Leviticus
Ekkewe asóren keek
1 Iwe, ewe SAMOL a kökkööri Moses o kapas ngeni i seni lón ewe Imw Managku Leenien Chufengen. A apasa ngeni i, 2“Kopwe kapas ngeni ekkewe chón Israel o üreniir: ‘Lupwen emön me leiimi epwe uwato an asór ngeni ewe SAMOL, epwe uwato pwe an asór emön maanfesir seni leiin nöün pwiin kowu ika pwiin siip me kuuch.
3“ ‘Are an we asór epwe ew asóren keek seni nöün pwiin kowu, epwe uwato emön ätemwänin kowu esap wor terin, ren asamalapen ewe Imw Mangaku Leenien Chufengen pwe epwe tiw meren ewe SAMOL. 4Iwe, ätewe epwe itetiw efóch pöün wón möküren ewe mönün asóren keek pwe ewe SAMOL epwe etiwa ewe münün asór pwe ina i ekesiwilin pwe liwinin omwusomwusen tipis fänitan. 5Mwirin, ätewe epwe posuw chioren ewe liäliffön ätemwänin kowu me mwen ewe SAMOL. Iwe, ekkewe souasór nöün Aaron kewe mwän repwe sónumi ewe chcha o uti ngeni winipelien ewe róngen asór meinisin mi nóm ren ewe leenien tolong ngeni ewe Imw Mangaku Leenien Chufengen. 6Mwirin, ätewe epwe pwal wiisen äseraló ünüchchen ewe mönün asóren keek o pökükisietiw lón ekkóch kinikin. 7Iwe, nöün ewe souasór Aaron kewe mwän repwe öküüw ewe ekkei wón ewe róngen asór o isenätä mwüüch wón ewe ekkei. 8Mwirin, ekkewe souasór iir nöün Aaron kewe mwän repwe isenätä ekkewe kinikinin ewe mönün asór pacholong pwal ewe möküran me ewe kiriis wón ekkewe mwüüch mi kü mi nóm wón ewe róngen asór. 9Nge ewe aramas epwe wiisen limeti lón kólik ekkewe affen ewe mönün asór me ekkewe seengen peheen. Mwirin, ewe souasór epwe kenaló meinisin wón ewe róngen asór. Iei ew asóren keek mi unus, och liffang mwöngö mi keek wón ekkei ewe SAMOL a efich pwonnan.
10“ ‘Iwe, are än ewe aramas we asór epwe ew asóren keek seni nöün pwiin siip me kuuch, epwe ääni asór emön siip ika kuuch, nge epwe fókkun ääni asór emön ätemwän esap wor terin. 11Ätewe epwe posuw chioren ewe mönün asór me peliefengin ewe róngen asór me mwen ewe SAMOL. Iwe, ekkewe souasór nöün Aaron kewe mwän repwe uti chaan ewe mönün asór ngeni winipelien ewe róngen asór meinisin. 12Mwirin, ätewe epwe pökükisietiw ewe mönün asór lón ekkóch kinikin. Iwe, ewe souasór epwe isenätä ekkewe kinikinin ewe mönün asór pwal pacholong ewe möküran me ekkewe kiriis wón ekkewe mwüüch mi kü mi nóm wón ewe róngen asór. 13Nge ätewe epwe wiisen limeti lón kólik ekkewe affen ewe mönün asór me ekkewe seengen pecheen. Mwirin, ewe souasór epwe asóruni unusan meinisin o kenireló me wón ewe róngen asór pwe epwe ew asóren keek. Iei ew liffang mwöngö mi keek wón ekkei ewe SAMOL a efich pwonnan.
14“ ‘Are än emön asór ngeni ewe SAMOL epwe ew asóren keek seni machchang mi fesir, ätewe epwe uwato emön lisóóm ika emön appansüünsün mwürö. 15Iwe, ewe souasór epwe uwato ewe machchang ren ewe róngen asór, o epwe äräppini möküran pwe epwe ttülüló. Iwe, epwe össürätiw chaan ewe machchang winipelien ewe róngen asór. Mwirin, epwe kenaló ewe machchang me wón ewe róngen asór. 16Ewe souasór epwe pwal ettawu ewe chükünkanan fiti fengen me affan o oturaló peliöötiwen ewe róngen asór, ia a nóm ie falangen ewe róngen asór. 17Iwe, ewe souasór epwe kömwöch pöükassin ewe machchang o ekis chök pwelieló, nge esap unusen pwelifeseni. Mwirin, ewe souasór epwe kenaló ewe machchang wón ekkewe mwüüch mi nóm wón ewe ekkei wón ewe róngen asór. Iei ew asóren keek mi unus, ew liffang mwöngö mi keek wón ekkei ewe SAMOL a efich pwonnan.
Ekkewe Asóren Mwöngö
2 “ ‘Lupwen emön epwe uwato ew asóren mwöngö pwe an asór ngeni ewe SAMOL, epwe ääni asór pilawa mi amas o pwetete. Epwe niinätiw apüra me appachen irä mi pwokkus wón. 2Iwe, epwe uwato ei asór ren emön leiin ekkewe souasór iir nöün Aaron kewe mwän. Nge ewe souasór epwe tukei ekumwuch seni ewe pilawa mi amas o pwetete mi nofit fengen me ewe apüra fiti fengen me unusen ewe appachen irä mi pwokkus. Iwe, epwe kenaló ei asór me wón ewe róngen asór pwe iei och kinikinin ächechchem mi esissilätä ewe unusan, ew asór mi keek wón ekkei ewe SAMOL a efich pwollan. 3Nge lussun ewe asóren mwöngö, enen Aaron me nöün kewe mwän. Iei ew kinikin seni ekkewe asóren mwöngö ngeni ewe SAMOL mi keek wón ekkei a fókkun pin.
4“ ‘Iwe, are kopwe uwato ew asóren mwöngö mi umw lón ew leenien uumw, epwe för seni pilawa mi amas o pwetete. Ika epwe och keik; iwe, epwe nofit ngeni apüra nge esap wor iis lón. Nge ika epwe och pisikit; iwe epwe chök tóótó ngeni apüra nge esap wor iis lón. 5Nge are óm asóren mwöngö epwe ammwoot wón och leenien ammwoot mi chök chööpöpüló usun fraipan, iwe, epwe för seni pilawa mi amas o pwetete, epwe nofit ngeni apüra nge esap wor iis lón. 6Iwe, kopwe ataatakisietiw o niinätiw apüra wón. Iei ewe asóren mwöngö. 7Nge are óm asóren mwöngö epwe kuk lón ew nape; iwe, epwe för seni pilawa mi amas o pwetete me apüra seni föün olif. 8Iwe, kopwe uwato ren ewe SAMOL ewe asóren mwöngö mi för seni ekkeei mettóch. Kopwe ngeni ewe souasór, nge i epwe uwealó ren ewe róngen asór. 9Iwe, ewe souasór epwe angei ewe och kinikinin ächechchem mi esissilätä ewe unusan o epwe kenaló me wón ewe róngen asór pwe ew asór mi keek wón ekkei ewe SAMOL a efich pwonnan. 10Nge lussun ewe asóren mwöngö, epwe enen Aaron me nöün kewe mwän. Iei och kinikin seni ekkewe asór ngeni ewe SAMOL mi keek wón ekkei a unusen pin.
11“ ‘Kosap aea iis lón och leiin ekkewe asóren mwöngö ka ääni asór ngeni ewe SAMOL, pwokiten esap wor iis ika chönün chunen epwe keek pwe ew asór ngeni ewe SAMOL. 12Ka tongeni apachalong iis me chönün chunen ngeni ekkewe asór ka ääni lupwen ewe fansoun kinikin uwa, nge ekkeei asór resap fókkun keek wón ewe róngen asóren keek pwe epwe ew asór mi pwoöch meren ewe SAMOL. 13Kopwe nofiti ngeni sólt óm kewe asóren mwöngö meinisin. Kosap likitawu ewe sólt seni lón óm kewe asóren mwöngö, pün iei esissilen ewe pwon ese mwüch än óm we Kot. Kopwe fókkun apachalong sólt ngeni óm kewe asór meinisin.
14“ ‘Are kopwe uwato ew asóren mwöngö ngeni ewe SAMOL seni ewe mwenuwa, kopwe ääni asór föün wiit mi fö, epwe üsüüs o kapwich wón ekkei. 15Iwe, kopwe niinätä apüra wón o iseis appachen irä mi pwokkus wón. Iei ew asóren mwöngö. 16Mwirin, ewe souasór epwe keni ewe och kinikinin ächechchem mi esissilätä ewe unusan seni ewe föün wiit mi üsüüs me ewe apüra fiti fengen me unusen ewe appachen irä mi pwokkus pwe ew asór ngeni ewe SAMOL mi keek wón ekkei.
Ekkewe asóren kinamwe
3 “ ‘Iwe, are emön epwe ääni asór ew asóren kinamwe, nge epwe ääni asór emön maanfesir seni nöün pwiin kowu, epwe uwato me mwen ewe SAMOL emön maanfesir esap wor terin, ese lifilifil ika emön ätemwän ika emön liäfefin. 2Iwe, ätewe epwe itetiw efóch pöün wón möküren an we mönün asór o epwe posuw chioren ewe maan me ren ewe leenien tolong ngeni ewe Imw Mangaku Leenien Chufengen. Mwirin, ekkewe souasór iir nöün Aaron kewe mwän repwe uti chaan ewe maan ngeni ewe róngen asór wón winipelian meinisin. 3Mwirin, ätewe epwe uweato ekkeei kinikin seni ewe mönün asóren kinamwe pwe ew asór ngeni ewe SAMOL mi keek wón ekkei: unusen ewe kiriis mi pwölüwoló ekkewe affen ewe maan ika mi pachatä wór, 4ekkewe faileewa me rüöföü fiti ewe kiriis mi nóm wór sooso ngeni ekkewe fituk ünükkün chüülapan pwal ewe emiemin ömmülün, ätewe epwe ettirewu fiti ekkewe faileewa. 5Mwirin, nöün Aaron kewe mwän repwe kenaló ekkeei kinikin wón ewe róngen asór asen ewe asóren keek mi nóm wón ekkewe mwüüch mi kü pwe epwe ew asór mi keek wón ekkei ewe SAMOL a efich pwonnan.
6“ ‘Are ätewe epwe ääni asór emön maanfesir seni leiin nöün pwiin siip me kuuch pwe an asóren kinamwe ngeni ewe SAMOL, i epwe ääni asór emön ätemwän ika emön liäfefin esap wor terin. 7Are i epwe ääni asór emön laam, epwe uweato me mwen ewe SAMOL. 8Iwe, ätewe epwe itetiw efóch pöün wón möküren an we mönün asór; mwirin, epwe posuw chioren ewe mönün asór me mwen ewe Imw Mangaku Leenien Chufengen. Mwirin, nöün Aaron kewe mwän repwe uti chaan ewe maan ngeni winipelien ewe róngen asór meinisin. 9Iwe, ätewe epwe uweato ekkeei kinikin seni ewe mönün asóren kinamwe pwe ew asór ngeni ewe SAMOL mi keek wón ekkei: kirissin ewe mönün asór, unusen ewe mechan mi kiriis a pöküpöküló sooso ngeni ewe chuulapan, unusen ewe kiriis mi pölüwoló ekkewe affen ewe maan ika mi pachatä wór, 10ekkewe faileewa me rüöföü fiti ewe kiriis mi nóm wór sooso ngeni ekkewe fituk ünükkün ewe chuulap pwal ewe emiemin ömmülün, ätewe epwe ettirewu fiti ekkewe faileewa. 11Iwe, ewe souasór epwe kenireló wón ewe róngen asór pwe och asóren mwöngö, ew asór ngeni ewe SAMOL mi keek wón ekkei.
12“ ‘Nge are ätewe epwe ääni asór emön kuuch; iwe, epwe uweato ewe kuuch mwen ewe SAMOL. 13Iwe, epwe itetiw efóch pöün wón möküren ewe mönün asór; mwirin, epwe posuw chioren ewe maan me mwen ewe Imw Mangaku Leenien Chufengen. Mwirin, nöün Aaron kewe mwän repwe uti chaan ewe mönün asór ngeni winipelien ewe róngen asór meinisin. 14Iwe, ätewe epwe uweato ekkeei kinikin seni meet i ääni asór pwe epwe ääni ew asór ngeni ewe SAMOL mi keek wón ekkei: unusen ewe kiriis mi pwölüwoló ekkewe affen ewe maan ika mi pachatä wór, 15ekkewe faileewa me rüöföü fiti ewe kiriis mi nóm wór sooso ngeni ekkewe fituk ünükkün ewe chuulapan, pwal ewe emiemin ömmülün, ätewe epwe ettirewu fiti ekkewe faileewa. 16Iwe, ewe souasór epwe kenireló wón ewe róngen asór pwe och asóren mwöngö, ew asór mi keek wón ekkei mi pwoöch. Unusen ewe kiriis meinisin än ewe SAMOL.
17“ ‘Ekis meinisin ia öüwa nóm iei, epwe iei ew öllük fäniten ekkewe tettelin pilóón aramas repwe feitto me mwirin: Öüsap fókkun ochei och kiriis ika ünümi och chcha.’ ”
Ekkewe asóren limelimen tipis
4 Iwe, ewe SAMOL a apasa ngeni Moses, 2“Kopwe apasa ngeni ekkewe chón Israel: ‘Lupwen emön a tipisin cheechengaw ren an föri meet esap mwümwütä me lón än ewe SAMOL kewe öllük,
3“ ‘are ewe souasór mi kepit a tipis o a atoto tipis wón ekkewe aramas, ewe souasór epwe uweato ngeni ewe SAMOL emön liäliffön ätemwänin kowu esap wor terin pwe ew asóren limelimen tipis fäniten ewe tipis i a föri. 4I epwe uweato ewe ätemwänin kowu ren ewe leenien tolong ngeni ewe Imw Mangaku Leenien Chufengen mwen ewe SAMOL. Iwe, i epwe itetiw efóch pöün wón möküren ewe mönün asór; mwirin, epwe posuw chioren ewe mönün asór me mwen ewe SAMOL. 5Mwirin, ewe souasór mi kepit epwe angei och chaan ewe ätemwänin kowu o uwealong lón ewe Imw Mangaku Leenien Chufengen. 6Iwe, i epwe tikilón lón ewe chcha ren efóch ächefen pöün o äsupwu ewe chcha fän fisu me mwen ewe SAMOL me mwen ewe refiref mangaku lón ewe imwenfel. 7Mwirin, ewe souasór epwe tóófätä och ewe chcha wón ekkewe mächään ewe róóng usun mächään maan mi kenitä me wón ewe róngen asóren ötüöt mi pwokkus mi nóm mwen ewe SAMOL lón ewe Imw Mangaku Leenien Chufengen. Iwe, ewe souasór epwe niinätiw lussun chaan ewe ätemwänin kowu lepopun ewe róngen asóren keek mi nóm ren ewe leenien tolong ngeni ewe Imw Mangaku Leenien Chufengen. 8Iwe, ewe souasór epwe ettaló meinisin kirissin ewe ätemwäni kowu, ewe mönün asóren limelimen tipis, ewe kiriis mi pwölüwoló ekkewe affen ewe maan ika mi pachatä wór. 9Epwe pwal ettawu ekkewe faileewa me rüöföü fiti ewe kiriis mi nóm wór sooso ngeni ekkewe fituk mi nóm ünükkün ewe chüülapan, pwal ewe emiemin ömmülün. 10Mwirin, epwe keniireló wón ewe róngen asóren keek usun chök minne a fis ngeni ewe ätemwänin kowu ika liäfefinin kowu mi ninniiló fäniten ewe asóren kinamwe. 11Nge ünüchchen ewe ätemwänin kowu me fitukan meinisin, pwal pacholong ewe möküran me ekkewe seengen pecheen, pwal ekkewe affan me ewe kiten mwöngö, 12wewen, meinisin lussun ewe ätemwänin kowu, ätewe epwe uweirewu ngeni ew leeni mi nóm lón tettelin limöch lükün ewe leeni ia ra asóósó ie, ewe leeni ia ra oturaló ie ewe falang. Iwe, ätewe epwe kenireló wón ekkewe mwüüch mi kü wón ewe falang mi chukuchukutä.
13“ ‘Are unusen ewe mwiichen chón Israel ra tipisin cheechengaw o föri meet esap mwüümwütä me lón ew me leiin än ewe SAMOL kewe öllük, inamwo are ewe mettóch esap pwä ngeni mesen ewe mwiichen aramas, nge ra chök meefi pwe ra tipis, 14iwe, lupwen a fataló usun ewe tipis ra föri, ekkewe souakkomwen ewe mwiichen aramas repwe uweato emön liäliffön ätemwänin kowu pwe ew asóren limelimen tipis. Iwe, repwe uweato ewe maan mwen ewe Imw Mangaku Leenien Chufengen. 15Iwe, ekkewe souakkomwen ewe mwiichen aramas repwe itetä wón möküren ewe ätemwänin kowu me fän mesen ewe SAMOL. Mwirin, epwe ppos chioren ewe ätemwänin kowu me fän mesen ewe SAMOL. 16Mwirin, ewe souasór mi kepit epwe wiisen angei och chaan ewe ätemwänin kowu o uwealong lón ewe Imw Mangaku Leenien Chufengen. 17Iwe, epwe tikilong lón ewe chcha ren efóch ächefen pöün o äsupwu ewe chcha fän fisu me fän mesen ewe SAMOL me mwen ewe refiref mangaku. 18Iwe, ewe souasór epwe pwal tóófätä och ewe chcha wón ekkewe mächään ewe róóng usun mächään maan mi kenitä me wón ewe róngen asóren ötüöt mi nóm fän mesen ewe SAMOL lón ewe Imw Mangaku Leenien Chufengen. Mwirin, epwe niinätiw lussun ewe chcha lepopun ewe róngen asóren keek mi nóm ren ewe leenien tolong ngeni ewe Imw Mangaku Leenien Chufengen. 19Mwirin, ewe souasór epwe ettaló ewe kiriis meinisin seni ewe mönün asór o kenaló wón ewe róngen asóren keek. 20Iwe, epwe föri ngeni ei ätemwänin kowu usun chök minne a föri ngeni ewe ätemwänin kowu fäniten ewe asóren limelimen tipis fäniten ewe souasór. Ren ei lapalap, ewe souasór epwe föri asóren limelimen omwusomwusen tipis fäniten ekkewe aramas. Iwe, ar tipis epwe mwusóló 21Mwirin, ewe souasór epwe uweawu ewe ätemwänin kowu lükün ewe leeni ia ra asóósó ie o epwe kenaló usun chök an kenaló ewe mönün asóren tipis fäniten ewe souasór mi lap. Iei ew asóren limelimen tipis fäniten unusen ewe mwiichen aramasen Israel.
22“ ‘Lupwen emön leiin ekkewe souemmwenin Israel a föri meet esap mwüümwütä me lón ew me leiin ekkewe öllük än ewe SAMOL an we Kot, i a tipis inamwo ika a chök tipisin cheechengaw. 23Iwe, lupwen i a mefi pwe a tipis ren minne i a föri, i epwe uweato emön ätemwänin kuuch esap wor terin pwe an asór. 24Ätewe epwe wiisen itetiw efóch pöün wón möküren ewe ätemwänin kuuch; mwirin, epwe posuw chioren ewe maan me lón ewe leeni mwen ewe SAMOL ia ewe mönün asóren keek a ninniiló me ie. Iei ew asóren limelimen tipis. 25Mwirin, ewe souasór epwe angei ren ächefen pöün och chaan ewe mönün asóren limelimen tipis o epwe tóófätä wón ekkewe mächään ewe róóng usun mächään maan mi kenitä me wón ewe róngen asóren keek. Mwirin, epwe niinätiw lussun ewe chcha lepopun ewe róóng. 26Iwe, epwe kenaló meinisin ewe kiriis wón ewe róngen asór usun chök an kenaló kirissin ewe mönün asóren kinamwe. Lón ei lapalap, ewe souasór epwe föri limelimen omwusomwusen tipis fäniten än ewe souemmwen tipis, iwe, an tipis epwe mwusóló.
27“ ‘Are emön me leiin ewe mwiichen aramasen Israel a föri meet esap mwüümwütä me lón ew me leiin än ewe SAMOL kewe öllük, i a tipis, inamwo ika a chök tipisin cheechengaw. 28Iwe, lupwen i a mefi pwe a tipis ren minne i a föri, i epwe uweato emön liäfefinin kuuch esap wor terin pwe an asór fäniten ewe tipis i a föri. 29Ätewe epwe itetiw efóch pöün wón möküren ewe mönün asóren limelimen tipis. Mwirin, epwe niieló ewe mönün asór meren ewe leeni ia ewe mönün asóren keek a ninniiló me ie. 30Mwirin, ewe souasór epwe angei ren ächefen pöün och ewe chcha o epwe tóófätä wón ekkewe mächään ewe róóng usun mächään maan mi kenitä me wón ewe róngen asóren keek. Iwe, epwe niinätiw lussun ewe chcha lepopun ewe róóng. 31Iwe, i epwe ettaló meinisin kirissin ewe mönün asór, usun chök an etiitiló ewe kiriis seni ewe mönün asóren kinamwe. Mwirin, ewe souasór epwe kenaló ewe kiriis me wón ewe róngen asór pwe ewe SAMOL epwe efich pwonnan. Lón ei lapalap, ewe souasór epwe föri asóren omwusomwusen tipis fäniten än ewe aramas tipis, iwe an tipis epwe mwusoló.
32“ ‘Are ätewe epwe uweato emön laam pwe an asóren limelimen tipis, i epwe uweato emön liäfefin esap wor terin. 33Iwe, ätewe epwe itetiw efóch pöün wón möküren ewe liäfefinin laam. Mwirin, epwe posuw chioran me lón ewe leeni ia ewe mönün asóren keek a ninniiló me ie pwe an asóren limelimen tipis. 34Mwirin, ewe souasór epwe angei ren ächefen pöün och chaan ewe mönün asóren limelimen tipis o epwe tóófätä wón ekkewe mächään ewe róóng usun mächään maan mi kenitä me wón ewe róngen asóren keek. Iwe, epwe niinätiw lussun ewe chcha lepopun ewe róngen asór. 35Iwe, ätewe minne an ewe asór epwe ettaló ewe kiriis meinisin, usun chök ewe kiriis a etiitiló seni ewe laam mönün asóren kinamwe. Mwirin, ewe souasór epwe kenaló ewe kiriis me wón ewe róngen asór asen ekkewe asóren mwöngö ngeni ewe SAMOL mi keek ren ekkei. Lón ei lapalap, ewe souasór epwe föri asóren omusomwusen tipis fänäsengesin ewe aramas fäniten ewe tipis i a föri, iwe, epwe mwusóló seni ewe aramas an tipis.
Ekkewe sókkun tipis epwe fis asóren limelimen tipis fäniter
5 “ ‘Iwe, are emön me leiin ekkewe aramas a akökkö pwe epwe pwärätä usun och mettóch i a küna me silei usun an fis nge ätewe esap mochen pwe epwe pwärätä, i epwe mwärelong fän liwiningawen tipisin an esap mochen pwärätä.
2“ ‘Are emön aramas a attapa och mettóch mi nóm lón tettelin limengaw - ese lifilifil ika inisin emön maan mwacho mi mä nge a nóm lón tettelin limengaw ika inisin emön maan fesir mi mä nge a nóm lón tettelin limengaw ika inisin emön ekkan sókkun maan mi tö wón pwül mi mä nge mi nóm lón tettelin limengaw, ina mwo ika ätewe esap meefi pwe a tipis ren, i a limengaw o a tipis. 3Nge are emön aramas a attapa och limengawen aramas - ese lifilifil ika meet sakkun limengaw a tongeni limengaw ren - inamwo ika i esap meefi pwe a limengaw ren, nge lupwen a silei usun, i epwe tipis ren. 4Are emön aramas a atapwanapwan le ääni och pwon fän ökköpöl pwe i epwe föri och mettóch, ese lifilifil ika fäniten och popun mi mwirinnö ika mi ingaw, inamwo ika i esap unusen meefi usun meet i a föri, nge lupwen epwe weweiti usun me mwirin, i epwe chök tipis ren. 5Lupwen a meefi pwe a tipis lón ew me leiin ekkeei sókkun lapalap o pwärätä an tipis, 6i epwe uweato ren ewe SAMOL emön liäfefinin laam ika kuuch seni leiin nöün pwiin siip me kuuch pwe liwinin pinasen tipisin. Ei epwe ew asóren limelimen tipis. Iwe, ewe souasór epwe föri asóren omwusomwusen tipis fänitan fänäsengesin an tipis.
7“ ‘Nge ika ätewe esap tongeni an epwe uweato emön laam; iwe, epwe uweato rüömön lisóóm ika rüömön appansüünsün mwurö ngeni ewe SAMOL pwe ew asóren pinasen tipisin. Emön fäniten ew asóren limelimen tipis, nge pwal ewe emön fäniten ew asóren keek. 8Ätewe epwe uweireto ren ewe souasór pwe i epwe akkomwen ääni asór emön ekkewe machchang fäniten ewe asóren limelimen tipis. Ewe souasór epwe ärääpini möküren ewe machchang nge esap chök unusen tüllüweló üwan. 9Iwe, epwe äsupwu och chaan ewe mönün asóren limelimen tipis ngeni winipelien ewe róngen asór, nge lussun ewe chcha epwe össürätiw lepopun ewe róngen asór. Iei ew asóren limelimen tipis. 10Mwirin, ewe souasór epwe ääni asór pwal ewe emön machchang pwe ew asóren keek lón pwüngün lapalapen angangen ewe asóren keek pün epwe föri asóren omwusomwusen tipis fäniten ätewe fänäsengesin ewe tipis i a föri. Iwe, epwe mwusoló seni ätewe an tipis.
11“ ‘Nge are ätewe esap tongeni an epwe uweato pwe an asór rüömön lisóóm ika rüömön appansüünsün mwurö; iwe, a tongeni uweato pwe ew asór fäniten an tipis ew naengolun ew efa ika ruu liter pilawa mi amas o pwetete fäniten ew asóren limelimen tipis. Esap uwowtä apüra ika appachen irä mi pwokkus wón, pwokiten iei ew asóren limelimen tipis. 12Iwe, ätewe epwe uweato an we asór ren ewe souasór pwe i epwe tukei ekumwuch seni pwe och kinikinin ächechchem seni ewe asór mi esissilätä ewe unusan. Iwe, epwe kenaló wón ewe róngen asór asen ekkewe asóren mwöngö ngeni ewe SAMOL mi keek wón ekkei. Iei ew asóren limelimen tipis. 13Ren ei lapalap, ewe souasór epwe föri omwusomwusen tipis fäniten ätewe fänäsengesin ew me leiin ekkeei tipis i a föri. Iwe, epwe mwusoló seni ätewe an tipis. Nge lussun ewe asór epwe än ewe souasór, usun chök meet mi fis ren ewe asóren mwöngö.’ ”
Ekkewe asóren liwinin pinasen tipis
14Iwe, ewe SAMOL a apasa ngeni Moses: 15“Lupwen emön aramas a pwuupwungaw o a tipisin cheechengaw le aangawa och me leiin än ewe SAMOL kewe mettóch mi pin, ätewe epwe uweato ren ewe SAMOL pwe och asóren pinasen tipis, emön ätemwänin siip seni nöün pwiin siip me kuuch, emön esap wor terin, epwe pwal pwüng ngeni üküükün liwinin öüchchean an epwe ekkesiwil ngeni silifer alóngólóng wón ewe öüküükün shekel ra aea lón ewe imw mi pin. Iei ew asóren liwinin pinasen tipis. 16Ätewe epwe pwal fókkun püngütiw liwinin pinasen meet i a tipis ren fäniten ekkewe pisek mi pin, nge epwe pwal apachatä ew na limu ngeni üküükün öüchchean, o epwe ngeni ewe souasór pwe i epwe föri asóren omwusomwusen tipis fänitan ren ewe ätemwänin siip pwe ew asóren liwinin pinasen tipis. Iwe, epwe mwusoló seni ätewe an tipis.
