Numbers
Ewe äkkäewin fansoun ällean iteiten chón Israel
1 Iwe, lón ewe äewin ränin ewe oruuwen maram lón ewe oruuwen ier mwirin än ekkewe chón Israel ra toowu seni ewe fönü Egypt, ewe SAMOL a kapas ngeni Moses me lón ewe Imw Mangaku Leenien Chufengen me lón ewe fönüpöönün Sinai o a apasa, 2“Öüpwe älleani iteiten unusen ewe mwiichen aramasen Israel meinisin lón ew me ew kewe familien lón ew me ew kewe einang. Öüpwe makkeetiw iteiten iten emön me emön mwän, 3seni ier rüwe feittä mi tongeni ar repwe fiti maun. En me Aaron öüpwe nampaniir lón ar kewe kinikin. 4Iwe, epwe wor emön mwän seni ew me ew famili, emön me emön epwe i souemmwenin lón an einang epwe älisi kemi. 5Iwe, ikkeei iten ekkewe mwän repwe älisi kemi: Elizur nöün Shedeur we mwän seni ewe einangen Reuben;
6“Shelumiel nöün Zurishaddai we mwän seni ewe einangen Simeon;
7“Nashon nöün Aminadab we mwän seni ewe einangen Judah;
8“Nethanel nöün Zuar we mwän seni ewe einangen Issakar;
9“Eliab nöün Helon we mwän seni ewe einangen Zebulun;
10“nge seni mwirimwirin nöün Josef kewe mwän: Elishama nöün Ammihud we mwän seni ewe einangen Efraim me Kamaliel nöün Pedahzur we mwän seni ewe einangen Manassah;
11“Abidan nöün Kideoni we mwän seni ewe einangen Benjamin;
12“Ahiezer nöün Ammishaddai we mwän seni ewe einangen Dan;
13“Pakiel nöün Okran we mwän seni ewe einangen Asher;
14“Eliasaf nöün Deuel we mwän seni ewe einangen Kad;
15“Ahira nöün Enan we mwän seni ewe einangen Naftali.”
16Ikkeiir ekkewe mwän mi kefilitä seni ewe mwiichen chón Israel, iir ekkewe souemmwenin än semer kewe einang. Iir möküren ekkewe eterengesin Israel.
17Iwe, Moses me Aaron ra angei ekkeei mwän mi föü iter, 18mwirin ra köri fengeni unusen ewe mwiichen aramasen Israel lón ewe äewin ränin ewe oruuwen maram. Ekkewe aramas ra apasalong iteiten chón en me an famili me än semer chóó o ra makkei iten emön me emön mwän seni ier rüwe feittä, 19usun ewe SAMOL a öllük ngeni Moses. Iei usun Moses a älleani iteiter me lón ewe fönüpöönun Sinai.
20Iwe, seni ekkewe mwirimwirin Reuben nöün Israel we mwännichi:
Iei iteiten ekkewe mwän meinisin a tori rüwe ierir ika lap seni iir mi tongeni fiti maun, emön me emön a makketiw itan lón tettelin an chóó me famili. 21Iwe, üküükün ewe iteit seni ewe einangen Reuben, fääik me wonu ngöröw limepwükü.
22Seni ekkewe mwirimwirin Simeon:
Iei iteiten ekkewe mwän meinisin a tori rüwe ierir ika lap seni iir mi tongeni fiti maun, emön me emön mi makketiw itan lón tettelin an chóó me famili. 23Iwe, üküükün ewe iteit seni ewe einangen Simeon, lime me tiwu ngöröw ülüpwükü.
24Seni ekkewe mwirimwirin Kad:
Iei iteiten ekkewe mwän meinisin a tori rüwe ierir ika lap seni iir mi tongeni fiti maun, emön me emön mi makketiw itan lón tettelin an chóó me famili. 25Iwe, üküükün ewe iteit seni ewe einangen Kad, fääik me limu ngöröw wonopwükü lime.
26Seni ekkewe mwirimwirin Judah:
Iei iteiten ekkewe mwän meinisin a tori rüwe ierir ika lap seni iir mi tongeni fiti maun, emön me emön mi makketiw itan lón tettelin an chóó me famili. 27Iwe, üküükün ewe iteit seni ewe einangen Judah, fiik me rüwänü ngöröw wonopwükü.
28Seni ekkewe mwirimwirin Issakar:
Iei iteiten ekkewe mwän meinisin a tori rüwe ierir ika lap seni iir mi tongeni fiti maun, emön me emön a makketiw itan lón tettelin an chóó me famili. 29Iwe, üküükün ewe iteit seni ewe einangen Issakar, lime me rüwänü ngöröw föpwükü.
30Seni ekkewe mwirimwirin Zebulun:
Iei iteiten ekkewe mwän meinisin a tori rüwe ierir ika lap seni iir mi tongeni fiti maun, emön me emön a makketiw itan lón tettelin an chóó me famili. 31Iwe, üküükün ewe iteit seni ewe einangen Zebulun, lime me fisu ngöröw föpwükü.
32Seni mwirimwirin nöün Josef kewe mwän:
Seni ekkewe mwirimwirin Efraim: Iei iteiten ekkewe mwän meinisin a tori rüwe ierir ika lap seni iir mi tongeni fiti maun, emön me emön a makketiw itan lón tettelin an chóó me famili. 33Iwe, üküükün ewe iteit seni ewe einangen Efraim, fääik ngöröw limöpwükü.
34Seni ekkewe mwirimwirin Manassah:
Iei iteiten ekkewe mwän meinisin a tori rüwe ierir ika lap seni iir mi tongeni fiti maun, emön me emön a makketiw itan lón tettelin an chóó me famili. 35Iwe, üküükün ewe iteit seni ewe einangen Manassah, iliik me ruu ngöröw rüwöpwükü.
36Seni ekkewe mwirimwirin Benjamin:
Iei iteiten ekkewe mwän meinisin a tori rüwe ierir ika lap seni iir mi tongeni fiti maun, emön me emön a makketiw itan lón tettelin an chóó me famili. 37Iwe, üküükün ewe iteit seni ewe einangen Benjamin, iliik me limu ngöröw föpwükü.
38Seni ekkewe mwirimwirin Dan:
Iei iteiten ekkewe mwän meinisin a tori rüwe ierir ika lap seni iir mi tongeni fiti maun, emön me emön mi makketiw itan lón tettelin an chóó me famili. 39Iwe, üküükün ewe iteit seni ewe einangen Dan, wone me ruu ngöröw füüpwükü.
40Seni ekkewe mwirimwirin Asher:
Iei iteiten ekkewe mwän meinisin a tori rüwe ierir ika lap seni iir mi tongeni fiti maun, emön me emön mi makketiw itan lón tettelin an chóó me famili. 41Iwe, üküükün ewe iteit seni ewe einangen Asher, fääik me ew ngöröw limöpwükü.
42Seni ekkewe mwirimwirin Naftali:
Iei iteiten ekkewe mwän meinisin a tori rüwe ierir ika lap seni iir mi tongeni fiti maun, emön me emön mi makketiw itan lón tettelin an chóó me famili. 43Iwe, üküükün ewe iteit seni ewe einangen Naftali, lime me ülüngät ngöröw föpwükü.
44Ikkeiir ekkewe mwän Moses me Aaron ra älleaniir me ekkewe engol me rüwömön souemmwenin Israel, emön me emön a tupwuni an einang. 45Iwe iei iteiten ekkewe mwän meinisin a tori rüwe ierir ika lap seni iir mi tongeni fiti ewe mwichen sounfiun Israel pwe repwe maun, emön me emön mi makketiw itan lón tettelin an chóó me famili. 46Unusen kapachalapen ewe iteit, wonopwükü ülüngät ngöröw limöpwükü lime.
47Nge ekkewe famili seni ewe einangen Levi resap pacholong leiin ekkewe ekkóch einang lón ewe ällea. 48Pün ewe SAMOL a apasa ngeni Moses: 49“Kosap älleani chón ewe einangen Levi, kosap pwal apacherelong lón ewe ällean iteit mi fis ngeni ekkewe ekkóch chón Israel. 50Nge kopwe ewiisa ekkewe mwän seni ewe einangen Levi pwe repwe wiisen tümwünü ewe imwenfel mangaku ia ewe Pisekin Pwärätä a nóm ie tori pisekin ewe imwenfel meinisn me iteiten ekkewe mettóch fänitan. Iir repwe pwal wiisen mwärei ewe imwenfel mangaku me pisekisekin kewe meinisin. Repwe tümwünü ewe imwenfel, repwe pwal öüüwetä imweer kewe imw mangaku pwellin ünükkün. 51Iteiten fansoun ewe imwenfel mangaku epwe mwöküt, ekkewe mwän seni ewe einangen Levi repwe wiisen atomwaló. Nge iteiten fansoun ewe imwenfel mangaku epwe köüütä, ekkewe mwän seni ewe einangen Levi repwe pwal öüüwetä. Ese lifilifil ika iö me lükür epwe kan ngeni ewe imwenfel mangaku epwe ninniiló. 52Ekkewe lussun chón Israel repwe en me pwisin öüüwetä imwer kewe imw mangaku lón ar kewe kinikin, emön me emön mwän lón en me an leenien asóósó fän en me an filäik. 53Nge chón ewe einangen Levi repwe öüüwetä imweer kewe imw mangaku pwellin ünükkün ewe imwenfel mangaku ia ewe Pisekin Pwärätä a nóm ie pwe repwe eppeti ekkewe aramasen Israel seni än ewe SAMOL soong. Ekkewe mwän seni ewe einangen Levi repwe wiisen üütä o mammasa ewe Imwenfel Mangaku.”
54Iwe, ekkewe chón Iserael ra föri meinisin usun chök minne ewe SAMOL a öllük ngeni Moses.
Tettelin ekkewe kinikinin mwiichen chón Israel
2 Iwe, ewe SAMOL a kapas ngeni Moses me Aaron o apasa: 2“Iteiten ew me ew ekkewe einangen Israel repwe öüüwetä imwer kewe imw mangaku pwellin ünükkün ewe imwenfel mangaku nge repwe ekis toowaw seni. Repwe öüüwetä imwer kewe imw mangaku fän en me an filäik pwal fän esissilen en me an famili nge repwe säpe ngeni ewe imw mangaku.”
3Iwe, peliöötiwen ewe imwenfel mangaku äwenewenen ia ewe akkar a töötä me ia, chón ewe einangen Judah me ekkewe einangen Issakar me Zebulun mi fiti lón an we kinikin repwe öüüwetä imwer imw mangaku fän ar kewe filäik lón tettelin en me an mwiich. Ewe chón emmweni ekkewe aramasen ewe einangen Judah itan Nashon nöün Amminadab we mwän. 4Iteiten chón än Nashon we kinikin, fiik me rüwänü ngöröw wonopwükü.
5Iwe, chón ewe einangen Issakar repwe öüüwetä imwer kewe imw mangaku ünükküür. Ewe chón emmweni ekkewe aramasen ewe einangen Issakar itan Nethanel, nöün Zuar we mwän. 6Iteiten chón än Zuar we kinikin, lime me rüwänü ngöröw föpwükü.
7Chón ewe einangen Zebulun iir repwe nóm ünükküür. Ewe chón emmweni ekkewe aramasen ewe einangen Zebulun itan Eliab nöün Helon we mwän. 8Iteiten chón än Eliab we kinikin, lime me fisu ngöröw föpwükü.
9Iwe, iteiten ekkewe aramas meinisin mi imweim lón än Judah we kinikin lón tettelin ar kewe mwiich, ipwükü waliik me wonu ngöröw föpwükü. Iir repwe wiisen akkakomw lón ar sääi.
10Iwe, chón ewe einangen Reuben me ekkewe einangen Simeon me Kad mi fiti lón an we kinikin repwe öüüwetä imwer kewe imw mangaku peliöörün ewe imwenfel managaku fän ar filäik lón tettelin en me an mwiich. Ewe chón emmweni ekkewe aramasen ewe einangen Reuben itan Elizur nöün Shedeur we mwän. 11Iteiten chón än Elizur we kinikin, fääik me wonu ngöröw limöpwükü.
12Iwe, chón ewe einangen Simeon repwe öüüwetä imwer kewe imw mangaku ünükküür. Ewe chón emmweni ekkewe aramasen ewe einangen Simeon itan Shelumiel nöün Zurishaddai we mwän. 13Iteiten chón än Shelumiel we kinikin, lime me tiuw ngöröw ülüpwükü.
14Chón ewe einangen Kad repwe nóm ünükküür. Ewe chón emmweni ekkewe aramasen ewe einangen Kad itan Eliasaf nöün Deuel we mwän. 15Iteiten chón än Eliasaf we kinikin, fääik me limu ngöröw wonopwükü lime.
16Iwe, iteiten ekkewe aramas meinisin mi imweimw lón än Reuben we kinikin lón tettelin ar kewe mwiich, ipwükü lime me ew ngöröw föpwükü lime. Iir repwe nóm lón oruuwen tettel lupwen fansoun ra sääi.
17Mwirin ekkeei ruu mwiich, ewe Imw Mangaku Leenien Chufengen me chón ewe einangen Levi repwe nóm lukalaper lupwen repwe sääi. Repwe sääi lón chök usun tettelin ar nóm lón ar leenien asóósó, ew me ew mwiich lón en me an tettel fän en me an filäik.
18Chón ewe einangen Efraim me ekkewe einangen Manassah me Benjamin mi fiti lón an we kinikin repwe öüüwetä imwer kewe imw mangaku pelilotowun ewe imwenfel mangaku fän ar filäik lón tettelin en me an mwiich. Ewe chón emmweni ekkewe aramasen ewe einangen Efraim itan Elishama nöün Amihud we mwän. 19Iteiten chón än Elishama we kinikin, fääik ngöröw limöpwükü.
20Chón ewe einangen Manassah repwe nóm ünükküür. Ewe chón emmweni ekkewe aramasen ewe einangen Manassah itan Kamaliel nöün Pedahzur we mwän. 21Iteiten chón än Kamaliel we kinikin, iliik me ruu ngöröw rüwöpwükü.
22Iwe, chón ewe einangen Benjamin repwe nóm ünükküür. Ewe chón emmweni ekkewe aramasen ewe einangen Bejamin itan Abidan nöün Kideoni we mwän. 23Iteiten chón än Kideoni we kinikin, iliik me limu ngöröw föpwükü.
24Iwe, iteiten ekkewe aramas meinisin mi imweimw lón än Efraim we kinikin lón tettelin ar kewe mwiich, ipwükü walüw ngöröw ipwükü. Iir repwe nóm lón öülüngätin tettel lupwen repwe sääi.
25Chón ewe einangen Dan me ekkewe einangen Asher me Naftali mi fiti lón an we kinikin repwe öüüwetä imwer kewe imw mangaku peliefengin ewe imwenfel mangaku fän ar filäik lón tettelin en me an mwiich. Ewe chón emmweni ekkewe aramasen ewe einangen Dan itan Ahiezer nöün Ammishaddai we mwän. 26Iteiten chón än Ahiezer we kinikin, wone me ruu ngöröw füüpwükü.
27Iwe, chón ewe einangen Asher repwe öüüwetä imwer kewe imw mangaku ünükküür. Ewe chón emmweni ekkewe aramasen ewe einangen Asher itan Pakiel nöün Okran we mwän. 28Iteiten chón än Pakiel we kinikin, fääik me ew ngöröw limöpwükü.
29Chón ewe einangen Naftali repwe nóm ünükküür. Ewe chón emmweni ekkewe aramasen ewe einangen Naftali itan Ahira nöün Enan we mwän. 30Iteiten chón än Ahira we kinikin, lime me ülüngät ngöröw föpwükü.
31Iwe, iteiten ekkewe aramas meinisin mi imweimw lón än Dan we kinikin lón tettelin ar kewe mwiich, ipwükü lime me fisu ngöröw wonopwükü. Iir repwe kuukumwir lupwen repwe sääi fän ar kewe filäik.
32Ikkeiir ekkewe chón Israel ra ällea me lón ar kewe famili. Ikkeiir ekkewe mwän meinisin mi nóm lón ar kewe leenien asóósó lón ar kewe kinikin, iteiter wonopwükü ülüngät ngöröw limöpwükü lime. 33Nge chón ewe einangen Levi resap ällealong leiin ekkewe ekkóch chón Israel, usun minne ewe SAMOL a öllük ngeni Moses.
34Iei usun ekkewe chón Israel ra föri iteiten ekkewe mettóch ewe SAMOL a öllük ngeni Moses. Ew me ew einang me famili ra öüüwetä imwer kewe imw mangaku fän ar kewe filäik, iwe, pwal ina chök usun lapalapen ar ra sääi pün ew me ew einang me famili a sääi lón en me an tettel.
Wiisen chón ewe einangen Levi
3 Iwe, iei porausen än Aaron me Moses famili lón ewe fansoun ewe SAMOL a kapas ngeni Moses me wón ewe Chuuk Sinai.
2Ikkeei iten nöün Aaron kewe mwän: Nadab ewe mwännichi, tapweto Abihu, Eleazar me Ithamar. 3Ikkana iten nöün Aaron kewe mwän, iir ätekewe mi kepit pwe repwe souasór, iir ekkewe ra angei pwonen wiiser pwe repwe angang lón ewe wiisen souasór. 4Nge Nadab me Abihu ra mäló me mwen ewe SAMOL me lón ewe fönüpöönün Sinai lupwen ra föri ew asór ngeni ewe SAMOL ren och ekkei esap mwüümwütä. Esap wor nöün ätekkeei, ina minne Eleazar chök me Ithamar ra angang pwe iir souasór lupwen fansoun lemanawen Aaron semer we.
5Iwe, ewe SAMOL a kapas ngeni Moses o apasa, 6“Kopwe emmwenato chón ewe einangen Levi o pwärireto ren ewe souasór Aaron pwe repwe älisi i. 7Iir repwe wiisen föri ekkewe angang fäniten Aaron pwal fäniten unusen ewe mwiichen aramas me ren ewe Imw Mangaku Leenien Chufengen ren ar repwe föri angangen lón me lükün ewe imwenfel mangaku. 8Iir repwe wiisen tümwünü pisekin ewe imwenfel mangaku meinisin o öpwönüwetä ekkewe sókkun angang fäniten ekkewe chón Israel ren ar repwe föri angangen ewe imwenfel mangaku. 9Iwe, kopwe ewiisa ngeni ekkewe mwän seni ewe einangen Levi pwe repwe angang ngeni Aaron me nöün kewe mwän. Iir repwe wiisen unusen angang ngeni Aaron me leiin ekkewe chón Israel. 10Ina minne kopwe filätä Aaron me nöün kewe mwän pwe repwe föri ewe angangen wiisen souasór. Nge ika epwe wor emön me lükür epwe kkan ngeni ewe leeni mi pin, epwe ninniiló.”
11Mwirin, ewe SAMOL a pwal apasa ngeni Moses, 12“Nengeni, pwisin ngang üwa filätä ekkewe mwän seni ewe einangen Levi seni leiin ekkewe aramasen Israel pwe iir repwe wiisen ekkesiwili iteiten mwännichi mi upwutiw seni iteiten fiin Israel. Iei minne, chón ewe einangen Levi iir neii, 13pün ekkewe mwännichi meinisin iir neii. Lupwen ngang üwa niieló ekkewe mwännichi meinisin me lón ewe fönü Egypt, ngang üwa epinaló fänitei iteiten mwännichi me lón Israel, seni mwännichien aramas me mweinöün maan. Iir repwe neii. Ngang ewe SAMOL.”
Ällean iteiten chón ewe einangen Levi
14Mwirin, ewe SAMOL a kapas ngeni Moses me lón ewe fönüpöönün Sinai o apasa, 15“Kopwe älleani iteiten chón ewe einangen Levi lón ar kewe famili me ar kewe chóó. Kopwe älleani iteiten mwän ra tori ew maram ika lap seni.” 16Ina minne Moses a älleaniir, usun minne än ewe SAMOL kapas a öllük ngeni i.
17Iwe, ikkeei iten nöün Levi kewe mwän: Kershon, Kohat me Merari.
18Iwe, ikkeei iten än Kershon kewe chóó ra eiteit seni iten nöün kewe mwän: Libni me Shimei.
19Iten än Kohat kewe chóó ra eiteit seni iten nöün kewe mwän iter Amram, Izhar, Hebron me Uzziel.
20Pwal ikkeei iten än Merari kewe chóó ra eiteit seni iten nöün kewe mwän iter Mahli me Musi.
Ikkeei än chón ewe einagen Levi kewe chóó lón ar kewe famili.
21Ekkewe mwirimwirin Kershon ikkanaiir chón ekkewe chóó mi feitto seni mwirimwirin Libni me Shimei. 22Iteiten ekkewe mwän meinisin ra ällea seni ew maram ika lap seni, üküükür fisu ngöröw limöpwükü me leiin än Kershon kewe chóó. 23Iwe, chón än Kershon kewe chóó repwe öüüwetä imwer imw mangaku pelilotowun ewe imwenfel mangaku. 24Ewe chón emmweni ekkewe familien än Kershon kewe chóó itan Eliasaf nöün Lael we mwän. 25Iwe, wiisen chón än Kershon kewe chóó me ren ewe Imw Mangaku Leenien Chufengen, iir repwe wiisen ämesemes wón tümwünün ewe imwenfel mangaku fiti pwölüpwölün kewe me ewe kaaten mi nóm leasamalapen ewe Imw Mangaku Leenien Chufengen, 26ekkewe kaaten mi tiit ngeni ewe leeni pwellin ünükkün ewe imwenfel mangaku, pwal ewe kaaten fäniten ewe leenien tolong ngeni ewe leeni pwellin ünükkün ewe imwenfel mangaku me ewe róngen asór, ekkewe sääl me ekkewe pisek meinisin mi sooso ngeni aean ekkeei mettóch.
27Ekkewe mwirimwirin Kohat ikkanaiir chón ekkewe chóó mi feitto seni mwirimwirin Amram, Izehar, Hebron me Uzziel. 28Iwe, iteiten ekkewe mwän meinisin ra ällea seni ew maram ika lap seni, iteiter walüw ngöröw wonopwükü. Chón än Kohat ei chóó ra wiisen ämesemes wón tümwünün ewe imw mi pin. 29Iwe, chón än Kohat kewe chóó repwe öüüwetä imwer imw mangaku peliöörün ewe imwenfel mangaku. 30Ewe chón emmweni ekkewe familien än Kohat kewe chóó itan Elizafan nöün Uzziel we mwän. 31Ekkeei rüwänü chóó repwe wiisen ämesemes wón tümwünün ewe Pwórofel, ewe cheepel, ewe leenien etittin, ekkewe róngen asór, ekkewe sakkopaaten pisek ra aea lón ewe imw mi pin, ewe refirefin lón ewe imwenfel mangau me ekkewe pisek meinisin mi sooso ngeni aean ekkeei mettóch. 32Iwe, ewe souasór Eleazar nöün Aaron we mwän i epwe meilapen ekkewe souemmwenin ewe einangen Levi meinisin. I a kefilitä pwe epwe nemenem wón chókewe ra wiisen nemenem wón tümwünün ewe imw mi pin.
33Ekkewe mwirimwirin Merari ikkanaiir chón ekkewe chóó mi feitto seni mwirimwirin Mahli me Mushi. Ikkeiir chón än Merari kewe chóó. 34Iwe, iteiten ekkewe mwän meinisin ra ällea seni ew maram ika lap seni, iteiter wonu ngöröw rüwöpwükü. 35Ewe chón emmweni ekkewe familien än Merari kewe chóó itan Zuriel nöün Abihail we mwän. Iir repwe öüüwetä imwer imw mangaku peliefengin ewe imwenfel mangaku. 36Chón än Merari kewe chóó ra kefilitä pwe iir repwe tümwünü ekkewe papen ewe imwenfel mangaku, ekkewe ääpenges, ekkewe üür, ekkewe wäänifót me ekkewe pisek meinisin mi sooso ngeni aean ekkeei mettóch. 37Repwe pwal tümwünü ekkewe üür mi pwellifeili ewe leeni ünükkün ewe imwenfel mangaku fiti wäänifótur kewe, ekkewe pwurowók me ekkewe sääl.
38Iwe, Moses me Aaron me nöün kewe mwän repwe öüüwetä imwer imw mangaku peliöötiwen ewe imwenfel mangaku, äwenewenen ia akkar a töötä me ie, iei fän mesen ewe Imw Mangaku Leenien Chufengen. Iir repwe nemenem wón tümwünün ewe imw mi pin fänäsengesin ekkewe chón Israel. Ika epwe wor emön me lüküür epwe kkan ngeni ewe imw mi pin, epwe ninniiló.
39Iwe, kapachalapen iteiten ekkewe chón ewe einangen Levi iir mi ällea fän än ewe SAMOL öllük ngeni Moses me Aaron, alóngólóng wón ar kewe chóó kapacholong iteiten mwän a tori ew maraman ika fen lap seni, iteiter meinisin rüwe me ruu ngöröw.
Ekkesiwilin ekkewe mwännichi
40Mwirin, ewe SAMOL a apasa ngeni Moses, “Kopwe älleani iteiten ekkewe mwännichi seni ekkewe chón Israel iir ekkewe ra tori ew maram ika lap seni o kopwe makkeetiw iter. 41Iwe, kopwe angei ekkewe mwän seni ewe einangen Levi fänitei pwe iir repwe ekkesiwili ekkewe mwännichi meinisin seni chón Israel. Kopwe pwal angei nöün chón ewe einangen Levi maan pwe repwe ekkesiwili meinisin ekkewe mweinöün nöün chón Israel maan. Ngang ewe SAMOL.”
42Ina minne, Moses a älleani meinisin ekkewe mwännichi seni leiin ekkewe chón Israel, usun minne ewe SAMOL a öllük ngeni i. 43Iwe, kapachalapen iteiten ekkewe mwännichi ra tori ew maram ika lap seni mi makketiw iter, iteiter rüwe me ruu ngöröw rüwöpwükü fiik me ülümön.
44Mwirin, ewe SAMOL a pwal kapas ngeni Moses o apasa, 45“Kopwe angei ekkewe mwän seni ewe einangen Levi pwe iir repwe ekkesiwili meinisin ekkewe mwännichien Israel. Kopwe pwal angei nöün chón ewe einangen Levi maan pwe repwe ekkesiwili mweinöün nöün ekkewe chón Israel maan. Chón ewe einangen Levi iir neii: Ngang ewe SAMOL. 46Nge ren möön ekkewe rüwöpwükü fiik me ülümön mwännichi seni ekkewe chón Israel mi lapaló seni iteiten ekkewe mwän seni ewe einangen Levi, 47kopwe angei limu shekel ika ruu aunus silifer fäniten emön me emön, nge epwe alóngólóng wón ewe shekel ra aea lón ewe imw mi pin, üküükün choun ei rüwe kerah. 48Iwe, kopwe angei ewe mooni möön ekkesiwilin ekkewe chón Israel ra lapaló wón seni ekkewe mwän seni ewe einangen Levi o kopwe ngeni Aaron me nöün kewe mwän.”
49Ina minne, Moses a angei ewe mooni fäniten möön ekkesiwilin ekkewe mwännichien Israel mi lapalo seni iteiten ekkewe mwän seni ewe einangen Levi. 50Iwe, üküükün ewe mooni a ionifengeni fäniten ekkeei mwännichi nöün ekkewe chón Israel a tori engöröw ülüpwükü wone me limu shekel choun ika iliik me limu paun silifer, alóngólóng wón ewe shekel ra aea lón ewe imw mi pin. 51Iwe, Moses a ngeni Aaron me nöün kewe mwän ewe mooni fäniten ewe möön ekkesiiwil, usun minne ewe SAMOL a öllük.
Wiisen chón än Kohat we chóó
4 Mwirin, ewe SAMOL a apasa ngeni Moses me Aaron, 2“Öüpwe älleani iteiten chón än Kohat we kinikin, iei ew keangen chón ewe einangen Levi. Öüpwe angei iteiten chón ar kewe famili me än semer kewe chóó. 3Öüpwe älleani iteiten ekkewe mwän meinisin seni ier iliik feittä tori ier lime, iir ekkewe mi fich ngeni ar repwe feitto angang o föri angangen lón ewe Imw Mangaku Leenien Chufengen.
4“Iei ewe angang chón än Kohat we chóó repwe föri me lón ewe Imw Mangaku Leenien Chufengen: repwe tümwünü ekkewe mettóch mi unusen pin. 5Lupwen ekkewe chón Israel repwe le mwöküt lón ar sääi, Aaron me nöün kewe mwän repwe tolong lón ewe Imwenfel mangaku. Iwe, repwe ettätiw ewe refirefin lón o repwe pwölüweló ewe pwórofelin Pwärätä ren ei refiref. 6Mwirin, repwe pwölüw ei refiref ngeni ewe ünüchchen kuuch. Mwirin, repwe pwölüweló ei ünüchchen kuuch ren echö mangaku mi arawaraw. Ömwüchchülón, repwe siikalong ämmwärin ewe Pwórofel kewe lón leenier.
7“Iwe repwe óletaaló echö mangaku mi arawaraw wón ewe cheepel ia ewe pilawa mi pin a nóm ie. Mwirin, repwe iseis wón ekkewe peleich, ekkewe paan me ekkewe sepi pwal ekkewe ruume fäniten ekkewe asóren wün. Iwe, ewe pilawa epwe chök nónnóm wón ewe cheepel iteiten fansoun meinisin. 8Mwirin, repwe emeresaló echö mangaku mi parachól wón ekkeei pisek. Iwe, repwe pwölüweló ei ngeni ünüchchen kuuch mi mwirinnö. Mwirin, repwe siikalong ämmwärin kewe.
9“Iwe, repwe angei echö mangaku mi arawaraw o repwe pölüw ngeni ewe leenien etittin fiti fengen me ekkewe laamp wón, ekkewe fichin wiik me ekkewe opwong, pwal meinisin ekkewe ruume fäniten ewe apüra repwe aea le alöölöw ngeni. 10Mwirin, repwe tükümaló ewe leenien etittin fiti fengen me pisekisekin kewe lón echö pwölüpwöl mi för seni ünüchchen kuuch mi mwirinnö. Iwe, repwe anómwu ekkeei pisek mi tükütüküló wón ew leenien keki.
11“Iwe, Aaron me nöün kewe mwän repwe emeresaló echö mangaku mi arawaraw wón ewe róngen asór mi för seni kolt. Mwirin, repwe pwal pölüweló ei ren och pwölüpwöl mi för seni ünüchchen kuuch mi mwirinnö. Iwe, repwe siikalong ämmwärin kewe.
12“Mwirin, repwe angei ekkewe lussun pisek meinisin ra aea le föri ar angang lón ewe imw mi pin o repwe tükümireló lón echö mangaku mi arawaraw. Mwirin, repwe pwölüreló ren ünüchchen kuuch mi mwirinnö o repwe anómwur wón ew leenien keki.
13“Repwe pwal wiisen tukealó ewe falang seni ewe róngen asór mi för seni piraas, mwirin, repwe pwölüweló ren echö mangaku mi parachól. 14Mwirin, repwe isenätä wón meinisin ekkewe pisek ra aea le föri ar angang wón ewe róngen asór pacholong ekkewe paan fäniten mwoli, ekkewe äächipwen fituk, ekkewe söföl me ekkewe sepi ra aea le äsupwu ewe chcha. Mwirin, repwe emeresaló wón ei echö pwölüpwöl mi för seni ünüchchen kuuch mi mwirinnö. Iwe, repwe siikalong ämmwärin kewe.
15“Iwe, mwirin än Aaron me nöün kewe mwän repwe wes le pwölüweló ekkewe pisek mi pin me meinisin ekkewe masowen lón ewe imw mi pin; iwe, lupwen än chón Israel repwe popuetä ar sääi, nöün Kohat kewe mwän repwe feitto o mwärei ekkewe pisek. Nge resap tongeni attapa och me leiin ekkewe pisek mi pin pün rete mäló. Ikkeei ekkewe mettóch mi nóm lón ewe imwenfel mangaku nöün Kohat kewe mwän repwe wiisen mwärer.
16“Iwe, Eleazar nöün ewe souasór Aaron we mwän a kefilitä pwe i epwe wiisen tümwünü ewe apüra fäniten alöölön ekkewe laamp pwal ewe appach mi pwokkus, me ewe asóren mwöngö mi soun fiffis iteiten rän me ewe lömmis fäniten kepit. Enletin, Eleazar epwe wiisen tümwünü unusen ewe imwenfel mangaku me iteiten mettóch meinisin mi nóm lón pwal pacholong ekkewe masowen lón mi pin me pwal ekkewe ekkóch pisek.”
17Mwirin, ewe SAMOL a apasa ngeni Moses me Aaron, 18“Öüpwe tümwünü pwe ekkewe familien än Kohat we chóó resap rosoló me leiin chón ewe einangen Levi. 19Iei usun meet öüpwe föri pwe repwe manaw pwe rete mäló lupwen repwe kkan ngeni ekkewe mettóch mi unusen pin. Iteiten fansoun, Aaron me nöün kewe mwän repwe fitirelong lón ewe leeni mi pin o repwe ewiisa ngeni emön me emön mwän an angang me meet i epwe wiisen mwärei. 20Nge ekkewe mwän seni än Kohat we chóó resap fókkun tolong lón ewe leeni mi pin pwe repwe katol ekkewe mettóch mi pin lupwen ra pwölüpwölüló pwe rete mäló.”
Wiisen nöün Kershon kewe mwän
21Mwirin, ewe SAMOL a kapas ngeni Moses o apasa, 22“Kopwe pwal älleani iteiten chón än Kershon we kinikin lón ar kewe famili me än semer kewe chóó. 23Kopwe älleani iteiten ekkewe mwän meinisin seni ier iliik feittä tori ier lime, iir ätekkewe mi fich ngeni ar repwe feitto o angang lón ewe Imw Mangaku Leenien Chufengen.
24“Iei ewe angang fäniten än Kershon kewe chóó, minne repwe föri me mwärei. 25Iir repwe wiisen mwärei ekkewe cheech mangaku fäniten ewe imwenfel mangaku, ewe Imw Mangaku Leenien Chufengen fiti pwölüpwölütiwan kewe me ekkewe pwölüwpölün lükün mi för seni ünüchchen kuuch mi mwirinnö, ekkewe kaaten fäniten ewe asamen tolong lón ewe Imw Mangaku Leenien Chufengen. 26Repwe pwal mwärei ekkewe kaaten fäniten tittin ewe leeni mi nóm pwellin ünükkün ewe imwenfel mangaku me ewe róngen asór, ewe kaaten fäniten ewe asamen tolong, ekkewe sääl me pisekin ewe róngen asór meinisin. Chón än Kershon kewe chóó repwe wiisen mwärei ekkeei pisek meinisin. 27Aaron me nöün kewe mwän repwe wiisen öpöwu chón än Kershon kewe chóó fänäsengesin minne repwe föri, ese lifilifil ika fäniten ar repwe mwöküt ika föri pwal ekkóch angang. Repwe ewiisa ngeni chón än Kershon we chóó ekkewe pisek iir repwe wiisen mwärei. 28Iei ewe angang fäniten chón än Kershon kewe chóó me lón ewe Imw Mangaku Leenien Chufengen. Angangen wiiser epwe nóm fän öpöüwen Ithamar nöün ewe souasór Aaron we mwän.
Wiisen nöün Merari kewe mwän
29“Kopwe älleani iteiten chón än Merari we kinikin lón ar kewe famili me än semer kewe chóó. 30Kopwe älleani iteiten ekkewe mwän meinisin seni ier iliik feittä tori ier lime, iir ekkewe mi fich ngeni ar repwe feitto o föri angangen lón ewe Imw Mangaku Leenien Chufengen. 31Iei wiiser lupwen repwe föri ar angang me lón ewe Imw Mangaku Leenien Chufengen. Repwe wiisen mwärei ekkewe papen ewe imwenfel mangaku, ekkewe ääpenges, ekkewe üür me ekkewe wäänifót. 32Repwe pwal mwärei ekkewe üür fäniten ewe tiit mi pwelli ewe leeni lükün fiti alóngur kewe, ekkewe pwurowók, ekkewe sääl, ekkóch pisekin atawe me iteiten mettóch mi sooso ngeni aear. Kopwe ewiisa ngeni emön me emön mwän tichchikin ekkewe mettóch i epwe wiisen mwärei. 33Iei ewe angang fäniten chón än Merari kewe chóó lupwen repwe föri ar angang lón ewe Imw Mangaku Leenien Chufengen fän öpöüwen Ithamar, nöün ewe souasór Aaron we mwän.”
Ewe ällean iteiten chón ewe einangen Levi
34Iwe, Moses me Aaron me ekkewe souemmwenin chón Israel ra älleani iteiten chón än Kohat we kinikin lón ar kewe famili me än semer kewe chóó. 35Iwe, meinisin ekkewe mwän seni ier iliik feittä tori ier lime, iir ekkewe mi fich ngeni ar repwe feitto o föri angangen lón ewe Imw Mangaku Leenien Chufengen. 36Iwe, unusalapen iteiten chókewe mi ällea lón ar kewe famili, iteiter ruu ngöröw füüpwükü lime. 37Iei iteiten chókewe mi ällea me lón än Kohat kewe famili, iir ekkewe mi tongeni ar repwe angang lón ewe imwenfel mangaku, ikkeiir ekkewe Moses me Aaron ra älleaniir alóngólóng wón minne ewe SAMOL a öllük ngeni Moses.
38Iwe, iteiten nöün Kershon kewe mwän mi ällea fiti ar kewe famili me än semer kewe chóó, 39seni ier iliik feittä tori ier lime, iteiten emön me emön mi fich ngeni an epwe feitto älillis lón angangen ewe Imw Mangaku Leenien Chufengen, 40iir chókewe mi ällea lón ar kewe famili me än semer kewe chóó, iteiter ruu ngöröw wonopwükü iliik. 41Ikkeiir ekkewe mi ällea me lón ekkewe famili än nöün Kershon kewe mwän, iir meinisin ekkewe mi tongeni ar repwe angang lón ewe imwenfel mangaku. Ikkeiir ekkewe Moses me Aaron ra älleaniir alóngólóng wón minne ewe SAMOL a öllük ngeni Moses.
