Malakai
1 Ew kapasen oosuni: Iei än ewe SAMOL kapas ngeni chón Israel. Kot a nöünöü Malakai pwe epwe aporausa ei poraus ngeni ekkewe aramas.
Israel mi ächengicheng meren Kot
2Ewe SAMOL a apasa ngeni nöün kewe aramas, “Ngang üwa echeni kemi.”
Nge ämi öüwa eiis, “Ifa usun óm pwääraló pwe ka echeni keem?”
Iwe, ewe SAMOL a pölüweni o apasa, “Ngang üwa pwääraló äi echeni kemi ren äi echeni Jakob ämi we leewo. Ifa usun, sap Esau pwiin Jakob? Nge ngang üwa echeni Jakob, 3nge üwa opwut Esau. Iwe, ngang üwa ataeló fönüwan we mi chukuchukutä o likiti ngeni ekkewe kolaak mi mwacho pwe repwe nóm lón fönüwan meren saman.”
4Eli ekkewe mwirimwirin Esau mi nóm lón Edom repwe tongeni apasa, “Inamwo are äm kewe telinimw ra taatakis, nge äm aipwe liwinsäfäl o öüüsäfäliretä.”
Nge iei meet ewe SAMOL mi Unusen Manaman epwe apasa: “Are iir repwe sótuni le öüüwsäfälietä ar kewe telinimw, ngang üpwe pwal ataisäfäliir.” Ina popun aramas repwe eita ngeni Edom ‘Ewe fönüwen Föfföringaw’ nge repwe eita ngeni aramasen Edom ‘Ew mwiichen aramas ewe SAMOL a soong ngenir tori feilfeilló chök.’ 5Lupwen öüpwe küna ekkeei feiengaw ren pwisin mesemi, iwe, öüpwe apasa, ‘Enlet, än ewe SAMOL manaman a lapalaap, an iteüöch a mwo nge toowu lükün ekkewe kiänin Israel.’
Atai ewe pwon ren ekkewe mönün asór mi wor teriir
6Ewe SAMOL mi Unusen Manaman a apasa ngeni ekkewe souasór, “Emön naaw a asamolu saman, pwal emön chón angang a asamolu an samol. Iwe, ngang sememi, nge pwata öüsap asamoluei? Ngang ämi samol, nge pwata öüsap meninitiei? Ämi ekkewe souasór öüwa turunufasei itei. Nge öüwa eiis, ‘Ifa usun äm turunufasei itom?’
7Ämi öüwa pwääraló ämi turunufasei itei ren ämi ääni asór mwöngö mi limengaw wón äi róngen asór. Mwirin, öüwa eiis, ‘Ifa usun äm elimengawa ekkewe asór?’ Ämi öüwa elimengawa ekkewe asór ren ämi apasa pwe äi we cheepel, iei ewe róngen asór, esap wor suufölün. 8Lupwen öüwa uweato ekkewe maan mi chuun pwe ämi asór, ifa usun, ei esap mwääl? Lupwen öüwa ääni asór ekkewe maan mi wor teriir ika samwaw, ifa usun, ei esap ngaw? Öüpwe sótuni le fang ngeni nöümi kepina ekkeei sókkun maan. Ifa usun, i epwe pwapwa reemi? Ifa usun, i epwe etiwa kemi?”
9Nge iei ämi öüwa sótuni le tungór ngeni Kot pwe epwe kirekiröch ngeni kemi. Ifa usun, i epwe etiwa kemi ren ena sókkun asór mi toowu seni lón pöümi?
10Iei alon ewe SAMOL mi Unusen Manaman: “Ngang üwa äneän pwe amwo emön leiimi epwe esipaló ekkewe asamen ewe imwenfel, pwe öüpwe ükütiw le öküüw ekkei esap wor lamwotan wón äi we róngen asór. Pün ngang üsap pwapwaiti kemi, üsap pwal etiwa och asór seni lón pöümi. 11Aramas meinisin wón pwellin fönüfan seni ewe ia akkar a töötä me ie tori ewe ia a tupwutiw me ie ra meniniti itei. Ekis meinisin iir ra ääni asór appach mi pwokkus me asór mi limöch ngeniei, pwokiten itei a öüchchea me leiin chón ekkewe mwüü.
