Nehemiah

Nehemiah a iótek fäniten aramasan kewe

1 Ikkeei ekkewe porausen manawen Nehemiah nöün Hakaliah we mwän.

Lón ewe maram Kislev,a lón ewe örüween ierin mwüün Artasörksiis, ngang Nehemiah üwa nóm lón Susa ew telinimwen king mi pöchökkül tittin. 2Iwe, lupwen äi nóm lón Susa, emön me leiin pwii kewe itan Hanani a feitto pwe epwe äämwaei fiti ekkóch mwän ra wareto seni Judah. Iwe, üwa kapas eiis ngeniir usun nónnómwun ekkewe chón Sus mi nómwetiw resap fiti ekkewe chón ooló me lón Judah, iir chókewe mi sü lupwen ewe fansoun ooló pwal usun nónnómwun Jerusalem.

3Iwe, ra apasa ngeniei, “Ekkewe lussun aramas mi nómwetiw resap fiti ekkewe chón ooló ra nóm lón wätten weires me sääw. Nge tittin ewe telinimw Jerusalem ra chüen taatiw, pwal asamalapan kewe mi karaló resap mwo försäfäl.”

4Iwe, lupwen üwa rongorong usun ekkeei mettóch, üwa móttiw o kechiw. Enletin, lón üküükün ekkóch rän, ngang üwa ngüüngüres o öchüün me iótek ngeni ewe Koten läng. 5Mwirin, ngang üwa apasa,

“Ngang üwa tungór ngenuk äi SAMOL, Koten läng, en ewe Kot mi lapalaap o eniwokkus. En ka öpwönüwetä óm pwonen tong ese mwüch ngeni chókana mi tongek me älleasochisi óm kewe öllük. 6Kose mochen kopwe öüüw selingóm pwe kopwe rongorong än noum ei chón angang iótek. Kopwe nennetiw o küna äi iótek ngenuk lerän me lepwin fäniten ekkewe aramasen Israel noum kewe chón angang. Ngang üwa pwärätä pwe äm chón Israel aia tipis ngenuk. Ewer, pwal ngang me chón äi famili aia tipis. 7Äm aia tipis ngenuk pwe äm aisap älleasochisi óm kewe öllük me pwüüng me öüröür en ka ngeni keem meren noum we chón angang Moses.

8Ngang üwa tungór, kose mochen kopwe chechchemeni meet en ka apasa ngeni noum we chón angang Moses, lupwen ka apasa, ‘Are ämi chón Israel öüpwe tipis ren ämi atai ewe pwonen lefiil mi ölükülük, ngang üpwe atoropassa kemi leiin chón ekkewe mwüü. 9Nge are öüpwe liwinsäfäl ngeniei o älleasochisi äi kewe öllük, mwirin, inamwo are öüpwe ooló toowaw tori leesópwun fönüfan, ngang üpwe eliwinisäfäli kemiito seni ikenan ngeni ewe leeni ngang üwa filätä pwe ina ewe leeni itei epwe lingeló me ie.’

10Iwe, äm noum chón angang me noum aramas en ka angasa keem ren óm manaman mi lapalaap pwal ren pöum mi pöchökkül. 11Äi SAMOL, ngang üwa tungór, kose mochen kopwe suuki selingom ngeni än noum ei chón angang iótek. Kopwe pwal öüseling ngeni ekkewe iótek än chókana me leeim mi pwapwaiti ar repwe meniniti itom. Üwa tungór ngenuk kose mochen kopwe mwüüt ngeniei ngang noum ei chón angang pwe üpwe wir meren ewe king, lupwen üpwe feilló iei o tungórei pwe epwe ümöümöch ngeniei. Kopwe atolonga lón letipan pwe epwe kirekiröch ngeniei.”

Lón ena fansoun ngang üwa nöün ewe king chón amollätä ünüman.

Ewe king a tiinaló Nehemiah Jerusalem

2 Iwe, a fis pwe lón ewe maram Nisan,b lón rüween ierin mwüün King Artasörksiis, ngang üwa amollotä ünümen ewe king wain o uwato ren. Nge esap fän ew mwo äi üpwe wóólólilen me fän mesan me mwen ei fansoun. 2Iei minne, ewe king a eisiniei, “Pwata wón mesom a wóólólilen nge en kosap samwaw? Esap wor och me lükün chök ei lólilen a pop seni lón lelukom.”

Mwirin, ngang üwa fókkun nuokkus, 3nge üwa apasa ngeni ewe king, “Amwo ewe king epwe manaw tori feilfeilló chök! Pwata üsap wóólolilen nge ewe telinimw ia äi kewe leewo ra peias ie a taatakis o asamalapen tittin kewe ra karaló ren ekkei?”

4Mwirin, ewe king a eisiniei, “Meet ka mochen tungór seniei?”

Iei minne, üwa iótek ngeni ewe Koten läng. 5Iwe, ngang üwa apasa ngeni ewe king, “Are a öch mereemw en äi king, nge are ngang noum ei chón angang üwa küna ümöümöch me fän mesom; iwe, kopwe tiinieiló Judah pwe üpwe öüüsäfälietä ewe telinimw ia äi kewe leewo ra peias ie.”

6Mwirin, ewe king a eisiniei (nge ewe kiwiin a móót ünükkün), “Epwe ifa üküükün pwongiom? Nge ineet kopwe liwinsäfäl?” Iwe, ewe king a pwapwaiti an epwe tiinieiló, ina minne üwa üreni ewe fansoun üpwe feilló.

7Iwe, üwa pwal apasa ngeni ewe king, “Are mi öch mereemw en äi king, kopwe makkei echö taropwe pwe üpwe uwealó ren ekkewe kepina lón ewe kinikin lotoun ewe chaanpwuupwu Eufreitis pwe repwe mwüüt ngeniei pwe üpwe pwereló lón ewe kinikin tori üpwe tikeri Judah. 8Kose mochen üpwe pwal uwealó echö taropwe ren Asaf ewe mi wiisen tümwünü än ewe king we wöllap pwe epwe ngeniei irä pwe üpwe aea le föri ekkewe asamalapen ewe imw mi pöchökkül mi nóm ren ewe imwenfel, pwal fäniten tittin ewe telinimw me fäniten ew imw ngang üpwe nóm lón.” Iwe, ewe king a mwüütätä ngeniei ekkeei mettóch, pwokiten ümöümöchün pöün äi we Kot a etiei. 9Mwirin, ngang üwa feilló ren ekkewe kepina lón ewe kinikin lotoun ewe chaanpwuupwu Eufreitis o üwa ngeniir nöün ewe king kewe taropwe. Nge ewe king a pwal tiinaló ekkóch meilapen mwiichen sounfiu me ew mwiichen chón waawa óris pwe repwe tümwünüei.

10Nge lupwen Sanballat ewe re Horon me Tobiah emön nöüwiisen Ammon ra rong usun ei poraus, ra fókkun letipechchou pwe emön aramas a feitto pwe epwe kütta usun nónnómöchün ekkewe chón Israel.

Nehemiah a ouwasacha tittin Jerusalem

11Iwe, üwa tori Jerusalem o üwa nónnóm üküükün ülüngät rän. 12Mwirin, üwa pwäätä o ännifewu lón ew pwinin, ngang me ekkóch mwän ra fitiei. Ngang üsap üreni emön usun ewe akkóót äi we Kot a atolonga lón lelukei pwe üpwe föri lón Jerusalem. Esap wor emön maan a nóm reei, chiilón chök ewe emön dongki ngang üwa waawa.

13Iwe, ngang üwa toowu lón ewe pwinin seni ewe telinimw me lón ewe Asamalapen Leemól o üwa feilló ren ewe Chönüttun Serepenit o pwereló ren ewe Asamalapen Ioien Piipi. Üwa ouwasacha tittin ewe telinimw Jerusalem mi taatiw me asamalapen tittin kewe mi karaló ren ekkei. 14Mwirin, üwa pwereló ren ewe Asamalapen Pwuachchen Kólik pwal ren än King we Nómwun Kólik, nge ewe dongki ngang üwa waawa esap tongeni an epwe pwereló leiin ewe ioien mettóch mi taaló. 15Iei minne, üwa feittä ren ewe leemólun Kidron lón ewe pwinin o üwa sachei ewe tiit. Mwirin, üwa kulsäfäl o tolongsäfäl me lón ewe Asamalapen Leemólun. 16Nge ekkewe nöüwiisen ewe telinimw resap silei ia üwa fen feilló ie ika meet üwa föri. Pün tori iei, ngang üsap mwo apasa ngeni emön och usun äi kewe akkóót. Ngang üsap mwo kapas ngeni ekkewe chón Sus me ekkewe souasór me ekkewe aramas tekia me ekkewe nöüwiis ika pwal ekkewe ekkóch aramas, itä pwüngün pwe iir repwe föri ewe angang.

17Mwirin, üwa apasa ngeniir, “Ämi öüwa pwisin küna ei weires sia nóm lón, pün Jerusalem a taatakis, nge asamalapen tittin kewe ra karaló. Öü etto, öüsipwe öüüsäfälietä tittin Jerusalem pwe sipwe atookichewu seni lón ei itengaw.” 18Iwe, üwa pwal aporausa ngeniir usun ümöümöchün pöün äi we Kot a nónnóm wói pwal usun meet ewe king a apasa ngeniei.

Iwe, ra apasa, “Öüsipwe üütä o poputä le öüüsäfälietä ewe tiit.” Iei usun ra popuetä ei angang mi mwirinnö.

19Nge lupwen Sanballat ewe re Horon me Tobiah ewe nöüwiisen Ammon me Keshem ewe re Arab ra rongorong usun äm ei akkóót, ra takiri keem o turunufasei keem. Iwe, ra apasa, “Meet ei ämi öüwa föri? Ifa usun, öüpwe le üüngeni ewe king?”

20Nge ngang üwa pölüweniir o apasa ngeniir, “Pwisin ewe Koten läng epwe ötüfichi keem lón ei angang. Iei minne, äm nöün keei chón angang aia üütä o försäfäli ei tiit. Nge ämi esap wor inetimi ika ämi pwüüng ika ämi uruwo lón Jerusalem.”

Försäfälin ewe tittin Jerusalem

3 Iwe, Eliashib ewe souasór mi lap me ekkewe pwal ekkóch souasór ra popuetä le försäfäli ewe Asamalapen Siip. Ra epinaló ewe asamalap o ra atolonga ekkewe asam lón leenier. Ra pwal senätä ewe tiit tori ewe Imw Tekia itan Ipwükü o ra epinaló. Mwirin, ra sópweló le angang tori ewe Imw Tekia än Hanani. 2Ekkewe aramas seni ewe telinimw Jeriko ra senätä ewe kinikin ünükkün senien Eliashib me chienan kewe. Nge Zakkur nöün Imri we mwän a senätä ewe kinikin ünükkün senien ekkewe chón Jeriko we.

3Iwe pwal nöün Hassenaah kewe mwän ra förätä ewe Asamalapen Iik. Ra amasalong ekkewe irän penkasam lón leenier o pachetä ekkewe asam fiti ömmwöchür me lókkur. 4Meremoth nöün Uriah we mwän nge Urijah nöün Hakkoz a senisäfälietä ewe kinikin ünükkür. Meshullam nöün Berekiah we mwän nge Berekiah nöün Meshezabel a senisäfälietä ewe kinikin ünükkün senien Meremoth we. Iwe, Zadok nöün Baana we mwän a senisäfälietä ewe kinikin ünükkün Meshullam. 5Ekkewe aramas seni Tekoa ra senisäfälietä ewe kinikin ünükkün Zadok. Nge ar kewe aramas tekia resap atolonga afarer fän ewe angang nöüür kewe souemmwen ra ewiisa ngeniir.

6Iwe pwal Joiada nöün Paseah we mwän me Meshullam nöün Besodeiah we mwän ra försäfäli ewe Asamalapen Yeshana. Ra amasalong ekkewe irän penkasam o pachetä ekkewe asam fiti ömmwöchür me lókkur. 7Iwe, Melatiah seni Kibeon me Jadon seni Meronoth pwal ekkewe aramas seni Kibeon me Mizpah ra sópweló le senisäfälietä ewe kinikin seni ünükkün Jehoiada me Meshullam tori ewe kinikin ünükkün ewe leenien oofes än kepinan ewe kinikin lotoun ewe chaanpwuupwu Eufreitis. 8Nge Uzziel nöün Harhaiah we mwän i emön me leiin ekkewe chón för pisek seni kolt a senisäfälietä ewe kinikin ünükkün senier we. Iwe, Hanaiah, emön leiin ekkewe chón för löö, a senisäfälietä ewe kinikin ünükkün Uzziel. Ra försäfäli tittin Jerusalem tori ewe Tiit mi Chöölap. 9Iwe, Refaiah nöün Hur we mwän, ewe sounemmwenin ewe esóp kinikinin Jerusalem, a senisäfälietä ewe kinikin ünükkün Uzziel me Hanaiah. 10Jedaiah nöün Harumaf we mwän a senisäfälietä ewe kinikin äwenewenen imwan we. Iwe, Hattush nöün Hashabneiah we mwän a senisäfälietä ewe kinikin ünükkün senien Jedaiah we. 11Iwe, Malkijah nöün Harim we mwän me Hashub nöün Pahath-Moab we mwän ra senisäfälietä ewe kinikin ünükkün senien Hattush we me ewe imw tekia Leenien Uum. 12Nge Shallum, nöün Hallohesh we mwän, me nöün kewe fefin ra senisäfälietä ewe kinikin ünükkün senien Malkijah me Hashub we. Shallum i souemmwenin pwal ewe esóp kinikinin Jerusalem.