42Chókewe seni ekkewe famili än nöün Merari kewe mwän iir mi ällea lón ar kewe famili me än semer kewe chóó, 43seni ier iliik feittä tori ier lime, iteiten emön me emön mi fich ngeni an epwe feitto älillis lón angangen ewe Imw Mangaku Leenien Chufengen, 44iir chókewe mi ällea lón ar kewe famili, iteiter ülüngät ngöröw rüwöpwükü. 45Iei unuselapen iteiten chókewe mi ällea me lón ekkewe famili än nöün Merari kewe mwän, iir ekkewe Moses me Aaron ra älleaniir alóngólóng wón ekkewe kapas ewe SAMOL a öllük ngeni Moses.
46Iei usun Moses me Aaron me ekkewe souemmwenin chón Israel ra älleani chón ewe einangen Levi lón ar kewe famili me än semer kewe chóó. 47Iwe, iteiten ekkewe mwän meinisin seni ier iliik feittä tori ier lime mi feitto pwe repwe föri angangen lón ewe imwenfel mangaku me mwärei ewe Imw Mangaku Leenien Chufengen fiti pisekin meinisin, 48iteiter walü ngöröw limöpwükü waliik. 49Iwe, fän än ewe SAMOL öllük ngeni Moses, emön me emön mwän a angei wiisan ren minne epwe ääni angang me meet epwe mwärei. Iei usun Moses a äwesi ewe ällean iteit, usun chök minne ewe SAMOL a öllük ngeni i.
Aramas mi nóm lón tettelin chón limengaw repwe käimwüüló
5 Iwe, ewe SAMOL a kapas ngeni Moses o apasa, 2“Kopwe öllük ngeni ekkewe aramasen Israel pwe repwe atoowu seni lón ewe leeni ia ra asóósó ie iteiten iö mi üri och kilingaw mi tongeni an epwe üri pwal ekkóch ika iteiten iö mi pwuu seni och chönü ika iö mi nóm lón tettelin chón limengaw ren an attapa emön soomä. 3Ei a weneiti ppöküw ekkewe mwän me ekkewe fefin. Öüpwe atoorowu pwe resap elimengawa ewe leeni ia öüwa asóósó ie, ia ngang üwa nónnóm ie leiimi.” 4Iei minne ekkewe aramasen Israel ra föri usun minne ewe SAMOL a öllük ngeni Moses o ra atoowu ekkewe chón limengaw lükün ewe leeni ia ra asóósó ie.
Omwusomwus me eliwinisäfäli mettóch
5Mwirin, ewe SAMOL a apasa ngeni Moses, 6“Kopwe ngeni ekkewe aramasen Israel ekkeei kapasen öüröür: ‘Are emön me leiin ekkewe aramas - emön mwän ika emön fefin - a atai an ölükülük ngeni ewe SAMOL, ren an föri och mettóch mi mwääl ngeni pwal emön aramas, ewe aramas a tipis. 7Mwirin, ewe aramas mi föri ewe mettóch mi mwääl epwe pwärätä an tipis i a föri o epwe eliwinisäfäli unusen minne a pwuupwungaw wón, nge epwe pwal apachatä ew na limu ngeni. Iwe, epwe eliwinisäfäli ewe mettóch ngeni ewe aramas i a mwääl ngeni. 8Nge are ewe aramas ätewe a mwääl ngeni a mäló nge esap wor määrärin epwe tongeni angei ewe mettóch ätewe epwe eliwinisäfäli ngeni; iwe, ewe mettóch epwe ló ngeni ewe SAMOL. Iwe, ätewe epwe ngeni ewe souasór ewe mettóch, nge epwe pwal apacha ngeni emön ätemwänin siip fäniten ewe asóren limelimen tipis pwe ewe souasór epwe föri ewe asóren limelimen tipis fänitan. 9Iwe, iteiten ekkewe liffang mi pin meinisin ekkewe aramasen Israel repwe uweato ren ewe souasór, än ewe souasór. 10Iteiten ekkewe mettóch emön aramas a epinaló, epwe pwisin an, nge minne emön aramas a fang ngeni ewe souasór epwe än ewe souasór.’ ”
Ekkana fefin mi pwüpwülü nge resap ölükülük
11Iwe, ewe SAMOL a kapas ngeni Moses o apasa, 12“Kopwe apasa ngeni ekkewe aramasen Israel: ‘Are pwülüwen emön mwän a tókkóló o a kirikiringaw ngeni pwülüwan, 13pün pwal emön mwän a kóón ren neminnewe, nge ei föfför a mwón seni mesen pwülüwen neminnewe we o esap pwä föfförün, pwokiten esap wor chón pwärätä epwe ettipisi i o esap wor emön epwe seretä wón, inamwo are neminnewe a elimengawa inisin, 14iwe, are ewe ekiekin öümöüm a tori ätewe o ätewe a öümöüma pwülüwan we, nge neminnewe a fen elimengawa pwisin inisin, ika are och ekiekin öümöüm a tori ätewe o ätewe a öümöüma pwülüwan we, nge neminnewe esap elimengawa pwisin inisin, 15lón ekkeei lapalap me ruu, ewe mwän epwe emmwenato pwülüwan we ren ewe souasór o uweato ewe asór fäniten neminnewe ew na engolun ew efa ika ruu kuache pilawa mi amas seni föün parli. Ätewe esap nofiti ngeni apüra seni föün olif, esap pwal iseis appach mi pwokkus wón, pwokiten iei ew asóren luukommóng, ew asóren kütta meet mi let pwe epwe kütta are neminnewe a tipis.
16“ ‘Mwirin, ewe souasór epwe emmwenato ewe fefin o anómwu i fän mesen ewe SAMOL. 17Iwe, ewe souasór epwe üfi och kólik mi pin lón ew sepi mi för seni pwül. Iwe, epwe tukei och mwormworen pwül seni pwülün lón ewe imwenfel mangaku o nofiti ngeni ewe kólik. 18Mwirin, ewe souasór epwe öütääi ewe fefin fän mesen ewe SAMOL. Iwe, epwe atomwa möküren neminnewe o uwalong lón pöün neminnewe ewe asóren kütta meet mi let, iei ewe asóren luukommóng pwe epwe kütta are än pwülüwan we öümöün a pwüng. Ewe souasór epwe üütä fän mesen ewe fefin o kömwöch lón pöün ewe sepien kólik mi maras mi atooto ew önümamaw wón chókana mi tipis. 19Iwe, ewe souasór epwe appwona ewe fefin fän ökköpöl o apasa ngeni, “Are esap wor pwal emön mwän a kóón reemw pwal are kosap tókkóló o kosap pwisin elimengawa inisum ren óm kosap kirikiringaw ngeni pwülüwom we, kopwe ngas seni ewe önümamaw ei kólik mi maras epwe atoto. 20Nge are ka tókkóló lupwen en mi nóm fän än pwülüwom we nemenem o ka pwisin elimengawa inisum ren än pwal emön mwän me lükün pwülüwom we a kóón reemw” - 21mwirin, ewe souasór epwe appwona ewe fefin fän ökköpöl mi fiti önümamaw o epwe apasa ngeni ewe fefin - “ewe SAMOL epwe föri pwe kopwe önümamaw o aramasom repwe leawenuk lón ar óttek, lupwen Kot epwe föri pwe aföom epwe pwasaló nge upwom epwe pwooló. 22Iwe, amwo ei kólik mi atoto önümamaw epwe tolong lón luukom o föri pwe upwom epwe pwooló nge aföom epwe kirowuló.” Mwirin, ewe fefin epwe apasa, “Amen, epwe ina usun.”
23“ ‘Mwirin, ewe souasór epwe makkeetiw ekkeei kapasen önümamaw lón echö leenien mak mi för seni ünüchchen maan o mwirin, epwe tölalong ekkewe mak lón ewe kólik mi maras. 24Iwe, ewe souasór epwe öünü ngeni ewe fefin ewe kólik mi maras epwe atoto ew önümamaw. Iwe, ewe kólik epwe atoto ewe önümamaw epwe tolong lón neminnewe o epwe efisätä maras mi eriäfföü. 25Mwirin, ewe souasór epwe angei seni lepöün ewe fefin ewe asóren mwöngö fäniten luukommóng; iwe, epwe sapaatä me mwen ewe SAMOL o epwe uwealó ren ewe róngen asór. 26Iwe, ewe souasór epwe tukei ekumwuch seni ewe asóren mwöngö pwe iei och kinikinin ächchem seni ewe asór mi esissilätä ewe unusan, o epwe kenaló wón ewe róngen asór. Mwirin ei, ewe souasór epwe öünü ngeni ewe fefin ewe kólik. 27Mwirin än ewe souasór a öünü ngeni neminnewe ewe kólik; iwe, epwe fis pwe ika neminnewe a pwisin elimengawa inisin o a kirikiringaw ngeni pwülüwan we, ewe kólik epwe atoto ew önümamaw epwe tolong lón inisin o epwe efisätä och metek mi weires. Iwe, upwen neminnewe epwe pwooló nge aföön epwe pwasaló. Iwe, ewe fefin epwe emön mi önümamaw me leiin aramasan. 28Nge are ewe fefin esap pwisin elimengawa inisin o i a limöch; mwirin, i a ngasaló seni ewe feiengaw o epwe tongeni nöünöü.
29“ ‘Iei ewe öllük fäniten luukommóng, lupwen emön fefin mi pwüpwülü a tókkóló o elimenagawa pwisin inisin nge i mi chüen nóm fän än pwülüwan we nemenem, 30ika lupwen ewe ngünün luukommóng a tolong lón leluken emön mwän pwokiten a ömümöüma pwülüwan. Mwirin, ewe souasór epwe öüütäi ewe fefin fän mesen ewe SAMOL o i epwe föri unusen pwüngün ei öllük ngeni neminnewe. 31Iwe, ewe mwän minne pwülüwan ewe epwe pichiló seni tipisin ei föfför, nge ewe fefin epwe pwisin mwärelong fän liwinin an tipis.’ ”
Ewe öllük fäniten chókana mi angei ei pwonen chón Nazir
6 Mwirin, ewe SAMOL a apasa ngeni Moses, 2“Kopwe kapas ngeni ekkewe aramasen Israel o ngeniir ekkeei kapasen öüröür: ‘Lupwen ekkóch me leiin ekkewe aramas, ese lifilifil ika iir mwän ika fefin, repwe ääni och sókkun pwon pwe repwe pwisin epinaló inisiir fäniten ewe SAMOL pwe repwe emön chón Nazir, 3repwe pwisin epini seni manawer ar resap wün wain ika pwal ekkóch sókkun minen wün mi mwääl, resap pwal fókkun wün finikar mi för seni wain ika seni ekkóch sókkun minen wün mi mwääl. Resap fókkun wün chönün kreip, resap pwal ochooch kreip ika kreip mi appwas. 4Lón üküükün ekkewe rän meinisin ra pwisin epinireló pwe repwe chón Nazir, resap fókkun mwöngö och mettóch mi pop seni ewe irän wain, seni föün tori ünüchchan.
5“ ‘Resap fókkun fichieló meeten mökürer lón üküükün unusen ewe fansoun ra pwon pwe repwe epinaló inisiir, pün iir ra pin o käimwüló fäniten ewe SAMOL. Iei popun repwe mwüüt ngeni meeten mökürer pwe epwe langattam.
6“ ‘Iwe, resap pwal arap ngeni inisin emön soomä lón unusen ewe fansoun ra föri pwüngün ar pwon ngeni ewe SAMOL, 7inamwo ika pwe pwisin semer ika iner ika pwiir ika fefiner ra mäló. Resap fókkun elimengawa ekkewe meeten mökür mi nóm wón mökürer, pwokiten iei esissilen ar käimwüló ngeni Kot. 8Ei öllük a weneiti ekkewe chón ääni ei pwon lón üküükün langattamen ewe fansoun ra käimwüló fäniten ewe SAMOL.
9“ ‘Nge are a chök mwittir cheeri emön aramas an mäló me ünükkün ekkeei aramas mi käimwüló, ina popun ra elimengawa meeten mökürer iir ra epinaló; iwe, repwe witiwit lón üküükün fisu rän. Mwirin, repwe reipööpöló meeten mökürer. Mwirin, repwe limeliöch seni ar limengaw. 10Iwe, lón ewe awalüwen rän, repwe uweato rüwömön lisóóm ika rüwömön appansüünsün mwürö ren ewe souasór leasamalapen ewe Imw Mangaku Leenien Chufengen. 11Iwe, ewe souasór epwe ääni asór emön me leiir fäniten ewe asóren limelimen tipis, nge ewe emön fäniten ewe asóren keek. Iwe, i epwe föri asóren omwusomwusen tipis fäniten ekkewe chón limengaw, pwokiten ra tipis ren ar kkan ngeni emön soomä. Iwe, lón chök pwal ewe ränin, repwe asöfösäfäli ar pwon o mwüüt ngeni meeten mökürer pwe repwe pwüksäfäl. 12Ekkewe ränin ar pwon ra fen wesiló me mwen ar limengaw resap chüen ällea. Repwe pwal poputäsäfäl o äimwüreló ngeni ewe SAMOL lón üküükün unusen fansoun ar we pwon. Iwe, emön me emön leiir epwe uwato emön ätemwänin laam ew ierin pwe ew asóren pwuupwungaw.
13“ ‘Iwe, iei öllükün ewe angangen än emön pwon pwe epwe emön chón Nazir. Lesópwólón ewe fansoun ra käimwüló pwe repwe chón Nazir, emön me emön leiir epwe feilló ren asamalapen ewe Imw Mangaku Leenien Chufengen. 14Iwe, i epwe ääni ekkeei asór ngeni ewe SAMOL me ikenan: emön ätemwänin laam ew ierin esap wor terin fäniten ew asóren keek, emön liäfefinin laam ew ierin esap wor terin fäniten ew asóren limelimen tipis, emön ätemwänin siip esap wor terin fäniten ew asóren kinamwe, 15ew chükün pilawa esap wor iis lón, masowan ekkóch keik mi för seni pilawa mi mwirinnö mi nofit fengen me apüra me pilawa usun nokop mi tóótó ngeni apüra, fiti fengen me chiechier kewe asóren mwöngö me ekkewe asóren wün.
16“ ‘Iwe, ewe souasór epwe uweato ekkeei asór fän mesen ewe SAMOL. Akkomw, ewe asóren limelimen tipis me asóren keek. 17Mwirin, epwe pwal ääni asór ewe ätemwänin siip fäniten ew asóren kinamwe ngeni ewe SAMOL fiti ewe chükün pilawa ese wor iis lón. Ewe souasór epwe pwal ääni asór ewe asóren mwöngö me ewe asóren wün.
18“ ‘Mwirin, ewe chón Nazir epwe reiipööpöló meeten möküran we mi epinipin me leasamalapen ewe Imw Mangaku Leenien Chufengen. Iwe, i epwe angei ekkewe meeten mökür o isenirelong lón ewe ekkei mi kü me fän ewe mönün asóren kinamwe.
19“ ‘Iwe, mwirin än emön me emön ekkewe chón Nazir a reiipööpoló meeten möküran we mi epinipin, ewe souasór epwe angei fäniten emön me emön leiir afaren ewe ätemwänin siip mi kuk, och keik esap wor iis lón me och pilawa usun nokop esap wor iis lón seni lón ewe chüük. Iwe, epwe isenirelong meinisin lepöün ewe chón Nazir. 20Mwirin, ewe souasór epwe sapaatä ekkeei liffang fän mesen ewe SAMOL pwe ew asóren epinipin. Ikkeei ekkewe kinikin mi pin fäniten ewe souasór fiti fengen me ewe leupwan me ewe aföön mi sapatä fän mesen ewe SAMOL. Mwirin ei lapalap, ewe chón Nazir a tongeni wün säfäl wain.’
21“ ‘Iei angangen pwüngün öllükün än emön epwe emön chón Nazir. Are emön chón Nazir a pwon pwe epwe pwal ngeni ewe SAMOL och mettóch mi luuló seni meet öüküükün emön chón Nazir epwe ääni pwon, ätewe epwe fókkun öpwönüetä ewe pwon i a ääni.’ ”
Än ewe souasór kapasen efeiöch
22Mwirin, ewe SAMOL a apasa ngeni Moses, 23“Kopwe kapas ngeni Aaron me nöün kewe mwän pwe epwe iei usun lapalapen ar repwe efeiöchüw ekkewe aramasen Israel. Repwe apasa ngeniir:
24‘Ewe SAMOL epwe efeiöchüw kemi o tümwünü kemi.
25‘Ewe SAMOL epwe wókekkei ngeni kemi o ümöümöch ngeni kemi.
26‘Ewe SAMOL epwe äsepa ngeni kemi wón mesan o fang ngeni kemi an kinamwe.’ ”
27Epwe iei usun än Aaron me nöün kewe mwän repwe föüni itei wón ekkewe chón Israel pwe iir neii aramas; iwe, ngang üpwe efeiöchür.”
Ekkewe asóren asópwun ewe Imwenfel
7 Iwe, lón ewe rän Moses a äwesaló le öüüetä ewe imwenfel mangaku, a epiti ewe imwenfel mangaku o epinaló fiti pisekin meinisin. I a pwal epiti o epinaló ewe róngen asór me pisekin kewe meinisin. 2Mwirin, ekkewe souemmwenin chón Israel iir ekkewe möküren ekkewe famili pwal iir ekkewe souemmwenin ar kewe chóó mi wiisen nemeni chókewe mi ällea ra feitto o uweato ar kewe asór. 3Ra uweato ar kewe asór fän mesen ewe SAMOL, wonofóch wóóken mi imweimw me engol me rüömön ätemwänin kowu - emön ätemwänin kowu seni emön me emön souemmwen pwal efóch wóóken seni ökkörüwömön souemmwen. Iwe, ra uweiireto leasamalapen ewe imwenfel mangaku.
4Mwirin, ewe SAMOL a apasa ngeni Moses, 5“Kopwe etiwa ekkeei asór seniir pwe ekkewe mwän seni ewe einangen Levi repwe aea le föri angangen lón ewe imwenfel mangaku. Kopwe ngeni chón ewe einangen Levi ekkeei asór minne mi pwüng ngeni äwenewenen än emön me emön angang.”
6Iei minne, Moses a angei ekkewe wóóken me ekkewe ätemwänin kowu o a ngeni ekkewe mwän seni ewe einangen Levi. 7A ngeni chón än Kershon we chóó rüwófóch wóóken me fömön ätemwänin kowu minne mi pwüng ngeni äwenewenen ar angang. 8Nge a ngeni chón än Merari we chóó fófóch wóóken me walümön ätemwänin kowu minne mi pwüng ngeni äwenewenen ar angang. Ar angang meinisin ra nóm fän nemenien Ithamar nöün ewe souasór Aaron we mwän. 9Nge Moses esap ngeni chón än Kohat we chóó efóch wóóken ika emön ätemwänin kowu, pwokiten iir repwe wiisen mwärei wón afarer ekkewe mettóch mi pin, pün iei meet wiiser.
10Lupwen ewe róngen asór a kepit, ekkewe souemmwen ra uweato ar kewe asór fäniten epinipinilón ewe róngen asór o ra anómwur mwen ewe róngen asór. 11Pün ewe SAMOL a apasa ngeni Moses, “Iteiten rän emön souemmwen epwe uweato an asór fäniten epinipinin ewe róngen asór, ew rän nge emön souemmwen.”
12Iwe, lón ewe äewin rän, Nahshon nöün Amminadab we mwän seni ewe einangen Judah a uweato an asór.
13I a ääni asór ew peleich mi för seni silifer üküükün choun ipwükü iliik shekel ika ülüngät ew na rüwänü paun, pwal ew sepien käsup mi för seni silifer üküükün choun fiik shekel ika ew ülüngät na rüwänü paun. Chouur me ruu ra lóngólóng wón ewe shekel ra aea lón ewe imw mi pin, nge ew me ew a masow ren pilawa mi amas o mwirinnö mi nofit fengen me apüra seni föün olif pwe ew asóren mwöngö. 14A pwal ääni asór ew sepi mi för seni kolt, üküükün choun engol shekel ika ina epwe rüwänü aunus, nge mi ur ren appach mi pwokkus. 15A pwal ääni asór emön liälifföön ätemwänin kowu, emön ätemwänin siip me emön ätemwänin laam ew ierir fäniten ew asóren keek. 16A pwal ääni asór emön ätemwänin kuuch fäniten ew asóren limelimen tipis. 17A pwal ääni asór rüwömön ätemwänin kowu, limmön ätemwänin siip, limmön ätemwänin kuuch me limmön ätemwänin laam ew ierir pwe epwe ew asóren kinamwe. Iei üküükün ewe asór än Nahshon nöün Amminadab we mwän.
18Iwe, lón ewe oruuwen rän, Nethanel nöün Zuar we mwän souemmwenin ewe einangen Issakar a uweato an asór.
19I a ääni asór ew peleich mi för seni silifer üküükün choun ipwükü iliik shekel ika ülüngät ew na rüwänü paun, pwal ew sepien käsup mi för seni silifer üküükün choun fiik shekel ika ew ülüngät na rüwänü paun. Chouur me ruu ra lóngólóng wón ewe shekel ra aea lón ewe imw mi pin, nge ew me ew a masow ren pilawa mi amas o mwirinnö mi nofit fengen me apüra seni föün olif pwe ew asóren mwöngö. 20A pwal ääni asór ew sepi mi för seni kolt, üküükün choun engol shekel ika ina epwe rüwänü aunus, nge mi ur ren appach mi pwokkus. 21A pwal ääni asór emön liälifföön ätemwänin kowu, emön ätemwänin siip me emön ätemwänin laam ew ierir fäniten ew asóren keek. 22A pwal ääni asór emön ätemwänin kuuch fäniten ew asóren limelimen tipis. 23A pwal ääni asór rüwömön ätemwänin kowu, limmön ätemwänin siip, limmön ätemwänin kuuch me limmön ätemwänin laam ew ierir pwe ew asóren kinamwe. Iei üküükün ewe asór än Nethanel nöün Zuar we mwän.
24Lón ewe öülüngätin rän, Eliab nöün Helon we mwän, souemmwenin ekkewe aramas seni ewe einangen Zebulun a uweato an asór.
25I a ääni asór ew peleich mi för seni silifer üküükün choun ipwükü iliik shekel ika ülüngät ew na rüwänü paun, pwal ew sepien käsup mi för seni silifer üküükün choun fiik shekel ika ew ülüngät na rüwänü paun. Chouur me ruu ra lóngólóng wón ewe shekel ra aea lón ewe imw mi pin, nge ew me ew a masow ren pilawa mi amas o mwirinnö mi nofit fengen me apüra seni föün olif pwe ew asóren mwöngö. 26A pwal ääni asór ew sepi mi för seni kolt, üküükün choun engol shekel ika ina epwe rüwänü aunus, nge mi ur ren appach mi pwokkus. 27A pwal ääni asór emön liälifföön ätemwänin kowu, emön ätemwänin siip me emön ätemwänin laam ew ierir fäniten ew asóren keek. 28A pwal ääni asór emön ätemwänin kuuch fäniten ew asóren limelimen tipis. 29A pwal ääni asór rüwömön ätemwänin kowu, limmön ätemwänin siip, limmön ätemwänin kuuch me limmön ätemwänin laam ew ierir pwe ew asóren kinamwe. Iei üküükün ewe asór än Eliab nöün Helon we mwän.
30Lón ewe örüwänüwen rän, Elizur nöün Shedeur we mwän, souemmwenin ekkewe aramas seni ewe einangen Reuben a uweato an asór.
31I a ääni asór ew peleich mi för seni silifer üküükün choun ipwükü iliik shekel ika ülüngät ew na rüwänü paun, pwal ew sepien käsup mi för seni silifer üküükün choun fiik shekel ika ew ülüngät na rüwänü paun. Chouur me ruu ra lóngólóng wón ewe shekel ra aea lón ewe imw mi pin, nge ew me ew a masow ren pilawa mi amas o mwirinnö mi nofit fengen me apüra seni föün olif pwe ew asóren mwöngö. 32A pwal ääni asór ew sepi mi för seni kolt, üküükün choun engol shekel ika ina epwe rüwänü aunus, nge mi ur ren appach mi pwokkus. 33A pwal ääni asór emön liälifföön ätemwänin kowu, emön ätemwänin siip me emön ätemwänin laam ew ierir fäniten ew asóren keek. 34A pwal ääni asór emön ätemwänin kuuch fäniten ew asóren limelimen tipis. 35A pwal ääni asór rüwömön ätemwänin kowu, limmön ätemwänin siip, limmön ätemwänin kuuch me limmön ätemwänin laam ew ierir pwe ew asóren kinamwe. Iei üküükün ewe asór än Elizur nöün Shedeur we mwän.
36Lón ewe elimuwen rän, Shelumiel nöün Zurishaddai we mwän, souemmwenin ekkewe aramas seni ewe einangen Simeon a uweato an asór.
37I a ääni asór ew peleich mi för seni silifer üküükün choun ipwükü iliik shekel ika ülüngät ew na rüwänü paun, pwal ew sepien käsup mi för seni silifer üküükün choun fiik shekel ika ew ülüngät na rüwänü paun. Chouur me ruu ra lóngólóng wón ewe shekel ra aea lón ewe imw mi pin, nge ew me ew a masow ren pilawa mi amas o mwirinnö mi nofit fengen me apüra seni föün olif pwe ew asóren mwöngö. 38A pwal ääni asór ew sepi mi för seni kolt, üküükün choun engol shekel ika ina epwe rüwänü aunus, nge mi ur ren appach mi pwokkus. 39A pwal ääni asór emön liälifföön ätemwänin kowu, emön ätemwänin siip me emön ätemwänin laam ew ierir fäniten ew asóren keek. 40A pwal ääni asór emön ätemwänin kuuch fäniten ew asóren limelimen tipis. 41A pwal ääni asór rüwömön ätemwänin kowu, limmön ätemwänin siip, limmön ätemwänin kuuch me limmön ätemwänin laam ew ierir pwe ew asóren kinamwe. Iei üküükün ewe asór än Shelumiel nöün Zurishaddai we mwän.
42Lón ewe awonuwen rän, Eliasaf nöün Deuel we mwän, souemmwenin ekkewe aramas seni ewe einagen Kad a uweato an asór.
43I a ääni asór ew peleich mi för seni silifer üküükün choun ipwükü iliik shekel ika ülüngät ew na rüwänü paun, pwal ew sepien käsup mi för seni silifer üküükün choun fiik shekel ika ew ülüngät na rüwänü paun. Chouur me ruu ra lóngólóng wón ewe shekel ra aea lón ewe imw mi pin, nge ew me ew a masow ren pilawa mi amas o mwirinnö mi nofit fengen me apüra seni föün olif pwe ew asóren mwöngö. 44A pwal ääni asór ew sepi mi för seni kolt, üküükün choun engol shekel ika ina epwe rüwänü aunus, nge mi ur ren appach mi pwokkus. 45A pwal ääni asór emön liälifföön ätemwänin kowu, emön ätemwänin siip me emön ätemwänin laam ew ierir fäniten ew asóren keek. 46A pwal ääni asór emön ätemwänin kuuch fäniten ew asóren limelimen tipis. 47A pwal ääni asór rüwömön ätemwänin kowu, limmön ätemwänin siip, limmön ätemwänin kuuch me limmön ätemwänin laam ew ierir pwe ew asóren kinamwe. Iei üküükün ewe asór än Eliasaf nöün Deuel we mwän.
48Lón ewe efisuwen rän, Elishama nöün Ammihud we mwän, souemmwenin ekkewe aramas seni ewe einangen Efraim a uweato an asór.
49I a ääni asór ew peleich mi för seni silifer üküükün choun ipwükü iliik shekel ika ülüngät ew na rüwänü paun, pwal ew sepien käsup mi för seni silifer üküükün choun fiik shekel ika ew ülüngät na rüwänü paun. Chouur me ruu ra lóngólóng wón ewe shekel ra aea lón ewe imw mi pin, nge ew me ew a masow ren pilawa mi amas o mwirinnö mi nofit fengen me apüra seni föün olif pwe ew asóren mwöngö. 50A pwal ääni asór ew sepi mi för seni kolt, üküükün choun engol shekel ika ina epwe rüwänü aunus, nge mi ur ren appach mi pwokkus. 51A pwal ääni asór emön liälifföön ätemwänin kowu, emön ätemwänin siip me emön ätemwänin laam ew ierir fäniten ew asóren keek. 52A pwal ääni asór emön ätemwänin kuuch fäniten ew asóren limelimen tipis. 53A pwal ääni asór rüwömön ätemwänin kowu, limmön ätemwänin siip, limmön ätemwänin kuuch me limmön ätemwänin laam ew ierir pwe ew asóren kinamwe. Iei üküükün ewe asór än Elishama nöün Ammihud we mwän.
54Lón ewe awalüwen rän, Kamaliel nöün Pedahzur we mwän, souemmwenin ekkewe aramas seni ewe einangen Manassah a uweato an asór.
55I a ääni asór ew peleich mi för seni silifer üküükün choun ipwükü iliik shekel ika ülüngät ew na rüwänü paun, pwal ew sepien käsup mi för seni silifer üküükün choun fiik shekel ika ew ülüngät na rüwänü paun. Chouur me ruu ra lóngólóng wón ewe shekel ra aea lón ewe imw mi pin, nge ew me ew a masow ren pilawa mi amas o mwirinnö mi nofit fengen me apüra seni föün olif pwe ew asóren mwöngö. 56A pwal ääni asór ew sepi mi för seni kolt, üküükün choun engol shekel ika ina epwe rüwänü aunus, nge mi ur ren appach mi pwokkus. 57A pwal ääni asór emön liälifföön ätemwänin kowu, emön ätemwänin siip me emön ätemwänin laam ew ierir fäniten ew asóren keek. 58A pwal ääni asór emön ätemwänin kuuch fäniten ew asóren limelimen tipis. 59A pwal ääni asór rüwömön ätemwänin kowu, limmön ätemwänin siip, limmön ätemwänin kuuch me limmön ätemwänin laam ew ierir pwe ew asóren kinamwe. Iei üküükün ewe asór än Kamaliel nöün Pedahzur we mwän.
60Lón ewe ettiuwen rän, Abidan nöün Kideoni we mwän, souemmwenin ekkewe aramas seni ewe einangen Benjamin a uweato an asór.
61I a ääni asór ew peleich mi för seni silifer üküükün choun ipwükü iliik shekel ika ülüngät ew na rüwänü paun, pwal ew sepien käsup mi för seni silifer üküükün choun fiik shekel ika ew ülüngät na rüwänü paun. Chouur me ruu ra lóngólóng wón ewe shekel ra aea lón ewe imw mi pin, nge ew me ew a masow ren pilawa mi amas o mwirinnö mi nofit fengen me apüra seni föün olif pwe ew asóren mwöngö. 62A pwal ääni asór ew sepi mi för seni kolt, üküükün choun engol shekel ika ina epwe rüwänü aunus, nge mi ur ren appach mi pwokkus. 63A pwal ääni asór emön liälifföön ätemwänin kowu, emön ätemwänin siip me emön ätemwänin laam ew ierir fäniten ew asóren keek. 64A pwal ääni asór emön ätemwänin kuuch fäniten ew asóren limelimen tipis. 65A pwal ääni asór rüwömön ätemwänin kowu, limmön ätemwänin siip, limmön ätemwänin kuuch me limmön ätemwänin laam ew ierir pwe ew asóren kinamwe. Iei üküükün ewe asór än Abidan nöün Kideoni we mwän.
66Lón ewe äengolun rän, Ahiezer nöün Ammishaddai we mwän, souemmwenin ekkewe aramas seni ewe einangen Dan a uweato an asór.
67I a ääni asór ew peleich mi för seni silifer üküükün choun ipwükü iliik shekel ika ülüngät ew na rüwänü paun, pwal ew sepien käsup mi för seni silifer üküükün choun fiik shekel ika ew ülüngät na rüwänü paun. Chouur me ruu ra lóngólóng wón ewe shekel ra aea lón ewe imw mi pin, nge ew me ew a masow ren pilawa mi amas o mwirinnö mi nofit fengen me apüra seni föün olif pwe ew asóren mwöngö. 68A pwal ääni asór ew sepi mi för seni kolt, üküükün choun engol shekel ika ina epwe rüwänü aunus, nge mi ur ren appach mi pwokkus. 69A pwal ääni asór emön liälifföön ätemwänin kowu, emön ätemwänin siip me emön ätemwänin laam ew ierir fäniten ew asóren keek. 70A pwal ääni asór emön ätemwänin kuuch fäniten ew asóren limelimen tipis. 71A pwal ääni asór rüwömön ätemwänin kowu, limmön ätemwänin siip, limmön ätemwänin kuuch me limmön ätemwänin laam ew ierir pwe ew asóren kinamwe. Iei üküükün ewe asór än Ahiezer nöün Ammishaddai we mwän.
72Lón ewe engol me ewin rän, Pakiel nöün Okran we mwän, souemmwenin ekkewe aramas seni ewe einangen Asher a uweato an asór.
73I a ääni asór ew peleich mi för seni silifer üküükün choun ipwükü iliik shekel ika ülüngät ew na rüwänü paun, pwal ew sepien käsup mi för seni silifer üküükün choun fiik shekel ika ew ülüngät na rüwänü paun. Chouur me ruu ra lóngólóng wón ewe shekel ra aea lón ewe imw mi pin, nge ew me ew a masow ren pilawa mi amas o mwirinnö mi nofit fengen me apüra seni föün olif pwe ew asóren mwöngö. 74A pwal ääni asór ew sepi mi för seni kolt, üküükün choun engol shekel ika ina epwe rüwänü aunus, nge mi ur ren appach mi pwokkus. 75A pwal ääni asór emön liälifföön ätemwänin kowu, emön ätemwänin siip me emön ätemwänin laam ew ierir fäniten ew asóren keek. 76A pwal ääni asór emön ätemwänin kuuch fäniten ew asóren limelimen tipis. 77A pwal ääni asór rüwömön ätemwänin kowu, limmön ätemwänin siip, limmön ätemwänin kuuch me limmön ätemwänin laam ew ierir pwe ew asóren kinamwe. Iei üküükün ewe asór än Pakiel nöün Okran we mwän.
78Lón ewe engol me ruuwen rän, Ahira nöün Enan we mwän, souemmwenin ekkewe aramas seni ewe einangen Naftali a uweato an asór.
79I a ääni asór ew peleich mi för seni silifer üküükün choun ipwükü iliik shekel ika ülüngät ew na rüwänü paun, pwal ew sepien käsup mi för seni silifer üküükün choun fiik shekel ika ew ülüngät na rüwänü paun. Chouur me ruu ra lóngólóng wón ewe shekel ra aea lón ewe imw mi pin, nge ew me ew a masow ren pilawa mi amas o mwirinnö mi nofit fengen me apüra seni föün olif pwe ew asóren mwöngö. 80A pwal ääni asór ew sepi mi för seni kolt, üküükün choun engol shekel ika ina epwe rüwänü aunus, nge mi ur ren appach mi pwokkus. 81A pwal ääni asór emön liälifföön ätemwänin kowu, emön ätemwänin siip me emön ätemwänin laam ew ierir fäniten ew asóren keek. 82A pwal ääni asór emön ätemwänin kuuch fäniten ew asóren limelimen tipis. 83A pwal ääni asór rüwömön ätemwänin kowu, limmön ätemwänin siip, limmön ätemwänin kuuch me limmön ätemwänin laam ew ierir pwe ew asóren kinamwe. Iei üküükün ewe asór än Ahira nöün Enan we mwän.
84Iwe, ikkeei ekkewe asór än ekkewe souemmwenin Israel fäniten epinipinin ewe róngen asór lupwen an a kepit: engol me ruu peleich silifer, engol me ruu sepi silifer sepien käsupw, pwal engol me ruu sepi kolt. 85Choun ew me ew kewe sepi silifer, üküükün ipwükü iliik shekel nge choun ew me ew kewe sepien käsupw, üküükün fiik shekel. Üküükün choun ekkewe sepi silifer fengen meinisin, ruu ngöröw föpwükü shekel ika ina epwe wone paun, alónglóng wón ewe shekel ra aea lón ewe imw mi pin. 86Üküükün choun ew me ew kewe engol me ruu sepi kolt mi ur ren appach mi pwokkus, engol shekel choun ew me ew, alóngólóng wón ewe shekel ra aea lón ewe imw mi pin. Üküükün choun ekkewe sepi kolt fengen meinisin, ipwükü rüwe shekel ika ina epwe ülüngät paun. 87Iwe, üküükün unusen iteiten ekkewe maan fäniten ewe asóren keek, engol me rüwömön ätemwänin kowu, engol me rüwömön ätemwänin siip me engol me rüwömön ätemwänin laam ew ierir fiti fengen me ekkewe asóren mwöngö. A pwal wor engol me rüwömön ätemwänin kuuch fäniten ewe asóren limelimen tipis. 88Pwal üküükün unusen iteiten ekkewe maan fäniten ewe asóren kinamwe, rüwe me fömön ätemwänin kowu, wone ätemwänin siip, wone ätemwänin kuuch me wone ätemwänin laam ew ierir. Ikkeei üküükün ekkewe asór fäniten angangen epinipinin ewe róngen asór mwirin an a kepit.
89Iwe, lupwen Moses a tolong lón ewe Imw Mangaku Leenien Chufengen pwe epwe kapas ngeni ewe SAMOL, i a rong och möngüngü a kapas ngeni i seni lefiilen ekkewe rüwömön keropiim mi nóm wón öppüngün ewe pwórofelin Pwärätä. Ewe SAMOL a kapas ngeni Moses seni ikenan.
