Köölfel
Ewe Pwuken
PWUK 1
Köölfel 1-41
Köölfel 1
Alen ekkewe chón pwüng me sópwólón ekkewe chón resap nuokkus Kot.
1A feiöch emön aramas esap fätäl fän öüröüräen aramasingaw, esap üütä lón alen ekkewe chón tipis, esap pwal móót lón leenien ekkewe chón turunufas.
2Nge a pwapwaiti än ewe SAMOL öllük o a leechüüni an öllük le rän me lepwin.
3I a wewe ngeni efóch irä mi ffótetiw ünüppen ekkana chanpwupwun kóluk, a chök ukkuwa iteiten fansoun uwa, nge chöön resap aiolool. Ese lifilifil minne i a föri a fisiöch.
4Nge ekkewe aramasingaw resap iei usur. Pün ra wewe ngeni piipi äsäpwääl a chök ässiireló.
5Iei minne, ekkewe aramasingaw resap tongeni üütä lón ewe fansoun köpwüng, pwal ekkewe chón tipis resap nóm lón ewe mwiichen chón pwüng.
6Pün ewe SAMOL a silei alen ekkewe chón pwüng, nge alen ekkewe aramasingaw epwe sópwólong lón feiengaw.
Köölfel 2
Än ewe Messiah pwora me mwüün.
1Pwata chón ekkewe mwüü ra emwicheich fengen fän ar lingeringer, nge pwata ekkewe aramas ra olussu mwäli ar fansoun le rawei minne mi lamwotongaw?
2Ekkewe kingen fönüfan ra amolleretä pwe repwe maun o ekkewe samol ra pwüngüpwüng fengen pwe repwe üüngeni ewe SAMOL o repwe pwal üüngeni Nöün we mi Kepit. Ra apasa:
3“Öüsipwe mwüüti kisietiw ar keei fööfö wóch o sipwe pwisin angasa kichewu le pöüti seni kich ar keei riiri wóch.”
4Nge ewe Emön mi móót lón läng epwe takir; ewe SAMOL a chök esiiter.
5Mwirin, i epwe öpwüngür lón an lingeringer epwe eniuokkusur lón an soong, o apasa,
6“Ngang üwa fen seikätä äi we King lón wiisan me wón Zion chuki we mi pin.”
7Ngang üpwe aronga än ewe SAMOL öllük: I a apasa ngeniei, ‘En neii, Ikenäi Ngang üwa wiliti semwom.
8Kopwe tungór ngeniei, nge ngang üpwe ngenuk ekkewe mwüü pwe mwuum pwal ökkömwüchün unusen fönüfan pwe fönüom.
9Kopwe atareló ren efóch wóók mächä; kopwe ömökkü kisiretiw usun ew sepi mi för seni pwül.’ ”
10Iei minne, ämi kana king öüpwe miriitiló o ämi kana sounemenem wón fönüfan öüpwe tümwünü fönemi.
11Öüpwe angang ngeni ewe SAMOL fän nuokkus, nge öüpwe pwapwa fän chechchech.
12Öüpwe mitiri pachapachen ewe Naaü pwe iei esissilen ämi anómwu kemi fän an nemenem pwe ete soong; iwe, ämi öüpwe mäfeiengaw lón minne öüwa föri, pün an soong a tongeni mwittir kü. Ra feiöch iir meinisin chókana mi anómwu ar apilükülük lón i.
Köölfel 3
Ewe SAMOL a älisi nöün kana aramas mi nóm lón osukosuk. Echö än David kööl lupwen a sü seni nöün we mwän Absalom.
1Äi SAMOL, a ifa me chómmóngun chókana mi opwutaei! Ra fókkun chómmóng chókewe mi üüngeniei.
2Chómmóng ra apasa usi: Kot esap fókkun chimanüw i.” Selah
3Nge en äi SAMOL ka usun chök ew pisekin tittin maun pwellin ünükki, en äi ling me chón echimwäeitä.
4Ngang üwa leüommóng le siö ngeni ewe SAMOL, iwe, i a öüselingaei seni wón chukun mi pin. Selah
5Üwa kónnóló o möür; mwirin üwa neló lón kinamwe pün ewe SAMOL a mämmäsaei.
6Ngang üsap nüokkusiti engol ngöröwüröwün aramas chón opwutaei mi nóm pwellin ünükki.
7Kopwe üütä, äi SAMOL; kopwe chimanüei Maing äi Kot! Pün kopwe pösapei ekkewe chón opwutaei meinisin, kopwe pwal kupii niin ekkewe aramasingaw.
8Ewe alen ngasaeló a feitto senuk en ewe SAMOL. Amwo pwe óm feiöch epwe nóm wón noum kewe aramas. Selah
Köölfel 4
Nónnómöchchün ekkewe mi tupwöl. Ngeni ewe chón nemeni kööl. Kööl mi fiti pisekin likettik mi wor säitelin. Echö kööl än David.
1Kopwe öüseling ngeniei o pölüweniei lupwen üwa kökkö, en ewe Kot mi pwärätä pwe ngang üwa pwüng. En ka fen angasaeiló lón äi riäfföü. Kopwe kirekiröch ngeniei o rongorong äi iótek.
2Ämi ekkana aramas, epwe ifa ükükün langattamen fansoun ämi öüpwe eitengawaei o äsääwaei? Epwe ifa langattamen fansoun ämi öüpwe efich minne mi lamwotongaw o kütta minne mi mwääl? Selah
3Nge öüpwe silei pwe ewe SAMOL a fen äimwüeló pwisin fänitan ätewe mi feiöch ren än Kot ümöümöch. Ewe SAMOL epwe öüseling lupwen ngang üpwe kökkööri i.
4Öüsap mwüüt ngeni soong epwe nemenikemiiló pün öüte tipis ren. Lupwen öüwa nóm wón kiemi, öüpwe etittina lón letipemi o öüpwe chök fanafaneló. Selah
5Öüpwe ääni asór ekkewe sókkun asór mi pwüng o öüpwe anómwu ämi apilükülük lón ewe SAMOL.
6Mi wor chómmóng aramas ra apasa, “Iö epwe tongeni pwääri ngeni kich och mi mwirinnö?” SAMOL, kopwe asarama keem ren wókekkein wón mesom ngeni keem.
7En ka fen isellong pwapwa lón lelukei lap seni pwapwan chókana lupwen kiniier föün wiit me ünümer wain a somwosomwoló.
8Ngang üpwe kónnóló lón kinamwe o möür; pün en chök Maing SAMOL ka föri pwe üpwe nónnómöch lón kinamwe.
Köölfel 5
Ew iótek fäniten än Kot epwe wiisen emwen. Ngeni ewe chón nemeni kööl: Echö kööl mi fiti tikin aangün. Echö kööl än David.
1Äi SAMOL, kopwe rongorong ngeni äi keei kapas, kopwe äffäli äi ngüüngü lón letipei.
2Kopwe öüseling ngeni ngiingin äi siön älillis, en äi King me äi Kot, pün ngang üwa iótek ngenuk.
3Maing SAMOL, kopwe rong ngeni mweliei lesossor. Iteiten lesossor ngang üpwe uwato äi tungór ngenuk o nennetä chök fän äi witiwit le ösüküsük.
4Pün en emön Kot kosap pwapwaiti minne mi ngaw, pwal en kosap tongeni mwüüt ngeni och mi ingaw epwe nóm reemw.
5Iei minne, ekkewe aramas mi lamalamtekia resap tongeni repwe ü me mwen mesom, pün en ka opwut ekkewe chón föfföringaw meinisin.
6En kopwe arosaló chókana mi ääni kapas chofona. Ewe SAMOL a niopwut emön mi niieló aramas me emön mi uren otupwutup.
7Nge ren ngang wón inisi, pwokiten óm tong mi fókkun lapalaap, ngang üpwe tongeni tolong lón imwom. Fän alóllólun äi meninituk, ngang üpwe chappetiw o fel lón imwom we mi pin.
8SAMOL, kopwe emmweniei lón óm aal mi pwüng pwokiten ekkewe chón opwutaei. Kopwe äwenechchara alom me mwei ren óm affata ngeniei minne üpwe föri me äiti ngeniei ia üpwe feilló ie.
9Pün esap wor och kapas mi enlet epwe toowu seni lón awen ekkewe chón opwutaei. Ekilólen leluker ra chök efich ar repwe efeiengawa ekkóch. Kapas mi pwongaw a chök toowu seni lón chiorer usun ew peias mi suuk; ar kapas mi toowu seni chónnawer a uren kapasen ämmärew.
10Kot, kopwe atowu pwüngün ar föfför pwe ra tipis. Repwe pwisin wo lón ar kana raaw mi ngaw. Kopwe ösüüreló pwokiten ar kana tipis mi chómmóng, pün iir ra üüngenuk.
11Nge kopwe mwüüt ngeni chókana meinisin mi anómwu ar apilükülük wóm pwe repwe pwapwa. Kopwe mwüüt ngeniir pwe repwe kööl fän pwapwa le mwareituk fansoun meinisin pwokiten en ka peniir. Kopwe pwal mwüüt ngeni chókana mi echeni itom repwe uren pwapwa lón en.
12Pün en SAMOL, kopwe efeiöchü ewe chón pwüng, kopwe pwellieló i ren óm tong epwe usun chök och pisekin eppetin feiengaw lón maun.
Köölfel 6
Ew iótekin lükü lón fansoun riäfföü. Ngeni ewe chón nemeni kööl: Kööl mi fiti pisekin likettik mi wor säitelin, wón ewe pisekin likettik mi wor 8 säitelin. Echö kööl än David.
1Äi SAMOL, kosap öpwüngüei lón óm soong, nge kosap ninnin emiriti ei lón pwichikkaren óm lingeringer.
2Kopwe kirekiröch ngeniei, äi SAMOL pün ngang emön mi apwangapwang; äi SAMOL, kopwe öpöchökküla säfäliei pün chüüi kana ra unusen metek.
3Ngüni a pwal fókkun riäfföü. Nge en Äi SAMOL, epwe ifä langattamen fansoun óm kopwe awitiwitiló tori óm kopwe öpöchökküla säfäliei?
4Äi SAMOL, kopwe liwinto o chinamüei! Kopwe angasaei pwokiten óm tong mi enlet!
5Pün esap wor emön epwe chechchemenuk me lón mäló. Iö epwe apasa an kilisou ngenuk seni lón peias?
6Ngang üwa mölülü ren äi ngüngüres. Iteiten pwiin, kiei a pas lón chönün mesei, äi leenien kóón a unusen chöchchön ren supwun chönün mesei.
7Mesei ra topwutopwuló ren äi letipeta, üwa pwal apwangapwangeló pwokiten chón opwutaei meinisin.
8Öüpwe sü seniei ämi meinisin chón föri föfför mi ingaw; pün ewe SAMOL a rongorong ngiingin äi kechiw.
9Ewe SAMOL a rong äi iótekin tungör. Ewe SAMOL epwe etiwa äi iótek.
10Amwo pwe kana chón opwutaei meinisin repwe sääw o tolong lón riäfföü mi lapalaap. Amwo repwe säp säfäl o mwittir meefi ar sääw.
Köölfel 7
Iötek me mwaar ren än Kot angasa seni chón opwutan kana. Och ekillón än David, a köölüw ngeni ewe SAMOL fäniten ekkewe kapas än Kush ewe re Benjamin.
1Äi SAMOL äi Kot, ngang üwa anómwu äi apilükülük lón en. Kopwe angasaei seni chókana meinisin mi tapweei pwe repwe niieiló. Kopwe chimanüei.
2Pün are kosap; iwe, repwe turufiei o ekinasaei usun minne emön laion a föri, repwe atatakisi fitukei nge esap wor emön epwe chinamüei.
3Äi SAMOL äi Kot, are üwa föri och mi mwääl, are a wor och meet mi tipis a nóm lón peii,
4are ngang üwa liwini ngaw ngeni emön mi kinamwe ngeniei, are üwa angei pisekin chón opwutei fän pöchökkül nge esap wor popun,
5mwirin, ewe chón opwutaei epwe tapweriei o okkufuei. Ewer, epwe pwurätiw manawei leppwül o likitätiw iteüöchi lón ewe pwül mi süüsü. Selah
6Äi SAMOL, kopwe üütä lón óm soong. Kopwe pwisin äwenóketä o üüngeni än ekkewe chón opwutaei lingeringer. Äi Kot kopwe pwäätä o awarato minne mi wenechchar, en ka fen öllük pwe epwe fis.
7Kopwe emwiicha fengeni aramasen ekkewe mwüü pwe repwe mwiicheto mwom. Kopwe móót wón óm leenien móótun nemenem mi tekiatä aser.
8Ewe SAMOL epwe öpwüngü aramasen ekkewe mwüü. Äi SAMOL kopwe atowu pwüngün pwe ngang mi pwüng pwal ngang mi wenechchar lón manawei, en ewe mi Unusen Tekia.
9Kopwe öükätiw än ekkewe aramasingaw föfför mi ngaw, nge kopwe älisi le önüküchchara ekkewe aramas mi pwüng. Pün en ewe Kot mi pwüng ka etittina fichi o küna lón letipen me ekiekin aramas.
10Kot i titti seni feieingaw, i ewe mi amanawa ekkewe aramas mi enlet o pwüng lón leluker.
11Kot emön souköpwüng mi wenechchar. Kot a soong iteiten rän ngeni ekkewe mi föfföringaw.
12Are emön aramas esap siwili an ekiek o kul säfál, Kot epwe le seimi nöün ketilas, epwe pwal emmeia nöün esefich o amollätä le äpera.
13I epwe amollätä fänitan an kewe pisekin maun mi efeiengaw o keni nöün kewe föün esefich mi pwulopwul ren ekkei.
14Nengeni, emön mi föfföringaw a ekiekietä minne mi ingaw. Usun chök nge a pwoopwoäsini fitikoko, nge mwirin a nöünätiw kapas chofona.
15Emön mi föfföringaw a ttuw ew pwaang pwe ekkóch repwe turulong lón, nge fen pwisin i a turulong lón.
16A efisätä fitikoko, nge minne i a föri a pwisin liwinsäfäliti. An kana föfförün efeiengaw ra pwisin turutiw wón möküran.
17Ngang üpwe mwareiti ewe SAMOL pwokiten i a pwüng. Ngang üpwe köölün mwareiti iten ewe SAMOL mi Unusen Tekia.
Köölfel 8
Ngeni ewe chón nemeni kööl: Echö kööl än David mi fiti och sókkun pisekin likettik minen Gath.
1Maing SAMOL, äm Samol, a ifa me echchipwörün itom mi ouraló unusen fönüfan! Lingom a tekia seni ekkewe läng.
2En ka äiti ngeni kana semiriit me ekkana monuköl mi chüen oupw pwe epwe toowu seni lón awer kapasen mwareituk. En ka pwääräló óm pöchökkül pwokiten ekkewe chón opwut en, pwe kopwe afanafanalói ekkewe chón koum me chón älemööw tipis.
3Lupwen üwa nennetä o ekieki usun óm kewe läng me angangen öütün pöum, üwa ekieki usun ewe maram me ekkewe füü en ka anómwur lón leenier,
4iwe, üwa ekieki ika meet öüchchean aramas pwe en ka ekieki usun, nge pwal meet öüchchean nöün aramas pwe en ka tümwünü i?
5Pün en ka föri aramas pwe epwe ekis chök kisitiw fän ekkewe chón läng, en ka ämwärämwära ngeni aramas ling me iteüöch.
6En ka pwal föri aramas pwe epwe wiisen nemeni förien poum kana, en ka anómwu mettóch meinisin pwe repwe nóm fän fecheen,
7meinisin ekkewe siip me ekkewe kowu, pwal mwo nge ekkewe maan mwacho mi nóm lón ekkewe mälämäl,
8ekkewe maan süüsü mi äkkääs lón äsäpwääl me ekkewe iik mi nóm leset, me meinisin minne mi äkkääfeil lón ekkewe öüten leemataw.
9Maing SAMOL, äm Samol, a ifa me echchipwörün itom mi ouraló unusen fönüfan!
Köölfel 9
Iotek me kilisou fäniten än ewe SAMOL kewe öpwüng mi pwüng. Ngeni ewe chón nemeni kööl. Mi fich ngeni ngiingiin ewe kööl itan, Mälón ewe Naw. Echö kööl än David.
1Ngang üpwe mareituk en SAMOL ren unusen lelukei, ngang üpwe aporausa usun óm kewe föfför mi amwaraar meinisin.
2Ngang üpwe pwapwa o meseik lón en, ngang üpwe köölün mwareiti itom, en ewe mi Unusen Tekia.
3Lupwen ekkewe chón opwutaei repwe kul säfäl o sü, repwe turuló o mäfeiengaw me mwen mesom.
4Pün en ka penieitä lón äi pwüüng me lón äi föfför, en ka móót wón óm leenien móótun nemenem o föri óm angangen köpwüng lón pwüng.
5En ka öpwüngü chón ekkewe mwüü, en ka arosaló le efeiengawa ekkewe mi föfföringaw, en ka tölaló iter tori feilfeilló chök.
6Ekkewe chón opwutaei ra feiengaw o rosoló feilfeilló chök, ar kewe telinimw ra taaló, esap chüen wor och minne emön epwe chechchemenir ren.
7Nge ewe SAMOL epwe nóm o nemenem feilfeilló chök. A fen amollätä an leenien móótun nemenem fäniten köpwüng.
8I epwe öpwüngü fönüfan lón pwüng, pwal i epwe ääni kopwüng ngeni ekkewe aramas lón pwüng.
9Ewe SAMOL epwe pwal ew leenien op mi tekia fäniten ekkewe mi nóm lón riäfföü. I epwe ew leenien op mi tekia lón fansoun riäfföü.
10Iwe, chókana iir mi silei itom repwe anómwu ar apilükülük lón en, pün en SAMOL kosap likitaló chókana mi kütók.
11Öüpwe köölün mwareiti ewe SAMOL mi nóm lón Zion! Öüpwe arongafeili porausen an kewe föfför me leiin ekkewe aramas.
12Pün i ewe mi ngeni chón niieló aramas chappen ar tipis nge tümwünü ekkewe mi osupwang. I esap ömönüngaw seni än ekkewe mi tipetekisón siö ngeni i pwe epwe älisiir.
13En SAMOL, kopwe kirekiröch ngeniei! Kopwe nengeni usun äi riäfföü ren chókana mi opwutaei, en ewe mi chimanüei le pwärieitä seni ekkewe asamen tittin mäló,
14pwe ngang üpwe tüfichin aporausa meinisin minne üpwe mwareituk ren me lón ekkewe asamen tittin Jerusalem. Ngang üpwe pwapwa pwe en ka chimanüei.
15Chón ekkewe mwüü ra koketiw lón ekkewe pwaang pwisin iir ra tuuw. Pwisin pecheer ra tupw lón ekkewe ssär iir ra sooni le mwónómwón.
16Ewe SAMOL a iteföüló ren an ääni öpwüngüwen. Ewe chón föfföringaw a pwisin tupw lón föfförün pöün kana. Hikkaion Selah
17Ewe chón föfföringaw epwe feittiw ngeni ewe leenien sotup pwal chón ekkewe mwüü meinisin mi mönlükaló Kot.
18Nge ekkewe mi osupwang resap möllüküló feilfeilló chök, pwal än ekkewe mi mweleele apilükülük esap ttur fansoun meinisin.
19En SAMOL kopwe pwäätä. Kosap mwüüt ngeni aramas epwe wiil lón an üngenuk. Kopwe mwüütätä pwe chón ekkewe mwüü repwe köpwüng me fän mesom.
20En SAMOL, kopwe atolonger lón nuokkus, kopwe esile ngeni chón ekkewe mwüü ar repwe pwisin silei pwe iir aramas chök. Selah
Köölfel 10
Echö köölün apilükülük lón än Kot pwora le okkufu mi ingaw.
1Pwata ka chök üütäto me towaw, En SAMOL? Pwata ka opoló lón fansoun äi riäfföü?
2Lón än ekkewe aramas mi föfföringaw lamalamtekia ra tapweri ekkewe aramas mi wöwingaw pwe repwe niireló. Kopwe föri pwe repwe pwisin wo lón ar kewe rawangaw pwisin iir ra ekiekietä.
3Pün ewe aramas mi föfföringaw a sikäsini mochenin lelukan, a mwareiti ekkewe mi mocheniä nge a ótteki ewe SAMOL.
4Lón än ewe mi föfföringaw mese lamalamtekia, esap kütta Kot. Esap awora leenien Kot me lón och an kewe ekiek.
5Än ewe aramasingaw kewe föfför meinisin ra chök fisiöch fansoun meinisin. Esap küna pwe óm köpwe öpwüngü i a chök witiwiti. I a chök takirin turunufasei chón opwutan kana meinisin.
6I a apasa lón letipan, “Ngang usap tongeni üpwe mwökütüküt. Ngang üsap tongeni üpwe tolong lón osukosuk fän ew.”
7Lón awen ewe aramasingaw a chök uren óttek me otupwutupw me kapasen eniwokkusu aramas. Minne mi efisätä osukosuk me mi ingaw ra chök mollotä le nóm fän chöön mwöngön.
8I a chök móótun osousouló lón ekkewe leenien likköür me lón ekkewe sóópw. A niimanawei ekkewe aramas esap wor tipisir me lón ekkewe leeni mi mwónómwón. I a chök okkop o ökköürü ekkewe aramas mi osupwang pwe epwe niireló.
9I a chök öüröüróló le akkawitiwit le mwónómwón usun chök emön laion lón pwangan a öüröüróló pwe epwe mweteri liapan. A chök öüröüróló pwe epwe turufi ewe aramas mi wöwingaw. A liäpeni ewe aramas mi wöwingaw lupwen a tupw lón an we ssär.
10Iei usun ewe mi osupwang a kufuló o chappóló, a turuló ren pöchökkülen ewe aramas mi föfföringaw.
11Ewe aramas mi föfföringaw a apasa lón letipan, “Kot a möllükaló. A pwölüweló wón mesan, esap tongeni epwe küna.”
12Äi SAMOL, kopwe üütä! Äi Kot, kopwe öpwüngü ewe aramas mi föfföringaw! Kosap möllükaló ekkewe mi osupwang.
13Pwata ewe aramas mi föfföringaw a turunufasei Kot o apasa lón letipan, “En kosap etikillöwü äi kewe föfför.” 14Nge en ka fen küna, pün en ka ouwasacha ekkewe osupwang me riäfföü pwe kopwe angei liwinin ren pwisin poum. Ewe aramas mi osupwang a pwisin lükü ngenuk manawan, en ewe chón älisi le peni ekkewe mi määsen.
15Kopwe kupii pöün ewe chón föfföringaw me ewe aramasingaw. Kopwe kütta an kana föfför mi ingaw tori óm kosap chüen küna och.
16Ewe SAMOL i King ese mwüch tori feilfeilló chök. Chón ekkewe mwüü mi fel ngeni pwal ekkóch kot repwe rosoló seni fönüan.
17Äi SAMOL, en ka fen rongorong ngeni mochenin letipen ekkewe mi osupwang; en kopwe öpöchökkülatä letiper, en kopwe öüüw selingom ngeniir,
18pwe kopwe ääni öpwüngüwen ngeni ekkewe mi määsen me ekkewe mi nóm lón riäfföü pwe aramas mi pop seni ei fönüfan resap chüen föri angangen eniuokkus ngeniir.
Köölfel 11
Lükü lón än ewe SAMOL pwüng. Ngeni ewe chón nemeni kööl. Echö än David kööl.
1Ngang üwa anómwu äi apilükülük lón ewe SAMOL pwe i äi leenien op. Iwe, pwata öüwa üreniei, “Kopwe süü ngeni chukum we usun emön machchang”?
2Pün nengeni, ekkewe aramasingaw ra amollätä le pwórei nöür kewe esefich o amollätä le pacheelong nöür kewe föün esefich wón selin pwe repwe pekki seni lón kiroch ekkewe mi wenechchar lón leluker.
3Are ekkewe lóngólóngun pwüng repwe taaló; iwe, meet ekkewe chón pwüng repwe tongeni föri?
4Ewe SAMOL a nóm lón imwan we Imwenfel mi pin, än ewe SAMOL we leenien móótun nemenem a nóm läng. Mesan a nennengeni fichi mettóch meinisin o etittina fichi föfförün aramas wón fönüfan.
5Ewe SAMOL a etittina fichi föfförün ekkewe chón pwüng me ekkewe chón föfföringaw. I a opwut emön me emön mi efich föfförün mwänesol.
6I epwe öpwüngätiw mwolien ekkei pwe epwe pwüngütiw usun rän wón ekkewe chón föfföringaw. Epwe öpwüngür ren ekkei me primston me äsäpwääl mi pwichikkar pwe epwe ina inetir masowen sepier.
7Pün ewe SAMOL a pwüng, a pwal efich föfför mi pwüng. Chókana mi föri minne mi pwüng repwe küna mesan.
Köölfel 12
Än aramas kirikiringaw me än Kot esap tongeni epwe siiwil. Ngeni ewe chón nemeni kööl. Echö kööl mi fich ngeni ewe pisekin likettik mi wor 8 säitelin. Echö kööl än David.
1Kopwe älillis, äi SAMOL, pün ekkewe aramas mi nuokkus Kot resap chüen nóm! Ekkewe aramas mi tupwöl ra morukóló seni fönüfan.
2Iteiten emön me emön a chofona ngeni chón arun. Ra chök ääni kapasen emichimich wón tinnawer, nge ar ekiek a wiliwilikkis.
3Amwo ewe SAMOL epwe pöküweló meinisin ekkewe tinnaw mi ääni kapasen emichimich me ekkewe chöön mwöngö mi apasätä mettóch mi lamalamtekia.
4Iir ekkewe mi apasa, “Sia wiil ren ach kapas chofona ren chöön mwöngöch. A wor ach pwüüng ach sipwe apasa minne sia mochen apasa pün tinnawach pwisin ach. Iö a wiisen nemeni kich?”
5Ewe SAMOL a apasa, “Fäniten än ekkewe mi wöwingaw ra riäfföü, fäniten än ekkewe mi mweleele ra siö, iei minne ngang üpwe le üütä o chimanür. Ngang üpwe le äleenier lón ewe leeni mi nükünüköch usun iir ra äneänei.”
6Än ewe SAMOL kewe pwon ra limelimöch; ra usun chök limöchün silfer mi elimelim lón ew leenien uumw lón pwül mi pwichikkar, a elimelim le ketel fän fisu.
7Äi SAMOL, en kopwe tümwünür, en kopwe äfälliir fansoun meinisin seni ei pilóón aramas mi chofona,
8inamwo ika ekkewe aramasingaw ra chök tanechpwak feil ekis meinisin, pwal lupwen ekkewe mettóch mi limengaw ra tekiatä me leiin aramas.
Köölfel 13
Apilükülük lón än ewe SAMOL alen ngaseló Ngeni ewe chón nemeni kööl. Echö kööl än David.
1Äi SAMOL, epwe ifa langattamen fansoun óm kopwe möllükieiló? Ifa usun, kopwe möllükieiló feilfeilló chök? Epwe ifa langattamen fansoun óm kopwe aopaló wón mesom seniei?
2Epwe ifa langattamen fansoun äi üpwe osukosuk lón ngüni ren äi riäfföü, ren äi üpwe chök letipeta lón letipei iteiten rän? Epwe ifa langattamen fansoun än chón opwutaei repwe tekiatä le nemeniei?
3En SAMOL äi Kot, kopwe kul ngeniei o öüselingaei; kopwe asaramaló mesei, pwe üsap möürüló lón ewe möürün mäló,
4pwe ewe chón opwutaei esap apasa, “Ngang üwa okkufu ätewe”, pwal chókewe mi osukosukaei resap pwapwa lupwen üwa turuló.
5Nge ngang üwa anómwu äi apilükülük lón óm kirekiröch, letipei epwe pwapwa lón óm we alen ngaseló.
6Ngang üpwe kööl ngeni ewe SAMOL, pwokiten i a fangafangöch ngeniei minne mi mwirinnö.
Köölfel 14
Än ekkewe aramas resap silei Kot umwes me än Kot ömwüchchulón wiil. Ngeni ewe chón nemeni kööl. Echö kööl än David.
1Emön mi umwes a apasa lón letipan, “Esap wor Kot.” Iir ra fókkun ingaw, ar kewe föfför ra fókkun enniopwut, esap wor emön a föri minne mi mwirinnö.
2Ewe SAMOL a nennetiw seni läng wón sókkun aramas meinisin pwe epwe nengeni are mi wor iö mi wewe, iö mi kütta Kot.
3Nge esap wor emön, pün iir meinisin ra tókkóló, ra pöküpökun unusen ingaweló. Esap wor emön a föri minne mi mwirinnö. Esap fókkun wor emön.
4Ifa usun, meinisin ekkewe chón föri föfföringaw esap wor ar miriit, iir ekkewe mi ocheei neii kewe aramas usun chök ar mwöngö pilawa nge resap ekiekin iótek ngeni ewe SAMOL?
5Nge me ikenaie nuokkus chapwur a toriir pün Kot a nóm ren chókana mi älleasochisi i.
6Ämi ekkewe aramasingaw öüwa aosukosuka än ewe chón wöwingaw akkóót, nge ewe SAMOL i an leenien op.
7Amwo ewe alen ngaseló epwe feitto seni Zion pwe epwe chimanü Israel! Lupwen ewe SAMOL epwe eliwinisäfäli ngeni nöün kewe aramas ar feiöch, Jakob epwe akkapwasen pwapwa o Israel epwe chengel.
Köölfel 15
Usun sókkun manawen chókana ra tongeni nóm ren ewe SAMOL lón leenian. Echö kööl än David.
1Äi SAMOL, iö a tongeni epwe nónnóm lón imwom imw mangaku mi pin? Iö a tongeni epwe nóm wón chukum we mi pin?
2Ewe chök emön esap wor tikingawen lón manawan o a föri minne mi pwüng, a pwal ääni kapas mi enlet seni lón lelukan.
3I emön esap aea chönnawan le apasata kapasen eitengaw, esap föri minne mi ingaw ngeni chón arun, esap pwal apasatä kapas mi ingaw fäniten chiechian,
4pwal i emön a opwut emön aramas mi manawangaw, nge a suföliti chókana mi meniniti ewe SAMOL, a pwal öpwönüetä minne a ääni pwön fän ökköpöl, inamwo ika a men weires ngeni.
5I emön a mwüütawu nöün mooni fäniten paaro nge esap angei manawan, esap pwal etiwa liffangen emichimich ren an epwe pwärätä le oturu emön esap wor an tipis.
Ewe emön mi föri ekkeei mettóch esap tongeni an epwe mwökut feilfeilló chök.
Köölfel 16
Än ekkewe mi tupwöl apilükülük me än ewe Messiah wiil. Echö kööl än David.
1Äi Kot, kopwe tümwünüei, pün ngang üwa anómwu äi apilükülük wómw.
2Ngang üwa apasa ngeni ewe SAMOL, “En chök äi Samol. Ekkewe mettóch mi mwirinnö meinisin mi wor reei ra feitto senuk.”
3Ekkewe chón pin mi nóm wón fönüfan, iir ekkewe mi fókkun echchipwör, ngang üwa unusen pwapwa reer.
4Ekkewe aramas mi mwittir le tapweló mwirin pwal ekkóch kot repwe uren letipeta. Ngang üsap fitiir lupwen ra niini ar kewe asór chcha ngeni ar kewe uluulun önümwäl, usap pwal fókkun föüni wón tinnnawei iten ar kewe kot.
5Äi SAMOL, en chök ineti me äi kapen feiöch, en chök ka tümwünü minne äi pwe epwe nónnómwöch.
6Kiään ineti we fönü ra nóm lón ekkewe leeni mi öch. Ewer, a wor ineti we mi mwirinnö.
7Ngang üwa mwareiti ewe SAMOL mi öüröüraei, pwal lepwin mwo nge letipei a fönöwei.
8Ngang üwa anómwu ewe SAMOL mwei iteiten fansoun meinisin. Pwokiten i a nóm le peliifichi, iei popun ngang üsap tongeni üpwe mwökütüküt.
9Iei minne, letipei a pwapwa nge chönnawei a chengel. Inisi epwe pwal asöösö lón apilüköchün kinamwe.
10Pün en kosap likitaló ngüni pwe epwe nóm lón ewe leenien mi mäló, kosap pwal mwüüt ngeni noum we Emön mi Pin pwe epwe kirowuló lón peias.
11En kopwe äiti ngeniei ewe alen manaw. A wor pwapwa mi somwoló me mwen mesom. A wor pwapwa ese mwüch mi nóm peliifichum.
Köölfel 17
Iótekin apilükülük lón ewe alen ngaseló Än David iótek.
1Äi SAMOL, kopwe rong ngeni äi tungór mi pwüng, kopwe öüseling ngeni äi siö. Kopwe öüüw selingom ngeni äi iótek mi feitto seni tinnaw esap chofona.
2Älelleten äi pwüng epwe pwisin feitto senuk. Mesom a pwisin küna ekkewe mettóch mi pwüng.
3En ka asóssóta äi ekiek o ka ämwaei lepwin ren óm kopwe etittina fichiei. Ka sótuniei nge kosap küna och. Ngang üwa filätä seni lón letipei pwe awei esap tipis.
4Ngang üwa fiti óm kewe öllük pün iir ra eppeti seniei äi üpwe fiti ekkewe aramas mi kirikiringaw me föfföringaw
5Kopwe önnükü ipwei pwe üpwe chök fätäl lón óm kewe aal, pecheei resap mit pwe üpwe tapweló mwirum.
6Ngang üwa iótek ngenuk, pün ngang üwa silei pwe en äi Kot kopwe pölüweniei. Kopwe öüüw selingom ngeniei o rongorong äi keei kapas.
7Kopwe pwäraló amwaraaren óm tong mi lapalaap, en ewe mi amanawa aramas ren manamanen pöüiifichum, iir chókewe mi feitto pwe repwe op reemw seni ekkewe mi üütä pwe repwe üngeniir.
8Kopwe tümwünüei, usun chök óm tümwünü chóchchólun lón mesom. Kopwe aopaei fän nurun pöükkasum,
9seni ekkewe aramasingaw mi eriäfföüei, seni ekkewe chón opwutaei mi efeiengaw ra pwellifeiliei.
10Ra pineeló letiper kana mi föüló pwe resap ääni tong. Ra apasawu kapas mi lamalamtekia seni lón awer.
11Ra eipwa ipwei, iwe, iei ra pwellifeiliei. Ra chök afóta meser ar repwe oturuweitiw lepwül.
12Ra wewe ngeni emön laion mi echik, a chök nómwun aawit an epwe ochei liapan, ra usun emön liäniföön laion mi chök öüröüreló lón an leenien op.
13Äi SAMOL, kopwe üütä. Kopwe öppölüwa ewe chón opwutaei, kopwe oturätiw i. Kopwe chimanü manawei seni ekkewe aramasingaw ren noum ketilas.
14Äi SAMOL, kopwe angasaei ren poum, seni ekkeei sókkun aramas, seni aramasen ei fönüfan iir ekkewe mi chök kütta ar feiöch me lón ei manaw. En ka ouraaló luuker ren pisek mi öüchchea; iir ra menemenöch ren semiriit o ra likitätiw minne ar mi sómwóló ngeni nöüür kana mönükól.
15Nge merei, ngang üpwe nengeni wón mesom lón pwüng. Lupwen üpwe nenneló, ngang üpwe menemenöch ren äi üpwe nengeni sókkum.
Köölfel 18
Kot i ewe asalapen Chón nemenem me Chón amanaw.Ngeni ewe chón nemeni kööl. Echö kööl än David, nöün ewe SAMOL chón angang a kapas ngeni ewe SAMOL lón kapasen ei kööl lón ewe ränin ewe SAMOL a angasa i seni lepöün chón opwutan kana meinisin pwal seni lepöün Saul. Iwe, i a apasa:
1Ngang üwa tongek, äi SAMOL, en äi pöchökkül.
2Ewe SAMOL i äi achaw me äi leeni mi tittiló lón maun, pwal i äi chón chiman, äi Kot i äi pöchökkül. I ewe üwa anómwu äi apilükülük wón. I äi pisekin eppetin feiengaw lón maun o i pöchökkülen äi alen ngaseló. I äi leeni mi pöchökkül.
3Ngang üpwe kökköri ewe SAMOL, i ewe mi fich ngeni äi üpwe mwareiti. Iwe, üpwe ngas seni ekkewe chón opwutaei.
4Ekkewe selin mäló ra föpwenieiló, ekkewe öütöüten feiengaw ra eniwokusuei.
5Ekkewe selin leenien sootupw ra rokopwalieiló, ekkewe sären mäló ra üüngeniei.
6Lón äi riäfföü, üwa kökköri ewe SAMOL, üwa siö ngeni äi we Kot. I a rong mweliei seni lón imwan imwenfel, äi siö a feitto mwan o a tori selingan.
7Mwirin, fönüfan a mwöüküük o a chechcheech; iwe, lóngólóngun ekkewe chuuk ra pwal chüngüchüng, ra chechcheech pwokiten i a soong.
8Ötüöt a ötüwu seni lón pwöötün, ekkei mi efeiengaw a ngetewu seni lón awan, mwolien ekkei mi sarara a küwu seni.
9I a tileni feseni läng o a feittiw fiti ekkewe kuchuchól ra nóm fän pachapachan.
10Iwe, a ääs nge a wawa emön kerop, a ääs wón pöükkässin ekkewe äsäpwääl.
11A finiti ngeni inisin rochopwaak, a apwelli ngeni pwellin ünükkün kuchun üüt mi malüül o rochokkich.
12Ewe saramaram mi nóm mwan a tilenifeseni ewe kuchu mi malüül, iwe, üten faaw me mwolien ekkei mi kü ra püngütiw.
13Ewe SAMOL a öpüngü chopwulap seni läng, ewe mi Unusen Tekia a kapas ren mwelian, iwe üten faaw me mwolien ekkei mi kü ra püngütiw.
14A esefichaló nöün kewe föün esefich o a atoropasafeili chón opwutan kana. A efiifii nöün kewe inefi o ra süüló.
15Ekkewe pwokuren fäniilól ra pwäätä, nge lóngólóngun fönüfan ra lingetä ren óm kapasen köpwüng, äi SAMOL, ren pöchökkülen enienin äsäpwäälin lón pwötum.
16I a angetiw seni läng o chimanüei, i a pwisiieiwu seni lón ekkewe kóluk mi alóllól.
17I a angasaei seni ewe chón opwutaei mi pöchökkül, seni chókewe mi opwut ngang pün ra fókkun pöchökkül seniei.
18Ra säpeitiei pwe repwe mwu ngeniei lupwen üwa apwangapwang lón äi riäfföü, nge ewe SAMOL a älisieitä.
19I a pwal emmwenieiwu ngeni ew leeni mi maasies, o a angasaeiló pwokiten i a pwapwa reei.
20Ewe SAMOL a liwini ngeniei minne mi fich ngeni äi föfför mi pwüng; a pwal liwini ngeniei minne mi fich ngeni limöchün peii.
21Pün ngang üwa tümwünüfichi le öpwönüetä ekkewe sókkun föfför än ewe SAMOL, nge üsap föri och mi ingaw ren äi üpwe kul seni äi Kot.
22Pün an kewe öllük meinisin ra nóm mwei fansoun meinisin. Ngang üsap likiti seniei an kewe öllük.
23Esap pwal wor äi mwääl me mwen mesan, pün üwa pwisin tümwünüei seni tipis.
24Iei minne, ewe SAMOL a liwini ngeniei minne mi fich ngeni äi föfför mi pwüng, pwal minne mi fich ngeni limöchün peii me mwen mesan.
25En ka pwääraló óm ölükülük ngeni iir mi ölükülük. En ka pwal pwääraló óm wenechchar ngeni iir mi wenechchar.
26En ka pwääraló óm limöch ngeni iir mi limöch, nge ka pwääraló óm soong ngeni ekkewe aramas mi pwór lón manawer.
27Pün en ka angasa ekkewe aramas mi tipetekisón, nge ka etekisónätiw ekkewe mi mese lamalamtekia.
28En, äi SAMOL, ka sópweló le ettina neii ei lamp, äi Kot ka föri pwe äi rochopwak a wiliti saram.
29Pün ren óm älillis, ngang üwa tongeni üpwe pöchökkül le üüngeni ew mwiichen sounfiu; ren äi Kot üwa tongeni mwetetä wón ew tiit.
30Nge ren Kot, an aal a fókkun unusöch; a fókkun let pwe esap wor mwäälin än ewe SAMOL kapasen pwon. I a usun chök ew pisekin eppetin feiengaw lón maun fäniten chókana mi op lón i.
31Pün iö Kot me lükün chök ewe SAMOL? Nge iö ewe achaw me lükün chök ach ei Kot?
32I ewe Kot mi eppiseki ngeniei pöchökkül pwe äi pisekin maun o föri pwe äi aal epwe unusöch.
33I a föri pwe pachapachei repwe wewe ngeni pachapachen ekkewe maan iter chia ren mwittiriir, o a ötüfichiei pwe üpwe tongeni üütä wón ekkewe leeni mi tekia.
34I a esipa peii pwe repwe sipeöch lón maun, pwe efóch esefich mi för seni piraas epwe tongeni pwór ren äi emmeia ngeni peii.
35En ka fen ngeniei óm we alen ngaseló pwe epwe usun chök ai pisekin eppetin feiengaw lón maun, pöüiifichum a älisieitä o óm tipepwetete a föri pwe üpwe tekia.
36En ka achööwätteló ewe aal ngang üwa fätäl wón, iei popun pecheei resap mititiw me wón.
37Ngang üwa tapwei ekkewe chón opwutaei o üwa liapeniir. Üsap kulsäfäl tori iir ra rosoló.
38Ngang üwa ekinaser, iei minne resap chüen tongeni pwäätä, iir ra turuló fän pecheei.
39En ka eppiseki ngeniei pöchökkül fäniten maun. En ka okkufätiw fai ekkewe chón opwutaei pwe repwe chappetiw arun pecheei.
40En ka pwal föri pwe ekkewe chón opwutaei ra kulluweto sókürür ren ar ra süün nuokkus. Iwe, ngang üwa arosaló chókewe mi opwut ngang.
41Iir ra siö pwe emön epwe älisiir nge esap wor emön epwe angaser. Iir ra siö ngeni ewe SAMOL nge i esap pölüeniir.
42Mwirin, ngang üwa üsiir tori ra usun chök pwül mworomwor äsäpwääl a ässireló. Ngang üwa otururewu usun chök móchór lón ekkewe aal.
43En ka angasaei seni än ekkewe aramas üüngeniei. En ka seikieitä pwe üpwe samolun ekkewe mwüü. Ekkewe aramas ngang üsap siler ra angang ngeniei.
44Lupwen chök iir ra rong usi, ra äleasochisiei. Chón ekis ra feitto o ra chappetiw fän äi nemenem.
45Letiper a kisiló ren ar nuokkus. Iir ra toowu seni ar kewe leenien op fän ar chechchech.
46Ewe SAMOL a manaw! Üpwe mwareiti äi we Achaw. Ewe Kot i ewe alen äi ngaseló epwe tekiatä.
47I Kot ewe mi wiisen älemööw fänitei än chón opwutaei föfför. I a okkufu o atolonga aramasen ekkewe mwüü fai.
48I a angasaei seni ekkewe chón opwutaei. Ewer, en ka pwal etekiaeitä asen chókana mi üütä pwe repwe üüngeniei. En ka chimanüei seni ekkewe aramas mi mwänesol.
49Iei minne, ngang üpwe kilisou ngenuk, äi SAMOL, me leiin chón ekkewe mwüü, o ngang üpwe köölün mwareiti itom.
50En ka ngeni nöüm we king älillis mi lapalaap pwe i epwe wiil o en ka pwääri óm kirekiröch ese mwüch ngeni nöum we mi kepit, ngeni David me mwirimwirin kana tori feilfeilló chök.
Köölfel 19
Unusöchün minne mi pwääräló usun ewe SAMOL. Ngeni ewe chón nemeni kööl. Echö kööl än David.
1Läng kana ra esilefeili lingen Kot, nge chöölapen unusen fän läng a pwääraló amwaraaren angangen pöün.
2Rän me rän ekkewe läng ra chök sópweló le kapas, pwiin me pwiin, masowen fän läng ra chök pwääraló minne sipwe silei i ren.
3Ra kapas nge esap wor möngüngür ika och sókkun kapas iir repwe nöünöü. Esap wor emön a tongeni rong mwelier.
4Nge ar poraus a fen meresfeil ngeni aramas meinisin, pwal ar kapas a tori unusen fönüfan meinisin. Kot a öüüwetä ew imw mangaku fän läng fäniten ewe akkar.
5A saramaram usun chök emön mwän epwe kärään öpwüpwülü lupwen a toowu seni lón rumwan, a pwal pwapwa usun emön mwän mi pöchökkül lupwen an ssä wón an alen kitir.
6Akkar a tötä seni epeek läng o pwelli ngeni pwal ewe epeek. Esap wor och mettóch epwe op seni pwichikkaran.
7Än ewe SAMOL kapasen käit a fókkun unusöch, a amanawa säfäli ngünüch. Än ewe SAMOL kapasen pwäräta ra fókkun enlet, ra etipächchema emön mi wewemang.
8Än ewe SAMOL kapasen öüröür ra pwüng, ra apwaapwai letipach. Än ewe SAMOL öllük ra fatafatöch, ra asaramaló mesach.
9Ach nuokkusiti ewe SAMOL a limelimöch, epwe nónnóm tori feilfeilló chök. Än ewe SAMOL kewe pwüngün köpwüng ra let o ra unusen pwüng.
10Ra fókkun öüchchea lap seni kolt; lap seni chómmóng kolt mi mwirinnö. Ra pwal araar lap seni chönün chunen pwal seni supwun ewe fasen chunen.
11Nge fen lapalón, noum chón angang a angei fönan seni ekkeei öllük. A wor wätten liiwin mi lapalaap ngeni iö mi öpwönüetä ekkei öllük.
12Nge iö a tongeni weweiti pwisin an kana föfför mi mwääl? Kopwe limetiei seni äi kewe tipis mi mwónómwón.
13Kopwe pwal tümwünü noum chón angang pwe esap föri tipis seni mochenin letipan. Kosap mwüüt ngeni ekkeei tipis pwe repwe nemenieiló. Mwirin, ngang üpwe unusöch lón manawei o ngas seni ekkewe pwupwungaw mi lapalaap.
14Amwo pwe kapasen awei me ekiekin lelukei repwe tiw me fän mesom, äi SAMOL, äi Achaw me äi Chón Sele.
Köölfel 20
Älelleten än Kot angangen amanawa aramas. Ngeni ewe chón nemeni kööl. Echö kööl än David.
1Amwo ewe SAMOL epwe pölüweni óm tungór lón ränin óm riafföü. Amwo iten än Jakob we Kot epwe penuk.
2Amwo i epwe tiinato óm älillis seni ewe leeni mi pin o uwato óm älillis seni Zion!
3Amwo epwe chechchemeni óm kewe asór o etiwa óm asóren keek.
4Amwo epwe mwüüt ngenuk minne mi fich ngeni mochenin letipom o öpwönüetä óm kewe akkóót pwe repwe fisiöch.
5Öüsipwe kööl ren pwapwa fäniten óm wiil. Lón iten ach we Kot, sipwe öürätä ach kewe filäik! Amwo ewe SAMOL epwe öpwönüetä óm kewe tungór meinisin.
6Iei üwa silei pwe ewe SAMOL a angasa nöün we mi kepit, a pölüweni an tungór seni lenian lón läng mi pin o angasa i ren manamanen pöümwänin.
7Ekkóch mwüü ra anómwu ar apilükülük wón war wóókenin maun, ekkóch ra anómwu ar apilükülük wón nöür óris, nge kich sia anómwu ach apilükülük lón iten ewe SAMOL ach we Kot.
8Ekkana mwüü ra turutiw o taaló, nge kich sia üütä o ü nüküchchar.
9Äm SAMOL, kopwe ewilla ewe king! Kopwe pölüweni keem lupwen aia siö ngenuk pwe kopwe älisi keem.
Köölfel 21
Pwapwa lón än ewe SAMOL alen ngaseló. Ngeni ewe chón nemeni kööl. Echö kööl än David.
1Äm SAMOL, ewe king a fókkun pwapwa ren óm manaman. A ifa me wätten an meseik ren óm chimanüw i pwe epwe wiil.
2En ka fang ngeni i mochenin letipan, nge kosap ömwöchü seni i minne tinnawan a tungór. Selah
3Pün en ka souni ngeni i feiöch ren mettóch mi mwirinnö. En ka ämwämwärätä wón möküran epa mwärämwär kolt mi mwirinnö.
4I a tungór ngenuk pwe en kopwe tümwünü manawan, iwe, en ka fang ngeni i an tungor. En ka alangattamaló ränin manawan esap mwüchüló tori feilfeilló chök.
5An ling a fókkun lapalaap ren óm angasa i pwe epwe wiil. En ka ämwärätä wón iteüöch me ling.
6Pün en ka föri pwe i epwe fókkun feiöch feilfeilló chök. En ka föri pwe i epwe selüküló an pwapwa ren óm nónnóm ren.
7Pün ewe king a anómwu an apilükülük wón ewe SAMOL. Iwe, pwokiten än ewe mi Unusen Tekia kirekiröch, i esap tongeni epwe mwökütüküt.
8Poum epwe kütta o liäpeni meinisin chón opwutom. Pöüiifichum mi pöchökkül epwe turufi chókana mi opwut en.
9Lupwen kopwe pwääto pwe kopwe maun ngeniir, en kopwe keniireló usun chök lón ew uumw mi ngetenget. Ewe SAMOL epwe aromireló lón an lingeringer o an ekkei epwe keniireló.
10En kopwe arosaló nöür kana seni wón fönüfan, kopwe arosaló mwirimwiriir kana seni leiin aramas.
11Pün iir ra ekiekietä ar repwe föri minne mi ingaw ngenuk. Iir ra rawei ar wiwi nge resap tongeni repwe pwönüetä.
12Iei minne, en kopwe föri pwe iir repwe kul o sü. En kopwe amollätä le atolonga noum föün esefich wón selin o äpera ngeni wón meser.
13Äm SAMOL, en kopwe tekiatä lón óm pöchökkül! Äm aipwe kööl o mwareiti óm manaman.
Köölfel 22
Än ewe Messiah riäfföü, än aramas mwareiti i me mwirimwirin. Ngeni ewe chón nemeni kööl. Mi fich ngeni ngiingiin ewe kööl itan, Ewe Chiaan Ünimweirän. Echö kööl än David.
1Äi Kot, äi Kot, pwata ka likitieiló? Pwata a iei me towawen óm kopwe älisiei, pwata a iei me towawen óm kopwe pölüweni äi keei kapasen ngüüngüres?
2O äi Kot, ngang üwa siö ngenuk lerän nge en kosap pölüweni. Ngang üwa pwal siö ngenuk lepwin, nge esap wor äi ngas.
3Nge en ka pin. En ka móót wón óm leenien móótun nemenem, nge chón Israel ra mwareituk.
4Äm kewe leewo ra anómwu ar apilükülük wóómw. Iir ra apilükülükuk, nge en ka chimanü iir.
5Iir ra siö ngenuk, nge en ka angaser. Iir ra anómwu ar apilükülük wóómw; iwe, iir resap lichippüng ren.
6Nge ngang emön mwósó, sap emön aramas. Ngang üwa itengaw meren aramas, üwa pwal küna kopwut meren aramas.
7Chókana meinisin mi nengeniei ra turunufaseei. Ra ngóngóriei o ra enlifechifechi mökürer ngeniei o apasa,
8“I a anómwü an apilükülük lón ewe SAMOL; iwe, mwüüt ngeni i epwe chimanüw. Mwüüt ngeni ewe SAMOL epwe angasa i pwokiten i a pwapwa ren.”
9Nge en ewe mi atöeiwu seni lón letipen inei. En ewe ka föri pwe üpwe äänuk apilükülük lupwen üwa chüen nóm wón oupwun inei.
