Kolose

Paul a kapwong ngeni pwiin kewe lón Kraist

1Ei taropwe seniei, ngang Paul, emön mi kefilitä meren Kot pwe üpwe emön nöün Jesus Kraist soukünó, pwal seni pwiich ei Timothy

2Äm aia makkei ei taropwe ngeni kemi ämi nöün Kot kewe aramas mi pin mi nóm lón ewe telinimw Kolose, ämi pwiim kana mi likiitü lón Kraist.

Ümöümöch me kinamwe seni Kot Samach me ewe Samol Jesus Kraist epwe tori kemi.

Paul a kilisou ngeni Kot ren än ekkewe chón pin lükü lón Kraist

3Äm aia iótek fänitemi iteiten fansoun meinisin o kilisou ngeni Kot, Semen ach Samol Jesus Kraist, 4pün äm aia rong usun ämi lükü lón Kraist Jesus me ämi tongei ekkewe chón pin meinisin, 5pwokiten öüwa apilükülükü ewe pwapwa mi iseis fänitemi lón läng. Iwe, öüwa ääni ei apilükülük seni chök ewe äkkäewin fansoun öüwa rong ewe kapsen let, iei ewe poraus allim. 6Ei poraus ällim mi tori kemi, pwal iei chök ewe poraus allim a meresfeil wón unusen fönüfan. A siwili manawen aramas ekis meinisin, usun chök an siwili manawemi lón ewe äkkäewin fansoun öüwa rong o weweiti ewe let usun än Kot ümöümöch ngeni chón tipis. 7Epafras, chienach we chón angang mi ächengicheng, i ewe a uweato reemi ewe poraus allim. I emön nöün Kraist amanaw mi likiitü a älisi keem fänäsengesimi. 8I ewe a pwal esile ngeni keem usun wätten ewe tong ewe Ngüünmifel a ngeni kemi fäniten ämi öüpwe tongei ekkóch.

Kraist chök I asalapan

9Iwe, iei popun, seni ewe fansoun äm aia rong ei poraus, äisap ükütiw le iótek fänitemi o tungór ngeni Kot pwe I epwe ngeni kemi ämi öüpwe unusen weweiti meet I a mochen epwe föri lón manawemi. Iwe, äm aia tungórei pwe epwe fang ngeni kemi ämi miriit lón tipächchemin peekin ngüün. 10Mwirin, öüpwe manaweni ew manaw mi fich ngeni ewe Samol iteiten fansoun meinisin o unusen föri minne I epwe pwapwa ren, öüpwe pwal uwaöch lón sókkun föfför mi mwirinnö meinisin, öüpwe pwal mämmääritä lón ämi silelapei Kot. 11Äm aia pwal iótek pwe öüpwe pöpöchökküleló ren unusen an manaman mi ling, fäniten an epwe wor ämi mósónóttam me engngiló. Öüpwe uren pwapwa, 12o kilisou ngeni ewe Saam iteiten fansoun meinisin, I ewe a ötüfichi kich an epwe wor inetich me lón inetin ekkewe chón pin mi nóm lón saram. 13Pün I a angasakichewu seni ewe emön mi nemenem lón rochopwak o atolonga kich lón mwüün Nöün we mi ächengicheng. 14Kot a möönatiw liwinin ach sipwe ngasaló seni ach kana tipis ren chaan Nöün we o omwusaló ach kana tipis meinisin.

15Kraist, I wesewesen uluulun ewe Kot sisap tongeni küna ren mesach. I a fen nóm me mwen än Kot a föri mettóch meinisin, pwal I a nemenlapei me nóm asalapen förien Kot meinisin. 16Pün Kot a föri mettóch meinisin meren Kraist, mettóch meinisin lón läng me wón fönüfan. I a föri kana mettóch kich mi tongeni küna me kana kich sisap tongeni küna ren mesach. I a föri ekkewe tettelin kinikinin chón läng, ese lifilifil ika iir king, ika chón nemeni mwüü ika samol ika nöüwiis. Mettóch meinisin ra för meren, ra pwal för fänitan. 17I a fen nóm mwen än mettóch meinisin ra poputä le wor, pwal I a ömwöchü fengeni mettóch meinisin. 18Pwal Kraist I möküren ewe mwichefel, iei ewe inisin Kraist. I ewe äkkäemönün mi akkomw me leiin chókana meinisin repwe manawsäfäl seni mäló, iei popun, I a akkomw lón mettóch meinisin. 19Pün iei usun minne Kot ewe Saam a efich, pwe unusen sókósókun me tüfichin meinisin repwe nóm lón Kraist. 20Ren Kraist, Kot a ächääsäfäli ngeni pwisin I mettóch meinisin, ese lifilifil ika lón läng ika wón fönüfan o föri pwe epwe wor kinamwe ren chaan lupwen a mäló wón ewe iräpenges.