Pachapachetän ekkewe laamp
8 Iwe, ewe SAMOL a apasa ngeni Moses, 2“Kopwe kapas ngeni Aaron o üreni i, ‘Lupwen óm kopwe pacheetä ekkewe fisu laamp, kopwe föri pwe tinen ekkewe laamp epwe asarama ewe kinikin mwen ewe leenien etittin.’ ”
3Iwe, iei meet Aaron a föri. I a pacheetä ekkewe laamp wón ewe leenien etittin pwe tineer epwe saramolong mwer usun chök ewe SAMOL a öllük ngeni Moses. 4Iei usun än ewe leenien etittin a för: A för seni kolt mi lechelech - seni wäänifótun we tori ekkewe uluulun pöön irän wón. Ewe leenien etittin a för usun chök wesewesen ewe köük ewe SAMOL a pwääri ngeni Moses.
Limelimen me epinipinin chón ewe einangen Levi
5Iwe, ewe SAMOL a apasa ngeni Moses, 6“Kopwe angei ekkewe mwän seni ewe einangen Levi seni leiin ekkewe pwal ekkóch chón Israel o kopwe limetiir pwe repwe nóm lón tettelin chón limöch. 7Iei usun meet kopwe föri óm kopwe limetiir: Kopwe äsupwu wór ewe kólikin limelim. Mwirin, kopwe üreniir pwe repwe räisöló ünöünen unusen inisir o repwe pwal sopwuni üfeer. Iei usun ar repwe pwisin elimelimer. 8Mwirin, repwe angei emön liäliffön ätemwänin kowu o ochuw ngeni ewe asóren mwöngö mi för seni pilawa mi amas o mwirinnö a nofit ngeni apüra seni föün olif. Nge en kopwe pwal angei emön liäliffön ätemwänin kowu fäniten ewe asóren limelimen tipis. 9Iwe, kopwe emmwenato ekkewe mwän seni ewe einangen Levi mwen ewe Imw Mangaku Leenien Chufengen o kopwe emwiichato ekkewe aramasen Israel meinisin. 10En kopwe emmwenato ekkewe mwän seni ewe einangen Levi fän mesen ewe SAMOL, nge ekkewe aramasen Israel repwe isettä pöüür wóór. 11Iwe, Aaron epwe wiisen fangaló chón ewe einangen Levi me fän mesen ewe SAMOL pwe epwe ew asóren sapatä seni ekkewe chón Israel, pwe ekkewe mwän seni ewe einagen Levi repwe mollotä ngeni ar repwe föri ewe angang fäniten ewe SAMOL.
12“Mwirin än ekkewe mwän seni ewe einangen Levi ra isettä pöüür wón möküren ekkewe liäliffön ätemwänin kowu, kopwe ääni asór ngeni ewe SAMOL emön fäniten ew asóren limelimen tipis, nge ewe pwal emön fäniten ew asóren keek pwe kopwe föri asóren omwusomwusen tipis fäniten ekkewe mwän seni ewe einangen Levi. 13Kopwe üreni ekkewe mwän seni ewe einangen Levi pwe repwe üütä fän mesen Aaron me nöün kewe mwän. Mwirin, kopwe epinireló usun ew asóren sapatä ngeni ewe SAMOL. 14Epwe iei usun óm kopwe äimwüweló ekkewe mwän seni ewe einangen Levi seni leiin ekkewe aramasen Israel pwe iir repwe neii.
15“Iwe, mwirin óm ka limeti ekkewe mwän seni ewe einangen Levi me óm ka epinireló pwe ew asóren sapatä, iir repwe feitto pwe repwe föri ar angang lón ewe Imw Mangaku Leenien Chufengen. 16Pün iir ew liffang mi unus ngeniei seni leiin ekkewe chón Israel. Ngang üwa angeiir pwe repwe neii, ekkesiwilin ekkewe mwännichi me leiin ekkewe aramasen Israel meinisin. 17Iteiten ekkewe mwännichi meinisin seni leiin ekkewe aramasen Israel me ekkewe mweinöün maan neii. Lupwen ngang üwa niieló ekkewe mwännichi meinisin me lón ewe fönü Egypt, ngang üwa epinaló ekkewe mwännichi fänitei. 18Nge ngang üwa angei chón ewe einangen Levi pwe iir ekkesiwilin ekkewe mwännichi meinisin me lón Israel. 19Seni leiin ekkewe chón Israel meinisin, ngang üwa ewiisa ekkewe mwän seni ewe einangen Levi pwe repwe älisi Aaron me nöün kewe mwän pwe repwe föri ewe angang lón ewe Imw Mangaku Leenien Chufengen fänäsengesin ekkewe chón Israel o repwe pwal föri asóren omwusomwusen tipis fäniter pwe esap wor och määlap epwe efeiengawa ekkewe chón Israel lupwen repwe kkan ngeni ewe imw mi pin.”
20Iei minne, Moses me Aaron me unusen ewe mwiichen chón Israel ra äimwüeló ekkewe mwän seni ewe einangen Levi nge ra tümwünüfichi le fiti pwüngün minne ewe SAMOL a öllük ngeni Moses. 21Iwe, ekkewe mwän seni ewe einangen Levi ra pwisin limetiir o ra soppwuni üfeer. Mwirin, Aaron a epinireló pwe repwe ew asóren sapatä me fän mesen ewe SAMOL. A pwal föri asóren omwusomwusen tipis fäniter pwe repwe limöch. 22Seni ena fansoun, ekkewe mwän seni ewe einangen Levi ra feitto pwe repwe föri ar angang lón ewe Imw Mangaku Leenien Chufengen pwe repwe älisi Aaron me nöün kewe mwän. Iei usun ar ra föri ekkewe öllük meinisin ewe SAMOL a öllük ngeni Moses fänäsengesin ekkewe mwän seni ewe einangen Levi.
23Mwirin, ewe SAMOL a apasa ngeni Moses, 24“Iei ewe öllük ekkewe mwän seni ewe einangen Levi repwe fiti pwüngün: Ekkewe mwän repwe poputä le angang lón ewe Imw Mangaku Leenien Chufengen lupwen ra tori rüwe me limu ierir ika lap seni. 25Nge lupwen ra tori lime ier, repwe le ükütiw seni angangen wiiser o resap chüen angang. 26Mwirin ar ra asöösö seni angangen wiiser, ra tongeni älisi chiechier kewe mwän seni ewe einangen Levi le föri angangen wiiser kewe lón ewe Imw Mangaku Leenien Chufengen, nge iir wón inisir resap chüen wiisen ämesemes le föri ewe angang. Epwe iei usun óm kopwe ewiisa ngeni ekkewe mwän seni ewe einangen Levi wiiser kewe.”
Ewe oruuwen Pasofer
9 Iwe, ewe SAMOL a ngeni Moses ekkeei kapasen öüröür lón ewe äewin maramen ewe oruuwen ier mwirin ar toowu seni Egypt lupwen i me ekkewe aramasen Israel ra nóm lón ewe fönüpöönün Sinai. A apasa, 2“Kopwe üreni ekkewe chón Israel pwe repwe efisi ächechchemen ewe Pasofer lón ewe fansoun mi kefilitä. 3Repwe efisi ächechcheman lón ewe fansoun mi kefilitä, lekkuniólupwinin ewe engol me rüwänüwen ränin ei äewin maram. Repwe förfichi ar repwe fiti pwüngün äi kewe öllük me öüröür meinisin fänäsengesin ächechchemen ei fansoun.”
4Iei minne, Moses a üreni ekkewe chón Israel pwe repwe efisi ächechchemen ewe Pasofer. 5Iwe, lekkuniólupwinin ewe engol me rüwänüwen ränin ewe äewin maram, ra föri ächechchemen ewe Pasofer me lón ewe fönüpöönün Sinai. Ekkewe chón Israel ra föri iteiten mettóch meinisin usun chök minne ewe SAMOL a öllük ngeni Moses.
6Nge mi wor ekkóch mwän me leiir ra nóm lón tettelin chón limengaw fäniten ar attapa emön soomä, ina minne resap tongeni ääni asór ekkewe laamen Pasofer lón ena ränin. Iei minne, ra feitto ren Moses me Aaron lón ewe chök ränin, 7o ra apasa ngeni Moses, “Äm aia limengaw pwokiten aia attapa emön soomä. Nge pwata a pinepin seni keem äm aipwe tongeni ääni ewe asór ngeni ewe SAMOL fiti pwal ekkewe ekkóch chón Israel lón ewe fansoun mi kefilitä?”
8Iwe, Moses a pölüweniir o apasa, “Öüpwe mwo chök ekis witiwit tori ngang üpwe silei meet än ewe SAMOL öllük fänäsengesimi.”
9Iwe, iei än ewe SAMOL pölüwen ngeni Moses, 10“Kopwe üreni ekkewe chón Israel: ‘Lupwen emön me leiin ekkewe aramas iei ika lón ekkewe pilóón aramas repwe feitto ra limengaw lón ewe fansoun Pasofer pwokiten ra attapa emön soomä ika pwokiten ra sääiló toowaw, iir ra chüen tongeni efisi ächechchemen än ewe SAMOL we Pasofer. 11Nge repwe le chök efisi ächechcheman lekkuniólupwinin ewe engol me rüwänüwen ränin ewe oruuwen maram. Repwe ochooch ewe laam fiti fengen me ar repwe mwöngö ewe pilawa esap wor iis lón me chöön irä mi maras. 12Resap fókkun likiti och lussun an epwe nóm tori lesossor, resap pwal kupii efóch chuun ewe laam. Lupwen repwe efisi ächechchemen ewe Pasofer, repwe fókkun fiti pwüngün öllükün kewe meinisin. 13Nge are emön mwän mi nóm lón tettelin chón limöch o esap pwal sääiló toowaw nge esap mochen föri ächechchemen ewe Pasofer, ena aramas epwe fókkun katoowu seni leiin ewe mwiichen chón Israel pwokiten i esap föri än ewe SAMOL asór lón ewe fansoun mi kefilitä. Ena aramas epwe pwisin mwärelong fän eselipäen an tipis.
14“ ‘Nge are emön chón ekis mi nóm leiimi a mochen pwe epwe efisi ächechchemen än ewe SAMOL we Pasofer, i epwe föri nge epwe fiti ekkewe öllükün me pwüngün ewe Pasofer. Epwe chök löllö fengen ekkewe öllük öüwa ääni fäniten chón ekis mi nóm leiimi me ämi ekkewe chón wilipós.’ ”
Ewe kuchu me ewe ekkei
15Iwe, lón ewe rän ewe imwenfel mangaku a köüütä, ewe kuchu a pwölüweló ewe imwenfel mangaku, iei ewe Imw Mangaku ewe Pisekin Pwärätä a nóm ie. Seni lekkuniól tori lesossor ewe kuchu a nóm asen ewe imwenfel mangaku, nge a pwä lón lapalapen och ekkei. 16Iei usun minne a sópwósópwóló le fis. Ewe kuchu a pwölüweló ewe imwenfel mangaku lerän, nge lepwin a pwä lón lapalapen ekkei. 17Iteiten fansoun lupwen ewe kuchu a langatä seni asen ewe imwenfel mangaku, ekkewe aramasen Israel ra poputä le sääi. Nge ewe leeni ia ewe kuchu a köüüló ie, ekkewe aramasen Israel ra öüüwetä imwer kewe imw mangaku ikeweie. 18Ekkewe aramasen Israel ra sääi fän än ewe SAMOL öllük, ra pwal öüüwetä imwer kewe imw mangaku fän än ewe SAMOL öllük. Üküükün langattamen fansoun än ewe kuchu nóm asen ewe imwenfel mangaku pwal iei üküükün langattamen fansoun ar ra nóm lón ewe leeni ia ra asóósó ie. 19Ika mwo lupwen ewe kuchu a nónnómóttam asen ewe imwenfel mangaku lón chómmóng rän, ekkewe aramasen Israel ra älleasochisi än ewe SAMOL öllük o resap sääi. 20Iwe a fis lón ekkóch fansoun pwe ewe kuchu a nóm asen ewe imwenfel mangaku lón ekkóch chök rän. Iwe, fän än ewe SAMOL öllük ekkewe aramas ra chök nómwóló lón ewe leeni pwal fän än ewe SAMOL öllük ra pwal sääi. 21Iwe, a fis fän ekkóch pwe ewe kuchu a chök köüüló seni lekkuniól tori lesossor. Nge lupwen ewe kuchu a langatä lesossor, ra sääi. Ese lifilifil are lerän ika lepwin, menni chök fansoun ewe kuchu a langatä, ekkewe aramas ra sääi. 22Ese lifilifil are ewe kuchu a nóm asen ewe imwenfel mangaku lón ruu rän ika ew maram ika ew ier, ekkewe chón Israel ra chök nómwóló lón leenier kewe o resap sääi. Nge lupwen ewe kuchu a langatä; iwe, ra sääi. 23Fän än ewe SAMOL öllük, ra nónnóm lón ar kewe leenien asóósó, pwal fän än ewe SAMOL öllük ra sääi. Ra öpwönüwetä minne ewe SAMOL a öüröüra ngeniir, alóngólóng wón an öllük a ngeni Moses.
Rüwófóch rappwa mi för seni silifer
10Iwe, ewe SAMOL a apasa ngeni Moses, 2“Kopwe föri rüwófóch rappwa fänitom repwe lechelech seni silifer pwe kopwe nöünöü iir lupwen kopwe kööri fengeni ewe mwiichen chón Israel pwal lupwen kopwe öpöwü mwökütükütün lón ewe leeni ia öüwa nóm ie. 3Lupwen ekkewe rappwa repwe ttik me rüófóch nge repwe tikittam, meinisin unusen ewe mwiichen aramas repwe mwiicheto reemw leasamalapen ewe Imw Mangaku Leenien Chufeengen. 4Nge are efóch chök rappwa epwe ttik nge epwe tikittam, iwe, ekkewe souemmwen, iir samolun ekkewe einangen Israel repwe mwiicheto reemw. 5Lupwen öüpwe ettiki ewe tikin esilesil fäniten sääi mi tikimmwoch, chókewe mi imweimw peliöötiwen ewe imwenfel mangaku repwe poputäni ar sääi. 6Lupwen öüpwe ettiki ewe tikin esilesil fäniten sääi mi tikimmwoch fän oruuwan, chókewe mi imweimw peliöörün ewe imwenfel mangaku repwe popuetä ar sääi. Ewe ttik mi tikimmwoch epwe iei ewe tikin esilesil fäniten akökköön ar repwe popuetä ar sääi. 7Iwe, lupwen ewe mwiichen chón Israel repwe mwiich fengen, öüpwe ettikittameei ekkewe rappwa me rüófóch, nge esap wewe fengen me ewe tikin esilesil fäniten ar repwe le sääi.
8“Iwe, nöün Aaron kewe mwän, ekkewe souasór, iir repwe wiisen ettiki ekkewe rappwa. Ei epwe ew öllük esap ükütiw fänitemi me ekkewe pilóón aramas repwe feitto me mwirin. 9Lupwen öüpwe nóm lón fönüwemi we nge öüpwe feilló maun ngeni chón opwuta kemi mi eriäfföwü kemi, öüpwe ettiki ekkewe rappwa ewe tikin esilesil fäniten maun mi tikimmwoch. Iwe, öüpwe chemeto me fän mesen ewe SAMOL ämi we Kot. Iwe, i epwe chimanü kemi seni ekkewe chón opwuta kemi. 10Pwal lón ränin ämi pwapwa, lupwen ämi kewe fansoun chuulap mi kefilitä me ämi kewe chuulapen lepoputän maram, öüpwe ettiki ekkewe rappwa nge repwe ttikittam. Öüpwe ettiki ekkewe rappwa lupwen fansoun öüwa ääni ekkewe asóren keek me asóren kinamwe. Ekkewe rappwa repwe ächchema ngeni ewe SAMOL ämi we Kot usun an we pwon ngeni kemi. Ngang ewe SAMOL ämi we Kot.”
Ekkewe chón Israel ra feilló seni Sinai
11Iwe, lón ewe örüween ränin ewe oruuwen maramen ewe oruuwen ier mwirin än ekkewe chón Israel toowu seni Egypt, ewe kuchu a langatä seni asen ewe imwenfel mangaku ia ewe Pisekin Pwärätä a nóm ie. 12Mwirin, ekkewe aramasen Israel ra popuetä le sääi seni ewe fönüapöön Sinai o ra sääi seni ew leeni ngeni pwal ew leeni tori ewe kuchu a köüüló lón ewe fönüapöön Paran. 13Lupwen a tori ewe fansoun ar repwe mwöküt, ewe SAMOL a atoowu ewe öllük meren Moses pwe repwe le mwöküt.
14Iwe, ekkewe einang mi fiti ewe einangen Judah le öüüwetä imweer imw mangaku lón ew leeni, ra fiti ewe einangen Judah le akkomw le sääi lón tettelir fän ar filäik. Nge Nahshon nöün Amminabad we mwän seni ewe einangen Judah a emmweni ar kewe mwiich. 15Nethanel nöün Zuar we mwän a wiisen emmweni ewe kinikinin einangen Issakar, 16nge Eliab nöün Helon we mwän a emmweni ewe kinikinin einangen Zebulun. 17Mwirin, ewe imwenfel mangaku a katomwotiw, nge nöün Kershon kewe mwän me nöün Merari kewe mwän mi mwärei ewe imwenfel mangaku ra sääi.
18Mwirin, ekkewe einang mi köüütä imwer imw mangaku ia ewe einangen Reuben a nóm ie iir ra tapw fän ar filäik. Elizur nöün Shedeur we mwän seni ewe einangen Reuben a wiisen emmweniir. 19Shelumiel nöün Zurishaddai we mwän a wiisen emmweni ewe kinikinin einangen Simeon, 20nge Eliasaf nöün Deuel we mwän a wiisen emmweni ewe kinikinin einangen Kad. 21Mwirin, än Kohat we chóó kinikinin ewe mwichen chón Levi ra sääi, nge ra mwärei ekkewe mettóch mi pin seni ewe Imwenfel mangaku. (Ewe imwenfel mangaku epwe akkomwen köüütä me mwen ar repwe tori ewe leeni ia repwe nóm ie.)
22Iwe, ekkewe einang mi köüütä imwer imw mangaku lón ewe leeni ia ewe einangen Efraim a nóm ie ra tapw le feilló fän ar filäik. Elisama nöün Ammihud we mwän seni ewe einangen Efraim a wiisen emmweniir. 23Kamaliel nöün Pedashur we mwän a wiisen emmweni ewe kinikinin einangen Manassah, 24nge Abidan nöün Kideoni we mwän a wiisen emmweni ewe kinikinin einangen Benjamin.
25Ömwüchchülón, ekkewe einang mi köüütä imwer imw mangaku lón ewe leeni ia ewe einangen Dan a nóm ie ra sääi fän ar filäik, nge iir ra kuukumwirifóch pwokiten iir ra wiisen tümwünü ekkewe einang meinisin me mwiriir. Ahiezer nöün Ammishaddai we mwän seni ewe einangen Dan a wiisen emmweniir. 26Pakiel nöün Okran we mwän a wiisen emmweni ewe kinikinin einangen Asher, 27nge Ahira nöün Enan we mwän a wiisen emmweni ewe kinikinin einangen Naftali. 28Iei tettelin än ekkewe chón Israel kewe kinikin lupwen ra sääi.
29Iwe, lón ew ränin, Moses a üreni öösan we itan Hobab nöün Reuel ewe re Midian we mwän, iei i Jethro semen pwülüwen Moses we, “Iei äm aipwe le sääi ngeni ewe fönü ewe SAMOL a pwon pwe epwe ngeni keem. Kopwe feitto fitikeem, nge äm aipwe föfföröch ngenuk, pün ewe SAMOL a pwon ngeni ekkewe chón Israel mettóch mi mwirinnö.”
30Iwe, ätewe a pölüweni o apasa, “Apwi, ngang üsap fitikemi. Ngang üpwe liwinsäfäliti poputän fönüwei me pwisin aramasei.”
31Nge Moses a apasa, “Kose mochen kosap likitikeemiló. En ka silei ia aipwe asóósó ie me lón ewe fönüpöön o en kopwe wiisen meseni keem. 32Iwe, are kopwe fitikeem, ächiööw epwe fókkun fis pwe ese lifilifil meet mi mwirinnö ewe SAMOL epwe föri ngeni keem, epwe pwal ina chök usun minne äm aipwe föri ngenuk.”
33Iei minne, ra sääiló seni chukun ewe SAMOL we o ra sääi lón üküükün ülüngät rän. Än ewe SAMOL we pwórun pwon a akkakoomw mweer lón ekkana ülüngät rän pwe epwe äiti ngeniir ia repwe köüüló ie pwe repwe asöösö. 34Iwe, lupwen ra mwöküt iteiten rän, kuchuun ewe SAMOL a nóm aser.
35“Iteiten fansoun lupwen ewe pwórofel a sääi, Moses a apasa,
“Äm SAMOL, kopwe üütä! Kopwe atoropasafeili chón opwutom kewe. Chókewe mi opwut en repwe sü me mwom.”
36Nge iteiten fansoun lupwen ewe pwórofel a asöösö, i a apasa,
“Äm SAMOL, kopwe liwinito ren ekkeei chómmóng ngöröwün chón Israel.”
Ekkewe aramas ra tunoppwen
11Iwe, esap mang mwo nge ekkewe aramas ra poputä le tunoppwen fäniten ar kana weires. Iwe, lupwen ewe SAMOL a rongorong ar tunoppwen, a letipengaw ren o a soong ngeniir. Mwirin, ewe ekkei mi feitto seni ewe SAMOL a nget me leiir o a kenaló ekkóch me lón kinikinin lesópwun ewe leeni ia ra asóósó ie. 2Mwirin, ekkewe aramas ra siö ngeni Moses. Iwe, lupwen Moses a iótek ngeni ewe SAMOL, ewe ekkei a kunuló. 3Mwirin ena fansoun, ewe leeni a iteni Taberah, wewen, ‘ewe leenien kar’ pwokiten ewe ekkei seni ewe SAMOL a nget me leiir me ikenan.
4Iwe, a wor ew mwiichen aramas iir chón ekis mi fiti ekkewe chón Israel lón ar sääi. Ekkeei aramas ra fókkun mwäräkkich wón fituk; ina minne ekkewe aramasen Israel ra pwal popusäfälitä le lal o apasa, “Iö ei epwe awochoocha kich fituk? 5Sia chechchemeni ekkewe iik sia mwöngö me lón Egypt nge sisap mööni, pwal ochaach kewe kiüri me merong me anach kewe nengi, anion me ninnikü. 6Nge iei sia apwangapwangalo. Esap fókkun wor och a nóm mwen mesach me lükün ei manna!”
7Ei mana a usun chök föün ewe irä itan koriander nge önüwan a usun önüwen ewe appach mi pwokkus mi ölepwech. 8Ekkewe aramas ra fätälfeil o rusifengeni ewe manna. Iwe, ra fööira wón ekkewe föün fööir ika pwooni lón sepi mi för seni pwül. Mwirin, ra kukuuw lón nape o föri nokop seni. Nennan a usun nennen mwöngö mi ammwoot lón apüra mi för seni föün olif. 9Iwe, lupwen omwurenipwin a püngütiw lepwin wón ewe leeni ia ra asóósó ie, ewe manna a pwal püngütiw.
10Mwirin, Moses a rongorong än ekkewe aramas kechiw, emön me emön me lón asamen en me imwan imw mangaku lón unusen ar kewe famili. Iwe, a tooto än ewe SAMOL soong, nge Moses a pwal letipengaw ren. 11Ina minne, Moses a apasa ngeni ewe SAMOL, “Pwata en ka eweiresiei ngang nöüm ei chón angang? Pwata ngang üsap küna ümöümöch mereemw iei ka uwätä wói weiresin choun tümwünün ekkeei aramas meinisin? 12Ifa usun, iir neii? Ifa usun, ngang semeer, iei popun en ka üreniei pwe üpwe pwisiir lón peii usun emön chón tümwün a pwisii emön mönukól mi chüen oup? Ifa usun, üpwe pwisiirelong lón ewe fönü en ka pwon ngeni ar kewe leewo pwe kopwe ngeniir? 13Ia ngang üpwe küüt me ie fituk pwe üpwe ngeni ekkeei aramas meinisin? Pün iir ra kechiw ngeniei o apasa, ‘Kopwe ngeni keem ochaam fituk pwe aipwe ochooch.’ 14Ngang üsap tongeni äi üpwe äkkälämön le mwärelong fän tümwünün ekkeei aramas meinisin, pwokiten choun ei tümwün a koon chou ngeniei. 15Ngang üfen efich óm kopwe niieiló lap seni óm kopwe föri ngeniei ei sókkun. Kose mochen kosap mwüüt ngeniei äi üpwe küna ei sókkun riäfföü.”
Ekkewe fiik souakkomw
16Iwe, ewe SAMOL a apasa ngeni Moses, “Kopwe köörato reei fiik mwän seni leiin ekkewe souakkomwen Israel, chókewe en ka sileer pwe iir repwe souakkomw me sounemenemen ekkewe aramas. Kopwe emweniireto ren ewe Imw Mangaku Leenien Chufengen pwe repwe etuk le üütä ikenan. 17Mwirin, ngang üpwe feittiw o kapas ngenuk me ikenan. Iwe, ngang üpwe angei och manaman seni ewe Ngüün mi nóm wóm o üpwe isettä ei chök pwal ngüün wóór. Iwe, repwe etuk le mwärelong fän choun tümwünün ekkewe aramas pwe en kosap äkkälämön le pwisin mwärelong fan.
18“Mwirin, en kopwe apasa ngeni ekkewe aramas pwe repwe pwisin epiniireló fäniten lesor. Pün lesor repwe ochooch fituk. Kopwe üreniir pwe ewe SAMOL a rongorong ar kechiw o tunoppwen le apasa, “Amwo sia fen ochooch fituk! Enlet sia fen nónnómöch me lón Egypt.” Iei minne ewe SAMOL epwe ngeni kemi fituk; iwe, öüpwe fókkun ochooch. 19Iwe, öüpwe ochooch fituk, sap lón ew chök rän, sap pwal lón ruu rän, sap lón limu rän, sap lón engol rän, sap pwal rüwe rän. 20Ngeii öüpwe ochooch fituk lón unusen ew maram tori än ewe fituk epwe toowu me lón pwangen pwöötümi o notä wóómi, pwokiten ämi öüwa opwut ewe SAMOL mi nóm ikeei leiimi o öüwa kechiw me fän mesan o apasa, ‘Pwata mwo chök sia fen toowu seni Egypt? ’ ”
21Nge Moses a apasa, “A wor üküükün wonopwükü ngöröw sounfiu mi sääi wón pecheer ra nóm reei ikeei, nge en ka pwon ngeniir pwe repwe ochooch fituk lón unusen ew maram! 22Ika mwo sipwe niieló nöüch kewe pwiin siip me pwiin kowu meinisin, ifa usun, repwe menemenöch ren? Ika mwo sipwe liäpeni ikenen lón ewe mataw meinisin, ifa usun, repwe naaf ren?”
23Mwirin, ewe SAMOL a apasa ngeni Moses, “Ifa usun, a mwochomwooch pöün ewe SAMOL? Mi wor öüküükün äi manaman? Iwe iei en kopwe küna are epwe fis ika esap fis meet ngang üwa apasa.”
24Ina minne, Moses a feilló o aporausa ngeni ekkewe aramas än ewe SAMOL kewe kapas. Iwe, i a emwiichato ekkewe fiik souakkomwen ekkewe aramas o a anómwur pwellin ewe imwenfel mangaku. 25Mwirin, ewe SAMOL a feittiw lón ewe kuchu o a kapas ngeni Moses. A angei och manamanen ewe Ngüün mi nóm wón Moses o isettä ei chök pwal ngüün wón ekkewe fiik souakkomw. Iwe, a fis pwe lupwen ewe Ngüün a sootiw wór, ra oosuni. Ina chök ewe fansoun a fis ei, nge esap pwal fis säfäl me mwirin.
26Nge mi wor rüwömön mwän iter Eldad me Medad ra chök nómotiw lón ewe leeni ia ra asóósó ie lupwen ewe Ngüün a sootiw wón ekkewe souakkomw. Ätekeei mi pwal ällealong leiin ekkewe souakkomw, nge resap feilló ren ewe imwenfel mangaku. Nge ewe Ngüün a pwal sootiw wóór; iwe, ra oosuni me lón ewe leeni ia ra asóósó ie. 27Iwe, emön ölüwöl a sääló ren Moses o a aporausa ngeni, “Eldad me Medad ra oosuni me lón ewe leeni ia sia asóósó ie.”
28Ina minne, Joshua nöün Nun we mwän, ewe chón äkkälisi Moses seni chök leölüwölün, a pölüweni o apasa, “Äi samol Moses, kopwe öüküüretiw!”
29Nge Moses a apasa ngeni Joshua, “Ifa usun, ka tipekoum fänäsengesi? Amwo pwe nöün ewe SAMOL kewe aramas meinisin repwe soufós, pwe ewe SAMOL epwe anómwu Ngünün we wóór meinisin!” 30Iwe, Moses a liwinsäfäliti ewe leeni ia ra asóósó ie, i me ekkewe souakkomwen Israel.
Ewe SAMOL a tiinato machchang iter kweel
31Iwe, ewe SAMOL a tiinato och äsäpwääl o a pöönato ekkewe sókkun maansüüsü iter kweel seni ewe mataw. Iwe, ra sootiw lón ewe leeni ia ra asóósó ie me pwellin ünükkün meinisin. Iwe, a wor kweel ra ässifeil lón üküükün fitu mwäil pwellin ünükkün ewe leeni ia ra asóósó pwal üküükün ülüngät fiit seni asen pwül. 32Iwe, ekkewe aramas ra toowu o ra turufi ekkewe kweel lón unusen ewe ränin me unusen ewe pwiin me pwal unusen ewe rän mwirin. Esap wor emön a chóókükkün ionian epwe kis seni üküükün engol homer. Mwirin, ra emeresaló ekkewe kweel wón unusen ewe leeni ia ra asóósó ie. 33Nge lupwen ekkewe aramas ra chüen chök ochooch ewe fituk, än ewe SAMOL soong a ngeteri ekkewe aramas. Iwe, ewe SAMOL a niieló ekkewe aramas ren och määlap mi fókkun wätte. 34Iei minne, ewe leeni a iteni Kibroth Hattaavah, wewen, ‘ekkewe peiasen chón mwäräkkich’ pwokiten ra peiaseni ikenan ekkewe aramas mi mwäräkichiti fituk seni Egypt.
35Iwe, ekkewe aramas ra sääi seni Kibroth Hattaavah o ra sääi ngeni Hazeroth, ia ra nóm ie lón ekkóch fansoun.
Aaron me Miriam ra üüngeni Moses
12Lupwen ra nóm lón Hazeroth, Miriam me Aaron ra kapasen esiita Moses pwokiten i a pwülüweni emön fiin Ethiopia, pün Moses a pwülüweni emön fefin seni Ethiopia, mwirimwirin Kuush. 2Ina minne Aaron me Miriam ra apasa, “Ifa usun, ewe SAMOL a chök nöünöü Moses le kapas ngeni aramas? Ifa usun, I esap pwal nöünöü kich?” Nge ewe SAMOL a rongorong ar kapas.
3(Ei mwän Moses i emön mi fókkun tipetekisón lap seni aramas meinisin wón fönüfan.)
4Iei minne, lón ewe chök atun, ewe SAMOL a kööri Moses me Aaron me Miriam o apasa, “Ämi me ülümön öüpwe toowu o feilló ren ewe Imw Mangaku Leenien Chufengen!” Ina minne iir me ülümön ra toowu o feilló. 5Mwirin, ewe SAMOL a feittiw lón ewe üren kuchu, a üütäló lón asamen ewe imwenfel mangaku o a kööri Aaron me Miriam. Iwe, iir me rüwömön ra feilló ren. 6Iwe, ewe SAMOL a apasa ngeniir, “Iei öüpwe öüseling ngeniei.
“Ekkewe mwo soufós nge ngang ewe SAMOL üpwe kapas ngeniir lón ar tan me künäer. 7“Nge esap iei usun äi üpwe kapas ngeni neii ei chón angang Moses. I neii chón angang mi likiitü. Ngang üwa lükü ngeni i meinisin mi nóm lón imwei. 8“Ngang üwa kapas ngeni i nge äm mi nennefengen. Üsap kapas ngeni i lón künäan ika lón kapas mwónómwón. I a küna lapalapei ngang ewe SAMOL. Pwata ämi öüsap nuokkus le kapasen esiita neii we chón angang Moses?”
9Iwe, ewe SAMOL soong ngeniir. Mwirin, a feilló seniir.
10Iwe, lupwen ewe kuchu a langatä seni asen ewe imwenfel mangaku, ese mang mwo nge a üri Miriam keinapan. Iwe, a usun chök pwechen sno. Lupwen Aaron a küna meet a fis ngeni Miriam pwe a üri keinapan, 11a kökkö ngeni Moses o apasa, “Äi samol! Kose mochen kosap öpwüngü keem ren ei tipis äm aia föri lón äm umwes. 12Kose mochen kosap mwüüt ngeni neminnei an epwe usun emön mönükól mi mäló lupwen a toowu seni än inan leenien mönükól nge esópwun fitukan a fen kirouló!”
13Ina minne, Moses a siö ngeni ewe SAMOL o apasa, “Ngang üwa iótek ngenuk äi Kot, kose mochen kopwe echikara neminnei!”
14Iwe, ewe SAMOL a apasa ngeni Moses, “Are semen neminnei epwe attufa mesan; ifa usun, neminnei esap limengaw lón üküükün fisu rän? Neminnei epwe käimwüló lükün ewe leeni ia aramas ra asóósó ie lón üküükün fisu rän. Mwirin, epwap pwal tongeni ketiwsäfäl.” 15Ina minne, Miriam a käimwüwu lükün ewe leeni ia aramas ra asóósó ie lón üküükün fisu rän. Iwe, ekkewe aramas ra witiwit tori än Miriam epwe katolongsäfäl, mwirin, repwap sääi.
16Mwirin, ekkewe aramas ra mwöküt seni Hazeroth o ra asóósó lón ewe fönüpöönün Paran.
Ekkewe chón sachei Kanaan ra ökkünöló
13 Iwe, ewe SAMOL a apasa ngeni Moses, 2“Kopwe tiinaló ekkóch mwän pwe repwe sachei ewe fönü Kanaan lemwónómwón, iei ewe fönü ngang üwa ngeni ekkewe aramasen Israel. Kopwe tiinaló emön souemmwen seni ew me ew kewe engol me ruu einangen ar kewe leewo.”
3Ina minne, Moses a föri usun minne ewe SAMOL a öllük ngeni. A tiinaló engol me rüwömön mwän, iir meinisin souemmwenin ekkewe einangen Israel seni lón ewe fönüapöön Paran. 4Iwe, ikkeei ekkewe einang me iten ekkewe souemmwen:
Shammua nöün Zakkur we mwän seni ewe einangen Reuben;
5Shafat nöün Hori we mwän seni ewe einangen Simeon;
6Kaleb nöün Jefunne we mwän seni ewe einangen Judah;
7Ikal nöün Josef we mwän seni ewe einangen Issakar;
8Hoshea nöün Nun we mwän seni ewe einangen Ephraim;
9Palti nöün Rafu we mwän seni ewe einangen Benjamin;
10Kaddiel nöün Sodi we mwän seni ewe einangen Zebulun;
11Kaddi nöün Susi we mwän seni ewe einangen Josef, wewen, seni ewe einangen Manassah;
12Ammiel nöün Kemalli we mwän seni ewe einangen Dan;
13Sethur nöün Mikael we mwän seni ewe einangen Asher;
14Nahbi nöün Vofsi we mwän seni ewe einangen Naftali;
15Keuel nöün Maki we mwän seni ewe einangen Kad.
16Ikkeei iten ekkewe mwän Moses a tiinireló pwe repwe sachei ewe fönü lemwónómwón. Lón ei fansoun, Moses a siwili iten Hoshea nöün Nun we mwän ngeni Joshua.
17Iwe, lupwen Moses a tiinireló pwe repwe sachei ewe fönü Kanaan, a apasa ngeniir, “Öüpwe feittä ngeni öörün ewe fönü o öüpwe feittä wón ekkewe chuuk. 18Iwe, öüpwe nengeni ika meet lapalapen ewe fönü. Öüpwe nengeni are ekkewe aramas mi nónnóm ie ra pöchökkül ika apwangapwang, ra chókükkün ika chómmóng; 19are ewe fönü ia ra nóm ie a mwirinnö ika ngaw, are ekkewe telinimw ia ra nóm ie ra usun chök leenien asóóso ika mi pöchökkül tittir; 20are pwülün ewe fönü a pwülüöch ika pwülüngaw; pwal are a wor wöllapan ika esap wor. Öüpwe tipepwora. Iwe, öüpwe uweato ekkóch föün irän mwömwöngö seni ewe fönü.” Lón ei ótun a tori fansoun än ekkewe akkomwen föün kreip ra maaw.
21Iei minne, ra feittä o ra sachei ewe fönü, poputä seni ewe Fönüpöönün Zin tori Rehob, arap ngeni ewe aal mi alengeni Hamath. 22Iwe, ra feittä ngeni peliefeng, nge ra akkomwen pwerelong lón ewe fönü Nekev o ra tori Hebron ewe ia Ahiman, Sheshai me Talmai, iir ekkewe mwirimwirin Anak ra nóm ie. (Ei telinimwen lóóm itan Hebron a köüütä fisu ier me mwen ewe telinimw Zoan lón Egypt a köüütä.) 23Mwirin, ra tori ew lemólün, iei a iteni lemólün Eshkol. Me ikenan, ra pöküw epal palen ewe irän wain mi wor eumw umwun kreip wón. Iwe, rüwömön me leiir ra ämmwära ei umwun kreip wón efóch ämmwär. Ra pwal uweei ekkóch föün ewe irä itan pómekränet me föün ewe irä fiik. 24Lón ena fansoun, ekkewe chón Israel ra eitasäfäli ngeni ewe lemólün, Eshkol, wewen, ‘umwuumw’ pwokiten ewe umwun kreip ra kinii me ikenan. 25Iwe, mwirin än ekkewe mwän ra sachei ewe fönü lón üküükün fääik rän, ra liwinsäfäl.
