Joshua
Än Kot öllük ngeni Joshua
1Iwe, mwirin än Moses, nöün ewe SAMOL we chón angang, a mäló, ewe SAMOL a kapas ngeni Joshua nöün Nun we mwän, ewe kisitiwen fän Moses. Iwe, a apasa, 2“Neii we chón angang Moses a mäló. Iei minne, iei en kopwe le üütä o feilló peekilón ei chaanpwuupwu Jordan, en me ei mwiichen aramas meinisin, pwe öüpwe feilló ngeni ewe fönü ngang üpwe ngeni ekkewe aramasen Israel. 3Iteiten leeni ia fän pachapachom epwe pwuutiw wón, ngang üwa fen ngenuk, usun üwa apasa ngeni Moses. 4Seni ewe fönüpöön mi nóm öör tori ewe chuuk Lebanon mi nóm efeng, pwal seni ewe chaanpwuupwu mi lapalaap, iei ewe Chaanpwuupwu Eufreitis mi nóm öötiw, unusen ewe fönü fönüwen ekkewe chón Hit tori ewe Mataw Wätte mi nóm lotow äwenewenen ia akkar a tupwutiw me ie, epwe iei kiään fönüwemi. 5Esap wor emön epwe tongeni üüngenuk lón unusen ränin manawom. Usun ngang üwa fiti Moses, iei usun ngang üpwe pwal fituk. Üsap tümwününgaw ngenuk, üsap pwal likitukoló. 6Kopwe pöchökkül o tipepwora, pün en kopwe eineti ngeni ei mwiichen aramas ewe fönü ngang üwa pwon fän ökköpöl ngeni semelaper kewe pwe üpwe ngeniir.
7Nge kopwe chök pöchökkül o fókkun tipepwora. Kopwe tümwünüfichi óm kopwe öpwönüwetä meinisin ewe öllük neii we chón angang Moses a öllük ngenuk. Kosap tókkóló seni ren óm kopwe kul ngeni peliifich ika peliimóóng, pwe kopwe feffeitä ekis meinisin ia kopwe feilló ie. 8Kosap ükütiw le kapas usun ewe pwuken öllük iteiten fansoun meinisin. Kopwe leechüüni lerän me lepwin, pwe kopwe tümwünü óm kopwe älleasochisi meinisin minne a mak lón. Pün mwirin, kopwe föri pwe óm kewe föfför repwe feiöch, pwal mwirin, kopwe feffeitä. 9Ifa usun, ngang üsap öllük ngenuk? Kopwe pöchökkül o tipepwora. Kosap nuokkus o kosap apilükülükingaw, pün ngang ewe SAMOL óm we Kot üpwe fituk ekis meinisin ia kopwe feilló ie.”
Ewe öllük pwe repwe le pwereló epeek ewe chaanpwuupwu Jordan
10Mwirin, Joshua a öllük ngeni ekkewe souemmwenin Israel o apasa, 11“Öüpwe fätälfeil leemelen ewe leeni ia ekkewe aramas ra asóósó ie. Iwe, öüpwe öllük ngeni ekkewe aramas o apasa, ‘Öüpwe amollätä fänitemi ömötümi, pün ülüngät rän seni ikenäi öüpwe pwereló peekilón ei chaanpwuupwu Jordan, pwe öüpwe tolong lón ewe fönü ewe SAMOL ämi we Kot epwe ngeni kemi pwe fönüwemi.’ ”
12Mwirin, Joshua a köörato chón ewe einangen Reuben, chón ewe einangen Kad me chón ewe esóp einangen Manassah. Iwe, a üreniir, 13“Öüpwe chechchemeni meet Moses nöün ewe SAMOL we chón angang a öllük ngeni kemi o apasa, ‘Ewe SAMOL ämi we Kot epwe ngeni kemi ämi öüpwe asöösö o epwe ngeni kemi ei fönü. 14Pwulüwemi kana me nöümi kana kükkün, pwal nöümi kana pwiin maan repwe chök nómwetiw ikeei lón ewe fönü Moses a ngeni kemi wón peli öötiwen ei chaanpwuupwu Jordan. Nge meinisin nöümi kewe mwän pwora repwe akkomw mwen chón ekkewe pwal ekkóch einang le pwereló peekilón ewe chaanpwuupwu Jordan fän pisekin maun pwe repwe älisiir le liäpeni fönüwer. Öüpwe fitireló, 15tori än ewe SAMOL epwe ngeni pwiimi kewe ar repwe asöösö, usun I a föri ngeni kemi, pwal tori iir repwe pwal angei fönüwer we ewe SAMOL ämi we Kot epwe ngeniir. Iwe, ina ótun ämi öüpwap tongeni liwinsäfäl ngeni inetimi kewe fönü o emeseika kemi lón, ewe fönü Moses nöün ewe SAMOL we chón angang a ngeni kemi me wón epeek ei chaanpwuupwu Jordan me peliöötiwan.”
16Ina minne, iir meinisin ra pölüweni Joshua o apasa, “Meinisin minne en ka öllük ngeni keem, äm aipwe föri. Iwe, ese lifilifil ia en kopwe tiinikeemiló ie, äm aipwe feilló. 17Usun chök äm aia älleasochisi Moses lón mettóch meinisin, epwe pwal ina usun äm aipwe älleasochisiik. Ew chök, amwo ewe SAMOL óm we Kot epwe fituk usun I a fiti Moses. 18Ese lifilifil ika iö a üüngeni óm öllük o esap älleasochisi óm kapas lón meinisin minne en ka öllük ngeni i, epwe ninniiló. Ew chök, kopwe pöchökkül o tipepwora.”
Rahab a aopa ekkewe chón op
2Iwe, Joshua nöün Nun we mwän a tiinaló rüwömön mwän lemwónómwón seni ew leeni itan Pilükün Akasia pwe repwe operi ewe fönü. Iwe, a apasa ngeniir, “Öüpwe feilló ouwasacha ewe fönü peekilón ewe chaanpwuupwu Jordan, nge koon wesewesen Jeriko.” Iei minne, ekkewe rüwömön mwän ra feilló o ra tori imwen emön fiin lisowu itan Rahab. Iwe, ra nónnóm ikenan lón ewe pwinin.
2Nge emön a aporausa ngeni ewe kingen Jeriko o apasa, “Nengeni a wor ekkóch aramasen Israel ra feitto ikeei lepwinei pwe repwe ouwasacha ewe fönü.” 3Ina minne, ewe kingen Jeriko a tiinaló ew öllük ren Rahab o apasa, “Kopwe emmwenawu ekkewe mwän mi feitto reemw o tolong lón imwom. Pün iir ra feitto pwe repwe operi unusen ewe fönü pwe repwe sachei alen ar repwe maun ngeni kich.”
4Nge ewe fefin a fen aopaló ekkewe rüwömön mwän. Iwe, a apasa, “Ewer, ekkewe rüwömön mwän ra feitto ikeei, nge ngang üsap silei ika iaan iir ra feitto seni ia. 5Iwe, lupwen a pwiniló, lupwen a tori fansoun än asamalapen tittin ei telinimw epwe kesipeló, ekkewe rüwömön mwän ra fen toowu. Ngang üsap silei ia ekkewe mwän ra feilló ie. Are öüpwe mwittir tapweriir, öüwa tongeni liäpeniir.” 6(Nge ewe fefin a fen emmwenätä ekkewe mwän wón ewe sässärin asan o aopeereló fän ekkewe fetilippwas seni ewe sókkun fetil itan flaks i a etettelöchüw le anómwur wón sässärin asen ewe imw). 7Mwirin, ekkewe mwän mi künööto seni ewe king ra feilló pwe repwe kütta ekkewe mwän wón ewe aal mi ale ngeni Jordan tori ekkewe leenien pwereló mi äpetepeet lón ewe chaanpwuupwu. Nge mwirin chök ar ra toowu, ra esipaló tittin asamalapen ewe telinimw we.
8Iwe, me mwen än ekkewe chón op repwe kónnóló, neminnewe a feittä reer wón ewe sässärin asan. 9Iwe, a apasa ngeniir: “Ngang mi silei pwe ewe SAMOL a fen ngeni kemi ei fönü, pün äm meinisin aia nuokkusiti kemi. Iwe, chón ei fönü meinisin ra rüükö pwokitemi. 10Pün äm aia rongorong usun än ewe SAMOL a appwasätä kólikin ewe Setipar fänitemi lupwen öüwa toowu seni Egypt. Äm aia pwal silei usun meet öüwa föri ngeni Sihon me Ok, ekkewe rüwömön king nöün chón Amor, iir mi nóm peekilón epeek ewe chaanpwuupwu Jordan, pwe ämi öüwa niireló me nöüür kewe aramas. 11Iwe, lupwen chök äm aia rong usun ekkeei mettóch, letipeem a teliló ren äm nuokkus. Esap chüen wor än emön pwora pwokitemi pün ewe SAMOL ämi we Kot, I chök Kot peekitä lón läng pwal faan ei wón fönüfan.
12Iei minne, ngang üwa tungór maamaw ngeni kemi pwe öüpwe pwon ngeniei fän ökköpöl iten ewe SAMOL, pwe ämi öüpwe kirekiröch ngeniei me chón äi famili, pwokiten ngang üwa kirekiröch ngeni kemi. Iwe, öüpwe ngeniei ew esissil mi enlet, 13pwe lupwen öüpwe liäpeni Jeriko, öüpwe amanawaei fiti semei, inei, mongeei kewe, pwii kewe me chón ar famili meinisin.”
14Iwe, ekkewe mwän ra pölüweni ngeni neminnewe o apasa, “Manaweem epwe ina ekkesiwilin manawemi. Are esap wor emön leiimi epwe akkafat meet ei äm aia föri, äm aipwe öpwönüwetä äm pwon lupwen ewe SAMOL epwe ngeni keem ei fönü. Äm aipwe föri minne mi kirekiröch me enlet ngeni kemi.”
15Mwirin, neminnewe a öürätiw ekkewe mwän wón efóch sääl me lón ew asammwacho, pün imwan we a nóm wón tittin ewe telinimw. Neminnewe a imweim wón ewe tiit. 16Iwe, neminnewe a apasa ngeniir, “Öüpwe süü ngeni wón ewe chuuk, pün ekkewe chón tapweri kemi rete chuuri kemi. Öüpwe op ikenan lón üküükün ülüngät rän tori än ekkewe chón tapweri kemi repwe liwinsäfäl. Mwirin, ämi öüpwap tongeni feilló wón alemi.”
17Nge me mwen än ekkewe mwän repwe feilló, ra apasa ngeni neminnewe: “Äm aipwe pich seni óm ei pwon en ka föri pwe äm aipwe pwon ngenuk fän ökköpöl, 18lupwen äm aipwe tolong lón ei fönü nge en kosap riietä ei sääl mi par lón ewe asammwacho en kopwe öürükeemitiw lón pwal are kosap uweato semom, inom, mongeom kewe me meinisin chón leimwen semom lón pwükütään imwom ei. 19Pün epwe fis pwe ese lifilifil are iö epwe toowu lükün asamen imwom we o nóm lón ewe aal, chaan epwe pwisin ukan chök, nge äm esap wor tipisiim. Iwe, ese lifilifil ika iö a nóm reemw lón imwom we, chaan epwe ukeem are emön epwe angetä wón. 20Iwe, are kopwe akkafat meet ei äm aia föri, mwirin, äm aipwe ngas seni óm we pwon en ka föri pwe äm aipwe pwon ngenuk fän ökköpöl fänitan.”
21Mwirin, neminnewe a apasa, “Epwe ina usun, alóngólóng wón ämi kapas.” Iwe, neminnewe a tiinireló, nge iir ra feilló. Iwe, neminnewe a föötätä ewe sääl mi par lón ewe asammwacho.
22Iwe, ekkewe mwän ra feilló o ra feittä wón ewe chuuk. Iwe, ra nónnóm ikenan ülüngät rän tori än ekkewe chón tapweriir ra liwinsäfäl. Ekkewe chón tapweriir ra kütteer wón unusen ewe aal, nge resap küneer. 23Iwe, ekkewe rüwömön mwän ra liwinsäfäl, ra feittiw seni wón ewe chuuk o ra pwereló epeek ewe chaanpwuupwu. Iwe, ra feitto ren Joshua nöün Nun we mwän o ra aporausa ngeni i usun meinisin minne a fis ngeniir. 24Iwe, ra apasa ngeni Joshua, “Enlet, ewe SAMOL a atolonga unusen ewe fönü lepöüch, pün meinisin chón ewe fönü ra wesewesen rüükö lón letiper pwokitach.”
Chón Israel ra pwereló epeek ewe chaanpwuupwu Jordan
3Iwe, lesossorusich chök nge Joshua a pwäätä. Mwirin, ra sääi seni ewe leeni itan Pilükün Akasia o ra tori ewe chaanpwuupwu Jordan, i me ekkewe aramasen Israel meinisin. Iwe, ra öüwetä imwer imw mangaku ikenan me mwen ar repwe pwereló epeek ewe chaanpwuupwu. 2Iwe, a fis pwe mwirin ülüngät rän, ekkewe meilap ra fätälfeil leemelen imweer kewe; 3iwe, ra öllük ngeni ekkewe aramas o apasa, “Lupwen öüpwe küna ekkewe souasór seni ewe einangen Levi ra mwäreei ewe pwórun pwon än ewe SAMOL ämi we Kot, öüpwe poputä le sääi seni leeniemi o tapweló mwirin ewe pwórofel. 4Nge pwokiten öüsap mwo sääi lón ei lapalap me mwan, iei minne iir repwe emmweni kemi. Öüpwe awora üküükün ruu ngöröw mwalü toowawen lefiilemi me ewe pwórofel. Öüpwe tümwünüfichi pwe öüsap arap ngeni.”
5Iwe, Joshua a apasa ngeni ekkewe aramas, “Öüpwe pwisin epini kemi, pün lesor ewe SAMOL epwe föri föfför mi amwaraar me lefiilemi.”
6Iwe, lón ewe sossorun, Joshua a kapas ngeni ekkewe souasór o apasa, “Öüpwe ekiietä ewe pwórun pwon o akkomw le pwereló mwen ekkewe aramas lón ewe chaanpwuupwu.” Ina minne ra ekiietä ewe pwórun pwon o feilló mwen ekkewe aramas.
7Iwe, ewe SAMOL a apasa ngeni Joshua, “Lón ei rän, ngang üpwe popuetä le etekióketä me fän mesen ekkewe aramasen Israel meinisin, pwe iir repwe silei pwe usun ngang üwa fiti Moses; iwe, epwe pwal ina usun äi üpwe fituk. 8En kopwe öllük ngeni ekkewe souasór mi mwäreei ewe pwórun pwon o apasa, ‘Lupwen öüpwe tori wünüppen ewe chaanpwuupwu Jordan, öüpwe ipweralong ekkóch chök iipw lón ewe chaanpwuupwu o köüüló.’
9Ina minne Joshua a apasa ngeni ekkewe aramasen Israel, “Öüpwe feitto ikeei o öüseling ngeni meet ewe SAMOL ämi we Kot a apasa. 10Ikenäi ämi öüpwe silei pwe ewe Kot mi manaw a nóm lefeiilemi. Iwe, esap mwääl seni pwe i epwe ösüüweló me mwemi ekkewe chón Kanaan, me ekkewe chón Hit me ekkewe chón Hiv me ekkewe chón Periz me ekkewe chón Kirkas me ekkewe chón Jebus. 11Nengeni, ewe pwórun pwon än ewe Samol mi nemeni unusen fönüfan epwe akkomw le pwereló mwemi lón ewe chaanpwuupwu Jordan. 12Iei minne, öüpwe filätä engol me rüwömön mwän, emön mwän seni iteiten ew me ew kewe einangen Israel. 13Ekkewe souasór repwe mwäreei än ewe SAMOL we pwórofel, iei i ewe Samol mi nemeni unusen fönüfan. Iwe, epwe fis pwe lupwen chök pachapacher epwe ipwelong lón kólikin ewe chaanpwuupwu Jordan, pwuupwun ewe kólik epwe köüüló le pwuutiw seni asan. Iwe, ewe kólik epwe le chök pwopwootä.”
14Iwe, ina meet a fis, pwe lupwen ekkewe aramas ra poputä le sääi seni ar we leenien asóósó pwe repwe pwereló epeek ewe chaanpwuupwu Jordan, ekkewe souasór mi mwäreei ewe pwórun pwon ra akkomw mwen ekkewe aramas. 15Lón unusen ewe fansoun rääs, kólikin ewe chaanpwuupwu Jordan a säsewu wón aroppen ewe chaanpwuupwu ekis meinisin. Nge lupwen chök pachapachen ekkewe souasór mi mwäreei ewe pwórofel ra tórii ewe kólik aroppen ewe chaanpwuupwu, 16ewe kólik mi pwuutiw seni asan a köüüló, o a poputä le pwootä usun ew chukuchukutä me asan ren ew telinimw itan Adam, ewe telinimw mi nóm ünükkün Zaretan. Nge ewe kólik mi pwuutiw lón ewe Setin Arabah, iei ewe Setin Mäló a köüüló, esap chüen wor kólik mi pwuutiw. Iwe, ekkewe aramas ra pwereló epeek ewe chanpwuupwu äkkäwenewenen ewe telinimw Jeriko. 17Mwirin, ekkewe souasór mi mwäreei ewe pwórun pwon än ewe SAMOL ra chök ücharatä wón pwül mi pwasapwas lukalapen ewe chaanpwuupwu Jordan lupwen ekkewe chón Israel meinisin ra pwereló wón pwül mi pwasapwas. Nge ekkewe souasór ra witiwit tori iir meinisin ra unusen pwereló wón pwül mi pwasapwas epeek ewe chaanpwuupwu Jordan.
Ekkewe föün ächchem
4Iwe, a fis pwe lupwen ekkewe aramas meinisin ra unusen pwereló epeek ewe chaanpwuupwu Jordan, ewe SAMOL a kapas ngeni Joshua o apasa: 2“Kopwe filätä engol me rüwömön mwän, emön mwän seni iteiten ew me ew einang. 3Iwe, kopwe öllük ngeni ekkewe mwän o apasa, “Öüpwe angei engol me rüwöföü faaw seni ewe leeni ia ekkewe souasór ra üütä ie lukalapen ewe chaanpwuupwu Jordan. Iwe, öüpwe chülaaló ekkewe faaw o seniiretä lón ewe leeni ia öüpwe asóósó ie lepwinei.’ ”
4Iei minne, Joshua a köörato ekkewe engol me rüwömön mwän i a fen filiretä seni leiin ekkewe aramasen Israel, emön mwän seni iteiten ew me ew einang. 5Iwe, Joshua a apasa ngeniir: “Öüpwe feilló lukalapen ewe chaanpwuupwu Jordan mwen ewe pwórofel än ewe SAMOL ämi we Kot. Iwe, emön me emön leiimi epwe angei eföw faaw o mwäreei wón afaran. Engol me rüwöföw faaw, eföw fäniten iteiten ew me ew ekkewe engol me ruu einangen Israel. 6Sipwe aea ekkeei faw le senäätä och minen ächechchem. Ei epwe ew ächechchem me leiimi lupwen nöümi kewe repwe eisini kemi lón ekkewe fansoun repwe feitto o apasa, ‘Meet wewen ekkeei faaw ngeni kemi?’ 7Mwirin, ämi öüpwe tongeni pölüweni o üreniir, ‘Ekkeei faaw ra ächchema ngeni keem pwe kólikin ewe chaanpwuupwu Jordan a köüüló le pwuutiw me mwen än ewe SAMOL we pwórun pwon lupwen a pwereló lón ewe chaanpwuupwu Jordan.’ Iwe, ekkeei faaw repwe nóm pwe och ächechchem me leiin ekkewe aramasen Israel tori feilfeilló chök.”
8Iwe, ekkewe mwän ra föri minne Joshua a öllük ngeniir. Ra angei engol me rüwöföü faaw seni lukalapen ewe chaanpwuuwpu Jordan, usun chök minne ewe SAMOL a öllük ngeni Joshua alóngólóng wón iteiten ekkewe einangen Israel. Iwe ra chülaaló ekkewe faaw ngeni ewe leeni ia ra asóósó ie lón ewe pwinin o ra senäätä ewe minen ächchem ikenan. 9Joshua a senäätä pwal engol me rüwöföü faaw pwe och minen ächchem lukalapen ewe chaanpwuupwu Jordan, lón ewe leeni ia ekkewe souasór mi mwäreei ewe pwórun pwon ra üütä ie. Iwe, ekkewe faaw ra nóm ikenan tori ikenäi.
10Pün ekkewe souasór mi mwäreei ewe pwórofel ra chök üütä lukalapen ewe chaanpwuupwu Jordan tori a wesiló ekkewe mettóch meinisin ewe SAMOL a öllük ngeni Joshua pwe epwe apasa ngeni ekewe aramas, alóngólóng wón meinisin minne Moses a fen öllük ngeni Joshua. Iwe, ekkewe aramas ra emwittiriir le pwereló wón pwül mi pwasapwas tori epeek ewe chaanpwuupwu. 11Iwe, a fis pwe lupwen ekkewe aramas meinisin ra unusoló le pwereló epeek ewe chaanpwuupwu; mwirin, ekkewe souasór ra pwereló fän än ewe SAMOL we pwórofel. 12Iwe, ekkewe mwän seni ewe einangen Reuben me ekkewe mwän seni ewe einangen Kad pwal ekkewe mwän seni ewe esóp einangen Manassah ra akkomw mwen ekkewe chón Israel le pwereló peekilón ewe chaanpwuupwu Jordan fän ar pisekin maun usun minne Moses a fen apasa ngeniir. 13Ina epwe üküükün fääik ngöröw ekkeei sounfiu mi mollotä fäniten ar repwe maun ra pwereló peekiló ngeni ewe maasiesin Jeriko fän mesen ewe SAMOL.