13Iwe, ekkewe aramas seni Zanoah ra försäfäli ewe Asamalapen Leemólun fän emmwenien Hanun. Ra amasalong ekkewe irän penkasam o pacheetä ekkewe asam fiti ömmwöchür me lókkur. Ra pwal senisäfälietä ewe tiit, üküükün engöröw mwalüa tori ewe Asamalapen Ioien Piipi.

14Malkija nöün Rekab we mwän, ewe souemmwenin ewe kinikin Beth Hakkerem a försäfäli ewe Asamalapen Ioien Piipi. A föri ewe asamalap o pacheetä asaman kewe fiti ömmwöchür me lókkur.

15Shallum nöün Kol-Hozeh we mwän, ewe souemmwenin ewe kinikin Mizpah, a försäfäli ewe Asamalapen Pwuachchen Kólik. A försäfäli ewe asamalap, awora sissin, pacheetä asaman kewe fiti ömmwöchür me lókkur. A pwal senisäfälietä tittin ewe nómwun kólik itan Shelah (iei Siloam) mi nóm arap ngeni ewe Tännipin King, atooraló ngeni ekkewe natö mi feittiw seni ewe Telinimwen David. 16Tapweto mwirin ätei, Nehemiah nöün Azbuk we mwän, ewe souemmwenin esóp ewe fönü Beth Zur a senisäfälietä ewe tiit ünükkün senien Shallum we tori ewe leeni mi nóm äwenewenen peiasen David we, tori ewe nómwun kólik förien aramas, pwal tori ewe Imwen mi Pwora.

17Tapweto mwirin ätei, ew mwiich seni chón ewe einangen Levi, ra angang fän emmwenien Rehum nöün Bani we mwän. Mwirin, Hashabiah, ewe souemmwenin esóp ewe fönü Keilah, a nemeni ewe angangen senisäfälietä ewe tiit fäniten an we kinikin ünükkün senien Rehum we. 18Mwirin, chiechier kewe chón fönüwer, fän emmwenien Binnui nöün Henadad we mwän, ewe souemmwenin pwal ewe esóp fönü Keilah, ra senisäfälietä ewe kinikin ünükkün senien Hashabiah we. 19Iwe, Ezer nöün Jeshua we mwän, ewe souemmwenin Mizpah, a senisäfälietä pwal ew kinikin äwenewenen ewe äletä ngeni ewe Imwen Iseis Pisekin Maun tori pwokuukun ewe tiit. 20Baruk nöün Zabbai we mwän a fókkun föröchchüw le senisäfälietä pwal ew kinikin ünükkün senien Ezer we seni pwokuukun ewe tiit tori asamen imwen Eliashib, ewe souasór mi lap. 21Meremoth nöün Uriah we mwän, nge Uriah nöün Hakkoz, a senisäfälietä pwal ew kinikin ünükkün senien Baruk we, seni äwenewenen asamen imwen Eliashib we tori leesópwun ewe imw.

22Mwirin, ekkewe souasór mi imweim lón ewe maasies ünükkün Jerusalem, ra senisäfälietä ewe kinikin ünükkün senien Meremoth we. 23Benjamin me Hasshub ra senisäfälietä ewe kinikin äwenewenen imweer kewe peekilón senien ekkewe souasór we. Nge Azariah nöün Maaseiah we mwän, nge Maaseiah nöün Ananiah, a senisäfälietä ewe kinikin ünükkün imwan we. 24Mwirin, Binnui nöün Henadad we mwän, a senisäfälietä pwal ew kinikinin ewe tiit ünükkün senien Azariah we, seni imwen Azariah we tori pwokuukun ewe tiit. 25Palal nöün Uzai we mwän a sópweló le senisäfälietä seni ewe kinikin äwenewenen ewe pwokuuku me ewe imw tekia mi köüwu seni ewe imwen king mi nóm asan ünükkün ewe leenien chón mas. Nge Pedaiah nöün Parosh we mwän a senisäfälietä ewe kinikin ünükkün senien Palal we. 26Iwe, ekkewe chón angang ngeni ewe imwenfel mi nónnóm wón ewe chukuchukutä Ofel, ew kinikinin lón ewe telinimw Jerusalem, ra senisäfälietä ewe kinikin ünükkün senien Pedaiah we tori ewe Asamalapen Kólik mi säpengeni öötiw me ewe imw tekia mi köüwu. 27Mwirin, ekkewe aramas seni Tekoa ra senisäfälietä pwal ew kinikin seni ewe imw tekia mi köüwu o wätte tori ewe tittin Ofel.

28Iwe, ekkewe souasór ra senisäfälietä ewe tiit wón ewe palapaletä asen ewe Asamalapen Òris, emön me emön a senisäfälietä äwenewenen en me imwan. 29Zadok nöün Immer we mwän a senisäfälietä ewe kinikin ünükkün senien ekkewe souasór we, äwenewenen pwisin imwan we. Nge Shemaiah nöün Shekaniah we mwän, ewe chón mammasa ewe Asamalapen Öötiw, a senisäfälietä ewe kinikin ünükkün senien Zadok we. 30Hananiah nöün Shelemiah we mwän me Hanun ewe awonomönün nöün Zalaf mwän, ra senisäfälietä pwal ew kinikin ünükkün senien Shemaiah we. Nge Meshullam nöün Berekiah we mwän a senisäfälietä ewe kinikin ünükkün senien Hananiah we me Hanun, äwenewenen pwisin imwan we. 31Malkijah, emön me leiin ekkewe chón för pisek seni kolt, a senisäfälietä ewe kinikin ünükkün senien Meshullam we tori imwen ekkewe chón angang ngeni ewe Imwenfel me imwen ekkewe chón amöömö me kamö, äwenewenen ewe Asamalapen Leenien Chek. Mwirin, ra sópweló tori ewe ruum mi nóm asan ren ewe pwokuuku. 32Iwe, ekkewe pwal ekkóch chón för pisek seni kolt ra senisäfälietä ewe tiit seni ewe ruum mi nóm asan ren ewe pwokuuku tori ewe Asamalapen Siip.

Tümwünün ewe tiit seni chókewe mi üüngeniir

4 Iwe, lupwen Sanballat a rongorong pwe äm aia senisäfälietä ewe tiit, a piitä an soong me lingeringer. Iwe, a esiita ekkewe chón Sus. 2Iwe, a kapas me fän mesen chiechian kewe me ekkewe meilapen ewe mwiichen sounfiun Samaria o apasa, “Meet ei ekkeei chón Sus mi apwangapwang ra föri? Ra ekieki pwe repwe tongeni försäfäli ar ei tiit pwe ekkewe aramas mi nóm ünükküür repwe likitireló? Ifa usun, repwe ääni ekkewe asór ikenan? Repwe tongeni äwesi ewe angang lón ew chök rän? Ifa usun, repwe tongeni aeasäfäl ekkewe faaw mi kar ra angeiirewu seni ewe ioien piipi?”

3Nge Tobiah ewe re Ammon mi nóm ünükkün a apasa, “Are emön foks epwe mwetetä wón ar we tiit faaw ra senisäfälietä, epwe asöönätiw.”

4Mwirin, ngang üwa iótek: “O äm Kot, kopwe öüselinga keem, pün äm aia küna turunufas. Kopwe äsepa ngeniir ar takirin ämängawa keem. Kopwe esechchireló pwe chón opwuter repwe liäpeniir o uweireló pwe repwe ooló lón pwal ew fönü. 5Kosap pwölüweló ar kana pwuupwungaw, kosap pwal ómóeló ar kana tipis seni fän mesom, pwokiten ra turunufasei ekkewe chón sees.”

6Iwe, aia senätä ewe tiit pwellin unusen ewe telinimw, nge tekian a chök tori esóp, pün ekkewe aramas ra fókkun angang weires.

7Nge lupwen Sanballat me Tobiah me ekkewe chón Arab me ekkewe chón Ammon me ekkewe chón Ashdod ra rongorong pwe ewe angang wón ewe tittin Jerusalem mi chök sópwósópwóló le försäfäl pwal ekkewe pwaang wón ewe tiit ra chök arap ngeni ar repwe le pineló, iwe, ra fókkun soong. 8Iwe, iir meinisin ra chufengen le föri ar rawangaw ar repwe feitto o maun ngeni Jerusalem pwe repwe efisätä fitikoko lón. 9Iwe, inamwo nge äm aia iótek ngeni äm we Kot o eleenia chón mammas pwe repwe masa ewe telinimw lerän me lepwin pwe repwe tümwünü keem reer.

10Iwe, lón ei fansoun, ekkewe aramasen Judah ra poputä le lal o apasa, “Ekkewe chón uwochchow ra mölüülü. A pwal wor chómmóng ioien faaw mi mmök ra chukuchukutä, iei minne äm aisap tongeni äwesaló le senisäfälietä ewe tiit.”

11Nge lón ei ótun, ekkewe chón opwuta keem ra apasa, “Me mwen ar repwe silei meet epwe fis, sipwe mwittir feitto lefiiler o niireló pwe sipwe föri minne ewe angang epwe ükütiw ren.”

12Mwirin, ekkewe chón Sus mi nóm arap ngeniir ra feitto o üreni keem fän chómmóng, “Ekkewe chón opwutakich repwe feitto seni ese lifilifil menni leeni ia ra nóm ie o maun ngeni kich.”

13Iei minne, ngang üwa eleenia ekkewe mwän lükünüppen ewe tiit ren ekkewe kinikin mi chök chüen tekisón, ia ewe tiit a chök chüen suukuló me ie. Üwa eleenier lón tettelin ar kewe famili fän nöüür ketilas, wókuur siles, me nöüür esefich. 14Iwe, mwirin äi üwa nengeni fichi usun ekkewe mettóch, üwa üütä o köörifengeni ekkewe aramas tekia me ekkewe nöüwiis pwal ekkewe lussun aramas o apasa ngeniir, “Öüsap nuokkusitiir. Öüpwe chechchemeni ewe Samol mi lapalaap o eniwokkus. Öüpwe maun fän iten pwiimi kewe, fäniten nöümi kewe äät me nöümi kewe nengngin pwal fäniten pwülüwemi kewe me leeniemi kewe.”

15Lupwen ekkewe chón opwutakeem ra rongorong pwe aia silei usun ar we rawangaw, iwe, ra meefi pwe Kot a ataeló ar we raaw. Mwirin, äm meinisin aia liwinsäfäliti äm angang wón ewe tiit.

16Nge seni ewe ränin feilló, esóp me leiin neii kewe chón angang ra angang ngeni ewe tiit, nge pwal ewe esóp ra üütä nge kömwöch siles, eppetin inis lón maun me esefich o üföüf üföüfen maun. Nge ekkewe meilap ra pwisin eleenier lükünsökürün ekkewe aramasen Judah meinisin 17mi senätä ewe tiit. Pwal chókewe mi wiisen keki mettóch mi chou ra sapaatä uwoser wón efóch pöüür, nge ra köwöch ar pisekin maun wón efóch. 18Nge iteiten emön me emön ekkewe chón sees ra riietä nöüür ketilas leepekir lupwen ra sees. Nge ewe mwän mi wiisen ettiki ewe rappwan esilesil a chök nóm ünükki.

19Mwirin, üwa äwewe ngeni ekkewe aramas tekia me ekkewe nöüwiis pwal ekkewe lussun aramas, “Ewe angang a men meresires o a toowaw fesen lefiilen emön me emön leiich lón ach angang ngeni ewe tiit. 20Lupwen öüpwe rongorong tikin ewe rappwan esilesil, öüpwe mwittirito ngeni ewe leeni ia a tik me ie. Ach we Kot epwe maun fänitach.”

21Iwe, aia sópwósópóló le föri ewe angang, poputä seni an a sarameló ünimweirän tori füü ra tinewu lepwin, nge esóp me leiin ewe mwiichen aramas ra mammas fän wókuur siles. 22Lón ena fansoun, ngang üwa pwal üreni ekkewe aramas mi nónnóm lükün ekkewe tiit pwe repwe mwökütülong lón Jerusalem. Ren ei, iir me nöüür kewe chón angang repwe tongeni mammas lepwin, nge repwe pwal tongeni angang lerän. 23Lón ei fansoun, esap wor emön me leiim a pwilitätiw üfan, sap ngang ika määräri kewe ika neii kewe chón angang ika ekkewe chón mas mi nóm reei, chiilón chök ika aipwe pwilitiretiw pwe repwe soop. Emön me emön leiim a chök mollotä le uweei an pisekin maun iteiten fansoun meinisin.