Chäfengen lón Kraist

21Ämi ekkewe mi toowaweló seni Kot melóóm. Ämi ekkewe mi koum ngeni Kot o toowaw seni I pwokiten ämi ekiek mi ngaw me föfför mi ingaw, 22nge iei I ächäsäfäli kemi pwe öüpwe chiechian. Kraist a föri ei ren an mäló wón ewe iräpenges lón inisin inisin aramas. Iwe, ren an mäló, I a emmwenikemiito me mwen mesen Kot, nge ämi öüwa pin o unusöch, esap wor och ämi mwääl, lupwen öüwa üütä fän mesan. 23Nge öüpwe chök fókkun sópweló le likiitü lón ämi lükü ei kapas mi let o nüküchchar le üütä lón. Öüsap mwöküt seni ewe apilükülük öüwa angei lupwen öüwa rong ewe poraus allim. Iei ewe poraus allim a arongfeil ngeni förien Kot aramas meinisin wón fönüfan, nge ngang Paul üwa fen kefilitä meren Kot pwe üpwe emön chón arongafeili.

Än Paul fangaló manawan lón an angang fäniten Kraist

24Iei ngang üwa pwapwa lupwen ngang üwa tolong lón riäfföü fänäsengesimi, pün lón riäfföün inisi, ngang üwa ounusöchüeló meet esap mwo unus me lón än Kraist riäfföü fäniten inisin we, iei mwichefel. 25Kot a ngeniei ewe sekining pwe upwe angang ngeni an mwichefel ren äi üpwe arongafeili unusen an kapas ngeni kemi ekkewe Sentail. 26Iei ewe poraus mi mwónómwón mi kóópóló seni lón ekkewe fansoun lóóm pwal seni ekkewe tettelin pilóón aramas melóóm, nge iei a pwääri ngeni nöün kana chón pin. 27Kot a pwääri ngeniir pwe repwe esilefeili leiin ekkewe Sentail usun amwararen lingen ei mwónómwón. Iei ewe mwónómwón: Kraist a nóm lóómi, iei ämi apilükülük fäniten ämi öüpwe fiti I lón an ling esemwüch.

28Iei popun, ekis meinisin ia sia feilló ie, sia afalafala ngeni aramas usun Kraist. Sia fönöör o esikuuleer fän unusen tipächchem Kot a fang ngeni kich, pün sia mochen pwe sipwe fangoto ngeni Kot emön me emön leiir, nge repwe mwokos lón nónnómwun lefiiler me Kraist Jesus. 29Iei meet ngang üwa akkangang weires fänitan pwe epwe fis. Ngang üwa anómwu äi apilükülük wón än Kraist manaman mi pöchökkül a akkangang lóói lón äi öttures le angang.

2Pün ngang üwa mochen pwe ämi öüpwe silei usun wätten äi öttures fänäsengesimi me pwal fänäsengesin ewe mwichefel mi nóm Laodisia, pwal fäniten ekkewe pwal ekkóch resap mwo sileei äm aipwe nennefengen, 2pün ngang üwa mochen pwe epwe pöchökkületä letiper o repwe äteetefengen ren ewe riirin tong mi pöchökkül. Ngang üwa mochen pwe epwe wor ar unusen apilükülük, pwokiten ra unusen weweiti än Kot we akkóót mi mwónómwón. Ei mwónómwón, pwisin Kraist. 3Kot a aopaló lón Kraist unusen wöwün an tipachchem me silelap meinisin.