14Lón ena ränin, ewe SAMOL a föri pwe Joshua epwe tekiatä me fän mesen chón Israel meinisin. Iwe, lón unusen ränin manawen Joshua, ra meniniti i usun chök ar meniniti Moses.
15Nge ewe SAMOL a fen apasa ngeni Joshua, 16“Kopwe öllük ngeni ekkewe souasór mi mwäreei ewe pwórun ewe Pisekin Pwärätä pwe repwe feittä seni ewe leeni mi pwasatä me lón ewe chaanpwuupwu Jordan.”
17Iei minne, Joshua a öllük ngeni ekkewe souasór o apasa, “Öüpwe feittä seni lón ewe chaanpwuupwu Jordan.”
18Iwe, a fis pwe lupwen ekkewe souasór mi mwäreei än ewe SAMOL we pwórun pwon ra feittä seni lukalapen ewe chaanpwuupwu Jordan o pachapacheer a ipwetä wón pwül mi pwasapwas, kólikin ewe chaanpwuupwu Jordan ra liwinsäfäliti leenier o ra sässewu wón ünüppen ewe chaanpwuupwu meinisin usun chök me mwan.
19Ekkewe aramas ra pwereló epeek ewe chaanpwuupwu Jordan lón äengolun ränin ewe äewin maram, iei ewe maram ra esissila pwe ra toowu seni Egypt. Iwe, ra asóósó lón Kilkal öötiwen kiänin Jeriko. 20Iwe, Joshua a senäätä lón Kilkal ekkewe engol me rüwöföü faaw ra angeiirewu seni lón ewe chaanpwuupwu Jordan. 21Mwirin, Joshua a kapas ngeni ekkewe aramasen Israel o apasa: “Lón ekkewe fansoun repwe feitto, lupwen nöümi kewe repwe eisini kemi o apasa, ‘Meet wewen ekkeei faaw?’ 22Mwirin, öüpwe üreniir, ‘Chón Israel ra pwereló lón ei chaanpwuupwu Jordan wón pwül mi pwasapwas.’ 23Pün ewe SAMOL ämi we Kot a appwasätä kólikin ewe chaanpwuupwu Jordan me mwemi tori ämi äüwa wes le pwereló epeek. 24I a föri ei pwe chón ekkewe mwüün fönüfan meinisin repwe silei pwe pöün ewe SAMOL a fókkun manaman. Iwe, ämi öüpwe meniniti ewe SAMOL ämi we Kot tori feilfeilló chök.”
Ewe oruuwen pilóón aramas ra sirkomsais
5Iwe, lupwen ekkewe king meinisin nöün ekkewe chón Amor mi nóm lotowen ewe chaanpwuupwu Jordan me ekkewe kingen Kanaan meinisin mi nóm arosset ra rongorong pwe ewe SAMOL a appwasätä kólikin ewe chaanpwuupwu Jordan pwe ekkewe aramasen Israel ra tongeni pwereló epeek, letiper a teliló. Iwe, esap chüen póssetiw ngünüür ren ar rüükö pwokiten ekkewe aramasen Israel.
2Iwe, lón ena fansoun ewe SAMOL a üreni Joshua, “Kopwe föri ekkóch säär seni sättin föüchól o föri säfäli lón ei oruuwen fansoun ewe angangen sirkomsais ngeni nöün chón Israel kewe mwän.” 3Ina minne, Joshua a föri ekkóch säär seni sättin föüchól, iwe, a sirkomsaisi nöün ekkewe chón Israel kewe mwän me lón Kibeath Haaraloth.
4Iwe, iei popun än Joshua a sirkomsaisi ekkewe mwän meinisin. Ekkewe mwän meinisin mi tori ierin sounfiu lupwen ra toowu seni Egypt ra mäló lupwen ar sääifeil lón ewe fönüpöön mwirin ar toowu seni Egypt. 5Inamwo are ekkewe mwän meinisin mi toowu seni Egypt ra fen sirkomsais, nge meinisin ekkewe mwän mi upwutiw lón ewe fönüpöön mwirin ar toowu seni Egypt resap mwo sirkomsais. 6Pün ekkewe aramasen Israel ra siamwüfeil lón ewe fönüpöön lón üküükün fääik ier tori än ekkewe mwän meinisin mi nóm lón ierin maun lupwen ra toowu seni Egypt ra rosoló, pwokiten iir resap älleasochisi mwelien ewe SAMOL. Ikkeiir ekkewe aramas ewe SAMOL a pwon fän ökköpöl pwe I esap mwüüt ngeniir pwe repwe küna ewe fönü I ewe SAMOL a pwon fän ökköpöl ngeni semelaper kewe pwe I epwe ngeni kich. Iei ewe fönü ia a pwuupwu ie milik me chönün chunen.” 7Iei minne, Joshua a sirkomsaisi nöüür kewe mwän resap mwo sirkumsais lón ar sääi ngeni ewe Fönüwen Pwon. Ikkeiir chókewe mi määritä pwe repwe tolong lón leenier semeer kewe. 8Iwe, mwirin än ekkewe mwän meinisin ra wes le sirkomsais, ra chök asöösö lón leenier kewe tori a irefengen kinaser.
9Mwirin, ewe SAMOL a apasa ngeni Joshua, “Ikenäi ngang üwa särisaló seni kemi ewe itengawen Egypt.” Iei minne ewe leeni a iteni Kilkal tori ikenäi.
10Iwe, lupwen ekkewe aramasen Israel ra asóósó lón Kilkal lón ewe maasiesin Jeriko, ra föri ächechchemen ewe Pasofer lekkuniólun ewe engol me rüwänüwen ränin ewe äewin maram, iei ewe mwaram a esissila ar toowu seni Egypt. 11Iwe, lón ewe rän mwirin ewe Pasofer, lón ena ränin, ra poputä le mwöngö seni uwään ewe fönü. Ra mwöngö pilawa esap nofit ngeni iis me föün wiit mi kapwich ra kinii seni ewe fönü. 12Mwirin, ewe manna a ükütiw lón ewe rän mwirin ar ra mwöngö seni uwään ewe fönü. Iwe, esap chüen wor manna epwe pwääsäfäl. Iei minne, seni ena fansoun feilló, ekkewe chón Israel ra mwöngö seni uwään ewe fönü Kanaan.
Ewe meilapen än ewe SAMOL mwiichen sounfiu
13Iwe, a fis pwe lupwen Joshua a arap ngeni ewe telinimw Jeriko, i a nennetä nge a mäirü pwe a küna emön Mwän mi üütä äwenewenan fän nöün ketilas a kömwöch lón pöün. Iwe, Joshua a feilló ren Ätewe o a eisini, “En ka nóm wón pelieem ika en ka nóm wón pelien ekkewe chón opwutakeem?”
14Iwe, Ätewe a apasa, “Apwii, ngang üwa feitto pün ngang ewe Chón Nemeni än ewe SAMOL mwiichen sounfiu.” Iwe, Joshua a chappetiw leppwül, a fel ngeni o apasa ngeni Ätewe, “Äi Samol, meet ka mochen pwe ngang nöüm ei chón angang üpwe föri?”
15Mwirin, ewe Chón Nemeni än ewe SAMOL mwiichen sounfiu a pölüweni o apasa ngeni Joshua, “Kopwe pwilitawu seni pachapachom noum kana sandal, pün ewe leeni ia en ka üütä ie a pin.” Iwe, Joshua a föri iei usun.
Usun taalón Jeriko
6Iwe, ekkewe asamalapen tittin ewe telinimw Jeriko ra önükünük le kesipeló pwokiten ekkewe aramasen lón ra nuokkusiti ekkewe aramasen Israel. Esap mwüümwütä ngeni emön an epwe toowu ika tolong.
2Nge ewe SAMOL a apasa ngeni Joshua: “Nengeni! Ngang üwa fen atolonga Jeriko lepöum fiti an we king me ekkewe mwän pöchökkül mi pwora. 3Noum unusen mwiichen sounfiu repwe karis pwellin ünükkün ewe telinimw fän ew lón ew rän lón üküükün wonu rän. 4Füümön souasór repwe akkomw mwen ewe pwórofel, nge emön me emön leiir epwe uweei ew rappwa mi för seni mächään ätemwänin siip. Iwe, lón ewe efisuwen rän öüpwe karis pwellin ünükkün ewe telinimw fän fisu, nge ekkewe füümön souasór repwe ettiki ekkewe rappwa. 5Iwe, epwe fis pwe lupwen kopwe rongorong än ekkewe souasór repwe ettikittamei tikin ekkewe rappwa mi för seni mächään ätemwänin siip, kopwe üreni ekkewe aramas meinisin pwe repwe leüommóng le akkapwas. Mwirin, tittin ewe telinimw repwe turuchaapapetiw. Iwe, ekkewe aramas repwe feittä, iteiten emön me emön mwän epwe tööfóchófóchlong seni en me äwenewenen leenian.”
6Iei minne, Joshua nöün Nun we mwän a köörato ekkewe souasór o apasa ngeniir, “Öüpwe ekii än ewe SAMOL we pwórun pwon, nge öüpwe ewiisa ngeni füümön souasór pwe repwe akkomw mwan, nge emön me emön leiir epwe uweei ew rappwa mi för seni mächään ätemwänin siip.” 7Mwirin, Joshua a öllük ngeni ekkewe aramas, “Öüpwe fätäleló o karis pwellin ünükkün ewe telinimw, nge ekkewe mwän fän ar pisekin maun epwe akkomwoló mwen än ewe SAMOL we pwórofel.”
8Iwe, ina meet a fis pwe lupwen Joshua a wes le kapas ngeni ekkewe aramas, ekkewe füümön souasór mi uweei ekkewe fisu rappwa mi för seni mächään ätemwänin siip ra teliló fän mesen ewe SAMOL. Iwe, ra poputä le ettiki ekkewe rappwa, nge än ewe SAMOL we pwórun pwon a tapweló mwiriir. 9Ekkewe mwän fän ar pisekin maun ra feilló mwen ekkewe souasór mi ettiki ekkewe rappwa, nge a pwal wor ekkewe mwän fän ar pisekin maun ra kuukumwirito mwirin ewe pwórofel, lupwen ekkewe souasór ra sópweeló le ettiki ekkewe rappwa. 10Iwe, Joshua a öllük ngeni ekkewe aramas o apasa, “Ämi öüsap apwas ika ökürang. Esap wor ew kapas epwe toowu seni awemi, tori ewe rän ngang üpwe apasa ngeni kemi pwe öüpwe arükak. Mwirin, öüpwap arükak.” 11Iwe, Joshua a öllük pwe repwe mwärei än ewe SAMOL we pwórofel pwellin ünükkün ewe telinimw fän ew chök lón ewe ränin. Mwirin, iir meinisin repwe liwinsäfäl ngeni ewe leeni ia ra asóósó ie o nómwóló ikenan lón ewe pwinin.
12Iwe, Joshua a pwäätä lesossorusich, nge ekkewe souasór ra ekii än ewe SAMOL we pwórofel. 13Mwirin, ekkewe füümön souasór mi uweei ekkewe fisu rappwa mi för seni mächään ätemwänin siip ra akkomw mwen än ewe SAMOL we pwórofel nge ra ettiki ekkewe rappwa. Iwe, ekkewe mwän fän ar pisekin maun ra akkomw mwen ekkewe souasór fän nöüür kewe rappwa, nge a pwal wor mwän fän ar pisekin maun mi kuukumwir ra tapweto mwirin än ewe SAMOL we pwórofel. Iwe, ekkewe souasór ra sópweló le ettiki ekkewe rappwa. 14Iwe, lón ewe oruuwen rän, ra karis pwellin ünükkün ewe telinimw fän ew o ra liwiniti ewe leeni ia ra asóósó ie. Iei usun meet ra föri lón üküükün wonu rän.
15Nge, a fis pwe lón ewe efisuwen rän, ekkewe chón Israel ra chök pwäätäkäi me ünimweirän. Iwe, ra karis pwellin ünükkün ewe telinimw fän fisu lón chök ewe lapalap ra föri me mwan. Nge lón ei rän ra karis pwellin ünükkün ewe telinimw fän fisu. 16Iwe, lón ewe efisuwen fansoun ar pwel, a fis pwe lupwen ekkewe souasór ra ettikitamei nöüür ekkewe rappwa, Joshua a öllük ngeni ekkewe aramas: “Öüle akkapwas, pün ewe SAMOL a ngeni kemi ewe telinimw! 17Iwe, ewe telinimw me mettóch meinisin mi nóm lón repwe unusen kataaló pwe ew asór ngeni ewe SAMOL. Chiilón chök Rahab ewe fiin lisowu epwe manaw me pwal ekkewe ekkóch aramas mi nóm ren lón imwan, pwokiten i a aopaló ekkewe chón künö sia ökkünör. 18Nge ämi, öüpwe fókkun äfälli kemi ren ekkewe mettóch öüpwe epiniir pwe repwe kata. Pün lupwen öüpwe epiniir pwe repwe kata, nge mwirin öüwa angei och seniir, iwe, öüpwe föri pwe än chón Israel leenien asóósó epwe önümamaw o awarato osukosuk wón. 19Nge silifer me kolt meinisin me iteiten ekkewe pisek mi för seni piraas ika mächä repwe pin fäniten ewe SAMOL. Repwe katolong lón än ewe SAMOL leenien iseis pisek öüchchea.”
20Ina minne, lupwen än ekkewe souasór ra ettiki ekkewe rappwa, ekkewe aramas ra fókkun leüommóng le akkapwas. Iwe, esap mang mwo nge tittin ewe telinimw Jeriko a turuchaapapetiw. Mwirin, ekkewe chón Israel ra cheewenewenelong lón ewe telinimw, emön me emön mwän a tööfóchofócholong seni en me äwenewenen leenian o ra liäpeni ewe telinimw. 21Iwe, ra unusen ataeló meinisin minne a nóm lón ewe telinimw. Ra niieló ren ketilas mwän me fefin, semiriit me chinlap, pwiin kowu me siip me dongki.
22Mwirin, Joshua a apasa ngeni ekkewe rüwömön mwän mi piin operi ewe fönü me mwan, “Öüpwe föri usun minne öüwa ääni pwon fän ökköpöl. Öüpwe feilló o tolong lón imwen ewe fiin lisowu o emmwenawu i fiti chón an famili meinisin.” 23Iwe, ekkewe ölüwöl mi piin operi ewe fönü ra tolong o ra emmwenawu Rahab, saman, inan, mongean kewe me aramasan meinisin mi nóm ren. Iwe, ra emmwenaló aramasen neminnewe kewe meinisin ngeni ew leeni ia repwe tümwün me ie arap ngeni leenien ekkewe chón Israel.
24Mwirin, ekkewe chón Israel ra keni ewe telinimw me mettóch meinisin minne ra nóm lón. Ekkewe chök mettóch mi för seni silifer, kolt, piraas ika mächä, ra isenirelong lón ewe leenien iseis pisek öüchchea lón imwen ewe SAMOL. 25Iei usun än Joshua a amanawa Rahab ewe fiin lisowu me chón leimwen saman pwal aramasan meinisin mi nóm ren lón ewe imw, pwokiten i a aopa ekkewe spaii Joshua a tiinireló pwe repwe operi Jeriko. Ina minne, neminnewe a nónnóm leiin ekkewe chón Israel tori ikenäi.
26Mwirin, lón ewe fansoun, Joshua a püngütiw ei kapasen pwon fän ökköpöl ngeni ekkewe aramasen Israel o apasa, “A önümamaw me fän mesen ewe SAMOL emön mwän mi sótuni an epwe öüüwsäfälietä ei telinimw Jeriko. Nöün mwännichi epwe mäló lupwen epwe fótuki lóngólóngun ei telinimw, nge nöün setipwütür epwe mäló lupwen epwe öüüwetä asamalapen ekkewe tiit.”
27Iei usun ewe SAMOL a fiti Joshua. Iwe, an iteüöch a meresfeil leemelen unusen ewe fönü.
Chón Israel ra kuf me lón Ai
7Nge ekkewe aramasen Israel ra ataai ar ölükülük fänäsengesin ekkewe mettóch mi käimwüüló fäniten ewe SAMOL pwe repwe kata. Pün emön mwän itan Akan a sooläni ekkóch kewe mettóch mi käimwüüló fäniten ewe SAMOL pwe repwe kata. Iei minne, ewe SAMOL a fókkun soong ngeni ekkewe aramasen Israel. Ätei Akan i nöün Karmi we mwän, nge Karmi nöün Zabdi, nge Zabdi nöün Zera seni ewe einangen Judah.
2Iwe, Joshua a tiinaló ekkóch mwän seni Jeriko pwe repwe operi ewe telinimw Ai mi nóm peliöötiwen Bethel ünükkün Beth Aven. A apasa ngeniir, “Öüpwe feittä o operi ewe fönü.” Ina minne ekkewe mwän ra feittä o operi Ai.
3Iwe, lupwen ra liwinsäfäl, ra apasa ngeni ngeni Joshua, “Ese pwal lamwot än ekkewe aramas meinisin pwe repwe feittä o maun ngeni Ai. Esap mwo nge lap seni ruu ika ülüngät ngöröw mwän repwe feittä o maun ngeni Ai. Kosap eweiresi ekkewe aramas meinisin ar repwe feittä ikenan, pün ekkewe aramasen Ai ra chök chóókükkün.” 4Ina minne, ina epwe üküükün ülüngät ngöröw mwän seni leiin ekkewe aramas ra feittä ikenan, nge ra sü me mwen ekkewe re Ai. 5Iwe, ekkewe re Ai ra tapweri ekkewe chón Israel seni asamalapen tittin ewe telinimw tori Shebarim. Iwe, ra niietiw ina epwe üküükün iliik me wonomön mwän mi süütiw wón ewe paletiw. Iei minne, ekkewe aramasen Israel ra määmechor ren ar nuokkus, pwokiten meet ei a fis. Iwe, ar pwora a teliló seniir.
6Mwirin, Joshua me ekkewe souakkomwen Israel ra kamweei üfeer kewe ren ar letipeta o ra tukotuketä pwül mworomwor wón mökürer. Ra chappetiw leppwül mwen än ewe SAMOL we pwórofel tori lekkuniól. 7Iwe, Joshua a apasa, “Mwa meet, Samol KOT, pwata chök ka fen emmwenato ei mwiichen aramas pwe repwe pwereto peekiton ewe chaanpwuupwu Jordan are kopwe mwüüt ngeni ekkewe chón Amor pwe repwe niikeemiló? O amwo ita äm aipwe fen menemenöch o nómwóló chök epeek ewe chaanpwupwu Jordan! 8O Samol, meet ngang üpwe tongeni apasa, nge iei chón Israel ra kul o äsepa sökürüür ren ar sü me mwen chón opwuter kana? 9Pün lupwen ekkewe chón Kanaan me chón ewe fönü meinisin repwe rong usun ei; iwe, repwe pwellikeemiló o ääraló item seni wón fönüfan. Mwirin meet epwe fis ngeni iteüöchchün Itom mi lapalaap?”
Än Akan tipis
10Nge ewe SAMOL a apasa ngeni Joshua: “Kopwe pwäätä! Pwata ka iei usum le chappetiw leppwül? 11Chón Israel ra tipis o ra pwal pwuurätiw äi we pwon ngang üwa öllük ngeniir. Pün ra sooläni ekkóch kewe mettóch ngang üwa öllük pwe repwe käimwüüló fänitei. Iwe, resap chök sooläni ekkewe mettóch, nge ra pwal chofona usun o ra aopaló ekkewe mettóch leiin pwisin pisekiir kewe. 12Iei minne ekkewe aramasen Israel ra sü pün ra kuf ren chón opwuter kana. Pün iei Israel a käimwüüló fäniten an epwe feiengaw. Ngang üsap pwal chüen nóm reemi, chiilón chök ika ämi öüpwe ataeló seni lefiilemi ekkewe mettóch mi käimwüüló pwe repwe kataaló.
13Kopwe pwäätä! Kopwe öllük ngeni ekkewe aramas o apasa, ‘Öüpwe epini kemi o amolla kemi fäniten lesor, pwokiten iei meet ewe SAMOL ewe Koten Israel a apasa: Ämi chón Israel, mi wor mettóch mi käimwüüló fäniten ewe SAMOL ra kóópóló leiimi. Öüsap tongeni okkufu ekkewe chón opwuta kemi tori ämi öüpwe ömwökütaló seni lefiilemi ekkeei mettóch mi käimwüüló pwe epwe kata.
14Iei minne, lesossor ew me ew ämi kewe einang repwe kökkööto. Iwe, ewe SAMOL epwe esilla chón menni einang ewe aramas a tipis. Iwe, ewe einang epwe feitto fiti ar kewe eterenges. Iwe, menni ewe eterenges ewe SAMOL epwe esilla, ar kewe famili repwe feitto. Nge menni famili ewe SAMOL epwe esilla, emön me emön mwän epwe feitto. 15Mwirin, ewe emön mi sooläni meet mi käimwüüló pwe repwe kata epwe keekiló ren ekkei, i me aramasan meinisin, pwokiten i a pwuurätiw ewe pwon än ewe SAMOL pwal pwokiten i a föri och föfför mi ässääw me lón Israel.”
