Pwärätä

Minne Jesus Kraist a

Kapas akkomw me efeiöch

1Jesus Kraist a pwärätä minne Kot a ngeni I pwe epwe pwääri ngeni nöün kewe amanaw usun ekkewe mettóch repwe mwittir fisitä. Kraist a pwääri minne Kot a ngeni ren an ökkünöweló nöün we chón läng ren nöün we amanaw John, 2ewe a wisen pwärätä än Kot kapas me pwisin meet Jesus Kraist a pwärätä, ikkeei ekkewe mettóch meinisin i a küna. 3A feiöch emön mi älleani ngeni mwichefel ekkewe kapasen ei oosuni, ra feiöch chókana mi rongorong me mi älleasochis ngeni meet mi makketiw lón, pün ewe fansoun a chök arap.

Kapwong ngeni ekkewe fisu mwichefel

4Ngang John, üwa mak ngeni ekkewe fisu mwichefel mi nóm lón Asia: Ümöümöch ngeni kemi me kinamwe seni Kot ewe mi nóm iei, a fen nóm seni chök lóóm o epwe nóm lón ekkaan fansoun repwe feitto, pwal seni ekkewe füümön Ngüün mi nóm mwen an we leenien móótun king, 5pwal seni Jesus Kraist, ewe chón pwärätä mi ölükülük, ewe mi nóm asalapen chón manawsäfäl me leiin mi mäló me ewe sounemenemen ekkewe kingen fönüfan. Sipwe mwareiti ewe mi tongei kich o angasa kich seni ach kana tipis ren chaan, 6o föri kich pwe sipwe ew mwüü me souasór ngeni an we Kot me Saman, I chök epwe ääni ling me nemenem tori feilfeilló chök. Amen.

7Nengeni, Kraist epwe le feitto fiti fengen me ekkewe kuchun läng. Iwe, iteiten maas epwe küna I, pwal mesen chókewe mi posuw I. Iwe, meinisin chón ekkewe einangen aramas wón fönüfan repwe pwupwuchöör pwokitan. Ewer, epwe ina usun. Amen.

8“Ngang ewe Alfa me ewe Omeka, ewe mi nóm iei o a fen nóm chök melóóm o epwe pwal nóm lón ekkan fansoun repwe feitto, ewe mi Unusen Manaman.” Iei alon ewe Samol Kot.

John a küna ewe Nöün Aramas lón künäan

9Ngang John, pwiimi me chiechiemi lón ewe riäfföü me lón ewe mwüü me lón öttures le engngiló fän weires, ikkana ach lón Jesus Kraist. Ngang üwa kösüüto wón ei fönü itan Patmos fäniten äi aronga ewe kapasen Kot me äi pwärätä usun Jesus Kraist. 10Ngang üwa nóm lón ewe Ngüün lón nöün ewe Samol we rän, iei ewe äewin rän. Iwe, ngang üwa rong ew möngüüngü mi leüommóng a kapas me lükün söküri, mi usun chök tikin ew rappwa, 11a apasa: “Kopwe makkeetiw lón ew pwuk meet ka küna o kopwe tiinaló ren ekkewe fisu mwichefel: ngeni Efisos, ngeni Smyrna, ngeni Perkamum, ngeni Thyatira, ngeni Sardis, ngeni Filadelfia pwal ngeni Laodisia.”

12Mwirin, ngang üwa kulluei pwe üpwe nengeni mönün ewe möngüüngü e kapas ngeniei. Iwe, lupwen üwa kül, üwa küna fisu leenien etittin mi för seni kolt. 13Iwe, üwa küna emön mi usun chök ewe Nöün Aramas a nóm leiin ekkewe fisu leenien etittin. A üföüf echö üüf mi tametiw tori pachapachan, nge a äffiit ngeni leupwan och riiri mi för seni kolt. 14Möküran me meeten möküran ra pwechepwech usun chök pwächäriken ünen siip, usun pwächäriken snow. Mesan kana ra usun chök och pwulopwulen ekkei. 15Pachapachan kana ra usun chök meriweriwen piraas mi saraara, lupwen a saraara me lón ew uumw mi pwichikkar, nge mwelian a usun chök püngün turun wätten nóó. 16I a kömwöch füüföw füü lón pöüifichin, nge efóch ketilas mi kken me rüepeek a itiwu seni lón awan. Iwe, wón sapwülün a usun chök tinen akkar lupwen a fókkun pöchökkül tinan.

17Iwe, lupwen ngang üwa küna I, ngang üwa chappetiw órun pachapachan, usun chök nge ngang emön mi mäló. Nge I a isettä pöüifichin wóói o apasa, “Kosap nuokkus. Ngang ewe Akkomwan me ewe Ömwüchchülón. 18Ngang ewe Emön mi manaw. Ngang üwa mäló, iwe, nengeni, ngang üwa manaw tori feilfeilló chök. Iwe, a nóm reei ekkewe kiien ewe leenien sootup me mäló.

19Iei minne, kopwe makkeetiw ekkewe mettóch en fen ka küna, ekkana ra fis iei me ekkana repwe fis me mwirin ei. 20Iwe, iei wewen ewe mwónómwón usun ekkewe füüföw füü en ka küner me lón pöüifichi me ekkewe fisu leenien etittin mi för seni kolt: Ekkewe füüföw füü iir ekkewe füümön chón künöön ekkewe fisu mwichefel, nge ekkewe fisu leenien etittin, ikkana ekkewe fisu mwichefel.”

Ngeni ewe mwichefel Efisos

2Kopwe mak ngeni ewe chón künöön ewe mwichefel lón Efisos: Ikkeei ekkewe kapas alon ewe Emön mi ömwöchü ekkewe füüföw füü lón pöüifichin, ewe mi fätäl leiin ekkewe fisu leenien etittin mi för seni kolt:

2“Ngang üwa silei óm kewe föfför, óm angang weires me óm likiitü le engngiló me usun óm kosap tongeni fanengeni chókana mi föfföringaw. Nge en ka älelletafichi le cheki chókana mi pwisin eita ngeniir soukünö, nge i sap iir soukünö. Iwe, ka küna pwe iir ra chofona. 3Ngang üwa silei pwe en ka mósónóttam le engngiló fän riäfföü fänäsengesin itei, nge kosap achaanü.

4Nge mi chök wor meet ei Ngang üpwe üüngenuk ren. En ka likitaló ewe tong en ka akkomw le ääni. 5Iei minne, kopwe chechchemeni ia en ka tur me ie. Iwe, kopwe siwili óm ekiek, kul seni tipis o kul ngeni Kot o föri ekkewe föfför en ka föri me lepoputän. Nge are kosap; iwe, Ngang üpwe feitto reemw o ömwökütaló óm we leenien etittin seni lón leenian, chiilón chök are kopwe siwili óm ekiek o kul ngeni Kot. 6Nge iei och meet mi mwirinnö usum. En ka opwut föfförün ewe mwichen Nikolas, Ngang üwa pwal opwut.

7Emön mi wor selingan epwe rongorong meet ewe Ngüünmifel a apasa ngeni ekkewe mwichefel. Iwe, ngang üpwe mwüüt ngeni emön mi pwora pwe epwe mwöngö seni ewe irän manaw mi nóm lón än Kot we Paradis.”

Ngeni ewe mwichefel Smyrna

8Iwe, kopwe mak ngeni ewe chón künöön ewe mwichefel lón Smyrna. Ikkeei ekkewe kapas alon ewe Akkomwan me Ömwüchchülón, ewe mi mäló o manawsäfäl:

9“Ngang üwa silei óm kewe riäfföü me óm wöüingaw (nge i en mi pisekisek). Ngang üwa pwal silei ekkewe kapasen eitengawen otuttur än chókewe mi apasa pwe iir chón Sus nge i sap iir chón Sus, pün iir ew sinakok än Satan. 10Kosap nuokkusiti meet kopwe le riäfföü ren. Nengeni, ewe devil epwe oturalong ekkóch me leiimi lón kalapwuus pwe epwe asóssóta le älelleta kemi. Iwe, öüpwe nóm lón riäfföün mi lapalaap lón üküükün engol rän. Kopwe ölükülük tori mäló; iwe, Ngang üpwe ngenuk ewe mwärämwärin manaw.

11Emön mi wor selingan epwe rongorong meet ewe Ngüünmifel a apasa ngeni ekkewe mwichefel. Ewe emön mi pwora esap feiengaw ren ewe oruuwen mäló.”

Ngeni ewe mwichefel Perkamum

12Iwe, kopwe mak ngeni ewe chón künöön ewe mwichefel lón Perkamum: Ikkeei ekkewe kapas alon ewe Emön mi wor ren ewe ketilas mi ken me rüepeek: 13“Ngang üwa silei ian en ka imweim ie, pün en ka nóm ia än Satan we leenien móótun nemenem a nóm ie. Nge en ka tupwöl le kömwöchünnük wón itei o kosap amaamäsini óm lüküei, wesewesen lón ekkewe rän lupwen Antipas neii we chón pwärätä mi ölükülük a ninniló me leiimi me lón ämi we telinimw ia Satan a nónnóm ie.

14Nge mi wor ekkóch mettóch Ngang üwa üüngenuk ren. Mi wor reemw ekkóch aramas mi kömwöch wón ewe käit än Balaam, ätewe mi äiti ngeni Balak pwe epwe anómwu och leenien chepetek me mwen ekkewe aramasen Israel pwe repwe mwöngö ekkewe mwöngö aramas ra ääni asór ngeni ekkewe uluulun önümwäl o repwe pwal föri föfförün lisowu. 15Iwe, pwal ina chök usun, pün a pwal wor reemw ekkóch mi kömwöch wón ewe käit än ewe mwichen Nikolas. 16Iei minne, kopwe siwili óm ekiek, kul seni tipis o kul ngeni Kot. Are kosap; iwe, Ngang üpwe mwittir feitto reemw o üpwe maun ngeni ekkewe aramas ren ewe ketilas seni lón awei.

17Emön mi wor selingan epwe rongorong meet ewe Ngüünmifel a apasa ngeni ekkewe mwichefel. Iö mi pwora, Ngang üpwe ngeni ekkóch ekkewe manna mi iseiseló. Iwe, üpwe pwal ngeni i eföw faaw mi pwechepwech, a wor ew iit mi fö mi makketiw wón, esap wor emön a silei, chiilón chök ewe mi wisen angei ewe faaw.”

Ngeni ewe mwichefel Thyatira

18Iwe, kopwe mak ngeni ewe chón künöön ewe mwichefel lón Thyatira: Ikkeei ekkewe kapas alon ewe Nöün Kot, mi wor mesan kana ra usun chök ngetengeten ekkei, nge pachapachan kana ra usun chök meriweriwen piraas mi emmis: 19“Ngang üwa silei óm kewe föfför, óm tong me óm lükü me óm angang me óm mósónóttam le engngiló. Iwe, üwa silei pwe óm kewe föfför en ka föri mwirin ra lap seni minne ka akkomwen föri.

20Nge mi chök wor ei mettóch Ngang üwa üüngenuk wón. En ka fanengeni ena fefin Jezebel, mi pwisin eita ngeni pwe i emön soufós fefin, pwe epwe esikuula me otupwaló neii kewe amanaw pwe repwe föri föfförün lisowu o mwöngö ekkewe mwöngó aramas ra ääni asór ngeni ekkewe uluulun önümwääl. 21Ngang üwa mwüüt ngeni neminna an fansoun pwe epwe siwili an ekiek, kul seni tipis o kul ngeni Kot, nge i esap mochen siwili an ekiek o kul seni an kewe föfförün lisowu. 22Nengeni, Ngang üpwe oturätiw neminnei wón an kiekien samwaw. Iwe, ngang üpwe oturalong chókana mi föri föfförün lisowu ngeni neminna lón riäfföü mi lapalaap, chiilón chök are repwe siwili ar ekiek o kul seni ar kewe föfför mi ngaw o kul ngeni Kot. 23Iwe, Ngang üpwe niieló nöün neminnei kewe pwe repwe mäló. Iwe, ekkewe mwichefel meinisin repwe silei pwe Ngang ewe mi etittinna ekiek kana me letip kana. Iwe, Ngang üpwe ngeni emön me emön leiimi liwinin alóngólóng wón ämi kewe föfför.

24Nge iei meet Ngang üpwe apasa ngenikemi ämi ekkewe lussun me lón Thyatira öüsap kömwöch wón än neminnei ei käit, ämi ekkewe öüsap käeö meet ekkóch ra eita ngeni pwe mettóch mi alóllóól usun Satan: Ngang üsap anómwu wóómi pwal och sókkun osochchow. 25Nge öüpwe chök kömwöch ünnük wón meet a wor reemi tori Ngang üpwe war.

26Iö mi pwora o föri letipei tori sópwólón, Ngang üpwe ngeni i pwe epwe nemenem wón ekkewe mwüü. 27‘Iwe, I epwe nemeni ekkewe mwüü fän efóch wóók mächä, o epwe amökkükisiretiw usun sepi mi för seni pwül,’a usun chök Ngang üwa angei äi nemenem seni Semei we. 28Iwe, Ngang üpwe pwal ngeni i ewe füün lesossor. 29Emön mi wor selingan, epwe rongorong meet ewe Ngüünmifel a apasa ngeni ekkewe mwichefel.”

Ngeni ewe mwichefel Sardis

3Iwe, kopwe mak ngeni ewe chón künöön ewe mwichefel lón Sardis: Ikkeei ekkewe kapas alon ewe Emön mi wor ren ekkewe füümön Ngünün Kot me ekkewe füüföw füü: “Ngang üwa silei óm kewe föfför. A wor itom pwe en mi manaw, nge i en mi mä. 2Kopwe neló o öpöchökkülatä meet mi chüen nómwetiw o arap ngeni epwe mäló, pün Ngang üwa küna pwe óm kewe föfför resap unusöch me mwen mesen äi Kot. 3Iei minne, kopwe chechchemeni meet en ka etiwa o rong. Kopwe älleasochis o siwili óm ekiek, kul seni tipis o kul ngeni Kot. Are kosap neló, Ngang üpwe war usun emön chón soolä, nge, kosap silei ineet kulókun äi üpwe war pwe üpwe efeiengawók.