Fätäl lón Kraist, nge sap lón tipächchemen fönüfan

4Ngang üwa üreni kemi ei pwokiten esap wor emön epwe tongeni otupwukemiiló ren kapasen pesepes mi mwotoutou, nge mi chök mwääl. 5Pün are mwo ngang üwa toowaw seni kemi wón inis, nge letipei mi chök nóm reemi. Iwe, ngang üwa fókkun pwapwa, pwokiten a pwüngüöch nónnómwun manawemi pwal pwokiten nüküchcharen ämi lükü lón Kraist.

6Iwe, pwokiten öüwa fen etiwa Kraist Jesus pwe ämi Samol, iei minne öüpwe pwal sópweló le manaweni ewe manawen älleasochis ngeni Kraist. 7Öüpwe mwüüt ngeni waaremi repwe pwükütiw lón Kraist, pwe öüpwe angeätä pöchökkülen ngünümi seni I, pwe öüpwe mämmääritä lón ämi lükü, öüpwe pöchökkül o maamaw lón ewe let ämi öüwa fen käeö. Öüpwe mwüüt ngeni an epwe säsewu seni lón manawemi ämi kilisou fäniten meinisin minne I a föri.

8Öüpwe äffäli kemi pwe öüsap mwüüt ngeni emön epwe liäpenikemi lón tipächchemen aramas mi pöön me ngiingin kapas mi tekia esap wor lamwotan mi pop seni än aramas ekiek pwal seni ekkewe manaman mi ngaw seni ei fönüfan, nge resap pop seni Kraist.

9Pün unusen sókkun Kot meinisin ra wilipósóló lón Kraist, lón lapalapen inisin aramas. 10Nge ämi öüwa unusöchuló, pwokiten öüwa chuungeni Kraist, I ewe Samol mi nemenem wón iteiten sókkun manaman me nemenem meinisin lón läng me wón fönüfan. 11Lón Kraist, ämi öüwa pwal sirkomsais, sap ren ewe sirkomsais mi fis ngeni inis, pwe ren ewe mi fis lón peekin ngüün, ren an a pöküpöküló seni kemi ewe manawen fituk manawen ewe aramas mi mes mi uren tipis, wewen, ren ewe sirkomsais Kraist a föri. 12Pwokiten öüwa fiti Kraist le peias, lupwen öüwa papatais, iwe öüwa pwal fiti I le manawsäfäl ngeni ew manaw mi fö, ren ämi lükü lón tüfichin manamanen Kot, I ewe a amanawa säfälietä Kraist seni mäló.

13Iwe, ämi öüwa mäló lón ngünümi pwokiten ämi tipis, pwal pwokiten ewe manawen fituk mi uren tipis esap mwo pöküpöküló. Nge Kot a amanawa kemi fiti Kraist. I a omwusaló ach kana tipis meinisin. 14Pün I a ómóieló makken ewe taropwe mi makketiw lón ach kewe liwinimmang mi ettipisi kich. Iwe, a angealó seni kich ei taropwe o ataeló ren an chüüfölüetä ngeni än Kraist we iräpenges. 15Lón ei lapalap, Kot a angei seni ekkewe meilap me ekkewe samolun chón läng mi ngaw ar pisekin maun. Iwe, a äsääwer ren an pwäriireló me mwen mesen aramas ren an okkufuur me wón ewe iräpengesin Kraist.

Tapweló mwirin Kraist, nge sap tichchik wón öllük

16Iei minne, öüsap mwüüt ngeni emön pwe epwe öpwüngü kemi ren meet öüwa äni ika ünümi, ika fäniten ämi öüsap chóóni ekkewe ränin chuulap mi fiffis iteiten ier ika ekkewe fansoun asór mi fiffis lepoputän pwinin maram ika ekkewe ränin Sabbat mi fiffis iteiten wiik lón ewe efisuen rän. 17Pün ekkeei mettóch iir chök ngünüwen ewe enletin mettóch, nge ewe enletin mettóch ina i Kraist. 18Öüsap pwal mwüüt ngeni emön mi pwapwaiti le otupwun lipwopwomweni chök manawen tipetekisón me fel ngeni chón läng o a wisen chón filätä pwe ämi öüsap angei ewe liffangen wiil. Ekkeei sókkun aramas ra soun kapas usun künäer. Öüsap öüseling ngeniir lupwen ra apasa pwe ämi öüwa mwääl pwokiten öüsap föri ekkeei mettóch. A fókkun umwes ar repwe lamalam tekia lón ar ekiek pwokiten ekkeei mettóch ra lóngólóng wón än aramas ekiek. 19Nge iir resap pach ngeni Kraist, iei i Möküren ewe inis. Pün kich sia chufengen lón inisin Kraist ren ekkewe selin fituk mi pöchökkül, nge sia chök määr lupwen sia angei ach tüfich me pöchökkül seni Kot.

