Hipru

Ewe Nöün Kot: I asalapen me ömwüchchün än Kot kapas ngeni aramas

1Kot a kapas me lóóm ngeni ach kewe leewo ren ekkewe soufós. A kapas ngeniir lón sókkopaaten fansoun me lón sókkopaaten lapalap. 2Nge mwirin, Kot a kapas ngeni kich lón ekkeei ränin sópwólón ren Nöün we, I ewe Emön, Kot a fen filätä pwe epwe älemwirini mettóch meinisin, pwal I ewe Emön, Kot a nöünöü le föri unusen läng me fönüfan fiti masower meinisin. 3I ngünüwen lingen Kot pwal sókósókun meinisin ra wesewesen unusen eliosunätä Kot. I a önüküchchara le sapaatä mettóch meinisin ren tüfichin manamanen an kapas. Iwe, mwirin an a pwisin awesaló ewe angangen limelim fäniten ach kana tipis, a móttiw lón ewe leenien chón tekia lepeliifichin ewe Kot mi Unusen Tekia lón läng. 4Ei a pwärätä pwe ewe Nöün Kot a fókkun tekia seni ekkewe chón läng, usun chök pwal ewe iit Kot a ngeni I a fókkun echchipwör lap seni iteer.

Ewe Nöün Kot a tekia seni ekkewe chón läng

5Pün iöön me leiin ekkewe chón läng Kot a apasa ngeni mwo fän ew meet I a apasa ngeni Jesus:

“En Neii, ikenäi Ngang üwa wiliti Semom”?a

Pwal iöön leiin ekkewe chón läng Kot a apasa fänitan usun meet I a apasa fäniten Jesus:

“Ngang üpwe Saam ngeni, nge I epwe emön Naaw ngeniei”?b

6Pwal mwirin, lupwen Kot a pwääraló ngeni fönüfan Nöün we mi suuföl, a apasa:

“Nöün Kot kewe chón läng meinisin repwe fel ngeni I.”c

7Nge lupwen Kot a kapas fäniten ekkewe chón läng, a apasa:

“Kot a föri nöün kewe chón läng pwe repwe chón künö mi mwittir usun äsäpwääl, iir nöün kewe chón angang mi wewe ngeni pwulopwulen ekkei.d

8Nge Kot a apasa usun Nöün we:

“O Kot, óm leenien móótun nemenem epwe nóm tori feilfeilló chök. Ewe wókun chón nemenem fänäsengesin pwüng epwe iei ewe wókun nemenem lón mwuum. 9En ka efich pwüng nge ka opwut pwüngingaw. Iei minne Kot, óm we Kot a epituk ngeni lömmis. A epituk ngeni ewe löön pwapwa o alapóketä pwe kopwe lap seni ekkewe chón läng mi chiechi ngenuk.”e

10Kot a pwal apasa usun Nöün we:

“En SAMOL, lepoputän ka föri lóngólóngen fönüfan. Ekkewe läng ikkana angangen poum. 11Iir repwe taaló, nge En kopwe chök nónnóm. Iir repwe mesiló usun echö üüf. 12Kopwe öllü fengeniir usun echö sekit; repwe ekkesiiwil usun echö üüf, nge En, kopwe usuusumw we chök. Ierin manawom esap mwüchchüló”.f

13Nge iöön me leiin ekkewe chón läng Kot a mwo apasa ngeni usun meet a apasa ngeni Nöün we:

“Kopwe móót lepeliifichi, tori Ngang üpwe föri pwe kopwe ääni leenien ipwetä chón opwutom kana”?g

14Nge ekkewe chón läng meinisin iir chón angang chök. Iir ekkewe ngüün ra ökkünöfeil seni Kot pwe repwe angang fäniten chókana repwe älemiwirini ewe manaw ese mwüch.

Äkkäewin kapasen fön: Kosap tunaló le pööpöni ewe alen manaw

2Iei minne, sipwe fókkun föötinüküwetiw manawach ngeni ewe kapasen let sia fen rong, pün site pich o sia paseló seni. 2Pün are a let pwe a fókkun ölükülük ewe poraus ekkewe chón läng ra aronga, nge iteiten chón ouucho le pwurätiw ika älleasolap ngeni ra angei chappan mi wenewen, 3iwe, epwe ifa usun ach sipwe tongeni tiweló seni chappen tipisin ach tunaló are kich sipwe tümwününgaw ngeni ei alen küna manaw mi fókkun lapalaap? Akkomwan, a esilesil pwisin meren ewe Samol, nge mwirin, a ölükülük ngeni kich meren chókewe iir mi rongorong ngeni lupwen a kapas. 4Iwe, pwal Kot a älleta le pwärätä ewe poraus ren ekkewe esissil me föfför mi amwarar me sókkopaaten manaman, pwal ren an eineti ekkewe liffangen Ngüünmifel ineet chök I a mochen filätä pwe epwe föri.

Ewe Naaw a kekisitiw fän ekkewe chón läng

5Pün Kot esap filätä ekkewe chón läng pwe repwe nemenem lón ewe fönüfan epwe feitto, iei ewe fönüfan kich sia fen kakkapas usun. 6Nge iei usun meet emön a fen pwärätä le makkei lón ewe taropwe mi pin:

“Meet aramas pwe En ka ekieki usun, ika meet nöün aramas pwe En ka tümwünü? 7Pün lón ekis chök fansoun mi mwochomwooch En ka föri pwe aramas epwe kisitiw fän ekkewe chón läng. En ka ämwärämwära ngeni aramas ling me iteüöch. En ka ngeni aramas pwe epwe nemenem wón angangen pöum kana. 8En ka atolonga mettóch meinisin fän pecheen pwe repwe nóm fän an nemenem.”a

Pün lupwen Kot a atolonga mettóch meinisin fän än aramas nemenem, esap wor och mettóch epwe etiwawu an esap anómwu fän än aramas nemenem. Nge tori iei sisap mwo küna pwe mettóch meinisin ra nóm fän än aramas nemenem. 9Nge sia küna Jesus, ewe a ekis chök kekisitiw fän ekkewe chón läng lón chök fansoun mwochomwooch. Nge iei, Kot a ämwärämwära ngeni I ling me iteüöch, pwokiten I a tolong lón riäfföün mäló fänitach. Ewer, ren än Kot ümöümöch Jesus a nenni mäló fänäsengesin iteiten emön me emön aramas lón unusen fönüfan.

Jesus epwe emmwenato chómmóng nöün Kot pwe repwe fiti I lón an ling

10Pün a fókkun unusen pwüng ngeni Kot, I ewe mettóch meinisin ra för fänitan pwal I ewe mettóch meinisin ra för meren, pwe lupwen a emmwenato chómmóng aramas pwe repwe wiliti nöün o fiti I lón lingan, nge a föri pwe Jesus, ewe chón popuw ar küna manaw epwe unusöch ren an tolong lón riäfföü. 11Iwe iei, Jesus ewe Emön mi epinaló aramas me chókewe I a epiniireló ra Semeni chök emön. Iei popun, Jesus esap sääw an epwe kööri ngeniir pwe iir pwiin.

12Pün I a apasa ngeni Kot:

“Ngang üpwe arongafeili amwaraaren Itom ngeni pwii kewe. Ngang üpwe köölün mwareituk me leiin noum we mwichen aramas.”b

13A pwal apasa:

“Ngang üpwe anómwu äi apilükülük wón I.” A pwal apasa: “Ngang iei me ekkewe naaw Kot a fang ngeniei.”c

14Iwe, pwokiten nöün Kot kana iir aramas, ra pop seni fituk me chcha, iei minne pwal pwisin Jesus a wiliti fituk me chcha usun emön leiir ren an upwutiw lón lapalapen aramas. Pün ren chök an epwe wiliti emön aramas, iwe, a tongeni mäló. Iwe, ren an mäló a tongeni kitereló manamanen ewe devil, ewe mi piin ääni ewe manamanen mäló. 15Lón chök ei lapalap I a tongeni angasaló chókana meinisin mi nónnóm lón unusen manaweer nge iir mi föötek ngeni ar nuokkusiti mäló. 16Kich meinisin sia fókkun silei pwe Jesus a feitto pwe epwe älisi ekkewe mwirimwirin Abraham, nge sap ren an epwe älisi ekkewe chón läng. 17Iei minne, a fókkun öüchchea fäniten Jesus an epwe usuni usuusun pwiin kana lón sókkun peekin meinisin, pwe I epwe tongeni ar Souasór mi Lap mi ümöümöch me ölükülük lón mettóch meinisin lón an angang fän mesen Kot. Mwirin, I a tongeni föri ewe angangen ächäächä fäniten än aramas tipis. 18Pün pwokiten pwisin Kraist a fen tolong lón riäfföü me sóssót, iei popun I a tongeni epwe älisi chókana lupwen ra tolong lón sóssót.