Nehemiah a peni ekkewe chón riäfföü

5 Iwe, lón ei fansoun a wor chómmóng mwän me pwülüwer kewe ra siön lalangaw ngeni chiechier kewe chón Sus. 2Pün mi wor ekkóch me leiir ra apasa, “Äm aia koon chómmóng pün a wor nöüüm kewe äät me nöüüm kewe nengngin. Iei minne, öüpwe mwüüt ngeni keem äm aipwe angei föün wiit pwe aipwe mwöngö o manaw.”

3Mi pwal wor ekkóch ra apasa, “Äm aia fen ääni önükünükün äm liwinimang mooni fönüem kewe me äm kewe tännipiin irän wain me imwem kewe pwe äm aipwe tongeni kamö föün wiit pwokiten ewe lengita.”

4Mi pwal wor chókana mi apasa, “Äm aia paaro mooni pwe aipwe tongeni püngütiw ngeni ewe king takisesin fönüem kewe me äm kewe tännipiin irän wain. 5Inamwo are äm me pwiim kewe chón Sus aia ew chök fituk, pwal nöüüm kana ra usun chök nöüür kana, nge äm aia asópwisekin mwüütaló nöüüm kewe mwän me fefin pwe aramas repwe nöüniir amanaw. Äm aia fen amöömöló ekkóch me leiin nöüüm kewe fefin pwe aramas repwe nöüniir amanaw. Nge äm aia lipwääkingaw äm aipwe möönisäfäliir pwokiten aia fen ääni önükünükün äm liwinimang mooni ekkóch fönüeem kewe me äm kewe tännipiin irän wain.”

6Iwe, lupwen üwa rongorong ar siöngaw me ar keei kapas, üwa fókkun soong. 7Mwirin äi ekieköchchüüw usun ei lapalap, üwa öpwüngü ekkewe aramas tekia me ekkewe nöüwiis o üwa apasa ngeniir, “Iteiten emön me emön leiimi öüwa eriäfföwü pwisin määrärimi kewe aramasen fönüemi ren ämi angei seniir manawen nöümi mooni ra paaroni.” Mwirin, ngang üwa akökkööw ew mwiich pwe üpwe kapas ngeniir usun ei osukosuk. 8Iwe, lón ewe mwiich, üwa apasa ngeniir, “Ekkóch me leiich sia föri üküükün ach tongeni pwe sipwe möönisäfäli määrärich kewe chón Sus ra pwisin amöömöreló ngeni ekkewe chón lükün chón ekis. Nge iei ämi öüwa fen pwal amöömösäfälireló pwe aramas repwe nöüniir amanaw. Fän fitu öüpwe möönsäfäliir?” Iwe, ra chök fanafanaló pwokiten resap silei meet repwe apasa.

9Mwirin, üwa pwal sópweló le apasa, “Meet ei ämi öüwa föri esap pwüng. Ifa usun, öüsap fätäl lón ämi nuokkusiti ach we Kot pwe chón ekkewe mwüü mi opwuta kich resap turunufasei kich? 10Nge pwisin ngang me pwii kewe me neii kewe chón angang äm aia mwüütätä ngeni ekkewe aramas pwe repwe paaro seni keem mooni me föün wiit. Öüse mochen öüsipwe ükütiw le angei manawen än emön liwinimmang ngeni kich. 11Ikenäi chök öüpwe eliwinisäfäli ngeniir fönüer kewe me ar kewe tännipiin irän wain me ar kewe tännipiin olif pwal imwer kewe. Öüpwe pwal omwusaló ar kewe liwinimmangen pwüküen mooni, föün wiit, wain me apüra seni föün olif.”

12Iwe, ra apasa, “Äm aipwe eliwinisäfäli ekkeei mettóch, aisap pwal chüen eriääni seni ekkewe aramas och mettóch. Äm aipwe le föri meinisin minne ka apasa.”

Mwirin, ngang üwa köörato ekkewe souasór o föri pwe ekkewe aramas tekia me ekkewe nöüwiis repwe pwon fän ökköpöl pwe repwe föri meet ra ääni pwon. 13Üwa pwal opowaawu leppwülün üfei we o apasa, “Epwe iei usun än Kot epwe opowaawu iteiten emön me emön aramas seni lón en me imwan pwal seni lón en me fönüan ika esap öpwönüwetä ei pwon. Amwo ei sókkun aramas epwe kääriwu seni lón imwan me fönüwan o esap mwo nge wor ekis mettóchun epwe nómwetiw.”

Iwe, unusen ewe mwiichen aramas ra pölüweni o apasa, “Amen!” Iwe, ra mwareiti ewe SAMOL. Mwirin, ekkewe aramas ra föri usun minne ra ääni pwon.

Än Nehemiah fangafangöch

14Ngang üwa pwal mochen üpwe apasa pwe lón unusen ekkewe engol me ruu ier ngang üwa kepinan Judah, seni ewe örüween tori ewe iliik me ruuen ierin mwüün King Artasörksiis, ngang me neii kewe nöüwiis aisap mwöngö seni ewe mwöngö mi mwüümwütä pwe wiisen kepina. 15Nge ei a sókkóló seni ekkewe kepina mesemwan mi akkomw mwei pün ra anómwu wón ekkewe aramas och wosochchou ren ar eriääni seniir eneer mwöngö me ünümer wain iteiten rän, kapach ngeni pwal üküükün ew paun silifer. Pwal ekkewe kisitiwen far ra nemenemengaw ngeni ekkewe aramas. Nge pwokiten äi meniniti Kot, iei minne ngang üsap föri ei sókkun. 16Nge meet ngang üwa fen föri, üwa chök pwal achoocho le sópweló ewe angang wón ewe tiit. Üwa pwal föri pwe neii kewe chón angang meinisin repwe fangaló ar fansoun le angang wón ewe tiit. Nge äm aisap angei ew fönü seni emön.

17Fen pwal lapalón, ngang üsap tungór och, inamwo ika üwa amwöngöni ipwükü lime mwän, iir chón Sus me ekkóch nöüwiis me lükün chókewe mi feitto äämwa keem seni ekkewe ekkóch fönü. 18Iwe, iei üküükün mwöngö mi amollotä iteiten rän ngang üwa mööni: emön ätemwänin kowu me wonomön siip mi kitinnup. A pwal wor chómmóng chukó. Nge fän ew iteiten engol rän a amollotä chómmóng sakkopaaten wain. Iei mwo ei üküükün, nge ngang üsap mochen eriääni ekkewe aramas pwe repwe ngeniei ewe mwöngö mi mwüümwütä pwe wiisen kepina, pwokiten ngang üsap mochen sópwetä ewe wosochchoun takises mi nóm wón ekkeei aramas.

19Äi Kot, kopwe chechchemeni ekkewe mettóch meinisin mi mwirinnö ngang üwa föri fäniten ekkeei aramas o efeiöchüwei fänitan.

Ewe angangen rawangaw ngeni Nehemiah

6 Iwe, lupwen Sanballat me Tobiah me Keshem ewe re Arabia me pwal ekkewe lussun chón opwutakeem ra rongorong pwe ngang üwa äwesaló le senisäfälietä ewe tiit, ra pwal rong pwe esap chüen wor pwaang a nóm lón ewe tiit (inamwo ika lón ewe fansoun üsap mwo pacheetä asamen ekkewe asamalapen ewe tiit), 2iwe, Sanballat me Keshem ra tiinato ew poraus reei o apasa, “Kopwe feitto pwe sipwe chufengen lón ew kewe sóóp lón ewe maasiesin Ono.”

Nge ngang üwa meefi pwe iir ra ekiekin rawangawaei pwe repwe efeiengawaei. 3Iwe, ngang üwa tiinaló ekkóch chón künö reer pwe repwe apasa ngeniir alooi, “Ngang üwa föri ew angang mi fókkun öüchchea, ina minne üsap tongeni feittiw reemi. Pwata ewe angang epwe köüüló pwokiten äi üpwe likitaló o feittiw chuuri kemi?” 4Nge iir ra tiinato reei ei chök itiitin poraus fän rüwänü, nge iteiten fansoun, ngang üwa pölüweniir pwal lón ei chök itiitin.

5Mwirin, fän elimuan, Sanballat a tiinato nöün we chón angang reei usun chök me mwan nge a uwei echö taropwe mi chök sukkuló esap appach. 6Iwe, iei meet a mak lón ei taropwe:

“Keshem a üreniei pwe ekis meinisin ia i a feilló ie, a rongorong pwe en me ekkewe chón Sus öüwa rawei pwe öüpwe üüngeni ewe mwüü, iei popun ämi öüwa senisäfälietä ewe tiit. Nge pwal alóngólóng wón ei poraus, en ka ekieki pwe kopwe ar king. 7Iwe, i a pwal aporausa pwe ka mwo nge filätä ekkóch soufós pwe repwe oosuni usum lón Jerusalem o apasa: ‘Nengeni, a wor emön king lón Judah!’ Iwe, kopwe fókkun silei pwe ei poraus epwe le tori ewe king. Iei minne, ngang üwa ekieki pwe kopwe feitto pwe sipwe pwüngüpwüng fengen usun ei poraus.”

8Mwirin, ngang üwa pölüweni o tiitiló ren, “En ka silei pwe ka kapas chofona. Esap wor och mi let me lón meet ka apasa pwe a fis. En ka chök pwisin efisätä seni lón mökürom ei poraus.”

9Pün iir meinisin ra chök mochen sótuni ar repwe eniwokkusu keem, pün ra ekieki, “Pöüür epwe apwangapwangaló le föri ewe angang pün ewe angang esap wesöchchüló.”

Nge ngang üwa iótek o apasa, “Iwe, iei minne, äi Kot kopwe öpöchökküla peii pwe üpwe sópweló ewe angang.”

10Iwe, lón ew ränin, ngang üwa feillo lón imwen Shemaiah we, iei i ätewe mi mwenilong lón imwan. Shemaiah i nöün Delaiah, nge Delaiah nöün Mehetabel. Iwe, Shemaiah a apasa, “Öüsipwe chufengen lón ewe Imwen Kot, lón ewe Imwenfel. Sipwe esipaló asaman kewe, pün ekkewe chón opwutók repwe feitto o niikeló. Repwe feitto pwe repwe niikeló lepwin.”

11Nge ngang üwa pölüweni o apasa, “Ifa usun, ei sókkun mwän usi epwe sü seni feiengaw? Ifa usun, menni sókkun mwän usi epwe süülong lón ewe Imwenfel pwe epwe kütta an epwe manaw? Ngang üsap feilló!” 12Mwirin, ngang üwa weweiti o küna pwe Kot esap ökkünööw Shemaiah, nge i a apasa ei kapasen oosuni mi üüngeniei pwokiten Tobiah me Sanballat ra mööni. 13Ra mööni Shemaiah ren ei popun, pwe i epwe eniwokkusuei o föri pwe üpwe tipis ren ai fiti an öüröür. Mwirin, repwe tongeni etipisiei o eitangawaei.

14Iwe, ngang üwa iótek o apasa, “Äi Kot, kopwe chechchemeni ekkewe mettóch mi ngaw meinisin Tobiah me Sanballat ra föri. Kopwe pwal chechchemeni ewe soufós fefin itan Noadiah me ekkewe lussun soufós mi ekiekin sótuni pwe repwe eniwokkusuei.”

Ewe tiit a wesöchchüló

15Iwe, lón ewe rüwe me limuen ränin ewe maram Elul,a ewe tiit a wesöchchüló, lime me ruu rän chök me mwirin äm poputä. 16Iwe, lupwen ekkwe chón opwutakeem me chón ekkewe mwüü mi nóm ünükküüm ra rongorong usun ei, ra fókkun nuokkus o sääw, pün a kkin me wór pwe ei angang a wes ren än äm we Kot älillis.

17Iwe, pwal lón ekkewe lime me ruu rän, ekkewe aramas mi tekia seni Judah ra tiinaló chómmóng taropwe ren Tobiah, nge Tobiah a pwal tiinato reer nöün kewe taropwe. 18Pün mi wor chómmóng chón Judah ra riiri fengen me Tobiah ren ew pwon fän ökköpöl, pwokiten ätei a pwülüweni nöün Shekaniah fefin, nge Shekaniah i nöün Ara mwän, pwal pwokiten Jehohanan nöün Tobiah mwän a pwülüweni nöün Meshullam fefin, nge Meshullam i nöün Berekiah mwän. 19Ekkewe aramas ra sópweló le üreniei usun än Tobiah kewe föfför mi mwirinnö, nge ra pwal üreni meinisin minne ngang üwa apasa. Iwe, Tobiah a tiinato reei chómmóng taropwen eniweniw pwe epwe eniwokkusuei.