26Iwe, ra liwinsäfäl o ra feitto ren Moses me Aaron me ekkewe aramasen Israel meinisin mi nóm lón Kadesh lón ewe fönüpöönün Paran. Iwe, ra aporausa ngeni ewe mwiichen aramas meet ra küna o ra eppii ngeniir ekkewe föün irä ra angei seni ewe fönü. 27Iwe, iei meet ra aporausa ngeni Moses, “Äm aia tori ewe fönü ia en ka tiinikeemiló ie pwe aipwe sachei. Mi pwüng pwe ewe fönü ew fönü mi fókkun amwaraar, pün ew fönü a pwuupwu milik me chönün chunen ie. Iwe, ikkeei ekkóch üwään irän ewe fönü aia uweireto pwe älelletan. 28Nge och chök, ekkewe aramas mi nónnóm lón ewe fönü ra fókkun pöchökkül. Ar kewe telinimw ra pöchökkül tittir o ra fókkun wätte. Iwe, pwal och, äm aia küna ekkewe mwirimwirin Anak ra nóm ikenan. 29Ekkewe chón Amalek ra nónnóm lón ewe fönü Nekev, nge ekkewe chón Hit, chón Jebus me chón Amor ra nónnóm wón ekkewe chukuchukutä. Ekkewe chón Kanaan ra nónnóm arosssetin ewe mataw me aroppen ewe chaanpwuupwu Jordan.”
30Nge Kaleb a üreni ekkewe aramas mi üütä fän mesen Moses pwe repwe fanafanaló. Iwe, a apasa, “Öüsipwe feittä iei chök pwe sipwe angei ewe fönü pwe fönüwach, pün kich mi fókkun tongeni.”
31Nge ekkewe ekkóch mwän mi fiti i le sachei ewe fönü ra apasa, “Kich sisap tongeni sipwe feittä o okkufu ekkewe aramas, pün iir ra pöchökkül seni kich.” 32Iwe, ra emeresifeili leiin ekkewe aramasen Israel och poraus mi ngaw usun ewe fönü iir ra feilló o sachei. Ra apasa, “Ewe fönü äm aia fätälfeil leemelan pwe aipwe sachei, ew fönü ekkewe aramas mi nónnnóm lón ra okkochooch aramas. Nge meinisin ekkewe aramas aia küner me lón ewe fönü, iir mi fókkun mwänättam. 33Äm aia küna me ikenan ekkewe mwänämmóng (ekkewe mwirimwirin Anak mi feitto seni ekkewe mwänämmóng). Iwe, äm aia usun chök liffichimas me lükür, nge pwal ina chök usuum merer.”
Chón Isreal resap mochen tolong Kanaan
14Mwirin, ekkewe aramas meinisin seni ewe mwiichen chón Israel ra poputä le pwuchöör o ra leüommóng le kechiw lón unusen ewe pwiin. 2Iwe, meinisin ekkewe aramasen Israel ra lal ngeni Moses me Aaron o ra apasa ngeniir, “Amwo itä äm aipwe fen chök mäló me lón ewe fönü Egypt! Ika amwo aipwe fen mäló chök me lón ei fönüpöön! 3Pwata ewe SAMOL a uweikeemito lón ei fönü pwe aipwe mäló lón maun? Pwülüwem kewe me nöüüm kewe repwe ooló o wiliti amanaw. Öüsipwe toowu seni ikeei o liwinsäfäl ngeni Egypt.” 4Iei minne ra rawei fengeni lefiiler o apasa, “Öüsipwe le filätä emön nöüch souemmwen pwe sipwe le liwinsäfäliti Egypt.”
5Mwirin, Moses me Aaron ra chappetiw wón pwül fän mesen ewe mwiichen aramasen Israel meinisin mi mwiichfengen. 6Nge Joshua nöün Nun we mwän me Kaleb nöün Jefunne we mwän, iir chienen chókewe mi feilló sachei ewe fönü, ra kamwei üfeer. 7Iwe, ra kapas ngeni ekkewe aramasen Israel meinisin mi mwiichfengen o ra apasa, “Ewe fönü äm aia fätälfeil leemelan pwe aipwe sachei, ew fönü mi fókkun mwirinnö. 8Are ewe SAMOL epwe pwapwa rech; mwirin, I epwe emmwenikichelong lón ei fönü o fang ngeni kich. Iei ew fönü mi wöw ia a pwuupwu ie milik me chönün chunen i epwe fang ngeni kich. 9Nge öüsap chök fókkun üüngeni ewe SAMOL, öüsap pwal nuokkusiti aramasen ewe fönü, pün iir repwe usun chök nge anach mwöngö, sisap filefil reer. Minne a öchchülór epwe süüseniir, nge ewe SAMOL a nóm reech. Öüsap nuokkusitiir.”
10Nge unusen ewe mwiichen aramas ra poputä le kapas usun ar repwe mónei faaw ngeni Joshua me Kaleb. Mwirin, lingen ewe SAMOL a pwä ngeni ekkewe aramasen Israel meinisin seni asen ewe Imw Mangaku Leenien Chufengen.
Moses a iótek fäniten ekkewe aramas
11Mwirin, ewe SAMOL a apasa ngeni Moses: “Epwe ifa üküükün langattamen fansoun än ekkeei aramas repwe turunufaseei? Epwe pwal ifa üküükün langattamen fansoun ar resap lüküei, inamwo are ngang üwa fen föri me leiir ekkewe esissil mi manaman meinisin? 12Ngang üpwe niir ren och määlap o arosereló. Iwe, ngang üpwe föri senuk ew mwüü mi lapalaap o pöchökkül lap seniir.”
13Iwe, Moses a apasa ngeni ewe SAMOL: “Nge meet ekkewe chón Egypt repwe ekieki lupwen repwe rong usun ei? Pün iir ra silei usun ewe manaman en ka pwääraló me leiir lupwen ka chimanüw ekkeei aramas seni Egypt. 14Iwe, ina repwe aporausa ei ngeni ekkewe aramasen ei fönü iir mi silei pwe en, äi SAMOL, ka nóm leiin ekkeei aramas. Iir mi silei pwe en, äi SAMOL, ka pwä ngeni noum kewe aramas me lón ewe üren kuchu mi üütä aser. Iir ra silei pwe en ka akkomw mwer lón ewe üren kuchu lerän me ew üren ekkei lepwin. 15Iwe, are kopwe niieló ekkeei aramas meinisin iei, chón ekkewe mwüü mi rongorong usun óm iteföüló ina repwe apasa, 16‘Ewe SAMOL esap tongeni emmwenalong ei mwiichen aramas ngeni ewe fönü i a pwon fän ökköpöl pwe epwe ngeniir; iei minne, i a niireló me lón ewe fönüpöön.’
17“Ina pwata, iei üwa tongór, äi Samol, kopwe pwääraló pwe óm manaman a fókkun lapalaap, usun ka fen apasa. Pün en ka apasa, 18‘Ewe SAMOL a songomang o a wöwün tong. I a omwusaló iteiten sókkun tipis me pwuupwungaw. Iwe, inamwo nge i esap chök likitaló ekkewe chón tipis an esap öpwüngür. Pün i a öpwüngü ekkewe naaw fäniten tipisin ekkewe saam tori ewe öülüngätin me örüwänüwen tettelin pilóón aramas. 19Ngang üwa tungór, kose mochen kopwe omwusaló tpisin ei mwiichen aramas, alóngólóng wón óm tong mi lapalaap, usun chök en ka fen omwusaló än ei mwiichen aramas tipis seni Egypt tooto tori iei.”
20Mwirin, ewe SAMOL a apasa: “Ngang üwa omwusaló ar tipis, usun meet en ka tungór. 21Nge enlet, mwo manawei me lingen ewe SAMOL mi ouraaló unusen fönüfan, 22esap wor emön me leiin ekkeei aramas epwe tolong lón ewe fönü. Pün iir meinisin ra fen küna äi ling me ekkewe esissil ngang üwa föriir me lón Egypt me ewe fönüpöön, nge ra chök sótuniei me sótuniei o resap älleasochisi mweliei. 23Iei minne, iir resap fókkun küna ewe fönü ngang üwa pwon fän ökköpöl ngeni ar kewe leewo. Esap pwal wor emön me leiin chókewe mi turunufaseei epwe tolong lón ewe fönü. 24Nge neii we chón angang Kaleb, a sókkóló seni ekkewe pwal ekkóch. I a likiitü le ölükülük ngeniei, iei minne, ngang üpwe emmwenalong i lón ewe fönü i a sachei. Iwe, i me mwirimwirin kana repwe angei unusen inetir fönü me lón ewe fönü. 25Iwe, öüpwe kulsäfäl pwe öüsap feilló ngeni ewe fönü ia ekkewe chón Amalek me chón Kanaan ra nónnóm ie. Lesor öüpwe kul o mwökütülong lón ewe fönüpöön ren ewe aal mi alengeni ewe Setipar.”
Ewe SAMOL a öpwüngü ekkewe chón üüngeni nemenem
26Iwe, ewe SAMOL a apasa ngeni Moses me Aaron, 27“Epwe ifa langattamen äi üpwe engngiló ngeni ei mwiichen aramasangaw mi lal ngeniei? Ngang üwa rongorong ekkewe kapasen tunoppwen ekkewe aramasen Israel ra apasa 28Iwe, öüpwe üreniir pwe iei aloi ngang ewe SAMOL, ‘Mwo manawei, ngang üpwe föri ngeni kemi ekkewe mettóch ngang üwa rong ämi apasa. 29Ämi meinisin öüpwe määtiw ikeei lón ei fönüpöön. Pwokiten öüwa pweniei, esap fókkun wor emön me leiimi seni ier rüwe feittä me ekkewe mi ällea lón ewe fansoun ällean iteit, 30epwe tolong lón ewe fönü ngang üwa pwon fän ökköpöl pwe üpwe ngeni kemi, chiilón chök Kaleb nöün Jefunne we mwän me Joshua nöün Nun we mwän. 31Nge ren nöümi kewe semiriit ämi öüwa apasa pwe repwe ooló, ngang üpwe emmweniirelong pwe repwe emeseikeer lón ewe fönü ämi öüwa opwut. 32Nge ämi, soomämi repwe chök määtiw lón ei fönüpöön. 33Iwe, nöümi kewe mwän repwe usun chök chón fóffóól maan, repwe siamwü lón ewe fönüpöön lón üküükün fääik ier. Lón ei lapalap, repwe mwärelong fän liwinin riäfföün ämi kirikiringaw tori ekkewe ömwüchchülón me leiimi repwe määtiw lón ewe fönüpöön. 34Pwokiten ekkewe mwän mi sachei ewe fönü ra nóm lón ewe fönü lón üküükün fääik rän, iei minne ämi öüpwe siamwü lón ewe fönüpöön lón üküükün fääik ier. Ew ier fäniten ew rän, ämi öüpwe mwärelong fän riäfföün eselipäen ämi tipis. Popun ei, pün öüpwe küna meet lapalapen äi üpwe emön chón opwuta kemi.’ 35Ngang ewe SAMOL üwa kapas. Ngang üpwe fókkun föri ei usun ngeni unusen ei mwiichen aramas mi ngaw ra chufengen pwe repwe üüngeniei. Repwe fókkun rosoló me lón ei fönüpöön o repwe chök määtiw ikenan.”
36Iwe, ekkewe mwän Moses a tiiniireló pwe repwe sachei ewe fönü, ikkeiir ätekewe mi liwinito o popuw pwe ewe mwiichen aramas meinisin repwe lal ngeni Moses ren ar uweato ew poraus mi ngaw fäniten ewe fönü, 37ikkanaiir ekkewe mwän ra mäló ren ewe määlap me fän mesen ewe SAMOL. 38Nge Joshua nöün Nun we mwän me Kaleb nöün Jefunne we mwän chök ra chüen manaw me leiin ekkewe mwän mi feilló o sacheei ewe fönü.
Ewe angangen maun ese pwönüwetä
39Lupwen Moses a aporausa ngeni ekkewe aramasen Israel meinisin än ewe SAMOL keei kapas, iwe, a wor wätten letipeta leiin ekkewe aramas. 40Iwe, ra pwäätä lesossorusichin ewe rän mwirin o ra poputä le feilló ngeni wón ungen ewe fönü mi chukuchukutä, pün ra apasa, “Öüsipwe feilló. Kich sia meefi pwe sia tipis, nge iei sia mollotä ngeni ach sipwe tolong lón ewe fönü ewe SAMOL a pwon ngeni kich!”
41Nge Moses a apasa, “Pwata öüwa älleasolap ngeni än ewe SAMOL öllük iei, i a öllük ngeni kemi pwe öüpwe liwinsäfäl ngeni ewe fönüpöön? Minne öüwa föri esap mwirinnö. 42Öüsap tolong lón ewe fönü iei. Are öüpwe tolong, iwe, öüpwe kuf ren ekkewe chón opwutakemi, pün ewe SAMOL esap fiti kemi. 43Lupwen öüpwe ämesemes fengen me ekkewe chón Amalek me ekkewe chón Kanaan lón maun, iwe, öüpwe mäló ren ketilas. Ewe SAMOL epwe likitikemiiló, pwokiten ämi öüwa likitaló ewe SAMOL.”
44Nge ekkewe aramas ra chök fókkun ouucho le filimwälietä pwe repwe feittä ngeni wón ungen ewe chukuchukutän ewe fönü Kanaan, inamwo ika än ewe SAMOL we pwórun pwon ika Moses resap feilló seni ewe leeni ia ra asóósó ie. 45Mwirin, ekkewe chón Amalek me ekkewe chón Kanaan mi nóm wón ekkewe chukuchukutä ra feittiw o maun ngeniir. Iwe, ra tapwerisäfälir tori Hormah.
Ekkewe öllük fäniten ekkewe asóren mwöngö me asóren wün
15 Iwe, ewe SAMOL a apasa ngeni Moses, 2“Kopwe üreni ekkewe aramasen Israel ekkeei kapasen öüröür: ‘Lupwen öüpwe tolong lón ewe fönü ngang üpwe ngeni kemi pwe öüpwe fönüweni, 3öüpwe ääni ew asór wón ekkei ngeni ewe SAMOL seni nöümi pwiin kowu ika nöümi pwiin siip me kuuch pwe epwe ew asór ewe SAMOL a efich pwoon, ese lifilifil ika ew asóren keek ika och sókkun asór pwe öüpwe öpwönüetä ew pwon ika ew asór seni pwisin mochenin letipemi ika ew asór lón ämi kewe fansoun chuulap mi kefilitä. 4Ewe aramas mi uweato an asór ngeni ewe SAMOL epwe pwal uweato ew asóren mwöngö ew na engolun ew efa ika ruu kuóche pilawa mi amas o mwirinnö mi nofit fengen me ew na rüwänüen ew hin ika ew kuóche apüra seni föün olif. 5Epwe pwal ääni asóren wün ew na rüwänüen ew hin ika ew kuóche wain epwe ochuuw ngeni emön me emön laam fäniten ewe asóren keek ika ew sókkun asór.
6“ ‘Iwe, are epwe ääni asór emön ätemwänin siip, epwe pwal amollätä pwe ew asóren mwöngö ruu na engolun ew efa ika rüwänü kuóche pilawa mi amas o mwirinnö mi nofit fengen me ew na ülüngätin ew hin ika ew ew na rüwänü kuóche apüra seni föün olif. 7Nge fäniten ew asóren wün, öüpwe ääni asór ew na ülüngätin ew hin ika ew ew na rüwänü kuóche wain pwe ew asór ewe SAMOL a pwapwa ren.
8“ ‘Iwe, lupwen öüpwe amollätä pwe öüpwe ääni asór ngeni ewe SAMOL emön liäliffön kowu pwe ew asóren keek ika ew asór fäniten ämi öüpwe öpwönüwetä ew pwon ika ew asóren kinamwe, 9mwirin, öüpwe pwal ääni ew asóren mwöngö ülüngät na engolun ew efa ika wonu kuóche pilawa mi amas o mwirinnö mi nofit fengen me esóp hin ika ruu kuóche apüra seni föün olif, fiti fengen me ewe liäliffön ätemwänin kowu. 10Iwe, öüpwe pwal uweato pwe ew asóren wün esóp hin ika ruu kuóche wain. Ei epwe ew asór mi keek wón ekkei ewe SAMOL a pwapwa ren. 11Ikkeei ekkewe kapasen öüröür fäniten meet epwe chiechi ngeni emön me emön liälifföön ätemwänin kowu, emön me emön ätemwänin siip ika emön me emön laam ika appanen kuuch. 12Epwe iei üküükün minne öüpwe föri ngeni üküükün iteiten ekkewe mönün asór öüpwe ääniir asór.
13“ ‘Are emön chón wilipósun Israel a mochen epwe ääni ew asór wón ekkei mi apwapwai ewe SAMOL, epwe föri pwüngün ekkeei kapasen öüröür meinisin. 14Pwal are emön chón ekis mi nóm leiimi a mochen epwe ääni ew asór wón ekkei mi apwapwai ewe SAMOL, epwe chök pwal fiti pwüngün ekkeei kapasen öüröür. 15Emön chón wilipósun Israel me emön chón ekis ra wewe fengen chök me fän mesen ewe SAMOL. Iwe, ra nóm fän pwüngün ew chök öllük. Iei ew öllük epwe nóm fóchófóch fänitemi. 16Epwe wor ew chök öllük me ew chök öüröür fänitemi me ekkewe chón ekis mi nóm leiimi.’ ”
17Iwe, ewe SAMOL a pwal apasa ngeni Moses lón ei fansoun, 18“Kopwe apasa ngeni ekkewe aramasen Israel ekkeei kapasen öüröür: ‘Lupwen öüpwe tolong lón ewe fönü ia ngang üpwe emmweni kemiiló ie, 19öüpwe mwöngö seni üwään ekkewe irä mi määr wón ewe fönü. Nge öüpwe äimüeló ekkóch pwe ew liffang ngeni ewe SAMOL. 20Öüpwe uweato efóch pilawa seni ewe akkomwen pilawa mi amas öüwa fööira o äimwüeló pwe ew liffang, usun chök minne öüwa föri ngeni ewe akkomwen föün wiit seni ewe leenien wichiwich umwun wiit. 21Lón ekkewe pilóón aramas repwe feitto, öüpwe uwato ei asór ngeni ewe SAMOL iteiten ier seni ewe akkomwen pilawa mi amas o fööiir.
Öllük fäniten tipisin mwälliló nge sap seni mochenin letip
22“ ‘Nge are öüwa tipis nge esap seni mochenin letipemi o öüsap föri pwüngün ekkeei öllük meinisin ewe SAMOL a fen apasa ngeni Moses, 23meinisin minne ewe SAMOL a öllük ngeni kemi meren Moses, seni ewe rän ewe SAMOL a ngeni kemi ekkewe öllük tooto leemelen ämi kewe pilóón aramas, 24nge ewe mwääl a fis ren chök mwälliló nge sap seni mochenin letip, nge ewe mwiichen aramas resap äpereni usun, mwirin, unusen ewe mwiichen aramas repwe ääni asór emön liälifföön ätemwänin kowu fäniten ew asóren keek, ewe SAMOL a pwapwa ren, fiti fengen me ewe asóren mwöngö me ewe asóren wün, alóngólóng wón pwüngün ewe öllük. Repwe pwal ääni asór emön appanen kuuch pwe ew asóren limelimen tipis. 25Iwe, ewe souasór epwe föri asóren omwusomwusen tipis fäniten unusen ewe mwiichen aramasen Israel. Iwe, ar föfför mi mwääl epwe mwusóló, pün iei ew mwäl sap seni mochenin letiper, ra pwal uweato ar asór ngeni ewe SAMOL mi keek wón ekkei me ar asóren limelimen tipis me fän mesen ewe SAMOL fäniten ar tipis sap seni mochenin letiper. 26Iwe, epwe mwusóló tipisin unusen ewe mwiichen aramasen Israel me ekkewe chón ekis mi nóm leiir, pwokiten ekkewe aramas meinisin ra tipis ren ar mwälliló nge sap seni mochenin letiper.
27“ ‘Iwe, are emön aramas a tipis nge sap seni mochenin letipan; mwirin i epwe uweato pwe an asór emön liäfefinen kuuch ew ierin fäniten an asóren limelimen tipis. 28Iwe, ewe souasór epwe föri asóren omwusomwusen tipis me fän mesen ewe SAMOL fäniten ewe aramas mi tipis ren an mwälliló nge sap seni mochenin letipan. Iwe, lupwen ewe asóren omwusomwusen tipis a för fäniten ewe aramas, i epwe le mwusóló. 29Öüpwe ääni ew chök öllük fäniten iö mi tipis nge sap seni mochenin letipan, ese lifilifil ika i emön chón wilipós me leiin ekkewe aramasen Israel ika i emön chón ekis mi nóm leiimi.
Öllük fäniten tipis seni fisefisen letip
30“ ‘Nge are emön aramas a föri och tipis seni fisefisen letipan, i a turunufasei ewe SAMOL, ese lifilifil ika i emön chón wilipós ika emön chón ekis. Ena aramas epwe katoowu seni leiin ewe mwiichen aramas. 31Pwokiten ewe aramas a opwut än ewe SAMOL kapas o pwurätiw an öllük; iei minne i epwe fókkun katoowu. An tipis epwe chök nónnóm wón i.’ ”
Chappen tipisin epiningawa ewe Ränin Sabbat
32Iwe, lupwen ekkewe aramasen Israel ra nóm lón ewe fönüpöön, ra küna emön mwän a rus mwüüch lón ewe ränin Sabbat. 33Iwe, chókewe mi küna ätei an rus mwüüch ra lukealó i ren Moses me Aaron pwal ren ewe mwiichen aramas meinisin. 34Iwe, ra atolonga ätewe lón kalapwuus, pwokiten esap mwo fat meet repwe föri ngeni i. 35Mwirin, ewe SAMOL a apasa ngeni Moses, “Ewe mwän epwe fókkun ninniiló. Ewe mwiichen aramas meinisin repwe móneei ngeni faaw ätewe me lükün ewe leeni ia öüwa asóósó ie.” 36Iwe, ewe mwiichen aramas meinisin ra lukeawu ätewe lükün ewe leeni ia ra asóósó ie o ra móneei ngeni faaw ätewe tori a mäló, usun minne ewe SAMOL a öllük ngeni Moses.
Ewe sókkun fouten wón üüf
37Iwe, ewe SAMOL a pwal apasa ngeni Moses, 38“Kopwe apasa ngeni ekkewe aramasen Israel ekkeei kapasen öüröür: ‘Seni kemi tori mwirimwirimi kana öüpwe sópwosüküw leppwülün üfemi, nge öüpwe pitäätä wón ew me ew kewe sópwosük och sääl mi arawaraw. 39Öüpwe awora ekkeei sópwosük pwe lupwen öüpwe küneer, öüpwe chemeni än ewe SAMOL kewe öllük meinisin o älleasochisir, pwe öüsap tapweló mwirin kirikiringawen mocheniän letipemi me künäen mesemi öüwa soun öörüni le fitaaló. 40Mwirin, öüpwe chechchemeni ämi öüpwe älleasochisi äi kewe öllük meinisin o öüpwe pin fäniten ämi we Kot. 41Ngang ewe SAMOL ämi we Kot mi emmwenikemiiwu seni ewe fönü Egypt pwe üpwe ämi Kot: Ngang ewe SAMOL ämi we Kot.’ ”
Üüngeni Moses me Aaron
16 Iwe, lón ew ränin Korah nöün Izhar we mwän emön mwirimwirin Kohat nöün Levi we mwän, a föri fengeni ew raaw me pwal ekkóch mwän iter Dathan me Abiram iir nöün Eliab kewe mwän me On nöün Peleth we mwän seni ewe einangen Reuben. 2Ra etipetipatä üküükün rüwöpwükü lime souakkomwen ewe mwiichen aramas, iir mwän mi iteföüló, ra tuppwuni ewe mwiichen aramas pwe repwe üüngeni Moses. 3Iwe, ra mwiich fengen pwe ra üüngeni Moses me Aaron. Iwe, ra feilló o apasa ngeniir, “Ämi öüwa koon pwisin esselükükemiiló, pün emön me emön leiin unusen ei mwiichen aramas a käimwüló meren ewe SAMOL, nge pwal i a nóm rech meinisin. Iwe, meet ämi pwüüng pwe öüwa föri pwe itä ämi öüwa lap seni emön me emön nöün ewe SAMOL keei aramas meinisin?”
4Ina minne, lupwen Moses a rong meet ra apasa, a chappetiw leppwül. 5Mwirin, a apasa ngeni Korah me chienan kewe meinisin, “Lesossorun lesor, ewe SAMOL epwe pwääri ngeni kich iön nöün pwal iön a pin. Iwe, ewe SAMOL epwe mwüüt ngeni chókana mi fil pwe repwe tolong fän mesan mi pin. 6En Korah me chiechiom kewe meinisin, iei meet öüpwe föri:Öüpwe angei ekkewe sepien asóren ötüöt, 7o öüpwe uwowlong ekkei lóór pwe öüpwe keni appach mi pwokkus lóór me fän mesen ewe SAMOL lesor. Mwirin, sipwe küna ika iöön ewe SAMOL a filätä pwe emön nöün mi pin. Fen ämi nöün Levi kana mwän öüwa koon pwisin esselükükemiiló!”
8Mwirin, Moses a kapas säfäl ngeni Korah, “Iei, öüpwe öüseling ämi nöün Levi kana mwän. 9Ifa usun, meremi pwe och mettóch mi kükkün pwe ewe Koten Israel a fili kemi seni leiin ekkewe chón Israel meinisin pwe öüpwe kkan ngeni i lupwen öüwa föri angangen lón an we imwenfel mangaku o üütä me mwen ewe mwiichen aramas pwe öüpwe angang ngeniir? 10I a uweikemiito pwe ämi chök öüpwe angang ngeni i, ämi me chiechiemi kewe mwän seni ewe einangen Levi, nge iei ämi öüwa pwal kütta pwe öüpwe wiiseni ewe wiisen souasór? 11Ewe emön en me chiechiom kana meinisin mi mwiichfengen öüwa wesewesen üüngeni, öüwa üüngeni ewe SAMOL. Iwe, iöön Aaron ina öüwa lal usun i?”
12Mwirin, Moses a tiiti Dathan me Abiram nöün Eliab kewe mwän pwe repwe feitto, nge iir ra pölüweni o apasa, “Äm aisap mochen feitto! 13Mereemw pwe och mettóch mi mwirinnö pwe ka emmwenikeemitä seni Egypt, ewe fönü ia a pwuupwu ie milik me chönün chunen pwe kopwe niikeemiló ikeei lón ei fönüpöön, iwe, ka pwal förukóló pwe kopwe emön samol wóóm? 14Nge fen pwal lapalón, en kosap mwo emmwenikeemilong lón ewe fönü ia a pwuupwu ie milik me chönün chunen, kosap pwal ngeni keem mälliim me äm tännipin irän wain. Ifa usun, ka ekieki pwe kopwe chök oumwesimwesi keem? Äm aisap feitto!”
15Mwirin, Moses a fókkun soong, o a apasa ngeni ewe SAMOL, “Kosap etiwa ar kewe asór. Ngang üsap mwo nge angei emön tongki seniir, usap pwal föri och mi mwääl ngeni emön me leiir.”
16Iwe, Moses a apasa ngeni Korah, “Lesor, en me chiechiom kewe meinisin öüpwe waroto ikeei fän mesen ewe SAMOL. Aaron epwe pwal feitto ikeei. 17Kopwe tümwünüfichi pwe emön me emön chiechiom kewe rüwöpwükü lime öüpwe en me uwato an sepien asóren ötüöt fiti appach mi pwokkus lón pwe öüpwe ääni asóren ötüöt fän mesen ewe SAMOL. Iwe, emön me emön epwe uweato en me an sepien asóren ötüöt fän mesen ewe SAMOL. Pwal Aaron epwe uweato an sepien asóren ötüöt.” 18Iei minne, ekkeei mwän ra feitto fän ar kewe sepien asóren ötüöt, ra iseiselong ekkei lór o uwowutä appach mi pwokkus wóór. Iwe, ra üütä leasamen ewe Imw Mangaku Leenien Chufengen fiti Moses me Aaron. 19Nge lón ei fansoun, Korah a etipetipa unusen ewe mwiichen aramas pwe repwe üüngeni Moses me Aaron. Iwe, iir meinisin ra mwiichfengen ren ewe leenien tolong ngeni ewe Imwenfel mangaku. Mwirin, lingen ewe SAMOL a pwä ngeni ewe mwiichen aramas meinisin. 20Iwe, ewe SAMOL a apasa ngeni Moses me Aaron, 21“Öüpwe märeló seni leiin ei mwiichen aramas pwe ngang üpwe arosereló fän ew chök.”
22Nge iir ra chappetiw leppwül o ra apasa, “O Kot, en ewe Kot me lepopun manaw meinisin. Ifa usun, en kopwe soong ngeni ewe mwiichen aramas meinisin lupwen emön chök mwän a tipis?”
23Ina minne ewe SAMOL a kapas ngeni Moses o apasa, 24“Kopwe üreni ekkewe aramas meinisin pwe repwe süü seni ekkewe imw mangaku imwen Korah, Dathan me Abiram.’ ”
25Iei minne, Moses a üütä o mwittir feilló ren ekkewe imw mangaku imwen Dathan me Abiram, nge ekkewe souakkomwen Israel ra tapweló mwirin. 26Iwe, Moses a üreni ekkewe aramas, “Öüpwe mwittir feilló iei chök seni ekkewe imw mangaku imwen ekkewe mwän mi föfföringaw! Öüsap attapa och pisekir pwe öüte pwal fitiir le rosoló ren ewe feiengaw epwe toriir pwokiten ar kewe tipis.” 27Ina minne, ekkewe aramas ra süü seni pwellin ünükkün ekkewe imw mangaku imwen Korah, Dathan me Abiram. Mwirin, Dathan me Abiram ra toowu o üütäló leasamen imwer kewe imw mangaku fiti pwülüwer kewe, nöüür kewe mwän me nöüür kewe kükkün semiriit.
28Iwe, Moses a apasa: “Ren ei, ämi öüpwe silei pwe ewe SAMOL a ökkünöweito pwe üpwe föri ekkeei mettóch meinisin ngang üwa föriir, pün ngang üsap föriir fän pwisin letipei. 29Are ekkeei mwän repwe mäló usun chök än aramas meinisin mäló, pwal are epwe fis ngeniir och usun minne mi pwal fiffis ngeni aramas meinisin, mwirin, ewe SAMOL esap ökkünöwei. 30Nge are ewe SAMOL epwe föri och manaman o ewe pwül epwe saangfesen o oromiireló fiti pisekir meinisin, pwe repwe feilmanawetiw lón ewe pwaang leenien sootup, mwirin, ämi öüpwe silei pwe ekkeei mwän ra turunufasei ewe SAMOL.”
31Iwe, a fis pwe lupwen chök än Moses a wes le apasa ekkeei kapas meinisin, ewe pwül a saangfesen me faar. 32Iwe, ewe pwül a saangfesen o oromaló ekkewe mwän fiti chón leimwer meinisin me chiechier kewe meinisin mi üütä reer fiti pisekir meinisin. 33Iei usun, iir meinisin ra feilmanawetiw lón ewe pwaang leenien sootup. Iwe, ewe pwül a pwölüüreló o iir meinisin ra mörukóló. 34Iwe, ekkewe chón Israel meinisin mi nóm ünükküür ra sü lupwen ra rong ar pwuchöör, pün ra apasa, “Sipwe sü pwe ewe pwül ete pwal oromikicheló!”
35Mwirin, och ekkei a ngetewu seni ewe SAMOL o a kenaló ekkewe rüwöpwükü lime mwän mi ääni ekkewe asóren ötüöt.
36Iwe, ewe SAMOL a apasa ngeni Moses, 37“Kopwe üreni Eleazar nöün ewe souasór Aaron we mwän pwe epwe angeawu ekkewe sepien asóren ötüöt seni lón ewe ekkei pün ra pin. Kopwe pwal üreni pwe epwe kümeeló ewe appach mi pwokkus nge mi kü, 38seni ekkewe sepien asóren ötüöt än ekkeei mwän mi liwini ngeni ar tipis pwisin manawer. I epwe lechei ekkeei sepien asóren ötüöt ngeni ama o achööpöpür pwe pwölüpwölün ewe róngen asór, pün ekkeei sepien asóren ötüöt ra pin, pwokiten ra aea le asór me fän mesen ewe SAMOL. Iwe, pwlüpwölün ewe róngen asór we epwe fis pwe och minen fön ngeni ekkewe aramasen Israel.”
39Ina minne, ewe souasór Eleazar a ionifengeni ekkewe rüwöpwükü lime sepien asóren ötüöt mi för seni piraas ekkewe mwän mi mäló ren ar kar lón ewe ekkei ra aea le asór. Iwe, a lecheer pwe pwölüpwölün ewe róngen asór. 40Ei epwe och pisekin ächchem ngeni ekkewe aramasen Israel pwe esap wor emön chón lükün, sap i emön mwirimwirin Aaron, epwe kanoto pwe epwe keni appach mi pwokkus me fän mesen ewe SAMOL, pwe ete appöön Korah me chiechian kewe. Iwe, Eleazar a föri usun chök minne ewe SAMOL a öüröüra ngeni Moses.
Än ekkewe aramas lal
41Nge lón chök ewe rän mwirin, unusen ewe mwiichen aramasen Israel ra lal ngeni Moses me Aaron o apasa, “Ämi ekkewe rüwömön öüwa niieló nöün ewe SAMOL kewe aramas.”
42Iwe, lupwen ewe mwiichen aramas ra mwiichfengen pwe repwe üüngeni Moses me Aaron, ra kul ngeni äwenewenen ewe Imw Mangaku Leenien Chufengen nge ra küna ewe kuchu a pwölüweló ewe imw mangaku o lingen ewe SAMOL a pwä. 43Mwirin, Moses me Aaron ra feitto o üütä mwen ewe Imw Mangaku Leenien Chufengen. 44Iwe, ewe SAMOL a apasa ngeni Moses, 45“Öüpwe märeseni ekkeei aramas pwe ngang üpwe arosereló fän ew chök.” Nge Moses me Aaron ra chappetiw leppwül.
46Iwe, Moses a apasa ngeni Aaron, “Kopwe mwittir angei ew sepien asóren ötüöt o uwowlong ekkei lón seni ewe róngen asór. Kopwe iseis appach mi pwokkus wón o kopwe mwittir uweeló leiin ekkewe aramas pwe kopwe föri asóren omwusomwusen tipis fäniter, pün än ewe SAMOL soong a fen ngetewu me leiir - ew määlap a fen poputä.” 47Iwe, Aaron a föri usun minne Moses a üreni, o a säälong leiin ekkewe aramas. Ewe määlap a fen poputä me leiin ekkewe aramas, nge Aaron a iseiselong appach mi pwokkus lón ewe sepien asóren ötüöt o a föri asóren omwusomwusen tipis fäniten ekkewe aramas. 48Iwe, i a üütä lefiilen ekkewe mi mäló me ekkewe mi manaw tori ewe määlap a köüüló. 49Iwe, iteiten ekkewe aramas mi mäló ren ewe määlap, üküükür engol me rüwänü ngöröw füüpwükü, kapach ngeni chókewe mi mäló lón ewe atun meet fis pwokiten Korah. 50Ina minne Aaron a liwinsäfäliló ren Moses leasamen ewe Imw Mangaku Leenien Chufengen pün ewe määlap a köüüló.
Wókun Aaron we a fasar
17Mwirin, ewe SAMOL a apasa ngeni Moses, 2“Kopwe üreni ekkewe aramasen Israel pwe kopwe angei seniir engol me rüwófóch wóók, äkkäefóch seni emön souemmwenin ew me ew ar kewe einang. Iwe, kopwe makkeetiw iten emön me emön mwän wón wókun. 3Iwe, kopwe makketiw iten Aaron wón ewe wóók fäniten ewe einangen Levi. Epwe wor efóch wóók fäniten emön me emön souemmwenin ew me ew kewe einang. 4Mwirin, kopwe isenalong ekkewe wóók lón ewe Imw Mangaku Leenien Chufengen mwen ewe pisekin Pwärätä, ikeweia ngang üwa chuuruk me ie. 5Iwe, epwe fasar wókun ewe mwän ngang üwa filätä. Iei usun pwisin ngang üpwe öükäätiw än ekkewe aramasen Israel lal ngenuk.”
6Ina minne, Moses a üreni ekkewe aramasen Israel ekkei kapas. Iwe, emön me emön leiin ekkewe engol me rüwömön souemmwenin einang pwal pacholong Aaron ra ngeni Moses efóch wóók. Iwe, a wor engol me rüwófóch wóók. Wókun Aaron we a pwal nóm leiin wókuur kewe. 7Iwe, Moses a eleenia ekkewe wóók fän mesen ewe SAMOL lón ewe imw mangaku ia ewe pisekin Pwärätä a nóm ie.
8Iwe, lón ewe rän mwirin, lupwen Moses a tolong lón ewe imw mangaku ia ewe pisekin Pwärätä a nóm ie, a küna pwe wókun Aaron we mi tupwuni ewe einangen Levi a fasar, a pwal et, a pöppöön irä o a uwääni föün almond mi maaw. 9Mwirin, Moses a uweawu ekkewe wóók meinisin seni fän mesen ewe SAMOL ren ekkewe aramasen Israel meinisin. Iwe, ra nennengeni ekkewe wóók o emön me emön mwän a angei en me wókun.