Ewe Nöün Kot a ölükülük

3Iei minne, ämi pwii kana chón pin, ämi ekkewe mi chóóni ewe kö seni läng, öüpwe afóta ämi ekiek wón Jesus ewe sia pwärätä usun pwe I nöün Kot Chön Künö me Souasör mi Lap. 2Pün Jesus a ölükülük ngeni Kot ewe mi filätä I, usun chök Moses a ölükülük lón an angang, iwe, a wiisen tümwünü unusen ewe imwen Kot. 3Nge a fich ngeni Jesus an epwe koon iteüöch lap seni Moses, usun chök emön aramas mi öüüwetä ew imw mi mwirinnö a iteüöch lap seni ewe imw. 4Pün iteiten imw ra köüütä ren aramas, nge Kot i ewe chón föri mettóch meinisin. 5Moses a wesewesen ölükülük lón wiisan wiisen emön chón angang lón imwen Kot, nge Moses i emön chón angang chök. An angang a eliosunätä ekkewe mettóch mi let Kot epwe pwääraló me mwirin. 6Nge Kraist, ewe Naaw mi ölükülük, a nemeni unusen pwisin chón leimwan. Iwe, öükich chón leimwen Kot, are sia wesewesen sópweló le kömwöchünnük wón ach tipepwora me ach pwapwaiti minne sia apilükülüküw lón Kraist tori lesópwólón.

Oruuwen kapasen fön: Öüpwe tupwöl

7Iei popun ewe Ngüünmifel a apasa:

“Ikenäi, are öüwa rong mwelien Kot, 8öüsap öpöchökkülaló letipemi usun minne ekkewe chón Israel ra föri lupwen ra üüngeni Kot lón ewe rän lupwen ra sótuni än Kot mósónóttam me lón ewe fönüpöön, 9ia ämi kewe leewo ra sótuniei ren ar mochen älelleta äi mósónóttam. Iwe, ra küna äi kewe föfför lón üküükün fääik ier. 10Iei minne, Ngang üwa soong ngeni ena pilóón aramas o apasa: ‘Iteiten fansoun meinisin, letiper a chök tókkóló seniei. Resap mochen föri meet Ngang üwa üreniir.’ 11Iei popun Ngang üwa pwon fän ökköpöl lón äi soong o apasa: ‘Resap fókkun tolong lón äi leenien asöösö.’ ”a

12Ämi pwii kana chón lükü, öüpwe äfälli kemi pwe esap wor lóómi ew letip mi ngaw me lükülükümmang epwe emmweni ngeni kemi ämi öüpwe tókkóló seni ewe Kot mi manaw. 13Nge öüpwe älillis fengen le fönöw fengeni kemi lefiilemi iteiten rän, lón ei ótun sia chüen tongeni eita ngeni “ikenäi,” pwe esap wor emön me leiimi epwe pöchökküleló letipan ren otupwutupwun tipis. 14Pün are sia chök sópweló le kömwöchünnük wón ach we apilükülük sia ääni seni lepoputän o likiitü wón tori lesópwólón, iwe, sipwe ääni meinisin minne än Kraist. 15Nge öüsap fókkun möllükaló meet ewe taropwe mi pin a apasa:

“Ikenäi are öüwa rong mwelien Kot, öüsap öpöchökkülaló letipemi usun minne chón Israel ra föri lupwen ra üüngeni Kot.”b

16Pün menni ekkewe aramas ra üüngeni Kot inawmo are ra rong mwelian? Ifa usun, esap chókewe Moses a emmweniirewu seni Egypt? 17Iwe, menni ekkewe aramas ra asoonga Kot lón ekkewe fääik ier? Ifa usun, sap ekkewe aramas mi tipis, iir ekkewe ra chök määtiw lón ewe fönüpöön? 18Menni ekkewe aramas Kot a kapas ngeniir lupwen a pwon fän ökköpöl pwe resap fókkun tolong lón an we leenien asöösö? Sap ngeni chókewe resap älleasochis ngeni? 19Iei usun sia küna pwe esap mwüümwütä ngeniir pwe repwe tolong lón än Kot we leenien asöösö pwokiten ar lükülükümmang.

Sópwósópwólón ewe pwon fäniten asöösö

4Iei minne, pwokiten mi chök chüen suuk än Kot we pwon fäniten ach sipwe tolong lón an we leenien asöösö, öüsipwe chechcheech fän nuokkus are mi chüen wor ekkóch me leiimi resap tori ewe leenien asöösö. 2Pün enletin ei poraus allim pwe Kot a fen amollätä ew leenien asöösö, a esilesil ngeni kich, usun chök pwal iir. Nge resap feiöch ren ewe kapas ra rongorong pwokiten chókewe mi rong resap lükü meet Kot a üreniir. 3Pün öükich chök ekkewe mi lükü sia tongeni tolong lón ewe leenien asöösö. Nge fäniten chókana resap lükü, Kot a apasa:

“Iei usun Ngang üwa pwon fän ökköpöl lón äi soong pwe resap tolong lón äi leenien asöösö,”c

inamwo are a fen mollotä än Kot we leenien asöösö seni chök lepoputän fönüfan. 4Pün iei usun meet Kot a apasa fäniten ewe efisuen rän mi makketiw lón ewe taropwe mi pin: “Iwe, lón ewe efisuuen rän Kot a asöösö seni an kewe angang meinisin.”d 5Nge lón pwal ew wokisin, Kot a apasa: “Resap fókkun tolong lón äi leenien asöösö.”e

6Iei minne, pwokiten än Kot ei asöösö mi chüen chök suuk pwe ekkóch repwe tolong lón, nge chókewe mi akkomwen esilesil ngeniir ei poraus allim me mwan resap tolong, pwokiten ra älleasolap ngeni Kot. 7Iei popun, Kot a filätä pwal ew rän fäniten ach sipwe tolong lón an we leenien asöösö. A eita ngeni ei rän “ikenäi”. Kot a apasa usun ei rän me lón möngüüngün David me mwirin ew fansoun mi langattam, usun chök minne a fen apasa me mwan:

“Ikenäi, are öüpwe rong mwelien Kot, öüsap öpöchökkülaló letipemi.”f

8Ei leenien asöösö mi fö esap ewe fönü Kanaan, ia Joshua a emmwenalong ie ekkewe aramas. Pün are ei leenien asöösö iei ewe fönü Kanaan, iwe Kot esap chüen kapas säfäl me mwirin usun pwal ew ränin asöösö. 9Iei minne, a wor ew asöösön Sabbat mi sókkóló a chüen witiwit fäniten nöün Kot kewe aramas. 10Pün meinisin mi tolong lón än Kot we asöösö, repwe asöösö seni ar angang weires usun chök Kot a asöösö mwirin an föri fönüfan. 11Iei minne, sipwe tilikken ngeni ach sipwe tolong lón enan leenien asöösö. Pün emön mi älleasolap ngeni Kot, usun minne ekkewe aramasen Israel ra föri, esap tolong.

12Pün än Kot kapas a manaw o manaman. A ken seni efóch ketilas mi seisei me rüepeek. A tongeni tilenalong o tilenifeseni tiip me ngüün, pwal lekkeilen chüü me lón chuu. A pwal tongeni etittinafichi mochenin me ekimwónómwónen letipen aramas. Än Kot kapas a särifätä enletin nónnómwun manawach. 13Iwe, esap fókkun wor och me leiin förien Kot epwe op seni fän mesan. Mettóch meinisin ra seleeló o särifiló me mwen mesen Kot. Iei i ewe Kot kich sipwe fókkun äwewe ngeni popun ach kana föfför meinisin.

Kraist I nöüch we Souasór mi Lap

14Iei pwokiten a wor emön nöüch Souasór mi Lap a fen feilló läng, I Jesus Kraist ewe Nöün Kot, iei minne sipwe kömwöchünnük wón Kraist o sisap ükütiw le pwärätä pwe sia lükü I. 15Nöüch ei Souasór mi Lap a weweiti ach kana apwangapwang, pün I a tolong lón ekkewe sóssót meinisin kich sia tolong lón, nge I esap tipis. 16Iei minne, sipwe kaneto ngeni ewe leenien móótun ümöümöch än ach we Kot fän ach apilükülük pwe sipwe etiwa än Kot kirekiröch o sipwe tongeni küna an ümöümöch pwe epwe älisi kich lón fansoun ach osupwang.

