James

James a kapwong ngeni chón ekkewe engol me ruu einangen Israel

1Ei taropwe seniei ngang James, ngang emön nöün Kot me ewe Samol Jesus Kraist amanaw. Ngang üwa mak ngeni kemi ämi chón ekkewe engol me ruu einang mi toropasfeil leemelen ekkewe mwüü. Äi kapwong ngeni kemi!

2Ämi pwii kana, lupwen öüpwe püngülong lón sókopaaten sóssótun riäfföü, öüpwe föri pwe epwe ew fansoun fich ämi öüpwe pwapwa. 3Pün öüwa silei seni nónnómwumi pwe lupwen ämi lükü a tolong lón sóssót, a efisätä pwe ämi tipeppós epwe määritä. 4Iwe, öüpwe mwüüt ngeni tipeppós epwe määritä, pün lupwen ämi tipeppós epwe unusen pwönüwetä, öüpwe tongeni mwokos lón manawemi o unusöch, nge öüsap osun och. 5Nge are emön me leiimi a osun tipächchem, are a mochen silei meet Kot a mochen pwe i epwe föri, epwe tungór ngeni Kot. Iwe, Kot epwe pwapwa le fang ngeni i, pün Kot a fangafangöch ngeni meinisin, nge esap opwut än emön tungór ngeni. 6Nge lupwen emön epwe tungór ngeni Kot, epwe tungór lón lükü pwe Kot epwe pölüweni, nge esap tipemwaramwar, pün emön mi tipemwaramwar a wewe ngeni nóón lemataw äsäpwääl a chök pööni o oturufeili. 7Ena sókkun aramas esap ekieki pwe epwe angei och seni ewe Samol, 8pwokiten i emön aramas mi tiperuu, a wiliwilikkis lón an föfför meinisin.

Usun chón wöwingaw me chón pisekisek

9Emön pwiipwi chón lükü mi nóm lón nónnómwun tekisónen an wöwingaw epwe pwapwa pwe i mi öüchchea meren Kot. 10Nge emön chón lükü mi pisekisek epwe pwapwa lupwen a fis ngeni mettóch mi ngaw pwe a etekisónätiw, pün an pisekisek esap eppeti seni an epwe mwittir mworoló usun ekkewe pöön irän lón mälämäl. 11Pün ewe akkar a töötä fiti enienin äsäpwääl mi pwichkkar o appwasaló ewe irä. Iwe, pöön irään a mworotiw o lapalapöchün lingan a kiteteriló. Ina usun ewe aramas mi pisekisek epwe pwal móróló fiti fengen me an kewe angang meinisin.

Tongei Kot lupwen sóssótun riäfföü

12Kot a efeiöchüw emön aramas mi engngiló fän riäfföün an sóssót, pün mwirin an a leteló pwüngün pwe i emön mi ölükülük; iwe, epwe angei ewe mwärin manaw, Kot a pwon ngeni chókana mi tongei I.

13Esap wor emön epwe apasa lupwen a tolong lón sóssót mi ngaw: “Ngang üwa küna sóssót meren Kot.” Pün Kot esap tongeni an epwe tupwuló pwe epwe föri och mi ingaw, esap pwal paanalong emön lón sóssót pwe epwe föri och mi ngaw. 14Nge emön me emön aramas a tolong lón sóssót ren pwisin an mocheniä lupwen an mocheniä a paani i o otupwaló. 15Mwirin, lupwen an mocheniä a usun chök nge a pwoopwo pün a fisiló lón föfför, iwe, a nöünätiw tipis. Nge lupwen tipis a unusen pwönüetä; iwe, a awarato mäló.

