Nahum

1 Iei ew kapasen oosuni fänäsengesin ewe telinimw Niniva. Iei pwuken künäen Nahum ewe re Elkosh i a küna lón künäan.

Än ewe SAMOL soong ngeni Niniva

2Ewe SAMOL i emön Kot mi luukommóng me älemöu tipis; i ewe SAMOL mi uren soong o ngeni aramas chappen ar föfför. Ewe SAMOL a ngeni chókewe mi üüngeni i chappen ar föfför o ossowu an soong ngeni chón opwutan kana.

3Ewe SAMOL a mang le soong, nge a lapalaap an manaman; ewe SAMOL esap likitaló an epwe öpwüngü ewe chón tipis. Ewe SAMOL a pwääraló an manaman lón ewiniär me mölümöl. Ekkewe kuchu ikkana süüsün fän pachapachan.

4Fän an öllük, ekkewe mataw me ekkewe chaanpwuupwu meinisin ra pwasapwasatä. Ekkewe tännipi mi pwülüöch lón Bashan me Karmel ra aiolool, nge ekkewe wöllap mi määröch lón Lebanon ra eiemäämä.

5Ekkewe chuuk ra chechcheech me mwen ewe SAMOL, nge ekkewe chukutekisón ra teliló. Fönüfan a chechcheech me fän mesan. Ewer, fönüfan me meinisin minne a nóm wón ra chechcheech.

6Iö a tongeni üütä me mwen an soong? Iö a tongeni manaw ren pwichikaren an soong? An lingeringer a ngetewu usun ekkei, nge ekkewe chuuk ra mökküfesen o wiliti pwul mworomwor me fän mesan.

7Ewe SAMOL a mwirinnö, i ew leenien op lón fansoun riäfföü. I a tümwünü chókana mi anómwu ar apilükülük wón,

8nge i epwe awarato sópwólón Niniva ren ew löölö mi pwummóng; i epwe tapweralong chón opwutan kana lón rochopwaaken pwiin.

9Pwata öüwa rawangawei ewe SAMOL? I epwe arosakemiiló ren ew chök wichiwich. Esap pwal osun an epwe okuuw fän ruu an epwe wichi kemi.

10Chón opwutan kana ra wewe ngeni iräfölüföl mi likopinipin, ra taroporop usun chókana mi pwucholó ren ünümeer wain; repwe karaló usun fetilipwas mi unusen pwasapwas lón ew mälämäl.

11Emön a feitto senuk, en Niniva, a rawei minne mi ngaw ngeni ewe SAMOL o ekiekietä ekkewe akkóót mi ngaw.

12Iwe, iei meet ewe SAMOL a apasa: “Inamwo ika chón Assyria ra fókkun pöchökkül o chómmóng, nge repwe chök rosoló o morukóló. Ämi neii aramas, ngang üwa fen eriäfföwü kemi fän ew. Iwe, ngang üsap pwal chüen eriäfföwüsäfäli kemi.

13Iei ngang üpwe angasakemiiló seni än chón Assyria eriäfföwü kemi o üpwe mwüütaló fööfömi kewe sein.”

14Nge ewe SAMOL a atoowu ei öllük fänitom en Assyria: “Esap chüen wor mwirimwirum epwe sópweló itom. Ngang üpwe ataeló ekkewe uluulun önümwäl mi fal me ekkewe mi ketel seni mächä mi nóm lón imwen óm kewe kot. Ngang üwa amollätä ew peias fänitom, pwokiten en ka fókkun enniopwut o esap fich ngenuk óm kopwe manaw!”

15Öüpwe nengeni! Pachapachen emön chón esilesil a feitto wón ekkewe chuuk. I a uweato poraus mi mwirinnö, epwe esilefeili ew porausen kinamwe. Ämi aramasen Judah, öüpwe efisi apwaapwan ämi kewe ränin chuulap o öpwönüwetä ämi kewe pwon. Pün ekkewe chón opwuta kemi seni Niniva resap chüen pwereto lón fönüwemi o maunsäfäl ngeni kemi. Iir repwe fókkun rosoló.

Taalón Niniva

2 Ewe chón kata a feitto pwe epwe maun ngenuk, en Niniva. Kopwe anómwu mwän lón ekkewe leeni mi pöchökkül me lón óm we telinimw. Kopwe mammasa ewe aal. Kopwe üföüfoló üföüfen maun. Kopwe öpöchökkülók.

2Pün ewe SAMOL a eliwinisäfäli lingen Jakob pwe epwe usun chök lingen Israel me mwan, pün chón opwutan kana ra sooläni pisekin o kupieló palan kana.