12Nge ämi öüwa pwääraló ämi eitengawa itei ren ämi kewe föfför. Pün ämi öüwa uweato mwöngö mi öüchcheangaw pwe öüpwe ääniir asór, nge öüwa apasa, ‘Ina chök ika sia elimengawa än ewe Samol we cheepel, iei ewe róngen asór.’ 13Iwe, ämi öüwa pwal apasa, ‘A nnü wóch!’ Iwe, öüwa pwääraló ämi turunufaseei ren ämi kkein lepwööt,” ewe SAMOL mi Unusen Manaman a apasa.
“Lupwen öüwa uweato ekkewe maan öüwa sooläniir ika mi kinas ika mi wor teriir ika mi samwaw pwe öüpwe äänir asór, ifa usun, ngang üpwe etiwer seni lepöümi?” ewe SAMOL a apasa. 14“A önümamaw emön chón otupwutup mi pwon pwe epwe ääni asór ngeniei emön ätemwänin siip mi likiliköch me leiin nöün pwiin siip, nge mwirin a ääni asór ngeniei ngang ewe SAMOL, emön maan mi wor terin. Pün ngang emön king mi lapalaap,” ewe SAMOL mi Unusen Manaman a apasa, “iwe, a wor meninin itei me leiin chón ekkewe mwüü.
Kapasen fön ngeni ekkewe souasór
2 “Iwe iei, ämi ekkewe souasór, ei kapasen öüröür a fänitemi. 2Are öüsap mochen öüseling ngeniei, are öüsap pwal anómwu lón letipemi pwe öüpwe asamolu itei, ngang üpwe tiinato ew önümamaw wóómi o önümamawa ämi kewe feiöch. Ewer, ngang üwa fen önümamawa ämi kewe feiöch, pwokiten ämi öüsap anómwu lón letipemi pwe öüpwe asamoluei.
3“Nengeni ngang üpwe öpwüngü mwirimwirimi kewe pwokitemi; ngang üpwe apparasätä wón mesemi kiten enen ämi kewe mönün asór lón ämi kewe chuulap. Iwe, öüpwe koturuló fiti ewe kiten mwöngö. 4Mwirin, ämi öüpwe silei pwe ngang üwa tiinato reemi ei öllük pwe äi we pwon ngeni Levi epwe tongeni sópwósópwóló,” ewe SAMOL mi Unusen Manaman a apasa. 5“Ngang üwa ääni ew pwon ngeni chón ewe einangen Levi, ngang üwa ngeniir ew pwonen manaw me kinamwe pwe repwe meninitiei; iwe, iir ra meninitiei o pwääraló ar asamolu itei. 6Kapasen öüröür mi let ra nóm lón aweer o esap wor och kapas mi chofona epwe pwä me wón tinnaweer. Iir ra fitiei le fätäl lón kinamwe me wenchchar. Iir ra okullu chómmóng aramas seni tipis.
7Pün tinnawen emön souasór epwe tümwünü silelap, nge ekkewe aramas repwe kütta öüröüreer seni kapasen awan, pün i nöün ewe SAMOL mi Unusen Manaman chón künö. 8Nge ämi öüwa kul seni än Kot kewe aal, o öüwa popuw pwe chómmóng aramas repwe chepetek ren ämi käit; ämi öüwa elimengawa äi we pwon ngeni ekkewe chón Levi,” ewe SAMOL mi Unusen Manaman a apasa. 9“Iei minne, ngang üwa föri pwe ämi öüpwe uren kopwut me öüchcheangaw me fän mesen aramas meinisin, pwokiten öüsap älleasochisiei, nge öüwa lifilifil aramas lón ämi äwewe ngeniir ekkewe öllük.”