10Seni chök äi upwutiw, ngang üwa uwätä wóómw äi apilükülük. En chök äi Kot seni chök äi nóm lón letipen inei.
11Kosap towaw seniei, pün osukosuk a chök arap ngeniei, nge esap wor emön epwe älisiei.
12Chómmóng chón opwutaei ra pwellifeiliei mi usun chök ekkan ätemwänin kowu. Ra usun chök ekkan ätemwänin kowu seni Bashan ra pwellifeiliei.
13Ra ammasaw ngeniei; ra pwupwuchör usun laion mi arochongaw lupwen ra turufi liäper.
14Manawei a niitiw usun chök kóluk, lekkeilen chüüi meinisin ra ruwofesen. Pworan letipei a teliló usun chök ewe mettóch kandel a för seni.
15Äi pöchökkül a pwasapwasatä usun chök ew sepi mi för seni pwül, chönnawei a pächätä fän fóngóóchi. En ka akkónaei lón ewe pwül mworomworen mäló.
16Pün ekkewe aramasingaw mi usun kolaak ra pwellifeiliei. Ewe mwiichen chón föfföringaw ra róngeeiló. Ra posuw kumwuchi me pachapachei.
17Ngang üwa tongeni älleani chüüi meinisin. Iir ra nennengeniei o ännefótaei.
18Iir ra ineti fengeni lefiiler üfei kewe, nge ra üttüüt wón äi we mangakü.
19Nge en, äi SAMOL, kosap towaw seniei, en äi pöchökkül, kopwe käito pwe kopwe älisiei!
20Kopwe chimanüei seni ewe efeiengawen ketilas, kopwe angasa manawei mi öüchchea seni fän pöchökkülen ekkeei kolaak.
21Kopwe chimanüei seni lón awen ewe laion pwal seni mächään ekkewe ätemwänin kowu mi mwacho. En ka pölüweni äi siö.
22Ngang üpwe aporausafeili itom ngeni pwii kana. Ngang üpwe mwareituk me leiin ewe mwiichen aramas.
23Ämi ekkewe mi nuokkusiti ewe SAMOL, öüpwe mwareiti i! Ämi mwirimwirin Jakob meinisin, öüpwe enlingaló i. Ämi nöün Israel kana meinisin öüpwe nuokkusiti i!
24Pün i esap opwut ika enniopwutäsini riäfföün emön mi nóm lón riäfföü. Esap pwal aopa wón mesan seni i. Nge lupwen ewe mi riäfföü a siö ngeni, i a rongorong.
25Äi kapasen mwaar epwe chök fänitom me lón ewe mwiichen aramas mi lapalaap. Ngang üpwe öpwönüetä le isettiw minne üwa ääni pwon me fän mesen chókana mi nuokkusiti i.
26Ekkewe mi wöwingaw repwe mwöngö o repwe mötüló. Chókana mi kütta ewe SAMOL repwe mwareiti i. Letiper epwe pwapwa ren pwapwa esap mwüchchüló!
27Meinisin unusen chón fönüfan seni esóp tori esóp repwe chechchemeni ewe SAMOL o kul ngeni i. Meinisin ekkewe einang seni ekkewe mwüü repwe chappetiw me mwan.
28Pün ewe SAMOL i king. I a nemenem wón ekkewe mwüü meinisin.
29Meinisin ekkewe mi pisekisek me wón fönüfan repwe mwöngö o fel ngeni i. Chókana meinisin mi mäló o feittiw fän pwül repwe fatopwäsukutiw me mwan- chókana resap tongeni repwe pwisin ömwöchü manawer.
30Mwirimwich kana repwe pwal angang ngeni i. Nöüch kana repwe rong usun porausen än ewe Samol kewe föfför mi amwarar.
31Iir repwe feitto o arongafeili usun an pwüng, repwe esile ngeni ewe mwiichen aramas repwe üpwutiw me mwirin. Repwe esile ngeniir pwe iei usun meet i a föri.
Köölfel 23
Ewe SAMOL i ewe chón masa nöün aramas usun emön chón masen siip. Echö kööl än David.
1Ewe SAMOL i äi chón mas, ngang üsap osun och mettóch.
2I a mwüüt ngeniei pwe üpwe asöösö lón ekkewe maasies ia a määröch fetil mi pwetete ie. I a emmwenieiló ünüppen ekkewe pwuupwun kólik mi lüwa.
3I a öpöchökküla säfäli ngüni. I a emmweniei wón ekkewe aal mi pwüng pwe üpwe atooto iteüöch ngeni itan.
4Pwal are mwo üpwe fätälelong lón lemólün nürün mäló, ngang üsap nuokkusiti och mi ingaw, pün en ka nóm reei. Öürom me wókum ra echipaei.
5En ka amollätä ew chepel me mwei me fän mesen ekkewe chón opwutaei. En ka epiti ngeni mökürei lömmis, äi kap a säsewu ren feiöch.
6Enlet, feiöch chök me chen repwe tapweto mwiri lón ränin manawei meinisin. Iwe, ngang üpwe nónnóm lón imwen ewe SAMOL feilfeilló chök.
Köölfel 24
Ewe King mi ling me mwüün we. Echö kööl än David.
1Fönüfan me masowan meinisin, än ewe SAMOL. Fönüfan me aramas meinisin mi nóm wón, an.
2Pün i a föri pwe fönü epwe pwäätä o nóm wón ekkewe mataw, a pwal önüküchcharatiw wón ekkewe kóluk.
3Iö a tongeni feittä wón chukun ewe SAMOL? Iö a tongeni üütä lón leenian mi pin?
4Ätewe chök mi limöch föfförün pöün o pwal limöch ekiekin lelukan, pwal iö esap apwaapwai manawan le fel ngeni uluulun önü mwäl o esap pwal chofona le pwon fän ökköpöl.
5I epwe angei an feiöch meren ewe SAMOL, epwe pwal angei an pwüng meren ewe Koten an küna manaw.
6Epwe iei usun pilóón chókana mi kütta Kot, iir mi kütta wón mesen än Jacob we Kot. Selah
7Öüpwe chimwetä o sukkuló ämi asamen ekkewe tiit minen chök lóóm, öüpwe chimwetä o sukkuló ämi ekkewe asam minen chök lóóm! Ewe King mi ling epwe tolong.
8Iö ei King mi ling? Ewe SAMOL mi pöchökkül o pwora, ewe SAMOL mi pwora lón maun.
9Ämi asamalapen ekkewe tiit öüpwe chimweta o sukkuló, öüpwe chimweta ämi ekkewe asam minen chök lóóm! Ewe King mi ling epwe tolong.
10Iö ei King mi ling? I ewe SAMOL mi Unusen Manaman. I ewe King mi ling. Selah
Köölfel 25
Tungór fäniten ngaseló me omwusomwusen tipis. Echö kööl än David.
1Äi SAMOL, ngang üwa sachchetä ngenuk lón letipei.
2O äi Kot, ngang üwa anómwu äi apilükülük wóómw. Kosap mwüüt ngeniei pwe üpwe lichippüng. Kosap mwüüt ngeni ekkana chón opwutaei pwe repwe pwapwa ren äi kuf.
3Enlet, esap wor emön mi witiwituk lón an lükü epwe lichippüng. Amwo pwe chókana mi chök popuchööw le föri föfföringaw repwe sääw.
4Kopwe pwääri ngeniei óm kewe aal, äi SAMOL. Kopwe äiti ngeniei óm kewe aal mi pwüng.
5Kopwe emmweniei lón óm let o äöüei. Pün en ewe Koten äi alen küna manaw. Ngang üwa witiwituk lón äi lükük rän meinisin.
6Äi SAMOL, kopwe chechchemeni óm ümöümöch mi pweteete me óm tong fiti kirekiröch, pün ra nóm seni chök lóóm.
7Kopwe omwusaló äi kewe tipis üwa föri lesäräföi, kosap pwal chechchemeni äi kewe pwuupwungaw. Kopwe chechchemeniei usun minne mi fich ngeni óm kirekiröch, pün en ka uren tong, äi SAMOL.
8Ewe SAMOL a mwirinnö o pwüng. Iei minne, i a äiti ngeni ekkewe chón tipis ewe aal.
9I a emmweni ewe chón tipetekisón lón minne mi wenechchar. I a äiti ngeni ewe mi tipetekisón an aal.
10Lón alen ewe SAMOL kewe meinisin a wor kirekiröch me let fäniten chókana mi öpwönüetä an pwon me an kewe kapasen pwärätä.
11Äi SAMOL, fäniten iteüöchün itom, kopwe epichaló äi tipis pün a fókkun lapalaap.
12Iö ewe aramas mi nuokkusiti ewe SAMOL? Iwe, ina i ewe emön i epwe äiti ngeni ewe aal epwe filätä.
13I wón inisin epwe nónnóm lón feiöch, nge mwirimwirin kana repwe älemwirini ewe fönü.
14Ewe SAMOL a pwääri an mwónómwón ngeni chókana mi nuokkusiti i. I epwe äiti ngeniir an pwon.
15Mesei ra chök newenewen ngeni ewe SAMOL, pün i chök a tongeni epichawu pecheei seni lón än ekkewe chón opwutaei ssär.
16Kopwe kül ngeniei o kirekiröch ngeniei, pün ngang üwa metip o kok lón riäfföü.
17Osukosuken letipei kana ra fen lapaló. Kopwe atooweiwu seni lón riäfföü!
18Kopwe nennengeni äi riäfföü me äi metek, o omwusaló äi kana tipis meinisin.
19Kopwe ekieki usun ekkewe chón opwutaei, pün iir ra fókkun chómmóng. Iir ra opwutangaw ngang ren kopwut mi mwänesol.
20Kopwe tümwünü manawei o chimanüei. Kosap mwüüt ngeniei pwe üpwe lichippüng, pün ngang üwa anómwu äi apilükülük wóómw.
21Awmo wenechchar me pwüng repwe tümwünüei, pün ngang üwa witiwituk lón äi lükü.
22Äi Kot, kopwe seläni chón Israel seni lón ar riäfföü meinisin.
Köölfel 26
Ew iótek fäniten än Kot epwe nengeni fichi me amanawa aramas. Echö kööl än David
1Äi SAMOL, kopwe älletätä äi pwüng. Pün ngang üwa fätäl lón äi wenechchar. Ngang üwa pwal anówmu äi apilükülük lón ewe SAMOL, nge esap wor äi üpwe mwarooro.
2Kopwe tessiniei, äi SAMOL, o sótuniei. Kopwe etittina letipei me äi ekiek,
3pün óm tong enlet a nóm mwen mesei fansoun meinisin o ngang üwa fätäl lón äi apilüküw óm ölükülük.
4Ngang üsap móót ren aramas mi uren chofona, üsap pwal chiechi ngeni chón manaweni manawen likotupwutupw.
5Ngang üwa opwut ewe mwiichen chón föfföringaw, o üsap móót ren ekkewe aramasingaw.
6Ngang üpwe tölü peii pwe üpwe pwärätä äi limöch. Iwe, üpwe feilló ren óm we róngen asór, äi SAMOL,
7pwe ngang üpwe leüommóng le apasatä äi kapasen mwareituk o aporausa usun óm kewe föfför mi amwaraar meinisin.
8Äi SAMOL, ngang üwa efich imwom we ia ka nóm ie, ewe leeni ia óm ling a nóm ie.
9Kosap angealó ngüni fiti ekkewe chón tipis, kosap angealó manawei fiti ekkewe aramas mi mochen niieló aramas,
10iir ekkewe ra föri angangen rawangaw ren pöür, nge pöüiifichir a uren liffangen emichimich.
11Nge ngang üpwe fätäl lón äi wenechchar. Kopwe seläniei o kirekiröch ngeniei.
12Pecheei a ipwetiw lón ew leeni mi sóssónöch. Ngang üpwe mwareiti ewe SAMOL me lón ewe mwiichen aramas mi lapalaap.
Köölfel 27
Kapasen pwärätä lükülük fän pwapwa. Echö kööl än David.
1Ewe SAMOL i äi saram me äi alen ngaseló. Iö üpwe nuokkusiti? Ewe SAMOL i än manawei leenien op mi pöchökkül. Iö üpwe niweiti?
2Lupwen ekkewe aramasingaw ra feitto o rangeitiei pwe repwe oromieiló, wesewesen iir ekkewe chón opwutaei me koum ngeniei, repwe chepetek o turuló.
3Inamwo are ew mwiichen sounfiu repwe nóm pwellin ünükki, nge letipei esap nuokkus. Inamwo are epwe wor maun epwe fis ngeniei, nge ngang üpwe chök anómwü äi apilükülük lón i.
4Mi wor och chök mettóch ngang üwa mochen seni ewe SAMOL, iei meet ngang üpwe tilikken le kütta: pwe ngang üpwe tongeni nónnóm lón imwen ewe SAMOL lón ränin manawei meinisin, pwe üpwe nennengeni lingöchün ewe SAMOL o kütta äi üpwe ekilólei usun i me lón imwan mi pin.
5Pün i epwe aopaei lón imwan mi pin lón fansoun osukosuk. I epwe aopaei lón ewe leeni mi mwónómwón me lón imwan we imw mangaku mi pin. I epwe anómwuei tekiatä wón ew achaw.
6Iwe, iei mökürei epwe tekiatä asen kana chón opwutaei meinisin mi pwelli feiliei. Iei minne, ngang üpwe ääni ekkewe asóren pwapwa me lón an we imwenfel mangaku. Ngang üpwe kööl, ewer, ngang üpwe köölün mwareiti ewe SAMOL.
7Äi SAMOL, kopwe rong lupwen üwa leüommóng le siö ngenuk. Kopwe pwal ümöümöch ngeniei o pölüweni äi siö ngenuk.
8En ka apasa, “Öüpwe kütta wón mesei.” Letipei a apasa ngenuk, “SAMOL, ngang üpwe kütta wón mesóm.”
9Kosap aopaló wón mesóm seniei. Kosap eliwinaló noum ei chón angang lón óm soong. En chök äi chón älillis. Kosap likitieiló o pöütieiló, Kot äi Chón Amanaw.
10Ikamwo semei me inei ra likitieiló, nge ewe SAMOL epwe etiwaei.
11Kopwe äiti ngeniei óm kewe aal, äi SAMOL, o emmweniei wón efóch aal mi wenechchar pwokiten ekkewe chón opwutaei.
12Kosap fangatäniei ngeni tipen ekkewe chón opwutaei, pün ekkena chón pwärätä mi chofona ra üüngeniei o apasatä kapasen otuttur mi fókkun ngaw.
13Nge ngang üwa apilükülük pwe üpwe küna än ewe SAMOL kirekiröch lupwen ngang üwa nóm ikeei lón ei fönüwen mi manaw.
14Kopwe witiwiti ewe SAMOL. Kopwe pöchökül o tipepwora o witiwiti ewe SAMOL.
Köölfel 28
Pwapwa ren pölüwen iótek. Echö kööl än David.
1Äi SAMOL, ngang üwa kökköruk, en äi Achaw, kosap fanafanaló ngeniei. Pün are kopwe fanafanaló ngeniei; iwe, ngang üpwe le wewe ngeni chókana mi feittiw lón ewe pwaang.
2Kopwe rong ngeni möngüngün äi iótekin tungór lupwen ngang üwa siö ngenuk, lupwen ngang üwa eitieta peii ngeni imwom imw mi pin.
3Kosap etekinieiló fiti ekkewe aramasingaw me ekkewe chón föfföri tipis. Iir ekkewe mi ääni kapas kinamwe ngeni chón aruur, nge lón letiper a ingaw.
4Kopwe liwini ngeniir minne mi fich ngeni ar kana föfför. Kopwe liwini ngeniir minne mi fich ngeni öükükün ingawen ar kana föfför. Kopwe liwini ngeniir minne mi fich ngeni angangen pöür kana. Kopwe ngeniir chappen minne mi fichiti iir.
5Pwokiten iir resap öüchcheani än ewe SAMOL kewe föfför, resap pwal öüchcheani minne pöün kana ra föri; iei minne i epwe atareló, nge esap öüüretä.
6Üpwe mwareiti ewe SAMOL, pün i a rongorong äi siö fäniten an ümöümöch!
7Ewe SAMOL i äi pöchökkül me äi pisekin eppet lón maun. Letipei a anómwu an apilükülük wón nge i a älisiei. Iei minne, letipei a mwetemwet ren pwapwa, o ngang üwa mwareiti i ren äi kööl.
8Ewe SAMOL i än nöün kewe aramas pöchökkül, i ew leenien open ngasaló fäniten nöün we emön mi kepit.
9Kopwe amanawa nöüm aramas o efeiöchü chón älemwirum kana. Kopwe fóóleniir usun emön chón fóól siip o pwisiir feilfeilló chök.
Köölfel 29
Mwareiti Kot lón an pin me manaman. Echö kööl än David
1Ämi ekkewe pwal ekkóch kot, öüpwe afóna ngeni ewe SAMOL ling me pöchökkül.
2Öüpwe afóna ngeni ewe SAMOL ewe ling mi fich ngeni itan; öüpwe fel ngeni ewe SAMOL lón amwaraaren lingen an pin.
3Möngüngün ewe SAMOL a tittiriis me asen ekkewe mataw. Ewe Koten ling a usun ei püngün chopulap. Ewe SAMOL a usun püngün chopwulap me asen ekkewe mataw mi pöchökkül.
4Möngüngün ewe SAMOL a uren manaman. Möngüngün ewe SAMOL a uren ling mi amwaraar.
5Möngüngün ewe SAMOL a kupii ekkewe irä iter setar. Ewer, ewe SAMOL a kupikisietiw ekkewe setaren Lebanon.
6I a föri pwe Lebanon epwe lusummwet usun emön liänifföön kowu, pwal ewe chukun Sirion pwe epwe mwetemwet usun emön liänifföön ätemwänin kowu mi mwacho.
7Möngüngün ewe SAMOL a fiiló ren fiifin inefi.
8Möngüngün ewe SAMOL a ächechchecha ewe fönüpöön. Ewe SAMOL a ächechchecha ewe fönüpöönün Kadesh.
9Möngüngün ewe SAMOL a föri pwe ewe chia mi pwoopwo epwe nöünöüló, a pwal amworätiw chöön irän ekkewe wollap. Nge meinisin mi nóm lón imwan we imwenfel ra leüommóng le apasa, “Ling!”
10Ewe SAMOL a móót wón an leenien móótun nemenem asen ewe Nóóter. Ewe SAMOL a móót wón leenian pwe i King feilfeilló chök.
11Ewe SAMOL a ngeni nöün kewe aramas ar pöchökkül. Ewe SAMOL a efeiöchü nöün kewe aramas ren kinamwe.
Köölfel 30
Pwapwa ren pölüwen iótek. Echö kööl. Echö kööl lupwen efinüünen imwen David.
1Ngang üpwe etekióketä, äi SAMOL, pün en ka etekinieitä seni lón ewe leeni mi alóllól, nge kosap mwüüt ngeni ekkewe chón opwutaei pwe repwe pwapwa le eriäfföüei.
2Äi SAMOL äi Kot, ngang üwa siö ngenuk pwe kopwe älisiei; iwe, ka öpöchökkülaeitä.
3Äi SAMOL, en ka uweieiwu seni lón peias. En ka tümwünüei pwe üpwe manaw, pwe üsap feittiw lón ewe pwaang.
4Öüpwe köölün mwareiti ewe SAMOL, ämi nöün kana chón pin. Öüpwe apasa ämi kilisou lupwen öüwa ächchema itan we mi pin.
5Pün a chök mwochomwooch fansoun an soong, nge an kirekiröch a nóm lón ükükün ränin manawen emön aramas. A fis kechiw lepwin, nge lesossor a war pwapwa.
6Lupwen äi nóm lón nükünüköch, ngang üwa apasa, “Ngang üsap fókkun tongeni üpwe mwökütüküt.”
7SAMOL, lupwen ka ääni kirekiröch ngeniei, ka föri pwe chuki epwe pöchökkül le üütä. Nge lupwen ka aopaló wón mesom seniei, ngang üwa osukosuk.
8Ngang üwa siö ngenuk, äi SAMOL. Ngang üwa tungór ngeni ewe SAMOL pwe epwe älisiei o apasa,
9“Meet en kopwe angei pwe óm wiil are ngang üpwe mäló, are ngang üpwe feittiw lón ewe pwaang? Ifa usun, inisi we mi wiliti pwül mworomwor epwe mwareituk seni lón peias? Ifa usun, epwe aporausa ngeni fönüfan usun óm ölükülük?
10Kopwe rongorong ngeniei, äi SAMOL, o kirekiröch ngeniei. Äi SAMOL, kopwe äi chón älillis!”
11En ka fen ewilaló äi ngüngüres ngeni pwapwan pwörük. En ka pwiliti seniei üfei üföüfen letipeta o öüföüfa ngeniei pwapwa,
12pwe ngang üpwe kööl ngenuk seni lón letipei, nge usap fanafanaló. Äi SAMOL äi Kot, ngang üpwe kilisou ngenuk tori feilfeilló chök.
Köölfel 31
Ewe SAMOL i leenien op lón fansoun riäfföü. Ngeni ewe chón nemeni kööl. Echö kööl än David.
1Lón en, äi SAMOL, ngang üwa äänuk leenien op; kosap mwüüt ngeniei pwe üpwe sääw; kopwe chimanüei lón óm pwüng.
2Kopwe öüüwetiw selingom ngeniei, kopwe mwittir chimanüei. En äi achaw leenien op, ew imwen maun mi pöchökkül pwe kopwe amanawaei.
3Pwokiten en äi achaw me imwei imweimwen lón maun mi tittiló, iei minne, fänäsengesin iteüöchün itom, kopwe emmweniei o mwenäniei.
4Kopwe epichieiwu seni lón ewe sär ekkena chón opwutaei ra föri fänitei le mwónómwón, pün en äi pöchökkül.
5Ngang üwa atolonga ngüni lón poum. Kopwe selaniei, äi SAMOL Koten let.
6Ngang üwa opwut chókana mi öüchcheani ekkewe uluulun önü mwäl mi lamwotongaw; nge üwa anómwu äi apilükülük lón ewe SAMOL.
7Ngang üpwe pwapwa o chengel ren óm kirekiröch, pün en ka ekieki usun äi riäfföü, en ka pwal silei än ngüni nóm lón weires,
8nge en kosap atolongaei lepöün chón opwutaei. En ka eipwätiw pecheei lón ew leeni mi chöölap.
9Kopwe kirekiröch ngeniei, äi SAMOL, pün ngang üwa nóm lón riäfföü. Mesei a apwangapwangeló ren äi lólilen, ewer, pwal ngüni me inisi ra apwangapwangaló!
10Pün ngang üpwe mäló ren äi letipeta, pwal ierin manawei a mwocholó ren äi ngüngüres. Äi pöchökkül a ngawaló pwokiten ai tipis, pwal chüüi kana ra apwangapwangeló.
11Ngang emön mi itengaw me ren ekkana chón opwutaei meinisin, nge koon lapalón me ren chón óri kana. Chiechiei kana ra niopwut ngang. Chókana mi künaei me lükün wón ekkana aal ra sü seniei.
12Ngang üwa mönlüküló usun emön aramas mi mäló, üsap chüen chemeto. Ngang üwa usun ew sepi mi för seni pwül mi mmök.
13Ngang üwa rongorong än chómmóng aramas kapasen eitengaw. Nuokkus wätte a nóm pwellin ünükki lupwen ekkewe chón opwutaei ra pwüngüpwüng fengen pwe repwe üüngeniei. Ra rawei pwe repwe angeló manawei.
14Nge ngang, üwa anómwu äi apilükülük lón en, äi SAMOL. Ngang üwa apasa, “En chök äi Kot.”
15Äi fansoun ra nóm lón poum. Kopwe angasaei seni lepöün ekkewe chón opwutaei, pwal seni chókewe mi tapweriei pwe repwe niieiló.
16Kopwe asarama wón mesom ngeni noum ei chón angang, kopwe amanawaei lón óm tong ese mwüch.
17Kosap mwüüt ngeniei pwe üpwe sääw, äi SAMOL, pün ngang üwa kööruk. Nge kopwe mwüütätä pwe ekkewe aramasingaw repwe sääw, kopwe mwüütätä pwe repwe fanafanaló lón peias.
18Kopwe mwüütätä pwe ekkewe tinnaw mi kapas chofona repwe fanafaneló, ekkewe tinnaw mi apasätä ekkewe mettóch mi osufölüngaw usun chón pwüng fän lamalamtekia me turunufas.
19A ifa me lapalaapen óm mwirinnö en ka isenaló fäniten chókana mi nuokkusituk, en ka amollätä fäniten chókana mi anómwu ar apilükülük lón en pwe kopwe fang ngeniir me mwen mesen aramas meinisin!
20Lón nürün ewe leeni mi mwónómwón me mwen mesom, en ka aopa iir seni än aramas meinisin rawangaw; me lón leeniom, en ka pwal tümwünü iir seni ekkewe chönnaw mi otuttur.
21Üpwe mwareiti ewe SAMOL, pün i a pwääri ngeniei amwaraaren an tong lupwen ngang üwa nóm lón ew telinimw sounfiu ra pwellieló fän ar pisekin maun.Iwe, inamwo nge en ka rongorong möngüngün äi tungóren älillis lupwen ngang üwa siö ngenuk.
22Lón äi nuokkus, ngang üwa apasa, “Ngang üwa koturuló seni mwen mesen ewe SAMOL.” Nge en ka rongorong äi siö fäniten óm ümöümöch lupwen ngang üwa kööruk pwe kopwe älillis.
23Öüpwe echeni ewe SAMOL, ämi meinisin nöün kana chón pin! Ewe SAMOL a tümwünü chókana mi ölükülük ngeni, nge i a liwini ngeni ekkewe mi lamalamtekia unusen chappen ar föfför.
24Öüpwe pöchökkül o tipepwora ämi meinisin mi anómwu ämi apilükülük lón ewe SAMOL.
Köölfel 32
Pwapwa ren mwusólón tipis. Echö kööl än David. Echö köölün wewe me ekillól.
1A feiöch emön aramas an pwuupwungaw a mwusóló, an tipis a pwölüló.
2A feiöch emön aramas ewe SAMOL esap ämwärätä wón liwinin an tipis o esap pwal wor otupwutupw lón manawan.
3Lupwen ngang üwa chök fanafaneló pwe üsap mochen pwärätä äi tipis, chüüi kana ra chök apwangapwangeló ren äi chök ngüüngü unusen rän.
4Pün lerän me lepwin poum a choutiw wói. Äi pöchökkül a mórótä usun chök kóluk a mórótä lupwen fansoun pwasapwasen pwichikkaren leres. Selah
5Mwirin, ngang üwa pwärätä ngenuk äi tipis meinisin o ükütiw le tükümiireló. Ngang üwa apasa ngeniei, “Üpwe pwärätä äi kana pwuupwungaw ngeni ewe SAMOL.” Iwe, en ka omwusaló liwiningawen äi tipis. Äi kana pwuupwungaw meinisin ra mwusoló. Selah
6Iei minne, ekkewe chón ölükülük meinisin repwe iótek ngenuk lón ew fansoun lupwen iir mi chüen tongeni kunók, enlet lupwen ekkewe kólik mi pöchökkül repwe pwootä, resap toriir.
7En äi leenien op; en kopwe tümwünüei seni osukosuk o pwellifeiliei ren köölün ngaseló. Selah
8Ngang üpwe fönook o äiti ngenuk ewe aal kopwe feilló lón. Ngang üpwe öüröürók ren mesei repwe fót wóm.
9Kosap usun emön óris ika emön aas esap wor ar wewe. Ka chök tongeni kopwe nemeniir are ka uwalong efóch mächä lón awer o fööti ngeni sääl. Pün are kosap, iwe, resap mochen feitto reemw.
10A wor chómmóng letipeta repwe tori ekkewe aramasingaw; nge än ewe SAMOL tong enlet epwe chök pwellifeili ewe emön mi anómwu an apilükülük lón ewe SAMOL.
11Öüpwe pwapwa lón ewe SAMOL o meseik ämi chón pwüng. Öüpwe kööl ämi meinisin mi wenechchar lón letipemi!
Köölfel 33
Än ewe SAMOL nemenem wón förian kana me wón uruwon fönüfan.
1Öüpwe kööl fän pwapwa ngeni ewe SAMOL, ämi kana chón pwüng! Pün a fichiti chón wenechchar ar repwe mwareiti i.
2Öüpwe mwareiti ewe SAMOL fän nöümi kewe pisekin likettik iter harp; öüpwe ettik ngeni i wón och pisekin likettik mi wor engol säitelin.
3Öüpwe köölüw ngeni i echö kööl mi fö. Öüpwe ettikiöchüw ekkewe pisekin likettik fiti mweireiren pwapwa.
4Pün än ewe SAMOL kapas a pwüng o let. I a ölükülük lón meinisin minne i a föri.
5Ewe SAMOL a saani pwüng me wenechchar. Fönüfan a ur ren än ewe SAMOL tong ese mwüch.
6Ekkewe läng ra förütä ren än ewe SAMOL kapas. Meinisin ekkewe mwiicheichen füü mi chómmóng ra för ren enienin äsäpwälin awan.
7A ionifengeni lölöön lón ewe mataw o ochukuchukätä. A isenaló ewe mataw mi alóllól lón sooko.
8Ekkewe mwüün fönüfan meinisin repwe nuokkusiti ewe SAMOL. Aramasen fönüfan meinisin repwe meniniti i.
9Pün minne chök i a apasa, a fisitä; pwal minne chök i a öllük, a mwittir pwönüetä.
10Ewe SAMOL a ataeló än chón ekkewe mwüü akkóót. A pinei popun än ekkewe aramas ekiek.
11Nge än ewe SAMOL akkóót a nüküchchar tori feilfeilló chök. Minne i a fiseetä me lón letipan ra chök fis ngeni ekkewe pilóón aramas meinisin.
12A feiöch ewe mwüü mi ääni Kot ewe SAMOL, iir ekkewe aramas i a filiiretä pwe iir älemwirin.
13Ewe SAMOL a nennetiw seni läng o a küna aramas meinisin.
14A akkatola meinisin mi nóm wón fönüfan seni ewe leenien móótun nemenem ia i a móót ie.
15I ewe a silei letipen emön me emön aramas pün förian, a weweiti meinisin minne ra föri.
16Esap wor emön king a manaw ren chómmóngun nöün mwiichen sounfiu. Esap wor emön sounfiu a ngasaló ren wätten pöchökkülan.
17A lamwotmwäl än emön epwe ääni apilükülük emön óris pwe epwe angasa i. Inamwo are a fókkun wätte an pöchökkül, nge esap tongeni amanawa emön.
18Nge mesen ewe SAMOL ra chök nennengeni chókana mi nuokkusiti i, ra chök nennengeni chókana mi anómwu ar apilükülük lón an tong ese mwüch,
19pwe i epwe angaser seni mäló o tümwünü iir pwe repwe manaw lón fansoun lengita.
20Kich sia witiwiti ewe SAMOL lón ach apilükülük, pün i chök a tongeni älisi kich o tümwünü kich seni feiengaw usun och pisekin eppet lón maun.
21Letipach a pwapwa lón ewe SAMOL pün kich sia anómwu ach apilükülük lón itan mi pin.
22Amwo óm tong ese mwuch epwe pwellikeemiló, äm SAMOL, pün äm äia anómwu äm apilükülük lón en echök.
Köölfel 34
Ewe pwapwa än chókana mi anómwu ar apilükülük lón Kot. Echö kööl än David lupwen a otupwun föraló pwe i mi umwes me fän mesen Abimelek, ätewe a ösüweló David; iwe, a feilló.
1Ngang üpwe ingeiti ewe SAMOL fansoun meinisin. Äi kapasen mwareiti i epwe chök nónnóm wón tinnawei.
2Ngüni epwe eingeing wón ewe SAMOL. Chókewe mi nóm lón riäfföü repwe rong usun o repwe pwapwa.
3Öüpwe fitiei le enlingaló ewe SAMOL. Öüsipwe chufengen le etekiata itan.
4Ngang üwa iótek ngeni ewe SAMOL, o i a pölüweniei. I a angasaei seni äi kana nuokkus meinisin.
5Chókana mi sachchetä ngeni i pwe epwe älisiir ra saramaram ren pwapwa. Esap pwölüló wón meser ren ar sääw.
6Ei aramas mi wöwingaw a siö ngeni ewe SAMOL lón an riäfföü, nge i a rongorong ngeni. I a angasawu seni lón an kewe nuokkus meinisin.
7Pün nöün ewe SAMOL we chón läng a nóm pwellin ünükkün chókana mi nuokkusiti i, o i a angaser.
8Öüpwe neni o küna pwe ewe SAMOL a mwirinnö. A feiöch ewe aramas mi anómwu an apilükülük lón i.
9Öüpwe nuokkusiti ewe SAMOL, ämi nöün kana chón pin, pün chókana mi nuokkusiti i resap osun och mettóch.
10Ekkewe laion ra tongeni apwangapwangeló o echik, nge chókana mi anómwu ar apilükülük wón ewe SAMOL resap osun och mettóch mi mwirinnö.
11Öüpwe feitto, ämi neii kana, öüpwe öüseling ngeniei. Ngang üpwe äiti ngeni kemi usun ämi öüpwe nuokkusiti ewe SAMOL.
12Iö me leiimi a saani pwe epwe manaw o mochen epwe küna chómmóng rän mwirinnö?
13Iwe, kopwe tümwünü chönnawom seni kapas mi ngaw me tinnawom seni óm kopwe kapas chofona.
14Kopwe kul seni minne mi ngaw o föri minne mi mwirinnö. Kopwe kütta kinamwe o tapweló mwirin.
15Mesen ewe SAMOL ra nennengeni ekkewe chón pwüng, nge selingan ra rongorong ngeni ar siö.
16Wón mesen ewe SAMOL a wópöchökkül ngeni chókana mi föri minne mi ngaw, pwe epwe amóieló ächechchemer seni fönüfan.
17Ekkewe chón pwüng ra siön älillis. Iwe, i a angaser seni ar kana riäfföü meinisin.
18Ewe SAMOL a arap ngeni ekkana mi luuktaatakis o amanawa chókana mi apilükingaw lón ngünür.
19A wor chómmóng riäfföü än ewe aramas mi pwüng, nge ewe SAMOL a angasa i seniir meinisin;
20i a tümwünü chüün kana meinisin, pwe esap wor efóch me leiir epwe kup.
21Minne mi ngaw epwe niieló ekkewe aramasingaw. Chókana mi opwut ekkewe chón pwüng repwe küna liwiningaw.
22Ewe SAMOL a möönätiw penmanawen nöün kana chón angang. Esap wor emön mi anómwu an apilükülük lón ewe SAMOL epwe küna liwiningaw.
Köölfel 35
Ewe SAMOL i chón älemööw nöün aramas. Echö kööl än David.
1Äi SAMOL, kopwe öppölüwa chókana mi üüngeniei. Kopwe fiu ngeni chókana mi fiu ngeniei.
2Kopwe angei óm we pisekin eppet lón maun, ewe mi wätte me ewe mi kükkün. Kopwe üütä o feitto pwe kopwe älisiei.
3Kopwe pwal ächewechewa wókum siles me fiisika ngeni chókana mi tapweriei. Kopwe apasa ngeni ngüni, “Ngang noum chón chiman.”
4Amwo pwe chókana mi kütta ar repwe angei manawei repwe itengaw me sääw ren ar kuf. Amwo pwe chókana mi rawei äi üpwe feiengaw repwe kulsäfäl lón ar nuokkus.
5Amwo repwe usun ekkan pöön föün wiit mi lamwotongaw äsäpwääl a usireló. Amwo nöün ewe SAMOL chón läng epwe ösüüreló.
6Amwo pwe ar aal epwe kiroch o emitimit, nge nöün ewe SAMOL chón läng epwe tapwerir.
7Pwokiten ra chök pwünüchööw le sooni ar sär fänitei pwe üpwe tup lón, ra pwal pwünüchööw le tuw ew pwaang fänitei äi üpwe turulong lón,
8iwe, amwo pwe feiengaw epwe äserengawer le toriir, amwo pwe repwe pwisin tup lón ewe sär iir ra sooni, amwo pwe repwe turulong lón ewe pwaang iir ra tuuw, pwe repwe feiengaw.
9Mwirin, ngüni epwe pwapwa lón ewe SAMOL o meseik ren an angasaeiló.
10Unusen inisi epwe apwasäsini o apasa, “Iö a wewe ngenuk, äi SAMOL?” En ka chimanüw ekkewe mi mweleele seni chókana ra koon pöchökkül seniir. En ka chimanüw ekkewe mi mweleele me osupwang seni chókana mi sooläni seniir pisekir.
11Chón pwärätä resap sile tong ra wareto, ra kapas eiis ngeniei wón ekkóch mettóch ngang usap silei usun.
12Ra liwini ngeniei ngaw fäniten äi föfför mwirinnö o ra likitaló ngüni lón äi lólilen.
13Nge ngang, lupwen iir ra pwüngütiw lón samwaw, ngang üwa üföüf üföüfen letipeta o pwisin etekisónäei ren äi öchüün fäniter. Lupwen ngang üwa iótek o öchüün fäniter nge äi iótek ra liwinsäfälito reei pün resap pölü,
14ngang üwa fätälfeil lón äi lólilen, usun itä nge äi lólilen fäniten chiechiei ika chón äi famili. Üwa pwarootiw lón äi kechiw fäniter, usun itä nge üwa kechiweiti inei.
15Nge lupwen ngang üwa chepetek, ra mwiich fengen fän pwapwa. Ekkewe chón efeiengawaei ra mwiich fengen pwe repwe üüngeniei, nge ngang üsap silei usun. Resap ükütiw le eitengawaei.
16Ra turunufaseei lón ar kapas mi ngaw, usun ekkewe resap nuokkus Kot. Ra akkasüngürü niir ngeniei.
17Äi SAMOL, epwe ifa langattamen fansoun óm kopwe chök nennengeni ei lapalap? Kopwe chimanüw manawei seni ar angangen efeiengaw; kopwe chimanüw manawei mi öüchchea seni ekkeei laion.
18Ngang üpwe apasa äi kilisou ngenuk me lón ewe mwiich mi lapalaap. Ngang üpwe mwareituk me leiin ewe pwiin aramas.
19Kosap mwüüt ngeni chókana repwe pwapwan turunufaseei, iir ekkewe chón opwutaei nge esap wor popun. Kosap mwüüt ngeni chókana mi opwutaffat ngang repwe ekkefiilemas.
20Resap kapas lón kinamwe, nge ra chök efisätä kapasen tipitipmwäl ngeni chókana mi nóm fän mósónósón lón ewe fönü.
21Ra ammasaw le pwärätä ar kapasen ettipisiei o apasa, “Aha! Aha! Äm mi küna ren pwisin meseem minne ka föri.”
22Äi SAMOL, en ka fen küna ei lapalap; iwe, kosap fanafaneló. Kosap toowaw seniei, äi SAMOL.
23Kopwe pwääch o üütä pwe kopwe peniei! Kopwe penieitä, äi Kot me Samol.
24Äi SAMOL äi Kot, lón óm pwüng kopwe pwääraló pwe ngang mi pwüng. Kosap mwüüt ngeniir pwe repwe pwapwan turunufaseei.
25Kosap mwüüt ngeniir pwe repwe ekieki, “Aha, iei a tori kich meet sia mochen!” ika apasa, “ Sia oromaló i.”
26Amwo pwe meinisin mi pwapwan turunufaseei ren äi feiengaw repwe tolong lón sääw me osukosuk. Amwo pwe meinisin mi pwisin etekiaretä wóói repwe pwölüló lón sääw me itengaw.
27Amwo pwe chókana mi pwapwaiti an epwe pwääpwäló pwe ngang mi pwüng repwe mweireir ren ar meseik me pwapwa. Amwo pwe fansoun meinisin repwe apasa, “Ewe SAMOL a tekia, i ewe mi pwapwa ren än nöün chón angang feiöch.”
28Mwirin, chönnawei epwe kapas le aporausafeili usun óm pwüng me óm kirekiröch. Iwe, ngang üpwe mwareituk unusen rän me rän.
Köölfel 36
Än aramas föfföringaw me än Kot unusöch. Ngeni ewe chón nemeni kööl. Echö kööl än David nöün Kot we chón angang.
1Mi wor reei och poraus seni Kot a nóm lón letipei fänäsengesin tipisin ewe aramas mi föfföringaw: Esap wor nuokkus Kot me mwen mesan.
2Pün a sellüküló an otupwätä pwisin i le pwisin ikeetä, iei popun esap chüen esilla ika opwut an tipis.
3Kapasen awan ra chök ingaw me uren otupwutupw. Esap mochen an epwe manaweni manawen emön mi miriit me föri minne mi mwirinnö.
4Lupwen mwo an koon wón kian nge a rawei minne a ngaw. A fangatäni manawan ngeni ew manawen tipis o esap opwut meet mi mwääl.
5Äi SAMOL, óm tong a totä ngeni ekkewe läng, óm ölükülük a totä ngeni ekkewe kuchu.
6Óm pwüng a tekia usun chök ekkewe chuuk mi amwaraar, óm öpwüngüwen a allóllól usun mataw mi lapalaap. Äi SAMOL, en ka tümwünü manawen aramas me maan.
7A ifa me an esap wor öükükün liwinin óm tong ese mwüch! Ekkewe aramas mi tekia me mi tekisón ra kütta ar leenien op fän nürün pöükässum.
8Ra kakkametip wón chómmóngun masowen imwom. En ka fang ngeniir ünümer seni óm we chaanpwupwun pwapwa.
9Pün a nóm reemw ewe puachchen kólikin manaw. Lón óm saram äm äia küna mweem.
10Kopwe sópweeló óm tong ngeni chókana mi sileek, kopwe pwal sópweló óm pwüng ngeni ekkewe mi wenechchar lón leluker.
11Amwo pwe pecheen ekkewe mi lamalamtekia resap pwuuriei, amwo pwal pöün ekkewe aramasingaw resap ösüweiló.
12Nengeni usun än ekkewe chón föfföringaw ra turuló. Ra koturutiw, nge resap tongeni pwäätä!
Köölfel 37
Feiöchün ekkewe chón pwüng nge feiengawen ekkewe chón föfföringaw. Echö kööl än David.
1Kosap aosukosuka lón óm ekiek pwokiten ekkewe aramasingaw. Kosap lólówó ngeni chókana mi föri minne mi mwääl.
2Pün repwe mwittir aiolool usun fetil, repwe mwittir mäló usun kana pöön irä.
3Kopwe änómwu óm apilükülük wón ewe SAMOL o föri minne mi mwirinnö. Kopwe nónnóm lón ewe fönü o mwöngö seni an ölükülük.
4Kopwe apwaapwók lón ewe SAMOL; iwe, i epwe ngenuk minne letipom epwe ääni mochen.
5Kopwe fangatäni ngeni ewe SAMOL meinisin minne en ka föri. Kopwe anómwu óm apilükülük lón i, nge iei meet i epwe föri:
6I epwe föri pwe óm pwüng epwe saram usun saramen ünimweirän, nge pwüngüöchün óm föfför epwe tittin usun tinen akkar leólówas.
7Kopwe chök fanafanaló me mwen ewe SAMOL o likiitü le witiwiti meet i epwe föri. Kosap aosukosuka lón óm ekiek ren än aramasingaw ra fefeitä, kosap pwal öüreki usun ar kewe raaw mi ngaw.
8Kopwe engngiló ngeni óm kosap soong o kul seni óm lingeringer. Kosap lólówóiti ekkóch pün a chök emmweni ngenuk feiengaw.
9Pün ekkewe aramasingaw repwe pöküpöküló, nge chókana mi ääni apilükülük ewe SAMOL repwe fönüweni ewe fönü.
10Lón ekis chök fansoun, ewe aramasingaw esap chüen nóm. Ika mwo kopwe küttafichi lón leenian, nge i esap nóm ikenan.
11Nge chókana mi mósónósón o tipetekisón repwe fönüweni ewe fönü. Repwe emeseiker le nónnóm lón kinamwe mi lapalaap.
12Ekkewe aramasingaw ra rawangawei ekkewe chón pwüng o akkasüngürü niir ngeniir.
13Nge ewe Samol a takiri ekkewe aramasingaw pün a silei pwe ränir a arapeto.
14Ekkewe aramasingaw ra fen amollätä le üttawu nöür ketilas o emeia nöür esefich pwe repwe efeiengawa ekkewe mi mweleele me osupwang, pwe repwe niieló chókana mi wenechchar ar föfför.
15Nge nöür kana ketilas repwe pwereni pwisin ngasangaser o nöür kewe esefich repwe kup.
16Än emön chón pwüng pisek mi chókükkün a mwirinnö lap seni chómmóngun wöwün emön aramasingaw.
17Pün pöchökkülen ekkewe aramasingaw epwe taaló, nge ewe SAMOL epwe ürenätä ekkewe chón pwüng.
18Rän me rän, ewe SAMOL a tümwünü ekkewe aramas esap wor an mwääl, iwe, iir repwe angei ew liiwin epwe nónnóm tori feilfeilló chök.
19Repwe manaw lón fansoun feiengaw mi wätte, lón fansoun lengita iir repwe menemenöch ren mettóch mi chómmóng.
20Nge ekkewe aramasingaw repwe mäfeiengaw. Ekkewe chón opwut ewe SAMOL repwe mwittir mworoló usun ekkewe pöön irä mi ling lón ekkewe mälämäl, repwe móróló usun ötüötün ekkei.
21Ewe aramasingaw a liwinimmang, nge esap omwusasäfäli, nge ewe chón pwüng a kirekiröch o fangafangöch.
22Chókana ewe SAMOL a efeiöchür repwe fönüweni ewe fönü, nge chókana i a önümamawer repwe mäló.
23Ewe SAMOL a wiisen emmweni ipweipwen emön aramas mi mwirinnö. I a pwapwaiti ewe aal i a fätäl lón.
24Ika mwo epwe chepetek nge esap chök turuló, pün ewe SAMOL a sapatä i ren pöün.
25Melóóm ngang üwa emön ölüwöl, nge iei üwa chinlap, nge usap küna mwo emön chón pwüng epwe kotur mweleeleló ika nöün kana semiriit repwe chäwälfeil äneer mwöngö.
26Iteiten fansoun, ewe chón pwüng a chök fangafangöch o mwüütätä än aramas repwe liwinimang seni nge esap angei willan. Nöün kana repwe ew feiöch.
27Kopwe kul seni minne mi ingaw o föri minne mi mwirinnö. Mwirin, kopwe nónnóm lón ewe fönü feilfeilló chök.
28Pün ewe SAMOL a echeni chón föri minne mi pwüng o esap likitaló nöün kana mi ölükülük. I epwe tümwünür feilfeilló chök, nge mwirimwirin ekkewe aramasingaw repwe määfeiengaw.
29Ekkewe chón pwüng repwe älemwiri ewe fönü o nónnóm lón feilfeilló chök.
30Awen emön aramas mi pwüng a apasatä kapas mi miriit o chönnawan a apasa minne mi pwüng.
31A oura ngeni lón letipan än ewe SAMOL öllük, pwe esap päipäifeil lupwen epwe fätäl.
32Ekeewe aramasingaw ra chök opooperi ekkewe chón pwüng o kütta ar repwe angei manawer.
33Nge ewe SAMOL esap mwüüt ngeni ekkewe aramasingaw pwe repwe feffeitä. Esap pwal mwüüt ngeni ekkewe chón nuokkus Kot pwe repwe tipis lupwen repwe katolong fän mesen ewe souköpwüng.
34Kopwe chök mósónóttam le witiwiti ewe SAMOL an epwe föri an föfför. Kopwe tipeppós le äleasochisi i. I epwe föri pwe kopwe iteüöch o ngenuk ewe fönü. En kopwe küna lupwen ekkewe aramasingaw repwe feiengaw.
35Ngang üwa fen küna än emön aramas mi föfföringaw me kirikiringaw a feffeitä lón an pöchökkül usun efóch irä mi määr lón pwükütän pwülün leenian.
36Nge a chök mwittir mäló o esap chüen nóm. Ika mwo üwa kütta nge usap chüen küna.
37Kopwe mwo ekieköchüw usun ewe aramas mi unusöch lón manawan o katol ewe mi wenechchar. A wor apilüköch lón ekkan fansoun mwach fäniten mwirimwirin emön aramas mi efisätä kinamwe.
38Nge ekkewe aramasingaw meinisin repwe karosoló. Esap wor mwirimwiriir lón ekkaan fansoun repwe feitto.
39Än ekkewe chón pwüng alen ngaseló epwe war meren ewe SAMOL, i ar leenien op mi pöchökkül lón fansoun riäfföü.
40Ewe SAMOL epwe älisiir o angaser. I epwe chimanür o amanawer seni ekkewe aramasingaw, pwokiten ra anómwu ar apilükülük wón i pwe ar leenien op.
Köölfel 38
Iótek lupwen fansoun nóm lón köpwüngün emiriit. Echö kööl än David. Köölün ächechchemato.
1Äi SAMOL, kosap öpwüngüei lón óm soong, kosap pwal fönöwei lón óm lingeringer.
2Pün noum kewe föün esefich ra tuulólóleei o poum a chounieitiw.
3Esap wor pöchökkülen lón inisi pwokiten óm soong. Esap wor kinamwein le chüüi pwokiten äi tipis.
4Äi kana föfför mi ngaw ra akokaeitiw o pwölüweló wón mökürei. Ra fókkun chou ngeniei usun chök och mettóch mi chow üwa mwärei.
5Kinasei kana ra nnót o ra pwoongaw pwokiten äi kana tipis mi umwes.
6Ngang üwa chök rootiw o pwarorootiw. Unusen rän, ngang üwa chök fätäl lón äi kekkechiw.
7Söküri a uren metek mi pwichipwich. Esap wor pöchökkülen lón inisi.
8Ngang üwa chök ünüünüló o üwa meefi ngütülón inisi. Üwa ngüüngü ren metekitekin letipei.
9Pwosun letipei meinisin ra sukuló me mwom, äi SAMOL. Ekippwichin letipei esap mwon senuk.
10Ngasangasei a mwittir pichipichin, pöchökkülen inisi a kisiló; ewe mwo saram nge a topwutopwuló me lón mesei.
11Attongeei kana me chón óri kana ra atowawereló seniei pwokiten ra opwut kinasei. Pwal märääri kana ra ü toowaw seniei.
12Chókana mi kütta ar repwe angei manawei ra sooni ar kana ssär pwe repwe säreei, nge chókana repwe efeiengawaei ra kapas usun äi feiengaw. Unusen rän ra chök föri ar rawen otupwutupw.
13Ngang üwa wewe ngeni emön aramas mi selingepüng esap tongeni rongorong, usun emön mi awemwöch esap tongeni suuki awan an epwe kapas.
14Ngang üwa fen wiliti usun emön aramas esap tongeni rongorong, pwal awan esap tongeni epwe pölüweni och kapas.
15Ngang üwa witiwituk lón äi apilükülükuk, äi SAMOL. En kopwe pölüweniei, äi Samol me äi Kot.
16Pün ngang üwa iótek ngenuk o apasa, “Kosap mwüüt ngeni ekkewe chón opwutaei pwe repwe pwapwan turunufaseei ika pwisin etekiaretä wóói lupwen pecheei ra mit.
17Pün ngang üwa chök arap ngeni üpwe turuló, nge äi metek a chök nóm reei fansoun meinisin.
18Ngang üwa pwärätä äi föfför mi ngaw; pün ngang üwa riäfföü ren äi tipis.
19Ra fókkun chómmóng chókana mi pöchökkül le opwutaei. Resap fókkun lea chókana mi opwut ngang nge esap wor wewen.
20Chókana mi liwinisäfäli äi föfför mwirinnö ngeni föfför ingaw ra eitengawaei lupwen üwa tapweló mwirin minne mi mwirinnö.
21Äi SAMOL, kosap likitieiló. Kosap toowaw seniei, O äi Kot.
22Kopwe mwittir feitto o älisiei, äi Samol me äi Chón Amanaw.