16Öüsap tupwuló, ämi pwii kana mi ächengicheng. 17Iteiten liffang mi mwirinnö me iteiten liffang mi unusöch ra feittiw seni läng, ra feittiw seni ewe Semen saram, pün I chón föri ekkewe saramen läng meinisin. I ewe esap wiliwilikkis ika wor nürün lupwen a kkul. 18Lón an kirekiröch, I a fili kich seni pwisin mochenin letipan pwe sipwe wiliti nöün, ren an fang ngeni kich an we kapas mi let. Iwe, kich sia wiliti och sókkun mwenuwa me leiin förian kana.

Ekkewe sókósók mi lamwot lón fansoun sóssótun riäfföü

19Ämi pwii kana mi ächengicheng, iei meet mi öch ämi öüpwe silei: Aramas meinisin repwe mwittir ngeni ar repwe rong, nge mang ngeni ar repwe kapas, pwal mang ngeni ar repwe soong, 20pün än aramas soong esap efisätä ach sipwe manaweni ewe manawen pwüng Kot a mochen. 21Iei minne, öüpwe pöütaló sókkun limengaw me föfföringaw meinisin seni lón manawemi, nge fän tipetekisón, öüpwe etiwa ewe kapas Kot a fótukätiw lón letipemi, pün a pöchökkül an epwe tongeni amanawa ngünümi.

22Nge öüpwe achoocho le pwisin älletätä pwüngün pwe ämi chón älleasochisi ewe kapas, nge öüsap chök chón öüseling ngeni. Pün are öüsap älleasochisi ewe kapas, iwe, öüwa chök pwisin otupwukemi. 23Pün are emön a chök chón rongorong ewe kapas, nge esap chón älleasochis ngeni, i a wewe ngeni emön aramas a eneen le oori lapalapen wón mesan lón ew kilaas nge esap föri och an epwe aöchchüweló wón mesan. 24A oori wón mesan o feilló, nge a mwittir möllükaló ifa usun lapalapen wón mesan. 25Are emön a tichchik le nennelong lón än Kot we öllük mi unusöch, ewe öllük mi angasa aramas seni lón föötekin tipis, nge are a föri meet ewe öllük a apasa o esap möllükaló meet i a rong, mwirin, Kot epwe efeiöchchüw ei aramas, pün i esap emön chón rong mi möllükaló rongean pwe i emön chón föri pwüngün minne i a rong.

26Are emön me leiimi a apasa pwe i emön mi silei lamalam, nge esap nemeni chöönmwöngön, i a otupwü pwisin manawan, pwal an lamalam a lamwotongaw. 27A iei usun än emön lamalam mi limöch o esap wor limengawan me mwen mesen ewe Kot Saam: a tümwünü ekkewe mi määsen me ekkewe fefin mi mä pwülüwer lón ar riäfföü o a pwisin tümwünü manawan seni limengawen ei fönüfan.

Sipwe äfalli kich ren ewe manawen lifilifil aramas

2 Ämi pwii kana, öüsap lifilifil aramas ren ämi öüpwe saani ekkóch aramas lap seni pwal ekkóch, pün ämi chón lükü ach we Samol Jesus Kraist, ewe Samolun ling. 2Pün are emön mwän mi nöünöü ring kolt me üföüf üüf mi ling a wareto lón ämi mwich, nge emön mwän mi wöwingaw a pwal wareto fän üfan mi limengaw, 3nge ämi öüwa chök äfälli ewe mwän mi üföüf üüf mi mwirinnö o apasa ngeni i: “Kopwe móót ikeei lón ei leeni mi mwirinnö”, nge öüwa üreni ewe mwän mi wöwingaw: “Kopwe chök üütä ikenan,” ika “Kopwe chök móót órun pachapahei,” 4iwe, ifa usun, ämi asókkafeseni lefiilen ekkeei rüwömön aramas esap pwääraló pwe ämi mi lifilifil aramas pwisin lefiilemi fengen o wiliti souköpwüng fän ämi ekiek mi ngaw?

