Köölün Kechiw

Än Jeremiah Kewe

Letipeta lón Jerusalem

1A ifa me pöönülón ewe telinimw Jerusalem, mi piin ur ren aramas me lóóm! A ifa me an ei a usun chök emön fefin mi mä pwülüwan, ewe mi iteföüló me leiin ekkewe mwüü! I ewe mi usun chök emön finesamol me leiin ekkewe fönü, nge iei a wiliti usun emön amanaw fefin.

2I a kechiwengaw lepwin, chönün mesan ra supwutiw wón sapan. Esap wor emön me leiin ekkewe chón tongei me lóóm a echipa i. Chiechian kewe meinisin ra kirikiringaw ngeni; iir ra wiliti chón opwutan.

3Chón Judah ra ooló, mwirin ar nóm lón riäfföü me angang weires. Ra nóm leiin chón ekkewe mwüü; nge resap küna ew leenien asöösö. Meinisin mi tapweriir ra liäpeniir, nge esap wor efóch aal repwe tongeni süüló wón.

4Ekkewe aal ngeni Zion ra letipeta, pün esap chüen wor emön mi feitto wór ngeni ekkewe fansoun chuulap mi kefilitä. Asamalapen Zion kewe meinisin ra pöönüló, nöün kewe souasór ra ngüüngü, nöün kewe föpwül ra letipeta, nge ewe telinimw a nóm lón marasen riäfföü.

5Ekkewe chón opwut Zion ra wiliti an masta; ekkewe chón koum ngeni ra feffeitä. Ewe SAMOL a atolonga Zion lón riäfföü, pwokiten an kewe tipis mi chómmóng. Nöün kewe ra feilló toowaw, ra ooló ren chón opwutan.

6Ekkewe ling meinisin ra sü seni Zion. Nöün kewe samol ra usun chök chia, resap küna ia repwe mwöngö ie; iir ra sü me mwen ekkewe chón tapweriir nge lón ar apwangapwang.

7Lón fansoun än Jerusalem a nóm lón riäfföü me tókótókfeil, a chechchemeni an kewe pisek öüchchea meinisin a ääni melóm lóóm. Lupwen nöün kewe aramas ra oolong lepöün chón opwutan, esap wor emön a älisi. Ekkewe chón opwut Jerusalem ra nennengeni o ra takiri pwokiten a taaló.

8Jerusalem a tipis chapwüür, iei popun a wesewesen limengaw. Meinisin mi asamolu i me lóóm ra turunufasei, pün ra küna an seleló; ewer, Jerusalem a chök ngüüngü o aopaló wón mesan.

9An limengaw a nóm wón ufan, nge i esap ekieki minne epwe fis ngeni me mwirin. Iei minne an turuló a fókkun ämäirü; esap wor emön epwe echipa. Jerusalem a apasa, “Äi SAMOL, kopwe nengeni äi riäfföü, pün ewe chón opwut ngang a wiil.”

10Ewe chón opwut Jerusalem a angealó an kewe pisek öüchchea meinisin; ewer, a küna än chón ekkewe mwüü ra tolong lón an we imwenfel - iir chókewe en kosap mwüütätä ngeniir pwe repwe nónnóm lón óm mwiich.

11Nöün Jerusalem kewe aramas meinisin ra ngüüngü lupwen ra küütfeil eneer mwöngö; iir ra fangaló ar kewe pisek mi öüchchea pwe ekkesiwilin eneer mwöngö, pwe repwe tongeni manaw. Jerusalem a apasa, “Äi SAMOL, kopwe nennengeni o ekieki usun pün ngang üwa nóm lón turunufas.”

12“Ifa usun, öüsap ekieki usun ei feiengaw, ämi meinisin ekkewe mi pwereló ünükki? Öüpwe nennefeil o küna. Ifa usun, mi wor och riäfföü usun äi riäfföü mi toriei, ewe SAMOL a atooto wóói lón ewe ränin a öpwüngüei lón an soong mi wätte?