17“Nge are emön aramas a tipis ren an föri meet esap mwüümwütä me lón ew me leiin än ewe SAMOL kewe öllük, inamwo ika ätewe esap meefi pwe a tipis, i a chök tipis o mwärelong fän ewe liwinin tipis. 18Iwe, ätewe epwe uweato ren ewe souasór pwe an asóren pinasen tipis emön ätemwänin siip seni nöün pwiin siip me kuuch, emön esap wor terin o pwüng ngeni üküükün liwinin öüchchean. Ren ei lapalap, ewe souasór epwe föri asóren omwusomwusen tipis fäniten ätewe fänäsengesin ewe mwääl i a föri fän an cheechengaw. Iwe, epwe mwusoló seni ätewe an tipis. 19Iei ew aóren pinasen tipis, pün ätewe a tipis ren an föri meet mi mwääl ngeni ewe SAMOL.”
6 Iwe, ewe SAMOL a pwal apasa ngeni Moses: 2“Are emön aramas a tipis o a kirikiringaw ngeni ewe SAMOL ren an otupwu chón arun usun och mettóch chón arun we a lüküw ngeni ika likiti ngeni pwe epwe tümwünü, nge a apasa pwe a pöütüló ika emön a sooläni, pwal ika esap ääni wenechcar fäniten och moonien önükünükün liwinimmang, pwal ika a angei och mettóch ren soolä ika fän pöchökkülen wiisan, 3are i a küna och pisek mi pöütüló nge a chofona usun, are a chofona ren an a ökköpöl mwääl, are i a föri och sókkun tipis aramas ra tongeni föri, 4are a ina usun pwe i a tipis, o i a meefi mengiringirin an tipis, i epwe eliwinisäfäli meet i a sooläni ika angei fän pöchökkül ika ewe mettóch chón arun a lüküw ngeni pwe epwe tümwünü ika ewe pisek mi pöütüló nge i a küna, 5ika ese lifilifil meet i a ökköpöl mwääl usun. Ewe aramas epwe fókkun eliwinisäfäli unusan, nge epwe apachatä ngeni ew na limu seni üküükün öüchean ewe mettóch. Iwe, epwe ngeni ewe minne an ekkewe mettóch meinisin lón ewe rän i a uweato an we asóren pinasen tipis. 6Iwe, fäniten ew liwinin pinasen tipis, ätewe epwe uweato ren ewe souasór, wewen, ren ewe SAMOL, än we asóren pinasen tipis, emön ätemwänin siip seni nöün pwiin siip me kuuch, emön esap wor terin o pwüng ngeni üküükün liwinin öüchchean. 7Ren ei lapalap, ewe souasór epwe föri asóren omwusomwusen tipis fäniten ätewe me fän mesen ewe SAMOL. Iwe, epwe mwusoló seni ätewe an tipis fäniten och me leiin ekkeei mettóch i a föri nge i a tipis ren.”
Sópwósópwólón öllükün angangen ewe asóren keek
8Iwe, ewe SAMOL a apasa ngeni Moses: 9“Kopwe ngeni Aaron me nöün kewe mwän ei öllük: ‘Ikkeei öllükün angangen ewe asóren keek: Ewe asóren keek epwe chök nómwóló wón ewe róngen asór lón unusen ewe pwiin tori lesossor. Iwe, ewe ekkei epwe chök kükkü me wón ewe róóng. 10Iwe, ewe souasór epwe üföüfolong üfan kewe mi pwechepwech o aalong an we rausesin lón mi pwechepwech epwe sooso ngeni inisin. Mwirin, epwe tukeei falangen ewe asóren keek ewe ekkei a kenaló me wón ewe róngen asór o isenätiw ünükkün ewe róóng. 11Mwirin, ewe souasór epwe pwilitätiw üfan keei o üföüfolong pwal ekkóch üüf. Iwe, epwe uweawu ewe falang lükün ewe leeni ia ra asóósó ie ngeni ew leeni mi nóm lón tettelin limöch. 12Nge ewe ekkei wón ewe róngen asór epwe chök fókkun kükkü, esap fókkun kunuló. Iteiten lesossor, ewe souasór epwe pwal iseisetä mwüüch wón ewe ekkei o etettelöchüw le isenätä ewe mönün asóren keek me wón ewe ekkei, epwe pwal kenaló ewe kiriis fäniten ewe asóren kinamwe wón. 13Ewe ekkei epwe chök fókkun sópwósópwóló le kükkü me wón ewe róngen asór. Esap fókkun kunuló.
14“ ‘Iwe, ikkeei ekkewe öllük fäniten ewe asóren mwöngö: Nöün Aaron kewe mwän repwe uweato ewe asóren mwöngö fän mesen ewe SAMOL mwen ewe róngen asór. 15Iwe, ewe souasór epwe tukei ekumwuch ewe pilawa mi amas o pwetete seni ewe asóren mwöngö pwal ewe apüra fiti fengen me unusen ewe appachen irä mi pwokkus mi nóm wón ewe asóren mwöngö. Mwirin, epwe kenaló wón ewe róngen asór pwe iei ewe kinikinin ächechchem mi esissilätä ewe unusan pwe ew asór ewe SAMOL a efich pwonnan. 16Mwirin, Aaron me nöün kewe mwän repwe äni lussun ewe asóren mwöngö. Nge repwe äni ewe asóren mwöngö ese wor iis lón me lón ew leeni mi pin. Repwe äni ewe asóren mwöngö me lón ewe leeni lükün ewe Imw Mangaku Leenien Chufengen. 17Resap fókkun umwuni ewe pilawa nge epwe wor iis lón. Ngang üwa ngeniir ei asóren mwöngö pwe iei inetir seni ekkewe asór ra asór ngeniei wón ekkei. Ei asóren mwöngö a fókkun pin, usun chök ewe asóren limelimen tipis me ewe asóren liwinin pinasen tipis. 18Iteiten mwän i mwirimwirin Aaron lón ekkewe tettelin pilóón aramas repwe feitto me mwirin, epwe tongeni mwöngö ei asóren mwöngö. Iei pwüngün tettelin inetin seni ekkewe asór aramas ra fang ngeni ewe SAMOL mi keek wón ekkei. Ese lifilifil ika meet a attapa ekkeei asór epwe pin.’ ”
19Iwe, ewe SAMOL a pwal apasa ngeni Moses, 20“Iei ewe asór Aaron me nöün kewe mwän repwe wiisen uweato ren ewe SAMOL lón ewe rän emön me emön leiir epwe kepit. Repwe uweato ew na engolun ew efa ika ruu kuoche pilawa mi amas o pwetete pwe ew asóren mwöngö. Lesossor, repwe ääni asór esóp seni ei asór, nge lekkuniól repwe ääni asór pwal ewe esóp. 21Ei asór epwe ammwoot fiti apüra seni föün olif wón och leenien ammwoot usun fraipan. Epwe nofitöch o kinikinikkisitiw. Iwe, ewe souasór epwe uweato o asóruni pwe ew asóren mwöngö, ew asór ewe SAMOL a efich pwonnan. 22Lupwen ekkewe naaw repwe siwili semer kewe lón wiiser wiisen souasór, repwe katolong lón ewe wiis ren ar ääni ei asór lón ewe rän ra kepit. Ei asór iei inetin ewe SAMOL, iei minne epwe unusen keekkiló. 23Iteiten asóren mwöngö än emön souasór epwe unusen keekkiló, esap wor emön epwe mwöngö och seni.”
24Iwe, ewe SAMOL a apasa ngeni Moses, 25“Kopwe üreni Aaron me nöün kewe mwän: ‘Ikkeei ekkewe öllük fäniten ewe asóren limelimen tipis: Ewe mönün asóren limelimen tipis epwe ppos chioran me fän mesen ewe SAMOL lón ewe leeni ia ewe mönün asóren keek a ppos chioran me ie. Ei mönün asór a fókkun pin. 26Ewe souasór mi föri ei angangen asóren limelimen tipis epwe mwöngö seni, nge epwe mwöngö lón ew leeni mi pin, lón ewe leeni lükün ewe Imw Mangaku Leenien Chufengen. 27Ese lifilifil ika meet a attapa och me leiin fituken ewe mönün asór, epwe pin. Nge are och ewe chcha a pissükütä wón och üüf, kopwe limeti ewe üüf lón ew leeni mi pin. 28Ika ewe fituk epwe kuk lón ew nape mi för seni pwül, ewe nape epwe fókkun ömmökküló. Nge ika ewe fituk epwe kuk lón ew nape mi för seni piraas, ewe nape epwe töttöl o chiichi lón kólik. 29Ekkewe chök mwän seni än emön souasór famili ra tongeni mwöngö seni ei asór, pün iei ew asór mi fókkun pin. 30Nge are chaan ewe mönün asóren limelimen tipis a fen uwoowlong lón ewe Imwenfel mangaku pwe epwe fis angangen omwusomwusen tipis ren me lón ewe Leeni mi Pin fäniten än ekkewe aramas tipis, esap wor emön a tongeni ocheei och fituken ewe maan. Ewe mönün asór epwe fókkun unusen keekkiló.
7 “ ‘Ikkeei ekkewe öllük fäniten ewe asóren liwinin pinasen tipis mi fókkun pin. 2Ewe mönün asóren liwinin pinasen tipis epwe ppos chioran me lón ewe leeni ia ewe mönün asóren keek a ppos chioran me ie. Iwe, chaan ewe mönün asór epwe utuut ngeni winipelien ewe róngen asór meinisin. 3Ewe souasór epwe ääni asór kirissin ewe mönün asór meinisin:ewe mechan mi kiriis me ewe kiriis mi pwölüwoló ekkewe affan, 4ekkewe faileewa me rüöföü fiti ewe kiriis mi nóm wór sooso ngeni ekkewe fituken lükün chüülapan me ewe emiemin ömmülün. 5Iwe, ewe souasór epwe kenireló wón ewe róngen asór pwe och asór ngeni ewe SAMOL mi keek wón ekkei. Iei ew asóren liwinin pinasen tipis. 6Ekkewe mwän meinisin seni lón än emön souasór famili ra tongeni mwöngö seni ei asór, nge repwe chök mwöngö ei asór lón ew leeni mi pin, pün ei asór a fókkun pin.
7“ ‘A löllöfengen chök öllükün ewe asóren limelimen tipis me ewe asóren liwinin pinasen tipis, pün fituken ewe mönün asór ina inetin ewe souasór mi wiisen föri angangen ewe asóren omwusomwusen tipis. 8Nge ren ewe asóren keek, ewe souasór mi föri angangen ei asór fäniten emön aramas a tongeni anómwu fänitan ünüchchen ewe mönün asór. 9Iteiten asóren mwöngö mi umw lón uumw ika kuk lón nape ika ammwoot lón fraipan iei wiisen ewe souasor mi föri angangen ewe asór. 10Nge ekkewe asóren mwöngö meinisin resap ammwoot, ese lifilifil ika pilawa mi nofit fengen me apüra seni föün olif ika pilawa mi chök pwasapwas, epwe löllöppök inetir wón nöün Aaron kewe mwän meinisin.
Sópwósópwun öllükün angangen ewe asóren kinamwe
11“ ‘Ikkeei ekkewe öllük fäniten ewe asóren kinamwe emön aramas a tongeni uweato ren ewe SAMOL:
12“ ‘Are emön aramas a ääni ew asóren kinamwe pwe epwe pwärätä esissilen an kilisou, iwe, epwe uweato ewe mönün asóren kilisou nge epwe pwal ääni asór ekkeei sókkun pilawa mi mwoot: fóchun pilawa mi nofit fengen me apüra nge esap wor iis lón, pisikit mi tóótó ngeni apüra nge esap wor iis lón, keik mi för seni pilawa mi pwetete o öüwööwöch pwal nofit ngeni apüra. 13Ätewe epwe pwal uweato pwe an asór ekkóch föün pilawa mi för fiti iis pwe chiechien an ei asóren kinamwe fäniten an kilisou. 14Ätewe epwe uweato och me och sókkun pilawa pwe ew asór, iei an liffang ngeni ewe SAMOL, iei än ewe souasór mi wiisen äsupwu chaan ewe mönün asóren kinamwe. 15Iwe, ätewe epwe ocheeló fituken an we mönün asóren kinamwe lón chök ewe rän i a ääni asór, nge esap fókkun likiti och seni tori lesossor.
16“ ‘Nge are ätewe a uweato an we asór fäniten an epwe öpwönüetä och pwon ika ew asór seni pwisin mochenin letipan, a tongeni ocheei fituken ewe mönün asór lón ewe chök ränin, nge meet a lussuló i a pwal tongeni ocheei lón ewe rän mwirin. 17Och fituk seni ewe mönün asór mi chüen nóm tori ewe öülüngätin rän epwe keekkiló. 18Are emön epwe ocheei och fituken ewe mönün asóren kinamwe lón ewe öülüngätin rän; iwe, esap ketiw meren ewe SAMOL. Esap pwal wor ällean ewe asór ngeni ewe emön mi ääni ewe asór, pün ei asór a limengaw. Ewe aramas mi ocheei och ewe fituk epwe pwisin küna pwüngün chappen an föfför.
19“ ‘Esap wor emön epwe ochooch och fituk mi ökküüw och mettóch mi nóm lón tettelin limengaw. Ewe fituk epwe unusen keekkiló. Nge ren ewe fituk mi öchchün ochooch, ese lifilifil iö mi nóm lón tettelin limöch a tongeni epwe ochooch seni. 20Nge are emön mi nóm lón tettelin limengaw a ochooch och seni fituken ewe mönün asóren kinamwe än ewe SAMOL, ena aramas epwe katoowu seni leiin aramasan. 21Are emön aramas a attapa och mettóch mi limengaw - ese lifilifil ika limengawen aramas ika limengawen maan ika och sókkun limengaw, ika och mettóch mi enniopwut - nge mwirin, a ochooch och seni fituken ewe mönün asóren kinamwe än ewe SAMOL, ena aramas epwe fókkun katoowu seni leiin aramasan.’ ”
Esap mwümwütä wün chcha me ochooch kiriis
22Iwe, ewe SAMOL a apasa ngeni Moses, 23“Kopwe üreni ekkewe chón Israel: ‘Öüsap ocheei och kirissin ekkewe kowu ika siip ika kuuch. 24Öüwa tongeni aea ren och popun kirissin emön maan öüwa küna nge a mä ika maanmwacho ra nii. Nge öüsap chök fókkun ocheei fitukan. 25Iteiten iö mi ocheei kirissin emön maan aramas ra ääni asór wón ekkei ngeni ewe SAMOL epwe fókkun kösüüló seni leiin aramasan. 26Iwe, ekis meinisin ia öüwa nóm ie öüsap fókkun ünümi chaan emön maansüüsü ika chaan maan. 27Are emön epwe wün chcha, ena aramas epwe fókkun katoowu seni leiin aramasan.’ ”
Inetin ekkewe souasór
28Mwirin, ewe SAMOL a apasa ngeni Moses, 29“Kopwe üreni ekkewe chón Israel ekkeei kapasen öüröür: ‘Lupwen emön epwe uweato ew asóren kinamwe ren ewe SAMOL, epwe chök uweato och kinikin seni pwe an asór ngeni ewe SAMOL. 30Ätewe mi uweato ewe asór epwe fangaló ren pwisin pöün pwe iei ew asór i a fang ngeni ewe SAMOL epwe keek wón ekkei. Ätewe epwe uweato kirissin ewe mönün asór fengen me ewe leupwan. Iwe, epwe sapaatä ewe leupwan me fän mesen ewe SAMOL pwe ew asóren asóp. 31Iwe, ewe souasór epwe keni ewe kiriis wón ewe róngen asór, nge ewe leupwan ina inetin Aaron me nöün kewe mwän. 32Öüpwe ngeni ewe souasór peliifichin aföön ämi kewe mönün asóren kinamwe pwe ina ew tupwumi ngeni. 33Nöün Aaron we mwän e wiisen äsupwu ewe chcha me keni kirissin ewe mönün asóren kinamwe epwe angei ewe peliifichin aföön pwe ina inetin. 34Ngang üwa filätä le angei seni än ekkewe chón Israel kewe mönün asóren kinamwe ewe leupwan pwe ina ar asóren asóp me ewe aföön pwe ina tupwur o üwa ngeni ewe souasór Aaron me nöün kewe mwän pwe epwe ikkana inetir iteiten fansoun meinisin meren ekkewe chón Israel.’ ”
35Iei ewe kinikin seni ekkewe asór mi keek wón ekkei ngeni ewe SAMOL ra käimwüüló fäniten Aaron me nöün kewe mwän pwe ikkeei inetir lón ewe rän ra kefilitä pwe repwe angang ngeni ewe SAMOL pwe iir repwe souasór. 36Lón ewe rän ra kepit, ewe SAMOL a öllük ngeni ekkewe chón Israel pwe repwe ngenir ei kinikin pwe epwe ina wiiser iteiten fansoun meinisin meren ekkewe tettelin pilóón aramas lón ekkan fansoun repwe feitto me mwirin.
37Iwe, ikkeei ekkewe öllük fäniten ewe asóren keek, ewe asóren mwöngö, ewe asóren limelimen tipis, ewe asóren liwinin pinasen tipis, ewe asóren angangen epinipin me ewe asóren kinamwe, 38ewe SAMOL a ngeni Moses me wón ewe Chuuk Sinai lón ewe rän i a öllük ngeni ekkewe chón Israel pwe repwe uweato ar kewe asór ngeni ewe SAMOL me lón ewe Fönüpöönün Sinai.
Ekkewe souasór ra angei ar epinipin(Exodus 29:1-37)
8 Iwe, ewe SAMOL a apasa ngeni Moses, 2“Kopwe emmwenato Aaron me nöün kewe mwän. Kopwe pwal uweato üfeer kewe, ewe löön kepit mi mis, ewe ätemwänin kowu fäniten ewe asóren limelimen tipis, ekkewe rüömön ätemwänin siip me ewe chüük mi masow ren pilawa ese wor iis lón. 3Iwe, kopwe emwiichafengeni unusen ewe mwiichen aramas meinisin ren ewe leenien tolong ngeni ewe Imw Mangaku Leenien Chufengen.” 4Iwe, Moses a föri usun minne ewe SAMOL a öllük ngeni i o unusen ewe mwiichen aramas ra mwiichfengen lón ewe kinikin ren ewe leenien tolong ngeni ewe Imw Mangaku Leenien Chufengen.
5Iwe, Moses a apasa ngeni ewe mwiichen aramas, “Ewe SAMOL a öllük pwe iei meet ngang üpwe föri.” 6Mwirin, Moses a emmwenato Aaron me nöün kewe mwän o a limetiir ren kólik. 7Iwe, a öüföüfa ngeni Aaron ewe pinu üföüfen lón mi pwechepwech o langattam, a pwal fööti ngeni lukalapan ewe ökkönük o öüföüfa ngeni ewe litinimwär, iei ewe üüf mi arawaraw o langattam. Mwirin, a öüföüfätä wón Aaron ewe wääwup iei ewe üfen souasór mi foutout. Iwe, Moses a pwal fööti ewe wääwup ngeni Aaron ren ekkewe fööfö mi lingöch ölüölün. Iwe, ewe wääwup a fööfö ngeni Aaron. 8Mwirin, Moses a pwal apachaatä ewe chechchen fänimmwär wón Aaron o isenalong ewe Urim me ewe Thumim lón ewe chechchen fänimmwär. 9Mwirin, Moses a isenätä ewe äfäichimw wón möküren Aaron o apachätä ewe kolt mi chööpöp, iei ewe mwärämwär mi pin usun mwärin king wón leten mesen ewe äfäichimw, usun ewe SAMOL a öllük ngeni Moses.
10Mwirin, Moses a pwal angei ewe löön kepit mi mis o a epiti ewe imw mangaku mi pin me meinisin mettóch mi nóm lón. Iei usun än Moses a epinireló. 11Iwe, a pwal äsupwätä fän fisu och ewe lömmis wón ewe róngen asór o epiti ewe róngen asór me pisekin meinisin, a pwal epiti ewe üülong me uchangan we pwe epwe epinireló. 12Iwe, a niinätiw och ewe lömmis wón möküren Aaron o a epiti pwe epwe epinaló i. 13Mwirin, Moses a emmwenato nöün Aaron kewe mwän. Iwe, a öüföüfa ngeniir ekkewe öüfölap mi pwechepwech o langattam, a pwal rii ngeni lukalaper ekkewe ökkönük o isenätä wór ekkewe äfäichimw, usun ewe SAMOL a öllük ngeni.
14Iwe, Moses a emmwenato ewe ätemwänin kowu fäniten ewe asóren limelimen tipis. Mwirin, Aaron me nöün kewe mwän ra itetiw pöüür wón möküren ewe mönün asór. 15Iwe, ätewe a posuw chioren ewe ätemwänin kowu. Iwe, Moses a angei och ewe chcha o a aea ächefen pöün le tóófätä ewe chcha wón meinisin ekkewe mächään ewe róngen asór mi kenitä usun mächään maan pwe epwe elimöchüw ewe róngen asór. Mwirin, a niinätiw lussun ewe chcha lepopun ewe róngen asór. Iei usun än Moses a epinaló ewe róngen asór pwe epwe föri omwusomwusen limelimen tipis fänitan. 16Iwe, a pwal angei meinisin ewe kiriis ünükkün ekkewe affan, ewe emiemin ömmülün me ekkewe faileewa me rüöföü me kirissir o a kenireló wón ewe róngen asór. 17Nge unusen ewe ätemwänin kowu pacholong ünüchchan me fitukan me affan, ra keekkiló lükün ewe leeni ia ra asóósó ie, usun ewe SAMOL a öllük ngeni Moses.
18Mwirin, Moses a emmwenato ewe ätemwänin siip fäniten ewe asóren keek. Iwe, Aaron me nöün kewe mwän ra itetiw pöüür wón möküren ewe mönün asór. 19Iwe, ätewe a posuw chioren ewe maan. Mwirin, Moses a angei chaan ewe ätemwänin siip o äsupwu ngeni winipelien ewe róngen asór meinisin. 20Mwirin, Moses a kinikkisietiw ewe ätemwänin siip. Iwe, a kenaló wón ewe róngen asór ewe möküran, ekkóch kewe kinikinin me ewe kiriis. 21Mwirin än Moses a wes le tölü ekkewe affan me ekkewe seengen pechen ren kólik, a kenaló unusen ewe ätemwänin siip wón ewe róngen asór pwe ew asóren keek mi unus. Iei ew asóren keek mi pwoöch, ew asór ngeni ewe SAMOL mi keek wón ekkei, usun ewe SAMOL a öllük ngeni Moses.
22Mwirin, Moses a emmwenato ewe örüwömönün ätemwänin siip, iei i ewe ätemwänin siip fäniten ewe angangen epinipin. Iwe, Aaron me nöün kewe mwän ra itetiw pöüür wón möküren ewe ätemwänin siip. 23Iwe, ätewe a posuw chioren ewe maan. Mwirin, Moses a angei och chaan ewe ätemwänin siip o tóófi ngeni emin fän peliifichin selingen Aaron, wón öütülapen pöüifichin pwal wón öütülapen peliifichin pachapachan. 24Moses a pwal emmwenato nöün Aaron kewe mwän o a tóófätä och ewe chcha wón emin fän peliifichin selinger, wón öütülapen pöüifichir pwal wón öütülapen peliifichin pachapacher. Mwirin, Moses a äsupwu ewe chcha ngeni winipelien ewe róngen asór meinisin. 25Mwirin, a angei ewe kiriis, ewe mechan mi kiriis, meinisin ewe kiriis ünükkün ekkewe affan, ewe emiemin ömmülün, ekkewe faileewa me rüöföü fiti kirissir me ewe peliifichin aföön. 26Mwirin, a angei seni lón ewe chükün pilawa ese nofit me iis mi nóm fän mesen ewe SAMOL eföw pilawa, pwal eföü pilawa mi nofit fengen me apüra me och pisikit. Iwe, a iseniretä wón ekkewe kinikinin kiriis pwal wón ewe peliifichin aföön. 27Moses a angei ekkeei mettóch meinisin o isenirelong lepöün Aaron me nöün kewe mwän. Iwe, ra sapeeretä me fän mesen ewe SAMOL pwe ew asóren asóp. 28Mwirin, Moses a angei ekkeei mettóch seni lepöür o a kenireló wón ewe róngen asór asen ewe asóren keek pwe iei ew asóren ewe angangen epinipin mi pwoöch, ew asór ngeni ewe SAMOL mi keek wón ekkei. 29Mwirin, Moses a angei leupwen ewe mönün asór, iei inetin Moses seni ewe ätemwänin siip mönün asóren angangen epinipin. Iwe, a sapaatä me fän mesen ewe SAMOL pwe ew asóren asóp, usun ewe SAMOL a öllük ngeni Moses.
30Mwirin, Moses a pwal angei och ewe löön kepit mi mis me och ewe chcha mi nóm wón ewe róngen asór. Iwe, a äsupwuretä wón Aaron me üfan kewe, pwal wón nöün Aaron kewe mwän me üfer kewe. Iei usun än Moses a epinaló Aaron me üfan kewe pwal nöün Aaron kewe mwän me üfer kewe.
31Mwirin ei, Moses a apasa ngeni Aaron me nöün kewe mwän, “Öüpwe kukuw ewe fituk me ren ewe leenien tolong ngeni ewe Imw Mangaku Leenien Chufengen. Iwe, öüpwe ocheei ewe fituk me ikenan fiti ewe pilawa mi nóm lón ewe chükün ekkewe asóren angangen epinipin, usun ngang üwa öllük o apasa, ‘Aaron me nöün kewe mwän repwe mwöngö.’ 32Mwirin, öüpwe kenaló lussun ewe fituk me ewe pilawa. 33Öüsap toowu seni lón ewe kinikin ren ewe leenien tolong ngeni ewe Imw Mangaku Leenien Chufengen lón üküükün fisu rän tori repwe unusöchchüló ekkewe ränin angangen ämi angei ämi epinipin. Pün angangen ämi angei ämi epinipin epwe fis lón üküükün fisu rän. 34Meet ei a fis ikenäi, iei meet ewe SAMOL a öllük fäniten an epwe fis asóren omwusomwusen tipis fänitemi. 35Öüpwe chechchemeni pwe öüpwe chök nóm lón ewe kinikin ren ewe leenien tolong ngeni ewe Imw Mangaku Leenien Chufengen lerän me lepwin lón üküükün fisu rän o föri ekkewe mettóch meinisin ewe SAMOL a mochen pwe öüpwe föri. Are öüsap föri minne i a mochen, iwe, öüpwe mäló. Iei meet ewe SAMOL a apasa.”
36Iei minne, Aaron me nöün kewe mwän ra föri iteiten ekkewe mettóch meinisin ewe SAMOL a öllük ngeniir meren Moses.