Atai ewe pwon ren ar mwüüseni pwülüwer
10Ifa usun, öükich meinisin sisap semeni chök emön Saam? Ifa usun, sap kich meinisin sia för meren ewe chök emön Kot? Iwe, pwata chök sia kirikiringaw fengen lefiilach o sia öüchcheangawei ewe pwon Kot a föri ngeni ach kewe leewo?
11Chón Judah ra kirikiringaw. A wor och mettóch mi enniopwut a fis lón Israel me lón Jerusalem. Ekkewe chón Judah ra epiningawa pinin ewe imw mi pin ewe SAMOL a öüchcheani, ren ar ra pwüpwülü ngeni fefin mi fel ngeni ekkewe koten ekis. 12Nge ren ewe mwän mi föri ei föfför, ese lifilifil ika i iö, amwo ewe SAMOL epwe ömwökütaló i seni än Jakob kewe imw mangaku - inamwo ika i epwe uweato ew asór ngeni ewe SAMOL mi Unusen Manaman.
13Mi pwal wor och mettóch ämi öüwa föri: Öüwa okuuweló le achöchchönü än ewe SAMOL we róngen asór ren chönün mesemi, ren ämi kechiw me ngüüngüres, pwokiten i esap chüen äfälli ämi ekkewe asór ika etiweer seni lepöümi fän pwapwa. 14Mwirin, öüwa eiis, “Pwata ewe SAMOL esap chüen etiwa ekkewe asór?” Ngang üpwe üreni kemi ika pwata! Pwokiten ewe SAMOL a chón pwärätä fäniten ewe pwon en me pwülüwom we öüwa ääni fengeni lefiilemi lón ewe rän ämi öüwa öpwüpwülü lupwen ka ölüwöl. Nge en ka kirikiringaw ngeni neminnewe ren óm atai óm pwonen öpwüpwülü, inamwo ika neminnewe a chüen chök emön chiechiom mi ölükülük me pwülüwom fän pwüngün öllük.
15Ifa usun, ewe SAMOL esap föri pwe ämi me rüwömön öüpwe ew chök? Ämi öüwa än ewe SAMOL lón inis pwal lón ngüün. Iwe, pwata i a föri pwe öüpwe ew chök? Pwokiten i a kütta an epwe wor mwirimwirimi mi nuokkus Kot. Iei minne, kopwe pwisin tümwünüfichik lón ngünum pwe kosap kirikiringaw le atai óm pwonen öpwüpwülü ngeni pwülüwom en ka pwülüweni leölüwölum.
16“Pün emön mwän mi opwut pwülüwan o mwüüseni,” ewe SAMOL, ewe Koten Israel a apasa, “a föri föfförün mwänesol ngeni ewe emön i epwe tümwünü,” ewe SAMOL mi Unusen Manaman a apasa. Iei minne, kopwe pwisin tümwünüfichik lón ngünüm pwe kosap kirikiringaw le atai óm pwonen öpwüpwülü ngeni pwülüwom we en ka pwülüweni leölüwölum.
Atai ewe pwon ren ar föri minne esap wenechchar
17Ämi öüwa eweiresi ewe SAMOL ren ämi kapas.
Ämi öüwa eiis, “Ifa usun äm eweiresi ewe SAMOL?”
Ämi öüwa eweiresi i ren ämi apasa, “Meinisin mi föri minne a ngaw ra mwirinnö me fän mesen ewe SAMOL o i a pwapwaitiir.” Ämi öüwa pwal eiis, “Ifa i ewe Kot mi ääni öpwüngüwen?”
3 “Nengeni, ngang üpwe tiinaló neii we chón künö pwe epwe amollätä efóch aal me mwei. Mwirin, ewe Samol ämi öüwa kütta epwe mwittir feitto lón an imwenfel; nengeni, epwe feitto ewe chón arong fäniten ewe pwon, ätewe ämi öüwa pwapwaiti,” ewe SAMOL mi Unusen Manaman a apasa.