16Ina minne, lesossorusichin sorotän ewe rän, Joshua a mwittir pwäätä o a köörato chón ekkewe einangen Israel fän mesen ewe SAMOL lón ew me ew einang. Iwe, ewe einangen Judah a siil. 17Mwirin, a köörato ewe einangen Juda. Iwe, a esilla ewe eterengesin Zerah. Mwirin, a köörato ekkewe familien ewe eterengesin Zerah fän mesen ewe SAMOL. Iwe, ewe familien Zabdi a siil. 18Mwirin, a köörato emön me emön mwän seni chón ewe familien Zabdi. Iwe, Akan nöün Karmi we mwän a siil. Karmi i nöün Zabdi nge Zabdi i nöün Zerah seni ewe einangen Judah.
19Iwe, Joshua a apasa ngeni Akan, “Neii mwän, ngang üwa tungór maamaw ngenuk, kopwe elingaló ewe SAMOL Koten Israel o apasätä meet mi let. Kopwe fangatä o üreniei meet ka föri. Kosap tükümaló seniei.”
20Iwe, Akan a pölüweni Joshua o apasa, “Mi enlet, ngang üwa tipis ngeni ewe SAMOL Koten Israel. Iwe, iei meet ngang üwa föri: 21Lupwen ngang üwa küna me leiin liäpach kewe echö apakauch mi ling minen Babylon, pwal rüwöpwükü shekel silifer me efóch fóchun kolt üküükün choun lime shekel; iwe, ngang üwa mocheniätiir o üwa angeiir. Iwe, ikkanan ngang üwa aoper fän pwül lukalapen imwei imw mangaku, nge ewe silifer a nóm fan.”
22Ina minne Joshua a tiinaló ekkóch chón künö pwe repwe pii. Iwe, ra sääló ren ewe imw mangaku o ra küna ekkewe mettóch ra kóópóló lón, usun chök minne Akan a apasa, nge ewe silifer a nóm fan. 23Iwe, ra angei ekkewe mettóch seni lón ewe imw mangaku o uweireló ren Joshua me ekkewe aramasen Israel meinisin. Iwe, ra iseniretiw fän mesen ewe SAMOL.
24Mwirin, Joshua me ekkewe chón Israel meinisin ra angei Akan nöün Zerah we mwän me ewe silifer, ewe apakauch, ewe fóchun kolt, nöün kewe mwän, nöün kewe fefin, nöün kowu, nöün dongki, nöün siip, imwan imw mangaku me meinisin minne a wor ren. Iwe, ra uweireló ngeni ewe Lemóólun Akor. 25Mwirin, Joshua a apasa ngeni Akan, “Pwata ka awarato ei osukosuk wóóch? Ewe SAMOL epwe awarato osukosuk wóóm ikenäi.”
Iwe, ekkewe chón Israel meinisin ra móneei faaw ngeni Akan me chón an famili, mwirin, ra kenaló inisiir. 26Mwirin, ra ochukuchukätä wón Akan ew wätten ioien faaw a nóm tori ikenäi. Iwe, ewe SAMOL a emmwen seni an soong. Iei minne, ewe leeni a iteni ewe Leemóólun Akor tori ikenäi.
Ai a kuf
8Mwirin, ewe SAMOL a apasa ngeni Joshua: “Kosap nuokkus, kosap pwal apilükingaw. Kopwe angei ekkewe sounfiu meinisin o feilló maun ngeni Ai. Nengeni, ngang üwa fen atolonga lepöum ewe kingen Ai, nöün kewe aramas, an telinimw me fönüwan. 2Iwe, en kopwe föri ngeni Ai me an we king usun minne en ka föri ngeni Jeriko me an we king, chiilón chök, öüpwe angei fänitemi pwe choon wókumi liäpemi me ekkewe maanfätäl. Öüpwe anómwu ew mwiichen chón op repwe nóm lükünsökürün ewe telinimw.”
3Ina minne Joshua a üütä fiti ekkewe sounfiu meinisin pwe repwe feilló maun ngeni Ai. Iwe, Joshua a filätä iliik ngöröw mwän pöchökkül mi pwora o a tiinireló lepwin. 4Iwe, a öllük ngeniir o apasa: “Nengeni, ämi öüpwe operi ewe telinimw me lükünsökürün. Öüsap feilló toowaw seni ewe telinimw, nge ämi meinisin öüpwe chök mollotä. 5Mwirin, ngang me chókana meinisin mi nóm reei aipwe fätäl ngeni ewe telinimw. Iwe, lupwen chón ewe telinimw repwe toowu pwe repwe maun ngeni keem usun me mwan, äm aipwe sü me mweer. 6Äm aipwe mwüüt ngeniir pwe repwe tapweri keem tori äm aipwe paanireló seni ewe telinimw, pün repwe apasa, ‘Ekkewe chón Israel ra sü me mwach usun ra föri me mwan.’ Iei minne, lupwen äm aipwe sü me mweer, 7ämi öüpwe üütä seni ämi leenien op o mwittir tolong lón ewe telinimw, pün ewe SAMOL ämi we Kot epwe atolonga lepöümi. 8Iwe, lupwen öüpwe liapeni ewe telinimw, öüpwe keni ewe telinimw. Öüpwe föri meet ewe SAMOL a öllük. Öüpwe pii pwe öüpwe föri minne ngang üwa öllük ngeni kemi.”
9Iei minne, Joshua a tiinireló. Iwe, ra feilló lón ewe pwinin ngeni ewe leeni ia repwe op ie. Ra op lefiilen Bethel me peli lotowen Ai. Nge Joshua a nómwetiw leiin ekkewe aramas lón ewe pwinin.
10Mwirin, Joshua a pwäätä lón ewe lesossorusichin, a köörifengeni ekkewe aramas. Iwe, i me ekkewe souakkomwen Israel ra akkomw mweer le feittä ngeni Ai. 11Iwe, unusen ewe mwiichen sounfiu mi fiti i ra feittä o kan ngeni ewe telinimw. Iwe, ra feitto mwen ewe telinimw Ai o ra asóósó peliefengin. Nge a wor ew leemóól mi nóm lefiileer me Ai. 12Iwe, lón ena pwinin, Joshua a tiinaló ina epwe üküükün limu ngöröw mwän pwe repwe op lefiilen Bethel me Ai pelilotowen ewe telinimw. 13Iei usun, ra äleenia unusen ewe mwiichen sounfiu meinisin peliefengin ewe telinimw me ekkewe chón op pelilotowun ewe telinimw, nge Joshua a feilló o nóm lón ewe leemóól lón ewe pwinin.
14Iwe, lupwen ewe kingen Ai a küna ekkewe chón Israel lón ewe leemóól, i me nöün kewe sounfiu meinisin, ra mwittir le pwäätä lesossorusich o feiliwu pwe repwe maun ngeni ekkewe chón Israel me lón ew leeni mi nóm mwen ewe maasies. Nge ätewe esap silei pwe a wor ew mwiichen chón op mi nóm lükünsökürün ewe telinimw. 15Iwe, Joshua me ewe mwiichen sounfiun Israel meinisin ra sü ngeni ewe fönüpöön, usun itä nge ra sü me mweer. 16Ina minne, ekkewe mwän meinisin mi nóm lón Ai ra kökkööto pwe repwe tapweriir. Ren ei lapalap, Joshua a paniir pwe repwe toowaweló seni ewe telinimw. 17Esap wor emön mwän a nómwetiw lón Ai ika Bethel, pün iir meinisin ra tapweri ekkewe chón Israel. Iwe, ra likitaló ewe telinimw pwe a chök suukuló asaman, nge ra tapweri ekkewe chón Israel.
18Mwirin, ewe SAMOL a apasa ngeni Joshua, “Kopwe itini ngeni Ai ewe siles mi nóm lepöum, pün ngang üpwe atolonga Ai lepöum.” Iwe, Joshua a itini ngeni ewe telinimw ewe siles mi nóm lepöün. 19Iwe, lón chök ewe ótun Joshua a eitiewu pöün, chókewe mi op ra mwittir üütä o säälong lón ewe telinimw. Iwe, ra mwittir liäpeni ewe telinimw o kenaló.
20Iwe, lupwen ekkewe re Ai ra nennesökürüló mwiriir, ra mäirü pün ra küna ötüötün ekkei seni ewe telinimw a ötütä läng. Iwe, esap chüen wor ia repwe süüló ie. Pün ekkewe chón Israel mi süü ngeni äwenewenen ewe fönüpöön ra kulsäfäl o fiu ngeni ekkewe chón tapweriir. 21Iwe, lupwen Joshua me ekkewe pwal ekkóch chón Israel ra küna pwe ekkewe chón op ra liäpeni ewe telinimw me ötütään ewe ötüötün ekkei seni ewe telinimw, ra kulsäfäl o ra niietiw ekkewe re Ai. 22Mwirin, ekkewe chón Israel, chókewe mi operi ewe telinimw ra toowu seni ewe telinimw o ra pwal maun ngeni ekkewe re Ai. Iei usun, ekkewe re Ai ra eo lefiilen ekkewe chón Israel, ekkóch ekkewe re Israel ra nóm ei epeek, pwal ekkewe ekkóch ra nóm ewe epeek. Iwe, ekkewe re Israel ra niietiw ekkewe re Ai, ina minne esap chüen wor emön me leiir mi manaw ika süüló. 23Nge ra liäpeni ewe kingen Ai o amanawa. Iwe, ra uwealó i ren Joshua.
24Iwe, lupwen ekkewe chón Israel ra wes le niieló ekkewe re Ai meinisin me lükün ewe telinimw, ra liwinsäfäl ngeni Ai o niietiw chókewe mi nóm lón ren ketilas. 25Iwe, ina usun meet a fis pwe unusen aramasen Ai meinisin ra mäló lón ewe ränin, mwän ppök me fefin, üküüküür, engol me ruu ngöröw. 26Pün Joshua a chök eitiewu pöün we mi kömwöch ewe siles tori iteiten emön me emön mi nóm lón Ai a ninniiló. 27Ekkewe chök maanfätäl me ekkewe pisek öüchchea seni lón ewe telinimw resap kataaló pün ekkewe chón Israel ra likitaló ekkeei pwisin fäniter pwe choon wókuur, usun ewe SAMOL a öllük ngeni Joshua.
28Ina minne Joshua a kenaló Ai o föri pwe epwe wiliti ew ioien mettóch mi taatakkis tori feilfeiiló chök, a ew leeni mi pöön tori ikenäi. 29Iwe, i a förusi ewe kingen Ai o emeittiwätä wón efóch irä tori lekkuniól. Nge lupwen chök ótun ewe akkar a tupwutiw, Joshua a öllük pwe repwe angeätiw seni wón ewe irä soomän ewe king we, o repwe oturätiw leasamalapen tittin ewe telinimw. Iwe, ra ochukuchukätä wón ew wätten ioiien faaw, a chüen nóm tori ikenäi.
Joshua a asöfösäfäli ewe pwon
30Lón ena fansoun, Joshua a senätä ew róngen asór ngeni ewe SAMOL Koten Israel me wón ewe chuuk Ebal, 31usun chök minne Moses nöün ewe SAMOL we chón angang a öllük ngeni ekkewe aramasen Israel, mi makketiw usun lón ewe Pwuken Öllükün Moses mi apasa: “Öüpwe senätä ew róngen asór fänitei mi för seni faaw resap falafal, resap pwal ouluul ren och pisekin angang mi för seni mächä.” Mwirin, ra ääni asóren keek me asóren kinamwe wón ewe róngen asór ngeni ewe SAMOL. 32Iwe, me ikenan fän mesen ekkewe aramasen Israel, Joshua a appirüw le makkei wón ekkewe föün ewe róngen asór ekkewe öllük Moses a fen makkeetiw me mwan. 33Mwirin, ekkewe chón Israel meinisin, seni ekkewe chón ekis tori ekkewe chón wilipós, fiti nöüür kewe souakkomw me ekkewe meilap me ekkewe souköpwüng, ra kinikinitiw lón ruu mwiich. Ew mwiich a üütä órun ewe chuuk Kerizim, nge ewe pwal ew mwiich a üütä órun ewe Chuuk Ebal. Ekkeei ruu mwiich ra säpefengen, nge ekkewe souasór, iir chón ewe einangen Levi mi wiisen mwäreei än ewe SAMOL we pwórun pwon ra üütä lefiiler. Ra föri ei alóngólóng wón ekkewe öüröür Moses nöün ewe SAMOL chón angang a fen öllük ngeniir pwe repwe föri fäniten ar repwe efeiöchü ekkewe aramasen Israel.
34Iwe, me mwirin, Joshua a älleani ngeniir meinisin kapasen ewe öllük, ekkewe kapasen feiöch me ekkewe kapasen önümamaw, Moses a makkeeretiw lón ewe Pwuken Öllük. 35Iteiten ekkewe öllük meinisin Moses a ngeniir, Joshua a älleani ngeni unusen ewe mwiichen aramasen Israel meinisin, pacholong ekkewe fefin, ekkewe kükkün me ekkewe chón ekis mi nóm leiin ekkewe chón Israel.
Ekkewe chón Kibeon ra otupwu chón Israel
9Iwe, ekkewe king meinisin mi nóm lotowun ewe chaanpwuupwu Jordan ra rong usun meet a fis. (Ikkeiir ekkewe king nöün ekkewe chón Hit, chón Amor, chón Kanaan, chón Periz, chón Hiv me chón Jebus mi nóm lón ewe fönü mi chukuchukutä me ewe fönü mi tekisón pwal lón unusen ewe kinikin arossetin ewe Mataw mi Lapalaap atoor ngeni efeng ren ekkewe chukun Lebanon.) 2Ekkeei king ra mwittir ochufengeni nöüür mwiichen sounfiu pwe repwe maun ngeni Joshua me ekkewe chón Israel.
3Nge lupwen ekkewe aramasen Kibeon ra rongorong usun meet Joshua a föri ngeni Jeriko me Ai, 4ra raweei pwe repwe ääni angangen tipächchem soolä pwe repwe pwisin amanawer. Iwe, ra tiinaló ew mwiichen chón künö ren Joshua, nge ra uwätä tuuk minen lóóm wón nöüür kewe dongki me minen lóómun leenien wain mi för seni ünüchchen maan mi kamw o eppinas. 5Ra pwal ipweip sandal mi mes me eppinas, o üföüf üüf minen lóóm. Iwe, ra pwal uwoow ömötüür pilawa mi pwasapwas o topwur. 6Iwe, lupwen ra tori ewe leeni ia ekkewe chón Israel ra asóósó ie lón Kilkal, ra apasa ngeni Joshua me ekkewe re Israel, “Äm aia feitto seni fönü toowaw pwe aipwe tungór ngeni kemi pwe öüpwe föri ew pwonen etipeew ngeni keem.”
7Nge ekkewe re Israel ra apasa ngeni ekkewe chón Hiv, “Meet äm aipwe silei ren pwe ämi öüwa chök nóm arap ngeni keem? Pün are öüwa chök nóm arap ngeni keem; iwe, äm aisap tongeni föri ew pwonen etipeew ngeni kemi.”
8Iwe, iir ra apasa ngeni Joshua, “Äm nöüm chón angang.”
Iwe, Joshua a apasa ngeniir, “Ämi iö? Ia öüwa feitto me ie?”
9Ina minne iir ra pölüweni o apasa, “Äm noum keei chón angang aia feitto seni ew fönü mi fókkun toowaw, pwokiten iten ewe SAMOL óm we Kot. Pün äm aia rongorong usun porausen an iteföüló me meinisin minne I a föri me lón Egypt. 10Äm aia pwal rongorong usun meinisin meet I a föri ngeni nöün ekkewe chón Amor kewe rüwömön king mi nóm öötiwen ewe chaanpwuupwu Jordan, ngeni Sihon ewe kingen Hesbon me Ok ewe kingen Bashan mi nóm lón Ashtaroth. 11Iei minne, nöüüm kewe souakkomw me meinisin chón fönüweem we ra kapas ngeni keem o apasa, ‘Öüpwe amollätä ömötümi fäniten ämi öüpwe sääi langattam. Iwe, öüpwe feilló chuuri ekkewe aramasen Israel o apasa ngeniir, Äm aia nöümi chón angang. Iei minne, öüpwe föri ew pwonen etipeew ngeni keem.’ 12Iei eneem ei pilawa, äm aia uweei seni imwem kewe pwe ömötüüm nge mi chök pwichikkareló lón ewe rän aia feilló pwe aipwe feitto reemi. Nge iei öüpwe nengeni pwe a pwasapwas o topwur. 13Iwe, ekkeei leenien wain mi för seni ünüchchen maan ra chök minafö lupwen äm aia alöölör, nge öüpwe nengeni pwe iei ra kamw. Üfeem keei me ipweem keei sandal ra mesiló pwokiten äm sääi a fókkun langattam.”
14Mwirin, ekkewe souemmwenin Israel ra sótuni le nenni ekkóch ömötüür kewe; nge resap eiis meren ewe SAMOL öüröürer. 15Ina minne, Joshua a föri ew etipeewin kinamwe ngeniir o föri ew pwonen etipeew ngeniir pwe epwe mwüüt ngeniir pwe repwe manaw. Iwe, ekkewe souemmwenin ewe mwiichen chón Israel ra önüküchchara ei pwonen etipeew ren ar ra pwon ngeniir fän ökköpöl.
16Iwe, a fis pwe ülüngät rän me mwirin än ekkewe chón Israel föri ewe pwonen etipeew ngeni ekkewe chón Kibeon, ra rong pwe ekkewe aramasen Kibeon iir chón óruur mi chök nóm arapakkan ngeniir. 17Mwirin, ekkewe chón Israel ra mwittir feilló pwe repwe atööpani ei poraus. Iwe, ra tori ar kewe telinimw lón ülüngät rän. Ikkeei ar kewe telinimw: Kibeon, Kefirah, Beeroth me Kiriath Jearim. 18Nge ekkewe aramasen Israel resap maun ngeniir, pwokiten ekkewe souemmwenin ewe mwiichen chón Israel ra fen pwon fän ökköpöl ngeniir iten ewe SAMOL Koten Israel. Iwe, ewe mwiichen chón Israel meinisin ra lal ngeni nöüür kewe souemmwen pwokiten ewe etipeew.
19Mwirin, ekkewe souemmwen meinisin ra apasa ngeni unusen ewe mwiichen chón Israel, “Äm aia pwon fän ökköpöl ngeniir iten ewe SAMOL Koten Israel; iei minne, kich sisap tongeni attaper. 20Nge iei meet sipwe föri ngeniir: Sipwe mwüüt ngeniir pwe repwe manaw, pün Kot esap soong ngeni kich are sipwe ataai ewe pwon sia ääni ngeniir fän ökköpöl.” 21Iwe, ekkewe souemmwen ra pwal apasa ngeni ewe mwiichen chón Israel, “Öüsipwe mwüüt ngeniir pwe repwe manaw. Nge sipwe föri pwe iir repwe chón wos mwüüch me chón üfüüf kólik fäniten ewe mwiichen chón Israel.” Iwe, ewe mwiichen chón Israel ra föri minne ekkewe souemmwen ra fen pwon ngeni ekkewe chón Kibeon.
22Mwirin, Joshua a köörato ekkewe souemmwenin chón Kibeon o apasa ngeniir, “Pwata öüwa kapas chofona ngeni keem? Pwata öüwa apasa pwe öüwa nóm lón ew fönü mi toowaw, nge iei ämi mi chök nóm arap ngeni keem? 23Iei minne, iei ämi öüwa nóm fän önümamaw! Seni ikenäi feilló, ämi öüpwe chón wos mwüüch me chón üfüüf kólik fäniten imwen äi we Kot.”
24Iwe, iir ra pölüweni Joshua o apasa, “Äm aia föri ei pwokiten a wor chón affata le aporausa ngeni keem, äm noum keei chón angang, pwe ewe SAMOL óm we Kot a öllük ngeni nöün we chón angang Moses pwe I epwe maun ngeni unusen ewe fönü o epwe arosaló me mwemi aramas meinisin mi nóm lón ewe fönü. Iei minne, äm aia fókkun nuokkus fäniten manawem pwokitemi. Iei popun äm aia föri ei lapalap. 25Iwe iei, äm ikeei, äm aia nóm lepöum. Kopwe föri ngeni keem minne a mwirinnö o pwüng pwe kopwe föri ngeni keem.”
26Iwe, Joshua esap mwüüt ngeni ekkewe aramasen Israel pwe repwe niireló. 27Nge lón ewe ränin, Joshua a föri pwe ekkewe chón Kibeon repwe chón wos mwüüch me chón üfüüf kólik fäniten ewe mwiichen chón Israel pwal fäniten än ewe SAMOL róngen asór ekis meinisin ia i a filätä pwe epwe förütä ie. Iwe, ina meet iir ra ääni angang tori ikenäi.