Ekkewe tüfich fäniten chón wiiseni ewe wiisen souasór mi lap

5Pün iteiten souasór mi lap a fil me leiin chienan aramas. A kefilitä pwe epwe tupwuni aramas lón ekkewe mettóch fäniten Kot. I epwe ääni asór än ekkewe aramas liffang ngeni Kot me ar kewe asór fäniten omwusomwusen tipis. 2Iwe, pwokiten ei souasór mi lap i emön aramas, iei popun a tongeni epwe ääni tipepwete ngeni ekkewe aramas, inamwo are iir ra wewemmang me tókkóló, pün pwisin i wón inisin mi pwal ääni ekkewe osukosuken apwangapwang iir ra ääni. 3Iwe, iei popun a öüchchea ngeni ewe souasór pwe i a föri ewe angangen asóren omwusomwusen tipis, fäniten än ekkewe aramas kewe tipis me pwal fäniten pwisin an kana tipis. 4Iwe, esap wor emön aramas epwe wiliti emön souasór pwokiten pwisin i a filätä pün a mochen mwärelong fän lingen ewe wiis. I a tolong lón ewe wiis lupwen a kö meren Kot, usun chök minne a fis ngeni Aaron.

Kraist i ewe Souasór tori feilfeilló chök

5Iei popun, Kraist esap pwisin etekiatä an epwe wiliti emön souasór mi lap. Kraist a fil meren Kot ewe mi apasa ngeni:

“En Neii, ikenäi Ngang üwa pwärukoló pwe en Neii.”a

6A makketiw lón pwal ew wokisin minne Kot a apasa ngeni Kraist:

“En kopwe emön souasór tori feilfeilló chök, lón ewe kinikinin tettel än Melkizedek.”b

7Lupwen fansoun än Jesus a wiliti aramas, I a iótek me tuttungór fän leüommóngun kechiw me fiti chönün mesan ngeni ewe Emön mi tongeni epwe amanawa I seni mäló. Iwe, ewe Kot Saam a öüselinga an iótek, pwokiten I a sile menin fiti älleasochis. 8Inamwo are Jesus I ewe Nöün Kot, nge I a käeö älleasochis seni ekkewe mettóch I a riäfföü ren. 9Ren ei lapalap, Kot a öpwüngaló pwe Jesus a emön Souasór mi Lap mi unusöch. Iwe, I a wiliti ewe leewon manaw ese mwüch fäniten chókana meinisin mi älleasochisi I. 10Iwe, Kot a atolonga Jesus pwe I epwe emön Souasór mi Lap “lón ewe kinikinin tettel än Melkizedek.”

Esap fis mämmäritän ngüün

11Mi wor chómmóng mettóch sia tongeni apasa usun lefiilen Kraist me Melkizedek, nge a weires ach sipwe äwewei ngeni kemi, pwokiten a usun chök nge mi pwas selingemi ren ämi wewemang. 12Pün itä fen letan pwe lón ei fansoun ämi öüpwe le chón esikuula ekkóch. Nge i a fen sossor, pün ämi mi chök chüen osun än emön epwe esikuula säfäli ngeni kemi ekkewe poputän lesen seni kapasen Kot. Ämi öüwa usun kana mönükól mi chök chüen ükkün milik, nge öüsap mwo kofichin mwöngö kana mwöngö mi pöchökkül. 13Pün iteiten emön me emön mi chök chüen ükkün milik, esap mwo sipeöch lón ewe manawen souleng pün i a chüen emön mönukól, esap silei an epwe föri meet mi pwüng. 14Nge ekkana mwöngö mi pöchökkül ra fäniten chókana ra mwukóló, wewen, iir chókewe ra achoocho le pwisin aörüni ngeniir ar repwe sipeöch le älefiila lefiilen meet mi pwüng me meet mi mwääl; iwe, mwirin ra föri meet mi pwüng.

Efeiengawen an esap fis mämmääritä

6Iei minne, sipwe le likitaló le ekkeliwini chök ekkewe poputän käit usun Kraist, nge sipwe le mwökütüló mwach ngeni ekkewe sókkun käit mi fich ngeni chókana ra mwukóló lón ar lükü. Sisap chüen enliwinisäfäli le föri ewe lóngólóngun käit usun ach sipwe kul seni ekkewe sókkun föfför ingaw mi emmweni ngeni kich mäló me usun ewe sókkun lükü lón Kot. 2Sipwe pwal likitaló ekkewe sókkun käit usun papatais me ewe angangen isettä paaw wón ekkewe mönün asór me ewe käit usun manaw säfälin sotupw me usun än Kot we köpwüngün eterialó. 3Iwe, iei meet sipwe föri, are fän letipen Kot. Sipwe mwökütüló mwach ngeni pwal ekkóch sópwósópwun weweöchün käit.

4Pün esap fókkun tüfich ar repwe asööfösäfäl chókana ra fen sarameló lón ar ekiek o ra weweiti ewe kapasen let, ra fen pwal neni ewe liffang seni läng, ra nóm ia mwökütükütün än ewe Ngüünmifel angang a fis ie, 5ra rong o asóssóta le neni än Kot kapas mi mwirinnö, ra pwal neni ekkewe sókkun manaman repwe fis lón ewe mwüü epwe feitto, 6nge mwirin, ra tókkóló seni meet mi let ra silei usun Kot. Esap fókkun tüfich ar repwe asööfösäfäl lón manawer pwe repwe ekieksäfäl, pwokiten ra pwisin iräpesengesi säfäli ewe Nöün Kot o pwääraló ar turunufasei I. 7Lupwen ewe pwül a chöchchön ren ewe üüt mi pwüngütiw wón, o a wor irä ra märitä wón mi lamwot fäniten ewe chón tännipi, ei pwül a angei an feiöch seni Kot. 8Nge are ekkana iräfölüföl me pötöwöl ingaw ra märitä wón ei pwül; iwe, ei pwül a lamwotongaw. A chök nóm ngeni an epwe koturuló o tolong lón feiengawen önümamaw. Iwe, lesópwólón epwe kataaló ren ekkei.

Och apilükülük mi mwirinnö

9Nge ämi chiechiei kana mi ächengicheng, inamwo are äm aia ääni ei sókkun itiitin kapas, nge äm aia wesewesen lükü pwe esap weneiti kemi. Äm aia apilükülük pwe a wor mettóch mi mwirinnö fän itemi, ewer, ekkewe mettóch mi chiechi ngeni ämi küna ewe manaw ese mwüch. 10Pün Kot mi wenechchar. I esap möllükaló usun ämi angang weires fänitan me usun ämi pwääraló ämi tong ngeni I ren ämi tümwünü ekkewe pwal ekkóch chón lükü usun öüwa chüen sópweló le föri. 11Iwe, äm aia fókkun mochen pwe öüpwe chök sópweló le tongei pwal ekkóch lón üküükün langattamen manawemi, pwe öüpwe älelletafichi pwe meet öüwa apilükülük fänitan epwe pwönüwetä. 12Mwirin, öüsap tilikkop lón ngünümi o tunaló. Nge öüpwe fen appirüw chókewe ra ääni feiöchün än Kot kewe pwon, pwokiten ar lükü me mósónóttam.

Minne Kot a ääni akkóót lón Kraist esap tongeni epwe siiwil

13Äwewe chök, Kot a ääni ew pwon ngeni Abraham. Nge pwokiten esap wor emön mi lap seni I an epwe öpölü; iwe, a pwisin ökköpöl itan, 14o apasa: “Enlet, Ngang üpwe efeiöchuk, Ngang üpwe pwal achómmóngaló mwirimwirum kana.”a 15Iwe, ina pwata, mwirin än Abraham a fókkun likiitüló le witiwit, a angei meet Kot a pwon ngeni.

16Lupwen aramas ra ökköpöl, ra ääni ökköpöl emön mi tekia ika öüchchea seni pwisin iir. Iwe, ngeniir, ewe ökköpöl ra apasawu pwe ölükülükün ar pwon, iei köükütiwen äniini meinisin. 17Iwe, pwal iei chök usun ren Kot. Lón an mochen epwe pwääri ngeni chókewe repwe angei minne I a pwonei pwe I esap tongeni siwili minne I a ekiekietä, iei minne, a önüküchchara än pwon ren an ääni ew ökköpöl. 18Iei popun, Kot a awora ekkeei ruu mettóch: an pwon me an ökköpöl. Ekkeei ruu mettóch resap tongeni repwe siiwil, pün esap tüfich ngeni Kot pwe epwe chofona. Iei minne, öükich ekkewe mi süü ngeni I pwe sipwe ääni leenien op, a fis pöchökkületän letipach, pün sia tongeni kömwöchüló wón an pwon fän apilükülük. 19Ei apilükülük a usun efóch angkö mi nüküchchar o pöchökkül fäniten manawach. Iei ewe apilükülük mi emmwenikichelong peekilongen ewe cheech mangaku lón läng, lón än Kot we imwenfel. 20Jesus a fen akkomwolong mwach le tolong ikenan pwe I epwe ach Souasór mi Lap tori feilfeilló chök, lón ewe kinikinin tettel än Melkizedek.