Köölfel 39
Iótek fäniten tipächchem me omwusomwusen tipis. Ngeni ewe chón nemeni kööl. Ngeni Jeduthun. Echö kööl än David.
1Ngang üwa apasa, “Üpwe mammasafichi äi kana föfför o tümwünü chónnawei seni tipis. Ngang üpwe fööti ngeni awei och kaan fööfön ngächin maan.
2Nge lupwen üwa fanafaneló o kupacheló chök, usap mwo nge apasa och mi mwirinnö, äi weires a lapaló.
3Leuti a pwichikkar ren äi lingeringer. Iwe, lupwen üwa oppwosalon leeuti äi ekiek, a usun chök nge och ekkei a kü. Mwirin, üwa kapas ren chönnawei:
4“Äi SAMOL, kopwe ächchema ngeniei pwe üpwe silei mwochomwoochen äi fansoun wón ei fönüfan. Kopwe ächchema ngeniei pwe ränin manawei ra nampa.
5Nengeni, en ka föri pwe tamen ränin manawei a chök usun chöchöön lón paaw. Ükükün tamen ierin manawei a usun chök nge ese wor mereemw. Enletin pwe kana mwo aramas mi ekieki pwe ra nónnómöch nge manawer a usun chök och ötüöt. Selah
6Enletin, äm aramas aia chök usun och ngünüwen mettóch mi mwökütüküt feil. Aia aosukosuka ngeni manawem chómmóng mettóch mi sópwolong lón lamwotongaw chök. Aia ochukuchukätä wöwüm, nge aisap silei iö epwe angei.
7Nge iei, Samol, ia ngang üpwe anómwu ie äi apilükülük me lón ei manaw? Äi apilükülük a nónnóm lóómw.
8Kopwe angasaei seni äi kana pwuupwungaw meinisin. Kosap mwüüt ngeni ekkana mi umwes repwe turunufaseei.
9Ngang üwa chök fanafaneló. Usap suuki awei, pün en ewe ka föriei.
10Kopwe öükätiw seniei óm wichiei. Ngang üwa kufuló ren pöchökkülen pisirien poum.
11En ka öpwüngü me fönöw aramas ren ar tipis. En ka ataeló wöwür usun pwötür mi efeiengaw. Enletin, emön me emön aramas a usun chök ötüöt. Selah
12Äi SAMOL, kopwe rongorong äi iótek, kopwe öüseling ngeni äi siön älillis. Kosap apwasa selingóm ngeni äi kechiw. Pün ngang üwa nónnóm reemw nge üwa usun chök emön chón siamwü, emön waasöla, usun chök minne a fis ngeni äi kewe leewo.
13Kopwe nenne seniei pwe üpwe tongeni pwapwa säfäl me mwen äi üpwe feilló o üsap chüen nóm.
Köölfel 40
Lükü a öttures lón sössöt. Ngeni ewe chón nemeni kööl. Echö kööl än David.
1Ngang üwa mósónóttam le witiwiti ewe SAMOL. I a kul ngeniei o rongorong äi siö.
2I a efiieitä seni lón ewe pwangen feiengaw, seni lón ewe pwakak me móchór. I a eipwätä pecheei wón ew achaw o eipwätiw pecheei lón ew leeni mi nüküchchar pwe üpwe üütä wón.
3A isenalong echö kööl mi fö lón awei, echö köölün mwareiti Kot. Chómmóng aramas repwe küna meet i a föri o nuokkus. Iwe, repwe anómwu ar apilükülük lón ewe SAMOL.
4A feiöch emön aramas mi ääni apilükülük ewe SAMOL, nge esap säp ngeni chón lamalamtekia me ngeni chókana mi säpe ngeni ekkana chón förätä minne mi chofona.
5Äi SAMOL me äi Kot, ra fókkun chómmóng ekkewe mettóch mi amwaraar en ka föriir. Esap wor emön a tongeni wewe ngenuk ren ekkewe mettóch en ka akkóóta fän item. Are üpwe aporausafeili usur o kapas usur, repwe koon fókkun chómmóng äi üpwe eiteiter.
6En kosap pwapwaiti ekkewe asór me liffang, nge en ka ngeniei ew seling mi suuk. En kosap pwal öüchcheani äi üpwe ääni ekkewe asóren keek me asóren tipis.
7Mwirin, ngang üwa apasa, “Ngang iei, ngang üwa feitto. Iei meet a makketiw usi lón ewe taropwe mi ölüülüló.
8Ngang üwa tipeni äi üpwe föri letipom, O äi Kot. Óm öllük a nóm lón letipei.”
9Ngang üwa aporausa ngeni noum kewe aramas meinisin usun óm pwüng. Enlet, ngang üsap eppeti tinnawei, usun en äi SAMOL ka silei.
10Ngang üsap tükümaló óm pwüng lón lelukei. Üwa kapas usun óm ölükülük me óm alen ngaseló. Ngang üsap tükümaló óm tong me óm let seni ewe mwiichen aramas mi lapalaap.
11Kosap ömwöchü seniei óm kirekiröch, äi SAMOL. Amwo pwe óm tong me óm let repwe tümwünüei fansoun meinisin.
12Pün äi kana riäfföü resap lea ra pwellifeiliei. Äi kana tipis ra liäpenieiló o ngang üsap chüen tongeni üpwe künaei. Ra fókkun chómmóng seni meeten wón mökürei, iei minne, letipei a apwangapwangeló.
13Äi SAMOL, kose mochen kopwe chimanüei. Äi SAMOL kopwe mwittir feitto pwe kopwe älisiei.
14Amwo pwe iir meinisin mi kütta ar repwe angei manawei repwe tolong lón sääw me osukosuk. Amwo pwe iir meinisin mi mochen pwe üpwe feiengaw repwe kulsäfäl lón ar itengaw.
15Amwo repwe rüükö ren pwisin ar sääw pün ra apasa ngeniei, “Aha! Aha! Sia liäpeni i iei.”
16Nge amwo pwe iir meinisin mi küttók repwe uren meseik o pwapwa. Amwo pwe chókana mi saani óm angasereló repwe apasa iteiten fansoun, “Ewe SAMOL epwe tekiatä!”
17Nge ngang üwa mweleele o osupwang, nge en ewe SAMOL ka ekieki usi. En äi chón älillis me äi chón amanaw. O äi Kot, kosap mang.
Köölfel 41
Än ekkewe chón nuokkusiti Kot feiöch me riäfföü. Ngeni ewe chón nemeni kööl. Echö kööl än David.
1A feiöch ätewe mi kirekiröch ngeni ekkewe mi apwangapwang. Ewe SAMOL epwe angasa i lón fansoun riäfföü.
2Ewe SAMOL epwe tümwünü i o ömwöchü manawan. Epwe efeiöchü i me lón ewe fönü o esap fangatäni inisin ngeni minne chón koum ngeni ra mochen.
3Ewe SAMOL epwe eteneki i wón an kiekien samwaw o echikarasäfäli i seni an kiekien apwangapwang.
4Ngang üwa apasa, “Äi SAMOL, kopwe kirekiröch ngeniei; kopwe echikaraei, pün ngang üwa tipis ngenuk.”
5Ekkewe chón opwutaei ra kapas fänitei lón ar tipekkoum o apasa, “Inet ätei epwe mäló pwe itan epwe móóló?”
6Iteiten fansoun emön a feitto pwe epwe chuuriei usun itä nge i chiechiei, nge i a chök ionifengeni kapasen eitengaw. Mwirin, lupwen a feilló lükün, a emeresifeili ekis meinisin.
7Ekkana chón opwutaei meinisin ra mwöngününgün fengen usi. Ra ekiekietä minne mi fókkun ngaw fänitei o apasa,
8“Och samwaw mi önümamaw a üri ätei. Esap chüen tongeni epwe pwäätä seni ewe leeni ia a kóón ie.”
9Pwal chienei we mwo äm mi fókkun kkan fengen, ngang üwa anómwu äi apilükülük wón, ewe emön mi mwöngö reei, a usun chök nge a chepeti ngeniei epinipinin pecheen ren an a üüngeniei.
10Nge en, äi SAMOL, kopwe kirekiröch ngeniei. Kopwe äpwäätäei pwe ngang üpwe liwini säfäli ngeniir ar föfför.
11Ngang üwa silei pwe en ka pwapwa reei, pwokiten ewe chón opwutaei esap okkufuei.
12Nge ren ngang, en ka penieitä lón äi wenechchar o ka anómwuei fän mesom feilfeilló chök.
13Öüpwe mwareiti ewe SAMOL, ewe Koten Israel seni fansoun ese pwop tori feilfeilló chök. Amen pwal Amen.
PWUK 2
Köölfel 42 – 72
Köölfel 42
Pwositi Kot lón fansoun riäfföü. Ngeni ewe chón nemeni kööl. Echö köölün ekillól än nöün Kora kewe mwän.
1Usun emön chia a ngaseppwichin an kaakaiti pwe epwe wün kólukun lón ew chönüpwupwu; iwe, a ina usun än unusen ngüni a ngaseppwich ren an pwosituk, äi Kot.
2Ngüni a kaakaiti Kot, ewe Kot mi manaw. Ineet üpwe tongeni feilló o chuuri Kot?
3Chönün mesei a fisitiw pwe ina enei lerän me lepwin, lupwen aramas ra chök sópweló le kapasen turunufas ngeniei o apasa, “Ifa i chök óm na Kot?”
4Ikkeei ekkewe mettóch ngang üwa chemeniir lupwen üwa niinawu masowen letipei: usun äi soun feilló fiti ewe mwiichen aramas o emmweni iir le tettel ngeni ewe imwen Kot, me äi mweireir fän pwapwa me kilisou me leiin ewe mwiichemmóngun aramas.
5Ngüni, pwata ka letipengaw? Pwata ka chök letipechchow me lóói? Kopwe anómwü óm apilükülük lón Kot, pün ngang üpwe chök chüen mwareiti i, äi Chón Amanaw me äi Kot.
6O äi Kot, ngüni a letipengaw me lóói; iei minne ngang üpwe chechchemenuk seni lón ewe fönü Jordan, seni wón ekkewe chukuchukutän Hermon, seni wón ewe chukun Mizar.
7Ew leeni mi alóllól a kökkö ngeni pwal ew leeni mi alóllól me lón mweireiren óm kewe chaanpwupwu ra pwuutiw me wón achaw, pwal noum kewe nóón lemataw me nóón órun fönü ra pwölüweiló.
8Iteiten rän, ewe SAMOL a niinätiw an tong ese mwüch wóói, nge iteiten pwiin ngang üwa köölüw an kööl. Üwa iótek ngeni Kot ewe mi fang ngeniei manaw.
9Ngang üwa apasa ngeni äi we achaw, “Pwata ka möllükieiló? Pwata ngang üwa chök fätäl feil lón äi kechiw pwokiten äi riäfföü ren chón opwutaei?”
10Usun chök nge chüüi kana ra kup ren än chón opwutaei kapasen turunufaseei, ra chök sópweló le apasa ngeniei, “Ifa i chök óm we Kot?”
11Ngüni, pwata ka letipengaw? Pwata ka chök letipechchow me lóóí. Kopwe anómwu óm apilükülük lón Kot, pün ngang üpwe chök chüen mwareiti i, äi Chón Amanaw me äi Kot.
Köölfel 43
Iótek ngeni Kot lón fansoun riäfföü.
1Äi Kot, kopwe atowu pwüngün pwe ngang mi pwüng, kopwe pwal peniei seni ekkeei aramas resap nuokkus Kot. Kopwe chimanüei seni ekkewe aramas mi otupwutupw me föfföringaw.
2En Kot äi leenien op mi pöchökkül. Pwata ka pöütieiló? Pwata ngang üwa chök fätäl feil lón äi kechiw pwokiten äi riäfföü ren chón opwutaei?
3Kopwe tiinato óm saram me óm let o mwüüt ngeniir pwe repwe emmweniei. Kopwe mwüüt ngeniir pwe repwe uweieiló ngeni chukum we mi pin, ngeni wesewesen ewe leeni iä en ka nóm ie.
4Mwirin, ngang üpwe feilló ren ewe róngen asór fäniten Kot, üpwe feilló ren Kot, i popun äi chengel me äi pwapwa. Ngang üpwe köölün mwareituk wón och pisekin likettik itan harp, O Kot, äi Kot.
5Ngüni, pwata ka letipengaw? Pwata ka chök letipechchow me lóói. Kopwe anómwu óm apilükülük wón Kot, pün ngang üpwe chök chüen mwareiti i, äi Chón Amanaw me äi Kot.
Köölfel 44
A chemeto ngaselón lóóm ren riäfföün lón ei fansoun. Ngeni ewe chón nemeni kööl. Echö än nöün Kora kewe mwän köölün änemenemeló.
1O Kot, äm äia fen rong ren selingem; äm kewe leewo ra fen aporausa ngeni keem minne en ka föri lón ränin ar manaw, lón ekkewe fansoun lóóm.
2En ka tapweeló chón ekkewe mwüü le maun ngeniir ren poum o ka atolonga äm kewe leewo lón ewe fönü o fótukiiretiw. En ka apachcha chón opwuter kewe nge ka föri pwe äm kewe leewo repwe feffeitä.
3Enletin, resap willeni ewe fönü ren pwisin nöüür ketilas nge i ren noum, esap pwal pöchökkülen pöür a efisätä ar wiil, nge i pöüiifichum me saramen wón mesom a efisätä ar wiil, pün en ka tonger.
4En äi King me äi Kot, en ewe mi emmweni Jakob lón maun iei popun a wiil.
5Pün reemw chök, äm äia ettimära säfäli ekkewe chón opwuta keem. Pwokiten itom chök äm äia pwurätiw ekkewe chón üüngeni keem.
6Ngang üsap anómwu äi apilükülük wón neii esefich, neii ketilas esap awarato äi wiil.
7Nge en chök ka fang ngeni keem pwe äipwe okkufu ekkewe chón opwuta keem. En ka atolonga ekkewe chón üüngeni keem lón sääw.
8Lón unusen rän me rän äm äipwe chök eingeing lón Kot o äm äipwe mwareiti itom fansoun meinisin. Selah
9Nge iei en ka pöütikemiló o etekisónakeem. Kosap chüen fiti äm kewe mwiichen sounfiu le maun.
10En ka föri pwe äm äipwe sü me mwen chón opwuta keem. Iwe, chókana mi opwuta keem ra chök pöchööw le angei seni keem pisekiim fän pöchökkül.
11En ka likitikeemiló pwe repwe ochei keem usun ekkana siip, äipwe pwal toropasfeil leiin chón ekkewe mwüü.
12En ka amöömökeemiló äm noum kewe aramas mi öüchchea wón och liiwin mi kisikiis. Esap wor och wiil kopwe angei seni óm amöömökeemiló.
13En ka föri pwe äm äipwe och minen ässääw meren chón aruum kana, och minen esiit me sachaaul meren chókana meinisin mi nóm pwellin ünükküüm.
14En ka föri pwe äm äipwe och minen ämecheichö me leiin chón ekkewe mwüü. Ekkewe aramas ra elifechifechi mökürer ngeni keem ren ar turunufasekeem.
15Äi itengaw a chök nóm mwei unusen rän me rän o wón mesei a pwölüló ren äi sääw,
16ren möngüüngün ekkewe kapasen ämängaw än chókana mi eitengawaei me kapasen turunufaseei, pwal pwokiten ewe chón opwut mi chök ekita an epwe ngeniei chappen äi föfför.
17Meinisin ei a fis ngeni keem, inamwo are äm äisap möllükükeló ika föri och mi mwääl ngeni óm we pwonen etipeew.
18Letipeem esap kulsäfäl, pecheem esap pwal tókkóló seni óm we aal.
19Nge en ka ataaatakisi keem me lón leenien ekkewe kolaak mi mwacho. En ka pwölükeemiló fän nürün mäló.
20Are pwe äm äipwe möllükaló iten äm we Kot, ika äipwe pwal eitietä pöüüm le fel ngeni emön koten ekis,
21ifa usun, Kot esap küna ei föfför, pwokiten i a silei ekkewe mwónómwónen letip?
22Iwe, nge fänäsengesum, äm äia chök ammol ngeni äm aipwe ninniiló rän me rän. Ra chök ekieki ngeni keem pwe äm äia usun kana siip repwe ninniiló.
23Äi Samol, kopwe pwök! Pwata kopwe möür? Kopwe pwäätä! Kosap pöütikeemiló fansoun meinisin.
24Pwata kopwe aopaló wón mesom o möllükaló äm weires me äm nóm fän choun riäfföü?
25Äm äia koturutiw lón pwül mworomwor; inisiim a pacheri pwül.
26Kopwe pwäätä o älisi keem. Kopwe angasakeem pwokiten óm tong esap mwüch.
Köölfel 45
Lingen ewe Messiah. Ngeni ewe chón nemeni kööl. Mi fich ngeni ngiingin ewe kööl “Ekkewe Kiop.” Echö köölün anamanam än nöün Kora kewe mwän. Echö köölün tong.
1Letipei a mwänek ren och kapas mi mwirinnö lupwen üwa enliwini le amwöchü lükün äi kewe wokisin fäniten ewe king. Chönnawei a usun chök nge efóch pen nöün emön chón mak mi angöch.
2En emön mwän mi fókkun echchipwör o tinnawom ra kepit ngeni ümöümöch pün óm kapas a uren tipächchem, pwokiten Kot a efeiöchuk fansoun meinisin.
3Kopwe riietä nöüm ketilas wón wäänükum, en ewe emön mi pwora fän óm ling me óm pwora.
4Lón óm manaman, kopwe feilló wón wóóm fän óm wiil, kopwe penätä let, tipetekisón me pwüng. Pöüiifichum epwe pwääraló óm föfför mi amwaraar.
5Noum kewe föün esefich repwe pwereni ngasangasen ekkewe chón opwut en ewe king. Chón ekkewe mwüü repwe turuló me mwom o kóónoló fän pecheemw.
6Öm leenien móótun nemenem, O Kot, epwe nóm tori feilfeilló chök. Efóch wókun nemenem mi öpwüngüwen epwe iei ewe wókun nemenemen mwuum.
7En ka saani pwüng nge ka opwut föfföringaw. Iei minne Kot, óm we Kot, a epiti ngenuk ewe lómmisin pwapwa o anómwuk asen chiechiom kana.
8Üfom kana meinisin ra pwoöch ren pwollen ekkewe minen apwokkus iter myrrh, aloes me kassia. Ekkewe pisekin likettik mi wor säitelir ra apwaapwók me lón ekkewe imwen samol mi ofout ngeni niin älefan.
9Nöün ekkewe king föpwül ra nóm leiin ekkewe fefin en ka etiwer. Wón peliifiichum a nóm ewe kiwiin mi foutei ngeni kolt minen Ofir.
10Kopwe öüseling ngeniei, en föpwül, kopwe öüüw selingóm o leechüüni meet ngang üwa apasa. Kopwe möllükaló aramasom me fönüwom mi nóm toowaw.
11Pün pwülüwom we king a wosuló ren liöchum. Kopwe awora sufölün pün i óm samol.
12Ewe föpwülün Tayer epwe wareto fän an liffang, ekkewe aramas mi pisekisek repwe kütta iter mereemw.
13Ewe fiin öpwüpwülüsöfö, emön nöün king föpwül a awitiwit lón rummwan we, nge a üföüf üfan mi ttür fengen me kolt.
14Neminnei a emmweniló ren ewe king fän üfan mi ling o fout ren chchü fiti chón älisitin kewe föpwül mi tapweló mwirin.
15Ra telito fän pwapwa me meseik lupwen ra tolong lón imwen ewe king we.
16Noum kana mwän repwe ekkesiwili óm kewe leewo lón wiiser wiisen king. En kopwe ewiiser pwe iir repwe samol leemelen ewe fönü.
17Ngang üpwe föri pwe iteiten ekkewe pilóón aramas meinisin repwe sópwósópwóló le chemeni itom; iei minne, chón ekkewe mwüü meinisin repwe mwareituk tori feilfeilló chök.
Köölfel 46
Kot i än nöün kana aramas leenien op pwal i chón okkufu chón ekkewe mwüü. Ngeni ewe chón nemeni kööl. Echö kööl än nöün Kora kewe mwän. Echö kööl epwe tekïa ngiingin usun ngiingin fefin.
1Kot ach leenien op me ach pöchökkül. I emön chón älillis mi fókkun nóm lón fansoun riäfföü.
2Iei minne, sisap nuokkus, inamwo ika fönüfan epwe mwökütüló o ekkewe chuuk tekia repwe turulóng lukalapen mataw,
3pwal inamwo ika nóónón lemataw repwe püng o pwuropwur me ekkewe chuuk tekia repwe chechchech ren pöchökkülen wätten nóó. Selah
4Mi wor ew chaanpwupwu, pwuupwun kana ra awarato pwapwa ngeni ewe telinimwen Kot, iei ewe leeni mi pin ia ewe mi Unusen Tekia a nóm ie.
5Kot a nónnóm lón ei telinimw, ina pwata esap taaló. Lesossorusich chök nge Kot epwe älisi ewe telinimw.
6Chón ekkewe mwüü ra fitikoko, ekkewe mwüü ra taaló. Kot a osomóngeetä leüwan; iwe, fönüfan a teliló.
7Ewe SAMOL mi Unusen Manaman a nóm rech; ewe Kot än Jakob i ach leenien op mi pöchökkül. Selah
8Öüpwe feitto o nengeni usun än ewe SAMOL kewe föfför mi amwaraar. Öüpwe nengeni usun an awarato kitetter wón fönüfan.
9I a öükätiw maun wón unusen fönüfan. I a kupi ekkewe esefich o pöküw ekkewe siles, a keni ngeni ekkei ekkewe wóókenin maun.
10I a apasa, “Öüpwe kupacheló, o silei pwe Ngang Kot. Ngang üpwe tekiatä me leiin chón ekkewe mwüü. Ngang üpwe tekiatä me lón fönüfan.”
11Ewe SAMOL mi Unusen Manaman a nóm reech, ewe Kot än Jakob i ach leenien op mi pöchökkül. Selah
Köölfel 47
Mwareiti Kot, ewe chón nemeni fönüfan. Ngeni ewe chón nemeni kööl. Echö kööl än nöün Kora kewe mwän.
1Öüpwe alopwolopw ämi chón ekkewe mwüü meinisin. Öüpwe pwupwuchöör ngeni Kot fän mweireiren pwapwa.
2A ifa me amwararen ämmefelin ewe SAMOL mi Unusen Tekia, ewe King mi Lapalaap wón unusen fönüfan meinisin!
3I a okkufätiw fach ekkewe mwüü, a okkufätiw ekkewe aramas pwe sipwe pwuriiretiw fän pecheech.
4I a filätä fänitach älemwirich, ew älemwir mi echchipwör fäniten Jakob, ätewe i a tongei.
5Kot a feittä ngeni leenian fiti pwupwuchörün pwapwa. Ewe SAMOL a feitta fiti tikkin rappwa.
6Öüpwe köölün mwareiti Kot, öüpwe köölün mwareiti. Öüpwe köölün mwareiti ach King, öüpwe köölün mwareiti.
7Pün Kot i ewe Kingen unusen fönüfan. Öüpwe köölü ngeni i echö köölün mwareiti.
8Kot a nemeni ekkewe mwüü. Kot a móttóló wón an leenien móótun nemenem mi pin.
9Ekkewe samolun ekkewe mwüü ra mwiich fengen, ra usun chök nge iir ewe mwiichen aramas nöün än Abraham we Kot, pün ekkewe kingen fönüfan ra nóm fän nemenien Kot. I a fókkun tekia chapwür.
Köölfel 48
Lingen Kot me lón Zion. Echö kööl. Echö kööl än nöün Kora kewe mwän.
1Ewe SAMOL a fókkun lapalaap, o a fókkun fich ngeni pwe aramas repwe mwareiti i me lón ewe telinimw än ach we Kot, me wón chukun we mi pin.
2Zion a lingöch lón tekiatän, i och leenien apwaapwa ngeni chón unusen fönüfan. Ewe chuuk Zion a wewe ngeni ewe chukuchukutän Zafon, pün a nóm ie ewe telinimw än ewe King mi Lapalaap.
3Kot a nóm lón än Zion kewe leenien open maun mi tekia. I a pwääraló pwe pwisin i än Zion leenien op mi pöchökkül.
4Ekkewe kingen fönüfan ra ochufengeni nöür sounfiu o ra mwuupöküto pwe repwe maun ngeni ewe telinimw.
5Nge lupwen ra küna ewe telinimw, ra weitfengenir. Iwe, ra nuokkus o ra süüló.
6Ra chechchech me ikenan, pwal metek a cheriir usun metekin emön fefin lón an faamw.
7Kopwe ataareló usun chök och äsäpwäälin öötiw a ataatakkisi ekkewe siip sein Tarshish.
8Sia rong usun lingen ewe telinimw; nge iei sia pwisin küna ewe telinimw än ewe SAMOL mi Unusen Manaman. Iei ewe telinimw än ach we Kot. Kot a föri pwe ewe telinimw epwe önükünük le tümwünöch fansoun meinisin. Selah
9Äm Kot, äm äia leechüüni usun óm tong ese mwüch me lón imwom we imw mi pin.
10Äm Kot, usun chök itom a tori unusen fönüfan, pwal ina chök usun ren än aramas repwe mwareituk. Pöüiifichum a uren pwüng.
11Aramasen ewe chuuk Zion ra pwapwa, ekkewe telinimwen Judah ra meseik pwokiten óm kewe pwüngün köpwüng ra pwüng.
12Öüpwe feilló o raunei Zion. Öüpwe fätäl pwellin ünükkün o älleani an kewe leenien open maun mi tekia.
13Öüpwe nennengeniöchüw ekkewe tiit mi pöchökkül, öüpwe katol ekkewe leeni pöchökkül mi tittiló meinisin, pwe öüpwe aporausa usur ngeni ewe pilóón aramas mwirin.
14Pün ei Kot i ach Kot fansoun meinisin tori feilfeilló chök. I epwe ach chón mwenäni kich tori lesópwólón.
Köölfel 49
Än chón umwes apilükülük. Ngeni ewe chón nemeni kööl. Echö kööl än nöün Kora kewe mwän.
1Öüpwe rongorong ei, ämi sókkun aramas meinisin. Öüpwe öüseling ämi meinisin mi nóm lón ei fönüfan,
2aramas tekisón ppök me aramas tekia, chón pisekisek pwal usun chök chón mweleele.
3Awei epwe apasätä kapasen miriit. Möngüüngü epwe toowu seni lón letipei epwe awora weweöch.
4Ngang üpwe kulluw selingei ngeni kapasen öüröür seni ekkeei kööl. Ngang üpwe suuki le äwewei wewen äi kapasen emiriit wón ewe pisekin likettik itan harp.
5Pwata ngang üpwe nuokkus lupwen fansoun mi ngaw ra wareto, lupwen ekkewe chón otupwutup mi föfföringaw ra pwellieiló,
6iir chókewe mi anómwu ar apilükülük wón ar pisekisek o sikäsini ar wöw mi lapalaap?
7Enlet, esap wor emön aramas a tongeni pwisin möönätiw möön manawan ika mööni ngeni Kot pen manawan.
8Pün pen manaw a men möömóng, esap wor och sókkun liiwin epwe naf an epwe möönätiw,
9pwe epwe sópwósópwóló le manaw fansoun meinisin nge esap tolong lón ewe pwaang.
10Pün aramas meinisin ra küna pwe aramas mi tipächchem mwo nge ra mäló; pwe ekkewe aramas mi umwes me ekkewe resap miriit ra pwal mäló, o ra likitätiw wöwür ngeni ekkóch.
11Peiaser kana repwe fisitiw pwe ina imweer fansoun meinisin; epwe ina leenier ia repwe nóm ie lón fansoun esap mwüch, inamwo are ra eita ngeni fönüer kana pwisin iter.
12Emön aramas, inamwo ika i a pisekisek, nge esap chök nónnómwottam. Epwe chök pwal mäló usun chök ekkana maan.
13Iei usun sópwóngawen chókana mi anómwu ar apilükülük wón pwisin iir me pwal sópwólón chókana mi kuukumwirito mwiriir mi fiti pwüngün ar kapas. Selah
14Ra chök wewe ngeni ekkana siip pün ra kefilliló chök me mwan pwe repwe ninniiló. Mäló epwe emmwenirelong lón peias, o mäló epwe ocheer. Ekkewe chón pwüng repwe nemenem wór lesossor. Inisiir epwe kirouwló me lón peias toowaw seni imwer kewe imwen samol.
15Nge ren ngang, Kot epwe angasa manawei seni lón peias, pün i epwe turufieiwu seni manamanen mäló. Selah
16Kosap ingeló lupwen emön aramasingaw a pisekisekiló, lupwen amwaraaren lingen imwan epwe lapaló.
17Pün lupwen epwe mäló esap efiti ngeni mwö ekis mettóch an epwe uwei, nge lingan esap fitätiw le feittiw lón peias,
18inamwo are a ekieki pwe i emön mi feiöch lupwen an chüen manaw pün lupwen an manaw, aramas ra mwareiti i lupwen a pisekisekiló.
19I epwe pwal mäló usun chök pwal meinisin mi akkomw mwan, iir chókewe resap chüen künasäfäli saramen rän.
20Aramas mi sikäsini ar pisekisek resap weweiti pwe iir repwe mäló usun chök kana maan.
Köölfel 50
Kot i ewe souköpwüng mi pwüng. Echö kööl än Asaf.
1Ewe Kot mi Unusen Manaman, ewe SAMOL, a kapas o a awora an akökköön köpwüng ngeni unusen fönüfan seni öötiw tori lotow.
2Kot a saramewu seni Zion, ewe telinimw mi unusen lingöch.
3Ach Kot epwe wareto fän ökürangen püngün chopwulap. Ekkei mi efeiengaw a kenaló mettóch meinisin a nóm mwan, nge mölümöl mi lapalaap a pwellifeili ünükkün.
4I a akökkööw ekkewe läng me fönüfan pwe repwe nöün chón pwärätä, lupwen i epwe öpwüngü nöün aramas.
5“Öüpwe mwiicheto reei ämi neii kana mi lükülük, chókewe mi ääni ew pwonen etipeew ngeniei ren ar ääni asór.”
6Mwirin, ekkewe läng ra pwärätä le aporausa usun an pwüng, pün pwisin Kot i ewe souköpwüng. Selah
7“Öüpwe öüseling, ämi neii aramas, pün ngang üpwe kapas. Kopwe rongorong en Israel, pün ngang üpwe üüngenuk lón äi pwärätä. Ngang Kot, óm we Kot.
8Ngang üsap öpwüngü kemi ren ämi kewe asór ika ren ämi kewe asóren keek öüwa uwato mwei fansoun meinisin.
9Ngang üsap chüen mochen emön ätemwänin kowu seni ämi leenien maan ika kuuch seni ämi kewe tittin maan.
10Pün ekkewe maan meinisin mi nóm leiin wollap, neii; pwal ekkewe pwiin kowu mi nóm wón ekkewe engöröw chuuk, neii.
11Ngang üwa silei iteiten machchangen wón ekkewe chuuk meinisin, nge ekkewe mönümanaw lón ekkewe mälämäl, neii.
12Are üpwe echik, ngang üsap üreni kemi, pün fönüfan äi me masowan meinisin.
13Ifa usun, ngang üwa ocheei fituken ekkewe ätemwänin kowu ika ünümi chaan ekkewe kuuch?
14Iei meet ngang üwa mochen pwe öüpwe ääni asór. “Öüpwe ääni asór ngeni Kot ämi enletin kilisou, öüpwe öpwönüetä ämi kewe pwon ngeni ewe mi Unusen Tekia,
15iwe, öüpwe köriei lón ränin ämi riäfföü; nge ngang üpwe angasa kemi o ämi öüpwe enlingaeiló.”
16Nge Kot a apasa ngeni ewe aramasingaw: “Kosap chüen leaweni äi kewe öllük, kosap pwal otupwun föri pwe en mi älleasochisiei.
17Pün en ka opwut äi öüröür o ka pöütaló äi kewe kapas liisökürum.
18Lupwen ka küna emön chón soolä, ka fen chiechi ngeni i. Ka pwal pach ngeni le mwinemwin ngeni kana chón lisowu.
19Awom a uren mettóch mi ngaw, chönnawom a uren kapas chofona.
20En ka chök eneen le kapasen üüngeni pwiimw o eitengawa nöün pwisin inom we mwän.
21Ikkeei ekkewe mettóch en ka föri nge ngang üwa chök fanafanaló. En ka ekieki pwe ngang üsap äfälli. Nge iei ngang üpwe öpwünguk o ächewenewen le ettipisuk.
22Kopwe ekiekielong lón letipom usun ei, en ewe mi möllükaló Kot. Pün are kosap; iwe, ngang üpwe ataatakisuketiw nge esap wor emön epwe chimanuuk.
23Nge emön mi ääni asór ekkewe asóren kilisou, i a elingaeiló, iwe, ngang üpwe pwääri än Kot alen ngaseló ngeni emön mi öpwüngöchüw kókkóóten lón manawan.”
Köölfel 51
Ew iótekin äier ika ekieksäfäl. Ngeni ewe chón nemeni kööl. Echö kööl än David lupwen ewe soufós Nathan a feilló ren mwirin an tipisin lisowu ngeni Bathseba.
1Äi Kot, kopwe ümöümöch ngeniei, alóngólóng wón óm tong mi nukuchchar; alóngólóng wón óm ümöümöch mi somwoló, kopwe amóiló äi kana pwuupwungaw.
2Kopwe unusen alla seniei äi kana pwüngingaw meinisin o limetiei seni äi tipis.
3Pün ngang üwa silei äi kana pwuupwungaw me äi tipis a nóm fóchófóch fän mesei.
4Ngang üwa tipis ngenuk, fókkun ngenuk echök ngang üwa föri meet mi ingaw me mwen mesom; iei popun en ka pwüng lupwen ka atoowu pwüngün köpwüng, ka pwal pwüng lupwen ka ääni köpwüng.
5Enlet, ngang üwa uren tipis lupwen äi upwutiw, ngang üwa uren tipis seni ewe fansoun inei a pwoopwoäsiniei.
6Nengeni, en ka pwapwaiti let me lón letip; en ka äiti ngeniei pwe üpwe sile miriit lón mwónómwónen letipei.
7Kopwe limetiei ren óm äsupwu ngeniei kóluk ren ülün ewe irä itan hyssop pwe üpwe limöch. Kopwe sopwuniei usun echö mangaku mi pwül pwe üpwe pwech seni sno.
8Kopwe mwüüt ngeniei pwe üpwe rongorong säfäl ngiingin pwapwa me meseik. Kopwe mwüüt ngeni chüüi kana en ka kupiir pwe repwe pwapwa.
9Kopwe opaaló wón mesom seni äi kewe tipis o kopwe amóiló äi kewe föfföringaw meinisin.
10Kopwe föri lóói ew leluk mi limöch, äi Kot, o asöfösäfäli ew ngüün mi pwüng lóói.
11Kosap ösüüweiló seni fän mesom, kosap pwal angei seniei Ngünum mi Pin.
12Kopwe eliwinsäfäli ngeniei pwapwan óm we alen küna ngaseló o fang ngeniei ew ngüün mi tipemecheres pwe epwe öpöchökkülaei.
13Mwirin, ngang üpwe äiti ngeni ekkewe chón pwuupwungaw óm kewe aal pwe ekkewe chón tipis pwe repwe kul säfäl ngenuk.
14Kopwe angasaei seni tipisin äi össükü chcha, en Kot äi Chón Amanaw, iwe, chönnawei epwe köölüw usun óm pwüng
15Äi Samol, kopwe suukaló tinnawei me awei pwe üpwe pwärätä le arongafeili äi mwareituk.
16En kosap pwapwaiti ekkewe asór are ngang üpwe uweiireto reemw; en kosap pwapwaiti ekkewe asóren keek.
17Iei, äi asór ngenuk, äi Kot, ew ngüün mi taatakkis, ew letip mi taatakkis me liamaamsäfäl, en Kot kosap opwut.
18Amwo epwe apwaapwai letipom óm kopwe äfeffeitäi Zion, pwe kopwe öüüwsäfälietä tittin Jerusalem kewe.
19Mwirin, en kopwe pwapwa ren ekkewe asór mi pwüng, ren ekkewe asóren keek me ekkewe unusen asóren keek; mwirin, ekkewe ätemwänin kowu repwe keekeló wón óm we róngen asór.
Köölfel 52
Sapwongawen ekkewe aramasingaw me kinamwein ekkewe chón nuokkus Kot. Ngeni ewe chón nemeni kööl. Echö köölün erekirek än David lupwen ewe re Edom itan Doek a feilló üreni Saul o apasa ngeni: “David ina a feilló lón imwen Ahimelek we.”
1Pwata ka sikäsini ekkewe föfför mi ngaw ka föri, en enan mwän mi pwora? Pwata ka tunosikesik usun óm tipis en ewe mi eitengawa nöün Kot aramas?
2Chönnawom a rawei an epwe efisätä feiengaw. Chönnawom a kken usun echö räisö, en ewe mi föri angangen otupwutup.
3En ka saani minne mi ingaw lap seni minne mi mwirinnö. En ka saani óm kopwe apasatä minne mi mwääl lap seni óm kopwe apasatä minne mi let.
4En ka saani iteiten kapas mi efeiengawa aramas, en ewe ka usun efóch chönnaw mi uren otupwutup.
5Nge Kot epwe ataatakisiketiw lón feiengaw esap mwüch. Epwe urusukowu seni lón imwom o ösuukóló. I epwe üttuketä seni ewe fönüen mi manaw. Selah
6Ekkewe chón pwüng repwe küna usun ei o repwe nuokkus. Repwe takiri i o apasa,
7“Iei i ewe aramas esap ääni Kot leenien op mi pöchökkül, nge a änómwu an apilükülük wón wöwün mi lapalaap o a alapaló an pöchökkül ren an efeiengawa pwal ekkóch aramas!”
8Nge ngang üwa wewe ngeni ewe irä itan olif üwa mämmääröchütä me lón ewe imwen Kot. Ngang üwa anómwu äi apilükülük lón än Kot tong ese mwüch fansoun meinisin tori feilfeilló chök.
9Ngang üpwe mwareituk fansoun meinisin ren meet en ka föri. Ngang üpwe apilükülüküw itom, pün itom a mwirinnö. Ngang üpwe mwareituk me fän mesen noum kewe chón pin.
Köölfel 53
Än ekkewe resap nuokkus Kot umwes me än Kot efeiöchüsäfäli Israel. Ngeni ewe chón nemeni kööl. Echö kööl än David mi fich ngeni ngiingin “Mahalath.”
1Ewe mi umwes a apasa lón letipan, “Ese wor Kot.” Iir ra kirow, ra föri föfförün pwüngingaw mi fókkun enniopwut; esap wor emön a föri minne mi mwirinnö.
2Kot a nennetiw seni läng wón sókkun aramas meinisin pwe epwe nengeni are mi wor iö mi wewe, iö mi kütta Kot.
3Iir meinisin ra tókkóló seni Kot, meinisin ra unusen kirouló; esap wor emön a föri minne mi mwirinnö, esap fókkun wor emön.
4Ifa usun, ekkewe chón föfföringaw meinisin resap miriit? Iir chókewe mi oromaaló neii kewe aramas usun chök nge re mwöngö pilawa; nge resap kööri Kot.
5Nge mwirin, ra püngütiw lón nuokkus lapalaap, nge esap wor och mettóch epwe eniwokkusur. Kot epwe atoropassa chüün chókana mi maun ngenuk; en kopwe äsääwir ren ar kuf reemw pün Kot a pöütireló.
6O amwo itä ewe alen ngaseló epwe feitto seni lón Zion pwe epwe chimanüw Israel! Lupwen Kot epwe eliwinisäfäli feiöchün nöün kewe aramas, Jakob epwe pwapwa o Israel epwe chengel!
Köölfel 54
Pölüwen iótek fäniten ngaseló seni ekkewe chón öppölüwa. Ngeni ewe chón nemeni kööl. Echö kööl mi fiti tikkin pisekin likettik mi wor säitelir. Echö än David kölün erekirek lupwen ekkewe chón Zif ra feilló o üreni Saul, “David iei a op reem.”
1Kopwe angasaei, äi Kot, fänäsengesin itom. Kopwe älletätä äi pwüng ren óm manaman.
2Kopwe öüseling ngeni äi iótek, äi Kot. Kopwe öüseling ngeni kapasen awei.
3Pün ekkewe chón ekis mi mwänesol ra maun ngeniei. Ekkewe aramas resap sile tong ra kütta pwe repwe angei manawei, iir ekkewe aramas resap meniniti Kot.
4Enlet Kot i äi chón älillis; ewe Samol chök i ewe enletin chón ömwöchü manawei.
5Amwo pwe minne mi ingaw epwe pwisin liwinsäfäliti le küüw chókana mi eitengawaei.
6Ngang üpwe asór ngenuk ew asór seni pwisin mochenin letipei. Ngang üpwe mwareiti itom, äi SAMOL, pün iei meet mi mwirinnö.
7Pün en ka angasaei seni äi kewe riäfföü meinisin o älisiei pwe üpwe okkufu ekkewe chón opwutaei.
Köölfel 55
Anómwu apilükülük wón Kot fänäsengesin chiechiach kana mi kirikiringaw. Ngeni ewe chón nemeni kööl. Echö kööl mi fiti tikin pisekin likettik mi wor säitelir. Echö än David köölün erekirek.
1Äi Kot, kopwe öüseling ngeni äi iótek, nge kosap asarongorong ngeni äi tungór;
2kopwe rongorong ngeniei o pölüweniei. Äi kana ekiek ra osukosukaei o ngang üwa nuokkus,
3pwokiten meet ekkewe chón opwutaei ra apasa, pwokiten än ekkewe aramasingaw eniwokkusuei, pün ra aworato riäfföü wóói o ra opwut ngang lón ar soong.
4Lelukei a fókkun metekitek; nuokkusun mäló a nemenieiló.
5Nuokkus me chechchech ra pwelli feiliei. Ngang üsap tongeni ükütiw le chechcheech.
6Iwe, ngang üwa apasa, “O, amwo itä epwe wor pöükässi usun emön mwurö! Pün ngang üpwe ässiló o asöösöló.
7Ngang üpwe ässiló toowaw ngeni ew leeni mi mósónósón lón ewe fönüpöön. Selah
8Ngang üpwe mwittir le sü ngeni äi leenien op, toowaw seni ewe äsäpwääl mi ngüsüngüs me mölümölün.
9Kopwe efeiengawa ekkewe aramasingaw, äi Samol, kopwe efitikokoi ar kapas, pün ngang üwa küna angangen mwänesol me fiu fengen lón ewe telinimw.
10Lerän me lepwin a wor chón mas ra chök pwellifeil wón tittin kana pwe repwe eppeti ekkewe chón tööki. Nge ewe enletin feiengaw a feitto seni ewe föfföringaw me efitikoko mi fis lón ewe telinimw.
11Föfförün niieló aramas me soolä ra fis lukalapen ewe telinimw. Angangen efeiengaw me chofona resap ükütiw seni lón alan kewe.
12Are emön chón opwutaei epwe kapasen turunufaseei, ngang mi tongeni üpwe engngiló ngeni. Are emön chón pölüweniei epwe üütä o üüngeniei, ngang mi tongeni üpwe opoló seni i.
13Nge fen en, emön aramas usi chök, en chiechiei, sia arap fengen lón ach pwiipwi fengen.
14A ifa me ach pwapwa le chiechiöch fengen me mwan lupwen sia fiti ewe mwiichen aramas le fätäl ngeni ewe imwen Kot.
15Amwo mäló epwe ämäirüw le turufi ekkewe chón opwutaei. Amwo ewe leenien sotup epwe oromiireló nge iir mi manaw, pün minne mi ngaw a nóm lón leenier kana a pwal nóm leiir.
16Nge ren ngang, ngang üwa kööri Kot, iwe, ewe SAMOL a angasaei.
17Lekkuniól, lesossor me leólówas ngang üwa iótek o leüommóng le siö lón äi riäfföü. Iwe, i a rongorong mweliei.
18I a chimanüwei o tümwünüei lón kinamwe seni ewe maun mi fis ngeniei, inamwo are ra chómmóng ekkewe mi üüngeniei.
19Kot, ewe mi móót wón an leenien móótun nemenem seni chók lóóm lóóm,, epwe rongorong ngeniei o epwe etekisóneretiw. Pün ekkewe chón opwutaei resap mochen siwili ar kewe aal o resap pwal nuokkusiti Kot. Selah
20Nge ren chiechiei we me lóóm, i a afangamäei. I a atai an kewe pwon.
21An kewe kapas a men motowtow usun chök pwötö, nge lón letipan a wor maun. An kana kapas ra men ekinamwe ren pweteeten lap seni noppwuk, nge fan a wor ketilas.
22Kopwe oturätä wón ewe SAMOL óm kana wosochchow; iwe, i epwe tümwünuk. I esap mwüüt ngeni ewe chón pwüng pwe epwe mit o turuló.
23Nge en, äi Kot, kopwe oturalong ekkewe aramasingaw lón ewe pwangen kitetter. Ekkewe aramas mi kaakaiti ar repwe össükü chcha me uren otupwutupw resap ounusa le manaw lón öükükün unusen ränin manawer pün epwe chök nesópw. Nge ngang üpwe anómwu äi apilükülük wóómw pwe kopwe amanawaei.
Köölfel 56
Iótek fäniten pichiló seni ekkewe chón eriäfföü. Ngeni ewe chón nemeni kööl. Mi fich ngeni ngiingin ewe kööl, “Ewe Mwürö mi Fanafanaló me lón Fönü Towaw.” Echö miktam än David lupwen ekkewe chón Filistia ra liäpeni me lón Kath.
1Kopwe kirekiröch ngeniei, äi Kot, pün aramas ra pwuurieitiw. Lón langattamen unusen ei rän ra chök eneen le öpöchökküla ar angangen fiu ngeniei.
2Ekkewe chón eitengawaei ra pwuurieitiw lón langattamen unusei ei rän. Chómmóng ra fiu ngeniei lón ar lamalamtekia.
3Lupwen ngang üwa nuokkus, ngang üwa anómwu äi apilükülük lón en.
4Lón Kot, ngang üwa mwareiti an kapas, lón Kot ngang üwa anómwu äi apilükülük lón Kot; iwe, ngang üsap nuokkus. Meet aramas mi feil ngeni an epwe mä epwe tongeni föri ngeniei?
5Lón langattamen unusen ei rän ra chök sorei äi kapas; ra rawei ar repwe efeiengawaei fansoun meinisin.
6Ra föri ar wiiwi lemwónómwón, ra chök opoló, ra chök okkoperi ipweipwen pecheei pün ra fókkun mochen angeló manawei.
7Pwokiten ar föfföringaw, kosap mwüüt ngeniir pwe repwe tiweló. Lón óm soong, äi Kot, kopwe okkufätiw chón ekkewe mwüü.
8Kopwe makkeetiw äi keei letipeta meinisin. Kopwe alöölöw supwun chónün mesei lón óm ruume. En ka makkeetiw ew me ew lón noum pwuk.
9Lón ewe rän ngang üpwe kööruk pwe kopwe älisiei, ekkewe chón opwutaei repwe kulsäfäl o sü. Ren ei, ngang üpwe silei pwe en Kot ka nóm wón äi peekin.
10Lón Kot, ngang üwa mwareiti an kapas, lón ewe SAMOL, ngang üwa mwareiti an kapas,
11lón Kot ngang üwa anómwu äi apilükülük o üsap nuokkus. Meet aramas epwe tongeni föri ngeniei?
12Ngang üpwe öpwönüetä äi kewe pwon ngenuk, äi Kot. Ngang üpwe uwato äi kewe asóren kilisou ngenuk fäniten óm älillis.
13Pün en ka chimanüei seni mäló, ka pwal tümwünü pecheei pwe resap mit. Iei minne, ngang üwa tongeni fätäl me fän mesom äi Kot lón óm we saram mi fangeto manaw.
Köölfel 57
Iótek fäniten an epwe wor tümwün seni ekkewe chón opwut. Ngeni ewe chón nemeni kööl. Mi fich ngeni ngiingin ewe kööl “Kosap Kitereló”. Echö miktam än David lupwen a sü seni Saul o opolong lón ewe fööimw.
1Kopwe kirekiröch ngeniei, äi Kot, kopwe kirekiröch ngeniei, pün ngüni a äänuk leenien op. Ngang üpwe opolong fän nürün pöükässum kana tori ewe feiengaw usun ew mölümöl a luuló.
2Ngang üwa pwuchör le siö ngeni Kot ewe mi Unusen Tekia; üwa siö ngeni Kot, ewe mi öpwönüetä minne i a mochen fänitei.
3Iwe, i a tiinätiw an tong me ölükülük seni läng o angasaei ren an öpwüngü chókana mi tapwerifeiliei. Kot a tiinato an tong me an ölükülük. Selah
4Ngang üwa nóm leiin laion; ngang üwa kóón leiin maan mwacho mi arochongaw, iir ekkewe aramas ngiir ra usun chök siles me föün esefich, pwal chönnawer ra ken usun ketilas.
5En ka tekiätä, äi Kot, asen ekkewe läng. Kopwe mwüüt ngeni óm ling epwe nónnóm wón unusen fönüfan.
6Chón opwutaei ra emeresaló ew ssär pwe pecheei epwe pwulong lón. Ngang üwa töpwaro fän choun äi riäfföü. Ra tuuw ew pwaang lón ewe aal üwa fätäl lón, nge iir ra fen pwisin turulong lón.
7Letipei a apilükülük lón en, äi Kot; letipei a apilükülük. Iei popun ngang üwa mollotä pwe üpwe kööl o mwareituk.
8Ngüni kopwe pwök! Ämi kewe pisekin likettik itemi harp me layer öüpwe pwök! Ngang üpwe öppwökätä ewe mallen rän ren äi kööl.
9Ngang üpwe kilisou ngenuk, äi Samol, me fän mesen ekkewe aramas meinisin. Ngang üpwe köölün mwareituk me leiin chón ekkewe mwüü.
10Pün óm tong ese mwüch a fókkun tekia usun tekian ekkewe läng. Óm ölükülük a tori ekkewe kuchu.
11En ka tekiatä, äi Kot, asen ekkewe läng. Kopwe mwüüt ngeni óm ling epwe tin wón unusen fönüfan.
Köölfel 58
Ewe pwüngün köpwüng mi pwüng fäniten ekkewe aramasingaw. Ngeni ewe chón nemeni kööl. Mi fich ngeni ngiingin ewe kööl “Kosap Kitereló.” Echö miktam än David.
1Ämi ekkewe souköpwüng, ifa usun, ämi mi kapas wenechchar? Ifa usun, ämi mi ääni köpwüng fän wenechchar me leiin aramas?
2Apw, pün lón letipemi öüwa ekiekietä minne esap pwüng nge pöümi kana ra föri föfförün mwänesol wón fönüfan.
3Ekkewe aramasingaw ra tókkóló lón tipis seni chök ar üpwütiw; ra fókkun üleförea o kapas chofona seni chök ar nóm lón ewe leenien mönukól.
4Ra kusufawu poisonur mi efeiengaw usun chök poisonun emön serepenit. Ra usun chök ewe serepenit itan kopra esap mochen öüseling,
5esap pwal äfälli ngiingin än ewe sourong föörüwör, inamwo are a fókkun sipeöch lón an angangen föörüwör.
6Kopwe kupii ngiir me lón awer, äi Kot. Äi SAMOL, kopwe apachcha ngächin ekkewe laion!
7Amwo repwe móróló usun chök kóluk lón pwül mi pwasapwas. Amwo nöür kana föün esefich repwe kupuló lupwen repwe emmeiia nöür kewe esefich.
8Amwo repwe usun och pweechar lipwich a chök pwisin teliló lupwen a tö fän akkar, pwal usun emön monukól mi upwutiw nge mi mä, esap küna tinen akkar.
9Me mwen óm we nape epwe meefi pwichikkaren ewe ekkei mi kü ren iräfölüföl - ese lifilifil ika iir mi manaw ika mi ppwas - i epwe mwittir arosaló ekkewe chón föfföringaw.
