Mika

1 Iwe, ewe SAMOL a kapas ngeni Mika ewe re Moresheth lón mwüün ekkewe kingen Judah iter Jotham, Ahaz me Hezekiah. Iei usun minne Kot a pwääri ngeni Mika lón künäan kewe fänäsengesin Samaria me Jerusalem.

2Öüpwe rongorong, ämi chón ekkewe mwüü meinisin, fönüfan me meinisin mi nóm wón öüpwe öüseling, pün ewe SAMOL KOT epwe emön chón pwärätä mi üüngeni kemi, ewe Samol epwe kapas seni an we imwenfel mi pin.

Köpwüngün Samaria me Jerusalem

3Nengeni, ewe SAMOL epwe feitto seni leenian we; i epwe feittiw o pwuutiw wón ekkewe leeni mi tekia wón fönüfan.

4Iwe, ekkewe chuuk repwe teliló me fän pecheen usun kiriis a teliló ren ekkei. Repwe teliló o pwuutiw usun kólik a pwuutiw me wón ew palapalatä. Iwe, ekkewe leemól repwe saang fesen.

5Ekkeei mettóch meinisin repwe fis pwokiten än Jakob üleförea pwal pwokiten än chón Israel kewe tipis. Iö a popuw än Jakob üleförea? Ifa usun, esap chon Samaria? Ia ra nóm ie ekkewe leenien fel wón ekkewe leeni mi tekia? Ifa usun, resap nóm lón Jerusalem?

6“Iei minne, ngang üpwe föri pwe Samaria epwe wiliti ew ioien piipi, epwe pwal wiliti ew leeni fäniten fót irän wain. Ngang üpwe asöönätiw föün tittin ewe telinimw lón ewe leemól o pwäärawu lóngólóngun kewe.

7An kewe uluulun önümwäl meinisin repwe taatakis; an kewe liffang meinisin ngeni ewe imwenfel repwe karaló ren ekkei; ngang üpwe ataeló an kewe uluulun önümwäl meinisin. Pwokiten Samaria a ionifengeni ekkewe liffang seni liwinin ekkewe chón amöömö inisiir fäniten angangen lisowu, iei minne chón opwuter kewe repwe pwal aeasäfäl ngeni liwinin chón amöömö inisiir fäniten angangen lisowu.”

Kechiw me letipeta

8Mwirin, Mika a apasa, “Pwokiten ei, ngang üpwe kechiw o ngüüngüres; ngang üpwe fätälfeil nge üpwe chök seleló, üsap pwal ipweip sandal pwe esissilen äi letipeta. Üpwe wöwüwör usun emön kolak mi mwacho o pwuchöör usun ewe machchang itan ostrich.

9Pün kinasen Samaria esap tongeni móóló; ewe feiengaw epwe tori Judah, epwe pwal tori ekkewe asamalapen Jerusalem, ia neii kewe aramas ra imweimw ie.

10Öüsap aporausa ngeni chón opwutach kewe mi nóm lón Kath usun ach feiengaw; öüsap pwal fókkun kechiw. Ämi ekkewe aramasen Beth Leafrah öüpwe asokopela kemi lón pwül pwe esissilen ämi riäfföü.

11Ämi chókewe mi nóm lón ewe telinimw Shafir, öüpwe pwereló wón ämi alen ooló fän ämi sääw me seleló. Chókewe mi nóm lón Zaanan resap tongeni toowu seni lükün tittin ar telinimw pwe repwe älisi kemi. Ekkewe aramasen Beth Ezel repwe ngüüngüres; pün lóngólóngun ar we telinimw a taaló.

12Ekkewe aramas mi nóm lón Maroth ra chök nómwun witiwit fäniten än emön epwe angaser, nge feiengaw epwe feitto wóór seni ewe SAMOL, epwe tori ewe asamalapen tittin Jerusalem.

13Ämi ekkewe aramas mi nóm lón Lakish, öüpwe rii ökkörüwömön óris ngeni äkkäefóch wóóken pün öüpwe mwittir le sü. Pün en ewe äkkäewin telinimw me lón Judah ka tapweló mwirin Israel lón ewe tipisin fel ngeni uluulun önümwäl. Iei usun en ka emmwenalong Jerusalem lón tipis.