4Nge mi chüen wor ekkóch chök iit me lón Sardis, iten aramas resap elimengawa üfeer kana. Iwe, iir repwe fitiei le fätäl fän üüf mi pwechepwech, pün ra fich ngeni. 5Iö mi pwora usur epwe üföüf ekkana üüf mi pwechepwech. Iwe, Ngang üsap fókkun amóiló itan seni lón ewe Pwuken Manaw. Ngang üpwe pwärätä itan me mwen Semei we pwal me mwen nöün kewe chón läng. 6Emön mi wor selingan epwe rongorong ngeni meet ewe Ngüünmifel a apasa ngeni ekkewe mwichefel.”

Ngeni ewe mwichefel Filadelfia

7Iwe, kopwe mak ngeni ewe chón künöön ewe mwichefel lón Filadelfia: Ikkeei ekkewe kapas alon ewe Emön mi pin, ewe emön mi let, ewe mi kömwöch ewe kii än David. Meet I a suuki esap wor emön a tongeni esipa, nge meet I a esipa, esap wor emön a tongeni suuki. 8“Ngang üwa silei óm kewe föfför. Nengeni, Ngang üwa fen anómwu mwomw ew asam mi suuk, esap wor emön a tongeni esipa. Ngang üwa silei pwe a chök kisikiis óm tüfich, nge en ka älleasochisi äi kapas o kosap amaamäsini itei. 9Nengeni, Ngang üpwe föri pwe chókana seni ewe sinakok än Satan mi chofona le apasa pwe iir chón Sus nge i sap iir chón Sus, nengeni Ngang üpwe föri pwe repwe feitto o chappetiw mwen pecheemw. Iwe, repwe älleta le pwärätä pwe en ewe Ngang üwa tongeek. 10Pwokiten en ka älleasochisi äi kapas pwe kopwe öttures le engngiló; iwe, Ngang üpwe tümwünuk seni ewe fansoun sóssótun riäfföü mi lapalaap epwe wareto wón unusen fönüfan pwe epwe asóssóta le älletätä ekkena chón wilipósen fönüfan.

11Ngang üpwe mwittir wareto! Kopwe kömwöchünnük wón meet a wor reemw, pwe esap wor emön epwe angei senuk mwärum mwärin wiil. 12Iö mi pwora, Ngang üpwe föri pwe i epwe efóch üür me lón ewe imwenfel än äi we Kot o esap chüen toowu seni. Iwe, Ngang üpwe makkei wón i iten äi we Kot me iten ewe telinimw än äi we Kot, iei ewe Jerusalem mi fö ewe epwe feittiw seni läng seni äi we Kot, me pwisin itei we mi fö. 13Emön mi wor selingan epwe rongorong ngeni meet ewe Ngüünmifel a apasa ngeni ekkewe mwichefel.”

Ngeni ewe mwichefel Laodisia

14Iwe, kopwe mak ngeni ewe chón künöön ewe mwichefel lón Laodisia: Ikkeei ekkewe kapas alon ewe Amen, ewe mi ölükülük me ewe Chón Pwärätä mi Enlet, ewe Chón Popuw förien Kot meinisin:

15“Ngang üwa silei óm kewe föfför. En kosap pat, kosap pwal pwich. Amwo kopwe fen chök pat ika pwich. 16Iwe, pwokiten en ka chök aropwichipwich, nge kosap chök fókkun pwich ika fókkun pat, Ngang üpwe kusufukowu seni lón awei. 17Pün en ka apasa: ‘Ngang mi pisekisek, a fen chómmóngóló wöwi, o üsap osupwangen och mettóch.’ Nge en kosap silei pwe ka mwelele, attong, wöwingaw, mesechuun me seleló. 18Ngang üpwe öüröürók pwe kopwe kamö seniei kolt mi limelim lón ekkei pwe kopwe tongeni pisekisekiló. Kopwe pwal kamö seniei üüf mi pwechepwech pwe kopwe üföüf pwe esap pwääló ässääwin óm seleló. Kopwe kamö óm säfeen maas pwe kopwe chenifi mesom pwe kopwe tongeni küna mwomw.

19Ngang üwa öpwüngü o fönöw chókana ngang üwa tongeer. Iei minne, kopwe sarofokkäi o siwili óm ekiek, kul seni tipis o kul ngeni Kot. 20Nengeni, Ngang üwa üütä lükün ewe asam o fichifich. Are emön epwe rong mweliei o suuki ewe asam, Ngang üpwe tolong ren o mwöngön lefääf ren, nge i epwe mwöngö rei.

21Iö mi pwora, Ngang üpwe mwüüt ngeni pwe i epwe móót reei wón äi leenien móótun king, usun chök pwal Ngang üwa pwora o üwa móttiw ren Semei we wón an leenien móótun king. 22“Emön mi wor selingan epwe rongorong ngeni meet ewe Ngüünmifel a apasa ngeni ekkewe mwichefel.”

Ewe ruumwen leenien móótun king lón läng

4Mwirin ekkeei mettóch, ngang üwa attololó nge üwa küna ew asam mi chök sukkuló lón läng. Iwe, ewe chök möngüüngü üwa fen piin rong me mwan a kapas ngeniei nge a usun och tikin rappwa mi leüommóng. Ewe möngüüngü a apasa: “Kopwe feittä ikeei pwe üpwe pwääri ngenuk meet epwe fis me mwirin ekkeei mettóch.” 2Iwe, lón ewe chök ótun, ngang üwa nóm lón ewe Ngüün. Iwe, üwa küna ewe leenien móótun king a fen mollotä lón läng, nge a wor Emön a móót wón ewe leenien móótun king. 3Iwe, wón sapwüülün ewe Emön mi móót wón ei leenien móótun king a usun chök saramaramen ewe faaw öüchchea mi kuruffat itan jasper me ewe faaw öüchchea mi parapar itan karnelian. Iwe, a wor ew resiim mi nóm pwellin ünükkün ewe leenien móótun king a usun chök molupolupen ewe faaw öüchchea mi önüwen fetil itan emerald. 4Iwe, a wor pwal rüwe me rüwänü leenien móótun king ra rokopwälieló ewe leenien móótun king, nge a wor rüwe me fömön souakkomw ra móót wón ekkewe leenien móótun king, ra üföüf üüf mi tam o pwechepwech o a wor mwärämwär kolt wón möküreer. 5Iwe, a fiifiwu inefi me püng chopwulap me möngüüngü seni ewe leenien móótun king. A wor füüföch tööl mi ngetenget me mwen ewe leenien móótun king. Ikkeiir ekkewe füümön Ngünün Kot.

6A pwal wor och mettóch mi nóm mwen ewe leenien móótun king a usun chök ew mataw seni kilaas, a kuruffat usun chök ewe faaw öüchchea itan krystal. Iwe, a wor fömön mönümanaw ra nóm lón ewe fäliel lukalapan me pwellin ünükkün ewe leenien móótun king. Nge wón inisin ekkeei mönümanaw a kuuló ren föün maas ra nóm mweer me lükisökürüür. 7Ewe äemönün mönümanaw a usun emön laion, ewe örüömönün mönümanaw a usun emön liälifföön kowu, wón mesen ewe öülümönün mönümanaw a usun wón mesen emön aramas, nge ewe öfömönün mönümanaw a usun emön ikel mi emeresaló pükässin usun chök nge mi ääs. 8Emön me emön leiin ekkewe fömön mönümanaw a wor en me wonofóch pöükkässin, nge ra kuuló ren föün maas mi rokopwälieló inisiir tori fän pöükkässiir kewe. Iwe, resap asöösö lerän me lepwin le apasa: “A pin, a pin, a pin, Ewe Samol Kot mi Unusen Manaman, I ewe a fen nóm seni chök lóóm, a nóm ikenäi, epwe pwal nóm lón ekkaan fansoun repwe feitto!”

9Iwe, iteiten fansoun lupwen ekkewe fömön mönümanaw ra kapasen elingaló me osuufölüw me kilisou ngeni ewe Emön mi móót wón ewe leenien móótun king, I ewe Emön mi manaw tori feilfeilló chök, 10ekkewe rüwe me fömön souakkomw ra chappetiw me mwen ewe Emön mi móót wón ewe leenien móótun king o fel ngeni I ewe Emön mi manaw tori feilfeilló chök. Ra isettiw mwäriir kewe me mwen ewe leenien móótün king o apasa:

11“Äm Samol me Kot, En chök a fich ngenuk óm kopwe angei ling me iteüöch me manaman. Pün En ka föri mettóch meinisin. Nge fän letipom, mettóch meinisin ra wor o fisitä.”

Ewe Laam a angei ewe taropwe mi öllüülüló

5Mwirin, ngang üwa küna pwe a wor echö taropwe mi öllüülüló a nóm lón pöüifichin ewe Emön mi móót wón ewe leenien móótun king. Ei taropwe a mak lón o a pwal mak wón ünükkün, nge a impwangaló ngeni fisu impwang. 2Iwe, ngang üwa küna emön chón läng mi pöchökkül a leüommóng le kökkö o apasa: “Iö a fich ngeni an epwe suuki ewe taropwe mi öllüülüló o atai impwangan kewe?” 3Nge, esap wor emön me wón läng ika wón fönüfan ika fään fönüfan a tongeni epwe suuki ewe taropwe ika nennelong lón. 4Iei minne, ngang üwa poputä le leüommóng lón äi kechiw pwokiten esap wor emön mi fich ngeni an epwe suuki ewe taropwe ika nennelong lón. 5Iwe, emön me leiin ekkewe souakkomw a üreniei: “Kosap kechiw. Nengeni, ewe Laion seni ewe einangen Judah, ewe Waaren David, a fen pwora o wiil, iei popun I a tongeni suuki ewe taropwe mi öllüülüló me impwangan kewe fisu.”

6Iwe, ngang üwa küna emön Laam a üütä lefilen ewe leenien móótun king me ekkewe fömön mönümanaw me leiin ekkewe rüwe me fömön souakkomw, usun chök nge a fen piin ninniló, nge a wor füüfóch mächään me füüföw föün mesan, ikkeeiir ekkewe füümön Ngünün Kot mi tiitiló leemelen unusen fönüfan. 7Iwe, ewe Laam a feilló o angei ewe taropwe mi öllüülüló seni lón pöüifichin ewe Emön mi móót wón ewe leenien móótun king.

A fich ngeni ewe Laam

8Iwe, lupwen ewe Laam a angei ewe taropwe mi öllüülüló, ekkewe fömön mönümanaw me ekkewe rüwe me fömön souakkomw ra chappetiw me mwen ewe Laam, nge emön me emön leiin ekkewe rüwe me fömön souakkomw a komwöch ewe sókkun pisekin likettik itan harp me ekkewe sepien asór mi för seni kolt mi ur ren ewe sókkun appach mi pwokkus ra keni fäniten asóren ötüöt, ikkeei än ekkewe chón pin iótek. 9Iwe, ra köölüw echö kööl mi fö o apasa:

“En chök a fich ngenuk óm kopwe angei ewe taropwe mi öllüülüló o suuki impwangan kewe, pün En ka ninniiló o ka mööni aramas ren chaóm fäniten Kot, seni iteiten einang me kapas me mwichen aramas me mwüü. 10Iwe, ka föri pwe iir repwe wiliti ew mwüü me souasór fäniten äm we Kot. Iwe, iir repwe nemenem wón fönüfan.”

11Mwirin, ngang üwa pwal attololó o üwa rongorong möngüüngün chómmóng chómmóng chón läng mi nóm pwellin ünükkün ewe leenien móótun king me ekkewe mönümanaw me ekkewe souakkomw. Resap fókkun lea ren üküükün chómmóngur, pün ina repwe ngöröw me ngöröw. 12Ra leüommóng le apasa: “A fich ngeni ewe Laam mi ninniiló pwe epwe angei manaman me wöw me tipächchem me pöchökkül me iteüöch me ling me feiöch!”

13Iwe, ngang üwa rongorong iteiten förien Kot kana meinisin mi nóm lón läng me wón fönüfan me fän fönüfan me wón mataw me ekkewe mettóch meinisin mi nóm lóór ra apasa: “Feiöch me iteüöch me ling me manaman tori feilfeilló chök än ewe Emön mi móót wón ewe leenien móótun king me ewe Laam!” 14Iwe, ekkewe fömön mönümanaw ra apasa: “Amen!” Iwe, ekkewe souakkomw ra chappetiw o fel.

Ewe äewin impwang a suuk: Ewe chón feilló maun

6Iwe, lupwen ewe Laam a suuki ewe äewin leiin ekkewe fisu impwang, ngang üwa attololó o üwa rongorong emön me leiin ekkewe fömön mönümanaw a apasa fän mwelian mi leüommóng usun püngün chopwulap: “Kopwe feitto.” 2Iwe, ngang üwa nengeni o üwa mäirü pwe üwa küna emön óris mi pwechepwech a nóm mwei. Ewe chón waawa ewe óris a kömwöch efóch esefich, nge emön a ngeni i epa mwärämwär mwärin chón wiil. Iwe, a feilliwu usun emön chón maun epwe willeni chómmóng maun.

Ewe oruuwen impwang a suuk: A fis maun wón fönüfan

3Lupwen ewe Laam a suuki ewe oruuwen impwang, ngang üwa rong ewe öruwömönün mönümanaw a apasa: “Kopwe feitto.” 4Iwe, pwal emön óris mi sangi paran a feiliwu. Iwe, a mwüümwütä ngeni ewe chón waawa ei óris pwe epwe angei kinamwe seni fönüfan pwe aramas repwe pwisin niifengeniir lefiler. Iwe, a kawor ngeni i efóch ketilas mi lapalaap.