Melkizedek ewe kingen pwüng

7Ätei Melkizedek, i kingen Salem, nge pwal i emön souasór fäniten ewe Kot mi Unusen Tekia. Lupwen Abraham a liwinsäfälito seni an niieló ekkewe king, Melkizedek a chuuri i o efeiöchü. 2Mwirin, Abraham a angei ew na engolun meinisin minne i a liäpeni lón an maun o ngeni Melkizedek. Popun minne Abraham a föri ren ei, pün ren wewen iten Melkizedek ei. Wewen Melkizedek, “kingen pwüng”, nge pwal i “kingen kinamwe” pün i kingen Salem, nge wewen Salem, “kinamwe.” 3Esap wor uruwon semen ätei, ese pwal wor uruwon inan ika uruwon an eterenges, ese pwal wor uruwon lepoputän ränin manawan ika sópwólón manawan. I a wewe ngeni ewe Nöün Kot, pwokiten a nóm lón ewe wiisen souasór feilfeilló chök.

4Iwe, sipwe nengeni usun tekian ätei Melkizedek. Pün Abraham, än chón Israel we leewo mi tekia nge a silleni usun tekian Melkizedek ren an fang ngeni i ew na engolun seni öchchün leiin meet i a liäpeni lón an maun. 5Iwe, a wor osomän lón ewe öllükün Moses ngeni ekkewe souasór iir ekkewe wesewesen mwirimwirin Levi pwe repwe angei ewe na engol seni ekkewe aramas meinisin, wewen, seni pwisin määräriir kewe, inamwo are iir mwirimwirin Abraham. 6Uruwon än Melkizedek leewo esap feitto seni kewe mwirimwirin Levi, nge i a angei ewe na engol seni Abraham. Iwe, Melkizedek a efeiöchü Abraham ewe mi fen angei än Kot kewe pwon. 7Iwe, ese pwal wor meet emön epwe ääni wiipinepin, pun mi fat pwe ewe aramas mi wiisen föri ewe angangen efeiöch a lap seni ewe aramas i a efeiöchüw. 8Ren ekkewe souasór seni mwirimwirin Levi mi angei ewe na engol, iir aramas ra tongeni repwe mäló. Nge ren Melkizedek, ätewe mi angei ewe na engol me ikewe, a lap seniir, pwokiten a wor chón pwärätä usun pwe i mi chök sópwósópwóló le manaw. 9Iwe, sia tongeni apasa pwe ekkewe mwirimwirin Levi mwo, iir ekkewe mi angei ewe na engol, nge ra püngütiw ewe na engol ngeni Melkizedek me lón ar we leewo Abraham. 10Pün ina mwo are Levi esap mwo upwutiw, nge meet i a fis seni a fen nóm lón inisin Abraham an we leewo lupwen Melkizedek a chuuri Abraham o angei ewe na engol seni.

Mi öüchchea an epwe wor ew angangen wiisen souasór mi fö

11Iwe, are än ewe mwichen souasór seni ewe einangen Levi angang a tongeni föri pwe aramas repwe unusöch, (nge än ewe mwichen souasór angang ra lóngólóng wón ekkewe öllük); iwe, epwe meet lamwoten än Kot epwe tiinato pwal emön souasór seni lón ewe kinikinin tettel än Melkizedek, nge sap emön seni chök lón tettelin Aaron? 12Pün lupwen epwe ekkesiiwil ewe mwichen souasór, iwe, a öüchchea pwe ekkewe öllük repwe pwal ekkesiiwil. 13Pün ewe Emön ekkeei mettóch ra kapas fänitan, a feitto seni ew einang mi sókkóló, nge esap wor mwo emön seni ena einang a piin angang ngeni ewe róngen asór. 14Mi fat pwe ach Samol a feitto seni ewe einangen Judah, nge Moses esap fós fänäsengesin ei einangen Judah lupwen a kapas fäniten ewe mwichen souasór. 15Iwe, ewe ekkesiiwil lón än Kot öllük a pwääpwäló ren an a war emön souasór mi sókkóló usun chök Melkizedek. 16I a wiliti emön souasór nge esap lóngólóng wón ekkewe öllükün lóóm mi weneiti ekkewe souasór seni ewe einangen Levi, pwe ren manamanen ew manaw esap tongeni epwe taaló. 17Pün iei meet ewe taropwe mi pin a pwärätä usun Kraist:

“En emön souasór tori feilfeilló chók lón ewe kinikinin tettel än Melkizedek.”a

18Ewer, ewe öllük minen lóóm fäniten ewe mwichen souasór seni ewe einangen Levi a kómóróló pwokiten a apwangapwang o lamwotongaw, 19pün ewe öllük esap tongeni föri och mettóch an epwe unusöch. Nge iei och apilükülük mi mwirinnö seni ewe öllük a siwili ewe öllük lón leenian. Iei ei apilükülük sia arap ngeni Kot ren.

Ewe Souasór mi fö a tekia

20Iwe, iei pwüngün pwe Kot a ääni ew pwon fän ökköpöl pwe Kraist epwe emön souasór fansoun meinisin, nge I esap apasa mwo fän ew ei itiitn kapas usun pwal emön souasór. 21Ekkewe ekkóch souasór ra tolong lón ewe wiisen souasór, nge esap wor ewe pwon fän ökköpöl fäniter, nge Kraist a tolong lón ewe wiisen souasór ren ew pwon fän ökköpöl. Jesus chök ei Kot a apasa ngeni:

“Ewe SAMOL a pwon fän ökköpöl, nge esap siwili an ekiek: ‘En emön souasór tori feilfeilló chök lón ewe kinikinin tettel än Melkizedek.’ ”a

22Iwe, pwal pwokiten än Kot ei pwon fän ökköpöl, a fis pwe Jesus ewe a önüküchchara fisiöchchün ei pwonen etipeew mi koon mwirinnö.

23Pwal iei ew sókkofesenin ewe wiisen souasór melóóm me iei. Lón ewe kinikinin souasór melóóm, ekkewe souasór ra chómmóng, pün lupwen emön a mäló; iwe, pwal emön souasór a tolong lón leenian. Mäló a öükätiw ar repwe sópwósópwóló lón angangen wiseer. 24Nge lón ei kinikin iei, Jesus a nóm fóchófóch lón ewe wiisen souasór, pwokiten I a manaw tori feilfeilló chök. 25Ina minne, Jesus a tongeni epwe amanawa (fän ew chök nge tori feilfeilló chök) chókana mi feitto ren Kot nge repwe aleni I, pwokiten I a manaw fansoun meinisin pwe epwe wiisen tutungór ngeni Kot fänäsengesiir.

26Pün a fókkun unusen pwüng ngeni ach sipwe nöüni ei sókkun Souasór mi Lap, pwokiten I emön mi pin o esap wor terin manawan, esap limengaw ren tipis. Iei, I a imwuló seni chón tipis o a fen kawor ngeni ewe leeni mi tekiatä seni meinisin lón läng. 27I esap osun an epwe ääni asóren omwusomwusen tipis iteiten rän usun ekkewe ekkóch souasór mi lap. Iir ra ääni asór fäniten pwisin ar tipis akkomw, nge mwirin repwapw ääni asor fäniten tipisin ekkewe aramas. Nge Jesus a ääni asór fän ew chök, nge a naaf fän iten aramas meinisin fansoun meinisin lupwen I a ääni asór pwisin manawan wón ewe iräpenges pwe omwusomwusen tipis. 28Pün ewe öllük a filätä ekkewe aramas mi wor ar apwangapwang usun chök aramas meinisin pwe repwe souasór mi lap. Nge mwirin an a kawor ewe öllük, Kot a filätä Nöün we ren ew pwon fän ökköpöl pwe I epwe souasór mi lap. Iwe, Nöün we mi unusöch ren an tolong lón riäfföü, a angang tori feilfeilló chök.

Ewe angang mi fö än ewe Souasór mi Lap

8Iwe, iei öüchchean ekkewe mettóch sia apasa: A wor emön ach Souasór mi Lap a fen móótóló wón leenian lón läng peliifichin ewe leenien móótun nemenem än Kot ewe mi Unusen Lapalaap. 2Me ikenan, I a emön chón angang lón ewe leeni mi unusen pin, iei ewe enletin imwenfel mangaku öüüwen ewe Samol, nge sap öüüwen pöün aramas.

3Nge pwokiten mi fen affatetiw pwüngün pwe iteiten souasór mi lap a wiisen ääni asór ekkewe asóren liffang me ekkewe ekkóch asór, iei minne, mi öüchchea pwe ach ei Souasór mi Lap epwe pwal awora och mettóch pwe epwe ääni asór. 4Are I epwe nóm wón fönüfan, iwe, I esap emön souasór, pwokiten a fen wor ekkewe souasór ra föri angangen ekkewe asóren liffang mi affatetiw pwüngün lón ewe öllükün Moses. 5Ra angang lón ewe imwenfel, iei och chök liossun me ngünüwen ewe wesewesen leenien fel lón läng. Pün lupwen Moses a mollotä pwe epwe öüüwetä ewe imwenfel mangaku, Kot a öüröüra i o apasa: “Kopwe tümwünüfichi pwe kopwe föri ekkewe mettóch meinisin fiti chök köükün ewe lioos Ngang üwa pwääri ngenuk me wón ewe chuuk.”b 6Nge ach ei Souasór mi Lap a ääni ew angang mi koon lapaló echchipwörün lap seni än ekkewe souasór mi angang fän pwüngün ewe öllük minen lóóm, pwokiten pwal I ewe chón afföör fäniten ew pwonen etipeew ngeni Kot mi koon lapaló mwirinöön a lóngólóng wón ekkewe pwon mi koon lapaló mwirinnöör.

