Hosea

1 Ikkeei ekkewe poraus ewe SAMOL a esile ngeni Hosea nöün Berri we mwän lón mwüün Uzziah, Jotham, Ahaz me Hezekiah ekkewe kingen Judah, pwal lón mwüün Jeroboam nöün Jehoash we mwän ewe kingen Israel:

Pwülüwen Hosea me nöün kewe

2Lupwen ewe SAMOL a popuetä le kapas ngeni ekkewe chón Israel meren Hosea, ewe SAMOL a apasa ngeni Hosea, “Kopwe feilló o angei emön fiin lisowu pwe pwülüwom, pwe epwe wor ekkóch me leiin noum repwe upwun leroch, pün chón ei fönü ra tipisin lisowu ren ar likitieiló ngang ewe SAMOL.” 3Iei popun Hosea a feilló o angei Komer nöün Diblaim we fefin pwe pwülüwan. Iwe, neminnewe a pwoopwo me wón Hosea o nöüni emön äät.

4Mwirin, ewe SAMOL a apasa ngeni Hosea, “Kopwe eita ngeni ewe äät, Jezreel, pwokiten epwe ekiseló chök nge ngang üpwe le öpwüngü chón leimwen Jehu pwe chappen an össükü chaan aramas me lón Jezreel. Iwe, üpwe öükätiw ewe mwüün Israel. 5Lón ena fansoun, ngang üpwe kupii nöün Israel we esefich me lón ewe leemólun Jezreel.”

6Iwe, Komer a pwal pwoopwo säfäl o a nöüni emön nengngin. Mwirin, ewe SAMOL a apasa ngeni Hosea, “Kopwe eita ngeni ewe nengngin, Lo-Ruhamah (wewen “Ese wor Tongan”) pün ngang üsap chüen pwääri äi tong ngeni ekkewe aramasen Israel, ngang üsap pwal omwusaló ar kewe tipis. 7Nge ngang üpwe pwääri äi tong ngeni ekkewe aramasen Judah; iwe, pwisin ngang üpwe amanawer, sap ren esefich ika ren ketilas ika ren maun ika ren óris ika ren chón waawa óris, nge i ngang ewe SAMOL ar we Kot, üpwe amanawer.”

8Iwe, mwirin än Komer a mwüüti Lo-Ruhamah seni oup, a pwal pwoopwo o nöüni pwal emön äät. 9Mwirin, ewe SAMOL a apasa, “Kopwe eita ngeni ewe äät, Lo-Ammi (wewen, “Sap nei Aramas”) pün ämi chón Israel, öüsap chüen neii aramas, nge ngang üsap chüen ämi Kot.

10Nge epwe war ewe fansoun lupwen Israel epwe feffeitä o wiliti ew mwüü mi lapalaap. Lón ena fansoun, ekkewe chón Israel repwe wewe ngeni föün pien arosset ren chómmóngur, resap tongeni öüküük ika lea. Mwirin, lón chök ewe leeni ia chón Israel ra rong me ie ekkewe kapas pwe “sap ämi neii aramas”, Kot epwe üreniir pwe, “ämi nöün ewe Kot mi manaw.” 11Mwirin, ekkewe aramasen Judah me ekkewe aramasen Israel repwe chufengen säfäl; iwe, iir repwe filätä fäniter emön chök nöüür chón emmwen. Iwe, repwe feittä seni ewe fönü, pün ewe ränin Jezreel epwe ew rän mi fókkun lapalaap.

2 Iwe, lón ena fansoun, öüpwe apasa ngeni pwiimi kewe, ‘Neii aramas’, öüpwe pwal apasa ngeni fefinemi kewe, Ruhamah - ‘Neii mi ächengicheng.’

Chón Israel ra köpwüng me asööfösäfäl

2“Öüpwe öpwüngü inemi we, öüpwe öpwüngü, pün sap i pwülüwei, nge ngang sap pwülüwan. Öüpwe üreni pwe epwe öükätiw seni wón mesan wóówón emön fiin lisowu, epwe pwal öükätiw an föfförün lisowu seni lefiilen oupwun.

3Pün ika esap ükütiw, ngang üpwe äselelói o föri pwe epwe seleló usun chök lón ewe rän i a upwutiw; ngang üpwe föri pwe neminnewe epwe wewe ngeni ew fönüpöön o föri pwe epwe wewe ngeni ew fönü mi pwasapwas. Iwe, üpwe niieló i ren kaaka.

4Ngang üsap pwal tongei nöün kana, pwokiten iir nöün emön fiis lisowu.

5Ineer we a kirikiringaw, o a nöüniir lón föfför mi ässääw. I a apasa, “Ngang üpwe kütta neii kewe kämmwet mi ngeniei enei mwöngö me ünümei kólik, ra pwal ngeniei äi ünen maan me mangaku mi pwechepwech, äi apüra mi för seni föün olif me ünümei wain.”

6Iei minne ngang üpwe eppetaló alan ren iräfölüföl; ngang üpwe tiieló pwe esap tongeni küna alan.

7Neminnewe epwe tapweei nöün kewe kämmwet nge esap toriir; epwe kütteer, nge esap küneer. Mwirin, epwe apasa, “Ngang üpwe liwinsäfäl ngeni pwülüwei we akkomw, pün ngang üwa feiöch me ikewe lap seni iei.”

8Neminnewe esap mochen esilla le pwärätä pwe ngang ätewe mi ngeni i föün wiit, wain mi fö me apüra mi för seni föün olif, pwal ngang ewe üwa fang ngeni i chómmóng silifer me kolt. Nge i a aea ewe silifer me kolt le fel ngeni ewe önü Baal.

9“Iei minne, ngang üpwe angei säfäli äi kewe föün wiit lupwen ra maaw, pwal äi kewe wain mi fö lupwen ra mollotä, ngang üwa fangafangöch le awora iteiten fansoun rääs. Ngang üpwe pwal angei säfäli seni neminnewe äi ünen maan me äi mangaku mi pwechepwech ngang üwa ngeni pwe epwe pwölüw ngeni an seleló.

10Iei usun ngang üpwe äselelói neminnewe me fän mesen nöün kewe kämmwet, nge esap wor emön epwe tongeni chimanüw seni lepeii.

11Ngang üpwe öükätiw an kewe fansoun apwaapwa meinisin, an kewe chuulapen iteiten ier, an kewe chuulapen popun maram, an kewe ränin Sabbat - an kewe chuulap meinisin mi kefilitä.

12Ngang üpwe ataeló än neminnewe kewe irän wain me an kewe irä fiik i a apasa pwe ikkeei liwinin meren nöün kewe kämmwet; ngang üpwe föri pwe an kewe tännipi repwe wiliti ew wöllap. Iwe, ekkewe maanmwacho repwe arosaló le eni uwaar.

