Titus

Paul a kapwong ngeni Titus

1Ei taropwe seniei ngang Paul, emön nöün Kot amanaw me emön nöün Jesus Kraist soukünö fänäsengesin chókana mi fil meren Kot pwe epwe wor ar lükü me ar silei ewe let mi emmweni ngeniir ar repwe manaweni ewe manawen tupwol lón Kot. 2Ei lükü me let a ngeniir ewe apilükülük pwe repwe ääni ewe manaw ese mwüch, minne Kot, ewe esap tongeni epwe chofona, a fen pwon ngeniir me mwen fansoun a poputä. 3Nge lón ewe fansoun mi fich pwisin I a filätä, i a mwüüt ngeni fönüfan pwe epwe silei usun ewe manaw. I a föri ei ren afalafalen ewe poraus allim, iei meet Kot ach Chón Amanaw a öllük o lükü ngeniei pwe üpwe wiisen föri.

4Ngang üwa mak ngenuk Titus, en enletin neii lón ewe lükü sia äänippökü. Ümöümöch me kinamwe seni ewe Kot Saam me Kraist Jesus ach Chón Amanaw epwe nónnóm reemw.

Mwichefel a osun ekkewe souemwen mi wor reer ekkewe tüfich

5Iei popun ngang üwa likituketiw wón ewe fönü Kriit pün kopwe atawei le akkótaöchüw ekkewe mettóch resap mwo tawe. Ngang üwa pwal likituketiw pwe kopwe filätä ekkewe souakkom lón iteiten ekkewe telinimw usun üwa fen öüröüra ngenuk. 6Emön epwe souakkom are epwe i emön mwän mi unusöch lón manawan, mi pwülüweni emön chök fefin, nöün kana repwe chón lükü, esap wor emön epwe ettipisi iir ren ar manaweni manawen fangesöröw ika ren ar resap mochen nóm fän nemenem. 7Pün emön soummas epwe fókkun unusöch lón manawan, pokiten i nöün Kot chón nemeni me akkótaöchüw ewe familien Kot. Esap pwisin filätä chók minne tipan, esap soongokkäi, esap ünümmóng wain, esap emön chón kawet ren pöün me an kapas, esap emön mi mocheniä wón mooni. 8Nge epwe etiwetiwöch ngeni wasööla, epwe efich minne mi mwirinnö, epwe miriit lón an ekiek, epwe wenechchar, epwe limelimöch lón manawan, epwe tongeni tipeppós le nemeni mochenin tipan. 9Epwe likiitü le kömwöchünnük wón ewe kapas mi ölükülük, mi unusen tipeew ngeni ewe sókkun käit seni ekkewe soukünö, pwe epwe tongeni förippöküw an epwe peseei chón lükü lón ewe käit mi efisätä pöchökkülen manawen ngüün me an epwe tongeni öppölüa än ekkewe chón üüngeni kapasen üppölü mi mwääl.

Ekkewe osukosuk souemmwenin mwichefel repwe chuuri

10Pün a wor chómmóng aramas mi üleförea, chón nöünöü kapas mi mwotoutou nge mi pöön, chón otupwutupw lón ar kapas, wesewesen iir ekkewe chón Sus mi sirkomsais. 11Kopwe pineeló awer pwe repwe fanafaneló, pwokiten ra efitikokoi le atókkaló unusen famili seni ewe let ren ar esikuula ekkewe mettóch mi ässääw fänäsengesin ekingawen ar mochen angei mooni. 12Emön me leiir, pwisin emön nöür soufós seni Kriit a apasa: “Chón Kriit iir chón kapas chofona fansoun meinisin. Iir ra usun maan mwacho mi arochongaw, iir chón chipwang mi mwöngömmóng.” 13Ei kapasen pwärätä a let. Iei popun kopwe ekkeni óm öpwüngüür, pwe repwe tongeni pöchökkül lón manawen ar lükü, 14nge resap äfälli än ekkewe chón Sus tuutulap me ekkewe öllük förien aramas mi tókkóló seni ewe let. 15Mettóch meinisin ra limöch meren ekkewe aramas mi limöch lelukeer. Nge esap wor och mettóch a limöch meren chókana mi limengaw leluker me mi lükülükümmang, pwokiten ar ekiek me mwelien letiper ra limengawöppök. 16Ekkeei sókkun aramas ra apasa pwe ra silei Kot, nge ra amaam I ren föfförün manaweer. Ra enniopwut me älleasolap, resap pwal lipwäköch ngeni ar repwe föri och angang mi mwirinnö.