10Ekkewe chón pwüng repwe pwapwa lupwen repwe küna pwe ekkewe aramasingaw ra angei chappen ar föfför. Ekkewe chón pwüng repwe pwapwa lupwen repwe tölü pecheer lón chaan ekkewe aramasingaw.
11Mwirin, aramas repwe apasa, “Enlet, mi chüen wor ew liiwin fäniten chón pwüng; enlet mi wor emön Kot mi öpwüngü fönüfan.”
Köölfel 59
Mi fókkun enlet pwe ekkewe chón föfföringaw repwe köpwüng. Ngeni ewe chón nemeni kööl. Mi fich ngeni ngiingin ewe kööl “Kosap Kitereló”. Echö miktam än David lupwen Saul a tiinaló ekkóch mwän pwe repwe operi ewe imw pwe repwe niieló i.
1Kopwe angasaei seni ekkewe chón opwutaei, äi Kot; kopwe tümwünüei seni chókana mi üüta pwe repwe niiei.
2Kopwe angasaei seni ekkewe chón föfföringaw o chimanüei seni ekkewe aramas mi saani ar repwe össükü chcha.
3Ka küna usun ar witiwit le opoperiei! Ekkewe aramas mi arochongaw ra akkóóta lemwónómwón pwe repwe niiei, nge esap ren äi mwääl ika ren äi tipis, äi SAMOL.
4Ngang üsap föri och mi mwääl, nge iir ra amollätä pwe repwe fiu ngeniei. Kopwe üütä o älisiei; kopwe nengeni äi riäfföü!
5Äi SAMOL Kot mi Unusen Manaman, ewe Koten Israel, kopwe pwäätä pwe kopwe öpwüngü chón ekkewe mwüü meinisin. Kosap kirekiröch ngeni ekkana chón afangamä mi kirikiringaw. Selah
6Ra liwinito iteiten lekuniól, ra ngüüngün kükkük usun kana kolaak, o ra änniffeil lón ewe telinimw.
7Kopwe öüseling ngeni ewe limengaw mi toowu seni lón awer, ekkewe kapas mi kken usun ketilas mi toowu seni wón tinnawer, pün ra ekieki, “Iö epwe tongeni rongorong kich?”
8Nge en, äi SAMOL, ka takiriir; ka esiitä meinisin chón ekkewe mwüü.
9En äi pöchökkül, ngang üwa ösüküsükuk pwe kopwe chimanüei; äi Kot, pün en imwei imwen maun mi pöchökkül.
10Äi Kot epwe souniei fän an tong enlet. Kot epwe mwüüt ngeniei pwe üpwe meseikäsini le küna än chón opwutaei repwe kuf.
11Nge kosap niireló pün ina neii kewe aramas repwe mwittir möllükaló minne ka föri ngeniir. Lón óm manaman, kopwe chök föri pwe repwe toropasfeil o mwirin kopwe okkufuretiw, äi Samol, en eppetim lón maun.
12Fäniten tipisin awer, fäniten kapasen tinnawer, amwo repwe pwisin wo lón ar lamalamekia. Fäniten ekkewe óttek me kapas chofona iir ra apasa,
13kopwe arosereló lón óm soong, kopwe arosereló tori resap chüen nóm.
14Ra liwinito iteiten lekuniól, ra ngüüngün kükkük usun kana kolaak, o ra änniffeil lón ewe telinimw.
15Ra täwälfeil ener mwöngö o ra pwüchöör ika resap möt.
16Nge ngang üpwe köölüw óm pöchökkül, lesossor ngang üpwe köölüw óm tong; pün en imwei imwen maun mi pöchökkül, en äi leenien op lón fansoun riäfföü.
17En äi pöchökkül, ngang üwa köölün mwareiti ngenuk; äi Kot, en imwei imwen maun mi pöchökkül, en äi Kot mi ääni tong.
Köölfel 60
Iótek mi weinein fäniten än Kot epwe tongesäfäliir. Ngeni ewe chón nemeni kööl. Mi fich ngeni ngiingin ewe kööl “Kiopun Pwärätä.” Echö miktam än David. Fäniten osukuul. Lupwen a fiu ngeni Aram Naharaim me Aram Zobah; iwe, Joab a liwinsäfäl o niieló engol me ruu ngöröw chón Edom me lón ewe lemölün Salt.
1En ka pöütikeemiló, äi Kot, a usun chök nge ka ataetiw tittim. En ka soong ngeni keem; iwe, iei kopwe öpöchökküla säfäli keem!
2En ka ächechcha ewe fönü o asanga feseni. Kopwe seleti säfäli taatakisin ewe fönü pün a chök chechchech.
3En ka öküna ngeni noum aramas fansoun weires; en ka öünü ngeni keem wain pwe äipwe tokorikirik feil ren.
4Nge en ka öürätä efóch filaik fäniten chökana mi nuokkusituk pwe epwe äfächcheló pwe ar leenien op seni feiengawen ewe föün esefich. Selah
5Kopwe angasa keem o älisi keem ren pöüiifichin, kopwe chimanüw noum kana aramas mi ächengicheng.
6Kot a kapas seni än we leeni mi pin o apasa, “Ngang üpwe inetii Shekem fän äi pwapwa. Ngang üpwe öükaló ewe leemólun Sukkoth.
7Fönüwei Kilead, pwal fönüwei Manassah. Efraim i imwei akkawen maun, Judah i wóki wókun king.
8Moab i sepiei sepien töttöl. Ngang üpwe móneetä wón Edom ipwei sandal. Ngang üpwe örukaken wiil me wón ewe fönü Filistia.”
9Nge iö epwe emmwenieiló ngeni ewe telinimw mi pöchökkül tittin? Iö epwe emmweniei ngeni Edom?
10Esap en, äi Kot, en ewe ka pöütikeemiló o kosap chüen feilló fiti nöüüm kewe mwiichen sounfiu?
11Kopwe älisi keem pwe aipwe tongeni üüngeni ekkewe chón opwuta keem, pün än aramas älillis a lamwotongaw.
12Ren än Kot älillis, kich sipwe wiil pün i epwe pwuurätiw ekkewe chón opwuta kich.
Köölfel 61
Älelleten än Kot tümwün esap mwüch. Ngeni ewe chón nemeni kööl. Echö kööl än David wón och pisekin likettik mi wor säitelin.
1Kopwe rongorong äi siö, äi Kot; kopwe öüseling ngeni äi iótek.
2Ngang üwa kökkööruk seni lesópwun fönüfan; ngang üwa kökkö pün letipei a apilükingaw. Kopwe emmweniei ngeni ewe achaw mi tekia seniei.
3Pün en chök ka fen piin äi leenien op; en ew leeni pöchökkül mi tekia üpwe op lón seni ewe chón opwutaei.
4Ngang üwa pwositi äi üpwe nóm lón imwom fansoun meinisin o opolong fän mwónun pöükässum kana. Selah
5Pün en, äi Kot, ka rong äi kewe pwon; en ka ngeniei ewe älemwir fäniten chókana mi nuokkusiti itom.
6Kopwe achómmóngaló ränin manawen ewe king, kopwe alangattamaló ierin manawan pwe epwe tori chómmóng pilóón aramas.
7Amwo epwe móót wón an leenien móótun nemenem me fän mesen Kot fansoun meinisin. Kopwe ökkünöw óm tong me óm ölükülük pwe repwe mammasa i.
8Mwirin, ngang üsap ükütiw le köölün mwareiti itom lupwen üwa öpwönüetä äi kewe pwon rän me rän.
Köölfel 62
Tipelüwa le witiwitiló ngeni än Kot älen ngaseló. Ngeni ewe chón nemeni kööl, Jeduthun. Echö kööl än David.
1Enlet, ngüni a chök fanafaneló le witiwiti Kot echök, pün äi alen ngaseló a feitto seni i.
2Enlet, i echök äi achaw me äi alen ngaseló. I imwei imwen maun mi pöchökkül, ngang üsap tongeni üpwe mwökütüküt.
3Epwe ifa langattamen fansoun ämi öüpwe mwungeni le fiu ngeni emön aramas? Ifa usun, ämi meinisin öüpwe oturätiw i, ewe mi wewe ngeni och etiip mi päi me och tiit mi rükürük?
4Ra unusen anómwu lón ar ekiek pwe repwe asapwilätiw i seni leenian mi tekia. Ra pwapwaäsini kapas chofona. Ra ääni kapasen mwareiti ren awer, nge ra óttek lón letiper.
5En ngüni, kopwe chök fanafaneló le witiwiti Kot echök, pün äi apilükülük a feitto seni i.
6I echök äi achaw me äi alen ngaseló. I imwei imwen maun mi pöchökkül, ngang üsap tongeni üpwe mwökütüküt.
7Ai ngaseló me äi iteüöch ra chök lóngólóng wón Kot; pün i äi achaw mi manaman me äi leenien op.
8Ämi aramas, öüpwe anómu ämi apilükülük wón Kot fansoun meinisin. Öüpwe niinawu masowen letipemi ngeni Kot pün i ach leenien op.
9Ekkana aramas mi upwutekisón ra chök usun och enienin äsäpwääl, ekkana mi upwutekia ra usun chök nge och chofona. Ika repwe ochchour wón ew kilo; iwe, esap wor chour. Iir ppök ra chök usun och enienin äsäpwääl.
10Öüsap anómwu ämi apilükülük wón pisek ämi öüwa eriäni seni aramas, öüsap pwal ääni apilükülük pisekin soolä. Inamwo are a lapaló ämi pisekisek, nge öüsap chök anómwu ämi ekiek wór.
11Kot a kapas fän ew chök, nge ngang üwa rongorong fän ruu: pwe manaman óm echök, Kot,
12pwal en echök, äi Samol, ka ääni tong ese mwüch. Pün en kopwe ngeni emön me emön aramas en me liwinin an föfför.
Köölfel 63
Pwapwan lón ewe chiechifengen me Kot. Echö kööl än David lupwen a nóm lón ewe fönüpöönün Judah.
1O Kot, en äi Kot, ngang üwa fókkun tilikken le küttók. Ngüni a kaakaituk, inisi a pwosituk me lón ew fönü mi pwasapwas o sangaang, ia esap wor kóluk ie.
2Ngang üwa fen künók me lón imwom we mi pin o üwa nengeni óm manaman me óm ling.
3Pwokiten óm tong a mwirinnö seni manaw; iei minne tinnawei epwe enlingókeló.
4Ngang üpwe mwareituk lón unusen langattamen ränin manawei, o lón itom ngang üpwe eitietä peii ngenuk lón äi iótek.
5Ngüni epwe menemenöch usun chök än inisi menemenöch ren kana mwöngö mi annö. Awei epwe mwareituk ren än tinnawei epwe kööl.
6Ngang üwa chechchemenuk me wón kiei we peet. Ngang üwa ekiekik lón unusen ekkewe kulókun ewe pwiin.
7Ngang üwa kööl me fän nürün pöükassum kana, pwokiten en äi chón älillis.
8Ngüni a fitipachek; pöüiifichin a sapaeitä.
9Chókana mi kütta pwe repwe angei manawei, repwe feiengaw. Repwe feittiw leutun fönüfan mi alóllón.
10Repwe ninniló ren ketilas o ekkewe kolaak mi mwacho repwe ocheei fituker.
11Nge ewe king epwe meseik lón Kot. Meinisin aramas mi öpölü iten Kot lón ar pwon repwe mwareiti i, nge awen ekkewe chón kapas chofona repwe chök fanafaneló.
Köölfel 64
Nóm lón riäfföü ren aramasingaw nge pwapwa lón ewe SAMOL. Ngeni ewe chón nemeni kööl. Echö kööl än David.
1Kopwe rongorong mweliei, äi Kot, lupwen ngang üwa apasatä äi lalangaw. Kopwe tümwünü manawei seni än ekkewe chón opwutaei eniwokkusuei.
2Kopwe aopaei seni ewe akkóót mi mwónómwón än ekkewe aramasingaw. Kopwe aopaei seni ewe mwiichen chón föfföringaw mi ökürang.
3Ra seimi chönnawer usun chök ketilas o ra äpera ar kana kapas usun chök kana föün esefich aramas ra mäló ren.
4Ra popuchööw le pekki ewe aramas esap wor an tipis seni ar leenien op. Ra mwittir pekki i nge esap wor ar nuokkus.
5Ra öpöchökküla fengeni lefiiler lón ar akkóót mi kirikiringaw, ra kapas usun ar repwe sooni ar kewe ssär lemwónómwón o ra ekieki, “Iö epwe küneer?”
6Ra rawei minne a pwüngingaw o apasa, “Kich sia ekiekietä och akkóót mi unusen mwirinnö!” Enlet ekiekin me letipen aramas ra men otupwutupw.
7Nge Kot epwe pekki ngeniir nöün kewe föün esefich; iwe, repwe mwittir el o turuló.
8I epwe kulluw ngeniir pwisin kapasen chönnawer pwe repwe feiengaw o epwe atolonger lón taatakkis. Meinisin mi küner repwe lüelüweti mökürer lón ämängaw.
9Aramas meinisin repwe nuokkus; repwe aporausa feili än Kot kewe föfför o repwe lechüüni meet i a föri.
10Ekkewe chón pwüng repwe pwapwa lón ar apilükülüküw ewe SAMOL, repwe pwal ääni i leenien op. Meinisin ekkewe mi wenechchar lón letiper repwe mwareiti i!
Köölfel 65
Mwareiti Kot ren an we alen ngaseló me an älillisöch. Ngeni ewe chón nemeni kööl. Echö kööl än David. Echö kööl
1A fich ngenuk pwe äipwe mwareituk, äm Kot, me lón Zion; pwe äm äipwe öpwönüetä äm kewe pwon ngenuk.
2En ewe mi rongorong ngeni iótek, aramas meinisin repwe feitto reemw.
3Lupwen äm äia kufuló ren äm kana tipis, en ka omwusaló äm kana pwuupwungaw.
4Ra feiöch chókana en ka filiiretä o akkanereto pwe repwe nóm lón leeniom leenien samol. Äm äia ur ren ekkewe mettóch mi mwirinnö minen lón imwom we, imwom we mi pin.
5En ka pölüweni äm iótek ren föfförün pwüng mi amwaraar, en Kot äm Chón Amanaw. En ewe apilükülük än aramas meinisin seni ekkewe lesópwun fönüfan meinisin me ekkewe mataw mi toowaweló,
6en ewe mi föri ekkewe chuuk tekia ren óm manaman, pwokiten ka öüföüfa ngenuk pöchökkül,
7en ewe mi ölüwaeló püngüpüngün ekkewe mataw, torotoren ekkewe nóó, me ökürangen fitikokon ekkewe mwüü,
8pwe chókana mi nóm toowaweló lesópwun fönüfan repwe nuokkus ren óm kewe föfför mi amwaraar. En ka akökkööw pwe epwe wor mwireiren pwapwa seni eweia akkar a tötä me ie tori ia a tupwutiw me ie.
9En ka öüchcheani le tümwünü fönüfan o ka atüütüw ren kóluk, en ka föri pwe epwe wöw o pwülüöch. Än Kot kewe chaanpwuupwu ra uretä ren kólik,
pwe repwe awora föün wiit ngeni ekkewe aramas, pün iei usun meet en ka fen amollätä le akkóóta.
10En ka alölöw warawaren ekkewe pwül mi ttu ren püngün üüt o asósónöchü iniinin kana mi tuutä. Ka äpwetetei ewe pwül ren püngün üüt o efeiöchü minne mi fótutiw lón pwe repwe mämmäritä o uwa.
11A usun chök nge ka ämwärämwära ewe ier ren óm awora fansoun kinikin uwa mi somwoló o wóóm kana wóóken ra säsewu ren mettóch mi chómmóng.
12Ewe fönüpöön a wiliti ew fönüen fetil mi arawaraw; ekkewe palapalatä ra pwölüló ren pwapwa.
13Ekkewe maasies ra uroló ren ekkewe pwiin siip o ekkewe lemölun ra pwölüló ren wiit. Iir meinisin ra mweireir o kööl ren ar pwapwa.
Köölfel 66
Mwareiti Kot ren an kewe föfför mi amwaraar. Ngeni ewe chón nemeni kööl. Echö kööl. Echö köölfel.
1Öüpwe mweireir fän pwapwa ngeni Kot, ämi chón fönüfan meinisin!
2Öüpwe köölüw lingen itan; öüpwe enlingaló i ren ämi mwareiti!
3Öüpwe apasa ngeni Kot, “A ifa me amwararen óm kewe föfför! Öm manaman a fókkun lapalaap, iei popun pwe ekkewe chón opwutok ra lumifengenir le chappetiw me fän mesom.
4Chón fönüfan meinisin ra chappetiw ngenuk; ra köölün mwareituk, ra köölün mwareiti itom.”
5Öü feitto o nengeni meet Kot a föri, usun an kewe föfför mi amwaraar i a föri fänäsengesin nöün aramas!
6I a ewili ewe mataw ngeni fönü mi pwasapwas. Iwe, nöün kewe aramas ra pwereló lón ewe chaanpwupwu wón pecheer. Me ikenan, äm aia pwapwa ren i.
7Pün ren an manaman mi lapalaap, i a nemenem tori feilfeilló chök. Mesan a mammasa iteiten mwökütükütün chón ekkewe mwüü. I esap mwüüt ngeni chón üleförea pwe repwe pwisin etekiaretä. Selah
8Ämi aramasen fönüfan kana öüpwe mwareiti äm we Kot, öüpwe leüommóng pwe aramas repwe rong ngiingin ämi mwareiti i.
9Manawach a nóm lón pöün o i a tümwünü pecheech pwe resap mit.
10Pün en, äi Kot, ka sótuni keem; en ka limeti keem lón ekkei usun silfer lón ew leenien limelim.
11En ka liäpeni keem lón ew cheew o isettä ekkana wosochchoun amanaw wón sökürüüm.
12En ka mwüüt ngeni aramas pwe repwe pwurätiw mökürem ren nöür kana óris. Äm äia pwerelong lón ekkei me kóluk, nge en ka emmweni keem ngeni ew leeni mi wäämmóng.
13Ngang üpwe feitto ren óm we imw mi pin fän ekkewe asóren keek pwe üpwe öpwönüetä äi kewe pwon ngenuk,
14ekkewe pwon tinnawei a pwonei me awei a apasa lupwen ngang üwa nóm lón riäfföü.
15Ina pwata ngang üpwe ääni ekkewe asóren keek ngenuk, neii kewe ätemwänin siip mi fókkun mwirinnö pwe epwe ew asór en ka efich pwonnan. Ngang üpwe pwal ääni asór ekkewe ätemwänin kowu me kuuch. Selah
16Öüpwe feitto o öüseling, ämi meinisin mi nuokkus Kot. Öüpwe mwüüt ngeniei pwe üpwe aporausa ngeni kemi meet i a föri fänitei.
17Pün ngang üwa siö ngeni i ren awei pwe epwe älisiei; ngang üwa mwareiti lupwen üwa kapas.
18Are ngang üwa efich äi üpwe iseis tipis lón letipei, ewe Samol esap öüselingaei.
19Nge enlet, Kot a öüseling! I a rongorong mweliei lón äi iótek.
20Ngang üpwe mwareiti Kot, pün i esap asarongorong ngeni äi iótek, esap pwal ömwöchü seniei an tong ese mwüch!
Köölfel 67
Iótekin tungör älillis me än Kot feiöch. Ngeni ewe chón nemeni kööl. Wón ekkewe pisekin likettik mi wor säitelir. Echö Köölfel. Echö kööl.
1Amwo Kot epwe ümöümöch ngeni kich o efeiöchü kich. Amwo epwe wóósaramaram ngeni kich, Selah
2pwe aramas repwe silei óm kewe aal leemelen fönüfan o repwe pwal silei manamanen óm we alen ngaseló me leiin chón ekkewe mwüü meinisin.
3Aramasen ekkewe mwüü repwe mwareituk, äi Kot; aramasen ekkewe mwüü meinisin repwe mwareituk!
4Chón ekkewe mwüü repwe pwapwa o köölün pwapwa, pün en ka öpwüngü ekkewe aramas fän pwüng o emmweni ekkewe mwüü wón fönüfan. Selah
5Aramasen ekkewe mwüü repwe mwareituk, äi Kot; aramasen ekkewe mwüü meinisin repwe mwareituk.
6Fönüfan a awora rääs, nge Kot, ach we Kot epwe efeiöchü kich.
7Kot epwe efeiöchü kich, nge aramas meinisin wón unusen fönüfan repwe nuokkusiti i.
Köölfel 68
Lingen Kot lón an kirekiröch ngeni Israel. Ngeni ewe chón nemeni kööl. Echö köölfel än David. Echö kööl
1Kot epwe üütä o atoropasafeili chón opwutan kana. Iwe, chókana mi opwut i repwe sü me mwan.
2Kopwe usiireló, usun chök äsäpwääl a usaló ötüötün ekkei. Kopwe eteliireló usun chök kiriis a teliló lón ekkei. Iei usun ekkewe aramasingaw repwe kitetteriló me fän mesen Kot.
3Nge ekkewe chón pwüng repwe pwapwa, repwe meseik me fän mesen Kot. Repwe uren pwapwa.
4Öüpwe köölün mwareiti Kot, öüpwe köölün mwareiti itan. Öüpwe leüommóng le köölün mwareiti i ewe mi wawa ekkewe kuchu, itan ewe SAMOL. Öüpwe meseik me fän mesan.
5I semen ekkewe esap wor semer me chón peni ekkewe fefin mi lipichsäfäl. Iei i ewe Kot lón leenian mi pin.
6Kot a ngeni ekkewe mi metip ar famili, a emmwenawu ekkewe chón föötek pwe repwe ngasaló fän pwapwa. Nge ekkewe mi üleförea ra nóm lón ew fönü mi pwasapwas.
7Äi Kot, lupwen ka feiliwu mwen noum kewe aramas, lupwen öüwa teliló lón ewe fönüpöön, Selah
8fönüfan a chechchech, ekkewe läng ra öpüngätiw üüt me mwen Kot, ewe Koten Sinai, me mwen Kot, ewe Koten Israel.
9Äi Kot, en ka öpüngätiw üüt mi somwoló; en ka öpöchökküla säfäli ewe Fönüwen Pwon mi mölüülü.
10Noum aramas ra chón lefönüló lón ewe fönü o seni óm fangafangöch, äi Kot, ka aworato feiöch ngeni ekkewe chón wöwingaw.
11Ewe Samol a apasawu ewe kapas, iwe ra fókkun chómmóng ekkewe fefin mi feilló o arongafeili ewe poraus o apasa:
12“Ekkewe king me nöür mwiichen sounfiu ra sü fän päächew. Iwe, ekkewe fiin Israel mi nómwetiw lón imwer ra ineti lïapen ekkewe mwän lón maun-
13are mwo ämi ekkewe mwän öüwa kóón leiin ekkewe leenien siip, nge ekkewe pöükässin emön lisóóm ra pwölüló ren silfer nge ülöüler ra molupolup ren kolt.”
14Lupwen ewe mi Unusen Manaman a atoropassa ekkewe king me ikenan, sno a püngütiw wón ewe chuuk Zalmon.
15En chukun Kot, ewe chuuk Bashan, en ewe chuuk Bashan mi wor chómmóng tolotän!
16En ewe chuuk mi kükkütä letolom, pwata ka nennen lólówó ngeni ewe chuuk ia Kot a mochen fäniten leenian, ewer, ia ewe SAMOL epwe nóm ie tori feilfeilló chök?
17A wor wään Kot kewe wóókenin maun üküükün ngöröw me ngöröw pwal kit me kit. Ewe Samol a feitto seni ewe chuuk Sinai o nóm lón imwan we mi pin.
18Lupwen ka feitta peekitä, ka lukeätä chómmóng chón ooló mi tapweto mwirum. En ka angei liffang seni aramas, fókkun seni ekkewe aramas mi üleförea pwe en ewe SAMOL Kot kopwe nónnóm ikenan.
19Sipwe mwareiti ewe Samol, sipwe mwareiti Kot ach Chón Amanaw mi mwärei ach kana wosochchou iteiten rän. Selah
20Ach Kot i emön Kot mi angasa kich. Ngasaló seni mäló a feitto seni KOT, ewe Samol.
21Nge Kot epwe ömökkukisi möküren chón opwutan kana, epwe ömökkü pöören möküren chókana mi sópweló le föfföri tipis.
22Iwe, ewe Samol a apasa, “Ngang üpwe eliwinisäfälireto seni Bashan; ngang üpwe eliwinisäfälireto seni fänilólun ewe mataw,
23pwe pachapachom repwe fätäl lón chaan chón opwutom kana, nge chönnawen noum kewe kolak repwe pwal angei wiiser.”
24A pwä teliton óm we mwiich, äi Kot. Än äi we Kot me King mwiich a telilong lón ewe imw mi pin.
25Ekkewe chón kööl ra akkom, nge ekkewe chón ettik pisekin likettik ra tapweto mwirir. Ekkewe föpwül mi ettik ekkewe pisekin likettik iter tamborin ra fitir.
26Öüpwe mwareiti Kot ämi aramasen Israel meinisin. Öüpwe mwareiti ewe SAMOL i popun än Israel manaw.
27Nengeni, inaan ewe einangen Benjamin mi kükkün a emmweniir. Mwirin, ra feitto ekkewe samol mi chómmóng seni Judah me ekkewe samolun Zebulun me Naftali.
28Ai Kot, kopwe tiiti óm manaman; kopwe pwäaraló óm pöchökkül ngeni keem, äi Kot, usun chök minne ka fen föri me mwan.
29Ekkewe kingen fönüfan ra uwato ar takises ngeni óm we Imwenfel lón Jerusalem.
30Kopwe öpwüngü ekkeei mwüü mi üüngenuk ra wewe ngeni maan mwachó mi op leiin ekkewe wowo, mi wewe ngeni pwiin ätemwänin kowu mi nóm leiin ekkewe liälifföön kowu mi apwangapwang. Kopwe etekisónätiw chókewe mi eriäni seni keem pwe aipwe takises ngeniir. Kopwe atoropassafeili chón ekkewe mwüü mi pwapwaiti maun.
31Egypt epwe feitto fän an kana liffang mächä mi öüchchea. Ethiopia epwe etekisónatiw o chappetiw ngeni Kot.
32Öüpwe kööl ngeni Kot, ämi ekkewe mwüün fönüfan, öüpwe köölün mwareiti ewe Samol. Selah
33Öüpwe köölün mwareiti ewe emön mi säifeil peekitä lón ekkewe längin lóóm lóóm. Mwelian mi manaman a püng usun chopwulap seni fän läng.
34Öüpwe arongafeili ngeni emön me emön usun än Kot manaman. An ling a tinetiw wón Israel, an pöchökkül mi manaman a nóm lón ekkewe läng.
35Kot a fókkun eniuokkus me lón imwan we mi pin. Ewe Koten Israel a fang manaman me pöchökkül ngeni nöün kewe aramas.
Mwareiti Kot!
Köölfel 69
Och tungór mi weinein fäniten alillis lón fansoun osukosuk. Ngeni ewe chón nemeni kööl. Mi fich ngeni ngiingin ewe kööl “Ekkewe Kiop.” Echö köölfel än David.
1Kopwe chimanüei, äi Kot! Pün ewe kóluk epwe le totä tori popun üwei.
2Ngang üwa koketiw lón móchór mi alóllól, esap wor anaie üpwe pwuutiw ie. Ngang üwa nóm lón kóluk mi alóllól, pwupwuun ra pwölüweiló.
3Ngang üwa pekkus ren äi resin le kökkö pwe emön epwe älisiei; a pwasapwasewu me lón chiorei. Mesei ra nennengaw ren äi resin ösüküsükü äi Kot.
4Chókana mi popuchööw le opwutaei ra chómmóng seni meeten mökürei. Ra fókkun chómmóng chókana mi chök popuchööw le opwutaei, chókana mi kütta ar repwe efeiengawaei. Ra eriäniei pwe üpwe eliwinisäfäli meet ngang üsap sooläni.
5Äi Kot, en ka silei äi föfför mi umwes; äi tipis esap mwón senuk.
6Amwo chókana mi apilükülükuk resap itengaw pwokitei, äi Samol, ewe SAMOL mi Unusen Manaman. Amwo chókana mi küttók resap tolong lón säáw pwokitei, äi Koten Israel.
7Pün ngang üwa ötturesiló fän turunufas fänäsengesum, o sääw a pwölüweló wón mesei.
8Ngang üwa usun chök nge emön wasööla meren pwii kana, üwa pwal usun emön chón ekis meren nöün pwisin inelapei we,
9pün pwichikkaren öüchchean ekiekin imwom a küüri leuti, nge ekkewe kapasen esiit än chókana mi esiitók ra turutä wóói.
10Lupwen üwa kechiw o öchüün fän mesen ewe SAMOL, iir ra turunufaseei.
11Lupwen ngang üwa üföüf üüf seni tuuk lón äi letipetä, aramas ra urumwoteei.
12Chókana mi móót leasamalapen tittin ewe leeni ra takiriei, nge ekkewe chón sakaw ra leaweniei lón ar kööl.
13Nge ngang üwa chök iótek ngenuk, äi Kot, lón ewe fansoun mi fich ngenuk; lón óm tong mi lapalaap, äi Kot, kopwe pölüweniei ren enletin óm we alen ngaseló.
14Kopwe chimanüei seni lón ewe móchór, kosap mwüüt ngeniei pwe üpwe kokotiw. Kopwe angasaei seni chókana mi opwut ngang, seni lón ekkewe kóluk mi alóllól.
15Kosap mwüüt ngeni pwupwuun ekkewe kóluk repwe pwölüweiló ika ekkewe kóluk mi alóllól repwe akokaeitiw ika ewe pwangen mäló epwe oromieiló.
16Kopwe pölüweniei, äi SAMOL, seni lón óm tong mi mwirinnö; lón óm kirekiröch mi lapalaap kopwe kul ngeniei.
17Kosap aopaló wón mesom seni noum ei chón angang; kopwe mwittir pölüweniei, pün ngang üwa nóm lón riäfföü.
18Kopwe kaneto rei o chimanüei; kopwe angasaei pwokiten ekkewe chón opwutaei.
19En ka silei usun äi nóm lón turunufas, itengaw me sääw; en ka küna ekkewe chón opwutaei meinisin pün ra nóm mwom.
20Kapasen turunufas a ataatakkisi letipei o üwa nóm lón äi apilükingaw; ngang üwa kütta ika epwe wor epwe tongeei, nge esap wor emön; ngang üwa kütta ika epwe wor chón echipaei, nge esap wor emön üpwe küna.
21Ra uwowlong wölüwöl mi maras lón enei mwöngö o ngeniei finikar pwe üpwe wün fäniten äi kaaka.
22Amwo ewe chepel mi mollotä me mwer epwe wiliti och chünnümei ngeniir; amwo epwe wiliti och köpwüng me och sär ngeniir.
23Amwo meser epwe rocholó pwe resap tongeni repwe küna mweer, pwal amwo sökürür epwe pwór feilfeilló.
24Kopwe niinätiw óm soong wóór; kopwe mwüüt ngeni óm lingeringer epwe toriir.
25Amwo leenier epwe pönnüló; amwo esap chüen wor emön epwe nóm lón imwer kana imw mangaku.
26Pün iir ra eriäfföwü ätewe en ka wiichii o ra kapasen turunufas usun metekin chókana en ka efeiengawer.
27Kopwe aloppätä liwinin tipisir; kosap mwüüt ngeniir pwe repwe ngaseló.
28Amwo epwe töttöluwu iter me lón ewe pwuken manaw, ämwo esap nóm iter lón tettelin iten ekkewe chón pwüng.
29Ngang üwa nóm lón äi metek me riäfföü. Amwo kopwe chimanüei, äi Kot, ren óm alen ngaseló.
30Ngang üpwe mwareiti iten Kot lón äi kööl o enlingaló i ren äi kilisou ngeni.
31Ei epwe apwaapwai ewe SAMOL lap seni äi üpwe asór ngeni i emön kowu, lap seni äi üpwe asór ngeni i emön ätemwänin kowu fiti mächään me pachapachan.
32Ekkewe mi wöwingaw repwe küna ei o repwe pwapwa. Ämwo ämi ekkewe mi kütta Kot öüpwe manaw lón pwapwa.
33Pün ewe SAMOL a rong än ekkewe mi osupwang siö o i esap opwut nöün kewe aramas mi ooló lón föötek.
34Läng me fönüfan repwe mwareiti i, pwal ekkewe mataw me meinisin minne mi mwökütüküt me lóór,
35pün Kot a angasa Zion o öüwsäfälietä ekkewe telinimwen Judah. Mwirin, nöün kewe aramas repwe nónnóm ikenan o fönüeni ewe fönü;
36nöün noun kewe chón angang repwe älemwiri ewe fönü, o chókana mi echeni itan repwe nónnóm ikenan.
Köölfel 70
Iótek fäniten ngaseló seni chón pölüweni kich. Ngeni ewe chón nemeni kööl. Echö Köölfel än David fäniten ächechchem.
1Kopwe käito, äi Kot, pwe kopwe angasaei; kopwe mwittir feitto, äi SAMOL, pwe kopwe älisiei.
2Amwo chókana mi kütta ar repwe angei manawei repwe tolong lón sääw me fitikoko; amo meinisin mi mochen pwe üpwe feiengaw repwe kulsäfäl lón ar itengaw.
3Amwo chókana mi apasa ngeniei, “Aha! Aha! Sia liäpeni i iei!” repwe kulsäfál pwokiten ar sääw
4Nge amwo meinisin mi küttók repwe meseik o pwapwa reemw; amwo chókana mi öüchcheani óm we alen ngaseló repwe apasa iteiten fansoun, “Kot a tekia!”
5Nge ngang mi wöwingaw o osupwang; kopwe mwittir feitto reei, äi Kot. En chök äi chón älillis me chón angasaei; äi SAMOL, kosap mang.
Köölfel 71
Kot ewe achawen ngaseló.
1Lón en, äi SAMOL, ngang üwa äänuk leenien op; kosap mwüüt ngeniei pwe üpwe itengaw.
2Lón óm pwüng, kopwe chimanüei o angasaei; kopwe kullueto selingom ngeniei o amanawaei.
3En äi achawen op ia ngang üwa tongeni feilló ie fansoun meinisin; kopwe atoowu óm öllük pwe kopwe angasaei, pün en äi achaw me äi leenien op mi pöchökkül lón maun.
4Kopwe angasaei, en äi Kot, seni lepöün ekkewe aramasingaw, kopwe angasaei seni än ekkewe mwän mi ngaw o mwänesol kömwöchuló wóói.
5Pün en ka fen äi apilükülük, äi Samol, en chök üwa lükülükuk seni lekükküni, äi SAMOL.
6Seni chök mwen äi upwutiw, ngang üwa ünnenuk, en ewe ka angeei seni lón än inei leenien monukól. Iei popun ngang üpwe chök sópweeló le mwareituk.
7Ngang üwa wiliti usun och esissil mi eniwokkus ngeni chómmóng aramas, nge en äi leenien op mi pöchökkül.
8Awei a ur ren an mwareituk, epwe arongafeili usun óm ling lón unusen längattamen ew rän.
9Kosap pöütieiló lupwen üwa chinlap; kosap likitieiló lupwen äi pöchökkül a ló seniei.
10Pün ekkewe chón opwutaei ra kapas mi ngaw usi; chókana mi chök witiwit pwe repwe niiei ra akkóót fengen lemwónómwón.
11Iir ra apasa, “Kot a likitaló i. Sipwe tapweri i o turufi, pün esap wor emön epwe chimanüw.”
12Nge äi Kot, kosap toowaw seniei; kopwe mwittir feitto, en äi Kot, pwe kopwe älisiei.
13Amwo ekkewe chón eitengawaei repwe rosoló lón ar sääw; amwo chókana mi mochen pwe repwe efeiengawaei repwe küna turunufas me itengaw.
14Nge ren ngang, mi chök wor äi apilükülüköch fansoun meinisin; ngang üpwe akkalapaló chök äi mwareituk.
15Awei epwe aporausa usun óm pwüng, epwe pwal aporausa usun óm we alen ngaseló lón unusen langattamen ew rän, pün ngang üsap tongeni älleani öüküükün minne en ka föri fänitei.
16Ngang üpwe feitto o arongafeili óm kewe föfför mi manaman, Samol KOT; ngang üpwe ächchema ngeniir usun óm pwüng, óm chök.
17Seni chök lekükküni, äi Kot, en ka äöüei, iwe, tori ei rän ngang mi chüen aporausafeili óm kewe föfför mi amwaraar.
18Lupwen mwo ngang üpwe chinlapeló o meeten mökürei repwe pwecheló, kosap likitieiló, äi Kot, tori ngang üpwe arongafeili óm manaman ngeni pwal ewe ew pilóón aramas epwe tapweto, üpwe arongafeili óm manaman ngeni meinisin ekkewe repwe pwal feitto me mwirin.
19Öm pwüng a tori ekkewe läng mi tekia, äi Kot, en ka föri ekkewe mettóch mi lapalaap. Äi Kot, iö a wewe ngenuk?
20Ika mwo en ka föri pwe üpwe küna chómmóng riäfföü mi maras, nge en kopwe pwal öpöchökküla säfäli manawei; kopwe uwei säfälieitä seni ewe pwaang mi alóllól leutun fönüfan.
21En kopwe alapaló äi iteüöch o echipa säfäli letipei.
22Ngang üpwe mwareituk fän tikin ewe pisekin likettik itan harp pwokiten óm ölükülük ngeni óm kewe pwon, en äi Kot. Ngang üpwe köölün mwareituk fiti tikin ewe pisekin likettik itan layer, en ewe Emön mi Pin lón Israel.
23Tinnawei repwe mweireiren pwapwa lupwen ngang üpwe köölün mwareituk, ngang ewe en ka angasaei.
24Chönnawei epwe aporausa óm kewe föfför mi pwüng lón unusen langattamen ew rän, pün chókewe mi mochen repwe efeiengawaei ra fen tolong lón säáw me fitikoko.
Köölfel 72
Än ewe Messiah ling me nemenem wón unusen fönüfan. Echö Köölfel än Solomon.
1Kopwe fang óm pwüngüöch ngeni ewe king, äi Kot, kopwe fang óm pwüng ngeni ewe nöün king.
2Amwo i epwe öpwüngü noum kewe aramas lón pwüng, epwe pwal öpwüngü noum kewe mi riäfföü fän pwüngüöch.
3Amwo ekkewe chuuk repwe aworato feiöch ngeni ekkewe aramas, nge ekkewe chukutekisón repwe aworato uwään pwüng.
4Amwo i epwe peni ekkewe mi riäfföü me leiin aramas o angasa nöün ekkewe mi osupwang; amwo i epwe ataatakkisi ekkewe chón eriäfföür.
5Amwo i epwe manaw usun chök üküükün langattamen fansoun än ewe akkar nóm, usun chök üküükün langattamen fansoun än ewe maram nóm fän läng, lón unusen ekkewe pilóón aramas meinisin.
6Amwo an nemenem epwe usun üten leres mi pwüngütiw wón ew tännipi mi otoot; epwe usun püngün üüt mi atüütüw fönüfan.
7Lón fansoun an nemenem, amwo ekkewe chón pwüng repwe feffeitä; epwe wor feiöch me kinamwe epwe lapaló tori ewe maram esap chüen nóm.
8Amwo i epwe nemenem seni mataw tori mataw, pwal seni ewe Chaanpwupwu Eufreitis tori le ömwüchchün fönüfan.
9Amwo ekkewe einangen aramas lón ewe fönüpöön repwe chappetiw me mwan o chón opwutan kana repwe chönnawei ewe pwül mworomwor.
10Amwo ekkewe kingen Tarshis me ekkewe fönü mi nóm lemataw repwe uwato ar takises ngeni i. Amwo ekkewe kingen Sheba me Seba repwe uwato ar liffang ngeni i.
11Amwo ekkewe king meinisin repwe chappetiw ngeni i o chón ekkewe mwüü meinisin repwe angang ngeni i.
12Pün i epwe angasa ekkewe mi osupwang ra siö ngeni, epwe pwal angasa ekkewe mi riäfföü esap wor emön mi älisiir.
13I epwe müüti ekkewe mi apwangapwang me ekkewe mi osupwang o i epwe angasa ekkewe mi osupwang seni mäló.
14I epwe chimanü iir seni ewe angangen eriäfföü me angangen mwänesol mi fis ngeniir, pün chaar a öüchchea me fän mesan.
15Amwo ewe king epwe manawattam! Amwo aramas repwe liffang ngeni i kolt seni Sheba. Amwo aramas repwe iótek fänitan o efeiöchü i lón unusen langattamen ew me ew rän.
16Amwo föün wiit epwe chómmóng leemelen ewe fönü, repwe mwo nge määr wón ungen ekkewe chukutekisón. Amwo uwään ekkewe irä repwe uwaöch usun irän lón Lebanon o repwe pwükütä usun chök ekkewe fetilin lón ekkewe mälämäl.
17Amwo itan epwe nónnómóló fansoun meinisin; amwo epwe sópwósópwóló le manaw usun chök üküükün langattamen fansoun än ewe akkar nóm. Mwirin, chón ekkewe mwüü meinisin repwe feiöch me ren; iwe, repwe köri ngeni pwe i emön mi feiöch.
18Sipwe mwareiti ewe SAMOL Kot, ewe Koten Israel, pün i echök a föri ekkewe föfför mi amwaraar.
19Sipwe mwareiti itan mi ling tori feilfeilló chök; amwo unusen fönüfan epwe ureló ren lingan. Amen pwal Amen!
20(A iei sópwólón ekkewe iótek än David nöün Jesse we mwän.)
PWUK 3
Köölfel 73- 89
Köölfel 73
Feiengawen föfföringaw nge feiöchün anómwu apilükülük lón Kot. Echö köölfel än Asaf.
1Enlet Kot a fókkun mwirinnö ngeni Israel, ngeni chókana mi limöch letiper.
2Nge ren ngang, pecheei ra arapakkan chök repwe mit; arap ngeni chök üwa sótun faaseló.
3Pün ngang üwa lólówóiti ekkewe chón lamalamtekia lupwen üwa küna nónnómöchün kinamwein ekkewe aramasingaw.
4Esap wor ar osukosuk; inisir a öümanaw o pöchökkül.
5Ra ngas seni kana sókkun chourek mi kan soun fiffis ngeni aramas; esap pwal toriir ekkana määlap mi üri aramas.
6Iei minne, lamalamtekia a usun chök epa mwärämwär fän üwer; ra pwisin öüföüfa ngeniir föfförün mwänesol pün a usun chök nge fouter.
7Ekiek mi ngaw a toowu seni lón letiper mi föüló; esap wor öükükün meet mi ngaw ra ekiekietä lón ar ekiek.
8Iir ra turunufas o ääni kapas mi fiti koum; lón sikesiken ar resap sile menin, ra eniwokkusu aramas pwe repwe eriäfföür.
9Awer kana ra kapasen üüngeni läng, nge kapasen chönnawer ra fätäl feil wón fönüfan fän lamalamtekia.
10Iei minne, nöüür kewe aramas ra nuokkus o rukoruk, usun chök nge ra ünümaló ar kana kapas meinisin nge resap ekieki, usun chök än emön ünümi kóluk.
11Ra apasa, “Epwe ifa usun än Kot epwe tongeni silei meet mi fis? Ifa usun, mi wor än ewe mi Unusen Tekia silelap?”
12Iei usun lapalapen ekkewe aramasingaw. Resap öüreki och, nge ra chök pisekisekiló.
13Enlet a lamwotmwäl äi tümwünü pwe epwe limöch lelukei; a lamwotmwäl äi tölü peii pwe üsap föri och tipis.
14Pün lón unusen langattamen rän me rän, ngang üwa chök nóm lón osukosuk. Iteiten lesossor ngang üwa köpwüng.
15Are ngang üwa apasa, “Ieen meet ngang üpwe apasa,” iwe, ngang üpwe le emön chón afangamäi noum kewe aramas.
16Lupwen ngang üwa sótuni pwe üpwe weweiti ika pwata ekkewe aramasingaw ra feffeitä, a weires ngeniei,
17tori lón ew ränin, ngang üwa feilló lón imwom we mi pin, äi Kot; mwirin, ngang üwa weweiti usun minne mi fen mollotä ngeni sópwólón ekkewe aramasingaw.
18Enlet, en ka anómwur wón ew leeni mi emitimit; en ka otururetiw leepökün achaw pwe repwe taatakkis.
19A ifa me mwittirin ar ra rosoló; ra unusen móroppöküló ren nuokkus chapwur.
20Iir ra wewe ngeni än emön tan a möllüküló lupwen a pwök; iwe, epwe ina chök usun lupwen en kopwe üütä, äi Samol, en kopwe föri pwe repwe móróló usun chök och onottan.
21Lupwen letipei a chourek o ngüni a maras,
22ngang üsap chüen memmef o üwa tiparoch; ngang üwa wewe ngeni emön maan esap miriit me mwom.
23Nge ngang üwa nóm reemw fansoun meinisin; en ka kömwöch pöümwäni.
24En ka mwenäniei fän óm öüröür; iwe, me mwirin en ka emmwenieiló ngeni ew sópwólón mi ling.
25Iö me lón läng ngang üpwe chiechi ngeni nge en chök? Esap wor och me wón fönüfan ngang üwa pwapwaiti me lükun chök en.
26Inisi me lelukei ra tongeni apwangapwangeló, nge Kot chök i pöchökkülen letipei me ineti tori feilfeilló chök.
27Chókana mi toowaw senuk repwe feiengaw. En kopwe arosaló meinisin chókewe resap ölükülük ngenuk.
28Nge ngang mereei, a mwirinnö pwe üpwe arap ngeni Kot. Ngang üwa filätä ewe Samol KOT pwe i äi leenien op. Ngang üpwe aporausa usun óm kewe föfför mi amwaraar meinisin.
Köölfel 74
Ew tungór fäniten ngaseló seni ekkewe chón eriäfföü. Echö maskil än Asaf.
1O Kot, pwata ka pöütikeemiló? Pwata ötüötün óm soong a ötüiti ekkewe siip mi nóm lón óm we mälämäl ia ra mwöngö fetil ie?
2Kopwe chechchemeni ewe mwüü en ka mööni me lóóm lóóm, ekkewe aramas en ka angaser pwe repwe noum aramas mi öüchchea. Kopwe chechchemeni ewe chuuk Zion, ikeweia en ka nóm ie.
3Kopwe fätäleló leemelen ewe telinimw o nengeni ei wätten taatakkis; unusen ei taatakkis ewe chón opwut a föri ngeni ewe imw mi pin.
4Ekkewe chón pölüwenuk ra wörüwör me lón ewe leeni ia en ke kan chuuri keem me ie; iir ra öürätä ar kana filaik pwe esissilen ar wiil.
5Iir ra wewe ngeni ekkana chón pöküpök irä ra kömwöch nöür kouk pwe repwe pöküpök leiin epinük irä mi chómmóng.
6Iir ra pökükkisietiw ren nöür kewe kouk me falafal meinisin ekkewe etippen lón mi enling.
7Iir ra kenaló imwom we mi pin o oturätiw leppwül; iir ra unusen elimengawa ewe leeni ia Itom mi pin a nóm ie.
8Iir ra apasalong lón letiper, “Sipwe unusen ataeló mettóch meinisin!” Iei minne, iir ra kenaló iteiten ekkewe leeni iä aramas ra fel ngeni Kot me ie me lón ewe fönü.
9Esap chüen wor esissil mi manaman epwe fis ngeni keem seni Kot; esap pwal chüen wor soufós, nge esap wor emön me leiim a silei ika epwe ifa langattamen fansoun än ei lapalap epwe fis.
10Epwe ifa langattamen fansoun än ekkewe chón opwut repwe turunufasek, äi Kot? Ifa usun, ekkewe chón pölüwenuk repwe kapasen urumwotei itom feilfeilló chök?
11Pwata ka ömwöchüsäfäli pöüifichum mi pöchökkül? Kopwe uwawu kumwuchum seni lón numun üfom na o arosereló!
12Nge en, äi Kot, en äi King seni chök lóóm; en ka uwato ewe alen ngaseló wón fönüfan.
13En ewe ka kinifeseni ewe mataw ren óm manaman; en ka ömökkü ekkewe möküren ewe mönün lemataw mi eniweniw.
14En ewe ka ataatakkisi ekkewe möküren ewe maan mi eniweniw itan Leviathan o ka ngeni ekkewe mönün lón fönüpöön pwe repwe ocheei.
15En ewe ka suukaló ekkewe miror me ekkewe pwuupwu; ka pwal appwasätä ekkewe chaanpwuupwu mi chök soun pwuupwu fóchófóch.
16Noum rän, pwal noum pwiin; en ka anómwü akkar me maram lón leenier.
17En ewe ka föri ekkewe kinikinin kiään fönüfan meinisin; en ka föri ewe fansoun pwichikkar me ewe fansoun patapat.
18Kopwe chechchemeni usun än ekkewe chón opwutók turunufasek, äi SAMOL, usun än ekkewe aramas mi umwes ra kapasen urumwotei itom.
19Kosap mwüüt ngeni ekkeei maanmwacho pwe repwe niieló noum kewe mwurö; kosap möllükaló manawen noum kewe aramas mi nóm lón riäfföü feilfeilló chök.
20Kopwe ekieki óm we pwon, pwokiten ekkewe leeni mi kiroch me lón ewe fönü ra ur ren föfförun mwänesol.
21Kosap mwüüt ngeni ekkewe mi riäfföü repwe chök nónnóm lón ar itengaw; amwo ekkewe mi mweleele me osupwang repwe mwareiti itom.
22Kopwe üütä, O Kot, o pwisin penätä óm akkóót; kopwe chechchemeni usun än ekkewe chón umwes turunufasek lón unusen langattamen rän me rän.
23Kosap ömölüngaweló seni ekkeei mettóch ekkewe chón opwutók ra apasa; än ekkewe chón opwutok ökürang mi chök sópwósópwóló le fiffis.
Köölfel 75
Kilisou ren an Kot pwüngün köpwüng mi pwüng Ngeni ewe chón nemeni kööl. Usun ngiingin ewe kööl “Kosap Ataeló.” Echö köölfel än Asaf. Echök kööl.
1Äm äia kilisou ngenuk, O Kot, äm äia kilisou ngenuk, pün itom a arap. Ekis meinisin, ekkewe aramas ra aporausa usun óm kewe manaman mi amwaraar.
2En ka apasa, “Ngang üpwe pwisin filätä ew fansoun, pwe ngang üpwe ääni köpwüng wenechchar ngeni ekkewe aramasingaw.
3Lupwen fönüfan me aramasen wón meinisin ra chechchech, ngang ewe emön mi ömwöchünüküw lóngólóngun kewe. Selah
4Ngang üwa apasa ngeni ekkewe mi sikesik, ‘Öüpwe ükütiw le eingeing.’ Ngang üwa üreni ekkewe aramasingaw, ‘Öüsap lamalamtekia.
5Öüsap lamalamtekia le üüngeni läng. Öüsap kapas fän ämi üleförea.’ ”
6Pün esap wor emön wón fönüfan, seni öötiw ika seni lotow ika seni ewe fönüpöön ra tongeni pwisin etekiaretä.
7Nge i Kot chök ewe mi ääni köpwüng. I a filätä ika iö epwe asapwaliätiw ika iö i epwe seikätä.
8Lón pöün ewe SAMOL a wor ew kap mi ur ren wain mi pwuropwur o nofit fengen me nofitin kana. I a wiisen niinawu ewe wain lón köpwüng, nge meinisin ekkewe aramasingaw wón fönüfan repwe ünümi tori ewe ömwüchülón sooson.
9Nge ren ngang, ngang üpwe esilefeili meet Kot a föri fansoun meinisin; ngang üpwe köölün mwareiti ewe Kot än Jakob,
10mi apasa, “Ngang üpwe etekisónätiw ekkewe aramasingaw meinisin, usun chök nge itä üpwe pöküweló mächäär, nge ngang üpwe alapaló pöchökkülen ekkewe chón pwüng, usun chök nge üpwe etekiatä mächäär.”