Ewe akkar a chök köüüló
10 Iwe, Adoni-Zedek ewe kingen Jerusalem a rong usun porausen än Joshua liäpeni o unusen ataeló Ai o niieló an we king, usun chök an ataeló ewe telinimw Jeriko o niieló an king. A pwal rong usun porausen än ekkewe chón Kibeon ra föri och etipeewin kinamwe ngeni chón Israel, iwe, iei ra pelieliir. 2Ina pwata i me nöün kewe aramas ra fókkun nuokkus lupwen ra rong usun ei, pwokiten Kibeon ew telinimw mi wätte usun wätten ew kewe telinimwen king, pwal pwokiten Kibeon a wätte seni Ai. Nge ekkewe re Kibeon meinisin iir mwän mi pwora. 3Iei minne, Adoni-Zedek ewe kingen Jerusalem a tiinaló chón künö ren pwal ekkeei ekkóch king: Hoham ewe kingen Hebron, Piram ewe kingen Jarmuth, Jafia ewe kingen Lakish me Debir ewe kingen Eklon. Iwe, a apasa ngeniir, 4“Öüpwe feittä reei o älisiei, pwe sipwe tongeni maun ngeni Kibeon, pün a föri och etipeewin kinamwe ngeni Joshua me ekkewe aramasen Israel.”
5Iei minne, ekkewe limmön king nöün ekkewe chón Amor: ewe kingen Jerusalem, ewe kingen Hebron, ewe kingen Jarmuth, ewe kingen Lakish me ewe kingen Eklon ra ochufengeni nöüür kewe mwiichen sounfiu o feittä pwe repwe maun ngeni Kibeon. Iwe, ra eleenier fän mesen ewe telinimw Kibeon o maun ngeni.
6Iwe, ekkewe re Kibeon ra tiitiló ren Joshua mi nóm lón Kilkal o apasa, “Kosap likitikeemiló äm noum keei chón angang. Kopwe mwittir feittä reem, kopwe chimanükeem o älisi keem, pün ekkewe king meinisin nöün chón Amor mi nóm wón ekkewe chuuk ra chufengen o maun ngeni keem.”
7Ina minne, Joshua a feittä seni Kilkal, i me ekkewe sounfiun Israel meinisin ra fiti pwal ekkewe mwän pöchökkül mi pwora meinisin pwe repwe chimanüw Kibeon. 8Iwe, ewe SAMOL a apasa ngeni Joshua, “Kosap nuokkusitiir, pün ngang üwa fen atolonger lepöum. Esap wor emön mwän me leiir epwe üütä me mwom.”
9Iei minne, Joshua a feittä seni Kilkal lón unusen ewe pwiin o mwittir äserengawa ekkewe sounfiun Amor. 10Iwe, ewe SAMOL a atolonger lón rukoruken nuokkus wätte me mwen ekkewe chón Israel. Iwe, ekkewe chón Israel ra okkufur o niireló me lón Kibeon. Ra pwal tapweiireló wón ewe aal mi alengeni Beth Horon o niiretiw tori Azekah me Makkedah. 11Iwe, a fis pwe lupwen ekkewe chón Amor ra sü me mwen ekkewe chón Israel o ra nóm wón ewe aal mi feittiw seni Beth Horon ngeni Azekah, ewe SAMOL a öpüngätiw wóór üten faaw mi wätte seni läng o ra mäló. Iwe, a wor chómmóng mi mäló ren ewe üten faaw lap seni ekkewe mi mäló ren än ekkewe aramasen Israel niireló ren ketilas.
12Lón ewe ränin ewe SAMOL a ewilla ekkewe chón Israel pwe repwe okkufu ekkewe chón Amor. Joshua a iótek ngeni ewe SAMOL me fän mesen ekkewe chón Israel meinisin o apasa: “Akkar, kopwe üüló me asen Kibeon, en maram kopwe üüló me asen ewe Leemóólun Aijalon.”
13Ina pwata ewe akkar me ewe maram ra chök köüüló, tori än ekkewe aramasen Israel ra okkufu chón opwuter kana.
Ifa usun, ei poraus esap makketiw lón nöün Jashar pwuk? Ina usun, ewe akkar a chök köüüló lukalapen läng nge a mang le tupwutiw lón üküükün unusen ew rän. 14Iwe, ewe SAMOL a maun fäniten Israel lón ewe ränin. Esap wor ew rän me mwan ika me mwirin epwe wewe ngeni ei rän, lupwen ewe SAMOL a pölüweni ew tungór seni emön aramas.
15Mwirin, Joshua me nöün kewe sounfiu meinisin mi fiti i ra liwinsäfäl ngeni ewe leeni ia ra asóósó ie lón Kilkal.
Ekkewe kingen Amor ra ninniiló
16Nge lupwen ewe maun, ekkewe limmön king ra sü o opoló lón ew fööimw lón Makkedah. 17Iwe, emön a aporausa ngeni Joshua o apasa, “Ekkewe limmön king ra pwä pwe ra op lón ewe fööimw lón Makkedah.” 18Iwe, Joshua a atoowu ew öllük o apasa, “Öüpwe pülüweto ekkóch faaw mi wätte o pinei ngeni mesen ewe fööimw, öüpwe pwal anómwu ekkóch mwän ren mesen ewe fööimw pwe repwe maseer. 19Nge ämi öüsap nómwetiw ikenan pwe öüpwe sópweló le tapweri chón opwutemi kewe o maunoto me mwiriir. Öüsap mwüüt ngeniir pwe repwe tolong lón ar kewe telinimw, pün ewe SAMOL ämi we Kot a atolonger lepöümi.”
20Mwirin, Joshua me ekkewe soufiun Israel ra sópweló le niieló o ömwüchchü ekkewe limuw mwiichen sounfiu, chiilón chök ekkóch mi achoocho ngeni le süülong lón ar kewe telinimw mi pöchökkül tittiir. 21Iwe, unusen ewe mwiichen sounfiun Israel ra liwinsäfäl ngeni Joshua fän kinamwe lón ar we leenien asóósó lón Makkedah. Iwe, mwirin ei, esap wor emön epwe chiewu seni awan och kapasen üüngeni ekkewe aramasen Israel.
22Mwirin, Joshua a apasa, “Öüpwe pülüweló ekkewe faaw seni asamen ewe fööimw o emmwenawu reei ekkana limmön king seni lón ewe fööimw.” 23Iwe, ra emmwenawu ekkewe limmön king ren Joshua seni lón ewe fööimw: ewe kingen Jerusalem, ewe kingen Hebron, ewe kingen Jarmuth, ewe kingen Lakish me ewe kingen Eklon. 24Iwe, a ina usun pwe lupwen ra emmwenawu ekkewe king ren Joshua, Joshua a köörato ekkewe re Israel meinisin. Iwe, a apasa ngeni nöün kewe samolun sounfiu mi fiti i le feilló maun, “Öüpwe kanoto, öüpwe eipwäätä pachapachemi wón üwen ekkeei king.” Iwe, ra kanoto o eipwäätä pachapacheer wón üwen ekkewe king.
25Mwirin, Joshua a apasa ngeniir, “Öüsap nuokkus, öüsap pwal apilükingaw. Öüpwe pöchökkül o tipepwora, pün iei usun minne ewe SAMOL epwe föri ngeni meinisin ekkewe chón opwuta keemi ämi öüpwe maun ngeniir.” 26Mwirin, Joshua a niieló emön me emön ekkewe limmön king. Iwe, a eitiweretä wón limefóch irä, o ra likemeittiw wón ekkewe irä tori lekkuniól.
27Iwe, lupwen ewe akkar a tupwutiw, Joshua a öllük pwe inisin ekkewe king repwe kepichitiw seni wón ekkewe irä o koturulong lón ewe fööimw ewe ia ra piin op ie me mwan. Mwirin, ra angei ekkóch faaw mi föüwätte o pinei ngeni mesen ewe fööimw. Ekkewe faaw ra chüen nóm tori ikenäi.
Maun ngeni fönü mi nóm öör
28Lón ewe chök ränin Joshua a liäpeni Makkedah, a niieló aramasan tori ewe kingen lón ren ketilas. I a unusen arosaló ekkewe aramas meinisin mi nóm lón ewe telinimw, esap likiti emön epwe manaw. I a niieló ewe kingen Makkedah usun an niieló ewe kingen Jeriko.
29Mwirin, Joshua me ekkewe chón Israel meinisin ra mwöküt seni Makkedah o feilló ngeni Libna. Iwe, ra maun ngeni Libna. 30Iwe, ewe SAMOL a pwal atolonga Libna me an king lepöün chón Israel. Iwe, Joshua a ataeló ewe telinimw o niieló ren ketilas ekkewe aramas meinisin mi nóm lón. I esap amanawa emön me lón ewe telinimw. Mwirin, Joshua a niieló ewe kingen Libna usun chök an niieló ewe kingen Jeriko.
31Mwirin, Joshua me ekkewe chón Israel meinisin ra mwöküt seni Libna o feilló ngeni Lakish. Iwe, ra pwellieló ewe telinimw fän ar pisekin maun o maun ngeni. 32Iwe, ewe SAMOL a atolonga Lakish lepöün chón Israel. Joshua a liäpeni ei telinimw lón ewe oruuwen rän. Iwe, ra ataeló ewe telinimw o niieló ren ketilas ekkewe aramas meinisin mi nóm lón, usun chök minne ra föri me lón Libnah. 33Nge lupwen än ekkewe chón Israel maun ngeni Lakish, Horam ewe kingen Kezer a war fiti nöün kewe sounfiu pwe repwe älisi Lakish. Nge Joshua a niieló ätei me nöün kewe sounfiu tori esap likiti emön epwe manaw.
34Mwirin, Joshua me ekkewe sounfiun Israel meinisin mi fiti ra mwökütüló seni Lakish o feilló ngeni Eklon. Iwe, ra pwellieló ewe telinimw fän ar pisekin maun o maun ngeni. 35Lón ena ränin, ra liäpeni ewe telinimw lón ew chök rän. Iwe, ra unusen arosaló ekkewe aramas meinisin mi nóm lón ewe telinimw, usun chök minne ra föri me lón Lakish.
36Iwe, mwirin än Joshua me ekkewe sounfiun Israel ra feittä seni Eklon, ra feilló Hebron o maun ngeni. 37Iwe, ra liäpeni ewe telinimw me ekkewe wiisópwósópwun lón meinisin. Iwe, ra niieló ren ketilas ekkewe aramas meinisin mi nóm lón fiti fengen me an we king usun chök minne ra föri me lón Eklon. Resap likiti emön epwe manaw.
38Mwirin, Joshua me ekkewe chón Israel meinisin mi fiti ra liwinsäfäl o maun ngeni Debir. 39Iwe, ra liäpeni ewe telinimw me an we king me meinisin wiisópwósópwun lón. Ra niieló ekkewe aramas meinisin mi nóm lón ren ketilas o unusen arosereló, nge resap likiti emön epwe manaw. Ra unusen ataeló Debir usun chök ar ataeló Libna me Hebron.
40Iei usun, Joshua a liäpeni unusen ewe fönü meinisin: ewe fönü mi chukuchukutä, ewe fönü mi nóm Öör, ewe fönü mi tekisón me ekkewe palapaletän ewe fönüpöön fiti ar kewe king meinisin. I a unusen arosaló aramas meinisin me lón ewe fönü, nge esap likiti emön epwe manaw, usun ewe SAMOL Koten Israel a öllük. 41Iwe, Joshua a okkufu chón ekkewe fönü seni Kadesh Barnea tori Kaza pwal seni unusen ewe kinikinin Koshen tori Kibeon. 42Joshua a liäpeni fän ew chök ekkeei king meinisin me fönüwer, pün ewe SAMOL Koten Israel a maun fäniten nöün kewe aramasen Israel.
43Mwirin, Joshua me ekkewe soufiun Israel meinisin mi fiti ra liwinsäfäl ngeni ewe leeni ia ra asóósó ie lón Kilkal.
Maun ngeni fönü mi nóm efeng
11Iwe, lupwen Jabin ewe kingen Hazor a rongorong usun meet a fis, i a tiinaló ew poraus mi weinein ren ekkeei king: Jobab ewe kingen Madon, ewe kingen Shimron me ewe kingen Akshaf, 2pwal ekkewe king mi nóm lón ewe fönü mi chukuchukutä mi nóm efeng me lón ewe lemólun Jordan öörün Kalili me lón ewe fönü mi tekisón pwal lón Nafoth-dor mi nóm lotow. 3A pwal tiitiló ren ekkewe chón Kanaan mi nóm öötiw me lotow, ekkewe chón Amor, ekkewe chón Hit, ekkewe chón Periz, ekkewe chón Jebus mi nóm lón ewe fönü mi chukuchukutä me ekkewe chón Hiv mi nóm lón ekkewe telinimw fän palen ewe chuuk Hermon lón ewe fönü Mizpah. 4Ina minne, ekkeei king meinisin ra emwiicha fengeni nöür kewe mwiichen sounfiu o ochufengeniir pwe repwe maun ngeni Israel. Ar kewe mwiichen sounfiu mi kochufengen fiti óris me wóóken mi fókkun chómmóng, ra pwölüweló ewe fönü usun chök föün pien arosset. 5Ekkeei king meinisin ra ochufengeni nöüür kewe mwiichen sounfiu, iwe, ra feilló o asóósó ren ekkewe kólikin Merom pwe repwe maun ngeni Israel.
6Nge ewe SAMOL a apasa ngeni Joshua, “Kosap nuokkusitiir, pün lesor lón ei chök ótun, iir meinisin repwe mäló. Kopwe pöküüw selin fituken pecheen nöüür kewe óris o keni waar kewe wóókenin maun ren ekkei.”
7Iwe, Joshua me nöün kewe sounfiu meinisin mi fiti i ra äserengawer meren ekkewe kólikin Merom o ra maun ngeniir. 8Iwe, ewe SAMOL a ewilla ekkewe chón Israel pwe repwe okkufu ekkewe chón opwut iir. Iwe, ekkewe chón Israel ra tapwerir tori Sidon Wätte, tori ewe pwuupwu Misrefoth, pwal tori ewe Leemóólun Mizpah mi nóm öötiw. Iwe, ra maun ngeni ekkewe chón opwut iir tori esap chüen wor emön lussun sounfiu mi manaw. 9Iwe, Joshua a pöküüw selin fituken pecheen nöüür kewe óris o keni waar kewe wóókenin maun ren ekkei, usun minne ewe SAMOL a fen öüröüra ngeni.
10Mwirin, Joshua a kul säfäl o a liäpeni Hazor. Iwe, a niieló ewe kingen Hazor ren ketilas. (Pün me mwan Hazor a samolun telinimwen ekkeei mwüü meinisin.) 11Ekkewe chón Israel ra niieló ren ketilas ekkewe aramas meinisin mi nóm lón Hazor o unusen arosereló. Resap likiti emön aramas pwe epwe manaw. Mwirin Joshua a kenaló ewe telinimw Hazor.
12Joshua a niieló ekkewe pwal ekkóch king meinisin me nöüür kewe aramas. A unusen arosereló usun Moses nöün ewe SAMOL we chón angang a öllük. 13Nge Joshua esap keni ekkewe telinimw mi köüütä wón ekkewe chukutekisón, chiilón chök Hazor. 14Iwe, ekkewe aramasen Israel ra angei fäniter ekkewe pisek meinisin me maan ra liäpeni me lón ekkeei telinimw ra ataareló pwe choon wókur. Nge ra niieló ekkewe aramas meinisin ren ketilas. Resap likiti emön aramas pwe epwe manaw. 15Usun minne ewe SAMOL a öllük ngeni nöün we chón angang Moses, iei usun Moses a öllük ngeni Joshua. Iwe, iei usun meet Joshua a föri. I a tümwünüfichi le älleasochisi meinisin minne ewe SAMOL a öllük ngeni Moses.
Mallapen porausen än Joshua liäpeni ewe fönü
16Iei usun Joshua a liäpeni unusen ewe kinikin: ewe fönü mi chukuchukutä, unusen ewe fönü öör, unusen ewe fönü Koshen, ewe fönü tekisón mi nóm pelilotow me ewe lemólun Jordan, ekkewe chuuk me ekkewe fönü tekisón lón Israel. 17Iei, kinikinin fönüwen ekkewe chón Israel a achööwü seni ewe chuuk Halak o keiitä ngeni Seir atoor ngeni Baal Kad mi nóm lón ewe Leemóólun Lebanon fäätiwen ewe Chuuk Hermon. Joshua a liäpeni ekkewe kingen ekkeei kinikin meinisin o niireló. 18Joshua a maun ngeni ekkana king meinisin lón fansoun langattam an epwe liäpeni fönüwer. 19Esap wor ew telinimw me lón ei kinikin epwe ääni pwonen etipeewin kinamwe ngeni ekkewe aramasen Israel, chiilón chök ekkewe chón Hiv, iir ekkewe ra nóm lón Kibeon. Nge meinisin ekkewe pwal ekkóch telinimw, ekkewe chón Israel ra liäpeniir lón maun. 20Pün pwisin ewe SAMOL a aföreai letiper o föri pwe repwe maun ngeni ekkewe chón Israel nge resap küttä an epwe wor kinamwe. Iei minne ewe SAMOL a unusen arosereló o esap ääni ümöümöch ngeniir, usun minne i a fen öllük ngeni Moses.
21Iwe, lón ena fansoun, Joshua a niieló ekkewe mwirimwirin Anak meinisin mi nóm wón ekkewe chukuchukutän Hebron, lón Debir, lón Anab, me lón unusen ewe fönü mi chukuchukutä lón Judah me Israel. Joshua a niireló meinisin o unusen ataeló ar kewe telinimw. 22Esap wor emön lussun ekkewe mwirimwirin Anak a chüen manaw lón unusen ewe fönü Israel, nge a chüen chök wor ekkóch ra nómwetiw lón Kaza, lón Kath me lón Ashdod.
23Iei usun Joshua a liäpeni unusen ewe fönü, usun chök minne ewe SAMOL a öüröüra ngeni Moses. Iwe, Joshua a eineti ei fönü ngeni ekkewe chón Israel pwe repwe fönüweni alóngólóng wón kinikinin ar kewe einang. Mwirin, ewe fönü a asöösö seni maun.
Ekkewe king Moses a okkufuur
12Ikkeiir ekkewe king mi nóm öötiwen ewe chaanpwuupwu Jordan, ekkewe aramasen Israel ra niireló o liäpeni fönüwer. Kinikinin fönüwer a achööwü seni ewe pwokuren Arnon tori ewe chuuk Hermon pwal pacholong unusen ewe fönü öötiwen ewe lemólun Jordan:
2Ra okkufu Sihon nöün chón Amor we king mi nóm lón Hebron. I a nemeni seni Aroer mi nóm órun ewe pwokuren Arnon, achööwaló seni lukalapen ewe pwokur Arnon tori ewe chaanpwuupwu Jabbok, iei kiänin fönüwen ekkewe chón Amor. Ei kinikin a pacholong esóp Kilead mi nóm efengin ewe chaanpwuupwu Jabbok. 3Sihon a pwal nemeni ewe lemólun Jordan keiiló peliefeng ngeni lotowun arossetin ewe nómwun Kinneroth, pwal keiiló ngeni peliöör tori ewe nómwun Arabah (iei ewe Nómwun Salt) seni ewe aal mi alengeni Beth Jeshimoth feilló ngeni ekkewe palen Piskah.
4Ra pwal okkufu King Ok ewe kingen Bashan, iei i ömwüchchülón ekkewe chón Refa, ekkewe mwän wätte mi nónnóm lón Ashtaroth me Edrei. 5I a nemeni ewe kinikin achööwü seni ewe chukun Hermon tori Salkah mi nóm peliefeng pwal tori unusen Bashan mi nóm peliöötiw o keiiló pelilotow tori kiänin fönüwen ekkewe chón Keshur me ekkewe chón Maakah. A pwal nemeni peliefengin esóp Kilead, nge ewe pwal esóp iei fönüwen Sihon, ewe kingen Heshbon.
6Ikkeiir kingen ekkewe fönü Moses nöün ewe SAMOL we chón angang me ekkewe aramasen Israel ra okkufuur. Iwe, Moses nöün ewe SAMOL we chón angang a fen ngeni chón ewe einangen Reuben, chón ewe einangen Kad me chón ewe esóp einangen Mannasah fönüwer kewe pwe repwe fönüweni.
Ekkewe king Joshua a okkufuur
7Iwe, ikkeiir ekkewe king Joshua me ekkewe sounfiun Israel ra okkufuur me pelilotowun ewe chaanpwuupwu Jordan, seni Baal Kad mi nóm lón ewe Leemóólun Lebanon tori ewe chukun Halak me ewe paletä ngeni Seir. Joshua a eineti ei fönü ngeni ekkewe einangen Israel pwe fönüwer, alóngólóng wón kinikinin ar kewe einang. 8A pwal apachalong ewe fönü mi nóm wón ewe chukuchukutä, ewe fönü tekisón mi nóm pelilotow, ewe lemólun Jordan, palapalatän ewe chuuk, ewe fönüapöön Judea me ewe fönü Öör. Ekkewe aramas mi nóm lón ei kinikin iir ekkewe chón Hit, chón Amor, chón Kanaan, chón Periz, chón Hiv me chón Jebus.
Ikkeiir ekkewe king chón Israel ra okkufuur:
9Ewe kingen Jeriko, emön;
ewe kingen Ai mi nóm ünükkün Bethel, emön.
10Ewe kingen Jerusalem, emön;
ewe kingen Hebron, emön.
11Ewe kingen Jarmuth, emön;
ewe kingen Lakish, emön.
12Ewe kingen Eklon, emön;
ewe kingen Kezer, emön.
13Ewe kingen Debir, emön;
ewe kingen Keder, emön.
14Ewe kingen Hormah, emön;
ewe kingen Arad, emön.
15Ewe kingen Libnah, emön;
ewe kingen Adullam, emön.