10Iwe, ewe SAMOL a apasa ngeni Moses, “Kopwe eliwinisäfälieló wókun Aaron we mwen ewe pisekin Pwärätä pün epwe iseis pwe och esissil ngeni ekkewe nöün chón üleförea, pwe ei epwe öükäätiw ar lal ngeniei pwe rete mäló.” 11Iwe, Moses a föri usun chök minne ewe SAMOL a öllük ngeni i.
12Mwirin, ekkewe aramasen Israel ra apasa ngeni Moses, “Enlet, äm aipwe le mäló, äm aipwe le rosoló, äm aipwe määfeiengaw meinisin! 13Iteiten emön me emön a chök kkan ngeni än ewe SAMOL we imwenfel mangaku a mäló. Sipwe le mäló meinisin!”
Än ekkewe souasór me chón ewe einangen Levi angang
18 Mwirin, ewe SAMOL a apasa ngeni Aaron: “En me noum kewe mwän pwal määrärum kewe seni ewe einangen Levi öüpwe wiisen mwärelong fän tipisin ekkewe pwuupwungaw mi fis ngeni ewe imw mi pin. Nge en me noum kewe mwän chök öüpwe mwärelong fän tipisin ekkewe pwuupwungaw mi fis ngeni wiisemi we wiisen souasór. 2Iwe, kopwe pwal emmwenato määrärum kewe seni ewe einangen Levi, einangen somwom we, pwe repwe älisuk me noum kewe mwän lupwen öüpwe föri ekkewe angang mi pin me mwen ewe Imw Mangaku ia ewe pisekin Pwärätä a nóm ie. 3Nge lupwen ekkewe mwän seni ewe einangen Levi repwe föri angangen wiiser fän óm tümwün, repwe fókkun tümwünüfichi pwe resap attapa och me leiin ekkewe pisek mi pin ika ewe róngen asór. Pün ika repwe attapa och, iwe, ämi ppök - en me iir öüpwe mäló. 4Ekkewe mwän seni ewe einangen Levi repwe chiechi ngenuk le öpwönüwetä angangen wiiser fäniten tümwünün ewe Imw Mangaku Leenien Chufengen. Nge esap wor emön sap i emön mwän seni ewe einangen Levi epwe tongeni fiti kemi le föri ei angang.
5“Ämi chök öüpwe wiisen föri ekkewe angang mi pin me lón ewe imw mi pin pwal ren ewe róngen asór. Are öüpwe fiti pwüngün ekkeei kapasen öüröür, iwe, än ewe SAMOL soong esap chüen ngeteri ekkewe aramasen Israel. 6Nge nengeni pwe pwisin ngang üwa filätä chiechiom kewe mwän seni ewe einangen Levi seni leiin ekkewe aramasen Israel pwe iir repwe chón älillis ngenuk. Iir ra epinipiniló ngeniei ngang ewe SAMOL pwe repwe föri angangen ewe Imw Mangaku Leenien Chufengen. 7Nge en me noum kewe mwän, iir ekkewe souasór, öüpwe föri ekkewe angang mi pin meinisin mi sooso ngeni ewe róngen asór me ekkewe mettóch meinisin mi nóm peekilongen ewe refiref mangaku lón ewe Leeni mi Unusen pin. Iwe, öüpwe föri ei angang pwe iei wiisemi. Ngang üwa ngeni kemi angangen ewe wiisen souasór pwe och liffang. Nge pwal emön aramas me lükümi mi kanoto ren ewe imw mi pin epwe ninniiló.”
Ekkewe asór fäniten älillisin ekkewe souasór
8Iwe, ewe SAMOL a apasa ngeni Aaron ekkeei kapasen öüröür: “Wesewesen pwisin ngang üwa fen pwal ewiisa ngeni kemi ämi ekkewe souasór pwe öüpwe tümwünü ekkewe liffang mi pin meinisin ekkewe aramasen Israel ra fang ngeniei. Ekkewe asór mi pin meinisin ekkewe chón Israel ra ngeniei, ngang üwa ngenuk me noum kewe mwän pwe inetimi. Ei epwe ew öllük tori feilfeilló chök. 9Ekkewe aramas repwe uwato ar liffang, ese lifilifil ika asóren mwöngö ika asóren limelimen tipis ika asóren pwuupwungaw. Ekkeei asór ra unusen pin. Inetimi me lón ekkewe asór mi unusen pin epwe feitto seni ekkewe kinikin resap keekkiló wón ekkei. Ekkeei kinikin repwe fänitom me noum kewe mwän. 10Öüpwe mwöngö ekkeei asór lón ew leeni mi pin. Iteiten ekkewe mwän lón ämi kewe famili ra tongeni mwöngö seni ekkeei asór. Nge öüpwe chök chechchemeni pwe ekkeei asór ra pin.
11“Ekkewe chón Israel repwe uweato ekkóch liffang pwe ämi öüpwe sapeeretä ngeniei. Ngang üwa ngenuk me noum kewe mwän me noum kewe fefin ekkeei asór. Iei inetimi. Iteiten emön me emön mi limöch me lón óm famili epwe tongeni mwöngö seni.
12“Ngang üwa pwal ngeni kemi meinisin ekkewe apüra mi mwirinnö seni meinisin, pwal meinisin ekkewe wain mi fö me föün wiit mi mwirinnö seni meinisin minne aramas ra fang ngeniei ngang ewe SAMOL. Ikkeei ekkewe mwen uwa ra kinii seni uwään fótaar irä. 13Lupwen ekkewe aramas ra kinii uwään fótaar irä, ra uwato ekkewe mwen uwa meinisin reei ngang ewe SAMOL. Iei minne, ngang üwa ngeni kemi ekkeei mettóch. Iwe, iteiten emön me emön mi limöch me lón óm famili a tongeni mwöngö seni.
14“Iteiten mettóch meinisin aramas ra epinaló me lón Israel repwe óm. 15Iteiten mönükól mi akkomwen upwutiw seni inan me iteiten mweinöün maan aramas ra uweato ngeni ewe SAMOL repwe noum. Nge ren mwännichien aramas, en kopwe angei ewe möön ekkesiwilin wón mooni, pwal ren ewe mweinöün maan mi limengaw, en kopwe angei ewe möön ekkesiwil wón mooni. 16Iwe, kopwe angei ewe möön ekkesiwil wón mooni fäniten ekkewe mettóch mi epinipiniló lupwen repwe ew maram. Ewe möön ekkesiwil epwe üküükün limu shekel ika ruu aunus silifer, mi öüküük wón shekelin ewe imw mi pin, iei rüwe kerah.
17“ ‘Nge kosap angei ewe möön ekkesiwil wón mooni fäniten ewe mweinöün emön kowu, ika ewe mweinöün emön siip ika ewe mweinöün emön kuuch, pün ra pin o käimwüló fäniten ewe SAMOL. En kopwe äsupwu chaar wón ewe róngen asór o kenaló kirissiir pwe ew asór mi keek wón ekkei ewe SAMOL a pwapwa ren. 18Nge fituken ekkeei maan, ochóóm, usun chök pwal ren ewe leupwan me ewe pelifichin aföön mi sapatä me mwen ewe róngen asór pün pwal ikkana ochóóm. 19Ewer, ngang üwa ngenuk ekkeei asór mi pin meinisin ekkewe aramasen Israel ra uwato reei ngang ewe SAMOL. Ikkeei inetum me noum kewe mwän me fefin. Iei ew pwon mi fiti sólt esap tongeni epwe taaló lefiilei ngang ewe SAMOL me en me mwirimwirum kana.”
20Mwirin, ewe SAMOL a apasa ngeni Aaron: “En me ekkewe souasór esap wor inetimi fönü me leiin ekkewe aramasen Israel, pün ngang ina inetimi me fönüwemi me leiin ekkewe aramasen Israel.
Ekkewe na engol fäniten älillisin chón ewe einangen Levi
21“Nge ren ekkewe mwän seni ewe einangen Levi, iir määrärum kewe, ngang üpwe ngeniir liwinir fäniten ar angang lón ewe Imwenfel mangaku seni ekkewe na engol meinisin seni unusen ewe fönü Israel. 22Iwe, seni iei feilló, ekkewe aramasen Israel resap chüen kanoto ren ewe imwenfel mangaku me lükün chök ekkewe souasór me ekkewe mwän seni ewe einangen Levi. Are ekkewe aramas repwe kanoto, repwe pwisin mwärelong fän ar tipis o mäló. 23Nge ekkewe mwän seni ewe einangen Levi repwe föri angangen ewe imwenfel mangaku o repwe pwisin mwärelong fän liwinin ar pwuupwungaw. Epwe iei ew öllük epwe nóm fóchófóch leiimi. Nge ekkewe mwän seni ewe einangen Levi resap angei och inetir fönü me leiin ekkewe chón Israel. 24Pün ngang üwa fen ngeni chón ewe einangen Levi ekkewe na engol än ekkewe aramasen Israel iir ra ääni asór ngeni ewe SAMOL pwe ina wiiser. Ina minne ngang üwa apasa ngeniir pwe esap wor inetir fönü me leiin ekkewe aramasen Israel.”
Ewe na engol än chón ewe einangen Levi
25Mwirin, ewe SAMOL a pwal apasa ngeni Moses, 26“Iei meet kopwe apasa ngeni ekkewe mwän seni ewe einangen Levi: ‘Lupwen öüpwe angei ekkewe na engol seni ekkewe aramasen Israel, öüpwe fangaló ngeni ewe SAMOL ew na engolun ewe na engol öüwa angei - wewen, ew na engolun ew na engol - pwe epwe ew liffang ngeni ewe SAMOL. 27Iwe, ewe SAMOL epwe ekieki ngeni ei pwe iei ämi asóren kinikin uwa, epwe usun chök nge ekkewe akkomwen föün wiit seni ämi leenien wichiwich umwun wiit ika wain seni ämi leenien üchüüch föün irän wain. 28Iei usun pwal ämi öüpwe fangaló ewe ew na engol seni ewe na engol öüwa angei seni ekkewe chón Israel pwe ew liffang ngeni ewe SAMOL. Iwe, seni ekkeei na engol, öüpwe ngeni ewe souasór Aaron kinikinin ewe SAMOL. 29Öüpwe fókkun förfichi pwe öüpwe äimwüeló och kinikinin ekkewe liffang mi koon mwirinnö seniir meinisin ekkewe aramas ra fang ngeni kemi pwe ämi liffang ngeni ewe SAMOL.’
30“Iwe, kopwe pwal apasa ngeni ekkewe mwän seni ewe einangen Levi: ‘Lupwen ekkewe chón Israel repwe ngeni kemi ewe ew na engol seni ar kewe leenien wichiwich umwun wiit me ar kewe leenien üchüüch föün irän wain, ämi öüpwe ngeni ewe SAMOL ewe kinikin mi koon mwirinnö seni meinisin. 31Ämi ekkewe mwän seni ewe einangen Levi me ämi kewe famili öüwa tongeni mwöngö ewe lussun mwöngö ese lifilifil lón menni leeni öüwa mochen, pün iei liwinimi fäniten ämi angang lón ewe imwenfel mangaku. 32Esap wor tipisin ämi mwöngö ewe lussun seni än ewe SAMOL we na engol, are öüwa fen ngeni ekkewe souasór ewe kinikin mi mwirinnö seni meinisin. Nge öüpwe fókkun tümwünüfichi pwe öüsap epiningawa ekkewe liffang mi pin än ekkewe aramasen Israel. Are öüpwe epiningawer, iwe, öüpwe mäló.’ ”
Öllükün limelim
19 Iwe, ewe SAMOL a apasa ngeni Moses me Aaron, 2“ ‘Iei pwal ew öllükün pwüngün angangen asór ngang ewe SAMOL üwa öllük: Kopwe üreni ekkewe aramasen Israel pwe repwe lukeato reemw emön liäliffön liäfefinin kowu mi par, emön mi unusöch, ese wor terin, esap pwal mwärelong mwo fän ew fän efóch öüwafar pwe epwe lukii ewe pisekin ttu pwül. 3Iwe, öüpwe ngeni ewe souasór Eleazar ewe kowu pwe i epwe lukealó lükün ewe leeni ia aramas ra asóósó ie. Iwe, ewe kowu epwe ninniiló me fän mesan. 4Mwirin, ewe souasór Eleazar epwe angei och chaan ewe kowu ren efóch ächefen pöün o epwe äsupwu ewe chcha fän fisu ngeni äwenewenen asamen ewe imwenfel mangaku. 5Mwirin, ewe liäfefinin kowu epwe keekiló nge Eleazar mi küna. Ünüchchen ewe kowu me fitukan me chaan me affan repwe keekiló. 6Iwe, Eleazar ewe souasór epwe angei emwüch mwüchün ewe irä sedar me och ülün ewe irä hisop pwal ekkamw mangaku mi par o mónerelong lón ewe ekkei ia ewe liäfefinin kowu a keek ie. 7Mwirin, ewe souasór epwe soppwuni üfan kewe o tüütü lón kólik. Mwirin, epwe liwinsäfäliti ewe leeni ia ra asóósó ie, inamwo ika i epwe nóm lón tettelin chón limengaw tori lekkuniól. 8Nge ewe mwän mi wiisen keni ewe liäfefinin kowu epwe soppwuni üfan kana lón kólik o epwe pwal tüütü lón kólik. Pwal ätei epwe nóm lón tettelin chón limengaw tori lekkuniól.
9“Mwirin, emön mwän mi nóm lón tettelin chón limöch epwe tukeei falangen ewe liäfefinin kowu o epwe iseni lón ew leeni mi limöch lükün ewe leeni ia ra asóósó ie. Iwe ewe falang epwe iseis fäniten ekkewe aramasen Israel pwe repwe aea lón ewe kólikin limelim, pün iei ewe kólik fäniten limelimen tipis. 10Iwe, ewe emön mi wiisen tukeei falangen ewe liäfefinin kowu epwe soppwuni üfan kana o epwe nóm lón tettelin chón limengaw tori lekkuniól. Ei epwe ew öllük tori feilfeilló chök fäniten ekkewe aramasen Israel pwal fäniten ekkewe chón ekis mi nóm leiir.
11“Iwe, emön mi attapa emön soomä epwe nóm lón tettelin chón limengaw lón üküükün fisu rän. 12Iwe, i epwe elimelima inisin ren ewe kólikin limelim lón ewe öülüngätin rän me lón ewe efisuwen rän, mwirin i epwe limöch. Nge are i esap elimelima inisin lón ewe ölüngätin rän me lón ewe efisuwen rän, i epwe chök sópwósópwóló le nóm lón tettelin chón limengaw tori pwal mwirin ewe efisuen rän. 13Iwe, ese lifilifil ika iö a attapa inisin emön mi mäló nge esap elimelima inisin lón ewe lapalap mi pwüng, a elimengawa än ewe SAMOL we imwenfel mangaku. Ena aramas epwe katoowu seni leiin ewe mwiichen chón Israel. I epwe nóm lón tettelin chón limengaw pwokiten ewe kólikin limelim esap käsupwutä wón; ina minne an limengaw a chüen chök nóm wón.
14“Iei ewe öllük lupwen emön aramas a mäló lón ew imw mangaku: Meinisin ekkewe aramas mi tolong lón ewe imw mangaku me meinisin ekkewe mi nóm lón ewe imw mangaku repwe nóm lón tettelin chón limengaw lón üküükün fisu rän. 15Nge iteiten sepi mi chök suukuló nge esap wór pwölüwpölün mi pwölüpwölütiw wón epwe pwal limengaw.
16“Iwe, ese lifilifil ika iö a attapa emön mi mäló ren ketilas me lón ew leeni mi amassawa ika emön mi chök pwisin mäló, pwal ika emön a attapa chüün emön aramas ika ew peias, ena aramas epwe nóm lón tettelin chón limengaw lón üküükün fisu rän.
17“Iwe, fäniten limelimen emön aramas mi limengaw, repwe angei ekis falangen ewe liäfefinin kowu mi keekiló fäniten asóren limelimen tipis o uwalong lón ew sepi. Mwirin repwe niinätä och kólik wón. 18Mwirin, emön aramas mi nóm lón tettelin chón limöch epwe angei och ülün ewe irä hisop o ottukalong lón ewe kólik. Iwe, ena aramas epwe äsupwu ewe kólik wón ewe imw mangaku, wón pisekin lón ewe imw mangaku meinisin pwal wón ekkewe aramas mi nóm lón ewe imw mangaku ika wón emön mi attapa och chüün emön mi mä ika mi attapa emön mi ninniiló ren ketilas ika attapa emön mi chök pwisin mäló ika attapa ew peias. 19Ewe aramas mi nóm lón tettelin chón limöch epwe äsupwu ewe kólik wón ätewe mi nóm lón tettelin chón limengaw lón ewe öülüngätin rän pwal lón ewe efisuwen rän. Iwe lón ewe efisuwen rän, ewe aramas mi limöchsäfäl epwe elimelima inisin, epwe soppwuni üfan kana o tüütü lón kólik. Iwe, lón ewe kuniólun epwe nóm lón tettelin chón limöch. 20Nge emön aramas mi nóm lón tettelin chón limengaw nge esap elimelima inisin, ena aramas epwe katoowu seni leiin ewe mwiichen aramas pwokiten i a elimengawa än ewe SAMOL we leeni mi pin. Ewe kólikin limelim esap käsupwutä wón; ina minne i a chök chüen limengaw.
21“Ei epwe ew öllük fänitemi fansoun meinisin. Iwe ätewe mi wiisen äsupwu ewe kólikin limelim epwe soppwuni üfan kana. Nge ätewe mi attapa ewe kólikin limelim epwe nóm lón tettelin chón limengaw tori lekkuniól. 22Iwe, ese lifilifil ika meet ewe aramas mi nóm lón tettelin chón limengaw a attapa, epwe limengaw. Nge iö a attapa ewe mettóch mi limengaw, i epwe nóm lón tettelin chón limengaw tori lekuniól.”
Än Moses mwääl me lón Kadesh
20 Mwirin, unusen ewe mwiichen aramasen Israel meinisin ra tolong lón ewe Fönüpöönün Zin lón ewe äewin maram. Iwe, ekkewe aramas ra nónnóm lón Kadesh; nge mwirin, Miriam a mäló me ikenan o a peiasetiw ikenan.
2Iwe, esap wor kólik fäniten än ewe mwiichen aramas repwe wün me ikenan. Ina minne ra mwiichfengen o ra üüngeni Moses me Aaron. 3Iwe, ekkewe aramas ra äniini ngeni Moses o apasa, “Amwo itä äm aia fen fiti pwiim kewe lupwen ra mäló me fän mesen ewe SAMOL! 4Ifa usun, öüwa emmwenato nöün ewe SAMOL ei mwiichen aramas ikeei lón ei fönüpöön, pwe äm me nöüüm kewe maan äipwe mäló? 5Pwata öüwa pesei keem pwe äipwe feittä seni Egypt o emmwenikeemito ikeei lón ei leeni mi ngaw? Ei fönü esap wor föün wiit ika ewe irä fiik ika irän wain ika ewe sókkun föün irä usun apel itan pómekränet. Iwe, ese pwal wor och kólik pwe äipwe wün.”
6Ina minne, Moses me Aaron ra kul seni ewe mwiichen aramas o ra feilló ren asamen ewe Imw Mangaku Leenien Chufengen. Iwe, ra chappetiw leppwül. Mwirin, lingen ewe SAMOL a pwä ngeniir. 7Iwe, ewe SAMOL a apasa ngeni Moses, 8“Kopwe angei ewe wóók. Iwe, en me Aaron pwiimw we öüpwe emwichafengeni ewe mwiichen aramas. Iwe, kopwe öllük ngeni ewe achaw me mwen meseer pwe epwe opwuuowu kólikin lón. Iei usun meet kopwe föri pwe kólik epwe pwuuwu seni lón ewe achaw. Iwe, kopwe öünü ewe mwiichen aramas me nöüür kewe maan.”
9Ina minne, Moses a föri usun minne ewe SAMOL a öllük ngeni. A angei ewe wóók seni ewe leeni ia a iseis ie fän mesen ewe SAMOL. 10Mwirin, Moses me Aaron ra köörifengeni ewe mwiichen aramas pwe repwe feitto o mwiich fengen ren ewe achaw. Iwe, Moses a osommóng le kökkö o apasa, “Öüpwe rongorong ämi chón üüngeni Kot! Ifa usun, äm äipwe atoowu kólik fänitemi seni ei achaw?” 11Mwirin, Moses a eitieló pöün fän wókun we o wichii ewe achaw fän ruu. Iwe, ewe kólik a fókkun pwummóngowu. Iwe, ewe mwiichen aramas me nöüür kewe maan ra wün.
12Nge ewe SAMOL a apasa ngeni Moses me Aaron, “Pwokiten ämi öüsap lüküwei ren ämi öüpwe pwääraló äi pin ngeni ekkewe aramasen Israel; iei minne ämi öüsap emmwenalong ei mwiichen aramas lón ewe fönü ngang üwa ngeniir.”
13Ei leeni a iteni ewe kólikin Meribah, pwokiten iei ewe leeni ia ekkewe aramasen Israel ra äniini ngeni Kot me ie, pwal iei ewe leeni i a pwääraló an pin me leiir.
Esap mwüümwütä än chón Israel repwe pwerelong Edom
14Iwe, lupwen Moses a nóm lón Kadesh, a tiinaló ekkóch chón künö seni ikenan ren Edom pwe repwe üreni,
“Iei ei poraus seni pwiimw we Israel: ‘En ka pwisin silei usun ekkewe riäfföü meinisin ra tori keem, 15pwal usun än äm kewe leewo ra feilló Egypt. Äm aia nónnóm Egypt lón fansoun langattam. Iwe, ekkewe chón Egypt ra eriäfföwü keem me äm kewe leewo ren ar nöüni keem amanaw. 16Nge lupwen äm aia siö ngeni ewe SAMOL, i a rongorong mwelieem o a tiinato ewe Chón läng mi emmwenikeemiwu seni Egypt.
“ ‘Iwe, iei äm aia köüütä imweem imw mangaku lón Kadesh, ew telinimw mi nóm lepökün kiänin fönüom. 17Kose mochen kopwe mwüüt ngeni keem pwe aipwe pwerelong lón fönüwom ei. Äm aisap pwerelong lón óm kewe tännipi ika tännipin irän wain, aisap pwal wün kólik seni óm kewe weel. Äm aipwe chök pwereló wón än ewe King Alelap, nge aisap kul ngeni peliifich ika peliimööng tori äm aipwe pwerewu seni kiänin fönüwom ei.’ ”
18Nge Edom a apasa ngeni ätewe:
“Öüsap pwerelong lón fönüwei ei. Pün ika öüpwe tolong, ngang üpwe souni kemi fän ew mwiichen sounfiu.”
19Iwe, ekkewe aramasen Israel ra pölüweni o apasa,
“Kopwe mwüüt ngeni keem pwe äm aipwe chök pwereló wón ewe Alelap. Nge are emön me leiin nöüüm kewe maan a mochen wün seni óm kólik, mwirin, äm aipwe püngütiw liwinin. Kopwe mwüüt ngeni keem pwe aipwe chök pwereló wón fönüwom ei, nge aisap pwal föri och me lükün.”
20Nge ätewe a pölüweni o apasa,
“Öüsap pwerelong lón fönüwem ei.”
Iwe, Edom a emwiicha fengeni nöün mwiichen sounfiu o feilliwu pwe repwe souni ekkewe chón Israel pwe repwe maun ngeniir. 21Iwe, pokiten Edom esap mwüüt ngeni Israel pwe epwe pwereló lón kinikinin fönüwan we; ina minne Israel a kulsäfäl seni.
Aaron a mäló
22Iwe, unusen ewe mwiichen aramasen Israel ra sääi seni Kadesh o ra tori ewe Chuuk Hor. 23Mwirin, ewe SAMOL a kapas ngeni Moses me Aaron meren ewe Chuuk Hor mi nóm wón kiänin ewe fönü Edom. A apasa: 24“Iei a tori fansoun pwe Aaron epwe le mäló o chuuri an kewe leewo. I esap tolong lón ewe fönü ngang üwa ngeni ekkewe aramasen Israel, pwokiten ämi me rüwömön öüwa üüngeni äi kapasen öüröür fänäsengesin ewe kólikin Meribah. 25Iei, kopwe kööri Aaron me Eleazar nöün we mwän o emmweniretä wón ewe Chuuk Hor. 26Iwe, me ikenan, kopwe pwiliti seni Aaron üfan kewe üfen souasór o öüföüferetä wón Eleazar nöün we mwän, pün Aaron epwe le mäló me ikenan o chuuri an kewe leewo.”
Ekkewe chón Kanaan ra kuf me lón Hormah
21Iwe, ewe kingen Arad, ewe re Kanaan mi nónnóm lón ewe fönü Nekev a rong pwe ekkewe chón Israel ra feitto wón ewe aal mi alengeni Atharim. Ina minne, i a maun ngeni ekkewe chón Israel o a liäpenaló ekkóch me leiir. 2Mwirin, ekkewe aramasen Israel ra ääni ew pwon ngeni ewe SAMOL o apasa, “Are En kopwe wesewesen älisi keem pwe aipwe liäpeni ei mwiichen aramas, äm aipwe unusen ataeló ar kewe telinimw meinisin.” 3Iwe, ewe SAMOL a öüseling ngeni än ekkewe chón Israel we tungór o a ewiller pwe repwe okkufu ekkewe chón Kanaan. Iwe, ra unusen arosaló ekkewe aramas o unusen ataeló ar kewe telinimw. Iei minne ewe leeni a iteni Hormah seni ena fansoun.
Ewe uluulun serepenit mi för seni piraas
4Mwirin, ekkewe aramasen Israel ra sääi seni ewe Chuuk Hor o ra sääi wón ewe aal mi alengeni ewe Setipar, pwe repwe pwelliló lükün ewe fönü Edom. Nge ekkewe aramas ra poputä le apilükülükingaw lón letiper me wón ewe aal. 5Iwe, ekkewe aramas ra poputä le ngününgünüw Kot me Moses o apasa: “Pwata öüwa emmwenikeemitä seni Egypt pwe aipwe mäló ikeei lón ei fönüpöön? Pün esap wor och mettóch äm aipwe äni me ikeei, esap pwal wor kólik. Äm aia noow ei mwöngö manna esap wor lamwotan.”
6Ina minne, ewe SAMOL a tiinato ekkewe serepenit mi poison küüwer leiin ekkewe aramas. Iwe, ra küüw chómmóng me leiin ekkewe aramas o ra mäló. 7Mwirin, ekkewe aramas ra feitto ren Moses o ra apasa, “Äm aia tipis, pün äm aia kapasen üüngeni ewe SAMOL me en. Kopwe iótek ngeni ewe SAMOL pwe i epwe ösüüweló ekkewe serepenit mi poison küüwer seni keem.” Ina minne, Moses a iótek fäniten ekkewe aramas.
8Mwirin, ewe SAMOL a apasa ngeni Moses, “Kopwe föri och uluulun ewe serepenit mi poison küüwan o eitiwätä wón efóch mwüüch. Iwe, epwe fis pwe iteiten emön me emön aramas serepenit a küüw, lupwen i epwe chök nennengeni ewe uluulun serepenit, epwe manaw.” 9Ina minne, Moses a föri och uluulun serepenit seni piraas o a eitiwätä ei uluulun wón efóch mwüüch. Iwe, ina usun meet a fis pwe are emön serepenit a küüw emön aramas, nge lupwen chök a nennengeni ewe uluulun serepenit piraas, a manaw.
Sääi seni Hor tori Moab
10Iwe, ekkewe aramasen Israel ra sópweló ar sääi o ra öüüwetä imwer imw mangaku lón Oboth. 11Mwirin, ra sääi seni Oboth o ra öüüwetä imwer imw mangaku lón Iye Abarim lón ewe fönüpöön öötiwen Moab, sässäpengeni töötän akkar. 12Mwirin, ra mwöküt seni ikenan o ra öüüwetä imwer imw mangaku lón ewe Lemólun Zered. 13Iwe, ra mwöküt seni ikenan o ra öüüwetä imwer imw maangaku epeek ewe chaanpwuupwu Arnon mi nóm lón ewe fönüpöön mi sópwósópw seni kiänin fönüwen ekkewe chón Amor. Pün ewe chaanpwuupwu Arnon iei kiään lefiilen fönüen ekkewe chón Moab me ekkewe chón Amor. 14Iei popun pwe Ewe Pwuken Kewe Maun än ewe SAMOL a kapas usun pwe:
“Ewe telinimw Waheb lón ewe leeni Sufah me ekkewe likaüwööwün ewe chaanpwuupwu Arnon, 15me pwokuretiwen ekkewe likaüwööw mi chööütiw tori lerasen Ar mi nóm wón kiään Moab.”
16Iwe, ekkewe aramasen Israel ra mwöküt seni ikenan o ra sääiló ngeni Beer, iei ewe weel ia ewe SAMOL a apasa ngeni Moses me ie, “Kopwe emwiicha fengeni ekkewe aramas pwe Ngang üpwe ngeniir ünümer kólik.”
17Lón ena fansoun ekkewe chón Israel ra kölüw ei kööl me ikenan:
“En weel, kopwe pwuachchatä! Ämi meinisin öüpwe kölüw usun! 18Öüpwe kölüw usun ei weel ekkewe samol ra tuuw. Ekkewe souemmwen mi iteföüló ra tuuw. Ra tuuw ren wókuur wókun king me wókuur.”
Mwirin, ekkewe chón Israel ra feilló seni ewe fönüpöön o ra feilló ngeni Mattanah; 19seni Mattanah tori Nahaliel; seni Nahaliel tori Bamoth; 20iwe, seni Bamoth ra tori ewe lemóól lón ewe fönü Moab ia ewe chuuk Piskah a nóm ie, aramas ra tongeni nennetiw me ie wón ewe fönüpöön mi maasies.
King Sihon a kuf
21Mwirin, Israel a tiinaló ekkóch chón künö ren Sihon nöün ekkewe chón Amor we king o apasa,
22“Kopwe mwüüt ngeni keem pwe aipwe pwereló lón fönüwom. Äm aipwe chök pwereló wón än ewe King Alelap tori äm aipwe pwerewu seni kinikinin fönüwom. Äm aisap kul o tolong lón ekkewe tännipi ika ekkewe tännipin irän wain. Äm aisap pwal wün kólik seni óm kewe weel.”
23Nge King Sihon esap mwüüt ngeni ekkewe chón Israel pwe repwe pwereló lón fönüwan we. Nge Sihon a fen emwiicha fengeni nöün kewe mwiichen sounfiu meinisin o feilló pwe epwe maun ngeni Israel me lón ewe fönüpöön. Iwe, a feitto Jahaz o maun ngeni Israel. 24Nge ekkewe chón Israel ra niieló Sihon me ekkewe sounfiun Amor ren ketilas. Iwe, ra liäpeni fönüwer we, seni ewe chaanpwuupwu Arnon tori ewe chaanpwuupwu Jabbok. Nge ra chök ükütiw meren kiänin fönüwen ekkewe chón Ammon, pün tittin kiänin fönüwen ekkewe chón Ammon a pöchökkül. 25Israel a liäpeni meinisin än ekkewe chón Amor kewe telinimw o ra imweimw lóór, pwal pacholong ewe telinimw Heshbon me ekkewe sóóp meinisin mi nóm pwellin ünükkün. 26Pün Heshbon iei ewe telinimw än Sihon nöün chón Amor we king. King Sihon a okkufu emön minen lóómwun kingen Moab o a liäpenaló fönüwan meinisin tori ewe chaanpwuupwu Arnon.
27Iei minne, ekkewe re lóóm iir soukapas ra apasa:
“Öüpwe feitto Heshbon, öüpwe öüüetä; öüpwe försäfäli än Sihon we telinimw.
28“Ew ekkei a ngetewu seni Heshbon, och ngetengeten ekkei a ngetewu seni än Sihon we telinimw. A kenaló ewe telinimw Ar lón Moab, a arosaló samolun ekkewe chukuchukutä órun ewe chaanpwuupwu Arnon.
29“Feiengawemi, ämi ekkewe aramasen Moab. Öüwa määfeiengaw ämi ekkewe chón fel ngeni Kemosh. Kemosh a likitaló nöün kewe mwän pwe repwe chóisä, pwal nöün kewe fefin pwe repwe chón ooló ren Sihon nöün chón Amor we king.
30“Kich sia okkufur. Sia arosereló seni Heshbon tori Dibon. Sia unusen arosereló seni Nofah me Medeba.”
31Iei usun, ekkewe aramasen Israel ra nónnóm lón kinikinin fönüwen ekkewe chón Amor.
32Mwirin än Moses a tiinaló chón op pwe repwe sachei Jazer, ra liäpeni ekkewe wisópwósópwun Jazer meinisin o ösüüweló ekkewe chón Amor mi nóm ikenan.
King Ok a kuf
33Mwirin, ra kul o feittä wón ewe aal ngeni Bashan. Nge Ok ewe kingen Bashan me nöün kewe aramas meinisin ra maun ngeniir me lón Edrei.
34Iwe, ewe SAMOL a apasa ngeni Moses, “Kosap nuokkusiti Ok, pün ngang üwa fen atolonga i lepoum pwe kopwe okkufu, fiti nöün aramas meinisin me fönüwan. Iwe, kopwe föri ngeni i usun minne ka föri ngeni Sihon, nöün chón Amor we king mi nemenem lón Heshbon.”
35Iei minne, ekkewe chón Israel ra wiil o ra niieló King Ok me nöün kewe mwän pwal nöün kewe aramas meinisin tori an esap chüen wor emön lussun mi manaw. Iwe, ekkewe chón Israel ra fönüweni fönüwer we.
Balak a tiiti Balaam
22 Mwirin, ekkewe aramasen Israel ra möküt o ra sääi ngeni lón ewe maasiesin Moab. Iwe, ra öüüwetä imwer imw mangaku öötiwen ewe chaanpwuupwu Jordan äseengen Jeriko me epeek.
2Iwe, Balak nöün Zippor we mwän, nöün chón Moab we king, a silei meinisin meet ekkewe chón Israel ra föri ngeni ekkewe chón Amor. 3Lupwen Balak me nöün kewe aramas ra küna usun chómmóngun ekkewe chón Israel, iwe, ra fókkun nuokkus.
4Ina minne, ewe kingen Moab a apasa ngeni ekkewe souakkomwen Midian, “Ei mwichemóngngun aramas repwe arosaló mettóch meinisin mi nóm pwellin ünükküch, usun emön ätemwänin kowu a arosaló fetilin lemal.”
Iwe, Balak nöün Zippor we mwän i kingen Moab lón ei fansoun, 5a ökkünöweló ekkóch chón künö ren Balaam nöün Beor we mwän mi nónnóm lón poputän fönüwan we itan Pethor mi arap ngeni ewe Chaanpwuupwu Eufreitis. A tiinaló ei poraus pwe epwe tungórei Balaam epwe feitto o älisi i. Iei ewe poraus Balak a tiinaló ren Balaam:
“Nengeni, ew mwiichen aramas mi fókkun chómmóng ra wareto seni Egypt. Ra pwölüweló unusen wón ewe fönü nge iei ra feitto pwe repwe eniwokkusuei! 6Kose mochen kopwe mwittir feitto pwe kopwe önümamawa ei mwiichen aramas fänitei, pün iir ra koon pöchökül mwei. Iwe, eli ngang üpwe tongeni okkufur o ösüüreló seni ei fönü. Ngang üwa silei pwe iö en ka efeiöchüw, a feiöch; nge iö en ka önümamawa, a önümamaw.”
7Ina minne, nöün Balak kewe chón künö, iir ekkewe nöüwiisen Moab me Midian ra feilló nge ra mwineló ewe cheniipwen emön soupwe pwe repwe mööni Balaam pwe epwe önümamawa ekkewe chón Israel. Iwe, ra feilló ren Balaam o ra fókkun atapwanapwan le äwewe ngeni meet Balak a mochen.
8Iwe, Balaam a apasa ngeniir, “Öüpwe nómwóló ikeei lepwinei. Lesossor, ngang üpwe üreni kemi meet ewe SAMOL a äiti ngeniei pwe üpwe apasa.” Ina minne ekkewe nöüwiis seni Moab ra nómwóló ikenan ren Balaam.
9Lón ewe pwinin, Kot a feitto ren Balaam o eisini, “Iö ekkeei mwän ra nóm reemw?”
10Iwe, Balaam a apasa ngeni Kot, “Balak nöün Zippor we mwän ewe kingen Moab a tiinato reei ei poraus: 11‘Nengeni, ew mwiichen aramas mi fókkun chómmóng ra feitto seni Egypt o ra pwölüweló wón unusen ei fönü. Kopwe feitto iei chök pwe kopwe önümamawer. Iwe, eli ngang üpwe tongeni okkufur o ösüreló seni ei fönü.’ ”
12Iwe, Kot a apasa ngeni Balaam, “En kosap fitiir. Kosap önümamawa ekkeei aramas, pün ngang üwa efeiöchür.”
13Ina minne, Balaam a pwäätä lón ewe sossoran o a apasa ngeni nöün Balak kewe nöüwiis, “Öüpwe liwinsäfäliló ngeni fönüwemi, pün ewe SAMOL esap mochen pwe epwe mwüüt ngeniei äi üpwe fiti kemi.”
14Iwe, ekkewe nöüwiisen Moab ra liwinsäfäliló ren Balak o ra apasa ngeni, “Balaam esap mochen pwe epwe fitikeem.”
15Mwirin, Balak a pwal sótunisäfäli. Lón ei fansoun, a tiinaló ekkóch nöüwiis, nge ra koon chómmóng me iteföüló seni chókewe i a tiiniireló lón ewe äewin fansoun. 16Iwe, ra feilló ren Balaam o ra atoura ngeni i ei poraus:
“Iei meet Balak nöün Zippor we mwän a apasa: ‘Kose mochen kosap mwüüt ngeni och mettóch epwe eppeti senuk óm kopwe feitto reei. 17Pün ngang üpwe enletin föri ngenuk och angangen osuuföl mi fókkun lapalaap, üpwe pwal föri ese lifilifil meet en ka apasa ngeniei. Iei minne, kose mochen kopwe feitto, kopwe önümamawa ei mwiichen aramas fänitei.’ ”
18Nge Balaam a pölüweni o a apasa ngeni nöün Balak kewe chón künö, “Ika mwo Balak epwe ngeniei ew imwen king mi ur ren silifer me kolt, esap wor äi tüfich äi üpwe föri och mettóch epwe üüngeni letipen ewe SAMOL äi we Kot. 19Nge öüpwe nómwóló ikeei lón pwal ew chök pwiin pwe öüpwe küna are mi pwal wor och mettócch ewe SAMOL epwe apasa ngeniei.