Ewe öülüngätin impwang a suuk: A fis naffangawelón mettóch wón fönüfan

5Lupwen ewe Laam a suuki ewe öülüngätin impwang, ngang üwa rongorong ewe öülümönün mönümanaw a apasa: “Kopwe feitto.” Iwe, ngang üwa nengeni o üwa mäirü pwe üwa küna emön óris mi chól. Iwe, ewe chón waawa ei óris a kömwöch ew peaan kilo lón pöün. 6Iwe, ngang üwa rong och möngüüngü usun itä ngiingin nge a feitto seni leiin ekkewe fömön mönümanaw a apasa: “Liwinin ew kuache wiit, eföw denarius, iei ükükün liwinin emön chón angang lón ew rän, nge liwinin ülüngät kuache barli pwal eföw denarius. Nge tümwünöchüw pwe kosap asolapa ewe apüra me ewe wain.”

Ewe örüwänüen impwang a suuk: Mäló epwe chööfeil wón unusen fönüfan

7Lupwen ewe Laam a suuki ewe örüwänüen impwang, ngang üwa rong mwelien ewe öfömönün mönümanaw a apasa: “Kopwe feitto.” 8Iwe, ngang üwa nengeni o üwa mäirü pwe üwa küna emön óris mi önükkiör. Iwe, ewe chón waawa ei óris a iteni Mäló, nge Heidis a chök fitifätälei le tapweto mwirin. Iwe, a kawor ngeniir ar nemenem wón ew na rüwänüen fönüfan, pwe repwe niieló aramas ren ketilas, ren echik, ren samwawtter me ren ekkewe maan mwacho wón fönüfan.

Ewe elimuen impwang a suuk: än ekkewe chón lükü mi ninniiló siö

9Lupwen ewe Laam a suuki ewe elimuen impwang, ngang üwa küna me fän ewe róngen asóren ötüöt ngünün chókewe meinisin mi ninniló fäniten ewe kapasen Kot pwal fäniten ar tupwöl lón ar pwärätä. 10Iwe, ra leüommóng le siö ngeni ewe Samol o apasa: “Äm Chón Nemenem mi pin o enlet, epwe ifa üküükün langttamen ewe fansoun me mwen óm kopwe öpwüngü me älemööw chaam wón chókewe mi wilipósóló wón fönüfan?” 11Mwirin, a einet ngeni emön me emön leiir echö üüf mi tam o pwechepwech. Iwe, a esilesil ngeniir pwe repwe mwo asöösöló lón ekis chök fansoun tori ewe iteit fäniten chiener kewe amanaw me pwiir me fefiner kewe epwe unusöchchüló, iir ekkewe repwe ninniiló usun chök pwal iir.

Ewe awonuwen impwang a suuk: Epwe fis kókkótóngawen fän läng

12Lupwen ewe Laam a suuki ewe awonuwen impwang, ngang üwa attololó o üwa mäirü pwe a fis och chechchechin fönü mi lapalaap. Iwe, ewe akkar a rocholó usun chök chólun echö mangaku mi för seni ünöünen kuuch mi chól o unusen ewe maram a par usun chök önüwen chcha. 13Iwe, ekkewe füün läng ra turutiw wón fönüfan, usun chök föün efóch irä fiik ra mworomworetiw lón fansoun patapaten leefeng lupwen äsäpwääl mi pöchökkül a wichikiir. 14Iwe, fäileng a móróló usun chök echö taropwe a ölüülüló. Iwe, iteiten chuuk me ekkewe fönüen leemataw ra mwöküt seni en me leenian.

15Mwirin, ekkewe kingen fönüfan me ekkewe aramas tekia me ekkewe meilapen sounfiu me ekkewe aramas pisekisek me ekkewe aramas mi wätte maneer, pwal iteiten emön me emön aramas, amanaw me chón ngas ra opoló lón ekkewe fööimw me lón pwangen ekkewe achaw wón ekkewe chuuk. 16Iwe, ra kökkö ngeni ekkewe chuuk me ekkewe achaw o apasa: “Öüpwe turutiw wóóm o aopa keemiló seni wón mesen ewe Emön mi móót wón ewe leenien móótun king pwal seni än ewe Laam soong, 17pün ewe rän mi lapalaap, ewe ränin ar soong a war, nge iö epwe tongeni üütä?”

Ekkewe chón Israel mi impwangeló

7Mwirin ei, ngang üwa küna fömön chón läng ra üüta lón ekkewe rüwänü lepwokukuun pelien fönüfan, nge ra ömwöchätiw ekkewe rüwänü itiitin äsäpwäälin fönüfan, pwe äsäpwääl esap chüen enien wón fönüfan ika wón mataw ika enieniti efóch irä. 2Mwirin, ngang üwa küna pwal emön chón läng a feittiw seni öötiw, äwenewenen eweia akkar a töötä me ie, nge a wor ren ewe impwang än ewe Kot mi manaw. Iwe, a leüommóng le pwuchöör ngeni ekkewe fömön chón läng mi mwüümwütä ngeniir ar manaman pwe repwe efeiengawa fönü me mataw, 3o a apasa ngeniir: “Öüsap mwo efeiengawa fönü ika mataw ika ekkewe irä tori äm äipwe wees le impwangei wón eten mesen ekkewe amanaw nöün ach we Kot.” 4Iwe, ngang üwa rongorong iteiten chókewe ra impwang. Üküükün ipwükü fäik me rüwänü ngöröw seni iteiten ekkewe einangen nöün Israel kewe mwän:

5Engol me ruu ngöröw seni ewe einangen Judah ra impwang; engol me ruu ngöröw seni ewe einangen Reuben; engol me ruu ngöröw seni ewe einangen Kad; 6engol me ruu ngöröw seni ewe einangen Asher; engol me ruu ngöröw seni ewe einangen Naftali; engol me ruu ngöröw seni ewe einangen Mannasah; 7engol me ruu ngöröw seni ewe einangen Simeon; engol me ruu ngöröw seni ewe einangen Levi; engol me ruu ngöröw seni ewe einangen Issakar; 8engol me ruu ngöröw seni ewe einangen Zebulun; engol me ruu ngöröw seni ewe einangen Josef; engol me ruu ngöröw seni ewe einangen Benjamin ra impwang.

Ewe mwichen aramas mi chómmóng mi küna ngas lupwen ewe fansoun riäfföü lapalaap wón fönüfan

9Mwirin ei, ngang attololó nge üwa mäirü pwe üwa küna ew mwichen aramas mi chómmóng esap wor emön a tongeni älleaniir, seni iteiten ekkewe mwüü, seni ekkewe einang meinisin me aramas me kapas, ra üütä me mwen ewe leenien móótun king pwal mwen ewe Laam. Ra üföüf üüf mi tam o pwechepwech o ra kömwöch lón pöür paan ewe irä usun nüü itan palm. 10Iwe, ra leüommóng le pwupwuchöör o apasa: “Ewe alen manaw a feitto seni ach we Kot, ewe mi móót wón ewe leenien móótun king pwal seni ewe Laam!”

11Iwe, ekkewe chón läng meinisin ra üütä pwellin ünükkün ewe leenien móótun king me ünükkün ekkewe souakkomw me ekkewe fömön mönümanaw. Iwe, ra chappetiw mwen ewe leenien móótun king o fel ngeni Kot, 12o apasa: “Amen! Feiöch me ling me tipächchem, pwal kilisou me iteüöch me manaman me pöchökkül än chök ach we Kot esap fókkun mwüch tori feilfeilló chök. Amen!”

13Mwirin, emön me leiin ekkewe souakkomw a kapas ngeniei o apasa: “Iö ekkeei mi üföüf üüf mi tam o pwechepwech, nge iä ra feitto me ie?”

14Iwe, ngang üwa apasa ngeni i: “Äi samol, en ka silei.” Mwirin, i a apasa ngeniei: “Ikkeiir ekkewe mi toowu seni lón ewe riäfföü mi lapalaap. Ra limeti üfeer kana o föri pwe repwe pwechepwech lón chaan ewe Laam. 15Iei minne, ra üütä mwen än Kot we leenien móótun king o ra angang ngeni I lón an we imwenfel lerän me lepwin. Iwe, ewe Emön mi móót wón ewe leenien móótun king epwe nónnóm leiir o emeresaló an we imw mangaku wóór pwe epwe öchchünóór. 16Resap chüen echik, resap pwal chüen kaaka; resap kar ren pwichikkaren ewe akkar, esap pwal wor och sókkun pwichikkar epwe toriir. 17Pün ewe Laam mi nóm lukalapen ewe leenien móótun king epwe I ar chón masen siip. I epwe emmweniir ngeni ekkewe pwuachchen kólikin manaw. Iwe, Kot epwe tölüpwaseló iteiten chönün maas seni meseer.”

Ewe efisuuen impwang a suuk: Minne a fis me mwen ekkewe fisu rappwa repwe tik

8Lupwen ewe Laam a suuki ewe efisuuen impwang, a wor fanafanaló lón unusen läng lón üküükün esóp kulók.

2Mwirin, ngang üwa küna füümön chón läng mi üütä me mwen Kot, nge a kawor ngeniir fisu rappwa.

3Iwe, pwal emön chón läng a feitto o üütä ren ewe róngen asór fän och leenien ekkei mi för seni kolt fäniten leenien mwolien ekkei mi kü pwe kekken ewe asóren ötüöt. A kawor ngeni ei chón läng chómmóng appach mi pwokkus pwe epwe ääni asór fiti ekkewe iótek än ekkewe chón pin meinisin wón ewe róngen asór mi för seni kolt mwen ewe leenien móótun king. 4Iwe, ötüötün ewe appach mi pwokkus fiti ekkewe iótek än ekkewe chón pin a ötütä mwen Kot seni lepöün ewe chón läng. 5Mwirin, ewe chón läng a angei ewe sepien mwolien ekkei o amasowa ren ekkei seni ewe róngen asóren keek. Iwe, a oturätiw ewe sepien ekkei wón fönüfan. Mwirin, a püng chopwulap, a wor üngüüng me fiifi inefi me och chechchechin fönü.

6Iwe iei, ekkewe füümön chón läng mi wor reer ekkewe fisu rappwa ra amolleretä pwe repwe le ettiki ekkewe rappwa.

Ewe äewin rappwa a tik: Irä ra karóló

7Ewe äemönün chón läng a ettiki nöün we rappwa. Iwe, üten faaw me ekkei mi nofit fengen me chcha ra koturutiw wón fönüfan. Iwe, ew na ülüngätin fönüfan a karaló, ew na ülüngätin ekkewe irä ra karóló o fetil meinisin ra pwal karóló.

Ewe oruuwen rappwa a tik: Feiengaw a küüw ekkewe mataw

8Ewe örüömönün chón läng a ettiki nöün we rappwa. Iwe, och mettóch usun ew chuuk mi fókkun wätte o ngetenget ren ekkei a koturutiw lón mataw. Iwe, ew na ülüngätin mataw a wiliti chcha. 9Ew na ülüngätin mönümanaw meinisin mi nóm lón mataw ra mäló, pwal ew na ülüngätin ekkewe siip ra taaló.

Ewe öülüngätin rappwa a tik: Feiengaw a küüw ekkewe kólik

10Ewe öülümönün chón läng a ettiki nöün we rappwa. Iwe, eföw füü mi fókkun wätte a turutiw seni läng o a ngetenget usun efóch tööl. Iwe, a turutiw wón ew na ülüngätin ekkewe chaanpwuupwu me ekkewe pwuachchen kóluk. 11Iten ewe füü, “Amaras”. Ew na ülüngätin ekkewe kólik ra marasaló ren. Iwe, chómmóng aramas ra mäló ren ewe kólik pwokiten a fókkun maras.

Ewe örüwänüen rappwa a tik: Feiengaw a küüw läng

12Ewe öfömönün chón läng a ettiki nöün we rappwa. Iwe, ew na ülüngätin ewe akkar a feiengaw me ew na ülüngätin ewe maram me ew na ülüngätin ekkewe füü, iei popun pwe ew na ülüngätin sarameer a rocholó. Iwe, ew nä ülüngätin lerän resap tin, pwal usun chök ew na ülüngätin lepwin.

13Mwirin, ngang üwa attololó o üwa rong emön ikel a kökkö ren mwelian mi leüommóng lupwen a äkkäs luukalapen läng, nge a apasa: “Feiengaw, feiengaw, feiengaw ngeni chókana mi wilipósóló wón fönüfan, pwokiten meet epwe fis lupwen ekkewe ülümön ömwüchchülón chón läng repwe ettiki nöüür kewe rappwa.”

Ewe elimuwen rappwa a tik: Ekkewe liffichimas seni lón ewe pwaang mi alóllóól esap wor epin

9Mwirin, ewe elimmönün chón läng a ettiki nöün we rappwa. Iwe, üwa küna eföw füü mi fen turutiw wón fönüfan seni läng. Iwe, a kawor ngeni ei füü kiien ewe pwaang mi fókkun alóllóól esap wor epin. 2Iwe, lupwen a suuki ewe pwaang mi fókkun alóllóól esap wor epin, ötüötün ekkei a ötüwu seni lón ewe pwaang nge a usun ötün ew uumw mi wätte. Iwe, ewe akkar me fän läng ra kirocholó ren ewe ötüöt mi ötüwu seni lón ewe pwaang. 3Mwirin, liffichimas ra toowu seni lón ewe ötüötün ekkei o ra feittiw wón fönüfan. Iwe, a kawor ngeni ekkeei liffichimas och sókkun manaman pwe repwe kükkük, usun chök manamanen ekkewe inen mönnükamen fönüfan. 4Iwe, a wor kapasen öllük ngeniir pwe resap efeiengawa ekkewe fetilin fönüfan ika och irä mi fót ika ekewe wölüwöl. Nge repwe chök efeiengawa ekkewe aramas meinisin esap nóm än Kot we impwang wón etenmeseer. 5A mwüümwütä ngeni ekkewe liffichimas pwe repwe chök eriäfföwü ekkewe aramas lón üküükün limu maram, nge resap niireló. Riäfföün ar metek a usun chök riäfföün metekin än emön inen mönnükam küüw emön aramas. 6Iwe, lón ekkana rän, aramas repwe kütta mäló nge resap küna, repwe äneänei ar repwe mäló, nge mäló epwe sü seniir.