13Ngang üpwe öpwüngü neminnewe fäniten ekkewe rän i a likitieiló lupwen a keni appach mi pwokkus lóór ngeni ekkewe uluulun ewe önü Baal; pwal fäniten an foutei ngeni ekkana ring me sókkopaaten fout mi ling o feilló kütta nöün kewe kämmwet, nge a möllükieiló,” ewe SAMOL a osomänetiw.

14“Iei minne, nengeni, ngang üpwe paani neminnewe, ngang üpwe emmwenaló i lón ewe fönüpöön o kapas pweteete ngeni i.

15Ngang üpwe ngeni säfäli neminnewe an kewe tännipin irän wain me ikenan o föri pwe ewe leemólun Akor epwe wiliti ew asamen apilüköch. Neminnewe epwe kööl me ikenan usun chök me leföpwülün we, usun chök lón ewe fansoun lupwen a toowu seni ewe fönü Egypt.

16“Iwe, lón ena rän,” ewe SAMOL a osomänetiw, “en kopwe kööri ngeniei ‘pwülüei’; nge kosap chüen kööri ngeniei ‘äi samol.’

17Pün ngang üpwe angealó iten ekkewe önü Baal seni wón tinnawen neminnewe; pwe i esap chüen föüni iteer.

18Lón ena fansoun, ngang üpwe ääni ew pwon ngeni ekkewe maanmwachon lemal me ekkewe machchangen fän läng, pwal ekkewe maantöötö, pwe resap efeiengawa neii aramas. Ngang üpwe öükätiw seni lón ewe fönü an esap chüen wor maun. Ngang üpwe ataatakisi ekkewe esefich me ketilas, pün aramas meinisin repwe kóón lón kinamwe.

19Ngang üpwe püngütiw ewe kiis o angeiuk pwe en pwülüwei tori feilfeilló chök; ngang üpwe pwülüwenuk lón pwüng me wenechchar, lón tong me kirekiröch.

20Ngang üpwe pwülüwenuk lón ölükülük, nge en kopwe esillä le pwärätä pwe ngang ewe SAMOL.

21“Lón ena fansoun ngang üpwe pöppölü,” ewe SAMOL a osomänetiw - “ngang üpwe pölüweni än ekkewe kuchun läng tungór nge iir repwe pölüweni än ewe pwül tungór;

22iwe, ewe pwül epwe pölüweni än ekkewe irän wiit, irän wain me irä fiik tungór, iwe, iir repwe pölüweni än Jezreel tungór.

23Ngang üpwe fótukätiw neminnewe fän pwisin itei lón ewe fönü; ngang üpwe pwääri äi tong ngeni ewe emön ngang üwa kööri ngeni pwe ‘esap wor tongan merei’. Ngang üpwe apasa ngeni chókewe üwa kööri ngeniir ‘Sap ämi neii aramas’; o üpwe apasa ngeniir ‘Ämi neii aramas’.

Mwirin, iir repwe pölüweni o apasa, ‘En äm Kot!’ ”

Hosea a möönsäfäli pwülüwan we

3 Iwe, ewe SAMOL a apasa ngeniei, “Kopwe feilló o pwääri säfäli óm tong ngeni pwülüwom we, inamwo ika i a pwal nöüni kämmwet emön mwän o i a emön fiin lisowu. Kopwe tongei neminnewe usun chök ngang ewe SAMOL üwa tongei ekkewe chón Israel, inamwo ika ra kul ngeni pwal ekkóch kot o efich ar repwe ääni asór ngeniir nokop mi för seni föün irän wain mi appwas.”

2Iei minne, ngang üwa möönisäfäl neminnewe wón üküükün engol me limuw shekel silifera me ina epwe üküükün ew homer me ew lethekb parli. 3Mwirin, ngang üwa üreni neminnewe, “En kopwe nóm reei lón imwei lón fansoun langattam o kopwe ükütiw seni óm ääni föfförün emön fiin lisowu. Lón ena fansoun, en kosap lisowu ngeni emön mwän, iwe epwe pwal ina chök usun föfföri ngenuk.”

4Pün epwe iei usun än chón Israel repwe nónnóm lón fansoun langattam nge esap wor ar king ika nöüür samol, resap ääni asór, esap pwal wor ar kewe üür mi pin, esap wor reer ewe üüf itan efod ika ekkewe uluulun önüün leimw. 5Mwirin, ekkewe chón Israel repwe liwinsäfäl o kütta ewe SAMOL ar we Kot me David ar we king. Iir repwe feitto ren ewe SAMOL fän chechcheech o repwe angei an kewe liffang mi mwirinnö lón ewe fansoun sópwólón.

Än ewe SAMOL kapasen ettipisi Israel

4 Ämi chón Israel, öüpwe rongorong än ewe SAMOL kapas, pün iei än ewe SAMOL kapasen ettipisi kemi ämi ekkewe mi nóm lón ewe fönü: “Esap wor wenewen, esap wor tong, esap pwal wor föfförün esillä Kot me lón ewe fönü.

2Nge a chök wor óttek, kapas chofona me niimanaw, soolä me föfförün lisowu; aramas ra föri föfförün mwänesol ekis meinisin, pwal angangen össükü chcha a chök fis ew mwirin ew.

3Iei minne, ewe fönü a ngüüngüres pün esap wor uwaan, nge meinisin mi nónnóm lón ewe fönü ra samwaw o mäló; ekkewe mwo maan, machchang me iik nge ra poputä le morukóló.

4“Esap wor aramas epwe tipi ngeni emön, esap pwal wor emön epwe ettipisi pwal emön. Pün nöümi kewe aramas ra usun chök chókewe mi äniini ngeni emön souasór.

5Ren liwinin ämi kewe föfför mi ngaw, öüpwe chepetek lerän usun chök ämi chepetek lepwin, pwal ina chök usun ren nöümi kewe soufós chofona pün iir repwe fiti kemi le chepetek. Iwe, ngang üpwe niieló inemi we Israel -

6neii kewe aramas ra feiengaw pwokiten esap wor ar sileei. “Pwokiten öüwa opwut ämi öüpwe sileei, ngang üpwe pwal opwut ämi pwe öüpwe neii souasór; pwokiten öüwa möllükaló ewe öllük än ämi we Kot, ngang üpwe pwal möllükaló äi üpwe efeiöchüw nöümi kewe.

7Ekkewe souasór ra fen chómmóngóló iwe, ar tipis ngeniei a fen pwal chómmóngóló; iir ra ekkesiwili ar we Ling ngeni och mettóch mi uren ässäw.

8Ekkewe souasór ra mötüló ren ar ocheei fituken ekkewe mönün asóren tipis lupwen neii kewe aramas ra tipis o uweato reer ar kewe mönün asór. Iei minne ekkewe souasór ra pwapwa lupwen ekkewe aramas ra tipis.

