ngang üpwe atööpani Jerusalem fän ew lamp o üpwe öpwüngü ekkewe mwän mi tunaló pün ra lükü pwisin ar tüfich o lükü pwisin iir, iir ra wewe ngeni wain mi nómwottam, ewe sooson epin a pöchökküleló. Iir chókewe mi ekieki lón leluker, ‘Ewe SAMOL esap föri och, ese lifilifil ika och mi mwirinnö ika och mi ngaw.’
13Iei minne, aramas repwe angealó pisekiir fän pöchökkül, repwe pwal ataeló imweer kewe. Inamwo are repwe köüütä imweer, nge resap fókkun nónnóm lóór. Inamwo are repwe fótuki ar tännipin irän wain, nge resap fókkun wün wain seniir.”
14Ewe rän mi lapalaap ränin ewe SAMOL a arapoto - a arapoto o mwittir feitto. Öüpwe rong! Möngüüngün lón ränin ewe SAMOL epwe ew möngüüngün riäfföü; ew rän ekkewe mwän mi pwora repwe kechiw ren ar nuokkus me riäfföü.
15Ena rän, epwe ew ränin än Kot lingeringer - ew ränin riäfföü me nuokkus, ew ränin feiengaw me taatakis - ew ränin rochopwak me topwutop, ew ränin kuchuuchu me chólopwaak -
16ew ränin tikin rappwa me arükaken maun, lupwen ekkewe sounfiu repwe maun ngeni ekkewe telinimw mi pöchökkül tittiir o maun ngeni ekkewe imw tekia mi nóm lón ekkewe pwokuuku.
17Iei alon ewe SAMOL, “Ngang üpwe awarato riäfföü wón ekkewe aramas pwe repwe attap feil usun chón mesechuun, pwokiten ar tipis ngeniei ngang ewe SAMOL. Chaar epwe niiniwu usun pwül mworomwor, nge inisin ekkewe soomä repwe chök nóm wón pwül usun kiten mwöngö.
18Sap ar silifer, sap pwal ar kolt epwe tongeni angaser lón ewe ränin än ewe SAMOL lingeringer.” Unusen fönüfan epwe kareló lón ewe ekkein an luukommóng, pün i epwe mwittir le awarato sópwólón ekkewe aramas meinisin mi nóm wón fönüfan.
Judah me Jerusalem repwe fiti ekkewe mwüü le köpwüng
Chón Judah ra akökkö pwe repwe äier
2 Öüpwe chufengen, öüpwe ochufengeni kemi, ämi chón ewe mwüü öüsap chüen sile sääw,
2me mwen an epwe war ewe fansoun mi kefilitä, me mwen än ewe rän epwe ässikemiiló usun äsäpwääl a ässaaló pöön wiit, me mwen an epwe feitto wóómi än ewe SAMOL soong mi pöchökkül, pwal me mwen epwe feitto wóómi ränin än ewe SAMOL lingeringer.
3Öüpwe kütta ewe SAMOL, ämi meinisin mi tipetekisón me lón ewe fönü, ämi mi föri meet i a ääni öllük. Öüpwe kütta pwüng, öüpwe kütta tekisón. Eli öüpwe tongeni opoló lón ewe ränin än ewe SAMOL soong.
Än Kot köpwüng ngeni chón Filistia
4Kaza epwe pöönüló esap wor emön aramas epwe nóm lón, nge Ashkelon epwe taaló. Ekkewe aramasen Ashdod repwe kösüüló leólowas, nge ekkewe chón Ekron repwe sää seni telinimweer.
5Feiengawemi ämi ekkewe chón imweimw arosset, ämi ekkewe aramasen Kereth; än ewe SAMOL kapas a üüngenuk en Kanaan, ewe fönüwen chón Filistia. I a apasa, “Ngang üpwe ataakeló, nge esap wor emön epwe nóm lóóm.”
6Ewe fönü mi nóm órun ewe mataw, ia ekkewe chón Kereth ra imweimw ie epwe wiliti ew leeni fäniten ekkewe chón masen siip me leenien ekkewe tittin siip.
7Mwirin, ei fönü epwe wiliti fönüwen ekkewe lussun chón leimwen Judah mi chüen manaw; iir repwe künökün ar leenien amwöngöni nöüür kewe maan me ikenan.Lefääf iir repwe kóón lón ekkewe imw mi pöön imwen chón Ashkelon pün ra süü seniir. Pün ewe SAMOL ar we Kot epwe kirekiröch ngeniir o eliwinisäfäli ngeniir wöwür.