13“I a tiinato ekkei seni läng, o tiinätiw lón chüüi. I a emeresaló ew sär pwe pachapachei epwe fiif lón o okullusäfäliei. I a föri pwe üpwe pöönüló, ngang üwa uren samwaw fansoun meinisin.

14“Äi kana tipis ra fööfötä wón efóch öüwafar; pöün ewe Samol a föötifengenir. Äi kana tipis ra ittiwetä wón üwei, iwe, ewe Samol a angei seniei äi pöchökkül. I a atolongaei lepöün chókana ngang üsap tongeni üüngeniir.

15“Ewe Samol a pöütaló neii kewe sounfiu mi pwora meinisin mi nóm reei; i a tiinato ew mwiichen sounfiu pwe repwe maun ngeniei o efeiengawa neii kewe ölüwöl. Ewe Samol a pwuuri ewe Föpwül Judah lón an we leenien üchüüch föün irän wain, usun emön a pwuuri föün irän wain.

16“Iei popun ngang üwa kechiw o chönün mesei a supwusupwutiw. Esap wor emön a kaneto pwe epwe echipaei, esap wor emön a öpöchökküla ngüni. Neii kewe ra fókkun osupwang pwokiten ewe chón opwutaei a okkufuei.

17Zion a eitiewu pöün, nge esap wor emön a echipa. Ewe SAMOL a öpwüngaló fäniten Jakob pwe chón órun kana repwe chón üüngeni; Jerusalem a wiliti och mettóch mi limengaw me leiir.

18“Ewe SAMOL a pwüng, nge ngang üwa üüngeni an öllük. Öüpwe öüseling, ämi chón ekkewe mwüü meinisin; öüpwe nennengeni äi riäfföü. Neii kewe föpwül me neii kewe ölüwöl ra ooló.

19“Ngang üwa kökkööri peliei kewe pwe repwe älisiei, nge ra afangamäei. Neii kewe souasór me neii kewe souakkomw ra mäfeiengaw me lón ewe telinimw lupwen ra küütfeil eneer mwöngö pwe repwe tongeni manaw.

20“Äi SAMOL, kopwe nennengeni usun äi riäfföü! Leuti a fókkun riäfföü, nge lelukei a osukosuk, pün ngang üwa fókkun üleförea ngenuk. Me lükün, ketilasen maun a ninni me lón ekkewe aal; me lón, a wor mäló me lón ekkewe imw.

21“Aramas ra rongorong äi ngüüngü, nge esap wor emön a echipaei. Ekkewe chón opwutaei meinisin ra rongorong usun äi feiengaw; ra pwaapwa ren meet en ka föri ngeniei. Amwo kopwe awarato ewe rän en ka fen pwonei, pwe ekkewe chón opwutaei repwe wewe ngeniei lón äi riäfföü.

22“Ar kewe föfföringaw meinisin ra nóm fän mesom; kopwe öpwüngüür usun óm ka öpwüngüei pwokiten äi kewe tipis meinisin. Äi ngüüngü ra chómmóng o lelukei a apwangapwang.”

2Ewe Samol a pwölüweló ewe Föpwül Zion ren kuchuen an soong! I a oturätiw lingen Israel seni läng ngeni fönüfan; i esap mwo nge ekieki an epwe chechchemeni imwan we imwenfel, iei leenien pwuun pecheen, lón ränin an soong.

2Ewe Samol a ataeló meinisin imwen ekkewe mwirimwirin Jakob, nge esap ääni tong; lón an lingeringer, i a ataetiw ekkewe imwen maun mi pöchökkül än ewe Föpwül Judah. I a oturätiw lepwül ewe mwüün Judah me nöün kewe samol pwe repwe itengaw.