7Iwe, lapalapen ekkewe liffichimas ra wewe ngeni ekkana óris mi mollotä ngeni maun. A wor mwärämwär kolt mwärin chón pwora ra nóm wón mökürer, nge wón meser ra wewe ngeni wón mesen aramas. 8Meeten mökürer a usun chök meeten möküren fefin, nge ngiir ra usun ngiin laion. 9A wor chechchen leupweer usun chechchen leeupw mi för seni mächä, nge üngüüngün äsäpwäälin pöükässiir ra wewe ngeni üngüüngün chómmóng wókenin maun óris ra lukeiir lupwen ra säälong lón maun. 10A wor lüsiäler me ar leenien kükkük wón lüsiäler kewe, nge ra kükkük usun ekaan inen mönnükam. Iwe, ar manaman pwe repwe efeiengawa aramas lón ükükün limu maram a nóm wón lüsiäler kewe. 11Iwe, ewe chón läng seni lón ewe pwaang mi alóllóól esap wor epin ina i nöür king a wisen nemeniir. Itan lón kapasen Hipru, Abaddon, nge lón kapasen Kriis a iteni Apollyon.

12Ewe äewin feiengaw a wes. Nge nengeni, a chüen wor ruu feiengaw repwe war.

Ewe awonuwen rappwa a tik: Ekkewe chón läng ren ewe chaanpwuupwu Eufreitis

13Mwirin, ewe awonomönün chón läng a ettiki nöün we rappwa. Iwe, üwa rong och möngüüngü a kapas seni ekkewe fófóch usun mächään maan mi ititä seni wón lepwokukuun ewe róngen asór mi för seni kolt. Ei róngen asór a üütä mwen Kot. 14Ewe möngüüngü a apasa ngeni ewe awonomönün chón läng mi kömwöch ewe rappwa: “Kopwe epichaló ekkewe fömön chón läng mi föötek ren ewe chaanpwuupu mi lapalaap Eufreitis.” 15Iei minne, ekkewe fömön chón läng mi chök akkamol fäniten ei kulók, ei rän, ei maram me ei ier, ra kepichiló pwe repwe niieló ew na ülüngätin aramas. 16Iteiten ekkewe sounfiu mi waawa óris, rüöpwükü million. Ngang üwa rongorong üküükün iteiter ei.

17Iwe, iei usun äi üwa küna lón künäei we ekkewe óris me ekkewe chón waawa óris. Ekkewe chón waawa óris ra pippisek ewe chechchen leeupw önüan a usun ekkei me ewe faw öüchchea itan sapfair me usun primston. Möküren ekkewe óris ra usun möküren laion. Iwe, ekkei me ötüötün ekkei me primston ra toowu seni lón aweer. 18Ew na ülüngätin aramas mi nóm wón fönüfan ra ninniiló ren ekkeei ülüngät feiengaw: ren ewe ekkei, ewe ötüöt me ewe primston mi toowu seni lón awen ekkewe óris. 19Pün manamanen ekkewe óris a nóm lón aweer me wón lüsiäler kewe. Pün lüsiäler kewe a wor möküreer usun serepenit, ra aea le ekinasa aramas.

20Nge ekkewe lussun aramas resap ninniiló ren ekkeei feiengaw, resap mochen pwe repwe siwili ar ekiek o kul seni ar kewe föfför ra föri ren pöüür, resap pwal fangatä ar fel ngeni ngüün mi ngaw me ekkewe uluulun önümwäl mi för seni kolt me silfer me piraas me faaw me mwüüch resap tongeni küna mweer ika rong ika fätäl. 21Ekkewe aramas resap pwal siwili ar ekiek pwe repwe kul seni ar niieló aramas ika ar angangen roong ika ar föfförün lisowu ika ar soolä.

Ewe chón läng mi pöchökkül mi kömwöch echö kükkün taropwe

10Mwirin, ngang üwa küna pwal emön chón läng mi pöchökkül a feittiw seni läng nge a finifiniló lón ew kuchu. Efóch resiim a nóm asen möküran o wón mesan a saramaram usun chök ewe akkar, nge pecheen kana ra usun chök ngetengeten ekkei mi ngetemmóng. 2A wor echö kükkün taropwe mi äfächcheló a nóm lón pöün ei chón läng. Ei chón läng a üütä, nge peliifichin pecheen a pwuutiw wón mataw, nge peliimöngün pecheen a pwuutiw wón fönü. 3Iwe, a leüommóng le pwuchöör usun emön laion lupwen a wörüwör. Iwe, lupwen a pwuchöör, möngüüngün fisu chopwulap ra kapas. 4Iwe, lupwen ekkewe fisu chopwulap ra kapas, itä üpwe le poputä le mak, nge üwa rong och möngüüngü seni läng a apasa ngeniei: “Kopwe impwangeló meet ekkewe fisu chopwulap ra apasa. Kosap makkeetiw meet ewe ra apasa.”

5Mwirin, ewe chón läng mi pöchökkül ngang üwa piin küna mi üütä o pwuutiw efóch pecheen lemataw nge efóch wón fönü a eitietä pöüiifichin ngeni läng. 6Iwe, a öpölü ewe Emön mi manaw tori feilfeilló chök, ewe mi föri läng me meet mi nóm lón, fönüfan me meet mi nóm lón, pwal mataw me meet mi nóm lón pwe esap chüen wor witiwitiló, 7nge lón ekkewe rän lupwen ewe öfümönün chón läng epwe ettiki nöün we rappwa, än Kot we akkóót mi mwónómwón epwe pwönüetä, usun chök minne I a esile ngeni nöün kewe amanaw, ekkewe soufós.

John a äni ewe kükkün taropwe

8Mwirin, ewe möngüüngü ngang üwa fen rong seni läng a kapas säfäl ngeniei o apasa: “Kopwe feilló o angei ewe kükkün taropwe mi äfächcheló seni lón pöün ewe chón läng mi ipwetiw wón mataw me fönü.”

9Iei minne, ngang üwa feilló ren ewe chón läng o üreni pwe epwe ngeniei ewe kükkün taropwe. Iwe, ewe chón läng a apasa ngeniei: “Kopwe angei ei taropwe o äni. Epwe föri pwe epwe maras lón luukom, nge lón awom epwe araar usun chönün chunen.” 10Iwe, ngang üwa angei ewe kükkün taropwe seni lón pöün ewe chón läng o üwa äni. Iwe, a araar usun chönün chunen me lón awei, nge lupwen üwa oromaló, a maras lón luukei. 11Mwirin, ewe chón läng a üreniei: “Kopwe fókkun oosuni säfäli usun chómmóng mwichen aramas me mwüü me kapas me king kana.”

Ekkewe rüömön chón pwärätä

11Mwirin, a keit ngeniei efóch wóók fäniten öüküük mi wewe ngeni efóch wóók o emön a apasa ngeniei: “Kopwe feilló o öükü ewe imwenfelin Kot me ewe róngen asór, kopwe pwal älleani iteiten ekkewe chón fel ikenan. 2Nge kosap öükü ewe leeni mi kinewu seni lükün ewe imwenfel. Kopwe chök likiti, pün a fen mwüümwütä ngeni ekkewe Sentail. Iwe, repwe pwuurätiw ewe telinimw mi pin lón ükükün fäik me ruu maram. 3Iwe, ngang üpwe fang ngeni neii kewe rüömön chón pwärätä ar manaman. Iwe, repwe üföüf mangakuun letipeta mi för seni tuuk o repwe afalafal lón üküükün engöröw rüöpwükü wone rän.” 4Ekkeei rüömön soufós iir ekkewe rüófóch irä olif me ekkewe ruu leenien etittin mi üütä mwen ewe Samolun fönüfan. 5Iwe, are emön a mochen epwe efeiengawa ekkeei rüwömön chón pwärätä, ekkei epwe ngetewu seni lón aweer o kenaló ekkana chón opwut iir. Are emön a mochen epwe efeiengawer, iwe epwe iei usun an epwe ninniiló. 6A wor än ekkeei rüömön chón pwärätä manaman ar repwe esipaló fän läng pwe esap püng üüt lón öükükün ekkewe rän ra esilefeili än Kot kapas. A pwal wor ar manaman ar repwe ewili ekkewe kólik ngeni chcha o efeiengawa fönüfan ren iteiten sókkun määlap iteiten fansoun ineet chök iir ra mochen.

7Iwe, lupwen repwe äwesaló ar angangen pwärätä, ewe maan mwacho mi toowu seni lón ewe pwaang mi alóllóól esap wor epin, epwe maun ngeniir. Iwe, epwe okkufuur o niireló. 8Iwe, soomar kewe repwe chök nóm lón alen ewe telinimw mi lapalaap. Lón kapas mwónomwón, ei telinimw a iteni Sodom me Egypt, ia ar we Samol a iräpenges ie. 9Chókana seni ekkewe mwichen aramas me einang me kapas me mwüü repwe katol inisin ekkewe soomä lón üküükün ülüngät esóp rän. Esap mwüümwütä än ekkewe soomä repwe peias. 10Iwe, ekkewe chón wilipósen fönüfan repwe pwapwa o efisi apwapwan o repwe tiiti fengen ar liffang, pwokiten ra mäló ekkeei rüömön soufós mi piin eriäfföwü chókana iir chón wilipósen fönüfan.

Ekkewe rüömön chón pwärätä ra manawsäfälitä

11Nge mwirin ekkewe ülüngät esóp rän, och ngasangasen manaw seni Kot a tolong lón ekkewe rüömön chón pwärätä. Iwe, ra üütä. Iwe, nuokkus mi lapalaap a tori chókana meinisin mi katol iir. 12Mwirin, ekkewe rüömön chón pwärätä ra rong ew möngüüngü mi leüommóng seni läng a apasa ngeniir: “Öüpwe feittä ikeei.” Iwe, ra feittä läng lón ew kuchu, nge chón opwuter kana ra katol iir.

13Lón ewe chök kulók, a fis och chechchechin fönü mi fókkun lapalaap. Iwe, ew na engolun ewe telinimw a taaló. Üküükün fisu ngöröw aramas ra mäló ren ewe chechchechin fónü. Nge ekkewe lussun aramas resap mäló ra nuokkus o ra enlingaló ewe Koten läng.

14Ewe oruuen feiengaw a wes, nge nengeni, iei ewe öülüngätin feiengaw epwe le mwittir wareto.

Ewe efisuen rappwa a tik: Ewe kapasen esilesil usun ewe mwüü

15Mwirin, ewe öfüümönün chón läng a ettiki nöün we rappwa. Iwe, a wor möngüüngü mi leüommóng lón läng ra apasa: “Ewe mwüün fönüfan a wiliti mwüün ach we Samol me mwüün nöün we Kraist. Iwe, I epwe nemenem lón fansoun ese mwüch tori feilfeilló chök!” 16Iwe, ekkewe rüwe me fömön souakkomw mi móót wón ar kewe leenien móótun nemenem mwen Kot ra chappetiw o fel ngeni Kot. 17Iwe, ra apasa: “Äm aia kilisou ngenuk En Samol Kot mi Unusen Manaman, En ewe Emön ka nóm iei, ka fen nónnóm seni chök lóóm, pün iei En ka fen angei óm manaman mi lapalaap o ka fen poputä le nemenem. 18Chón ekkewe mwüü ra soong, nge óm lingeringer a war. A war ewe fansoun fäniten än ekkewe mi mäló repwe köpwüng me fäniten än noum kewe amanaw repwe angei liwiniir, iir ekkewe soufós me chón pin me chókana mi nuokkusiti itom, ekkewe mi kis me mi tekia, pwal fäniten óm kopwe arosaló ekkewe chón atai fönüfan.”

19Mwirin, ewe imwenfelin Kot lón läng a suukuló. Iwe, ewe pwórun än Kot we pwon a pwääló me lón an we imwenfel. Iwe a fiifi inefi me üngüüng me püng chopwulap, a wor ew chechchechin fönü me üten faaw mi chou.

Ewe fefin, ewe monukól äät me ewe drakon

12Iwe, och esissil mi lapalaap a pwä me lón läng. Emön fefin mi üföüfóló ewe akkar, nge ewe maram a nóm fän pachapachan o epa mwärämwär mwärin chón wiil mi wor engol me rüöföw füü wón a nóm wón möküran. 2Ei fefin mi pwoopwo, nge a pwupwuchöör, pwokiten a cheeri metekin an epwe le nöünöüló. 3Iwe, pwal och esissil a pwä me lón läng. Nengeni, emön drakon mi wätte o parapar, a wor fisu möküran me engol mächään, nge a wor füüpa ekkewe mwärämwär mwärin king ra nóm wón möküran kewe. 4Mechen ei drakon a älupwäätiw ew na ülüngätin ekkewe füün läng o otururetiw wón fönüfan. Mwirin, ewe drakon a üütä mwen ewe fefin mi arap ngeni an epwe nöünöü pün epwe ochei nöün neminewe we mönükól lón chök ewe ótun epwe upwutiw. 5Iwe, ewe fefin a nöünätiw emön mönukól äät, emön epwe nemeni ekkewe mwüü meinisin ren efóch wókun king wóók mächä. Nge nöün ewe fefin we mönukól äät a pwisipwisitä ngeni Kot me ngeni an we leenien móótun king. 6Iwe, ewe fefin a süüló lón ewe fönüapö, ia a wor ie ew leeni fänitan mi mollotä meren Kot, ia i epwe tümwün me ie lón üküükün engöröw rüöpwükü wone rän.