5Iwe, öüpwe öüseling ngeniei ämi pwii kana mi ächengicheng. Ifa usun, Kot esap fen fili ekkewe mi wöwingaw me lón ei fönüfan pwe repwe wöw lón ar lükü? Ifa usun, esap iir ekkewe repwe chón älemwirini ewe mwüü I a pwon ngeni chókana mi tongei I? 6Nge ämi öüwa fen fölüw letipen ewe aramas mi wöüingaw. Ifa usun, sap ekkewe mi pisekisek ekkewe ra eriäfföwü kemi o etekinikemiiló lón köpwüng? 7Ifa usun, sap iir ekkewe ra kapasen turunufasei le eitengawa Jesus Kraist, I ewe itan mi suuföl a föw wóómi?

8Ämi öüwa wesewesen föri minne a mwirinnö are öüwa älleasochisi ewe asalapen öllük mi mak lón ewe taropwe mi pin: “Kopwe tongei chón órum usun óm pwisin tongek.”a 9Nge are öüwa apaap me lifilifil aramas, öüwa föri ew tipis, pün öüwa pwurätiw ei öllük. 10Pün ese lifilifil ika iö a öpwönüetä unusen ekkewe öllük, nge a pwuurätiw ew chök; ätewe a tipis usun chök emön aramas mi pwuurätiw än Kot kewe öllük meinisin. 11Pün I ewe mi apasa: “Kosap lisowu”, a pwal apasa: “Kosap niieló aramas.” Iwe, ika mwo kosap tipisin lisowu nge ka niieló aramas, ka wiliti emön chón pwurätiw öllük.b

12Iei minne, iteiten fansoun lupwen öüpwe kapas ika ese lifilifil meet öüpwe föri, öüpwe chechchemeni pwe ämi öüpwe köpwüng alóngólóng wón ewe öllükün tong, iei ewe öllük mi angasa kemi. 13Pün Kot esap ääni kirekiröch lupwen epwe öpwüngü emön aramas esap sile kirekiröch ngeni pwal ekkóch. Nge Kot epwe pwääri an ümöümöch ngeni emön aramas lupwen a öpwüngü i are ewe aramas mi pwal ääni kirekiröch ngeni ekkóch.

Lukü esap fiti föfför iei ew lükü mi mä

14Äm pwii kana, epwe meet lamwoten än emön aramas epwe apasa pwe a wor an lükü nge esap älelleta an lükü ren an föfför? Ifa usun, ena sókkun lükü epwe tongeni amanawa i? 15Epwe ifa ika emön pwiich ika fefinach chón lükü a feitto reemi lón an osupwangen üfan ika osupwangen anan mwöngö iteiten rän, 16nge emön me leiimi a apasa ngeni: “Kot epwe fituk, kole kan feilló lón kinamwe. Kot epwe tümwünuk pwe epwe wor üfom óm kopwe pwichikkar me anom mwöngö óm kopwe möt,” nge esap ngeni ewe aramas ekkewe mettóch a osupwangan fäniten mi öüchchea ngeni inisin. Iwe, meet lamwoten ei sókkun kapas? 17Iwe, ina chök pwal usun ren lükü, pün lükü esap naaf are i chök wón an. Are lükü esap pwääló lón föfför mi mwirinnö; iwe, ew lükü mi mä o lamwotongaw.

18Nge ina emön epwe äniinitä o apasa: “Ën a wor óm lükü, nge ngang a wor äi föfför mi mwirinnö.” Iwe, ngang üpwe pölüweni o apasa: “Ngang üsap tongeni küna óm lükü are esap wor óm föfför mi mwirinnö, nge ngang üpwe pwääri ngenuk äi lükü ren äi föfför mi mwirinnö.” 19En ka lükü pwe mi wor emön chök Kot? Mi mwirinnö. Ekkewe mwo ngüün mi ngaw nge ra lükü pwe mi wor emön chök Kot o ra chechchech ren ar nuokkus!