Ekkewe souasór ra popuetä ar angang
9 Iwe, mwirin ewe fansoun epinipin, lón ewe awalüwen rän, Moses a kööri fengeni Aaron me nöün kewe mwän pwal ekkewe souakkomwen Israel. 2Iwe, a apasa ngeni Aaron, “Kopwe angei emön liäliffön ätemwänin kowu fäniten óm asóren limelimen tipis me emön ätemwänin siip fäniten óm asóren keek, iir me rüömön ekkewe maan esap wor terir. Iwe, kopwe äänir asór me fän mesen ewe SAMOL. 3Mwirin, kopwe üreni ekkewe chón Israel pwe repwe angei emön ätemwänin kuuch fäniten ew asóren limelimen tipis fäniter, pwal emön liäliffön kowu ew ierin me emön laam ew ierin fäniten ew asóren keek, iir me rüömön esap wor terir. 4Kopwe pwal üreniir pwe repwe angei emön ätemwänin kowu me emön ätemwänin siip pwe repwe äänir asór fän mesen ewe SAMOL fäniten ew asóren kinamwe fiti ew asóren mwöngö mi nofit ngeni apüra. Kopwe üreniir pwe repwe uweato ekkeei asór meinisin ngeni ewe SAMOL, pün ewe SAMOL epwe pwääto reer ikenäi.”
5Iwe, ekkewe aramas ra angei ekkewe mettóch Moses a öllük ngeniir o uweireló ngeni mwen ewe Imw Mangaku Leenien Chufengen. Iwe, unusen ewe mwiichen aramas ra kaneto o üütä fän mesen ewe SAMOL. 6Mwirin, Moses a apasa, “Iei meet ewe SAMOL a öllük ngeni kemi pwe öüpwe föri, pwe lingen ewe SAMOL epwe pwää ngeni kemi.”
7Iwe, Moses a apasa ngeni Aaron, “Kopwe feitto ren ewe róngen asór o ääni óm asóren limelimen tipis me óm asóren keek pwe kopwe föri asóren omwusomwusen tipis pwisin fänitom me ekkewe aramas. Kopwe pwal ääni ewe asór fäniten ekkewe aramas pwe kopwe föri asóren omwusomwusen tipis fäniter, usun ewe SAMOL a fen öllük.”
8Ina minne Aaron a feitto ren ewe róngen asór o posuw chioren ewe liäliffön kowu pwe ew asóren limelimen tipis pwisin fänitan. 9Iwe, nöün kewe mwän ra uweato ewe chcha ren, nge i a tikilong lón ewe chcha ren efóch ächefen pöün o tóófätä ewe chcha wón ekkewe mächään ewe róngen asór mi kenitä usun mächään maan. Nge a niinätiw ewe lussun chcha lepopun ewe róngen asór. 10Mwirin, Aaron a keni ewe kiriis me ekkewe faileewa me ewe emiemin ömmülün seni ewe mönün asóren limelimen tipis wón ewe róngen asór, usun ewe SAMOL a öllük ngeni Moses. 11Nge a kenaló fituken me ünüchchen ewe mönün asór me lükün ewe leeni ia ra asóósó ie.
12Mwirin, Aaron a pwal posuw chioren ewe mönün asóren keek. Iwe, nöün kewe mwän ra eiti ngeni ewe chcha, nge i a uti ewe chcha ngeni winipelien ewe róngen asór meinisin. 13Iwe, ra pwal eiti ngeni och me och kewe kininin ewe mönün asór pwal pacholong ewe möküran. Iwe, i a kenireló wón ewe róngen asór. 14Iwe, a limeti ren kólik ekkewe affan me ekkewe seengen pecheen o kenireló asen ewe mönün asóren keek wón ewe róngen asór.
15Mwirin, Aaron a uweato ewe asór fäniten ekkewe aramas. I a angei ewe kuuch fäniten än ekkewe aramas asóren limelimen tipis. Iwe, a posuw chioren ewe mönün asór o ääni asór pwe ew asóren limelimen tipis, usun chök minne i a fen föri ren ewe äewin asór.
16Iwe, a pwal uweato ewe mönün asóren keek o a ääni asór lón pwüngün lapalapen angangan. 17I a pwal uweato ewe asóren mwöngö. Iwe, a tukeei ekumwuch seni o keni wón ewe róngen asór kapach ngeni ewe asóren keek mi fis lesossor.
18Iwe, i a pwal posuw chioren ewe ätemwänin kowu me ewe ätemwänin siip pwe iei ewe asóren kinamwe fäniten ekkewe aramas. Iwe, nöün kewe mwän ra eiti ngeni i ewe chcha, nge i a uti ewe chcha ngeni winipelien ewe róngen asór meinisin. 19Mwirin, a angei kirissin ewe ätemwänin kowu me ewe ätemwnin siip - ikkeei ekkewe kiriis seni ekkewe mechan pwal seni ünükkün ekkewe affan - fiti ekkewe faileewa me ewe emiemin ömmülün. 20Iwe, a isettä ekkeei kinikin mi kiriis wón ekkewe leupwen ekkeei maan. Mwirin, Aaron a keniireló wón ewe róngen asór. 21Mwirin, Aaron a sapaatä ekkewe leupwan me ewe peliifichin aföön me fän mesen ewe SAMOL pwe ew asóren asóp, usun Moses a öllük.
22Mwirin ei, Aaron a eitiwu pöün me rüófóch ren ekkewe aramas o a efeiöchür. Iwe, Aaron a feittiw seni ewe róngen asór pwokiten a wes le ääni ewe asóren limelimen tipis me ewe asóren keek me ewe asóren kinamwe.
23Iwe, Moses me Aaron ra feillong lón ewe Imw Mangaku Leenien Chufengen. Nge lupwen ra toowu, ra efeiöchüw ekkewe aramas. Iwe, lingen ewe SAMOL a pwää ngeni ekkewe aramas meinisin. 24Iwe, ekkei a ngetewu seni ikeweia ewe SAMOL a nóm ie o kenaló ewe asóren keek me ekkewe kinikinin kiriis wón ewe róngen asór. Iwe, lupwen ekkewe aramas meinisin ra küna ei, ra mweireir ren ar pwapwa o chappetiw lepwül.
Nadab me Abihu ra tipis
10 Iwe, nöün Aaron kewe mwän iter Nadab me Abihu ra angei ar kewe leenien asóren ötüöt, ra amasowalong mwolien ekkei mi kü lór o ra amworomworotä appach mi pwokkus wór. Lón ei lapalap, ra älleasolap ngeni ewe SAMOL ren ar keni me fän mesan och ekkei esap mwüümwütä, pün mi sókkóló seni meet i a öllük ngeniir. 2Iei minne, ekkei a ngetewu seni ikeweia ewe SAMOL a nóm ie o keniireló. Iwe, ra mäló me fän mesen ewe SAMOL. 3Mwirin, Moses a apasa ngeni Aaron, “Iei meet ewe SAMOL e kapas usun lupwen a apasa:
“ ‘Ngang üpwe pwisin pwääraló pwe ngang mi pin me leiin chókana mi ämweto rei. Ngang üpwe pwääraló äi iteüöch me mwen mesen aramas meinisin.’ ”
Nge Aaron a chök fanafanaló.
4Iwe, Moses a tiiti Mishael me Elizafan, nöün Uzziel kewe mwän, nge Uzziel i tettelin semen Aaron, o a apasa ngeniir, “Öüpwe feitto ikeei o uwealó tettelin pwiimi keei seni mwen ei imw mi pin. Öüpwe uweireló lükün ewe leeni ia sia asóósó ie.” 5Ina minne ra feitto o uweeló soomän Nadab me Abihu lükün ewe leeni ia ra asóósó ie, usun Moses a öllük, nge ra chüen üföüf üfer kewe üföüfen souasór mi pwechepwech.
6Mwirin, Moses a apasa ngeni Aaron me nöün kewe mwän iter Eleazar me Ithamar, “Öüsap atorotorongawa meeten möküremi, öüsap pwal kamwei üfemi pwe esissilen ämi letipeta. Are öüpwe föri ei sókkun, öüpwe mäló, nge ewe SAMOL epwe soong ngeni unusen ewe mwiichen aramasen Israel. Nge ekkewe lussun chón Israel iir määrärimi kewe repwe kechiweiti Nadab me Abihu, iir ätekewe ewe SAMOL a niireló ren ekkei. 7Öüsap toowu seni lón ewe kinikin ren ewe leenien tolong ngeni ewe Imw Mangaku Leenien Chufengen pwe öüte mäló, pwokiten än ewe SAMOL löön kepit mi mis a nóm wóómi.” Ina minne ra föri usun minne Moses a apasa.
8Mwirin, ewe SAMOL a kapas ngeni Aaron o ürä, 9“En me noum kewe mwän öüsap wün wain ika pwal och sókkun wün mi mwääl lupwen öüpwe tolong lón ewe Imw Mangaku Leenien Chufengen pün öüte mäló. Iei ew öllük fänitemi esap ekkesiwil tori ekkewe tettelin pilóón aramas repwe feitto me mwirin. 10Iei wiisemi pwe öüpwe fókkun älefiila lefiilen meet mi pin me meet a fäniten aramas meinisin, pwal lefiilen meet mi limengaw me meet mi limöch. 11Iwe, öüpwe äööw ngeni ekkewe chón Israel meinisin ekkewe öllük ewe SAMOL a fen ngeniir meren Moses.”
12Iwe, Moses a apasa ngeni Aaron me nöün kewe mwän mi chüen manaw iter Eleazar me Ithamar, “Öüpwe angei meet lussun ewe asóren mwöngö me mwirin an tukotuk ewe ekumwuch o asór ngeni ewe SAMOL wón ekkei. Iwe, öüpwe mwöngö me ünükkün ewe róngen asór nge öüpwe tümwünü pwe esap wor iis lón pün ei asór a fókkun pin. 13Öüpwe mwöngö ei asór me lón ew leeni mi pin, pwokiten iei inetum me inetin noum kewe mwän iteiten fansoun meinisin seni ekkewe asór ngeni ewe SAMOL mi keek wón ekkei, pün iei usun minne ngang üwa fen öllük. 14Nge en me noum kewe mwän me noum kewe fefin öüwa tongeni ochooch leupwen ewe mönün asór mi fen sapatä me ewe peliifichin aföön mi fen öülöül pün ikkeei ekkewe kinikin ekkewe chón Israel ra ngenuk me noum kewe pwe inetimi seni ar kewe asóren kinamwe. Öüpwe ocheer me lón ew leeni mi nóm lón tettelin limöch. 15Repwe uweato ewe peliifichin aföön ra öüla me ewe leupwan ra ääni asóren asóp fiti fengen me ekkewe kinikinin kiriis repwe ääni asór wón ekkei pwe repwe sapeeretä me fän mesen ewe SAMOL pwe ew asóren asóp. Epwe iei inetum me noum kewe iteiten fansoun meinisin, usun ewe SAMOL a öllük.”
16Iwe, lupwen Moses a eiis tichchik an epwe silei usun minne a fis ngeni ewe ätemwänin kuuch fäniten ewe asóren limelimen tipis; iwe, a küna pwe a fen keekkiló. Iei popun, a soong ngeni Eleazar me Ithamar, nöün Aaron kewe mwän mi chüen manaw. Iwe, a eisiniir, 17“Pwata öüsap ocheei fituken ewe mönün asóren limelimen tipis me lón ewe kinikinin leeni mi pin? Ewe mönün asór a fókkun pin. Iwe, a einet ngeni kemi pwe ämi öüpwe mwärelong fän choun liwinin tipisin ewe mwiichen aramas ren ämi öüpwe föri asóren omwusomwusen tipis fäniten ekkewe aramas me fän mesen ewe SAMOL. 18Pwokiten chaan ewe mönün asór esap uwowlong lón ewe Leeni mi Pin; iei minne pwüngün pwe ämi öüpwe ocheei fituken ewe kuuch me lón ewe kinikinin leeni mi pin, usun ngang üwa öllük ngeni kemi.”
19Mwirin, Aaron a pölüweni o apasa ngeni Moses fäniten nöün kewe mwän, “Ikenäi neii kewe mwän ra ääni ar asóren limelimen tipis me ar asóren keek ngeni ewe SAMOL. Nge ei sókkun mettóch ra fen fis ngeniei. Ifa usun, ewe SAMOL epwe etiwa are ngang üpwe ocheei fituken ewe mönün asóren limelimen tipis ikenäi?” 20Iwe, lupwen Moses a rong ei, a menemeöch ren.
Ekkewe maan mi nóm lón tettelin limöch me limengaw(Deuteronom 14:3-20)
11Iwe, ewe SAMOL a apasa ngeni Moses me Aaron, 2“Öüpwe üreni ekkewe chón Israel: ‘Ikkeeir ekkewe sókkun maan öüwa tongeni ochooch seni leiin ekkewe maan meinisin mi nóm wón fönü: 3Öüwa tongeni ochooch emön sókkun maan mi unusen kinikin fesen ükkün apachapachan o lüülüwsäfäli anan.
4“ ‘A wor ekkóch maan ra chök lüülüw säfäli ener ika a chök kinikin fesen ükkün apachapacher. Iwe, ämi öüsap fókkun ochooch ekkeei sókkun maan. Ewe maan kamel a nóm lón tettelin maan mi limengaw ngeni kemi, pün inamwo ika a lüülüw säfäli anan nge esap kinikin fesen ükkün apachapachan. 5Pwal ewe maan itan kooni a limengaw ngeni kemi pün inamwo ika a lüülüwsäfäli anan, nge esap kinikin fesen ükkün apachapachan. 6Ewe maan üsangi a limengaw ngeni kemi pün inamwo ika a lüülüwsäfäli anan nge esap kinikin fesen ükkün apachapachan. 7Iwe, pwal ewe maan piik a limengaw ngeni kemi, pün inamwo ika kinikin fesen kumwuchun pachapachan nge esap chök lüülüwsäfäli anan. 8Öüsap ochooch fituken ekkeei maan öüsap pwal attapa inisir mi mä, pün ra limegaw ngeni kemi.
9“ ‘Öüwa tongeni mwöngö emön mönün leeset mi wor iniinin me ünöünan seni leiin ekkewe mönün leeset me mönün lón kólik meinisin. 10Nge meinisin ekkewe mönümanaw mi nóm lón säät me lón kólik esap wor ininiir me ünöüner, ese lifilifil ika iir seni leiin ekkewe maan mi kükkün meinisin ika iir seni leiin ekkewe mönümanaw meinisin mi nóm lón kólik, öüpwe niopwutäsinir. 11Iwe, pwokiten öüwa niopwutäsinir; iei minne öüsap fókkun mwöngö fituker, öüsap pwal fókkun attapa inisir mi mä. 12Ese lifilifil ika meet sókkun mönümanaw mi nóm lón kólik ika leeset esap wor iniinin ika ünöünan epwe enniopwut ngeni kemi.
13“ ‘Ikkeeir ekkewe sókkun maansüüsü ämi öüpwe niopwutäsinir o öüsap pwal ochooch fituker pwokiten ra enniopwut: ewe maansüüsü ikel, ewe maansüüsü mi okkochooch fituk, ewe maansüüsü mi chól nge mi pwal ochooch fituk, 14ewe maansüüsü mi par itan kait, ese lifilifil menni sókkun kait mi chól, 15ese lifilifil menni sókkun ewe maansüüsü itan reifen, 16ewe sókkun füküro mi wor mächään, ewe sókkun füküro mi tikikken, ewe lipöüwällei, ese lifilifil menni sókkun kawakaw, 17ewe sókkun füküro mi kükkün, ewe mallap, ewe sókkun füküro mi wätte, 18ewe sókkun füküro mi pwech, ewe füküron lón fönüpöön, och sókkun ikel itan osprei, 19ewe öröpwech, ese lifilifil menni sókkun öröchól, och sókkun mansüüsü itan huupo me ewe pöüte.
20“ ‘Meinisin ekkewe sókkun mönükkis mi wor pöükässir mi pwal fätäl wón fófóch pecheer repwe enniopwut ngeni kemi. 21Nge mi wor ekkóch sókkun mönükkis mi wor pöükässir nge ra pwal fätäl wón fófóch pecheer öüwa tongeni ochooch: ikkanair ekkewe sókkun mi wor lekupwukupwun pecheer fäniten ar repwe mwetemwet wón pwül. 22Öüwa tongeni ochooch och me leiin ekkeei: iteiten sókkun liffichimasen lón fönüpöön, soromä, koorongi ika pwal ekkewe ekkóch sókkun liffichimas. 23Nge meinisin ekkewe pwal ekkóch sókkun maan mi kükkün mi wor pöükässir o wor fófóch pecheer öüpwe niopwutäsinir.
24“ ‘Ikkeiir ekkewe maan öüpwe limengaw reer. Ese lifilifil ika iö a attapa inisir mi mä epwe limengaw tori lekuniól. 25Ese lifilifil ika iö a angei inisin emön mi mä me leiin ekkeei maan epwe limeti üfan lón kólik, nge ewe aramas epwe limengaw tori lekuniól.
26“ ‘Iteiten emön me emön maan wätte esap unusen kinikin fesen ükkün apachapachan ika esap pwal lüülüwsäfäli anan a limengaw ngeni kemi. Ese lifilifil ika iö a attapa inisin emön mi mä me leiir, i epwe limengaw. 27Ekkana maan mi kken ükkün apachapacher me leiin ekkewe sókkun maan meinisin mi fätäl wón fóffóch pecheer repwe limengaw ngeni kemi. Ese lifilifil ika iö a attapa inisir mi mä i epwe limengaw tori lekuniól. 28Iteiten emön me emön mi angei ika ömwökütü inisir mi mä epwe mwittir limeti üfan lón kólik. Iwe, i epwe limengaw tori lekuniól. Ekkeei sókkun maan ra limengaw ngeni kemi.
29“ ‘Ikkeiir ekkewe sókkun maan repwe limengaw ngeni kemi me leiin ekkewe maan mi tööfeil wón pwül: ewe sókkun maan itan wiisöl, nakkich, ese lifilifil menni sókkun koluuf, 30litoupach, küweel, likottow, liküüch me lipwaroch. 31Ikkeeir ekkewe sókkun maan mi limengaw ngeni kemi me leiin ekkana maan meinisin mi tööfeil wón pwül. Ese lifilifil ika iö a attaper lupwen ra mä, i epwe limengaw tori lekuniól. 32Iwe, lupwen emön me leiin ekkeei maan a turutiw lón och mettóch, ese lifilifil ika meet aean ena pisek, ena pisek epwe chök limengaw. Ese lifilifil ika ena pisek a för seni ömwüch, mangaku, ünüchchen maan ika tuuk. Öüpwe uwalong ewe pisek lón kólik; iwe, epwe limengaw tori lekuniól. Mwirin, epwap limöch. 33Are emön me leiir epwe turulong lón ew sepi mi för seni pwül, meinisin minne mi nóm lón ewe sepi epwe limengaw, nge kopwe pwal fókkun ömökkü ewe sepi. 34Ese lifilifil ika meet sókkun mwöngö itä mi mwirinnö ngeni än aramas repwe mwöngö nge a chiitiw wón ewe kólik seni lón ei sókkun sepi, ewe mwöngö a limengaw, pwal och kólik itä mi mwirinnö ngeni än aramas repwe wün nge a nóm lón ei sókkun sepi, ewe kólik a pwal limengaw. 35Iteiten mettóch emön ekkeei sókkun maan mi mä a turutiw wón, ewe mettóch a limengaw, ese lifilifil ika ew leenien umw ika ew napeen kuk, epwe chök kataaló. Ekkeei mettóch ra limengaw. Ämi öüpwe nengeni fichi usur pwe ra limengaw. 36Nge are emön ekkeei sókkun maan epwe turulong lón ew limiror ika ew chönüttu mi löölö kólik lón, ewe kólik epwe chök limöch, nge iö a attapa emön mi mä me leiin ekkeei sókkun maan ren an epwe angeawu me lón ewe kólik, i a limengaw. 37Ika emön mi mä me leiin ekkeei sókkun maan a turutiw wón ekkóch föün irän fóffót, ekkewe föün irä repwe chök limöch. 38Nge are ekkewe föün irä ra fen chöchchön ren kólik nge emön mi mä me leiin ekkeei sókkun maan a turutiw wór, ekkewe föün irä ra limengaw ngeni kemi.
39“ ‘Iwe, are emön me leiin ekkewe maan mi mwüümwütä ämi öüpwe ochooch a mäló, nge emön a attapa inisin ewe maan mi mä, ätewe epwe limengaw tori lekuniól. 40Emön mi ocheei och fituken ewe maan mi mä epwe fókkun limeti üfan ren kólik, nge i epwe limengaw tori lekuniól. Emön mi ekii ewe maan mi mä epwe fókkun limeti üfan ren kólik, nge i epwe limengaw tori lekuniól.
41“ ‘Iteiten mönümanaw mi tööfeil wón pwül ra enniopwut. Öüsap ochooch ei sókkun maan. 42Öüsap fókkun ochooch och sókkun mönümanaw mi tööfeil wón pwül, ese lifilifil ika a tö wón upwan ika tö wón fóffóch pecheen ika tö wón chómmóng pecheen. Ei sókkun maan a enniopwut. 43Öüsap pwisin enniopwuta kemi ren emön me leiin ekkewe maan mi tö. Öüsap föri ämi öüpwe limengaw pwokiter ika limengaw rer. 44Pün ngang ewe SAMOL ämi Kot, öüpwe pwisin epini kemi pwe öüpwe pin, pwokiten ngang mi pin. Öüsap föri ämi öüpwe pwisin limengaw ren emön leiin ekkewe maan mi tööfeil wón pwül. 45Pün ngang ewe SAMOL üwa emmweni kemiitä seni Egypt pwe üpwe ämi Kot; iei minne öüpwe pin, pwokiten ngang mi pin.
46“ ‘Ikkeei ekkewe öllük fäniten ekkewe maan me maansüüsü pwal fäniten iteiten mönümanaw mi nóm lón kólik me säät me ekkewe mönümanaw mi tööfeil wón pwül, 47pwe öüpwe fókkun älefiila lefiilen meet mi limengaw me meet mi limöch, pwal lefiilen ekkewe sókkun mönümanaw aramas ra tongeni ochooch me ekkana resap tongeni ochooch.’ ”
Angangen limelim fäniten fefin mwirin ar nöünöü
12 Iwe, ewe SAMOL a apasa ngeni Moses, 2“Kopwe üreni ekkewe chón Israel: ‘Are emön fefin a pwoopwo nge mwirin a nöüni emön äät, neminnewe epwe nóm lón tettelin chón limengaw lón üküükün fisu rän, usun chök an limengaw lón fansoun an semmwenin maram. 3Iwe, lón ewe awalüwen rän ewe äät epwe sirkomsais. 4Mwirin, ewe fefin epwe witiwit lón üküükün pwal iliik me ülüngät rän tori an epwe limöch seni chaan. Neminnewe esap attapa och mettóch mi pin, esap pwal feilló ngeni ewe imw mi pin tori ar ra wesiló ekkewe ränin an angangen limelim. 5Nge are emön fefin epwe nöüni emön nengngin; iwe i epwe nóm lón tettelin chón limengaw lón üküükün ruu wiik, usun chök lón an fansoun semmwenin maram. Mwirin, neminnewe epwe pwal witiwit lón üküükün wone me wonu rän pwe epwe limöch seni chaan.
6“ ‘Iwe, lupwen ra wesiló ekkewe ränin än neminnewe angangen limelim ese lifilifil ika fäniten emön äät ika emön nengngin, neminnewe epwe uweato ren ewe souasór mi nóm ren ewe leenien tolong ngeni ewe Imw Mangaku Leenien Chufengen, emön laam ew ierin fäniten ew asóren keek me emön appansüünsün mwurö ika emön lisóóm fäniten ew asóren limelimen tipis. 7Iwe, ewe souasór epwe äänir asór fän mesen ewe SAMOL pwe epwe föri asóren omwusomwusen tipis fäniten neminnewe. Mwirin, neminnewe epwe nóm lón tettelin chón limöch seni an pwuu seni chcha.
“ ‘Ikkeei ekkewe öllük fäniten emön fefin mi nöüni emön äät ika emön nengngin. 8Nge ika esap naf ngeni neminnewe an epwe ääni asór emön laam; iwe, a tongeni uweato rüömön lisóóm ika rüömön appansüünsün mwurö. Emön fäniten ew asóren keek, nge ewe pwal emön fäniten ew asóren limelimen tipis. Ren ei lapalap, ewe souasór epwe föri asóren omwusomwusen tipis fäniten neminnewe; iwe neminnewe epwe limöch.’ ”
Ekkewe sókkun kilingaw mi tongeni repwe paiking
13 Iwe, ewe SAMOL a apasa ngeni Moses me Aaron, 2“Lupwen a wor och pwoo wón inisin emön aramas ika och kiil ika och kiil mi tikipwechepwech wón ünüchchan mi tongeni an epwe wiliti och kilingaw mi tongeni paiking, iwe, epwe wor epwe emmwenaló ätewe ren ewe souasór ika ren emön leiin nöün kewe mwän i emön souasór. 3Iwe, ewe souasór epwe kensani fichi ünüchchen ätewe we mi üri ewe kiil. Iwe, are öüchimwen lón ewe kiil ra pwecheló pwal are a pwä pwe ewe kiil a alóllól seni fän ünüchchan; iwe, iei och kilingaw mi paiking. Iwe, lupwen ewe souasór a wes le kensani fichi ätewe, i epwe le atowu pwüngün pwe ätewe a nóm lón tettelin chón limengaw. 4Are ewe tiketik wón ünüchchan a pwechepwech nge esap pwä pwe a alóllóletiw seni fän ünüchchan pwal öüchimwen lón ewe kiil resap pwecheló, ewe souasór epwe äimwüeló ewe aramas mi üri ewe kiil pwe epwe i chök lón ew leeni lón üküükün fisu rän. 5Iwe, lón ewe efisuen rän ewe souasór epwe pwal kensani säfäli ätewe. Nge are ewe souasór a küna pwe ewe kiil esap siiwil esap pwal tööfeil wón ünüchchen ätewe; iwe, i epwe sópweló le äimwüeló ätewe pwe i chök epwe nóm lón ew leeni lón üküükün pwal fisu rän. 6Iwe, lón pwal ewe efisuen rän, ewe souasór epwe pwal kensani säfäli ätewe. Iwe, are ewe kiil a fänemóómó o esap tööló wón ünüchchen ätewe; ewe souasór epwe le atowu pwüngün ätewe pwe i a limöch. A chök üri och kilingaw. Iwe, ewe aramas epwe fókkun limeti üfan lón kólik o epwe nóm lón tettelin chón limöch. 7Nge are ewe kiil epwe tööló wón ünüchchen ätewe mwirin an pwääri ngeni ewe souasór inisin o a atowu pwüngün pwe a limöch, ätewe epwe fókkun pwääri säfäli inisin ngeni ewe souasór. 8Iwe, ewe souasór epwe kensani ätewe. Nge are ewe kiil a tööló wón ünüchchan, ewe souasór epwe atowu pwüngün ätewe pwe i a nóm lón tettelin chón limengaw. A üri och kilingaw mi paiking.
9“Iwe, lupwen a üri emön aramas och kilingaw mi paiking, epwe fókkun wor emön epwe emmwenato i ren ewe souasór. 10Iwe, ewe souasór epwe kensani ätewe, nge are a wor och pwoo mi pwechepwech wón ünüchchan a äpwechaló öüchimwen wón ewe pwoo, are a pwal wor och fituk mi parapar lón ewe pwoo, 11iwe, iei och kilingaw minen lóóm mi chök soun ükküri ätewe. Iwe, ewe souasór epwe atowu pwüngün ätewe pwe i a nóm lón tettelin chón limengaw. Ewe souasór esap äimwüeló ätewe an epwe imwuuló i chök lón ew leeni pwokiten i a fen nóm lón tettelin chón limengaw.