Satan a koturutiw seni läng

7Iwe, a fis maun lón läng. Mikael me ekkewe chón läng mi nóm fän an nemenem ra fiiu ngeni ewe drakon. Iwe, ewe drakon me nöün kewe chón läng ra öppölüer le fiiu ngeniir. 8Nge ewe drakon a kuf, ina pwata esap chüen wor och leeni fäniter lón läng. 9Iwe, ewe drakon mi fókkun lapalaap a koturutiw. Iei i ewe serepenitin lóóm, ewe mi iteni ewe devil me Satan, i ewe chón otupwaló unusen fönüfan. I a koturutiw wón fönüfan me nöün kewe chón läng ra fiti i le koturutiw.

10Iwe, ngang üwa rongorong ew möngüüngü mi leüommóng me lón läng a apasa: “Iei a war ewe fansoun ngaseló me manaman me mwüün ach we Kot me än nöün we Kraist nemenem. Pün ewe chón ettipisi pwiich me fefinach kewe a fen koturutiw, i ewe mi oturur lerän me lepwin fän mesen ach we Kot. 11Iwe, iir ra okufu Satan ren chaan ewe Laam pwal ren ewe kapas iir ra pwärätä, pün resap echeni manawer, inamwo are repwe tolong lón mäló. 12Iei minne, öüpwe pwapwa ämi ekkewe läng me ämi ekkewe mi nónnóm lón ekkewe läng! Nge feiengaw ngeni kemi, ämi fönüfan me mataw! Pün ewe devil a fen feittiw reemi lón an lingeringer mi lapalaap, pwokiten i a silei pwe an fansoun a chök mwochomwooch.”

Ewe drakon a tapweri ewe fefin pwe epwe nii

13Iwe, lupwen ewe drakon a küna pwe i a fen koturutiw wón fönüfan, a tapweri ewe fefin mi piin nöünätiw ewe mönukól äät. 14Nge a kawor ngeni ewe fefin rüófóch pöükässin emön ikel mi wätte pwe epwe tongeni ässiló seni ewe serepenit o ässilong lón ewe fönüapö, ngeni ewe leeni ia i epwe tümwün me ie lón ükükün ew fansoun me ekkóch fansoun me esóp fansoun. 15Iwe, ewe serepenit a kusufawu kólik seni lón awan usun ew chaanpwuupwu mwirin ewe fefin, pwe epwe opwuueló neminewe ren och löölö. 16Nge fönüfan a älisi ewe fefin ren an ammasawaló awan o ünümaló ewe chaanpwuupwu ewe drakon a kusufawu seni lón awan. 17Mwirin, ewe drakon a lingeringeriti ewe fefin. Iwe, a feilló pwe epwe maun ngeni lussun mwirimwirin ewe fefin kewe, ngeni chókewe mi älleasochisi än Kot kewe öllük o kömwöchünnuk wón ekkewe kapasen let Jesus Kraist a pwärätä.

Ewe maan mwacho mi toowu seni lón ewe mataw

13Iwe, ewe drakon a üütä wón pien arossetin ewe mataw. Iwe, ngang üwa küna emön maanmwacho a toowu seni lón ewe mataw. A wor fisu möküran me engol mächään, nge a wor engol mwärämwär mwärin king wón mächään kewe. A wor iit mi turunufasei Kot wón ew me ew möküran kewe. 2Iwe, ewe maanmwacho ngang üwa küna, a usun emön leopard, nge pecheen kana ra usun pecheen emön pear, awan a usun awen emön laion. Iwe, ewe drakon a ngeni ei maanmwacho pwisin an manaman, an leenien móótun king me an nemenem mi lapalaap. 3Ew me leiin möküren ewe maanmwacho kewe a usun itä lapalapan nge mi kinas nge a mäló ren. Nge ewe kinas a fen móóló. Iwe, unusen chón fönüfan ra ingemwaar o ra tapweló mwirin ewe maanmwacho. 4Iwe, ra fel ngeni ewe drakon, pün i a ngeni ewe maanmwacho an manaman. Iwe, ra pwal fel ngeni ewe maanmwacho o apasa: “Iö a wewe ngeni ewe maanmwacho? Iö a tongeni epwe maun ngeni i?”

5Iwe, a mwüümwütä ngeni ewe maanmwacho ew aaw pwe epwe apasatä kapas lamalamtekia me kapasen turunufas. A pwal mwüümwütä ngeni an epwe sópweló le föri an nemenem lón ükükün fääik me ruu maram. 6Iwe, ewe maanmwacho a suukaló awan pwe epwe apasa kapasen turunufasei Kot o turunufasei itan me leenian we me chókewe mi nóm läng. 7A pwal mwüümwütä ngeni ewe maanmwacho pwe epwe maun ngeni ekkewe chón pin o epwe okkufuur. Iwe, a kawor ngeni an nemenem pwe epwe nemeni iteiten einang me mwichen aramas me kapas me mwüü, 8o ekkewe chón wilipósen fönüfan meinisin ra fel ngeni ewe maanmwacho, iteiten emön me emön esap mak itan lón ewe pwuken manaw. Iei ewe pwuk nöün ewe Laam mi ninniiló seni chök mwen än Kot esap mwo föri fönüfan.

9Are mi wor selingen emön, iwe, epwe rongorong. 10Are emön epwe ooló; iwe, epwe chök fätäl ngeni an epwe ooló. Are emön epwe ninniiló ren ketilas; iwe, epwe chök fätäl ngeni an epwe ninniiló ren ketilas. Iei ew kökkö fäniten mósónóttam me ölükülük ren ekkewe chón pin.

Ewe maanmwacho mi pwäätä seni wón fönüfan

11Mwirin, ngang üwa küna pwal emön maanmwacho a pwäätä seni wón fönüfan. A wor rüofóch mächään usun mächään emön appanen siip, nge a kapas usun emön drakon. 12A aea ekkewe pöchökkülen nemenem meinisin än ewe äemönün maanmwacho me mwen mesen ewe äemönün maanmwacho o föri pwe fönüfan me chón fönüfan meinisin repwe fel ngeni ewe äemönün maanmwacho, ewe minne kinasan we mi afeiengaw a fen a móóló. 13Ei örüömönün maanmwacho a föri esissil mi lapalaap pün a mwo nge föri pwe ekkei epwe feittiw wón fönüfan seni läng, nge aramas meinisin mi katol. 14Iwe, ren ekkeei manaman mi mwüümwütä ngeni pwe epwe föri fänäsengesin ewe äemönün maanmwacho, i a otupwaló ekkewe chón wilipósen fönüfan. I a üreniir pwe repwe föri och uluulun fäniten ar repwe asamolu ewe maanmwacho mi kinas ren ewe ketilas nge a manaw. 15Iwe, a mwüümwütä ngeni ewe örüömönün maanmwacho pwe epwe wor an manaman an epwe ngeni ewe uluulun ewe äemönün maanmwacho enienin ngasangas pwe ewe uluulun maanmwacho epwe tongeni kapas o öllük pwe chókana resap mochen fel ngeni uluulun we repwe ninniiló. 16Ewe örüömönün maanmwacho a pwal eriääni iteiten emön me emön aramas, ekkewe aramas mi lap me ekkewe mi kis, ekkewe mi pisekisek me ekkewe mi wöwingaw, ekkewe mi ngas me ekkewe amanaw pwe repwe esissil, epwe nóm wón iifichin kumwuchuur ika wón eten meseer, 17pwe esap wor emön epwe tongeni kamö ika amöömö, chiilón chök ika epwe wor ren ewe esissil, iei iten ewe maanmwacho we ika nampan itan.

18A öüchchea an epwe wor än emön tipächchem pwe epwe weweiti ei. Emön mi wor an wewe, epwe älleletafichi nampan ewe maanmwacho we, pün ena nampa ina nampan emön aramas. Iwe, nampan ei, wonopwükü wone me wonu.

Ewe Laam me ekkewe 144,000

14Mwirin, ngang üwa attololó o üwa küna ewe Laam a üütä wón ewe Chuuk Zion. A wor ipwükü fääik me rüwänü ngöröw aramas ra nóm ren, mi makketiw itan me iten Saman we wón eten meseer. 2Iwe, üwa rongorong och möngüüngü seni läng mi usun üngüüngün püngüpüngün nóó pwal usun püngün chopwulap mi üngümmóng. Ei möngüüngü ngang üwa rong a usun ngiingin chómmóng chón ettiki kewe pisekin likettik itan harp ra chufengen le ettik. 3Ei mwichen chón kööl mi chómmóng ra köölüw echö kööl mi fö me mwen ewe leenien móótun king pwal mwen ekkewe fömön mönümanaw me ekkewe rüwe me fömön souakkomw. Iwe, esap wor emön a tongeni sile ewe kööl, chiilón chök iir ekkewe ipwükü fääik me rüänü ngöröw. Ikkeiir ekkewe ra fen kämööwu seni fönüfan. 4Ikkeiir chókewe resap elimengawer ren fefin, pün iir ra pwisin tümwünür pwe repwe limöch. Ikkeiir ekkewe ra tapweló mwirin ewe Laam ekis meinisin ia I a feilló ie. Ikkeiir ekkewe ra fen kamööwu me leiin aramas pwe iir ewe asóren mwen uwa ngeni Kot pwal ngeni ewe Laam, 5o esap wor och chofona a toowu seni lón awer pün esap wor itengawer.

Än ekkewe ülümön chón läng poraus

6Mwirin, ngang üwa küna pwal emön chón läng a äkkääs lukalapen läng, nge a uwei ewe poraus allim esap mwüch pwe epwe aronga ngeni ekkewe chón wilipósen fönüfan, ngeni iteiten mwüü, einang, kapas me mwichen aramas. 7Iwe, a kökkö fän mwelian mi leüommóng o apasa: “Öüpwe nuokkusiti Kot o elingaló I, pün an öpwüng a war. Öüpwe fel ngeni I, ewe mi föri läng me fönüfan, mataw me ekkewe pwuachchen kóluk.”

8Mwirin, pwal emön chón läng (iei i ewe örüwömönün chón läng) a tapweto mwirin ewe emön o apasa: “A taaló, a taaló Babylon mi lapalaap, i neminewe mi föri pwe chón ekkewe mwüü meinisin repwe ünümi ewe wainin mocheniän an föfförün lisowu.”

9Iwe, pwal emön chón läng, iei i ewe öülümönün, mi tapweto mwirin ekkewe rüömön, a leüommóng le apasa: “Are emön aramas a fel ngeni ewe maanmwacho me uluulun we o etiwa och esissil wón eten mesan ika wón kumwuchun, 10ei aramas epwe pwal ünümi ewe wainin än Kot soong mi unusen pöchökkül esap nofit a niniilong lón än Kot we kapen lingeringer. Iwe, ei aramas epwe riäfföü lón ewe ekkei me primston me mwen mesen ekkewe chón läng mi pin pwal mwen mesen ewe Laam. 11Iwe, ötüötün ar riäfföü epwe ötütä feilfeilló chök. Iwe, esap wor ar asöösö lerän me lepwin. Ikkeiir ekkewe chón fel ngeni ewe maanmwacho me uluulun we, me iö mi etiwa esissilen itan we.” 12Iei ew kökkön mósónóttam le engngiló fäniten ekkewe chón pin mi älleasochisi än Kot kewe öllük o likiitü le ölükülük ngeni Jesus.

13Iwe, ngang üwa rong ew möngüüngü seni läng a apasa: “Kopwe makkeetiw ei: “Ra feiöch ekkewe sootup mi mäló lón ewe Samol seni iei feilló.” Ewe Ngüün a apasa: “Ewer, ra wesewesen feiöch, pün repwe le asöösö seni ar kewe angang weires me riäfföü, pün ar kewe föfför repwe tapweto mwiriir.”

Ewe ömwüchchülón kinikin üwään rääs wón fönüfan

14Mwirin, üwa attololó nge üwa küna ew kuchu mi pwechepwech. Iwe, a wor emön a móót wón ewe kuchu, usun emön Nöün Aramas, a wor epa mwärämwär kolt wón möküran mwärin chón wiil o efóch kama mi ken a nóm lón pöün. 15Iwe, pwal emön chón läng a toowu seni lón ewe imwenfel lón läng, a leüommóng le kökkö ngeni Ätewe mi móót wón ewe kuchu: “Kole ätteralong noum na kama o kinikin, pün a tori ewe fansoun kinikin uwään rääs, pwokiten rääsin fönüfan a unusen maraló. 16Iei popun, Ätewe mi móót wón ewe kuchu a ätteraló nöün we kama wón fönüfan o a wes ewe kinikinin uwään resin unusen fönüfan.

A kinikin ekkewe föün irän wainin soong

17Mwirn, pwal emön chón läng a toowu seni lón ewe imwenfel mi nóm läng, pwal i a wor ren efóch kama mi ken. 18Iwe, pwal emön chón läng a feitto seni ewe róngen asór, i ewe chón läng mi wor an nemenem wón ekkei. Iwe, a leüommóng le kökköló ren ewe emön chón läng mi wor ren ewe kama mi ken o apasa: “Kole nöünöü noum na kama mi ken o pöküw ekkewe umwun föün irän wain seni ewe tännipin irän wain wón fönüfan, pün an kewe föün irän wain ra maaw.” 19Ina minne, ewe chón läng a ätteraló nöün we kama wón fönüfan o a pöküw ekkewe umwun föün irän wain seni ewe rääs wón fönüfan. Iwe, a otururolong lón ewe wätten leenien pwuupwu föün irän wainin än Kot soong. 20Ekkewe föün irän wain ra pwuupwu lón ewe leenien pwuupwu föün irän wain mi nóm lükün ewe telinimw. Iwe, chcha a pwupwuuwu seni lón ewe leenien pwuupwu föün irän wain o a löölötä tori öüküükün tekian ewe fööfö wón awen óris o a pwupwuuló lón üküükün engöröw wonopwükü stadia.a

Minne a fis me mwen an epwe niini ekkewe sepien än Kot soong

15Mwirin, üwa küna pwal och esissil me lón läng, a fókkun lapalaap o amwaraar. Füümön chón läng ra kömwöch ekkewe fisu feiengaw, ikkeei ekkewe ömwüchchülón feiengaw, pün än Kot soong epwe unusöchüló reer. 2Iwe, ngang üwa küna och mettóch usun itä lapalapen ew mataw mi fatafatöch usun kilaas mi nofit fengen me ekkei. Ngang üwa pwal küna chókewe mi pworaiti ewe maanmwacho me uluulun we me nampan itan we ra üütä ünükkün ewe mataw mi fatafatöch usun kilaas. Iir meinisin ra kömwöch lón pöüür ekkewe sókkun pisekin likettik itan harp Kot a ngeniir. 3Iwe, ra köölüw ewe kööl än Moses, nöün Kot we amanaw me ewe kööl usun ewe Laam o apasa: “Ra men fókkun lapalaap o amwaraar óm kewe föfför, Samol Kot mi Unusen Manaman! A pwüng o let óm kewe sókósók, En Kingen ekkewe mwüü! 4Iö esap nuokkusituk o elingaló itom, En Samol? Pün En chök ka pin. Chón ekkewe mwüü meinisin repwe feitto o fel ngenuk, pwokiten óm kewe föfför mi pwüng ra fen pwääpwäló.”