3Lón an soong mi fókkun wätte i a pöküweló mächääna Israel meinisin. I a öükätiw pöüifichin seni an epwe älisi kich lupwen chón opwutach kewe ra feitto pwe repwe maun ngeni kich. I a kü me lón Jakob usun ew ekkei mi ngetenget mi kenaló mettóch meinisin mi nóm ünükkün.

4I a äpera nöün esefich ngeni nöün kewe aramas usun chök nge i chón opwuter; pöüifichin a mollotä. I a niieló ekkewe mi äteöchchün lón Judah meinisin usun chök nge i chón opwuter; i a niinätiw an lingeringer usun ekkei wón ekkewe imw mangaku än ewe Föpwül Zion.

5Ewe Samol a oromaló Israel usun emön chón opwutan. I ataeló än Israel kewe imwen king meinisin o ataatakisi an kewe imwen maun mi pöchökkül. I a pwal achómmónga letipeta me kechiw fäniten ewe Föpwül Judah.

6I a ataetiw imwan we imwenfel; iwe, a usun chök nge ew tännipi; i a ataatakisi an we leenien chuulap. Ewe SAMOL a föri pwe Zion epwe möllükaló an kewe fansoun chuulap mi kefilitä me an kewe ränin Sabbat; i a pöütaló ekkewe king me ekkewe souasór lón an soong mi fókkun wätte.

7Ewe Samol a pöütaló an we róngen asór o likitaló imwan we mi pin. I a atolonga lepöün ekkewe chón opwut pwe repwe ataeló tittin ekkewe imwen king; iir ra mweireiren wiil me lón imwen ewe SAMOL we usun ewe mweireir a fis lón ew ränin chuulap mi kefilitä.

8Ewe SAMOL a öpwüngaló pwe epwe ataetiw ewe tiit pwellin ünükkün ewe Föpwül Zion. I a öükü ewe tiit ren efóch selin öüküük pwe epwe ataeló. Mwirin, esap öükätiw pöün seni an epwe unusen ataeló. Iei minne, i a föri pwe ekkewe imw tekia me ekkewe tiit ra kechiwen lólilen; iir ppök ra taaló.

9Ekkewe asamalapen tittin Jerusalem ra kokotiw lón ewe pwül; ammwöchüür kewe ra kupuló o taaló. Än Jerusalem we king me ekkewe samol ra ooló leiin chón ekkewe mwüü, esap chüen wor emön a äeööw ngeni aramas ewe öllük, nöün kewe soufós resap chüen angei künäer seni ewe SAMOL.

10Ekkewe souakkomwen Zion ra móót wón pwül nge fanafanaló; iir ra amworomworätä pwül wón möküreer o üföüf üüf mi för seni tuuk pwe esissilen ar letipeta. Ekkewe föpwülün Jerusalem ra chök roorotiw lepwül.

11Mesei a mölüülü ren äi kechiw, ngang üwa riäfföü lón letipei, letipeta a säsewu lepwül seni lón lelukei pwokiten neii kewe aramas ra feiengaw, pwal pwokiten ekkewe semiriit me mönükól ra chök turuló me lón ekkewe alen ewe telinimw.

12Ra apasa ngeni ineer kewe, “Ifa pilawa me wain?” lupwen ra turuló usun emön aramas mi kinas me lón ekkewe alen ewe telinimw, lupwen manawer a mwüchchüló nge ineer mi sapeer lón pöüür.

13Iwe, en Jerusalem, meet ngang üpwe tongeni apasa fänitom? Meet ngang üpwe tongeni appööni ngeni óm riäfföü en ewe Föpwül Jerusalem? Meet ngang üpwe föri pwe üpwe tongeni echipók en ewe Föpwül Zion? Pün kinasom a alóllóól usun ewe mataw. Iö a tongeni echikarasäfäliik?

14Künäen noum kewe soufós ra mwääl o chofona; iir resap särifaló óm kewe tipis pwe repwe eppeti senuk óm kopwe ooló. Ekkewe kapasen oosuni iir ra apasa ngenuk ra mwääl o emmweningawók.