12“Iwe, are ewe kiil a rangowu o okuuweló wón unusen ünüchchen ätewe, nge lón öüküükün än ewe souasór a tongeni küna, ewe kiil a pwölüweló wón unusen ünüchchen ewe aramas mi üri ewe kiil seni wón möküran tori apachapachan, 13iwe, ewe souasór epwe kensani ätewe. Nge are ewe kiil a pwölüweló unusen inisin ätewe, ewe souasór epwe atowu pwüngün ätewe pwe i a nóm lón tettelin chón limöch. Pwokiten ewe kiil a pwecheló; iei minne ätewe a limöch. 14Nge are a pwä och ruup mi sukkuló, iwe, ewe aramas mi üri ewe ruup epwe nóm lón tettelin chón limengaw. 15Lupwen ewe souasór epwe nengeni ewe ruup, i epwe atowu pwüngün pwe ätewe a nóm lón tettelin chón limengaw. Ewe ruup a limengaw, nge ätewe a ääni och kilingaw mi paiking. 16Nge ika pwe ewe ruup a siiwil önüönün pün a pwecheló, ätewe epwe fókkun feilló ren ewe souasór. 17Iwe, ewe souasór epwe kensani ätewe, nge are a küna pwe ewe ruup a pwecheló; iwe, epwe le atowu pwüngün ewe aramas mi üri ewe ruup pwe a limöch. Mwirin, ätewe epwe le nóm lón tettelin chón limöch.
18“Lupwen a wor och mmach wón ünüchchen emön aramas a fen móóló, 19nge mwirin, a pwä me lón lemóómón ewe mmach och pwoo mi pwechepwech ika och tiketik mi parepwech, ätewe epwe pwisin feilló o pwääri inisin ngeni ewe souasór. 20Iwe, ewe souasór epwe kensani ewe kiil. Nge are a pwä pwe ewe kiil a alóllóletiw seni fän ünüchchan, pwal öüchimwen lón ewe kiil a pwecheló; iwe, ewe souasór epwe atowu pwüngün ätewe pwe a limengaw. Iei ew kilingaw mi paiking a pwüküwu me lemóón ewe mmach. 21Nge are, lupwen ewe souasór a kensani ewe kiil, nge esap wor öüchimw mi pwech lón ewe kiil, pwal ewe kiil esap alóllóletiw seni fän ünüchchan o a pwal fänemóómó, mwirin, ewe souasór epwe äimwüeló ätewe pwe epwe i chök lón ew leeni lón üküükün fisu rän. 22Are ewe kiil a tö lón ünüchchen ätewe; iwe, ewe souasór epwe le atowu pwüngün ätewe pwe i a nóm lón tettelin chón limengaw. Ei kiil a paiking. 23Nge are ewe tiketik esap siiwil lapalapan o esap pwal tööfeil; iwe, a chök och kinas mi pop seni ewe mmach. Iwe, ewe souasór epwe atowu pwüngün ätewe pwe i a nóm lón tettelin chón limöch.
24“Lupwen a wor och kkar wón ünüchchen emön aramas, nge a pwä me lón ewe fituk mi kkar och tiketik mi parepwech ika pwechepwech, 25ewe souasór epwe kensani ewe tiketik. Iwe, are a pwecheló öüchimwen lón ewe kiil, a pwal pwä pwe ewe kiil a alóllóletiw seni fän ewe ünüchchan; iwe, iei ew kilingaw mi paiking a pwüküwu me lón ewe kkar. Iwe, ewe souasór epwe atowu pwüngün ätewe pwe a nóm lón tettelin chón limengaw. Iei och kilingaw mi paiking. 26Nge are ewe souasór epwe kensani ewe kiil nge esap wor öüchimw mi pwech lón ewe tiketik, pwal are ewe kiil esap alóllóletiw seni fän ewe ünüchchan o a pwal fänemóómó; mwirin, ewe souasór epwe äimwüeló ätewe pwe epwe i chök lón ew leeni lón üküükün fisu rän. 27Iwe, lón ewe efisuen rän, ewe souasór epwe pwal kensanisäfäli ätewe. Iwe, are ewe kiil a tööfeil lón ünüchchan, ewe souasór epwe le atowu pwüngün ätewe pwe i a nóm lón tettelin chón limengaw. Iei och kilingaw mi paiking. 28Nge ika pwe ewe tiketik esap siiwil lapalapan o esap pwal tööfeil wón ünüchchan, nge a fen fänemóómó; iwe, iei och pwoo a fis seni ewe kkar. Iwe, ewe souasór epwe atowu pwüngün ätewe pwe a nóm lón tettelin chón limöch. Iei och chök kinas a fis seni ewe kkar.
29“Are a wor och kinas wón möküren ika ngächin emön mwän ika emön fefin, 30iwe, ewe souasór epwe kensani ewe kinas. Nge are epwe pwä pwe ewe kinas a alóllól seni fän ünüchchan o öüchimwen lón ewe kinas ra öleöl; iwe, ewe souasór epwe le atowu pwüngün ewe aramas pwe i a nóm lón tettelin chón limengaw. Iei och pwerik, och kilingawen wón mökür ika wón ngääch mi paiking. 31Nge are, lupwen ewe souasór epwe kensani ei sókkun kinas, nge lapalapan pwe esap alóllól seni fän ünüchchan o esap pwal wor öüchimw mi chól lón; mwirin, ewe souasór epwe äimwüeló ewe aramas mi üri ewe kiil pwe epwe i chök lón ew leeni lón üküükün fisu rän. 32Iwe, lón ewe efisuen rän, ewe souasór epwe pwal kensanisäfäli ewe kinas. Iwe, are ewe kinas esap tööfeil, esap pwal wor öüchimw mi öleöl lón o esap pwal pwä pwe a alóllóletiw seni fän ünüchchan, 33ewe aramas epwe räisö chiilón chök ewe kinikin ia mi kilingaw ie. Iwe, ewe souasór epwe äimwüeló ewe aramas pwe epwe i chök wón an lón ew leeni lón pwal üküükün fisu rän. 34Iwe, lón ewe efisuen rän, ewe souasór epwe pwal kensanisäfäli ewe kinas. Iwe, are esap tööfeil lón ünüchchan o a pwal pwä pwe esap alóllól seni fän ünüchchan, ewe souasór epwe atowu pwüngün ewe aramas pwe a nóm lón tettelin chón limöch. Iwe, ewe aramas epwe limeti üfan lón kólik o i epwe limöch. 35Nge are ewe kinas epwe tööfeil lón ünüchchan mwirin an a katoowu pwüngün pwe i a limöch, 36ewe souasór epwe pwal kensanisäfäli. Iwe, are ewe kinas a fen tööfeil lón ünüchchan, ewe souasór esap pwal osun an epwe nengeni are mi wor öüchimw mi öleöl, pün ewe aramas a limengaw. 37Nge are ewe souasór a meefi pwe ewe kinas esap siiwil, a pwal pwük öüchimw mi chól wón; iwe, ewe kinas a mó. Ewe aramas a limöch. Iwe, ewe souasór epwe le atowu pwüngün ewe aramas pwe a nóm lón tettelin chón limöch.
38“Iwe, lupwen a wor ekkóch tiketik mi pwech wón ünüchchen emön mwän ika emön fefin, 39ewe souasór epwe kensanir. Iwe, are ekkewe tiketik ra pwech nge fänengaw, iei och kilingaw esap efeiengaw a pwüküwu me wón ünüchchen ewe aramas. Iwe, ewe aramas a limöch.
40“Iwe, lupwen a mworoló meeten möküren emön mwän o a móngópaal, i a nóm lón tettelin chón limöch. 41Are a mworoló meeten möküran seni wón leten mesan o a chök paal möküran me wón leten mesan, ätewe a nóm lón tettelin chón limöch. 42Nge are a wor och kinas mi parepwech wón möküran we ika wón leten mesan we mi paal, iei och kiil mi paiking a pwüküwu me wón möküran ika wón leten mesan. 43Iwe, ewe souasór epwe kensani ätewe, nge are ewe kinas mi pwo wón möküran ika leten mesan a parepwech usun och kiil mi paiking, 44ewe mwän a kilingaw o a nóm lón tettelin chón limengaw. Iwe, ewe souasór epwe atowu pwüngün ätewe pwe i a nóm lón tettelin chón limengaw pwokiten ewe kinas wón möküran.
45“Ewe aramas mi üri ei sókkun kilingaw mi paiking epwe üföüf üüf mi kamw, epwe atórótóróngawa möküran, epwe pwölüweló ölüsan o kökkö, ‘Limengaw! Limengaw!’ 46Ätewe epwe chök nóm lón tettelin chón limengaw lón üküükün langattamen fansoun an üri ei kilingaw. I epwe älemönüló chök lón leenian, nge epwe fókkun nóm lükün ewe leeni ia aramas ra asóósó ie.
Minne epwe fis ngeni üüf mi üri mään mangaak
47“Iwe, are och üüf a limengaw ren an a üri mään mangaak, ese lifilifil ika ewe üüf a för seni ünöünen maan ika mi för seni silin irä, 48ese lifilifil ika och pisek mi tür ika föüföü seni silin irä ika ünöünen maan, och ünüchchen maan ika och mettóch mi för seni ünüchchen maan, 49nge ika ewe limengaw wón ewe üüf ika ünüchchen maan ika och pisek mi föüföü me tür ika och pisek mi för seni ünüchchen maan a aro önünfetil ika aro önüparapar, iei och mään mangaak mi meresfeil. Repwe fókkun eppi ngeni ewe souasór ei pisek. 50Iwe, ewe souasór epwe kensani ewe mään mangaak o epwe äimwüeló ewe pisek mi üri mään mangaak pwe epwe i chök wón an lón üküükün fisu rän. 51Iwe, lón ewe efisuen rän, ewe souasór epwe kensani säfäli ewe pisek. Nge are ewe niwangir a meresfeil wón ewe üüf ika wón och pisek mi föüföü ika tür ika för seni ünüchchen maan, ese lifilifil ika meet aean ewe pisek, a üri och mään mangaak epwe tongeni chööüló. Iwe, ewe pisek a limengaw. 52Mwirin, ewe souasór epwe kenaló ewe üüf ika ewe pisek mi föüföü ika tür seni ünöünen maan ika silin irä ika och pisek mi för seni ünüchchen maan a wor ewe limengaw wón, pwokiten ewe mään mangaak epwe chök chööüló. Ei pisek epwe keekkiló.
53“Nge are, lupwen ewe souasór epwe kensani ewe pisek, nge ewe mään mangaak esap meresfeil wón ewe üüf ika och pisek mi föüföü ika tür ika och pisek mi för seni ünüchchen maan, 54i epwe atowu an öllük pwe ewe pisek mi limengaw epwe limelim ren kólik. Mwirin, i epwe pwal äimwüeló ewe pisek lón pwal üküükün fisu rän. 55Mwirin än ewe pisek mi limengaw a limelim ren kólik, ewe souasór epwe pwal kensani ewe pisek. Iwe, inamwo are ewe mään mangaak esap meresfeil nge ika esap siiwil lapalapan, ewe pisek a limengaw. Epwe keekiló ren ekkei, ese lifilifil ika ewe mään mangaak a chök üri lón ika lükün. 56Are, lupwen ewe souasór epwe kensani ewe pisek, nge ewe mään mangaak a fänemóómó mwirin än ewe pisek a fen limelim ren kólik; iwe, ewe souasór epwe kamweeló ewe kinikin mi üri ewe mään mangaak me wón ewe üüf ika ewe pisek mi för seni ünüchchen maan ika och pisek mi föüföü ika tür. 57Nge are ewe mään mangaak epwe pwääsäfäl me wón ewe üüf ika wón och pisek mi föüföü ika tür ika wón och pisek mi för seni ünüchchen maan, ewe mään mangaak a pwal pwüküsäfäl. Iwe, ese lifilifil ika meet a üri mään mangaak epwe fókkun keekkiló ren ekkei. 58Echö üüf ika och pisek mi föüföü ika tür ika och pisek mi för seni ünüchchen maan a fen limelim ren kólik o ewe mään mangaak a móóló, epwe pwal limelimsäfäl ren kólik; mwirin, epwe limöch.”
59Ikkeei ekkewe öllük fäniten ekkewe limengawen mään mangaak mi üri kana üüf mi för seni ünöünen maan ika silin irä ika pisek mi föüföü ika tür ika och pisek mi för seni ünüchchen maan, fäniten an epwe katoowu pwüngür are ra nóm lón tettelin limöch ika limengaw.
Angangen limelim fäniten kilingaw
14Iwe, ewe SAMOL a apasa ngeni Moses, 2“Ikkeei ekkewe öllük fäniten ekkana aramas mi kütta ar repwe limelim seni ar kilingaw repwe föri pwüngün. Chókana mi chikar seni ar kilingaw repwe feitto ren ewe souasór. 3Iwe, ewe souasór epwe feilló o kensaniir lükün ewe leeni ia aramas ra asóósó ie. Are ewe souasór a küna pwe a mó seni ewe aramas an we kilingaw mi paiking, 4ewe souasór epwe föri och angangen limelim o öllük pwe repwe uweato rüömön maansüüsü mi manaw o limöch me ömwüch seni ewe irä itan sedar pwal suwain mi parapar me ülün ewe irä itan hisop fäniten ewe emön epwe limelim. 5Mwirin, ewe souasór epwe öllük ngenir pwe emön me leiin ekkewe maansüüsü epwe niniiló me asen ew sepi mi för seni pwül nge mi löölö kólik mi mwirinnö lón. 6Nge i epwe angei ewe emön maansüüsü mi manaw o otüüwfengenirelong me ewe mwüüch seni ewe irä itan sedar me ewe suwain mi parapar me ewe irä itan hisop lón chaan ewe maansüüsü mi ninniiló me asen ewe kólik mi mwirinnö. 7Iwe, i epwe äsupwätä ewe chcha fän fisuw wón ewe aramas epwe limelim seni an kilingaw mi paiking o epwe atowu pwüngün pwe ewe aramas a nóm lón tettelin chón limöch. Mwirin, i epwe ässaló ewe maansüüsü mi manaw lón ewe mälämäl mi amassawa.
8“Iwe, ewe aramas mi limöch epwe limeti üfan ren kólik, epwe räisööló öüchimwen wón inisin meinisin o tüütü lón kólik. Mwirin, i epwe le nóm lón tettelin chón limöch. Mwirin ei, i a tongeni tolong lón ewe leeni ia aramas ra asóósó ie, nge epwe chök nóm lükün imwan imw mangaku lón üküükün fisu rän. 9Iwe, lón ewe efisuen rän, ewe aramas epwe räisööló öüchimwan meinisin, wewen, epwe fókkun räisööló meeten möküran, ölüsan, fötün me pwal lussun öüchimwen inisin meinisin. Iwe, epwe fókkun limeti üfan o atüütüw inisin ren kólik. Iwe, i epwe nóm lón tettelin chón limöch.
10“Nge lón ewe awalüwen rän ewe aramas mi chikar seni an kilingaw epwe uweato rüömön ätemwänin laam me emön liäfefinin laam ew ierir, emön me emön leiir esap wor terin fiti ülüngät naengolun ew efa -ika limu kuóche- pilawa mi amas o mwirinnö mi nofit fengen me apüra, pwal ew lóók -ika ülüngät nalimuen ew paint- apüra mi för seni föün olif fäniten ew asóren mwöngö. 11Iwe, ewe souasór mi atowu pwüngün ewe aramas pwe a nóm lón tettelin chón limöch epwe emmwenato ewe aramas epwe limelim fengen me an asór fän mesen ewe SAMOL lón ewe leeni ren ewe leenien tolong ngeni ewe Imw Mangaku Leenien Chufengen.
12“Mwirin, ewe souasór epwe angei emön ekkewe ätemwänin laam fiti fengen me ewe ew lóók - ika ülüngät nalimuen ew paint- apüra mi för seni föün olif, o epwe äänir asór pwe ew asóren liwinin pinasen tipis, i epwe sapeeretä fän mesen ewe SAMOL pwe ew asóren asóp. 13I epwe wiisen posuw chioren ewe laam me lón ewe leeni ia ewe mönün asóren limelimen tipis me ewe mönün asóren keek ra ninniiló me ie. Ewe mönün asóren liwinin pinasen tipis epwe usun chök ewe mönün asóren limelimen tipis, pün iei wiisen ewe souasór. Ei mönün asór a fókkun pin. 14Iwe, ewe souasór epwe angei och chaan ewe mönün asóren liwinin pinasen tipis o epwe tóófätä wón emin fän peliifichin selingen ewe aramas epwe limelim, pwal wón öütülapen pöüifichin me wón öütülapen peliifichin pachapachan 15Mwirin, ewe souasór epwe angei och ewe apüra o niinalong lón pöüimööngün pwisin pöün. 16Iwe, epwe ottukalong ewe öütütiit me wón pöüiifichin lón ewe apüra mi nóm lón pöünimööngün. Iwe, epwe äsupwu fän fisu och ewe apüra mi nóm wón ächefen pöün we me fän mesen ewe SAMOL. 17Iwe, ewe souasór epwe angei och ewe apüra mi chüen nóm lón pöün o tóófi ngeni emin fän peliifichin selingen ewe aramas epwe limelim, pwal wón öütülapen pöüiifichin me wón öütülapen peliifichin pachapachan. Epwe tóófätä ewe apüra wón chök pwal eweia a tóófätä ie chaan ewe mönün asóren liwinin pinasen tipis. 18Nge ewe lussun apüra mi chüen nóm lón pöün ewe souasór, epwe tóófätä wón möküren ewe aramas epwe limelim o epwe föri ewe angangen elimelimen tipis fänitan me fän mesen ewe SAMOL.
19“Mwirin, ewe souasór epwe wiisen ääni ewe asóren limelimen tipis o föri asóren omwusomwusen tipis fäniten ewe aramas mi chikar seni an kilingaw. Mwirin ena, ewe souasór epwe posuw chioren ewe mönün asóren keek. 20Iwe, ewe souasór epwe ääni ewe asór wón ewe róngen asóren keek fiti fengen me ewe asóren mwöngö o föri asóren omwusomwusen tipis fäniten ewe aramas. Iwe, ewe aramas epwe nóm lón tettelin chón limöch.
21“Nge ika ewe aramas a mweleele o esap naf ngeni an epwe ääni asór ekkeei mettóch; iwe, i epwe fókkun angei emön ätemwänin laam pwe ew asóren liwinin pinasen tipis pwe epwe sapaatä pün epwe föri asóren omwusomwusen tipis fänitan, fiti fengen me ew naengolun ew efa - ika ruu kuóche- pilawa mi amas o mwirinnö mi nofit fengen me apüra mi för seni föün olif pwe ew asóren mwöngö me pwal ew lóók - ika ülüngät nalimuen ew paint apüra mi för seni föün olif. 22Epwe pwal uweato rüömön lisóóm ika rüömön appansüünsün mwürö, minne i a tongeni naf ngeni. Emön fäniten ew asóren limelimen tipis nge ewe pwal emön fäniten ew asóren keek.
23“Iwe, lón ewe awalüwen rän, ewe aramas epwe uweato ekkeei mönün asór fäniten an limelim ren ewe souasór ren ewe leenien tolong ngeni ewe Imw Mangaku Leenien Chufengen fän mesen ewe SAMOL. 24Iwe, ewe souasór epwe angei ewe laam fäniten ewe asóren liwinin pinasen tipis fiti fengen me ewe lóók (ika ülüngät nalimuen ew paint) apüra mi för seni föün olif. Iwe, epwe sapeeretä me fän mesen ewe SAMOL pwe ew asóren asóp. 25Mwirin, ewe souasór epwe posuw chioren ewe laam fäniten ewe asóren liwinin pinasen tipis. Iwe, epwe angei och chaan ewe mönün asór o tóófätä ngeni emin fän peliifichin selingen ewe aramas epwe limelim. Epwe pwal tóófätä wón öütülapen pöüifichin me wón öütülapen peliifichin pachapachan. 26Iwe, ewe souasór epwe niinalong och ewe apüra lón pöüimööngün. 27Iwe, epwe aea öütütiitin pöüiifichin le äsupwu fän fisu och ewe apüra mi nóm lón pöüimööngün me fän mesen ewe SAMOL. 28Iwe, epwe pwal tóófätä och ewe apüra mi nóm lón pöün ngeni ekkewe chök pwal kinikin ia a tóófätä ie chaan ewe mönün asóren liwinin pinasen tipis. Epwe tóófätä ewe apüra wón emin fän peliifichin selingen ewe aramas epwe limelim, wón öütülapen pöüifichin me wón öütülapen pelifichin pachapachan. 29Nge ewe lussun apüra mi chüen nóm lón pöüimööngün ewe souasór, i epwe tóófätä wón möküren ewe aramas epwe limelim, pwe epwe föri asóren omwusomwusen tipis fänitan me fän mesen ewe SAMOL. 30Mwirin, i epwe ääni asór ekkewe lisóóm ika ekkewe appansüünsün mwürö, minne ewe aramas a tongeni an epwe naf ngeni. 31Iwe, epwe ääni asór emön fäniten ew asóren limelimen tipis nge ewe pwal emön fäniten ew asóren keek, fiti fengen me ewe asóren mwöngö. Ren ei lapalap, ewe souasór epwe föri asóren omwusomwusen tipis me fän mesen ewe SAMOL fänäsengesin ewe aramas epwe limelim.”
32Ikkeei ekkewe öllük fäniten emön aramas mi üri kilingaw mi paiking nge esap naf ngeni an epwe uweato ekkewe sókkun asór fäniten an epwe limelim.
Minne epwe fis ngeni imw mi limengaw ren luumw
33Mwirin, ewe SAMOL a apasa ngeni Moses me Aaron, 34“Lupwen öüpwe tolong lón ewe fönü Kanaan ngang üpwe ngeni kemi pwe fönüemi, a tongeni tüfich pwe ngang üpwe atöötä luumw pwe epwe tööfeil lón ekkóch imwemi kewe. 35Iwe, ewe aramas minne imwan ewe epwe fókkun feilló o üreni ewe souasór, ‘Ngang üwa küna och mettóch usun lapalapen luumw me lón imwei we.’ 36Iwe, ewe souasór epwe atowu an öllük pwe ewe imw epwe pöön me mwen an epwe feilló o kensani ewe luumw, pwe esap wor och mettóch me lón ewe imw epwe köpwüngüló pwe a nóm lón tettelin limengaw. Mwirin ei, ewe souasór epwe tolong o cheki lón ewe imw. 37Ewe souasór epwe kensani ewe luumw mi nóm wón ekkewe etiip, nge ika a wor pwokur wón ekkewe etiip mi önünfetil ika önüpar ra alóllónetiw seni winiórun ewe etiip, 38iwe, ewe souasór epwe towu me lón asamen ewe imw o esipaló ewe imw lón üküükün fisu rän. 39Iwe, lón ewe efisuen rän, ewe souasór epwe liwinsäfäl pwe epwe cheki ewe imw. Ika ewe luumw a tööfeil wón ekkewe etiip, 40iwe, ewe souasór epwe öllük pwe ekkewe faaw mi töökir ewe luumw repwe kämwetewu o koturuló lón ew leeni mi limengaw lükün ewe telinimw. 41I epwe pwal öllük pwe meinisin ekkewe etiipen lón ewe imw repwe körö. Nge minne ra karöötiw repwe koturulong lón ew leeni mi limengaw lükün ewe telinimw. 42Mwirin, repwe angei pwal ekkóch faaw o ekkesiwilirelong lón leenien ekkewe mi kämwetewu. Iwe, repwe angei pwülüpar mi fö o ommwotowu ngeni ewe imw.
43“Nge are ewe luumw a pwal pwääsäfäl me lón ewe imw mwirin än ekkewe faaw ra fen kämwetewu o ewe imw a fen körö o ommwotow, 44ewe souasór epwe feilló o kensani ewe luumw. Iwe, are ewe luumw a tööfeil lón ewe imw, iei och luumw mi efisätä än mettóch epwe taaló. Ewe imw a nóm lón tettelin limengaw. 45Ewe imw epwe fókkun kataatiw - föün, mwüchün me meinisin ommwotowun. Iwe, repwe kääpiwu ngeni ewe leeni mi limengaw lükün ewe telinimw.
46“Ese lifilifil ika iö a tolong lón ewe imw lupwen a kesipeló epwe nóm lón tettelin chón limengaw tori lekuniól. 47Ese lifilifil ika iö e möür ika mwöngö lón ewe imw, epwe limeti üfan ren kólik.
48“Nge are ewe souasór a feitto pwe epwe kensani ewe luumw nge ewe luumw esap tööfeil mwirin an a fen wes ewe imw le ommwotow, i epwe atowu pwüngün ewe imw pwe a nóm lón tettelin limöch pwokiten ewe luumw a móóló. 49Iwe, i epwe angei rüömön maansüüsü me ekkóch mwüüch seni ewe irä itan sedar, pwal suwain mi par me ewe irä itan hisop. 50Iwe, i epwe nii emön me leiin ekkewe maansüüsü me asen ewe kólik mi nóm lón ew sepi mi för seni pwül. 51Mwirin, i epwe angei ekkewe mwüüch seni ewe irä itan sedar me ewe irä itan hisop pwal ewe suwain mi par me ewe maansüüsü mi manaw; iwe, i epwe ötüürolong lón chaan ewe maansüüsü mi ninniiló me asen ewe kólik mi mwirinnö. Iwe, epwe äsupwu ewe chcha ngeni ewe imw fän fisu. 52Mwirin än ewe souasór limeti ewe imw lón ei sókkun lapalap, 53epwe ässaló ewe maansüüsü mi manaw lón ewe mälämäl mi amassawa lükün ewe telinimw. Ren ei lapalap i epwe föri asóren omwusomwusen tipis fäniten ewe imw. Iwe, ewe imw epwe nóm lón tettelin limöch.”
54Ikkeei ekkewe öllük fäniten och kilingaw mi paiking, fäniten och kinas, 55fäniten mään mangaak wón üüf ika luumw lón imw, 56pwal fäniten och pwoo ika och kiil ika och tiketik mi pwechepwech. 57Ikkeei ekkewe kapasen öüröür repwe fiti lupwen repwe filätä fäniten och kilingaw mi paiking ika mään mangaak lupwen och mettóch a nóm lón tettelin limöch ika limengaw.
Chönü mi pwuu seni inisin aramas
15 Iwe, ewe SAMOL a apasa ngeni Moses me Aaron, 2“Öüpwe kapas ngeni ekkewe chón Israel o apasa ngeniir: ‘Lupwen och chönü a pwuu seni inisin emön mwän, ewe chönü a limengaw. 3Ese lifilifil ika ewe chönü mi chök sópwósópwóló le pwüü seni inisin ika a eppeti an esap pwu, ewe chönü a föri pwe ätewe epwe limengaw. Iei usun än ewe chönü mi pwuu seni ätewe epwe efisätä limengaw:
4“ ‘Iteiten peet ewe mwän mi pwuu seni och chönü a kóón wón epwe limengaw, pwal iteiten mettóch i a móót wón epwe limengaw. 5Ese lifilifil ika iö mi attapa kien ätewe epwe sopwuni üfan o epwe tüütü lón kólik. Iwe, i epwe limengaw tori lekuniól. 6Ese lifilifil ika iö a móót wón och mettóch ewe mwän mi pwuu seni och chönü a móót wón epwe fókkun sopwuni üfan o tüütü lón kólik. Iwe, i epwe limengaw tori lekuniól.
7“ ‘Ese lifilifil ika iö a attapa emön mwän mi pwuu seni och chönü epwe fókkun limeti üfan o epwe tüütü lón kólik. Iwe, epwe limengaw tori lekuniól.
8“ ‘Are emön mwän mi pwuu seni och chönü a attufetä wón emön aramas mi limöch, ena aramas epwe fókkun limeti üfan o epwe tüütü lón kólik. Iwe, i epwe limengaw tori lekuniól.