3Ekkewe chón pwora mi maun ngenuk ra uwoow ar pisekin eppet lón maun mi parapar; ekkewe sounfiu ra üföüf üüf mi parachól. Mächään wón ekkewe wóókenin maun ra molupolup lón ewe rän ra mollotä ngeni maun; ekkewe siles mi för seni ewe irä pain ra äkkächewechew.

4Ekkewe wóókenin maun ra säpwuropwurfeil lón ekkewe aal, ra ekkeliwin le sääfeil lón ewe leeni lukalapen ewe telinimw. Ra usun tööl mi ngetenget; ra mwittir usun inefi.

5Ewe kingen Assyria a tiiti nöün kewe sounfiu mi kefil, nge ra chepetek me leal ren ar nuokkus. Ra mwittir le sää ngeni tittin ewe telinimw; ra öüüwetä ar kewe pisekin eppet lón maun.

6Ekkewe asamalap órun ewe chaanpwuupwu ra fen suukuló o ekkewe chón opwut ra fen tolong. Ewe imwen king a chök arap ngeni epwe turuló.

7Ewe finesamol a ooló. Nöün kewe chón angang nengngin meinisin ra letipeta ren an ooló. Ra ngüüngüres usun ekkewe mwurö. Ra pisiri fän mwäriir lón ar letipeta.

8Niniva a wewe ngeni ew nómwun kólik mi lich, ewe kólikin lón a chök pwuupwuló, pün ekkewe aramasen lón ra süseni. Aramas ra kökkö o apasa, “Öüpwe köüüló, öüpwe köüüló le süüló!” Nge esap wor emön a kul säfäl.

9Öüpwe angei ewe silifer fän pöchökkül! Öüpwe angei ewe kolt fän pöchökkül! Pün esap wor öüküükün chómmóngun pisek mi öüchchea me sakkopaaten wöw mi wor lón ewe telinimw.

10Iei ewe telinimw a taaló o pöön. Leluken aramas a kisikiisiló, pwäsukuur a apwangapwangaló, inisiir a chechcheech, nge wón meser a örüló.

11Ifa chök ewe telinimw Niniva mi wewe ngeni ew pwangen laion, ewe leeni ia ekkewe appanen laion ra mwöngö ie, ewe leeni ia ewe ätemwänin laion me ewe liäfefinin laion ra feilló ie, pwal ekkewe appanen laion ra nóm lón nge esap wor och repwe nuokkusiti?

12Ewe laion a ataatakisietiw liäpan pwe ochään nöün kewe appanan, a fiei chioren liapan pwe ochään ewe liäfefin. A amasowa pwangan ren liäpan, ren minne a niieló.

13Iwe, ewe SAMOL mi Unusen Manaman a apasa, “Nengeni, ngang üwa üüngenuk, en Niniva. Ngang üpwe kenaló wóóm kewe wóókenin maun. Iwe, ketilas epwe niieló lón maun noum kewe sounfiu mi wewe ngeni liäliföön laion. Ngang üpwe öükätiw pwe esap chüen wor liapom kopwe liäpeni seni wón fönüfan. Esap pwal wor emön epwe chüen rong mwelien noum kewe chón arong.”

Feiengawen Niniva

3 Feiengawen ewe telinimen össükü chcha, ewe telinimw mi uren chofona me ur ren wöw pün ra angei pisekin aramas fän pöchökkül. Esap ükütiw le angei liäpan.

2Öüpwe öüseling! Öüwa tongeni rongorong ökürangen ewe selin wichiwich me ökürangen willen ekkewe wóóken, pwal chopwuchopwun pachapachen ekkewe óris me ökürangen ekkewe wóókenin maun.

3Ekkewe sounfiu mi waawa óris ra che fän nöüür ketilas mi molupolup me fän wókuur siles mi meriweriw. A wor chómmóng aramas ra mäló. Ekkewe soomä ra chök chukuchukutä, resap lea pün ra fókkun chómmóng. Aramas ra chök chepetek wón ekkewe soomä.

4Meinisin ei a fis ngeni Niniva pwokiten chómmóngun an föri usun föfförun emön fiin lisowu. Niniva ew telinimw a wewe ngeni emön fefin mi silelap emichimich o föri angangen roong mi efeiengaw. A otupwu chón ekkewe mwüü ren an föfförun lisowu me mwiichen aramas ren an angangen roong.

5Iei alon ewe SAMOL mi Unusen Manaman, “Nengeni, ngang üwa üüngenuk, en Niniva. Ngang üpwe särifäätä üfom o pwölü ngeni wón mesom. Ngang üpwe pwääri ngeni chón ekkewe mwüü óm seleló me ässäwum.