16Ewe kingen Makkedah, emön;
ewe kingen Bethel, emön.
17Ewe kingen Tappuah, emön;
ewe kingen Hefer, emön.
18Ewe kingen Afek, emön;
ewe kingen Lasharon, emön.
19Ewe kingen Madon, emön;
ewe kingen Hazor, emön.
20Ewe kingen Shimron Meron, emön;
ewe kingen Akshaf, emön.
21Ewe kingen Taanak, emön;
ewe kingen Mekiddo, emön.
22Ewe kingen Kedesh, emön;
ewe kingen Jokneam mi nóm lón Karmel, emön.
23Ewe kingen Dor mi nóm wónpalapaletän Dor, emön;
ewe king nöün ekkewe aramasen Kilkal, emön.
24Ewe kingen Tirzah, emön.
Ekkewe king meinisin iir iliik me emön ra kuf nge ar kewe telinimw ra taaló.
Ewe lussun fönü resap mwo liäpeni
13Iwe, lupwen Joshua a chinlapaló o a otoló lón ierin, ewe SAMOL a apasa ngeni i: “En ka chinlap o ka otoló lón ierum, nge a chüen wor wätten lussun fönü öüsap mwo liäpeni pwe öüpwe fönüweni.
2Mi öüchchea än ekkewe aramas repwe amasowa ewe lussun fönü fönüwen ekkewe chón Filistia me ekkewe chón Keshur, 3iei kinikinin fönüwen ekkewe chón Kanaan. Ei fönü a achööwaló seni ewe pwuupwu Sihor mi nóm wón kiänin öötiwen Egypt keiitä peliefeng ngeni kiänin Ekron, 4pwal pacholong ekkewe limuw telinimwen Filistia iter Kaza, Ashdod, Ashkelon, Kath me Ekron. Pwal ewe fönü mi nóm öör fönüwen ekkewe chón Av a chüen chök nóm pwe repwe liäpeni. Pwal iei ewe kinikin resap mwo liäpeni me efeng: unusen fönüwen ekkewe chón Kanaan pacholong Mearah (iei fönüwen ekkewe chón Sidon) äfätälätä ngeni peliefeng tori Afek mi nóm wón kiänin fönüwen chón Amor, 5pwal fönüwen chón Kebal me unusen ewe fönü Lebanon sässäpengeni öötiw, seni Baal Kad mi nóm fäätiwen ewe chuuk Hermon tori ewe aal mi alengeni Hamath,
6me unusen ewe fönü mi chukuchukutä seni Lebanon tori Misrefoth Maim, pacholong meinisin fönüwen ekkewe chón Sidon. Pwisin ngang üpwe ösüüeló ekkeei aramas seni ekkewe fönü me mwen ekkewe aramasen Israel. Nge kopwe tümwünü pwe kopwe inetii ewe fönü ren üttüüt ngeni ekkewe chón Israel pwe repwe fönüweni, usun ngang üwa fen öllük ngenuk. 7Iei minne, iei kopwe inetii ei fönü ngeni ekkewe tiuw einang me ewe esóp einangen Manassah pwe repwe fönüweni.”
Ewe fönü mi inet me öötiwen ewe chaanpwuupwu Jordan
8Chón ewe einangen Reuben me chón ewe einangen Kad me chón ewe esóp einangen Manassah ra fen angei inetiir fönü me öötiwen ewe chaanpwuupwu Jordan, pün Moses nöün ewe SAMOL we chón angang a fen ewiisa ngeniir ei fönü.
9Kinikinin fönüwer a achööwaló seni Aroer mi nóm órun ewe pwokuren Arnon (pacholong ewe telinimw mi nóm lukalapen ewe pwokur), tori unusen ewe maasies mi nóm peekilón Medeba atooraló ngeni Dibon. 10A pwal pacholong ekkewe telinimw meinisin än Sihon nöün chón Amor we king mi nemenem lón Heshbon atoraló ngeni ewe kiänin fönüwen ekkewe aramasen Ammon. 11A pwal pacholong Kilead me ewe kiänin fönüwen ekkewe chón Keshur me ekkewe chón Maakah, unusen ewe chuuk Hermon pwal unusen Bashan tori Salekah; 12pwal unusen kinikinin fönüwen Ok ewe kingen Bashan mi nemenem lón Ashtaroth me Edrei. King Ok i ömwüchchülón me leiin ekkewe mwän wätte; pün Moses a maun ngeni ekkeei aramas o ösüüreló seni fönüwer. 13Nge ekkewe aramasen Israel resap ösüüwewu ekkewe aramasen Keshur me ekkewe chón Maakath, iei popun ra sópweló le nónnóm leiin ekkewe chón Israel tori ei rän.
14Moses esap ewiisa ngeni chón ewe einangen Levi och inetiir fönü pwe repwe fönüweni, pwokiten inetiir a feitto seni ekkewe asór mi keek wón ewe róngen asór ngeni ewe SAMOL Koten Israel, usun ewe SAMOL a pwon ngeniir.
Fönüwen ekkewe familien chón ewe einangen Reuben
15Nge Moses a ewiisa ngeni ekkewe familien chón ewe einangen Reuben ei kinikinin fönü:
16Kinikinin fönüwer a keiiló seni Aroer mi nóm órun ewe pwokuren Arnon (pacholong ewe telinimw mi nóm lukalapen ewe pwokur) tori unusen ewe maasies peekilón Medeba. 17A pacholong Heshbon me ekkewe ekkóch telinimw mi nóm lón ewe maasies iter: Dibon, Bamoth baal, Beth baal meon, 18Jahaza, Kedemoth, Mefaath, 19Kirjathaim, Sibmah, Zereth shahar mi nóm wón ewe palapaletä asen ewe leemóólun, 20Beth peor, ekkewe palen ewe chuuk Piskah me Beth jeshimoth. 21Fönüwen Reuben a pwal pacholong ekkewe telinimw meinisin mi nóm lón ewe maasies me unusen ewe mwüün Sihon nöün chón Amor we king mi nemenem lón Heshbon, i ätewe Moses a niieló fiti ekkewe samolun Midian iter Evi, Rekem, Zur, Hur me Reba, iir ekkewe samol mi nóm lón ena fönü ra pelieni Sihon. 22Ekkewe aramasen Israel ra pwal niieló ren ketilas Balaam ewe soupwe nöün Beor we mwän, a fitilong leiin chókewe ekkewe aramasen Israel ra niireló. 23Iwe, ewe chaanpwuupwu Jordan iei kiänin fönüwen chón ewe einangen Reuben me pelilotow. Ekkewe telinimw me sóóp mi nóm lón ei kinikin ikkeei inetin ekkewe familien chón ewe einangen Reuben.
Fönüwen ekkewe familien chón ewe einangen Kad
24Iwe, Moses a pwal ewiisa ngeni ekkewe familien chón ewe einangen Kad ei kinikinin fönü:
25Kinikinin fönüwer a pacholong Jazer me ekkewe telinimwen Kilead meinisin, pwal esóp fönüwen ekkewe chón Ammon tori ewe telinimw Aroer mi nóm lotoun Rabbah. 26A pwal keiiló seni Heshbon tori Ramath-mizpeh me Betonim, pwal seni Mahanaim tori ewe kiänin Lo Debar. 27Ra pwal ääni ekkewe telinimw lón ewe leemóólun Jordan iter Beth Haram, me Beth Nimrah me Sukkoth me Zafon pwal lussun mwüün Sihon ewe kingen Heshbon. Nge ewe chaanpwuupwu Jordan iei kiään fönüwer me pelilotow. Iwe, a keiiló ngeni peliefeng tori lepökütiwen ewe Nómwun Kinnereth o feilló peliöötiw ngeni peekilón Jordan. 28Ekkewe telinimw me sóóp mi nóm lón ei kinikin ikkeei inetin ekkewe familien chón ewe einangen Kad.
Fönüwen familien chón ewe esóp einangen Mannasah me öötiw
29Moses a pwal ewiisa ngeni ekkewe familien chón ewe esóp einangen Mannasah ei kinikinin fönü:
30Kinikinin fönüwer a keiiló seni Mahanaim, pacholong unusen Bashan, unusen mwüün Ok ewe kingen Bashan me ekkewe wone telinimwen Jair mi nóm lón Bashan. 31A pwal pacholong esóp Kilead me än King Ok kewe telinimwen king iter Ashtaroth me Edrei. Ekkeei telinimw meinisin Moses a ewiisa ngeni ekkewe mwirimwirin Makir nöün Manassah we mwän.
32Ikkeei ekkewe kinikinin leeni Moses a fen kiniietiw pwe epwe eineti lupwen a nóm lón ewe maasiesin Moab peekilón epeek ewe chaanpwuupwu Jordan öötiwen Jeriko. 33Nge Moses esap ewiisa ngeni chón ewe einangen Levi och fönü pwe inetiir, pün ewe SAMOL Koten Israel a pwon pwe i epwe ina inetiir.
Ewe fönü mi inet me lotowun ewe chaanpwuupwu Jordan
14Ikkeei ekkewe leeni ekkewe aramasen Israel ra angei pwe inetiir me lón ewe fönü Kanaan, ewe souasór Eleasar me Joshua nöün Nun we mwän pwal ekkewe souemmwenin än semer kewe chóó seni ekkewe einangen Israel ra eineti ngeniir pwe repwe fönüweni. 2Ekkeei tiuw esóp einang ra angei inetiir fönü ren üttüüt, usun minne ewe SAMOL a öllük ngeni Moses. 3Pün Moses a fen ewiisa ngeni ekkewe ruu esóp einang inetiir fönü me öötiwen ewe chaanpwuupwu Jordan. Nge Moses esap ngeni chón ewe einangen Levi och inetiir fönü me leiin ekkewe lussun einang. 4Pün ewe einangen Josef ra wiliti ruu einang mi imwufesen: ewe einangen Manassah me ewe einangen Efraim. Iwe, chón ewe einangen Levi resap angei ew fönü, chiilón chök ekkóch telinimw pwe repwe nóm lóór fiti ekkewe fönü pwellin ünükkür mi amassawa fäniten nöüür kewe siip me kowu. 5Iei usun ekkewe aramasen Israel ra fókkun tichchik lón ar eineti ewe fönü, alóngólóng wón minne ewe SAMOL a öllük ngeni Moses.
Kaleb a angei Hebron pwe inetin
6Iwe, ew mwiichen chón tupwuni ekkewe mwirimwirin Judah ra feitto ren Joshua lón Kilkal fän emmwenien Kaleb nöün Jefunne we mwän ewe chón Keniz. Iwe, Kaleb a apasa ngeni Joshua: “En ka chechchemeni meet ewe SAMOL a apasa ngeni Moses, ewe mwäneilükün Kot, fänäsengesum me ngang lupwen sia nóm lón Kadesh Barnea. 7Ngang üwa ier fääik lupwen Moses nöün ewe SAMOL we chón angang a tiinieiló seni Kadesh Barnea pwe üpwe operi ewe fönü Kanaan. Iwe, ngang üwa liwinsäfäl o aporausa seni lón letipei ew poraus mi mwirinnö. 8Nge pwii kewe mi fitiei le feittä ra eniwokkusu ekkewe aramas o ekisaló letiper pwe resap tolong lón ewe Fönüwen Pwon. Nge ngang wón äi, üwa unusen ölükülük le tapweló mwirin ewe SAMOL äi Kot. 9Ina minne lón ena ränin Moses a pwon fän ökköpöl o apasa, ‘Enlet, ia pachapachom epwe pwuutiw ie me lón ewe fönü Kanaan, epwe ina fönüwom me mwirimwirum kana tori feilfeilló chök, pwokiten en ka tapweló mwirin ewe SAMOL äi Kot ren unusen letipom.’
10Iwe, iei en ka pwisin küna, pwe ewe SAMOL a tümwünüei usun i a pwon pwe üpwe manaw o pöchökkül lón ekkeei fääik me limu ier, seni ewe fansoun Moses a ääni ei pwon, inamwo ika ekkewe chón Israel ra siamwüfeil lón ewe fönüpöön. Iwe, iei ikenäi, ngang üwa waliik me limu ieri. 11Nge ngang mi chüen chök pöchökkül ikenäi usun chök lón ewe rän lupwen Moses a tiinieiló lón ewe sääi. Iwe, ngang mi chök chüen tongeni äi üpwe sääi me maun usun chök äi tongeni me ikewe. 12Iei minne, ngang üwa tungór ngenuk pwe kopwe ngeniei ei fönü mi chukuchukutä, ewe SAMOL a pwon ngeniei lón ewe ränin, pün en ka rongorong lón ewe ränin sia operi ewe fönü lupwen sia küna ekkewe Anakim ra nóm ikenan lón ekkewe telinimw ra wätte o pöchökkül tittiir. Üwa epilükülüküw pwe ewe SAMOL epwe fitiei. Iwe, ngang üpwe tongeni ösüürewu usun ewe SAMOL a apasa.”
13Iwe, Joshua a efeiöchü Kaleb, nöün Jefunne we mwän o ngeni i Hebron pwe epwe inetini. 14Iei minne Hebron a wiliti pwe inetin Kaleb nöün Jefunne we mwän ewe chón Keniz tori ikenäi pwokiten i a ölükülük ngeni ewe SAMOL Koten Israel ren unusen letipan. 15Iwe, iten Hebron me mwan, Kiriath Arba. (A eiteit seni iten Arba emön mwän mi fókkun iteföüló me leiin ekkewe Anakim).
Mwirin, ewe fönü a asöösö seni maun.
Fönüwen chón ewe einangen Judah
15Iwe, iei ewe fönü mi einet ngeni ekkewe familien chón ewe einangen Judah. Peliöörün fönüwer a poputä seni wón kiänin Edom tori ewe Fönüpöön Zin mi kükkü ngeni öör.
2Mwirin, kiänin fönüwer me pilöör a poputä seni arossetin ewe Setin Salt, seni ewe nóómw mi säpetiw ngeni peliöör. 3Mwirin, a feiliwu ngeni peliöörun ewe chukuchukutän Akrabin, a tafaaló tori Zin o a feittiw wón peliöörun Kadesh Barnea, tafaaló tori Hezor. Iwe, a feittä tori Adar ia a kul me ie o feilló ngeni Karka. 4Iwe, seni ikenan a pwereló ngeni Azmon tori a tikeri ewe Öüwöön Egypt. Iwe, ewe kiä a fitaló ewe öüwö tori ewe mataw. Iei kiänin fönüer me öör.
5Kiään fönüwer me öötiw, a keiiló ünükkün ewe Setin Mäló feilló tori mesen ewe chaanpwuupwu Jordan.
Iwe, ewe kiä me peliefeng a poputä seni ewe pwokurolong ia ewe chaanpwuupwu Jordan a pwuulong lón ewe Setin Mäló me ie. 6Iwe, ewe kiä a feittä ngeni Beth Hoglah, mwirin, a tafaaló efengin Beth Arabah tori ewe föün Boshan. (Boshan i nöün Reuben mwän.) 7Mwirin, ewe kiä a feilló seni ikenan o feilló lón ewe Leemóólun Akor tori Debir. Iwe, a kul ngeni peliefeng o fätäl ngeni Kilkal mi sässäpengeni ewe chukuchukutän Adummim mi nóm peliöörun ewe leemóól. Ewe kiä a sópwósópwóló le pwelliló ren ekkewe pwuachchen kólik lón En Shemesh o feilló ngeni En Rogel. 8Iwe, ewe kiä a pwerelong lón ewe leemóólun Ben Hinnom o pwelliló peliöörun ewe chukuchukutä ia än ekkewe chón Jebus we telinimw a nóm ie, iei ewe leeni ia ewe telinimw Jerusalem a nóm ie. Ewe kiä a feittä tori wón ewe chuuk mi sässäpe ngeni ewe leemóólun Hinnom me pelilotowun, mi nóm lesópwun ewe leemóólun Refaim me peliefeng. 9Mwirin, ewe kiä a pwelliló seni wón ewe chuuk tori ewe kólikin Neftoah. Iwe, a keiiló ngeni ewe telinimw mi arap ngeni ewe chuuk Efron. Iwe, ewe kiä a pwelliló ngeni Baalah (iei Kiriath Jearim). 10Mwirin, ewe kiä a pwelliló lotowun Baalah tori ewe chuuk Seir. Iwe, a keiiló ngeni ewe telinimw Kesalon mi nóm peliefengin leepelien ewe chuuk Jearim. Iwe, a feittiw tori Beth Shemesh o pwereló ngeni Timnah. 11Iwe, ewe kiä a pwerewu ngeni leepelien Ekron me peliefeng. Mwirin, ewe kiä a pwelliló ngeni Shikkeron me ewe chuuk Baalah o pwerewu ngeni Jabneel. Iwe, a pwereló seni Jabneel o ükütiw me órun ewe Mataw mi Lapalaap.
12Kiään ewe fönü me lotow iei arossetin ewe Mataw mi Lapalaap.
Iei unusen pwellin kiänin fönüwen ekkewe familien chón ewe einangen Judah.
Kaleb a òsóói Hebron me Debir
13Iwe, ewe SAMOL a öüröüra ngeni Joshua pwe epwe ewiisa ngeni Kaleb nöün Jefunne we mwän ekkóch kinikin me lón wiisen ekkewe mwirimwirin Judah. Iei minne, Kaleb a ääni ewe telinimw Arba, (iei Hebron) mi eiteit seni iten än Anak we leewo. 14Kaleb a ösüüweló ekkewe ülümön chón Anak seni ikenan iter: Sheshai, Ahiman me Talmai, iir ekkewe mwirimwirin Anak. 15Mwirin, Kaleb a feittä seni ikenan o maun ngeni ekkewe aramas mi nóm lón Debir (iten Debir me mwan, Kiriath Sefer). 16Iwe, Kaleb a apasa, “Ngang üpwe ngeni ätewe mi maun ngeni Kiriath Sefer o liäpeni, neii we föpwül Aksa pwe pwülüwan.” 17Iwe Othniel nöün pwiin Kaleb we itan Kenaz a liäpeni Kiriath Sefer. Iwe, Kaleb a ngeni Othniel nöün we föpwül itan Aksa pwe pwülüwan.
18Iwe, iei meet a fis pwe lón ew ränin lupwen Aksa a feitto ren Othniel, neminnei a peseei Othniel pwe epwe tungórei semen neminnei we ew tännipi. Iwe, lupwen neminnei a töötiw seni wón nöün we dongki, Kaleb a eisini, “Meet ka mochen? Meet ngang üpwe tongeni föri fänitom?”
19Iwe, neminnei a pölüweni o apasa, “Kopwe ngeniei pwal ew feiöch. Pwokiten en ka fen ngeniei ew fönü me lón ewe fönü Öör, iei minne kopwe pwal ngeniei ekkóch pwuachchen kólik.” Ina pwata Kaleb a ngeni neminnei ekkewe kólik mi pwuachchetä ra nóm peekitä, pwal ekkewe ra nóm peekitiw.
Ekkewe telinimw än chón ewe einangen Judah
20Iwe, iei inetin ekkewe familien chón ewe einangen Judah.
21Ikkeei ekkewe telinimw än ekkewe familien chón ewe einangen Judah mi nóm ünükkün ewe kiänin Edom leesópwuchikin me öör:
Kabzeel, Eder, Jakur, 22Kinah, Dimonah, Adadah, 23Kedesh, Hazor, Ithnan, 24Zif, Telem, Bealoth, 25Hazor-hadattah, Kerioth-hezron (iei Hazor), 26Amam,Shema, Moladah, 27Hazar kaddah, Heshmon, Beth-pelet, 28Hazar-shual, Beersheba, Biziothiah, 29Baala, Iim, Ezem, 30Eltolad, Kesil, Hormah, 31Ziklak, Madmannah, Sansannah, 32Lebaoth, Shilhim, Ain, me Rimmon. Ekkewe telinimw meinisin iir rüwe me tiwu fiti ekkewe sóóp mi nóm pwellin ünükküür.
33Pwal ikkeei ekkewe telinimw mi nóm pelilotoun ewe fönü tekisón inetin chón ewe einangen Judah:
Eshtaol, Zorah, Ashnah, 34Zanoah, En-kannim, Tappuah, Enam, 35Jarmuth, Adullam, Sokoh, Azekah, 36Shaaraim, Adithaim, Kederah me Kederothaim. Iir meinisin engol me rüwänü telinimw fiti ekkewe sóóp mi nóm pwellin ünükküür.
37Ra pwal pacholong Zenan, Hadashah, Mikdal-kad, 38Dilean, Mizpeh, Joktheel, 39Lakish, Bozkath, Eklon, 40Kabbon, Lahmam, Kitlish, 41Kederoth, Beth-dakon, Naamah me Makkedah: engol me wonu telinimw fiti ekkewe sóóp mi nóm pwellin ünükküür.
42Me lükün ekkeei, ra pwal leenieni Libnah, Ether, Ashan, 43Iftah, Ashnah, Nezib, 44Keilah, Akzib, me Mareshah: tiwu telinimw fiti ekkewe sóóp mi nóm pwellin ünükküür.
45Kinikinin fönüwen chón ewe einangen Judah a pwal pacholong ekkewe telinimw meinisin me ekkewe sóóp lón Ekron. 46Iwe, ewe kiä a keiiló lotowun Ekron pacholong ekkewe telinimw meinisin mi arap ngeni Ashdod fiti ekkewe sóóp mi nóm pwellin ünükküür. 47A pwal pacholong Ashdod fiti an kewe telinimw me sópwun kewe pwal Kaza me an kewe telinimw me sópwun kewe feilló tori ewe Öüwöön Egypt o pwereló arossetin ewe Mataw mi Lapalaap.