20Ämi öüwa fiti Kraist le mäló. Iwe, I a angasa kemi seni ekkewe manamanen fönüfan mi ngaw. Iwe, pwata öüwa föri ämi kana föfför usun itä nge ämi mi chüen nóm fän nemenien ei fönüfan? Pwata öüpwe sópweló le tapweló mwirin ekkewe öllük, äwewe chök ren: 21“Öüsap attapa, öüsap neni, öüsap komwoch”? 22(Pün ekkeei öllük ra kapas usun ekkewe mettóch ra iteló lupwen aramas ra aea. Ra lóngólóng wón än aramas öllük me käit). 23Usun itä lapalapan nge ekkeei öllük ra lóngólóng wón tipächchem, pwokiten ra öüchcheani pöchökkülen achoocho, tipetekisón me eriäfföwü pwisin inisiir. Nge esap wor lamwoten ekkeei öllük, pün resap tongeni okkufu än emön aramas ekiek mi ngaw me mocheniä.

Kütta Kraist, nge sap tipen fituk

3Iei minne, pwokiten ämi öüwa fen fiti Kraist le manawsäfäl ngeni ewe manaw mi fö; iwe, öüpwe chök sópweló le afóta letipemi wón ekkewe mettóchun läng, ia Kraist a móót ie peliifichin Kot, iei ewe leenien suuföl me manaman. 2Öüpwe oura ngeni lón ämi ekiek ekkewe mettóchun läng, nge öüsap ekieki chök usun ekkewe mettóch mi nóm ikeei wón fönüfan. 3Pün öüwa fen mäló lupwen Kraist a mäló, ina popun manawemi a kóóp ren Kraist, lón Kot. 4Iwe, lupwen Kraist, ina i enletin manawach, epwe pwä ngeni unusen fönüfan, mwirin pwal ämi öüpwe fiti I lón unusen lingan.

5Iei minne, öüpwe ämälói seni kifetin inisimi kana ekkewe sókkun manawen lóóm sókkun ei fönüfan. Öüpwe ükütiw seni sókkopaaten föfförün lisowu, ekiek mi limengaw, mocheniä, ekiekin lisowu mi ässääw. Öüsap tipemmóng wón ekkewe mettóchun lón ei manaw, pün tipemmóng a wewe fengen chök me fel ngeni önümwäl. 6Pwokiten ekkeei mettóch, än Kot soong mi efeiengaw epwe wareto wón chókana mi lükümmach le föri ekkeei sókkun mettóch. 7Ämi öüwa fen piin föri ekkeei sókkun föfför melóóm lupwen ämi we chök chüen manaweni manawen ei fönüfan. 8Nge iei, öüpwe pwal fókkun likitaló soong, lingeringer, ekingaw, tunoppwen, me kapas mi limengaw. 9Öüsap kapas chofona fengen lefiilemi, pün öüwa fen pwilitätiw sókkun manawen ewe aramas mi mes fitifengen me an kewe föfför mi ngaw meinisin, 10nge öüwa fen üföüfolong sókkun manawen ewe aramas mi fö. Öüwa mämmääritä lón ämi weweiti ewe emön mi föri kemi. Öüwa sópwósópwóló le asööfösäfäl lupwen öüwa alapaló ämi käeö usun Kraist, ewe mi föri ei manaw mi fö lóómi. 11Lón ei manaw mi fö, iei och manaw ese lifilifil ika en emön Sentail ika en emön chón Sus, en mi sirkomsais ika sapw emön mi sirkomsais. Ese lifilifil ika en emön mi sókkóló óm kapas ika en emön chón Siithia. Ese lifilifil ika en emön amanaw ika en emön chón ngas, pün ren Kraist, meinisin ra chök löllöfengen, pwokiten I a nóm lóór meinisin.