14Iei minne, öüpwe ngeni Moresheth Kath ekkewe liffangen äimwüfesen, pün esap wor och apilükülük fäniten an epwe manaw. Ewe telinim Akzib a otupwu ekkewe kingen Israel, pün a pwon ngeniir pwe epwe älisiir, nge esap föri.

15Ämi ekkewe aramas mi nóm lón Mareshah, ngang üpwe awarato emön chón liäpeni pisek fän pöchökkül pwe epwe maun ngeni kemi. Iwe, ekkewe souemmwen mi iteföüló me lón Israel repwe opolong lón ewe fööimw Adullam.

16Öüpwe kechiw ämi aramasen Judah! Öüpwe fichieló meeten möküremi fän ämi letipeta pwokiten ekkewe semiriit ämi öüwa echeniir repwe ooló nge öüsap chüen künasääfäliir. Öüpwe reipööpöló meeten möküremi, pwe öüpwe wewe ngeni ekkewe ikel mi paal, pün öüpwe letipeta ren nöümi kewe repwe ooló lón ekkewe fönü mi toowaw.

Än aramas akkóót me än Kot akkóót

2 Feiengawen chókewe mi föri ar akkóót pwe repwe föri minne a ngaw. Ra kóón wón kieer lepwin o föri ar kewe raaw mi ngaw. Mwirin, lupwen a räniló, ra föri meet iir ra fen akkóóta, pwokiten a nóm reer ewe pöchökkül pwe repwe föri meet iir ra mochen.

2Lupwen iir ra mocheniäiti ekkewe mälämäl, ra angeiir fän pöchökkül. Lupwen iir ra mochen repwe imweni imwen emön, ra chök angei. Iir ra angei seni emön aramas imwan me fönüwan me wón saman ren angangen otupwutup me mwänesol.

3Iei minne, ewe SAMOL a apasa: “Nengeni, ngang üwa ekiekietä pwe üpwe awarato feiengaw wóómi ämi ei mwiichen aramas, ew feiengaw ämi öüsap tongeni pwisin amanaw kemi seni. Iwe öüsap chüen tongeni fätäl fän ämi lamalamtekia, pün epwe tori kemi ew fansoun feiengaw.

4Lón ena fansoun, chón opwutemi kewe repwe ääni affa porausen ämi feiengaw o repwe ääni echö köölün riäfföü fäniten minne a fis ngeni kemi; repwe apasa: ‘Äm aia wesewesen feiengaw. Kot a angei seni keem fönüwem kewe o ngeni chókewe mi liäpeni keem.’ ”

5Iei minne, lupwen epwe tori ewe fansoun pwe ewe fönü epwe inetsäfäl ngeni nöün ewe SAMOL kewe aramas, esap fókkun wor inetimi.

Ekkewe soufós chofona

6Ekkewe soufós chofona ra apasa, “Kosap apasa ekeei sókkun mettóch; kosap ääni ei sókkun afalafal. Ekkeei sókkun feiengaw resap fis ngeni keem.”

7Ekkewe soufós chofona ra pwal apasa, “Ifa usun, ekkewe mwirimwirin Jakob ra önümamaw? Ifa usun, Ngünün ewe SAMOL mi songokkäi? Ifa usun, Kot mi tongeni föri ekkeei sókkun föfför?” Nge iei meet Kot a apasa: “Ngang üpwe efeiöchü emön aramas mi manaweni manawen wenechchar.

8Nge tori iei ämi neii aramas öüwa üüngeniei usun chón opwutaei. Öüwa sooläni üfen chókewe mi anómwu ar apilükülük wóómi o öüwa föri pwe repwe üföüf üüf mi kamw usun chök ekkewe mi liwinito seni maun.

9Ämi öüwa ösüüweló ekkewe fefin me leiin neii kewe aramas seni imweer kewe mi mwirinnö. Ämi öüwa pwal angefócheló äi feiöch seni nöüür kewe semiriit.

10Öüpwe üütä o feilló! Esap chüen iei fönüwemi, pwokiten ämi öüwa ouraló ei leeni ren tipis o unusen ataeló, iei popun esap chüen tüfichin an epwe försäfäl.