2Nge iö epwe tongeni engngiló lón ewe ränin epwe war? Iö epwe tongeni üütä lupwen i epwe pwä? Pün i epwe wewe ngeni ew ekkei mi ngetenget än emön chón ketel mächä. I epwe pwal wewe ngeni och soop mi pöchökkül aramas ra aea le limeti mettóch. 3Iwe, i epwe móót usun emön chón ketel mächä me emön chón limeti silifer lón ekkei pwe epwe nengeni lupwen ewe limengaw a karaló; i epwe limeti chón ewe einangen Levi pwe repwe limelim lón ekkei usun kolt me silifer, pwe repwe tongeni ääni säfäli ekkewe asór ngeni ewe SAMOL lón pwüng, 4mwirin, ewe SAMOL epwe etiwa säfäli ekkewe asór ekkewe aramasen Judah me Jerusalem ra uweato ren, usun chök lón ekkewe fansoun lóóm, usun lón ekkewe ier me mwan.
5“Iei usun ngang üpwe feitto fäniten äi üpwe öpwüngü kemi. Ngang üpwe emön chón pwärätä mi angangöch le ettipisi ekkewe sourong, ekkewe chón lisowu me ekkewe chón ökköpöl mwääl, pwal chókewe mi kirikiringaw ngeni nöüür chón angang ren liwiniir me chókewe mi eriäfföwü ekkewe fefin mi mä pwülüwer me ekkewe mi mäsen, pwal chókewe mi ömwöchü seni ekkewe chón siamwü minne mi wenechchar, nge resap nuokkusitiei,” ewe SAMOL mi Unusen Manaman a apasa.
Atai ewe pwon ren ömwöchätiw ewe naengol
6“Ngang ewe SAMOL üsap tongeni siiwil. Iei popun, ämi ekkewe mwirimwirin Jakob öüsap unusen rosoló. 7Seni chök lón fansoun ämi kewe leewo, ämi öüwa tókkóló seni äi kewe öllük o öüsap älleasochis ngeniir. Öüpwe liwinsäfälito reei, pwe ngang üpwe liwinsäfäl ngeni kemi,” ewe SAMOL mi Unusen Manaman a apasa. “Nge ämi öüwa eiis, ‘Epwe ifa äm aipwe liwinsäfäl ngenuk, nge äm aisap mwo feilló senuk?’
8“Ifa usun, emön aramas epwe tongeni sooläni och seni Kot? Nge ämi öüwa sooläni och seniei. “Ämi öüwa eiis, ‘Ifa usun äm aia sooläni och senuk?’ “Ämi öüwa sooläni och seniei lón ämi kewe naengol me ämi kewe asór. 9Ämi öüwa nóm fän ew önümamaw - ämi chón unusen ewe mwüü - pwokiten ämi öüwa sooläni och seniei. 10Öüpwe uweato unusen ewe naengol lón ewe imwen iseis pwe epwe wor mwöngö lón imwei we. Öüpwe sótuniei ren ei,” ewe SAMOL mi Unusen Manaman a apasa, “iwe, öüpwe nengeni are ngang üsap suukaló ekkewe asamwachoon läng o niinätiw chómmóng sókkun feiöch mi somwoló pwe esap chüen tongeni naaf ämi leeni ia öüpwe iseni ie. 11Uwään fótämi irä repwe fókkun chómmóng, pün ngang üpwe eppeti seniir ekkewe mesenipik me samwaw. Iwe, ämi kewe irän wain meinisin lón ämi kewe tännipi resap chüen ükütiw le uwa,” ewe SAMOL mi Unusen manaman a apasa. 12“Mwirin, chón ekkewe mwüü meinisin repwe eita ngeni kemi pwe ämi chón feiöch, pün fönüwemi epwe ew fönü mi uren pwapwa” ewe SAMOL mi Unusen Manaman a apasa.