5Iwe, mwirin ekkeei mettóch, ngang üwa netä o üwa küna ewe imwenfel mangaku lón läng a sukkuló, ia ewe pworun pwärätä a nóm ie. 6Iwe, ekkewe füümön chón läng mi kömwöch ekkewe fisu sepien feiengaw ra toowu seni lón ewe imwenfel. Ra üföüf mangaku mi pwechepwech o limelimöch o molupolup, ra pwal äfitti ngeni fän mwäriir riiri mi för seni kolt. 7Iwe, emön me leiin ekkewe fömön mönümanaw a eiti ngeni ekkewe füümön chón läng fisu sepi mi för seni kolt mi ur ren än Kot lingeringer, I ewe Kot mi manaw lón fansoun ese mwüch tori feilfeilló chök. 8Iwe, ewe imwenfel a uroló ren ötüötün ekkei mi feitto seni lingen Kot me seni an manaman. Iwe, esap wor emön a tongeni tolong lón ewe imwenfel tori än ekkewe füümön chón läng ra äwesaló le lupenätiw ekkewe fisu määlap.

16Mwirin, ngang üwa rong ew möngüüngü mi leüommóng a kökkö seni ewe imwenfel o üreni ekkewe füümön chón läng: “Öüpwe feilló o lupenätiw masowen ekkewe fisu sepien än Kot lingeringer wón fönüfan.”

Masowen ewe äewin sepi: Ruupw mi emmetek

2Ina minne, ewe äemönün chón läng a feilló seni ewe imwenfel o lupenätiw masowen sepian we wón fönüfan. Iwe, ruup mi fókkun efeiengaw me emmetek a pwüküwu seni wón inisin ekkewe aramas mi ääni esissilen ewe maanmwacho we o fel ngeni uluulun we.

Masowen ewe oruuwen sepi: Mataw a wiliti chcha

3Ewe örüwömönün chón läng a lupenätiw masowen sepian we wón mataw. Iwe, mataw a wiliti chcha, usun chaan emön aramas mi mäló. Iwe, iteiten mettóch mi manaw mi nóm lón mataw ra mäló.

Masowen ewe öülüngätin sepi: Ekkewe kólik ra wiliti chcha

4Ewe öülümönün chón läng a lupenätiw masowen sepian we lón ekkewe chaanpwuupwu me ekkewe pwuachchen kólik. Iwe, ra wiliti chcha. 5Iwe, ngang üwa rong än ewe chón läng mi wor an nemenem wón kólik a apasa: “En ka pwüng ren óm awarato ekkeei köpwüng, en ewe Emön mi Pin, ka nóm iei o ka nóm seni chök lóóm. 6Pün iir ra össükü chaan ekkewe chón pin me ekkewe soufós. Iwe iei, en ka ngeniir chcha pwe repwe ünümi. Ina meet a fich ngeniir.” 7Iwe, ngang üwa rongorong ewe róngen asór a apasa: “Ewer, Samol Kot mi Unusen Manaman, a let o pwüng pwüngün óm kewe köpwüng.”

Masowen ewe örüwänüen sepi: Aramas ra kar ren ekkei

8Ewe öfömönün chón läng a lupenätiw masowen sepian we wón akkar. Iwe, a mwüümwütä ngeni ewe akkar pwe epwe keni aramas ren ekkei. 9Iwe, aramas ra kar ren wätten pwichikkaren ewe akkar, nge ra ótteki iten Kot, ewe mi wor an manaman wón ekkeei feiengaw. Iwe, resap siwili ar ekiek, kul seni ar tipis o kul ngeni Kot pwe repwe enlingaló Kot.

Masowen ewe elimuen sepi: Rochopwaak me metek

10Ewe elimmönün chón läng a lupenätiw masowen sepian we wón än ewe maanmwacho we leenien móótun nemenem. Iwe, mwüün ewe maanmwacho we a tolong lón rochopwaak. Ekkewe aramas ra lüülüw chönmwöngör pwokiten wätten metekin ar riäfföü, 11o ra ótteki ewe Koten läng fäniten ar metek pwal ren rupwuur kewe. Nge resap siwili ar ekiek, kul seni ar kewe föfföringaw o kul ngeni Kot.

Masowen ewe awonuen sepi: Ewe chaan pwuupwu Eufreitis a pwäsätä

12Ewe awonomönün chón läng a lupenätiw masowen sepian we wón Eufreitis, ewe chaanpwuupwu mi fókkun wätte. Iwe, kólikin lón a pwäsätä pwe epwe möllöta ewe aal fäniten ekkewe king seni öötiw. 13Iwe, ngang üwa kuna ülümön ngüün mi limengaw usun käirü ra mwetewu seni lón awen ewe drakon, seni lón awen ewe maanmwacho pwal seni lón awen ewe soufós chofona. 14Iir ekkewe ngünün önüngaw mi föri ekkewe manaman o feilló ren ekkewe kingen unusen fönüfan pwe repwe emwicha fengeniir fäniten ewe maun lón ewe rän mi lapalaap, ränin Kot ewe mi Unusen Manaman.

15“Nengeni, Ngang üpwe war usun emön chón soolä! A feiöch emön mi chök nenneló o anómwu ngeni üfan, pwe i esap fätälfeil fän an seleló o sääw ren än aramas küna.”

16Iwe, ekkewe ngüün ra emwicha fengeni ekkewe king me nöüür kewe mwichen sounfiu lón ewe leeni itan Armakeddon, lón kapasen Hipru.

Masowen ewe efisuuen sepi: Fönüfan a unusen chechchech

17Ewe öfüümönün chón läng a lupenätiw masowen sepian we lón äsäpwääl. Iwe, ew möngüüngü mi leüommóng a feitto seni lón ewe imwenfel, seni ewe leenien móótun king o apasa: “A taweeló!” 18Iwe, a fiifi inefi, a wor üngüüng me püngün chopwulap. Iwe, a fis och chechchechin fönü mi fókkun lapalaap esap wor mwo och usun seni poputän fansoun än aramas ra nóm wón fönüfan. Iei ew chechchechin fönü mi fókkun lapalaap. 19Iwe, ewe telinimw mi lapalaap a tiletil fesen lón ülüngät kinikin, o ekkewe telinimwen ekkewe mwüü ra taaló. Iwe, Kot a chemeni Babylon mi lapalaap o a ngeni i ewe kap mi ur ren wainin lingeringerin an soong. 20Iwe, iteiten fönüen lemataw meinisin ra süüló, o ekkewe chuuk resap chüen pwä. 21Iwe, üten faaw mi lapalaap a püngütiw seni läng wón ekkewe aramas. Choun eföw me eföw ina epwe ukükün ipwükü paun. Nge ekkewe aramas ra ótteki Kot, fäniten ewe feiengawen üten faaw pwokiten a fókkun selukuló wätten efeiengawan.

Ewe fefin mi üföüf üüf mi parachól me ewe maanmwacho mi parachól

17Mwirin, emön me leiin ekkewe füümön chón läng mi lupenätiw masowen ekkewe fisu sepi a feitto o a apasa ngeniei: “Kopwe feitto, ngang üpwe öküna ngenuk usun köpwüngün ewe fiin lisowu mi iteföüló, iei i neminewe mi móót wón chómmóng kólik. 2Ekkewe kingen fönüfan ra föri föfförün lisowu ngeni neminnei, o ekkewe chón wilipósen fönüfan ra sakaweló ren wainin an föfförün lisowu.”

3Iwe, ewe chón läng a uweieiló lón ewe fönüapö nge ngang mi nóm lón ewe Ngüün. Iwe, ngang üwa küna emön fefin mi móót wón emön maanmwacho mi parachól. A kuuló wón inisin ei maanmwacho ren iit mi turunufas o a wor fisu möküran me engol mächään. 4Ewe fefin a foutei ngeni üüf mi önüwen foorket me parachól, a pwal likemweteri ren kolt, faaw mi öüchchea me ekkaan föün lón pwei o a kömwöch lón pöün ew kap kolt mi ur ren ekkewe mettóch mi enniopwut me limengawen an föfförün lisowu. 5Iwe, a mak wón eten mesen neminnei ew iit mi mwónómwón: “Babylon mi Lapalaap, Ewe Inelapen Fiin Lisowu me Minne mi Enniopwut wón Fönüfan.” 6Iwe, ngang üwa küna ewe fefin pwe a sakaweló ren chaan ekkewe chón pin, chaan chókewe mi ninniiló ren ar pwärätä Jesus. Iwe, lupwen ngang üwa küna ei fefin, a lapalaap äi mäirü.

Wewen ewe mwónómwón usun ewe fefin me ewe maanmwacho

7Nge ewe chón läng a apasa ngeniei: “Pwata ka mäirü? Ngang üpwe ürenuk wewen ewe mwónómwón usun ei fefin me ei maanmwacho mi wor fisu möküran me engol mächään mi uweei ewe fefin. 8Ewe maanmwacho en ka küna, iei i ewe maanmwacho a fen nóm, nge iei esap nóm, iwe iei epwe le feittä seni lón ewe pwaang mi alóllóól esap wor epin o epwe feil ngeni an epwe kitetter. Iwe, ekkewe chón wilipósen fönüfan iter esap mak lón ewe Pwuken Manaw seni lepoputän fönüfan, repwe mäirü lupwen repwe küna ewe maanmwacho, pwokiten a piin nóm, iwe iei esap nóm, nge epwe war.

9Iei a fich ngeni ew ekiek mi fiti tipächchem. Ekkewe fisu mökür ikkana ekkewe fisu chuuk ewe fefin a móót wóór; 10pwal iir ekkewe füümön king. Limmön me leiir ra fen tur, ewe emön a nóm iei, nge ewe pwal emön esap mwo war. Iwe, lupwen epwe war, epwe nóm lón chök ew fansoun mi mwochomwooch. 11Nge ren ewe maanmwacho mi piin nóm, nge iei esap nóm, i epwe ewe awalümönün king, nge i emön me leiin ekkewe füümön king. I epwe feil ngeni an epwe kitetter.

12Iwe, ekkewe engol mächä en ka küneer, iir engol king resap mwo angei ar nemenemen king, nge repwap angei ar nemenem pwe iir repwe king fiti ewe maanmwacho lón ükükün ew chök awa. 13Ekkeei king repwe tipeew fengen le ääni ew chök ekiek o repwe ngeni ewe maanmwacho ar pöchökkül me nemenem. 14Repwe maun ngeni ewe Laam, nge ewe Laam epwe okkufuur, pün I ewe Samol asen samol meinisin me King asen king meinisin. Iwe, chókewe mi fiti ewe Laam, iir nöün kewe mi kö me fil me ölükülük.”

15Iwe, ewe chón läng a apasa ngeniei: “Ekkewe kólik en ka küna, ia ewe fiin lisowu a móót ie, iir ekkewe mwichen aramas me chómmóng aramas me mwüü me sókkun kapas. 16Iwe, ewe maanmwacho me ekkewe engol mächä en ka küner, repwe opwut ewe fiin lisowu. Iwe, repwe föri pwe neminewe epwe tolong lón taatakis me seleló. Iwe, repwe ocheei fituken neminewe o kenaló i ren ekkei. 17Pün Kot a atolonga lón letiper pwe repwe wisen apwönüetä an ekiek ren ar repwe tipeew fengen le ääni ew chök ekiek o ngeni ewe maanmwacho ar pöchökkülen nemenem tori ekkewe kapasen Kot repwe unusen pwönüetä. 18Iwe, ewe fefin en ka küna, i ewe telinimw mi lapalaap a nemenen wón ekkewe kingen fönüfan.”

Babylon mi lapalaap a taaló

18Mwirin ei, ngang üwa küna pwal emön chón läng a feittiw seni läng, a wor an pöchökkülen nemenem mi lapalaap, nge fönüfan a saramaram ren lingan. 2Iwe, ei chón läng a kökkö fän mwelian mi leüommóng o apasa: “A taaló, a taaló Babylon mi lapalaap! I a wiliti ew leenien imwen ekkewe önü ngaw, ew leeni fäniten än iteiten ngüün mi limengaw chufengen, ew kuur fäniten iteiten maansüüsü mi limengaw me ew leeni fäniten iteiten maanmwacho mi limengaw me enniopwut. 3Pün chón ekkewe mwüü meinisin ra sakaweló ren ewe wainin an mocheniän föfförün lisowu o ekkewe kingen fönüfan ra föri föfförün lisowu ngeni, pwal ekkewe chón amöömö me kamö pisek wón unusen fönüfan ra pisekisekiló ren somwosomwolón wöün.”