9“ ‘Iteiten mettóch ewe mwän mi pwuu seni och chönü a móót wón lupwen an waawa emön maan epwe limengaw. 10Nge iö a attapa och me leiin ekkewe mettóch mi nóm fän ätewe mi pwuu seni och chönü epwe limengaw tori lekuniól. Nge iö a ekii ekkana mettóch epwe fókkun limeti üfan o tüütü lón kólik. Iwe, i epwe limengaw tori lekuniól.
11“ ‘Are ewe mwän mi pwuu seni och chönü a attapa emön aramas nge esap mwo tölü pöün lón kólik, ewe aramas epwe fókkun limeti üfan o tüütü lón kólik. Iwe, i epwe limengaw tori lekuniól.
12“ ‘Pwal are ätewe mi pwuu seni och chönü a attapa ew sepi mi för seni pwül, ewe sepi epwe ömmök. Nge ika e attapa och sepi mi för seni mwüüch, ewe sepi epwe chök chiichi ngeni kólik.
13“ ‘Lupwen emön mwän a limöch ren an a ükütiw le pwuu seni ewe chönü; iwe, i epwe eiteita üküükün fisu rän fäniten an angangen limelim. Mwirin, epwe fókkun limeti üfan o atüütüw inisin ren kólik mi mwirinnö. Iwe, i epwe limöch 14Iwe, lón ewe awalüen rän, ätewe epwe wiisen uweato rüömön lisóóm ika rüömön appansüünsün mwürö o epwe feitto fän mesen ewe SAMOL ren ewe leenien tolong ngeni ewe Imw Mangaku Leenien Chufengen. Iwe, epwe ngeni ewe souasór ekkewe lisóóm. 15Iwe, ewe souasór epwe äänir asór, ewe emön fäniten ew asóren limelimen tipis, nge ewe pwal emön fäniten ew asóren keek. Lón ei lapalap, ewe souasór epwe föri asóren omwusomwusen tipis me fän mesen ewe SAMOL fäniten ewe mwän pwokiten an pwuu seni och chönü.
16“ ‘Lupwen ewe chaan mwän a toowu seni emön mwän, ätei epwe atüütüw unusen inisin ren kólik. Iwe, i epwe limengaw tori lekuniól. 17Ese lifilifil ika menni üüf ika pisek mi för seni ünüchchen maan a tupw lón ewe chaan mwän, ewe pisek epwe fókkun limelim lón kólik. Iwe, epwe limengaw tori lekuniól. 18Lupwen emön mwän a kóón ren emön fefin o ewe chaan mwän a toowu, iir me rüömön repwe fókkun tüütü lón kólik. Iwe, repwe limengaw tori lekuniól.
19“ ‘Iwe, lupwen a tori emön fefin äwenewenen an fansoun epwe pwuu seni chcha, limengawen an fansoun semmwenin maram epwe fis lón üküükün fisu rän. Iwe, ese lifilifil ika iö a attapa neminnewe epwe limengaw tori lekuniól.
20“ ‘Ese lifilifil ika meet mettóch neminnewe a kóón wón lupwen an we semmwenin maram epwe limengaw. Ese pwal lifilifil ika meet i a móót wón epwe pwal limengaw. 21Ese lifilifil ika iö a attapa kien neminnewe peet epwe fókkun limeti üfan o tüütü lón kólik. Iwe, i epwe limengaw tori lekuniól. 22Ese lifilifil ika iö a attapa och mettóch neminnewe a móót wón, epwe fókkun limeti üfan o tüütü lón kólik. Iwe, i epwe limengaw tori lekuniól. 23Lupwen emön a attapa och mettóch neminnewe a móót wón, ese lifilifil ika peet ika och mettóch, i epwe limengaw tori lekuniól.
24“ ‘Are emön mwän a kóón ren emön fefin, nge limengawen an semmwenin maram a meenitä wón ätewe, ätewe epwe limengaw lón üküükün fisu rän. Nge ewe peet ätewe a kóón wón epwe pwal limengaw.
25“ ‘Lupwen a pwuu chcha seni emön fefin lón chómmóng rän lón ew fansoun me lükün an we fansoun semmwenin maram, ika a pwal sópweló le pwuu seni chcha pün a luuló seni öüküükün fansoun an semmwenin maram, neminnewe epwe limengaw lón üküükün langattamen fansoun an pwuu seni chcha, usun chök lón ekkewe ränin an semmwenin maram. 26Ese lifilifil ika menni peet neminnewe a kóón wón lupwen an sópwósópwóló le pwuu seni chcha epwe limengaw, usun chök ewe peet a kóón wón lupwen an semmwenin maram. Ese lifilifil ika meet mettóch neminnewe a móót wón epwe limengaw, usun chök lupwen an semmwenin maram. 27Ese lifilifil ika iö a attapa ekkeei mettóch epwe limengaw. I epwe soopwuni üfan o tüütü lón kólik. Iwe, i epwe limengaw tori lekuniól.
28“ ‘Iwe, lupwen neminnewe a limöch pün a ükütiw le pwuu seni chcha, i epwe witiwit lón üküükün fisu rän. Iwe, mwirin ena fansoun, neminnewe epwe nóm lón tettelin chón limöch. 29Nge lón ewe awalüen rän neminnewe epwe angei rüömön lisóóm ika rüömön appansüünsün mwürö. Iwe, epwe uweireto ren ewe souasór ren ewe leenien tolong ngeni ewe Imw Mangaku Leenien Chufengen. 30Iwe, ewe souasór epwe äänir asór, emön fäniten asóren limelimen tipis nge ewe pwal emön fäniten asóren keek. Ren ei lapalap, ewe souasór epwe föri asóren omwusomwusen tipis fäniten neminnewe me fän mesen ewe SAMOL ren limengawen an pwuu seni chcha.
31“ ‘Öüpwe fókkun tümwünü ekkewe chón Israel ar repwe imwuuló seni ekkewe mettóch mi efisätä ar repwe limengaw pwe rete mäló lón ar limengaw fäniten ar elimengawa ewe leeni ia üwa nóm ie mi nóm leiir.’ ”
32Ikkeei ekkewe öllük fäniten emön mwän mi pwuu seni och chönü pwal fäniten ese lifilifil iö mi limengaw ren ewe chaan mwän, 33pwal fäniten emön fefin lón an fansoun semmwenin maram, fäniten emön mwän ika emön fefin mi pwuu seni och chönü, pwal fäniten emön mwän mi kóón ren emön fefin mi nóm lón tettelin chón limengaw.
Ewe ränin elimelimen tipis(Lev. 23:26-32; Numbers 29:7-11)
16 Iwe, ewe SAMOL a kapas ngeni Moses mwirin määlón nöün Aaron kewe rüömön mwän ra maló lupwen ra keni och ekkei mi sókkóló seni minne ewe SAMOL a öllük. 2Iwe, ewe SAMOL a apasa ngeni Moses: “Kopwe üreni Aaron pwiimw we pwe esap tolong ineet chök i a mochen lón ewe Leeni mi Unusen Pin peekilongen ewe refiref mangaku mwen ewe pwölüpwölün omwusomwusen tipis mi nóm wón ewe pwórofel, pün ika epwe föri ina usun; iwe, epwe mäló, pwokiten ngang üwa pwä lón ewe kuchu me asen ewe pwölüpwölun omwusomwusen tipis.
3“Lupwen Aaron epwe tolong lón ewe kinikinin leeni mi pin, epwe fókkun föri pwüngün ekkeei öüröür. Akkomwan, epwe uweato emön liäliffön ätemwänin kowu fäniten ew asóren limelimen tipis me emön ätemwänin siip fäniten ew asóren keek. 4Mwirin, epwe atüütüw unusen inisin. Iwe, epwe üföüf ewe pinu mi pin, iei ewe üföüfen lón mi pwech o fókkun langattam, epwe pwal aea ewe rausesin lón mi pwechepwech mi sooso ngeni inisin. Iwe, epwe fööti ngeni lükalapan ewe ökkönük mi pwechepwech o imweim ewe äfäichimw mi pwechepwech. Ikkeei ekkewe üüf mi pin. 5Iwe, ewe mwiichen aramasen Israel repwe uweato ren rüömön ätemwänin kuuch fäniten ew asóren limelimen tipis pwal emön ätemwänin siip fäniten ew asóren keek.
6“Iwe, Aaron epwe ääni asór ewe ätemwänin kowu fäniten pwisin an asóren limelimen tipis pün epwe föri elimelimen tipis pwisin fänitan me fäniten chón leimwan. 7Mwirin, i epwe uwato ekkewe rüömön ätemwänin kuuch o äänir asór ngeni ewe SAMOL me lón ewe leenien tolong ngeni ewe Imw Mangaku Leenien Chufengen. 8Iwe, Aaron epwe üttüüt wón ekkewe rüömön kuuch an epwe filätä ika menni leiir epwe ääni asór ngeni ewe SAMOL nge menni epwe fäniten azazel epwe wiisen mwärei itengaw. 9Iwe, Aaron epwe uweato ewe kuuch a weneiti ewe üttüüt pwe ina i ewe kuuch epwe ääni asór ngeni ewe SAMOL o epwe ääni asór ei kuuch fäniten ew asóren limelimen tipis. 10Nge ewe emön kuuch mi weneiti ewe üttüüt pwe ina i ewe emön epwe wiisen mwärei itengaw, i epwe uweato fän mesen ewe SAMOL nge mi manaw pwe epwe nöünöü le föri omwusomwusen tipis ren an epwe tiinaló ei kuuch lón ewe fönüpöön pwe epwe omwusomwusen tipis fäniten ekkewe aramas.
11“Aaron epwe emmwenato ewe liäliffön ätemwänin kowu pwe ew asóren limelimen tipis pwisin fänitan me fäniten chón an famili. Mwirin, Aaron epwe posuw chioren ei ätemwänin kowu fäniten ewe asóren limelimen an tipis. 12Iwe, epwe angei ewe leenien asóren ötüöt o amasowa ren mwolien ekkei mi kü seni ewe róngen asór mi nóm fän mesen ewe SAMOL, epwe pwal tukeei rüokumwuch ewe appach mi pwokkus o katakkisitiw. Iwe, epwe uweelong ewe leenien asóren ötüöt me ewe appach mi pwokkus peekilongen ewe refiref mangaku. 13Mwirin, i epwe isenätä ewe appach mi pwokkus wón ewe ekkei me fän mesen ewe SAMOL. Iwe, ötüötün ewe appach mi pwokkus epwe ötütä wón ewe pwölüpwölün omwusomwusen tipis mi nóm asen ewe pisekin Pwärätä. Are epwe föri pwüngün ekkeei öüröür, iwe, esap mäló. 14Mwirin, i epwe angei och chaan ewe ätemwänin kowu o epwe aea efóch ächefen pöün le äsupwätä ewe chcha ngeni fän mesen ewe pwölüpwölün omwusomwusen tipis me peliöötiwan. Mwirin, i epwe pwal aea efóch ächefen pöün le äsupwu och ewe chcha fän fisu ngeni mwen ewe Pwórofel.
15“Mwirin, Aaron epwe pwal posuw chioren ewe kuuch fäniten ewe asóren limelimen tipis fänäsengesin ekkewe aramas o epwe uwealong chaan ewe mönün asór peekilongen ewe refiref mangaku. Me ikenan, i epwe äsupwu ewe chcha ngeni wón ewe pwölüpwölün omwusomwusen tipis pwal ngeni mwen ewe Pwórofel, usun chök minne a föri ngeni chaan ewe ätemwänin kowu. 16Lón ei lapalap, i epwe föri asóren omwusomwusen tipis fäniten ewe Leeni mi Unusen Pin pwokiten limengawen tipisin me üleförean ekkewe chón Israel ren ese lifilifil meet ar kewe tipis. I epwe pwal föri ei chök lapalap fäniten ewe Imw Mangaku Leenien Chufengen mi nóm leiir. 17Esap wor pwal emön epwe mwüümwütä ngeni an epwe nóm lón ewe Imw Mangaku Leenien Chufengen lupwen Aaron epwe tolong pwe epwe föri ewe angangen omwusomwusen tipis fäniten ewe Leeni mi Unusen Pin. Esap wor emön epwe tolong tori än Aaron epwe toowu säfäl mwirin an föri ewe angangen omwusomwusen tipis pwisin fänitan me fäniten chón an famili me fäniten unusen ewe mwiichen aramasen Israel.
18“Mwirin, Aaron epwe toowu ren ewe róngen asór mi nóm fän mesen ewe SAMOL o föri ewe angangen elimelimen tipis fäniten ewe róóng. I epwe angei och chaan ewe ätemwänin kowu me och chaan ewe kuuch o epwe tóófätä wón meinisin ekkewe mächään ewe róngen asór mi kenitä usun mächään maan. 19Iwe, i epwe pwal aea efóch ächefen pöün le äsupwu och ewe chcha fän fisu ngeni wón ewe róngen asór. Lón ei lapalap, i epwe limeti ewe róngen asór seni än ekkewe chón Israel limengaw o eliwinisäfäli an pin usun me mwan.
20“Lupwen Aaron a wes le föri ewe angangen elimelimen tipis fäniten ewe Leeni mi Unusen Pin me ewe Imw Mangaku Leenien Chufengen me ewe róngen asór; iwe, i epwe uweato ewe kuuch mi manaw. 21Iwe, i epwe isenätä pöün me rüöfóch wón möküren ewe kuuch mi manaw o epwe pwärätä wón meinisin föfför ingawen me üleförean ekkewe chón Israel. Lón ei lapalap, i epwe isenätä meinisin ar tipis wón möküren ewe kuuch. Mwirin, i epwe tiinaló ewe kuuch lón ewe fönüpöön fän emmwenien emön mwän mi kefilitä fäniten ei angang. 22Mwirin än ewe mwän epwe epichaló ewe kuuch lón ewe fönüpöön, iwe, ewe kuuch epwe mwärei wón inisin än ekkewe aramas tipis meinisin ngeni ew fönü mi imwuuló o pöön ia esap tongeni epwe liwinsäfäl me ie.
23“Lupwen Aaron epwe tolong lón ewe Imw Mangaku Leenien Chufengen, epwe pwilitätiw ekkewe üüf mi pwech i a üföüf lupwen a tolong lón ewe Leeni mi Unusen Pin. Iwe, epwe chök likitätiw ekkewe üüf ikenan. 24Mwirin, i epwe atüütüw unusen inisin ren kólik me lón ew leeni mi pin o üföüfolong üfan üföüfen lón rän me rän. Mwirin, i epwe toowu o ääni asór ewe asóren keek pwisin fänitan me ewe asóren keek fäniten ekkewe aramas. Lón ei lapalap, i epwe föri angangen elimelimen tipis pwisin fänitan me fäniten ekkewe aramas. 25Iwe, i epwe pwal kenaló meinisin kirissin ewe mönün asóren limelimen tipis wón ewe róngen asór.
26“Nge ewe mwän mi kefilitä pwe epwe wiisen emmwenawu ewe kuuch lón ewe fönüpöön pwe epwe mwäreeló tipisin ekkewe aramas, epwe soppwuni üfan o atüütüw unusen inisin lón kólik. Mwirin, a tongeni tolong lón ewe leeni ia aramas ra asóósó ie. 27Iwe, repwe uwealó ünüchchen me fituken me affen ewe ätemwänin kowu me ewe kuuch lükün ewe leeni ia aramas ra asóósó ie o repwe kenireló. Ikkeiir ekkewe mönün asóren limelimen tipis minne chaar ewe Aaron a uwealong lón ewe Leeni mi Unusen Pin pwe epwe föri ewe angangen elimelimen tipis ren. 28Ewe mwän mi wiisen keniir epwe soppwuni üfan o atüütüw inisin lón kólik. Mwirin, i a tongeni tolong lón ewe leeni ia aramas ra asóósó ie.
29“Lón ewe äengolun ränin ewe efisuwen maram, öüpwe ääni unusen ei rän le öchüün, öüsap pwal föri och angang. Epwe iei ew öllük fänitemi epwe nóm fóchófóch. Ei öllük epwe weneiti chókana iir chón Israel seni ar upwutiw pwal ekkana chón ekis mi nóm leiimi. 30Lón ei rän, epwe fis angangen asóren elimelimen tipis fänitemi. Mwirin, öüpwe limöch me fän mesen ewe SAMOL seni ämi kewe tipis meinisin. 31Epwe iei ew ränin Sabbat ränin asöösö mi öüchea fänitemi. Iwe, öüpwe öchüün lón ei rän. Iei ew öllük epwe nóm fóchófóch fänitemi. 32Lón ekkewe pilóón aramas repwe feitto me mwirin, ewe souasór mi kepit o angei an epinipin pwe epwe tolong lón leenien an we leewo Aaron pwe i epwe souasór mi lap, epwe föri ewe asóren elimelimen tipis. I epwe üföüf ekkewe üüf mi pin o pwechepwech, 33o i epwe föri ewe asóren elimelimen tipis fäniten ewe Leeni mi Unusen Pin, fäniten ewe Imw Mangaku Leenien Chufengen me fäniten ewe róngen asór, pwal fäniten ekkewe souasór me ekkewe mwiicheichen aramas meinisin.
34“Iei ew öllük fänitemi epwe nóm fóchófóch pwe epwe fis asóren elimelimen tipis fäniten ekkewe chón Israel fän ew lón ew ier.”
Iwe, Moses a föri ekkeei öüröür meinisin ewe SAMOL a ngeni.
Esap mwüümwütä ochooch chcha
17Mwirin, ewe SAMOL a apasa ngeni Moses, 2“Kopwe kapas ngeni Aaron me nöün kewe mwän pwal ngeni ekkewe chón Israel meinisin o kopwe apasa ngeniir: ‘Iei meet ewe SAMOL a ääni öllük: 3Are emön chón Israel a ääni asór emön ätemwänin kowu ika emön laam ika emön kuuch me lón ika me lükün ewe leeni ia aramas ra asóósó ie, 4nge esap uweato an we mönün asór ren ewe leenien tolong ngeni ewe Imw Mangaku Leenien Chufengen pwe epwe fangaló pwe an asór ngeni ewe SAMOL me mwen ewe imw mangaku mi pin imwen ewe SAMOL, ewe aramas epwe le nóm lón tettelin tipisin össükü chcha. Ei aramas a össükü chcha; iwe, epwe fókkun katoowu seni leiin tettelin aramasan. 5Ei öllük epwe öükü seni ekkewe chón Israel ar repwe ääni asór ekkewe maan lón ekkewe mälämäl mi amassawa. Ei öllük epwe föri pwe repwe fókkun uweato ar kewe mönün asór ren ewe souasór lón ewe leenien tolong ngeni ewe Imw Mangaku Leenien Chufengen pwe ewe souasór epwe ääniir asór ngeni ewe SAMOL pwe asóren kinamwe. 6Ren ei lapalap, ewe souasór epwe tongeni äsupwu chaan ewe mönün asór o keni ewe kiriis wón än ewe SAMOL we róngen asór mi nóm lón ewe leenien tolong ngeni ewe Imw Mangaku Leenien Chufengen. Iwe, epwe iei ew asór ewe SAMOL epwe pwapwa ren. 7Iwe, ekkewe aramas resap chüen kirikiringaw ngeni ewe SAMOL le ääni och leiin ar kewe asór ngeni ekkewe önümwäl uluulun ätemwänin kuuch. Iei ew öllük fäniter epwe nóm fóchófóch o repwe föri pwüngün seni ew pilóón aramas tori pwaal ew.’
8“Kopwe pwal apasa ngeniir: ‘Iteiten emön me emön chón Israel ika emön chón ekis mi nóm leiir epwe ääni ew asóren keek ika och sókkun asór, 9nge esap uweato an we asór lón ewe leeni ren ewe leenien tolong ngeni ewe Imw Mangaku Leenien Chufengen pwe epwe ääni an asór ngeni ewe SAMOL, ena aramas epwe fókkun katoowu seni leiin ewe mwiichen aramas.
10“ ‘Iteiten emön me emön chón Israel ika emön chón ekis mi nóm leiir epwe ochooch chcha, ngang üpwe kulluw wón mesei pwe üpwe üüngeni ena aramas mi wün chcha o üpwe atoowu i seni leiin ewe mwiichen aramas. 11Pün manawen emön mönümanaw a nóm lón chaan. Ngang üwa ngeni kemi ewe chcha pwe öüpwe föri ewe asóren omwusomwusen tipis fäniten ämi tipis. Iei ewe chcha mi esissilätä manaw a uwato ämi omwusomwusen tipis. 12Iei minne, ngang üwa apasa ngeni ekkewe chón Israel, ‘Ämi me ekkewe chón ekis mi nóm leiimi öüsaap fókkun ochooch chcha.’
13“ ‘Iwe, ei öllük a weneiti ekkewe chón Israel me ekkewe chón ekis mi nónnóm leiimi. Are öüpwe feilló küüt ochäämi maan nge öüwa liäpeni emön maan ika machchang mi mwüümwütä ämi öüpwe ochooch, öüpwe fókkun okusawu ewe chcha o pwölüweló ngeni pwül. 14Pün manawen iteiten mönümanaw a nóm lón ewe chcha. Ina popun ngang üwa apasa ngeni ekkewe chón Israel pwe resap fókkun ochooch ewe chcha, pün manawen emön machchang ika emön maan a nóm lón ewe chcha. Iei minne, ese lifilifil ika iö a ochooch chcha epwe katoowu seni leiin ewe mwiichen aramas.
15“ ‘Iwe, pwal ei ew öllük a weneiti ekkewe chón Israel me ekkewe chón ekis mi nónnóm leiimi. Are öüpwe ochooch fituken emön maan mi mä ren pwisin an mäló ika a mäló ren än maanmwacho ra nii, öüpwe soppwuni üfemi o atüütüw inisimi ren kólik. Mwirin, öüpwe nóm lón tettelin chón limengaw tori lekuniól. Mwirin, öüpwap nóm lón tettelin chón limöch. 16Nge are öüsap soppwuni üfemi o atüütüw inisimi lón kólik; iwe, öüpwe mwärelong fän liwinin ämi pwürätiw öllük.’ ”
Esap mwüümwütä ekkewe sókkun föfförün lisowu
18Mwirin, ewe SAMOL a apasa ngeni Moses, 2“Kopwe kapas ngeni ekkewe chón Israel o üreniir: ‘Ngang ewe SAMOL ämi we Kot. 3Iei minne, öüsap fókkun föri usun minne ekkewe aramas lón Egypt ra föri, ikeweia ämi öüwa piin nónnóm ie. Öüsap pwal föri usun minne ekkewe aramas lón ewe fönü Kanaan ra föri, ikeweia ngang üpwe emwenikemiiló ie. Öüsap liköppirüw ar kewe föfför. 4Öüpwe fókkun älleasochisi äi kewe öllük o tümwünüfichi ämi öüpwe tapweló mwirin äi kewe kapasen öüröür. Pün ngang ewe SAMOL ämi we Kot. 5Öüpwe tümwünü le öpwönüetä äi kewe kapasen öüröür me öllük, pün emön aramas mi unusen älleasochisir epwe küna manaw reer. Ngang ewe SAMOL.
6“ ‘Kosap lisowu ngeni emön määrärum mi arap ngenuk, pün ngang ewe SAMOL.
7“ ‘Kosap osufölüngawei semom ren óm lisowu ngeni inom. Neminnewe i inom, ina pwata kosap lisowu ngeni.
8“ ‘Kosap lisowu ngeni pwülüwen somom we, pün kopwe osufölüngawei semom ren ena.
9“ ‘Kosap lisowu ngeni fefinom, och leiin neminnewe i nöün somom me wón emön ika nöün inom me wón emön, ese lifilifil ika neminnewe a upwutiw me lón leeniom ika a upwutiw me ekis.
10“ ‘Kosap lisowu ngeni nöün noum mwän föpwül ika nöün noum fefin föpwül, pün ka pwisin osufölüngawók ren.
11“ ‘Kosap lisowu ngeni nöün pwülüwen somwom we föpwül me wón emön, pün neminnewe i nöün somwom we, nge pwal i fefinom.
12“ ‘Kosap lisowu ngeni fefinen somom we, pün neminnewe me somwom we iir ew chök fituk.
13“ ‘Kosap lisowu ngeni pwiin inom we, pwokiten neminnewe me inom we iir ew chök fituk.
14“ ‘Kosap osufölüngawei pwiin somwom we ren óm kopwe kkan ngeni pwülüwan we pwe kopwe lisowu ngeni, pün neminnewe i tettelin inom.
15“ ‘Kosap lisowu ngeni pwülüwen noum mwän. Neminnewe i pwülüwen noum we mwän, ina minne kosap lisowu ngeni.
16“ ‘Kosap lisowu ngeni pwülüwen pwiimw we, pün kopwe osufölüngawei pwiimw we ren.
17“ ‘Kosap lisowu ppök ngeni emön fefin me nöün föpwül. Kosap pwal lisowu ngeni nöün nöün neminnewe mwän föpwül ika nöün nöün neminnewe fefin föpwül, pün neminnewe me ekkewe föpwül iir ew chök fituk. Iei ew föfför mi fókkun ngaw.
18“ ‘Kosap angei pwiin pwülüwom we pwe kopwe ääni oruuw, pwe kopwe lisowu ngeni neminnewe lupwen än pwülüwom we mi chüen manaw.
19“ ‘Kosap óróór ngeni emön fefin óm kopwe lisowu ngeni lupwen an limengaw ren an semmwenin maram.
20“ ‘Kosap lisowu ngeni pwülüwen chón órum we o pwisin elimengawók ren neminnewe.
21“ ‘Kosap fangaló emön me leiin noum kewe semiriit pwe kopwe ääni asór ngeni ewe önü itan Molek, pün kosap fókkun turunufasei iten óm we Kot. Ngang ewe SAMOL.
22“ ‘Kosap lisowu ngeni emön mwän usun än emön lisowu ngeni emön fefin, pün ei a fókkun enniopwut.
23“ ‘Kosap lisowu ngeni emön maan o pwisin elimengawók ren ei sókkun föfför. Emön fefin esap pwal fangaló inisin ngeni emön maan an epwe lisowu ngeni ewe maan, pün ei lapalap a fókkun ämwälaló pwüngün akkótöchün nónnómwun aramas.
24“ ‘Öüsap pwisin elimengawa kemi ren och me leiin ekkeei sókkun lapalap, pwokiten iei usun meet chón ekkewe mwüü ngang üpwe tapwerirewu me mwemi ra limengaw ren. 25Ewe fönü mwo nge a limengaw ren, ina minne ngang üwa öpwüngü ewe fönü fäniten an tipis. Iwe, ewe fönü a usun chök nge a mwusäsinawu ekkewe aramas mi nóm lón. 26Nge ämi öüpwe fókkun tichchik le öpwönüetä äi kewe kapasen öüröür me äi kewe öllük. Öüsap fókkun föri och me leiin ekkeei mettóch mi fókkun enniopwut. Ekkeei öllük ra weneiti kemi ämi ekkewe chón Israel seni ämi upwutiw me ekkewe chón ekis mi nónnóm leiimi. 27Ekkewe aramasen ewe fönü ia ngang üpwe emmwenikemiiló ia ra föri ekkeei föfför mi enniopwut meinisin; iei minne ewe fönü a limengaw. 28Iwe, are ämi öüpwe elimengawa ewe fönü, ewe fönü epwe mwusäsini kemiiwu usun chök an a mwusäsinawu chón ekkewe mwüü mi akkomw mwemi le nóm lón ewe fönü.
29“ ‘Pün ese lifilifil ika iö a föri ew me leiin ekkeei föfför mi enniopwut, ekkana sókkun aramas repwe katoowu seni leiin ewe mwiichen aramasen Israel. 30Iei minne, ämi öüpwe tümwünüfichi pwe öüpwe älleasochisi äi kewe öllük, nge öüsap föri ew me leiin ekkeei sókkun föfför mi enniopwut chón ekkewe mwüü ra föri me mwen ämi feitto. Öüsap elimengawa kemi ren ämi föri ew me leiin ekkeei föfför, pün ngang ewe SAMOL ämi we Kot.’ ”
Pwal ekkóch öllük usun manawen pin
19 Iwe, ewe SAMOL a kapas ngeni Moses o apasa, 2“Kopwe apasa ngeni unusen ewe mwiichen aramasen Israel pwe iei aloi: ‘Ämi öüpwe pin, pün Ngang ewe SAMOL ämi Kot üwa pin.