Ekkewe sókósókun Kraist

12Iwe, pwokiten Kot a fili kemi pwe öüpwe nöün aramas mi pin I a echeni kemi, iei minne, öüpwe öüföüfa ngeni manawemi letip pweteete mi sile tong, kirekiröch, tipetekisón, mósónósón me mökürochchou. 13Öüpwe engngiló fengen o omwusomwus fengen are mi wor än emön osukosuk ngeni pwal emön. Öüpwe chechchemeni pwe Kraist a omwusakemiiló; iei popun, pwal ämi öüpwe pwal fókkun omwusomwus fengen lefiilemi. 14Nge meet a koon öüchchea me leiin ekkeei mettóch meinisin, ämi öüpwe fókkun öüföüfa ngeni kemi ewe manawen tong, pün tong iei meet a pinüküw fengeni kich meinisin lón tipeew mi unusöch.

15Iwe, öüpwe mwüüt ngeni ewe kinamwe mi feitto seni Kraist pwe epwe nemenem lón letipemi. Pün pwokiten ämi ekkewe kifetin ewe ew chök inis; iei popun öüwa kö pwe öüpwe manaweni manawen kinamwe. Iwe, öüpwe uren kilisou fansoun meinisin. 16Öüpwe mwüüt ngeni än Kraist kapas epwe unusen chööchöló le imweim o nemenem lón unusen manawemi pwe öüpwe tipächchem. Öüpwe aea än Kraist kapas le emiriti me fönöw fengeni kemi lefiilemi. Öüpwe köölün elingaló Kot, köölün mwareiti Kot, me köölün pwärätä usun Kot. Öüpwe kööl fiti kilisou lón letipemi ngeni Kot. 17Iwe, ese lifilifil ika meet öüpwe föri ika apasa, öüpwe chemeni pwe ämi chón tupwuni ewe Samol Jesus. Nge öüpwe kilisou ngeni ewe Kot Saam lón Kraist.

Öüpwe chón angang ngeni Kraist me lón ämi famili

18Ämi kana fefin mi pwüpwülü, öüpwe pwisin anómwu kemi fän än pwülüemi kana nemenem, usun mi fich ngeni nónnómwun chókana iir nöün ewe Samol.

19Ämi kana mwän mi pwüpwülü, öüpwe tongei pwülüemi kana, nge öüsap fókkun pöchökkül ngeniir.

20Ämi ekkana naaw, öüpwe älleasochisi sememi me inemi kana lón mettóch meinisin, pün iei meet a apwapwai letipen ewe Samol.

21Ämi ekkana saam me iin, öüsap aleetipengawa nöümi kana. Pün are repwe letipengaw; iwe, epwe tur letiper o repwe achaanü.

22Ämi ekkana amanaw, öüpwe älleasochis ngeni ämi kana masta me wón ei fönüfan lón mettóch meinisin öüwa föri. Öüpwe föri meet repwe pwapwa ren fansoun meinisin, sap chök lupwen iir mi nengeni kemi, ren ämi öüpwe kütta itemi mereer. Öüpwe älleasochisiir seni mochenin letipemi, pwokiten ämi nuokkusun suuföliti Kot. 23Iwe, ese lifilifil ika meet öüpwe föri, öüpwe achoocho o föri fän unusen pwapwan letipemi, usun chök nge öüwa angang fäniten ewe Samol, nge sap fäniten aramas. 24Öüpwe chechchemeni pwe ewe Samol epwe ngeni kemi inetimi pwe ina liwinimi. Kraist ina i ewe Masta ämi öüwa angang ngeni. 25Nge are öüwa föri meet mi ngaw, öüpwe angei liwinimi meren Kot fäniten ekkewe föfför mi ngaw öüwa föri. Pün Kot esap apaap an epwe tongeni mwüüt ngeni emön pwe esap angei chappen an föfför mi ngaw.

4Ämi ekkana masta mi wor nöümi amanaw, öüpwe föri ngeni nöümi kana amanaw minne mi wenechchar me apööch. Öüpwe chemeni pwe pwal ämi mi wor emön ämi Samol lón läng.