Ew pwonen etipeew mi fö

7Pün are esap wor üküngawen ewe äewin pwonen etipeew; iwe, esap wor lamwoten an epwe pwal kawor ew oruuwen pwon pwe epwe ekkesiwili. 8Nge pwisin Kot a küna üküngawen ewe pwon minen lóóm; iei minne I a apasa:

“Epwe war ewe fansoun, lupwen Ngang üpwe föri ew pwonen etipeew mi fö ngeni chón leimwen Israel me chón leimwen Judah. 9Ei pwonen etipeew esap usun ewe pwon ngang üwa ääni ngeni ar kewe leewo lón ewe fansoun lupwen ngang üwa kömwöch pöüür o emweniirewu seni ewe fönü Egypt, pwokiten iir resap sópweló le öpwönüetä pwüngün äi we pwon. Ina minne, Ngang üwa likitiireló o üsap chüen tümwünür.” Iei meet ewe SAMOL a apasa. 10Pün iei ewe pwonen etipeew Ngang üpwe ääni ngeni chón leimwen Israel me mwirin ekkewe fansoun repwe feitto, ewe SAMOL a apasa. Ngang üpwe atolonga äi kewe öllük lón ar ekiek o makkeretiw lón letipeer. Iwe, Ngang üpwe ar Kot, nge iir repwe neii aramas. 11Esap chüen wor emön epwe äiti ngeni chón arun ika pwal ngeni emön pwiin o apasa ngeni: ‘Kopwe silei ewe SAMOL,’ pün iir meinisin repwe le fen sileei, seni ekkewe mi kis me leiir tori ekkewe mi lap. 12Pün Ngang üpwe ääni kirekiröch ngeniir le omwusaló ar kana pwüngingaw me ar kana tipis pwal ar kana föfförün pwurätiw äi kewe öllük. Iwe, Ngang üsap chüen chemeni ar kana tipis.”a

13Lupwen Kot a kapas usun “ew pwon mi fö”, wewen I a fen föri pwe ewe äewin pwon a wiliti outaamw. Nge minne a outaamw o minen lóóm, a chök nóm ngeni an epwe le koturuló.

Ewe imwenfel minen fönüfan

9Iwe, mi enlet pwe lón ewe äewin pwon Kot a ääni ngeni ekkewe chón Israel, mi wor ekkewe öllük fäniten än aramas repwe fel ngeni Kot me fäniten ewe imwenfel ikeei wón ei fönüfan. 2Pün a wor ew imwenfel mangaku a köüütä, nge mi wor ruu ruum lón. Lón ewe äewin ruum, a wor ew leenien etittin, ew cheepel me ekkewe pilawa mi pin ra nóm wón. Iei ewe ruum a iteni ewe Leeni mi Pin. 3Mwirin, a wor och refiref mangaku. Nge peekilongen ei refiref mangaku, iei ewe oruuwen ruum me lón ewe imwenfel mangaku. Iei ewe ruum a iteni ewe Leeni mi Unusen Pin. 4Lón ei ruum, a wor ew róóng mi för seni kolt fäniten asóren ötüöt, a pwal wor ew pwóór a iteni pwórun pwon mi cheech ngeni kolt unusen lepeekin meinisin. Lón ei pwórun pwon, a nóm ew pöör mi masow ren ekkóch manna, a pwal nóm wókun Aaron we, ewe mi pwük fasaran, me ekkewe faaw mi chööpööp fäniten ewe pwon mi maketiw ekkewe Engol Öllük wóór. 5Iwe, a wor uluulun chón läng mi ling ra nóm asen ewe pwórun pwon. Pöükässiir ra meresiwu asen öppüngün ewe pwórun pwon. Ei öppüng, iei ewe leenien än Kot ümöümöch. Nge iei sisap tongeni tichchik le äwewei ekkeei mettóch meinisin.

Üküngawen angangen lón ewe imwenfel minen fönüfan

6Iwe, lupwen ekkeei mettóch ra wes le mollotä, ekkewe souasór ra tolong me toowu lón ewe äewin ruum lón ewe imwenfel mangaku iteiten fansoun lupwen ra föri angangen wiiser. 7Nge ewe souasór mi lap chök a äkkälämön le tolong lón ewe Leeni mi Unusen Pin, nge fän ew chök lón ew ier. Nge iteiten fansoun an tolong lón ei ruum, a uweei chaan ewe mönün asór. Pün i a ääni asór ei chcha ngeni Kot pwe pwölüpwölün pwisin an tipis me än ekkewe aramas tipis ra föri lón ar wewengaw. 8Ren ekkeei öllük, ewe Ngüünmifel a pwääraló pwe ewe aal ngeni ewe Leeni mi Unusen Pin esap suuk ngeni ekkewe aramas lón unusen langattamen fansoun ewe äewin ruum mi chüen chök nóm. 9Ei a ew chök lioos fäniten ei kinikinin fansoun. Pün ekkewe liffang me ekkewe mönün asóren omwusomwusen tipis ekkewe souasór ra äänir asór resap tongeni limeti mwelien letipen ekkewe aramas mi uweato ekkewe asór. 10Pün ewe angangen asór minen lóóm ekkewe souasór seni ewe einangen Levi ra föri, a chök fänäsengesin mwöngó me minen wün me pwal ekkóch sokkopaaten angangen öörüni fäniten limelim. Ikkeei ekkóch öllük mi kawor fäniten chök meet epwe fis ngeni lükün inis tori ewe fansoun repwap äwenewensäfäl.

Ewe imwenfel lón läng

11Nge lupwen Kraist a war, I a wiliti ewe Souasór mi Lap fäniten ekkewe mettóch mi mwirinnö ra fen war. Iwe, I a tolong lón ewe imwenfel lón läng mi lapalaap o unusöch lap seni ewe minen mwan, esap för ren pöün aramas, wewen, esap för seni och mettóchun ei fönüfan. 12Lupwen Kraist a tolong lón ei imwenfel, esap uwealong chaan kuuch ika chaan ätemwäänin kowu. Kraist a tolong lón ewe Leeni mi Unusen Pin fän ew chök nge a naaf fäniten fansoun meinisin o a uwealong pwisin chaan. Iwe, I a äwesi le möönätiw liwinin ach sipwe kepichiló seni fän nemenien tipis tori feilfeilló chök. 13Pün are chaan ekkewe ätemwänin kowu me chaan ekkewe kuuch me falangen emön liälifföön kowu mi keek ra kasupwutä wón emön aramas mi nóm lón tettelin chón limengaw o epinaló pwe inisin epwe tongeni limöchüló, 14iwe, epwe le fen ifan me lapalón än ewe chaan Kraist epwe limeti letipach seni ekkewe föfför mi emmweni kich ngeni mäló, pwe sipwe tongeni fel ngeni ewe Kot mi manaw. Pün ren manamanen ewe Ngüün ese mwüch, Kraist a ääni asór pwisin inisin ngeni Kot pwe epwe och asór mi unus fäniten ach kana tipis.

15Iwe, ren ei popun, Kraist a wiisen ewe Chón Afföör fäniten ewe pwonen etipeew mi fö lefiilen Kot me aramas, pwe chókana meinisin mi kö repwe tongeni angei ewe älemwir esap mwüch Kot a pwon ngeniir, pwokiten Kraist a fen mäló pwe epwe möönätiw liwinin kepichilón tipisin ekkewe pwupwungaw ra föri fän ewe äewin pwonen etipeew.