3“ ‘Iteiten emön me emön leiimi epwe meniniti inan me saman. Öüpwe afóna le pinini äi kewe ränin Sabbat, pün ngang ewe SAMOL ämi we Kot.
4“ ‘Öüsap anómwu ämi apilükülük wón ekkewe uluulun önümwäl ren ämi öüpwe fel ngeniir, öüsap pwal föri fän itemi nöümi kot mi för seni mächä, pün ngang ewe SAMOL ämi we Kot.
5“ ‘Lupwen öüpwe ääni asór och asóren kinamwe ngeni ewe SAMOL, öüpwe föri seni pwisin mochenin letipemi. 6Öüpwe ocheei ewe mönün asór lón chök ewe rän öüwa ääni ewe asór ika pwal lón ewe rän mwirin. Nge ika epwe wor och lussun tori ewe öülüngätin rän; iwe, epwe kekkiló. 7Nge are öüpwe ochooch och seni ewe mönün asór lón ewe öülüngätin rän, epwe le enniopwut; iwe, ngang üsap etiwa ewe asór. 8Iei minne, ese lifilifil ika iö a ochooch ei sókkun asór epwe pwisin angei chappen an föfför pwokiten a epiningawa meet mi pin meren ewe SAMOL. Iwe, ena aramas epwe katoowu seni leiin ewe mwiichen aramas.
9“ ‘Iwe, lupwen öüpwe kinii üwään fönüemi, öüsap kinii üwään fótäämi tori lepökütiwen kiänin tännipimi, öüsap pwal rusi minne mi mworotiw seni kiniiemi wiit. 10Öüsap kiniieló meinisin üwään fótäämi kewe irän wain, öüsap pwal rusi ekkewe föün irän wain mi mworotiw lón ämi kewe tännipin irän wain. Öüpwe chök likitireló fän iten ekkewe chón wöwingaw me ekkewe chón ekis, pün ngang ewe SAMOL ämi we Kot.
11“ ‘Öüsap soolä.
“ ‘Öüsap chofona.
“ ‘Öüsap pwal otupwutupw fengen lefiilemi.
12“ ‘Öüsap ökköpölmwäli itei pwe öüte epiningawa iten ämi we Kot. Ngang ewe SAMOL ämi we Kot.
13“ ‘Öüsap otupwu seni chón órumi och, ika angei och seni i fän pöchökkül.
“ ‘Öüpwe mwittir ngeni ekkewe chón angang mi angang fäniten liiwin pwe repwe angei liwiniir.
14“ ‘Öüpwe pwääraló ämi nuokkusiti Kot ren ämi öüpwe kirekiröch ngeni emön aramas mi selingepüng pwal ren ämi öüsap anómwu och leenien chepetek me mwen emön mi mesechuun. Ngang ewe SAMOL.
15“ ‘Öüsap föri minne esap pwüng lón ämi pwüngün köpwüng. Öüsap apaap le peni emön mi wöüingaw, öüsap pwal lifilifil aramas le ewinna emön mi pisekisek. Nge öüpwe ääni köpwüng lón pwüng ngeni chón órumi.
16“ ‘Öüsap fätälfeil leiin aramasemi o luwapasfeil.
“ ‘Öüsap pwal föri och mettóch epwe efeiengawa manawen chón órumi. Ngang ewe SAMOL.
17“ ‘Kosap opwut pwiimw lón lelukom. Nge kopwe suukchööchö le fönöw chón órum pwe kosap tolong lón tipis pwokitan.
18“ ‘Kosap kütta óm kopwe pwisin angei chappen än emön föfför mi ngaw ngenuk, kosap pwal amwöchü lón ekiekum óm koum ngeni emön leiin aramasom. Nge kopwe echeni chón órum usun chök óm pwisin echenuk. Ngang ewe SAMOL.
19“ ‘Kopwe älleasochisi äi kewe öllük.
“ ‘Kosap mwüüt ngeni och sókkun noum maanfesir an epwe pwüpwülü fengen me pwal och sókkun maanfesir.
“ ‘Kosap nofiti fengeni le fótuki ekkóch föün irä mi sókkofesen lón óm tännipi.
“ ‘Kosap pwal üföüf echö üüf mi nofit fengen kireen mangaku mi för seni ünen maan me kire mi för seni tereech.
20“ ‘Are emön mwän a lisowu ngeni emön fefin i emön amanaw a fen pwon ngeni pwal emön mwän pwe epwe pwülüweni, nge esap wor mwo emön a mööni neminnewe, esap pwal mwo ngasaló, repwe fókkun köpwüng fäniten ei föfför, nge resap ninniiló pwokiten neminnewe esap mwo emön mi ngas. 21Iwe, ewe mwän epwe uweato emön ätemwänin siip ren ewe leenien tolong ngeni ewe Imw Mangaku Leenien Chufengen fäniten ew asóren tipis epwe asór ngeni ewe SAMOL. 22Ewe souasór epwe föri ewe asóren omwusomwusen tipis ren ewe ätemwänin siip me fän mesen ewe SAMOL fäniten ewe tipis ätewe a föri. Iwe, än ätewe tipis epwe mwusóló seni.
23“ ‘Lupwen öüpwe tolong lón ewe fönü o öüpwe fótuki sókkopaaten irän mwöngö pwe öüpwe mwöngö seni uwaar, öüpwe likitaló pwe öüsap kinii uwaar lón ekkewe akkomwen ülüngät ier pwe resap mwüümwütä ngeni kemi ämi öüpwe mwöngö pün usun itä nge resap mwo sirkomsais. 24Iwe, lón ewe örüwänüen ier, uwaar meinisin repwe pin, epwe ew asóren kilisou ngeni ewe SAMOL. 25Nge lón ewe elimuen ier, öüwa tongeni mwöngö seni uwaar. Ren ei lapalap uwään fótämi irä repwe chómmóngóló. Ngang ewe SAMOL ämi we Kot.
26“ ‘Öüsap ochooch och fituk mi chüen wor ewe chcha lón.
“ ‘Öüsap föri angangen pwee ika roong.
27“ ‘Öüsap pöküüweló meeten möküren asen selingemi ika fichieló ülüülen ölüsemi.
28“ ‘Öüsap lekelekei inisimi fäniten mönümä, ika ichchii wón inisimi sókkopaten lios. Ngang ewe SAMOL.
29“ ‘Kosap turunufasei noum fefin ren óm kopwe mwüüt ngeni pwe epwe emön fefin mi amömö inisin fäniten lisowu pwe ewe fönü ete wiliti ew leenien fefin mi amömö inisir fäniten lisowu o epwe uróló ren föfföringaw.
30“ ‘Kopwe afóna le pinini äi kewe ränin Sabbat o meniniti imwei mi pin. Ngang ewe SAMOL.
31“ ‘Kosap feilló ren ekkewe waatawa ika ren ekkewe sourong, kosap kütta öüröüróm merer pwe kote limengaw reer. Ngang ewe SAMOL óm we Kot.
32“ ‘Kopwe üütä me mwen emön a pwecheló meeten möküran, kopwe pwäri óm suföliti emön mwän mi chinlap o kopwe nuokkusiti óm we Kot. Ngang ewe SAMOL.
33“ ‘Lupwen emön chón ekis a waasöla lón fönüemi, öüsap kirikiringaw ngeni i. 34Öüpwe föri ngeni ekkewe chón ekis mi nóm reemi pwe repwe usun chök nge iir chón wilipós leiimi. Kopwe echeni ekkewe chón ekis usun chök pwisin óm echenuk. Öüpwe chechchemeni pwe ämi öüwa fen piin waasöla lón ewe fönü Egypt. Ngang ewe SAMOL ämi we Kot.
35“ ‘Öüsap nöünöü och sókkun öüküük mi chofona lupwen öüpwe öwükü langattamen ika choun ika masowen mettóch. 36Öüpwe nöünöü kana kilo mi wenechchar me föün kiló mi wenechchar pwal ew köükün mettóch mi pwasapwas itan efa mi wenechchar me ew köükün mettóch mi löölö itan hin mi wenechchar. Ngang ewe SAMOL ämi we Kot mi emmwenikemiiwu seni ewe fönü Egypt.
37“ ‘Öüpwe tümwünü le älleasochisi o öpwönüetä äi kewe öllük me pwüüng meinisin. Ngang ewe SAMOL.’ ”
Liwinin tipisin älleasolap
20Mwirin, ewe SAMOL a kapas ngeni Moses o apasa, 2“Kopwe pwal üreni ekkewe chón Israel: ‘Ese lifilifil ika emön me leiin ekkewe aramasen Israel ika emön me leiin ekkewe chón ekis mi nóm lón Israel epwe ääni asór emön nöün semiriit ngeni ewe önü Molek, ewe aramas epwe fókkun ninniiló. Ewe mwiichen aramas repwe mónei faaw ngeni i. 3Pwisin ngang üpwe säpe ngeni ewe aramas o üüngeni. Üpwe atoowu i seni leiin ewe mwiichen aramas pün a elimengawa imwei mi pin o epiningawa itei mi pin ren an ääni asór nöün semiriit ngeni Molek. 4Nge are ewe mwiichen aramas repwe pineeló meser lupwen ätewe a ääni asór nöün semiriit ngeni Molek pwal are resap niieló ätewe, 5mwirin, pwisin ngang üpwe säpe ngeni ewe aramas äi üpwe üüngeni me an famili o ngang üpwe atoowu ätewe seni leiin ewe mwiichen aramas fiti fengen me chókewe meinisin mi tapweló mwirin ätewe ren ar föri usun föfförün fiin lisowu ren ar amöömöló inisir ngeni Molek.
6“ ‘Iwe, ngang üpwe säpe ngeni äi üpwe üüngeni emön aramas mi feilló ren ekkana waatawa me sourong ren an epwe angei öüröüran seniir. Ngang üpwe atoowu ewe aramas seni leiin ewe mwiichen aramas.
7“ ‘Iei minne, öüpwe pwisin epinikemiiló pwe öüpwe pin pün ngang ewe SAMOL ämi we Kot. 8Iwe, öüpwe tümwünü le älleasochisi äi kewe öllük o öpwönüetä pwüngür.
9“ ‘Are emön aramas a ótteki saman ika inan, i epwe fókkun ninniiló. Pwokiten i a ótteki saman ika inan; iwe, pwisin chaan epwe ina chappen tipisin an föfför.
10“ ‘Are emön mwän a tipisin lisowu ngeni pwülüwen pwal emön mwän, iir me rüömön, ewe mwän me ewe fefin, repwe ninniiló.
11“ ‘Are emön mwän a kóón ren pwülüwen saman, i a turunufasei saman pün usun chök nge a pwäraló selelón saman. Iwe, iir me rüömön repwe fókkun ninniiló. Pwisin chaar epwe ina chappen tipisin ar föfför.
12“ ‘Are emön mwän a lisowu ngeni pwülüwen nöün mwän, iir me rüömön repwe fókkun ninniiló. Iir ra ämwälaló pwüngün akkótöchün nónnómwun aramas. Pwisin chaar epwe ina chappen tipisin ar föfför.
13“ ‘Are emön mwän a lisowu ngeni pwal emön mwän usun chök an epwe lisowu ngeni emön fefin, iir me rüömön ra föri och föfför mi fókkun enniopwut. Iir repwe fókkun ninniiló, nge pwisin chaar epwe ina chappen tipisin ar föfför.
14“ ‘Are emön mwän a pwülüweni pökküw emön fefin me inen ewe fefin, ei föfför mi fókkun ngaw. Iwe, iir ppök ewe mwän me ekkewe fefin repwe kekkiló ren ekkei pwe ei föfför mi ngaw epwe töttölüwu seni leiimi.
15“ ‘Are emön mwän a lisowu ngeni emön maan, ewe mwän epwe fókkun ninniiló. Iwe, öüpwe pwal fókkun niieló ewe maan.
16“ ‘Are emön fefin a óróór ngeni emön ätemwänin maan pwe epwe lisowu ngeni, öüpwe niireló me rüömön, ewe fefin me ewe maan. Iir me rüömön repwe ninniiló, nge pwisin chaar epwe ina chappen ar föfför.
17“ ‘Are emön mwän a lisowu ngeni pwisin fefinan, nöün saman we me wón emön ika nöün inan we me wón emön, iwe, ätewe a küna seleelón neminnewe, nge neminnewe a küna seleelón ätewe. Iei ew föfför mi ässääw. Iir repwe katoowu seni leiin ewe mwiichen aramas. Ätewe a äpwääpwängawa fefinan we ren an nengeni seleelón. Ätewe epwe pwisin angei ukun an föfför mi ngaw.
18“ ‘Are emön mwän a lisowu ngeni emön fefin lupwen an semmwenin maram o a äselelói neminnewe ren an lisowu ngeni, ätewe a särifaló ia än neminnewe we samwaw a pop seni ie, nge neminnewe a mwüüt ngeni ätewe an epwe särifaló ia an we samwaw a pop seni ie. Iir me rüömön repwe katoowu seni leiin ewe mwiichen aramas.
19“ ‘Iwe, kosap lisowu ngeni pwiin inom ika fefinen semwom, pün ren ei föfför ka äselelói wesewesen fitukom mi arap ngenuk. Ämi me rüömön öüpwe pwisin angei chappen ämi föfför mi ngaw.
20“ ‘Are emön mwän a lisowu ngeni pwülüwen pwiin saman ika pwülüwen mwongeen inan, i a turunufasei pwiin saman ika mongeen inan. Iir me rüömön repwe angei chappen ar föfför. Repwe mäló nge esap wor nöüür.
21“ ‘Are emön mwän a pwülüweni pwülüwen pwiin, iei ew föfför mi limengaw pün ätewe a turunufasei pwiin. Iwe, esap wor nöüür.
22“ ‘Iei minne, öüpwe tümwünü le älleasochisi äi kewe öllük me pwüüng meinisin o öpwönüeta le föri pwüngür, pwe ewe fönü ia ngang üpwe emmwenikemilong lón pwe öüpwe nónnóm ie ete mwusäsinikemiiwu. 23Öüsap manaweni sókkun manawen öörünien chón ekkewe mwüü ngang üpwe ösüüreló me mwemi. Ngang üpwe föri ei, pwokiten iir ra föri ekkewe mettóch ngang üwa fókkun enniopwuter. 24Nge ngang üwa pwon ngeni kemi pwe ämi öüpwe fönüeni fönüer, ew fönü ia a pwuupwu ie milik me chönün chunen. Ngang ewe SAMOL ämi we Kot üwa äimwükemiiló seni chón ekkewe pwal ekkóch mwüü pwe öüpwe sókkóló seniir.
25“ ‘Iei minne öüpwe fókkun äleefila lefiilen ekkana maan mi limöch me ekkana mi limengaw, pwal lefiilen ekkana machchang mi limengaw me ekkana mi limöch. Öüsap elimengawa kemi ren ämi öüpwe ochooch emön maan ika emön machchang ika emön sókkun mönümanaw mi tö wón pwül, ekkana sókkun maan resap mwüümwüta ngeni kemi. 26Ämi öüpwe fókkun pin, pwokiten ngang, ewe SAMOL, üwa pin. Ngang üwa äimwükemiiló seni ekkewe pwal ekkóch aramas pwe ämi öüpwe wesewesen neii.
27“ ‘Emön mwän ika emön fefin mi föri föfförün emön waatawa ika sourong me leiimi epwe fókkun ninniiló. Öüpwe mónei faaw ngeniir. Pwisin chaar epwe ina chappen tipisin ar föfför.’ ”
Kapasen öüröür fäniten ekkewe souasór
21Iwe, ewe SAMOL a apasa ngeni Moses, “Kopwe kapas ngeni ekkewe souasór, nöün Aaron kewe mwän, o kopwe üreniir: ‘Esap wor emön me leiimi epwe pwisin elimengawa ren emön mi mäló me leiin aramasan, 2chiilón chök ren soomän emön fitukan usun ren inan ika saman, nöün mwän ika nöün fefin, pwiin, 3ika fefinan esamwo pwüpwülü mi chök chüen nóm ren lón imwan pün esamwo wor pwülüwan, ina pwata ätewe a tongeni föri pwe i epwe limengaw fänitan. 4Emön souasór esap elimengawa ren ekkana aramas i a määrärinir fäniten pwülüwan, ina pwätä esap epiningawa wiisan.
5“ ‘Ekkewe souasór resap reipööpöló meeten mökürer ika emii le fichieló ülüülen ölüser ika lekelekei inisir. 6Iir repwe käimwüló fäniten Kot, pün iir ra pin, nge resap eitengawa itan. Fen pwal iir ra wiisen ääni ekkewe asór ngeni ewe SAMOL mi keek wón ekkei, iei ewe mwöngö fäniten Kot, iei minne iir repwe fókkun pin.
7“ ‘Ekkewe souasór resap pwüpwpülü ngeni fiin lisowu ika ngeni fefin ra fen tór ren än mwän turunufaser. Resap pwal pwüpwülü ngeni fefin mi mwüü seni pwülüwer, pün ekkewe souasór ra käimwüló fäniten Kot pwe repwe pin. 8Iei minne, öüpwe awóói ekkewe souasór pwe repwe pin mereemi, pwokiten iir ra wiisen ääni ewe asóren mwöngö ngeni ämi we Kot. Iir repwe pin mereemi, pwokiten ngang ewe SAMOL ngang mi pin, iwe, üwa föri pwe öüpwe pin.
9“ ‘Are emön föpwül nöün emön souasór a pwisin elimengawa ren an amöömö inisin fäniten lisowu, i a elimengawa pinin saman pwal pwisin i. Iwe, neminnewe epwe kekkiló ren ekkei.
10“ ‘Ewe souasór mi lap me leiin pwiin kana, i ätewe a niinitiw wón möküran ewe löön kepit o a epinipiniló pwe epwe üföüf ekkewe üfen souasór, esap mwüüt ngeni meeten möküran an epwe tóróngaw ika epwe kamwei üfan lupwen a wor an soomä. 11Ewe souasór mi lap esap fókkun elimengawa inisin ren an feilló arap ngeni emön soomä, inamwo ika pwe ewe soomä saman ika inan. 12Esap pwal fókkun elimengawa ewe imw mi pin än an we Kot ren an epwe toowu seni ewe imw mi pin pwe epwe fiti felin peiasen saman ika inan, pwokiten i a fen epinipiniló ren ewe löön kepit än an we Kot. Ngang ewe SAMOL.
13“ ‘Ewe souasór mi lap epwe pwülüweni emön fefin esap mwo tori mwän. 14Nge esap pwülüweni emön fefin mi mäseni pwülüwan ika emön fefin mi mwüü seni pwülüwan ika emön fefin mi tór ren än mwän turunufasei ika emön fiin lisowu. Nge epwe chök pwülüweni emön fefin esap mwo tori mwän seni leiin pwisin chón an einang, 15pwe esap atolonga mwirimwirin kana lón tettelin chón limengaw me leiin chón an einang, pwokiten Ngang ewe SAMOL üwa äimwüeló ewe souasór mi lap pwe i epwe pin.’ ”
16Mwirin, ewe SAMOL a apasa ngeni Moses, 17“Kopwe üreni Aaron: ‘Lón ekkewe pilóón aramas repwe feitto, esap wor emön me leiin mwirimwirin kana mi wor terin epwe kaneto pwe epwe ääni ewe asóren mwöngö ngeni Kot. 18Pün esap wor emön mi wor terin epwe tongeni kaneto reei. Ese lifilifil ika i emön mi chuun ika mwök, ika i emön mi wor terin wón mesan ika emön mi fätälmwöömwö lón fansoun langattam, 19ika i emön mi ter efóch pachapachan ika ter efóch pöün, 20ika emön mi chuk sökürün ika mi ningenge, are emön mi wor terin lón mesan ika mi wor kilingawan mi pwerik ika emön mi fas ika mi ter föün ochchoun. 21Inamwo ika i emön mwirimwirin ewe souasór Aaron nge terin inisin a efisätä an esap tongeni ääni ekkewe asór mi keek wón ekkei ngeni ewe SAMOL. Pwokiten a wor och terin; iwe, esap fókkun ääni ewe asóren mwöngö ngeni an we Kot. 22Nge i a tongeni mwöngö seni ewe asóren mwöngö aramas ra uweato pwe repwe ääni asór ngeni Kot, pacholong ewe asóren mwöngö mi pin me ewe asóren mwöngö mi fókkun pin. 23Nge pwokiten a wor terin, iei minne esap fókkun tolong arap ngeni ewe mangakun refirefin leefil lón ewe imw mi pin ika kan ngeni ewe róngen asór, pün are epwe föri ei, iwe, epwe epiningawa imwei mi pin. Ngang ewe SAMOL üwa äimwüeló ekkewe mettóch pwe repwe pin.’ ”
24Iei minne Moses a aporausa ngeni Aaron me nöün kewe mwän ekkeei kapasen öüröür pwal ngeni ekkewe chón Israel meinisin.
22Mwirin, ewe SAMOL a pwal apasa ngeni Moses, 2“Kopwe üreni Aaron me nöün kewe mwän pwe repwe awora sufölün ekkewe asór mi pin minne ekkewe chón Israel ra epinaló fän itei, pwe resap eitengawa itei mi pin. Ngang ewe SAMOL.
3“Kopwe ächchema ngeniir pwe are emön me leiin mwirimwiriir kana seni ew pilóón aramas tori pwal ew epwe kan ngeni ekkewe mwöngö mi pin ekkewe aramasen Israel ra epinaló fäniten ewe SAMOL nge mi wor an limengaw, ena aramas epwe katoowu seni fän mesei. Ngang ewe SAMOL.
4“Are emön me leiin ekkewe souasór mwirimwirin Aaron a üri keilapan ika och sókkun chönü a toowu seni inisin pwe a föri pwe epwe nóm lón tettelin chón limengaw, ena souasór esap tongeni mwöngö seni ekkewe asór mi pin tori an epwe katoowu pwüngün pwe i a limöchsäfäl. Are emön me leiin ekkewe souasór epwe nóm lón tettelin chón limengaw ren an attapa emön somä ika ren an attapa emön mwän mi toowu seni ewe chaan mwän, 5ika ren an attapa emön me leiin ekkewe sókkun maantöötö mi limengaw, ika pwal ren an attapa emön aramas mi nóm lón tettelin chón limengaw ren ese lifilifil ika meet popun a limengaw, 6ewe souasór epwe nóm lón tettelin chón limengaw tori lekkuniól. Iwe, esap tongeni mwöngö seni ekkewe asór mi pin are esap limeti inisin lón kólik. 7Iwe, lupwen akkar a tupwutiw, ätewe epwe limöch säfäl. Mwirin, a tongeni mwöngö seni ekkewe asór mi pin, pwokiten ekkeei asór iei anan. 8Ewe souasór esap tongeni ochooch emön maan mi pwisin mäló ika emön mi mäló ren maanmwacho, pün ei epwe elimengawa i. Ngang ewe SAMOL.
9“Iei minne, kopwe fönöw ekkewe souasór meinisin pwe repwe tümwünüfichi le föri pwüngün ekkeei kapasen öüröür, pün are resap, iwe, repwe atooto köpwüng wóór o mäló ren ar pwurätiw äi kewe öllük. Ngang ewe SAMOL üwa epiniir.
10“Esap wor emön me lükün chón än emön souasór famili epwe tongeni mwöngö seni ekkewe asór mi pin, sap mwo nge emön aramas mi nóm lón imwen emön souasór ika emön nöün ewe souasór chón angang mi angei peiofun. 11Nge are emön souasór a kamö amanaw ren pwisin nöün mooni, ekkewe amanaw ra tongeni mwöngö seni enen ewe souasór. Pwal ika a wor nöün ekkewe amanaw semiriit ra upwutiw me lón imwen ewe souasór, ekkewe semiriit ra tongeni mwöngö seni enen ewe souasór. 12Are nöün ewe souasór fefin a pwüpwülü ngeni emön chón lükün an einang, neminnewe esap tongeni mwöngö seni ekkewe asór mi pin. 13Nge are emön fefin nöün emön souasór a määseni pwülüwan ika mwüüseni pwülüwan nge esap wor nöün; nge mwirin, a liwiniti saman we o a nóm ren usun chök lekükkünün, neminnewe a tongeni mwöngö seni enen saman we, nge esap wor emön me lükün chón än ewe souasór famili a mwüümwütä ngeni an epwe mwöngö.
14“Iwe, are emön aramas a mwälliló le mwöngö och seni ewe asór mi pin, ätewe epwe uweato siwilin ewe asór mi pin ren ewe souasór, nge epwe apachätä ngeni ew na limu. 15Iir ekkewe souasór resap fókkun epiningawa än ekkewe aramasen Israel kewe asór mi pin, minne iir ra asór ngeni ewe SAMOL, 16ren ar repwe mwüüt ngeni ekkewe aramas pwe repwe mwöngö seni ekkewe asór mi pin nge esap mwüümwütä ngeniir. Ewe souasór mi tümwününgaw ren an föri ei sókkun, epwe atoto tipis me pwupwungaw wón ekkewe aramas o föri pwe repwe liwinisäfäli ewe mwöngö fiti ewe ew nalimu. Pün ngang ewe SAMOL üwa föri pwe ekkewe asór repwe pin.”
Ekkewe asór mi ketiw me ekkewe resap ketiw
17Iwe, ewe SAMOL a apasa ngeni Moses, 18“Kopwe üreni Aaron me nöün kewe mwän, pwal ekkewe aramasen Israel meinisin ekkeei kapasen öüröür mi weneiti ekkana iir chón Israel seni ar upwutiw pwal ekkana chón ekis mi nónnóm leiimi. Are öüpwe ääni ew asóren keek ngeni ewe SAMOL, ese lifilifil ika ren ämi öüpwe öpwönüwetä ew pwon ika ew asór seni pwisin mochenin letipemi, 19ei asór epwe chök ketiw are epwe emön ätemwän seni nöümi pwiin kowu, seni ekkewe siip ika seni ekkewe kuuch esap wor terin. 20Öüsap ääni asór emön maan mi wor terin, pün esap ketiw an epwe ew asór fän äsengesimi. 21Ese lifilifil ika iö a uweato ew asóren kinamwe ngeni ewe SAMOL seni leiin nöün pwiin kowu ika pwiin siip me kuuch, pwe epwe öpwönüetä an pwon ika epwe chök ääni och asór seni pwisin letipan, ewe mönün asór epwe emön mi fókkun unusöch pwe epwe tongeni ketiw. Esap fókkun wor terin ewe maan. 22Öüsap ääni asór ngeni ewe SAMOL ekkana sókkun maan mi chuun meser ika mi kinas ika pwök ika kana sókkun mi pwuu senir och chönü ika kana mi kilingaw ika mi fas. Öüsap isettä emön me leiin ekkeei sókkun maan wón ewe róngen asór pwe epwe ew asór mi keek wón ekkei ngeni ewe SAMOL. 23Nge öüwa tongeni uweato pwe öüpwe ääni asór seni pwisin mochenin letipemi emön ätemwänin kowu ika emön laam mi ter ren an koon langattam ika mwochomwoch efóch pöün ika pecheen. Nge ie sókkun maan esap ketiw are öüpwe ääni asór fäniten ämi öüpwe öpwönüetä ew pwon. 24Öüsap ääni asór ngeni ewe SAMOL emön maan mi pweaw ika pachchaach ika reirei ika kinas föün ochchoun. Öüsap fókkun föri ei me lón fönüemi ren ämi öüpwe reii ekkewe ätemwänin maan. 25Öüsap etiwa ekkeei sókkun maan mi wor terir ika kinaser seni lepöün emön chón ekis pwe öüpwe äänir asór ngeni ämi we Kot. Ekkeei sókkun maan resap ketiw ar repwe fichiti asór fän äsengesimi pwokiten ra likilikingaw o a wor terir.”