7 Mwirin an a wes ewe tiit le seessäfälitä o üwa pwal wes le pacheetä ekkewe asam wón asamen ekkewe tiit, ekkewe chón tümwünü ekkewe asamalpen imwenfel, me ekkewe chón kööl me ekkewe mwän seni ewe einangen Levi ra kefilitä ngeni en me an angang. 2Iwe, ngang üwa ewiisa ngeni Hanani pwii we me Hananiah ewe meilapen ewe imwen maun pwe repwe nemeni Jerusalem. Hananiah emön mwän mi ölükülük o nuokkusiti Kot lap seni chiechian kewe. 3Iwe, ngang üwa apasa ngeniir, “Öüsap likitaló ekkewe asamalapen ewe tittin Jerusalem pwe repwe chök suukuló tori ewe akkar a tinekeniken leólowas. Ekkewe asamalap repwe chök kesipeló o lókkóló lupwen ekkewe chón mas ra chüen mammas. Iwe, öüpwe pwal fili chón ewe telinimw Jerusalem pwe repwe chón mas. Ekkóch repwe nóm lón ar kewe leenien mammas, nge ekkóch repwe chök nóm lón en me äwenewenen imwan.”

Ekkewe chón ooló mi liwinsäfäl ngeni Jerusalem

4Lón ena fansoun, ewe telinimw Jerusalem a wätte o meresires, nge ekkewe aramas mi nóm lón ra chókükkün. A wor ekkóch chök imw ra meresfeil leemelen ewe telinimw. 5Mwirin, äi we Kot a atolonga lón letipei pwe üpwe emwiicha fengeni ekkewe aramas tekia me ekkewe nöüwiisen ewe telinimw me ekkewe aramas pwe epwe mak iteiter lón tettelin ar leewo. Ngang üwa fen küna ew pwuk mi makketiw lón iteiten leewon chókewe mi akkomw le liwinsäfälito ngeni Judah. Iei meet ngang üwa küna pwe a mak lón:

6“Iei tettelin iten ekkewe chón Sus mi ooló seni ekkewe eif, ra liwinsäfäl seni ar ooló o liwin ngeni Jerusalem me ekkewe ekkóch telinimwen Judah, emön me emön ngeni en me sópwun. Ikkeiir chókewe King Nebukadnezzar a läpeniir o uweireló Babylon. 7Ikkeiir chókewe mi fitaato Zerubbabel, Jeshua, Nehemiah, Azariah, Ramaiah, Nahamani, Mordekai, Bilshan, Mispereth, Bikvai, Nehum me Baanah.

Iwe, iei iteiten ekkewe mwän seni leiin ekkewe aramasen Israel mi liwinsäfäl seni ar ooló:

8Seni mwirirmwirin Parosh, 2,172

9seni mwirimwirin Sefatiah, 372

10seni mwirimwirin Arah, 652

11seni mwirimwirin Pahot-Moab, (iir mwirimwirin Jeshua me Joab), 2,818

12seni mwirimwirin Elam, 1,254

13seni mwirimwirin Zattu, 845

14seni mwirimwirin Zakkai, 760

15seni mwirimwirin Bani, 648

16seni mwirimwirin Bebai, 628

17seni mwirimwirin Azkad, 2,322

18seni mwirimwirin Adonikam, 667

19seni mwirimwirin Bikvai, 2,067

20seni mwirimwirin Adin, 655

21seni mwirimwirin Ater, (iir mwirimwirin Hezekiah), 98

22seni mwirimwirin Hashum, 328

23seni mwirimwirin Bezai, 324

24seni mwirimwirin Jora, 112

25seni mwirimwirin Kibeon, 95

26Iei iteiten ekkewe aramas mi pwal liwinsäfäl seni ar ooló, iir ekkewe aramas ar leewo a pop seni ekkeei telinimw Bethlehem me Netofah, 188

27seni Anathoth, 128

28seni Beth Azmaveth, 42

29seni Kiriath Jearim,
Kefirah me Beeroth, 743

30seni Ramah me Keba, 621

31seni Mikmash, 122

32seni Bethel me Ai, 123

33seni ewe pwal ew Nebo, 52

34seni ewe pwal ew Elam, 1,254

35seni Harim, 320

36seni Jeriko, 345

37seni Lod, Hadid me Ono, 721

38seni Senaah, 3,930

39Iwe, ikkeei iteiten chón ekkewe familien souasór mi liwinsäfäl seni ar ooló:

Ekkewe seni mwirimwirin Jedaiah (seni ewe tettelin Jeshua) 973

40seni mwirimwirin Immer, 1,052

41seni mwirimwirin Pashhur, 1,247

42seni mwirimwirin Harim, 1,017

43Iwe, iei iteiten chón ewe einangen Levi mi liwinsäfäl seni ar ooló:

Seni ekkewe mwirimwirin Jeshua ( mi leewoto seni Kadmiel me lón tettelin Hodaviah), 74

44Iteiten ekkewe chón kööl:

Iir ekkewe mwirimwirin Asaf, 148

45Iteiten ekkewe chón mammasa asamalapen ewe imwenfel:

Iir mwirimwirin Shallum, Ater, Talmon, Akkub, Hatita me Shobai, 138

46A pwal wor ekkewe chón angang ngeni ewe imwenfel mi liwinsäfäl seni ar ooló:

Iir ekkewe mwirimwirin Ziha, Hasufa, Tabbaoth,

47Keroa, Siaha, Padon,

48Lebana, Hakaba, Shalmai,

49Hanan, Kiddel, Kahar,

50Reaiah, Rezin, Nekoda,

51Kazzam, Uzza, Paseah,

52Besai, Meunim, Nefusim,

53Bakbuk, Hakufa, Harhur,

54Bazluth, Mehida, Harsha,

55Barkos, Sisera, Temah,

56Neziah me Hatifa.

57Ekkewe mwirimwirin nöün Solomon kewe chón angang mi liwinsäfäl seni ar ooló:

Iir ekkewe mwirimwirin Sotai, Soferet, Perida,

58Jaala, Darkon, Kiddel,

59Shefatiah, Hattil, Pokereth-Hazzebai me Amon.

60Üküükün iteiten meinisin ekkewe chón angang ngeni ewe imwenfel me ekkewe mwirimwirin nöün Solomon kewe chón angang, 392

61Mi wor pwal ew mwiichen aramas mi liwinsäfäl ngeni Jerusalem lón ei fansoun seni ekkewe telinimw Tel Melah, Tel Harsha, Kerub, Addon me Immer, nge resap tongeni affata pwe iir ika ar kewe famili mwirimwirin chón Israel.

62Ikkeei ekkewe famili mi pacholong lón ei mwiichen aramas: Ekkewe mwirimwirin Delaiah, Tobiah me Nekoda, iteiter 642

63Mi pwal wor ülüngät familien souasór mi liwinsäfäl ngeni Jerusalem, nge esap fat ar leewo, iir ekkewe mwirimwirin Hobaiah, Hakkoz me Barzillai. (Ei mwän Barzillai a pwülüweni emön föpwül nöün Barzillai ewe re Kiliad. Iwe, ätei a iteni iten än semen pwülüwan we famili).

64Chón ekkeei famili ra kütta ika mi makkelong iter leiin chókewe mi makkelong iter lón tettelin ar kewe leewo, nge resap küner. Iei minne, ra katoowu seni ewe wiisen souasór pün ra nóm lón tettelin chón limengaw. 65Iei minne, ewe kepina a öllük ngeniir pwe resap tongeni mwöngö och seni ewe mwöngö mi pin wiisen ekkewe souasór seni ekkewe asór tori an epwe wor emön souasór epwe tongeni kütta meren ewe SAMOL pwüngün ei mettóch ren ewe Urim me Thumim.

66Iwe, iteiten unuselapen ewe mwiichen aramas mi liwinsäfäl ngeni Judah seni ar ooló, 42,360, 67me lükün nöüür kewe chón angang mwän me chón angang fefin resap ällealong lón ei iteit, üküükün iteiter, 7,337. Mi pwal wor 245 nöüür kewe chón kööl mwän me fefin. 68Mi pwal wor üküükün 736 nöüür óris, 245 nöüür aas upwun wón óris, 69435 nöüür kamel me 6,720 nöüür dongki.

70Iwe, chómmóng me leiin ekkewe souemmwenin famili ra awora tupwuur fäniten ewe angang. Ewe kepina a fangaló ngeni ewe leenien iseis mooni 1,000 darik kolta pwal 50 sepi kolt me 530 üüf fäniten ekkewe souasór. 71Ekkóch kewe souemmwen ra fangaló ngeni ewe leenien iseis mooni üküükün 20,000 darik koltb pwal 2,200 mina silifer fäniten ewe angang. 72Nge ekkewe lussun aramas ra fangaló 20,000 darik kolt pwal 2,000 mina siliferc me 67 üüf fäniten ekkewe souasór.

73Iwe, ekkewe souasór, ekkewe chón ewe einangen Levi, ekkewe chón mammasa asamalapen ewe Imwenfel, ekkewe chón kööl, ekkewe chón angang ngeni ewe Imwenfel, fiti pwal ekkóch aramas, me ekkewe lussun chón Israel meinisin, ra nómwóló lón pwisin ar kewe telinimw.

Iwe, lupwen a tori ewe efisuen maram, ekkewe chón Israel ra fen póssóló lón ar kewe telinimw.

Ezra a älleani ewe Öllük

8 Iwe, ekkewe aramas meinisin ra tipeew le mwiichfengen lón ewe leeni mi amassawa mi nóm mwen ewe Asamalapen Kólik. Iwe, ra tungórei Ezra ewe soummak pwe epwe uwato ewe Pwuken Öllük än Moses, ewe SAMOL a öllük fäniten chón Israel pwe repwe älleasochisi.

2Iwe, lón ewe äewin ränin ewe efisuwen maram, ewe souasór Ezra a uwato ewe pwuken öllük mwen ewe mwiichen aramas, iir ekkewe mwän me fefin pwal ekkewe semiriit mi wätte ra tongeni rong o weweiti. 3Iwe, Ezra a säpe ngeni ewe leeni mi amassawa mi nóm mwen ewe Asamalapen Kólik o a leüommóng le älleani seni lón ewe pwuk ngeni ekkewe mwän me ekkewe fefin pwal chókewe mi tongeni weweiti. I a ällea seni lesossorusich tori leólówas. Iwe, ekkewe aramas meinisin ra tümwünöch le öüüw selinger ngeni ewe pwuken öllük.

4Nge Ezra ewe soummak a üütä wón ew póó mi tekia a för seni irä fäniten ei popun. Iwe, Mattithiah, Shema, Anaiah, Uriah, Hilkiah me Maaseiah ra üütä ünükkün me peliifichin. Nge Pedaiah, Mishael, Malkijah, Hashum, Hashbaddana, Zekariah me Meshullam ra üütä ünükkün me peliimöngün.

5Ezra a üütä wón ewe póó pwe ekkewe aramas meinisin ra tongeni küna. Iwe, lupwen Ezra a suuki ewe pwuk, ekkewe aramas meinisin ra küna o ra üütä. 6Mwirin, Ezra a mwareiti ewe SAMOL, ewe Kot mi lapalaap. Nge ekkewe aramas meinisin ra eitietä pöüür ngeni läng o apasa, “Amen, Amen!” Mwirin, ra rootiw o fel ngeni ewe SAMOL nge ra chappetiw leppwül.

7Iwe, pwal Jeshua, Bani, Sherebiah, Jamin, Akkub, Shabbetai, Hodiah, Maaseiah, Kelita, Azariah, Jozabad, Hanan me Pelaiah, iir ekkewe mwän seni ewe einangen Levi ra älisi ekkewe aramas meinisin le äwewei ngeniir ewe öllük, nge ekkewe aramas ra chök üütäló lón leenier. 8Ra älleaniöchchüw seni lón ewe pwuken öllük än Kot o afföüüw, ra pwal affataöchüw le äweweni weween meet ra älleani o älisi ekkewe aramas pwe repwe weweiti meet ra älleani.

9Mwirin, ewe kepina Nehemiah me Ezra ewe souasór me soummak pwal ekkewe mwän seni ewe einangen Levi mi äwewei ewe öllük ngeni ekkewe aramas, ra apasa ngeni ekkewe aramas meinisin, “Öüsap letipeta are kechiw. Pün ikenäi iei ew rän a pin fäniten ewe SAMOL ämi we Kot.” Pün ekkewe aramas meinisin ra kechiw lupwen ra öüseling ngeni kapasen ewe Öllük.

10Mwirin, Nehemiah a sópweló le apasa ngeniir, “Öüpwe feilló o efisi ew apwaapwa ren kametip. Öüpwe mwöngö enemi mwöngö mi annö me wün ünümemi mi araar. Iwe, öüpwe pwal tiinaló wiisen chókana esap wor minne ra tongeni amollätä, pün ikenäi ew rän mi pin me fän mesen ach we Samol. Öüsap letipechchou, pwokiten ewe pwapwa seni ewe SAMOL iei ämi pöchökkül.”

11Iwe, ekkewe mwän seni ewe einangen Levi ra amósónósónaló ekkewe aramas meinisin o apasa, “Öüpwe fanafanaló. Öüsap letipechchou, pwokiten iei ew rän mi pin.”