15Meinisin aramas mi pwereló ünükkum ra alopwolop o takiriik; iir ra elifechifech o kapasen turunufasek en ewe Föpwül Jerusalem: Ra apasa, “Ifa usun, iei ewe telinimw ra eita ngeni pwe a unusen lingöch, än unusen fönüfan apwaapwa?”

16Chón opwutom kewe meinisin ra akkamasaaw le takiriik; iir ra kapasen turunufas o assüngürü niir o apasa, “Sia ataeló Jerusalem. Iei ewe rän sia akkawitiwiti. Iei sia manaw ngeni pwe sipwe küna.”

17Ewe SAMOL a föri meet i a akkóóta; i a öpwönüwetä an kapas, i a öpwüngaló me lóómlóóm. I a ataakeló nge esap ääni tong, i a mwüüt ngeni chón opwutom repwe ämängawók pwokiten meet a fis ngenuk, i a öpöchökküla ekkewe chón pölüwenuk.

18Leluken ekkewe aramas repwe siö ngeni ewe Samol. En ewe tittin ewe Föpwül Zion, kopwe mwüüt ngeni chönün mesom repwe supwusupwutiw lerän me lepwin usun chök ew chaanpwuuwpu; kosap ükütiw le kechiw, kosap asöösöw mesom ar repwe pwasapwas.

19Kopwe pwäätä, kopwe leüommóng le kechiw lón unusen lepwin, lupwen ekkewe kulókun mas lepwin ra poputä; kopwe niinawu masowen lelukom fän mesen ewe Samol usun emön a niinawu kólik. Kopwe eitietä pöum ngeni i lón óm iótek pwe i epwe mwüüt ngeni noum kewe mi echik ar repwe manaw. Iir ra turuló lepwokuukun iteiten ekkewe aal pwokiten ar echik.

20“Kopwe nennengeni, äi SAMOL, o ekieki. Iö ka föri ngeni ei sókkun? Ifa usun, ekkewe fefin repwe ocheei pwisin nöüür semiriit, ikkeiir ekkewe semiriit iir ra tümwünüür? Ifa usun, souasór me soufós repwe ninniiló me lón ewe imw mi pin än ewe Samol?

21“Ekkewe äät me ekkewe chinlap mwän ra määtiw wón pwül lón ekkewe aal; ekkewe föpwül me ekkewe ölüwöl ra mäló ren ketilas. En ka niireló lón ränin óm soong; en ka niireló nge kosap tonger.

22“Usun óm ka köörato aramas ngeni ew ränin chuulap, iei usun en ka köörato chón eniwokkusuei seni ekis meinisin. Lón ewe ränin än ewe SAMOL soong, esap wor emön a tongeni süüló ika manaw; ewe chón opwutaei a niieló chókewe ngang üwa tümwünüür o fóóleniir.”

3Ngang emön aramas mi küna riäfföü mi feitto seni wókun ewe SAMOL lón an soong.

2I a ösüüweiló o föri pwe üpwe fätäl lón rochopwak nge sap lón saram;

3enlet, pöün a üüngeniei o wichikkisiei, lón unusen rän me rän nge esap tongeei.

4I a föri pwe ünüchchei me fitukei ra ngawaló usun chök nge üwa chinlap. I a pwal kupii chüüi.

5I a senätä o pwellieló ngeni ünükki weires me riäfföü.

6I a föri pwe üpwe nónnóm lón rochopwaak usun chök chókewe ra mäló chök melóóm lóóm.

7I a tiieló ünükki pwe üsap tongeni süüló; i a fööti ngeniei sein mi chow.

8Lupwen ngang üwa kökkö ika siö pwe epwe älisiei, nge i esap öüselinga äi iótek.