11Are emön aramas mi kapas chofona me otupwutup epwe feitto o apasa, ‘Ngang üpwe afalafal ngeni kemi usun wain me sakaw mi pöchökkül,’ iwe i epwe chón afalafal fäniten ei mwiichen aramas.

Kapasen pwon fäniten ngasaló

12Ewe SAMOL a sópweló le apasa, “Lón ew fansoun, ngang üpwe fókkun emwiichafengeni kemi, ämi ekkewe mwirimwirin Jakob. Ngang üpwe fókkun ochufengeni kemi, ämi ekkewe lussun chón Israel meinisin mi chüen manaw. Ngang üpwe ochufengeni kemi usun kana siip lón ew tiit, usun epwi pwiin siip lón ar leenien mwöngö fetil. Iwe, ewe leeni epwe ur ren ökürangen chómmóngun aramas.

13Nöümi we souemmwen epwe atai ewe tiit o emmweni kemiiwu seni ämi leenien ooló. I epwe emmweni kemiiwu me lón asamalapen tiitin ekkewe telinimw ia ämi öüwa ooló ie o eliwinisäfäli kemi ngeni poputän fönüwemi. Ämi we King epwe emmweni kemi, pwisin ewe SAMOL epwe öpöwü kemi o akkomw mwemi.”

Kot epwe öpwüngü ekkewe souemmwen me ekkewe soufós

3 Mwirin, ngang üwa apasa,

“Öüpwe öüseling ämi ekkewe souemmwen seni mwirimwirin Jakob pwal ämi ekkewe samolun ewe mwüün Israel. Ifa usun, sap ämi chón silei minne a pwüng?

2Nge ämi öüwa opwut minne a mwirinnö o efich minne a ngaw; ämi öüwa äseraló ünüchchen neii kewe aramas o etti fituker seni chüür;

3ämi öüwa ocheei fituken neii kewe aramas, öüwa äsera ünüchcher o pökükisietiw chüür; öüwa pökükisietiw usun fituk fäniten ämi öüpwe kukuur lón nape.”

4Mwirin, ekkewe souemmwen repwe iótek ngeni ewe SAMOL pwe epwe älillis lón fansoun riäfföü, nge i esap pölüweniir. Lón ena fansoun, i epwe aopa wón mesan seniir, pwokiten ekkewe föfför mi ngaw iir ra föri.

5Iei meet ewe SAMOL a apasa ngeni ekkewe soufós chofona: “Ämi öüwa atókkaló neii kewe aramas. Öüwa pwon ngeni chókana mi amwöngöni kemi pwe repwe kinamwe, nge öüwa amollätä pwe öüpwe maun ngeni chókana resap ngeni kemi och minne öüpwe eni.

6Iei minne, pwiin epwe tori kemi, pwe esap wor künäemi. Rochopwaak epwe pwölükemiiló o föri pwe esap tüfich ämi öüpwe oosuni minne epwe fis lón fansoun epwe feitto. Akkar epwe tupwutiw wón ekkewe soufós, nge rän epwe rocholó wóór.

7Ekkewe souwo repwe sääw, pwal ekkewe soupwe repwe itengaw. Iir meinisin repwe pwölüweló wón meser, pwokiten Kot esap pölüweniir.

8Nge ren ngang wón inisi, üwa ur ren manaman, ren Ngünün ewe SAMOL, pwal ren pwüng me pwora, pwe üpwe aronga ngeni Jakob an üleförea me Israel an tipis.

9Öüpwe rongorong ei, ämi ekkewe souemmwen seni ekkewe mwirimwirin Jakob, ämi ekkewe chón nemenem seni ekkewe mwirimwirin Israel, ämi chókewe mi opwut wenechchar o sorei meinisin minne a pwüng,

10ämi chókewe mi öüüwetä lóngólóngun Zion ren ämi nii aramas, pwal Jerusalem fän föfföringaw.

11Ekkewe souemmwenin Jerusalem ra angei liffangen emichimich lupwen ra ääni köpwüng, ekkewe souasór ra äiti ngeni aramas än Kot kapas fäniten ar repwe angei ew liiwin. Ekkewe soufós ra föri pwee fäniten ar repwe angei mooni. Nge ra pwal üra pwe ra anómwu ar apilükülük wón ewe SAMOL o apasa, “Esap wor och feiengaw epwe tori kich. Ifa usun, ewe SAMOL esap nóm lefiilach?”