Köölfel 76
Lingen Kot lón an ääni köpwüng. Ngeni ewe chón nemeni kööl. Echö kööl mi fiti pisekin likettik mi wor säitelin. Echö köölfel än Asaf. Echö kööl.
1Kot a iteföüló me lón Judah; itan a tekia me lón Israel.
2Imwan imw mangaku a nóm lón Salem, leenian a nóm lón Zion.
3Me ikenan i a kupii nöün ewe chón opwut föün esefich mi meriweriw, a pwal atai ekkewe pisekin eppet lón maun me ekkewe ketilas me ekkewe pisekin maun än ekkewe chón üüngeni.
4En ka molupolup ren saram, ka echchipwör lap seni ekkewe chuuk mi ur ren maan mwacho.
5Ekkewe mwän mi pwora me leiin ekkewe chón opwuta kich ra turuló o a ooló senir pisekir, ra kóónóló me mwach lón ar möürün mäló; esap emön me leiin ekkewe chón maun a tongeni epwe angatä pwe epwe pölüweni kich.
6En än Jakob we Kot, lupwen ka öpwüngür, waar kewe óris me wóóken ra chök köüló.
7En chök a lapalaap nuokkusum! Iö a tongeni üütä me mwom lupwen ka soong?
8En ka atoowu pwüngün köpwüng seni läng wón chón opwutom kana; iwe, fönüfan a chechchech o a fanafanaló me mwom,
9lupwen en, äi Kot, ka üütä pwe kopwe ääni köpwüng, pwe kopwe amanawa meinisin ekkewe chón riäfföü me lón fönü. Selah
10Enlet, än aramas soong a chök alapaló óm ling, pün en ka aea än aramas soong usun efóch ketilasen köpwüng.
11Öüpwe ääni ämi kewe pwon ngeni ewe SAMOL ämi we Kot o öpwönüretä. Meinisin chón ekkewe fönü mi nóm ünükkümi repwe uwato ar takises ngeni ewe Emön mi Eniwokkus.
12Pün i epwe esiita le okkufu ekkewe samol mi üüngeni i, nge ekkewe kingen fönüfan repwe nuokkusiti i.
Köölfel 77
Ewe chip a pop seni ach chemeni än Kot kewe föfförün angasa aramas. Ngeni ewe chón nemeni kööl. Ngeni Jeduthun. Echö köölfel än Asaf.
1Ngang üwa siö ngeni Kot pwe epwe älisiei; ngang üwa siö ngeni Kot pwe
epwe rongorong ngeniei.
2Lupwen ngang üwa nóm lón riäfföü mi alóllóól, üwa kütta ewe Samol; lón unusen pwiin ngang üwa iótek o eitietä peii ngeni läng. Ngüni esap mochen epwe chipiló.
3Lupwen ngang üwa chechchemenuk Kot, ngang üwa ngüüngü. Lupwen ngang üwa ekilolei usun óm älillis, ngüni a apwangwangeló. Selah
4En ka ömwöchätä öppwönün mesei pwe repwe chök suukuló. Ngang üwa fókkun riäfföü pwe üsap tongeni kapas.
5Ngang üwa ekieki usun ekkewe fansoun lóóm, ekkewe ierin lóóm.
6Üwa chechchemeni äi kööl lepwin; letipei a ekieki usun o ngüni a kapas eiis:
7“Ifa usun, ewe Samol a pöütieiló tori feilfeilló chök? Ifa usun, esap chüen pwääri säfäli ngeniei an kirekiröch?
8Ifa usun, an tong enlet a ükütiw tori feilfeilló chök? Ifa usun, an kewe pwon resap chüen fis tori feilfeilló chök?
9Ifa usun, Kot a möllükaló an epwe ääni ümöümöch? Ifa usun, an soong a esipaló asamen an tong? Selah
10Mwirin, ngang üwa ekieki, “Iei meet ngang üpwe ääni tungór lón äi iótek. Ngang üpwe tungór fäniten minne pöümwänin ewe mi Unusen Tekia a föri lón ekkewe ierin lóóm.
11Ngang üpwe chechchemeni än ewe SAMOL kewe föfför; ewer, ngang üpwe chechchemeni óm kewe föfför mi amwaraar ka föri me lóóm.
12Ngang üpwe anómwu lón lelukei óm kewe angang meinisin o leechüüni óm kewe föfför mi manaman meinisin.”
13Óm kewe aal, äi Kot, ra pin. Menni kot epwe lapalaap usun ach ei Kot?
14En ewe Kot ka föri ekkewe manaman; en ka pwääräló óm manaman me leiin aramasen ekkewe mwüü.
15Ren poum mi manaman, en ka angasa noum kewe aramas, iir ekkewe mwirimwirin Jakob me Josef. Selah
16Ekkewe kóluk ra künók, äi Kot, ekkewe kóluk ra künók o ra öütöüt; pwal fänilólen ewe mataw a pwöüküük.
17Ekkewe kuchu ra niinätiw üüt, ekkewe chopulap ra püng me fän läng. Noum kewe föün esefich ikkana kewe inefi ra fiiló ekis meinisin.
18Noum we chopulap a püng seni lón ewe ewiniär, noum we inefi a asarama fönüfan. Fönüfan a pwöüküük o chechchech.
19Alom we a pwereló lón ewe mataw, ölükóóm we a pwereló lón ekkewe kóluk mi lapalaap, efóch aal esap wor emön a silei pwe mi nóm ikenan.
20En ka emmweni noum kewe aramas usun chök epwi pwiin siip fän tümwünüen pöün Moses me Aaron.
Köölfel 78
Än Kot kirekiröch ngeni ekkewe chón Israel mi üleförea. Echö än Asaf maskil.
1Ämi neii aramas, öüpwe rongorong ngeni äi käit, öüpwe öüseling ngeni kapasen awei.
2Ngang üpwe suuki awei o kapas lón kapas mi mwönünnür; ngang üpwe apasaawu ekkewe mettóch mi mwónómwón, ekkewe mettóch seni chök lóóm,
3minne sia fen rong me silei, minne ach kewe leewo ra fen aporausa ngeni kich.
4Öükich sisap aoper seni mwirimwirir kana; kich sipwe aporausa ngeni ewe pilóón aramas me mwirin usun än ewe SAMOL kewe föfför mi fich ngeni ach sipwe mwareitir, usun an manaman me ekkewe mettóch mi amwaraar i a föri.
5I a atoowu an kewe osomän fäniten Jakob, a öpwönüetä an öllük lón Israel i a öllük ngeni ach kewe leewo pwe repwe äiti ngeni nöür kana,
6pwe ewe pwal ew pilóón aramas me mwirin repwe silei ekkewe öllük, ikkeiir ekkewe semiriit resap mwo upwutiw, pwe pwal iir repwe aporausa ngeni nour kana.
7Mwirin, repwe anómwu ar apilükülük lón Kot o resap möllükaló an kewe föfför nge repwe kömwöchünnük wón an kewe öllük.
8Iir resap wewe ngeni ar kewe leewo, iir ew pilóón aramas mi lükümmach me tipeförea, letiper esap tipeppós wón Kot, ngünür esap pwal ölükülük ngeni.
9Inamwo are ekkewe re Efraim ra mollotä fän nöür föün esefich, nge repwe chök süsäfäl lón fansoun maun;
10pün resap öpwönüetä än Kot pwon o resap mochen pwe manawer epwe fiti pwüngün an öllük.
11Iir ra möllükaló meet i a föri, ekkewe föfför mi amwaraar i a pwääri ngeniir.
12I a föri ekkewe manaman me mwen mesen ar kewe leewo me lón ewe fönü Egypt lón ewe kinikinin Zoan.
13I a kinifeseni ewe mataw o emmwenireló lón; i a föri pwe ewe kóluk epwe chök üütäló usun ew etiip.
14I a emmweniir lerän ren ew kuchu nge unusen lepwin a emmweniir ren saramen och ekkei.
15I a tileni feseni ekkewe achaw me lón ewe fönüpöön o öünü ngeniir kóluk mi usun chök lömmóngün ekkewe mataw;
16i a opwuupwuowu kóluk seni lepökün ew achaw o föri pwe kóluk epwe pwuupwutiw usun chök kana chaanpwuupwu.
17Nge iir ra chök sópweló le tipis ngeni i, ra üleförea le üüngeni ewe mi Unusen Tekia.
18Iir ra fiseetä seni lón letiper pwe repwe sótüni Kot ren ar öpöchööüreló pwe repwe mwöngö ekkewe mwöngö ra mwóneiti.
19Iir ra kapasen üüngeni Kot o apasa, “Ifa usun, Kot a tongeni epwe amollätä ew cheepelin mwöngö lón ei fönüpöön?
20I a wichii ewe achaw, iwe kóluk a toowu o ekkewe chönüpwuupwu ra säsewu. Nge ifa usun, i a pwal tongeni ngeni kich anach mwöngö? I a tongeni epwe awora fituk fäniten ochään nöün kewe aramas?”
21Iei minne, lupwen ewe SAMOL a rongorong ar kapas, i a fókkun uren soong. Ekkein an soong a keni Jakob, an soong a küpetitä ngeni Israel,
22pwokiten iir resap lükü lón Kot, resap pwal anómwu ar apilükülük wón pwe i epwe angaser.
23Iwe, nge a öllük ngeni fäileng kana o a suukaló asamen ekkewe läng;
24iwe i a öpwüngätiw manna fäniten ekkewe aramas pwe repwe mwöngö, i a ngeniir ewe pilawa seni läng.
25Aramas ra mwöngö enen ekkewe chón läng pilawa; i a tiinato reer ekkewe mwöngö meinisin ra tongeni repwe mwöngö.
26I a esechchaló ewe äsäpwäälin öötiw seni läng, o ren an manaman a pöönätä ewe äsäpwäälin öör.
27I a öpwüngätiw fituk wón ekkewe aramas a usun chök pwül mworomwor, ikkeiir ekkewe maansüüsü mi äkkäs ra usun chök chómmóngun föün pien asorsset.
28I a föri pwe ekkewe maansüüsü repwe ässito lón leenier we ewe ia ra köütä imwer imw mangaku ie. Iwe, ra sootiw pwellin ünükkün imwer kewe imw mangaku meinisin.
29Ekkewe aramas ra mwöngö tori a fókkun luuló seni öükükün ar mót, pün i a ngeniir meet ra ngeriti.
30Nge me mwen ar repwe säpe seni ekkewe mwöngö ra ngeiriti, wesewesen lupwen ewe mwöngö a chök chüen nóm lón awer,
31än Kot soong a küpetita ngeniir. Iwe, i a niieló ekkewe mi pöchökkül me leiir o awataló ekkewe ölüwölün Israel.
32Iwe, inamwo an a fis ekkeei meinisin, nge ekkewe aramas ra chök sópweló le tipis. Inamwo are ra küna än Kot kewe manaman, nge resap lükü.
33Ina minne, Kot a asópwaló ränin manawer lón an esap wor lamwotan nge lón ierin manawer ra chök nóm lón nuokkus wätte.
34Iteiten fansoun lupwen Kot a nii ekkóch leiir; ekkewe lussun ra kütta i. Ra ekieksäfäl o kul ngeni Kot.
35Ra chechchemeni pwe Kot i ar we Achaw, ewe Kot mi Unusen Tekia i ar we Chón Sele.
36Nge mwirin, ra chök tunommis ngeni Kot ren awer, ra kapas chofona ngeni i ren chönnawer,
37nge letiper esap wenechchar ngeni i o resap likiitü wón an we pwon.
38Nge Kot a uren kirekiröch; i a omwusaló tipisin ar kewe föfför mi ngaw nge esap arosereló. Chómmóng fansoun i a ömwöchü an soong, esap pwal küpetätä unusen an lingeringer.
39I a chechchemeni pwe iir aramas echök, ra usun chök enienin äsäpwääl mi enito nge esap liwinsäfäl.
40Fän chómmóng, iir ra üleförea le üüngeni Kot me lón ewe fönüpöön o ra ochchouu i me lón ewe fönüpwas!
41Iir ra enliwini fän chómmóng ar sótuni än Kot mósónóttam; iir ra asoonga ewe Emön mi Pin lón Israel.
42Iir ra möllükaló usun an manaman me usun an angaserewu seni ekkewe chón opwuter mi eriäfföür,
43iir ra möllükaló ewe rän i a pwääraló an kewe esissil me lón Egypt, an kewe föfför mi amwaraar me lón ewe maasiesin Zoan.
44Pün i a ewili ar kewe chaanpwuupwu ngeni chcha; iwe, esap wor emön a tongeni wün seni ar kewe chönüpwuupwu.
45I a tiinato pwiin lóóng pwe repwe küüw ekkewe aramas, a pwal tiinato käirü pwe repwe kiterei fönüer we.
46I a amwöngöni ngeni ekkewe muun üwän fótar irä, a pwal ngeni ekkewe liffichimas pwe repwe enaló uwän ar tännipi.
47I a ateló fótar kewe irän wain ren üüten faaw, pwal ar kewe irä itan sikamwor ren ais.
48I a niieló nöür kewe pwiin kowu ren üüten faaw, pwal nöür kewe pwiin siip ren fiifin inefi.
49I a epichaló fööfön an soong mi pwich, an lingeringer, an chow. I a tiinato ew mwiichen chón läng mi efeiengaw pwe repwe efeiengawer.
50I a äsepa an soong ngeniir. I esap ächchika manawen ekkewe chón Egypt, nge a niireló ren ewe mätter.
51I a niieló meinisin ekkewe mwännichi me lón ew me ew än chón Egypt famili, ekkewe mweinöü mwän me lón imwen Ham imw mangaku.
52Nge i a emmwenawu nöün kewe aramas usun epwi pwiin siip; i a emmweniir usun epwi pwiin siip me lón ewe fönüpöön.
53I a mwenäniir fän kinamwe, iei popun resap nuokkus, nge ewe mataw a amwopwu chón opwuter kewe.
54Iei usun an a emmwenireló ngeni kiänin fönüan we mi pin, ngeni ewe leeni mi chukuchukutä pwisin pöümwänin a liäpeni.
55I a tapweewu chón ekkewe mwüü me mweer o a eineti fönüer kewe ngeni nöün kewe aramas pwe fönüer. I a ewilipósaló ekkewe einangen Israel lón leenier kewe.
56Nge iir ra sótuni Kot o üleförea le üüngeni ewe mi Unusen Tekia; iir resap öpwönüetä an kewe öllük.
57Iir ra usun chök ar kewe leewo pün ra kirikiringaw o lükülükümang, esap wor emön a lükülükur pün ra usun chök eföw föün esefich mi pwór.
58Iir ra asoonga Kot ren ar fel ngeni pwal ekkóch kot wón ekkewe leeni mi tekia, ra enlingeringerietä i ren ar kewe uluulun önümwäl.
59Lupwen Kot a rongorong ar kapas, a fókkun soong o a wesewesen pöütaló Israel.
60I a likitaló an we imwen fel mi för seni mangaku mi nóm Shilo, iei ewe imw mangaku i a öüüwetä pwe i epwe nónnóm leiin ekkewe aramas.
61I a mwüütätä pwe ewe Pwórofel, iei esissilen an manaman, epwe ooló. I a mwüütätä pwe ewe esissilen an ling epwe oolong lepöün chón opwuter.
62I a esechchaló nöün kewe aramas pwe repwe mäló ren ketilas, pün i a fókkun soong ren nöün kewe aramas iir chókewe i a filiiretä pwe repwe älemwiri.
63Ekkei a kenaló nöür kewe ölüwöl, o esap chüen wor köölün öpwüpwülü fäniten nöür kewe föpwül pün esap chüen wor iö repwe pwülüweni;
64nöüür kewe souasór ra ninniiló ren ketilas, iwe, ekkewe fefin mi mä senir pwülüwer resap chüen kofichin kechiw ren wätten ar riäfföü.
65Mwirin, ewe Samol a pwök usun itä nge seni an möür, usun emön sounfiu mi pwora a mwäneketä ren an wün wain.
66I a cheeisäfälieló chón opwutan kewe o a atolonger lón sääw ese mwüch.
67Mwirin, Kot a pöütaló ekkewe mwirimwirin Josef, i esap pwal filätä ewe einangen Efraim;
68nge i a filätä ewe einangen Judah, ewe chuuk Zion, ewe leeni i a echeni.
69I a öüüwetä imwan we mi pin, a tekia usun chök ekkewe läng mi tekia, a nüküchchar o nónnómoffóch usun chök fönüfan i a föri.
70I a filätä David nöün we chón angang o a angei i seni ekkewe leenien siip;
71seni an tümwünü ekkewe siip o emmwenato i pwe epwe chón masen nöün kewe aramas, ekkewe mwirimwirin Jakob, iir ekkewe chón Israel i a filiiretä pwe iir nöün aramas repwe älemwiri.
72Iwe, David a fóólenätä ekkewe aramas fän wenechcharen letipan; a emmweniir ren pöün kana mi sipeöch.
Köölfel 79
Echö köölün ächechchemen mi mäló me ew iótek fäniten Israel mi taaló ren chón opwutan kana. Echö köölfel än Asaf.
1O Kot, chón ekkewe mwüü ra tööki ewe fönü en ka filätä pwe fönüom; iir ra elimengawa le atai pinin imwom we mi pin.
2Iir ra ngeni ekkewe maansüüsün fän läng pwe repwe ochei soomän noum kewe chón angang, ra aochocha ngeni ekkewe maan mwachon fönüfan fituken noum kewe chón pin.
3Iir ra niinätiw chcha pwellin unusen Jerusalem a usun chök nge kólik, nge esap wor emön lussun epwe peiaseni ekkewe mi mäló.
4Äm äia uren takir meren chón aruum kana, äm äia pwal uren turunufas me itengaw meren chókana mi nóm ünükküüm.
5Epwe ifa langattamen fansoun óm kopwe soong ngeni keem, äi SAMOL? Ifa usun, kopwe soong tori feilfeilló chök? Epwe ifa langattamen óm lingeringer epwe kü usun ekkei?
6Kopwe niinätiw óm lingeringer wón chón ekkewe mwüü resap mochen pwe repwe esillók, wón ekkewe mwüü resap mochen repwe köri itom;
7pün iir ra oromaló Jakob o kitereló fönüan we.
8Kosap ukun ngeni keem tipisin äm kewe leewo; amwo kopwe emwittirato óm kirekiröch pwe epwe atawei äm kana osupwang, pün äm äia nóm lón osukosuken osupwang.
9Kopwe älisi keem, Kot äm Chón amanaw fänäsengesin lingen itom; kopwe angasa keem o omwusaló äm kana tipis fänäsengesin itom.
10Pwata chón ekkewe mwüü repwe apasa, “Ifa i chök ar we Kot?” Me mwen meseem, kopwe esile ngeni chón ekkewe mwüü pwe en ka angei chappen ewe chcha mi niiniló, chaan noum kewe chón angang.
11Amwo än ekkewe chón nóm lón föötek ngüüngü epwe feitto mwomw; ren pöchökkülen poum, kopwe tümwünü manawen chókana mi köpwüngüló pwe repwe mäló.
12Kopwe isettä wón aföön chón óruum kana chappen ar föfför nge kopwe liwini ngeniir fän fisu chappen ekkewe kapasen turunufas ra älla ngenuk, äm Samol.
13Mwirin, äm noum kewe aramas, äm ekkewe siip mi nóm lón óm we mälämäl, äipwe mwareituk tori feilfeilló chök. Äm aipwe chök ekkeliwini le mwareituk seni ew pilóón aramas tori pwal ew.
Köölfel 80
Iótek fäniten än chón Israel repwe liwinsäfäl. Ngeni ewe chón nemeni kööl. Mi fich ngeni ngiingin ewe kööl “Ekkewe Kiop.” Echö köölün pwärätä än Asaf. Echö köölfel.
1Kopwe öüselinga keem, en ewe Chónmasen Israel, en ewe mi emmweni Josef usun chök epwi pwiin siip. En ewe mi móót wón leeniom leenien nemenem lefiilen ekkewe keropim kopwe pwääraló saramen óm ling,
2ngeni Efraim, Benjamin me Manassah. Kopwe pwääri ngeni keem óm manaman; kopwe feitto o chimanüw keem.
3Kopwe asööfösäfäli keem, O Kot; kopwe asaramatiw wón mesóm wóóm pwe äm äipwe ngaseló.
4Äi SAMOL Kot mi Unusen Manaman, epwe ifa üküükün langattamen fansoun óm kopwe soong ngeni än noum kewe aramas iótek?
5En ka amwöngöni ngeni keem letipeta, ka pwal öünü ngeni keem chönün maas mi urowu me lón sepi.
6En ka föri pwe äm äipwe och minen turunufas meren chón ekkewe mwüü mi nóm ünükküüm, o ekkewe chón opwutakeem ra turunufasekeem.
7Äi Kot mi Unusen Manaman, kopwe föri pwe äipwe kulsäfäl ngenuk. Kopwe asaramatiw wón mesom wóóm pwe äm äipwe ngaseló.
8En ka eini efóch irän wain seni Egypt; en ka tapweeló chón ekkewe mwüü o ka fótukätiw.
9En ka limeti ewe pwül fänitan; iwe, a pwük waaran, a määritä o ouraló ewe fönü.
10Ekkewe chuuk ra pwölüló fän nürün, ekkewe irä iter sedar mi wätte ra pwölüló fän palan kewe.
11Palan kewe ra meresiwu ngeni ewe Mataw, fasaran kewe ra tööló ngeni ewe Chaanpwuupwu.
12Pwata en ka ataetiw tittiin kewe ina pwata meinisin mi pwereló ünükkün ra kinii uwaan kewe föün kreip?
13Ekkewe ätemwänin piikkeniwöl ra ataatakisi o ekkewe nissefich seni lón mälämäl ra ocheei ekkewe föün.
14Kopwe kulsäfäl ngeni keem, Kot mi Unusen Manaman! Kopwe nennetiw seni läng o nengeni äm weires! Kopwe mammasa ei irän wain,
15iei ewe waaran pöüiifichum a fótukätiw, iei i noum we en ka pwisin fóólenätä fänitom.
16Óm we irän wain a pöküpökütiw, a karaló ren ekkei; ren óm kapasen öpwüng, noum kewe aramas ra mäfeiengaw.
17Kopwe isettä pöum wón ewe mwän mi nóm peliifichum, ewe nöün aramas en ka fóólenätä fänitom.
18Mwirin, äm äisap chüen kul senuk; kopwe etiwa keem o äm äipwe kökkööri itom.
19Kopwe föri pwe äipwe kulsäfäl ngenuk, SAMOL Kot mi Unusen Manaman; kopwe asaramatiw wón mesom wóóm, pwe äm äipwe ngaseló.
Köölfel 81
Ew tungór fäniten än chón Israel repwe ekieksäfäl. Ngeni ewe chón nemeni kööl. Echö kööl wón pisekin likettik seni Kath. Echö köölfel än Asaf.
1Öüpwe köölün pwapwa ngeni Kot pün i ach pöchökkül. Öüpwe osommóng le mweireir ngeni än Jakob we Kot.
2Öüpwe chietä le kööl, öüpwe pisipisiri ekkewe pisekin pwörük iter tamborin, öüpwe ettiki ekkewe pisekin likettik mi ngiiöch iter harp me layer.
3Öüpwe opwuuw ewe rappwa mi för seni mächään ätemwanin siip lupwen ewe Chuulapen Elingeling pwal lupwen ewe maram a unus, lón ewe ränin ach we chuulap;
4pün iei ew osomän fäniten chón Israel, iei ew öllük än än Jakon we Kot.
5Kot a föri ei öllük pwe epwe ew pwon mi önükünük fäniten Josef, lupwen i a feilló pwe epwe efeiengawa Egypt o angasakicheló.
Ngang üwa rong ew möngüüngü üsap sissilei a apasa:
6“Iei ngang üpwe ömwökütaló seni wón afaremi ewe wosochchow. Ngang üpwe angasaló pöümi seni ämi mwäreei ekkewe chüük mi chow.
7Lón ämi riäfföü ämi öüwa siö ngeniei, nge ngang üwa chimanü kemi. Ngang üwa pölüweni ämi kökkö me lón ewe leeni mi mwónómwón, lón ew kuchuun chopwulap; ngang üwa sótuni ämi lükülük me ren ekkewe kólukun Meribah lupwen öüwa lal pwe esap wor kólik. Selah
8“Öüpwe öüseling ngeniei, ämi neii kana aramas, pün ngang üpwe fönöw kemi are öüpwe chök öüseling ngeni ei, ämi chón Israel!
9Öüsap awora emön koten ekis leiimi. Öüsap chappetiw o fel ngeni emön koten ekis.
10Pün ngang ewe SAMOL ämi Kot, ewe mi chimanü kemiiwu seni ewe fönü Egypt. Öüpwe suukchöchöló awemi pün ngang üpwe oura le amasowa ren mettóch mi mwirinnö.
11“Nge neii kana aramas resap mochen öüseling ngeniei. Chón Israel resap mochen äleasochis ngeniei.
12Ina pwata ngang üwa esel ngeniir mochenin letiper mi tipeförea pwe repwe tapweló mwirin pwisin ar kana mochen.
13“Are neii kana aramas repwe chök öüseling ngeniei, are chón Israel repwe fätäl lón äi kewe aal,
14iwe, epwe ifa me mwittirin äi üpwe okkufu chón opwuter kewe o äsepa peii pwe epwe üüngeni ekkewe chón pölüweniir!
15Chókana mi opwut ewe SAMOL repwe numichikir me mwan, o köpwüngür esap mwüch tori feilfeilló chök.
16Nge ngang üpwe amwöngöni ngeni kemi uwään wiit mi fókkun mwirinnö, ngang üpwe pwal öünü ngeni kemi chönün chunen seni ewe achaw pwe öüpwe mötuló.”
Köölfel 82
Ew tungór fäniten pwüngün köpwüng mi wenechchar. Echö köölfel än Asaf.
1Kot a móótóló wón an leenien móótun kopwung me lón ewe mwiich mi lapalaap lón läng. I a atoöwu pwüngün köpwüng me leiin ekkewe kot.
2Epwe ifa langattamen fansoun ämi öüpwe penätä minne esap pwüng o pwääri ämi lifilifil aramas le peni ekkewe aramasingaw? Selah
3Öüpwe wenechchar lón ämi atoowu pwüngün köpwüng ngeni ekkewe mi mweleele me ekkewe mi määsen. Öüpwe älisätä ekkewe mi wöwingaw me riäfföü lón ar pwüüng.
4Öüpwe chimanüw ekkewe mi apwangapwang me osupwang; öüpwe angaser seni lepöün ekkewe aramasingaw.
5Nge ekkeei ‘kot’ resap silei och, resap pwal weweiti och. Iir ra chök fätälfeil lón rochopwaak. Ekkewe lóngólóngen fönüfan meinisin ra mwökütüküt.
6“Ngang üwa apasa, ‘Ämi “kot”, ämi meinisin nöün ewe mi Unusen Tekia.’
7Inamwo nge öüpwe mäló usun chök aramas; öüpwe pwal turuló usun chök iteiten emön me emön samol.’ ”
8Kopwe üütä, äi Kot, kopwe öpwüngü fönüfan pün en kopwe älemwirini chón ekkewe mwüü meinisin.
Köölfel 83
Iötek ngeni Kot pwe epwe aosukosuka ewe angangen rawangawei Israel. Echö kööl. Echö köölfel än Asaf.
1O Kot, kosap fanafaneló chök; kosap apwasaló selingom, kosap kupacheló chök pwe kosap föri och, O Kot.
2Nengeni usun än ekkewe chón opwutók ra mwökütüküt feil, nengeni usun än ekkewe chón pölüwenuk ra äwenätä mökürer, ar pwääraló pwe ra üüngenuk.
3Ra rawangawei noum kewe aramas fän tipächchem soolä; ra rawangawei chókana en ka öüchcheanir.
4Ra apasa, “Öü feitto, öüsipwe arosereló fengen me mwüür, pwe esap wor epwe chüen chechchemeni iten Israel.”
5Ra tipeew fengen le akkóóta ar rawangaw. Ra förätä och pwonen epwiipwi fengen pwe repwe üüngenuk,
6iir ekkewe chón Edom me ekkewe chón Ishmael, chón Moab me ekkewe chón Hakri,
7pwal ekkewe chón Kebal, Ammon, me Amalek, Filistia fiti ekkewe aramasen Tayer.
8Ekkewe mwo chón Assyria nge ra pwal chuu ngeniir pwe repwe fang ar pöchökkül ngeni ekkewe mwirimwirin Lot. Selah
9Kopwe föri ngeniir usun minne ka föri ngeni chón Midian, usun minne ka föri ngeni Sisera me Jabin meren ewe chaanpwuupwu Kishon,
10ra mäfeiengaw me lón Endor o ra wiliti usun chök kiten mwöngö me wón pwül.
11Kopwe föri pwe ar kewe aramas tekia repwe ninniiló usun chök Oreb me Zeep pwal meinisin ekkewe nöün samol repwe mäló usun chök Zebah me Zalmunna,
12iir ekkewe mi apasa, “Öüsipwe angei fän pöchökkül fänitach ekkewe fönü fönüwen Kot ia a wor ie fetil me maan.”
13En äi Kot, kopwe föri pwe repwe wewe ngeni fetil mi pwas, repwe pwal wewe ngeni ekkan pöön föün wiit äsäpwääl a ässireló.
14Usun chök än ekkei a kenaló ew wöllap, ika usun ngetengeten ew ekkei a küüri ekkewe chuuk,
15iwe, epwe iei usun óm kopwe tapweer ren óm äsäpwääl mi pöchökkül o eniwokkusur ren óm mölümöl.
16Kopwe pwölüweló wón meser ren sääw, pwe aramas repwe kütta itom, äi SAMOL.
17Amwo repwe sääw me nuokkus tori feilfeilló chök. Amwo repwe mäfeiengaw lón ar itengaw.
18Kopwe esile ngeniir pwe en, itom ewe SAMOL pwe en chök ewe mi Unusen Tekia wón unusen fönüfan.
Köölfel 84
Feiöchün nónnóm lón imwen Kot. Ngeni ewe chón nemeni kööl. Wón ewe pisekin likettik itan kittith. Echö kööl än noun Korah kewe mwän. Echö köölfel.
1Äi SAMOL mi Unusen Manaman, a ifa me öchchün ewe leeni ia ka nóm ie.
2Ngüni a pwositi, a mwo nge efisi mölülün an mochen epwe nóm lón ekkewe leenien emwiicheich fengen än ewe SAMOL. Letipei me inisi ra pwupwuchörün pwapwa ren ewe Kot mi manaw.
3Ewe mwo lichchok nge a küna leenian, pwal ewe sääsä a sees fasan ia epwe tongeni anómwu ie nöün kana me lón ew leeni arap ngeni óm we róngen asór, äi SAMOL mi Unusen Manaman, äi King me äi Kot.
4Ra feiöch chókana mi tongeni nónnóm lón imwom, pün ra köölün mwareituk fansoun meinisin. Selah
5Ra feiöch chókana ar pöchökkül a nónnóm lón en, iir ekkewe mi anómwu lón letiper pwe repwe sääi ngeni Jerusalem.
6Lupwen repwe pwereló lón ewe lemólun Baka, repwe ewili ngeni pwe epwe ew leenien ekkana pwuachchen köluk. Ewe üüten fansoun leefen epwe pwölüweló ewe leeni ren feiöch.
7Repwe feilló nge epwe lallapeló ar pöchökkül tori emön me emön leiir epwe pwääto me mwen Kot lón Zion.
8Kopwe rongorong äi iótek, äi SAMOL Kot mi Unusen Manaman; kopwe öüseling ngeniei, en än Jakob we Kot. Selah
9O Kot, kopwe nengeni äm we pisekin eppetin feiengaw lón maun; kopwe nengeni wón mesen noum we mi kepit.
10Pün ew chök rän äi üpwe nóm lón imwom we, a mwirinnö seni äi üpwe nóm ekis lón engöröw rän. Ngang üwa efich
äi üpwe emön chón mammasa asam me lón imwen äi we Kot lap seni äi üpwe nónnómöch lón ekkewe imw mangaku imwen ekkewe aramasingaw.
11Pün ewe SAMOL Kot i saram me pisekin eppetin feiengaw lón maun. Ewe SAMOL epwe fang an ümöümöch me an ling. Ewe SAMOL esap ömwöchü och mettóch mi mwirinnö seni chókana mi föri meet mi pwüng.
12SAMOL mi Unusen Manaman, a feiöch ewe aramas mi anómwu an apilükülük lón en.
Köölfel 85
Iótek pwe Kot epwe eliwinisäfälieto an ümöümöch ngeni ewe fönü. Ngeni ewe chón nemeni kööl. Echö köölfel än nöün Korah kewe mwän.
1En SAMOL, ka fen pwääri óm ümöümöch ngeni fönüom we; en ka eliwinsäfälieto feiöchün Jakob.
2En ka omwusaló tipisin noum kewe aramas o ka pwölüweló ar kana tipis meinisin. Selah
3En ka likitätiw óm soong o ka kul seni óm lingeringer.
4Kopwe kul säfäl ngeni keem, en Kot äm Chón Amanaw o kopwe pöütaló óm letipengaw ngeni keem.
5Ifa usun, kopwe soong ngeni keem tori feilfeilló chök? Ifa usun, kopwe chök alangattamaló óm soong ngeni keem tori pwal ekkewe pilóón aramas meinisin?
6Ifa usun, kosap öpöchökküla säfälikeemitä, pwe noum aramas repwe pwapwa lón en?
7Kopwe pwääri ngeni keem óm tong ese mwuch, äi SAMOL, o mwüüt ngeni keem óm we alen ngaseló.
8Ngang üpwe öüseling ngeni meet Kot ewe SAMOL epwe apasa, pün i a pwon pwe epwe awora kinamwe ngeni nöün kewe aramas, nöün kewe chón pin, nge esap mwüüt ngeniir pwe repwe liwinsäfäliti ar föfför mi umwes.
9Enlet än Kot alen ngaseló a arapeto ngeni chókana mi nuokkusiti i, pwe an ling epwe nónnóm lón fönüach.
10Tong me ölükülük ra chufengen, pwal pwüng me kinamwe ra mitirifengenir.
11Ölükülük epwe pwuachetä seni wón fönüfan, nge pwüng epwe netiw seni läng.
12Ewe SAMOL epwe wesewesen fangeto meet mi mwirinnö o epwe wor ew wätten rääs wón fönüach.
13Pwüng epwe akkomwoló mwan pwe epwe emön chón arong, epwe amollätä ewe aal fäniten ia pecheen epwe pwuutiw ie.
Köölfel 86
Iótek fäniten än Kot kirekiröch fiti ekillól usun echchipwörun ewe SAMOL. Ew Iótek än David.
1Kopwe pwarootiw o rongorong äi iótek, äi SAMOL, o pölüweniei, pün ngang üwa wöwingaw o osun óm älillis.
2Kopwe mammasa manawei, pün ngang mi fangelong manawei ngenuk; kopwe angasaei pün ngang üwa angang ngenuk o anómwu an apilükülük wóómw. En chök äi Kot,
3kopwe kirekiröch ngeniei, äi Samol, pün ngang üwa chök soun kökkööruk.
4Kopwe awarato ngeni noum ei chón angang pwapwa, Äi Samol, pün ngang üwa anómwu äi apilükülük lón en.
5En, äi Samol, ka mwirinnö o mollotä pwe kopwe omwusaló tipis. En ka ääni tong ese mwüch ngeni meinisin iir mi köruk pwe kopwe älisiir.
6Äi Samol, kopwe öüselingöch ngeni äi iótek; kopwe rongorong ngeni äi siö ngenuk pwe kopwe kirekiröch ngeniei.
7Lupwen ngang üwa nóm lón riäfföü, ngang üwa kööruk, pwokiten en ka pölüweniei.
8Esap wor emön me leiin ekkewe kot epwe wewe ngenuk, äi Samol; esap wor pwal och föfför epwe löllö ngeni óm.
9Chón ekkewe mwüü meinisin, en ka föri ew me ew, repwe feitto o chappetiw me mwomw, äi Samol; repwe mwareiti itom mi lapalaap o pin.
10Pün en ka fókkun lapalaap o ka föri ekkewe föfför mi amwaraar; en echök Kot.
11Kopwe äööw ngeniei óm aal, äi SAMOL pwe ngang üpwe fätäl lón óm let. Kopwe fang ngeniei ew letip esap tipekinikin, pwe ngang üpwe asamolu itom.
12Ngang üpwe mwareituk, en Samol äi Kot ren unusen letipei. Ngang üpwe enlingaló itom tori feilfeilló chök.
13Pün óm tong ngeniei a fókkun lapalaap. En ka angasaei seni lón epilólun ewe leenien sootup.
14Äi Kot, ekkewe mi lamalam tekia ra üüngeniei; ew mwiichen aramas mi mwänesol ra kütta manawei, iir ekkewe sókkun aramas resap öüchcheanuk.
15Nge en, äi Samol, en emön Kot mi kirekiröch me ümöümöch, en ka songommang o uren tong ese mwüch me let.
16Kopwe säpengeniei o kirekiröch ngeniei; kopwe pwääri óm pöchökkül fänäsengesin noum chón angang; ewer, kopwe angasaei, pün ngang üwa angang ngenuk, usun chök minne inei we a föri.
17Kopwe pwääri ngeniei ew esissilen óm kirekiröch, pwe chókana mi opwut ngang repwe küna o repwe sääw, pün en, äi SAMOL, ka älisiei o echipaei.
Köölfel 87
Lingen än Kot we telinimw. Echö köölfel än nöün Korah kewe mwän. Echö kööl.
1I a öüüwetä an we telinimw wón ewe chuuk mi pin.
2Ewe SAMOL a echeni ekkewe asamalapen ewe tittin Zion lap seni ekkewe leeni meinisin ia Jakob a nóm ie.
3En än Kot we telinimw, a wor mettóch mi ling aramas ra apasatä usum. Selah
4“Ngang üpwe makkeetiw iten Rahab me Babylon pwe iir leiin chókana mi sileei, pwal Filistia me Tayer fiti Kush o üpwe apasa: “Ei emön a upwutiw lón Zion.”
5Enletin, iei meet aramas repwe apasa usun Zion, “Ei emön me enan emön ra upwutiw lón Zion,” iwe, pwisin ewe mi Unusen Tekia epwe önüküchchara ei telinimw.
6Ewe SAMOL epwe makkeetiw lón ewe pwuken makken iten aramas: “Ei emön a upwutiw lón Zion.” Selah
7Ekkewe chón kööl me chón pwörük repwe kööl o apasa, “Äi kewe pwuachchen kólik meinisin ra nóm lón en.”
Köölfel 88
Ew iótek fäniten tungór älillis lón fansoun letipengaw. Echö kööl. Echö köölfel än nöün Korah kewe mwän. Ngeni ewe chón nemeni kööl. Usun ngiingin mahalath leannoth. Echö maskil än Heman emön mwirimwirin Ezra.
1Äi SAMOL, en ewe Kot ka amanawaei; lerän me lepwin ngang üwa sissiö ngenuk.
2Amwo äi iótek epwe tongeni feitto mwom; kopwe öüüw selingom ngeni äi siö.
3Ngang üwa kufuló ren riäfföü o manawei a chök arap ngeni mäló.
4Ngang üwa älealong leiin chókana repwe feittiw lón ewe pwaang; ngang üwa wewe ngeni emön mwän esap chüen wor an pöchökkül.
5Ngang üwa koturuló leiin ekkewe sootup, üwa usun ekkewe mi ninniiló ra nóm lón peias, iir chókkewe kosap chüen chechchemeniir, iir ekkewe ra pökütiw seni óm tümwün.
6En ka atolongaei lón epiilólen ewe pwaang, lón ewe leeni mi rochokkich o alóllóól.
7Óm soong a choutiw wóói; en ka pwölüweiló fän noum kewe nóó meinisin. Selah
8En ka angei seniei chiechiei kana mi chiechiöch ngeniei o ka föri pwe üpwe likiló mereer. Ngang üwa mwöch lón föötek nge üsap tongeni üpwe tiweló;
9mesei kana ra topwutopwuló ren äi letipeta. Ngang üwa kökkööruk, äi SAMOL, iteiten rän. Ngang üwa eitiewu peii ngenuk.
10Meet lamwoten óm kewe manaman ngeni ekkewe sootupw? Ifa usun, chókewe mi mäló repwe pwäätä o mwareituk? Selah
11Ifa usun, chókana mi nóm lón peias repwe tongeni esilefeili usun óm tong ese mwüch? Ifa usun, repwe tongeni aronga usun óm ölükülük me lón ewe leenien kitetter?
12Ifa usun, rochopwaak a tongeni kapas usun óm kewe manaman? Ifa usun, epwe wor emön me lón ewe fönüwen möllüküló epwe kapas usun óm föfförün pwüng?
13Nge ngang üwa siö ngenuk pwe kopwe älisiei, äi SAMOL. Iteiten lesossor äi iótek a feitto mwomw.
14Äi SAMOL, pwata ka pöütieiló? Pwata ka aopa wón mesom seniei?
15Seni chök lesäráfööi, ngang üwa riäfföü o arap ngeni üpwe mäló; ngang üwa riäfföü o nóm lón epilükingaw ren eniwokkusum.
16Óm kewe föfförün soong mi lapalaap ra pwölüweiló, nuokkusum ra efeiengawaei.
17Ra róngeeiló lón unusen längattamen rän me rän usun och nóóter. Ra unusen pwellieiló.
18En ka angealó seniei chienei kana me attongeei kana. Rochopwaak chök a nómwetiw pwe epwe ina chiechiei.
Köölfel 89
Chechchemeni ewe pwon ngeni David me lólilen ren feiöch mi pöütüló. Echö maskil än Ethan, emön mwirimwirin Ezra.
1Ngang üpwe köölüw än ewe SAMOL tong mi lapalaap tori feilfeilló chök; ngang üpwe esilefeili ren awei usun óm ölükülük leiin ekkewe pilóón aramas meinisin.
2Ngang üpwe arongafeili pwe óm tong a nüküchchar le nónnóm tori feilfeilló chök. Òm ölükülük a nómfóchófóch usun chök ekkewe läng.
3En ka apasa, “Ngang üwa ääni ew pwon ngeni neii we emön üwa filätä, ngang üwa pwon fän ökköpöl ngeni David neii we chón angang o apasa:
4‘Ngang üpwe önüküchchara tettelin mwirimwirum tori feilfeilló chök o föri pwe óm we leenien móótun nemenem epwe nüküchchar lón unusen ekkewe pilóón aramas meinisin.’ ”
5Ekkewe läng repwe mwareiti óm kewe manaman, äi SAMOL, ekkewe mwiicheichen chón läng repwe mwareiti óm ölükülük.
6Pün iö me peekitä lón läng a tongeni löllö ngeni ewe SAMOL? Iö a usun ewe SAMOL me leiin ekkewe mönün lón läng?
7A fókkun lapalaap ar nuokkusiti Kot me lón än ekkewe chón pin mwiichen chiechifengen. I a koon ömmösök lap seni chókana meinisin mi róngeeló an we leenien móótun king.
8Iö a wewe ngenuk, SAMOL Kot mi Unusen Manaman? En, SAMOL, ka manaman o óm ölükülük a pwellifeilik.
9En ka nemeni ekkewe mataw mi nóóngaw. Lupwen nóónón ekkewe mataw ra pwootä lón mölümöl mi eniwokkus, en ka ölüwareló.
10En ka apachchatiw Rahab ewe mönün lemataw mi wätte, pwe epwe usun emön mi ninniiló. En ka atoropassa feili chón opwutom kana ren poum mi pöchökkül.
11Ekkewe läng, óm; pwal fönüfan, óm. En ka förätä fönüfan me meinisin minne ra nóm lón.
12En ka föri efeng me öör; ewe chuuk Tabor me ewe chuuk Hermon ra kööl ren ar mwareiti itom.
13Poum a sipeöch ren manaman. Kumwuchum a pöchökkül, pöümwänum a ökköüpöw lón pöchökkül mi ling.
14Pwüng me öpwüngüwen ikkeei lóngólóngun óm we leenien móótun nemenem. Tong me let ra akkomw mwom pwe iir chón mwenänuk.
15Ra feiöch chókana mi rongorong ewe pwapwan kökkö pwe repwe fel ngenuk pün iir repwe fätäl lón saramen óm nónnóm, äi SAMOL.
16Repwe pwapwa lón unusen langattamen rän me rän; repwe emeseiker lón óm pwüng.
17Pün en ar ling me ar pöchökkül, o ren óm ümöümöch en ka fang ngeni keem äm pöchökkül, usun chök nge ka etekiatä mächääm.
18Ewer, ach eppetin maun, än ewe SAMOL ach king, än ewe Emön mi Pin lón Israel.
19En ka kapas fän ew lón längipwi, ngeni noum kewe aramas mi ölükülük o apasa: “Ngang üwa ämwärätä pöchökkül wón emön soumaun mi pwora; ngang üwa filätä emön ölüwöl seni leiin ekkewe aramas.
20Ngang üwa küna neii we chón angang David; iwe, ngang üwa epiti ngeni i äi we lömmis mi pin.
21Kumwuchi epwe älisätä i, enlet peii epwe öpöchökküla i.
22Ewe chón opwut i esap okkufu lón an ekiek; esap wor emön aramas mi föfföringaw epwe eriäfföwü i.
23Ngang üpwe ataatakkisietiw me mwan chókana mi opwut i o niietiw ekkewe chón öppölüwa.
24Äi tong ese mwüch me ölükülük epwe chök nónnóm ren, nge i epwe tekiatä lón an pöchökkül pwokitei.
25Ngang üpwe achöölapaló an nemenem seni ewe Matawen Mediterrane mi nóm lotow tori ekkewe chaanpwuupwu Taikris me Eufreitis mi nó öötiw.
26Iwe, i epwe apasa ngeniei, ‘En Semei, äi Kot, me ewe Achawen äi ngasaló.’
27Ngang üpwe pwal ewiisa i pwe epwe neii mwännichi, ewe mi unusen tekia me leiin ekkewe kingen fönüfan.
28Ngang üpwe önüküchchara äi tong ngeni i tori feilfeilló chök, nge äi pwon ngeni i esap taaló.
29Ngang üpwe önüküchchara tettelin mwirimwirin tori feilfeilló chök; ngang üpwe önüküchchara än we leenien móótun nemenem lón ükükün langattamen fansoun än ekkewe läng repwe nóm.
30Nge are nöün kewe mwän repwe likitaló äi öllük o resap fätäl lón äi kewe pwüüng,
31are resap älleasochisi äi kewe osomän o repwe lipwäkingaw ngeni ar repwe öpwönüetä äi kewe öllük,
32mwirin, ngang üpwe öpwüngür ren ar kewe tipis ren efóch wóók, üpwe öpwüngü ar föfföringaw ren wichiwich.
33Nge ngang üsap chök angei seni i äi tong, usap fókkun amaamäsini äi ölükülük ngeni.
34Ngang üsap atai äi we pwon ngeni; ngang üsap angeisäfäli ew kapas ngang üwa apasa.
35Fän ew chök, ngang üwa öpölü äi pin lón äi pwon fän ökköpöl ngeni David, nge üsap kapas chofona,
36pwe tettelin mwirimwirin kana repwe sópwósópwóló chök le móót wón an we leenien móótun king me mwei usun chök ewe akkar,
37epwe pwal nüküchchar tori feilfeilló chök usun ewe maram, äi pisekin pwärätä mi ölükülük mi nóm fän läng.” Selah
38Nge iei en ka fen pöütaló i. Pwata ka soong ngeni ewe emön en ka filätä o epiti pwe epwe king?
39En ka fangatäni óm we pwon ngeni noum we chón angang pün ka oturätiw lón pwül mwärin we mwärin king.
40En ka ataetiw än kewe tiit meinisin mi tümwünü i seni feiengaw o ka ewili ngeni leeni mi taatakkis an kewe leeni mi pöchökkül mi eppetaló i.
41Meinisin mi pwereló ünükkün ra sooläni pisekin fän pöchökkül, nge chón órun kana ra turunufasei i.
42En ka etekiatä pöümwänin ekkewe chón pölüweni; ka pwal föri pwe meinisin chón opwutan kana repwe meseik.
43En ka föri pwe nöün ketilas a lamwotmwäl o kosap mochen älisi i lón maun.
44En ka öükätiw an ling o oturätiw an we leenien móótun nemenem lón pwül.
45En ka föri pwe i epwe mwittir chinlapeló nge esap mwo tori an fansoun chinlap. En ka äsääwa i leiin aramas. Selah
46Äi SAMOL, epwe ifa langattamen än ei lapalap epwe sópwósópwóló le fis? Ifa usun, kopwe aopókóló tori feilfeilló chök? Epwe ifa längattamen fansoun óm soong epwe kü usun ekkei?
47Kopwe chechchemeni usun mwochomwoochen ränin manawei. Pün a ifa me lamwotmwälin óm föri aramas meinisin!
48Esap wor emön aramas a tongeni manaw tori feilfeilló chök, pün meinisin repwe mäló; esap wor emön epwe tongeni tiweló seni manamanen peias. Selah
49Äi Samol, ifa óm we tongen mesemwan mi lapalaap, ewe en ka aea le pwon ngeni David fän ökköpöl lón óm ölükülük?
50Samol, kopwe chechchemeni usun än noum kewe chón angang ra küna turunufas. Ngang üwa engngiló ngeni le mwärei lón letipei än ekkewe aramas mi chómmóng meinisin kapasen esiit.
51Äi SAMOL, ekkewe chón opwut en ra turunufaseei. Ra turunufasei ewe emön en ka epiti pwe epwe king.
52Öüsipwe mwareiti ewe SAMOL tori feilfeilló chök! Amen me Amen.
PWUK 4
Köölfel 90 - 106
Köölfel 90
Kot a nóm feilfeilló chök nge manawen aramas a chök mwochomwooch. Ew Iótek än Moses, ewe aramas mi wisen kapas fäniten Kot.
1Samol, en ka fen äm leenien op lón ekkewe pilóón aramas meinisin.
2Me mwen än ekkewe chuuk ra för, me mwen óm ka föri unusen fönüfan me masowan kana, seni fansoun esepop tori feilfeilló chök, en chök Kot.
3En ka eliwini säfäli aramas ngeni pwül o apasa, “Öüpwe liwin säfäliti pwül, ämi nöün aramas.”
4Engöröw ier me fän mesom nge ra wewe ngeni ew chök rän mi luuló, ika ra wewe ngeni ew chök kinikinin kulókun lepwin.
5En ka piruumweló aramas lón möürün mäló usun chök och tan mi móróló, ika usun fetil mi pwüküföötä lesossor.
6Lesossor a määritä o wor pöön irän, nge lekkuniól a pwaseló o mäló.
7Äm äia rosoló ren óm soong o fókkun nuokkus ren óm lingeringer.
8En ka anómwu mwom äm kewe pwüngingaw, o ka anómwu äm kewe tipis mi mwónómwón lón saramen ia ka nóm ie pwe kopwe küner meinisin.
9Ränin manaweem meinisin ra chök nóm fän óm soong; äm äia asópwaló manaweem ren ew ngüüngü.
10Ränin manawem ra tongeni tori fiik ier ika waliik, are äm pöchökkül epwe nómwottameló; nge lón älein ekkewe ier, ra chök uren riäfföü me letipetä, pün ra mwittir luuló, iwe, äm aia ässiló.
11Iö a tongeni silei manamanen óm soong? Pün óm lingeringer a fókkun lapalaap usun chök öükükün ewe nuokkus mi fich ngenuk.
12Kopwe äööw ngeni keem äm aipwe alamwota fansoun ränin manaweem, pwe äm äipwe mämmäritä lón äm miriit.
13Äi SAMOL, kopwe liwinsäfälito ngeni keem! Epwe ifa langattamen fansoun óm kopwe mang? Kopwe ääni kirekiröch ngeni noum kewe chón angang.
14Kopwe ämenemenöchü keem iteiten lesossor ren óm tong ese mwüch, pwe äm äipwe kööl fän chengel o pwapwa tori lesópwólón mamanweem.