Än Kot köpwüng ngeni chón Moab me Ammon
8“Ngang üwa rongorong än chón Moab kapasen turunufas me än chón Ammon kapasen ämäängaw. Iir ra turunufasei neii kewe aramas o ääni kapasen lamalamtekia, pün ra liäpeni fönüwen neii kewe aramas pwe repwe äwätteló kiän fönüwer.
9Iei minne, mwo manawei,” ewe SAMOL mi Unusen Manaman, ewe Koten Israel a osomänetiw, “enlet Moab epwe wewe ngeni Sodom, nge Ammon ewe wewe ngeni Komorah. Iir repwe wiliti ew fönüwen fetilingaw me pwangen salt, repwe wiliti ew fönü mi pöön tori feilfeilló chök. Nge ekkewe lussun aramas mi chüen manaw me leiin neii kewe aramas repwe angei pisekiir fän pöchökkül; ekkewe lussun aramas mi chüen manaw me lón mwüüi repwe fönüweni fönüwer.”
10Iei meet chón Moab me chón Ammon repwe angei fäniten chappen ar lamalamtekia, ar älemesengawa me ar turunufasei ekkewe aramas nöün ewe SAMOL mi Unusen Manaman.
11Ewe SAMOL epwe eniwokkusur lupwen i epwe ataeló meinisin ekkewe koten ewe fönü. Mwirin, chón ekkewe mwüü meinisin lón ekkewe fönü mi toowaw repwe fel ngeni Kot lón en me pwisin fönüwan.
Än Kot köpwüng ngeni chón Ethiopia
12“Pwal ämi chón Ethiopia, öüpwe ninniiló ren neii ketilas.”
Än Kot köpwüng ngeni chón Assyria
13Kot epwe eitiewu pöün ngeni efeng o ataeló Assyria, i epwe föri pwe Niniva epwe unusen pöönüló o pwasapwas usun ew fönüpöön.
14Pwiin siip me kuuch chök me pwiin kowu repwe kóón ikenan, pwal iteiten sókkun mönümanaw repwe nóm lón ewe leeni mi taatakis. Ekkewe füküron lón fönüpöön me ekkewe füküro mi tikikken repwe nóm leetolen ekkewe üür mi chüen üütä. Aramas repwe rong tikiir repwe tikiwu me lón ekkewe asamwacho. Ioien mettóch mi taatakis repwe eppetaló lón ekkewe asamalap, nge ekkewe irälap mi för seni ewe irä sedar repwe pwääwu.
15Iei usun minne epwe fis ngeni ewe telinimw esap öüreki usun och o nóm lón nükünüköch. Ewe telinimw mi apasa ngeni pwisin i, “Ngang chök ewe emön, ese pwal wor emön me lüki.” Iwe, a ifa me an wiliti ew leeni mi taatakis! A fis pwe i a ew leeni fäniten ekkewe maanmwacho! Meinisin aramas mi pwereló ünükkün ewe telinimw repwe ngóóngóri o ächewechewa kumwuchur ngeni.
Än Kot köpwüng ngeni Jerusalem
3 Feiengawen Jerusalem, ewe telinimwen chón eriäfföwü aramas, chón üleförea me limengaw.
2I esap mochen älleasochis ngeni mwelien emön, esap pwal etiwa än emön epwe emiriiti. I esap anómwu an apilükülük wón ewe SAMOL, pün a anómwu an apilükülük wón ekkóch mettóch fäniten nónnómöchün me kinamwein, iei popun i esap mochen kanoto ren an we Kot.
3Nöün kewe nöüwiis mi nóm lón ra usun chök ekkewe laion mi wörüwör mi kütta minne repwe liäpeni seni meet ra tongeni angei. Nöün kewe souköpwüng ra usun chök ekkewe wolif mi küüt liäper lefääf, resap likiti och tori lesossor.
4Nöün kewe soufós ra tunosikesik, iir aramas mi uren otupwutup. Nöüür kewe souasór ra epiningawa ewe leeni mi pin o sorei wewen än Kot kapas.
5Nge ewe SAMOL mi nóm lón ewe telinimw a fókkun pwüng. I esap föri och mi mwääl. Iteiten lesossor, i a pwäärawu an pwüng, esap etiwaló mwo ew rän. Nge ekkewe chón pwüngingaw ra chök föri minne a ngaw, nge resap sile sääw.
Jerusalem esap mochen äier
6Iwe, ewe SAMOL a apasa, “Ngang üwa fen arosaló chón ekkewe mwüü. Ar kewe imw mi pöchökkül o tekia ra taaló. Ngang üwa föri pwe ar kewe aal ra pöön, esap chüen wor emön a fätäl wór. Ar kewe telinimw ra taaló, esap chüen wor emön aramas a nóm lóór.