9I a pineeló äi kewe aal ren faaw mi wätte; i a föri pwe äi kewe aal repwe pwór.

10I a chök operiei usun emön pear, i a opoló usun emön laion, pwe epwe efeiengawaei,

11i a etekinieiló seni ewe aal o ataatakisiei. Mwirin, a likitieiló nge esap wor emön a älisiei.

12I a äpera nöün esefich o föri pwe ngang üpwe och leenien änneen wón nöün kewe föün esefich.

13I a pwangeni ngasangasei ren ekkewe föün esefich i a atoorowu seni an leenien föün esefich.

14Ngang üwa wiliti och minen atakirikir meren aramasei meinisin; iir ra turunufaseei lón ar kööl fansoun meinisin.

15I a ouraei ren wün mi maras. I a ngeniei ew kapen lólilen mi alóllóól pwe üpwe ünümi.

16I a kupii nii lón pwül mi tareföfföw; i a pwuurieitiw lón pwül.

17Esap chüen mwüümwütä ngeniei pwe epwe wor äi kinamwe; ngang üwa möllükaló ika meet manawen nónnómöch.

18Iei popun ngang üwa apasa, “Äi ling a ló pwal meinisin minne ngang üwa apilükülüküw seni ewe SAMOL ra ló.”

19Ngang üwa chechchemeni äi riäfföü me äi siamwüfeil, üwa pwal chechchemeni ewe maras me poison en ka ngeniei.

20Ngang üwa fókkun chechchemeniöchüür, iwe, ngüni a letipengaw me lóói.

21Nge iei meet ngang üwa chemeni iei minne a wor äi apilükülüköch:

22Pwokiten än ewe SAMOL tong a fókkun lapalaap kich sisap rosoló, pün an ümöümöch esap fókkun mwüch.

23Ra sööfö iteiten lesossor; óm ölükülük a fókkun lapalaap.

24Ngang üwa pwisin apasa ngeniei, “Ewe SAMOL i ineti; iei minne ngang üpwe witiwiti i.”

25Ewe SAMOL a mwirinnö ngeni chókana mi ääni i apilükülük, i a mwirinnö ngeni ewe emön mi kütta i;

26a mwirinnö pwe aramas repwe witiwit fän mósónósón fäniten ewe alen ngasaló mi feitto seni ewe SAMOL.

27A mwirinnö pwe emön mwän pwe epwe mwärelong fän öüwafaren an weires lupwen i a emön ölüwöl.

28I epwe äkkälämön le móót fän mósónósón, pün ewe SAMOL a isenätä ei weires wón.

29Epwe chappetiw o pwölüweló wón mesan lepwül - pün eli epwe chüen wor apilükülük fänitan.

30I epwe äsepa sapan ngeni ewe emön mi pösapei, o mwüüt ngeni aramas repwe turunufasei.

31Pün ewe SAMOL esap pöütaló emön aramas tori feilfeilló chök.

32Inamwo ika a awarato letipeta, nge i epwe pwääri an ümöümöch, pün an tong enlet a fókkun lapalaap.

33Pün esap iei turun tipan pwe epwe awarato riäfföü ika letipeta ngeni aramas.

34Nge ekkewe chón emmweni nöün kewe aramas ra pwuurätiw fän pecheer ekkewe chón föötek meinisin me lón ewe fönü,

35pwe repwe eppeti seni emön aramas an pwüüng me fän mesen ewe mi Unusen Tekia,

36pwe repwe sorei minne a pwüng lón köpwüng. Ifa usun, ra ekieki pwe ewe Samol esap küna ekkeei sókkun föfför?

37Iö a tongeni kapas nge a fisitä ika ewe Samol esap öpwüngaló?

38Ifa usun, feiöch me feiengaw resap feitto seni mwelien awen ewe mi Unusen Tekia?

39Pwata emön aramas mi manaw epwe lal lupwen a köpwüng ren an kana tipis?