15Kopwe fang ngeni keem pwapwa öüküük ngeni chök pwal äm kewe riäfföü me mwan. Kopwe ekkesiwili ekkewe ier mi ingaw ngeni mi mwirinnö.
16Kopwe pwääri óm föfför ngeni noum kewe chón angang me óm manaman mi ling ngeni nöüür kana.
17Ümöümöchün ewe Samol ach we Kot epwe nónnóm wóóch o öpwönüwetä angangen pöüch. Ewer, epwe öpwönüwetä angangen pöüch!
Köölfel 91
Nónnómöchün ach nóm fän mesen Kot.
1Emön mi op fän nürün ewe mi Unusen Tekia, epwe asöösö lón nürün ewe mi Unusen Manaman.
2Ngang üpwe apasa usun ewe SAMOL, “I chök äi leenien op me imwei imwen maun mi pöchökkül, i äi Kot, ngang üwa anómwu äi apilükülük lón i.”
3Enlet, i epwe angasók seni än ewe chón chünnümei nikottupw, epwe pwal tümwünuk seni mätter mi efeiengaw.
4I epwe pwölukoló fän ünöünan kana, en kopwe ääni leenien op fän pöükässin kana; an ölükülük epwe ikkana óm pisekin tittin maun me tittin ünükküm mi chukuchukutä.
5En kosap niweiti och sókkun eniweniwen lepwin ika föün esefich mi äkkääs lerän,
6kosap pwal niweiti och sókkun mätter mi äkkänif lón rochopwak ika och määlap mi ekkefeiengaw leólówas.
7Engöröw repwe turuló lepeliom, engol ngöröw lepeliifichum, nge esap arap ngenuk.
8En kopwe chök nennengeni ren mesom o kopwe küna usun än ekkewe aramasingaw repwe angei liwinin ar tipis.
9Pwokiten en ka apasa, “Ewe SAMOL i äi leenien op,” o ka föri pwe ewe mi Unusen Tekia epwe óm leenien öchchüló seni feiengaw,
10esap wor och feiengaw epwe okkufuk, esap pwal wor och mätter epwe arap ngeni imwom.
11Pün i epwe öllük ngeni nöün kewe chón läng fänäsengesum pwe iir repwe tümwünuk wón óm aal meinisin;
12iir repwe sapóketä wón pöür kana pwe kete chepetei ngeni eföw faaw pachapachom.
13En kopwe pwuutiw wón ewe laion me ewe serepenit itan kopra; en kopwe apachchatiw fän pachapachom ewe laion me ewe serepenit.
14Ewe SAMOL a apasa, “Pwokiten i a echeniei, ngang üpwe angasa i; ngang üpwe tümwünü i seni feiengaw, pün i a silei itei.
15I epwe köriei, nge ngang üpwe pölüweni i; ngang üpwe nóm ren lón fansoun riáfföü, ngang üpwe chimanü i o eiteöchü i.
16Ngang üpwe ämenemenöchü i ren manaw mi langattam o üpwe pwääri ngeni i äi alen ngasaeló.”
Köölfel 92
Mwareiti ewe SAMOL ren an tong me an ölükülük. Echö köölfel. Echö köölün ewe ränin Sabbat.
1A men mwirinnö pwe äm äipwe kilisou ngenuk en ewe SAMOL o köölün mwareiti itom, en ewe mi Unusen Tekia.
2A men mwirinnö äm äipwe aronga feili óm tong ese mwüch iteiten lesossor me óm ölükülük iteiten lepwin,
3pwe äm äipwe köölün mwareituk wón ewe pisekin likettik itan layer mi wor engol säitelin pwal fiti ngiingin ewe pisekin likettik itan harp.
4Pün en ka föri pwe ngang üpwe pwapwa, äi SAMOL, ren óm angang. Ngang üpwe kööl ren äi pwapwa pwokiten angangen pöum.
5Äi SAMOL, a ifa me amwararen óm kewe angang! Òm kewe ekiek ra fókkun alóllóól!
6Ewe aramas mi tiparoch esap silei, ewe mi umwes esap tongeni weweiti,
7pwe inamwo are ewe aramasingaw a mämmäritä usun fetil o meinisin chón föfföringaw ra feffeitä, nge repwe chök fätäl ngeni feiengaw tori feilfeilló chök.
8Nge en, äi SAMOL, ka tekiatä tori feilfeilló chök.
9Pün nengeni, ekkewe chón opwutók, äi SAMOL, repwe wesewesen mäfeieingaw; chón föfföringaw meinisin repwe toropasfeil.
10Nge en ka fang ngeniei äi pöchökkül, a usun chök nge ka etekiatä mächääi usun emön ätemwänin kowu mi mwacho. En ka niinätiw wói lömmis mi mwirinnö.
11Mesei ra küna än ekkewe chón opwutaei ra kuf; selingei ra rongorong usun feiengawen ekkewe aramasingaw mi üüngeniei.
12Ekkewe chón pwüng ra määröch usun efóch irä itan palm, ra mämmäritä usun efóch irä itan sedar lón Lebanon,
13pün ra fót lón imwen ewe SAMOL, ra öümanawatä me lón ewe leeni mi amassawa ünükkün imwen ach we Kot.
14Iir repwe chök ukkuwa lupwen ar ra chinlapeló, ra uren appach o arawaraw,
15pwe repwe arongafeili, “Ewe SAMOL a wenechchar; i äi Achaw, esap wor och pwüngingaw a nóm lón i.
Köölfel 93
Än ewe SAMOL nemenem esap mwüchüló.
1Ewe SAMOL a nemenem, i a ousopwölüló lón ling; ewe SAMOL a üföüf ling o riietä pöchökkül pwe an ökkönük. Ewer, fönüfan a nüküchchar, a póssóló chök o esap tongeni epwe mwöküt.
2Óm leenien móótun nemenem a nüküchchar seni chök lóóm; en ka nóm seni chök fansoun ese pwop o tori feilfeilló chök.
3Ekkewe mataw mi pöchökkül ra tekiatä, äi SAMOL, ekkewe mataw ra alapatä mwelier; ekkewe mataw ra alapatä püngüpüngün nóónór.
4Ewe SAMOL wón läng a manaman! A pöchökkül seni püngün ekkewe mataw mi lapalaap usun püngün chopulap; a pöchökkül seni ekkewe nóón lemataw.
5Óm kewe öllük, äi SAMOL, ra nüküchchar resap tongeni siiwil; pin a ofouta imwom tori feilfeilló chök.
Köölfel 94
Kot i än ekkewe chón pwüng leenien op.
1Ewe SAMOL i emön Kot mi wiisen angei chappen tipis. O Kot, ewe mi wiisen angei chappen tipis, kopwe sarameló.
2Kopwe üütä, en Souköpwüngün fönüfan; kopwe liwinisäfäli ngeni ekkewe mi lamalamtekia meet mi fich ngeniir.
3Epwe ifa langattamen fansoun, äi SAMOL, epwe ifa langattamen fansoun än ekkewe chón föfföringaw repwe tunosikesik?
4Iir ra apasawu ar kapas mi tunosikesik; ekkewe chón föfföringaw meinisin ra uren eingeing.
5Iir ra eriäfföwü noum kewe aramas, äi SAMOL; iir ra efeiengawa chókana en ka tongeer.
6Iir ra niieló fefin mi lipichsäfäl me ekkewe waasöla; iir ra niimanawei ekkewe mi määsen.
7Iir ra apasa, “Ewe SAMOL esap küna, ewe Kot än Jakob esap äfälli.”
8Öüpwe ekiek säfäl, ämi ekkewe mi umwes me leiin aramas; ämi ekkewe mi umwes, ineet öüpwe weweló?
9Ifa usun, ewe mi wiisen föri selingemi, esap rongorong? Ifa usun, ewe mi wiisen föri mesemi, esap küna?
10Ifa usun, ewe mi wiisen emiriti le öpwüngü chón ekkewe mwüü esap pwal öpwüngü kemi? Ifa usun, i ewe mi silei mettóch meinisin, esap silei meet ämi öüwa föri?
11Ewe SAMOL a silei än aramas ekiek; i a silei pwe iir ra chök lamwotongaw.
12Äi SAMOL, a feiöch emön aramas en ka emiriti le öpwüngü, ewe emön en ka äööw seni lón óm öllük;
13en ka mwüüt ngeni an epwe ngasatä seni an kewe fansoun riäfföü, tori ew pwaang epwe wes le ttu fäniten ekkewe aramasingaw.
14Pün ewe SAMOL esap pöütaló nöün kewe aramas; i esap fókkun likitaló nöün kana mi öüchchea.
15Pwüngün köpwüng epwe feitto säfäl fäniten ekkewe chón pwüng, nge chókana mi wenechchar lón letiper repwe angei ew liiwin.
16Iö epwe üütä fänitei o üüngeni ekkewe aramasingaw? Iö epwe üütä fänitei o üüngeni ekkewe chón föfföringaw?
17Are ewe SAMOL esap älisiei; iwe, ngang üwa sótun mwittir nóm lón ewe leeni mi fanafaneló lón mäló.
18Lupwen ngang üwa ekieki, “Pecheei a mit,” óm tong ese mwüch, äi SAMOL, a sapaeitä.
19Lupwen tipemwaramwar a ouraló lón äi ekiek, óm angangen echipechip a asöfösäfäli äi apilüköch me pwapwa.
20Ifa usun, mi tongeni än ekkana souemmwen resap wenechchar repwe apasa pwe Kot mi nóm wón ar peekin, iir ekkana souemmwen mi mwüütätä pwüngingaw ren ar kana öllük?
21Ekkewe aramasingaw ra chufengen le üüngeni ekkewe chón pwüng o ettipisi ekkewe esap wor ar tipis pwe repwe mäló.
22Nge ewe SAMOL i äi imwen maun mi pöchökkül, äi Kot i ewe achaw mi pöchökkül ia ngang üwa tongeni op ie.
23I epwe liwinisäfäli ngeniir fäniter ar kana tipis o arosereló fäniten ar kana föfföringaw; ewe SAMOL ach Kot epwe arosereló.
Köölfel 95
Ew akökkö ngeni fel me äleasochis.
1Öü feitto, öüsipwe köölün pwapwa ngeni ewe SAMOL, öüsipwe osommóng le mweireir ngeni ewe Achawen ach alen ngaseló.
2Öüsipwe feitto mwan fän kilisou o etekiatä i fän pisekin likettik me kööl.
3Pün ewe SAMOL i ewe Kot mi lapalaap. I ewe King mi lapalaap seni ekkewe kot meinisin.
4Ekkewe leeni mi alóllól lón fönüfan ra nóm lón pöün, pwal ekkewe chuuk mi fókkun tekia, an.
5Mataw, an, pün i a föri, pöün kana ra ouluulu ewe fönü mi pwasapwasatä.
6Öü feitto, öüsipwe chappetiw o fel, öüsipwe fatopwäsukutiw me mwen ewe SAMOL, ewe Chón föri kich;
7pün i ach Kot, iwe, öükich ekkewe aramas lón an we mälämäl, öükich ewe pwiin siip mi nóm fän an túmwün.
Ikenäi, are öüpwe öüseling ngeni mwelian!
8“Öüsap öpöchökkülaló letipemi usun minne öüwa föri me lón Meribah, usun minne öüwa föri lón ewe ränin me lón Massah lón ewe fönüpöön,
9ia ämi kewe leewo ra sótuniei me ie, inamwo are ra fen küna meet ngang üwa föri.
10Lón ükükün fääik ier ngang üwa soong ren ena pilóón aramas. Iwe, üwa apasa, ‘Iir ew mwiichen aramas letiper a tókkóló seniei, resap mochen repwe silei äi kewe aal.’
11Iei minne, ngang üwa pwon fän ökköpöl lón äi soong o apasa, ‘Iir resap fókkun tolong lón äi asöösó.’ ”
Köölfel 96
Echö köölün mwareiti Kot epwe war lón köpwüng.
1Öüpwe köölüw ngeni ewe SAMOL echö kööl mi fö. Öüpwe kööl ngeni ewe SAMOL, ämi chón fönüfan meinisin.
2Öüpwe kööl ngeni ewe SAMOL, öüpwe mwareiti itan; öüpwe esile feili an we alen ngaseló rän me rän.
3Öüpwe aronga feili an ling leiin chón ekkewe mwüü; öüpwe aronga feili leiin aramas meinisin usun ekkewe mettóch mi amwaraar i a föri.
4Pün ewe SAMOL a fókkun lapalaap; a fich ngeni i ach sipwe mwareiti. I epwe wor nuokkusun lap seni ekkewe kot meinisin.
5Pün än chón ekkewe mwüü kewe kot meinisin ra chök uluulul önümwäl, nge ewe SAMOL i ewe a föri ekkewe läng.
6Iteüöch me manaman ra nóm pwellin ünükkün; pöchökkül me ling ra nóm lón imwan we mi pin.
7Ämi chón ekkewe mwüün fönüfan, öüpwe esilla ewe SAMOL; öüpwe esilla pwe ewe SAMOL a ling o pöchökkül.
8Öüpwe ngeni ewe SAMOL ewe ling mi fichiti i; öüpwe uwato ämi asór o feitto pwe öüpwe fel ngeni i.
9Öüpwe fel ngeni ewe SAMOL lón unusen lingen an pin; öüpwe chechcheech me mwan ämi chón fönüfan meinisin.
10Öüpwe üreni chón ekkewe mwüü, “Ewe SAMOL a nemenem.” Fönüfan a nüküchchar le üppósóló chök, esap tongeni an epwe mwökütüküt; i epwe öpwüngü aramas meinisin fän wenechchar.
11Ekkewe läng repwe meseik, fönüfan epwe pwapwa; mataw me masowan meinisin repwe mweireiren mwareiti i.
12Ekkewe mälämäl me meinisin minne mi määritä lóór repwe pwapwa; ekkewe irän leiin wöllap meinisin repwe köölün pwapwa.
13Repwe kööl me mwen ewe SAMOL, pün i a war; i a war pwe epwe öpwüngü fönüfan; i epwe öpwúngü fönüfan fän pwüng me ekkewe mwüü meinisin fän an let.
Köölfel 97
Echö köölün mwareiti ewe SAMOL mi nemeni mettóch meinisin.
1Ewe SAMOL a nemenem! Fönüfan epwe pwapwa; ekkewe fönüen lemataw mi toowaweló repwe meseik.
2Ekkana kuchu me rochopwaak mi malüül ra rokopwälieló i; pwüng me öpwüngüwen ikkana lóngólóngun an leenien móótun nemenem.
3Ekkei a akkomwoló mwan o a kenaló chón opwutan kana mi nóm lepeekin meinisin.
4An inefi a asaramaló fönüfan; fönüfan a küna o a chechcheech.
5Ekkewe chuuk ra teliló usun kandel me mwen ewe SAMOL; me mwen ewe Samolun unusen fönüfan.
6Ekkewe läng ra esile feili an pwüng; nge iteiten ekkewe mwüü ra küna an ling.
7Chókana mi fel ngeni ekkewe uluulun önümwäl repwe sääw; iir chókewe mi eingeing wón ekkewe önümwäl mi lamwotmwäl. Ämi ekkewe kot meinisin öüpwe fel ngeni Kot.
8Äi SAMOL, Zion a rongorong o a pwapwa; pwal ekkewe telinimwen Judah meinisin ra pwapwa pwokiten óm öpwüngüwen.
9Pün en, äi SAMOL, ewe mi Unusen Tekia seni chón fönüfan meinisin; en ka tekiatä asen ekkewe kot meinisin.
10Ämi chókana mi tongei ewe SAMOL, öüpwe opwut minne mi ngaw; pün i a tümwünü le mammasa manawen nöün kana mi uren lükü o a chimanür seni lepöün ekkewe aramasingaw.
11Saram a tinetiw wón ekkewe chón pwüng; pwal pwapwa a feittiw wón chókana mi föri minne mi pwüng.
12Öüpwe pwapwa lón ewe SAMOL, ämi chón pwüng, o kilisou ngeni itan mi pin.
Köölfel 98
Echö köölün mwareiti ewe SAMOL ren an alen ngaseló me pwüngün köpwüng. Echö köölfel.
1Öüpwe köölüw echö kööl mi fö ngeni ewe SAMOL, pün i a föri ekkewe föfför mi amwarar. I a wiil o pwora ren pöün mi manaman o pin.
2Ewe SAMOL a esilefeili porausen an wiil, a pwal pwääraló an pwüng ngeni chón ekkewe mwüü.
3I a chechchemeni an pwon pwe epwe tongei me ölükülük ngeni chón leimwen Israel; aramasen fönüfan meinisin seni esóp tori pwal esóp ra fen küna än ach we Kot alen ngaseló me pwora.
4Öüpwe mweireiren pwapwa ngeni ewe SAMOL, ämi aramasen fönüfan meinisin, öüpwe mweiretä lón ämi kööl; öüpwe pwapwa o köölün mwareiti.
5Öüpwe kööl ngeni ewe SAMOL fiti ewe pisekin likettik itan harp; öüpwe kööl fiti ewe pisekin likettik itan harp me kööl mi ngiiöch,
6pwal fiti tikin rappwa me mächään ätemwänin siip usun rappwa. Öüpwe mweireiren pwapwa me mwen ewe SAMOL, ewe King.
7Ewe mataw me meinisin mi nóm lón repwe mweiren mwareiti i! Fönüfan me mettóch meinisin mi wor manaw lóór repwe pacholong le mwareiti i.
8Ekkewe chaanpwüüpwu repwe alopwolopw ren ar pwapwa, ekkewe chukutekisón repwe kööl fengen ren ar pwapwa;
9repwe kööl me fän mesen ewe SAMOL, pün i a wareto pwe epwe öpwüngü fönüfan. I epwe öpwüngü fönüfan fän öpwüngüwen, epwe öpwüngü ekkewe mwüü fän wenechchar.
Köölfel 99
Mwareiti ewe SAMOL ren an pin.
1Ewe SAMOL a nemenem, chón ekkewe mwüü repwe chechchech; i a móót wón an leenien móótun nemenem lefiilen ekkewe keropim, unusen fönüfan a chüngüchüng.
2Ewe SAMOL a tekia me lón Zion; i a tekiatä asen chón ekkewe mwüü meinisin.
3Iir repwe mwareiti itom mi lapalaap o eniwokkus. I a pin.
4Ewe King a manaman, i a öüchcheani öpwüngüwen. En ka önüküchchara minne a wenechchar; en ka föri óm föfför fän wenechchar me pwüng me lón Jacob.
5Öüpwe etekiatä ewe SAMOL ach Kot; öüpwe chappetiw órun ewe leeni ia a anómwu pecheen wón, pün i a pin.
6Moses me Aaron iir leiin nöün kewe souasór; pwal Samuel i emön leiin chókana mi köri itan; iir ra kööri ewe SAMOL, nge i a pölüweniir.
7I a kapas ngeniir seni ewe üren kuchu; iir ra öpwönüetä an kewe öllük me öüröür i a ngeniir.
8SAMOL äm Kot, en ka pölüweniir; en emön Kot mi omwusaló tipis ngeni Israel, inamwo are en ka öpwüngü ar föfför mi mwääl.
9Öüpwe etekiatä ewe SAMOL ach Kot o fel ngeni i me wón chukun we mi pin; pün ewe SAMOL ach Kot a pin.
Köölfel 100
Echö kölün mwareiti ewe SAMOL ren an ölükülük ngeni nöün aramas. Echö köölfel fäniten kilisou.
1Öüpwe mweireiren pwapwa ngeni ewe SAMOL ämi ekkewe fönü meinisin.
2Öüpwe fel ngeni ewe SAMOL fän pwapwa; öüpwe feitto mwan fän köölün pwapwa.
3Öüpwe silei pwe ewe SAMOL i Kot; i ewe a föri kich, nge kich nöün; kich nöün aramas, öükich ekkewe siip lón an we mälämäl ia a wor fetil ie.
4Öüpwe tolong me lón ekkewe asamalapen ewe telinimw fän ämi kilisou; öüpwe tolong lón ekkewe leenien emwiicheich fän ämi mwareiti; öüpwe kilisou ngeni i o mwareiti itan.
5Pün ewe SAMOL a mwirinnö; an tong a nónnóm tori feilfeilló chök; an ölükülük a tori pilóón aramas meinisin.
Köölfel 101
Pwonen ölükülük ngeni ewe SAMOL. Echö köölfel än David.
1Ngang üpwe köölüw usun óm tong me óm öpwüngüwen; ngenuk äi SAMOL, ngang üpwe köölün mwareituk.
2Ngang üpwe tümwünü fichi pwe üpwe manaweni ew manaw esap wor itengawan. Ineet kopwe feitto reei? Ngang üpwe fätäl fän wenechcharen letipei me lón pwisin imwei.
3Ngang üsap anómwu me mwen mesei och mettóch mi lamwotongaw. Ngang üwa opwut meet ekkewe aramas mi lükülükümang ra föri; ngang üsap mochen üpwe pacholong lón ekkana föfför mi ngaw.
4Ngang üpwe atoowawaló seniei ew letip mi tipeförea; ngang üsap mochen silei och mettóch mi ingaw.
5Ngang üpwe afanafanalói emön aramas mi eitengawa chón órun lemwónómwón; ngang üsap fanengeni emön mi mese lamalamtekia me emön mi lamalamtekia lón lelukan.
6Mesei repwe fót wón chókana mi ölükülük me lón ewe fönü, pwe iir repwe nónnóm reei; nge emön mi unusöch fäffätälin epwe angang ngeniei.
7Esap wor emön mi föfföri angangen otupwutupw epwe nóm reei lón imwei; esap wor emön mi kapas chofona epwe üütä fän mesei.
8Iteiten lesossor ngang üpwe afanafanalói ekkewe aramasingaw meinisin mi nóm lón ei fönü; ngang üpwe ösüüeló iteiten chón föfföringaw menisin seni än ewe SAMOL we telinimw.
Köölfel 102
Än ewe SAMOL tong esap mwüch. Än emön chón riäfföü iótek lupwen i a kok lón riäfföü nge a inätiw an kewe riäfföü me mwen ewe SAMOL.
1Äi SAMOL, kopwe rongorong äi iótek; kopwe öüseling ngeni äi siö fäniten älillis.
2Kosap aopaló wón mesom seniei lupwen fansoun ngang üwa nóm lón riäfföü. Kopwe öüüw selingom ngeniei o mwittir pölüweniei lupwen ngang üwa kökköruk,
3pün ränin manawei ra chök mwittir móróló usun ötüötün ekkei; nge chüüi kana ra kü usun ekkan wesen ekkei mi kü.
4Letipei a aioloololó o pwaseló usun fetil; ngang üwa möllükaló pwe üpwe mwöngö enei mwöngö.
5Lón äi riäfföü ngang üwa osommóng le ngüüngü, ngang üwa kichchüüchüló, ünüchchei a chök pacheri chüüi.
6Ngang üwa usun emön füküron lón fönüpöön; ngang üwa usun emön füküro mi nóm lón ew leeni mi taatakkis.
7Ngang üwa chök kóón nge neló; ngang üwa usun emön maansüüsü mi chök äkkälämön wón ungen ew imw.
8Lón unusen langattamen ewe rän, ekkewe chón opwutaei ra chök ämängawaei; chókana mi kapasingaw usi ra ääni itei le óttek.
9Ngang üwa mwöngö falangen ekkei pwe ekkesiwilin enei mwöngö o nofiti chönün mesei ngeni ünümei,
10pwokiten óm soong me óm lingeringer, pün en ka pwisiieitä o oturuweiwu.
11Ränin manawei ra mwittir süüló usun chök och nür lekuniól; ngang üwa aioloololó usun fetil.
12Nge en, äi SAMOL, ka móót wón óm leenien móótun nemenem tori feifeilló chök; en kopwe chem meren ekkewe pilóón aramas meinisin.
13En kopwe pwäätä o ääni kirekiröch ngeni Zion, pün iei a tori fansoun óm kopwe pwääräló óm ümöümöch ngeni; iei a tori ewe fansoun en ka pwon pwe kopwe älillis.
14Pün noum kewe chón angang ra echeni iteiten föün tittin Zion; ra pwärätä ar tongei ewe pwül mworomworen lón ekkewe alen Zion.
15Iwe, chón ekkewe mwüü repwe meniniti iten ewe SAMOL o ekkewe kingen fönüfan meinisin repwe nuokkusiti an ling.
16Pün ewe SAMOL epwe öüüwsäfälietä Zion o epwe pwääló lón an ling.
17I epwe öüseling ngeni än ekkewe mi mweleele iótek; i esap opwut ar tungór.
18Iei meet epwe makketiw fäniten ekkewe pilóón aramas lón fansoun epwe feitto, pwe ew mwiichen aramas resap mwo fis repwe tongeni mwareiti ewe SAMOL.
19Öüpwe üreniir pwe ewe SAMOL a nennetiw seni lón imwan mi pin lón läng; i a nennetiw wón fönüfan seni läng,
20pwe epwe rongorong ngüüngün ekkewe chón föötek; pwe epwe epichaló chókana mi köpwüngüló pwe repwe mäló.
21Ina minne, aramas repwe efisi apwapwan iteüöchün ewe SAMOL me lón Zion me ar mwareiti i me lón Jerusalem,
22lupwen chómmóng mwiichen aramas repwe chufengen, pwal chón ekkewe mwüü repwe feitto pwe repwe fel ngeni ewe SAMOL.
23I a ataeló äi pöchökkül lukalapaen manawei; a pökümochei ränin manawei.
24Nge ngang üwa siö ngeni o apasa, “Äi Kot mi manaw tori feilfeilló chök, kosap angeeló manawei lupwen ngang mi chök chüen ölüwöl.
25Lón ekkewe fansoun lóóm lóóm, en ka föri lóngólóngun fönüfan o ekkewe läng ikkana förien poum.
26Iir mwo nge repwe taaló, nge en kopwe chök nónnóm tori feilfeilló chök; iir repwe kamweló usun echö üüf; en kopwe ekkesiwilir usun echö mangaku o repwe mesiló,
27nge en kopwe usuusum we chök kosap siiwil, nge ierin manawom resap tongeni mwüchchüló.
28Ekkewe semiriit nöün noum kewe chón angang repwe manaw lón nónnómöch; nöün nöüür kana repwe nüküchchar me fän mesom.”
Köölfel 103
Mwareiti ewe SAMOL ren an kirekiröch. Echö köölfel än David.
1Ngüni, kopwe mwareiti ewe SAMOL; leuti meinisin kopwe mwareiti itan mi pin.
2Ngüni, kopwe mwareiti ewe SAMOL, nge kosap möllükaló an kewe kirekiröch meinisin -
3i a omwusaló óm kana tipis meinisin o amóiló óm samwaw meinisin,
4i a angasa manawom seni peias o ämwärämwära ngenuk kirekiröch me tong,
5i a ämenemenöchük ren ekkewe mettóch mi mwirinnö o asöfö säfäli pöchökkülen leölüwöli usun chök pöchökkülen emön ikel.
6Ewe SAMOL a föri föfförün pwüng me öpwüngüwen fäniten meinisin mi riäfföü.
7I a pwääri sókósókun ngeni Moses, a pwal pwääri an kewe föfför ngeni ekkewe aramasen Israel.
8Ewe SAMOL a kirekiröch me uren ümöümöch, i a songommang o uren tong ese mwüch.
9I esap öpwüngü aramas fansoun meinisin, esap pwal ömwöchü an soong tori feilfeilló chök.
10I esap föri ngeni kich üküükün minne mi fich ngeni ach kana tipis, esap pwal liwini ngeni kich üküükün ach kana föfföringaw.
11Pün usun tekian ekkewe läng seni fönüfan, iei usun tekian an tong enlet fäniten chókana mi nuokkusiti i.
12Usun toowawen öötiw seni lotow, iei usun toowawen an ömwökütaló ach pwuupwungaw seni kich.
13Usun än emön saam tongei nöün kana; iei usun än ewe SAMOL a pwääri an tong ngeni chókana mi nuokkusiti i;
14pün i a silei ifa usun ach sia för, i a chechchemeni pwe kich pwül echök.
15Manawen aramas a wewe ngeni fetil, ra sóólóló usun epö pöön irän lemal,
16ewe äsäpwääl a eniló wón, iwe, esap chüen nóm, o esap chüen chechchemeni leenian.
17Nge än ewe SAMOL tong enlet, seni fansoun esepwop tori feilfeilló chök, a nónnóm wón chókana mi nuokkusiti i, pwal an pwüng a tori nöün nöüür,
18ngeni chókana mi öpwnüetä an pwon o chechchemeni pwe repwe älleasochisi an kewe öllük!
19Ewe SAMOL a önüküchchara an leenien móótun nemenem lón läng; mwüün a nemenen wón meinisin.
20Öüpwe mwareiti ewe SAMOL, ämi nöün chón läng kana; ämi ekkewe mi pwora mi föri an kapas; ämi mi älleasochis ngeni möngüüngün an kapas.
21Öüpwe mwareiti ewe SAMOL, ämi meinisin nöün mwiichen soufiun läng mi angang ngeni i o föri letipan.
22Öüpwe mwareiti ewe SAMOL ämi förian kana meinisin; ekis meinisin lón mwüün. Ngüni, kopwe mwareiti ewe SAMOL!
Köölfel 104
Mwareiti ewe SAMOL mi nemeni mettóch meinisin fäniten i a föri me tümwünü förian kana.
1Ngüni, kopwe mwareiti ewe SAMOL. O SAMOL äi Kot, en ka fókkun lapalaap; en ka üföüf ling me manaman.
2Ewe SAMOL a pwisin finitaló i lón saram usun chök echö üüf; i a emeresaló ekkewe läng usun chök ew imw mangaku
3o a anómwu tinöwün an kewe ruumwen asan wón ekkewe kuchun üüt. I a föri ekkewe kuchu pwe wan wóóken, i a wawa pöükässin äsäpwääl.
4I a föri äsäpwääl pwe nöün chón ökkünö, ngetengeten ekkei pwe nöün chón angang.
5I a anómwü fönüfan wón lóngólóngun kewe; esap tongeni epwe mwökütüküt.
6En ka pwölüweló fönüfan ren kóluk mi alóllóól usun chök nge ka pwölü ngeni echö üüf; ekkewe kóluk ra pwölüweló ekkewe chuuk.
7Nge ren möngüngün óm kapasen ffön ekkewe kóluk ra sü, ren möngüngün chopulapen óm kapas ra mwittir süüló;
8ra pwuutiw seni wón ekkewe chuuk, ra feittiw lón ekkewe leemólun ngeni ewe leeni ia en ka filätä fäniter.
9En ka öükaló kiänin ekkewe mataw ia resap tongeni repwe luuló seni, iei minne, resap chüen pwölüw säfälieló fönüfan.
10I a föri ekkewe pwuachchen kóluk pwe repwe pwuupwu lón ekkewe warawar lefiilen chuuk, iei minne, ekkewe pwuupwu ra pwuupwutiw seni wón ekkewe chuuk.
11Ekkewe pwuupwu ra awora kóluk fäniten ünümen ekkewe maanün lón mälämäl meinisin; ekkewe dongki ra äwesi ar kaaka ren.
12Ekkewe maansüüsün fän läng ra fas órun ekkewe pwuupwu o ra tittik me leiin palen ekkewe irä.
13I a öpüngätiw üüt wón ekkewe chuuk seni lón leenian lón läng; fönüfan a menemenöch ren üwään an angang.
14I a öpwükäätä fetil pwe repwe määritä fäniten ekkewe kowu, pwal ekkewe irä fäniten aramas pwe epwe fótukiretiw, pwe i epwe tongeni aworato mwöngö seni ewe pwül,
15pwe epwe wor wain epwe apwapwai letipen aramas, pwal löömmis pwe epwe emmisi ngeni wón mesan me pilawa pwe epwe öpöchökkulätä letipen aramas.
16Ekkewe irä än ewe SAMOL ra atüütü ren chómmóng kóluk; ekkewe irä iter sedar lón Lebanon i a fótukiretiw.
17Ekkewe maansüüsü ra sseni faser wón ekkewe irä; ewe määnsüüsü usun öröpwech a föri leenian wón ekkewe irä iter pain.
18Ekkewe chuuk mi tekia ra fisitiw pwe leenien ekkewe kuuch mi mwacho; ekkewe achaw mi säpereper ra och leenien op fäniten ekkewe maan iter kooni.
19I a föri ewe maram pwe epwe esissila ekkewe kinikinin fansoun, nge ewe akkar a silei ineet epwe tupwutiw.
20En ka awarato rochopwak, iwe, a wor pwiin, ina atun meinisin ekkewe maanün leiin wollap ra ännif feil.
21Ekkewe liälifföön laion ra wörüwör lupwen ra kütta minne repwe liäpeni o kütta eneer mwöngö seni Kot.
22Lupwen ewe akkar a töötä, ra opoló; ra liwinsäfäl o kónnóló lón pwangeer kewe.
23Mwirin, aramas a feilló ngeni an angang, ngeni angang weires tori lekuniól.
24Äi SAMOL, a ifa me chómmóngun óm kewe angang! En ka föriir meinisin lón óm tipächchem; fönüfan a ur ren förióm kana.
25A wor ewe mataw, a fókkun wätte o chöölap, a fókkun masow ren sókkun mönümanaw resap tongeni repwe lea; mettóch mi manaw mi wätte me kükkün.
26Ra wor ekkewe siip ra sääiló me sääito, pwal ewe maan itan leviathan en ka föri pwe epwe kukkunow lón ewe mataw.
27Meinisin ekkeei ra chök nennengenuk pwe kopwe ngeniir ener mwöngö lón fansoun mi fich.
28Lupwen en ka awora ngeniir eneer mwöngö, iir ra wiisen ioni fengeni; lupwen en ka suukaló pöum, iir ra mötüló ren ekkewe mettóch mi mwirinnö.
29Lupwen en ka aopa wón mesom seniir, iir ra nuokkus; lupwen ka angei seniir ar enienin ngasangas, ra mäló o liwin säfäliti ar pwül mworomwor.
30Lupwen en ka tiinato Ngünum, ra förütä o en ka asöfösäfäli ewe pwül.
31Amwo lingen ewe SAMOL epwe nónnóm tori feilfeilló chök; amwo ewe SAMOL epwe pwapwa ren an kewe föfför.
32Fönüfan a chechchech ren an attola; ekkewe chuuk ra ötüöt ren an attaper.
33Ngang üpwe kööl ngeni ewe SAMOL lón ränin manawei meinisin; ngang üpwe köölün mwareiti äi Kot tori ngasangasei epwe mwüchchüló.
34Amwo meinisin minne üwa leechüüni lón letipei epwe apwaapwai letipen ewe SAMOL, pün ngang üwa pwapwa lón ewe SAMOl.
35Nge ekkewe chón tipis repwe móróló seni wón fönüfan o ekkewe aramasingaw resap chüen nóm.
Ngüni, kopwe mwareiti ewe SAMOL! Mwareiti ewe SAMOL!
Köölfel 105
Än ewe SAMOL ölükülük esap mwüchchüló.
1Öüpwe kilisou ngeni ewe SAMOL o arongafeili itan; öüpwe esilefeili leiin chón ekkewe mwüü pwe repwe silei meet i a föri.
2Öüpwe kööl ngeni i, öüpwe köölün mwareiti i; öüpwe aporausa usun än kewe föfför mi amwaraar meinisin.
3Öüpwe pwapwa lón itan mi pin; letipen chókana mi kütta ewe SAMOL repwe pwapwa.
4Öüpwe chök kütta ewe SAMOL me an pöchökkül; öüpwe kütta wón mesan fansoun meinisin.
5Öüpwe chechchemeni ekkewe föfför mi amwaraar i a fen föri, an kewe manaman me ekkewe pwüngün köpwüng i a öpwüngaló,
6ämi nöün kewe chón angang, ekkewe mwirimwirin Abraham, nöün kewe i a filiiretä, ekkewe nöün Jakob.
7I ewe SAMOL ach Kot; an nemenem a nóm lón unusen fönüfan meinisin.
8I a chechchemeni an pwon tori feilfeilló chök. I a chemeni an kapas i a öllük ngeni ngöröwün pilóón aramas,
9iei ewe pwon i a ääni ngeni Abraham, ewe pwon i a ääni fän ökköpöl ngeni Isaak.
10I a önüküchchara an pwon ngeni Jakob pwe epwe ew öllük, a önüküchchara an pwon ngeni Israel pwe epwe ew pwon esap mwüch tori feilfeilló chök.
11A apasa, “Ngang üpwe ngenuk ewe fönü Kanaan pwe kopwe fönüweni.”
12I a ääni ei pwon lupwen ra chüen chök chóó kisikiis iteiter, wesewesen ew chök kükkün mwiichen waasöla lón Kanaan,
13iir ra chök siamwüfeil seni ew fönü ngeni pwal ew fönü, seni ew mwüü ngeni pwal ew.
14Nge i esap chök mwüüt ngeni emön epwe eriäfföür; fänäsengesir, i a öpwüngü ekkewe king o apasa:
15“Öüsap attapa ekkeei aramas mi kepit; öüsap efeiengawa neii kana soufós.”
16I a köörato ew lengita wón ewe fönü Kanaan o arosaló meinisin alen woren ener mwöngö;
17i a tiinaló emön mwän pwe epwe akkomwoló mweer Egypt, ewe mwän itan Josef, ätewe ra amöömöló pwe epwe emön amanaw.
18Iwe, me ikenan lón imwen föötek, ra emeteki pecheen ren ar fööti ngeni ekkewe seli mächä o atolonga üwan lón och ring seni mächä,
19tori an a pwönüwetä meet i a apasa me mwan, tori än ewe SAMOL kapas a äletätä pwe ätei a wenechchar.
20Ewe king a tiiti Josef o ra epichaló i pwe epwe ngasaló, ewe samolun ewe mwüü a omwusawu i.
21Ewe king a seikätä ätei pwe epwe mastan lón imwan we, epwe samolun pisekin ewe king meinisin,
22pwe epwe öüröüra nöün ewe king kewe samol seni pwisin letipan o äööw tipächchem ngeni nöün ewe king kewe souakkomw.
23Mwirin, Israel a wareiti Egypt; Jakob a nónnnómun emön chón ekis me lón ewe fönüen Ham.
24Ewe SAMOL a föri pwe nöün kewe aramas repwe up; i a föri pwe repwe chómmóngóló lap seni chón opwuter kana,
25i a kulluw letiper pwe repwe opwut nöün kewe aramas, pwe repwe rawangawei nöün kewe chón angang.
26I a tiinaló Moses nöün we chón angang, me Aaron ätewe i a filätä.
27Iir ra föri an kewe esissil mi manaman me leiin ekkewe chón Egypt, an kewe föfför mi amwawaar me lón ewe fönüwen Ham.
28I a tiinaló rochopwaak o föri pwe ewe fönü epwe kiroch - pün ifa usun, iir resap üleförea le üüngeni an kewe kapas?
29I a siwili ar kewe kólik ngeni chcha, iei popun ekkewe ikenen lóór ra mäló.
30Fönüer we a pwölüló ren pwiin käirü, ra tölong lón än ewe king kewe ruumwen möür.
31I a kapas, iwe, pwiin lóóng ra wareto, pwal mönün mwooi ra ässifeil leemelen fönüwer we.
32I a siwili üüt ngeni üten faaw, fiti fiifin inefi leemelen ewe fönü;
33i a ataetiw ar kewe irän wain me irä fiik o ataatakkisi irän fönüer we.
34I a kapas; iwe, ekkewe pwiin liffichimas ra war, liffichimas resap tongeni lea;
35iir ra eitaló le eni iteiten mettóch meinisin mi pwükütä me lón ewe fönü, ra enaló meinisin minne mi fótutiw wón ar kewe pwül.
36Mwirin, i a niieló ekkewe mwännichi meinisin me lón fönüwer we, ikkeiir mesemwetän nöür le pöchökküler.
37I a emmwenawu Israel fän oser silifer me kolt, esap wor emön aramas me leiin chón ar kewe einang a chepetek.
38Egypt a pwapwa lupwen iir ra toowu, pwokiten eniwokkusun Israel a püngütiw wór.
39I a emeresaló ew kuchu wóór pwe epwe fis pwe pwölüpwölür, pwal och ekkei pwe epwe asaramer lepwin.
40Iir ra tungór, nge i a tiinato reer ewe sókkun maansüüsü itan kweil; i a amwöngönöchchür ren ewe pilawa seni läng.
41I a suukaló ewe achaw; iwe, kóluk a pwuuwu; a pwuupwu usun ew chaanpwuupwu me lón ewe fönüpöön.
42Pün i a chechchemeni an pwon mi pin ngeni nöün we chón angang Abraham.
43I a emmwenawu nöün kewe aramas fän pwapwa, nöün kewe aramas i a filiiretä fän mweireiren pwapwa;
44i a ngeniir fönüen chón ekkewe mwüü, iwe, iir ra älemwiri meet ekkóch ra pekkus le angang fänitan -
45pwe iir repwe älleasochisi an kewe pwüüng o öpwönüwetä an kewe öllük. Öüsipwe mwareiti ewe SAMOL!
Köölfel 106
Pwapwa ren än chón Israel kana tipis ra mwusóló.
1Öüsipwe mwareiti ewe SAMOL. Öüsipwe kilisou ngeni ewe SAMOL, pün i a kirekiröch. An tong ese mwüch mi ölükülük a nónnóm tori feilfeilló chök.
2Iö a tongeni esilefeili än ewe SAMOL kewe föfför mi manaman, ika arongafeili unusen ach mwareiti?
3Ra feiöch chókewe mi föri minne mi wenechchar ngeni ekkóch o föri meet mi pwüng fansoun meinisin.
4Kopwe chechchemeniei, äi SAMOL, lupwen kopwe pwääri óm ümöümöch ngeni noum kewe aramas; kopwe älisiei lupwen en kopwe angasereló,
5pwe ngang üpwe tongeni nennengeni feiöchün noum kewe en ka filiiretä, pwe ngang üpwe tongeni pwapwa lón ewe pwapwa än mwuum we, pwe ngang üpwe tongeni elingókeló fiti chókana iir älemwirum.
6Äm äia tipis, usun chök minne äm kewe leewo ra föri; äm äia föri minne mi mwääl o föri föfför mi ngaw.
7Lupwen äm kewe leewo ra nóm Egypt, resap ekieki usun óm kewe manaman; resap chechchemeni óm kewe föfförün kirekiröch mi chómmóng; nge iir ra üleförea o üüngenuk me órun ewe mataw, ewe Setipar.
8Iei mwo nge i a angaser fänäsengesin itan, pwe epwe föri pwe aramas repwe silei an manaman mi lapalaap.
9I a öpwüngü ewe Setipar, iwe a pwasatä; i a emmwenireló lón ewe mataw mi alóllóón usun chök nge ew fönüpöön.
10I a chimanür seni lepöün chón opwuter; i a angaser seni ekkewe chón pölüweniir.
11Ewe säät a pwölüweló chón opwuter kewe; esap wor emön leiir a manaw.
12Mwirin, iir ra lükü an kewe pwon o ra köölün mwareiti i.
13Nge ra mwittir möllükaló meet i a fen föri nge resap witiwiti an akkóót epwe suuk ngeniir.
14A toriir mocheniän ar nger me lón ewe fönüpöön; ra sótuni Kot me lón ewe fönü mi pwasapwas.
15Ina pwata, i a ngeniir meet ra tungór fänitan, nge a tiinato leiir och samwaw inisir epwe kinniló ren.
16Me lón ewe leeni ia ra köüütä imwer imw mangaku ie, ra lólówó ngeni Moses pwal ngeni Aaron, ewe mi epinipiniló fäniten ewe SAMOL.
17Ewe pwül a saangfesen o oromaló Dathan; a pwal ireeló chiechien Abiram kewe.
18Ekkei a ngetewu me leiin chókewe mi tapweló mwiriir; och ngetenget a kenaló ekkewe aramasingaw.
19Me lón Horeb iir ra föri och uluulun liälifföön kowu o ra fel ngeni och uluulun önümwäl mi för seni kolt.
20Iir ra ekkesiwili ar we Kot mi ling ngeni och uluulun emön ätemwänin kowu mi mwöngö fetil.
21Iir ra möllükaló ewe Kot mi angaser, i ewe mi fen föri ekkewe mettóch mi lapalaap me lón Egypt,
22ekkewe manaman me lón ewe fönüen Ham me ekkewe föfför mi eniuokkus me arun ewe Setipar.
23Ina pwata i a apasa pwe epwe arosereló - nge Moses, ewe emön i a filätä, mi nóm fän mesan a üütä pwe epwe eppetiir seni än Kot soong pwe esap arosereló.
24Mwirin, ekkewe aramas ra opwut ewe fönü mi mwirinnö; pün resap lükü an we pwon ngeniir.
25Iir ra tuno ngününgün me lón imwer kewe imw mangaku o resap mochen äleasochisi ewe SAMOL.
26Iei minne, i a pwon ngeniir fän ökköpöl pwe iir repwe mäló me lón ewe fönüapö,
27i epwe föri pwe mwirimwirir kana repwe mäló me leiin chón ekkewe mwüü o atoropassafeilir leemelen ekkewe fönü.
28Mwirin, iir ra pwisin ämwererelong pwe repwe aköökö fengen me ekkewe chón fel ngeni ewe önü Baal me lón Peor. Ra mwöngö ekkewe asór ra ääni asór ngeni ekkewe kot esap wor manaw lóór;
29ra epiietä än ewe SAMOL soong ren ar kewe föfför mi ngaw meinisin, ina minne, och mätter a tter feil lefiiler.
30Nge Finehas a üütä o tolong lefiil ren an angangen afföör, mwirin, ewe mätter a ükütiw.
31Ren ei föfför, a ällea pwe i emön chón pwüng seni ew tettelin pilóón aramas tori pwal ew tettelin pilóón aramas feilfeilló chök.
32Me arun ekkewe kólik lón Meribah, ekkewe aramas ra asoonga ewe SAMOL, iwe, osukosuk a tori Moses pwokiter;
33pün iir ra üüngeni ewe Ngünün Kot, iwe, kapas mi pöchökkül ra toowu seni tinnawen Moses.
34Iir resap arosaló ekkewe aramas mi nóm lón ewe fönü usun minne ewe SAMOL a fen öllük ngeniir,
35nge iir ra fen efitiar fengen me chón ekkewe mwüü o ra angei ar kewe öörüni mi ngaw.
36Iir ra fel ngeni ar kewe uluulun önümwäl, iei meet a wiliti pwe ew likottupw ngeniir.
37Iir ra ääni asór nöür kewe äät me nöür kewe nengngin ngeni ekkewe kot mi chofona.
38Iir ra össükaló chcha esap wor tipisin, chaan nöür kewe äät me nengngin, iir ra ääniir asór ngeni ekkewe uluulun önüün Kanaan, iwe ewe fönü a limengaweló ren chaar.
39Iir ra pwisin elimengawer ren meet ra föri; ren ar kewe föfför iir ra pwisin föri föfförün chón lisowu.
40Iei minne, ewe SAMOL a soong ngeni nöün kewe aramas o a enniopwutäsini älemwirin kewe.
41I a atolonger lepöün chón ekkewe mwüü, iwe, chókana mi opwut iir ra nemeniir.
42Chón opwuter kewe ra eriäfföür o ra anówmur fän ar nemenemengaw.
43Fän chómmóng ewe SAMOL a angaser, nge iir ra chök sópweló lón ar üleförea o ra feiengaw lón ar tipis.
44Iei mwo nge i a tonger lón ar riäfföü lupwen i rongorong ar siö;
45fänäsengesir, i a chechchemeni an pwon ngeniir o a omwusereló pwokiten an tong ese mwüch.
46I a popuw pwe meinisin ekkewe chón liäpeniir repwe ääni föfförün kirekiröch ngeniir.
47Kopwe amanawa keem, SAMOL äm Kot, kopwe ionisäfäli keem seni leiin ekkewe mwüü, pwe äm äipwe tongeni kilisou ngeni itom mi pin, aipwe pwapwa lón äm mwareituk.
48Öüpwe mwareiti ewe SAMOL, ewe Koten Israel seni fansoun ese pwop tori feilfeilló chök. Aramas meinisin repwe apasa, “Amen!” Öüsipwe mwareiti ewe SAMOL.
PWUK 5
Köölfel 107 - 150
Köölfel 107
Kilisou ngeni ewe SAMOL ren an angangen angasaló aramas mi riäfföü.
1Öüpwe kilisou ngeni ewe SAMOL pün i a fókkun mwirinnö, an tong mi ölükülük a nónnóm tori feilfeilló chök.
2Ekkewe mi ngasaló meren ewe SAMOL repwe apasa iei usun, chókewe i a angasereló seni chón opwuter kana,
3o ioniireto seni ekkewe fönü ia ra ooló ie, seni öötiw me seni lotow, seni efeng me seni öör.
4Ekkóch ra chök tókótók feil lón ewe fönüpöön nge resap küna efóch aal ngeni ewe telinimw ia repwe tongeni wilipósóló ie.
5Iir ra echik o kaaka o ra chök arap ngeni repwe mäló.
6Mwirin, ra siö ngeni ewe SAMOL lón ar osukosuk nge i a chimanür seni lón ar riäfföü.
7I a emmweniir wón efóch aal mi wenechchar ngeni ew telinimw ia repwe tongeni wilipósóló ie.
8Iir repwe kilisou ngeni ewe SAMOL pwokiten an tong esap mwüch me an kewe föfför mi amwaraar ngeni aramas,
9pün i a öünü ekkewe mi kaaka o amwöngöw ekkewe mi echik ren mettóch mi mwirinnö.
10Ekkóch aramas ra móót lón rochopwak me lón nürün mäló, iir chón föötek mi fööfö ngeni sein mächä,
11pwokiten ra üüngeni än Kot kewe kapas o opwut ekkewe kapasen öüröür än ewe mi Unusen Tekia.
12Iei minne, i a atolonger fän angang weires; ra turuló nge esap wor emön epwe älisiir pwe repwe üütäsäfäl.
13Mwirin, ra siö ngeni ewe SAMOL lón ar osukosuk nge i a amanawer seni lón ar riäfföü.
14Iwe, i a emmwenirewu seni lón rochopwak me nürün mäló o a mwüütaló fööför kewe sein.
15Iir repwe kilisou ngeni ewe SAMOL pwokiten an tong ese mwüch me an kewe föfför mi amwaraar ngeni aramas,
16pün i a ataetiw asamalapen tiitin ewe imwen föötek mi för seni piras o a pöküwetiw ekkewe ömmwöch mi för seni mächä.
17Ekkóch aramas mi umwes lón ar üleförea, ra tolong lón riäfföü fäniten ar kewe tipis.
18Iir resap chüen mwóón mwöngö, o ra arap ngeni ekkewe asamalapen tittin mäló.
19Mwirin, ra siö ngeni ewe SAMOL lón ar osukosuk nge i a amanawer seni lón ar riäfföü.
20I a tiinaló an kapas o echikareretä; i a chimanü iir seni peias.
21Iir repwe kilisou ngeni ewe SAMOL ren an tong ese mwüch me an kewe föfför mi amwaraar ngeni aramas.
22Repwe pwal ääni asóren kilisou o aporausa usun an kewe föfför ren köölün pwapwa.
23Ekkóch aramas ra sääi lemataw wón ekkewe siip; iir ra föri ar angangen amöömö wón ekkewe mataw mi lapalaap.
24Iir ra küna ekkewe föfför än ewe SAMOL, an kewe angang mi amwaraar lón ekkewe mataw mi alóllóól.
25Pün i a kapas o a efisätä ew mölümöl mi anóónóetä ekkewe nóó mi tekia.
26Waar kewe siip ra kekiitä fän läng o turusäfälitiw tori fänilólen mataw; lón ar feiengaw ar pwora a teliló seniir.
27Ra päipäifätäl o tokorikirikfeil usun chón pwulaas; a pineló ar ekiek resap silei meet repwe föri.
28Mwirin, ra siö ngeni ewe SAMOL lón ar osukosuk nge i a amanawer seni lón ar riäfföü.