48Judah a pwal angei ekkeei telinimw mi nóm lón ewe fönü mi chukuchukutä:
Shamir, Jattir, Sokoh, 49Dannah, Kiriath-sannah (iei Debir), 50Anab, Eshtemoh, Anim, 51Koshen, Holon me Kiloh: engol me ew telinimw fiti sópwur kewe mi nóm pwellin ünükküür.
52A pwal pacholong ekkeei telinimw: Arab, Dumah, Eshan, 53Janim, Beth tappuah, Afekah, 54Humtah, Kiriath-arba (iei Hebron) me Zior: tiw telinimw fiti sópwur kewe mi nóm pwellin ünükküür.
55Me lükün ekkeei, ra pwal leenieni Maon, Karmel, Zif, Juttah, 56Jezreel, Jokdeam, Zanoah, 57Kain, Kibeah me Timnah: engol telinimw fiti sópwur kewe mi nóm pwellin ünükküür.
58Ra pwal kapachatä ekkeei telinimw: Halhul, Beth-zur, Kedor, 59Maarath, Beth-anoth me Eltekon: wonu telinimw fiti ekkewe sóóp mi nóm pwellin ünükküür.
60Pwal Kiriath-baal (iei Kiriath Jearim) me Rabbah: ruu telinimw fiti ekkewe sóóp mi nóm pwellin ünükküür.
61Ikkeei ekkewe telinimw mi nóm lón ewe fönüpöön:
Beth-arabah, Middin, Sekaka, 62Nibshan, ewe Telinimwen Salt me En Kedi: wonu telinimw fiti ekkewe sóóp mi nóm pwellin ünükküür.
63Nge chón ewe einangen Judah resap tongeni ösüüweló ekkewe chón Jebus mi nóm lón ewe telinimw Jerusalem. Iei minne, ekkewe chón Jebus ra chök nónnóm leiin ekkewe aramasen Judah tori ikenäi.
Efraim me Manassah ra angei inetiir fönü me lotow
16Iwe, inetin ekkewe mwirimwirin Josef fönü a poputä kiänin seni ewe chaanpwuupwu Jordan arap ngeni Jeriko, öötiwen ekkewe kólikin Jeriko. Iwe, a pwerelong lón ewe fönüpöön o feillong lón ewe fönü mi chukuchukutä lón Bethel. 2Mwirin, a feiliwu seni Bethel (iei Luz) o pwereló tori kiänin fönüwen ekkewe chón Ark lón Ataroth. 3Iwe, a feittiw pelilotow ngeni ewe kiänin fönüwen ekkewe chón Jaflet tori ewe kiänin Beth Horon faan. Mwirin a feilló ngeni Kezer o pwereló tori ewe Mataw mi Lapalaap.
4Iwe, ekkewe familien nöün Josef kewe mwän, Manassah me Efraim, ra angei inetiir fönü.
Fönüwen ekkewe mwirimwirin Efraim
5Iwe, iei ewe kinikinin fönü a einet ngeni ekkewe familien chón ewe einangen Efraim:
Kiään fönüwer me peliöötiw a poputä seni Ataroth Addar. Iwe, seni ikenan, a feittä tori Beth Horon asan. 6Mwirin, ewe kiä a feiliwu seni ikenan tori ewe Mataw mi Lapalaap. Ewe telinimw Mikmethah a nóm wón kiään me efeng. Mwirin, ewe kiä a pwereló ngeni öötiw a pwelilliló ngeni Taanah Shiloh o pwereló peliöötiw tori Janoah. 7Mwirin, ewe kiä a feittiw seni Janoah o fätäl ngeni peliöör tori Ataroth me Naarah atoor ngeni Jeriko. Iwe, a ükütiw me órun ewe chaanpwuupwu Jordan. 8Iwe, ewe kiä a feiliwu seni Tappuah keiiló ngeni lotow nge a chök fiti ewe Pwokuren Kanah o ükütiw me órun ewe Mataw mi Lapalaap. Iei fönüwen ekkewe familien chón ewe einangen Efraim. 9Efraim a pwal angei ekkóch telinimw fiti ekkewe sóóp mi nóm pwellin ünükküür me lón kinikinin fönüwen chón ewe esóp einangen Manassah.
10Ekkewe mwirimwirin Efraim resap ösüüwewu ekkewe chón Kanaan mi nóm lón Kezer, nge ekkewe chón Kanaan ra chök nónnómun iir chón kinroosi leiin ekkewe aramasen Efraim tori ikenäi.
Fönüwen mwirimwirin chón ewe esóp einangen Manassah me lotow
17Iei ewe fönü mi inet ngeni chón ewe esóp einangen Manassah, pün i nöün Josef we mwännichi. Ekkewe fönü Kilead me Bashan mi nóm öötiwen ewe chaanpwuupwu Jordan ra fen einet ngeni ewe familien Makir pwokiten i emön mwän mi pwora. (Makir i nöün Manassah mwännichi me semen Kilead.) 2Iwe ewe fönü mi nóm lotowun ewe chaanpwuupwu Jordan a einet ngeni ekkewe lussun familien ewe einangen Manassah: ngeni ekkewe mwirimwirin Abiezer, ekkewe mwirimwirin Helek, ekkewe mwirimwirin Asriel, ekkewe mwirimwirin Shekem, ekkewe mwirimwirin Hefer, me ekkewe mwirimwirin Shemida. Ikkeiir ekkewe pwal ekkóch mwän mwirimwirin Manassah nöün Josef we mwän.
3Nge Zelofehad nöün Hefer we mwän esap wor nöün mwän pwe a chök wor limmön nöün fefin. Hefer i nöün Kilead, nge Kilead i nöün Makir, nge Makir i nöün Manassah. Iwe, ikkeei iten nöün Zelofehad kewe fefin: Mahlah, Noah, Hoklah, Milkah me Tirzah. 4Ekkeei fefin ra feitto fän mesen ewe souasór Eleasar me Joshua nöün Nun we mwän me fän mesen ekkewe souemmwenin Israel o apasa, “Ewe SAMOL a öllük ngeni Moses pwe epwe ngeni keem inetiim fönü me leiin ekkewe mwän chón äm we einang.” Iei minne, Joshua a ngeniir inetiir fönü me leiin fönüwen pwiin semer we, usun minne ewe SAMOL a öllük. 5Iwe, ren ei popun, a wor engol fönü inetin ewe einangen Manassah a angei ren pwüngün üttüüt kapach ngeni ewe fönü Kilead me Bashan mi nóm epeek ewe chaanpwuupwu Jordan me peliöötiw, 6pwokiten ekkewe fefin iir mwirimwirin Manassah ra angei inetiir fönü fiti mwirimwirin Manassah kewe mwän. (Ewe fönü Kilead a einet ngeni ekkewe lussun mwän iir mwirimwirin Manassah.)
7Iwe, kiänin fönüwen Manassah a keiiló seni ewe kiänin Asher tori Mikmethath mi nóm öötiwen Shekem. Mwirin, ewe kiä a feilló ngeni öör seni Mikmethah tori fönüwen ekkewe aramas mi nónnóm arap ngeni ewe kólik mi pwuachchetä lón Tappuah. 8(Ewe fönü pwellin ünükkün Tappuah fönüwen Manassah, nge ewe telinimw Tappuah mi nóm wón kiänin fönüwen chón ewe einangen Manassah, än ekkewe mwirimwirin Efraim.) 9Iwe, ewe kiän fönüwen Manassah a feittiw seni ewe kólik mi pwuachchetä lón Tappuah o tääraló peliefengin ewe pwokuren Kana tori ewe Mataw mi Lapalaap. (Ekkóch telinimw än chón ewe einangen Efraim ra nóm lón kinikinin fönüwen chón ewe einangen Manassah.) 10Ewe fönü mi nóm öörün ewe pwokur, fönüwen chón ewe einangen Efraim, nge ewe fönü mi nóm efengin ewe pwokur fönüwen chón ewe einangen Manassah. Ewe Mataw mi Lapalaap iei kiän fönüwen chón ewe einangen Manassah me lotow. Kinikinin fönüwen chón ewe einangen Manassah a kiäfesen me kinikinin fönüwen chón ewe einangen Asher me efeng, nge a kiäfesen me kinikinin fönüwen chón ewe einangen Issakar me öötiw.
11Ikkeei ekkewe telinimw än chón ewe einangen Manassah mi nóm lón fönüwen chón ewe einangen Issakar me lón fönüwen chón ewe einangen Asher: Beth Shan, Ibleam, Dor (iei Nafoth dor), En Dor, Taanak me Mekiddo fiti sópwur kewe.
12Nge ekkewe mwirimwirin Manassah resap tongeni asóói ekkeei telinimw, pün resap tongeni ösüüwewu ekkewe chón Kanaan mi chök ouucho le ömwöchümöchütiw ar repwe nóm lón ewe fönü. 13Iwe, me mwirin, a fis pwe lupwen ekkewe aramasen Israel ra pöchökküleló, ra eriäni ekkewe chón Kanaan pwe repwe nöüniir chón kinroosi. Nge resap unusen ösüürewu seni ewe fönü.
Pwal ekkóch fönü fäniten chón ekkewe einangen Efraim me Manassah
14Mwirin, ekkewe mwirimwirin Josef ra feitto ren Joshua o eisini, “Pwata ka ngeni keem ew chök inetiim fönü pwe fönüweem, nge äm ew mwiichen aramas mi fókkun chómmóng, pün ewe SAMOL a efeiöchü keem tori iei?”
15Iwe, Joshua a pölüweniir o apasa, “Are ewe fönü mi chukuchukutä lón Efraim esap naaf wätten fänitemi, pün ämi ew mwiichen aramas mi fókkun chómmóng; iwe, öüpwe feittä o elimelima ew fönü fänitemi me leiin ewe wöllap ia ekkewe chón Periz me ekkewe mwän wätte ra nóm ie.”
16Nge ekkewe mwirimwirin Josef ra apasa, “Ewe fönü mi chukuchukutä lón Efraim esap naf ngeni keem, nge ekkewe chón Kanaan meinisin mi nóm lón ewe fönü mi tekisón pwellin Beth Shan me ewe lemólun Jezreel a wor war wóóken mächä. Ra koon pöchökkül mweem.”
17Mwirin, Joshua a apasa ngeni chón ewe einangen Efraim me chón ewe einangen Manassah, iir ekkewe mwirimwirin Josef, “Pwokiten ämi ew mwiichen aramas mi fókkun chómmóng, öüwa pwal fókkun pöchökkül, iei minne, öüsap inetini ew chök fönü. 18Öüpwe pwal fönüweni ewe wöllap lón ewe fönü mi chukuchukutä. Ika mwo ei fönü epwe wöllap, nge ämi öüpwe pöküüwetiw ewe wöllap üküükün ämi mochen o nónnóm ikenan. Ngang üwa lükü pwe ämi öüwa tongeni ösüüwewu ekkewe chón Kanaan seni pwal lón ekkewe leemól, inamwo ika iir ra pöchökkül o wor war wóóken mächä.”
Lussun ewe fönü a inet
18 Pwokiten ewe fönü a nóm fän nemenien ekkewe chón Israel, iei minne, unusen ewe mwiichen aramasen Israel ra mwiichfengen lón Shiloh o öüüwetä ikenan ewe imwenfel mangaku. 2Nge a chüen wor fisu lussun einang me leiin ekkewe einangen Israel resap mwo angei inetiir fönü.
3Mwirin, Joshua a apasa ngeni ekkewe aramasen Israel: “Epwe ifa langattamen fansoun ämi öüpwe tunaló le witiwit pwe öüpwe feilló o angei pwe fönüwemi ewe fönü ewe SAMOL än ämi kewe leewo we Kot a fen ngeni kemi? 4Öüpwe filawu ülümön mwän seni ew me ew einang. Iwe, ngang üpwe tiinireló pwe repwe ouwasacha ewe kinikinin fönü sisap mwo liäpeni. Iwe, repwe liwinsäfälito reei fän tichchikin lapalapen repoten meet ra ekieki ren menni kinikin epwe mwirinnö pwe fönüwen ew me ew ar kewe einang. 5Iwe, iir repwe föri mappen ewe fönü lón fisu kinikin. Nge resap apachalong kinikinin fönüwen chón ewe einangen Judah mi nóm öör me kinikinin fönüwen chón ewe einagen Josef mi nóm efeng. 6Iei minne, öüpwe makkeetiw tichchikin lapalapen ewe fönü lón fisu kinikin o uweato reei minne öüwa makkeetiw ren tichchikin lapalapan. Mwirin, ngang üpwe ütti ekkewe üttüüt fänitemi me fän mesen ewe SAMOL ach we Kot pwe üpwe filätä menni kinikin epwe einet ngeni ew me ew einang. 7Nge chón ewe einangen Levi esap wor inetiir fönü. Pün ewe angangen wiisen souasór fäniten ewe SAMOL ina inetiir. Iwe, chón ekkewe einangen Kad, Reuben me chón ewe esóp einangen Manassah resap pwal chüen angei inetiir fönü, pün ra fen angei inetiir, Moses nöün ewe SAMOL we chón angang a ngeniir me öötiwen ewe chaanpwuupwu Jordan.”
8Iwe, lupwen ekkewe mwän ra amollätä ngeni ar repwe feilló pwe repwe mappei ewe fönü, Joshua a kapasen ölükülük ngenir o apasa, “Öüpwe feilló o ouwasacha ewe fönü. Iwe, öüpwe makkei tichchikin lapalapan, mwirin öüpwe liwinsäfälito reei. Iwe, ngang üpwe inetii ewe fönü ngeni ekkewe einang ren äi üpwe ütti ekkewe üttüüt fänitemi me fän mesen ewe SAMOL me ikeei lón Shiloh.” 9Ina minne, ekkewe mwän ra feilló o ra fätälfeil leemelen ewe fönü. Iwe ra föri mappen unusen ewe fönü lón fisu kinikin o makkeetiw iten ekkewe telinimw mi nóm lón ew me ew kinikin. Mwirin, ra liwinito ren Joshua lón ewe leeni ia ra asóósó ie me lón Shiloh. 10Iwe, me ikenan lón Shiloh, Joshua a ütti ekkewe üttüüt fäniter me fän mesen ewe SAMOL, pwe epwe filätä menni einang epwe fönüweni menni kinikin.
Fönüwen chón ewe einangen Benjamin
11Iwe, ewe äewin kinikinin inet a weneiti ekkewe familien chón ewe einangen Benjamin. Iwe, kinikinin inetiir fönü a nóm lefiilen fönüwen ekkewe mwirimwirin Judah me ekkewe mwirimwirin Josef.
12Kiänin fönüwer me peliefeng a poputä meren ewe chaanpwuupwu Jordan. Iwe, ewe kiä a feittä efengin ewe chukuchukutä ünükkün Jeriko. Mwirin a pwereló ngeni lotow o pwerelong lón ewe fönü mi chukuchukutä me ewe fönüpöönün Beth Aven. 13Iwe, ewe kiä a feilló seni ikenan o feilló öör ngeni Luz, (iei Bethel). Iwe, ewe kiä a feittiw tori Ataroth Addar, tori wón ungen ewe palapalatä mi nóm öörün Beth Horon Faan.
14Mwirin, ewe kiä a pwelliló öör, leepelien pelilotowun ewe palapalatä mi nóm sässäpengeni Beth Horon. Iwe, ewe kiä a ükütiw me ren ewe sóóp Kiriath Baal (iei Kiriath Jearim), iei ew telinimw än chón ewe einangen Judah. Iei ewe kiä me lotow.
15Iwe, ewe kiä me peliöör a poputä me leesópwun Kiriath Jearim. Seni ikenan, ewe kiä a pwereló pelilotow tori ekkewe kólik mi pwuachchetä me lón Neftoah. 16Mwirin, ewe kiä a feittiw tori lepopun ewe chuuk ünükkün ewe lemólun Ben Hinnom mi nóm peliefengin mwüchchütiwen ewe lemólun Refaim. Seni ikenan, ewe kiä a feittiw lón ewe lemólun Hinnom. Iwe, a pwereló öörün ewe palapalatä ia ekkewe chón Jebus ra nónnóm ie. Iwe, a feittiw tori En Rokel. 17Iwe, ewe kiä a feilló seni En Rokel o pwereló öötiwefeng tori En Shemesh. Mwirin, a keiiló ngeni Keliloth mi sässäpe ngeni ewe palapalatän Adummim. Mwirin, ewe kiä a feittiw tori ewe Föün Bohan. (Bohan i nöün Reuben mwän.) 18Mwirin, ewe kiä a feilló seni ikenan o pwereló ünükkün peliefengin ewe palapalatä mi nóm asatään ewe lemólun Jordan. Iwe, ewe kiä a feittiw lón ewe lemólun. 19Iwe, ewe kiä a pwereló peliefengin ünükkün Beth Hokla. Mwirin, a ükütiw ren ewe nóóm mi nóm peliefengin ewe Setin Mäló, iei ömwüchchütiwen ewe chaanpwuupwu Jordan me öör.
20Ewe chaanpwuupwu Jordan iei ewe kiä me öötiw.
Iwe, iei ewe fönü inetin ekkewe familien chón ewe einangen Benjamin.
21Iwe, ikkeei ekkewe telinimw än ekkewe familien chón ewe einangen Benjamin:
Jeriko, Beth Hokla, Emek Keziz, 22Beth Arabah, Zemaraim, Bethel, 23Avvim, Parah, Ofrah, 24Kefar Ammoni, Ofni, me Kaba. Engol me ruu telinimw fiti sópwur kewe.
25Pwal Kibeon, Ramah, Beeroth, 26Mizpeh, Kefirah, Mozah, 27Rekem, Irpeel, Taralah, 28Zelah, Haelef, Jebus (iei Jerusalem) Kibeah, me Kiriath Jearim. Engol me rüwänü telinimw fiti sópwur kewe. Iei inetin ekkewe familien chón ewe einangen Benjamin.
Inetin Simeon ren Judah
19 Iwe, ewe oruuwen kinikinin inetin fönü a weneiti ekkewe familien chón ewe einangen Simeon. Iwe, inetiir fönü a nóm lukalapen kinikinin fönüwen ekkewe mwirimwirin Judah. 2Ikkeei ekkewe telinimw inetin chón ewe einangen Simeon:
Beersheba (ika Sheba), Moladah, 3Hazar Shual, Balah, Ezem, 4Eltolad, Bethul, Hormah, 5Ziklak, Beth Markaboth, Hazar Susah, 6Beth Lebaoth, me Sharuhen. Engol me ülüngät telinimw me sópwur kewe mi nóm pwellin ünükküür.
7Pwal pacholong Ain, Rimmon, Ether, me Ashan. Rüwänü telinimw me sópwur kewe, 8pwal pacholong ekkewe sóópw meinisin atoorätiw öör tori Baalath Beer, (iei Ramah lón Öör.) Iei inetin ekkewe familien chón ewe einangen Simeon.
9Inetin ekkewe familien chón ewe einangen Simeon a feitto seni kinikinin meet a fen einet ngeni ekkewe mwirimwirin Judah, pwokiten ewe kinikin a einet ngeni ekkewe mwirimwirin Judah a fókkun wätte ngeniir. Iei minne ekkewe mwirimwirin Simeon ra angei inetiir me lón inetin ekkewe mwirimwirin Judah.
Fönüwen chón ewe einangen Zebulun
10Ewe öülüngätin kinikinin inetin fönü a weneiti ekkewe familien chón ewe einangen Zebulun.
Iwe, kiänin inetin chón ewe einangen Zebulun fönü a poputä me Sarid. 11Iwe, ewe kiä feilló seni Sarid o feilwenewen ngeni lotow. Iwe, a luuló seni Maralah o ökküüw Dabbasheth. Mwirin, a pwereló ren ewe öüwö mi nóm öötiwen Jokneam. 12Nge fätälin ewe kiä me ewe epeek, a feilló peliöötiw seni Sarid tori ewe kiään Kisloth Tabor. Iwe, seni ikenan, a feilló ngeni Daberath o feittä ngeni Jafia. 13Iwe, seni ikenan, ewe kiä a sópwósópwóló le fätäleló öötiw ngeni Kath Hefer, Eth Kazin me Rimmon. Mwirin a kul ngeni Neah. 14Kiään fönüwen chón ewe einangen Zebulun a pwellitä efeng ngeni Hannathon o ükütiw me lón ewe lemólun Iftah El. 15Ra pwal pacholong ekkewe ekkóch telinimw mi nóm lón ekkeei leeni: Kattah, Nahalal, Shimron, Idalah me Bethlehem. Engol me ruu telinimw fiti sópwur kewe mi nóm pwellin ünükküür.
16Iei inetin ekkewe familien chón ewe einangen Zebulun.
Fönüwen chón ewe einangen Issakar
17Ewe örüwänüwen kinikinin inetin fönü a weneiti ekkewe familien chón ewe einangen Issakar. 18Iwe, ikkeei ekkewe telinimw mi pacholong lón kiänin fönüwer:
Jezreel, Kesulloth, Shunem, 19Hafraim, Shion, Anaharath, 20Rabbith, Kishion, Abez, 21Remeth, En Kannim, En Hadah, me Beth Pazzez. 22Iwe, ewe kiä a pwal ökküüw Tabor, Shahazumah, me Beth Shemesh o ükütiw me órun ewe chaanpwuupwu Jordan. Engol me wonu telinimw fiti sópwur kewe mi nóm pwellin ünükküür.