12Mwirin, ekkewe aramas meinisin ra feilló ngeni leenier. Iwe, ra mwöngö o wün, ra pwal tiinaló wiisen chókewe esap wor eneer. Ra efisi ar apwaapwa fän meseik mi wätte, pwokiten ra rongorong än Kot kapas o weweitiir.

Ewe chuulapen Imw Likachooch

13Iwe, lón ewe oruuen rän, ekkewe souemmwenin famili seni leiin aramas meinisin, pwal ekkewe souasór me ekkewe mwän seni ewe einangen Levi, ra mwiicheto ren Ezra ewe soummak pwe repwe käeö kapasen ewe öllük. 14Iwe, lupwen ra käeö ewe öllük, ra küna pwe ewe SAMOL a öllük ngeni Moses pwe ekkewe chón Israel repwe nóm lón imw likachooch lupwen ewe chuulapen efisuen maram, 15o epwe wor ew kapasen esilesil epwe tiitiló leemelen ar kewe telinimw meinisin pwal lón Jerusalem, epwe esile ngeni ekkewe aramas pwe repwe feilló wón ekkewe chuuk pwe repwe angei ekkewe palen irä seni ewe irä olif, olif mi pwisin pwükütä, pwal palen ewe irä itan myrtöl me ewe irä usun nüü me palen sakkopaten irä mi mwuresires. Iwe, repwe aea ekkeei palen irä le för imw likachooch pwe repwe nónnóm lóór lón ótun ewe chuulap, usun minne a fen mak lón ewe öllük.

16Iei minne, ekkewe aramas ra feilló pöküpök ekkewe palen irä o uweiireto. Iwe, ra aea ekkewe palen irä le för imw likachooch fäniter wón ewe sässärin asan me wón imwer kewe pwal lón ekkewe leeni lükün imweer kewe pwal lón ewe leeni lükün än Kot we Imwenfel ika lón ewe leeni mi amassawa órun ewe Asamalapen Kólik pwal lón ewe leeni mi amassawa órun ewe Asamalapen Efraim. 17Iwe, unusen ewe mwiichen aramas meinisin mi liwinsäfälito seni ar ooló ra för imw likachooch o ra nóm lóór lón ekkewe fisu ränin chuulap. Iwe, iir meinisin ra uren pwapwa. Pün ekkewe aramasen Israel resap mwo efisi ar apwaapwa lón ei sókkun lapalap seni lón ótun Joshua nöün Nun we mwän tori ei rän.

18Ezra a älleani seni än Kot we pwuken öllük lón ew me ew ekkewe fisu ränin chuulap. Ekkewe aramas ra föri ewe chuulap lón üküükün fisu rän. Mwirin, lón ewe awalüen rän, ra föri ew mwiich mi pin, usun minne a mak lón ewe öllükün Moses.

Ekkewe aramas ra pwärätä ar tipis

9 Iwe, lón ewe rüwe me rüwänüen ränin ei chök pwal efisuen maram, ekkewe aramasen Israel ra pwal mwiichfengen. Lón ei fansoun ra öchüün o üföüf üüf mi för seni tuuk, ra pwal amworomworätä pwül mworomwor wón mökürer pwe esissilen ar letipeta pwokiten ar tipis. 2Mwirin, chókana me leiir iir mwirimwirin chón Israel ra äimwüreló seni ekkewe chón ekis meinisin lupwen ra üütä o pwärätä pwisin ar kana tipis me tipisin ar kewe leewo. 3Lón üküükün ülüngät kulók ra üütä lón leenier, lupwen ewe pwuken öllük än ewe SAMOL ar we Kot a ällea ngeniir. Mwirin, lón pwal üküükün ülüngät kulók, ra pwärätä ar tipis o fel ngeni ewe SAMOL ar we Kot. 4Nge ekkóch me leiin ekkewe mwän seni ewe einangen Levi ra üütä wón ewe póó o leüommóng le siö ngeni ewe SAMOL ar we Kot. Ikkeei iten ekkeei mwän: Jeshua, Bani, Kadmiel, Shebaniah, Bunni, Sherebiah, Bani me Kenani. 5Mwirin, ekkewe souemmwen me leiin ekkewe mwän seni ewe einangen Levi iter Jeshua, Kadmiel, Bani, Hashabneiah, Sherebiah, Hodiah, Shebaniah me Pethahiah ra kökkö ngeni ekkewe aramas: “Öüpwe üütä o mwareiti ewe SAMOL ämi we Kot a nóm seni fansoun esepwop tori feilfeilló chök!”

Mwirin ra sópweló le apasa, “Äm aipwe mwareiti itom mi ling, o epwe takiatä seni ekkewe feiöch meinisin me minne aramas ra mwareiti! 6En chök ewe SAMOL. En ka föri ewe ileng me ekkewe läng mi fókkun tekia me ekkewe füü meinisin. En ka föri fönüfan me iteiten mettóch meinisin mi nóm wón, pwal ekkewe mataw me meinisin mi nóm lóór. En ka fang manaw ngeni mettóch meinisin o etenekiir pwe esap ekkesiiwil nónnómwur. Ekkewe mwiichen chón läng meinisin ra fel ngenuk.

7En ewe SAMOL, ewe Kot mi filätä Abram. Ka emmwenawu i seni Ur lón ewe fönüen chón Kaldea. Iwe, ka eitasäfäli ngeni i Abraham. 8Lupwen ka küna pwe i a ölükülük ngenuk lón letipan, ka föri ew pwon ngeni pwe kopwe ngeni i me mwirimwirin kana fönüen ekkewe chón Kanaan, chón Hit, chón Amor, chón Periz, chón Jebus me chón Kirkash. Iwe, en ka öpwönüwetä meet ka ääni pwon, pün en ka pwüng o wenechchar lón óm kapas fansoun meinisin.

9En ka küna än äm kewe leewo riäfföü me letipeta me lón Egypt. En ka rongorong ar siö me órun ewe Setipar. 10En ka föri ekkewe esissil me manaman o efeiengawa Farao. Ka pwal efeiengawa nöün kewe chón angang me aramasen fönüan meinisin, pün en ka silei usun än ekkewe chón Egypt föfförün lamalamtekia le eriäfföwü äm kewe leewo. En ka pwisin föri pwe itom a iteföüló tori ikenäi. 11Iwe, ka kinifeseni ewe mataw me mwen noum kewe aramas pwe repwe tongeni pwereló lukalapen ewe mataw wón pwül mi pwasapwas. Iwe mwirin, en ka oturalong chón opwuter kewe mi tapweriir lón ewe mataw mi alóllóól. Iwe, ra kokotiw usun faaw lón ewe nöönö mi lapalaap. 12Iwe, en ka emmweni äm kewe leewo ren ew üren kuchu lerän, nge ka emmweniir ren ew üren ekkei lepwin, pwe epwe asaramer wón ewe aal repwe sääi wón.

13En ka pwal feittiw wón ewe chuuk Sinai o kapas ngeniir seni läng. En ka ngeniir ekkewe pwüüng mi wenechchar, ekkewe käit mi let, ekkewe öüröür me öllük mi mwirinnö. 14En ka öüröürer usun öllükün óm we ränin Sabbat mi pin. En ka öllük ngeniir meren nöüm we chón angang Moses pwe repwe älleasochisi óm kewe öllük me pwüüng me öüröür meinisin. 15En ka ngeniir mwöngö seni läng lupwen ra echik o opwuuowu kólik ngeniir seni lón ewe achaw lupwen ra kaaka. En ka öllük ngeniir pwe repwe feillong lón ewe fönü pwe repwe fönüeni, iei ewe fönü en ka pwon fän ökköpöl pwe kopwe ngeniir.

16Nge äm kewe leewo ra lamalamtekia. Ra tipepöchökkül o resap älleasochisi óm kewe öllük. 17Resap mochen pwe repwe öüseling o resap chechchemeni ekkewe manaman en ka föri fäniter. Nge ra chök öpöchökküla letiper o ra fiseetä me lón ekiekir pwe repwe filätä emön souemmwen pwe epwe emmwenisäfälir ngeni Egypt ia aramas repwe nöüniir amanaw me ie. Nge en emön Kot mi omwusaló tipis, ka ääni ümöümöch me kirekiröch, ka songomang o wöwün tong ese mwüch. Iei minne kosap likitireló, 18inamwo are ra pwisin föri fäniter och uluulun önümwäl mi ketel seni mächä lón lapalapen emön liälifföön kowu o apasa, ‘Iei i ach we kot mi emmwenikichewu seni Egypt.’ Ra tipis o föri föfförün turunufas mi fókkun ngaw.

19Nge en, lón óm tong mi somwoló, kosap likitireló pwe repwe mäló lón ewe fönüpöön. Ewe üren kuchu a chüen emmweniir lerän wón ewe aal, nge ewe üren ekkei a asaramer lepwin o pwääri ngeniir ewe aal repwe feilló wón. 20En ka pwal liffang ngeniir Ngünum mi mwirinnö pwe epwe öüröürer. Kosap ükütiw le amwöngö ngeniir óm we manna seni läng, kosap pwal ükütiw le öünür kólik fäniten ar kaaka. 21Lón üküükün fääik ier, en ka etenekiir me lón ewe fönüpöön. Resap osupwang ren och mettóch fansoun meinisin. Üfeer kewe resap kamwaló, pwal pachapacher resap pwo.

22Mwirin, en ka älisi äm kewe leewo pwe repwe liäpeni ekkewe mwüü mi lapalaap me chómmóng fönü. Iwe, en ka atolonga noum kewe aramas lón iteiten kinikinin ewe fönü. Iwe, ra unusen fönüwenaló fönüen Sihon ewe kingen Heshbon me fönüen Ok ewe kingen Bashan. 23En ka pwal föri pwe mwirimwirir kewe repwe chómmóngóló usun chómmóngun ekkewe füün läng. En ka pwal emmwenirelong lón ewe fönü en ka pwon ngeni ar kewe leewo pwe repwe tolong lón o fönüweni. 24Iei minne, mwirimwirir kewe ra tolong lón ewe fönü o fönüwenaló. En ka okkufu ekkewe mwüü me mweer. Ekkewe mwo king me chón Kanaan mi nóm lón ewe fönü nge esap wor ar pöchökkül. Noum kewe aramas ra tongeni föri uweneer ngeniir. 25Äm kewe leewo ra liäpeni ekkewe telinimw mi pöchökkül tittiir me fönü mi pwülüöch. Ra imweni ekkewe imw mi ur ren mettóch mi mwirinnö, ra ääni ekkewe chönüttu mi fen piin ttu, ra pwal ääni ekkewe tännipiin irän wain me olif me chómmóng sakkopaaten irä mi wor uwaar. Iwe, ra mwöngö tori ra möt o kitinupwuló. Ra emeseiker lón óm kewe feiöch mi lapalaap.

26Iwe, iei mwo nge iir ra älleasolap o üüngenuk. Ra pöütaló óm öllük lükünsökürüür o ra niieló noum kewe soufós mi fönöör pwe repwe kulsäfäl ngenuk. Ra föri föfförün turunufas mi fókkun ngaw. 27Iei minne, en ka esechiireló pwe repwe nóm fän nemenien ekkewe chón opwuter mi eriäfföüür. Nge lón fansoun ar riäfföü, ra siö ngenuk, nge en ka öüseling ngeniir seni läng. Iwe, lón óm tong mi lapalaap, en ka tiinato reer ekkewe chón chiman mi angaser seni ekkewe chón opwuter.

28Nge mwirin än noum kewe aramas ra nóm lón kinamwe, ra pwal försäfäli minne a ngaw me fän mesom. Iei minne, ka pwal atolongasäfälir fän nemenien chón opwuter kewe. Iwe, chón opwuter kewe ra nemeniir. Nge iteiten fansoun lupwen noum kewe aramas ra ekieksäfäl o siösäfäl ngenuk pwe kopwe älisiir, en ka pwal öüselingsäfäl ngeniir seni läng. Lón óm tong mi amwaraar, en ka angaser fän chómmóng.

29En ka fönör pwe repwe liwinisäfälito ngeni óm kewe öllük, nge iir ra chök lamalamtekia o tipepöchökkül o resap älleasochis ngeni óm kewe öllük. Iwe, ra tipis ren ar pwurätiw óm kewe pwüüng, emön aramas epwe manaw reer are epwe älleasochisiir. Lón ar üleförea, ra kulluw sökürüür ngenuk, pwokiten ra tipepöchökkül o resap mochen öüseling. 30Lón óm tong, en ka mósónóttam ngeniir lón chómmóng ier. En ka tiinato Ngünum mi nöünöü ekkewe soufós pwe repwe fönör usun ar kewe tipis. Nge iir resap mochen öüseling. Iei minne, en ka pwal mwüütsäfäli ngeni ekkewe chón lükün chón ewe fönü pwe repwe okkufur. 31Nge lón óm tong mi lapalap, kosap unusen arosereló ika likitireló feilfeilló chök. Pün en emön Kot mi ümöümöch o uren tong!