4Mwirin, ngang üwa rong pwal ew möngüüngü seni läng mi apasa: “Ämi neii aramas, öüpwe toowu seni Babylon pwe öüsap fiti i lón an kewe tipis pwe öüte fiti i le angei an kewe feiengaw. 5Pün an kewe tipis ra sessetä usun chök tekian läng, iwe, Kot a chechchemeni an kewe föfför mi ngaw. 6Öüpwe liwinisäfäli ngeni i usun chök minne i a liwini ngeni pwal ekkóch. Öüpwe liwinisäfäli ngeni i fän ruu fäniten meet i a föri. Öüpwe nofiti fänitan ew kinikin fän ruu lón ewe kap i a aea le nofit. 7Usun chök än neminewe a pwisin elingaló i me an manaw lón pwapwan fönüfan, ina usun ämi öüpwe ngeni i riäfföü me letipeta mi wewe ngeni, pwokiten i a apasa lón lelukan: ‘Ngang üwa móót usun emön kiwiin. Sap ngang emön fefin mi lipichsäfäl. Ngang üsap küna mwo letipeta fän ew.’ 8Ren ei popun, lón ew chök rän, an kewe feiengaw repwe war: mäló, letipeta me lengita. Iwe, neminewe epwe kareló ren ekkei pün a manaman ewe Samol Kot mi öpwüngü i.

Chón fönüfan ra kechiweiti Babylon ren an a taaló

9Iwe, ekkewe kingen fönüfan mi föri föfförün lisowu ngeni neminewe o fiti i le föri ekkewe mocheniän pwapwan fönüfan repwe pwupwuchöör o kechiweiti i lupwen repwe küna ötüötün an a kareló. 10Repwe üüto me toowaw lón ar ruukö ren an riäfföü mi lapalaap o repwe apasa: “Feiengawom en ewe telinimw mi lapalaap, en ewe telinimw Babylon mi pöchökkül! Pün lón ew chök kulók a war köpwüngum.”

11Iwe, ekkewe chón amöömö me kamö pisek wón fönüfan repwe kechiw o letipeta fäniten Babylon, pwokiten esap wor emön epwe chüen mööni ar kewe pisekin amöömö, 12kolt, silifer, faaw mi öüchche me föün lón pwei, mangaku mi pwechepwech, mangaku mi forkeet, silik, mangaku mi parachól, meinisin sókkun mwüüch mi pwokkus, meinisin sókkun pisek mi för seni ngiin älefant, meinisin sókkun pisek mi för seni mwüüch mi möömóng, piraas me mächä me ekkewe faaw mi misimis, 13pwal sinamon, wölüwöl mi pwoöch, minen ötüöt mi pwoöch, chönün irä mi pwokkus, appachen irä mi pwokkus, wain me apüra mi för seni föün olif, pilawa mi amas, föün wiit, kowu me siip, óris me wóóken, pwal amanaw me manawen aramas.

14Repwe pwal apasa: “Ekkewe föün irän ochooch en ka saniir ra iteló senuk, pwal ekkewe mettóch meinisin mi efisätä óm wöw me ling ra pöütüló senuk, iwe, kosap tongeni kopwe chüen küna säfäliir.” 15Ekkewe chón amöömö me kamö mi pisekisekiló ren ar amöömö ngeni Babylón ekkeei mettóch, repwe üüto me toowaw lón ar nuokkus ren an riáföü mi lapalaap. Repwe kechiw me leüommóng le pwupwuchöör. 16Repwe apasa: “A feiengaw, a feiengaw, ewe telinimw mi lapalaap mi üföüf üüf mi pwechepwech, forkeet me parachól o foutei ren kolt, faaw mi öüchche me föün lón pwei.

17Pün lón ew chök kulók, wöwün meinisin ra taaló.” Iwe chokana meinisin mi wor waar siip me kaptinin ekkewe siip sein amöömö pisek me ekkewe sääló me chókana meinisin mi manaw seni ar angang le mataw repwe üüto me toowaw, 18o repwe pwupwuchöör lupwen repwe küna ötüötün Babylon an a kareló. Iwe, repwe apasa: ‘Menni telinimw a wewe ngeni ei telinimw mi lapalaap?’ 19Iwe, repwe amworomworotä pwül wón möküreer pwe esissilen ar letipeta. Repwe pwupwuchöör o kechiw, repwe pwal ngüüngüres o apasa: “A feiengaw, a feiengaw, ewe telinimw mi lapalaap ia chókewe meinisin mi wor war siip lemataw ra pisekisekiló ren wöün mi fókkun lapalaap! Pün lón ew chök kulók a taaló o pöönüló.’ 20Kopwe pwapwa fäniten ei en läng, pwal ämi ekkewe chón pin me soukünö me soufós, pün Kot a öpwüngü Babylon fäniten minne i a föri ngeni kemi!”

Än Babylon a turuffóch

21Mwirin, emön chón läng mi pöchökkül a ekietä eföü faaw mi wewe ngeni eföü föün kata föün wiit mi föümmóng, a oturätiw lón ewe mataw o apasa: “Epwe iei usum Babylon, ewe telinimw mi lapalaap, kopwe koturutiw fän pöchökkül o kosap chüen pwääsäfäl. 22Iwe, esap wor emön epwe chüen rong me lóóm tikin än ekkewe chón ettiki ewe pisekin likettik itan harp me ngiingin chón kööl me tikin än ekkewe chón ettiki ewe pisekin likettik itan fluut me tikin än ekkewe chón ettiki rappwa. Esap wor emön sousilelap lón och sókkun angangen paaw epwe chüen pwä me lóóm o esap pwal wor emön epwe chüen rong ökürangen ewe föün kata föün wiit. 23Iwe, esap wor emön epwe chüen küna och tittinen lamp epwe tittin me lóóm. Esap pwal wor emön epwe chüen rong och möngüüngün mwän öpwüpwülü sööfö ika fefin öpwüpwülü sööfö me lóóm. Noum kewe chón amöömö me kamö pisek, iir ekkewe mi iteföüló wón fönüfan. Iwe, chón ekkewe mwüü meinisin ra tupwuló ren óm kewe angangen roong. 24Iwe, a pwä me lón Babylon chaan ekkewe soufós me ekkewe chón pin me meinisin ekkewe mi fen ninniiló me wón fönüfan.”

Läng a pwapwa ren än Babylon a taaló

19Mwirin ei, ngang üwa rong meet mi usun leüommóngun mweireiren ew chóó mi fókkun chówätte lón läng, ra apasa: “Alleluia! Ewe alen ngasaló me ling me manaman än ach we Kot, 2pün a let o pwüng pwüngün an köpwüng, pün I a öpwüngü ewe fiin lisowu mi lapalaap mi elimengawa fönüfan ren an föfförün lisowu, o a älemööw wón neminewe chaan nöün kewe amanaw.” 3Ra pwal enliwinisäfäli le kökkö o apasa: “Alleluia! Ewe ötüöt seni ewe telinimw mi taaló a ötütä tori feilfeilló chök.”

4Iwe, ekkewe rüwe me fömön souakkomw me ekkewe fömön mönümanaw ra chappetiw o fel ngeni Kot mi móót wón ewe leenien móótun king o apasa: “Amen! Alleluia!”

5Iwe, ew möngüüngü a feitto seni ewe leenien móótun king o apasa: “Öüpwe mwareiti ach Kot, ämi meinisin nöün kana amanaw, ämi chókana mi nuokkusiti I, ekkewe mi kis me ekkewe mi tekia!”

6Mwirin, ngang üwa rongorong meet mi usun möngüüngün ew mwichen aramas mi chówätte, usun ngüüngüün nóónón lemataw mi wätte me usun püngün chopwulap mi püngümmóng, a apasa: “Alleluia! Pün ewe Samol ach Kot mi Unusen Manaman a nemenem! 7Öüsipwe meseik o pwapwa o ngeni I ewe ling, pün a war fansoun än ewe Laam öpwüpwülü, o ewe Fiin Öpwüpwülü söfö a fen amollätä fänitan. 8A mwüümwütä ngeni neminewe pwe epwe üföüf üüf mi pwechepwech, limöch o saramaram.” (Pün ewe üüf mi pwechepwech iei än ekkewe chón pin föfförün pwüng).

9Iwe, ewe chón läng a apasa ngeniei: “Kopwe makkei ei: ‘Ra feiöch chókana mi kö ngeni ewe mwöngön öpwüpwülüen ewe Laam.’ ” Iwe, a pwal apasa ngeniei: “Ikkeei ekkewe kapasen Kot mi let.”

10Mwirin, ngang üwa chappetiw órun pachapachan pwe üpwe fel ngeni i, nge i a üreniei: “Kosap fókkun föri ei. Pün ngang emön chiechiom amanaw usum chök me pwiimw kewe mi kömwöchünnük wón ar pwärätä Jesus. Kopwe fel ngeni Kot!” Pün ekkewe kapasen pwärätä usun Jesus iei ewe ngünün kapasen oosuni.

Kraist a waawa emön óris mi pwechepwech

11Mwirin, ngang üwa küna läng a sukkuló o üwa mäirü pwe emön óris mi pwechepwech a üütä mwei. Ewe Emön mi móót ewe óris a iteni Ölükülük me Let. Lón pwüng, I a ääni köpwüng me maun. 12Mesan ra usun och ngetengeten ekkei o wón möküran a wor chómmóng mwärämwär mwärin king. Iwe, a wor ew iit a mak wón inisin, esap wor emön a silei, nge i pwisin I chök. 13I a üföüf echö üüf mi tam mi kötü lón chcha o I a iteni Ewe Kapasen Kot. 14Iwe, ekkewe mwichen soufiun läng ra üföüf üüf mi pwechepwech o limöch, ra tapweló mwirin Ätewe wón nöüür óris mi pwechepwech. 15Iwe, efóch ketilas mi ken a itiwu seni lón awen Ätewe pwe epwe nöünöü le niieló chón ekkewe mwüü. Iwe, I epwe nemeniir ren efóch wóók mächä. I epwe pwuuri ekkewe föün irän wain lón ewe leenien pwuupwun lingeringerin ewe soongen Kot, ewe mi Unusen Manaman. 16Iwe, a wor ew iit mi makketiw wón üfan we mi tam me wón aföön: Kingen king kana me Samolun samol kana.

Ewe maanmwacho me nöün kewe mwichen sounfiu ra kuf

17Mwirin, ngang üwa küna emön chón läng a üütä lón ewe akkar. A kökkö fän mwelian mi leüommóng ngeni ekkewe maansüüsü mi äkkääs lukalapen läng o apasa: “Öüpwe feitto o mwich fengen fäniten än Kot we mwöngö mi lapalaap, 18pwe öüpwe ocheei fituken ekkewe king, fituken ekkewe meilapen sounfiu, fituken ekkewe äte pwora, fituken ekkewe óris me ekkewe chón waawa óris, me fituken aramas meinisin, ekkewe mi ngas me ekkewe amanaw, ekkewe mi kis me ekkewe mi tekia.”

19Iwe, ngang üwa küna ewe maanmwacho me ekkewe kingen fönüfan fiti nöüür kewe mwichen sounfiu ra mwich fengen pwe repwe maun ngeni ewe Emön mi móót ewe óris pwal ngeni nöün we mwichen sounfiu. 20Iwe, ewe maanmwacho a ooló fengen me ewe soufós chofona mi föri ekkewe manaman fäniten ewe maanmwacho o otupwaló chókewe meinisin mi etiwa esissilen ewe maanmwacho we me chókewe mi fel ngeni uluulun we. Ekkeei rüömön, ewe maanmwacho me ewe soufós chofona, ra koturulong lón ewe nómwun ekkei mi ngetenget ren primston. 21Iwe, ekkewe lussun ra ninniiló ren ewe ketilas mi itiwu seni lón awen ewe Emön mi móót wón ewe óris. Iwe, ekkewe maansüüsü meinisin ra ömötüreló le ocheei fituker.

Satan a fööfö lón üküükün engöröw ier

20Mwirin, ngang üwa küna emön chón läng a feittiw seni läng nge a kömwöch lón pöün kiien ewe pwaang mi alóllóól esap wor epin. A pwal wor efóch sein mächä mi wätte a nóm lón pöün. 2Iwe, ewe chón läng a turufi ewe drakon, ewe serepenitin lóóm, iei i ewe devil me Satan. Iwe, a fööti i ngeni ewe sein pwe epwe föötek lón üküükün engöröw ier. 3Iwe, ewe chón läng a oturalong Satan lón ewe pwaang mi alóllóól esap wor epin. Iwe, a esipaló ewe pwaang o impwangeeló wón pün Satan esap chüen otupwu chón ekkewe mwüü tori ekkewe engöröw ier repwe sópw. Mwirin ena, Satan epwe kepichiwu lón ekis chök fansoun.

Ekkewe chón pin ra fiti Kraist le nemenem lón ekkewe engöröw ier

4Mwirin, ngang üwa küna leenien móotun king, nge ekkewe mi móót wór iir chókewe mi kawor ngeniir ar nemenem pwe repwe ääni angangen köpwüng. Üwa pwal küna ngünün chókewe mi ninniiló pwokiten ar pwärätä Jesus pwal pwokiten ar tupwöl le aronga ewe kapasen Kot me chókewe resap fel ngeni ewe maamwacho ika uluulun we, resap pwal etiwa le angei esissilan we pwe epwe nóm wón eten meser ika wón kumwuchur. Iir ra manawsäfäl o fiti Kraist le nemenem lón üküükün engöröw ier. 5Iei ewe äewin manawsäfäl. (Nge ekkewe lussun mi mäló resap manawsäfäl tori ekkewe engöröw ier repwe sópw). 6Ra feiöch o pin chókana mi wor inetiir lón ewe äewin manawsäfäl. Esap wor än ewe oruuen mäló nemenem wóór, nge iir repwe souasór fäniten Kot me fäniten Kraist, o iir repwe fiti Kraist le nemenem lón üküükün engöröw ier.