23Iei inetin ekkewe familien chón ewe einangen Issakar.
Fönüwen chón ewe einangen Asher
24Ewe elimuwen kinikinin inetin fönü a weneiti ekkewe familien chón ewe einangen Asher. 25Iwe, ikkeei ekkewe telinimw mi pacholong lón kiänin fönüwer:
Helkath, Hali, Beten, Akshaf, 26Allammelek, Amad, me Mishal. Iwe, ewe kiä me lotow a feilló seni ewe chuuk Karmel tori Shihor Libnath. 27Mwirin, a kul ngeni öötiw, o pwereló ngeni Beth Dakon. Iwe, a ökküüw kiänin fönüwen Zebulun me lón ewe lemólun Iftah El. Mwirin, a pwereló efeng tori Beth Emek me Neiel. Iwe, a sópweló le feilló efeng tori Kabul, 28Abdon, Rehob, Hammon, me Kanah afätälaló ngeni Sidon Wätte. 29Mwirin, ewe kiä a kul ngeni Ramah me Tayer ewe telinimw mi pöchökkül tittin. Iwe, a feitto ren Hosah órun ewe Mataw mi Lapalaap. Iwe. ikkeei ekkewe telinimw ra pwal pacholong lón ei kinikinin fönü: Mehebel, Akzib, 30Ummah, Afek, me Rehob. Rüwe me ruu telinimw fiti sópwur kewe mi nóm pwellin ünükküür.
31Iei inetin ekkewe familien chón ewe einangen Asher.
Fönüwen chón ewe einangen Naftali
32Ewe awonuwen kinikinin inetin fönü a weneiti ekkewe familien chón ewe einangen Naftali.
33Kiänin fönüwer a feilló seni Helef, seni ewe irä ook mi nóm lón Zaanannim. Iwe, a pwereló tori Adami Nekeb me Jabneel, atoor ngeni Lakkum o ükütiw me órun ewe chaanpwuupwu Jordan. 34Iwe, ewe kiä me lotow a pwelliló seni Helef o pwereló ngeni Aznoth Tabor. Iwe, a feilliwu seni ikenan tori Hukkok. Iwe, ewe kiä a ökküw kiänin fönüwen Zebulun me öör, nge a ökküw fönüwen Asher me lotow. Iwe, a ökküw ewe chaanpwuupwu Jordan me öötiw. 35Iwe, ikkeei ekkewe telinimw mi pöchökkül tittiir ra pacholong lón ei kinikin: Ziddim, Zer, Hammath, Rakkath, Kinnereth, 36Adamah, Ramah, Hazor, 37Kedesh, Edrei, En Hazor, 38Yiron, Mikdal El, Horem, Beth Anath, me Beth Shemesh. Engol me tiwu telinimw fiti sópwur kewe mi nóm pwellin ünükküür.
39Iei inetin ekkewe familien chón ewe einangen Naftali
Fönüwen chón ewe einangen Dan
40Ewe efisuwen kinikinin inetin fönü a weneiti ekkewe familien chón ewe einangen Dan. 41Iwe, ikkeei ekkewe telinimw mi nóm lón kinikinin fönüen chón ewe einangen Dan:
Zorah, Esthaol, Ir Shemesh, 42Shaalabbin, Aijalon, Ithlah, 43Elon, Timnah, Ekron, 44Eltekeh, Kibbethon, Baalath, 45Jehud, Bene Berak, Kath Rimmon, 46Me-jarkon pwal Rakkon fiti ewe äpär arap ngeni Joppa.
47Nge a wor än chón ewe einangen Dan weires ar repwe tolong lón fönüwer, iei popun ra maun ngeni ewe telinimw Laish. Iwe, ra liäpeni ewe telinimw o niieló aramasen lón o nómwóló ikenan. Iwe ra eitasäfäli ewe telinimw Laish ngeni Dan, iten ar we leewo.
48Iwe, iei inetin ekkewe familien chón ewe einangen Dan. Ekkeei telinimw me sópwur kewe.
Inetin Joshua
49Lupwen ra wes le inetii unusen ewe fönü wón ekkewe einang, ekkewe aramasen Israel ra ngeni Joshua nöün Nun we mwän ew kinikinin fönü pwe inetin me leiir. 50Pün ewe SAMOL a fen apasa pwe Joshua a tongeni ääni ese lifilifil menni telinimw i a mochen. Iwe, Joshua a filätä ewe telinimw Timnath Serah mi nóm wón chukuchukutän ewe fönü Efraim. Iwe, i a öüüwetä ewe telinimw o imweimw lón.
51Ikkeei ekkewe kinikinin inetin fönü ewe souasór Eleazar me Joshua nöün Nun we mwän pwal ekkewe souemmwenin einang ra inetii ngeni ekkewe einangen Israel ren üttüüt pwe fönüwer me fän mesen ewe SAMOL me leasamalapen ewe imwenfel mangaku leenien chufengen me lón Shiloh. Iwe, iei usun ra wes le inetii ewe fönü.
Ekkewe telinimwen op
20 Iwe, ewe SAMOL a pwal kapas ngeni Joshua o apasa, 2“Kopwe üreni ekkewe aramasen Israel pwe repwe filätä fäniter ekkóch telinimwen op, usun ngang üwa öüröüra ngeni Moses. 3Pün ese lifilifil ika iö a eniiserin niieló emön aramas fän an cheechengaw ika sap seni mochenin letipan epwe tongeni süü ngeni ew me leiin ekkeei telinimw. Iwe, ewe aramas epwe tongeni tümwün seni määrärin ewe emön mi mäló, pün määrärin ewe mi mäló repwe tongeni kütta ar repwe alemööü ewe ninni. 4Iwe, lupwen ätewe mi popuw ewe mäló fän cheechengaw epwe süü ngeni ew me leiin ekkana telinimw, epwe üütä fän mesen ekkewe souemmwen leasamalapen tittin ewe telinimw o äwewei meet a fis. Iwe, repwe mwüüt ngeni ätewe pwe epwe tolong lón ewe telinimw o nónnóm ikenan leiir. 5Mwirin, are määrärin ewe chón mäló repwe feitto pwe repwe alemööü ewe ninni, ekkewe souemmwen resap mwüütawu ewe chón ninni reer, pün ewe mäló a fis fän cheechengaw. 6Nge ewe aramas mi popuw ewe mäló epwe chök nóm lón ena telinimw o köpwüng ren ewe mwiichen aramas pwe epwe pwääló are esap wor an tipis. Mwirin, ätewe mi köpwüngüló pwe esap wor an tipis pwokiten ewe mäló a fis fän cheechengaw epwe chök sópweló le nónnóm lón ena telinimw tori mälón ewe souasór mi lap mi nóm lón ewe wiis lupwen fansoun an fis ewe cheechengaw. Mwirin ena, ätewe mi pwääló pwe esap wor an tipis epwe ngasaló an epwe liwiniti imwan.”
7Ina minne, ra filätä ekkeei telinimw pwe repwe telinimwen op: Kedesh mi nóm lón Kalili wón ekkewe chukuchukutän ewe fönü Naftali, Shekem mi nóm lón chukuchukutän ewe fönü Efraim, me Kiriath Arba (iei Hebron) mi nóm wón chukuchukutän ewe fönü Judah. 8Iwe, me peliöötiwen ewe chaanpwuupwu Jordan, sässäpe ngeni Jeriko me epeek, ra filätä ekkeei telinimw pwe repwe telinimwen op: Bezer mi nóm lón ewe fönüpöön lón maasiesin fönüwen chón ewe einangen Reuben, Rimoth mi nóm lón Kilead lón kinikinin fönüwen chón ewe einangen Kad, me Kolan mi nóm lón Bashan, lón fönüwen chón ewe einangen Manassah. 9Ikkeei ekkewe telinimw ra käimwüüló fäniten ekkewe chón Israel meinisin pwal fäniten ekkewe chón ekis mi nóm lefiiler. Ese lifilifil iö a niieló emön aramas fän an cheechengaw epwe tongeni op lón ew ekkeei telinimw. Ren ei lapalap, chókana mi niieló aramas fän cheechengaw ra tongeni sü pwe resap ninniiló ren ewe chón älemööw liwinin chcha me mwen ar repwe üütä lón köpwüng fän mesen ewe mwiichen aramas.
Telinimw fäniten chón ewe einangen Levi
21Mwirin, ekkewe souemmwenin ekkewe familien chón ewe einangen Levi ra feitto ren ewe souasór Eleazar me Joshua nöün Nun we mwän, pwal ren ekkewe souemmwenin ekkewe ekkóch einangen Israel. 2Iwe, ra kapas ngeniir me lón Shiloh lón ewe fönü Kanaan o apasa, “Ewe SAMOL a öllük ngeni Moses pwe epwe ngeni keem ekkóch äm telinimw pwe aipwe nónnóm lóór fiti ekkewe fönü ünükkür mi amassawa fäniten nöüüm kewe maan.” 3Iei minne, fän än ewe SAMOL öllük, ekkewe aramasen Israel ra ngeni chón ewe einangen Levi ekkeei telinimw pwe inetiir fiti ekkewe fönü ünükkür mi amassawa fäniten nöüür maan seni lón pwisin inetiir kewe:
4Ewe äewin kinikinin inetin fönü a weneiti ekkewe familien lón ewe eterengesin Kohat. Iwe, ren pwüngün üttüüt, ekkewe mwirimwirin ewe souasór Aaron, iir chón ewe eterengesin Kohat me lón ewe einangen Levi ra angei engol me ülüngät telinimw seni inetin chón ekkewe einangen Judah, Simeon me Benjamin. 5Nge ekkewe ekkóch familien ewe eterengesin Kohat ra angei engol telinimw, ren pwüngün üttüüt, seni kinikinin inetin ekkewe familien chón ekkewe einangen Efraim, Dan me ewe esóp einangen Manassah.
6Iwe, ekkewe mwirimwirin Kershon ra angei engol me ülüngät telinimw seni chón ekkewe einangen Issakar, Asher, Naftali, me ewe esóp einangen Manassah lón Bashan.
7Ekkewe mwirimwirin Merari ra angei engol me ruu telinimw seni chón ekkewe einangen Reuben, Kad me Zebulun.
8Iei usun ekkewe chón Israel ra älleasochisi än ewe SAMOL öllük ngeni Moses o ra ewiisa ngeni chón ewe einangen Levi ekkeei telinimw fiti ekkewe fönü ünükküür mi amassawa ren pwüngün üttüüt.
9Ekkewe aramas seni ewe einangen Judah me ekkewe aramas seni ewe einangen Simeon ra fangaló ekkeei telinimw mi föü iter fan, 10ngeni ekkewe mwirimwirin Aaron, iir chón ewe eterengesin Kohat seni ewe einangen Levi, pwokiten ewe ütüüt a weneitiir akkomw.
11Ra ngeniir Kiriath Arba, (iei Hebron), fiti ewe fönü ünükkün mi amassawa mi nóm wón chukuchukutän ewe fönü Judah. (Arba i än Anak leewo). 12Nge ekkewe mälämäl peekilón ewe telinimw me ekkewe sóóp mi nóm pwellin ünükküür ra fen ngeni Kaleb nöün Jefunne we mwän pwe leenian.
13Iwe, ra ngeni ekkewe mwirimwirin ewe souasór Aaron ekkeei telinimw fiti ekkewe fönü ünükküür mi amassawa: Hebron, (iei ewe telinimwen op fäniten iö mi niieló emön aramas fän cheechengaw), Libnah, 14Jattir, Eshtemoa, 15Holon, Debir, 16Ain, Juttah me Beth Shemesh. Tiuw telinimw seni ekkewe ruu einang.
17Iwe, ra pwal ngeni ekkewe souasór ekkeei telinimw fiti ekkewe fönü ünükküür mi amassawa seni ewe einangen Benjamin: Kibeon, Keba, 18Anathoth me Almon. Rüwänü telinimw.
19Iei usun, ra ngeni ekkewe souasór iir mwirimwirin Aaron engol me ülüngät telinimw fiti ekkewe fönü ünükküür mi amassawa.
20Ekkewe lussun familien lón ewe eterengesin Kohat seni ewe einangen Levi ra ääni ekkeei telinimw me ekkewe fönü ünükküür mi amassawa ren pwüngün üttüüt seni chón ewe einangen Efraim:
21Ewe telinimw Shekem(iei ewe telinimwen op fäniten emön mi niieló emön aramas fän cheechengaw), Kezer, 22Kibzaim me Beth Horon. Rüwänü telinimw.
23Ikkeei ekkewe telinimw fiti ekkewe fönü ünükküür mi amassawa ra ewiisa ngeni ekkewe souasór meren chón ewe einangen Dan: Eltekeh, Kibbethon, 24Aijalon me Kath Rimmon. Rüwänü telinimw.
25Iwe, chón ewe esóp einangen Manassah ra pwal ewiisa ngeni ekkewe souasór ekkeei telinimw fiti ekkewe fönü ünükküür mi amassawa: Tanak me Kath Rimmon. Ruu telinimw.
26Meinisin ekkewe engol telinimw fiti ekkewe fönü ünükküür mi amassawa ra ewiisa ngeni ekkewe lussun familien ewe eterengesin Kohat.
27Iwe, ekkewe mwirimwirin Kershon pwal ew eterenges seni lón ewe einangen Levi ra angei ruu telinimw fiti ekkewe fönü ünükküür mi amassawa seni ewe pwal esóp einangen Manassah. Ra ngeniir ewe telinimw Kolan mi nóm lón Bashan (iei ew telinimwen op fäniten emön mi niieló emön aramas fän cheechengaw) me Beeshterah. Ruu telinimw.
28Iwe ra pwal angei seni chón ewe einangen Issakar ekkeei telinimw: Kishion, Daberath, 29Jarmuth me En Kannim. Rüwänü telinimw fiti ekkewe fönü ünükküür mi amassawa.
30Iwe, ra angei seni chón ewe einangen Asher ekkeei telinimw: Mishal, Abdon, 31Helkath me Rehob. Rüwänü telinimw fiti ekkewe fönü ünükküür mi amassawa.
32Ra pwal angei seni chón ewe einangen Naftali ekkeei telinimw: Kedesh mi nóm lón Kalili (iei ew telinimwen op fäniten emön mi niieló emön aramas fän cheechengaw), Hammoth Dor me Kartan. Ülüngät telinimw fiti ekkewe fönü ünükküür mi amassawa.
33Iei usun ar ra ewiisa ngeni ekkewe familien lón ewe eterengesin Kershon engol me ülüngät telinimw fiti ekkewe fönü ünükküür mi amassawa.
34Iwe, ekkewe familien lón ewe eterengesin Merari, iir lussun chón ewe einangen Levi ra angei seni chón ewe einangen Zebulun ekkeei telinimw: Jokneam, Kartah, 35Dimnah me Nahalal. Rüwänü telinimw fiti ekkewe fönü ünükküür mi amassawa.
36Iwe, ra pwal angei seni chón ewe einangen Reuben ekkeei telinimw: Bezer, Jahaz, 37Kedemoth me Mefaath. Rüwänü telinimw fiti ekkewe fönü ünükküür mi amassawa.
38Iwe, ra pwal angei seni chón ewe einangen Kad ekkeei telinimw: Ramoth mi nóm lón Kilead (iei ew telinmwen op fäniten emön mi niieló emön aramas fän cheechengaw), Mahanaim, 39Heshbon me Jazer. Rüwänü telinimw fiti ekkewe fönü ünükküür mi amassawa.
40Iei usun ar ra ewiisa ngeni ekkewe eterengesin Merari iir ekkewe lussun chón ewe einangen Levi engol me ruu telinimw ren pwüngün üttüüt.
41Iwe, meinisin ekkewe telinimw fiti ekkewe fönü ünükküür mi amassawa mi nóm lón kinikinin fönüwen ekkewe chón Israel ra ngeni chón ewe einangen Levi, iteiter fääik me walüw telinimw. 42Iteiten ew me ew ekkeei telinimw a wor fönü mi amassawa a nóm ünükkün. Iei usun lapalapen ekkeei telinimw meinisin.
Ewe pwon a pwönüwetä
43Iei usun än ewe SAMOL a ngeni chón Israel unusen ewe fönü i a pwon fän ökköpöl pwe epwe ngeni ar kewe leewo. Iwe, ra liäpeni ei fönü pwe fönüwer o ra nónnóm lón. 44Iwe, ewe SAMOL a fang ngeniir ar kinamwe ekis meinisin, usun chök minne i a fen pwon fän ökköpöl ngeni ar kewe leewo. Esap wor emön aramas me leiin chón opwuter kewe a tongeni üüngeniir, pün ewe SAMOL a älisiir le okkufu chón opwuter kewe meinisin. 45Iwe, ra pwönüwetä ekkewe pwon mi mwirinnö meinisin ewe SAMOL a pwon ngeni ekkewe chón Israel.
Chón ekkewe einang mi nóm öötiw ra liwiniti fönüwer
22Mwirin, Joshua a köörato chón ekkewe einangen Reuben, Kad me chón ewe esóp einangen Manassah. 2Iwe, a apasa ngeniir: “Ämi öüwa föri meinisin minne Moses nöün ewe SAMOL we chón angang a öllük ngeni kemi, öüwa pwal älleasochisi iteiten ekkewe öllük meinisin ngang üwa öllük ngeni kemi. 3Ämi öüsap likitaló chón ekkeei pwal ekkóch einang, inamwo are ach ei maun a sópwósópwóló lón fansoun langattam. Ämi öüwa pwal fókkun tümwünü le älleasochisi ekkewe öllük än ewe SAMOL ämi we Kot tori ei rän ikenäi. 4Iwe iei ewe SAMOL ämi we Kot a ngeni chón ekkewe ekkóch lussun einang ar kinamwe, usun i a fen pwon ngeniir. Iei minne, iei öüpwe le liwinsäfäliló ren imwemi kewe me ewe fönü, Moses nöün ewe SAMOL we chón angang a ngeni kemi me öötiwen ewe chaanpwuupwu Jordan. 5Nge öüpwe chök tümwünüfichi ämi öüpwe älleasochisi ekkewe öllük meinisin me pwüüng Moses nöün ewe SAMOL we chón angang a ngeni kemi. Öüpwe echeni ewe SAMOL ämi we Kot, öüpwe fätäl lón an kewe aal meinisin, öüpwe älleasochisi an kewe öllük meinisin, öüpwe ölükülük ngeni i o angang ngeni i ren unusen letipemi me unusen ngünümi.”
6Iwe, Joshua a efeiöchür o a tiinireló. Mwirin, ra feilló ngeni leenier kewe. 7(Moses a fen ngeni chón ewe esóp einangen Manassah ewe fönü Bashan pwe fönüwer me öötiwen ewe chaanpwuupwu Jordan. Nge Joshua a ngeni chón ewe pwal esóp einangen Manassah fönüwer ünükkün chök pwiir kewe lón ewe fönü lotowun ewe chaanpwuupwu Jordan.) Iwe, lupwen Joshua a tiinireló ngeni leenier kewe, a efeiöchüür, 8o apasa ngeniir, “Öüpwe ewiiseisa määrärimi kewe mi nóm lón leeniemi ewe wöw mi wätte öüwa liäpeni seni ekkewe chón opwuta kemi. Öüpwe ewiiseiser seni nöümi kewe pwiin maan mi chómmóng, nöümi silifer me kolt, nöümi piraas me mächä me üfemi mi chómmóng.”
9Ina minne, ekkewe mwän seni ekkewe einangen Reuben, Kad me ewe esóp einangen Manassah ra käimwüfesen me ekkewe aramasen Israel me lón Shiloh lón ewe fönü Kanaan. Iwe, ra liwinsäfäl ngeni poputän fönüwer, iei ewe fönü Kilead, ewe kinikinin fönü iir ra fönüweni, alóngólóng wón än ewe SAMOL öllük a üreni Moses.
Ew róngen asór me òrun ewe chaanpwuupwu Jordan
10Nge lupwen ekkewe mwän seni ekkewe einangen Reuben, Kad me ewe esóp einangen Manassah ra chüen nóm lón Kanaan, me mwen ar repwe pwereló epeek ewe chaanpwuupwu Jordan, ra senätä ew róngen asór mi wätte arap ngeni ewe chaanpwuupwu Jordan me lón ew leeni itan Keliloth. 11Iwe, lupwen ekkewe aramasen Israel ra rong pwe ekkewe mwän seni ekkewe einangen Reuben, Kad me ewe esóp einangen Manassah ra senätä ew róngen asór lón Keliloth lotowun ewe chaanpwuupwu Jordan lón ewe fönü Kanaan, 12unusen ewe mwiichen aramasen Israel ra chufengen lón Shiloh o amollätä pwe repwe feilló maun ngeni pwiir kewe chón ekkewe einang.
13Nge akkomwan, ra tiinaló ew mwiichen chón tupwuniir fän emmwenien Finehas nöün Eleazar we mwän, ewe souasór. Iwe, ra pwereló epeek ewe chaanpwuupwu Jordan pwe repwe kapas ngeni chón ekkewe einangen Reuben, Kad me ewe esóp eiangen Manassah lón ewe fönü Kilead. 14Iwe, a wor engol samolun Israel ra chóni ei mwiichen chón tupwuniir, emön samol seni ew me ew kewe einang, emön me emön i souemmwenin ekkewe kinikinin eterenges lón Israel.