29I a ölüwaeló ewe mölümöl tori a usun chök nge och mwöngününgün; ekkewe nóón lemataw ra fanafaneló.
30Ekkewe aramas ra pwapwa lupwen a lüwaló, nge i a emmweniir ngeni ewe ia ra mochen repwe ileiti.
31Iir repwe kilisou ngeni ewe SAMOL ren an tong ese mwüch me an kewe föfför mi amwarar ngeni aramas.
32Iir repwe etekiatä i me fän mesen ewe mwiichen aramas, repwe mwareiti i me fän mesen ekkewe souakkomwen ewe mwüü.
33I a ewili ekkewe chaapwuupwu ngeni fönüpöön, a pwal ewili ekkewe leenien pwuachchen kóluk ngeni pwül mi pwasapwas,
34i a ewili ew fönü mi uwaöch ngeni ew fönü mi uren salt o lamwotongaw, pwokiten föfföringawen chókewe mi nónnóm ikenan.
35Nge i a pwal ewili ew fönü mi pöön ngeni ew nóómwun kóluk, a pwal ewili ew fönü mi pwasapwas ngeni leenien pwuachchen kóluk mi pwuupwu.
36I a uweato ekkewe chón echik pwe repwe lefönüló ikenan o öüüwetä ar kewe telinimw pwe repwe tongeni wilipósóló ikenan.
37Ekkewe aramas ra amwora föün irä lón ekkewe tännipi o fótukätiw ar kewe tännipin irän wain mi aworato ew fansoun kinikin mi wätte.
38I a efeiöchür o ra chómmóngóló, nge i esap mwüüt ngeni nöür kewe pwiin kowu pwe repwe chókükkünüló.
39Lupwen ekkewe aramas ra chókükkünüló o ra tekisónetiw ren ar tolong lón riäfföü, weires me letipeta,
40ewe SAMOL, ewe mi niinätiw itengaw wón ekkewe aramas tekia, a föri pwe repwe tókótókfeil lón ewe fönüpöön ia esap wor efóch aal ie.
41Nge i a chimanüw ekkewe chón osupwang seni lón ar riäfföü o a achómmóngaló ar kewe famili pwe ra usun chök chómmóngun pwiin siip.
42Ekkewe chón pwüng repwe küna ekkeei mettóch o repwe pwapwa, nge ekkewe aramasingaw meinisin repwe chök fanafanaló
43Ewe emön mi miriit epwe äfälli ekkeei mettóch o ekieki lón letipan ekkewe föfförün tong än ewe SAMOL.
Köölfel 108
Älelleten än Kot pworaiti chón opwutan kana. Echö kööl. Echö köölfel än David.
1Letipei a nüküchchar O Kot. Ngang üpwe kööl o ääni köölün mwareituk ren unusen ngüni.
2Öüpwe pwök ämi ekkewe pisekin likettik itemi harp me layer! Ngang üpwe föngünätä ewe mallen rän ren äi kööl.
3Ngang üpwe kilisou ngenuk, äi SAMOL, me fän mesen ekkewe aramas meinisin; ngang üpwe köölün mwareituk me leiin chón ekkewe mwüü.
4Pün óm tong ese mwüch a fókkun tekia seni ekkewe läng; óm ölükülük a tekiatä tori ekkewe kuchu.
5Äi Kot, kopwe tekiatä asen ekkewe läng mi tekia; amwo óm ling epwe sarameló wón unusen fönüfan.
6Kopwe amanawa keem o älisi keem ren pöümwänum pwe chókana mi echenuk repwe tongeni ngasaló.
7Kot a fen kapas seni lón imwan mi pin o apasa: “Ngang üpwe inetii Shekem lón äi pwapwan wiil o üpwe kiänieló ewe lemólun Sukkoth.
8Kilead fönüei, Manassah pwal fönüei; Efraim i imwei akkawen maun, Judah i wóki wókun king.
9Moab i sepiei sepien töttöl, ngang üpwe móneeló ipwei sandal wón Edom; ngang üpwe örükaken wiil me wón Filistia.”
10Iö epwe uweieiló ngeni ewe telinimw mi pöchökkül tittin? Iö epwe emmwenieiló ngeni Edom?
11Äi Kot, ifa usun, sapw en ka fen pöütikeemiló o kosap chüen fiti nöüüm kewe mwiichen sounfiu?
12Kopwe älisi keem le maun ngeni ekkewe chon opwuta keem, pün än aramas älillis a lamwotongaw.
13Ren än Kot älillis, kich sipwe wiil, iwe, i epwe pwuurätiw ekkewe chón opwuta kich.
Köölfel 109
Ew tungór pwe Kot epwe öpwüngü ekkewe chón tipitipmwäl. Ngeni ewe chón nemeni kööl. Echö köölfel än David.
1Äi Kot, en ewe ngang üwa mwareituk, kosap chök fanafaneló,
2pün ekkewe aramas mi föfföringaw me uren otupwutup ra suukaló awer o üüngeniei; iir ra eitengawaei ren chönnawer mi kapas chofona.
3Iir ra pwellifeiliei fän ar kapas mi uren kopwut, ra fiu ngeniei nge esap wor popun.
4Ekkesiwilin äi chiechiöch ngeniir, iir ra ettipisiei, nge ngang emön mi sile iótek.
5Iir ra liwini ngeniei meet mi ngaw fäniten äi föfför mi mwirinnö, ra pwal liwini ngeniei kopwut fäniten äi tonger.
6Kopwe filätä emön aramasingaw pwe epwe üüngeni ewe chón opwutaei; kopwe tiinato emön chón otuttur pwe epwe üütä peliifichin lón köpwüng.
7Lupwen epwe köpwüng, epwe toowu pwüngün pwe i a tipis; amwo an kana iótek repwe pwisin ettipisi i.
8Amwo ränin manawan repwe chókükkün; amwo emön epwe siwili lón wiisan wiisen souemwen.
9Amwo nöün kana repwe määsen, nge amwo pwülüwan epwe lipichsäfäl.
10Amwo nöün kana repwe chón mwärä mi chök tókótókfeil; amwo emön epwe ösüüreló seni imwer mi taatakkisitiw.
11Amwo ewe chón angei liwinimmang epwe angei seni meinisin minne a wor ren; amwo ekkewe chón ekis repwe angei fän pöchökkül uwään an angang.
12Amwo esap wor emön epwe ääni kirekiröch ngeni, ika müüti nöün kana mi määsen.
13Amwo mwirimwirin kana repwe rosoló, iter epwe töttölüwu seni ewe pilóón aramas me mwirin.
14Amwo tipisin an kewe leewo repwe chök chemeto me fän mesen ewe SAMOL; amwo tipisin inan we esap tongeni kómóróló.
15Amwo ar kewe tipis repwe chök nónnóm me mwen ewe SAMOL, pwe i epwe tongeni amóieló iter seni fönüfan.
16Pün esap mwo fän ew an epwe ekiekin föri ew föfförün kirekiröch ngeni ekkóch, nge a tapweri ekkewe mi wöwingaw me ekkewe mi osupwang pwal ekkewe mi letiptaatakis pwe epwe niireló.
17I a saani an epwe apasa kapasen önümamawa aramas - amwo ewe kapasen önümamaw epwe liwinsäfäliti. I esap pwapwaiti an epwe efeiöchü aramas- amwo feiöch epwe toowaw seni i.
18An óttek a usun chök üfan; a tolong lón inisin usun chök nge ünüman kólik, a tolong lón chüün kana usun chök nge lómmis.
19Amwo an óttek epwe usun echö üüf mi finitaló i, epwe usun efóch peelit mi föötinüküweló lukalapan feilfeiló chök.
20Amwo epwe ina meet ewe SAMOL epwe liwini ngeni tipisin ekkewe chón ettipisi mwääliei, ina meet epwe liwini ngeni tipisin chókana mi kapas mi ngaw usi.
21Nge en, KOT äi SAMOL, kopwe älisiei fänäsengesin iteüöchün itom; kopwe angasaei seni lón mwirinnön óm tong.
22Pün ngang üwa mweleele o osupwang, letipei a kinas me lón.
23Ngang üwa móróló usun chök och nürün lekuniólupwin; ngang üwa mworotiw usun emön liffichmas emön a pöönätiw seni inisin.
24Pwäsukun pecheei ra apwangapwang ren äi öchüün; inisi a kinniló o kichchüüchüló.
25Ngang üwa och minen turunufas meren ekkewe chón ettipisiei; lupwen ra künaei, ra wichikichiki mökürer.
26Kopwe älisiei, SAMOL äi Kot; kopwe amanawaei alóngólóng wón om tong ese mwüch.
27Kopwe mwüüt ngeniir pwe repwe silei pwe iei meet poum, iei meet en, äi SAMOL, ka föri.
28Lupwen iir repwe óttekiei, amwo en kopwe efeiöchüei; amwo chókana mi efeiengawaei repwe tolong lón itengawen sääw, nge amwo ngang, noum ei chón angang, üpwe pwapwa.
29Amwo ekkewe chón ettipisiei repwe itengaw o repwe finifiniló lón sääw usun lón echö üüf.
30Ren awei ngang üpwe awora äi kilisou mi lapalaap ngeni ewe SAMOL; ngang üpwe mwareiti i me leiin ewe mwiichemmóngun chón fel.
31Pün i a üütä peliifichin ekkewe mi osupwang, pwe epwe seläni manawer seni chókana repwe ettipisiir.
Köölfel 110
Esilesil fäniten än ewe Messiah nemenem. Echö köölfel än David.
1Ewe SAMOL a apasa ngeni äi we samol, “Kopwe móttiw peliifichi tori ngang üpwe föri pwe chón opwutom kana repwe ew leenien pwuun pecheemw.”
2Ewe SAMOL epwe emeresawu manamanen wókum we wókun king seni lón Zion o apasa, “En kopwe nemenem leiin chón opwutom kana!”
3Lón ränin óm kopwe maun ngeni chón opwutom, noum kewe aramas repwe fituk seni pwisin mochenin letiper. Repwe üföüf üüf mi pin, noum kewe ölüwöl repwe feitto reemw, usun omwurenipwin mi püngütiw lesossor.
4Ewe SAMOL a pwon fän ökköpöl o esap siwili an ekiek, “En emön souasór tori feilfeilló chök lón ewe tettelin Melkizedek.”
5Ewe Samol a nóm peliifichum; i epwe ataatakisi ekkewe king lón ewe ränin an lingeringer.
6I epwe öpwüngü ekkewe mwüü, epwe ochukuchukätä ekkewe mi mäló o epwe attaatakisi ekkewe samol wón unusen fönüfan.
7I epwe wün seni ekkewe pwuupwu mi nóm ünükkün ewe aal; iei minne, i epwe echimwätä möküran.
Köölfel 111
Mwareiti Kot ren an ölükülük me an öpwüngüwen.
1Mwareiti ewe SAMOL. Ngang üpwe kilisou ngeni ewe SAMOL ren unusen letipei lupwen ngang üpwe chiechi ngeni nöün kewe aramas mi pwüng.
2A ifa me amwararen än ewe SAMOL kewe föfför! Meinisin mi pwapwaiti i repwe ekieki usur lón letiper.
3Ra ling o manaman an kana föfför, an pwüng a nónnóm tori feilfeilló chök.
4I a popuw pwe aramas repwe chemeni an kewe föfför mi amwaraar; ewe SAMOL a ümöümöch me kirekiröch.
5I a awora mwöngö fäniten chókana mi nuokkusiti i; i a chechchemeni an pwon iteiten fansoun meinisin.
6I a pwääraló ngeni nöün kewe aramas manamanen an kewe föfför, ren an fang ngeniir fönüen chón ekkewe ekkóch mwüü.
7Angangen pöün kana ra ölükülük o wenechchar; an kewe öllük meinisin ra nüküchchar.
8An kewe öllük ra let tori feilfeilló chök, pwe aramas repwe älleasochisir lón ölükülük me wenechchar.
9I a awora ew unusen penmanaw fäniten nöün aramas; i a älelletafichi an pwon ngeniir tori feilfeilló chök - itan a pin o uren ämmäfen.
10Nuokkusiti ewe SAMOL iei lepopun tipächchem enlet; meinisin mi tapweló mwirin an kewe öllük a wor ar weweöch mi mwirinnö. Ngeni i echök, aramas repwe mwareiti tori feilfeilló chök!
Köölfel 112
Feiöchün nónnómwun chón pwüng.
1Mwareiti ewe SAMOL. A pwapwa ewe aramas mi nuokkusiti ewe SAMOL, mi kütta an pwapwa lón an kewe öllük.
2Nöün kana repwe lapalaap me lón ewe fönü; mwirimwirin ekkewe aramas mi wenechchar repwe feiöch.
3Wöw me pisekisek ra nóm lón imwan, nge an pwüng a nónnóm tori feilfeilló chök.
4Lón mwo rochopwak nge saram epwe tin fäniten ewe mi wenechchar, fäniten ewe aramas mi ääni ümöümöch, kirekiröch me pwüng.
5Minne mi mwirinnö epwe tori emön aramas mi fangafangöch o mwüütätä mettóchun nge esap kamö, emön mi föri pwüngün an angang fän pwüng.
6Enlet ewe chón pwüng esap fókkun mwökütüküt; aramas repwe chechchemeni i tori feilfeilló chök.
7Esap wor an epwe nuokkusiti poraus mi ngaw; letipan a pós o a anómwu an apilükülük lón ewe SAMOL.
8Letipan a nükünük, esap wor an nuokkus; lesópólón, i epwe säpengeni chón opwutan kana lón an wiil.
9I a atoropassafeili an kana liffang ngeni ekkewe mi wöwingaw, an pwüng epwe nónnóm tori feilfeilló chök; mächään, wewen, iei manan, epwe tekiatä lón iteüöch.
10Ewe aramasingaw epwe küna o epwe fókkun soong, epwe akkasüngürü niin lón an soong o epwe kinniló; minne ewe aramasingaw a tipeni esap pwönüetä.
Köölfel 113
Än Kot manaman me an etekiatä chón tekisón.
1Mwareiti ewe SAMOL. Öüpwe mwareiti ewe SAMOL ämi nöün chón angang kana; öüpwe mwareiti iten ewe SAMOL.
2Öüpwe mwareiti iten ewe SAMOL, iei o tori feilfeilló chök.
3Seni töötän ewe akkar tori ewe leeni ia a tupwutiw me ia, aramas repwe mwareiti iten ewe SAMOL.
4Ewe SAMOL a tekia asen chón ekkewe mwüü meinisin, lingan a nóm asen ekkewe läng.
5Iö a wewe ngeni ewe SAMOL ach Kot, ewe Emön mi móót wón an leenien móót mi tekia,
6i a pwarootiw pwe epwe nennetiw wón ekkewe läng me fönüfan?
7I a äpwäätäi ekkewe chón wöwingaw seni lón ewe pwül mworomwor o a ekiietä ekkewe mi osupwang seni lón ewe ioien falangen ekkei;
8i a amóóter leiin ekkewe samol, ren ekkewe samolun nöün kewe aramas.
9I a anómwätiw ewe fefin esap wor nöün lón imwan pwe epwe i emön inelapen semiriit mi pwapwa. Mwareiti ewe SAMOL.
Köölfel 114
Än Kot manaman lupwen a angasa chón Israel.
1Lupwen Israel a toowu seni Egypt, lupwen Jakob a toowu seni ew mwiichen aramas mi kapas lón kapasen ekis,
2Judah a wiliti än Kot leeni mi pin, Israel a wiliti mwüün.
3Ewe Setipar a nennengeni o a mwittir sü, kólukun ewe chaanpwupwu Jordan a liwinsäfäl;
4ekkewe chukutekia ra mwetemwet usun kana ätemwänin siip, ekkewe chukutekisón ra mwetemwet usun kana appanen siip.
5Pwata a iei usun, en ewe mataw, pwe ka mwittir sü? Pwata, en ewe chaanpwupwu Jordan, ka liwinsäfäl?
6Pwata, ämi ekkewe chukutekia öüwa mwetemwet usun ekkewe ätemwänin siip, pwata ämi ekkewe chukutekisón öüwa mwetemwet usun ekkewe appanen siip?
7En fönüfan, kopwe chechcheech me mwen ewe Samol, me mwen ewe Kot än Jakob,
8i ewe mi ewili ewe achaw ngeni ew nóómwun kóluk, ewe achaw mi pöchökkül ngeni ew pwuachchen kóluk.
Köölfel 115
Lipwäkingawen ekkewe uluulul önümwäl me ach apilükülüküw Kot.
1Sapw äm, SAMOL, sapw äm äipwe lingeló, nge i itom epwe lingeló, pwokiten óm tong ese mwüch me óm ölükülük.
2Pwata chón ekkewe mwüü repwe apasa, “Iwe, ifa i chök ar we Kot?”
3Ach Kot a nóm läng; i a föri ese lifilifil meet i a mochen.
4Nge ar kewe uluulun önümwäl iir silfer me kolt, ouluuluen pöün aramas.
5A wor awer, nge resap tongeni kapas, a wor meser, nge resap tongeni küna mweer.
6A wor selinger, nge resap tongeni rongorong, a wor pwöötür, nge resap tongeni färeni pwollen och.
7A wor pöür, nge resap tongeni kömwöch, a wor pecheer, nge resap tongeni fätäl, resap pwal tongeni repwe möngüüngü me lón chiorer.
8Chókewe mi föri ekkeei uluulun önümwäl repwe chök wewe ngeniir, pwal ina chök usun iir meinisin mi anómwu ar apilükülük lón ekkewe uluulun önümwäl.
9Ämi chón Israel meinisin, öüpwe anómwu ämi apilükülük lón ewe SAMOL - pün i ämi chón älillis me ämi eppetin feieingaw lón maun.
10Ämi chón leimwen Aaron, öüpwe anómwu ämi apilükülük lón ewe SAMOL - pün i ämi chón älillis me ämi eppetin feiengaw lón maun.
11Ämi meinisin mi nuokkusiti ewe SAMOL, öüpwe anómwu ämi apilükülük lón ewe SAMOL - pün i ämi chón älillis me ämi eppetin feiengaw lón maun.
12Ewe SAMOL a chechchemeni kich o i epwe efeiöchü kich; I epwe efeiöchü nöün kewe aramasen Israel, i epwe efeiöchü ewe familien Aaron,
13i epwe efeiöchü chókana mi nuokkusiti ewe SAMOL - ekkewe aramas mi kis me ekkewe mi tekia.
14Amwo ewe SAMOL epwe äfeffeitäkemi, ämi ppök me nöümi kana.
15Amwo öüpwe feiöch meren ewe SAMOL, ewe Chón föri läng me fönüfan.
16Ekkewe läng mi fókkun tekia, än ewe SAMOL, nge i a fang fönüfan ngeni aramas meinisin.
17Ekkewe sootup resap tongeni köölün mwareiti ewe SAMOL, iir chókana mi feittiw lón peias, ewe leenien fanafaneló;
18nge i kich sipwe mwareiti ewe SAMOL, iei o feilfeilló chök.
Mwareiti ewe SAMOL!
Köölfel 116
Kilisou ren ngaseló seni mäló.
1Ngang üwa echeni ewe SAMOL, pün i a rongorong mweliei; i a rongorong äi siö pwe epwe ümöümöch ngeniei.
2Pwokiten i a öüüw selingan ngeniei, iei minne, ngang üpwe kööri i lón üküükün langattamen fansoun äi manaw.
3Ekkewe selin mäló ra äfittieiló, nuokkusun ewe leenien sootup a feittiw wóói; Ngang üwa kkuf ren riäfföü me lólilen.
4Mwirin, ngang üwa kökköri iten ewe SAMOL o apasa: “Äi SAMOL, ngang üwa tungór, kopwe angasa ngüni!”
5Ewe SAMOL a ümöümöch o pwüng; ach Kot a fókkun uren tong.
6Ewe SAMOL a tümwünü ekkewe mi lipwäkingaw; lupwen ngang üwa nóm lón osupwang wätte, i a angasaei.
7Ngüni, kopwe liwiniti óm asöösö, pün ewe SAMOL a fen kirekiröch ngenuk.
8Pün en, SAMOL, ka amanawa ngüni seni mäló, ka öükätiw chönün mesei, ka tümwünü pecheei pwe resap chepetek,
9pwe ngang üpwe tongeni fätäl me mwen ewe SAMOL me lón fönüwen ekkewe mi manaw.
10Ngang üwa anómwu äi apilükülük lón ewe SAMOL lupwen ngang üwa apasa, “Ngang üwa nóm lón riäfföü mi lapalaap”;
11lón äi nuokkus ngang üwa apasa, “Aramas meinisin iir chón kapas chofona.”
12Meet ngang üpwe tongeni liwini ngeni ewe SAMOL ren meinisin an kewe kirekiröch ngeniei?
13Ngang üpwe ekiietä ew kapen alen ngaseló o kökkööri iten ewe SAMOL.
14Ngang üpwe öpwönüetä äi kewe pwon ngeni ewe SAMOL me fän mesen nöün kewe aramas meinisin.
15A men öüchchea me fän mesen ewe SAMOL mälón nöün kewe chón pin.
16Enlet ngang emön noum chón angang, SAMOL; ngang üwa angang ngenuk usun chök inei we a föri; en ka epichieiló seni ekkewe sein mi föötiei.
17Ngang üpwe ääni asór ew asoren kilisou ngenuk o kööri itom en ewe SAMOL.
18Ngang üpwe öpwönüetä äi kewe pwon ngeni ewe SAMOL me fän mesen nöün kewe aramas,
19me lón ekkewe leeni mi tittiló pwellin ünükkün imwen ewe SAMOL we, mi nóm lukalapom, Jerusalem. Mwareiti ewe SAMOL!
Köölfel 117
Aramas meinisin repwe mwareiti ewe SAMOL.
1Mwareiti ewe SAMOL, ämi chón ekkewe mwüü meinisin; öüpwe inge-mwareiti i ämi aramasen fönüfan meinisin!
2Pün a fókkun lapalaap an tong enlet ngeni kich, än ewe SAMOL ölükülük a nónnóm tori feilfeilló chök.
Mwareiti ewe SAMOL!
Köölfel 118
Mwareiti Kot ren an tong enlet ese mwüch.
1Öüpwe kilisou ngeni ewe SAMOL, pün i a mwirinnö; an tong mi ölükülük a nónnóm tori feilfeilló chök.
2Israel epwe apasa: “An tong mi ölükülük a nónnóm tori feilfeilló chök.”
3Ekkewe mwirimwirin Aaron repwe apasa: “An tong mi ölükülük a nónnóm tori feifeilló chök.”
4Chókana mi nuokkusiti ewe SAMOL repwe apasa: “An tong mi ölükülük a nónnóm tori feilfeilló chök.”
5Lupwen üwa nóm lechach, ngang üwa siö ngeni ewe SAMOL; iwe, i a uweieiló ngeni lón ew leeni mi wämmóng.
6Ewe SAMOL a nóm reei; ngang üsap nuokkus. Meet aramas repwe tongeni föri ngeniei?
7Ewe SAMOL a nóm reei; i äi chón älillis. Ngang üpwe nennengeni ekkana chón opwutaei fän ai pwora.
8A mwirinnö ach sipwe opolong lón ewe SAMOL, lap seni ach sipwe anómwu ach apilukuluk lón aramas.
9A mwirinnö ach sipwe opolong lón ewe SAMOL, lap seni ach sipwe anómwu ach apilukuluk wón ekkewe samol.
10Chón ekkewe mwüü meinisin ra pwellieiló, nge lón iten ewe SAMOL ngang üwa arosereló.
11Iir ra pwellieiló lepeeki meinisin, nge lón iten ewe SAMOL ngang uwa arosereló.
12Iir ra rangeitiei usun ekkana achi, nge ra mwittir kareló usun iräfölüföl mi kkar; lón iten ewe SAMOL ngang üwa arosereló.
13Ngang üwa timärsäfäl o arap ngeni üpwe turuló, nge ewe SAMOL a älisiei.
14Ewe SAMOL i äi pöchökkül me äi eppetin feiengaw. I a wiliti äi alen ngasaló.
15Mweireiren köölün pwapwa me wiil ra leüommóngeto me lón imwen ekkewe chón pwüng imw mangaku. Ra apasa: “Pöüifichin ewe SAMOL mi pöchökkül a föri ekkewe mettóch mi manaman!
16Pöüifichin ewe SAMOL mi pöchökkül a ökköüpöw lón wiil; pöüifichin ewe SAMOL mi pöchökkül a föri ekkewe mettóch mi manaman!”
17Ngang üsap mäló, nge üpwe manaw, pwe üpwe esilefeili meet ewe SAMOL a fen föri.
18Ewe SAMOL a emiritiei le öpwüngüchouei, nge i esap chök atolongaei lón maló.
19Öüpwe suuki ngeniei ekkewe asamalapen tittin ekkewe chón pwüng; pwe ngang üpwe tolong o apasa ai kilisou ngeni ewe SAMOL.
20Iei ewe asamalapen tittin ewe SAMOL ia ekkewe chón pwüng ra tolong me ie.
21Ngang üwa kilisou ngenuk, ren óm pölüweniei; en ka wiliti äi alen ngasaló.
22Ewe faaw ekkewe chón köü imw ra pöütaló, iei a wiliti ewe föün lepwokuku mi öüchchea;
23ewe SAMOL a föri ei; iwe, a fókkun amwaraar me mwen mesach.
24Ewe SAMOL a fen föri ei lón ei rän; öüsipwe meseik ikenäi o pwapwa.
25SAMOL, kopwe angasa keem! SAMOL, kopwe mwüüt ngeni keem pwe äipwe feffeitä.
26A feiöch ätewe mi wareto lón iten ewe SAMOL. Äm äia efeiöchü kemi seni lón imwen ewe SAMOL.
27Ewe SAMOL i Kot, i a fen föri pwe an saram epwe tinetiw wóch. Öüpwe fööti ewe mönün asóren chuulap ngeni sääl, o föötätä ngeni ekkewe mächään ewe róngen asór.
28En äi Kot, iwe, ngang üpwe kilisou ngenuk; en äi Kot; iwe, ngang üpwe ingemwareituk.
29Öüpwe kilisou ngeni ewe SAMOL, pün i a mwirinnö; an tong mi nüküchchar a nónnóm tori feilfeilló chök.
Köölfel 119
Leechüüni usun echchipwörün än Kot kapas.
Aleph
1Ra pwapwa chókana esap wor limengawen lón manawer, iir ekkewe mi fätäl alóngólóng wón än ewe SAMOL kewe öllük.
2Ra pwapwa chókana mi älleasochisi an kewe öllük o kütta i ren unusen letiper-
3resap föri och mi mwääl nge ra chök fätäl lón an kewe aal.
4En ka fen isettiw óm kewe öllük pwe äm äipwe unusen älleasochisir.
5Amwo äi kana föfför repwe nüküchchar lón äi älleasochis óm kewe pwüüng!
6Mwirin, ngang üsap sääw lupwen ngang üpwe ekieköchüw óm kewe öllük meinisin.
7Ngang üpwe mwareituk fän wenechcharen letipei lupwen üwa käeö óm kewe öllük mi pwüng.
8Ngang üpwe älleasochisi óm kewe pwüüng; kosap likitifócheeiló.
Beth
9Epwe ifa usun än emön ölüwöl epwe tongeni tümwünü manawan pwe epwe limöch? Ren an epwe mammasafichi manawan alóngólóng wón óm kapas.
10Ngang üwa küttók ren unusen letipei; kosap mwüüt ngeniei pwe üpwe tókkóló seni óm kewe öllük.
11Ngang üwa iseis óm kapas lón letipei pwe ngang üsap tipis ngenuk.
12Ngang üpwe mwareituk, äi SAMOL; kopwe äööw ngeniei óm kewe pwüüng.
13Ngang üwa arongafeili ren tinnawei ekkewe öllük meinisin mi toowu seni awom.
14Ngang üwa pwapwa le tapweló mwirin óm kewe öllük usun chök än emön pwapwa ren wöwün mi lapalaap.
15Ngang üpwe lechüüni óm kewe kapasen öüröür o ekiekiöchüw óm kewe aal.
16Ngang üpwe apwaapwaei lón óm kewe pwüüng o üsap möllükaló óm kewe kapas.
Gimel
17Kopwe föri minne mi mwirinnö ngeni noum ei chón angang lupwen ngang mi chüen manaw, pwe üpwe tongeni älleasochisi óm kapas.
18Kopwe suukaló mesei pwe üpwe tongeni küna ekkewe mettóch mi amwaraar seni lón óm we öllük.
19Ngang emön chón siamwü ikeei wón fonufan; kosap aopaló óm kewe öllük seniei.
20Ngüni a taatakkis ren äi pwositi óm kewe öllük iteiten fansoun meinisin.
21En ka öpwüngü ekkana mi lamalamtekia mi önümamaaw, chókana mi tókkóló seni óm kewe öllük.
22Kopwe ömwöküatló seniei ar turunufaseei o eitengawaei, pün ngang üwa älleasochisi óm kewe osomän.
23Inamwo are ekkewe samol ra móót le pwüngüpwüng fengen o rawangawaei, nge ngang noum ei chón angang üpwe chök leechüüni óm kewe pwüüng.
24Óm kewe kapasen pwärätä ra apwaapwaei; pün iir äi chón öüröür.
Daleth
25Ngang üwa eiwelitiw lón ewe pwül mworomwor; kopwe tümwünü manawei alóngólóng wón óm kapas.
26Lupwen ngang üwa ürenuk äi kana akkóót, nge en ka pölüweniei; kopwe äööw ngeniei óm kewe pwüüng.
27Kopwe älisiei pwe üpwe weweiti usun äi üpwe fätäl fän pwüngün óm kewe öllük, pwe ngang üpwe leechüüni óm kewe föfför mi amwaraar.
28Ngüni a meefi an pekkus ren an letipeta; kopwe öpöchökkülätä letipei ren óm kapas.
29Kopwe atoowawaló seniei ekkewe aal mi otupwutup; kopwe ümöümöch ngeniei o äööw ngeniei óm öllük.
30Ngang üwa filätä ewe alen ölükülük, ngang üwa anómwu óm kewe öllük mwei.
31Ngang üwa kömwöchünnük wón óm kewe kapasen pwärätä, äi SAMOL; kosap mwüüt ngeniei pwe üpwe sääw.
32Ngang üwa ssä lón alen óm kewe öllük, pün en ka achölapaló äi weweöch.
He
33Äi SAMOL, kopwe äööwei alen óm kewe pwüüng, pwe ngang üpwe älleasochisir tori lesópwólón.
34Kopwe fang ngeniei weweöch, pwe ngang üpwe tongeni öpwönüwetä óm öllük o älleasochisi ren unusen letipei.
35Kopwe emmweniei lón alen óm kewe öllük, pün ngang üwa pwapwaitir.
36Kopwe okullu letipei ngeni óm kewe kapasen pwärätä, nge sap ngeni tipemmóngun kütta wiil.
37Kopwe okullaló mesei seni ekkana mettóch mi lamwotongaw; kopwe tümwünü manawei ren óm kapas.
38Kopwe öpwönüwetä óm pwon ngeni noum ei chón angang, pwe aramas repwe nuokkusituk.
39Kopwe angealó ewe itengaw ngang üwa nuokkusiti, pün óm kewe öllük ra mwirinnö.
40Nengeni, ngang üwa pwositi óm kewe kapasen öüröür! Kopwe fang ngeniei manaw lón óm pwüng.
Waw
41Amwo óm tong ese mwüch epwe feitto reei, SAMOL, kopwe fang ngeniei ewe alen ngasaló alóngólóng wón óm pwon;
42mwirin, ngang üwa tongeni pölüweni chókana mi turunufaseei, pün ngang üwa anómwu äi apilükülük lón óm kapas.
43Kosap fókkun angealó seni lón awei ewe kapasen let, pün ngang üwa anómwu äi apilükülük lón chök óm kewe öllük.
44Ngang üpwe älleasochisi óm kewe öllük iteiten fansoun meinisin, tori feilfeilló chök.
45Ngang üpwe fätäl lón ew leeni mi chöölap, pün ngang üwa achoocho le kütta óm kewe kapasen öüröür.
46Ngang üpwe kapas usun óm kewe kapasen pwärätä me fän mesen ekkewe king, nge ngang üsap tolong lón sääw,
47pün ngang üwa pwapwaiti óm kewe öllük pwokiten ngang üwa echeniir!
48Ngang üpwe eitietä peii ngeni óm kewe öllük, ngang üwa echeniir, pwe ngang üpwe tongeni leechüüni óm kewe pwüüng.
Zayin
49Kopwe chemeni óm kapas ngeni noum ei chón angang, pün en ka ngeniei apilükülüköch.
50Iei äi chip lón äi riäfföü: Óm pwon a tümwünü manawei.
51Ekkewe mi lamalamtekia resap ätittini ar turunufaseei, nge ngang üsap kul seni óm öllük.
52Äi SAMOL, ngang üwa chechchemeni óm kewe öllük mi nóm seni chök lóóm, o ngang üwa küna äi chip me lóór.
53Lingeringer mi pwichikkar a turufiei pwokiten ekkewe aramasingaw, ra fen pöütaló óm öllük.
54Óm kewe pwüüng ikana äi kööl ekis meinisin ia ngang üwa imweimw ie.
55Lepwin, äi SAMOL, ngang üwa chechchemeni itom, pwe ngang üpwe öpwönüwetä óm öllük.
56Iei ei pwapwa mi toriei lón manawei, pwe ngang üpwe älleasochisi óm kewe kapasen öüröür.
Heth
57En ineti, äi SAMOL; ngang üwa fen pwon pwe üpwe älleasochisi óm kewe kapas.
58Ngang üwa tungór ren unusen letipei pwe kopwe ümöümöch ngeniei usun chök minne ka pwon.
59Lupwen ngang üwa ekiekelong lón letipei usun äi kewe föfför, iwe, üwa kulluw pecheei pwe üpwe tapweló mwirin óm kewe kapasen pwärätä.
60Ngang üwa mwittir nge üsap mang äi üpwe älleasochisi óm kewe öllük.
61Ina mwo ika än ekkewe aramasingaw sääl ra föötiei, nge ngang üsap möllükaló óm öllük.
62Ngang üpwe pwäätä lukenipwin pwe üpwe mwareituk, pwokiten óm kewe öllük mi pwüng.
63Ngang emön chiechien chókana meinisin mi nuokkusituk, chókana mi älleasochisi óm kewe kapasen öüröür.
64Äi SAMOL, fönüfan a ureló ren óm tong ese mwüch; kopwe äööw ngeniei óm kewe pwüüng.
Teth
65Äi SAMOL, en ka fen kirekiröch ngeniei ngang noum ei chón angang, alóngólóng wón óm kapas.
66Kopwe äööw ngeniei miriit me silelap, pün ngang üwa lükü lón óm kewe öllük.
67Ngang üwa mwälechfeil me mwen óm ka öpwüngüei lón riäfföü, nge iei ngang üwa äleasochisi óm kapas.
68En ka mwirinnö o minne en ka föri a mwirinnö; kopwe äööw ngeniei óm kewe pwüüng.
69Ekkewe aramas mi lamalamtekia ra efisätä kapas chofona usi, nge ngang üwa älleasochisi óm kewe kapasen öüröür ren unusen letipei,
70letiper esap chüen memmeef usun kiriis, nge ngang üwa apwaapwaei lón óm öllük.
71A mwirinnö ngeniei pwe ngang üwa riäfföü, pwe ngang üpwe tongeni käeö óm kewe pwüüng.
72Ewe öllük mi toowu seni awom a fókkun mwirinnö ngeniei lap seni ngöröün föün silfer me kolt.
Yodh
73Pöum kana ra föriei o ouluuluei; kopwe fang ngeniei weweöch, pwe ngang üpwe tongeni käeö óm kewe öllük.
74Chókana mi nuokkusituk repwe künaei o repwe pwapwa, pwokiten ngang üwa anómwu äi apilükülüköch lón óm kapas.
75Äi SAMOL, ngang mi silei pwe óm kewe öllük ra pwüng, nge lón óm ölükülük ka atolongaei lón riäfföü.
76Òm tong ese mwüch epwe echipaei, usun chök minne en ka pwon ngeniei ngang noum ei chón angang.
77Òm ümöümöch epwe toriei pwe üpwe tongeni manaw, pün óm öllük ina äi apwaapwa.
78Amwo ekkewe aramas mi lamalamtekia repwe sääw, pwokiten iir ra ettipisiei ren minne mi chofona; nge ngang üpwe leechüüni óm kewe kapasen öüröür.
79Kopwe mwüüt ngeni chókana mi nuokkusituk pwe repwe säp ngeniei, pwe iir repwe tongeni silei óm kewe kapasen pwärätä.
80Amwo letipei epwe unusöch lón äi tümwünü óm kewe pwüüng, pwe ngang üsap fókkun sääw.
Kaph
81Ngüni a apwangapwangeló ren äi pwositi óm alen ngaseló, nge ngang üwa anómwu äi apilükülüköch lón óm kapas.
82Mesei ra topwutopwuló ren äi resin le ösüküsükü pwe epwe pwönüetä óm kewe pwon ngeniei. Iwe, üwa eiis, “Ineet en kopwe echipaei?”
83Pün ngang üwa wiliti usun ew leenien wain mi för seni ünüchchen maan mi nóm lón ötüwötün ekkei, nge ngang üsap möllükaló óm kewe pwüüng.
84Epwe ifa langattamen fansoun än noum ei chón angang epwe engngiló? Ineet kopwe öpwüngü chókana mi eriäfföüei?
85Ekkeei aramas mi lamalamtekia ra tuuw ekkewe pwaang mi alóllóól fänitei; iir chókewe resap manaw lón óm öllük.
86Óm kewe öllük meinisin ra ölükülük; nge aramas ra eriäfföwüei ren ar kapas chofona; kopwe älisiei!
87Arapakkan chök iir repwe äwesieiló seni wón ei fönüfan, nge ngang üsap mochen likitaló óm kewe kapasen öüröür.
88Lón óm tong ese mwüch, kopwe fang ngeniei manaw, pwe ngang üpwe tongeni sópweló le älleasochisi ekkewe kapasen pwärätä mi toowu seni awom.
Lamedh
89Äi SAMOL, óm kapas a nüküchchar le nóm lón läng tori feilfeilló chök.
90Óm ölükülük a sópwósópwóló le nónnóm tori ekkewe pilóón aramas meinisin; en ka önüküchchara fönüfan, iwe, a sópwósópwóló le nónnóm.
91Óm kewe öllük ra chök chüen enlet tori ikenäi, pün mettóch meinisin iir noum chón angang.
92Are esap pwünün óm öllük an epwe sapaeitä ren pwapwa; iwe, ngang üwa sótun mäló lón äi riäfföü.
93Üsap tongeni üpwe möllükaló óm kewe kapasen öüröür, pün me reer en ka fang ngeniei manaw.
94Ngang noum, kopwe amanawaei, pün ngang üwa kütta óm kewe kapasen öüröür.
95Ekkewe aramasingaw ra operiei pwe repwe niieiló, nge ngang üwa ekieki lón letipei óm kewe kapasen pwärätä.
96Ngang üwa küna pwe mi wor öüküükün unusöch, nge óm öllük a sellüküló lükün öüküük.
Mem
97O a ifa me äi echeni óm öllük; iei meet ngang üwa leechüni lón unusen langattamen ew rän.
98Óm öllük a föri pwe üpwe tipächchem lap seni ekkewe chón opwutaei, pün óm öllük a nóm reei fansoun meinisin.
99A wor äi weweöch lap seni neii kewe sense meinisin, pün ngang üwa leechüüni óm kewe kapasen pwärätä.
100Ngang üwa koon miriit lap seni ekkewe ikemwään, pün ngang üwa älleasochisi óm kewe kapasen öüröür.
101Ngang üwa tümwünüfichi pecheei seni ekkewe aal mi ingaw, pwe ngang üpwe sópweló le älleasochisi óm kapas.
102Ngang üsap tókkóló seni óm kewe öllük, pün pwisin en ka osuukula ngeniei.
103A ifa me araaren óm kewe kapas lupwen üwa neni; ra fókkun araar me lón awei lap seni chönün chunen.
104Ngang üwa angei äi weweöch seni lón óm kewe kapasen öüröür; iei minne üwa opwut iteiten aal mi mwääl.
Nun
105Óm kapas a ew lamp fäniten pecheei me ew saram fäniten alei.
106Ngang üwa ääni ew pwon fän ökköpöl o önüküchchara, pwe ngang üpwe öpwönüwetä óm kewe öllük mi pwüng.
107Ngang üwa fókkun riäfföü; kopwe fang ngeniei manaw, äi SAMOL, usun chök minne ka pwon lón óm kapas.
108Kopwe etiwa äi asóren mwareituk seni lón letipei, äi SAMOL, o kopwe äööw ngeniei óm kewe öllük.
109Ngang üwa sópweló le kömwöch manawei lón peii, nge üsap möllükaló óm öllük.
110Ekkewe aramasingaw ra sooni ew ssär fänitei, nge ngang üsap tókkóló seni óm kewe kapasen öüröür.
111Óm kewe kapasen pwärätä, ikkana wöwi tori feilfeilló chök, pün iir ra apwaapwai letipei.
112Ngang üwa filätä seni lón letipei, pwe üpwe öpwönüwetä óm kewe pwüüng feilfeilló chök tori lesópwólón.
Samekh
113Ngang üwa opwut aramas mi tipe wiliwilikkis, nge ngang üwa echeni óm öllük.
114En äi leenien op me äi pisekin eppetin feiengaw; óm kapas ina chök popun äi apilüköch.
115Öüpwe sü seniei ämi chón föri minne mi ngaw, pwe ngang üpwe tongeni älleasochisi ekkewe öllük än äi we Kot!
116Kopwe ömwöchüeitä usun minne ka pwon, pwe ngang üpwe tongeni manaw; kosap mwüüt ngeniei pwe üpwe sääw lón äi apilüköch.
117Kopwe ömwöchüeitä pwe ngang üpwe tümwün seni feiengaw; mwirin, ngang üpwe sópweló le öüchcheani ekiekin óm kewe öllük.
118En ka pöütaló meinisin mi tókkóló seni óm kewe pwüüng, pün ar tipächem soolä a lanwotmwäl.
119En ka oturaló ekkewe aramasingaw meinisin wón fönüfan usun chök limengawen och luumw; iei minne, ngang üwa echeni äi üpwe älleasochisi óm kewe kapasen pwärätä.
120Fitukei a chechchech ren äi nuokkusituk, o ngang üwa nuokkusiti óm kewe köpwüng.
Ayin
121Ngang üwa föri minne mi pwüng o wenechchar, kosap likitieiló ngeni ekkana chón eriäfföüei.
122Kopwe ngeni noum ei chón angang ew pwonen feiöch; kosap mwüüt ngeni ekkewe mi lamalamtekia pwe repwe eriäfföüei.
123Mesei ra topwutopwuló fäniten äi resin le ösüküsükü óm alen ngasaló me fäniten an epwe pwönüetä óm we pwon mi pwüng.
124Kopwe föri óm föfför ngeni noum ei chón angang alóngólóng wón óm tong ese mwüch, o äööw ngeniei óm kewe pwüüng.
125Ngang noum chón angang; kopwe fang ngeniei weweöch, pwe ngang üpwe tongeni silei óm kewe kapasen pwärätä.
126Äi SAMOL, a tori fansoun óm kopwe le föri óm föfför, pün ekkeei aramasingaw ra chök atai óm öllük.
127Enlet ngang üwa echeni óm kewe öllük lap seni kolt; lap seni kolt mi mwirinnö.
128Iei minne, ngang üwa öüchcheani óm kewe kapasen öüröür meinisin pwe ra pwüng; ngang üwa opwut iteiten aal mi mwäl.
Pe
129Óm kewe kapasen pwärätä ra men amwaraar; iei minne, ngüni a älleasochisir.
130Lupwen a suuk masowen óm kewe kapas, a wor saram. Òm kapas a fang weweöch ngeni ekkewe mi lipwäkingaw lón ar ekiek.
131Ngang üwa suuki awei o ngaseppwich, pwokiten ngang üwa pwositi óm kewe öllük.
132Kopwe kul ngeniei o ümöümöch ngeniei, usun minne ka föri ngeni chókana mi echeni itom.
133Kopwe önüküchchara ipweipwen pecheei, usun ka pwon, o kosap mwüüt ngeni och mi ngaw epwe nemenem wóói.
134Kopwe angasaei seni än aramas eriäfföüei, pwe üpwe tongeni älleasochisi óm kewe kapasen öüröür.
135Kopwe asarama wón mesom wón noum ei chón angang, o äööw ngeniei óm kewe pwüüng.
136Pwuupwun chónün maas ra pwuupwutiw seni mesei kana, pwokiten aramas resap älleasochisi óm öllük.
Tsadhe
137Äi SAMOL, en ka pwüng, o óm kewe öllük ra pwüng.
138Ekkewe kapasen pwärätä en ka püngütiw ra pwüng; ra unusen fich ngeni ach sipwe anómwu ach apilükülük wór.
139Äi tilikken a amölüülüei, pün chón opwutei kana resap äfälli óm kewe kapas.
140Óm kewe pwon ra fen wesöch le asóssót; iwe, ngang noum ei chón angang, üwa fókkun echeniir.
141Ngang emön esap wor öüchcheai me uren kopwut, nge ngang üsap möllükaló óm kewe kapasen öüröür.
142Óm pwüng a pwüng tori feilfeilló chök, o óm öllük a unusen let.
143Osukosuk me lólilen ra künaei, nge óm kewe öllük ra apwaapwaei.
144Óm kewe kapasen pwärätä ra pwüng tori feilfeilló chök; ra ngeniei weweöch pwe üpwe tongeni manaw.
Qoph
145Ngang üwa siö ren unusen letipei, Äi SAMOL, kopwe pölüweniei. Ngang üpwe älleasochisi óm kewe pwüüng.
146Ngang üwa kökköruk; kopwe angasaei, pwe ngang üpwe tongeni öpwönüwetä óm kewe kapasen pwärätä.
147Ngang üpwe pwäätä me mwen wünimweirän; ngang üpwe siö ngenuk pwe kopwe älisiei. Ngang üwa anómwu äi apilüköch lón óm kapas.
148Mesei ra chök nenneló me mwen ekkewe kulókun mammas lepwin, pwe üpwe tongeni leechüni óm pwon.
149Kopwe rong ngeni mweliei, lón óm tong mi ölükülük; äi SAMOL, kopwe angasa manawei lón óm öpwüngüwen.
150Ra arapeto chókana mi eriäfföwüei fän ar rawangaw; iir ra toowaw seni óm öllük.
151Nge en äi SAMOL ka arap, o óm kewe öllük meinisin ra let.
152Seni chök lóóm lóóm ngang üwa silei seni óm kewe pwüüng, pwe en ka önüküchcharer pwe repwe nóm tori feilfeilló chök.
Resh
153Kopwe nengeni äi riäfföü o angasaei, pün ngang üsap möllükaló óm öllük.
154Kopwe peniei o angasaei; kopwe fang ngeniei manaw usun en ka pwon.
155Ewe alen küna manaw a toowaw seni ekkewe aramasingaw, pün iir resap kütta óm kewe pwüüng.
156Äi SAMOL, óm ümöümöch a fókkun lapalaap; kopwe fang ngeniei manaw alóngólóng wón óm kewe öllük.
157Ra men chómmóng ekkewe chón üüngeniei me chón eriäfföüei, nge ngang üsap rik seni óm kewe kapasen pwärätä.
158Ngang üwa nengeni fän kopwut ekkewe aramas resap ölükülük, pwokiten resap älleasochisi óm kewe öllük.
159Kopwe ekieki usun äi echeni óm kewe kapasen öüröür; kopwe fang ngeniei manaw alóngólóng wón óm tong ese mwüch.
160Óm kewe kapas meinisin ra let; óm kewe öllük mi pwüng meinisin ra nóm tori feilfeilló chök.
Sin me Shin
161Ekkewe souemmwen ra eriäfföüei, nge esap wor popun, nge letipei a chök üütä lón nuokkus ren óm kewe kapas.
162Ngang üwa pwapwa ren óm kapas, usun emön mi küna chómmóng liapan lón maun.
163Ngang üwa opwut me niopwutäsini manawen otupwutup, nge ngang üwa echeni óm öllük.
164Ngang üwa mwareituk fän fisu lón ew rän, pwokiten óm kewe öllük ra pwüng.
165A wor kinamwe mi lapalaap ren chókana mi echeni óm öllük; esap wor och mettóch epwe föri pwe repwe chepetek.
166Äi SAMOL, ngang üwa apilükülükü óm we alen ngaseló, iei minne, ngang üwa älleasochisi óm kewe öllük.
167Ngüni a älleasochisi óm kewe kapasen pwärätä, ngang üwa fókkun echeniir.
168Ewer, ngang üwa älleasochisi óm kewe kapasen öüröür me óm kewe kapasen pwärätä, pwokiten en ka silei meinisin minne ngang üwa föri.
Taw
169Äi SAMOL, kopwe mwüüt ngeni äi siö epwe feitto mwom; kopwe fang ngeniei weweöch alóngólóng wón óm kapas.
170Kopwe mwüüt ngeni äi iótekin tungór epwe feitto mwom; kopwe angasaei alóngólóng wón om kapas.
171Tinnawei epwe apasatä an mwareituk, pün en ka äööw ngeniei óm kewe pwüüng.
172Chönnawei epwe kööl usun óm kapas, pün óm kewe öllük meinisin ra pwüng.
173Pöum epwe mollotä an epwe älisiei, pün ngang üwa fen filätä pwe üpwe tapweló mwirin óm kewe kapasen öüröür.
174Äi SAMOL, ngang üwa pwositi óm we alen manaw; óm öllük ina äi pwapwa.
175Kopwe mwüüt ngeni ngüni pwe üpwe manaw o mwareituk, kopwe mwüüt ngeni óm kewe öllük pwe repwe älisiei.
176Ngang üwa mwälechfeil usun emön siip mi mwälecheló; kopwe küttaei, ngang noum ei chón angang, pün ngang üsap möllükaló óm kewe öllük.
Köölfel 120
Iótekin tungór ngaseló seni chón opwut mi eriäfföü. Echö köölün feittä.
1Lón äi riäfföü, ngang üwa kökkööri ewe SAMOL, nge i a pölüweniei.
2Äi SAMOL, kopwe angasaei seni ekkewe tinnaw mi kapas chofona pwal seni ew chönnaw mi otupwutup.
3En ewe chónnaw mi otupwutup, meet Kot epwe ngenuk, pwal meet lükün i epwe föri ngenuk?
4I epwe öpwünguk ren an epwe äppwera ngenuk kana föün esefich mi kken noun emön sounfiu mi pwora, pwal ren an epwe keni ngenuk mwolien ekkei mi nget seni ewe irä piruum a för seni.
5Feiengawei, pwe üwa siamwüfeil lón Meshek, pwe üwa imweim leiin imwen ekkeei aramas seni Kedar imw mangaku!
6A fókkun langattam fansoun äi nónnóm leiin chókana mi opwut kinamwe.
7Ngang emön mi tipeni kinamwe, nge lupwen üwa kapas, iir ra tipeni maun.
Köölfel 121
Kot ewe chón älisi chókana mi kütta i. Echö köölün feittä.
1Ngang üwa ännetäi mesei ngeni ekkewe chuuk - ia äi älillis epwe feitto seni?
2Äi älillis epwe war seni ewe SAMOL, ewe chón föri läng me fönüfan.
3I esap mwüüt ngeni pecheemw pwe epwe faas - i ewe mi mammasók esap möür;
4ewer, ewe mi mammasa Israel esap äiessum esap pwal möür.
5Ewe SAMOL epwe mammasók - ewe SAMOL epwe önnüruk wón peliifichum;
6ewe akkar esap efeiengawók lerään, ewe maram esap pwal efeiengawók lepwin.
7Ewe SAMOL epwe tümwünuk seni feiengaw meinisin, i epwe tümwünü manawom;
8ewe SAMOL epwe mammasa óm toowu me óm tolong, iei o feilfeilló chök.
Köölfel 122
Pwapwan feilló ngeni imwen ewe SAMOL. Echö köölün feittä än David.
