Jonah

Jonah a sü seni ewe SAMOL

1 Iwe, lón ew ränin, ewe SAMOL a kapas ngeni Jonah nöün Amittai we mwän o apasa: 2“Kopwe üütä iei chök o feilló Niniva, ewe telinimw mi wätte, pün ngang üwa rongorong usun ekkewe chómmóng mettóch mi ngaw ekkewe aramas ra föri ikenan. Iwe, kopwe afalafal ngeniir pwe repwe ükütiw le föri ekkewe sókkun mettóch mi ngaw.”

3Nge Jonah a ekieki pwe epwe sü seni fän mesen ewe SAMOL. Ina minne, a feittiw Joppa o küna efóch siip mi mollotä ngeni an epwe sääiló ngeni ew telinimw mi toowaw itan Tarshish. Mwirin än Jonah a püngütiw liwinin fäniten an sääi, a töötä wón ewe siip pwe epwe sääiló ngeni Tarshish pün a mochen sü seni ewe SAMOL.

4Mwirin, ewe SAMOL a tiinato ew äsäpwääl mi fókkun pöchökkül wón ewe mataw. Iwe, arap ngeni chök ewe siip epwe ta ren pöchökkülen ewe mölümöl. 5Ekkewe sääló meinisin ra fókkun nuokkus o emön me emön leiir a iótek ngeni en me an kot. Iwe, ra oturaló lemataw ütenen ewe siip kewe pisek pwe repwe äppäläätä ewe siip.

Nge Jonah a fen töötiw leföön ewe siip ia a kóónótiw ie o a möürüló. 6Iwe, ewe kaptinin ewe siip a küna Jonah o apasa, “Kopwe pwäätä. Pwata ka tongeni möür? Kopwe iótek ngeni óm we kot! Eli óm we kot epwe rongorong óm iótek o amanawa kich pwe sisap feiengaw!”

7Mwirin, ekkewe sääló ra kapas fengen lefiiler o apasa, “Öü etto öüsipwe le esissil pwe sipwe küna ika popun iö ei a fis ngeni kich ei feiengaw. Iwe, lupwen ra esissil, a pwä pwe ewe feiengaw a wareitiir pwokiten Jonah. 8Iwe, ekkewe mwän ra apasa ngeni Jonah, “Kopwe üreni keem ika popun iö ei a tori kich ei feiengaw? Meet ka föri? Meet wiisom? Ia ka feitto me ie? Menni fönü en ka feitto seni? En menni sókkun aramas?”

9Iwe, Jonah a pölüweniir o apasa, “Ngang emön re Hipru. Ngang üwa fel ngeni ewe SAMOL, ewe Koten läng mi föri mataw me fönü.”

10Iwe, ra fókkun nuokkus o ra eisini Jonah, “Pwata ka föri ei sókkun föfför?”(Ekkewe sääló ra silei pwe Jonah a sü seni fän mesen ewe SAMOL pwokiten i a fen üreniir.)

11Ewe äsäpwääl me nóónón ewe mataw ra fókkun pöchökküleló, ina minne ekkewe mwän ra apasa ngeni Jonah, “Meet äm aipwe föri ngenuk pwe ewe mataw epwe lüwaló?”

12Iwe, Jonah a apasa ngeni ekkewe mwän, “Öüpwe ekiiei o oturueiló lemataw pwe ewe mataw epwe lüwaló. Ngang üwa silei pwe ngang üwa föri minne mi mwääl iei popun ewe mölümöl mi wätte a tori kich.”

13Ekkewe mwän resap mochen oturätiw Jonah, nge ra chök achoochomaaw le sótuni ar repwe fötülsäfäl ngeni fönü. Nge resap fókkun tongeni, pün ewe äsäpwääl me nóónón lón ewe mataw ra fókkun pöchökküleló seni me mwan. 14Mwirin, ekkewe mwän ra siö ngeni ewe SAMOL o apasa, “SAMOL, kose mochen kosap mwüüt ngeni keem pwe aipwe mäló ren äm aipwe angei manawen ei mwän. Kosap pwal ngeni keem chappen äm aipwe niieló emön aramas esap wor an tipis, pün äm aia silei pwe en ewe SAMOL, o en ka föri usun minne ka mochen.” 15Mwirin, ra ekii Jonah o oturätiw lemataw seni wón ewe waa. Iwe, ewe mölümöl a ükütiw, pwal ewe mataw mi nóónó a lüwaló. 16Iwe, lupwen ekkewe mwän ra küna meet ei a fis, ra poputä le nuokkus o meniniti ewe SAMOL. Iwe, ra ääni ew asór ngeni ewe SAMOL o ra pwon pwe repwe angang ngeni.