Pwääraló sókkun manawen Kraist

2Öüpwe sópweló ämi likiitü lón iótek. Öüpwe mollotä fäniten mettóch meinisin ren iótek me uren kilisou. 3Öüsap möllükaló ämi öüpwe iótek pwal fänitem, pwe Kot epwe ngeni keem chómmóng fansoun fich pwe aipwe afalafal usun an we akkóót mi mwónómwón, pwe Kraist a pwal fänitemi ekkewe Sentail. Iei popun ngang üwa nóm ikeei, nge üwa fööfö ngeni ekkeei sein. 4Öüpwe iótek pwe ngang üpwe afatafatöchüw le arongafeili ei poraus lón üküükün äi tongeni. 5Öüpwe miriit lón nónnómwun manawemi leiin chókana sap iir chón lükü o öüpwe alamwota iteiten ämi fansoun fich. 6Öüpwe mwüüt ngeni ämi kapas epwe fiti ümöümöch iteiten fansoun meinisin o epwe wor lamwotan, usun itä nge och mwöngö mi nofit ngeni salt ren annöön, pwe epwe tongeni pwüng meet öüpwe pölüeni ngeni än aramas kapas.

Nöün Kraist chón angang ra tiinaló ar kapwong

7Tykikos, i emön pwiipwi mi ächengicheng, epwap aporausa ngeni kemi meinisin usun porausei. I emön chón angang mi likiitü, emön chón älillis a fitiei le angang ngeni ewe Samol. 8Ngang üwa tiinawow i reemi fäniten ei popun, pwe i epwe esile ngeni kemi usun nónnómuum o echipa letipemi. 9Ngang üwa pwal tiinawow Onesimus, i emön pwiipwi mi likiitü me ächengicheng, i emön leiin nöümi kana aramas. I me Tykikos repwe esile ngeni kemi meinisin minne ra fis ikeei.

10Aristarkus, chienei ei lón kalapwuus a kapwong ngeni kemi, pwal Mark, iei i ätewe i tettelin pwiin Barnabas. Ämi öüwa fen angei öüröüremi me mwan pwe öüpwe etiwa Mark are i epwe tori kemi. 11Jesus, (ätewe aia pwal eita ngeni Justus) a tiinawow an kapwong ngeni kemi. Ikkeiir chök ekkewe souleng chón Sus leiin chienei keei chón angang. Iir ra fitiei le angang ikeei fäniten ewe mwüün Kot. Iir ra fókkun echipa letipei! 12Epafras, i seni ämi na telinimw, i emön nöün Kraist Jesus amanaw, a tiinawow an kapwong ngeni kemi. Iteiten fansoun meinisin i a fókkun achoocho le öttures lón an iótek fänitemi. I a tungór ngeni Kot pwe epwe öpöchökküla kemi o föri pwe öüpwe unusöch me unusen lükülük lón ämi silei unusen letipen Kot. 13Pün ngang üwa tongeni pwisin älleta ngeni kemi pwe i a fókkun angang weires fänitemi me pwal fäniten ekkewe chón lükü lón Laodisia me Hierapolis. 14Luke, pwiich ei mi ächengicheng me Dimas ra tiinawow ar kapwong ngeni kemi. 15Öüse mochen öüpwe uweei äi kapwong ngeni pwiich me fefinach kana chón lükü lón Laodisia. Öüpwe pwal uweei äi kapwong ngeni liewe Nymfa me chókana ra kan mwimwich fengen lón imwan na.

16Mwirin ämi öüpwe wes le älleani ei taropwe leiimi, öüpwe atoura ngeni chón ewe mwichefel lón Laodisia pwe repwe pwal tongeni älleani. Iwe, öüpwe pwal älleani ewe taropwe ngang üwa makkei ngeniir.

17Iwe, öüpwe üreni Arkippus: “Kopwe tümwünüöchü óm kopwe öpwönüetä ewe angang ewe Samol a ewisa ngenuk.”

18Ngang Paul üwa makkei äi ei kapwong ren pwisin peii. Öüpwe chechchemeniei lón äi ei fööfö ngeni ekkeei sein. Än Kot ümöümöch epwe epwe nónnóm reemi. Amen.