9Iwe, epwe iei usun meet epwe fis: Minne a fis ngeni ekkewe aramas, pwal ina chök usun minne epwe pwal fis ngeni ekkewe souasór. Ngang üpwe öpwüngü pöküür o ngeni pökküür liwinin ar kewe föfför mi ngaw.

10“Iir repwe mwöngö, nge resap möt; repwe amöömö inisiir fäniten angangen lisowu, nge resap chómmóngóló, pwokiten iir ra likitieiló ngang ewe SAMOL, nge iir ra öüchcheani

11föfförün lisowu; pwal wain minen lóóm me wain mi fö mi angealó än neii kewe aramas miriit.

12Neii kewe aramas ra angei öüröürer seni esóp sópwun mwüüch uluulun önümwäl, nge wókuur wókun sourong a esile ngeniir minne ra mochen, pün emön ngünün amöömö inis ren angangen lisowu a atókereló; iwe, ra föri föfförün emön fiin lisowu o tókkóló seniei ngang ar we Kot.

13Ra ääni asór wón ungen ekkewe chuuk o keni appach mi pwokkus wón ekkewe chukutekisón, fän ewe irä ook, pwal fän ewe irä poplar me ewe irä terebinth, pün a mwirinnö fän nürüür. Iei minne nöümi kewe föpwül ra ääni amöömö inisiir ren angangen lisowu, nge pwülüwen nöümi kewe mwän ra föri tipisin lisowu.

14“Ngang üsap öpwüngü nöümi kewe föpwül lupwen ra ääni amöömö inisiir ren angangen lisowu, üsap pwal öpwüngü pwülüwen nöümi kewe mwän lupwen ra föri tipisin lisowu, pwokiten pwisin ekkewe mwän ra emwinemwin fengen me ekkewe fiin lisowu o ra fiti chókewe mi ääni amöömö inisiir ren angangen lisowu lón imwenfel le asór. Ina minne ekkewe aramas esap wor ar miriit repwe feiengaw.

15“Inamwo ika ämi chón Israel öüwa föri tipisin lisowu, nge amwo ämi chón Judah öüsap föri ei tipis. Ämi chón Judah, öüsap feilló ngeni Kilkal; öüsap pwal feittä Beth Aven pwe öüpwe chiechi ngeni chókana mi kefisitä le fel ngeniei. Öüsap pwal ääni ei ökköpöl: ‘Mwo manawen ewe SAMOL!’

16Ekkewe chón Israel ra üleförea usun emön liälifföön kowu mi üleförea. Iwe, epwe ifa usun än ewe SAMOL epwe tongeni amwöngöniir fetil usun ekkóch appanen siip lón ew maasies?

17Efraim a chuungeni ekkewe uluulun önümwäl; öüpwe chök likitaló.

18Lupwen mwo ar ra wes le pulaas nge ra chök sópweló ar ääni amöömö inisiir ren angangen lisowu; nöüür kewe samol mi wewe ngeni ar pisekin eppet lón maun ra fókkun efich ekkewe sókkun föfför mi uren ässääw.

19Ew ewiniär epwe ässiireló o repwe sääw pwokiten ar kewe asór ngeni ekkewe uluulun önümwäl.

Mwäälin ekkewe souemmwenin Israel

5 “Öüpwe rong ämi ekkewe souasór, öüpwe öüseling, ämi chón Israel, öüpwe öüüw selingemi ämi ekkewe chón leimwen king! Pün ewe köpwüng epwe weneiti kemi; pwokiten ämi öüwa emmwenalong neii kewe aramas lón ew likottup me lón Mizpah me ew cheew mi meresiló me wón ewe chuuk Tabor pwe repwe fel ngeni uluulun önümwäl.

2Öüwa tuuw ew pwaang mi alóllóól fäniten neii kewe aramas me lón Shittim. Nge öüpwe chechchemeni pwe ngang üpwe öpwüngü kemi ren meet öüwa föri.

3Ngang üwa silei meinisin usun nónnómwumi ämi chón Efraim; än chón Israel föfför esap mwónoló seniei. Ämi chón Efraim öüwa tókkóló seniei usun emön fefin mi amöömö inisin fäniten lisowu a likitaló pwülüwan; ämi chón Israel öüwa unusen limengaw.

4“Ämi kewe föfför mi ngaw ra eppeti kemi ämi öüpwe kulsäfäl ngeni ämi we Kot. Pün ewe ngünün kirikiringaw mi usun ewe angangen amöömö inis fäniten lisowu a nóm lón letipemi; ina minne öüsap tongeni silei ewe SAMOL.”

5Än chón Israel lamalamtekia a pwisin säpeitiir o üüngeniir; iei minne chón Israel me Efraim repwe chepetek o turuló lón ar tipis; pwal chón Judah repwe fitiir le chepetek.

6Mwirin, repwe feitto fän nöüür pwiin siip me kowu pwe repwe ääni asór ngeni ewe SAMOL, nge resap küna; pün a pwisin amwona i seniir.

7Iir ra kirikiringaw ngeni ewe SAMOL; iir ra nöünöütiw nöüür upwun leroch. Ar kewe chuulap ra föri iteiten maram repwe pwisin säpeitiir o efeiengawer me fönüwer.

8“Öüpwe ettiki ewe rappwa me lón Kibeah, öüpwe pwal opuuw ewe pisekin likettik mi för seni mächän maan me lón Ramah. Öüpwe arükak me lón Beth Aven. Ämi chón ewe einangen Benjamin öüpwe mweii kich le feilló maun.

9Efraim epwe taaló lón ewe ränin öpwüng. Ngang üwa esilefeili leiin ekkewe einangen Israel usun ewe feiengaw epwe fókkun fis ngeniir.

10Ekkewe souemmwenin Judah ra wewe ngeni chókewe mi ömwökütaló ekkewe föün kiään fänü. Iei minne ngang üpwe niinätiw wór äi lingeringer usun chök och kólik mi pwuupwu.

11Efraim a riäfföü o pachaach lón köpwüng, pwokiten a tipeew ngeni an epwe fiti än aramas öüröür ngeni.

12Iei minne ngang üwa usun wuul ngeni Efraim, üwa pwal usun nóót ngeni ekkewe aramasen Judah.

13“Iwe, lupwen Efraim a küna an samwaw o Judah a küna kinasan, mwirin Efraim a kul ngeni Assyria o tiitiló ren ewe king mi lap pwe epwe älisi. Nge i esap tongeni echikarer ika amóieló kinaser kewe.

14Pün ngang üpwe usun emön laion ngeni Efraim, üpwe pwal usun emön liälifföön laion ngeni Judah. Ngang, fókkun ngang üpwe ataatakisiir o likitireló; ngang üpwe uweiireló, nge esap wor emön epwe tongeni chimanür.