Än Jonah iótek

17Nge lupwen Jonah a turutiw lón ewe mataw, ewe SAMOL a filätä emön iik mi fókkun wätte pwe epwe oromaaló Jonah. Iwe, Jonah a nóm lón upwen ewe iik lón üküükün ülüngät rän me ülüngät pwiin.

Än Jonah iótek

2 Iwe, Jonah a iótek ngeni ewe SAMOL an we Kot seni lón upwen ewe iik. 2A apasa,

“Lón äi riäfföü, ngang üwa kökkööri ewe SAMOL, nge i a pölüweniei. Ngang üwa siö ngenuk äi SAMOL seni lón ewe leenien sootup mi alóllóól pwe kopwe älisiei nge en ka öüseling ngeni äi siö.

3En ka oturueitiw lón ewe mataw. Noum kewe nóó mi pöchökkül ra pwölüweiló. Ngang üwa kokotiw, kokotiw lón ewe mataw mi alóllóól, ewe säät a pwellifeiliei.

4Mwirin, ngang üwa ekieki pwe en ka ösüweiló seni fän mesom. Epwe ifa usun äi üpwe chüen künasäfäli óm we imwenfel mi pin?

5Ewe säät a pwölüweiló o üwa chök arap ngeni äi üpwe mäló. Üwa kokotiw lón ewe mataw mi alóllóól. Iwe, ekkewe fetilin fäilól ra fittieló mökürei.

6Ngang üwa kokotiw tori epilólun ewe mataw; ewe leeni ia ekkewe chuuk ra poputä seni ie. Mereei pwe üwa lókkóló lón ei imwen kalapwuus tori feifeilló chök, nge en ewe SAMOL äi we Kot ka atööeiwu seni lón ewe peias o fangesäfäl ngeniei äi manaw.

7Lupwen manawei a kisikiisiló, ngang üwa chechchemenuk, äi SAMOL. Iwe, äi iótek a toruk lón óm we imwenfel mi pin.

8Chókana mi fel ngeni uluulun önümwäl mi lamwotongaw ra pwisin angei seniir ewe ümöümöch itä repwe tongeni ääni.

9Nge ngang üpwe ääni asór ngenuk fän äi köölün kilisou. Ngang üpwe öpwönüwetä meet ngang üwa ääni pwon. Ngang üpwe apasa, ‘Manaw a chök feitto seni ewe SAMOL.’ ”

10Mwirin, ewe SAMOL a kapas ngeni ewe iik, iwe, ewe iik a mwusäsinätä Jonah wón fönü mi pwasapwas.

Jonah a feilló Niniva

3 Mwirin ewe SAMOL a kapassäfäl ngeni Jonah lón ei oruuwen fansoun o apasa: 2“Kopwe üütä o feilló Niniva, ewe telinimw mi lapalaap, pwe kopwe aronga ngeni chón ewe telinimw ewe poraus ngang üwa ürenuk.”

3Iei minne, Jonah a älleasochisi än ewe SAMOL kapas o a feilló Niniva. Niniva ew telinimw mi fókkun wätte. Emön aramas epwe fätäl seni epeek ei telinimw tori epeek lón üküükün ülüngät rän.

4Lón ewe äewin rän, Jonah a feilló lukalapen ewe telinimw o poputä le kapas ngeni ekkewe aramas. A kökkö o aronga ngeni ekkewe aramas ei poraus: “Mwirin fääik rän, Niniva epwe kullutä fan.” 5Iwe, ekkewe chón Niniva ra lükü Kot. Iir ra arongafeili pwe aramas meinisin, seni ekkewe aramas tekia tori ekkewe aramas kis, repwe öchüün o üföüf üüf mi för seni tuuk pwe repwe pwärätä pwe ra liamaam.