32Iei minne, äm Kot, en ewe Kot mi lapalaap me manaman me eniwokkus, en ka öpwönüwetä óm pwonen tong ese mwüch ngeni keem. Kosap mwüüt ngeni pwe ekkewe riäfföü meinisin ra tori keem esap wor öüchchear ngeni keem. Riäfföü mi lapalaap ra tori keem me äm kewe king me samol, nöüüm kewe souasór me soufós, äm kewe leewo seni ewe fansoun lupwen ekkewe kingen Assyria ra okkufu keem tori ikenäi. 33En ka pwüng iteiten fansoun en ka öpwüngü keem. Äm aia fókkun tipis, nge en ka föri ngeni keem meet chök a fich ngeni keem. 34Äm kewe king me samol, äm kewe souasór me äm kewe leewo resap älleasochisi óm kewe öllük, resap pwal öüseling ngeni óm kewe kapasen fön me óm kewe kapasen pwärätä en ka ngeniir. 35Pwal mwo lupwen ra nóm lón pwisin mwüür, resap angang ngenuk, inamwo ika en ka öpüngätiw wóór óm kewe feiöch. En ka ngeniir ew fönü mi wätte o pwülüöch, nge iir resap mochen kul seni ar kewe föfför mi ngaw.

36Nge nengeni, ikenäi aramas ra nöüni keem amanaw. Aramas ra nöüni keem amanaw me lón ewe fönü en ka ngeni äm kewe leewo pwe repwe tongeni mwöngö seni uwään irän me pwal ekkóch mettóch mi mwirinnö ewe fönü a awora. 37Iwe, uwään ewe fönü mi somwosomoló ra feilló ngeni lón pöün ekkewe king en ka ewiiser pwe repwe nemeni keem, pwokiten äm kana tipis. Ra pwal nemeni inisiim me nöüüm kana maan. Äm aia angang ngeniir usun ar mochen, nge äm aia nóm lón riäfföü mi lapalaap.

38Iwe, pwokiten ekkeei mettóch meinisin, äm aia föri ew pwon mi nüküchchar o aia makkeetiw. Nge nöüüm kewe souemmwen me ekkewe mwän seni ewe einangen Levi me nöüüm kewe souasór ra saini iter wón ei taropwe o impwangei.”

Ekkewe aramas mi impwangei ewe pwon

10 Ikkeiir chókewe mi impangeló ei taropwe:

Ewe kepina Nehemiah nöün Hakaliah we mwän, pwal Zedekiah,

2Seraiah,Azariah, Jeremiah,

3Pashhur, Amariah, Malkijah,

4Hattush, Shebaniah, Malluk,

5Harim, Meremoth, Obadiah,

6Daniel, Kinnethon, Baruk,

7Meshullam, Abijah, Mijamin,

8Maaziah, Bilkai me Shemaiah.

Ikkeiir ekkewe souasór mi impwangei ewe taropwe.

9Ekkewe mwän seni ewe einangen Levi mi saini ewe taropwe:

Jeshua nöün Azaniah we mwän, Binnui seni ewe familien Henadad me Kadmiel,

10pwal chiechier kewe mwän seni ewe einangen Levi iter: Shebaniah, Hodiah, Kelita, Pelaiah, Hanan,

11Mika, Rehob, Hashabiah,

12Zakkur, Sherebiah, Shebaniah,

13Hodiah, Bani me Beninu.

14Ekkewe souemmwenin aramas mi saini ewe taropwe:

Parosh, Pahat-Moab, Elam, Zattu, Bani,

15Bunni, Azkad, Bebai,

16Adonijah, Bikvai, Adin,

17Ater, Hezekiah, Azzur,

18Hodiah, Hashum, Bezai,

19Harif, Anathoth, Nebai,

20Makpiash, Meshullam, Hezir,

21Meshezabel, Zadok, Jaddua,

22Pelatiah, Hanan, Anaiah,

23Hoshea, Hananiah, Hasshub,

24Hallohesh, Pilha, Shobek,

25Rehum,Hashabnah, Maaseiah,

26Ahiah, Hanan, Anan,

27Malluk, Harim me Baanah.

Ewe pwon mi impwang

28Iwe, ekkewe lussun aramas meinisin - ekkewe souasór, ekkewe mwän seni ewe einangen Levi, ekkewe chón mammasa asamalapen ewe Imwenfel, ekkewe chón kööl, ekkewe chon angang ngeni ewe Imwenfel, pwal meinisin chókewe mi pwisin äimwüreló seni chón ekkewe fönü pwokiten ar älleasochis ngeni än Kot kewe öllük, fiti pwülüwer kewe me nöüür kewe mwän me fefin meinisin mi tongeni silei o weweiti ewe pwon- 29ra chufengen me pwiir kewe me ekkewe aramas tekia o ra önüküchchara fengeni lefiiler ren ew pwon. Ra pwon fän ökköpöl pwe repwe etiwa ewe önümamaw seni Kot are resap öpwönüwetä än Kot we Öllük, Moses nöün Kot we chón angang a ngeniir. Ra pwon pwe repwe tümwünüfichi le älleasochisi ekkewe öllük, öüröür me pwüüng meinisin än ewe SAMOL ar we Samol.

30Äm aia pwon pwe aisap öpwüpwülüwa nöüüm kewe föpwül ngeni ekkewe aramas mi nóm pwellin ünükküüm, aisap pwal öpwüpwülüwa nöüüm kewe mwän ngeni nöüür kewe föpwül.

31Äm aia pwal pwon pwe lupwen aramasen ewe fönü mi nóm aruum repwe uwato ar pisek ika föün wiit pwe repwe amöömö lón ewe ränin Sabbat ika lón ew rän mi pin, äm aisap kamö seniir. Aia pwal pwon pwe aisap föri och angang lón iteiten ewe efisuen ier, aipwe pwal omwusaló ekkewe liwinimmang meinisin ekkóch chón Sus ra liwinimang ngeni keem.

32Pwal kapachatä, äm aia pwon pwe aipwe älleasochisi ewe öllük ren äm aipwe püngütiw ew na ülüngätin ew sekel silifer pwe takisesin Imwenfel iteiten ier, pwe epwe wor mooni fäniten angangen tümwünün ewe Imwenfelin Kot. 33Ei mooni epwe kawor fäniten ekkewe pilawa mi pin, fäniten ewe asóren mwöngö me asóren keek mi fis iteiten rän, fäniten ekkewe asór mi fis lón ränin Sabbat me lón ekkewe ränin popun maram me lón ekkewe fansoun chuulap mi fis iteiten ier, fäniten ekkewe asór mi pin pwal fäniten ekkewe asóren tipis pwe epwe fis asóren omwusomwusen tipis fäniten ekkewe aramasen Israel. Ei mooni epwe pwal fäniten ekkewe ekkóch mettóch mi öüchchea fäniten angangen ewe Imwenfel än äm we Kot.

34Iwe, aia awora äm ütüüt pwe aipwe filätä ika ineet fansoun ew me ew ekkewe familien souasór me ekkewe mwän seni ewe eiangen Levi me ekkewe aramas repwe uweato tupwur ömwüch ngeni än Kot we Imwenfel, iteiten ier lón fansoun mi kefilitä, fäniten ekkewe asór repwe keek wón än ewe SAMOL äm we Kot róngen asór, usun a fen mak lón ewe öllük.

35Äm aia pwal pwon pwe iteiten ier äm aipwe wiisen uwato ngeni än ewe SAMOL we Imwenfel mwen uwään minne aia fótuki lón äm kewe pwül pwal ewe mwen uwa seni ekkewe föün irä meinisin aia kinii seni äm kewe irä meinisin.

36Äm aia pwal tipeew ngeni pwe aipwe ngeni Kot nöüüm kewe mwännichi me ekkewe mweinöün nöüüm kewe pwiin kowu me pwiin siip me kuuch, usun minne a mak lón ewe öllük. Äm aipwe uweiireto ren ekkewe souasór mi angang lón ewe Imwenfel än äm we Kot.

37Äm aipwe pwal uwato ewe mwen uwa seni äm föün wiit mi üsüüs, pwal äm kewe ekkóch asóren mwöngö, ekkewe föün irä seni äm kewe irä meinisin, ewe wain mi fö me apüra seni föün olif ren ekkewe souasór lón ekkewe rummwen iseis lón ewe Imwenfel än äm we Kot. Iwe, äm aia pwon pwe aipwe uwato ren ekkewe mwän seni ewe einangen Levi, ew naengolun minne aia fótuki lón äm kewe pwül, pün ekkewe mwän seni ewe einangen Levi ra wiisen ioni ekkewe naengol seni lón ekkewe sóóp meinisin ia aia angang ie. 38Iwe, emön souasór, emön mwirimwirin Aaron, epwe fiti ekkewe mwän seni ewe einangen Levi lupwen repwe angei ekkewe naengol. Iwe, ekkewe mwän seni ewe einangen Levi repwe uwato ew naengol seni ekkewe naengol meinisin ra ionifengeni o isenalong lón ekkewe rummwen iseis lón ewe Imwenfel än äm we Kot. 39Pün ekkewe aramasen Israel me ekkewe mwän seni ewe einangen Levi repwe uwato ar kewe asór föün wiit, wain mi fö me apüra seni föün olif ren ewe Imwenfel o isenirelong lón ekkewe rummwen iseis ia ekkewe pisek fäniten ewe Imwenfel ra iseis ie, arap ngeni ia ekkewe souasór mi föri ar angang me ekkewe chón mammasa asamalapen ewe imwenfel me ekkewe chón kööl ra nóm ie.

Iei usun äm aia pwon fengen pwe aisap tümwününgaw ngeni ewe Imwenfel än äm we Kot.

Ekkewe aramas mi nóm lón Jerusalem

11 Iwe, lón ei fansoun, ekkewe souemmwen seni leiin ekkewe aramas ra nónnóm lón Jerusalem, ewe telinimw mi pin. Ekkewe lussun aramas ra üttüüt wón emön seni iteiten engol pwe epwe feitto o nónnóm lón Jerusalem, nge ekkewe tiwemön repwe chök nómwetiw lón ekkewe ekkóch telinimw. 2Iwe, ekkewe aramas ra apasatä ar kilisou o efeiöchüw chókewe meinisin mi pwisin filätä seni mochenin letiper pwe repwe nónnóm Jerusalem.

3Ikkeiir ekkewe souemmwenin ekkewe eif mi nómwetiw lón Jerusalem. (Nge lón ekkewe lussun telinimwen Judah, a wor ekkóch leiin ekkewe chón Israel, ekkewe souasór, ekkewe mwän seni ewe einangen Levi, ekkewe chón angang ngeni ewe Imwenfel me ekkewe mwirimwirin nöün Solomon kewe chón angang ra chök sópweló le nónnóm lón ar kewe telinimw, emön me emön a nóm lón en me pwisin leenian, 4nge pwal ekkóch aramas seni ekkewe einangen Judah me Benjamin ra nóm lón Jerusalem):

Ekkewe samolun eif mi mwöküt ngeni Jerusalem seni ewe einangen Judah:

Athaiah nöün Uzziah we mwän, nge Uzziah nöün Zekariah, Zekariah nöün Amariah, Amariah nöün Shefatiah, Shefatiah nöün Mahalalel, nge Mahalalel i emön mwirimwirin Perez, 5pwal Maaseiah nöün Baruk we mwän, nge Baruk nöün Kol-Hozeh, Kol-Hozeh nöün Hazaiah, Hazaiah nöün Adaiah, Adaiah nöün Joiarib, Joiarib nöün Zekariah, nge Zekariah i emön mwirimwirin Shelah. 6Ekkewe mwirimwirin Perez mi nónnóm Jerusalem, iteiter, 468 iir meinisin mwän mi pwora.

7Seni ekkewe mwirimwirin Benjamin:

Sallu nöün Meshullam we mwän, nge Meshullam nöün Joed, Joed nöün Pedaiah, Pedaiah nöün Kolaiah, Kolaiah nöün Maaseiah, Maaseiah nöün Ithiel, Ithiel nöün Jeshaiah, 8me chókewe mi tapweto mwirin Jeshaiah iter Kabbai me Sallai, pwal fiti määräriir kewe mwän mi pwora, iteiter 928. 9Joel nöün Zikri we mwän i nöüür sounemenem, nge Judah nöün Hassenuah we mwän i kisitoon fän Joel le sounemenem lón ewe Minaföön Kinikinin ewe telinimw.

10Seni leiin ekkewe souasór mi mwöküt ngeni Jerusalem:

Jedaiah nöün Joiarib we mwän me Jakin, 11pwal Seraiah nöün Hilkiah we mwän nge Hilkiah nöün Meshullam, Meshullam nöün Zadok, Zadok nöün Meraioth, Meraioth nöün Ahitub, i ewe chón nemeni ewe Imwenfelin Kot, 12fiti chiechier kewe 822 mwän mi föri ewe angang fäniten ewe Imwenfel. A pwal nóm Adaiah nöün Jeroham we mwän nge Jeroham nöün Pelaliah, Pelaliah nöün Amzi, Amzi nöün Zekariah, Zekariah nöün Pashhur, Pashhur Malkijah, 13me chiechian kewe 242 mwän iir samolun ar kewe famili. A pwal nóm Amashai nöün Azarel we mwän, nge Azarel nöün Ahzai, Ahzai nöün Meshillemoth, Meshillemoth nöün Immer, 14me chiechian kewe 128 iir ekkewe mwän pwora. Zabdiel nöün Hakkedolim we mwän i nöüür sounemenem.