7Ngang üwa apasa ei ngeni chón ewe telinimw Jerusalem pün üwa ekieki, ‘Enlet öüpwe meniniitiei o etiwa äi kewe kapasen emiriit!’ Mwirin, imweer kewe resap taaló, pwal äi kewe köpwüng meinisin üwa amollätä fäniter resap feittiw wóór. Nge ekkeei aramas mi föfföringaw ra chök mochen sópweló le föri ekkewe föfför mi ngaw ra fen piin föfföriir.
8Iei minne öüpwe witiwitiei,” ewe SAMOL a osomänetiw, “öüpwe witiwiti ewe rän ngang üpwe üütä pwe üpwe emön chón pwärätä. Pün ngang üwa fen öpwüngaló pwe üpwe emwiichafengeni chón ekkewe mwüü, pwe üpwe niinätiw äi lingeringer me äi soong mi wätte wóór. Iwe, unusen fönüfan epwe karaló ren ekkein äi lingeringer.
Ekkewe lussun aramasen Isreal mi chüen manaw repwe feiöchsäfäl
9Lón ena fansoun, ngang üpwe limeti tinnawen aramas meinisin, pwe iir meinisin repwe kööri itei ngang ewe SAMOL o repwe tongeni fel ngeniei fän tipeew.
10Neii kewe aramas mi toropasfeil iir mi nóm peekilón ekkewe chaanpwuupwun Ethiopia, repwe feitto o ääni ar asór ngeniei.
11Lón ena fansoun, ämi chón Jerusalem öüsap chüen pwisin sääwäsini kemi, pün öüsap chüen üüngeniei. Ngang üpwe ösüüweló seni lón ei telinimw ekkewe aramas mi lamalamtekia o pwisin etekiaretä. Iwe, esap chüen wor lamalamtekia me wón chuki we mi pin.
12Nge ngang üpwe likiti me leiimi ekkewe mi mósónósón me tipetekisón, ekkewe mi anómwu ar apilükülük lón itei ngang ewe SAMOL.
13Iwe, ekkewe lussun mi chüen manaw me lón Israel resap chüen föri föfför mi mwääl; resap chüen apasa kapas chofona. Esap chüen wor och kapasen otupwutup epwe toowu seni lón aweer. Iir repwe mwöngö o kóónoló, nge esap wor emön epwe eniwokkusuur.”
14Kopwe kööl en ewe Föpwül Zion, kopwe leüommóng le pwupwuchörün pwapwa en Israel. Kopwe pwapwa o mwänek ren unusen lelukom, en ewe Föpwül Jerusalem!
15Pün ewe SAMOL a fen ömwökütaló senuk pöün pöün köpwüng, i afen ösüüweló senuk nöün chón opwutom mwiichen sounfiu.
Iwe, pwisin ewe SAMOL, ewe Kingen Israel, epwe nónnóm reemw; óm riäfföü epwe wesiló o kosap chüen nuokkusiti och feiengaw.
16Lón ena fansoun epwe wor ew kapasen esilesil ngeni Jerusalem epwe apasa, “Kopwe meseik Zion; kosap chök eitietiw pöum ren lipwäkingawen óm rüükö.
17Pün ewe SAMOL óm we Kot a war pwe epwe nónnóm reemw. I ewe Emön mi Manaman a tongeni amanawa aramas. I epwe fókkun meseikeituk fän an pwapwa;
i epwe amalasöösöetiw óm nuokkus meinisin ren an tong. I epwe meseikeituk ren an epwe köölüw echö köölün pwapwa mi leüommóng.”
18“Ngang üpwe ochufengeni kemi ämi ekkewe mi letipeta fäniten ämi öüsap chüen fiti ekkewe fansoun chuulap mi kefilitä, ämi chókewe mi weires ren itengawen ämi ooló.
19Nengeni, lón ena fansoun, ngang üpwe öpwüngü chókewe meinisin mi eriäfföwü kemi. Ngang üpwe chimanüw ekkewe mi pecheemä; üpwe ochufengeni chókewe mi toropasfeil. Ngang üpwe ekkesiwili ar sääw ngeni iteüöch, nge aramas repwe mwareitiir me lón iteiten ekkewe fönü ia ra nóm ie.
20Lón ena fansoun ngang üpwe ochufengeni kemi; ngang üpwe eliwinisäfälikemiito ngeni leeniemi. Ngang üpwe ngeni kemi ew iit mi mwirinnö, ew iit mi iteüöch me leiin ekkewe aramasen mwüün fönüfan meinisin. Iwe, repwe mwareiti kemi, lupwen ngang üpwe eliwinisäfäli ekkewe chón ooló me mwen meseer,” ewe SAMOL a apasa.