20En emön aramas mi umwes! Ifa usun, ka mochen kopwe silei älelletan pwe lükü ese fiti föfför ew lükü esap wor lamwotan? 21Ifa usun, esap iei älelletan pwe Kot a öpwüngaló pwe ach we leewo Abraham a emön chón pwüng, pwokiten meet i a föri lupwen a ääni asór Isaak nöün we wón ewe rongen asór? 22Ka küna, Abraham a fókkun lükü Kot, iei popun i a mochen föri meet Kot a üreni pwe epwe föri. Iwe, an lükü a pwääló unusöchün ren meet i a föri. An lükü a pwääló ren an föfför. 23Iwe, a fis pwe a pwönüetä pwüngün minne ewe taropwe mi pin a apasa: “Abraham a lükü Kot; iei popun Kot a öpwüngaló pwe i emön chón pwüng.” Pokiten ei, Abraham a iteni pwe i chiechien Kot.a 24Iwe, öüwa küna pwe emön aramas a wiliti emön chón pwüng meren Kot ren meet a föri, nge sap ren an lükü echök.

25Pwal iei chök usun ren Rahab, ewe fefin mi ääni amöömö inisin. Neminnei a wiliti emön chón pwüng meren Kot ren an föfför, lupwen i aopaló ekkewe chón künö o tiiniireló fän kinamwe wón pwal efóch aal.b 26Pün usun chök ewe inis a mäló ika ewe ngüün esap nóm lón, pwal iei chök usun lükü a mäló are esap fiti föfför mi mwirinnö.

Ewe chöönmwöngö esap tongeni epwe fesir

3 Ämi pwii kana, öüsap mwüüt ngeni pwe epwe chómmóng me leiimi repwe chón esikuula än Kot kapas, pün öüwa silei pwe öükich ekkewe mi ääni ei angang epwe koon lapaló tichchikin ach köpwüng meren Kot. 2Pün kich meinisin sia föri chómmóng mettóch mi mwääl. Are emön esap mwälliló lón minne i a apasa; iwe, i emön aramas mi unusöch manawan, a pwal tongeni pwisin nemeni unusen inisin.

3Pwüngün pwe sia tongeni enlifechi unusen inisin emön óris mi wätte o föri pwe epwe feilló ia sia mochen epwe feilló ie, lupwen sia uwalong ewe mächä mi kükkün lón awan. 4Sipwe nengeni pwal ekkewe siip, pün are mwo ra fókkun wätte o ra su ren an äsäpwääl mi pöchökkül a enienitiir, nge ra tongeni lifechiló ngeni ese lifilifil ia ewe kaptin a mochen, ren chök efóch kasi mi fókkun kükkün. 5Iei usun pwal ren ewe chöönmwóngö, pün a chök och kükkün kifet me won inisich, nge a fókkun tunosikesik wón mettóch mi lapalaap. A fókkun wätte feiengaw ewe chöönmwöngö a tongeni föri. Öüpwe nengeni pwe och chök kükkün möröküükün ekkei, nge a tongeni kenaló ew wöllap mi wätte. 6Ewe chöönmwöngö pwal iei och ekkei mi nget. A uren föfföringaw mi tongeni ataeló unusen manawen emön aramas. Ewe chöönmwöngö a nóm leiin kifetin inisich kewe, ina pwata a tongeni elimengawa unusen ewe inis. A tongeni kulluw unusen manawen emön aramas o atolonga lón ngetengeten ekkein feiengaw, pün a kü ren ewe ekkei seni hell.

7Aramas ra tongeni efesira sókkun maan fätäl me maan süüsü me ekkewe maan mi tö wón upweer me ekkewe mönün leset. 8Nge esap wor emön aramas a tongeni an epwe efesira ewe chöönmwöngö. Ewe chöönmwöngö och mettóch mi ingaw esap tongeni póssetiw, a uren poison sia tongeni mäló ren.