26Iwe, ewe SAMOL a apasa ngeni Moses, 27“Lupwen emön appanen kowu ika siip ika kuuch a upwutiw, ewe appanan epwe nóm ren inelapan we lón üküükün fisu rän. Nge seni ewe awalüwen rän feilló, ewe appanen maan a tongeni ketiw pwe epwe emön mönün asór mi keek wón ekkei ngeni ewe SAMOL. 28Öüsap niipöküw emön inelapen kowu me appanan ika emön inelapen siip me appanan lón ew chök rän.
29“Iwe, lupwen öüpwe uwato ew asóren kilisou ngeni ewe SAMOL, öüpwe föröchchüw pwüngün angangen ewe asór pwe epwe ketiw fänitemi. 30Öüpwe ocheei unusen ewe mönün asór lón ewe chök ränin öüwa ääni ewe asór, nge öüsap likiti och tori ewe oruuen rän. Ngang ewe SAMOL.
31“Öüpwe likiitü le öpwönüetä äi kewe öllük ren ämi öüpwe älleasochis ngeniir, pün ngang ewe SAMOL. 32Öüsap turunufasei itei mi pin, pün ngang üpwe pin meren ekkewe aramasen Israel. Ngang ewe SAMOL üwa epini kemi. 33Ngang ewe mi angasakemiiwu seni ewe fönü Egypt pwe ngang üpwe wesewesen ämi Kot. Ngang ewe SAMOL.”
Ekkewe ränin chuulap mi kefilitä
23 Iwe, ewe SAMOL a apasa ngeni Moses, 2“Kopwe ngeni ekkewe aramasen Israel ekkeei kapasen öüröür fänäsengesin än ewe SAMOL kewe ränin chuulap mi kefilitä. Ikkeei ekkewe rän ämi meinisin öüpwe mwiich fengen pwe öüpwe fel ngeniei lóór.
Ewe ränin Sabbat
3“Öüwa tongeni föri ämi angang lón üküükün wonu rän iteiten wiik, nge lón ewe efisuen rän, angang meinisin repwe köüüló. Iei än ewe SAMOL ränin Sabbat ränin asöösö, ew rän mi pin pwe öüpwe mwiich fengen fäniten ämi öüpwe fel. Öüsap föri och angang lón ei rän, pün ew ränin Sabbat fäniten ewe SAMOL lón leeniemi kana meinisin.
4“Pwal kapach ngeni ei ränin Sabbat, ewe SAMOL a filätä ekkewe fansoun chuulap, ekkewe fansoun mwiich mi pin pwe öüpwe afóna lón ekkewe fansoun ra weneiti iteiten ier.
Ewe chuulapen Pasofer me pilawa ese wor iis lón(Exod. 12:14-20; Num. 28:16-25; Deut. 16:1-8)
5“Akkomwan, öüpwe efisi ächechchemen än ewe SAMOL we chuulapen Pasofer. Ei fansoun epwe poputä leefäfin ewe engol me rüwänüen ränin ewe äewin maram. 6Mwirin, lón ewe engol me limuwen ränin pwal lón ewe chök maram, epwe poputä än ewe SAMOL we Chuulapen Mwöngö Pilawa ese wor iis lón. Ei chuulap epwe sópwósópwóló le fis lón üküükün fisu rän. Iwe, öüpwe mwöngö pilawa esap nofit ngeni iis lón ekkeei fisu rän. 7Lón ewe äewin ränin ei chuulap, ekkewe aramas meinisin repwe köüüló seni ar angang. Iwe, öüpwe mwiich fengen pwe öüpwe efisi ew mwiich mi pin. 8Nge lón iteiten ekkewe fisu rän, öüpwe ääni ew asór mi keek wón ekkei ngeni ewe SAMOL. Iwe, lón ewe efisuwen rän, ekkewe aramas meinisin repwe köüüló seni ar angang pwe repwe efisi ew mwiich mi pin.”
Ewe Chuulapen Mwen Uwa
9Mwirin, ewe SAMOL a üreni Moses, 10pwe epwe ngeni ekkewe chón Israel ekkeei kapasen öüröür: “Lupwen öüpwe tolong lón ewe fönü ngang üpwe ngeni kemi nge öüpwe le kinii mwen uwään fótäämi irä, öüpwe uweato ren ewe souasór ew pinükün akkomwen kiniiemi uwään wiit. 11Iwe, ewe souasór epwe sapäätä ewe pinük me mwen ewe SAMOL pwe epwe ketiw fän äsengesimi. Ewe souasór epwe sapäätä ewe pinükün wiit lón ewe rän mwirin ewe ränin Sabbat. 12Lón ewe rän lupwen ämi öüpwe sapaatä ewe pinükün wiit, öüpwe pwal ääni asór emön ätemwänin laam ew ierin esap wor terin pwe epwe ew asór ngeni SAMOL mi keek wón ekkei. 13Iwe, öüpwe chienen ngeni ruu na engolun ew efa ika rüwänü paun pilawa mi amas o mwirinnö mi pwal nofit fengen me apüra pwe ew asóren mwöngö. Ei epwe ew asór ngeni ewe SAMOL mi keek wón ekkei i a efich pwonnan. Öüpwe pwal efiti ngeni ew na rüwänüen ew hin ika ew kuóche wain pwe asóren wün. 14Öüsap fókkun mwöngö och pilawa ika föün wiit mi kapwich ika ekkewe föün wiit mi minafö tori mwirin ämi öüwa uweato ei asór ren ämi we Kot. Ei epwe ew öllük tori feilfeilló chök fänitemi me ekkewe pilóón aramas repwe feitto me mwirin me lón leeniemi kana meinisin ese lifilifil ia öüwa nónnóm ie.
Ewe chuulap mi fis lón üküükün fisu wiik(Num. 28:26-31; Deut. 16:9-12)
15“Seni ewe rän mwirin ewe ränin Sabbat, iei ewe ränin Sabbat öüwa uweato ewe pinükün wiit öüpwe sapaatä pwe ämi asóren mwen uwa, öüpwe älleani üküükün fisu wiik. 16Öüpwe sópweló le ällea tori üküükün lime rän iei ewe rän mwirin ewe efisuen Sabbat. Mwirin, öüpwe uweato ew asóren mwöngö seni ekkewe föün wiit mi fö pwe ew asór ngeni ewe SAMOL. 17Seni ese lifilifil menni leeni ia öüwa nóm ie, öüpwe uweato rüwófóch pilawa pwe repwe sapatä fän mesen ewe SAMOL pwe epwe ew asór. Ekkeei pilawa repwe för seni ruu na engolun ew efa ika rüwänü paun pilawa mi amas, nge repwe umw fiti iis. Ekkeei pilawa repwe ew asór ngeni ewe SAMOL seni mwen uwään fótäämi wiit. 18Öüpwe pwal chienen ngeni ei pilawa füümön laam ew ierir esap wor terir, pwal emön liäliffön ätemwänin kowu me rüömön ätemwänin siip. Ekkeei maan repwe ew asóren keek ngeni ewe SAMOL fiti fengen me chiechier kewe asóren mwöngö me asóren wün. Ei epwe ew asór mi keek wón ekkei ewe SAMOL a efich pwonnan. 19Mwirin, öüpwe pwal ääni asór emön ätemwänin kuuch fäniten asóren limelimen tipis me pwal rüömön ätemwänin laam, ew ierin emön me emön leiir, pwe ew asóren kinamwe. 20Iwe, ewe souasór epwe sapaatä ekkewe rüömön laam fiti fengen me ewe pilawan asóren mwen uwa pwe epwe ew asór mi sapatä me mwen ewe SAMOL. Ekkeei mettóch repwe ew asór mi pin meren ewe SAMOL fäniten ewe souasór. 21Iwe, lón ewe chök ränin, öüpwe esilefeili pwe epwe fis ew mwiich mi pin. Öüsap föri och angang mi chou lón ei rän. Ei epwe ew öllük fänitemi me ekkewe pilóón aramas repwe feitto me mwirin tori feilfeilló chök me lón ekkewe leeni meinisin ese lifilifil ia öüwa nóm ie.
22“Lupwen öüpwe kinii resin fönüwemi, öüsap arosa le kiniieló meinisin uwään tännipimi tori lepökütiwen kiänir, öüsap pwal rusifengeni minne mi turutiw seni kiniiemi föün wiit. Öüpwe likitireló fäniten ekkewe chón wöwingaw me chón ekis. Ngang ewe SAMOL ämi we Kot.”
Ewe ränin chuulap mi fiti tikin rappwa(Num. 29:1-6)
23Iwe, ewe SAMOL a apasa ngeni Moses 24pwe epwe ngeni ekkewe chón Israel ekkeei kapasen öüröür: “Lón ewe äewin ränin ewe efisuwen maram, ämi öüpwe efisi ew ränin asöösö, ew fansoun mwiich mi pin, ew ränin ächechchem epwe fiti tikin rappwa. 25Öüsap föri och angang mi chou lón ei rän, nge öüpwe ääni ew asór ngeni ewe SAMOL mi keek wón ekkei.”
Ewe ränin limelimen tipis(Lev. 16:2-34; Num. 29:7-11)
26Mwirin, ewe SAMOL a apasa ngeni Moses, 27“Kopwe chechchemeni pwe epwe fis ächechchemen ewe Ränin Omwusomwusen tipis lón ewe äengolun ränin ei efisuwen maram. Ei rän epwe ew fansoun mwiich mi pin fänitemi. Öüpwe pwisin etekisóna kemi o öüpwe ääni ew asór ngeni ewe SAMOL mi keek wón ekkei. 28Öüsap föri och angang lón unusen ei rän, pwokiten iei ewe Ränin Omwusomwusen tipis, lupwen epwe fis limelimen tipis fänitemi me fän mesen ewe SAMOL ämi we Kot. 29Ika emön aramas esap pwisin etekisóna lón ei ränin, i epwe katoowu seni leiin ewe mwiichen aramas. 30Ngang üpwe efeiengawa emön aramas me leiimi mi föri och angang lón ewe rän. 31Öüsap fókkun föri och sókkun angang. Iei ew öllük fänitemi me ekkewe pilóón aramas repwe feitto me mwirin tori feilfeilló chök me lón ekkewe leeni meinisin ese lifilifil ia öüwa nóm ie. 32Ei rän epwe ew Sabbat, ew ränin asöösö fänitemi. Öüpwe pwisin etekisóna kemi lón ei rän. Ei fansoun asöösö me öchüün epwe poputä seni lekkuniólun ewe ettiuwen ränin ewe maram tori lekkuniólun ewe rän mwirin. Öüpwe afóna le föri pinin ämi ei ränin Sabbat.”
Ewe chuulapen imw likachchooch(Num. 29:12-39; Deut. 16:13-17)
33Mwirin, ewe SAMOL a apasa ngeni Moses, 34“Kopwe üreni ekkewe chón Israel pwe repwe popuetäni ewe Chuulapen Imw Likachchooch lón ewe engol me limuen ränin ewe efisuwen maram. Ei chuulap ngeni ewe SAMOL epwe fis lón üküükün fisu rän. 35Lón ewe äewin rän, epwe fis ew mwiich mi pin. Öüsap föri och angang mi chou lón ei rän. 36Lón üküükün fisu rän öüpwe ääni ämi kewe asór mi keek wón ekkei ngeni ewe SAMOL, nge lón ewe awalüwen rän, öüpwe föri ew mwiich mi pin o ääni ew asór mi keek wón ekkei ngeni ewe SAMOL. Iei ew mwiich mi pin. Öüsap fókkun föri och angang mi chou lón ei rän.
37“Ikkeei än ewe SAMOL kewe ränin chuulap mi kefilitä meren, ämi öüpwe esilefeili usun pwe repwe fansoun mwiich mi pin fäniten ämi öüpwe uweato ekkewe asór mi keek wón ekkei ngeni ewe SAMOL- ekkewe asóren keek me ekkewe asóren mwöngö, ekkewe sókkun asór me ekkewe asóren wün mi nóm lón pwüngün akkóót fäniten ew me ew rän. 38Ekkeei asór repwe kapach ngeni ekkewe asór fäniten än ewe SAMOL kewe ränin Sabbat, repwe pwal kapach ngeni ämi kewe liffang me ese lifilifil meet öüwa ääni pwon me meinisin ämi kewe asór öüwa fang ngeni ewe SAMOL seni pwisin mochenin letipemi.
39“Iei minne pwal lón ewe engol me limuwen ränin ewe efisuwen maram, mwirin ämi ionifengeni uwään fönüemi, öüpwe pwal föri ew chuulap ngeni ewe SAMOL lón üküükün fisu rän. Öüpwe chechchemeni pwe ewe äewin rän epwe ew ränin asöösö mi pin, pwal ewe awalüwen rän epwe pwal ew ränin asöösö mi pin. 40Lón ewe äewin rän, öüpwe angei ekkewe uwään irä mi fókkun mwirinnö seni ekkewe irä pwal paan ewe irä usun nüü itan palm me ekkewe palen irä mi umwuum chöör me palen ewe irä itan poplar mi määr ünükkün ekkewe chönüpwuupwu. Iwe, öüpwe fókkun pwapwa me fän mesen ewe SAMOL ämi we Kot lón üküükün fisu rän. 41Öüpwe föri apwaapwan ächechchemen ei atun pwe epwe ew chuulap ngeni ewe SAMOL lón üküükün fisu rän iteiten ier. Iei ew öllük fänitemi me ekkewe pilóón aramas repwe feitto me mwirin. Öüpwe föri ächechchemen ei fansoun chuulap lón ewe efisuwen maram. 42Öüpwe imweimw imw likachchooch lón üküükün fisu rän. Ekkewe chón wilipósun Israel meinisin repwe nóm lón imw likachchooch, 43pwe mwirimwirimi kana repwe silei pwe ngang üwa föri pwe ekkewe chón Israel repwe nóm lón imw likachchooch lupwen üwa emmwenirewu seni ewe fönü Egypt. Ngang ewe SAMOL ämi we Kot.”
44Ina minne, Moses a ngeni ekkewe chón Israel ekkeei kapasen öüröür fänäsengesin än ewe SAMOL kewe fansoun chuulap mi fis iteiten ier.
Ewe apüra mi mwirinnö me ewe pilawa mi pin(Exodus 27:20-21)
24Iwe, ewe SAMOL a apasa ngeni Moses, 2“Kopwe öllük ngeni ekkewe chón Israel pwe repwe uweato reemw apüra mi mwirinnö mi unguung seni föün olif fäniten ekkewe laamp pwe repwe chök sópwósópwóló le tittin. 3Aaron epwe tüttümwünü ekkewe laamp mi nóm mwen ewe SAMOL lükün ewe refiref mangaku mi refiieló ewe Pisekin Pwärätä mi nóm lón ewe Imw Mangaku Leenien Chufengen, pwe ekkeei laamp repwe chök sópwósópwóló le tittin seni lekkuniól tori lesossor. Ei epwe ew öllük tori feilfeilló chök fänitemi me ekkewe pilóón aramas repwe feitto me mwirin. 4Aaron epwe wiisen tümwünü angangen ekkewe laamp mi nóm wón ewe leenien etittin mi för seni kolt mi nóm mwen ewe SAMOL pwe repwe titttin fóchófóch.
5“Iwe, kopwe angei pilawa mi amas o mwirinnö o kopwe umwuni engol me rüöföw pilawa seni. Kopwe ääni üküükün ruu na engolun ew efa ika rüwänü kuóche pilawa mi amas fäniten eföw me eföü pilawa. 6Kopwe etetteli ekkewe föün pilawa wón ewe cheepel mi för seni kolt mi mwirinnö mi nóm mwen ewe SAMOL. Ekkewe föün pilawa repwe nóm lón ruu tettel nge repwe akkawonoföw wón ew tettel. 7Iwe, kopwe amworomworätiw ekkóch kewe appach mi pwokkus o mwirinnö ünükkün ew me ew tettel. Ei epwe ew kinikinin ewe asóren mwöngö epwe ekkesiwili ewe pilawa pwe epwe ew asór mi keek wón ekkei ngeni ewe SAMOL. 8Iteiten ränin Sabbat, ei pilawa epwe iseisewu me mwen ewe SAMOL fänäsengesin ekkewe chón Israel pwe epwe ew pwon esap mwüchchüló. 9Ekkewe föün pilawa enen Aaron me nöün kewe mwän, iir repwe mwöngö lón ew leeni mi pin, pwokiten iei ewe pilawa mi unusen pin wiisen ekkewe souasór och kinikin seni ekkewe asór ngeni ewe SAMOL mi keek wón ekkei. Iei ew öllük esap mwüchchüló.”
Chappen tipisin kapas turunufas
10“Lón ew ränin, emön mwän nöün emön fiin Israel, nge saman emön re Egypt a fiu ngeni emön leiin ekkewe re Israel. 11Iwe, lupwen ar fiu, ewe mwän nöün ewe fiin Israel a turunufasei iten ewe SAMOL ren ew óttek. Ina minne, ra emmwenato ätewe ren Moses. (Iten inen ätei, Shelomith, nge neminnei i nöün Dibri seni ewe einangen Dan.) 12Iwe, ra kalapwusei ätei tori an epwe fat ngeniir letipen ewe SAMOL.
13Mwirin, ewe SAMOL a apasa ngeni Moses, 14“Kopwe uweawu ätewe mi óttek lükün ewe leeni ia öüwa asóósó ie. Iwe, meinisin chókewe iir mi rong än ätewe fós repwe isettä pöüür wón möküran. Mwirin, meinisin ewe mwiichen chón Israel repwe mónei faaw ngeni ätewe. 15Mwirin, kopwe apasa ngeni ekkewe aramasen Israel: ‘Emön a ótteki Kot epwe fókkun köpwüng o mwärelong fän chappen an tipis. 16Emön a turunufasei iten ewe SAMOL epwe fókkun ninniiló. Unusen ewe mwiichen chón Israel meinisin repwe mónei faaw ngeni ätewe. Emön chón ekis mi nóm leiimi ika emön chón Israel a kapasen turunufasei iten ewe SAMOL, epwe chök ninniiló.
17“ ‘Emön a angei manawen emön aramas, epwe pwal ninniiló. 18Emön a niieló nöün emön aramas maan, epwe püngütiw unusen liwinin ewe maan. Epwe liwini ewe maan mi mä ngeni emön maan mi manaw. 19Emön aramas mi efeiengawa pwal emön aramas; epwe fis ngeni i usun chök ewe feiengaw i a föri: 20liwinin efóch chuu mi kup pwal efóch chüü, liwinin eföw föün maas mi feiengaw pwal eföw föün maas, liwinin efóch nii mi ttül pwal efóch nii. Ese lifilifil ika ifa usun än emön aramas efeiengawa pwal emön aramas, epwe pwal ina chök usun an epwe angei chappan. 21Iö a niieló emön maan, i epwe ekkesiwili ewe maan, nge iö a niieló emön aramas, epwe fókkun ninniiló. 22Ekkeei öllük ra weneiti ekkewe chón ekis mi nóm leiimi me ekkewe chón Israel seni ar upwutiw. Ngang ewe SAMOL ämi we Kot.’ ”
23Mwirin än Moses apasa ekkeei kapasen öüröür ngeni ekkewe chón Israel, ra emmwenawu ätewe mi óttek lükün ewe leeni ia ra asóósó ie o ra mónei faaw ngeni i. Iei usun ekkewe aramasen Israel ra föri minne ewe SAMOL a öllük ngeni Moses.
Ewe Sabbat lón ewe efisuwen ier
25 Iwe, lupwen Moses a nóm wón ewe Chuuk Sinai, ewe SAMOL a apasa ngeni, 2“Kopwe apasa ngeni ekkewe aramasen Israel ekkeei kapasen öüröür: ‘Lupwen öüpwe tolong lón ewe fönü ngang üpwe ngeni kemi pwe fönüemi, öüpwe awora fäniten ewe fönü ew fansoun sabbat ngeni ewe SAMOL iteiten fisu ier. 3Lón üküükün wonu ier öüpwe fótuki ämi kewe tännipi o limeti le emwii ekkewe irän lón ämi kewe tännipin irän wain o kinii uwään fótäämi. 4Nge lón ewe efisuwen ier epwe wor ew sabbat ew fansoun asöösö fäniten ewe fönü an epwe piniló, epwe ew sabbat ngeni ewe SAMOL. Öüsap fótuki och lón ämi kewe tännipi, öüsap pwal limeti le emwii ekkewe irän lón ämi kewe tännipin irän wain. 5Öüsap kinii uwään minne a pwisin pwükütä, öüsap pwal kinii uwään ekkewe irän wain ese wor emön a tümwünür, pün iei ew ierin asöösö fäniten ewe fönü. 6Iwe, ese lifilifil ika meet mi pwisin määritä me wón ewe fönü lón ewe ierin Sabbat epwe ina mwöngö fänitemi. Epwe pwisin fänitemi, fäniten nöümi amanaw mwän me fefin, pwal fäniten nöümi chón angang mi angei liwinin me ekkewe chón ekis mi chök nómwun asóósó leiimi, 7pwal fäniten enen nöümi kewe maanfesir me ekkewe maan mwacho mi nóm lón fönüwemi. Meinisin minne uwään fönüwemi mi chök pwisin pwükütä epwe fäniten ämi öüpwe mwöngö.
Ewe ierin Suupili
8“ ‘Öüpwe älleani fisu ierin Sabbat, wewen, öüpwe älleani fisu ngeni fisu ier. Iwe, kapach fengen üküükün ekkewe fisu ierin Sabbat, iwe, epwe wor fääik me tiuw ier. 9Mwirin, lón ewe äengolun ränin ewe efisuwen maram öüpwe ettiki rappwa ekis meinisin. Lón ei ränin omwusomwusen tipis öüpwe ettiki rappwa leemelen unusen fönüwemi. Epwe tikittam o leüommóng. 10Öüpwe epinaló ei elimeen ier o arongafeili leemelen unusen ewe fönü ngeni aramasan meinisin pwe iei ra ngasaló. Ei ier epwe ew ierin suupili fänitemi. Emön me emön leiimi epwe angeisäfäli pwükütän fönüwan, pwal emön me emön leiimi epwe liwinsäfäliti en me an famili. 11Ewer, ei elimeen ier epwe ew ierin suupili fänitemi. Lón ei ier, öüsap fóffót, öüsap isenaló lón imwen iseis uwään minne mi pwisin pwükütä, öüsap pwal föri wain seni uwään ämi ekkewe irän wain mi chök pwisin määritä wón ar. 12Pün iei ew ierin suupili epwe pin mereemi. Öüpwe chök mwöngö seni minne a pwisin pwükütä me lón ekkewe tännipi.
13“ ‘Iwe, lón ei ireni suupili emön me emön leiimi epwe angeisäfäli fönüwan.
14“ ‘Nge ika ka amöömöló ngeni chón órum ew fönü ika mööni seni chón órum ew fönü, öüsap kirikiringaw fengen lefiilemi. 15Are ka mööni seni chón órum ew fönü, kopwe ngeni i liwinin ewe fönü alóngólóng wón üküükün fitu ier me mwirin ewe fansoun suupili, nge liwinin an epwe amöömö ngenuk epwe alóngólóng wón üküükün fitu ier en ka tongeni kinii uwään irän ewe fönü. 16Iwe, kopwe äwättetä liwinin ewe fönü alóngólóng wón üküükün chómmóngun ekkewe ier, nge kopwe ekisätiw liwinin ewe fönü alóngólóng wón üküükün chókisikiisin ekkewe ier, pün chón órum we epwe amöömö ngenuk ewe fönü alóngólóng wón üküükün chómmóngun ekkewe ier ka tongeni kinii uwään irän ewe fönü. 17Iei minne, öüsap kirikiringaw fengen lefiilemi, nge öüpwe nuokkusiti ämi we Kot; pün ngang ewe SAMOL ämi we Kot.
18“ ‘Iwe, öüpwe föri pwüngün äi kewe öllük o öpwönüetä äi kewe pwüüng pwe öüpwe nónnóm lón ewe fönü fän kinamwe. 19Mwirin, ewe fönü epwe efisätä uwa pwe ämi öüpwe mwöngö tori öüwa mótüló, öüpwe pwal nónnóm lón ewe fönü fän kinamwe. 20Nge are öüpwe eiis o apasa, “Meta äm aipwe eni lón ewe efisuwen ier are esap mwüümwütä äm aipwe tongeni fóffót ika aisap pwal ionifengeni uwään äm kewe irä?” 21Iwe, iei pölüwan: Ngang üpwe tiinato äi feiöch wómi lón ewe awonuwen ier pwe uwään ewe fönü epwe naf fäniten an epwe älisi kemi lón üküükün ülüngät ier. 22Iwe, lupwen öüpwe fóffót lón ewe awalüwen ier, nge öüpwe chök chüen mwöngö seni ekkewe uwään lóóm. Öüpwe sópwósópwóló le mwöngö seni ewe uwään lóóm tori öüwa kiniielong uwään ewe rääs lón ewe ettiuwen ier.
23“ ‘Iwe, öüpwe chechchemeni pwe öüsap amöömöfócheeló ewe fönü, pwokiten ewe fönü wesewesen fönüwei, nge ämi öüwa usun chök chón ekis pün öüwa chök nómwun asóósó wón reei. 24Leemelen unusen ewe fönü öüwa nóm lón, öüpwe awora mwüümwütän än ewe chón amöömöló fönü epwe tongeni möönisäfäli fönüwan.
25“ ‘Are emön me leiimi ämi ekkewe chón Israel a wöwingawaló o a amöömöló och kinikinin fönüwan, emön määrärin ätei mi kkan ngeni a tongeni feitto o mööni ewe fönü pwiin we epwe amöömöló. 26Are esap wor emön määrärin ewe mwän an epwe mööni ewe fönü, nge mwririn, pwisin i ewe aramas mi amöömö a wor an tüfich o a naf ngeni an epwe tongeni möönsäfäli ewe fönü, 27iwe, a wor an pwüüng an epwe möönsäfäli ewe fönü seni ewe aramas a mööni ewe fönü. Iwe, liwinin ewe fönü an epwe möönsäfäli epwe alóngólóng wón iteiten ekkewe ier mi chüen nóm tori ewe Ierin Suupili me mwirin. Mwirin, än ewe minne fönüwan ewe fönü a möönsäfäli ewe fönü, a tongeni liwiniti fönüwan we. 28Nge are ätewe minne pwükütän fönüwan ewe esap naf ngeni liwinin an epwe möönsäfäli fönüwan we, iwe, ewe mi mööni ewe fönü epwe chök fönüweni tori ewe Ierin Suupili. Iwe, lón ewe Ierin Suupili, ewe fönü epwe liwinsäfäliti ewe minne pwükütän fönüwan ewe. Mwirin, ätewe epwe liwinsäfäliti fönüwan we.
29“ ‘Are emön aramas a amöömöló ew imw mi nóm lón ew telinimw mi tittiló, a wor än ei aramas pwüüng an epwe tongeni möönsäfäli ewe imw lón üküükün unusen ew ier me mwirin an amöömöló. Lón üküükün ei fansoun, mi wor än ewe chón amöömö pwüüng an epwe möönsäfäli ewe imw. 30Nge ika esap möönsäfäli ewe imw lón üküükün unusen ewe ew ier, ätewe mi mööni ewe imw mi nóm lón ewe telinimw mi tittiló epwe imwenifóchei ewe imw, i me mwirimwirin kana. Iwe, ewe imw esap liwinsäfäliti ewe minne imwan ewe lón ewe Ierin Suupili. 31Nge ekkewe imw mi nóm lón ekkewe sóóp esap wor tiit mi pwellieló ünükkür repwe chök nóm lón tettelin kana leeni mi nóm lón ekkewe amassawa. Aramas ra tongeni repwe möönsäfälir, nge lón ewe Ierin Suupili ekkewe imw repwe liwinsäfäliti ekkewe minne imwer kewe.