Mi lamwot än ewe chón afföör epwe mäló

16Lupwen emön aramas a mäló, nge a likitätiw och emwirinimä, esap wor emön a angei och mettóch tori a leteló pwe ewe aramas mi makkeei ewe emwirinimä a mäló. 17Pün ewe emwirinimä a chök poputä le wor manan mwirin määlón ewe aramas mi makkei ewe emwirinimä. Nge lupwen ewe chón föri ewe emwirinimä mi chüen chök manaw, esap wor emön epwe aea ewe emwirinimä an epwe angei och leiin ekkewe mettóch mi pwon ngeniir. 18Iei popun, fän ewe akkomwen pwon, mi öüchchea pwe epwe wor chcha pwe epwe älelletätä pwe a wor mäló. 19Pün mwirin än Moses a wes le apasa ngeni ekkewe aramas meinisin masowen iteiten än Kot kewe öllük, a angei chaan ekkewe liälifföön ätemwänin kowu me chaan ekkewe kuuch fiti fengen me kólik. Iwe, a ottukalong ülün ewe irä hyssop me ülen siip mi parachól lón. Mwirin, a äsupwätä ewe chcha wón ewe pwuk pwal wón ekkewe aramas meinisin. 20Mwirin, a apasa: “Ei chcha iei önüküchcharen ewe pwonen etipeew Kot a ääni ngeni kemi.”a 21Pwal lón ei chök sókkun lapalap, Moses a äsupwu chcha ngeni ewe imwenfel mangaku pwal wón ekkewe pisek meinisin fäniten angangen lón ewe imwenfel. 22Enletin, sia tongeni apasa pwe fän pwüngün ewe öllükün Moses, arapakkan mettóch meinisin ra limelim ren an käsupwutä chcha ngeni, pün ika esap wor chcha mi süküló; iwe, esap wor omusomwusen tipis.

Än Kraist ääni asór manawan a fókkun lapalaap

23Iei minne, mi öüchchea pwe ewe imw mangakü minen fönüfan me iteiten ekkewe mettóch meinisin mi nóm lón, ikkeei liossun ekkewe mettóch mi nóm läng, ra limelim ren chaan ekkewe maan. Nge ekkewe enletin mettóch mi nóm läng ra limelim ren och sókkun asór mi mwirinnö lap seni chaan ekkewe maan. 24Pün Kraist a tolong lón wesewesen läng o pwääto mwen mesen Kot pwe I ach Chón Älillis. I esap tolong lón ewe leenien fel wón fönüfan förien pöün aramas pün iei och chök liossun ewe enletin imwenfel lón läng. 25Kraist esap pwal ekkeliwin le tolong läng fän chómmóng ren an epwe ääni asór pwisin inisin, esap usun ewe souasór mi lap wón fönüfan a tolong lón ewe Leeni mi Unusen Pin iteiten ier pwe epwe ääni asór chaan maan nge sap pwisin chaan. 26Pün are epwe iei usun; iwe, Kraist epwe enliwin fän chómmóng le riäfföü o mäló seni chök ewe fansoun fönüfan a för. Nge iei, Kraist a wareto fän ew chök fän iten fansoun meinisin lón ei lesópwólón kinikinin fansoun pwe epwe ataeló manamanen tipis tori feilfeilló chök ren an mäló pwe epwe ääni asór pwisin inisin fänitach. 27Iwe, usun chök an a fen appwonoló pwe emön me emön aramas epwe mäló fän ew chök, nge mwirin ena, epwe war ewe fansoun köpwüng. 28Iwe, pwal iei chök usun ren Kraist, pwokiten I a mäló fän ew chök ren an mwärelong fän liwinin tipisin chómmóng aramas. Mwirin, Kraist epwe waresäfälito fönüfan fän oruuwan, sap fäniten an epwe chüen föri och ren omwusomwusen tipis. Lón ena fansoun I epwe warsäfäl, epwe ölükülükü ngeni chókana mi osüküsükü le witiwiti an wareto pwe ar küna manaw a tiw meren Kot o unusöchchüló.

Ekkewe asór maan resap naaf

10 Pwokiten ewe angangen asór minen lóóm ekkewe souasór ra föri lón ewe öllükün Moses iir chök ngünüwen ekkewe mettóch mi mwirinnö Kraist a fen föri fänitach, nge sap ikkana wesewesen ekkewe mettóch mi mwririnnö, iei minne, ekkewe asór lón ewe akkóót minen lóóm ra enliwin me enliwin iteiten ier me ier, nge resap tongeni ar repwe ounusöchchüw le limeti manawen chókana mi feitto pwe repwe fel ngeni Kot. 2Pün are ekkewe asór repwe tongeni ounusöchchüw le limeti manawen ekkewe chón ääni ekkewe asór; iwe, ekkewe asór repwe le köüüló, pwokiten ekkewe chón fel ngeni Kot repwe le fen limöchüló fän ew chök nge a naaf fäniten fansoun meinisin o resap pwal chüen meefi mengiringirin mwelien letiper. 3Nge ekkewe asór mi fis iteiten ier me ier ra ächchemätä ngeni ekkewe aramas ar tipis, 4pwokiten esap fókkun tüfich pwe chaan ätemwänin kowu me kuuch repwe tongeni omwusaló tipis.

Än Kraist mäló a öpwönüetä letipen Kot

5Ina popun, lupwen Kraist a feitto lón fönüfan, I a apasa:

“En kosap efich ekkewe asór maan me ekkewe asóren mwöngö, nge En ka amollätä fänitei ew inis. 6En kosap pwapwa ren ekkewe maan mi keek wón ewe róngen asór me ekkewe pwal ekkóch asór fäniten omwusomwusen tipis. 7Mwirin, Ngang üwa apasa: ‘Nengeni, Ngang üwa feitto pwe üpwe föri letipom, O Kot, usun chök minne a mak fänitei lón ewe taropwe mi pin.’ ”a

8Akkomwan, Kraist a apasa: “En kosap efich ekkewe asór maan me ekkewe asóren mwöngö. En kosap pwapwa ren ekkewe maan mi keek wón ewe róngen asór me ekkewe pwal ekkóch asór fäniten omwusomwusen tipis.” (Inamwo ika ikkeei ekkewe asór mi affatetiw lón ewe öllükün Moses pwe aramas repwe ääniir.) 9Nge mwirin, I a sópweló le apasa: “Nengeni, Ngang üwa fen feitto pwe üpwe föri letipom, O Kot.” Iwe, I a öükätiw ewe akkomwen angangen asór minen lóóm pwe epwe öpwönüetä ewe oruuwen angangen asór mi fö. 10Iwe, ina letipen Kot, pwe I a mochen föri pwe kich sipwe pin fänitan ren än Jesus Kraist ääni asór inisin fän ew chök nge a naf fäniten aramas meinisin fansoun meinisin.

Än Kraist mäló a ounusaöchü le limeti manawen ekkewe mi käimwuló fäniten Kot

11Fän pwüngün ewe pwon minen lóóm, emön me emön souasór a üütä mwen ewe róngen asór iteiten rän o föri an angang. I a ekkeliwini le ääni asór ekkewe chök sókkun asór resap tongeni ar repwe omwusaló än ekkewe aramas tipis. 12Nge ach ei Souasór a ääni asór pwisin inisin ngeni Kot pwe epwe ew asór fäniten tipis mi naf fäniten aramas meinisin fansoun meinisin. Mwirin, a móttiw lón ewe leeni mi tekia peliifichin Kot. 13Seni ena fansoun I a chök witiwit tori än Kot epwe föri pwe I epwe ääni leenien pwuun pecheen chón opwutan kana. 14Pün ren ewe ew chök asór mi naf fäniten aramas meinisin fansoun meinisin, Kraist a föri pwe chókewe meinisin mi käimwuló repwe unusöchchüló.

15Iwe, ewe Ngüünmifel a pwal pwärätä ngeni kich usun ei pwe mi pwüng. Pün akkomwan a apasa:

16“Iei ewe pwonen etipeew Ngang üpwe ääni ngeniir mwirin ekkana rän, alon ewe SAMOL. Ngang üpwe atolonga äi kewe öllük lón letipeer pwe repwe weweiti. Iwe, Ngang üpwe makkeretiw lón ar ekiek pwe repwe älleasochisiir.”

17Nge mwirin, a pwal sópweló le apasa: “Ngang üsap chüen chechchemeni ar kewe tipis me ar kewe föfförün pwurätiw än Kot öllük.”b

18Iwe, mwirin än ekkeei tipis ra mwusóló, esap lamwot an epwe chüen wor asór fäniten omwusomwusen tipis.

Kömwöchünnük wón ölükülükün ämi ääni ewe manaw

19Iei minne, ämi pwii kana mi ächengicheng, iei sia tongeni tolong lón ewe Leeni mi Unusen pin fän apilükülük, pwokiten ewe chaan Jesus. 20Iei ewe aal mi fö mi fang ngeni kich manaw, Kraist a suki fänitach ren ach sipwe pwerelong me lón ewe refiref mangaku mi pin, wewen, iei inisin ren an mäló fänitach. 21Iwe, pwokiten sia ääni emön Souasór mi Lap mi nemeni ewe imwen Kot, 22öüsipwe arapeto ngeni fän mesen Kot fän letip mi wenechchar lón unusen ölükülükün ach lükü I, pün mengiringirin mwelien letipach mi ingaw ra fen utuut ren chaan Kraist o föri pwe sipwe limöch, pwal inisich ra fen töttöl ren kólik mi limöch. 23Öüsipwe kömwöchünnüküló wón ach apilükülük sia pwärätä pwe sia ääni ewe manaw ren, nge sisap wiliwilikkis, pün Kot ewe mi pwon ngeni kich a ölükülük. 24Iwe, öüsipwe ekieki usun ach sipwe alóllólätä emön me emön leiich ngeni tong me föfför mwirinnö. 25Sisap tümwününgaw ngeni ach sipwe emwicheich fengen lefiiach, usun ekkóch ra öörüni le föfföri, nge sipwe fen eneen le fönöw me epwichikkara fengeni lefiiach. Sipwe alapaló le föri ei sókkun, pün öüwa pwisin küna pwe ewe Ränin än Kraist epwe liwinsäfälito a arapakkan.