20Iwe, Kot a feitto ren Balaam lón ewe pwinin o apasa ngeni i, “Pwokiten ekkeei mwän ra fen feitto fänitom, kopwe pwäätä o fitiireló. Nge kopwe förfichi pwe kopwe chök föri meet ngang üpwe ürenuk pwe kopwe föri.”
Balaam, ewe dongki me ewe chón läng
21Ina minne, Balaam a pwäätä lón ewe soran, a riietä leenien móótun wón nöün we dongki o a feilló fiti ekkewe nöüwiisen Moab. 22Nge Kot a fókkun soong pwokiten Balaam a feilló. Iwe, a tiinaló nöün we Chón Läng pwe epwe üütä lón ewe aal pwe epwe pineeló ewe aal. Iwe, lupwen Balaam me nöün kewe rüwömön chón angang ra sääiló wón nöüür kewe dongki, 23nöün Balaam we dongki a mwittir küna nöün ewe SAMOL we Chón Läng a üütä lón ewe aal fän nöün ketilas mi nóm lón pöün. Iwe, ewe dongki a mwetewu seni lón ewe aal o feilló lón ewe mälämäl. Nge Balaam a wichi ewe dongki o okullusäfälielong wón ewe aal.
24Mwirin, nöün ewe SAMOL we Chón Läng a üütä lón ew leeni ia ewe aal a chöökisiló me ie lefiilen ruu tittin tännipin irän wain. 25Iwe, lupwen ewe dongki a küna nöün ewe SAMOL we Chón Läng a üütä ikenan, a sótuni an epwe chök achachaaló lefiilen ekkewe tiit nge a apachcha pachapachen Balaam ngeni ewe tiit. Ina minne, Balaam a pwal wichisäfäli ewe dongki.
26Mwirin, nöün ewe SAMOL we Chón Läng a pwal akkomwoló mwan wón ewe aal o a üütä lón ew leeni mi fókkun chöökis, ia esap wor alen än emön epwe rik ngeni peliifich ika peliimöng. 27Lón ei fansoun, lupwen ewe dongki a küna nöün ewe SAMOL we Chón Läng, a kónnóló nge Balaam mi chök móót wón. Ina minne, Balaam a soong o a wichi ewe dongki ngeni wókun we. 28Mwirin, ewe SAMOL a föri pwe ewe dongki epwe kapas. Iwe, a eisini Balaam, “Meet ngang üwa föri ngenuk iei ka wichiei fän ülüngät?”
29Iwe, Balaam a chiwörüwör ngeni ewe dongki o apasa, “Pwokiten en ka föri pwe ngang üpwe usun emön mi umwes. Are mi wor efóch ketilas lepeii, ngang üpwe niikeló!”
30Iwe, ewe dongki a pölüweni o apasa ngeni Balaam, “Ifa usun, sap ngang noum we chök dongki en ka wakkawa seni chök ewe atun üwa wiliti noum tori ei rän? Ifa usun, ngang üwa fen piin föri ei sókkun ngenuk me mwan?”
Nge Balaam a apasa, “Apw.”
31Mwirin, ewe SAMOL a suuki mesen Balaam o a küna nöün ewe SAMOL we Chón Läng a üütä lón ewe aal fän nöün ketilas mi nóm lón pöün. Iwe, Balaam a rootiw o chappetiw leppwül me fän mesan.
32Iwe, nöün ewe SAMOL we Chón Läng a apasa ngeni Balaam, “Pwata ka wichi noum we dongki fän ülüngät? Nengeni, ngang üwa feitto pwe üpwe eppeti alom, pwokiten en ka üleförea le pölüweniei. 33Fän ülüngät ewe dongki a künäei o a kul seniei. Are ewe dongki esap kul seniei, enlet itä iei nge üwa fen niikeló, nge üpwe mwüüt ngeni ewe dongki pwe epwe manaw.”
34Iwe, Balaam a apasa ngeni nöün ewe SAMOL we Chón Läng, “Ngang üwa tipis, pün ngang üsap silei pwe en ka üütä lón ewe aal pwe kopwe eppeti alei. Ngang üpwe liwinsäfäl ngeni leeniei are en ka opwut äi üpwe feilló.”
35Nge nöün ewe SAMOL we Chón Läng a apasa ngeni Balaam, “Kopwe feilló fiti ekkewe mwän, nge kopwe chök tongeni apasa meet ngang üpwe ürenuk pwe kopwe apasa.” Ina minne, Balaam a fiti nöün Balak kewe nöüwiis.
36Iwe, lupwen King Balak a rong pwe Balaam a wareto, a feilló pwe epwe chuuri i me ren ew telinimwen Moab mi nóm wón kiään Arnon, iei kiään kinikinin fönüwan we. 37Iwe, Balak a eisini Balaam, “Ifa usun, ngang üsap tiinaló reemw ew kapasen akökkö mi atapwanapwan? Pwata kosap mwittir feitto? Ifa usun, kosap lüküei lupwen üwa apasa pwe üpwe äwättei liwinum?”
38Balaam a pölüweni o apasa ngeni Balak, “Nengeni, ngang üwa feitto reemw, nge esap wor äi manaman pwe üpwe chök pwisin filätä äi üpwe apasa och mettóch. Ngang üpwe apasa ekkewe chök poraus ewe Kot a ngeniei.”
39Mwirin, Balaam a fitaló Balak tori Kirjath Huzoth, 40ia ewe king a ääni asór ie ätemwänin kowu me siip. Iwe, a tiinaló ekkóch kinikinin ekkewe fituk ren Balaam me ekkewe nöüwiis mi nóm ren.
Äewin än Balaam kapasen oosuni
41Iwe, lón ewe sorotään, Balak a etto angei Balaam o emmwenätä ngeni Bamoth Baal. Me ikenan, Balaam a tongeni küna ekkewe aramasen Israel ra meresiresiló me peekitiwan.
23Mwirin, Balaam a apasa ngeni King Balak, “Kopwe senätä ikeei fisu róngen asór fänitei o amollätä ikeei füümön ätemwänin kowu me füümön ätemwänin siip fäniten ew asór.” 2Iwe, Balak a föri usun minne Balaam a apasa. Iwe, Balak me Balaam ra ääni asór emön ätemwänin kowu me emön ätemwäni siip wón ew me ew róngen asór.
3Mwirin, Balaam a apasa ngeni Balak, “Kopwe üütä ikeei ren óm we asóren keek, nge ngang üpwe feilló ekis. Eli ewe SAMOL epwe feitto pwe epwe chuuriei. Iwe, ese lifilifil ika meet i epwe pwääri ngeniei, ngang üpwe aporausa ngenuk.” Ina minne, Balaam a feilló ngeni ew chukuchukutä mi pöön nge i chök.
4Iwe, Kot a chuuri Balaam me ikenan. Nge Balaam a apasa ngeni Kot, “Ngang üwa fen amollätä fisu róngen asór o üwa fen ääni asór emön ätemwänin kowu me emön ätemwänin siip wón ew me ew róngen asór.”
5Mwirin, ewe SAMOL a atolonga ew kapas lón awen Balaam o apasa, “Kopwe liwinsäfäliló ren Balak o üreni meet ngang üwa ürenuk.”
6Iwe, lupwen Balaam a liwinsäfäliló ren Balak, nge ina Balak mi chök chüen üütä ren an kewe asóren keek fiti ekkewe nöüwiisen Moab meinisin. 7Iwe, Balaam a chietä an kapasen oosuni o apasa:
“Balak a tiiti ngang pwe üpwe feitto seni Aram, ewe kingen Moab a emmwenieito seni ekkewe chukuchukutän öötiw. A apasa, ‘Kopwe feitto o önümamawa Jakob fänitei, kopwe feitto o apasa kapasen esilesil usun feiengawen Israel!’
8“Nge epwe ifa usun äi üpwe önümamawa chókana Kot esap önümamawer? Epwe ifa usun äi üpwe ettipisi chókana ewe SAMOL esap ettipisir?
9“Pün ngang üwa küna ekkewe chón Israel seni wón ungen ekkewe chuuk achaw, üwa attoler seni wón ungen ekkewe chukuchukutä mi mwotowtow. Iwe, ngang üwa küna ew mwiichen aramas mi chök imwuuló lón leenian, mi käimwüló seni chón ekkewe ekkóch mwüü.
10“Iö a tongeni epwe älleani ekkewe mwirimwirin Jakob iir ra fókkun chómmóng usun chök piipi süüsü? Iö a tongeni älleani ew na rüwänüwen ekkewe aramasen Israel? Mwüüt ngeniei üpwe mäló usun emön chón pwüng. Amwo sópwólón manawei epwe usun sópwólón manawer.”
11Mwirin, King Balak a apasa ngeni Balaam, “Meet ka föri ngeniei? Ngang üwa angeuk pwe kopwe önümamawa chókewe üwa opwut iir, nge nengeni, en ka fen efeiöchür!”
12Nge Balaam a pölüweni o apasa, “Ifa usun, ngang üsap tümwünüfichi äi üpwe apasa meet ewe SAMOL a üreniei?”
Oruuwen än Balaam kapasen oosuni
13Mwirin, King Balak a apasa ngeni Balaam, “Kose mochen kopwe feitto fitiei ngeni pwal ew leeni ia en kopwe tongeni küneer seni ie. Pün me ikenan ina kopwe chök küna och chök kinikinin ewe mwiichen chón Israel, nge kosap küna unuser meinisin. Iwe, kopwe önümamawa ena üküükün fänitei seni ikenan.” 14Ina minne, Balak a emmwenaló Balaam ngeni wón ewe achaw Zofim mi chööpöp wón ungen ewe chuuk Piskah. Iwe, a senätä fisu róngen asór ikenan o a ääni asór emön ätemwänin kowu me emön ätemwänin siip wón ew me ew róngen asór.
15Mwirin, Balaam a apasa ngeni Balak, “Kopwe üütä ikeei ren óm we asóren keek, nge ngang üpwe feilló chuuri ewe SAMOL ikenan.”
16Iwe, ewe SAMOL a chuuri Balaam o ngeni i ew poraus. Mwirin, a apasa, “Kopwe liwinsäfäliló ren Balak o ngeni i ei poraus.”
17Ina minne, Balaam a liwinsäfäliló ren ewe leeni ia King Balak me ekkewe nöüwiisen Moab ra üütä ie, lükün än Balak we asóren keek. Iwe, Balak a eisini, “Meet ewe SAMOL a apasa?”
18Iwe, iei ewe kapasen oosuni Balaam a chietä le apasa:
“Kopwe üütä Balak o öüseling! Kopwe rongorong ngeniei en nöün Zippor mwän!
19“Kot sap emön aramas pwe i epwe chofona, sap pwal i emön nöün aramas pwe epwe siwili än ekiek. Ifa usun, lupwen a apasa och, nge esap föri? Ifa usun, lupwen a ääni ew pwon, nge esap öpwönüwetä?
20“Nengeni, ngang üwa angei ew öllük pwe üpwe ääni kapasen efeiöch. I a efeiöchüür; iwe, ngang üsap tongeni üpwe sorei.
21“I esap küna och pwuupwungaw lón Jakob, esap pwal küna och föfföringaw lón Israel. Pün ewe SAMOL ar we Kot a nóm rer. Iir ra arongafeili usun ar we king.
22“Kot a emmweniirewu seni Egypt. I a usun emön ätemwänin kowu mi pöchökkül fäniter.
23“Esap wor och pöüt epwe efeiengawa Jakob, esap pwal wor manamanen och roong epwe efeiengawa Israel. Seni iei, aramas repwe apasa fäniten Jakob, ‘Mwa meet ren ekkewe föfför mi amwaraar Kot a föri fäniten Israel!’
24“Nengeni ekkeei aramas ra pwäätä usun emön liäfefinin laion, ra üütä usun emön laion. Resap mochen asöösö tori ar repwe oromaló liaper o repwe ünümi chaan minne ra niieló.”
25Mwirin, Balak a apasa ngeni Balaam, “Are kosap önümamawer; iwe, kosap pwal efeiöchüür.”
26Nge Balaam a pölüweni o apasa ngeni Balak, “Ifa usun, üsap ürenuk pwe ngang üpwe föri meinisin meet ewe SAMOL a üreniei?”
Öülüngätin än Balaam kapasen oosuni
27Mwirin, King Balak a apasa ngeni Balaam, “Kose mochen feitto, ngang üpwe uweekeló ngeni pwal ew leeni. Eli Kot epwe efich óm kopwe önümamawer fänitei seni ikenan.” 28Ina minne, Balak a emmwenätä Balaam wón ungen ewe chuuk Peor, ia ra tongeni nennetiwei ewe fönüpöön mi maasies me ie.
29Mwirin, Balaam a apasa ngeni Balak, “Kopwe senätä ikeei fisu róngen asór fänitei o amollätä fänitei füümön ätemwänin kowu me füümön ätemwänin siip.” 30Iei minne, Balak a föri usun meet Balaam a apasa, o a ääni asór emön ätemwänin kowu me emön ätemwänin siip wón iteiten ew me ew róngen asór.
24 Iwe, lón ei ótun, Balaam a meefi pwe iei mochenin ewe SAMOL pwe epwe efeiöchüw Israel, iei minne esap kütta an älillis seni angangen roong usun meet i a soun föri lón ekkewe ekkóch fansoun me mwan. Nge a chök kul o newenewen ngeni ewe fönüpöön, 2o a küna ekkewe aramasen Israel lón ewe leeni ia ra köüütä imwer imw mangaku ie lón kinikinin ew me ew ar kewe einang. Iwe, ewe Ngünün Kot a feitto wón Balaam. 3Iwe, iei ewe kapasen oosuni i a chietä le apasa:
“Iei ewe kapasen oosuni än Balaam nöün Beor we mwän. Iei ewe kapasen oosuni än ewe mwän mi fatafatöch minne mesan ra küna,
4“mi rongorong än Kot kewe kapas, mi küna künäan seni ewe mi Unusen Manaman, mi chappetiw leppwül, nge mesan kana mi nenneló.
5“A ifa me lingeöchchün imwom kewe imw mangaku, en Jakob! A ifa me lingeöchchün leeniom kewe, en Israel!
6“Ra meresiló me mwen mesei usun chök ekkewe irä usun nüü iter palm, usun ekkewe atake mi ling ünükkün ewe chaanpwuupwu. Ra usun chök ekkewe irä iter alos fótukien ewe SAMOL, ra usun chök ekkewe irä iter sedar ünükkün ekkewe kólik.
7“Kólik epwe säsewu, epwe wor chómmóng kólik fäniten fótaar kewe föün irä pwe repwe määr. Ar we king epwe lapalaap seni Akak, pwal mwüür epwe tekia.
8“Kot a emmwenirewu seni Egypt. A etekiniiretä usun emön ätemwänin kowu mi mwacho. I epwe arosaló chón ekkewe mwüü meinisin mi üüngeni i. I epwe kupii chüür o pekki ngeniir nöün kewe föün esefich.
9“Israel a öüpwäsukutiw o kónnóló usun emön laion. I a usun emön liäfefinin laion lupwen a kónnóló, nge iö epwe ökkölümwün äpwäätäi?
A feiöch iö mi efeiöchuk en Israel, nge a önümamaw iö a önümamawók.”
10Iwe, King Balak a fókkun lingeringeriti Balaam. Balak a episi fengeni pöün o apasa ngeni Balaam, “Ngang üwa kööruk pwe kopwe önümamawa chókewe üwa opwut iir, nge nengeni, en ka fen efeiöchüür fän ülüngät! 11Iei kopwe süüló ngeni leeniom. Ngang üwa ekieki pwe üpwe liwini ngenuk ew liiwin mi fókkun wätte, nge ewe SAMOL a eppetuk seni liwinum.”
12Iwe, Balaam a üreni Balak, “Ifa usun, kosap chechchemeni meet ngang üwa üreni noum kewe chón künö en ka tiinireto reei? Ngang üwa apasa ngeniir, 13‘Ika mwo Balak epwe ngeniei ew imwen king mi ur ren silifer me kolt, esap wor äi manaman pwe üpwe föri och mettóch epwe üüngeni tipen ewe SAMOL.’ Ngang üwa fen ürenuk pwe ngang üpwe tongeni apasa meet chök ewe SAMOL a apasa! 14Iwe iei, nengeni ngang üpwe le liwinsäfäliló ren pwisin äi kewe aramas. Nge akkomwan, kopwe mwüüt ngeniei pwe üpwe ürenuk meet ekkewe chón Israel repwe föri ngeni noum aramas lón ekkan rän repwe feitto.”
Örüwänuen än Balaam kapasen oosuni
15Iwe, iei ewe kapasen oosuni Balaam a chietä le apasa:
“Iei ewe poraus än Balaam nöün Beor we mwän, ewe kapasen oosuni än ewe mwän mi fatafatöch minne mesan ra küna,
16“mi rongorong än Kot kewe kapas, mi wor an silelap meren ewe mi Unusen Tekia, mi wor ew künäan seni ewe mi Unusen Manaman, mi chappetiw leppwül nge mesan mi nenneló.
17“Ngang üwa küna ätewe, nge esap iei lón ei fansoun. Ngang üwa nennengeni ätewe, nge toowaweló lón ekkewe fansoun repwe feitto. Eföw Füü epwe töötä seni Jakob, efóch wókun Samol epwe pwäätä seni Israel. Epwe apachcha eten mesen nöün Moab kewe aramas, epwe pwal ömökkü pöören möküren ekkewe aramasen Sheth.
18“Iwe, epwe fönüweni Edom, epwe pwal fönüweni fönüwen ekkewe chón Seir, iir ekkewe chón opwut i. Nge Israel epwe chök sópwósópwóló le wiil.
19“Epwe wor emön Souemmwen mi fö epwe feitto seni ewe familien Jakob epwe arosaló ekkewe lussun aramas mi chüen manaw me lón ewe telinimw.”
20Mwirin, Balaam a nenneló wón ekkewe aramasen Amalek; iwe, a chietä an kapasen oosuni o apasa:
“Amalek a lapalaap me leiin ekkewe mwüü, nge lesópwólón i epwe tolong lón taatakkis.”
21Mwirin i a nenneló wón ekkewe chón Ken; iwe, a chietä an kapasen oosuni o apasa:
“Ämi öüwa imweim lón ew leeni mi pöchökkül. Ewe leeni ia öüwa fas ie a nóm lón ewe achaw. 22“Iwe, inamwo nge ämi ekkewe chón Ken öüpwe chök rosoló lupwen Assyria epwe feitto o uweekemiiló pwe öüpwe chón ooló?”
23Iwe, Balaam a asópwaló an kapasen oosuni o apasa:
“Feiengawei! Iö epwe tongeni manaw lupwen Kot epwe föri ei? 24Ekkewe siip repwe feitto seni arossetin Saipros. Repwe okkufu Assyria me Eber, iwe, pwal iir repwe unusen taaló.”
25Mwirin, Balaam a üütä o liwinsäfäl ngeni leenian. Iwe, pwal Balak a feilló wón alan.
Än Israel föfförün lisowu me lón Moab
25 Iwe, lupwen ekkewe chón Israel ra köüütä imwer imw mangaku lón Shittim, ekkóch leiin ekkewe mwän ra elimengawer ren ar lisowu ngeni ekkewe fiin Moab. 2Ekkewe fiin Moab ra kööri ekkewe mwän pwe repwe fitiir le asór ngeni ar kewe kot. Iwe, ekkewe re Israel ra fitir le mwöngö seni ekkewe asór o fel ngeni ekkewe koten Moab. 3Ese mang mwo nge Israel a pacholong lón ewe angangen fel ngeni Baal seni Peor. Iwe, iei meet a popuw än ewe SAMOL soong epwe ngeteri nöün kewe aramasen Israel.
4Mwirin, ewe SAMOL a atoowu ei öllük ngeni Moses: “Kopwe turufi ekkewe chón emmweningawa ekkewe aramas o niireló. Kopwe emeitiwer lükün fän akkar me fän mesei ngang ewe SAMOL pwe pöchökkülen äi soong epwe kul seni ekkewe aramasen Israel.”
5Ina minne, Moses a öllük ngeni ekkewe souköpwüngün Israel pwe repwe niieló chókewe seni en me an einang mi pacholong lón ewe angangen fel ngeni Baal seni Peor.
6Nge lón ewe chök ótun, emön me leiin ekkewe re Israel a mwineto emön fiin Midian lón ewe leeni ia ra köüütä imwer imw mangaku ie, fän mesen Moses me ekkewe aramasen Israel meinisin lupwen ra kechiw leasamen ewe Imw Mangaku Leenien Chufengen. 7Iwe, lupwen Finehas nöün Eleazar we mwän, nge Eleazar nöün ewe souasór Aaron mwän, a küna ei; iwe, a üütä o toowu seni leiin ewe mwiichen aramas. Iwe, a angei efóch siles, 8o mwittir tapweló mwirin ewe re Israel lón imwan we imw mangaku. Iwe, Finehas a posuu fengeni ewe mwän me ewe fefin ngeni ewe siles. Iwe, ewe siles a pwerenätiw ewe re Israel o pwereni luuken ewe fefin. Iei usun, ewe määlap a ükütiw seni leiin ekkewe aramasen Israel. 9Nge chókewe ra fen mäló lón ewe määlap üküükür rüwe me rüwänü ngöröw.
10Mwirin, ewe SAMOL a apasa ngeni Moses, 11“Finehas nöün Eleazar we mwän, nge Eleazar nöün ewe souasór Aaron mwän, a okullu äi soong seni ekkewe aramasen Israel ren an pwääraló an achoocho fäniten iteüöchi me leiir. Ina minne, ngang üwa ükütiw äi üpwe arosaló ekkewe aramasen Israel meinisin, usun minne ngang üwa ekiekin föri lón äi soong. 12Iei minne, kopwe apasa ngeni Finehas pwe ngang üwa föri ew pwonen kinamwe ngeni i. 13Lón ei pwon, i me mwirimwirin kana repwe wiiseni ewe wiisen souasór iteiten fansoun meinisin, pwokiten i a achoocho fäniten iteüöchi ngang an we Kot o a föri asóren omwusomwusen tipis fäniten ekkewe aramasen Israel.”
14Iwe, iten ewe re Israel mi ninniiló fiti ewe fiin Moab, itan Zimri nöün Salu we mwän, i emön söüemmwenin ew famili seni ewe einangen Simeon. 15Nge iten ewe fiin Moab mi ninniiló, itan Kozbi nöün Zur we fefin. Zur i souemmwenin ew än ekkewe chón Midian eterenges.
16Mwirin, ewe SAMOL a apasa ngeni Moses, 17“Öüpwe maun ngeni ekkewe chón Midian o niireló, 18pwokiten iir ra maun ngeni kemi ren ar rawangaw lupwen ra otupwu kemi pwe öüpwe fel ngeni Baal seni Peor pwal pwokiten meet mi fis ren Kozbi, emön fefin nöün emön souemmwenin chón Midian mi ninniiló lón ewe rän a fis ewe määlap lón Peor.”
Ewe oruuwen fansoun ällean iteiten chón Israel
26 Iwe, mwirin än ewe määlap a ükütiw, ewe SAMOL a apasa ngeni Moses me Eleazar nöün Aaron we mwän, ewe souasór, 2“Öüpwe älleani iteiten ekkewe re Israel meinisin, ekkewe ra ier rüwe ika lap seni lón än semer kewe famili, pwe öüpwe kütta ika fitemön seni ew me ew famili ra tori ierin ar repwe sounfiu me lón Israel.” 3Lón ena fansoun, unusen ewe mwiichen aramasen Israel ra öüüwetä imwer imw mangaku lón ewe maasiesin Moab arun ewe chaanpwuupwu Jordan äwenewenen Jeriko me epeek. Iwe, Moses me Eleazar ewe souasór ra atoowu ekkeei kapasen öüröür ngeni ekkewe souemmwenin Israel fäniten ewe angangen ällean iteit. Ra apasa: 4“Öüpwe älleani iteiten ekkewe re Israel meinisin ra tori ier rüwe feittä, usun minne ewe SAMOL a öllük ngeni Moses.”
Iwe, iei iteiten mwirimwirin ekkewe aramasen Israel meinisin mi toowu seni ewe fönü Egypt:
Ewe einangen Reuben
5A wor ekkewe mwän seni eterengesin mwirimwirin Reuben, nöün Israel we mwännichi:
A wor seni mwirimwirin Hanok iir chón ewe eterengesin Hanok.
A wor seni mwirimwirin Pallu iir chón ewe eterengesin Pallu.
6A wor seni mwirimwirin Hezron iir chón ewe eterengesin Hezron.
A wor seni mwirimwirin Karmi iir chón ewe eterengesin Karmi.
7Iteiten ekkewe mwän seni ekkewe eterengesin Reuben meinisin mi ällea me leiir, fääik me ülüngät ngöröw füüpwükü iliik.
8Pallu i än Eliab leewo, 9nge Eliab i semen Nemuel me Dathan me Abiram. Ätekeei Dathan me Abiram, iir ekkewe souemmwenin mwiichen aramas mi fiti Korah le rawangawei Moses me Aaron lupwen ra üüngeni ewe SAMOL. 10Nge ewe pwül a saangfesen o oromiireló fiti fengen me Korah. Iwe, a wor üküükün rüwöpwükü lime me leiin ekkewe aramas mi tapweló mwiriir ra rosoló lón ena rän ren ekkei seni ewe SAMOL. Iwe, ei a fis pwe och minen fön fäniten feiengaw ngeni unusen ewe mwiichen aramasen Israel. 11Nge nöün Korah kewe mwän resap mäló lón ena rän.
Ewe einangen Simeon
12A wor ekkewe mwän seni ekkewe eterengesin mwirimwirin nöün Simeon kewe mwän:
A wor seni mwirimwirin Nemuel iir chón ewe eterengesin Nemuel.
A wor seni mwirimwirin Jamin iir chón ewe eterengesin Jamin.
A wor seni mwirimwirin Jachin iir chón ewe eterengesin Jachin.
13A wor seni mwirimwirin Zerah iir chón ewe eterengesin Zerah.
A wor mwirimwirin Shaul iir chón ewe eterengesin Shaul.
14Iteiten ekkewe mwän seni ekkewe eterengesin Simeon meinisin mi ällea me leiir, rüwe me ruu ngöröw rüwö pwükü.
Ewe einangen Kad
15Iwe, a wor ekkewe mwän seni ekkewe eterengesin mwirimwirin nöün Kad kewe mwän.
A wor mwirimwirin Zefon iir chón ewe eterengesin Zefon.
A wor mwirimwirin Hakki iir chón ewe eterengesin Hakki.
A wor mwirimwirin Shuni iir chón ewe eterengesin Shuni.
16A wor seni mwirimwirin Ozni iir chón ewe eterengesin Ozni.
A wor mwirimwirin Eri iir chón ewe eterengesin Eri.
17A wor seni mwirimwirin Arod iir chón ewe eterengesin Arod.
A wor seni mwirimwirin Areli iir chón ewe eterengesin Areli.
18Iwe, iteiten ekkewe mwän seni ekkewe eterengesin Kad meinisin mi ällea me leiir, fääik ngöröw limöpwükü.
Ewe einangen Judah
19Mi wor rüwömön nöün Judah mwän iter Er me Onan. Nge Er me Onan ra mäló me lón ewe fönü Kanaan.
20Nge ekkewe eterenges mi tettelitiw fän seni eterengesin nöün Judah kewe mwän mi chüen manaw:
A wor seni mwirimwirin Shelah iir chón ewe eterengesin Shelah.
A wor seni mwirimwirin Perez iir chón ewe eterengesin Perez.
A wor seni mwirimwirin Zerah iir chón ewe eterengesin Zerah.
21Iwe, a wor ekkewe mwän seni ekkewe eterenges mi feitto seni mwirimwirin Perez:
A wor seni ekkewe mwirimwirin Hezron iir chón ewe eterengesin Hezron.
A wor seni ekkewe mwirimwirin Hamul iir chón ewe eterengesin Hamul.
22Iwe, iteiten ekkewe mwän seni chón ekkewe eterengesin Judah meinisin mi ällea me leiir, fiik me wonu ngöröw limöpwükü.
Ewe einangen Issakar
23Iwe, a wor ekkewe mwän seni eterengesin mwirimwirin nöün Issakar kewe mwän:
A wor seni ekkewe mwirimwirin Tola iir chón ewe eterengesin Tola.
A wor seni ekkewe mwirimwirin Pun iir chón ewe eterengesin Pun.
24A wor seni ekkewe mwirimwirin Jashub iir chón ewe eterengesin Jashub.
A wor seni ekkewe mwirimwirin Shimron iir chón ewe eterengesin Shimron.
25Iteiten ekkewe mwän seni ekkewe eterengesin Issakar meinisin mi ällea me leiir, wone me rüwänü ngöröw ülüpwükü.
Ewe einangen Zebulun
26Iwe, a wor ekkewe mwän seni ekkewe eterengesin mwirimwirin nöün Zebulun kewe mwän:
A wor seni ekkewe mwirimwirin Sered iir chón ewe eterengesin Sered.
A wor seni ekkewe mwirimwirin Elon iir chón ewe eterengesin Elon.
A wor seni ekkewe mwirimwirin Jahleel iir chón ewe eterengesin Jahleel.
27Iwe, iteiten ekkewe mwän seni chón ekkewe eterengesin Zebulon meinisin mi ällea me leiir, wone ngöröw limöpwükü.
Ewe einangen Manassah
28Mi wor ruu eterenges seni mwirimwirin nöün Josef kewe mwän, seni mwirimwirin Manassah me Efraim.
29A wor ekkewe mwän seni ekkewe eterenges mi feitto seni mwirimwirin Manassah:
A wor seni ekkewe mwirimwirin Makir iir chón ewe eterengesin Makir, nge Makir a nöünätiw Kilead.
Iwe, a wor seni ekkewe mwirimwirin Kilead iir chón ewe eterengesin Kilead.
30Iwe, a wor ekkewe mwän seni mwirimwirin nöün Kilead kewe mwän:
A wor seni ekkewe mwirimwirin Jezer iir chón ewe eterengesin Jezer.
A wor seni ekkewe mwirimwirin Helek iir chón ewe eterengesin Helek.
31A wor seni ekkewe mwirimwirin Asriel iir chón ewe eterengesin Asriel.
A wor seni ekkewe mwirimwirin Shekem iir chón ewe eterengesin Shekem.
32A wor seni ekkewe mwirimwirin Shemida iir chón ewe eterengesin Shemida.
A wor ekkewe mwirimwirin Hefer iir chón ewe eterengesin Hefer.
33Iwe, Zelofehad nöün Hefer we mwän esap wor nöün mwän, nge a chök wor nöün fefin. Iwe, ikkeei iten nöün Zelofehad kewe fefin: Mahlah, Noah, Hoklah, Milkah, me Tirzah.
34Iwe, iteiten ekkewe mwän seni ekkewe eterengesin Manassah meinisin mi ällea me leiir, lime me ruu ngöröw füüpwükü.
Ewe einangen Efraim
35Iwe, a wor ekkewe mwän seni ekkewe eterengesin mwirimwirin nöün Efraim kewe mwän:
A wor seni ekkewe mwirimwirin Shuthelah iir chón ewe eterengesin Shuthelah.
A wor seni ekkewe mwirimwirin Beker iir chón ewe eterengesin Beker.
A wor seni ekkewe mwirimwirin Tahan iir chón ewe eterengesin Tahan.
36Iwe, a wor ekkewe mwän seni mwirimwirin ewe eterengesin Shuthelah:
A wor seni ekkewe mwirimwirin Eran iir chón ewe eterengesin Eran.
37Iteiten ekkewe mwän seni ekkewe eterengesin Efraim meinisin mi ällea me leiir, iliik me ruu ngöröw limöpwükü.
Chón ekkeei eterengesin Manassah me Efraim iir meinisin mwirimwirin Josef.
Ewe einangen Benjamin
38A wor ekkewe mwän seni ekkewe eterengesin mwirimwirin nöün Benjamin kewe mwän:
A wor seni ekkewe mwirimwirin Bela iir chón ewe eterengesin Bela.
A wor seni ekkewe mwirimwirin Ashbel iir chón ewe eterengesin Ashbel.
A wor seni ekkewe mwirimwirin Ahiram iir chón ewe eterengesin Ahiram.
39A wor seni ekkewe mwirimwirin Shufam iir chón ewe eterengesin Shufam.
A wor seni ekkewe mwirimwirin Hufam iir chón ewe eterengesin Hufam.
40Iwe, a wor ekkewe mwän mi feitto seni chón ewe eterengesin Bela.
A wor seni ekkewe mwirimwirin Ard iir chón ewe eterengesin Ard.
A wor seni ekkewe mwirimwirin Naaman iir chón ewe eterengesin Namaan.
41Iwe, iteiten ekkewe mwän seni ekkewe eterengesin Benjamin meinisin mi ällea me leiir, fääik me limu ngöröw wonopwükü.
Ewe einangen Dan
42Iwe, a wor ekkewe mwän seni ekkewe eterengesin mwirimwirin nöün Dan kewe mwän:
A wor seni ekkewe mwirimwirin Shuham iir chón ewe eterengesin Shuham.
43Meinisin ekkewe mwän seni ekkewe eterengesin Dan iir chón ekkewe eterengesin Shuham. Iteiten ekkewe mwän meinisin seni ekkeei eterenges mi ällea me leiir, wone me rüwänü ngöröw föpwükü.
Ewe einangen Asher
44Iwe, a wor ekkewe mwän seni ekkewe eterengesin mwirimwirin nöün Asher kewe mwän:
A wor seni ekkewe mwirimwirin Imnah iir chón ewe eterengesin Imnah.
A wor seni ekkewe mwirimwirin Ishvi iir chón ewe eterengesin Ishvi.
A wor seni ekkewe mwirimwirin Beriah iir chón ewe eterengesin Beriah.
45Iwe, a wor ekkewe mwän mi feitto seni mwirimwirin nöün Beriah kewe mwän:
A wor seni ekkewe mwirimwirin Heber iir chón ewe eterengesin Heber.
A wor seni ekkewe mwirimwirin Malkiel iir chón ewe eterengesin Malkiel.
46Mi pwal wor emön nöün Asher fefin itan Serah. 47Iwe, iteiten ekkewe mwän seni ekkewe eterengesin Asher meinisin mi ällea me leiir, lime me ülüngät ngöröw föpwükü.
Ewe einangen Naftali
48Iwe, a wor ekkewe mwän seni ekkewe eterengesin mwirimwirin nöün Naftali kewe mwän:
A wor seni ekkewe mwirimwirin Jahzeel iir chón ewe eterengesin Jahzeel.
A wor seni ekkewe mwirimwirin Kuni iir chón ewe eterengesin Kuni.
49A wor seni ekkewe mwirimwirin Jezer iir chón ewe eterengesin Jezer.
A wor seni ekkewe mwirimwirin Shillem iir chón ewe eterengesin Shillem.
50Iteiten ekkewe mwän seni ekkewe eterengesin Naftali meinisin mi ällea me leiir, fääik me limu ngöröw föpwükü.
51Iwe, üküükün unuselapen iteiten ekkewe re Israel mi ällea me leiin ekkewe aramasen Israel, wonopwükü ew ngöröw füüpwükü iliik.
52Mwirin, ewe SAMOL a apasa ngeni Moses, 53“Kopwe ineti ewe fönü wón ekkewe einang pwe fönüweer epwe öüküük wón üküükün chóóchón ew me ew einang, usun mi pwä lón ewe ällean iteit. 54Kopwe ngeni ekkewe einang mi wätte pwe repwe fönüweni fönü mi wätte, nge kopwe ngeni ekkewe einang mi kükkün pwe repwe fönüweni fönü mi kükkün. Kopwe ngeni ew me ew einang fönüwan alóngólóng wón iteiten chóóchón chókewe mi ällea me leiir. 55Nge kopwe förfichi pwe kopwe eineti ewe fönü fän pwüngün ütüüt. Kopwe affata kinikinin inetin ew me ew einang seni pwüngün tettelin ewe ällean iteit. 56Epwe einet ngeni ew me ew einang fönüwan wón pwüngün ütüüt lefiilen ekkewe einang mi wätte me ekkewe mi kükkün.”
57Iwe, ra pwal älleani chón ewe einangen Levi. Iwe, ikkeei ekkewe eterengesin ewe einangen Levi:
Ekkewe mwirimwirin Kershon iir chón ewe eterengesin Kershon;
ekkewe mwirimwirin Kohat iir chón ewe eterengesin Kohat;
ekkewe mwirimwirin Merari iir chón ewe eterengesin Merari.
58Iwe, pwal ikkeei ekkóch eterengesin ewe einangen Levi:
Ewe eterengesin Libni,
ewe eterengesin Hebron,
ewe eterengesin Mahli,
ewe eterengesin Mushi,
me ewe eterengesin Korah.
Amram i seni ewe eterengesin Kohat
59Iten pwülüwen Amram we, Jokebed. Neminnei pwal i emön seni ewe einangen Levi. Neminnei a upwutiw me lón Egypt. A wor rüwömön nöün Amram me Jokebed mwän iter Aaron me Moses. A pwal wor emön nöüür fefin itan Miriam. 60Aaron i semen Nadab, Abihu, Eleazar me Ithamar. 61Nge Nadab me Abihu ra mäló lupwen ra ääni asór me fän mesen ewe SAMOL och ekkei esap pin.