15Lupwen ra wareiti ewe fönü Kilead, ra apasa ngeni chón ekkewe einangen Reuben, Kad me ewe esóp einangen Manasah, 16“Unusen än ewe SAMOL we mwiichen aramas ra mochen silei ika pwata öüwa atai ämi ölükülük ngeni ewe Koten Israel. Pwata öüwa tongeni kul seni ewe SAMOL o senätä fänitemi ew róngen asór pwe öüpwe üüngeni i? 17Ifa usun, sisap mwo kker ren meet a fis ngeni kich ren ewe tipis mi fis me lón Peor? Tori ikenäi sisap mwo limöch seni ewe tipis, inamwo are a fis ew mätter lón än ewe SAMOL we mwiichen aramas. 18Nge ikenäi ämi öüwa pwal fókkun kul seni ämi tapweló mwirin ewe SAMOL. Iwe, epwe fókkun fis pwe are ämi öüwa üüngeni ewe SAMOL ikenäi, lesor i epwe soong ngeni kich meinisin. 19Are öüwa osun ew róngen asór pwokiten fönüwemi a limengaw, öüpwe feitto chuungeni keem wón peekin ewe chaanpwuupwu äm aia nóm wón, ia ewe SAMOL a nónnóm leiim lón an we imwenfel mangaku. Iwe, äm aipwe inetii fönüwem ngeni kemi. Nge öüsap chök üüngeni ewe SAMOL, ika ürikeemilong lón ämi üleförea ren ämi senätä fänitemi pwal ew róngen asór. Pün mi wor ew chök enletin róngen asór än ewe SAMOL ach we Kot. 20Ifa usun, Kot esap öpwüngü ekkewe aramasen Israel meinisin lupwen Akan, emön chón ewe eterengesin Zerah, a tipis ren an sooläni ekkewe mettóch mi käimwüüló fäniten ewe SAMOL? Sap Akan chök ewe emön wón an a määfeiengaw pwokiten an tipis.”
21Mwirin, chón ekkewe einangen Reuben, Kad me ewe esóp einangen Manassah ra pölüweni o apasa ngeni ekkewe souemmwenin ekkewe kinikinin lón Israel: 22“Ewe Emön mi Manaman i Kot ewe SAMOL, ewe Emön mi Manaman i Kot ewe SAMOL. Äm aia senätä ewe róngen asór sap ren äm aipwe üüngeni ewe SAMOL. Nge are äm aia üüngeni ewe SAMOL, iwe, öüsap amanawa keem ikenäi. Nge ewe SAMOL a silei; iwe, ekkewe chón Israel repwe pwal silei, 23pwe äm aia senätä ew róngen asór fänitem sap fäniten äm aipwe kul seni äm tapweló mwirin ewe SAMOL. Äm aisap pwal aea ewe róngen asór fäniten äm asóren keek ika asóren mwöngö ika asóren kinamwe. Are äm aia senätä ewe róngen asór fäniten ei popun, iwe, amwo pwisin ewe SAMOL epwe öpwüngü keem. 24Nge äm aia senätä ei róngen asór, pwokiten äm aia nuokkus, pwe lón ekkan fansoun mwach, mwirimwirimi kana repwe apasa ngeni mwirimwiriim kana, ‘Meet ämi pwüüng pwe öüpwe fel ngeni ewe SAMOL, ewe Koten Israel?
25Pün ewe SAMOL a föri pwe ewe chaanpwuupwu Jordan ina ew kiään lefiilen nöüüm kewe aramas me nöümi kewe aramas. Esap wor wewemi ngeni ewe SAMOL.’ Iwe, mwirimwirimi kana repwe föri pwe mwirimwiriim kana repwe ükütiw le fel ngeni ewe SAMOL.
26Iei minne äm aia ekiekietä pwe aipwe senätä ewe róngen asór, sap fäniten äm aipwe keni ekkewe sókkun asór wón, 27nge i ei róngen asór epwe ew ächechchem. Epwe ächchema ngeni mwirimwiriim kana me mwirimwirimi kana pwe pwal äm mi wor äm pwüüng pwe aipwe fel ngeni ewe SAMOL me lón an we leeni mi pin ren äm kewe asóren keek, ren äm kewe ekkóch sókkun asór, pwal ren äm kewe asóren kinamwe. Mwirin, mwirimwirimi kewe resap tongeni üreni mwirimwiriim kewe lón ekkan fansoun mwach, ‘Esap wor wewemi ngeni ewe SAMOL.’
28Iei minne, äm aia ekieki pwe lupwen repwe apasa ei; iwe, mwirimwiriim kana repwe tongeni pölüweni o apasa, ‘Öüpwe nengeni ei liossun än ewe SAMOL we róngen asór äm kewe leewo ra föri. Inamwo ika esap fäniten ekkewe asóren keek ika ekkewe ekkóch sókkun asór, nge iei ew ächechchem fäniten ewe lefiil ämi me äm sia ääni ngeni ewe SAMOL.’
29Ese fókkun akkarapolong lón äm ekiek pwe äm aipwe üüngeni ewe SAMOL ika kul seni äm aipwe tapweló mwirin ewe SAMOL ikenäi, ren äm aipwe senätä pwisin ew äm róngen asór fäniten ekkewe asóren keek, ika fäniten ekkewe asóren mwöngö ika fäniten ekkewe pwal ekkóch sókkun asór. Ewe chök róngen asór än ewe SAMOL ach we Kot mi üütä mwen imwan we imwenfel mangaku sia tongeni aea fäniten ei popun.”
30Iwe, lupwen ewe souasór Finehas me ekkewe samolun ewe mwiichen aramas, iir ekkewe souemmwenin ekkewe kinikinin lón Israel ra rong ekkeei kapas seni chón ekkewe einangen Reuben, Kad me ewe esóp einangen Manassah, ra menemenöch ren. 31Mwirin, Finehas nöün Eleazar we mwän, ewe souasór, a pölüweni o apasa ngeni chón ekkewe einangen Reuben, Kad me ewe esóp einangen Mannasah, “Ikenäi, sia silei pwe ewe SAMOL a nóm lefiilach, pwokiten ämi öüsap tipis ngeni ewe SAMOL, usun äm aia ekieki. Nge ämi öüwa amanawa ekkewe aramasen Israel seni ar repwe feiengaw ren ewe SAMOL.”
32Mwirin, Finehas nöün Eleazar we mwän, ewe souasór me ekkewe engol samol ra feilló seni chón ekkewe einangen Reuben me Kad lón Kilead o liwinsäfäliló ngeni ewe fönü Kanaan pwe repwe aporausa ngeni ekkewe aramasen Israel meet a fis. 33Iwe, ekkewe chón Israel meinisin ra menemenöch ren ei poraus. Iwe, ra mwareiti Kot o resap chüen kapas usun ar repwe feilló maun ngeni chón ekkewe einangen Reuben me Kad o ataeló ewe fönü ia ra nóm ie.
34Iwe, chón ekkewe einangen Reuben me Kad ra eita ngeni ewe róngen asór, Pisekin Pwärätä, pün ra apasa, “Iei ew pisekin pwärätä lefiilach me iir pwe ewe SAMOL pwal i ach Kot.”
Än Joshua kapasen emwirimwir
23Iwe, a fis pwe a pwongieló fansoun langattam mwirin än ewe SAMOL a fen ngeni chón Israel ar repwe asöösö seni än ekkewe chón opwuter mi nóm ünükküür maun ngeniir. Iei, Joshua a chinlap pün a luuló ierin. 2Iwe, Joshua a köörato ekkewe souemmwen meinisin me ekkewe souakkomw me ekkewe souköpwüng me ekkewe meilapen Israel o a apasa ngeniir: “Iei ngang üwa chinlap pün a luuló ieri. 3Ämi öüwa küna ekkewe mettóch meinisin ewe SAMOL ämi we Kot a föri fänitemi lón fansoun ränin manawei. Ewe SAMOL ämi we Kot a maun fänitemi ngeni ekkewe chón opwuta kemi. 4Öüpwe chechchemeni usun äi üwa fen inetii ngeni kemi pwe fönüwen ämi kewe einang meinisin fönüwen chón ekkewe mwüü mi chüen nóm resap mwo ooló, pwal usun chök fönüwen chókewe sia fen okkufur, seni ewe chaanpwupwu Jordan tori ewe Mataw mi Lapalaap mi nóm lotow. 5Ei fönü epwe fönüwemi, pün pwisin ewe SAMOL ämi we Kot epwe ösüüeló seni mwemi ekkewe aramas meinisin mi nónnóm ikenan iei o cheereló pwe öüsap chüen küneer. Iwe, ämi öüpwe fönüweni fönüwer usun ewe SAMOL ämi we Kot a pwon ngeni kemi.
6Iei minne, öüpwe öpöchökküla kemi! Öüpwe fókkun tümwünüfichi pwe öüpwe älleasochis ngeni ekkewe kapasen öüröür meinisin mi mak lón nöün Moses we pwuken öllük. Öüsap tókkóló seniir lón och föfför. 7Öüpwe föröchüw pwe öüsap chiechi ngeni chón ekkeei mwüü, ekkewe mi chüen nómwetiw leiimi lón ei fönü. Öüsap mwo nge föüni iten ar kewe kot, sisap fen paani ika emön epwe ääniir ökköpöl. Öüsap angang ngeniir, öüsap pwal fel ngeniir. 8Nge öüpwe ölükülük ngeni ewe SAMOL ämi we Kot usun öüwa föri tori ikenäi.
9Pün ewe SAMOL a fen ösüüweló fänitemi chón ekkewe mwüü mi wätte o pöchökkül, nge esap wor mwo emön a tongeni okkufu kemi tori ikenäi. 10Emön me emön leiimi a tongeni an epwe cheeló engöröw chón opwutemi, pün ewe SAMOL ämi we Kot, I ewe a maun fänitemi usun a fen pwon ngeni kemi. 11Iei minne, öüpwe fókkun tümwünüfichi pwe öüpwe echeni ewe SAMOL ämi we Kot.
12Nge are öüpwe kul seni i o pwüpwülü fengen me ekkewe lussun mi chüen manaw me leiin chón ekkeei mwüü mi chüen nóm leiimi, 13mwirin, öüpwe fókkun silei enletin pwe ewe SAMOL ämi we Kot esap chüen ösüüweló chón ekkeei mwüü seni lón fönüwemi ei. Nge iir repwe wiliti ekkóch ssär me ekkóch likottup ngeni kemi. Repwe pwal usun ekkaan wókun wichiwich repwe emeteki sökürümi me ekkóch fölüföl lón mesemi. Iwe, öüpwe rosoló seni ei fönü mi mwirinnö ewe SAMOL ämi we Kot a fen ngeni kemi.
14Nengeni, ikenäi ngang üwa chök arap ngeni äi üpwe mäló o feilló lón ewe aal ia chón fönüfan meinisin ra fefeilló ie. Iwe, ämi öüwa silei lón unusen letipemi me lón unusen ngünümi pwe iteiten ekkewe pwon meinisin än ewe SAMOL ämi we Kot ra pwönüwetä. Esap wor ew me leiir epwe mwäliló. 15Iei minne, iei meet epwe pwal fis. Usun chök än ewe SAMOL ämi we Kot a ngeni kemi ekkewe mettóch mi mwirinnö meinisin i a pwon ngeni kemi, iei usun i epwe pwal awarato feiengaw wóómi are öüpwe älleasolap ngeni. I epwe arosakemiiló seni ei fönü mi mwirinnö i a fen ngeni kemi. 16Lupwen öüpwe atai ewe pwon än ewe SAMOL ämi we Kot ren ämi öüpwe fel o angang ngeni pwal ekkóch kot, an soong epwe keni kemi. Iwe, öüpwe mwittir rosoló seni ewe fönü mi mwirinnö i a fen ngeni kemi.”
Ewe pwon me lón Shekem
24Mwirin, Joshua a emwiichato chón ekkewe einangen Israel meinisin lón Shekem. Iwe, a köörato nöüür kewe souakkomw me souemmwen me souköpwüng me nöüür kewe meilap. Iwe, ra feitto o nóm fän mesen Kot.
2Iwe, Joshua a apasa ngeni ekkewe aramas meinisin, “Iei meet ewe SAMOL ewe Koten Israel a apasa: ‘Ämi kewe leewo, pacholong Terah, semen Abraham me Nahor, ra nóm peekilón ewe chaanpwuupwu Eufreitis me lóómlóóm. Iwe, iir ra fel ngeni pwal ekkóch kot. 3Nge ngang üwa angei Abraham ämi we leewo seni ewe fönü peekilón ewe Chaanpwuupwu o üwa emmwenalong i lón ewe fönü Kanaan. Iwe, ngang fang ngeni i chómmóng mwirimwirin me ren nöün we mwän Isaak. 4Mwirin, ngang üwa ngeni Isaak: Jakob me Esau. Iwe, ngang üwa ngeni Esau ekkewe fönü mi chukuchukutä lón Seir pwe epwe fönüweni, nge Jakob me nöün kewe ra feittiw Egypt.
5‘Mwirin, ngang üwa ökkünööweló Moses me Aaron. Iwe, ngang üwa efeiengawa ekkewe chón Egypt ren ekkewe määlap ngang üwa föri me ikenan. Mwirin, ngang üwa emmwenikemiiwu pwe öüpwe ew mwiichen aramas mi ngas. 6Nge lupwen ämi kewe leewo ra tori ewe Setipar, ekkewe chón Egypt ra tapweriir fän war kewe wóókenin maun me óris. 7Iwe, lupwen ra siö ngeniei ngang ewe SAMOL, ngang üwa anómwu och rochopwaak lefiilemi me ekkewe chón Egypt. Iwe, ngang üwa uweato ewe mataw pwe epwe pwölüweló ekkewe chón Egypt o amalumuur. Iwe, mesemi ra küna meet ngang üwa föri me lón Egypt. Mwirin, ämi öüwa nónnóm lón ewe fönüpöön fansoun langattam.
8Iwe, ngang üwa emmweni kemiilong lón ewe fönü fönüwen ekkewe chón Amor mi nóm öötiwen ewe chaanpwuupwu Jordan. Iwe, ra maun ngeni kemi, nge ngang üwa ewilla kemi pwe öüpwe okkufur o öüwa fönüweni fönüwer. 9Mwirin, Balak nöün Zippor we mwän kingen Moab a üütä o maun ngeni Israel. Iwe, a tiiti Balaam nöün Beor we mwän o köörato pwe epwe önümamawa kemi. 10Nge ngang üsap öüseling ngeni Balaam. Ngang üwa föri pwe Balaam epwe chök sópweló le efeiöchü kemi. Iwe, ngang üwa chimanüw kemi seni Balak.
11‘Lupwen öüwa pwereló epeek ewe channpwuupwu Jordan o öüwa tori Jeriko, ekkewe re Jeriko ra maun ngeni kemi. A pwal wor ekkóch ra maun ngeni kemi, pacholong ekkewe chón Amor, chón Periz, chón Kanaan, chón Hit, chón Kirkash, chón Hiv me chón Jebus. Nge ngang üwa atolonger lepöümi. 12Ngang üwa tiinaló pwiin achi mwemi pwe repwe tapwerawu ekkewe rüwömön king nöün chón Amor. Esap nöümi ketilas ika nöümi esefich ra ewilla kemi. 13Ngang üwa ngeni kemi ew fönü ämi öüsap angang weires fänitan, üwa pwal ngeni kemi telinimw pwe öüpwe nónnóm lóór nge sap ämi öüwa öüüretä, ikkeei ekkewe telinimw ämi öüwa nónnóm lóór iei. Ngang üwa ngeni kemi ekkewe tännipin irän wain me tännipin olif pwe öüpwe mwöngö seni uwaar, inamwo ika sap ämi öüwa fótukiir.
14“Iei minne, iei öüpwe asamolu ewe SAMOL o angang ngeni i ren unusen lelukemi me let. Öüpwe pöütifócheló ekkewe uluulun önümwäl ämi kewe leewo ra fel ngeniir lupwen ra nónnóm peekilón ewe Chaanpwuupwu Eufreitis me Egypt. Öüpwe angang ngeni ewe SAMOL echök! 15Nge are öüsap mochen pwe öüpwe angang ngeni ewe SAMOL, mwirin öüpwe filätä ikenäi iö öüpwe angang ngeni. Öüpwe filätä ika öüpwe angang ngeni ekkewe kot ämi kewe leewo ra angang ngeniir me lón ewe fönü peekilón Eufreitis, ika ekkewe kot än chón Amor minne fönüwer ei öüwa nóm lón iei. Nge ren ngang me chón äi famili, äm aipwe angang ngeni ewe SAMOL.”
16Iwe, ekkewe aramas ra pölüweni o apasa, “Äm aisap fókkun ökkölümwün aipwe likitaló ewe SAMOL o fel ngeni pwal ekkóch kot. 17Pün ewe SAMOL ach we Kot, i ewe emön a chimanüw kich me ach kewe leewo seni lón ewe fönü Egypt, ewe leeni ia ra nöüni kich amanaw ie. I a föri ekkewe manaman mi lapalaap me mwen mesach. Lupwen sia sääifeil lón ewe fönüpöön leiin ekkewe chón opwuta kich, i a tümwünü kich. 18Ewe SAMOL, i ewe a ösüüweló ekkewe chón Amor me chón ekkewe pwal ekkóch mwüü mi nónnóm ikeei lón ewe fönü. Iei minne, pwal kich sipwe angang ngeni ewe SAMOL, pün i chök ach Kot.”
19Mwirin, Joshua a apasa ngeni ekkewe aramas, “Ämi öüsap tongeni angang ngeni ewe SAMOL, pün i emön Kot mi pin me emön Kot mi luukommóng. I esap omwusaló ämi pwuupwungaw me ämi tipis. 20Are öüpwe likitaló ewe SAMOL o angang ngeni pwal ekkóch kot, mwirin, i epwe kul o efeiengawa kemi. Epwe arosakemiiló, inamwo ika i a piin mwirinnö ngeni kemi.”
21Nge ekkewe aramas ra pölüweni Joshua o apasa, “Apwi, pün äm aia fiseetä seni lón letipeem pwe aipwe angang ngeni ewe SAMOL.”
22Iwe, Joshua a apasa ngeni ekkewe aramas, “Pwisin ämi öüwa chón pwärätä fänitemi pwe ämi öüwa filätä pwe öüpwe angang ngeni ewe SAMOL.”
Nge iir ra pölüweni, “Ewer, äm aia chón pwärätä!”
23Iwe, Joshua a apasa, “Mi allim. Iwe, iei öüpwe ataeló ekkewe uluulun önümwäl mi nóm leiimi o kulluw letipemi ngeni ewe SAMOL, ewe Koten Israel.”
24Iwe, ekkewe aramas ra apasa ngeni Joshua, “Äm aipwe angang ngeni ewe SAMOL ach we Kot. Äm aipwe älleasochisi i echök.”
25Iwe, Joshua a föri ew pwon fäniten ekkewe aramas lón ewe ränin me lón Shekem o anómwu fän ar tümwün ew etipeew mi nüküchchar o nónnómofóch lefiiler me ewe SAMOL. 26Mwirin, Joshua a makkei ekkeei mettóch lón nöün Kot we pwuken öllük. Iwe, a angei eföw faaw mi wätte o öüwetä ikenan fän ewe irä ook mi nóm ünükkün än ewe SAMOL we leeni mi pin, pwe ew ächechchemen ar ei etipeew.
27Iwe, Joshua a apasa ngeni ekkewe aramas meinisin, “Nengeni, ei faaw epwe och pisekin pwärätä epwe oturu kich pün a rongorong ekkewe kapas meinisin ewe SAMOL a apasa ngeni kich. Iei minne, ei faaw epwe ew pisekin pwärätä epwe oturu kemi are öüpwe kirikiringaw lón ämi pwon ngeni Kot.”
28Iwe, Joshua a mwüüt ngeni ekkewe aramas pwe repwe feilló, emön me emön ngeni en me pwisin inetin fönü.
Joshua me Eleazar ra mäló
29Iwe, a fis pwe mwirin ekkeei mettóch, Joshua nöün Nun we mwän, nöün ewe SAMOL we chón angang, a mäló lupwen a ipwükü engol ierin. 30Iwe, ra peiaseni i lón pwisin inetin we fönü lón Timnath Serah, mi nóm wón ewe fönü mi chukuchukutä lón Efraim efengin ewe chuuk Kaash.
31Chón Israel ra angang ngeni ewe SAMOL lón fansoun ränin manawen Joshua meinisin, pwal lón fansoun ränin manawen ekkewe souakkomw mi manawattam seni Joshua, iir chókewe mi silei ekkewe föfför meinisin ewe SAMOL a föri fäniten chón Israel.
32Nge ren chüün Josef kewe ekkewe aramasen Israel ra uweiiretä lupwen ra toowu seni Egypt, ra peiaseniir lón Shekem, lón ewe kinikinin fönü Jakob a mööni wón üküükün ipwükü föün mooni silifer seni ekkewe mwän nöün Hamor semen Shekem. Ei fönü a nóm lón ewe kinikinin fönü mi einet ngeni chón ekkewe einangen Efraim me Manassah, ekkewe mwirimwirin Josef.
33Iwe, Eleazar nöün Aaron we mwän a pwal mäló. Iwe, ra peiaseni i lón ewe fönü mi chukuchukutä lón Efraim lón ewe telinimw Kibeah. Iei ewe telinimw ra fen ewiisa ngeni Finehas nöün Eleazar we mwän.