6Nengeni, ngang üpwe móneetä wóm limengaw, ngang üpwe föri pwe kopwe itengaw, üpwe pwal föri pwe kopwe och minen ässäw me fän mesen aramas.

7Aramas meinisin mi künók repwe süü senuk o apasa, ‘Niniva a nóm lón taatakis. Iö epwe letipeta fänitan?’ Ia ngang üpwe tongeni kütta me ie emön chón echipóók?”

8Ifa usun, en ka mwirinnö lap seni ewe telinimw Thebes lón Egypt mi nóm órun ewe chaanpwuupwu Nail, ewe kólik a pwellifeili ünükkün? Ewe chaanpwuupwu ina eppetin seni feiengaw, nge ewe kólik ina tittin.

9Ethiopia me Egypt ra nóm fän an nemenem, esap wor öüküükün an pöchökkül; ekkewe chón Put me chón Lybia iir pelian.

10Iei mwo nge chón Thebes ra ooló o feilló lón fönüwen chón ekis. Ekkewe chón maun ngeniir ra oturu ekkewe semiritin Thebes ngeni föün tittin ewe telinimw me lón ekkewe leeni ia aramas ra mwiichfengen ie. Ekkewe sounfiu ra üttüüt wón ekkewe chón Egypt mi iteföüló pün repwe silei ika iön leiir repwe nöüni chón angang. Ra fööti ekkewe aramas tekia ngeni sein o uweireló.

11Iwe, pwal en Niniva, kopwe usun chök emön chón sakaw mi tokorikirik; kopwe resin le kütta ia kopwe op ie, pwe kopwe op seni ewe chón opwutók.

12Òm kewe imwen maun mi pöchökkül meinisin ra wewe ngeni ekkewe irä fiik mi wor akkomwen üwaar mi nup; lupwen emön a wichikiir, ekkewe föün fiik ra mworotiw lón awen ewe chón ochooch.

13Nengeni noum kewe sounfiu repwe apwangapwang o lipwäkingaw usun ekkewe fefin! Ekkewe asamalapen tittin fönüwom repwe suukchööchöló ngeni ekkewe chón opwutók; ekkei epwe kenaló óm kewe ammwöchün asamalap.

14Kopwe amollóketä pün chón opwutom repwe pwellieló leeniom fän pisekin maun. Kopwe iseiseló kólik fänitom. Kopwe öpöchökküla óm kewe leeni mi pöchökkül. Kopwe för pilak pwe kopwe försäfäli ekkewe tiit. Kopwe feilló lón ekkewe pwaang o alölü ewe pwülüpar. Mwirin, kopwe atolonga lón sekiitaan.

15Iwe, inamwo are ka amollóketä, nge ekkei epwe kenukló; ketilas epwe pökuketiw lón maun. Ewe chón opwutók epwe äärukoló usun liffichimas ra arosaló irän mwömwöngö mi ffót. Kosap tongeni tiweló, inamwo ika ka achómmóngukeló usun liffichimas, inamwo ika ka achómmóngukeló usun ekkewe liffichimas mi wätte.

16En ka achómmóngaló noum kewe chón amöömö pisek pwe ra chómmóng seni ekkewe füün läng. Iir ra ouraló óm we telinimw ren wöw mi chómmóng. Nge iir ra wewe ngeni ekkewe pwiin liffichimas pün repwe ataeló ewe fönü; mwirin, repwe ässiló.

17Noum kewe samol ra wewe ngeni ekkewe pwiin liffichimas mi mwetemwet, noum kewe aramas tekia ra wewe ngeni ekkewe pwiin liffichimas mi sootiw wón ekkewe tiit lón fansoun patapat.

Nge lupwen ewe akkar a töötä, ra ässiló, nge esap wor emön a silei ia ra ässiló ie.

18En kingen Assyria, noum kewe samol mi wewe ngeni chón masen siip ra möürüchchow, noum kewe aramas tekia ra möürün mäló; noum kewe mwiichen sounfiu ra toropasfeil wón ekkewe chuuk, nge esap wor emön a emwiichafengeniir.

19Esap wor och a tongeni amóeló kinasom; nifönum a fókkun efeiengaw. Iteiten emön me emön mi rongorong ewe poraus usun óm feiengaw, a alopwolop ren an pwapwa pwokiten óm taaló. Pün iö esap meefi weiresin óm angangen eriäfföü mi sópwósópwóló le fis lón fansoun langattam?