32“ ‘Iwe nge iteiten fansoun meinisin a wor än chón ewe einangen Levi pwüüng ar repwe tongeni möönsäfäli ew imw iir ra amöömöló me lón ew leiin ar kewe telinimw. 33Iei usun chón ewe einangen Levi ra tongeni möönisäfäli pisekir. Are emön chón ewe einangen Levi a amöömöló ew imw me lón ekkewe telinimw ra nóm lón, ewe imw epwe liwinsäfäl ngeni ewe chón amöömöló lón ewe Ierin Suupili pwokiten ekkewe imw lón ekkewe telinimw än chón ewe einangen Levi ikkana chök pisekir me leiin ekkewe chón Israel. 34Nge resap tongeni amöömöló ekkewe fönüwen atake mi nóm pwellin ünükkün ar kewe telinimw, pün ikkeei fönüwer tori feilfeilló.
35“ ‘Are emön me leiin määrärimi kewe chón Israel a tolong lón osupwangen wöwingaw, ämi öüpwe älisiir usun chök ämi älisi emön waasöla me chón ekis mi nóm leiimi o mwüüt ngeniir pwe repwe tongeni sópwósópwóló le nónnóm leiimi. 36Kosap angei cheikingin ika manawen ewe mooni en ka mwüüt ngeniir pwe repwe liwinimang senuk. Nge kopwe pwääri óm nuokkusiti Kot ren óm mwüüt ngeniir pwe repwe tongeni sópwósópwóló le nónnóm leiimi. 37Kopwe chechchemeni pwe kosap fókkun angei manawen noum mooni seni pwiimw we, kosap pwal amöömö ngeni i onom mwöngö ren óm kopwe angei óm wiil seni. 38Ngang ewe SAMOL ämi we Kot üwa emmwenikemiiwu seni ewe fönü Egypt pwe üpwe ngeni kemi ewe fönü Kanaan o üpwe pwal ämi Kot.
39“ ‘Iwe, are emön määrärum chón Israel mi nóm reemw a wöwingawaló o a amöömöló pwisin inisin ngenuk, kosap eriäni i an epwe angang usun emön aramaw. 40Kopwe föri ngeni i pwe epwe usun nónnómwun emön chón angang mi angei liwinin ika usun emön waasöla mereemw. I epwe angang ngenuk tori chök ewe Ierin Suupili. 41Lón ena fansoun, i me nöün kana resap chüen angang ngenuk. Repwe liwinsäfäliti ar einang me fönüwen ar leewo. 42Pwokiten ekkewe chón Israel iir neii chón angang, ngang üwa emmweniirewu seni Egypt, iei minne, esap wor emön epwe ääniir amöömö pwe repwe amanaw. 43Kopwe pwääri óm nuokkusiti Kot ren óm kirekiröch ngeniir. Kosap fókkun föri óm nemenemengaw wóór ren óm kopwe nemenem pöchökkül ngeniir.
44“ ‘Öüpwe kamö nöümi amanaw mwän me fefin seni leiin ekkewe chón ekis mi nónnóm leiimi. Öüwa tongeni kamö nöümi amanaw seniir. 45Öüwa pwal tongeni kamööni ekkóch seni leiin ekkewe waasöla mi nóm leiimi me pwal seni chón ar kewe einang iir mi upwutiw me lón fönüwemi. Ikkeiir ekkewe repwe le wiliti pwe iir pisekimi. 46Öüwa tongeni likitiiretiw ngeni nöümi kana pwe repwe älemwiriniir me mwirimi, repwe älemwiriniir usun chök nge pisekir. Iwe, repwe nöümi amanaw feilfeilló. Nge fänäsengesin pwiimi kewe, ekkewe chón Israel, öüsap nemenem pöchökül fengen lefiilemi.
47“ ‘Are emön chón ekis ika emön waasöla mi nóm leiimi a pisekisekiló, nge emön määrärum kewe chón Israel a wöwingawaló o a amöömöló pwisin inisin ngeni ewe chón ekis mi nóm leiimi ika ngeni emön chón än ewe chón ekis eterenges, 48a chüen wor än ewe chón Israel pwüüng än emön epwe möönisäfäli mwirin an pwisin amöömló i. Emön me leiin määrärin ätewe a tongeni möönisäfäli. 49Emön pwiin saman ika mongeen inan ika emön wesewesen fitukan me lón an eterenges a tongeni an epwe möönisäfäli ätei. Nge ika a pisekisekiló; iwe, i a tongeni pwisin möönisäfäli inisin. 50Ätewe mi pwisin amöömöló inisin me ewe chón kamö repwe älleani üküükün ekkewe ier seni ewe ier ätei a pwisin amöömöló inisin tori ewe Ierin Suupili. Ewe liiwin fäniten än ätewe epwe ngasaló epwe alóngólóng wón üküükün ekkewe lussun ier tori ewe Ierin Suupili - ika ifa üküükün liwinin emön chón angang mi angang fäniten liiwin lón ekkana üküükün iteiten ier. 51Are mi chüen wor chómmóng ier ra nóm tori ewe Ierin Suupili, ewe mi ngasaló epwe möönätiw och kinikin mi wätte seni ewe mooni ewe mi mööni a püngütiw fäniten an epwe ngasaló. Üküükün ei liiwin ewe mi ngasaló epwe püngütiw epwe alóngólóng wón ekkewe lussun ier. 52Nge are ra chök chókisikiis ekkewe ier ra chüen nóm tori ewe Ierin Suupili, ätewe mi ngasaló epwe föri üküükün liwinin ekkewe lussun ier pün epwe ina üküükün i epwe püngütiw pwe liwinin an ngasaló. 53Ätei epwe usun chök nge i emön chón angang mi angang fäniten liiwin iteiten ier me ier. Öüpwe nengeni fichi pwe ätewe mi nöüni i amanaw esap nemenem pöchökkül ngeni i.
54“ ‘Nge ika mwo pwe ewe mi ngasaló esap ngasaló ren än emön epwe mööni lón ew me leiin ekkeei lapalap, i me nöün kana repwe ngasaló lón ewe Ierin Suupili. 55Pün ekkewe aramasen Israel iir chón angang ngeniei. Iir neii chón angang ngang üwa emmwenirewu seni ewe fönü Egypt. Ngang ewe SAMOL ämi we Kot.
Feiöch fäniten älleasochis
26 “ ‘Öüsap föri uluulun önümwäl fänitemi, öüsap pwal falei och uluulun önü ika öüüwetä efóch üür mi pin fänitemi. Öüsap pwal öüüwetä eföw faaw mi ouluul ngeni uluulun önü pwe öüpwe fel ngeni me lón fönüwemi. Ngang ewe SAMOL ämi we Kot.
2“ ‘Öüpwe öpwönüetä pinin äi kewe ränin Sabbat o meniniti imwei mi pin. Ngang ewe SAMOL.
3“ ‘Are öüpwe föri pwüngün äi kewe öüröür o tümwünüöchüw le öpwönüetä äi kewe öllük, 4mwirin, ngang üpwe öpüngätiw üüt ngeni kemi lón fansoun mi weneiti. Iwe, ewe fönü epwe awora ekkewe irän mwöngön lepwül, nge ekkewe irän lón ekkewe mälämäl repwe uwa. 5Ewe fansoun ämi wichii umwun wiit epwe sópwósópwóló tori ewe fansoun ämi kinikin föün irän wain, nge ewe fansoun ämi kinikin föün irän wain epwe sópwósópwóló tori ewe fansoun ämi fóffót. Iwe, öüpwe mwöngö meinisin ekkewe mwöngö öüwa mochen o öüpwe nóm lón fönüwemi lón nükünüköchün kinamwe.
6“ ‘Ngang üwe fangoto kinamwe lón ewe fönü. Iwe, öüpwe kóónóló, nge esap wor och mettóch epwe eniwokkusu kemi. Ngang üpwe ösüweló seni lón ewe fönü ekkewe maanmwacho, üpwe pwal tümwünü kemi än chón opwuta kemi resap tolong lón fönüwemi o efeiengawa kemi ren ketilas. 7Ngang üpwe tapweri chón opwuta kemi o öüpwe niireló ren ketilas. 8Limmön me leiimi repwe cheei ipwükü, nge ipwükü me leiimi repwe cheei engol ngöröw. Iwe, öüpwe niieló ekkewe chón opwuta kemi meinisin ren ketilas.
9“ ‘Pün ngang üpwe äsepa ngeni kemi wón mesei lón äi ümöümöch. Üpwe föri pwe öüpwe up o chómmóngóló, üpwe pwal önüküchchara äi pwon ngeni kemi. 10Öüpwe chök chüen mwöngö minne öüwa kinii lón ewe ier a ló tori ämi öüpwe ömwökütawu ewe minen lóóm pwe öüpwe wääsi leenien ewe mwöngö mi fö. 11Ngang üpwe anómwu imwei mi pin leiimi, nge ngang üsap opwut ämi. 12Ngang üpwe fätäl leiimi pwe ngang üpwe ämi Kot, nge ämi öüpwe neii aramas. 13Ngang ewe SAMOL ämi we Kot, üwa emmwenikemiiwu seni Egypt pwe ekkewe chón Egypt resap chüen nöüni kemi amanaw. Ngang üwa kupii ämi kewe öüwafaren amanaw seni wón üwemi o ötüfichi kemi pwe öüpwe fätäl nge möküremi epwe wenetä.
Chappen tipisin älleasolap
14“ ‘Nge are öüsap öüseling ngeniei o öüsap föri pwüngün äi kewe öllük meinisin, 15ika öüpwe pwal opwut äi kewe öüröür o pwurätiw äi kewe öllük, pün öüsap föri pwüngün äi kewe öllük meinisin, nge öüwa atai äi we pwon, 16mwirin, iei meet ngang üpwe föri ngeni kemi: üpwe emwittirato wómi nuokkus mi ömmösök fiti samwaw pwe öüpwe kichchüüchüló ren, pwal pwichikkar epwe ochunaló mesemi o ekisikisaló pöchökkülen manawemi. Iwe, epwe lussumwäl ämi öüpwe fóffót, pwokiten ekkewe chón opwuta kemi repwe eni uwään fótäämi. 17Ngang üpwe säpesäpengaw ngeni kemi pwe öüpwe kuf ren ekkewe chón opwuta kemi. Iwe, chókana mi opwuta kemi repwe nemeni kemi. Iwe, öüpwe sü inamwo ika esap wor emön a tapweri kemi.
18“ ‘Nge are öüsap mochen öüseling ngeniei me mwirin än ekkeei feiengaw meinisin ra tori kemi, ngang üpwe alapaló äi öpwüngü kemi fän fisu pwokiten ämi tipis. 19Ngang üpwe atai ämi tipeförean lamalamtekia. Ngang üpwe föri pwe ewe läng mi nóm asemi epwe usun chök mächä, nge ewe pwül mi nóm faami epwe usun chök piraas. 20Ämi pöchökkül epwe lussumwäl, pün ewe fönü esap awora irän mwöngön lepwül, pwal irän lón ekkewe mälämäl resap uwa.
21“ ‘Nge are öüwa chüen lukumach ngeniei o öüsap mochen öüpwe öüseling ngeniei, ngang üpwe awarato määlap wómi nge epwe lap seni fän fisu fäniten ämi kana tipis. 22Iwe, üpwe pwal tiinato ekkewe maanmwacho leiimi pwe repwe efeiengawa nöümi kana, repwe pwal niieló nöümi pwiin maan o achókisikisikemiiló, pwe alen fönüwemi repwe pöönüló.
23“ ‘Nge are öüsap käeö seni äi öpwüngü kemi inamwo are üwa föri ngeni kemi ekkeei mettóch, nge öüpwe chök sópweló le üüngeniei, 24pwisin ngang üpwe üüngeni kemi o efeiengawa kemi lap seni fän fisu fäniten ämi kana tipis. 25Iwe, ngang üpwe tiinato mwiichen soufiu pwe repwe ngeni kemi chappen tipisin ämi atai ewe pwon. Lupwen öüpwe süülong lón ämi kewe telinimw, ngang üpwe tiinato ew matter leiimi pwe epwe efeiengawa kemi me ikenan. Iwe, öüpwe oolong lepöün chón opwuta kemi. 26Lupwen ngang üpwe ekisikiisaló enemi mwöngö; iwe, engol fefin repwe umwuni eneer pilawa lón ew chök uumw o repwe paunnei ewe pilawa o inetii fengeni. Iwe, öüpwe mwöngö nge öüsap möt ren.
27“ ‘Nge are öüsap älleasochis ngeniei mwirin äi föri ngeni kemi ekkeei riäfföü, pwe öüwa chök sópweló le üüngeniei, 28mwirin, ngang üpwe üüngeni kemi lón äi soong o pwisin ngang üpwe emiriti kemi fän fisu fäniten ämi tipis. 29Öüpwe ocheei fituken nöümi kewe äät me fituken nöümi kewe nengngin. 30Ngang üwe ataeló ämi kewe leenien fel ngeni önümwäl wón ekkewe leeni mi tekia, üpwe pwal pökükisietiw ämi kewe róngen asóren keek appach mi pwokkus. Iwe, üpwe ochukuchukätä inisin ämi kewe soomä wón ämi kewe uluulun onümwäl ese wor manaw lór. 31Ngang üpwe ataeló ämi kewe telinimw o apönnü ämi kewe leeni mi pin. Iwe, ngang üsap fókkun pwapwaiti äi üpwe tini pwoöchchün pwoen ämi kewe asór. 32Ngang üpwe ataeló fönüwemi we pwe ekkewe chón opwuta kemi mi relefönüló ie repwe fókkun mäiru ren. 33Ngang üpwe angei neii ketilas o tapweekemi, üpwe atoropasakemi pwe öüpwe nóm leiin chón ekkewe mwüü. Fönüwemi epwe taaló, nge ämi kewe telinimw repwe taatakkis. 34Mwirin, ewe fönü epwe pwapwaäsini an kewe ierin Sabbat lón üküükün ekkewe fansoun meinisin a pöönüló lupwen ämi öüpwe nóm lón fönüwen ekkewe chón opwuta kemi. Mwirin, ewe fönü epwe asöösö o pwapwaäsini an kewe Sabbat. 35Lón üküükün ekkewe fansoun meinisin ewe fönü a pöönüló, epwe wor än ewe fönü asöösö, pün esap wor an asöösö lón ekkewe fansoun Sabbat lupwen ämi öüwa nóm lón.
36“ ‘Nge ren chókewe me leiimi mi chüen manaw, ngang üpwe föri pwe leluker epwe uren nuokkus me lón fönüen chón opwuter, pün repwe mwo nge sü ren mwaataten chöön irä ren än äsäpwääl pööniir. Repwe sü usun chök ar repwe süü seni ar niweiti efóch ketilas, repwe turuló nge esap wor emön a tapweriir. 37Repwe chepetek wón emön me emön leiir, usun chök ar repwe chepetek lupwen repwe süü seni än efóch ketilas epwe efeiengawer, inamwo ika esap wor emön epwe tapweriir. Epwe iei usun ämi öüsap tongeni üütä me mwen ekkewe chón opwuta kemi. 38Ämi öüpwe määfeiengaw me leiin aramasen chón ekkewe mwüü. Fönüwen chón opwuta kemi epwe oromikemiiló. 39Chokana me leiimi mi chüen manaw repwe chök kirowuló me lón ekkewe fönüwen chón opwuter pwokiten ar kewe tipis, repwe pwal kirowuló pwokiten än semer kewe tipis.
40“ ‘Nge are repwe pwärätä ar kana tipis me än semer kewe tipis, tipisin ar kirikiringaw ngeniei me ar üüngeniei, 41iei popun pwe ngang üwa üüngeniir o üwa tiinireló lón fönüwen ekkewe chón opwut iir, mwirin, lupwen leluker esap sirkomsais epwe tekisón o repwe angei chappen ar tipis, 42ngang üpwe chechchemeni äi pwon ngeni Jakob me äi pwon ngeni Isaak me äi pwon ngeni Abraham. Ngang üpwe pwal chechchemeni ewe fönü. 43Pün ewe fönü mi koturuló epwe pwapwaäsini an kewe fansoun Sabbat lupwen a pöön pün resap nóm lón. Iir repwe angei chappen ar tipis pwokiten ra opwut äi kewe öllük o niopwutäsini äi kewe öüröür. 44Iwe, iei mwo ekkeei, nge ngang üsap opwut iir ika niopwutäsiniir lupwen repwe nóm lón fönüwen ekkewe chón opwuter. Pün üsap ökkölümwü le atai äi pwon ngeniir ren äi üpwe unusen arosereló. Ngang ewe SAMOL ar we Kot. 45Nge fänäsengesir, ngang üpwe chechchemeni ewe pwon üwa ääni ngeni ar kewe leewo iir ekkewe ngang üwa emmwenirewu seni Egypt me mwen mesen chón ekkewe mwüü pwe ngang üpwe ar Kot. Ngang ewe SAMOL.’ ”
46Ikkeei ekkewe öüröür me pwüüng me öllük ewe SAMOL a föri me wón ewe Chuuk Sinai o a ngeni Moses fäniten pwüngün nónnómwun lefiilan me ekkewe chón Israel.
Möömön ekkewe aramas me pisek mi käimwüló fäniten Kot
27 Iwe, ewe SAMOL a apasa ngeni Moses, 2“Kopwe ngeni ekkewe aramasen Israel ekkeei kapasen öüröür: ‘Lupwen emön aramas epwe ääni ew pwon mi weires pün a pwon an epwe fangaló emön aramas ngeni ewe SAMOL, nge epwe le chök fang ngeni üküükün liwinin öüchchean emön aramas, 3iwe, iei öüküükün ewe liwinin epwe aea. Üküükün liwinin öüchchean emön mwän seni ier rüwe tori wone epwe lime shekel silifer (ika ew ew na rüwänü paun silifer), alóngólóng wón ewe shekel ra aea le öüküük lón ewe imw mi pin. 4Nge are ewe aramas epwe emön fefin; iwe, üküükün liwinin öüchchean epwe iliik shekel silifer (ika engol me ruu aunus silifer). 5Are ewe aramas emön äät lefiilen limu ier tori rüwe ier; iwe, üküükün liwinin öüchchean epwe rüwe shekel silifer (ika walüw aunus silifer). Nge are i emön nengngin, iwe, üküükün liwinin öüchchean epwe engol shekel silifer (ika rüwänü aunus silifer). 6Nge are ewe aramas i emön äät a nóm lefiilen ew maram tori limu ier; iwe, üküükün liwinin öüchchean epwe limu shekel silifer (ika ruu aunus silifer). Nge are i emön nengngin a nóm lefiilen ew maram tori limu ier, iwe, üküükün liwinin öüchchean epwe ülüngät shekel silifer (ika ew ew na rüwänü aunus silifer). 7Are ewe aramas a emön mi ierini wone feittä; iwe, üküükün liwinin öüchchean emön mwän epwe engol me limu shekel silifer (ika wonu aunus silifer), nge fäniten emön fefin epwe engol shekel silifer (ika rüwänü aunus silifer). 8Are emön aramas a ääni ew pwon nge i a fókkun wöwingaw an epwe möönätiw ewe öüküükün liiwin mi affat, iwe, ätewe epwe emmwenato ewe aramas i a ääni ewe pwon fänitan fän mesen ewe souasór. Iwe, ewe souasór epwe öükü och öüküükün liwinin öüchchean ewe aramas nge epwe alóngólóng wón üküükün tüfichin ätewe mi ääni ewe pwon.
9“ ‘Are emön aramas a pwon pwe epwe fangaló emön maan mi nóm lón tettelin limöch - ewe sókkun maan mi tongeni ketiw pwe epwe ew asór ngeni ewe SAMOL, iwe, an we liffang ngeni ewe SAMOL a pin. 10Iwe, ätewe esap tongeni an epwe ekkesiwili ika atolonga emön maan lón leenien pwal emön, esap pwal ekkesiwili emön mi mwirinnö ngeni emön mi ngaw ika emön mi ngaw ngeni emön mi mwirinnö. Nge ika epwe fis ei sókkun ekkesiiwil, iwe, ewe emön maan a angeei akkomw me ekkesiwilin we repwe pin me rüömön. 11Nge are emön a ääni pwon emön maan mi nóm lón tettelin limengaw, emön esap fich ngeni pwe epwe emön mönün asór ngeni ewe SAMOL, iwe, ewe aramas epwe uweato ewe maan fän mesen ewe souasór. 12Iwe, ewe souasór epwe wiisen filätä üküükün öüchchean ewe maan. Ese lifilifil ika meet ewe souasór a filätä pwe ina üküükün liwinin öüchchean; iwe, epwe ina meet üküükün. 13Nge are ewe minne nöün ewe maan a mochen möönsäfäli ewe maan, i epwe fókkun püngütiw üküükün liwinin öüchchean ewe maan mi köüküló meren ewe souasór o apachätä ew na limu ngeni üküükün liwinin öüchchean ewe maan.
14“ ‘Are emön aramas a fangaló imwan pwe epwe och mettóch mi pin fäniten ewe SAMOL, ewe souasór epwe wiisen filätä öüchchean ewe imw ika mi mwirinnö ika mi ngaw. Iwe, ese lifilifil ika meet öüküükün liwinin öüchchean ewe imw ewe souasór a filätä; iwe, epwe le chök nóm wón ena üküükün. 15Nge are ewe mwän mi fangaló imwan we a mochen epwe möönsäfäli ewe imw; iwe, epwe apachätä ew na limu ngeni üküükün liwinin öüchchean ewe imw. Mwirin, i epwe le pwal imweni säfäli ewe imw.
16“ ‘Are emön aramas epwe fangaló ngeni ewe SAMOL och kinikin ew fönüwen tännipi seni fönüwen an leewo; iwe, üküükün liwinin öüchchean epwe alóngólóng wón üküükün minne a tongeni fótetiw wón ewe fönü. Üküükün liwinin ew homer ika wone paun föün parli mi tongeni fótetiw wón ewe fönü, epwe lime shekel föün silifer. 17Are emön aramas a mochen epwe fangaló ngeni ewe SAMOL an fönüwen tännipi lón ewe Ierin Suupili; iwe, üküükün liwinin öüchchean ewe tännipi epwe le chök nómwóló wón üküükün minne a fen köüküló meren ewe souasór. 18Nge are ätewe a mochen epwe fangaló an fönüwen tännipi mwirin ewe Ierin Suupili, mwirin, ewe souasór epwe wiisen föri üküükün liwinin öüchchean ewe fönü, nge epwe alóngólóng wón üküükün ekkewe lussun fitu ier mi chüen nóm tori ewe Ierin Suupili me mwirin. Nge üküükün liwinin öüchchean epwe le kotur wón üküükün ekkewe ier ra fen wes. 19Iwe, are ewe aramas mi fangaló an we tännipi a mochen epwe möönisäfäli; iwe, epwe apachätä ew na limu ngeni üküükün liwinin öüchchean ewe tännipi. Iwe, ätewe epwe pwal leenienisäfäli ewe leeni. 20Nge are ewe aramas a filätä pwe esap mochen möönsäfäli ewe tännipi, pwal ika ekkewe souasór ra fen amöömöló ngeni pwal emön aramas; iwe, ewe fönü esap chüen tongeni an epwe amöömösäfäl. 21Lupwen ewe tännipi epwe kepichiló lón ewe Ierin Suupili, ei tännipi epwe le pin, epwe le ew tännipi mi käimwüló fäniten ewe SAMOL. Ei tännipi epwe le wiliti ew leenien ekkewe souasór.
22Are emön aramas epwe fangaló ngeni ewe SAMOL ew tännipi i a fen mööni nge esap ew kinikinin fönüen an leewo, 23ewe souasór epwe öükü üküükün liwinin öüchchean ewe leeni seni fansoun än ewe aramas a fangaló ewe tännipi tori ewe Ierin Suupili. Iwe, ewe aramas epwe möönätiw üküükün liwinin öüchchean mi köüküló lón ewe chök rän pwe epwe ew asór mi pin ngeni ewe SAMOL. 24Iwe, lón ewe Ierin Suupili, ewe tännipi epwe liwiniti ewe aramas minne wesewesen fönüwan ewe, ewe chón kamö a mööni seni. 25Iteiten üküükün ewe liiwin fäniten öüchchean och mettóch epwe köük wón ewe shekel ra nöünöü le öüküük lón ewe imw mi pin. Rüwe kerah epwe förätä ew shekel.
26“ ‘Iwe, esap wor emön aramas epwe tongeni fangaló ngeni ewe SAMOL ekkewe mweinöün nöün ekkewe maan, pwokiten ekkewe mweinöü ra fen käimwüló fäniten ewe SAMOL. Ese lifilifil ika emön kowu ika emön siip, i nöün ewe SAMOL. 27Nge are ewe maan epwe emön mweinöün emön ekkewe sókkun maan mi nóm lón tettelin maan mi limengaw; iwe, ätewe minne nöün ewe maan a tongeni möönsäfäli wón üküükün liwinin öüchchean ewe maan minne ewe souasór a fen öükaló, nge epwe apachätä ew na limu ngeni üküükün liwinin öüchchean. Nge are ätewe esap mochen möönsäfäli ewe maan; iwe, ewe souasór a tongeni amöömöló ewe maan ngeni emön aramas wón üküükün liwinin we a fen köüküló.
28“ ‘Nge esap wor emön aramas epwe tongeni amöömöló ika möönsäfäli och minne an nge a fen fangaló ngeni ewe SAMOL, ese lifilifil ika a fangaló emön aramas ika maan ika fönüwen famili, pün iteiten mettóch meinisin mi käimwüló pwe repwe kata ra unusen pin fäniten ewe SAMOL.
29“ ‘Emön aramas mi käimwüló meren ewe SAMOL fäniten an epwe ninniiló esap tongeni an epwe kamösäfäl. Ei sókkun aramas epwe chök ninniiló.
30“ ‘Na engol meinisin seni ewe uwään irän fönü, ese lifilifil ika föün wiit mi määritä wón pwül ika uwään ekkewe sakkopaten irä, än ewe SAMOL. Ewe na engol a pin pün a käimwüló fäniten ewe SAMOL. 31Are emön aramas a mochen epwe möönsäfäli än ewe SAMOL we na engol seni föün irä ika föün wiit; iwe, epwe apachätä ew na limu ngeni üküükün liwinin öüchchean. 32Ewe SAMOL a pwal ääni iteiten naengolun maan mi ällealó seni nöümi kewe pwiin kowu me pwiin siip me kuuch. Iteiten äengolun maan mi pwereló fän wókun ewe chón fóól, ina i epwe käimwüló fäniten ewe SAMOL pün a pin. 33Ewe äengolun maan esap kefililó alóngólóng wón ika emön mi ngaw ika emön mi mwirinnö. Iwe, esap pwal mwüümwütä an epwe katolong emön maan lón leenien ewe äengolun maan. Are enletin pwe ewe äengolun maan epwe ekkesiwil ngeni pwal emön maan, iwe, iir me rüömön, ewe maan me ekkesiwilin we, repwe pin. Iwe, esap wor emön epwe tongeni möönsäfäliir.’ ”
34Ikkeei ekkewe öllük ewe SAMOL a ngeni Moses me wón ewe Chuuk Sinai fäniten ekkewe chón Israel.