Jude

Än Jude kapwong ngeni ekkewe mi kkö meren Kot

1Ei taropwe seniei ngang Jude emön amanaw nöün Jesus Kraist, pwal ngang pwiin James. Ngang üwa mak ngeni kemi ämi meinisin chókana mi kö o ächengicheng meren ewe Kot Sam o tümwün meren Jesus Kraist.

2Amwo öüpwe ääni ümöümöch, kinamwe me tong mi somwoló.

Popun än Jude mak

3Ämi chiechiei kana mi ächengicheng, inamwo ika ngang üwa fókkun mochen üpwe makkei ngeni kemi usun ach we alen manaw sia ääni pöküw, nge ngang üwa meefi pwe epwe koon lamwot äi üpwe mak ngeni kemi o peseei kemi pwe öüpwe öttures le penätä ewe lükü Kot a ngeni nöün kewe aramas mi pin fän ew chök. 4Pün mi wor ekkóch aramas ra ännifelong leiimi, a fen chök makketiw melóóm usur pwe repwe önümaamaw. Iir ekkewe aramas resap meniniti Kot, ra sorei ümöümöchün ach Kot ngeni manawen mocheisou o ra amaamäsini ach we chök emön Masta me Samol Jesus Kraist.

5Iei ngang üwa mochen üpwe ächchema ngeni kemi, inamwo ika öüwa fen unusen silei, pwe ewe Samol a angasawu nöün kewe aramas seni ewe fönü Egypt. Nge mwirin, a arosaló chókewe meinisin resap lükü. 6Iwe, ekkewe chón läng resap nóm lón pwüngün kinikinin pwisin ar nemenem, nge ra likitaló pwisin leenier, Kot a föötekiniir lón rochopwak o särei ngeniir sein esap tongeni epwe mwü tori feilfeilló chök pwe repwe witiwiti ewe fansoun etikillöw lón ewe Rän mi lapalaap. 7Pwal usun chök Sodom me Komorrah me ekkewe telinimw mi nóm ünükküür ra wewe ngeni ekkeei chón läng pün ra fangatäni manawer ngeni sókkun föfförun lisowu mi enniopwut me föfförün lisowu mi mwäliló seni pwüngüöchün kókkóótan. Ekkeei telinimw ra fisitiw pwe repwe och minen äwewe usun feiengawen chókana repwe angei chappen ar tipis lón ewe ekkei ese kun tori feilfeilló chök.

8Nge pwal ina chök usun ren ekkeei aramas mi ääni lóngólóng ar kana tan, ra elimengawa pwisin inisir, ra üüngeni nemenem o ra kapasen turunufas fäniten ekkewe mönün ling. 9Nge lupwen Mikael ewe chón läng mi lap me ewe devil ra äniini fengen usun soomän Moses we, i esap eppwisi ewe devil le kapasen turunufasei an epwe öpwüngü, nge a chök apasa: “Ewe Samol epwe öpwünguk!” 10Nge ekkeei aramas ra ääni kapas turunufas le üüngeni meet resap weweiti. Ekkewe mettóch iir ra weweiti ren chök ar memmeef usun kana maan esap wor ar wewe, ikkeei ekkewe mettóch repwe efeiengawer.

11A ifa me feieingawer! Pün iir ra fätäl lón alen Kain o ra pwisin atolonger lón än Balaam we mwääl fänäsengesin ar mocheniän mooni. Repwe määfeiengaw usun Korah lón an üleförea

Chón rikiló seni ar lükü ra feiengngaw

12Ekkeei aramas ra wewe ngeni liwangir lón ämi kewe kametipen tong lupwen ra fiti kemi le kametip nge resap nuokkus. Iir ekkewe chón masen siip mi pwisin chök amwöngöniir. Iir ekkewe kuchu resap nöönö ren kólik äsäpwääl a pööniireló. Iir ekkewe irä resap uwa lupwen fansoun kinikin, ra mä fän ruu o üttüpökütä fiti fengen me wareer. 13Iir ekkewe nóó mwachon lemataw, ra pwisin küpetätä pwuropwuren ar kana föfför mi ässäw. Iir ekkewe füü mi mwälechfeil, ra chök ossow ngeni ewe leeni mi kirochorochen rochopwaak tori feilfeilló chök.

14Ikkeiir pwal ekkewe aramas Enok, ewe efisuuen tettelin pilóón aramas seni Adam a oosuni usun o apasa: “Öüpwe nengeni, ewe Samol epwe war fiti fengen me nöün kana ngöröüröün chón pin, 15pwe epwe öpwüngü iteiten emön me emön o epwe ettipisi meinisin ekkewe resap meniniti Kot ren ar kana föfförün resap meniniti Kot iir ra föri lón lapalapen ar resap meniniti Kot, pwal ren meinisin ekkewe kapas mi pöchökkül ekkana chón tipis resap meniniti Kot ra apasatä lón ar üüngeni I.”

Oosuni usun chón rikiló seni ar lükü

16Ekkeei aramas iir chón ngününgün me tunoppwen, ra fiti pwisin ar mochen mi uren tipis. Iir ra osommóng le apasatä kapasen tunosikesik usun pwisin fäniter, ra pwal apaatäi aramas pwe repwe liäpeni minne ra mochen. 17Nge ämi kana mi ächengicheng, öüpwe chechchemeni meet nöün ewe Samol Jesus Kraist kewe chón künö ra oosuni. 18Iir ra apasa ngeni kemi, “Lón ewe fansoun sópwólón, epwe wor chón turunufas esap wor ar meniniti Kot repwe föri pwisin mocheniän letiper.

Tümwünü manawen ngünümi

19Ikkeeir ekkewe aramas mi efisätä kinikinfesen, iir aramas mi nóm fän nemenien mochenin fituker, resap masow ren ewe Ngüün. 20Nge ämi chiechiei kana mi achengicheng, öüpwe aea ämi we lükü mi unusen pin le öüüwetä manawemi o öüpwe iótek lón ewe Ngüünmifel. 21Öüpwe pwisin tümwünü kemi lón än Kot we tong, lupwen öüwa witiwit fäniten ewe ümöümöchün ach we Samol Jesus Kraist epwe emmweni kemi ngeni ewe manaw ese mwüch.

22Öüpwe kirekiröch ngeni chókana mi tipemwaramwar lón ar lükü. 23Öüpwe chimanüüw pwal ekkóch ren ämi öüpwe turufiirewu seni ewe ekkei. Öüpwe ääni kirekiröch ngeni ekkewe pwal ekkóch fän nuokkus. Öüpwe mwo nge opwut ewe üföüfen lón mi fötöpwül ren limengawen fituk.

Kot mi tongeni

24Ngeni ewe Emön mi tongeni epwe mammasa kemi pwe öüsap turuló o epwe önüküchara kemi mwen an ling nge esap wor och terimi fän pwapwa mi lapalaap, 25ngeni ewe chök Kot, ach Chón Amanaw, ren Jesus Kraist ach Samol. I chök a ääni ling me tekia, nemenem me manaman seni fansoun esepwop, pwal ikenäi o tori feilfeilló chök. Amen.