62Iwe, iteiten ekkewe mwän seni ekkewe eterengesin Levi seni ew maram feittä, rüwe me ülüngät ngöröw. Nge ekkewe mwän seni ewe einangen Levi resap pacholong lón iteitein ewe ällean iteiten aramasen Israel, pwokiten esap wor inetir fönü lupwen ewe fönü a inet wón ekkewe aramasen Israel.
63Moses me ewe souasór Eleazar ra älleani ekkewe aramasen Israel meinisin. Ra älleanir lupwen ra nóm lón ewe lemólun Jordan lón Moab. Ei leeni a arap ngeni ewe chaanpwuupwu Jordan äwenewenen Jeriko me epeek. 64Chómmóng ier me mwan, Moses me ewe souasór Aaron ra älleani iteiten ekkewe chón Israel me lón ewe fönüapöön Sinai. Nge ekkeei aramas meinisin ra mäló. Esap wor emön me leiir a chüen manaw. 65Pün iei meet ewe SAMOL a üreniir pwe iir meinisin repwe fókkun mäló lón ewe fönüpöön. Ina minne, esap wor emön me leiir a chüen manaw, chiilón chök Kaleb nöün Jefunne we mwän me Joshua nöün Nun we mwän.
Öllükün föffönü fönü
27Lón ew ränin, ew tungór a katolong seni nöün Zelofehad kewe fefin iter Mahlah, Noah, Hoklah, Milkah me Tirzah. Semer we Zelofehad i nöün Hefer mwän, nge Hefer i nöün Kilead mwän, nge Kilead i nöün Makir mwän, nge Makir i nöün Manassah mwän seni ekkewe eterengesin Manassah, nge Manassah i nöün Josef mwän. 2Ekkeei fefin ra feilló o üütä fän mesen Moses me ewe souasór Eleazar me ekkewe souemwenin einang me ewe mwiichen aramas meinisin leasamen ewe Imw Managku Leenien chufenegn. Iwe, ra apasa, 3“Semem we a mäló me lón ewe fönüpöön nge esap wor nöün mwän. Sap i emön leiin chókewe mi tapweló mwirin Korah pwe repwe üüngeni ewe SAMOL. I a mäló pwokiten pwisin an tipis. 4Pwata iten semem we a töttölüwu seni leiin chón an famili pwokiten chök an esap wor nöün mwän? Öüpwe ngeni keem inetiim fönü me leiin fönüwen määrärim kewe.”
5Ina minne, Moses a uweato ar ei tungór fän mesen ewe SAMOL. 6Iwe, ewe SAMOL a pölüweni o apasa ngeni Moses, 7“Nöün Zelofehad kewe fefin ra apasa meet mi pwüng. Kopwe fókkun ngeniir ew inetiir fönü pwe fönüwer seni leiin fönüwen määrärir kewe. Kopwe ewiisa ngeniir ewe fönü fönüwen semer we.
8“Iwe pwal och, en kopwe esile ngeni ekkewe aramasen Israel ei poraus, ‘Are emön mwän a mäló nge esap wor nöün mwän; mwirin, öüpwe ngeni nöün kewe fefin inetin semer we fönü. 9Nge are esap wor nöün fefin; mwirin, öüpwe ngeni pwiin kana fönüwan. 10Nge are esap wor pwiin; mwirin öüpwe fangaló fönüwan ngeni pwiin saman kewe. 11Nge ika esap wor pwiin saman we; mwirin, öüpwe fangaló fönüwan we ngeni määrärin mi koon kkan ngeni me lón an eterenges. Iwe, ätewe epwe fönüweni ewe fönü. Ekkewe chón Israel repwe tümwünü ei pwe epwe ew pwüüng me ew öllük, usun chök minne ngang ewe SAMOL a öllük ngenuk Moses.’ ”
Joshua a tapw mwirin Moses le chón emmweni Israel
12Lón ew ränin, ewe SAMOL a apasa ngeni Moses: “Kopwe feittä wón ewe Chuuk Abarim mi nóm öötiwen ewe chaanpwuupwu o kopwe nennelói ewe fönü ngang üwa fen ngeni ekkewe aramasen Israel. 13Iwe, mwirin óm kopwe wes le nengeni ewe fönü, pwal en kopwe mäló o chuuló ren aramasom kewe, usun Aaron pwiimw we a fen föri. 14Pün ämi me rüwömön öüwa lükümmach ngeni äi kewe kapasen öüröür me lón ewe fönüpöönün Zin. Lupwen ekkewe aramasen Israel ra lal, ämi öüsap pwääraló ngeniir äi pin meren ekkewe kólik.” (Ikkeei ekkewe kólikin Meribah lón Kadesh lón ewe fönüpöönün Zin.)
15Mwirin, Moses a apasa ngeni ewe SAMOL, 16“Äi SAMOL, ewe Koten ngünün mettóch mi manaw meinisin, kose mochen kopwe filätä emön souemmwen mi fö epwe emmweni ei mwiichen aramas. 17Kopwe fang ngeniir emön souemmwen epwe akkomw mweer lón maun. Epwe emmweniirewu seni ei fönü o atolonger lón ewe fönü mi fö pwe noum kewe aramas en ewe SAMOL resap wewe ngeni kana siip esap wor emön chón emmweniir.”
18Iwe, ewe SAMOL a pölüweni o apasa ngeni Moses: “Kopwe angeato reemw Joshua nöün Nun we mwän, pün i emön mwän ewe Ngüün a nóm lón o kopwe isettä pöüm wón i. 19Iwe, kopwe emmwenato o öüütäi fän mesen ewe souasór Eleazar me unusen ewe mwiichen aramas. Iwe, kopwe atolonga i lón wiisan pwe epwe emmweni ekkewe aramas. 20Iwe, kopwe ämwärätä wón óm na pöchökkülen nemenem pwe unusen ewe mwiichen aramasen Israel meinisin repwe älleasochisi. 21Lupwen Joshua epwe osun öpöwpöw seni ewe SAMOL, iwe, epwe üütä fän mesen ewe souasór Eleazar nge Eleazar epwe wiisen eiis tichchik me fän mesen ewe SAMOL fänitan seni minne epwe köpwüngüló meren ewe Urim. Epwe iei usun än Joshua me ewe mwiichen chón Israel repwe silei meet repwe föri.”
22Iwe, Moses a föri minne ewe SAMOL a öllük ngeni i. A angei Joshua o öüütäi fän mesen ewe souasór Eleazar me unusen ewe mwiichen aramas. 23Mwirin, Moses a isettä pöün wón Joshua o atolonga i lón wiisan, usun chök minne ewe SAMOL a öllük pwe i epwe föri.
Ekkewe asór repwe fis iteiten rän
28Iwe, ewe SAMOL a apasa ngeni Moses, 2“Kopwe ngeni ekkewe chón Israel ekkeei kapasen öüröür: ‘Ekkewe asór öüpwe äänir asór ngeniei ren ekkei wón ewe róngen asór, ikkana enei mwöngö ngang üwa efich pwonneer. Öüpwe tümwünüfichi pwe öüpwe uweato reei ekkewe asór fänitei lón ekkewe fansoun mi kefilitä o äänir asór alóngólóng wón äi kewe kapasen öüröür.’ 3“Kopwe apasa ngeniir: ‘Lupwen öüpwe uwato ämi kewe asóren keek öüwa ääni asór ngeni ewe SAMOL iteiten rän, öüpwe fókkun ääni asór rüwömön ätemwänin laam, ew ieriir, esap wor teriir. 4Öüpwe ääni asór emön laam lesossor, nge lekkuniól, öüpwe ääni asór ewe pwal emön laam. 5Öüpwe ääni asór emön me emön ekkewe laam fiti fengen me ew naengolun ew efa pilawa mi amas o mwirinnö mi nofit fengen me ew na rüwänüen ew kuóche apüra mi unguung seni föün olif pwe ew asóren mwöngö. 6Iei ewe asóren keek epwe chök soun fiffis iteiten rän a fen katoowu pwüngün me wón ewe Chuuk Sinai, ew asór mi keek wón ekkei ewe SAMOL a efich pwonnan. 7Öüpwe pwal chienen ngeni ei asór ew asóren wün epwe för seni ew kuóche wain fäniten emön me emön leiin ekkewe laam. Öüpwe niinätiw ewe asóren wün lón ewe Leeni mi Pin pwe epwe ew asór ngeni ewe SAMOL. 8Iwe, öüpwe pwal ääni asór ewe örüwömönün laam lekkuniól. Öüpwe pwal ääni asór ewe asóren mwöngö me ewe asóren wün usun chök ewe asór a fis lesossor, pwe epwe och asór mi keek wón ekkei, ewe SAMOL a efich pwonnan.
Ekkewe asóren lón ränin Sabbat
9“ ‘Iwe, lón ewe ränin Sabbat öüpwe ääni asór rüwömön laam ew ieriir esap wor teriir. Repwe chieneni ülüngät kuóche pilawa mi amas o mwirinnö mi nofit fengen me apüra seni föün olif me ew asóren wün. 10Iei ewe asóren keek epwe fis iteiten ränin Sabbat kapach ngeni ewe asóren keek mi fiffis iteiten rän me chiechian we asóren wün.
Ekkewe asóren maram
11“ ‘Iwe, lón ewe äewin ränin iteiten maram, öüpwe fangaló pwe pwal ew asóren keek ngeni ewe SAMOL rüwömön liälifföön ätemwänin kowu, emön ätemwänin siip, füümön laam ew ieriir, esap wor teriir. 12Repwe chieneni ekkeei asóren mwöngö: Limu kuóche pilawa mi amas o mwirinnö mi nofit fengen me apüra seni föün olif chienen emön me emön kewe ätemwänin kowu, ülüngät kuóche pilawa mi amas o mwirinnö mi nofit fengen me apüra seni föün olif chienen ewe emön ätemwänin siip, 13pwal ruu kuóche pilawa mi amas o mwirinnö mi nofit fengen me apüra seni föün olif chienen emön me emön kewe laam. Ei asóren keek epwe keek wón ekkei pwe ewe SAMOL a efich pwonnan. 14Öüpwe pwal ääni ew asóren wün fiti ew me ew ekkewe asór. Öüpwe ääni asór ruu kuóche wain chienen emön me emön kewe ätemwänin kowu, ruu esóp paint wain chienen ewe emön ätemwänin siip, pwal ew kuóche wain chienen emön me emön kewe laam. Öüpwe ääni ei asóren keek iteiten maram lón ewe äewin ränin iteiten maram lón unusen ewe ier. 15Iwe, lón ewe äewin ränin iteiten maram, öüpwe pwal ääni asór ngeni ewe SAMOL emön ätemwänin kuuch pwe ew asóren limelimen tipis. Ei asór epwe kapachetä ngeni ewe asóren keek mi fiffis iteiten rän me chiechian we asóren wün.
Ekkewe asór lón ewe Chuulapen Pasofer
16“ ‘Iwe, lón ewe rän mi kefilitä, iei ewe engol me rüwänüen ränin ewe äewin maram, öüpwe fókkun efisi ächechchemen än ewe SAMOL we Pasofer. 17Nge lón ewe engol me limuen ränin ewe äewin maram, iei ewe rän mwirin ewe ränin Pasofer, öüpwe poputäni ekkewe fisu ränin chuulap. Lón ekkeei fisu rän öüpwe mwöngö pilawa esap wor iis lón. 18Lón ewe äewin ränin ei chuulap, öüpwe efisi ew mwiich mi pin fäniten ekkewe aramas. Öüsap föri och angang ämi mi soun föfföri lón ei rän. 19Iwe, öüpwe fókkun fangaló ngeni ewe SAMOL pwe ew asóren keek rüömön liälifföön ätemwänin kowu, emön ätemwänin siip me füümön laam ew ieriir, iir meinisin esap wor teriir. 20Repwe chieneni ekkeei asóren mwöngö: Limu kuóche pilawa mi amas o nofit fengen me apüra seni föün olif chienen emön me emön ekkewe ätemwänin kowu, ülüngät kuóche pilawa mi amas o nofit fengen me apüra seni föün olif chienen ewe emön ätemwänin siip, 21pwal ruu kuóche pilawa mi amas o nofit fengen me apüra seni föün olif chienen emön me emön kewe füümön laam. 22Öüpwe pwal ääni asór emön ätemwänin kuuch pwe ew asóren limelimen tipis pwe öüpwe föri asóren omwusomwusen tipis fänitemi. 23Öüpwe fangaló ekkeei asór me lükün ämi kewe asór mi fis lesossor. 24Lón iteiten ew me ew kewe fisu ränin chuulap, epwe iei usun ämi öüpwe amollätä ekkewe asóren keek öüpwe äänir asór wón ekkei mi pwoöch meren ewe SAMOL. Öüpwe ääni ekkeei asór me lükün ewe asóren mwöngö me asóren wün mi chök soun fiffis iteiten rän. 25Iwe, lón ewe efisuen ränin ewe chuulap, öüpwe efisi pwal ew mwiich mi pin fäniten ekkewe aramas. Öüsap föri och angang ämi mi soun föfföri lón ei rän.
Ekkewe asór lón ewe Chuulapen Wiik ika Chuulapen Kinikin Uwa
26“ ‘Iwe, lón ewe äewin ränin ewe Chuulapen kinikinin mwen üwa lupwen öüpwe uweato ewe akkomwen föün wiit mi fö ngeni ewe SAMOL, öüpwe efisi ew mwiich mi pin fäniten ekkewe aramas. Öüsap föri och angang ämi mi soun föfföri lón ei rän. 27Öüpwe ääni ew asóren keek lón ei rän, ew asór ewe SAMOL epwe pwapwa ren. Öüpwe ääni asór rüwömön liälifföön ätemwänin kowu, emön ätemwänin siip me füümön laam ew ieriir. 28Repwe chieneni ekkewe asóren mwöngö seni pilawa mi amas o mwirinnö mi nofit fengen me apüra seni föün olif. Limu kuóche pilawa mi amas o nofit fengen me apüra seni föün olif chienen emön me emön kewe ätemwänin kowu, ülüngät kuóche pilawa mi amas o nofit ngeni apüra seni föün olif chienen ewe emön ätemwänin siip, 29me ruu kuóche pilawa mi amas o nofit ngeni apüra seni föün olif chienen emön me emön kewe füümön laam. 30Öüpwe pwal ääni asór emön ätemwänin kuuch pwe öüpwe föri asóren omwusomwusen tipis fänitemi. 31Ekkeei asóren keek fiti chiechier kewe asóren wün repwe kapach ngeni ewe asóren keek mi fiffis iteiten rän me chiechian we asóren mwöngö. Öüpwe förfichi pwe ekkewe maan meinisin öüpwe äänir asór esap wor teriir.
Ekkewe asór lupwen ewe Chuulapen Rappwa
29 “ ‘Iwe, öüpwe efisi ächechchemen ewe Chuulapen Rappwa lón ewe rän mi kefilitä lón ewe äewin ränin ewe efisuen maram. Öüpwe efisi ew mwiich mi pin fäniten ekkewe aramas meinisin lón ena rän. Öüsap föri och angang ämi mi soun föfföri. 2Lón ena rän, öüpwe ääni ew asóren keek ewe SAMOL a efich. Öüpwe ääni asór emön liälifföön ätemwänin kowu, emön ätemwänin siip me füümön laam ew ieriir, iir meinisin esap wor teriir. 3Repwe chieneni ekkewe asóren mwöngö seni pilawa mi amas o mwirinnö mi nofit fengen mi apüra seni föün olif. Limu kuóche pilawa mi amas o nofit ngeni apüra seni föün olif chienen ewe ätemwänin kowu, ülüngät kuóche pilawa mi amas o nofit ngeni apüra seni föün olif chienen ewe ätemwänin siip, 4me ruu kuóche pilawa mi amas o nofit ngeni apüra seni föün olif chienen emön me emön kewe füümön laam. 5Kapach ngeni ekkeei, öüpwe pwal ääni asór emön ätemwänin kuuch pwe ew asóren limelimen tipis, pwe öüpwe föri asóren omwusomwusen tipis fänitemi. 6Ekkeei asór repwe kapach ngeni ämi kewe asóren keek mi fiffis iteiten maram me iteiten rän. Iwe, öüpwe ääni ekkeei asór fiti chiechier kewe asóren mwöngö me asóren wün. Öüpwe fangaló ekkeei asór ngeni ewe SAMOL pwe repwe keek wón ekkei pwe i epwe pwapwa ren.
Ekkewe asór lón ewe Ränin Omwusomwusen Tipis
7“ ‘Iwe, lón ewe äengolun ränin ewe efisuen maram, öüpwe efisi pwal ew mwiich mi pin fäniten ekkewe aramas meinisin. Lón ena rän, Ränin Omwusomwusen tipis, ekkewe aramas repwe öchüün o resap föri och angang. 8Öüpwe ääni ew asóren keek mi fókkun pwoöch ngeni ewe SAMOL. Öüpwe ääni asór emön liälifföön ätemwänin kowu, emön ätemwänin siip, me füümön laam ew ieriir, iir meinisin esap wor teriir. 9Ekkeei asór repwe chieneni ekkewe asóren mwöngö seni pilawa mi amas o mwirinnö mi nofit ngeni apüra seni föün olif. Limu kuóche pilawa mi amas o mwirinnö mi nofit ngeni apüra seni föün olif chienen ewe ätemwänin kowu, ülüngät kuóche pilawa mi amas o mwirinnö mi nofit ngeni apüra seni föün olif chienen ewe ätemwänin siip, 10me ruu kuóche pilawa mi amas o mwirinnö mi nofit ngeni apüra seni föün olif chienen emön me emön kewe füümön laam. 11Öüpwe pwal ääni asór emön ätemwänin kuuch fäniten ew asóren limelimen tipis. Ei epwe kapach ngeni ewe asóren limelimen tipis fäniten omwusomwusen tipis me ewe asóren keek mi chök soun fiffis iteiten rän fiti chienan we asóren mwöngö me chiener kewe asóren wün.
Ekkewe asór lupwen ewe Chuulapen Imw Mangaku
12“ ‘Iwe, lón ewe engol me limuen ränin ewe efisuen maram, öüpwe efisi pwal ew mwiich mi pin fäniten ekkewe aramas meinisin. Lón ena ränin, öüsap föri och angang ämi mi soun föfföri. Iei poputän ewe Chuulapen Imw Mangaku, ew chuulap ngeni ewe SAMOL epwe fis lón üküükün fisu rän. 13Lón ewe äewin rän, öüpwe ääni ew asóren keek wón ekkei epwe pwoöch meren ewe SAMOL. Öüpwe ääni asór engol me ülümön liälifföön ätemwänin kowu, rüwömön ätemwänin siip me engol me fömön laam ew ieriir, iir meinisin esap wor teriir. 14Ew me ew ekkeei asór epwe chieneni ew asóren mwöngö seni pilawa mi amas o mwirinnö mi nofit ngeni apüra seni föün olif. Limu kuóche pilawa mi amas o mwirinnö mi nofit ngeni apüra seni föün olif chienen emön me emön kewe engol me ülümön ätemwänin kowu, ülüngät kuóche pilawa mi amas o mwirinnö mi nofit ngeni apüra seni föün olif chienen emön me emön kewe rüwömön ätemwnin siip, 15nge ruu kuóche pilawa mi amas o mwirinnö mi nofit ngeni apüra seni föün olif chienen emön me emön kewe engol me fömön laam. 16Öüpwe pwal ääni asór emön ätemwänin kuuch pwe ew asóren limelimen tipis, kapach ngeni ewe asóren keek mi chök soun fiffis iteiten rän me chienan kewe asóren mwöngö me asóren wün.
17“ ‘Lón ewe oruuwen ränin ei fisu ränin chuulap, öüpwe ääni asór engol me rüwömön liälifföön ätemwänin kowu, rüwömön ätemwänin siip, engol me fömön laam ew ieriir, iir meinisin esap wor teriir. 18Emön me emön ekkeei mönün asór ätemwänin kowu, ätemwänin siip me laam repwe fiti chiechier kewe asóren mwöngö me asóren wün. 19Öüpwe pwal fókkun ääni asór emön ätemwänin kuuch pwe ew asóren limelimen tipis, kapach ngeni ewe asóren keek mi chök soun fiffis iteiten rän me chienan kewe asóren mwöngö me asóren wün.
20“ ‘Iwe, lón ewe öülüngätin ränin ewe chuulap, öüpwe ääni asór engol me emön ätemwänin kowu, rüwömön ätemwänin siip me engol me fömön laam, ew ieriir, iir meinisin esap wor teriir. 21Emön me emön ekkeei mönün asór ätemwänin kowu, ätemwänin siip me laam repwe fiti chiechier kewe asóren mwöngö me asóren wün. 22Öüpwe pwal fókkun ääni asór emön ätemwänin kuuch pwe ew asóren limelimen tipis, kapach ngeni ewe asóren keek mi chök soun fiffis iteiten rän me chienan kewe asóren mwöngö me asóren wün.
23“ ‘Lón ewe örüwänüen ränin ewe chuulap, öüpwe ääni asór engol ätemwänin kowu, rüwömön ätemwänin siip me engol me fömön laam, ew ieriir, iir meinisin esap wor teriir. 24Emön me emön ekkeei mönün asór ätemwänin kowu, ätemwänin siip me laam repwe fiti chiechier kewe asóren mwöngö me asóren wün. 25Öüpwe pwal fókkun ääni asór emön ätemwänin kuuch pwe ew asóren limelimen tipis, kapach ngeni ewe asóren keek mi chök soun fiffis iteiten rän me chienan kewe asóren mwöngö me asóren wün.
26“ ‘Iwe, lón ewe elimuen ränin ewe chuulap, öüpwe ääni asór tiwemön ätemwänin kowu, rüwömön ätemwänin siip me engol me fömön laam, ew ieriir, iir meinisin esap wor teriir. 27Emön me emön ekkeei mönün asór ätemwänin kowu, ätemwänin siip me laam repwe fiti chiechier kewe asóren mwöngö me asóren wün. 28Öüpwe pwal fókkun ääni asór emön ätemwänin kuuch pwe ew asóren limelimen tipis, kapach ngeni ewe asóren keek mi chök soun fiffis iteiten rän me chienan kewe asóren mwöngö me asóren wün.
29“ ‘Lón ewe awonuwen ränin ewe chuulap, öüpwe ääni asór walümön ätemwänin kowu, rüwömön ätemwänin siip me engol me fömön laam, ew ieriir, iir meinisin esap wor teriir. 30Emön me emön ekkeei mönün asór ätemwänin kowu, ätemwänin siip me laam repwe fiti chiechier kewe asóren mwöngö me asóren wün. 31Öüpwe pwal fókkun ääni asór emön ätemwänin kuuch pwe ew asóren limelimen tipis, kapach ngeni ewe asóren keek mi chök soun fiffis iteiten rän me chienan kewe asóren mwöngö me asóren wün.
32“ ‘Iwe, lón ewe efisuuen ränin ewe chuulap, öüpwe ääni asór füümön ätemwänin kowu, rüwömön ätemwänin siip me engol me fömön laam, ew ieriir, iir meinisin esap wor teriir. 33Emön me emön ekkeei mönün asór ätemwänin kowu, ätemwänin siip me laam repwe fiti chiechier kewe asóren mwöngö me asóren wün. 34Öüpwe pwal fókkun ääni asór emön ätemwänin kuuch pwe ew asóren limelimen tipis, kapach ngeni ewe asóren keek mi chök soun fiffis iteiten rän me chienan kewe asóren mwöngö me asóren wün.
35“ ‘Iwe, lón ewe awalüwen ränin ewe chuulap, öüpwe pwal efisi ew mwiich mi pin fäniten ekkewe aramas meinisin. Lón ena rän, öüsap föri och angang ämi mi soun föfföri. 36Öüpwe ääni ew asóren keek mi fókkun pwoöch ngeni ewe SAMOL. Öüpwe ääni asór emön ätemwänin kowu, emön ätemwänin siip, me füümön laam ew ieriir, iir meinisin esap wor teriir. 37Emön me emön ekkeei mönün asór ätemwänin kowu, ätemwänin siip me laam repwe fiti chiechier kewe asóren mwöngö me asóren wün. 38Öüpwe pwal fókkun ääni asór emön ätemwänin kuuch pwe ew asóren limelimen tipis, kapach ngeni ewe asóren keek mi chök soun fiffis iteiten rän me chienan kewe asóren mwöngö me asóren wün.
39“ ‘Öüpwe fókkun ääni ekkeei asór ngeni ewe SAMOL lón ämi kewe chuulapen ier. Ekkeei asór ra kapach ngeni ekkewe pwal ekkóch sókkun asór öüwa ääniir lupwen öüwa ääni ämi pwon ika ekkewe asór seni pwisin mochenin letipemi ika asóren keek ika asóren mwöngö ika asóren wün ika asóren kinamwe.’ ”
40Iwe, Moses a ngeni ekkewe aramasen Israel meinisin ekkeei kapasen öüröür, usun chök minne ewe SAMOL a öllük ngeni.
Ewe öllük fänäsengesin pwon
30 Mwirin, Moses a köörifengeni ekkewe souemmwenin ekkewe einangen Israel o üreniir, “Iei meet ewe SAMOL a öllük: 2Are emön mwän a ääni ew pwon ngeni ewe SAMOL ika pwon fän ökköpöl pwe epwe pwisin atolonga inisin lón och föfförün etipeew, ätewe esap fókkun atai an kapas. I epwe fókkun föri meinisin minne a apasawu seni awan pwe epwe föri.
3“Pwal ika emön föpwül a ääni ew pwon ngeni ewe SAMOL ika pwisin atolonga inisin lón och föfförün etipeew lupwen i mi chüen chök nóm lón imwen saman, 4nge saman we a rong an pwon ika ewe föfförün etipeew neminnewe a pwisin atolonga lón, nge i esap apasa och ngeni neminnewe, mwirin, a wor pöchökkülen an kewe pwon meinisin pwal an kewe föfförün etipeew pwisin i a atolonga lón. 5Nge are semen neminnewe we esap mochen mwüüt ngeni neminnewe pwe epwe öpwönüwetä an pwon ika an etipeew lón chök ewe rän i a rong, mwirin, än neminnewe kewe pwon ika an kewe etipeew esap wor pöchökkülan. Iwe, ewe SAMOL epwe epichaló tipisin neminnewe pwokiten saman we esap mwüüt ngeni pwe epwe öpwönüwetä an kewe pwon ika an kewe etipeew.
6“Nge are emön föpwül a ääni ew pwon ika awakkäi le föri och etipeew, nge mwirin a pwüpwülü, 7are pwülüwan we a silei usun, nge esap awora an kapasen opwut lón ewe rän i a rongorong, mwirin, a wor pöchökkülen än neminnewe kewe pwonen etipeew i a pwisin atolonga inisin lón. 8Nge are pwülüwen neminnewe we esap mochen etiwa än neminnewe we pwon ika etipeew i a awakkäi le föri lón ewe rän i a rong usun, ätewe a ataeló pöchökkülen än neminnewe we pwon i a ääni me pwal meet i a awakkäi le apasa. Iwe, ewe SAMOL epwe epichaló tipisin neminnewe.
9“Nge are emön fefin i emön mi mwüüseni pwülüwan ika emön mi määseni pwülüwan a ääni ew pwon ika atolonga pwisin inisin lón och föfförün etipeew, i epwe fókkun öpwönüwetä an kewe pwon me föfförün etipeew meinisin.
10“Are emön fefin a pwüpwülü o nónnóm lón imwen pwülüwan we lupwen a ääni ew pwon ika a pwisin atolonga inisin lón och föfförün etipeewin pwon, 11nge pwülüwan we a rong usun, nge i esap föri och an epwe öükätiw neminnewe, mwirin än neminnewe pwon me föfförün etipeew ra pwönüwetä. 12Nge are pwülüwen neminnewe we esap mochen etiwa än neminnewe we pwon ika föfförün etipeew lón ewe rän i a rong usun, mwirin, än neminnewe we pwon ika föfförün etipeew a taaló pöchökkülan. Iwe, ewe SAMOL epwe epichaló tipisin neminnewe. 13Iei usun än pwülüwen neminnewe we a tongeni epwe önüküchchara ika ataeló pöchökkülen än neminnewe pwon ika föfförün etipeew i a föri an epwe pwisin pöllüküweló manawan. 14Nge are pwülüwen neminnewe we esap apasa och lón ewe rän i a rongorong usun, mwirin, i a tipeew ngeni än neminnewe we pwon ika an we föfförün etipeew. 15Nge are ätewe epwe witiwitiló lap seni ew rän, nge mwirin epwe sótuni le ataeló pöchökkülen än neminnewe pwon ika föfförün etipeew, ätewe epwe mwärelong fän eselipäen än neminnewe tipis.”
16Ikkeei ekkewe öllük ewe SAMOL a ngeni Moses fänäsengesin pwüngün lefiilen emön mwän me pwülüwan, pwal fänäsengesin lefiilen emön saam me nöün föpwül mi chüen nónnóm ren lón imwan.
Chappen tipisin än chón Midian föfför
31Mwirin, ewe SAMOL a apasa ngeni Moses, 2“Kopwe ukun ngeni ekkewe chón Midian chappen ar föfför ren ar emmwenalong ekkewe chón Israel lón ewe angangen fel ngeni önümwäl. Mwirin, kopwap mäló o chuungeni óm kewe leewo.”
3Ina minne, Moses a apasa ngeni ekkewe aramas, “Öüpwe filätä ekkóch mwän seni leiimi fäniten ar repwe feilló maun fäniten ewe SAMOL ngeni ekkewe chón Midian pwe repwe ngeni ekkewe chón Midian chappen ar föfför. 4Öüpwe tiinaló ngeni maun engöröw mwän seni ew me ew ekkewe einangen Israel meinisin.” 5Ina minne, ra filätä engöröw mwän seni ew me ew kewe einangen Israel. Iwe, a wor engol me ruu ngöröw mwän ra mollotä ngeni maun. 6Mwirin, Moses a tiinireló pwe repwe maun, engöröw mwän seni ew me ew einang, nge Finehas nöün ewe souasór Eleazar we mwän a emmwenireló lón maun. Ra mwärei ekkewe pisek mi pin seni lón ewe imw mi pin me ekkewe rappwa fäniten esilesilen maun.
7Iwe, ra maun ngeni ekkewe chón Midian usun minne ewe SAMOL a öllük ngeni Moses o ra niieló ekkewe mwän meinisin. 8Ra niieló ekkewe limmön kingen Midian iter Evi, Rekem, Zur, Hur me Reba lón maun. Ra pwal niieló Balaam nöün Beor we mwän ren ketilas. 9Mwirin, ekkewe sounfiun Israel ra liäpeni ekkewe fiin Midian me nöüür kewe semiriit o turufi nöüür kewe pwiin kowu me pwiin siip me kuuch me pisekiir meinisin pwe choon wókur. 10Ra kenaló ekkewe telinimw meinisin me ekkewe sóóp ia ekkewe chón Midian ra imweim ie. 11Mwirin, ra ionifengeni choon wókur me liäper meinisin pacholong maan me aramas.
Ra liwinsäfäl seni maun
12Mwirin, ra uweato liäpeer kewe me choon wókur kewe ren Moses me ewe souasór Eleazar me ewe mwiichen aramasen Israel ren ewe leeni ia ra öüüwetä imwer imw mangaku ie lón ewe maasiesin Moab órun ewe chaanpwuupwu Jordan äwenewenen Jeriko me epeek.
13Iwe, Moses me ewe souasór Eleazar me ekkewe souemmwenin ekkewe aramas meinisin ra feilló pwe repwe souniir me lükün ewe leeni ia ra öüüwetä imwer imw mangaku ie. 14Nge Moses a soong ren ekkewe meilapen mwiichen sounfiu, ren ekkewe mi nemenem wón ngöröw pwal ren ekkewe mi nemenem wón pwükü mi liwinito seni maun.
15Iwe, Moses a üreniir, “Ifa usun, pwata öüwa mwüüt ngeni ekkewe fefin meinisin pwe repwe manaw? 16Nengeni, fókkun ikkeiir ekkewe fefin mi fiti än Balaam öüröür o popuw än ekkewe aramasen Israel repwe üüngeni ewe SAMOL meren ewe Chuuk Peor. Ikkeiir ekkewe mi popuw ewe määlap me ikenan pwe repwe efeiengawa nöün ewe SAMOL kewe aramas. 17Iei minne, öüpwe niieló ekkewe äät meinisin me ekkewe fefin meinisin ra fen kóón ren mwän. 18Nge öüpwe amanawa ekkewe chök nengngin meinisin resamwo kóón ren mwän. Öüwa tongeni anómwur fänitemi.
19“Nge ämi meinisin mi niieló emön aramas ika attapa emön soomä öüpwe chök nómwóló lükün ewe leeni ia sia öüüwetä imwach imw mangaku ie lón üküükün fisu rän. Öüpwe fókkun elimelima kemi me chókewe öüwa liäpeniir lón ewe öülüngätin rän me ewe efisuwen rän. 20Öüpwe pwal limeti üfemi meinisin me iteiten mettóch meinisin mi för seni ünüchchen maan me ünöünen kuuch ika för seni mwüüch.”
21Mwirin, ewe souasór Eleazar a apasa ngeni ekkewe mwän mi feilló ngeni maun, “Iei pwüngün ewe öllük ewe SAMOL a ngeni Moses: 22‘Mettóch meinisin mi för seni kolt me silifer me piraas me mächä me tiin me piloom, 23wewen, ekkewe mächä resap kareló ren ekkei, öüpwe atolonga lón ekkei pwe repwe nóm lón tettelin limöch. Ekkeei pisek mi för seni mächä repwe pwal sópwósópwóló le limelim ren ewe kólikin limelim. Nge meinisin mettóch mi tongeni karaló repwe chök limelim ren kólik. 24Iwe, lón ewe efisuen rän, öüpwe soppwuni üfemi o elimöchü kemi. Mwirin öüpwap tongeni liwinsäfälilong lón ewe leeni ia sia öüüwetä imwach imw mangaku ie.’ ”
Inetin ewe choon wóók
25Iwe, ewe SAMOL a apasa ngeni Moses, 26“En me ewe souasór Eleazar me ekkewe souemmwenin famili seni ew me ew einang öüpwe makkeetiw iteiten choon wókumi kewe meinisin lón maun, pacholong aramas me maan. 27Mwirin, kopwe inetii ewe choon wóók lón ruu kinikin. Iwe, kopwe angei ew kinikin o ngeni ekkewe mwän mi feilló ääni ewe maun, nge ewe ew kinikin kopwe ngeni ekkewe lussun aramas. 28Nge kopwe akkomwen ngeni ewe SAMOL inetin seni leiin ekkewe aramas mi ooló me ekkewe pwiin kowu me dongki me siip me kuuch. Kopwe angei seni inetin ekkewe sounfiu mi feilló maun. Kopwe äimwüeló emön seni iteiten limöpwükü pwe iei inetin ewe SAMOL. 29Kopwe angei ei seni ewe esóp inetin ekkewe mwän mi feilló maun o ngeni ewe souasór Eleazar pwe epwe ew asór ngeni ewe SAMOL. 30Kopwe pwal angei emön seni iteiten lime aramas mi ooló, seni iteiten lime kow, dongki, siip me kuuch seni ewe esóp inet inetin ekkewe aramasen Israel. Iwe, kopwe angei ei inet o ngeni ekkewe mwän seni ewe einangen Levi pün iir ra wiisen tümwünü le föri angangen ewe imw mangaku än ewe SAMOL.” 31Iei usun Moses me ewe souasór Eleazar ra föri minne ewe SAMOL a öllük ngeni Moses.
32Iwe, iei üküükün ewe choon wóók ekkewe sounfiu ra angei fän pöchökkülen ar pwora pwe liäpeer: wonopwükü fiik me limu ngöröw siip, 33fiik me ruu ngöröw kowu, 34wone me ew ngöröw dongki, 35me iliik me ruu ngöröw aramas meinisin, iir ekkewe föpwül resap mwo kóón ren emön mwän.
36Iwe esópwun liäpeer we, iei inetin chókewe mi feilló maun, üküükün ülüpwükü iliik me fisu ngöröw limöpwükü siip;
37nge üküükün inetin ewe SAMOL seni ekkewe siip inetin chókewe mi feilló maun, wonopwükü fiik me limmön.
38Iwe, üküükün inetir kewe kowu, iliik me wonu ngöröw, nge üküükün inetin ewe SAMOL seniir, fiik me rüwömön.
39Pwal üküükün inetir dongki, iliik ngöröw limöpwükü, nge üküükün inetin ewe SAMOL seniir, wone me emön.
40Iwe, üküükün inetir föpwül, engol me wonu ngöröw, nge üküükün inetin ewe SAMOL seniir, iliik me rüwömön.
41Iwe, Moses a ngeni ewe souasór Eleazar inetin ewe SAMOL kewe meinisin pwe epwe ew asór iei tupwuur, usun minne ewe SAMOL a öllük ngeni.
42Iwe, ewe esópwun inet, iei inetin ekkewe aramasen Israel, Moses a äimwüeló seni ewe esóp inet inetin ekkewe mwän mi feilló maun, 43üküükün, ülüpwükü iliik me fisu ngöröw limöpwükü siip, 44iliik me wonu ngöröw kowu, 45iliik ngöröw limöpwükü dongki, 46me engol me wonu ngöröw föpwül. 47Iwe, Moses a angei seni ewe esópwun inet inetin ekkewe aramasen Israel we, emön seni iteiten lime. A filiirewu seni aramas me maan o a ngeni ekkewe mwän seni ewe einangen Levi pün iir ra wiisen tümwünü le föri angangen ewe imw mangaku än ewe SAMOL, usun ewe SAMOL a öllük ngeni Moses.