15Mwirin, ngang üpwe feilló o liwinsäfäl ngeni leeniei tori repwe fangatäni pwe iir ra tipis o repwe küttaei pwe üpwe älisiir. Pün lupwen repwe nóm lón ar riäfföü, repwe fókkun achoocho le küttaei.”

Israel esap ekieksäfäl

6 Iwe, ekkewe aramas repwe apasa, “Öü etto, öüsipwe liwinsäfäl ngeni ewe SAMOL. I a ataatakisi kich, nge i epwe pwal echikarasäfäli kich; i a ekinasa kich, nge i epwe pwal finiti kinasach kana.

2I epwe amanawa kich mwirin ruu rän, i epwe öüütäkich lón ewe öülüngätin rän, pwe sipwe nóm fän mesan.

3Ina minne öüsipwe silei ewe SAMOL; öüsipwe achoocho ngeni ach sipwe silei i. Usun chök enletin än ewe mmal a tö iteiten lesossor, iei usun i epwe fókkun pwä ngeni kich. I epwe wareiti kich usun chök püngün üüt, usun ekkewe üten leres mi achöchchönü fönüfan.”

4Iwe, ewe SAMOL a eiis, “Meet ngang üpwe tongeni föri ngenuk en Efraim? Meet ngang üpwe tongeni föri ngenuk en Judah? Pün ämi tong a usun chök ew kuchun lesossor, a usun chök ewe omwurenipwin a mwittir móróló lesossorusich.

5Iei minne, ngang üwa tiinato neii kewe soufós pwe repwe ataatakisi kemi, ngang üwa nii kemi ren kapasen awei. Äi pwüng a akkomw mwemi usun saram.

6Pün ngang üwa pwapwaiti ämi öüpwe ääni tong enlet lap seni asór. Ngang üwa mochen pwe ämi neii aramas öüpwe sileei pün ina meet a öüchchea lap seni ämi asóren keek.

7Nge ämi öüwa usun chök Adam pün öüwa pwuurätiw ämi pwon; ämi öüwa kirikiringaw ngeniei me ikenan.

8Kiliead ew telinimwen aramas mi föfföringaw, a chök wor lemóómón chcha lerasen ipweer.

9Usun chök ewe mwiichen chón maun äserengaw mi küüt liäper ra operi emön aramas, iei usun ekkewe souasór; iir ra nii aramas me wón ewe aal mi ale ngeni Shekem o föri föfför mi uren ässääw.

10Ngang üwa küna och mettóch mi fókkun enniopwut me lón Israel; Efraim a föri föfförün lisowu, Israel a pwisin elimengawa ren an tapweló mwirin pwal ekkóch kot.

11“Pwal en Judah, ew fansoun kinikin uwa fäniten köpwüng a chök awitiwit fänitom. “Iteiten fansoun ngang üwa fókkun mochen pwe üpwe eliwinisäfälito feiöchün neii kewe aramas,

7 iteiten fansoun ngang üwa mochen üpwe echikarasäfäli Israel, nge än Efraim kewe tipis ra särifitä pwal än Samaria föfförün tipis ra pwääló. Pün iir ra föri föfförün otupwutup lefiileer, iir chón soolä ra ataelong imw, iir ew mwiichen chón soolä ra angei seni aramas pisekir fän pöchökkül me lón ekkewe aal;

2nge iir resap meefi pwe ngang üwa chechchemeni ar kewe föfför mi ngaw meinisin. Ar kewe tipis ra pwellieló unukküür; ra nóm fän mesei iteiten fansoun.

3“Iir ra apwaapwai ewe king ren ar kewe föfför mi ngaw, ra pwal apwaapwai ekkewe samol ren ar kapas chofona.

4Iir meinisin chón föri föfförün lisowu, ra pwichipwichitä ren ar mocheisow. Ra wewe ngeni ew uumw mi chök ekkepwichipwich lupwen ewe chón umw a chüen chök ökköüwa ewe pilawa.

5Lón ewe ränin kametip än ach we king, ekkewe samol ra sakaweló. Ewe king a föri föfför mi ässääw o chiechi ngeni ekkewe chón apaatäi le wün sakaw.

6Leluken ekkewe chón apaatä ra wewe ngeni ew uumw mi mollotä o kü; lupwen ra föri ar raaw pwe repwe niieló ewe king. Ar we raaw a küümochooch lón unusen ewe pwiin; nge lesossor a ngetetä usun ew ekkei mi ngetenget.

7Iir meinisin ra pwichikkar usun ew uumw; ra niieló nöüür kewe sounemenem. Ar kewe king meinisin ra ninniiló, emön mwirin emön, nge esap wor emön me leiir epwe siö ngeniei pwe üpwe älillis.

8“Chón Efraim ra eileil fengen me chón ekkewe mwüü; resap nuokkusiti Kot o ra appirüw ar kewe föfför mi ngaw. Iwe, iei chón Efraim ra lamwotongaw usun echö nokop esap wilik.

9Ar fel ngeni ekkewe koten ekis a angei seniir ar pöchökkül, nge resap meefi. Israel a wewe ngeni emön chinlap mwän, meeten möküran ra tikepwechepwech ren mooi, nge esap äpereni pwe i a apwangapwang o chinlap.

10Än chón Israel lamalamtekia a pwisin säpe ngeniir, nge iir resap liwinsäfäl ngeni ewe SAMOL ar we Kot, resap pwal kütta i lupwen ekkewe mettóch ra fis ngeniir.

11“Chón Efraim ra wewe ngeni emön mwurö, ra tupwukkäi o esap pwal wor ar miriit. Ra siö ngeni Egypt, nge mwirin ra pwal feilló ngeni Assyria.

12Nge lupwen repwe feilló, ngang üpwe loutaló äi we cheew wóór; ngang üpwe efiiretiw usun ekkewe machchang mi äkkääs lón äsäpwääl. Ngang üpwe öpwüngüür fäniten ar kewe föfföringaw meinisin.

13Feiengawer, pwokiten ra tókkóló seniei. Taatakis epwe fis ngeniir pwokiten iir ra üüngeniei! Ngang üwa mochen angasereló, nge iir ra chök ääni kapas chofona usi.

14Iwe, iir resap siö ngeniei seni lón leluker, nge ra chök ngüüngüres wón ar kana peet. Ra mwiich fengen o pwisin ekinaser lupwen ra tungór ngeni ekkewe koten ekis fäniten eneer föün wiit me ünümer wain, nge ra kul seniei.

15Ngang üwa öüröüreer o öpöchöküleer, nge iir ra chök rawangaw ngeniei.