12Iei minne, Zion epwe wewe ngeni ew mälämäl mi ttu pwokitemi, Jerusalem epwe wiliti ew ioien mettóch mi taaló, nge ewe chuuk ia ewe imwenfel a nóm ie epwe wiliti ew wöllap.

Chukun ewe SAMOL

4 Iwe, lón ekkewe ränin sópwólón,

ewe chuuk ia a nóm ie än ewe SAMOL we imwenfel epwe nüküchchar pwe epwe ew chukusamol me leiin ekkewe chuuk, epwe pwal tekiatä seni chuuk meinisin, nge chón ekkewe mwüü wón unusen fönüfan repwe kiito pwe repwe fel ikenan.

2Iwe, chómmóng aramas seni ekkewe mwüü repwe feilló ikenan o apasa, “Öüsipwe feittä wón chukun ewe SAMOL, ren imwen än Jakob we Kot. I epwe äiti ngeni kich an kewe aal, pwe sipwe älleasochisi i.” Pün lón ena fansoun, än ewe SAMOL öllük epwe toowu seni Zion, än ewe SAMOL kapas epwe toowu seni Jerusalem.

3Ewe SAMOL epwe ääni köpwüng lefiilen chómmóng mwiichen aramas o epwe öükätiw ekkewe fitikoko lefiilen mwüü mi pöchökkül, ekkewe mi arapoto me ekkewe mi toowaw. Iwe, chón ekkewe mwüü meinisin repwe üsi nöür kewe ketilas o ewiliir ngeni pisekin ttu pwül, repwe pwal ewili ngeni näifen otoot wókur kewe siles. Ekkewe mwüü resap chüen maun fengen, resap pwal chüen awora käeö fäniten maun.

4Emön me emön epwe móót fän en me an irän wain me fän en me an irä fiik, nge esap wor emön epwe eniwokkusur. Ei epwe fis pün ewe SAMOL mi Unusen Manaman a pwonei.

5Iwe, inamwo ika chón ekkewe pwal ekkóch mwüü mi nóm ünükküch ra fel ngeni ekkewe uluulun önümwäl, nge kich sipwe tapweló mwirin ewe SAMOL ach we Kot tori feilfeilló chök.

Än ewe SAMOL akkóót

6Iwe, ewe SAMOL a apasa, “Lón ena fansoun, ngang üpwe ochufengeni neii kewe aramas mi pecheemä. Ngang üpwe emwiichafengeni ekkewe mi ooló me chókana ngang üwa atolonger lón riäfföü.

7Iir ra apwangapwang o toowaw seni leenier, nge ngang üpwe föri pwe repwe pöchökkülsäfäl o wiliti ew mwüü mi pöchökkül. Mwirin, ngang ewe SAMOL üpwe nemeniir seni wón ewe chuuk Zion pwe üpwe ar king seni ena fansoun tori feilfeilló chök.

8Nge en Jerusalem, ewe leenien mas mi tekia fäniten nöün Kot aramas, óm fansoun epwe war, en ewe leeni mi pöchökkül wón ewe chuuk Zion, óm nemenem epwe liwinsäfäl ngenuk. Ewer, ewe mwüü epwe nóm lón Jerusalem usun minne a fis melóóm.

9Iwe, pwata ka leüommóng le pwuchöör iei? Ifa usun, esap wor óm king? Ifa usun, nöüm kewe chón öüröür ra mäló, iei popun cheuch a cheruk usun emön fefin a cheri an cheuchen faamw?

10Ämi chón Zion, öüpwe akköösü kemi ren ämi metek, usun emön fefin mi cheeri an cheuchen faamw, pün iei öüpwe le toowu seni ewe telinimw pwe öüpwe nónnóm lón ew mälämäl mi amassawa. Öüpwe ooló lón ewe fönü Babylon mi toowaw, nge epwe wor chón chimanü kemi. Ewe SAMOL epwe angasakemiiwu me ikenan seni lepöün ekkewe chón opwuta kemi.