48Mwirin, ekkewe meilapen sounfiu meinisin iir ekkewe chón emmweni ngöröwün sounfiu me ekkewe chón emmweni pwüküen sounfiu ra feitto ren Moses. 49Iwe, ra apasa ngeni Moses, “Äm noum keei chón angang aia wes le älleani ekkewe sounfiu mi nóm fän äm nemenem, nge esap wor emön me leiim a pöütüló. 50Iwe, äm aia uwato ekkewe pisek mi för seni kolt äm aia liäpeniir pwe ew asór ngeni ewe SAMOL seni inetim kewe aia liäpeni. Ikkeei ekkewe ofouten wón sópwun paaw, läälä, ringen pwaaw, iering me mwärämwärin fän üüw, aia uweiireto pwe aipwe föri och asóren omwusomwusen tipis pwisin fäniteem fän mesen ewe SAMOL.”
51Iwe, Moses me ewe souasór Eleazar ra angei seni ekkewe meilapen sounfiu meinisin ekkewe pisek meinisin mi för seni kolt, sakkopaaten fout meinisin me mettóch ra fen för. 52Iwe, üküükün ewe kolt meinisin ekkewe meilapen sounfiu ra uwato pwe ar liffang ngeni ewe SAMOL, föpwükü rüwe paun choun. 53(Ekkewe sounfiu meinisin ra angei ekkóch choon wókuur kewe pwisin fäniter.) 54Iei usun, Moses me ewe souasór Eleazar ra etiwa ewe liffang seni ekkewe meilapen sounfiu o ra uwealó ewe kolt lón ewe Imw Mangaku Leenien Chufengen pwe epwe och minen ächchem ngeni ewe SAMOL pwe ekkewe aramasen Israel iir nöün ewe SAMOL.
Ekkewe einang mi nómwetiw öötiwen Jordan
32 Iwe, a fókkun chómmóng nöün chón ewe einangen Reuben me chón ewe einangen Kad pwiin maan. Iwe, lupwen ra küna pwe ewe fönü Jazer me ewe fönü Kilead ra mwirinnö fäniten nöüür kewe pwiin kowu me siip, 2ra feitto ren Moses me ewe souasór Eleazar me ekkewe ekkóch souemmwenin ekkewe aramas o apasa, 3“Ataroth, Dibon, Jazer, Nimrah, Heshbon, Elealeh, Sebam, Nebo me Beon, 4ewe SAMOL a ökkufu unusen ei kinikin fäniten ewe mwiichen aramasen Israel. Unusen ei kinikin a fókkun mwirinnö fäniten nöüüm kewe pwiin kowu me siip. Iwe, äm noum keei chón angang a wor nöüüm pwiin maan. 5Are äm aia küna ümöümöch me fän mesom, kose mochen kopwe mwüüt ngeni keem ei fönü äm noum keei chón angang pwe aipwe fönüweni. Nge kosap ngeni keem fönü me peekilón ewe chaanpwupwu Jordan.”
6Iwe, Moses a apasa ngeni chón ewe einangen Kad me chón ewe einangen Reuben: “Ifa usun, wewen pwe öüpwe le chök nómwetiw ikeei nge pwiimi kewe repwe feilló peekilón ewe chaanpwuupwu Jordan o ääni ekkewe maun meinisin? 7Ifa usun, pwata öüwa sótuni ämi öüpwe epiitaló seni lón letipen ekkewe lussun aramasen Israel ar repwe feilló lón ewe fönü ewe SAMOL a fen fang ngeniir? 8Ina usun meet ämi kewe leewo ra föri lupwen ngang üwa tiinireló seni Kadesh Barnea pwe repwe sachei ewe fönü. 9Pün mwirin ar ra feittä ngeni ewe Lemólun Eshkol o sachei ewe fönü, ra epiita letipen ekkewe aramasen Israel pwe repwe feilló o tolong lón ewe fönü ewe SAMOL a fang ngeniir. 10Mwirin, ewe SAMOL a soong ngeniir o a pwon fän ökköpöl, 11‘Enlet esap wor emön seni leiin chókewe ngang üwa chimanürewu seni Egypt, seni ier rüwe feittä, repwe küna ewe fönü ngang üwa pwon fän ökköpöl pwe üpwe ngeni Abraham, Isaak me Jakob, pwokiten iir resap unusen älleasochiei, 12chiilón chök Kaleb nöün Jefunne we mwän, ewe chón Keniz me Joshua nöün Nun we mwän, pün iir ra unusen tapweló mwiri, ngang ewe SAMOL.’ 13Ina minne ewe SAMOL a soong ngeni ekkewe chón Israel o föri pwe repwe chök siamwüfeil lón ewe fönüpöön lón üküükün fääik ier tori ewe pilóón aramas mi tipis ngeni ewe SAMOL ra mäló meinisin.
14“Iwe, iei ämi öüwa föri ewe chök pwal föfför ämi kewe leewo ra föri. Ämi aramas mi uren tipis, ifa usun, öüwa mochen pwe ewe SAMOL epwe alapaló an soong ngeni ekkewe chón Israel? 15Pün are öüpwe kul seni ämi öüpwe tapweló mwirin ewe SAMOL, I epwe pwal säfäliti le likitaló ekkewe aramas lón ewe fönüpöön. Iwe, ei epwe tipisimi are unusen ei mwiichen aramas repwe rosoló.”
16Nge ra pölüweni Moses o apasa, “Äm aia chök mochen aipwe köüütä äm tittin siip ikeei fäniten nöüüm kewe pwiin siip me äm telinimw mi tittiló fäniten pwülüwem kana me nöüüm kana semiriit. 17Mwirin, äm aipwe angei pisekiim pisekin maun o akkomowoló mwen chiechiem kewe aramasen Israel pwe aipwe maun tori aipwe emmweniirelong lón fönüwer. Nge nöüüm kewe semiriit repwe nóm lón ekkewe telinim mi tittiló äm aipwe öüüretä ikeei, pwe repwe tümwün seni än ekkewe aramasen ikeei repwe efeiengawer. 18Äm aisap liwinsäfäl ngeni leeniem kana tori än ekkewe chón Israel meinisin repwe angei inetiir fönü. 19Nge äm aisap mochen fönüweni ew fönü epeek ewe chaanpwuupwu Jordan pwal tori peekilón. Pün äm aia mochen nónnóm ikeei peliöötiwen ewe chaanpwuupwu Jordan ia äm aia fen angei inetiim fönü me ie.”
20Mwirin, Moses a apasa ngeniir: “Are öüpwe föri pwüngün ämi kapas o amollakemiitä fän pisekin maun fäniten än ewe SAMOL kewe maun, 21pwal are ekkewe mwän meinisin mi mollotä fän pisekin maun repwe pwereló peekilón ewe chaanpwuupwu Jordan tori än ewe SAMOL epwe ösüüwowu chón opwutan kana, 22mwirin ämi öüwa tongeni liwinsäfäl lupwen ewe fönü a kinamweló me fän mesen ewe SAMOL. Ämi öüpwe föri wiisemi ngeni ewe SAMOL pwal ngeni ekkewe lussun aramasen Israel. Iwe, ewe fönü mi nóm öötiwen ewe chaanpwuupwu Jordan epwe inetimi meren ewe SAMOL.
23“Nge are öüsap öpwönüwetä ämi kapas, mwirin, ämi öüpwe tipis ngeni ewe SAMOL. Iwe, öüpwe silei enletin pwe ämi tipis epwe pwisin küttä kemi. 24Iwe, öüpwe köüütä telinimw fäniten ämi kana famili me tiit fäniten nöümi pwiin siip. Mwirin, öüpwe föri ekkewe mettóch meinisin öüwa apasa.”
25Mwirin, ekkewe aramas seni ewe einangen Kad me ewe einangen Reuben ra pölüweni o apasa ngeni Moses, “Äm noum keei chón angang aipwe föri usun minne en äm samol ka ääni öüröür. 26Nöüüm kana semiriit me pwülüweem kana, pwal nöüüm kana pwiin siip me kowu meinisin repwe nóm ikeei lón ekkewe telinimwen Kilead. 27Nge äm noum keei chón angang meinisin mi mollotä fän äm pisekin maun, aipwe feilló peekiló pwe aipwe maun fäniten ewe SAMOL, usun chök minne en äm samol ka apasa.”
28Ina minne, Moses a öllük ngeni ewe souasór Eleazar me Joshua nöün Nun we mwän me ekkewe souemmwenin ekkewe einangen Israel usur. 29Moses a apasa ngeniir: “Are ekkewe mwän meinisin seni ekkewe einangen Kad me Reuben mi tongeni ääni än ewe SAMOL kewe maun repwe fiti kemi le feilló peekilón ewe chaanpwuupwu Jordan, mwirin, lupwen öüwa liäpeni ewe fönü, öüpwe ngeniir ewe fönü Kilead pwe fönüer. 30Nge are resap mochen fiti kemi le feilló peekilón ewe chaanpwuupwu fän pisekin maun; mwirin, repwe chök etiwa ar repwe föffönü leiimi lón ewe fönü Kanaan.”
31Mwirin, chón ekkewe einangen Kad me Reuben ra pölüweni o apasa: “Äm aipwe föri usun minne ewe SAMOL a öllük ngeni keem äm noum keei chón angang pwe aipwe föri. 32Äm aipwe feilló peekilón ewe chaanpwuupwu Jordan o tolong lón ewe fönü Kanaan fän pisekiim pisekin maun pwe aipwe maun fäniten ewe SAMOL, nge inetiim fönü epwe chök ikeei wón ei peekin ewe chaanpwuupwu Jordan.”
33Ina minne, Moses a ewiisa ngeni chón ewe einangen Kad me ewe einangen Reuben me esóp ewe einangen Manassah nöün Josef we mwän ewe kinikinin fönü mi nóm fän nemenien King Sihon nöün chón Amor we king me ewe fönü fönüwen King Ok seni Bashan. A ngeniir unusen ewe fönü fiti telinimwan kewe me ekkewe fönü mi nóm pwellin ünükküür.
34Iwe, chón ewe einangen Kad ra öüüetä ekkeei telinimw: Dibon, Ataroth, Aroer, 35Atroth Sofam, Jazer, Jokbehah, 36Beth Nimrah me Beth Haran. Ekkeei telinimw meinisin a wor tittiir mi pöchökkül fiti tittin siip fäniten nöüür kewe pwiin siip. 37Nge chón ewe einangen Reuben ra öüüetä ekkeei telinimw: Heshbon, Elealeh, Kiriathaim, 38Nebo, Baal Meon me Shibmah. Ra siwili iten ekkóch me leiin ekkeei telinimw ra liäpeniir o öüüwsäfäliretä.
39Iwe, ekkewe mwirimwirin Makir seni ewe einangen Manassah ra feilló Kilead o liäpeni. Iwe, ra ösüüweló ekkewe chón Amor mi nónnóm ikenan. 40Ina minne Moses a ngeni ekkewe mwirimwirin Makir nöün Manassah we mwän ewe fönü Kilead. Iwe, ra nónnóm ikenan. 41Iwe, pwal ekkewe aramasen Jair, pwal iei ew eterengesin ewe einangen Manassah, ra liäpeni chómmóng telinimw me lón Kilead o ra siwili iten ena kinikin ngeni Havoth Jair. 42Nge lón ei fansoun, a wor emön mwän itan Nobah a liäpeni ewe telinimw Kenath me ekkewe sóóp mi nóm pwellin ünükkün. Iwe, a eita ngeni ei leeni, Nobah iei pwisin itan we.
Porausen än Israel sääi seni Egypt a enliwinsäfäl
33 Ikkeei tettelin kinikinin än ekkewe aramasen Israel kewe sääi lupwen ra toowu seni Egypt lón ar kewe kinikin usun mwiichen sounfiu fän emmwenien Moses me Aaron. 2Fän än ewe SAMOL öllük, Moses a makkeetiw porausen fätälin ar sääi. Iwe, ikkeei tettelin kinikinin ar kewe sääi alóngólóng wón leeni ia ra köüüló me ie lón ar sääi:
3Ra sääi seni ewe telinimw Rameses lón ewe engol me limuen ränin ewe äewin maram. Lón ewe rän mwirin ewe Pasofer ekkewe chón Israel ra toowu fän pwora me fän mesen ekkewe chón Egypt meinisin. 4Nge lón ei fansoun, ekkewe chón Egypt ra peiaseni nöüür kewe mwännichi meinisin, iir ekkewe ewe SAMOL a niireló lón ewe pwinin me mwan. Ewe SAMOL a okkufu ekkewe koten Egypt lón ena pwinin ren ew föfförün köpwüng mi lapalaap.
5Mwirin än ekkewe aramasen Israel ra mwöküt seni Rameses, ra öüüwetä imwer imw mangaku lón Sukkoth.
6Iwe, ra sääi seni Sukkoth o ra öüüwetä imwer imw mangaku lón Etham mi nóm lepökütiwen ewe fönüpöön.
7Iwe, ra mwöküt seni Etham o liwinsäfäl ngeni Pi Hahiroth mi nóm öötiwen Baal Zefon. Iwe, ra öüüwetä imwer imw mangaku arap ngeni Mikdol.
8Mwirin, ra sääi seni Pi Hahiroth, ra pwerelong lukalapen ewe Setipar o pwerelong lón ewe fönüpöön. Iwe, ra sääilong lón ewe fönüpöönün Etham lón üküükün ülüngät rän o ra öüüwetä imwer imw mangaku lón Marah.
9Iwe, ra mwöküt seni Marah o ra öüüwetä imwer imw mangaku lón Elim, ia a wor ie engol me ruu pwuachchen kólik me fiik ekkewe irä usun nüü iter palm. Ina minne ra öüüwetä imwer imw mangaku ikenan.
10Iwe, ra mwöküt seni Elim o ra öüüwetä imwer imw mangaku órun ewe Setipar.
11Mwirin, ra mwöküt seni ewe Setipar o ra öüüwetä imwer imw mangaku lón ewe Fönüpöönün Sin.
12Iwe, ra sääi seni ewe Fönüpöönün Sin o ra öüüwetä imwer imw mangaku lón Dofkah.
13Mwirin, ra sääi seni Dofkah o ra öüüwetä imwer imw mangaku lón Alush.
14Ra pwal mwöküt seni Alush o ra öüüwetä imwer imw mangaku lón Refidim ikeweia esap wor kólik ie fäniten än ekkewe aramas repwe wün.
15Iwe, ra sääi seni Refidim o ra öüüwetä imwer imw mangaku lón ewe Fönüpöönün Sinai.
16Mwirin, ra mwöküt seni ewe Fönüpöönün Sinai o ra öüüwetä imwer imw mangaku lón Kibroth Hattaavah.
17Ra pwal mwöküt seni Kibroth Hataavah o ra öüüwetä imwer imw mangaku lón Hezeroth.
18Iwe, ra sääi seni Hezeroth o ra öüüwetä imwer imw mangaku lón Rithmah.
19Mwirin, ra sääi seni Rithmah o ra öüüwetä imwer imw mangaku lón Rimmon Perez.
20Ra pwal sääi seni Rimmon Perez o ra öüüwetä imwer imw mangaku lón Libnah.
21Iwe, ra mwöküt seni Libnah o ra öüüwetä imwer imw mangaku lón Rissah.
22Mwirin, ra sääi seni Rissah o ra öüüwetä imwer imw mangaku lón Kehelathah.
23Ra pwal feilló seni Kehelathah o ra öüüwetä imwer imw mangaku ren ewe Chuuk Shefer.
24Iwe, ra mwöküt seni ewe Chuuk Shefer o ra öüüwetä imwer imw mangaku lón Haradah.
25Mwirin, ra mwöküt seni Haradah o ra öüüwetä imwer imw mangaku lón Makheloth.
26Ra pwal mwöküt seni Makheloth o ra öüüwetä imwer imw mangaku lón Tahath.
27Iwe, ra sääi seni Tahath o ra öüüwetä imwer imw mangaku lón Terah.
28Mwirin, ra mwöküt seni Terah o ra öüüwetä imwer imw mangaku lón Mithkah.
29Ra pwal feilló seni Mithkah o ra öüüwetä imwer imw mangaku lón Hashmonah.
30Iwe, ra sääi seni Hashmonah o ra öüüwetä imwer imw mangaku lón Moseroth.
31Mwirin, ra sääi seni Moseroth o ra öüüwetä imwer imw mangaku lón Bene Jaakan.
32Ra pwal mwöküt seni Bene Jaakan o ra öüüwetä imwer imw mangaku lón Hor Hakkidkad.
33Iwe, ra feilló seni Hakkidkad o ra öüüwetä imwer imw mangaku lón Jotbathah.
34Mwirin, ra mwöküt seni Jotbathah o ra öüüwetä imwer imw mangaku lón Abronah.
35Ra pwal sääi seni Abronah o ra öüüwetä imwer imw mangaku lón Ezion Keber.
36Iwe, ra mwöküt seni Ezion Keber o ra öüüwetä imwer imw mangaku lón ewe Fönüpöönün Zin, iei Kadesh.
37Mwirin, ra mwöküt seni Kadesh o ra öüüwetä imwer imw mangaku ren ewe Chuuk Hor mi nóm wón kiänin ewe fönü Edom. 38Lupwen ra nóm lepopun ewe Chuuk Hor, ewe souasór Aaron a feittä wón ewe Chuuk Hor fän än ewe SAMOL öüröür ngeni. Iwe, a mäló me ikenan. Ei a fis lón ewe äewin ränin ewe elimuen maram, lón ewe äfääiken ier mwirin än ekkewe aramasen Israel ra toowu seni ewe fönü Egypt. 39Aaron a ipwükü rüwe me ülüngät ierin lupwen i a mäló me wón ewe Chuuk Hor.
40Lón ena fansoun, ewe kingen Harad, ewe re Kanaan, mi nónnóm lón ewe Nekev lón ewe fönü Kanaan a rongorong pwe ekkewe aramasen Israel ra pwereto ngeni fönüwan we.
41Lón ei ótun, ekkewe chón Israel ra sääi seni ewe Chuuk Hor o ra öüüwetä imwer imw mangaku lón Zalmonah.
42Mwirin, ra sääi seni Zalmonah o ra öüüwetä imwer imw mangaku lón Punon.
43Ra pwal sääi seni Punon o ra öüüwetä imwer imw mangaku lón Oboth.
44Iwe, ra sääi seni Oboth o ra öüüwetä imwer imw mangaku lón Iye Abarim mi nóm wón kiänin Moab.
45Mwirin, ra sääi seni Iye Abarim o ra öüüwetä imwer imw mangaku lón Dibon Kad.
46Iwe, ra mwöküt seni Dibon Kad o ra öüüwetä imwer imw mangaku lón Almon Diblathaim.
47Iwe, ra mwöküt seni Almon Diblathaim o ra öüüwetä imwer imw mangaku wón ekkewe chukuchukutän Abarim mi nóm arap ngeni Nebo.
48Mwirin, ra sääi seni ekkewe chukuchukutän Abarim o ra öüüwetä imwer imw mangaku lón ekkewe maasiesin Moab órun ewe chaanpwuupwu Jordan, äseengen Jeriko me epeek. 49Ra pwal öüüwetä imwer imw mangaku órun Jordan seni Beth Jesimoth äfätälaló ngeni Abel Akasia mi nóm lón ekkewe maasiesin Moab.
Kapasen öüröür fäniten ar repwe maunei Kanaan
50Lupwen ra öüüwetä imwer imw mangaku lón ekkewe maasiesin Moab me órun Jordan äseengen Jeriko me epeek, ewe SAMOL a apasa ngeni Moses, 51“Kopwe kapas ngeni ekkewe aramasen Israel o üreniir: ‘Lupwen öüpwe pwereló peekilón Jordan o tolong lón ewe fönü Kanaan, 52öüpwe fókkun tapweewu ekkewe aramas meinisin mi nónnóm ikenan. Öüpwe fókkun ataeló meinisin ar kewe uluulun önümwäl mi för seni faaw me ar kewe uluulun önümwäl mi för seni mächä, öüpwe pwal ataatakisietiw ar kewe leenien fel ngeni önü wón ekkewe leeni mi tekia meinisin. 53Iwe, öüpwe angei ewe fönü o nónnóm lón, pün Ngang üwa fen ngeni kemi ewe fönü pwe öüpwe fönüweni. 54Iwe, öüpwe eineti ewe fönü wón ämi kewe einang ren üttüüt öüküük ngeni chóóchón ew me ew. Öüpwe ewiisa ngeni ew me ew kewe einang mi wätte, ew inetin fönü mi wätte, nge öüpwe ngeni ew me ew kewe einang mi kükkün ew inetin fönü mi kükkün. Fönüwen ew me ew eianang epwe ina meet ewe ütüüt mi pin a filätä. Epwe iei usun lapalapen ämi öüpwe inetii ewe fönü wón einangen ämi kewe leewo.
55“ ‘Nge are öüsap tapweewu ekkewe aramas mi nónnóm lón ewe fönü, iwe, epwe fis pwe chókana ämi öüwa mwüüt ngeniir pwe repwe nómwetiw, repwe wiliti och mettóch mi epwerika lón mesemi me iräfölüföl mi fölüsi lepeekimi. Iwe, repwe chök ekkeriäföwü kemi me lón ewe fönü ia öüpwe nóm ie. 56Pwal lapalón, epwe fis pwe Ngang üpwe föri ngeni kemi usun meet ngang üwa ekieki pwe üpwe föri ngeniir.’ ”
Kiänin Kanaan kewe mi kefilitä
34 Mwirin, ewe SAMOL a apasa ngeni Moses, 2“Kopwe ngeni ekkewe aramasen Israel ekkeei kapasen öüröür: ‘Lupwen öüpwe tolong lón ewe fönü Kanaan, iei ewe fönü epwe einet ngeni kemi pwe fönüwemi; iwe, epwe ikkeei kiänin ena fönü Kanaan.
3“ ‘Kiään fönüwemi me peliöör epwe fätäl seni ewe Fönüpöönün Zin o keiiló wón kiänin Edom. Ämi kiä me peliöör epwe poputä me öötiwen ewe Setin Sólt. 4Iwe, epwe keiiló öör o luuseni ewe Palapalatän Akrabim äwenewenen Zin. Lesópwuchikin ämi kiä me peliöör epwe Kadesh Barnea. Mwirin, ewe kiä epwe feilló ngeni Hazar Addar o sópwósópwóló ngeni Azmon. 5Iwe, ewe kiä epwe fätäl seni Azmon o epwe kul ngeni ewe Öüwöön Egypt. Iwe, epwe ükütiw me ren ewe Mataw.
6“ ‘Ämi kiä me pelilotow, epwe arossetin ewe Mataw.
7“ ‘Ämi kiä me peliefeng epwe poputä seni ewe Mataw o keiiló peliöötiw ngeni ewe Chuuk Hor. 8Mwirin, seni ewe Chuuk Hor, ämi kiä epwe feilló ngeni Lebo Hamath o sópwósópwóló le fätäleló ngeni Zedad 9me Zifon tori Hazar Enan. Epwe iei ämi kiä me peliefeng
10“ ‘Ämi kiä me peliöötiw epwe poputä seni Hazar Enan o keiiló öör ngeni Shefam. 11Mwirin, ewe kiä epwe keiitiw ngeni Riblah mi nóm peliöötiwen Ain. Seni ikenan, ewe kiä epwe feittiw ator ngeni peliöötiwen lepeekin ewe Nómwun Kalili. 12Iwe, ewe kiä epwe fitätiw órun ewe chaanpwuupwu Jordan o ükütiw me ren ewe Setin Sólt.
“ ‘Epwe iei fönüwemi we fiti ekkewe kiään ünükkün meinisin.’ ”
13Mwirin, Moses a üreni ekkewe aramasen Israel, “Iei ewe fönü ämi öüpwe inetii lefiilemi fän pwüngün ewe angangen üttüüt mi pin. Ewe SAMOL a öllük pwe ewe fönü epwe einet wón ekkewe tiu esóp einang, 14pwokiten ekkewe famili seni ekkewe einangen Reuben, Kad me ewe esóp einangen Manassah ra fen angei inetiir fönü. 15Ekkeei ruu esóp einang ra fen angei inetiir me peliöötiwen ewe chaanpwuupwu Jordan, äseengen Jeriko me epeek äwenewenen ia akkar a töötä me ie.”
Ekkewe souemmwen mi kefilitä pwe repwe inetii ewe fönü
16Iwe, ewe SAMOL a apasa ngeni Moses, 17“Ikkeiir ekkewe mwän repwe inetii ewe fönü wón ekkewe aramasen Israel: Ewe souasór Eleazar me Joshua nöün Nun we mwän. 18Iwe, kopwe pwal angei emön souemmwen seni iteiten ew me ew kewe einang pwe repwe älisiir ren ewe angang. 19Iwe, ikkeei ekkewe einang me iten ekkewe souemmwen:
“Kaleb nöün Jefuneh we mwän seni ewe einangen Judah.
20“Shemuel nöün Ammihud we mwän seni ewe einangen Simeon.
21“Elidad nöün Kislon we mwän seni ewe einangen Benjamin.
22“Buki nöün Jokli we mwän seni ewe einangen Dan.
23“Hanniel nöün Efod we mwän seni ewe einangen Manassah nöün Josef we mwän.
24“Kemuel nöün Shiftan we mwän seni ewe einangen Efraim nöün Josef we mwän.
25“Elizafan nöün Parnak we mwän seni ewe einangen Zebulun.
26“Paltiel nöün Azzan we mwän seni ewe einangen Issakar.
27“Ahihud nöün Shelomi we mwän seni ewe einangen Asher.
28“Pedahel nöün Ammihud we mwän seni ewe einangen Naftali.”
29Ikkeiir ekkewe mwän ewe SAMOL a filiretä pwe repwe wiisen nemeni angangen inetin ewe fönü Kanaan wón ekkewe aramasen Israel.
Ekkewe telinimw fäniten chón ewe einangen Levi
35 Lupwen ekkewe chón Israel ra nóm lón imwer kewe imw mangaku lón ekkewe maasiesin Moab órun ewe chaanpwuupwu Jordan äseengen Jeriko me epeek, ewe SAMOL a apasa ngeni Moses, 2“Kopwe öllük ngeni ekkewe aramasen Israel pwe repwe ngeni chón ewe einangen Levi ekkóch telinimw seni lón leenier kewe pwe repwe nónnóm ie. Repwe pwal ngeniir ekkewe fönü mi määr fetil wón fäniten nöüür maan mi nóm pwellin ünükkün ar kewe telinimw. 3Iwe, ekkewe telinimw repwe fäniter ar repwe imweim lóór, nge ekkewe fönü ünükkün ar kewe telinimw repwe chök föffönü fengen fäniten nöüür kewe pwiin kowu me pwiin siip me nöüür kewe pwal ekkóch maan meinisin.
4“Ekkewe fönü ämi öüpwe ngeni chón ewe einangen Levi pwe repwe föffönü fengen fäniten nöüür kewe pwiin maan repwe sópwósópw seni tittin ar kewe telinimw feiliwu wón üküükün engöröw limepwükü fiit unusen pwellin ünükkür. 5Iwe, öüpwe öükaló üküükün ülüngät ngöröw fiit seni lükün tittin ewe telinimw leepekin meinisin ngeni öötiw, öör, lotow me efeng. Iwe, ewe telinimw epwe nóm lukalapan. Ei fönü repwe föffönü fengen lón ar kewe telinimw fäniten nöüür kewe maan.
6“Iwe, öüpwe filaló wonu telinimw me leiin ekkewe telinimw öüpwe ngeni chón ewe einangen Levi fäniten leenien op seni feiengaw, ia emön chón niieló aramas fän cheechengaw epwe tongeni süü ngeni. Iwe, öüpwe pwal apachätä fääik me ruu telinimw ngeni ekkeei wonu. 7Ina minne meinisin ekkewe telinimw öüpwe ngeni chón ewe einangen Levi repwe üküükün fääik me walüw. Ikkeei iteiten ekkewe telinimw öüpwe ngeniir fiti ekkewe fönü repwe föffönü fengen mi nóm pwellin ünükkün ar kewe telinimw fäniten nöüür kewe maan. 8Iwe, ekkewe telinimw ämi öüpwe ngeniir repwe seni fönüwen ekkewe aramasen Israel. Öüpwe ngeniir chómmóng telinimw seni ekkewe einang mi wätte, nge öüpwe ngeniir mi chóókükkün seni ekkewe einang mi kükkün. Ekkewe einang mi wätte repwe ngeni chón ewe einangen Levi telinimw mi chómmóng, nge ekkewe einang mi kükkün repwe ngeniir telinimw mi chókükkün. Ew me ew einang epwe fang öüküükük ngeni öüküükün inetin fönü.”
Ekkewe telinimwen op
9Mwirin, ewe SAMOL a apasa ngeni Moses, 10“Kopwe kapas ngeni ekkewe aramasen Israel o üreniir: ‘Lupwen öüpwe pwereló peekilón Jordan o tolong lón ewe fönü Kanaan, 11mwirin, öüpwe filaló ekkewe telinimw pwe repwe ämi telinimwen op seni feieingaw fäniten ekkewe aramas, pwe ewe chón nii aramas mi eniiserin niieló emön aramas epwe tongeni süüló ikenan. 12Ekkewe telinimw repwe leenien tümwün seni feiengaw fänitemi ren määrärin ewe mi mäló mi mochen alemööw än emön föfför. Pün ewe chón nii aramas esap mäló tori an epwe üütä me mwen ewe mwiichen aramas lón köpwüng. 13Iwe, öüpwe filaló wonu telinimw seni leiin ekkewe telinimw öüpwe ngeni chón ewe einangen Levi fäniten leenien op seni feiengaw. 14Öüpwe filaló ülüngät telinimw me öötiwen ei chaanpwuupwu Jordan pwal ülüngät telinimw me lotowun ei chaanpwuupwu Jordan lón ewe fönü Kanaan. 15Ekkeei wonu telinimw repwe fäniten leenien op seni feiengaw fäniten ekkewe aramasen Israel, fäniten ekkewe chón ekis ra wilipósóló leiimi, pwal fäniten ekkewe chón amöömö me kamö pisek mi sääifeil leiimi. Ese lifilifil ika iö mi eniiseren nii emön aramas epwe tongeni süüló ikenan.
16“ ‘Nge are emön aramas a wichii o niieló pwal emön aramas ren och pisek seni mächä, ei epwe nóm lón tettelin niimanaw. Iwe, emön chón niimanaw epwe fókkun ninniiló. 17Iwe, are emön aramas a efeiengawa o niieló pwal emön aramas ren eföw faaw mi wätte, iei ew föfförün niimanaw. Ewe chón niimanaw epwe fókkun ninniiló. 18Pwal are emön aramas a wichii o niieló pwal emön aramas ren och pisekin efeiengaw seni mwüüch, ei epwe nóm lón tettelin niimanaw. Ewe chón niimanaw epwe fókkun ninniiló. 19Määrärin ewe mi mäló mi wesewesen kkan ngeni epwe wiisen niieló ewe chón niimanaw. Lupwen repwe chufengen, ewe chón mochen älemööw ewe föfför epwe niieló ewe chón niimanaw. 20Are emön aramas a fen amollätä lón an ekiek pwe epwe tiini pwal emön aramas ren an opwut i ika mónei ngeni i och mettóch mi efeiengaw ina minne a mäló, iei ew föfförün niimanaw. 21Are emön aramas a soong o öfönü pwal emön aramas, ina minne ei aramas a mäló, iei ew föfförün niimanaw. Lón ekkeei sókkun lapalap, määrärin ewe mi mäló mi wesewesen arap ngeni epwe niieló ewe chón niimanaw lupwen repwe chufengen.
22“ ‘Nge are emön aramas a tiini pwal emön aramas nge sap seni an amollätä lón an ekiek ren an opwut i, pwal are emön aramas a móneei och mettóch nge a chök sereni le küüw pwal emön aramas, 23pwal are emön aramas a chök eniiseren oturätiw eföw faaw wón pwal emön aramas, ina minne ewe aramas a mäló, nge iir resap koum fengen, 24are ekkeei sókkun lapalap repwe fis, mwirin, ewe mwiichen aramas repwe wiisen souköpwüng lefiilen ewe chón nii aramas me ewe chón kütta an epwe alemööw chcha alóngólóng wón öllük. 25Iwe, ewe mwiichen aramas repwe tümwünü ewe chón nii aramas seni lepöün ewe chón kütta an epwe alemööw chcha. Repwe eliwinaló ewe chón nii aramas ngeni ewe leenien op seni feiengaw. Iwe, i epwe nónnóm ikenan tori än ewe souasór mi kepit ngeni ewe lömmis mi pin epwe mäló.
26“ ‘Nge are ewe chón nii aramas epwe toowu lükün ewe telinimwen op seni feiengaw, 27nge määrärin ewe mi mäló mi wesewesen arap ngeni, iei i ewe chón mochen kütta an epwe alemööw chcha, epwe küna ätewe me lükün öüküükün ewe telinimwen op seni feiengaw nge epwe niieló ewe chón nii aramas; iwe, ei esap nóm lón tettelin niimanaw, 28pwokiten pwüngün pwe ewe chón nii aramas epwe chök nómwóló lón ewe telinimwen op seni feiengaw tori än ewe souasór mi lap epwe mäló. Nge mwirin än ewe souasór mi lap epwe mäló, ewe chón nii aramas a tongeni liwinisäfäliti leenian lón fönüwan.
29“ ‘Ikkeei ekkewe öllük fänitemi öüpwe föri pwüngüür seni ew pilóón aramas tori pwal ew, ese lifilifil ika ia öüwa nónnóm ie.
30“ ‘Chón niimanaw meinisin repwe ninniiló, are mi wor lap seni emön chón pwärätä. Nge are a wor emön chök chón pwärätä; iwe, esap naaf minne a ääni pwärätä. Emön aramas esap tipisin mäló ren emön chök chón pwärätä.
31“ ‘Iwe pwal och, öüsap etiwa och liwinin penmanaw fäniten manawen emön chón tipisin niimanaw mi pwüngüló pwe epwe ninniiló. Iteiten fansoun, ekkewe chón niimanaw repwe chök ninniiló.
32“ ‘Are emön aramas a niieló pwal emön aramas, nge mwirin, a süü ngeni ew me leiin ekkewe telinimwen op seni feiengaw, öüsap etiwa och liwinin penmanaw fäniten ena aramas pwe i epwe tongeni liwiniti ewe fönü ia i a nóm ie me mwen än ewe souasór epwe mäló.
33“ ‘Ei epwe tümwünü pwe ewe fönü ia öüpwe nónnóm ie esap limengaw, pün niimanaw a elimengawa ewe fönü. Iwe, esap wor och omwusomwusen tipis epwe tongeni för fäniten niimanaw, chiilón chök ren än ewe chón niimanaw epwe ninniiló. 34Iei minne, öüsap elimengawa ewe fönü ämi öüpwe le nónnóm ie, pün ngang üwa nónnóm ikenan. Pün ngang ewe SAMOL üwa nónnóm leiin ekkewe aramasen Israel.’ ”
Öpwüpwülüwen ekkewe fefin mi tongeni föffönü fönü
36Mwirin, ekkewe möküren ewe eterengesin Kilead iir mwirimwirin Makir nöün Manassah we mwän, nge Manassah nöün Josef, ra feitto ren Moses me ekkewe souemmwenin familien Israel fän ar ei tungór. 2Iwe, ra apasa: “Ewe SAMOL a öllük ngenuk en äm samol Moses pwe kopwe inetii ewe fönü wón ekkewe aramasen Israel pwe repwe fönüweni fän pwüngün ewe ütüüt mi pin. Ewe SAMOL a pwal öllük ngenuk en äm samol pwe kopwe angei fönüwen pwiim we Zelofehad o ngeni nöün kewe fefin. 3Nge are emön me leiir a pwülüweni emön mwän seni pwal ew kewe einangen Israel, mwirin inetin neminnewe fönü epwe le kapacholong lón inetin chón ewe einang i a pwüpwpülülong lón. Ren ei lapalap, üküükün unusen fönüen äm einang epwe le kisiló. 4Mwirin, lupwen epwe tori än ekkewe aramasen Israel we Ierin Suupili, inetiir we fönü epwe kapach ngeni inetin chón ewe einang iir ra pwüpwülülong lón. Ei epwe efisätä pwe ewe fönü epwe le pöütüfóchóló seni fönüwen einangen äm we leewo.”
5Iei minne, Moses a ngeni ekkewe aramasen Israel ei ölük seni ewe SAMOL. A apasa: “Meet ewe ekkewe mwän seni ewe einangen Josef ra apasa, a pwüng. 6Iwe, iei meet ewe SAMOL a öllük fänäsengesin nöün Zelofehad kewe fefin: ‘Repwe tongeni pwüpwülü ngeni iö ra efich, nge repwe chök tongeni pwüpwülülong lón pwisin än ar we leewo einang. 7Epwe iei usun pün esap wor inetin ew einang fönü epwe ló ngeni pwal ew einang. Pün inetin iteiten ew me ew einang fönü epwe chök nómwóló usun chök lón ewe äewin fansoun ra einet. 8Ekkewe fefin lón ekkewe einangen Israel mi nóm lón tettelin ar repwe angei inetiir fönü, repwe fókkun chök pwüpwülü me lón ar kewe einang. Epwe iei usun pwe ekkewe aramasen Israel meinisin repwe chök nómwóló wón inetin ar kewe einang fönü. 9Esap wor inetin ew einang fönü epwe ló ngeni pwal ew einang. Ew me ew einangen Israel epwe chök kömwöchüló wón inetin fönü.”
10Iwe, nöün Zelofehad kewe fefin ra föri usun chök minne ewe SAMOL a öllük ngeni Moses. 11Pün Mahlah, Tirzah, Hoklah, Milkah me Noah, iir nöün Zelofehad kewe fefin ra pwüpwpülü ngeni ekkewe mwän nöün pwiin semer we. 12Iir ra pwüpwpülülong lón ewe eterengesin Manassah nöün Josef mwän. Iwe, inetiir fönü a chök nómwóló lón einangen ar we leewo.
13Ikkeei ekkewe öllük me pwüüng ewe SAMOL a ngeni ekkewe aramasen Isreal meren Moses lupwen ra nóm lón imwer kewe imw mangaku lón ekkewe maasiesin Moab órun ewe chaanpwuupwu Jordan äwenewenen Jeriko me epeek.