Ewe chón pwüng a manaw ren an lükü

26Pün are sipwe chök ouucho le fiti meet pwisin letipach a filätä ach sipwe chök sópweló le tipis mwirin ach sia fen unusen silei ewe let; iwe, esap chüen wor pwal och asóren omwusomwusen tipis epwe pwölüw ach kana tipis. 27Nge sia chök ösüküsükü ew enletin köpwüng mi eniwokkus me ewe ekkein än Kot soong mi ngetenget epwe kenaló ekkewe chón üüngeni I. 28Emön aramas esap mochen älleasochis ngeni än Moses we Öllük, a chök ninniló, nge esap wor och alen an epwe küna ümöümöch, alóngólóng wón minne rüömön ika ülümön chón pwärätä ra älletätä. 29Iwe, öüwa ekieki epwe ifa usun öükükün lapalón efeiengawen ewe köpwüng faniten emön mi pwurätiw fän pecheen ewe Nöün Kot o turunufasei chaan ewe pwon i a epinipiniló ren o ekieki pwe och mettóch esap pin? Ei sókkun aramas a eletipechchowu me asoonga ewe Ngüünmifel mi uwato än Kot ümöümöch wón aramas. 30Pün kich sia silei ewe Emön mi apasa: “Wisei chök pwe üpwe ngeni aramas chappen ar föfför. Ngang üpwe wiisen liwini ngeniir chappen ar föfför.” alon ewe Samol. I a pwal apasa: “Ewe SAMOL epwe wiisen öpwüngü Nöün kewe aramas.”a 31Iei och mettóch mi fókkun ömmösök, än emön epwe turulong lepöün ewe Kot mi manaw pwe epwe öpwüngü i.

32Nge öüpwe chemenisäfäli minne a fis ngeni kemi lón ekkewe fansoun lóóm, lupwen öüwa kärään chök käeö usun Kraist o a sarameló lón ämi ekiek. Öüpwe chechchemeni usun ämi üppós le engngiló fän osukosuken riäfföü mi lapalaap. 33Fän ekkóch öüwa küna turunufas me riäfföün ninni lepwääpwäló me mwen mesen aramas, pwal fän ekkóch öüwa tolong lón riäfföü ren ämi chiechi ngeni chókana mi tolong lón ekkeei sókkun riäfföü. 34Pün ämi öüwa pwääri ämi tong ngeni chókana mi nóm lón föötek. Lupwen ra angei seni kemi pisekimi fän pöchökkül, ämi öüwa pwal etiwa fän unusen ämi pwapwa, pün öüwa silei pwe a fen wor mettóch mi mwirinnö seni ra amollotä fänitemi repwe nónnóm tori feilfeilló chök. 35Iei minne, öüsap pöütaló ämi ei apilükülük lón ewe Samol, ese lifilifil ika meet a fis ngeni kemi. Öüpwe chechchemeni pwe mi wor liiwin mi fókkun lapalaap epwe tori kemi.

36Iwe, mósónóttam le engngiló ina meet ämi öüwa osun iei, pwe öüpwe tongeni sópweló le föri letipen Kot. Mwirin, öüpwe angei meinisin minne I a pwon ngeni kemi.

37Pún “ekis chök fansoun, ewe Emön epwe feitto, epwe war, nge esap mang. 38Nge, neii we chón pwüng epwe küna manaw ren an lükü. Nge Ngüni esap pwapwa ren emön mi kul seni Kot.”b

39Nge kich sisap ällealong leiin chókana mi kul seni Kot o tolong lón ewe küpwüngün eterialó, nge kich sia ällealong leiin chókana iir mi lükü o amanawa ngünüür.

Sia weweöch ren ach lükü

11Lükü, iei ach älleta pwe ekkewe mettóch sia apilükülükür repwe fókkun fis, pwal iei ach ächiööwü woren ekkewe mettóch sisap küneer. 2Iei popun pwe Kot a etiwa ekkewe aramasen lóóm, pwokiten ar lükü.

3Ren lükü, sia tongeni weweiti pwe mettóch meinisin mi wor lón läng me fönüfan fiti akkóóter me mwökütükütür ra förütä ren än Kot kapas. Pwal ren lükü sia weweiti pwe meet sia küna ren mesach iei, resap för seni ekkana mettóch kich mi tongeni küna ren mesach.

Lükü a pwä lepoputän uruwon fönüfan

4Ren än Abel lükü, i a ääni asór ngeni Kot och asór mi koon echchipwör lap seni än Kain asór. Ren än Abel lükü, Kot a etiwa an kewe asór pwe epwe älleleta le pwärätä pwe i emön chón pwüng. Iwe, inamwo are Abel a fen mäló chök melóóm, nge a chüen chök kakkapas ngeni kich, pwokiten an lükü.

5Ren än Enok lükü, Kot a uweeló i läng ina popun esap mäló. Esap wor emön a chüen küna i, pwokiten Kot a uweeló. Nge me mwen än Kot a uweeló i, a wor ölükülükün pwärätä ren manawen ätei pwe i a föri minne Kot a pwapwa ren.c 6Esap fókkun tüfich än emön aramas epwe apwapwai Kot, are esap wor an lükü. Pün iö mi mochen epwe feitto ren Kot, epwe fókkun lükü pwe mi wor Kot, epwe pwal lükü pwe I ewe chón liwini chókana mi tilikken le kütta I.

7Ren än Noah lükü, a mwöküt lón an suuföliti Kot o a falei efóch waaimw pwe epwe amanawa an famili seni ewe nóóter. Noah a älleasochisi Kot, lupwen Kot a esile ngeni i usun efeiengawen ewe mettóch esap mwo fis fän ew me mwan. Ren an lükü, a öpwüngü le fönööw ekkewe lussun aramasen fönüfan, o a wiliti emön chón älemwiri än Kot pwüng mi alóngólóng wón lükü.

Abraham ewe mi tupwöl

8Ren än Abraham lükü, a älleasochis lupwen Kot a köri i pwe epwe toowu seni fönüwan o feilló ngeni pwal ew fönü Kot epwe fang ngeni me mwirin pwe fönüwan. Iwe, a feilló inamwo ika esap silei ia we i epwe feilló ie. 9Ren an lükü, lupwen a tori ewe fönü Kot a pwon ngeni, i a nónnóm ikenan usun chök nge i emön chón ekis, pün a chök imweim imw mangaku. Iwe, pwal ina chök usun ren Isaak me Jakob, iir ekkewe Kot mi ngeniir pwal ewe chök pwon. 10Abraham a föri ei, pwokiten i a apilükülük le witiwiti ewe telinimw mi wor lóngólóngun kana resap mwüch, pwisin Kot ewe chón alapalapa me chón öüüwetä. 11Ren än Sarah me än Abraham lükü, a tongeni wor emön nöüür, inamwo ika iir me rüwömön ra fókkun chinlap, nge Sarah a riit. Abraham a lükü pwe Kot a ölükülük an epwe öpwönüetä minne I a ääni pwon. 12Ina minne, unusen ew mwüü a feitto seni ei emön chök aramas Abraham, inamwo ika itä usun chök nge a mäló pün a luuló ierin an epwe tongeni wor nöün. Iwe, a wor chómmóng mwirimwirin kana ra upwutiw usun chök chómmóngun ekkewe füün läng, rese pwal tongeni repwe lea usun chök ekkewe föün ppi mi nóm arosset.

Ewe epilükülük mi nóm läng

13Ekkeei aramas meinisin mi lükü ra mäló, nge resap angei minne Kot a pwon ngeniir. Ra chök nennelói me toowaw minne Kot a ääni pwon ngeniir o etiweer. Ra tipeew ngeni le pwärätä pwe iir chón wasööla chök me chóisä wón fönüfan. 14Pün chókewe mi apasatä ekkeei sókkun kapas, ra affatafichi le apasa pwe iir ra kütta ew fönü ra tongeni eita ngeni pwe ina pwükütään fönüer. 15Iwe, enletin pwe ika iir ra ekieki usun ewe fönü ra toowu seni; iwe, mi wor ar fansoun fich ar repwe liwinisäfäl ngeni. 16Nge esap ina, pün iir ra kütta ew fönü mi mwirinnö seni ewe ra toowu seni, wewen, ra kütta ew fönü mi nóm läng. Iei minne, Kot esap sääw ren ar repwe köri ngeni I pwe I ar Kot, pün I a fen amollätä ew telinimw lón läng fäniter.