11Nge iei chómmóng mwüü ra ochufengeniir pwe repwe maun ngeni kemi. Ra apasa, “Sipwe elimengawa ewe telinimw mi pin. Sipwe ämängawa Zion lupwen mesach epwe küna an taatakis.”

12Nge resap silei än ewe SAMOL ekiek, resap pwal weweiti an akkóót. Resap meefi pwe i a ochufengenir pwe epwe öpwüngüür, usun emön a ionifengeni pinükün wiit ngeni ewe leenien wichiwich umwun wiit pwe epwe wichiir.

13Ämi aramasen Jerusalem, öüpwe üütä o öpwüngü chón opwutemi usun än emön wichiwich umwun wiit, pün ngang üpwe ngeni kemi ämi pöchökkül usun emön ätemwänin kowu mi wor mächään mi för seni mächä me pachapachan mi för seni piraas. Iwe, öüpwe ataatakisi chómmóng mwüü. Öüpwe angei wöwür kewe ra angei fän pöchökkül o ääni asór ngeniei ngang ewe SAMOL. Öüpwe fangaló ngeniei ar kewe pisek mi öüchchea, ngang ewe Samolun unusen fönüfan.

Emön chón nemenem seni Bethlehem

5 Iei öüpwe emwiichafengeni nöümi kewe sounfiu ämi chón ewe telinimwen sounfiu mi pöchökkül, pün ekkewe chón opwuta kich ra pwellieló leeniach fän ar pisekin maun. Iwe, repwe pöösapei ewe chón nemeni Israel ren efóch wóók.

2Nge en Bethlehem Efratha, inamwo are en ka fókkun kisikiis me leiin ekkewe sópwun lón ewe einangen Judah, nge emön epwe feitto senuk fänitei, i ewe emön epwe samolun Israel, an leewo a nóm seni chök lóómlóóm, seni fansoun esepwop.”

3Iei minne, ekkewe aramasen Israel repwe koturuló leiin chón opwuter kana tori ewe fansoun lupwen ewe fefin mi cheri an metekin faamw epwe nöünöüló. Mwirin, chón fönüwan kewe mi ooló repwe liwinsäfälito ngeni poputän fönüwer.

4Iwe, lupwen ewe chón nemeni Israel epwe war, epwe üütä o emmweni nöün we pwiin siip fän pöchökkülen ewe SAMOL, pwal fän lingen iten ewe SAMOL an we Kot. Iwe, ekkewe aramas repwe nónnóm fän kinamwe, pün lón ena fansoun, an tekia epwe föüló tori lesópwun fönüfan.

5Iei i ewe Emön epwe awarato ar kinamwe. Lupwen ekkewe chón Assyria repwe tööki fönüwem o ataelong äm kewe imwen maun mi pöchökkül, mwirin äm aipwe filätä füümön souemmwen pwe repwe masa keem pwal walümön samol pwe repwe emmweni keem.

6Iwe, iir repwe nemeni ewe fönü Assyria fän ketilas, repwe tolong lón asamalapen tittin fönüwen Nimrod fän ketilas mi ken. Iir repwe angasa keem seni ekkewe chón Assyria, lupwen repwe tööki fönüwem o pwuulong lón kiänin fönüwem.

7Iwe, epwe fis pwe ekkewe mi chüen manaw me leiin ekkewe mwirimwirin Jakob repwe toropasfeil leiin chón ekkewe mwüü mi chómmóng. Repwe wewe ngeni omwurenipwin mi püngütiw seni ewe SAMOL, repwe pwal wewe ngeni üüt mi püngütiw wón fetil. Resap mangaló fäniten emön aramas, resap pwal awitiwitiló fäniten emön aramas.

8Iwe, chókewe mi chüen manaw me leiin ekkewe mwirimwirin Jakob repwe feilló leiin chón ekkewe mwüü, nge repwe wewe ngeni pöchökkülen emön laion me leiin ekkewe maanmwachon lein wöllap. Repwe wewe ngeni emön liälifföön laion mi nóm leiin ekkewe pwiin siip. Lupwen a fätälfeil lefiiler, a pwuuriretiw o ataatakisir, nge esap wor emön a tongeni chimanüür.

9Ekkewe aramasen Israel repwe okkufu ekkewe chón opwuter o repwe arosereló.