1Ngang üwa pwapwa lupwen ra apasa ngeniei, “Öüsipwe feilló ngeni imwen ewe SAMOL we.”
2Pecheem ra fen üütä ikeei lón asamalapen tittum kewe, en Jerusalem.
3Jerusalem a köüütä usun ew telinim mi chök etieppach fengen.
4Iei ewe telinimw ekkewe einang ra feitto, än ewe SAMOL kewe einang ra feitto pwe repwe mwareiti iten ewe SAMOL, usun minne ewe öllük a apasa fäniten Israel.
5Ra üütä ikenan ekkewe leenien móótun nemenem pwe repwe öpwüngü ekkewe aramas, ikkeei ekkewe leenien móótun nemenem fäniten ewe mwüün familien David.
6Öüpwe iótek fäniten an epwe wor kinamwe lón Jerusalem. Amwo meinisin mi tongei ei telinimw repwe nónnómöch.
7Amwo epwe wor kinamwe lón tittum kana me nónnómöch me lón óm kewe imwetekia mi pöchökkül.
8Fänäsengesin pwii kana me chiechiei kana, ngang üpwe apasa, “Kinamwe epwe nónnóm lóómw.”
9Fänäsengesin imwen ewe SAMOL ach we Kot, ngang üpwe kütta meet mi fókkun mwirinnö fänitom.
Köölfel 123
Iótekin ngaseló seni itengaw. Echö köölün feittä.
1Ngang üpwe ännetäi mesei ngenuk, en ewe mi móót wón óm leenien móótun nemenem lón ekkewe läng!
2Nengeni, usun chök mesen ekkewe amanaw ra nennengeni pöün ar masta, pwal usun mesen emön amanaw nengngin a chök nennengeni pöün an we masta fefin, iei usun kich sia nennengeni ewe SAMOL ach we Kot tori i epwe ümöümöch ngeni kich.
3Kopwe ümöümöch ngeni keem, äm SAMOL, kopwe ümöümöch ngeni keem, pün äm äia ku ren än aramas kapasen eitengaw.
4Ngünüüm a ku ren än ekkewe mi lamalamtekia eitengawa keem, pwal ren än chókewe mi mwänesol turunufasei keem.
Köölfel 124
Ewe SAMOL i chón peni nöün kana aramas. Echö köölün feittä än David.
1Are ewe SAMOL esap nóm wón ach peekin - chon Israel repwe apasa -
2are ewe SAMOL esap nóm wón ach peekin lupwen aramas ra üütä pwe repwe üüngeni kich,
3iir ra sótun oromikicheló nge kich mi manaw lupwen ar soong a ngeteri kich;
4ewe nóóter a sótun pwölükicheló, ewe öütöüt a sótun püngütiw wóch,
5ewe pwuupwun kólukun ar lingeringer a sótun pwuurikicheló.
6Sipwe mwareiti ewe SAMOL, pün esap mwüüt ngeni ngiin ekkewe aramasingaw pwe repwe ataatakisi kich.
7Sia tiweló usun emön machchang a tiwewu seni lón än ewe chon chünnümei sär. Ewe sär a mwü; iwe, kich sia tiweló.
8Ach älillis a nóm lón iten ewe SAMOL, mi föri läng me fönüfan.
Köölfel 125
Ewe SAMOL i än nöün kana aramas pöchökkül. Echö köölün feittä.
1Chókana mi anómwu ar apilükülük lón ewe SAMOL ra nónnómöch usun ewe Chuuk Zion; resap tongeni mwöküt, nge repwe nónnóm tori feilfeilló chök.
2Usun chök ekkewe chuuk ra rokopwällieló Jerusalem, iei usun ewe SAMOL a rokopwällieló nöün kana aramas, iei o feilfeilló chök.
3Pün ewe wókun king wókun ekkewe aramasingaw esap nómwetiw wón ewe fönü mi einet ngeni ekkewe chón pwüng, pün mwirin, ina ekkewe chón pwüng repwe aea pöüür le föri meet mi ingaw.
4Äi SAMOL, kopwe föri minne mi mwirinnö ngeni chókana mi mwirinnö; ngeni chókana mi wenechchar lón letiper.
5Nge chókana mi kul ngeni ar kewe aal mi pwór, ewe SAMOL epwe ösüüreló fiti ekkewe chón föföringaw.
Kinamwe epwe nónnóm wón Israel.
Köölfel 126
Liwinsäfäl ngeni Zion fän pwapwa. Echö köölün feittä.
1Lupwen ewe SAMOL a eliwini säfälieto wöwün Zion, kich sia wewe ngeni chókana mi ttan.
2Awach ra ur ren takirikir, chönnawach ra mweireiren pwapwa. Mwirin, chón ekkewe ekkóch mwüü ra apasa, “Ewe SAMOL a föri mettóch mi amwaraar fäniter.”
3Ewer, ewe SAMOL a föri mettóch mi amwarar fänitach, iei minne, kich sia uren pwapwa.
4Äi SAMOL, kopwe eliwini säfälieto wöwüüm, usun chök ekkewe chönüpwuupwu lón ewe Nekev.
5Chókana mi amwora pwukil fän chönün meser, repwe kinikin fän ar köölün pwapwa.
6Chókana mi feiliwu fän kechiw o uwei fótaar pwikil pwe repwe amwora, repwe liwinsäfäl fän köölün pwapwa, o repwe uwei ekkena pinükün wiit.
Köölfel 127
Angang me feffeitä ren ewe SAMOL. Echö köölün feittä än Solomon.
1Are ewe SAMOL esap öüüwetä ewe imw, epwe lamwotmwäl än ekkewe chón öüüwetä ewe imw angang. Are ewe SAMOL esap mammasa ewe telinimw, epwe lamwotmwäl än ekkewe chón mas üütä o mammas.
2A lamwotmwäl ämi mwittir pwäätä me ämi nennelóttam, pwe öüpwe angang weires fäniten enemi mwöngö, pün Kot a fang ngeni chókana mi echeni i ar asöösön möür.
3Nengeni, ekewe naaw iir och kiis seni ewe SAMOL, uwään ewe leenien mönükól ew liiwin seni Kot.
4Usun ekkewe föün esefich me lón pöün emön sounfiu mi pwora, ina usun ekkewe naaw emön mwän a nöüniir leölüwölün.
5A feiöch emön mwän mi ur an leenien föün esefich reer. I esap sääw lupwen epwe kapas ngeni chón opwutan kana me lón asamalapen tittin ewe telinimw.
Köölfel 128
Feiöchün chókana mi nuokkusiti ewe SAMOL. Echö köölün feittä.
1A pwapwa iteiten emön me emön mi nuokkusiti ewe SAMOL, mi fätäl lón an kewe aal.
2Kopwe mwöngö uwään angangen pöum; feiöch me feffeitä repwe óm.
3Pwülüwom we epwe usun efóch irän wain mi fókkun uwa, epwe fókkun feffeitä me lón imwom; noum kana repwe usun ekkewe fasaren ewe irä olif lupwen repwe móót ünükkün óm chepel.
4Ewer, epwe iei ewe feiöch fäniten ewe aramas mi nuokkusiti ewe SAMOL.
5Amwo ewe SAMOL epwe efeiöchuk seni Zion; amwo kopwe küna än Jerusalem feffeitä lón ränin manawom meinisin.
6Amwo kopwe manaw tori óm kopwe küna nöün noum kana.
Kinamwe epwe nónnóm wón Israel!
Köölfel 129
Echö köölün wiil ren än chón opwuten Zion kuf. Echö köölün feittä.
1Israel epwe apasa, “Iir ra fókkun eriäfföwüei seni chök lesäräföi,”
2iir ra fókkun eriäfföüei seni lekükküni, nge resap okkufueiló.
3Ekkewe chón ttu pwül ra tuuw wón söküri, ra föri ar kewe warawar mi langattam.
4Nge ewe SAMOL a pwüng; i a pöküeló seniei än ekkewe aramasingaw fööfö ra fööti ngeniei.
5Amwo meinisin mi opwut Zion repwe kulsäfäl lón ar sääw.
6Amwo repwe wewe ngeni ekkewe fetil mi nóm wón ungen ekkewe imw, ra fen aioloololó me mwen ar repwe märitä;
7emön chón kinikin uwa esap tongeni amasowa kumwuchun ren uwaan, esap wor emön chón pinüküw fengeni epwe tongeni amasowa pöün ren epinük.
8Amwo chókana mi pwereló ünükkür resap apasa ngeniir ei kapasen efeiöch, “Än ewe SAMOL feiöch epwe nónnóm wóómi; äm äia efeiöchü kemi lón iten ewe SAMOL.”
Köölfel 130
Witiwiti ewe fansoun ngaseló seni ewe SAMOL. Echö köölün feittä.
1Äi SAMOL, ngang üwa siö ngenuk seni lón ekkewe leeni mi alóllóól;
2äi Samol, kopwe rongorong mweliei. Kopwe öüüw selingom ngeni äi siö pwe kopwe ümöümöch ngeniei.
3Äi SAMOL, are en kopwe makkeetiw äm kewe tipis, äi Samol, iö epwe tongeni manaw?
4Nge ren en, a wor omwusomwusen tipis, pwe äm aipwe tongeni angang ngenuk fän menin.
5Ngang üwa witiwiti ewe SAMOL, ewer, ngüni a witiwiti i. Ngang üwa anómwu äi apilüköch lón an kapas.
6Ngüni a witiwiti ewe SAMOL lap seni än ekkewe chon mas ra ösüküsükü an epwe tori lesossor, ewer, lap seni än ekkewe chón mas ra ösüküsükü an epwe tori lesossor.
7O Israel, kopwe anómwu óm apilüköch lón ewe SAMOL, pün tong ese mwüch a nóm ren ewe SAMOL, a pwal nóm ren unusen angangen amanawa aramas.
8Pwisin i epwe amanawa Israel seni an tipis meinisin.
Köölfel 131
Anómwu apilükülük lón ewe SAMOL. Echö köölün feittä än David.
1Äi SAMOL, letipei esap lamalamtekia, mesei resap pwal wólamalamtekia; ngang üsap aosukosukaei ren ekkana mettóch mi koon lapalaap ika mettóch mi koon amwaraar ngeniei.
2Nge ngang üwa okkupachaló me amósónósónätiw ngüni, ngang üwa wewe ngeni emön mönukól a mósónósónóló lupwen a wes le wün oupwun inan; ngang üwa menemenöch usun emön mönukól lupwen a wes le wün oupw.
3Israel, kopwe anómwu óm apilüköch lón ewe SAMOL, iei o feilfeilló chök.
Köölfel 132
Kot epwe nóm lón Zion feilfeilló chök. Echö köölün feittä.
1Äi SAMOL, kopwe chechchemeni David me an kewe riäfföü meinisin i a engngiló fän,
2usun an ökköpöl ngeni ewe SAMOL o ääni ew pwon ngeni ewe Emön mi Manaman, än Jakob we Kot o apasa:
3“Ngang üsap tolong lón imwei ika tolong lón kiei,
4ngang üsap mwüüt ngeni mesei pwe repwe möür, üsap pwal mwüüt ngeni appwölün mesei pwe repwe ächikichikitiw,
5tori ngang üpwe küna ew leeni fäniten ewe SAMOL, ew leeni fäniten ewe Emön mi Manaman, än Jakob we Kot.”
6Nengeni, kich sia rongorong usun me lón Efrathah; sia küna me lón ekkewe mälämälin Jaar:
7“Öüsipwe feilló ngeni ewe leeni ia ewe SAMOL a imweimw ie, öüsipwe fel me arun ewe leenien pwuun pecheen, o apasa,
8‘Äi SAMOL, kopwe üütä o feilló ngeni óm we leenien asöösö, en me ewe Pwórofel, iei ewe esissilen óm manaman.
9Noum kewe souasór repwe üföüf óm pwüng o noum kewe chón pin repwe mweireiren pwapwa.’ ”
10Fänäsengesin noum we chón angang David, kosap äsepaló mesen noum we emön mi kepit.
11Ewe SAMOL a pwon fän ökköpöl ngeni David, ew pwon mi let i esap kulsäfäl seni o apasa: “Ngang üpwe äleenia emön me leiin noum kewe mwän wón óm we leenien móótun nemenem.
12Are noum kana mwän repwe älleasochisi äi pwon me äi kewe kapasen pwärätä, ngang üpwe äööw ngeniir, mwirin, pwal nöüür kana mwän repwe móót wón óm we leenien móótun nemenem tori feilfeilló chök.”
13Pün ewe SAMOL a fen filätä Zion, i a mochen pwe epwe iei leenien imwan o apasa,
14“Iei äi leenien asöösö tori feilfeilló chök; ngang üpwe imweim ikeei, pün iei ewe leeni ngang üwa tipeni.
15Ngang üpwe efeiöchüw Zion ren äi üpwe awora mwöngö mi somwosomwoló; ngang üpwe awora enen ekkewe chón wöwingaw pwe repwe mötüló.
16Ngang üpwe öüföüfa ngeni nöün Zion kewe souasór pwüng, nge nöün kewe chón pin repwe mweireiren pwapwa.
17Me ikenan lón Zion ngang üpwe föri pwe pöchökkülen än David nemenem epwe lapaló, epwe wewe ngeni efóch mächään maan epwe pwükütä fäniten David. Ngang üwa fen amollätä ew lamp fäniten neii we mi kepit.
18Ngang üpwe öüföüfa chón opwutan kana ren sääw, nge möküren ewe king epwe ofout ren epa mwärämwär mi lingöch.”
Köölfel 133
Feiöchün än nöün Kot aramas tipeew fengen. Echö köölün feittä än David.
1Nengeni, a ifa me mwirinnön pwal amwararan lupwen nöün Kot aramas ra nónnóm fengen lón ar tipeew!
2Pün tipeew a usun ewe lömmis mi öüchchea a niinitä wón möküren Aaron, a supwusupwutiw wón ölüsan o a supwusupwutiw wón kalaan üfan mi ttam.
3Tipeew a usun chök nge ewe omwurenipwinin ewe chuuk Hermon a püngütiw wón ewe Chuuk Zion. Pün ewe SAMOL a öllük pwe epwe anómwu an feiöch ikenan, iei ewe manaw feilfeilló chök.
Köölfel 134
Mwareiti ewe SAMOL lepwin me lón imwan we. Echö köölün feittä.
1Öüpwe feitto o mwareiti ewe SAMOL ämi meinisin noun ewe SAMOL chon angang, ämi mi üütä lepwin pwe ämi chón mas lón imwen ewe SAMOL.
2Öüpwe eitietä pöümi ngeni ewe leeni mi pin o mwareiti ewe SAMOL.
3Amwo ewe SAMOL, ewe mi föri läng me fönüfan, epwe efeiöchü kemi seni Zion.
Köölfel 135
Mwareiti Kot ren förian kana pwal ren an angangen angasa aramas.
1Mwareiti ewe SAMOL. Mwareiti iten ewe SAMOL; öüpwe mwareiti i, ämi nöün ewe SAMOL chon angang,
2ämi mi angang lón imwen ewe SAMOL, lón ekkewe leeni ünükkün imwen ach we Kot.
3Öüpwe mwareiti ewe SAMOL, pün ewe SAMOL a mwirinnö; öüpwe köölün mwareiti itan, pün itan a men amwaraar.
4Pün ewe SAMOL a fen filätä Jakob pwe pwisin noun, i a filätä Israel pwe epwe usun chök och pisekin mi öüchchea.
5Pün ngang mi silei pwe ewe SAMOL a lapalaap, üwa silei pwe ach ei Samol a lapalaap seni ekkewe kot meinisin.
6Ewe SAMOL a föri minne chök i a efich lón läng pwal wón fönüfan, lón ekkewe mataw me pwal lón ekkewe leeni mi alóllóól meinisin.
7I a föri ekkewe kuchu pwe repwe töötä seni ekkewe lesópwun fönüfan; i a pwal tiinato inefi fiti pwüngün üüt, a pwal atoowu äsäpwääl seni lón an kewe imwen iseis.
8I ewe a niieló ekkewe mwännichi me lón Egypt, ekkewe mwen nöün aramas me maan.
9I a föri an kewe esissil mi manaman me an kewe föfför mi amwaraar lón Egypt, pwal wón Farao me noun kewe chon angang meinisin.
10I a ataetiw ekkewe mwüü mi lapalaap o niieló ekkewe king mi pwora,
11Sihon, noun chon Amor we king, Ok ewe kingen Bashan me ekkewe kingen Kanaan meinisin.
12Iwe, a fangeló fönüer pwe epwe ew älemwir ngeni noun kewe aramasen Israel pwe repwe fönüeni.
13Äi SAMOL, itom a nónnóm tori feilfeilläo chök, äi SAMOL, iteiten pilóón aramas meinisin repwe silei iteüöchum.
14Pün ewe SAMOL epwe älletätä än noun kewe aramas pwüng o epwe ääni tong ngeni noun kana chón angang.
15Än chón ekkewe mwüü kewe kot ra för seni silfer me kolt, ouluuluen pöün aramas.
16A wor awer, nge resap tongeni kapas, a wor meser nge resap tongeni küna mweer,
17a wor selinger, nge resap tongeni rongorong, resap pwal tongeni färeni pwollen och me lón pwöötüür.
18Chókana mi föri ekkewe kot ra chök pwal usur; pwal usun chök meinisin iir mi anómwu ar apilükülük wór.
19Ämi chón leimwen Israel, öüpwe mwareiti ewe SAMOL; ämi ekkewe souasór seni chón leimwen Aaron, öüpwe mwareiti ewe SAMOL;
20ämi ekkewe chón leimwen Levi, öüpwe mwareiti ewe SAMOL; ämi mi nuokkusiti ewe SAMOL, öüpwe mwareiti ewe SAMOL.
21Öüpwe mwareiti ewe SAMOL seni lón Zion, öüpwe mwareiti ewe mi imweim lón Jwerusalem. Mwareiti ewe SAMOL.
Köölfel 136
1Öüpwe kilisou ngeni ewe SAMOL, pün i a mwirinnö, pün an tong mi nüküchchar a nónnóm tori feilfeilló chök;
2Öüpwe kilisou ngeni ewe Kot mi tekia seni ekkewe kot meinisin, pün an tong mi nüküchchar a nónnóm tori feilfeilló chök;
3Öüpwe kilisou ngeni ewe Samol mi tekia seni ekkewe samol meinisin, pün an tong mi nüküchchar a nónnóm tori feilfeilló chök;
4ngeni i echök ewe mi föri ekkewe manaman mi amwaraar, pün an tong mi nüküchchar a nónnóm tori feilfeilló chök;
5ngeni i ewe mi föri ekkewe läng ren an silelap, pün an tong mi nüküchchar a nónnóm tori feilfeilló chök;
6ngeni i ewe mi anómwu fönüfan wón ekkewe mataw, pün an tong mi nüküchchar a nónnóm tori feilfeilló chök;
7ngeni i ewe mi föri ekkewe saram mi wätte, pün an tong mi nüküchchar a nónnóm tori feilfeilló chök;
8ewe akkar pwe epwe nemeni rän, pün an tong mi nüküchchar a nónnóm tori feilfeilló chök;
9ewe maram me ekkewe füü pwe repwe nemeni pwiin, pün an tong mi nüküchchar a nónnóm tori feilfeilló chök;
10ngeni i ewe mi niieló ekkewe mwännichien lón Egypt, pün an tong mi nüküchchar a nónnóm tori feilfeilló chök;
11o a emmwenawu ekkewe chon Israel seni Egypt, pün an tong mi nüküchchar a nónnóm tori feilfeilló chök;
12ren pöün mi pöchökkül o manaman, pün an tong mi nüküchchar a nónnóm tori feilfeilló chök;
13ngeni i ewe mi kinifeseni ewe Setipar lón ruu, pün an tong mi nüküchchar a nónnóm tori feilfeilló chök;
14o emmwenawu ekkewe chón Israel pwe repwe pwereló lukalapen ewe Setipar, pün an tong mi nüküchchar a nónnóm tori feilfeilló chök;
15nge a oturalong Farao me an mwichen sounfiu lón ewe Setipar, pün an tong mi nüküchchar a nónnóm tori feilfeilló chök;
16ngeni i ewe mi emmwenaló nöün kewe aramas lón ewe fönüpöön, pün an tong mi nüküchchar a nónnóm tori feilfeilló chök;
17ngeni i ewe mi niietiw ekkewe king mi iteföüló, pün an tong mi nüküchchar a nónnóm tori feilfeilló chök;
18o niieló ekkewe king mi pwora, pün an tong mi nüküchchar a nónnóm tori feilfeilló chök;
19Sihon nöün ekkewe chón Amor we king, pün an tong mi nüküchchar a nónnóm tori feilfeilló chök;
20me Ok ewe kingen Bashan, pün an tong mi nüküchchar a nónnóm tori feilfeilló chök;
21o a fangeló fönüen ekkeei king pwe epwe ew älemwir, pün an tong mi nüküchchar a nónnóm tori feilfeilló chök;
22ew älemwir ngeni Israel, noun we chón angang, pün an tong mi nükücchchar a nónnóm tori feilfeilló chök;
23I a chechchemeni kich lón ach nóm lón tekisón, pün an tong mi nüküchchar a nónnóm tori feilfeilló chök;
24o angasa kich seni ekkewe chón opwuta kich, pün an tong mi nüküchchar a nónnóm tori feilfeilló chök;
25i a fang mwöngö ngeni iteiten förian kana meinisin, pün an tong mi nüküchchar a nónnóm tori feilfeilló chök.
26Öüpwe kilisou ngeni ewe Koten läng, pün an tong mi nüküchchar a nónnóm tori feilfeilló chök.
Köölfel 137
Pwositi Zion me lón ew fönüen chón ekis.
1Äm äia móttiw o kechiw ünükkün ekkewe chaanpwuupwun Babylon lupwen äia chemeni Zion.
2Me ikenan äm äia asapätä nöüüm kewe pisekin likettik itan harp wón ekkewe irä iter poplar,
3pün me ikenan ekkewe chon liäpeni keem ra echchimwa keem pwe äipwe kööl, ekkewe chon eriäfföü keem ra eriäni keem pwe äipwe köölün pwapwa; ra apasa: “Öüpwe köölüw ngeni keem echo kewe köölün Zion!”
4Nge epwe ifa usun äm äipwe köölüw ekkewe köölün ewe SAMOL lupwen äm mi nóm lón ew fönüen chón ekis?
5Are ngang üpwe möllükukeló, Jerusalem, iwe, amwo pöüifichi epwe möllükaló an sipeöch le ettiki ewe pisekin likettik itan harp.
6Amwo chönnawei epwe pachatä fän fóngóchi, are üsap chechchemenuk, are üsap chüen öüchcheani ekiekum en Jerusalem asalapen äi pwapwa.
7Äi SAMOL, kopwe chechchemeni meet ekkewe chón Edom ra föri lón ewe ränin ekkewe sounfiun Babylon ra liäpeni Jerusalem. Ra pwupwuchör o apasa, “Ataetiw, ataetiw tori ekkewe lóngólóngun faan!”
8En Babylon, kopwe fätäl ngeni óm kopwe taaló. Epwe pwapwa iö mi ngenuk chappen meet en ka föri ngeni keem.
9Epwe pwapwa iö mi turufi noum kewe semiriit o oturuur ngeni ekkewe achaw.
Köölfel 138
Än ewe SAMOL kirekiröch ngeni ekkewe mi ölükülük. Echö kööl än David.
1Ngang üpwe kilisou ngenuk, äi SAMOL, ren unusen letipei; ngang üpwe köölün mwareituk me mwen ekkewe kot.
2Ngang üpwe chappetiw me mwen óm we Imwenfel mi pin lupwen ngang üpwe fel ngenuk; ngang üpwe mwareiti itom ren óm tong ese mwüch me óm ölükülük, pwokiten en ka etekiatä itom me óm kapas asen mettóch meinisin.
3Lón ewe rän ngang üwa kökköruk, en ka pölüweniei; en ka alapaló pöchökkülen ngüni.
4Ekkewe kingen fönüfan meinisin repwe kilisou ngenuk, äi SAMOL, lupwen repwe rongorong ekkewe kapas mi toowu seni awom,
5iwe, iir repwe köölüw usun än ewe SAMOL kewe föfför, pün lingen ewe SAMOL a fókkun lapalaap.
6Pün inamwo are ewe SAMOL a fókkun tekia, nge i a äfälli ekkewe mi tekisón. Nge i a toowaw seni ekkewe mi lamalamtekia.
7Inamwo are ngang üwa fätäl lukalapen osukosuk, nge en ka tümwünü manawei; en ka eitiewu pöum o pölüweni än ekkewe chon opwutaei soong o pöüiifichum a angasaei.
8Ewe SAMOL epwe ounusa le öpwönüetä an akkóót fänitei. Òm tong mi nüküchchar, äi SAMOL, a nónnóm tori feilfeilló chök. Kosap likitaló angangen pöüm kana.
Köölfel 139
Än Kot silei aramas a unusöch. Fäniten ewe chón nemeni kööl. Echö än David kööl.
1En ka etittinaei, äi SAMOL, o en ka sileei.
2En ka silei lupwen üwa móót me lupwen äi üütä; en ka silei iteiten äi ekiek seni toowaw.
3En ka öüwasacha äi feilló me äi kóónóló; en ka silei äi kewe föfför meinisin.
4Me mwen ew kapas a nóm wón chónnawei, nengeni, äi SAMOL, en ka fen unusen silei.
5En ka rokopwälieló lükisöküri me fän mesei o ka isenätä pöum wóói.
6Ei sókkun silelap a fókkun amwaraar ngeniei, a fókkun tekia ngeniei pwe ngang üsap tongeni to wón.
7Ia üpwe tongeni feilló ie seni Ngünum? Ia üpwe tongeni süüló ie seni fän mesom?
8Are üpwe feittä läng, en mi nóm ikenan. Are üpwe feittiw o kóón lón ewe leenien mi mäló, en ka pwal nóm ikenan.
9Are üpwe ääs wón pöükässin mällen rän pwe üpwe ässiló ngeni lesópwólón ewe mataw,
10pwal me ikenan mwo nge pöum epwe emmweniei o pöüifichum epwe kömwöch ngang.
11Are üpwe apasa, “Enlet, rochopwak epwe pwölüweiló, nge ewe saram ünükki epwe wiliti pwiin,”
12iwe, ewe mwo rochopwaak nge esap roch mereemw; lepwin epwe saramaram usun chök lerän, pün rochopwak a usun chök saram mereemw.
13Pün en ka föri ekkewe kinikinin masowen leutun inisi; en ka ochufengeniei me lón än inei leenien monukól.
14Ngang üwa mwareituk pwokiten a uren eniwokkus me uren amwaraar óm föriei. Ra fókkun amwaraar óm kewe angang. Ngüni a fókkun sileöchüw.
15Chüüi resap mwón senuk lupwen ngang üwa för lemwónómwón, lupwen üwa kochufengen me lón ekkewe leeni mi alóllóól lón fönüfan.
16Mesom ra künaei me mwen an esap mwo wor uluulun inisi. Iteiten ränin manawei meinisin en ka awora fänitei, ra makketiw lón noum pwuk; iteiten ew me ew rän a makketiw lupwen esap mwo wor ew me leiir.
17Äi Kot, a ifa me öüchchean ngeniei óm kewe ekiek! A ifa me ar resap tongeni repwe lea ngeniei kapachalaper.
18Are ngang üpwe älleaniir, iwe, ra chómmóng seni iteiten ekkewe föün pien arosset. Iwe, lupwen üwa pwäätä lesossor, ngang üwa chüen nóm reemw.
19Äi Kot, amwo itä kopwe chök niieló ekkewe aramasingaw! Öüpwe süü seniei ämi ekkana chón niieló aramas.
20Iir ra kapas mi ngaw fänitom fän ekingawen letiper; ekkewe chón opwut en ra föüni mwäli itom.
21Äi SAMOL, ifa usun, ngang üsap opwut chókana mi opwut en? Ifa usun, ngang üsap niopwut chókana mi üüngenuk?
22Ewer, ngang üwa opwut iir ren unusen kopwut, pün chókewe en ka opwut iir, pwal ngang üwa opwut iir.
23Kopwe etittinaei, O Kot, o silei letipei. Kopwe sótuniei o silei äi kana ekiek.
24Iwe, kopwe nengeni are mi wor och föfför mi älemesengaw lón manawei, o kopwe emmweniei lón ewe aal ese mwüch.
Köölfel 140
Iótekin ngaseló seni ekkewe aramasingaw. Ngeni ewe chon nemeni kööl. Echö kööl än David.
1Kopwe chimanüei, äi SAMOL, seni ekkewe aramasingaw; kopwe tümünüei seni ekkewe aramas mi mwänesol,
2chókana mi ekiekietä lón letiper ekkewe akkóót mi ngaw o öpöchökküla le popuw an epwe sópwósópwóló le wor maun.
3Iir ra seimi chönnawer pwe repwe kken usun chök chönnawen serepenit. Poisonun serepenit a nóm fän tinnnawer. Selah
4Äi SAMOL, kopwe tümwünüei seni pöün ekkewe aramasingaw; kopwe tümwünüei seni chókana mi mwänesol mi rawangaweei pwe pecheei repwe chepetek.
5Ekkewe aramas mi lamalamtekia ra sooni ew likottup fänitei; ra emeresaló ar kewe cheew o ra sooni ar kewe likottup aroppen alei we pwe üpwe ttup lóór. Selah
6Ngang üwa apasa ngeni ewe SAMOL, “En äi Kot!” Kopwe öüseling ngeni äi siö pwe kopwe ümöümöch ngeniei.
7Äi SAMOL KOT, en ewe chón angasaeiló mi pöchökkül, ka eppeti mökürei lón ewe ränin maun.
8Äi SAMOL, kosap mwüüt ngeni ekkewe aramasingaw ar mochen; kosap mwüüt ngeniir pwe repwe sópweló ar kewe akkóót mi ngaw pwe repwe pwönüetä, pün are kosap; iwe, repwe etekiaretä. Selah
9Chókana mi pwellieiló ra echimwätä mökürer fän lamalamtekia. Amwo kirikiringawen tinnawer epwe pwisin efeiengawer.
10Kopwe mwüüt ngeni mwolien ekkei mi kü repwe turutiw wón mökürer; kopwe likitireló pwe repwe koturolong lón ewe ekkei, lón ekkewe pwaang mi alóllóól pwe resap chüen toowu.
11Kosap mwüüt ngeni ekkewe chón eitengawa aramas pwe repwe feffeitä me lón ewe fönü; kopwe likiti ngeni och feiengaw mi wätte epwe mwittir kütta emön aramas mi mwänesol pwe liapan.
12Nge ngang üwa silei pwe ewe SAMOL epwe fókkun peni ekkewe mi riäfföü o epwe ääni öpwüngüwen ngeni ekkewe mi osupwang.
13Enlet, ewe chón pwüng epwe kilisou ngeni itom, o ewe chón wenechchar epwe nónnóm fän mesom.
Köölfel 141
Iótekin tungór tümwün seni minne mi ngaw. Echö än David kööl.
1Ngang üwa kökköruk, äi SAMOL, kose mochen kopwe käito reei; kopwe öüüw selingom ngeni mweliei lupwen ngang üwa köruk!
2Amwo kopwe etiwa äi iótek pwe epwe usun asóren ötüöt mi pwokkus me fän mesom; amwo äi eitietä peii epwe usun ewe asóren lekkuniól.
3Kopwe awora emön chón masa awei, äi SAMOL, epwe mammasa asamen tinnawei.
4Kosap mwüüt ngeni letipei pwe epwe paaniei ngeni meet mi ngaw, pwe üpwe pacholong le föri ekkewe föfför mi ngaw fiti chókana mi föfföringaw; kosap mwüüt ngeniei pwe üpwe mwöngö aner kewe mi annö.
5Kopwe mwüüt ngeni emön aramas mi pwüng pwe epwe wichiiei - ei epwe och kirekiröch; kopwe mwüüt ngeni pwe epwe öpwüngüei - ei epwe usun lömmis mi pwokkus wón mökürei. Kosap mwüüt ngeni mökürei pwe epwe opwut, pün üwa chók ikkiótek fóchófóch le üüngeni ekkewe föfför än ekkewe chón föfföringaw.
6Lupwen nöür kewe samol repwe koturutiw seni lepökun ekkewe achaw, mwirin, ekkewe aramasingaw repwe öüseling ngeni äi kewe kapas o käeö pwe ra mwirinnö o pwüng.
7Usun emön chón atake a tuuwetä pwül o ekkewe faaw ra pwäätä, iwe, epwe ina usun chüün ekkewe aramasingaw repwe chök toropasfeil nge resap peias.
8Nge mesei kana ra chök nennengenuk, SAMOL KOT; ngang üwa küttók pwe en kopwe äi leenien op. Kosap likitieiló pwe esap wor chón peniei.
9Kopwe tümwünüei seni ekkewe chünnümei ra sooni fänitei; kopwe tümwünüei seni ekkewe likottupw än chókana mi föfföringaw.
10Kopwe mwüüt ngeni ekkewe aramasingaw pwe repwe turulong lón pwisin ar kewe sär, lupwen ngang upwe pwereló seniir pün üsap tupw lóór.
Köölfel 142
Ew tungór fäniten älillisin ngaseló seni ekkewe chón eriäfföü. Och ekillól än David. Ew iótek lupwen a nóm lón ewe fööimw.
1Ngang üwa leüommóng le siö ngeni ewe SAMOL; ngang üwa leüommóngetä fän mweliei ngeni ewe SAMOL pwe epwe ümöümöch ngeniei.
2Ngang üwa niinätiw fän mesan äi kana lalangaw; ngang üwa aporausa äi kana osukosuk me fän mesan.
3Lupwen ngüni a apwangapwangeló me lóói, en chök ka silei ewe aal. Lón ewe aal ia ngang üwa fätäl ie, ra sooni ew likottupw fänitei.
4Kopwe nengeni o küna pwe esap wor emön a nóm peliifichi; esap wor emön a ekieki usi. Esap wor äi leenien op; esap wor emön a chüngüw manawei.
5Ngang üwa siö ngenuk, äi SAMOL; ngang üwa apasa, “En äi leenien op, en ineti me lón ewe fönüen chón manaw.”
6Kopwe öüseling ngeni äi siö, pün ngang üwa nóm lón osupwang wätte; kopwe chimanüei seni ekkana chón tapweriei, pün iir ra koon pöchökkül ngeniei.
7Kopwe angasaeiwu seni lón leenien föötek, pwe ngang üpwe tongeni kilisou ngeni itom. Mwirin, ekkewe chón pwüng repwe mwiicheto ünükki pwokiten óm kirekiröch ngeniei.”
Köölfel 143
Ew iótekin tungór fäniten emwen me ngaseló. Echö kööl än David.
1Äi SAMOL, kopwe rong äi iótek, kopwe öüüw selingom ngeni äi tungór pwe kopwe ümöümöch ngeniei; kopwe pölüweniei lón óm ölükülük pwal lón óm pwüng.
2Kosap atolonga noum chón angang lón köpwüng, pün esap wor emön mi manaw a unusöch me fän mesom.
3Pün ewe chón opwut a tapweri ngüni, i a appachatiw manawei lepwül; i a eriäniei pwe üpwe móót lón rochopwak usun chókana ra mäló chök melóóm.
4Iei minne, ngüni a apwangapwangeló, letipei a nuokkus.
5Ngang üwa chechchemeni ewe fansoun lóóm; ngang üwa leechüüni óm kewe föfför meinisin o ekieki ekkewe angang poum ra fen föri.
6Ngang üwa eitietä peii ngenuk; ngüni a kaakaituk usun ew fönü mi pwasapwas a kaakaiti kólik. Selah
7Kopwe mwittir pölüweniei, äi SAMOL, pün ngüni a apwangapwangeló. Kosap aopa wón mesom seniei, pwe ngang üse wewe ngeni chókana mi feittiw lón ewe pwaang.
8Kopwe mwüüt ngeniei pwe üpwe rongorong usun óm tong ese mwüch lesossor, pün ngang üwa anómwu äi apilükülük wóómw. Kopwe esilei ngeniei ewe aal üpwe fätäl wón, pün ngang üwa lükü ngenuk manawei.
9Kopwe chimänüei seni ekkewe chón opwutaei, äi SAMOL, pün ngang üwa sü ngenuk pwe en kopwe äi leenien op.
10Kopwe äööw ngeniei äi üpwe föri letipom, pün en äi Kot; amwo Ngünum mi ümöümöch epwe emmweniei wón ew pwül mi sóssónöch.
11Fänäsengesin itom, äi SAMOL, kopwe tümwünü manawei; lón óm pwüng, kopwe atöweiwu seni lón ei riäfföü.
12Lón óm tong ese mwüch, kopwe arosaló ekkewe chón opwutaei meinisin; kopwe niieló ekkewe chón üüngeniei meinisin, pün ngang noum chón angang.
Köölfel 144
Echö kööl ngeni ewe SAMOL mi tümwünü me äfeffeitäi nöün aramas. Echö kööl än David.
1Üpwe mwareiti ewe SAMOL äi achaw, mi esipa ngeni kumwuchun peii pwe repwe supwusupöch lón maun, pwal ächefen peii pwe repwe angöch le fiiu.
2I äi Kot mi ääni tong ese mwüch pwal i imwei imwen maun mi tekia, äi leenien op mi pöchökkül me chón seläniei, äi pisekin eppetin feiengaw lón maun, i ewe ngang üwa süüri pwe äi leenien op, i ewe mi okkufätiw fai chón ekkewe mwüü.
3Äi SAMOL, meet aramas pwe en ka äfälli usun, ika meet nöün aramas pwe en ka ekieki usun?
4Äramas a chök wewe ngeni enienin ngasangas; ränin manawan a usun chök och nnür mi mwittir móróló.
5Kopwe pwóreetiw óm ekkewe läng, äi SAMOL, o feittiw; kopwe attapa ekkewe chuuk pwe repwe ötüwöt.
6Kopwe efiifieló óm kewe inefi o atoropasereló; kopwe pekkieló noum kewe föün esefich o cheereló.
7Kopwe eitietiw pöum seni läng; kopwe chimanüei o angasaei seni ekkewe kólik mi chómmóng, seni pöün ekkewe chón ekis,
8awer ra uren kapas chofona; ra eitietä pöüiifichir o pwon fän ökköpöl pwe repwe kapas enlet, nge ra kapas chofona.
9Ngang üpwe köölüw echo kööl mi fö ngenuk, äi Kot; ngang üpwe köölün mwareituk fiti ewe pisekin likettik itan harp mi wor engol säitelin.
10Ngang üpwe kööl ngeni ewe Emön mi fang ngeni ekkewe king ar wiil, ewe emön mi chimanü nöün we chón angang David.
11Kopwe chimanüei o angasaei seni pöün ekkewe chón ekis, awer ra uren kapas chofona, ra eitietä pöüiifichir o pwon fän ökköpöl pwe repwe kapas enlet, nge ra kapas chofona.
12Amwo nöüch kana äät repwe pöchökkül lupwen ra ölüwöl, repwe wewe ngeni ekkana irä mi fókkun määröch; amwo nöüch kana föpwül repwe lingöch usun ekkana üren lepwokuuku ra ffal fäniten ofouten lón ew imwen king.
13Amwo ach kewe leenien iseis uwään fótach irä repwe ur ren sakkopaaten üwään irä; amwo nöüch kana pwiin siip lón ach kana mälämäl repwe chómmóngóló fän ngöröw me ngöröw, pwal fän engol ngöröw,
14amwo nöüch kana pwiin kowu epwe chómmóng nöüür, nge esap mwet seniir nöüür ika mä nöüür; amwo esap wor pwuchöörün riäfföü me lón alach kana.
15Ra pwapwa ekkana aramas mi fis ngeniir ekkeei sókkun feiöch. Ra pwapwa ekkana aramas mi ääni Kot ewe SAMOL.
Köölfel 145
Echö kööl fäniten än Kot manaman me tong. Echö än David köölün mwareiti Kot.
1Ngang üpwe mwareituk, äi Kot me King; ngang üpwe mwareiti itom tori feilfeilló chök.
2Ngang üpwe mwareituk iteiten rän o mwareiti itom tori feilfeilló chök.
3Ewe SAMOL a fókkun lapalaap, o epwe fókkun lapalaap än aramas repwe mwareiti, esap wor emön a tongeni ngafa öükükün an lapalaap.
4Ew pilóón aramas epwe aporausa ngeni pwal ew pilóón usun óm kewe föfför o repwe esilefeili óm manaman.
5Ngang üpwe leechüüni amwaraaren lingen óm manaman, me amwaraaren óm kewe föfför.
6Iir repwe aporausa usun manamanen óm kewe föfför mi eniwokkus, nge ngang üpwe esilefeili óm kewe angang mi lapalaap.
7Iir repwe aporausa porausen óm kirekiröch mi somwoló o repwe köölüw óm pwüng fän pwapwa.
8Ewe SAMOL a ümöümöch o kirekiröch, a songommang o uren tong ese mwüch.
9Ewe SAMOL a mwirinnö ngeni aramas meinisin; an ümöümöch a nóm wón meinisin minne i a föri.
10Meinisin föriom kana repwe kilisou ngenuk, äi SAMOL; noum kewe chón pin meinisin repwe mwareituk.
11Repwe kapas usun lingen mwuum, repwe aporausa usun óm manaman,
12repwe esilei ngeni ekkewe nöün aramas óm kewe föfför mi manaman me amwaraaren lingen óm mwuum.
13Pün mwuum ew mwüü mi nóm tori feilfeilló chök, nge óm nemenem a nónnóm wón ekkewe pilóón aramas meinisin. Ewe SAMOL a ölükülük lón an kapas meinisin o kirekiröch lón an föfför meinisin.
14Ewe SAMOL a ömwöchätä chókana meinisin mi turuló o a echimwätä meinisin iir mi pworetiw fän ar wosochchow.
15Mesen mönümanaw meinisin ra nennengenuk, nge en ka fang ngeniir äner mwöngö lupwen a tori fansoun.
16En ka suukaló pöum, en ka ämenemenöchüw mochenin iteiten mettóch mi manaw.
17Ewe SAMOL a pwüng lón meinisin minne i a föri o kirekiröch lón an föfför meinisin.
18Ewe SAMOL a arap ngeni iir meinisin mi kööri i, ewer, i a arap ngeni iir meinisin mi kööri i lón let.
19I a öpwönüetä mochenin chókana mi nuokkusiti i; i a pwal rongorong ar siö o amanawer.
20Ewe SAMOL a tümwünü chókana meinisin mi echeni i, nge a arosaló ekkewe aramasingaw meinisin.
21Awei epwe kapasen mwareiti ewe SAMOL, o fituk meinisin repwe mwareiti itan mi pin tori feilfeilló chök.
Köölfel 146
Pwapwan chókana ra ääni ewe SAMOL chón älillis.
1Mwareiti ewe SAMOL! Ngüni, kopwe mwareiti ewe SAMOL.
2Ngang üpwe mwareiti ewe SAMOL lón unusen manawei; ngang üpwe köölün mwareiti äi Kot lón üküükün langattamen äi manaw.
3Öüsap anómwu ämi apilükülük wón ekkewe samol ika emön nöün aramas, pün esap wor alen küna manaw reer.
4Lupwen enienin ngasangaser epwe toowu seniir, iir epwe liwinsäfäl ngeni ewe pwül; lón ena chök ränin, ar kewe akkóót ra mwüchchüló.
5Nge a pwapwa emön aramas mi ääni chon älillis än Jakob we Kot, an apilüköch a nóm lón ewe SAMOL an Kot,
6ewe mi föri läng me fönüfan me mataw me meinisin mi nóm lóór, ewe mi ölükülük tori feilfeilló chök;
7ewe mi ääni öpwüngüwen fäniten ekkewe mi riäfföü o a fang ngeni ekkewe mi echik äner mwöngö. Ewe SAMOL a angasaló ekkewe chon föötek;
8ewe SAMOL a änennelói mesen ekkewe mi mesechuun. Ewe SAMOL a ekiietä chókana mi pwóretiw fän ar wosochchow; ewe SAMOL a tongei ekkewe chon pwüng.
9Ewe SAMOL a mammasa ekewe chón ekis, a äfälli ekkewe mi määsen me ekkewe fefin mi mä pwülüwer, nge i a atai än ekkewe aramasingaw akkóót.
10Ewe SAMOL epwe nemenem tori feilfeilló chök, óm we Kot, en Zion, epwe nemenem wón ekkewe pilóón aramas meinisin. Mwareiti ewe SAMOL!
Köölfel 147
Mwareiti Kot ren an kapas me an tümwün.
1Mwareiti ewe SAMOL! A ifa me mwirinnön ach sipwe köölün mwareiti ach Kot, a ifa me öchchün me pwüngüöchchün ach sipwe mwareiti i!
2Ewe SAMOL a öüüwetä Jerusalem o ionato ekkewe chon Israel mi koturuló.
3I a echikara ekkewe mi taatakkis letiper o a finiti kinaser.
4I a filätä le öpwüngaló iteiten ekkewe füü o a köri ngeni eföü me eföü itan.
5A fókkun lapalaap ach ei Samol, an manaman a fókkun somwoló, an weweöch a selüküló öüküükün.
6Ewe SAMOL a älisätä ekkewe mi tekisón, nge a oturätiw leppwül ekkewe aramasingaw.
7Öüpwe kööl ngeni ewe SAMOL fän kilisou; öüpwe köölün mwareiti ach Kot fiti ewe pisekin likettik itan harp.
8I a pwölüweló fän läng ren ekkewe kuchu; i a öpüngätiw üüt wón fönüfan o ämäärätä ekkewe fetil wón ekkewe chukuchukutä.
9I a awora mwöngö fäniten ekkewe maan mwacho pwal fäniten ekkewe appanen machchang iter reifen lupwen ra ttik.
10I esap mwaar ren pöchökkülen óris, esap pwal ing ren pöchökkülen pecheen emön soumaun;
11nge ewe SAMOL a pwapwa ren chókana mi meniniti i, chókana mi anómwu ar apilüköch lón an tong ese mwüch.
12Kopwe mwareiti ewe SAMOL, en Jerusalem; kopwe mwareiti óm Kot, en Zion.
13Pün i a öpöchökküla pinepinen asamalapom kewe o efeiöchü noum kewe aramas mi nóm lóóm.
14I a awora kinamwe me lón kinikinin kiänum kewe o amasowók ren chómmóng wiit mi mwirinnö.
15I a tiinaló an öllük ngeni fönüfan; an kapas a mwittir säfätäl.
16I a emeresaló ewe sno usun chök ünen siip mi pwechepwech o a atoropasa feili sno mi föüló usun chök falangen ekkei.
17I a amworätiw an föün ais usun chök föümwo. Iö a tongeni epwe pwääk ren pöchökkülen enienin patapatan?
18I a tiinaló an kapas o etelaló ekkewe föün ais; i a föri pwe äsäpwääl epwe enien, iwe, ekkewe kólik ra pwuupwu.
19I a pwääri an kapas ngeni Jakob, an kewe öllük me pwüüng ngeni Israel.
20I esap föri mwo fän ew ei sókkun ngeni pwal ekkóch mwüü; ekkewe ekkóch mwüü resap silei an kewe öllük.
Mwareiti ewe SAMOL!
Köölfel 148
Kapasen mwareiti ewe SAMOL meren förian kana
1Mwareiti ewe SAMOL! Öüpwe mwareiti ewe SAMOL seni ekkewe läng; öüpwe mwareiti i me lón ekkewe leeni mi tekia peekitä.
2Öüpwe mwareiti i, ämi nöün kana chón läng meinisin; öüpwe mwareiti i, ämi nöün mwiichen soufiun läng meinisin!
3Öüpwe mwareiti i, ämi akkar me maram; öüpwe mwareiti i, ämi ekkewe füü meinisin mi ttin!
4Öüpwe mwareiti i, ämi ekkewe läng mi fókkun tekia; öüpwe mwareiti i, ämi ekkewe kólik asen ekkewe läng.
5Iir meinisin repwe mwareiti iten ewe SAMOL, pün i a atoowu an öllük, iwe, ra fisitä,
6i a önüküchcharer lón leenier pwe repwe nóm tori feilfeilló chök, ren ew öllük esap tongeni epwe taaló.
7Öüpwe mwareiti ewe SAMOL seni wón fönüfan, ämi ekkewe mönün lemataw mi fókkun wätte me meinisin ekkewe leeni mi alóllóól lón mataw,
8inefi me üten faaw, sno me kuchu, pwal äsäpwäälin mölümöl mi öpwönüetä an kapas,
9ämi ekkewe chukutekia me ekkewe chukutekisón, ämi ekkewe irä mi wor uwaar me ekkewe irä iter sedar meinisin,
10ämi ekkewe maanmwacho me ekkewe maanfesir meinisin, ämi ekkewe maantöötö me ekkewe maansüüsü,
11ämi ekkewe kingen fönüfan me ekkewe aramas meinisin, ämi ekkewe samol me ekkewe souköpwüngün fonufan,
12ämi ekkewe ölüwül me föpwül, ämi ekkewe chinlap me semiriit.
13Iir meinisin repwe mwareiti iten ewe SAMOL, pün itan chök a fókkun tekia; an ling a tekiatä asen fönüfan me läng.
14I a öüüwetä efóch mächä, usun mächään maan, fäniten nöün kewe aramas, pwe noun kana chón angang meinisin repwe mwareiti i, iir ekkewe aramasen Israel mi kkan ngeni i. Mwareiti ewe SAMOL.
Köölfel 149
Mwareiti Kot ren an alen ngaseló me an öpwüngü aramas
1Mwareiti ewe SAMOL! Öüpwe köölüw ngeni ewe SAMOL echö kööl mi fö, öüpwe köölün mwareiti i me lón ewe mwiichen nöün aramas mi ölükülük.
2Israel epwe pwapwa ren ewe Chón Föri i; aramasen Zion repwe meseik ren ar we King.
3Iir repwe mwareiti itan fän pwörük, o repwe kööl ngeni i fiti ekkewe pisekin likettik iter tamporin me harp.
4Pün ewe SAMOL a pwapwaiti noun aramas; i a ämwärämwära ngeni ekkewe chon tekisón ewe alen manaw.
5Nöün kewe aramas mi ölükülük repwe meseik lón ei ling o kööl ren ar pwapwa lupwen ra kóón wón kieer kewe peet.
6Amwo ar kapasen mwareiti Kot epwe nóm lón aweer, nge efóch ketilas mi kken me rüepeek epwe nóm lón pöüür,
7pwe repwe ngeni chon ekkewe mwüü chappen ar föfför o öpwüngü ekkewe aramas,
8pwe repwe fööti nöün chón ekkewe mwüü kewe king ren sein me nöür kewe aramas tekia ren selimächä,
9pwe repwe öpwüngü chón ekkewe mwüü usun minne a fen makketiw pwe epwe fis ngeniir. Iei lingen noun kana aramas mi ölükülük meinisin.
Mwareiti ewe SAMOL!
Köölfel 150
Mettóch meinisin repwe mwareiti ewe SAMOL
1Mwareiti ewe SAMOL!
Öüpwe mwareiti Kot me lón imwan we mi pin; öüpwe mwareiti i me lón an we läng mi manaman.
2Öüpwe mwareiti i ren an kewe föfför mi manaman; öüpwe mwareiti i ren an tekia mi somwosomwoló echchipwörün.
3Öüpwe mwareiti i ren tikin rappwa; öüpwe mwareiti i ren tikin ekkewe pisekin likettik iter harp me layer,
4öüpwe mwareiti i ren ewe pisekin likettik itan tamporin pwal ren pwörük, öüpwe mwareiti i ren ekkewe pisekin likettik mi wor säitelin pwal ren ewe pisekin likettik itan flut,
5öüpwe mwareiti i ren ämi älecha fengeni ekkewe mächään likettik itan simpal, öüpwe mwareiti i ren ämi älechasäfäli fän leüommóng ekkewe simpal.
6Iteiten mettóch meinisin mi wor an enienin ngasangas epwe mwareiti ewe SAMOL.
Mwareiti ewe SAMOL!