16Ra nennefeil ekis meinisin, nge resap kul ngeniei ngang ewe mi Unusen Tekia; iir ra wewe ngeni efóch esefich mi pwór a chök rikiseni minne emön a äwena ngeni. Nöüür kewe souemmwen repwe mäló ren nöün ekkewe chón opwuter ketilas pwokiten kapasen chönnawer a lamalamtekia ngeniei. Ren ei, iir repwe küna turunufas me lón ewe fönü Egypt.

Israel epwe kinii chappen an föfför

8 “Kopwe ettiki ewe rappwa! Ewe chón opwut epwe feitto usun emön ikel pwe epwe efeiengawa neii kewe aramas ngang ewe SAMOL, pwokiten ra atai äi we pwon o üüngeni äi we öllük.

2Mwirin, chón Israel repwe siö ngeniei o apasa, ‘En äm Kot, äm aia sileek!’

3Nge chón Israel ra pöütaló meet mi mwirinnö, iei minne emön chón opwut epwe tapwerir.

4Iir ra filätä ar kewe king, nge resap angei ar mwüümwütä seniei; iir ra filätä nöüür kewe samol, nge esap köpwüngüló merei. Iir ra föri ekkewe uluulun önümwäl seni ar kewe silifer me kolt. Ren ei, ra pwisin awarato ar feiengaw.

5Ämi chón Samaria, ämi we uluulun liälifföön kowu a pwongaw. Äi soong a ngeteiti ekkewe chón Israel mi fel ngeni uluulun önümwäl. Ineet repwe ükütiw le fel ngeni ekkewe uluulun önümwäl?

6Pün pwal ewe angangen fel ngeni ewe uluulun liälliföön kowu a pop seni Israel. Emön souangang a föri ewe uluulun önümwäl, iei minne esap fókkun i Kot. Enlet, ewe uluulun liälliföön kowu lón Samaria epwe taatakis.

7“Iir ra pisenätiw äsäpwääl, iei minne repwe kinii ewiniär. Esap wor etin ekkewe irän wiit; iei minne esap wor pilawa mi amas. Nge are epwe fen wor uwaan; iwe, chón ekis repwe eni.

8Usun chök nge emön a oromaló ekkewe chón Israel; iei minne iir ra nóm leiin chón ekkewe mwüü, ra usun ew pöör mi mmök esap wor emön a efich.

9Pün chón Israel ra üleförea usun emön aas mi mwacho. Iir ra feilló Assyria pwe repwe kütta ar älillis. Chón Efraim ra eileil ngeni ekkóch mwüü usun chök emön fefin mi amöömöló inisin ngeni nöün kana kämwet.

10Inamwo are chón Israel ra mööni eileer kana me leiin ekkewe mwüü, nge iei ngang üpwe ochufengeni ekkewe mwüü pwe repwe üüngeniir. Iwe, ewe king me ekkewe samol repwe meefi ar riäfföü ren choun ewe takises.

11“Inamwo are chón Efraim ra senätä chómmóng róngen asór pwe repwe ääni asóren omwusomwusen tipis wóór, nge ekkeei róngen asór ra fen wiliti leenien tipis ngeniir.

12Ngang üwa ngeniir äi kewe öllük meinisin, nge iir ra ekieki pwe äi öllük esap weneiti manawer.

13Iir ra uweato ar kewe asór ngeniei o ocheei fituken ewe mönün asór, nge ngang ewe SAMOL üsap pwapwaitiir. Iwe, ngang üpwe chechchemeni ar kewe föfför mi ngaw o öpwüngüür ren ar kewe tipis; iir repwe liwinsäfäl ngeni Egypt.

14Chón Israel ra öüüwetä ekkewe imwen king mi wätte; pwal chón Judah ra öpöchökküla tittin ar kewe telinimw mi chómmóng, nge ra möllükaló ewe Chón Föriir. Iei minne, ngang üpwe tiinato ew ekkei wón ar kewe telinimw, pwe epwe kenaló ar kewe imwen king me ar kewe telinimw mi pöchökkül tittiir.”

Köpwüng fäniten Israel

9 Ämi chón Israel öüsap pwapwa; öüsap meseik usun chón ekkewe ekkóch mwüü. Pün ämi öüwa kirikiringaw ngeni ämi we Kot; ämi öüwa likitaló i usun emön mi pwüpwülü a kirikiringaw ngeni pwülüwan. Ämi öüwa wewe ngeni emön fefin mi amöömö inisin ren ämi ääni asór ngeni pwal ekkóch kot me lón iteiten ekkewe leenien wichiwich umwun wiit.

2Iwe, iei epwe war ewe fansoun pwe esap chüen wor mwöngö epwe feitto seni ekkewe leenien wichiwich umwun wiit me ekkewe leenien üchüüch föün olif fäniten ekkewe aramas; esap pwal chüen wor ewe wain mi fö fäniter.

3Öüsap chüen nónnóm ikeei lón fönüwen ewe SAMOL we; öüpwe ooló lón Egypt me Assyria, ia öüpwe mwöngö me ie ekkana sókkun mwöngö mi nóm lón tettelin limengaw.

4Me ikenan, toowaw seni leeniemi, esap tongeni mwüümwütä ngeni kemi ämi öüpwe ääni asóren wün wain ngeni ewe SAMOL. Esap wor ew me leiin ekkewe asór öüpwe ääni me ikenan epwe tongeni apwaapwai i. Ekkana sókkun asór repwe limengaw usun chök och mwöngö a limengaw ren än emön chón letipeta a attapa; meinisin mi ääni ekkeei sókkun asór repwe limengaw. Ra tongeni eni ei mwöngö pwisin fäniter chök; nge resap tongeni uwalong lón ewe imwenfel pwe repwe ääni asór ngeni ewe SAMOL.

5Meet öüpwe föri lón ewe ränin chuulap mi kefilitä? Meet öüpwe föri lón ewe ränin kametip me fän mesen ewe SAMOL?

6Pün nengeni, ika mwo öüpwe tiwewu seni ewe feiengaw mi feitto seni Assyria, nge öüpwe ooló ren Egypt. Chómmóng me leiimi repwe mäló o peias lón Memfis. Fetilingaw repwe määritä lón ämi kewe leenien iseis silifer, nge iräfölüföl repwe pwükütä lón imwemi kewe.

7Ra arapeto ekkewe ränin än Israel epwe köpwüng, ra arapeto ekkewe ränin angei chappen föfför. Chón Israel repwe silei usun ei lupwen epwe fis. Pwokiten ämi kewe tipis ra koon chómmóng me ämi koum a fókkun wätte, iei minne öüwa ekieki pwe ewe soufós a emön mi tiparoch, nge ewe emön mi mwöküt fän emmwenien ewe Ngünün Kot a emön mi umwes.

8Ewe soufós i ewe chón mammasa Efraim fäniten äi we Kot. Nge eseichin machchang ra nóm wón an kewe aal meinisin, i a pwal küna kopwut me lón imwen an we Kot.