10“Lón ena fansoun,” ewe SAMOL a osomänetiw, “ngang üpwe arosaló nöümi kewe óris seni leiimi o ataatakisi wäämi kewe wóóken.

11Ngang üpwe ataeló ekkewe telinimw lón fönüwemi o ataatakisietiw ämi kewe leeni mi pöchökkül meinisin.

12Ngang üpwe ataeló ämi kewe angangen roong, nge esap chüen wor nöümi souesissil öüpwe kapas eiis ngeniir.

13Ngang üpwe ataeló seni leiimi ämi kewe uluulun önümwäl me ämi kewe üür mi pin pwe öüsap chüen fel ngeni angangen pöümi kana.

14Ngang üpwe üttäätä seni leiimi ämi kewe uluulun ewe önüfefin Asherah o ataeló ekkewe telinimw ia ämi kewe imwenfel ngeni uluulun önümwäl ra nóm ie.

15Ngang üpwe ngeni chón ekkewe mwüü resap mochen älleasochisiei chappen ar föfför lón äi soong me lingeringer.”

Än ewe SAMOL kapasen äniini ngeni chón Israel

6 Öüpwe öüseling meet ewe SAMOL a apasa:

“Öüpwe üütä o apasätä ämi kapasen üüngeniei me mwen ekkewe chuuk; öüpwe mwüüt ngeni ekkewe chukutekisón repwe chón pwärätä fäniten meet öüwa mochen apasa.

2Ämi ekkewe chuuk, öüpwe rongorong än ewe SAMOL kapasen ettipisi; ämi ekkewe lóngólóngun fönüfan mi nüküchchar, öüpwe öüseling. Pün mi wor än ewe SAMOL köpwüng ngeni nöün kewe aramasen Israel; i epwe ettipisi chón Israel.

3I a apasa, “Ämi neii aramas, meet ngang üwa föri ngeni kemi pwe öüwa kul seniei? Ifa usun, ngang üwa eweiresi kemi? Öüpwe pölüweniei.

4Ngang üwa emmwenikemiitä seni Egypt o möönikemi seni ewe fönü ia ra nöüni kemi amanaw ie. Ngang üwa ökkünöw Moses, pwal Aaron me Miriam pwe repwe emmweni kemi.

5Ämi neii aramas, öüpwe chechchemeni usun än Barak ewe kingen Moab a sótuni pwe epwe önümamawa kemi me usun än Balaam nöün Beor we mwän a fen sorei an kapasen önümamaw o efeiöchü kemi. Öüpwe chechchemeni ämi sääi seni Shittim tori Kilkal, lupwen ngang ewe SAMOL üwa föri mettóch meinisin üwa tongeni pwe üpwe äiti ngeni kemi usun äi ölükülük.”

6Meet ngang üpwe tongeni uweato fän mesen ewe SAMOL, lupwen üwa feitto o fel ngeni ewe Kot mi tekia? Ifa usun, ngang üpwe feitto fän mesan fän asóren keek, fän ekkewe liälifföön ätemwänin kowu ew ierir?

7Ifa usun, ewe SAMOL epwe pwapwa ren ngöröwün ätemwänin siip me engol ngöröw pwuupwun apüra mi för seni föün olif? Ifa usun, ngang üpwe ääni asór neii mwännichi fäniten äi pwuupwungaw? Ifa usun, üpwe ääni asór neii kana iir uwään inisi fäniten tipisin manawei?

8En aramas, ewe SAMOL a fen ürenuk meet mi mwirinnö me meet i a öüchcheani mereemw. I a mochen pwe kopwe föri minne mi pwüng, kopwe ääni kirekiröch, kopwe pwal fätäl fän tipetekisón fän mesen óm we Kot.

Än Israel tipis me köpwüng

9Öüpwe öüseling. Öüpwe nuokkusiti ewe SAMOL are öüwa miriit. Mwelien ewe SAMOL a kökkö ngeni meinisin mi nóm lón ewe telinimw Jerusalem o apasa: “Öüpwe äfälli kemi ren ewe wókun emiriit, iir ekkewe mwiichen sounfiu mi efeingaw. Ewe SAMOL i ewe Emön mi filätä o tiinato ei wóók.