9Ekkóch fansoun sia aea ewe chöönmwöngö le mwareiti ach Samol me Samach, nge fän ekkóch sia pwal aea le otteki aramas, iir ekkewe mi för lón lapalapen Kot. 10Seni lón ew chök aaw, ra toowu ppök kapasen mwaar me ottek. Ämi pwii kana, esap pwüng ei sókkun lapalap. 11Ifa usun, mi tongeni an epwe pwuupwu seni lón ew chök pwangen pwuachen kólik, kólikin wun mi fat me kólik mi maras? 12Ämi pwii kana, epwe tüfich än efóch irä fiik epwe uwääni uwään ewe irä olif, ika ewe irän wain epwe uwääni uwään ewe irä fiik? Apwi. Iwe pwal ina chök usun, pün esap wor ew pwuachen kólik epwe pwuu ppökuwu säät me kólik seni.

Tipächchem mi feitto seni läng me tipächchem mi feitto seni ngüün mi ngaw

13Iö me leiimi a miriit o wewe? Iwe, ren an manawöch epwe pwääraló an kana föfför mi mwirinnö fän mósónósónen tipächchem. 14Nge are a wor lólówón killen letip me apangawen tipemmóng lón letipemi; iwe, esap wor popun ämi öüpwe tunosikesik usun pwe öüwa tipächchem. Pün ämi tunosikesik iei ew chofona a üüngeni minne a let. 15Ei sókkun tipächchem esap feittiw seni Kot lón läng, nge i a feitto seni fönüfan, seni tipen fituk, a pesepes seni ngüün mi ingaw. 16Pün ia a wor ie lólówó me apangawen tipemmóng, a pwal wor kókkótóngaw me iteieten sókkun föfför mi ingaw.

17Nge ewe tipächchem mi feittiw seni läng, akkomwan, a limöch. Iwe, a pwal efich kinamwe, a pweteete me tipemecheres fansoun meinisin o mochen aea ngeni ekkóch. A uren kirekiröch me föfför mwirinnö. Esap apaap, nge a wenechchar. 18Chókana mi efisätä kinamwe ra fótukätiw ewe pwikilin kinamwe. Iwe, repwe kinii ewe uwään manawen pwüng.

Lamalamtekian manawen fönüfan a efisätä fitikooko

4 Meet a popuw äniini me fiffiu lefiilemi? Ifa usun, resap pop seni ämi mocheniäiti pwapwan fönüfan ra likefiu fengen me lón kifetin inisimi kana? 2Öüwa mochen meet esap wor reemi, nge öüsap tori. Iei popun, öüa rawangaw o ninni aramas pwe öüpwe angei meet öüwa mochen. Öüwa lólówóiti meet mi wor ren ekkóch, nge öüsap tongeni ääni. Iei popun öüwa fiffiu o äkkänini pwe öüpwe angei seniir. Nge popun öüsap ääni meet öüwa mochen, pwokiten öüsap tungór ngeni Kot fänitan. 3Nge ika mwo öüwa tungór, nge öüsap angei minne öüwa tungór, pwokiten a mwääl ekiekin letipemi, pün öüwa chök mochen öüpwe aea fäniten pwapwan fitukemi.

4Ämi aramas mi wewe ngeni ekkana chón lisowu pün öüsap ölükülük ngeni Kot. Ifa usun, öüsap silei pwe chiechi ngeni ei fönüfan a wewe ngeni koum ngeni Kot? Iei minne, iö a filätä pwe epwe chiechi ngeni fönüfan, a pwisin föri pwe i emön chón koum ngeni Kot. 5Met öüwa ekieki, esap wor popun än ekkewe taropwe mi pin ra apasa pwe ewe ngüün mi nóm lóóch mi chök tipeni an epwe lólówó? 6Nge Kot a fang ngeni kich an ümöümöch mi lapalaap pwe sipwe tongeni pöchökkül le üüngeni ekkeei sókkun mochen mi ngaw. Iei popun ewe taropwe mi pin a apasa:

“Kot a üüngeni chón lamalamtekia, nge a fang an ümöümöch ngeni chón tipetekisón.”a

7Iei minne, öüpwe anómwu kemi fän än Kot nemenem. Öüpwe üüngeni ewe devil, ewe souotuttur; pwe i epwe sü seni kemi. 8Öüpwe arap ngeni Kot; pwe Kot epwe arap ngeni kemi. Öüpwe limeti pöümi ämi chón tipis kana; öüpwe elimöchchüw lelukemi ämi ekkana mi tipe-ruu. 9Öüpwe letipeta o ngüüngüres o kechiw fäniten ekkewe mettóch mi ngaw öüwa föri. Öüpwe ekkesiwili ämi takir ngeni kechiw, pwal ämi pwapwa ngeni letipechchow. 10Öüpwe pwisin etekisónakemi me mwen mesen ewe Samol; pwe I epwe etekiakemiitä.

Emön mi tipetekisón esap öpwüngü pwiin

11Ämi pwii kana, öüsap apasa och mi ngaw usun emön me emön leiimi. Ewe emön mi apasa och mi ngaw usun pwiin ika öpwüngü pwiin, i a apasa och mi ngaw usun ewe öllük me öpwüngü ewe öllük. Nge are kopwe öpwüngü ewe öllük; iwe, kosap chüen en emön chón föri pwüngün ewe öllük, nge i ka emön souköpwüng mi tongeni filätä are ewe öllük a pwüng ika mwääl. Nge wiisom chök pwe kopwe älleasochisi ewe öllük. 12Mi wor emön chök chón föri öllük me souköpwüng. I chök a tongeni amanawa me kitereló aramas. Nge en iö pwe kopwe öpwüngü chón órum?

Emön mi tipetekisón esap tunosikesik wón meet epwe föri lesor

13Öüpwe öüseling, ämi ekkana aramas mi apasa: “Ikenäi ika lesor sipwe feilló ngeni enan me enan telinimw. Iwe, sipwe nónnóm ikenan ew ier pwe sipwe föri ach angangen pisnis le kamö me amöömö o förätä ach wiil.” 14Nge öüsap silei meet lesor epwe uweato. Pün meet manawemi? Manawemi a usun chök och likapwór, a pwä lón ekis chök fansoun, nge mwirin a móróló. 15Nge epwe fen iei usun meet öüpwe apasa: “Are fän letipen ewe Samol, iwe, sipwe manaw o föri ei ika enan.” 16Nge iei ämi öüwa fen tunosikesik lón ämi lamalamtekia usun ämi akkóót. Sókkun tunosikesik meinisin a ngaw. 17Iei popun, öüpwe chechchemeni pwe iö mi silei pwe epwe föri och mettóch mi pwüng, nge esap föri, ngeni ei aramas, iei tipis.

Kana chón pisekisek mi eriäfföwü aramas repwe köpwüng

5 Öüpwe öüseling ämi kana aramas mi pisekisek. Öüpwe leüommóng le kechiw o pwupwuchöör pün ämi riäffów repwe le feittiw wóómi. 2Wöümi kana repwe kirouló, nge pwötür repwe äni üfemi kana mi mwirinnö. 3Nöümi kolt me silfer repwe paarangaló, nge paaranger repwe chón pwärätä mi ettipisi kemi o repwe ocheei fitukemi usun ekkei. Ämi öüwa ochukuchukätä ämi kewe pisek öüchchea lón ekkewe ränin sópwólón. 4Öüpwe öüseling! Öüpwe rongorong kechiwen ekkewe chón angang mi otoot lón ämi kewe tännipi öüwa ömwöchü seniir liwiniir. Ewe liiwin ämi öüsap ngeniir iei ra kökkö o ettipisi kemi. Än ekkewe chón kinikin uwa siö a tori selingen ewe Samol mi Unusen Manaman. 5Ämi öüwa manaw wón fönüfan lón manawen pwapwan fituk me manawen fangesöröw. Öüwa pwisin fóóleni o ekitinnupwu kemi fäniten ewe ränin ninni. 6Öüwa ettipisi o niieló ekkewe aramas mi pwüng, esap wor ar tüfich pwe repwe pwisin peniiretä le pölüweni kemi.