9Ekkewe mettóch neii kewe aramas ra föri ra fókkun ngaw usun meet ra föri me lón Kibeah melóóm. Iei minne, Kot epwe chechchemeni ar kewe föfför mi ngaw o öpwüngür ren ar kewe tipis.

10Ewe SAMOL a apasa, “Lupwen ngang üwa küna Israel me lóóm, a usun chök nge üwa künökün föün irän wain me lón ewe fönüpöön; lupwen ngang üwa küna ämi kewe leewo, a usun chök nge üwa küna ekkewe mwen üwään ewe irä fiik. Nge lupwen ra tori Baal Peor, ra pöütieiló. Iir ra pwisin epiniireló ngeni ewe uluulun önümwäl mi uren ässääw o ra wiliti och minen enniopwut usun chök ewe kot iir ra fel ngeni.

11Än Efraim ling epwe ässiló usun emön machchang. Pün nöümi repwe mäló chök me lupwen ar upwutiw ika mäló me lón ewe leenien mönükól ika resap fen pwal fis lupwen fansoun kolu.

12Ika mwo epwe wor nöümi mi manaw repwe määritä, ngang üpwe angeiir seni kemi. Epwe ew fansoun efeiengaw mi wätte lupwen ngang üpwe kul seni kemi o likitikemiiló!

13Ngang üwa küna Efraim pwe a fót lón ew maasies mi mwirinnö usun Tayer. Nge Efraim epwe emmwenawu nöün kana ren ewe chón ninni.”

14Äi SAMOL, meet ngang üpwe tungór pwe kopwe föri ngeni noum kewe aramas? Ngang üpwe tungór pwe kopwe ngeni ekkewe fefin ar leenien mönükól epwe turuló masowan me oup mi pwasapwas.

15Ewe SAMOL a apasa, “Pwokiten ar kewe föfföringaw meinisin iir ra poputä me lón Kilkal, iei minne ngang üwa poputä le opwut iir me ikenan. Ngang üpwe ösüüreló seni lón imwei pwokiten ar kewe föfför mi ngaw. Ngang üsap chüen tonger; pwokiten nöüür kewe souemmwen meinisin ra üüngeniei.

16Chón Efraim ra wewe ngeni irä, waareer ra pwaseló, ina minne esap wor mwirimwirir; ika mwo repwe nöünöü, ngang üpwe chök niieló nöüür kewe ra echeniir.”

17Äi Kot epwe pöütaló ekkewe aramasen Israel, pwokiten resap öüseling ika älleasochis ngeni i; iwe, repwe chón siamwüfeil leiin chón ekkewe mwüü.

Ewe SAMOL epwe öpwüngü Israel

10Israel a fókkun pisekisek, a wewe ngeni efóch irän wain mi fókkun chómmóng uwaan; nge a chök soolapmwääl pün a awora uwaan pwisin chök fänitan. Lupwen ekkewe aramas ra pisekisekiló, ra pwal alapaló le fangaló wöwür wón ekkewe róngen asór fäniten ar kewe koten ekis. Lupwen a chómmóngóló minne ra kinii seni resin fönüwer, a pwal lapaló lingen ar kewe üür mi pin me uluulun önümwäl iir ra fel ngeniir.

2Leluken ekkewe aramas a uren otupwutup. Iwe, iei repwe mwärelong fän chappen ar tipis.

3Mwirin, iir repwe apasa, “Esap wor ach king, pwokiten sisap meniniti ewe SAMOL. Nge ika mwo epwe wor emön ach king; meet i epwe tongeni föri fänitach?”

4Iir ra chök ääni kapas mi pöön o ökköpöl mwäl le föri ar pwonen etipeew. Iei minne, köpwüng ra pwükütä usun fetil mi poison ra pwükütä me lón tännipin emön chón atake.

5Ekkewe chón Samaria repwe nuokkus pwokiten ewe uluulun liälifföön kowu mi nóm lón Beth Aven. Iir repwe letipeta pwokitan. Pwal ekkewe souasór mi angang ngeni ewe uluulun önümwäl, iir chókewe mi pwapwaiti lingan, repwe kechiweiti, pün a ooló seniir.

6Iir repwe uwealó ewe uluulun önümwäl ngeni Assyria pwe ew takises ngeni ewe King Jareb. Efraim epwe itengaw, Israel epwe sääw ren an kewe uluulun önümwäl mi för seni irä.

7Samaria me an we king repwe maanüló usun efóch kükkün palen irä a maanütiw lón ew pwuupwun kólik.

8Ekkewe leenien fel wón ekkewe leeni mi tekia mi nóm lón Aven, ewe ia chón Israel ra tipis me ie, repwe taaló. Iräfölüföl me fetilingaw repwe määritä o pwölüweló ar kewe róngen asór. Mwirin, ekkewe aramas repwe apasa ngeni ekkewe chukutekia, “Öüpwe pwölükeemiló.” Repwe pwal üreni ekkewe chukutekisón, “Öüpwe turutiw wóóm.”

9“Ämi chón Israel öüwa chök sópweló le tipis ngeniei seni ewe fansoun öüwa tipis me lón Kibeah. Ifa usun, maun esap tori ekkewe chón föfföringaw me lón Kibeah?

10Ngang üpwe öpwüngü kemi, ineet chök fansoun ngang üwa mochen; iwe, chón ekkewe mwüü repwe chufengen o maun ngeni kemi, pün repwe öpwüngü kemi ren ämi kewe tipis mi chómmóng.

11Iwe, Efraim a wewe ngeni emön liälifföön kowu mi sipeöch le angang, a fókkun efich an epwe föri ewe angangen wichiwich umwun wiit; nge iei üpwe uwätä efóch öüwafar wón üwan we mi chök chüen pweteete. Ngang üpwe föri pwe Efraim epwe lukii ewe pisekin ttu pwül, Judah epwe ttuw ewe pwül, nge Jakob epwe asóssónöchüw ewe pwül.

12Öüpwe pisenätiw ewe föün pwüng fänitemi, pwe öüpwe kinii ewe uwa tong enlet. Öüpwe tuuw ämi pwül esap mwo ttu me mwan; pün a tori fansoun ämi öüpwe kütta ewe SAMOL tori i epwe war o öpüngätiw pwüng wóómi.

13Nge ämi öüwa fótukätiw föfföringaw; iwe, öüwa kinii föfför ingaw o eni üwään ämi otupwutup. Pwokiten öüwa anómwu ämi apilükülük wón pwisin ämi pöchökkül me wón nöümi sounfiu mi chómmóng,

14iei minne, maun epwe tori nöümi aramas, nge ämi kewe imwen maun mi pöchökkül meinisin repwe taaló. Epwe usun ewe fansoun Shalman a ataeló Beth Arbel lón ewe fansoun maun, lupwen i a ataatakisietiw ekkewe inelap fiti fengen me nöüür kewe.