Nónnómwun chón ew mwichefel mi pöchökkül manawen ar souleng

2Nge en, kopwe fókkun sópweló le esikuula ewe sókkun manaw mi fiti pwüngün käit mi pwüng. 2Kopwe äiti ngeni ekkewe chinlap mwän ar repwe tongeni tipeppós le nemeni mochenin tipeer, epwe wor meniniir, repwe tipemiriit lón ar ekiek, repwe pöchökkül lón manawen ar lükü, repwe uren tong me sile engngiló.

3Pwal ina chök usun óm kopwe äiti ngeni ekkewe fefin mi chinlap ar repwe manaweni ewe sókkun manaw mi fich ngeni manawen emön chón angang ngeni ewe Samol. Resap fätälfeil o apasatä kapas mi ngaw usun ekkóch, resap pwal nóm fän nemenien wain. Repwe tongeni esikuula meet mi mwirinnö. 4Lupwen repwe föri ei, repwe äiti ngeni ekkewe fefin mi chüen ier kükkün ar repwe tongei pwülüwer kana me nöüür kana semiriit, 5repwe manaweni manawen miriit me manawen limöch, repwe tümwünü angangen lón imweer, repwe föri föfför mi mwirinnö, repwe pwisin anómwur fän än pwülüwer kana nemenem, pün ewe kapasen Kot esap itengaw reer.

6Iwe, epwe pwal ina chök usun óm kopwe peseei le äiti ngeni ekkewe ölüöl pwe repwe manaweni manawen miriit lón meinisin minne iir ra föri. 7Nge en, kopwe pwäärukoló pwe en ew leenien appirü ngeniir ren óm föri sókkun föfför mi mwirinnö meinisin. Lón mettóch meinisin, kopwe pwääraló óm wenechchar me óm tipeni tipen mwän lón óm esikuul. 8Òm esikuul epwe fókkun pwüng, pwe esap wor emön epwe tongeni apasätä och ngawan. Mwirin, chókana mi mochen üüngeni kich repwe sääw, pwokiten esap wor och mettóch mi ngaw repwe apasatä usuch.

9Kopwe pwal peseei ngeni ekkewe amanaw pwe repwe anómwur fän än ar kewe masta nemenem lón mettóch meinisin o föri meet repwe apwapwai letiper ren. Resap wiipinepin ngeniir, 10resap sooläni och seniir, nge repwe pwääraló pwe ra unusen ölükülük me mwirinnö. Mwirin, repwe föri pwe ewe käit usun Kot ach we Chón Amanaw epwe amwaraar lón peekin meinisin.

11Pün ewe ümöümöchün Kot a fen pwääló o uwato ewe manaw ese mwüch ngeni aramas meinisin. 12A äiti ngeni kich pwe sipwe kul seni ewe manawen turunufas me mocheniän fönüfan mi uren tipis, o äiti ngeni kich pwe sipwe nóm lón ei kinikinin fansoun fän tipeppós le nemeni mochenin tipach, lón manawen wenechchar me manawen tupwöl wón Kot, 13lupwen sia ösüküsükü ach we apilükülük mi feiöch lupwen lingen ach we Kot mi tekia me Chón Amanaw Kraist Jesus epwe pwääló. 14I ewe a fangeló pwisin manawan fänäsengesich pwe epwe mööni kich ach sipwe pichiwu seni lón föötekin tipis meinisin, epwe pwal limeti kich o föri kich pwe sipwe wesewesen nöün aramas mi unusen tilikken le föri meet mi pwüng.