Sipwe likiitü o engngiló

7Iei minne, ämi pwii kana, öüpwe mósónóttam le witiwit tori än ewe Samol epwe war. Öüpwe nengeni usun än ewe chón atake a mósónóttam le witiwit fäniten ewe uwa mi öüchchea epwe kinii seni an pwül. A witiwiti ewe üüten mesemwan lupwen fansoun fóffót me ewe üüten mwirin me mwen ewe fansoun kinikin. 8Iei usun pwal ämi öüpwe likiitü le mósónóttam. Öüpwe önüküchchara lelukemi pün a arap wareton ewe Samol. 9Ämi pwii kana, öüsap pwenifengeni kemi lefiilemi, pwe Kot ete öpwüngü kemi. Pün nengeni, ewe Souköpwüng a war. Ina i mi üütä órun ewe asam!

10Ämi pwii kana, öüpwe ääni leenien appirü ekkewe soufós ren ar mósónóttam lón riäfföü, iir ekkewe soufós ra kapas lón iten ewe Samol. 11Mi pwüng ach sipwe awora suufölün chókana mi engngiló fän riäfföü. Äwewe chök ren Job i emön mwän mi engngiló le mósónóttam. Seni meet a fis ngeni, sia küna usun än ewe Samol akkóót a sópwólong lón mwirinnö. Pün ewe Samol a fókkun luukpwetete o kirekiröch.

12Nge lapalón seni meinisin, ämi pwii kana, öüsap ökköpöl. Öüsap ääni ökköpöl läng ika fönüfan ika ääni ökköpöl pwal och sókkun mettóch. Nge ämi “Ewer” epwe chök “Ewer” pwal ämi “Apw” epwe chök “Apw”, pwe öüte tipis o tolong köpwüng fänitan.

13Mi wor emön me leiimi a riäfföü? Iwe, i epwe iótek usun. Mi wor emön mi pwapwa? Iwe, i epwe köölün mwareiti ewe Samol. 14Mi wor emön mi samwaw me leiimi? Iwe, i epwe köörato ekkewe souakkomwen mwichefel pwe repwe iótek wón o epiti i ngeni lömmis lón iten ewe Samol. 15Iwe, ar iótek ra ääni lón ar lükü epwe angasa ewe emön mi samwaw. Iwe, ewe Samol epwe echikarätä i. Nge are mi pwüng pwe i a föri tipis; ewe Samol epwe omwusaló an tipis. 16Iei minne, öüpwe pwärätä ämi kana tipis, emön ngeni emön, o iótek fäniten emön me emön, pwe öüpwe chikaretä. Än emön aramas mi manaweni manawen pwüng iótek a tongeni efisätä mettóch mi lapalaap.

17Elijah emön aramas pwal usuch chök, nge lupwen a tilikken le iótek pwe esap püng üüt, iwe, esap püng üüt wón ewe fönü lón ükükün ülüngät ier me wonu maram. 18Mwirin a pwal iótek säfäl fäniten üüt; iwe, üüt a püngütiw seni läng. Iwe, fetil ra pwükütä nge irän lón tännipi ra pwal poputä le uwasäfäl.

Okullusäfäli ewe mi tókkóló

19Ämi pwii kana, are emön me leiimi a tókkóló seni ewe let, nge emön a eliwinisäfäli ena aramas, 20iwe, iei meet i epwe chechchemeni: iö a eliwinisäfäli emön chón tipis seni an tókkóló, i epwe amanawa ngünün ewe chón tipis seni mäló o föri pwe chómmóng tipis repwe mwusoló.