6Iwe, lupwen ewe kingen Niniva a rong ei poraus, a feilló seni an we leenien móótun king, a pwilitawu üfan üfen king, a üföüf üüf mi för seni tuuk o móttiw lón falangen ekkei. 7Mwirin, ewe king me nöün kewe nöüwiis ra atoowu ew kapasen esilesil ngeni chón Niniva meinisin mi apasa:

“Ei öllük a katoowu seni ewe king me nöün kewe nöüwiis:

Esap mwüümwütä ngeni emön aramas ika maan, pwiin kowu ika pwiin siip pwe repwe neni och mettóch; esap mwüümwüta ngeniir ar repwe mwöngö ika wün lón ew fansoun mi mwochomwooch. 8Nge ekkewe aramas tori maan meinisin repwe pwölüreló ngeni üüf mi för seni tuuk. Ekkewe aramas repwe osommóng le kechiw ngeni Kot. Repwe kul seni ar kewe föfför mi ngaw o ükütiw seni ar kewe föfförün mwänesol. 9Iö a tongeni silei are Kot epwe tipemecheres le siwili an ekiek o lón an luukpweteete epwe kul seni an soong mi fókkun wätte, pwe sisap määfeiengaw.”

10Iwe, lupwen Kot a küna meet ra föri me usun ar ra kul seni ar kewe föfför mi ngaw, i a luukpweteete ngeniir o esap awarato wóór ewe feiengaw i a apasa pwe epwe föri ngeniir.

Än Jonah soong me än ewe SAMOL ömöümöch

4 Nge Jonah a fókkun letipengaw pwe Kot a amanawa ewe telinimw. Iwe, a fókkun soong. 2Iwe, a lal lón an iótek ngeni ewe SAMOL o apasa, “Äi SAMOL, ifa usun, esap iei meet ngang üwa apasa lupwen üwa chüen nóm lón leeniei? Iei popun ngang üwa mwittir ekiekin süüló Tarshish, pün ngang mi silei pwe en emön Kot mi ümöümöch o luukpweteete, ka pwal songomang o ääni tong mi lapalaap. Pwal en emön Kot mi tipemecheres le likitaló ekiekin óm kopwe tiinato feiengaw. 3Iei minne, äi SAMOL ngang üwa tungór ngenuk pwe kopwe angealó manawei, pün epwe fen mwirinnö äi üpwe mäló lap seni äi üpwe manaw.”

4Nge ewe SAMOL a pölüweni o eisini Jonah, “Ifa usun, mi pwüng óm kopwe soong?”

5Iwe, Jonah a toowu seni ewe telinimw o feilló ngeni peliöötiwan. A öüüwetä fänitan ew likachooch ikenan o a móót fän nürün. Iwe, a witiwit pwe epwe küna meet epwe fis ngeni ewe telinimw. 6Mwirin, ewe SAMOL Kot a awora efóch irä o föri pwe epwe mwittir määritä o önnürü Jonah. Ei a förätä ew leeni mi patapat fäniten Jonah pwe epwe móót fän o angasaló i seni an kinamwengaw. Iwe, Jonah a fókkun pwapwa ren ewe irä. 7Nge ünimweiränin ewe rän mwirin, Kot a tiinato emön muun pwe epwe eni popun ewe irä. Ina minne, ewe irä a äiolol o pwaseló. 8Iwe, lupwen ewe akkar a töötä, Kot a tiinato och äsäpwääl mi pwichikkar seni öötiw. Iwe, ewe akkar a tineiti wón möküren Jonah; ina minne, i a fókkun eiengaw ren pwichikkaran. Iwe, a äneänei an epwe mäló o apasa, “Epwe mwirinö ngeniei äi üpwe mäló lap seni äi üpwe manaw.”

9Nge Kot a eisini Jonah, “Ifa usun, mi pwüng óm kopwe soong ren ewe irä?”

Iwe, Jonah a pölüweni o apasa, “Mi pwüng äi üpwe soong, inamwo ika üpwe mäló ren äi soong.”

10Nge ewe SAMOL a apasa, “En ka tongei ewe irä, inamwo ika en kosap tümwünü ika föri och pwe epwe määritä. Ewe irä a pwisin määritä lón ew pwinin, nge pwal lón ew pwinin, a mäló. 11Ifa usun, ngang üsap tongei Niniva, ewe telinimw mi lapalaap, ia a wor ie lap seni ipwükü rüwe ngöröw aramas resap silei sakkofesenin lefiilen pöüifichiir seni pöüiimöngüür - iwe a pwal wor chómmóng maan lón?”