40Öüsipwe etittina ach kana föfför o sótuniir, mwirin, sipwe liwinsäfäl ngeni ewe SAMOL.

41Öüsipwe suuki lelukach o eitietä pöüch ngeni Kot lón läng o apasa:

42“Äm aia tipis o üüngenuk, nge en kosap omwusaló äm tipis.

43En ka pwöluukoló ngeni óm soong o tapweri keem; en ka niikeemiló nge kosap ääni tong.

44En ka pwöluukoló ren ew kuchu pwe esap wor ew iótek epwe toruk.

45En ka föri pwe äm aipwe och limengaw me minen enniopwut me leiin chón ekkewe mwüü.

46Ekkewe chón opwutakeem meinisin ra akkamasaw le kapasen turunufas ngeni keem.

47Äm aia nóm lón riäfföü mi eniwokkus me feiengaw, kata me taatakis ra tori keem.”

48Chönün maas a supwusupwutiw seni mesei pwokiten neii kewe aramas ra feiengaw.

49Chönün mesei esap ükütiw le supwutiw, esap asöösö,

50tori ewe SAMOL epwe nennetiw seni läng o küna.

51Meet ngang üwa küna a awarato letipeta ngeni ngüni, pwokiten meet a fis ngeni ekkewe fefin meinisin lón äi telinimw.

52Chókewe mi opwutaei nge esap wor popun, iir ra tapweriei pwe repwe likoppichiei usun emön machchang.

53Iir ra sótuni pwe repwe ömwüchchaló manawei lón ew pwaang o monei ngeniei faaw;

54ewe kólik a pwölüweló wón mökürei, iwe, ngang üwa ekieki pwe üpwe le mäló.

55Ngang üwa kökkööri itom, äi SAMOL, seni epin ewe pwaang.

56En ka rongorong äi ei tungór: “Kosap pineeló selingom ngeni äi siö fäniten älillis.”

57En ka arap ngeniei lupwen ngang üwa kööruk, iwe, ka apasa, “Kosap nuokkus.”

58En, äi Samol, ka peniei; en ka angasa manawei.

59Äi SAMOL, en ka küna ekkewe föfför mi mwääl iir ra föri ngeniei. En kopwe neii souköpwüng o älletätä äi pwüng!

60En ka fen küna usun alóllólun ar opwutaei, pwal usun ar kewe rawangaw ngeniei meinisin.

61Äi SAMOL, en ka fen rongorong ar kewe kapasen ämängaw, pwal meinisin ar kewe rawangaw ngeniei -

62en ka fen rongorong meet ekkewe chón opwutaei ra ääni mwöngününgün me ar tunopweliei fansoun meinisin.

63Kopwe nennengeniir! Pün ese lifilifil are ra móót ika üütä, iir ra chök ämängawaei lón ar kewe kööl.

64Kopwe liwinisäfäli ngeniir meet a fich ngeniir, äi SAMOL, ren meet pöüür a föri.

65Kopwe ngeniir letip mi pöchökkül me üleförea, mwirin, kopwe öpüngätiw önümamaw wóór.

66Kopwe tapweriir lón óm soong o arosereló seni wón fönüfan, äi SAMOL.”

Kot a ounusa an soong

4A ifa me topwutopwulón ewe kolt, pwal ewe kolt mi mwirinnö a siiwil önüwönün! Ekkewe faaw mi pin föün ewe imwenfel ra toropasfeil lón iteiten ekkewe aal.

2Ekkewe ölüwölün Zion mi öüchchea ra wewe ngeni kolt mi mwirinnö me lóóm, nge iei ra wewe ngeni sepi mi för seni pwül, förien pöün emön chón föri pisek seni pwül.

3Ekkewe mwo liäfefinin kolaak mi mwacho nge ra mwüüt ngeni appaner kewe pwe repwe ünümi oupwuur, nge neii kewe aramas esap wor tong lón leluker pün resap äfälli än nöüür kewe kechiw usun chök ewe machchang ostrich mi nóm lón fönüapö.