15Iei usun meet epwe fis ngeni kemi ämi chón Bethel, pwokiten ämi föfför mi ngaw a fókkun lapalaap. Lupwen ena fansoun köpwüng epwe pwönüwetä, ewe kingen Israel epwe unusen feiengaw.

Än ewe SAMOL echeni Israel

11“Lupwen Israel a emön chök semiriit, ngang üwa tongei usun chök emön neii. I neii we mwän ngang üwa köörawu seni Egypt.

2Nge lupwen ngang üwa fen alapaló äi kööri chón Israel, nge iir ra fen atoowawereló le feilló seniei. Iir ra ääni asór ngeni ekkewe önü Baal o keni appach mi pwokkus ngeni ekkewe uluulun önümwäl.

3Nge ngang ewe Emön mi äiti chón Efraim ar repwe fätäl, üwa emmweniir o kömwöch pöüür; nge iir resap meefi pwe ngang ewe üwa tümwünüür.

4Ngang üwa emmweniir ren ewe sókkun sääl aramas ra aea le emmwen lón ar kirekiröch pwal ren ewe riirin tong. Ngang üwa epichaló fööfön ewe öüwafar seni fän ngächiir. Iwe, üwa pwarootiw o amwöngöniir.

5“Nge pwokiten neii kewe aramas resap mochen liwinsäfäl ngeniei, iei minne, repwe liwinsäfäl ngeni ewe fönü Egypt o repwe angang ngeni Assyria.

6Maun epwe chök ekkeliwin feil lón ar kewe telinimw; ekkewe chón opwuter repwe ataatakisi ammwöchün asamalapen tittiir kewe, repwe pwal niieló ekkewe aramas. Iei usun ra pwisin tup lón ar kewe akkóót mi ngaw.

7Pün neii kewe aramas ra chök päi ngeni ar repwe kul seniei. Inamwo ika ra kööri ngeniei pwe ngang ewe mi Unusen Tekia, nge resap enletin asamoluei.

8“Epwe ifa usun äi üpwe tongeni fangatänuk en Efraim? Epwe ifa usun äi üpwe tongeni likitukeló en Israel? Epwe ifa usun äi üpwe tongeni föri ngenuk usun minne üwa föri ngeni Admah? Epwe ifa usun äi üpwe tongeni föri ngenuk usun minne üwa föri ngeni Zeboiim? Letipei a fókkun taatakis. Äi tong a fókkun säsewu.

9Ngang üsap öpwünguk lón öüküükün pwichikkaren äi soong. Ngang üsap unusen ataeló Efraim, pün ngang Kot, nge sap emön aramas. Ngang ewe Emön mi Pin mi nóm leiimi. Ngang üwa feitto sap ren äi üpwe efeiengawa kemi.

10Pün lón ew rän, ekkewe aramas repwe tapweto mwiri ngang ewe SAMOL; ngang üpwe wörüwör usun emön laion. Lupwen ngang üpwe wörüwör, neii kana aramas repwe feitto seni lotow fän chechcheech.

11Iir repwe feitto seni Egypt fän ar chechcheech usun machchang, usun mwurö seni Assyria. Iwe, ngang üpwe eleenier lón imwer kana,” ewe SAMOL a osomänetiw.

Kapasen ettipisi Israel me Judah

12Chón Efraim ra pwellieiló ren föfförün chofona, chón Israel ra pwellieiló ren angangen otupwutup. Nge chón Judah ra chüen tókkóló ngeni emön kot o ölükülük ngeni ekkewe kot mi pin.

12 Efraim a mwöngö äsäpwääl; i a sópweló le tapweló mwirin ewe äsäpwäälin öötiw iteiten rän. I a achómmóngaló an chofona me föfförün mwänesol. I a föri ew pwonen etipeew ngeni Assyria o tiitiló apüra mi för seni föün olif ngeni Egypt.

2A wor än ewe SAMOL kapasen ettipisi Judah; i epwe pwal öpwüngü Jakob fänäsengesin an kewe lapalap o ngeni i chappen an kewe föfför.

3Lupwen Jakob a nóm lón än inan we leenien mönükól, i a ömwöchü epilipilin pachapachen pwiin we; nge lupwen an a tori ierin mwän, i a ökköüras ngeni Kot.

4Ewer, i a ökköüras ngeni ewe chón läng o okkufu i; i a kechiw o tungór ngeni Kot pwe epwe efeiöchüw. Iwe, Jakob a chuuri Kot me lón Bethel o kapas ngeni i me ikenan -

5iei i ewe SAMOL, ewe Kot mi Unusen Manaman, ewe SAMOL iei itan mi iteföüló.

6Iei minne, ämi öüpwe liwinsäfäl ngeni ämi we Kot; öüpwe ääni tong me wenechchar o likiitü le witiwiti ämi we Kot iteiten fansoun.

7Nge esap ina usun, pün ekkewe aramas ra wewe ngeni emön chón amöömö a nöünöü ew kilo esap wenechchar pün a efich an epwe otupwu chón kamö.

8Efraim a tunosikesik o apasa, “Ngang üwa fókkun wöw; ngang üwa pisekisekiló. Lón äi angang weires meinisin, esap wor emön epwe küna merei och äi pwuupwungaw ika tipis.”

9“Ngang ewe SAMOL ämi Kot seni chök ewe fansoun ämi öüwa toowu seni Egypt; ngang üpwe föri pwe öüpwe pwal nónnómsäfäl lón imw mangaku, usun chök minne öüwa föri lón ekkewe ränin ämi we fansoun chuulapen likachooch.

10Ngang üwa kapas ngeni ekkewe soufós o awora ngeniir chómmóng künäeer pwe repwe kapas ngeni kemi o fönöw kemi. Ngang üwa pwal ngeni ekkewe soufós ekkewe kapas mwönünnür pwe repwe fönöw kemi mereer.”

11Nge Kilead a uroló ren chón tipis mi fel ngeni uluulun önümwäl, iei minne ekkewe aramas ra usun och mettóch mi lamwotongaw. Iir ra pwal ääni asór ätemwänin kowu me lón Kilkal, iei minne ar kewe róngen asór ra tetteliló usun ioien faaw ünükkün ew tännipi mi ttu.

12Jakob a süüló ngeni ewe fönü Aram; Israel a angang fäniten emön pwülüwan ren an tümwünü siip pwe möön neminnewe.

13Mwirin, ewe SAMOL a emmwenätä seni Egypt ekkewe mwirimwirin Jakob, iir ekkewe chón Israel, ren emön soufós mi emmweniir o tümwünür.