15Seni ewe einangen Levi mi mwöküt ngeni Jerusalem:

Shemaiah nöün Hasshub we mwän, nge Hasshub nöün Azrikam, Azrikam nöün Hashabiah, Hashabiah nöün Bunni. 16Shabbethai me Jozabad iir ekkewe rüwömön samolun ekkewe mwän seni ewe einangen Levi ra wiisen nemeni angangen lükün ewe Imwenfelin Kot. 17Mattaniah nöün Mika we mwän, nge Mika nöün Zabdi, emön mwirimwirin Asaf, i ewe a wiisen emmweni ekkewe köölün mwareiti. I a pwal wiisen liwowomönü ngeni ekkewe kapasen kilisou fäniten kewe iótek mi fiti kööl. Babukiah i kisitoon fän Mattaniah. A pwal nóm Abda nöün Shammua we mwän nge Shammua nöün Kalal, Kalal nöün Jeduthun. 18A wor üküükün 284 mwän seni ewe einangen Levi mi nóm lón ewe telinimw mi pin.

19Ekkewe chón mammasa ekkewe asamalap mi mwöküt ngeni Jerusalem:

Akkub, Talmon me chiechier kewe 172 mwän mi mammasa ekkewe asamalap.

20Nge ekkewe lussun chón Israel, ekkewe lussun souasór me ekkewe lussun mwän seni ewe einangen Levi ra nónnóm ia ar kewe famili ra nóm ie me lón ekkewe telinimwen Judah.

21Nge ekkewe chón angang ngeni ewe Imwenfel meinisin ra nónnóm wón ewe chukuchukutän Ofel, nge Ziha me Kishpa ra wiisen nemeniir.

22Ewe sounemenemen chón ewe einangen Levi mi nóm lón Jerusalem itan Uzzi nöün Bani we mwän, nge Bani nöün Hashabiah, Hashabiah nöün Mattaniah, Mattaniah nöün Mika. Uzzi i emön mwirimwirin Asaf, iir ekkewe chón kööl mi wiisen kööl lupwen ar fel lón än Kot we Imwenfel. 23Ekkewe chón kööl ra nóm fän än ewe king öllük mi akkóóta ar angang iteiten rän.

24Pethahiah nöün Meshezabel we mwän, i emön seni ekkewe mwirimwirin Zerah nöün Judah we mwän a wiisen tupwuni ewe king fänäsengesin ekkewe mettóch meinisin fäniten ekkewe aramas.

Ekkewe aramas mi nóm lükün Jerusalem

25Mi wor ekkóch ekkewe aramasen Judah ra nóm lón Kiriath Arba me wisópwósópwun kewe, lón Dibon me wisópwósópwun kewe, lón Jekabzeel me wisópwósópwun kewe. 26Ra pwal nónnóm lón Jeshua, lón Moladah, lón Beth Pelet, 27lón Hazar Shual, lón Beersheba me wisópwósópwun kewe, 28lón Ziklak, lón Mekonah me wisópwósópwun kewe. 29Ra pwal nónnóm lón En Rimmon, lón Zorah, lón Jarmuth, 30lón Zanoah, lón Adullam me wisópwósópwun kewe, lón Lakish me ekkewe tännipi ünükkün, pwal lón Azekah me wisópwósópwun kewe. Iei usun ekkewe aramasen Judah ra nónnóm lón ewe fönü seni Beersheba tori ewe leemólun Hinnom.

31Nge ekkóch ekkewe aramasen Benjamin ra nóm lón Keba, Mikmash, Aija, Bethel me wisópwósópwun kewe. 32Ra pwal nónnóm lón Anathoth, Nob, Ananiah, 33Hazor, Ramah, Kittaim, 34Hadid, Zeboim, Neballat, 35Lod, Ono me ewe leemólun Chón Sipeöch le Angangen wón Paaw.

36Ekkóch me leiin chón ewe einangen Levi mi nóm lón Judah ra feilló pwe repwe nónnóm ren chón ewe einangen Benjamin.

Ekkewe souasór me ekkewe mwän seni ewe einagen Levi

12 Ikkeiir ekkewe souasór me ekkewe mwän seni ewe einangen Levi mi liwinsäfäl seni ar ooló ra fiti Zerubbabel nöün Shealtiel we mwän me Jeshua: Seraiah, Jeremiah, Ezra,

2Amariah, Malluk, Hattush,

3Shekaniah, Rehum, Meremoth,

4Iddo, Kinnethon, Abijah,

5Miamin, Moadiah, Bilkah,

6Shemaiah, Joiarib, Jedaiah,

7Sallu, Amok, Hilkiah me Jedaiah. Ikkeiir ekkewe souemmwenin leiin ekkewe souasór me chiechier kewe lón fansoun Jeshua.

8Ekkewe mwän seni ewe einangen Levi mi liwinsäfälito seni ar ooló: Jeshua, Binnui, Kadmiel, Sherebiah, Judah me pwal Mattaniah. Mattaniah me chiechian kewe ra wiisen nemeni ekkewe köölün kilisou. 9Bakbukia me Unni fiti chiechier kewe ra üütä äwenewener lupwen ar föri angangen wiiser.

10Jeshua ewe souaór mi lap i semen Joiakim, nge Joiakim i semen Eliashib, Eliashib i semen Joiada, 11Joiada i semen Johanan, nge Johanan i semen Jaddua.

12Iwe, lupwen Joiakim a souasór mi lap, ikkeiir ekkewe souemmwenin familien ekkewe souasór:

Meraiah i souemmwenin ewe familien Seraiah. Hananiah i souemmwenin ewe familien Jeremiah.

13Meshullam i souemmwenin ewe familien Ezra. Jehohanan i souemmwenin ewe familien Amariah.

14Jonathan i souemmwenin ewe familien Malluk. Josef i souemmwenin ewe familien Shekaniah.

15Adna i souemmwenin ewe familien Harim. Helkai i souemmwenin ewe familien Meremoth.

16Zekariah i souemmwenin ewe familien Iddo. Meshullam i souemmwenin ewe familien Kinnethon.

17Zikri i souemmwenin ewe familien Abijah. Piltai i souemmwenin ekkewe familien Miniamin me familien Moadiah.

18Shammua i souemmwenin ewe familien Bilkah. Jehonathan i souemmwenin ewe familien Shemaiah.

19Mattenai i souemmwenin ewe familien Joiarib. Uzzi i souemmwenin ewe familien Jedaiah.

20Kallai i souemmwenin ewe familien Sallu. Eber i souemmwenin ewe familien Amok.

21Hashabiah i souemmwenin ewe familien Hilkiah. Nethanel i souemmwenin ewe familien Jedaiah.

22Lón ótun mwüün Darius ewe re Persia, a kochufengen le makketiw iteiten ekkewe souemmwenin familien ekkewe mwän seni ewe einangen Levi pwal iteiten ekkewe souemmwenin familien ekkewe souasór lón ótun ekkeei souasór mi lap: Eliashib, Joiada, Johanan me Jaddua. 23Nge ren ekkewe mwirimwirin chón ewe einangen Levi, a chök makkelong iteiten samolun ar kewe famili lón ewe pwuken uruwo tori lón ótun Johanan nöün nöün Eliashib we mwän. 24Iwe, ikkeiir ekkewe souemmwenin famili me leiin ekkewe mwän seni ewe einangen Levi: Hashabiah, Sherebiah, Jeshua nöün Kadmiel, Kadmiel me pwal chiechier kewe ekkóch mi ü äwenewener lupwen ra köölün mwareiti me kilisou ngeni Kot. Ew kinikinin mwiichen chón kööl a likatattapw mwirin pwal ew le pölüweni, usun minne David ewe mwäneilükün Kot a fen öllük.

25Mattaniah, Bakbukiah me Obadiah ra pwal pacholong leiin ekkewe chón kööl. Nge Meshullam, Talmon me Akkub iir ekkewe chón mammasa ekkewe asamalap ra wiisen tümwünü ekkewe imwen iseis mi nóm órun asamen titttin ewe Imwenfel. 26Ätekeei ra föri ar angang lón ótun Joiakim nöün Jeshua we mwän, nge Jeshua nöün Jehozadak lón ótun Nehemiah ewe kepina pwal lón ótun Ezra ewe souasór me soummak.

Nehemiah a efiinüüna ewe tiit

27Iwe, lupwen fansoun efiinüünen ewe minaföön tittin Jerusalem, ra kütta ekkewe mwän seni ewe einangen Levi lón leenier kewe meinisin o ra emmweniireto Jerusalem pwe repwe älillis lón apwaapwan efiinüünen ewe tiit. Repwe chóóni ewe fansoun apwaapwa fän ar köölün kilisou, pwal fän ekkewe pisekin likettik iter simpal, laer me harp. 28Iwe, ra pwal emwiichato ekkewe chón kööl seni Jerusalem me ekkewe sóóp mi nóm pwellin ünükkün pwal seni ekkewe sóóp ia ekkewe chón Netofa ra nóm ie. 29Ekkewe chón kööl ra pwal feitto seni Beth Kilkal, Keba me Asmaveth, pün ekkewe chón kööl ra köüütä pwisin ar telinimw pwellin ünükkün Jerusalem. 30Iwe, lupwen ekkewe souasór me ekkewe mwän seni ewe einangen Levi ra wes le pwisin limetiir lón ewe angangen öörünien limelim, mwirin, ra pwal föri ewe angangen öörünien limelim ngeni ekkewe aramas, ngeni ekkewe asamalap pwal ngeni ewe tiit.

31Mwirin, ngang üwa emmwenätä ekkewe souemmwenin Judah wón ungen ewe tiit o üwa ochufengeni ruu mwiichen chón kööl mi wätte, pwe repwe fätäl wón ewe tiit o köölün kilisou. Ew mwiichen chón kööl epwe fätäl ngeni peliifich wón ewe tiit nge repwe fätäliti ewe Asamalapen Ioien Piipi. 32Iwe, Hoshaiah me esópwun ewe mwiichen souemmwenin Judah ra tapweló mwiriiir, 33fiti Azariah, Ezra, Meshullam, 34Judah, Benjamin, Shemaiah, Jeremiah, 35me ekkóch souasór mi ettiki nöüür rappwa ra tapweló mwiriir. Mwirin, Zekariah nöün Jonathan we mwän, nge Jonathan nöün Shemaiah, Shemaiah nöün Mattaniah, Mattaniah nöün Mikaiah, Mikaiah nöün Zakkur, nge Zakkur emön mwirimwirin Asaf, a tapweto mwiriir, 36fiti chiechian kewe iter Shemaiah, Azarel, Milalai, Kilalai, Maai, Nethanel, Judah me Hanani. Ra nöünöü pisekin likettik mi för lón ótun David ewe mwäneilükün Kot. Nge Ezra ewe soummak a mweii ewe tettel. 37Iwe, lupwen ra tori ewe Asamalapen Pwuachchen Kólik, ra fätäl wenewenetä wón ekkewe nattö mi pweretä ngeni ewe telinimwen David. Iwe, ra fätäletä ngeni wón ewe tiit o pwereló asen imwen David we. Mwirin, ra feilló ngeni ewe Asamalapen Kólik mi nóm peliöötiw.

38Iwe, ewe oruuwen mwiichen chón köölün kilisou ra fätäl ngeni peliimööng pwe aipwe chufengen me ewe ew mwiichen chón kööl. Ngang üwa tapweló mwiriir fiti ewe pwal esóp mwiichen aramas aia pwereló wón ewe tiit. Aia feilló asen ewe Imw Tekia Leenien Uum o feittä tori ewe Tiit mi Chöölap. 39Mwirin, aia pwal feilló asen ewe Asamalapen Efraim o fätäleló tori ewe Asamalapen Jeshanah me ewe Asamalapen Iik me ewe Imw Tekia imwen Hananel. Iwe, aia feilló tori ewe Imw Tekia itan Ipwükü. Mwirin, aia sópweló le pwereló tori ewe Asamalpen Siip o köüüló meren ewe Asamalapen Chón Mammas.