Chón Israel ra kapasen üppölü ngeni Kot
13“Ämi öüwa fókkun kapasen üppölü ngeniei,” ewe SAMOL a apasa.
“Nge ämi öüwa eiis, ‘Meet äm aia ääni kapasen üüpölü ngenuk?’
14“Ämi öüwa apasa, ‘A lamwotongaw ach angang ngeni Kot. Kich sia föri meet ewe SAMOL mi Unusen Manaman a üreni kich, nge kich sisap angei och feiöch ren. Kich sia kechiw usun kana aramas ra kechiw lupwen fansoun peias, ren ach sipwe pwääri pwe sia letipeta ren ach kana tipis, nge esap wor lamwotan. 15Iei minne, poputä seni iei, sipwe le apasa pwe ekkewe chón lamalamtekia ra feiöch. Ekkewe chón föri föfför mi ngaw ra pisekisekiló. Pwal mwo lupwen iir ra föri ekkewe mettóch mi ngaw pwe repwe sótuni än Kot mósónottam, nge Kot esap öpwüngür.’ ”
Än ekkewe lussun aramas mi chüen manaw ölükülük
16Mwirin, chókana mi nuokkusiti ewe SAMOL ra kapas fengen lefiiler, nge ewe SAMOL a öüseling o rongorong ar kapas. Mi wor ew pwuken ächechchem a nóm fän mesan. A makketiw lón ewe pwuk iten chókewe mi tapweló mwirin. Iir ekkewe aramas mi nuokkusiti ewe SAMOL o asamolu itan.
17“Lón ewe rän lupwen ngang üpwe föri äi föfför,” ewe SAMOL mi Unusen Manaman a apasa, “iir repwe wewe ngeni piseki pisek mi öüchchea. Ngang üpwe kirekiröch ngeniir, usun emön saam a kirekiröch ngeni nöün mwän mi älleasochis le angang ngeni. 18Iwe, ämi öüpwe tongeni künasäfäli sakkofesenin lefiilen emön chón pwüng me emön aramasingaw, lefiilen chókewe mi angang ngeni Kot me chókewe resap angang ngeni Kot.
Ewe ränin köpwüng me asööfösäfäli ewe pwon
4 “Enlet, ew rän epwe war; epwe pwulopwul usun ew uumw. Iwe, ekkewe chón lamalamtekia meinisin me iteiten chón föfföringaw meinisin repwe wewe ngeni fetilippwas. Lón ewe rän epwe war, repwe usun efóch irä mi kareló,” ewe SAMOL mi Unusen Manaman a apasa. “Iwe, esap wor efóch lussun palan ika waaran epwe nóm. 2Nge fänitemi ämi ekkewe mi meniniti itei, ewe akkaren pwüng epwe töötä ngeni kemi nge tüfichin chikarsäfäl epwe nóm lón liköütüütün tinan. Iwe, öüpwe toowu o mwetemwet usun liälifföön kowu mi kepichiló seni leenier. 3Mwirin, lón ena ränin, lupwen ngang üpwe föri ekkeei föfför, ämi öüpwe pwuurätiw ekkewe aramasingaw; iir repwe usun chök falangen ekkei me fän pachapachemi,” ewe SAMOL mi Unusen Manaman a apasa.
4“Ämi öüpwe chechchemeni pwe öüpwe älleasochisi ekkewe kapasen öüröür än neii we chón angang Moses, ekkewe öllük me pwüüng ngang üwa ngeni i me wón ewe chuuk Horeb fäniten chón Israel meinisin.
5“Öüpwe nengeni pwe ngang üpwe tiinato reemi ewe soufós Elijah me mwen an epwe war ewe ränin ewe SAMOL, ewe rän mi lapalaap me eniwokkus. 6An afalafal epwe okullu leluken ekkewe saam me iin ngeni nöüür kewe, epwe pwal okullu leluken ekkewe naaw ngeni semer me ineer kewe; nge ika esap fis ei; iwe, ngang üpwe feitto o efeiengawa ewe fönü ren ew önümamaw.”