14Nge ekkewe chón Efraim ra fókkun asoonga ar we Samol; iei minne ar we Samol epwe likitaló wór tipisin ar niimanaw o liwini ngeniir ar kewe föfför mi ässääw.

Än ewe SAMOL soong ngeni Israel

13Melóóm, lupwen chón ewe einangen Efraim ra kapas, aramas ra chechcheech ren ar nuokkus; pwokiten chón ewe einangen Efraim ra fókkun tekia me lón Israel. Nge ra tipis ren ar fel ngeni ewe önü Baal o ra mäló.

2Iwe, iei ra chök alapaló ar tipis; iir ra föri fäniter uluulun önümwäl seni silifer, ra fókkun angangöch le föri ekkewe uluulun önümwäl, iir meinisin förien ekkewe souangang mi sipeöch. Ekkóch ekkewe chón Israel ra peseei ngeni ekkewe pwal ekkóch o apasa, “Öüpwe asór ngeni ekkeei uluulun önümwäl o mitiri ekkewe uluulun liälifföön kowu.”

3Iei minne, iir repwe usun ewe topwutopwun lesossor ika omwurenipwin mi mwittir móróló. Repwe pwal wewe ngeni pöön föün wiit äsäpwääl a ässireló seni ewe leenien wichiwich umwun wiit, pwal usun ötüötün ekkei mi ötüwu seni lón ew asammwacho.

4“Nge ngang ewe SAMOL ämi we Kot mi chimanüw kemi seni än ekkewe chón Egypt nöüni kemi amanaw. Esap wor emön ämi kot nge i ngang chök, pün esap wor emön chón amanaw me lüki.

5Ngang üwa tümwünü kemi me lón ewe fönüpöön, lón ewe fönü mi pwasapwas.

6Lupwen öüwa tolong lón ewe fönü mi mwirinnö, üwa amwöngö kemi o öüwa mötüló; nge lupwen öüwa mötüló, öüwa lamalamtekia, mwirin, öüwa möllükieiló.

7Ina minne, ngang üpwe mweteri kemi usun emön laion, ngang üpwe operi kemi ünükkün alemi kewe usun ewe maan itan leopard.

8Usun minne emön pear a föri lupwen aramas ra angei seni appanan kana, iei usun ngang üpwe fiu ngeni kemi o ataatakisi kemi; usun emön laion a oromaló liapan, iei usun ngang üpwe oromikemiiló me ikenan - üpwe ataatakisi kemi usun emön maan mwacho a ataatakisi liapan.

9Ngang üpwe efeiengawa kemi, ämi chón Israel, pwokiten öüwa üüngeniei, ngang ämi we chón älillis.

10Ifa i ämi we king? Pwata öüsap kööri pwe epwe älisi kemi? Ikkafaiir nöümi kewe souemmwen lón ämi kewe telinimw meinisin ämi öüwa tungór fäniter o apasa, ‘Kopwe ngeni keem emön king me ekkóch samol’?

11Iei minne, lón äi soong, ngang üwa ngeni kemi emön king, lón äi lingeringer, ngang üwa angeisäfäli i.

12Än Efraim kewe pwuupwungaw ra makketiw lón taropwe, an kana tipis ra iseiseló fäniten köpwüng.

13A kawor ngeni ekkewe aramas ar fansoun pwe repwe ääni ew manaw mi fö, nge iir ra wewe ngeni emön mönükól esap mochen epwe toowu seni ewe leenien mönükól pwe epwe upwutiw. A ifa me üleförear!

14“Ngang üpwe angasa ei mwiichen aramas seni ewe leenien sótup; ngang üpwe püngütiw pen manawer seni mäló. En mäló, ikkafa óm kewe mätter? En leenien sotup, ifa óm efeiengaw mi manaman? “Ngang üsap chüen ääni tong,

15inamwo ika Efraim epwe feffeitä me leiin pwiin kewe, nge ngang üpwe tiinato ew äsäpwäälin öötiw pwe epwe enito seni ewe fönüpöön; epwe amóräätä an kewe puachchen kólik me an kewe chönüttu. Aramas repwe angei fän pöchökkül an kewe pisek öüchchea meinisin seni an leenien iseis.

16Ekkewe aramasen Samaria repwe pwisin mwärelong fän chappen ar kewe tipis, pwokiten iir ra üüngeni ar we Kot.

Iir repwe mäló ren ketilas, nöüür kewe semiriit repwe koturutiw leppwül pwe repwe taatakis, nge ekkewe fefin mi pwoopwo epwe tiletil luuker.”

Äier epwe awarato feiöch

14 Ämi chón Israel, öüpwe liwinsäfäl ngeni ewe SAMOL ämi we Kot, pün öüwa turuló pwokiten ämi kewe tipis.

2Öüpwe liwinsäfäl ngeni ewe SAMOL o apasa ngeni i ekkeei kapas: “Kopwe omwusaló äm kana tipis meinisin o etiwa keem fän óm ümöümöch, pwe äm aipwe tongeni asór ngenuk uwään tinnaweem.

3Assyria esap tongeni amanawa keem; ekkewe órisin maun resap tongeni älisi keem. Äm aisap chüen apasa säfäli ngeni meet pwisin pöüüm ra föri, ‘Ämi äm kot,’ pün lón en echök ekkewe mi määsen ra küna ümöümöch.”

4Ewe SAMOL a apasa, “Ngang üpwe echikara ar tókkóló. Ngang üpwe tonger seni pwisin letipei, pün äi soong a kul seniir.

5Ngang üpwe usun chök omwurenipwin ngeni Israel; iwe, i epwe määr usun ewe irä kiop mi ling pöön irän. I epwe usun ewe irä itan sedar lón Lebanon mi alóllóólätiw le öpwükätiw waaran;

6palan kana repwe meresiló, nge lingan epwe usun lingen efóch irä olif. Pwollan epwe usun pwoöchchün ewe irä sedar lón Lebanon.

7Neii kewe aramas repwe liwinsäfäl o nónnóm fän nürün; iir repwe fókkun määröch o chómmóng uwaar usun ew tännipin wiit, repwe fasar usun efóch irän wain - repwe pwoöch usun ewe wainin Lebanon.

8O Efraim, kopwe mär seni ekkewe uluulun önümwäl! Ifa usun, sap ngang ewe emön mi mammasók o pölüweni óm tungór? Ngang üwa wewe ngeni ewe irä saipres mi määr fóchófóch; óm feiöch a feitto seniei.”

9Iö a miriit? I epwe älleta usun ekkeei mettóch. Iö mi sile älefiila lefiilen öch me ngaw? I epwe weweiti ekkeei mettóch. Än ewe SAMOL kewe aal ra pwüng; ekkewe chón pwüng repwe fätäl lóór, nge ekkewe chón tipis repwe chepetek me lóór.