Satan a kufufóch lón an üüngeni Kot

7Iwe, lupwen ekkewe engöröw ier ra sópw, Satan epwe le kepichiwu seni lón an föötek. 8Iwe, epwe le feilló pwe epwe otupwu chón ekkewe mwüü mi nóm lón ekkewe rüänü kinikinin pwokuukun fönüfan, Kok me Makok, pwe epwe ochufengeniir fäniten ar repwe maun. Esap tongeni lea iteiter pün ra usun chök chómmóngun föün pien arosset. 9Iwe, ra telitä lón ewe maasiesin fönüfan mi fókkun chöölap o ra rokopwälieló ewe leeni ia ekkewe chón pin ra köüütä imweer ie me ewe telinimw mi ächengicheng. Nge ekkei a feittiw seni läng o keniireló. 10Iwe, ewe devil mi otupwuur, a koturulong lón ewe nómwun ekkei me primston ia ewe maanmwacho me ewe soufós chofona ra nóm ie. Iwe, repwe riäfföü lerän me lepwin tori feilfeilló chök esap mwüchüló.

Ewe kopwüng mi fis mwen ewe leenien móótun king mi lapalaap o pwechepwech

11Mwirin, ngang üwa küna ew leenien móótun king mi lapalaap o pwechepwech me ewe Emön mi móót wón. Iwe, fönüfan me fän läng ra süüló seni mwen mesan, o esap wor leeni fäniter. 12Iwe, ngang üwa küna ekkewe mi mäló, ekkewe mi kis me ekkewe mi tekia, ra üütä mwen ewe leenien móótun king. Iwe, ekkewe pwuk ra suukuló. Mwirin, pwal ew pwuk a suukuló, iei ewe pwuken manaw. Iwe, ekkewe mi mäló ra köpwüng ren meet mi makketiw lón ekkewe pwuk, alóngólóng wón meet iir ra föri. 13Iwe, mataw a fangewu ekkewe mi mäló ra nóm lón. Mäló me Heidis ra fangewu ekkewe mi mäló ra nóm lóór. Iwe, iir meinisin ra köpwüng, emön me emön leiir alóngólóng wón meet iir ra föri. 14Mwirin, Mäló me Heidis ra koturulong lón ewe nómwun ekkei. Ei nómwun ekkei, iei ewe oruuen mäló. 15Iwe, are esap pwä pwe a makketiw iten emön lón ewe pwuken manaw, i a koturulong lón ewe nómwun ekkei.

Mettóch meinisin ra sööfö

21Mwirin, ngang üwa küna ew läng mi fö me ew fönüfan mi fö, pün ewe akkomwen läng me ewe akkomwen fönüfan ra móróló o esap chüen wor mataw. 2Iwe, ngang üwa küna ewe telinimw mi pin, Jerusalem mi fö, a feittiw seni lón läng seni Kot, a fen mollotä usun emön fiin öpwüpwülü sööfö a foutei fäniten pwülüwan. 3Iwe, ngang üwa rong ew möngüüngü mi leüommóng seni ewe leenien móótun king a apasa: “Nengeni, ewe imwen Kot a nóm ren aramas. I epwe imweim reer o iir repwe nöün aramas, iwe, pwisin Kot epwe nónnóm reer pwe I epwe ar Kot. 4I epwe tölüpwaseló iteiten chönün maas seni meseer, iwe, esap chüen wor mäló; esap chüen wor letipeta ika kechiw ika metek, pün ekkewe mettóchun akkomw ra ló.”

5Iwe, ewe Emön mi móót wón ewe leenien móótun king a apasa: “Nengeni, Ngang üwa föri mettóch meinisin pwe repwe sööfö.” A pwal apasa: “Kopwe makkeetiw ei, pün ekkeei kapas ra let o ölükülük.”

6Mwirin, i a apasa ngeniei: “A taweeló! Ngang ewe Alfa me ewe Omeka, ewe Lepopun me ewe Lesópwólón. Ngang üpwe ngeni ekkewe mi kaaka pwe epwe wün seni ewe pwuachchen kólukun manaw nge resap mööni. 7Iö mi pwora epwe älemwirini ekkeei feiöch meinisin. Iwe, Ngang üpwe an Kot o i epwe neii mwän. 8Nge ekkewe mi mösöküta, ekkewe mi lükülükümmang, ekkewe mi enniopwut, ekkewe chón niieló aramas, ekkewe chón föri föfförün lisowu, ekkewe mi föri angangen roong, ekkewe chón fel ngeni uluulun önümwäl me chón chofona meinisin repwe tolong lón leenier lón ewe nóóm mi pwulopwul ren ekkei me primston, iei ewe oruuen mäló.”

Ewe Jerusalem sööfö

9Mwirin, emön me leiin ekkewe füümön chón läng mi piin kömwöch ekkewe fisu sepi mi ur ren ekkewe fisu ömwüchülón feiengaw, a feitto rei. A kapas ngeniei o apasa: “Kopwe feitto, ngang üpwe öküna ngenuk ewe fiin öpwüpwülü sööfö, iei i pwülüwen ewe Laam we.” 10Iwe, ewe chón läng a uweieiló lón ewe Ngüün ngeni ew chuuk mi tekia o wätte. Iwe, a öküna ngeniei ewe telinimw Jerusalem mi pin a feittiw seni lón läng seni Kot. 11Ei telinimw a saramaram ren lingen Kot. Meriweriwan a usun eföw faaw mi fókkun öüchche, usun ewe faaw öüchche itan jasper o kurufatafat usun kristal. 12A wor ew tiitin mi fókkun chöölap o tekia, fiti engol me ruu asamalapan. Iwe, a wor engol me rüömön chón läng ra masa ekkewe asamalap o a makketa wón ekkewe asamalap iten ekkewe engol me ruu einangen nöün Israel kewe mwän. 13A wor ülüngät asamalap peliöötiwen ewe tiit, ülüngät asamalap peliefeng, ülüngät asamalap peliöör, iwe, ülüngät asamalap pelilotow. 14Iwe, a wor engol me ruu lóngólóngun tittin ewe telinimw o a makketiw wór iten nöün ewe Laam kewe engol me rüömön soukünö.

15Iwe, ewe chón läng mi kapas ngeniei a kömwöch efóch wókuwókun öüküük seni kolt pwe epwe öükü ewe telinimw me asamalapan kewe me tittin we. 16Ewe telinimw a usun lapalapen sukeea, pün langattaman a chök nönnö fengen me chöölapan. Iwe, i a öükü ewe telinimw ren an we wókun öüküük o a küna pwe a engol me ruu ngöröw stadiaa langattaman me chöölapan me tekian. 17Mwirin, ewe chón läng a pwal öükü malüülün tittin ewe telinimw we. Iwe, üküükün maalüülün, ipwükü fääik me rüänu mwalü (iei än aramas öüküük pwal än chón läng öüküük). 18Ewe tiit a för seni ewe faaw öüchche itan jasper, nge ewe telinimw a för seni kolt mi fókkun mwirinnö, a kurufatafat usun chök kilas. 19Lóngólóngun ewe telinimw kewe ra ofout ngeni iteiten sókkun faaw mi öüchche. Ewe äeföün föün lóngólóng iei ewe faaw öüchche itan jasper, ewe orüöföün - sapfair, ewe öülüföün - akat, ewe öföföün- emerald, 20ewe elimeföün - sardoniks, ewe awonoföün - karnelian, ewe öfüüföün - krisolait, ewe awalüföün - beril, ewe ettiwöföün - topas, ewe äengolun - krisoprais, ewe engol me eföün - jasinth, ewe engol me örüöföün -amethyst. 21Iwe, ekkewe engol me ruu asamalap ra för seni engol me rüöföü föün lón pwei. Ew me ew ekkewe asamalap a för seni äkkäeföü föün lón pwei o ekkewe alen ewe telinimw ra för seni kolt mi fókkun mwirinnö, a kurufatafat usun kilaas.

Lingen ewe Jerusalem sööfö

22Iwe, ngang üwa küna pwe esap wor imwenfel lón ewe telinimw pün an imwenfel ina i ewe Samol Kot mi Unusen Manaman me ewe Laam. 23Iwe, ewe telinimw esap osun än akkar ika maram repwe tinieitiw wón, pün ewe lingen Kot a ngeni i saram o ewe Laam ina nöün lamp. 24Chón ekkewe mwüü repwe fätäl lón saramen ewe Laam o ekkewe kingen fönüfan repwe uweato ar ling lón ei telinimw. 25Iwe, esap wor ew rän ekkewe asamalapen tittin ewe telinimw repwe kesipeló, pün esap chüen wor pwiin ikenan. 26Repwe uweato lón ewe telinimw lingen me iteüöchchün ekkewe mwüü. 27Nge esap wor och mettóch mi limengaw epwe tolong lón ei telinimw, ika emön mi föri meet mi enniopwut ika otupwutup, nge i chókewe chök iter mi mak lón nöün ewe Laam we pwuken manaw.

Ewe Chaanpwupwun Manaw

22Mwirin, ewe chón läng a öküna ngeniei ew chaanpwupwun kólikin manaw mi fókkun kurufatafat, usun kurufaten ewe faaw öüchche itan kristal, mi pwupwuwu seni ewe leenien móótun king än Kot me än ewe Laam, 2o pwuupwutiw lukalapen alen ewe telinimw. Iwe, epeek me epeek ewe chanpwupwu a üütä ewe irän manaw mi uwääni engol me ruu sókkun uwa, nge a uwa iteiten maram. Chöön ewe irä ra fäniten säfei epwe tongeni echikara chón ekkewe mwüü. 3Esap chüen wor och mettóch mi önümaamaw. Ewe leenien móótun king än Kot me än ewe Laam epwe nóm lón ewe telinimw o nöün kewe amanaw repwe fel ngeni I. 4Iir repwe küna wón mesan o itan epwe nóm wón eten meseer. 5Iwe, esap chüen wor pwiin. Iir resap osun saramen laamp ika akkar, pün ewe Samol Kot epwe ar saram. Iwe, iir repwe nemenem tori feilfeilló chök.

Ewe fansoun a arapeto

6Iwe, ewe chón läng a apasa ngeniei: “Ekkeei kapas ra ölükülük o let. Iwe, ewe Samol, ewe Koten ngünün ekkewe soufós a tiinaló nöün we chón läng pwe epwe pwääri ngeni nöün kewe amanaw meet epwe mwittir fisitä.”

7Iwe, nengeni, Ngang üpwe mwittir wareto. A feiöch emön mi älleasochisi ekkewe kapasen oosuni lón ei pwuk.”

8Ngang John, ewe emön mi küna o rong ekkeei mettóch. Iwe, lupwen ngang üwa rong o küna ekkeei mettóch, ngang üwa chappetiw órun pachapachen ewe chón läng mi öküna ngeniei ekkeei mettóch pwe üpwe fel ngeni, 9nge i a apasa ngeniei: “Kosap fókkun föri ena! Ngang emön chiechiom amanaw usum chök me pwiimw kewe soufós me chókewe mi älleasochisi ekkewe kapasen ei pwuk. Kopwe fel ngeni Kot!”

10Mwirin, i a apasa ngeniei: “Kosap impwangeló ekkewe kapasen oosuni lón ei pwuk, pün ewe fansoun a chök arapeto. 11Likiti ngeni emön chón föfför ingaw epwe chök sópweló le föri minne mi ingaw o emön mi limengaw epwe chök sópweló le limengaw. Nge emön mi pwüng epwe chök sópweló le föfföri minne mi pwüng o emön mi pin epwe chök sópweló an epwe pin.”

Minne Jesus a pwärätä ngeni ekkewe mwichefel

12“Iwe, nengeni Ngang üpwe mwittir wareto, nge üpwe uweei äi kewe liiwin pwe üpwe ngeni iteiten emön me emön liwinin fäniten meet i piin föri. 13Ngang ewe Alfa me ewe Omeka, ewe Lepopun me ewe Lesópwólón, ewe Akkomwan me ewe Ömwüchchülón.”

14Ra feiöch chókana mi limeti üfeer kana, pwe epwe tongeni wor ar pwüüng ar repwe mwöngö seni uwään ewe irän manaw o repwe tongeni tolong lón ewe telinimw me lón ekkewe asamalap. 15Nge ekkewe kolak repwe nóm lükün ewe telinimw, chókewe mi föri angangen roong me ekkewe chón föri föfförün lisowu me ekkewe chón niieló aramas me ekkewe chón fel ngeni uluulun önümwäl me iteiten emön me emön mi echeni me föfföri föfförün chofona.

16“Ngang Jesus üwa ökkünöweló neii we chón läng pwe epwe pwärätä ngeni kemi usun ekkeei mettóch fäniten ekkewe mwichefel. Ngang ewe waaren me mwirimwirin David, Ngang ewe Füün lesossor mi saramaram.”

17Iwe, ewe Ngüün me ewe fiin öpwüpwülü sööfö ra apasa: “Feitto!” Iwe, iö mi rong ei epwe apasa: “Feitto!” Iwe, iö mi kaaka epwe feitto. Ese lifilifil ika iö mi mochen, epwe angei ewe liffang esap kamö, iei ewe kólikin manaw.

Ew kapasen esilesilen feiengaw

18Ngang üwa aronga ei kapasen esilesil usun feiengaw ngeni iteiten emön me emön mi rong ekkewe kapasen oosuni lón ei pwuk, pwe are emön epwe apacha och ngeni ekkewe kapas, Kot epwe apacha ngeni ena aramas ekkewe feiengaw mi makketiw usuur lón ei pwuk. 19Iwe, are emön epwe angealó ekkóch kapas seni lón ei pwuken oosuni, Kot epwe angealó seni i wisan me wón ewe irän manaw, pwal seni lón ewe telinimw mi pin, mi makketiw usuur lón ei pwuk.

Ngang üpwe mwittir wareto

20Ewe Emön mi pwärätä ekkeei mettóch a apasa: “Ewer, Ngang üpwe mwittir feitto.” Amen. Kopwe feitto, Samol Jesus!

21Ümöümöchün ewe Samol Jesus Kraist epwe nónnóm reemi ekkewe chón pin meinisin. Amen.