4Chönnawen ekkewe mönükól a pachatä fän fóngóchuur pwokiten ar kaaka; ekkewe semiriit ra tuttungór eneer mwöngö, nge esap wor emön a ngenäniir.

5Chókewe mi örüni mwöngö mi annö melóóm, iei ra küütfeil piipin mwöngö mi koturuló lón ekkewe aal. Chókewe mi piin üföüf üüf mi parachól o möömmóng, iei ra chup eneer mwöngö lón ekkewe pwangen pii.

6Än neii kewe aramas köpwüng a lapalaap seni köpwüngün Sodom, ewe telinimw mi taaló lón ew chök ótun, nge esap wor efóch paaw epwe älisi.

7Melóóm, ekkewe samolun Jerusalem ra saramaram seni sno o pwech seni milik, inisiir a aroparapar lap seni ewe faaw öüchchea itan rupi, nge wóówóór a usun chök ekkewe faaw öüchchea iter sapfair.

8Nge iei ra chólukkich seni moochen ekkei; esap wor emön a silleniir me lón ekkewe aal. Ünüchcheer a ppwach o pacheri chüür; a usun ömwüch mi pwas.

9Chókewe mi ninniiló ren ketilas ra mwirinnö mwen chókewe mi mäló ren lengita; pün ra riäfföün echik, ra kichüüchüló pwokiten esap wor eneer mwöngö seni ekkewe tännipi.

10Ekkewe fefin mi fókkun tongei nöüür ra pwisin kukuuw nöüür kewe semiriit, ra ocheer pwe repwe tongeni manaw lupwen sounfiu ra pwellieló leenier fän ar pisekin maun.

11Ewe SAMOL a ounusa le atoowu an lingeringer, a niinätiw an soong mi wätte; i a öküüw ew ekkei lón Zion mi kenaló lóngólóngun kewe.

12Esap wor emön me leiin ekkewe kingen unusen fönüfan a lükü, ika ew mwiichen aramasen fönüfan, pwe ekkewe chón opwut me chón pölüweni Judah repwe tongeni tolong lón ekkewe asamalapen Jerusalem.

13Nge ei a fis pwokiten tipisin nöün Jerusalem kewe soufós me föfföringawen nöün kewe souasór, iir chókewe mi össükü chaan ekkewe chón pwüng me lón Jerusalem.

14Iwe, iei ra chök attapfeil lón ekkewe aal usun chök aramas mi mesechuun. Iir ra fókkun limengaw ren chcha iei popun esap wor emön a mochen epwe attapa üfeer.

15Aramas ra kökkö ngeniir o apasa, “Öüpwe süüló! Ämi mi limengaw! Öüpwe süüló, öüpwe süüló! Öüsap attapakeem.” Iwe, lupwen ra süüló o siamwüfeil, aramasen ekkewe mwüü ra apasa, “Resap tongeni nónnómottam reech.”

16Pwisin ewe SAMOL a atoropasseer; i esap chüen mammaser. Aramas resap chüen meniniti ekkewe souasór, resap pwal öüchcheani ekkewe souakkomw.

17Pwal och, mesach a weires le nennefeil nge esap wor lamwotan, pün esap wor emön epwe älisi kich; sia nennewu seni ach kewe imwen maun mi tekia o witiwiti ika epwe wor ew mwüü epwe tongeni amanawa kich.

18Ekkewe chón opwuta kich ra chök operi kich fansoun meinisin, iei popun sisap tongeni fätäl lón alach kewe. Sópwólón manawach a arapoto, ränin manawach ra ällea, pün ach fansoun a war.

19Ekkewe chón tapweri kich ra mwittir seni ekkewe ikel mi ääs fän läng; iir ra tapweri kich me wón ekkewe chuuk o operi kich lón ewe fönüapö.