10Ifa usun, esap wor ükütiwen ämi öüpwe pisekisekiló ren ämi soolä? Imwen ekkewe chón föfföringaw ra uroló ren pisek mi öüchchea ra angei seni ar nöüöü kiló mi soolä lupwen ra kiloni ekkewe föün wiit, iei ew föfför ngang üwa opwut.

11Ifa usun, ngang üpwe omwusafatei tipisin emön aramas mi nöünöü ew kiló mi chofona, emön mi aea ew tuken öüküük mi mwääl?

12Ekkewe aramas mi pisekisek me leiimi ra pisekisekiló ren ar eriäni aramas me föfförün mwänesol. Ekkewe aramas mi nóm lón ewe telinimw ra öörüni kapas chofona, iei minne chönnawer esap chüen tongeni apasatä minne a let.

13Iei minne, pwisin ngang üpwe efeiengawa kemi! Ngang üpwe ataeló fönüemi pwokiten ämi kewe tipis meinisin.

14Öüpwe mwöngö, nge öüsap möt, pün luukemi epwe chök pöön. Öüpwe sótuni le iseiseló mettóch, nge esap nómwetiw och, pwokiten meet öüwa anómwätiw, ngang üpwe ngeni chókana mi maun ngeni kemi pwe repwe ataeló.

15Öüpwe fóffót, nge öüsap kinikin. Öüpwe üchüüch föün olif, nge öüsap epiti kemi ewe apüra. Öüpwe pwuuri ekkewe föün irän wain, nge öüsap wün wain.

16Ei epwe fis, pwokiten ämi öüwa älleasochis ngeni än Omri kewe öllük o appirüw än chón leimwen Ahab kewe föfför mi ngaw. Öüwa pwal fiti ar kewe öüröür. Iei minne, ngang üpwe mwüütätä pwe fönüwemi epwe taaló, nge ekkewe aramasen lón repwe och minen turunufas. Mwirin, öüpwe mwärelong fän itengaw meren chón ekkewe mwüü.”

Än Israel lichippüng

7 Lichippüngi! Ngang üwa usun emön chón kinikin föün irä mwirin fansoun rääs, ika usun emön mi kütta uwään irän wain mwirin fansoun rääs. Esap fókkun wor eum umwun föün irän wain üpwe ocheei; esap pwal wor eföw lussun föün ewe irä fiik mi annö ngang üwa mwónneiti.

2Esap chüen wor emön aramas mi pwüng lón ewe fönü; esap pwal chüen wor emön mi wenechchar me leiin ekkewe aramas. Ekkewe aramas meinisin ra chök osowusowuló pwe repwe össükü chcha; emön me emön a älemesafeili pwiin fän ew ssär pwe epwe liäpeni.

3Pöüür me rüwöfóch ra sipeöch le föri minne a ngaw; ekkewe nöüwiis ra echchimwa aramas ar repwe angei seniir liffang, ekkewe souköpwüng ra etiwa liffangen emichimich. Ekkewe aramas tekia ra chök osomänewu meet iir ra mochen - iir meinisin ra chök löllö fengen lon ar rawangaw.

4Ewe mi fókkun mwirinnö me leiir a usun chök och pötöwölingaw, nge ewe mi koon wenechchar me leiir a fókkun kopäi seni ew tiit iräfölüföl. Ewe ränin än Kot epwe öpwüngü ekkewe aramas epwe mwittir wareto, usun i a fen esile ngeniir me ren nöün kewe chón mas, ekkewe soufós. Iei ar fansoun köpwüng epwe fis.

5Kosap lükülüküw chón órum; kosap pwal anómu óm lükülük wón chiechiom. Kopwe pwal mwo nge tümwünüfichi kapasen awom ren neminnewe mi kóón fän mwärum.

6Pün emön naaw äät epwe osufölüngawei saman, emön naaw föpwül epwe üüngeni inan, emön föpwül mi pwüpwülü epwe üüngeni inen pwülüwan, nge chón opwuten emön aramas repwe pwisin chón leimwan.

7Nge ren ngang, ngang üpwe chök nennengeni ewe SAMOL pwe epwe älisiei. Ngang üpwe witiwiti Kot äi Chón amanaw; i äi Kot epwe fókkun öüselingaei.