15Ikkeei ekkewe mettóch kopwe afalafal usun. Kopwe fönööw noum kewe aramas pwe repwe föri meet mi pwüng o öpwüngür pwe repwe kul seni meet mi mwääl. Kopwe föri ei fän unusen pöchökkülen óm pwüüng. Kosap mwüüt ngeni emön an epwe turunufasek ika öüchcheangawei meet ka apasa.

Ekkewe feiöch fäniten ekkewe chón angei än Kot ümöümöch

3Kopwe ächchema ngeni ekkewe aramas pwe repwe anómwur fän än nöür kana samol me nöüwiis nemenem, repwe älleasochis, repwe mollotä ngeni ar repwe föri föfför mi mwirinnö. 2Resap kapas mi ngaw fäniten emön aramas, resap äniini, repwe mósónósón, repwe pwääraló ar enletin tipetekisón ngeni aramas meinisin.

3Pün pwal pwisin kich sia manaweni ew manaw mi umwes melóóm. Sia älleasolap, sia tókkóló ren emmwenien ekkóch, sia föötek ngeni sókkopaaten mocheniä me pwapwan fönüfan. Manawach a uren föfför mi ngaw me lólówó, kich sia opwut ekkóch me koum fengen pwisin lefiilach. 4Nge lupwen Kot ach Chón Amanaw a pwääri ngeni aramas an kirekiröch me tong, 5I a amanawa kich, sap ren ekkewe angangen pwüng kich sia föriir, nge i a chök alóngólóng wón an tong, ren ewe atüütün limelimen upsäfäl me än ewe Ngüünmifel asööfösäfäli manawach. 6I ewe Ngüün, Kot a fangafangöch le niinätiw wóóch, pwokiten minne Jesus Kraist ach Chón Amanaw a föri. 7Iei popun Kot a öpwüngaló pwe kich sia chón pwüng pwokiten an ümöümöch. Iwe, iei sia silei pwe kich sia chón älemwiri ewe manaw ese mwüch sia apilükülükü.

Föri föfför mwirinnö nge sü seni tipekinikin

8Iei ew kapas mi ölükülük. Iwe, ngang üwa mochen pwe kopwe önüküchchara le kapas fänäsengesin ekkeei mettóch pwe chókana mi lükü Kot repwe föröchüw ar repwe tupwöl le föri meet mi mwirinnö fansoun meinisin. Ekkeei mettóch ra echchipwör o lamwot fäniten aramas meinisin. 9Nge kopwe atoowawók seni ekkana kapasen efitikooko mi umwes, pwal seni ekkana äwewen tettelin leewo me kapasen tipefesen me äniini usun än Moses kewe öllük, pün ra öüchcheangaw me lamwotongaw. 10Are emön aramas a popuw tipekinikin me tipekoum lefiilemi, kopwe fönöw i fän ew ika fän ruu, nge mwirin, kosap chüen chiechi ngeni ena aramas. 11Pün ka silei pwe ei sókkun aramas a fittek manawan o uren tipis. I a pwisin atooto köpwüng wón.

12Lupwen ngang üpwe tiinawow Artemas ika Tykikos reemw, kopwe achoocho ngeni óm kopwe feitto rei lón Nikopolis, pün ngang üwa filätä pwe üpwe nónnóm ikenan lón ewe fansoun patapat. 13Kopwe pwal achoocho ngeni lón üküükün óm tongeni le

älisi Zenas ewe souöllük me Apollos lón ar sääi pwe esap wor och minne repwe osupwang ren. 14Iwe, nöüch kana aramas repwe pwal achoocho le käeö ar repwe föri ekkana föfför mi mwirinnö pwe repwe älillis le atawei ekkana osupwang mi atapwanapwan, pün resap manaweni ewe sókkun manaw esap wor uwaan.

15Chókeei meinisin mi nóm rei ra kapwong ngenuk. Kopwe uwei äi kapwong ngeni ekkewe chón lükü meinisin mi tongei keem. Ümöümöchün Kot epwe nónnóm reemi meinisin. Amen