20Nöün ewe SAMOL we mi kepit, iei i ngasangasen manawach, a oolóng lón ar kewe likottup. Iei i ätewe sia ekieki pwe sipwe chülong fän nürün pwe sipwe tongeni manaw me leiin chón ekkewe mwüü.

21Öüpwe meseik o pwaapwa, ämi chón Edom, ämi chókewe mi nóm lón ewe fönü Uz. Nge öüpwe chechchemeni pwe epwe pwal tori kemi ewe kapen än Kot soong; öüpwe wün seni ei kap o sakaweló o pwiliti seni kemi üfemi pwe öüpwe seleló.

22Ämi köpwüng epwe ükütiw, ämi chón Zion; i esap chüen alangattamaló fansoun ämi ooló. Nge i epwe öpwüngü ämi kewe tipis, ämi chón Edom, o särifaló ämi kewe föfför mi ngaw.

5Kopwe chechchemeni, äm SAMOL, meet a fen fis ngeni keem; kopwe nennengeni o küna äm itengaw.

2Waasöla ra fönüweni fönüweem, chón ekis ra imweni imweem.

3Äm aia wiliti chón määsen, ineem kewe ra lipichsäfäl.

4Äm aia wiisen mööni ewe kólik aia ünümi; a chök tongeni wor äm ömwüch ika aipwe püngütiw liwinin.

5Chókewe mi tapweri keem ra pwuutä wón üweem; äm aia mölüülü nge esap wor asöösö fänitem.

6Äm aia fangatä ngeni Egypt me Assyria pwe epwe naaf eneem mwöngö pwe aipwe tongeni manaw.

7Äm kewe leewo ra tipis nge iei resap chüen nóm, iwe, äm aia mwärelong fän liwinin ar tipis.

8Chón angang ra nemeni keem, nge esap wor emön a angasa keem seni lepöüür.

9Äm aia atolonga manawem lón feiengaw lupwen aia küüt eneem mwöngö, pwokiten a wor aramas fän nöüür ketilas lón ewe fönüapö.

10Ünüchcheem a pwichikkar usun pwichin ew uumw, a pwichikkar ren äm echik.

11Ekkewe chón opwuta keem ra achomanawei ekkewe fefin lón Zion, me ekkewe föpwül lón ekkewe telinimwen Judah.

12Iir ra fööti pöün ekkewe samol o emeitiweretä; nge resap meniniti ekkewe souakkomw.

13Ekkewe ölüwöl ra angang weires lón ekkewe leenien fööir föün wiit; ekkewe äät ra taroporop fän woser mwüüch mi chow.

14Ekkewe mwän mi chinlap ra ükütiw le móót lón asamalapen ewe telinimw; nge ekkewe ölüwöl ra köüüló le ettiki nöüür kewe pisekin likettik.

15Pwapwa a ükütiw seni lón lelukem; äm pwörük a wiliti letipeta.

16Ewe mwärämwär a turutiw seni wón möküreem. Feiengawem, pün äm aia tipis!

17Pwokiten ei, lelukem a riäfföü, pwokiten ekkeei mettóch, meseem ra topwutopwuló,

18pün ewe chuuk Zion a taaló, nge ekkewe kolaak mi mwacho ra säfeil wón.

19Nge en, äm SAMOL, ka nemenem tori feilfeilló chök; óm leenien móótun king a nóm seni ew pilóón aramas tori pwal ew.

20Pwata ka möllükikeemiló fansoun meinisin? Pwata ka likitikeemiló lón fansoun langattam?

21Kopwe eliwinisäfäli keem ngenuk, äm SAMOL, pwe äm aipwe tongeni liwinsäfäl; kopwe asööfösäfäli ränim usun chök me lóóm,

22chiilón chök ika en ka wesewesen pöütikeemiló o óm soong ngeni keem a selüküló öüküükün.