Israel epwe üütäsäfäl

8Ämi chón opwutaei, öüsap tunoämängaw! Pün inamwo ika ngang üwa turuló, nge üpwe pwal üütäsäfäl. Inamwo ika ngang üwa móót lón rochopwaak, nge ewe SAMOL epwe äi saram.

9Pwokiten ngang üwa tipis ngeni ewe SAMOL, iei minne ngang üpwe chök engngiló lupwen i a öpwüngüei. Nge mwirin ena, i epwe peniei lón äi köpwüng o öpwüngü ekkewe chón opwutaei fäniten ekkewe föfför mi ngaw iir ra föri ngeniei. Ewe SAMOL epwe emmwenieiwu seni lón rochopwaak o emmwenieilong lón ewe saram, pwe ngang üpwe küna an pwüng.

10Mwirin, ekkewe chón opwutaei repwe küna pwe ewe SAMOL a nóm wón peeki. Iwe, repwe sääw pwe iir ra turunufaseei o apasa, “Ifa i chök ewe SAMOL óm we Kot?” Pwisin mesei epwe küner lupwen aramas repwe pwuuriretiw usun pwakaken lón ekkewe aal.

11Lón ena fansoun, en Israel, óm kewe telinimw repwe försäfäl, pün iei ewe fansoun kiänin fönüwom epwe wätteeló.

12Iwe, lón ena fansoun, aramasen chómmóng fönü repwe feitto o asamoluk. Repwe feitto seni Assyria me ekkewe telinimwen Egypt. Aramas repwe feitto seni Egypt pwal seni ewe chaanpwuupwu Eufreitis. Repwe pwal mwo nge feitto seni arossetin ekkewe mataw mi toowaw, pwal seni ekkewe chuuk.

13Iwe, fönüfan epwe pöönüló, pwokiten chókewe mi nónnóm wón, pwe iei pwüngün ar kewe föfför mi ngaw.

Iótel me Mwareiti

14Äm SAMOL, kopwe feitto o nemenem wón noum kewe aramas. Kopwe emmweniir fän wókum usun emön chón masen siip lón ewe leeni ia fetil a määröch ie. Kopwe älisiir pwe repwe nónnóm lón kinamwe o feffeitä. Kopwe mwüüt ngeniir pwe repwe emeseiker lón ekkewe leenien fetil mi pwülüöch lón Bashan me Kilead usun chök minne ra föri lón ekkewe fansoun lóóm.

15Iwe, ewe SAMOL a apasa, “Ewer, ngang üpwe föri äi kewe manaman fänitemi, usun minne ngang üwa föri lón ewe fansoun lupwen öüwa toowu seni Egypt.”

16Iwe, chón ekkewe mwüün fönüfan meinisin repwe üüta fän ar mäirü lupwen repwe küna meet ewe SAMOL epwe föri fänitemi. Iwe, repwe fókkun sääw, pwokiten repwe küna pwe an manaman a fókkun lapalaap seni ar. Iwe, repwe pwölüweló awer ngeni pöüür, nge selinger epwe pwasaló.

17Repwe chönnawei ewe pwül mworomwor usun emön serepenit. Repwe tö wón pwül usun maantöötö. Repwe tööwu fän ar chechcheech seni ar kewe imwen maun mi pöchökkül. Repwe kul ngeni ewe SAMOL ach Kot lón ar nuokkus. Iwe, repwe nuokkusiti kemi.

18Ifa usun, mi wor pwal emön Kot a wewe ngenuk? En ka epichaló tipis o omwusaló pwuupwungawen ekkewe lussun aramas mi chüen manaw me leiin noum kewe aramas. En kosap ömwöchü óm soong tori feilfeilló chök, pwokiten en ka pwapwa le pwääri óm tong enlet ngeni keem.

19Kopwe pwal tongeisäfäli keem; kopwe pwuurätiw äm kewe tipis fän pachapachom o oturaló äm kewe föfför mi ngaw lón mataw mi alóllóól.

20En kopwe pwääri ngeni keem óm ölükülük me óm tong enlet usun en ka fen pwon fän ökköpöl ngeni äm kewe leewo, Abraham me Jakob, lón ekkewe fansoun lóóm.