40Iwe, ekkewe ruu mwiichen chón kööl ra köölün kilisou. Mwirin, ra feilló ren ewe Imwenfelin Kot, ia ra üütäló ie lón leenier. Iwe, pwal ina chök usun meet ngang üwa föri fitifengen me ewe mwiichen souemmwen mi fitiei. 41Äm aia feilló ppök me ekkewe souasór mi ettik rappwa iter Eliakim, Maaseiah, Miniamin, Mikaiah, Elioenai, Zekariah me Hananiah, 42pwal ekkewe chón kööl iter Maaseiah, Shemaiah, Eleazar, Uzzi, Jehohanan, Malkijah, Elam me Erez. Ra ettiki nöüür kewe pisekin likettik o leüommóng le kööl fän emmwenien Jezrahiah ewe chón emmweni ar we mwiichen chón kööl. 43Iwe, pwal lón ena ränin, ra ääni asór chómmóng mönün asór o ra pwapwa pün Kot a föri pwe repwe meseik fän pwapwa mi lapalaap. Ekkewe fefin me ekkewe semiriit ra pwal chóóni ei apwaapwa. Ina minne, aramas ra tongeni rongorong me toowaw mweireiren än ekkewe aramasen Jerusalem pwapwa.

Chón wiisen föri angangen lón ewe Imwenfel

44Iwe, pwal lón ena chök fansoun, ekkóch mwän ra kefilitä pwe repwe wiisen tümwünü ekkewe ruumwen iseis fäniten ekkewe asór, ekkewe mwenuwa me ekkewe naengol. Iir repwe wiisen ionireto seni ekkewe tännipi mi nóm ünükkün ekkewe telinimw o isenirelong lón ekkewe leenien iseis fäniten ekkewe souasór me ekkewe mwän seni ewe einangen Levi, usun a fen pwüngüló lón öllük, pün ekkewe aramasen Judah ra öüchcheani ekkewe souasór me ekkewe mwän seni ewe einangen Levi me ar angang. 45Ra föri ewe angang fäniten ar we Kot me ewe angangen limelim, usun chök pwal minne ekkewe chón kööl me ekkewe chón mammasa ekkewe asamalap ra föri, alóngólóng wón ewe öllük än David me Solomon nöün we mwän. 46Pün ei öörüni fäniten an epwe wor ekkewe chón emmweni mwiichen chón kööl lón köölün mwareiti me kilisou ngeni Kot a poputä seni chök lóóm lón ótun David me Asaf. 47Iwe iei, lón ótun Zerubbabel me lón ótun Nehemiah, ekkewe aramasen Israel meinisin ra uwato mwöngö iteiten rän fäniten ekkewe chón kööl me ekkewe chón mammasa ekkewe asamalap. Ra pwal äimwüeló wiisen ekkewe mwän seni ewe einangen Levi, nge ekkewe mwän seni ewe einangen Levi ra äimwüeló och kinikinin meet ra angei pwe wiisen ekkewe souasór, ekkewe mwirimwirin Aaron.

Lóngólóngun imwufesen

13 Iwe, lón ewe chök pwal ränin, lupwen ra älleani ngeni ekkewe aramas ewe pwuken öllük än Moses pwe repwe rongorong, ekkewe aramas ra küna pwe a makketiw lón pwe esap tongeni mwüümwütä ngeni emön chón Ammon ika emön chón Moab an epwe chóóni ewe mwiichen aramas nöün Kot, 2pwokiten iir resap etiwa ekkewe chón Israel fän pilawa me kólik lupwen ra toowu seni Egypt. Nge ra fen mööni Balaam pwe epwe üüngeniir o önümamawer. Inamwo nge äm we Kot a sorei ewe önümamaw ngeni ew feiöch. 3Iwe, lupwen ekkewe aramas ra rongorong ei öllük, ra mwittir ösüüweló chókewe meinisin mi nofit ar leewo seni leiin ewe mwiichen chón Israel.

Ewe angangen försäfäl fän emmwenien Nehemiah

4Me mwen an fis ei, Eliashib ewe souasór, a fen kefilitä pwe i epwe wiisen tümwünü ekkewe ruumwen iseis lón ewe Imwenfel än äm we Kot, nge pwal i emön määrärin Tobiah. 5Eliashib a försäfäli ew kewe ruumwen iseis mi wätte fäniten Tobiah. Ra piin aea ei ruumw me mwan fäniten ar repwe iseni ie ekkewe asóren mwöngö, ewe appach mi pwokkus, ekkewe pisek fäniten ewe Imwenfel, ekkewe naengolun föün wiit, wain mi fö, apüra seni föün olif me ewe kinikin mi käimwüló fäniten ekkewe souasór. Moses a öllük pwe ekkeei asór ikkeei wiisen ekkewe mwän seni ewe einangen Levi me ekkewe chón kööl me ekkewe chón mammasa ekkewe asamalap.

6Nge lón ena fansoun lupwen a fis ei lapalap, ngang üsap nóm lón Jerusalem, pün ngang üwa fen liwinsäfäliló ren ewe king lón iliik me ruuen ierin mwüün Artasörksiis kingen Babylon. Iwe, ekkóch fansoun me mwirin, ngang üwa tungór mwümwütän äi üpwe liwinsäfäl ngeni Jerusalem seni ewe king. 7Iwe, lupwen üwa waresäfäliti Jerusalem, üwa silei usun ewe lapalap mi ngaw Eliashib a föri pwe i a awora ngeni Tobiah ew ruumw me lón ekkewe leeni lükün ewe Imwen Kot. 8Ngang üwa fókkun letipechchou ren ei lapalap. Iei minne, ngang üwa oturawu pisekin Tobiah kewe meinisin seni lón ewe ruumw. 9Mwirin, ngang üwa öllük ngeniir pwe repwe limeti ekkewe ruumw. Iwe, ngang üwa eliwinisäfälielong ekkewe pisek fäniten än Kot we Imwenfel fiti ewe asóren mwöngö me ewe appach mi pwokkus.

10Üwa pwal silei pwe ekkewe aramas resap ngeni ekkewe mwän seni ewe einangen Levi wiiser, ina popun emön me emön leiin ekkewe mwän seni ewe einangen Levi me ekkewe chón kööl mi wiisen föri angangen fel ra en me liwiniti an angang lón ar kewe tännipi. 11Iwe, ngang üwa äniini ngeni ekkewe souemmwen o eisiniir, “Pwata esap chüen tümwün ewe Imwenfelin Kot?” Mwirin, üwa köörato ekkewe mwän seni ewe einangen Levi meinisin o üwa atolonga säfäliir lón en me pwüngün leenian.

12Mwirin, ekkewe aramasen Judah meinisin ra pwal poputä säfäl le uwato ar kewe naengolun föün wiit, wain mi fö me apüra seni föün olif lón ekkewe ruumwen iseis lón ewe Imwenfel. 13Iwe, ngang üwa atolonga Shelemiah ewe souasór, Zadok ewe soummak me Pedaiah emön mwän seni ewe einangen Levi pwe repwe wiisen tümwünü ekkewe ruumwen iseis. Üwa pwal filätä Hanan nöün Zakkur we mwän nge Zakkur nöün Mattaniah pwe epwe wiisen chón älisiir. Ekkeei mwän ra fókkun ölükülük o echchipwör nónnómwun manawer. Iwe, iei wiiser pwe repwe ääni wenechchar le eineti ekkewe mwöngö ngeni määräriir kewe seni ewe einangen Levi.

14Äi Kot, kopwe chechchemeniei fänäsengesin minne üwa föri, nge kosap möllükaló äi kewe föfför mi mwirinnö üwa likiitü le föri fäniten óm we Imwenfel en äi Kot pwal fäniten óm kewe angang mi fis lón.

15Iwe, lón ekkana fansoun, ngang üwa küna ekkóch aramas me lón Judah ra pwuupwu föün irän wain lón ewe ränin Sabbat. Pwal ekkóch ra kekiiätä wón nöüür kewe dongki tuken föün wiit. Ra pwal uweato ar kewe wain, föün irän wain, föün ewe irä fiik me sakkopaten masowen lón tännipi ngeni Jerusalem pwe repwe amöömö lón ewe ränin Sabbat. Iei minne, ngang üwa öpwüngür fäniten ar amöömö masowen ar kewe tännipi lón ewe ränin Sabbat. 16Mi pwal wor ekkóch re Tayer ra nóm ikenan, ra uwowto iik me sakkopaten pisek. Ra amöömö ngeni ekkewe aramasen Judah lón ewe ränin Sabbat, nge fókkun me lón Jerusalem. 17Mwirin, ngang üwa chiewenewen ngeni ekkewe souemmwenin Judah o apasa ngeniir, “Meet ei sókkun mettóch mi ngaw ämi öüwa föri? Pwata öüwa epiningawa pinin ewe ränin Sabbat lón ei sókkun lapalap mi ngaw? 18Ifa usun, sap iei ewe sókkun föfför ämi kewe leewo ra föri, ina pwata ach we Kot a awarato wóóch me wón ei telinimw ekkeei feiengaw meinisin sia nóm lón iei? Iwe, iei ämi öüwa alapaló än Kot lingeringer wón ekkewe aramasen Israel ren ämi mwüütätä pwe epwe ta pinin ewe Sabbat lón ei sókkun lapalap.”

19Ina minne, ngang üwa öllük pwe seni ena fansoun feilló, ekkewe asamalapen ewe tittin Jerusalem repwe kesipeló lupwen a poputä le pwiniló lekkuniól iteiten Elimuw me mwen ewe ränin Sabbat, nge ekkewe asamalap resap tongeni suuksäfäl tori wesin ewe ränin Sabbat. Mwirin, üwa tiinaló ekkóch leiin neii kewe chón angang pwe repwe mammasa ekkewe asamalap pwe esap wor emön epwe tongeni uwealong och pisekin amöömö lón ewe telinimw lón ewe ränin Sabbat. 20Iwe, a fis fän ew ika fän ruu pwe ekkewe chón kamö me amöömö sakkopaten pisek ra chök pwinipwin lükün ewe tittin Jerusalem. 21Nge ngang üwa ekkeni äi kapas ngeniir o apasa, “Meet öüwa föri ikeei? Pwata öüwa pwinipwin lükün ewe tiit? Are öüpwe försäfäli ei, ngang üpwe aressini kemi.” Iwe, seni ei fansoun, resap chüen feitto lón ewe ränin Sabbat. 22Mwirin, ngang üwa öllük ngeni ekkewe mwän seni ewe einangen Levi pwe repwe limetiir lón pwüngün ewe öörünien limelim. Iwe, repwe feilló o mammasa ekkewe asamalap fäniten ar repwe tümwünü ewe ränin Sabbat pwe aramas repwe epini.

Äi Kot, kopwe chechchemeniei fänäsengesin pwal ei föfför üwa föri. Kopwe pwääri ngeniei óm ümöümöch alóngólóng wón óm tong ese mwüch mi lapalaap.

23Lón ekkana fansoun, ngang üwa pwal künökün chón Sus mi pwüpwülü ngeni fiin Ashdod, Ammon me Moab. 24Iwe, fen lapalón ngawan, esóp seni iteiten leiin nöüür kewe semiriit ra kapas lón kapasen Ashdod ika lón än ekkóch sókkun aramas kapas, nge resap fen tongeni ar repwe kapas lón kapasen Judah. 25Iwe, ngang üwa äniini ngeniir o önümamawer. Üwa wichii ekkóch me leiir o weitaawu meeten möküreer. Mwirin, ngang üwa föri pwe iir repwe pwon lón iten Kot o üwa apasa: “Ämi öüsap fókkun chüen öpwüpwülüwa nöümi kewe föpwül ngeni nöüür kewe ölüwölün, öüsap pwal angei nöüür kewe föwpül pwe pwülüwen nöümi kewe ölüwöl ika pwisin pwülüwemi.” 26Üwa pwal apasa: “Ifa usun, esap pwokiten apwüpwülü usun ekkeei ina meet Solomon kingen Israel a tipis ren? Esap wor emön me leiin kingen ekkewe mwüü mi chómmóng a tongeni wewe ngeni Solomon. I a chen meren Kot, iwe, Kot a seikätä i pwe epwe king wón unusen Israel. Nge pwal i mwo nge pwülüwan kewe fiin ekis ra emmwenalong lón tipis. 27Ifa usun, men öch ach sipwe rong pwe pwal ämi öüwa föri ei sókkun föfföringaw o öüwa atai ämi pwonen ölükülük ngeni ach we Kot ren ämi pwüpwülü ngeni fiin ekis?”

28Emön me leiin nöün Joiada kewe mwän, nge Joiada nöün Eliashib ewe souasór mi lap, a pwülüweni emön föpwül nöün Sanballat ewe re Horon. Iei minne, ngang üwa ösüüweló ätei seniei.

29O äi Kot, kopwe chechchemeni ekkeei aramas, pwokiten iir ra elimengawa ewe wiisen souasór me ekkewe pwon fäniten ekkewe souasór me chón ewe einangen Levi.

30Iei usun äi üwa limetawu iteiten mettóchun ekis meinisin seni ekkewe souasór me ekkewe mwän seni ewe einangen Levi o ewiisa ngeniir minne repwe föri, o älelleta fichi pwe emön me emön a silei en me an angang. 31Ngang üwa pwal awora akkóót fäniten fansoun än ekkewe aramas repwe tupwuto mwüüch fäniten ewe róngen asór lón ekkewe fansoun mi affat. Ngang üwa pwal akkóóta ewe fansoun fäniten an epwe ioifengen ewe mwenuwa.

O äi Kot, kopwe chechchemeniei ren óm ümöümöch!