Än chón Israel kewe leewo me ar lükü

17Ren än Abraham lükü, a ääni asór Isaak lupwen Kot a sótuni i. Abraham, ewe mi angei än Kot kewe pwon, a mollotä pwe epwe ääni asór Isaak nöün we emön chök i a nöüni fän pwüngün än Kot pwon ngeni. 18Iei i ätewe Kot a pwon ngeni Abraham pwe “mwirimwirum kana meinisin repwe äleewoto seni Isaak noum we.”a 19Pün Abraham a fen öpwüngaló lón an ekiek pwe are mwo nöün we epwe mäló, nge Kot mi tongeni epwe amanawasäfälietä i seni mäló. Ren meet ewe a fis, a eliosunäta pwe usun chök nge Abraham a angeisäfäli Isaak seni mäló.

20Ren än Isaak lükü, a efeiöchü nöün kewe rüwömön mwän Jakob me Esau. A wor an apilükülük lón meet Kot epwe föri me mwirin.

21Ren än Jakob lükü, lupwen a fätäl ngeni an epwe le mäló, a efeiöchü emön me emön nöün Josef kewe. Mwirin, a öüra ngeni wókun we o fel ngeni Kot.

22Ren än Josef lükü, lupwen a arap ngeni an epwe mäló, a kapas fän apilükülük usun än Kot epwe emmwenawu ekkewe aramasen Israel seni Egypt. I a fókkun ächiföüwa usun, iei popun a awora an kapasen emwirimwir ngeniir pwe repwe uweei chüün kana lupwen repwe feilló seni Egypt.

Än Moses lükü

23Ren än Moses lükü, lupwen a upwutiw, saman me inan kewe ra aopaló i lón ükükün ülüngät maram, pwokiten ra küna pwe Kot a fang ngeniir emön monukól mi sókkóló. Iwe, resap nuokkusiti än ewe king we öllük.

24Ren än Moses lükü, lupwen an a tori ierin mwän, esap mochen pwe repwe köri ngeni pwe i nöün nöün Farao we föpwül. 25Nge i a fen filätä pwe epwe fiti nöün Kot kewe aramas le riäfföü lap seni an epwe apwapwai manawan lón pwapwan tipis mi mwüchchükkäi 26A ekieköchüw o öpwüngaló pwe an küna itengngaw fäniten ewe Messiah iei och wöw mi lapalaap öüchchean lap seni ekkewe wöwün lón Egypt; pün i a nennengeni ewe liiwin Kot epwe ngeni i me mwirin. 27Ren än Moses lükü, a likitaló Egypt, nge esap nuokkusiti än ewe king soong. Moses esap fangatä, pwokiten i a afóta mesan wón ewe Emön sisap tongeni küna ren mesach. 28Ren än Moses lükü, i a öllük ngeni ekkewe aramasen Israel pwe repwe öpwönüwetä ewe Pasofer me äsupwu ewe chcha wón penkasamen imweer kewe pwe ewe chón läng chón niieló ekkewe mwänichi nöün chón Egypt esap niieló ekkewe mwänichi nöün chón Israel.

29Ren än ekkewe chón Israel lükü, ra pwereló lón ewe Setipar usun chök nge ra fätäl wón fönü mi pwasapwas. Nge lupwen ekkewe chón Egypt ra tapweló mwiriir, iir meinisin ra malumw.

Ekkewe chón Israel ra wiil ren ar lükü

30Ren än ekkewe chón Israel lükü, ra pwellifeil ünükkün tittin ewe telinimw Jeriko lón üküükün fisu rän. Iwe, ekkewe tiit ra turutiw.

31Ren än ewe fiin lisowu Rahap lükü, i esap mäló fiti ekkewe aramas meinisin lón an we telinimw resap mochen älleasochis ngeni Kot. Pün neminnei a etiwa ekkewe chón operi ewe fönü fän kinamwe.

32Iwe, pwal meet ngang üpwe sópweló le apasa? Pün epwe langattam fansoun äi üpwe aporausa porausen än Kideon me Barak me Samson me Jefthah lükü, pwal usun än David me Samuel me ekkewe soufós meinisin luku. 33Ren än ekkeei aramas lükü, ra okkufu ekkewe mwüü, ra nemenem fän pwüng, ra angei meet Kot a pwon ngeniir. Ren ar lükü, ra pineei awen ekkewe laion, 34ra kunuweló ngetengeten ekkei, ra tiweló seni ar repwe ninniló ren ketilas. Ar apwangapwang a wiliti pöchökkül, ra wiliti chón pwora lón maun o okkufu ekkewe mwichen sounfiun chón ekis. 35Mi wor ekkóch fefin ra angeisäfäli ar kewe soomä, ra fen mäló nge ra manawsäfäl. Ekkóch aramas ra lükü Kot nge ra tolong lón riäfföü. Iwe, ra fen saani ar repwe mäló lap seni ar repwe kul seni Kot o kangaseló, pün ra apilükülükü pwe repwe manawsäfäl ngeni ew manaw mi miwinnö. 36Pwal ekkóch ra küna turunufas, a taatakis sökürüür ren wichiwich, ewer, pwal ekkóch ra fööfö ngeni sein o koturulong lón pwaang fän pwül pwe repwe kalapwuus. 37Ekkóch ra mäló ren än aramas móneei ngeniir faaw, ekkóch ra ngerenger fesen inisiir, ekkóch ra tolong lón sóssót, ekkóch ra ninniiló ren ketilas. Ekkóch ra fätälfeil fän üfeer mi för seni ünüchchen siip me ünüchchen kuuch, ra echik, ra rïäfföü, aramas ra turunufaser. 38Iir ekkewe esap wor fineteer me lón ei fönüfan. Ra chök nómfeil lón ekkewe fönüpöön me pwal wón ekkewe chuuk, ra nóm lón ekkewe fööimw pwal lón ekkewe pwaang fän pwül.

39Ekkeei aramas meinisin sia föüniir ra iteüöch meren Kot, pwokiten ar lükü, nge esap wor emön leiir a angei unusen minne Kot a pwon ngeniir, 40pwokiten Kot a anómwu lón an akkóót och mettóch mi fókkun mwirinnö fänitach, pwe iir resap mwo ounusöchchüló tori kich sipwe unusöchchüló.

Ewe kitirin lükü

12 Iei minne, pwokiten a wor ew tupwuopwuen mwichen chón pwärätä mi pwellikicheló, iwe, pwal kich sipwe likitätiw iteiten kana mettóch mi ochchowukichetin pwe repwe ammangakicheló me kana sókkun tipis mi mecheres ar repwe elikefiffi kich. Nge sipwe öttüresiló le ssä o ekitacho ngeni le äwesaló ei kitir mi nóm mwach. 2Öüsipwe chök afóta mesach wón Jesus, I ewe chón popuetä me chón ounusöchüweló ach lükü. I a tipeni an epwe ötturesiló fän ässääwin an epwe mäló wón ewe iräpenges, pwokiten ewe pwapwa I mi silei pwe epwe angei me mwirin. Iwe, iei I a móttiw lón ewe leenien tekia lepeliifichin än Kot we leenien móótun king lón läng.

Än Kot angangen emiriti nöün kana

3Öüpwe ekieki usun meinisin minne Jesus a engngiló fan lupwen ekkewe chón tipis ra föri ekkewe sókkun föfförün kopwut ngeni I, pün öüsap mölüülüló o achaanü lón manawemi.

4Ämi, öüsap mwo tori ewe öükük ämi öüpwe ninniló ren ämi öttüres le üüngeni tipis. 5Nge öüwa fen unusen möllükaló ekkewe kapasen öüröür Kot a apasa ngeni kemi pwokiten ämi nöün. A apasa:

“Neii, kosap öüchchea ngawei än ewe SAMOL angangen fönen emiriit ngenuk. Kosap pwal ekiekin achaanu lupwen I a öpwünguk. 6Pün ewe SAMOL a emiriti le fönöw iö I a echeni. A pwal wichii iteiten emön me emön I a etiwa pwe nöün.”a

7Are Kot a fönöw le emiriti kemi, öüpwe chechchemeni pwe I a föri ngeni kemi ei sókkun pün ämi nöün. Pün menni emön naaw saman esap fönöw? 8Nge are Kot esap fönöw kemi usun an fönöw nöün kana meinisin; iwe, ämi upwun leroch nge sap ämi wesewesen nöün. 9Iwe pwal och, kich sia suuföliti samach kana lón peekin fituk lupwen ra öpwüngü kich ren meet sia mwääl wón. Ifa usun, sisap fen koon mwittir pwapwa ngeni ach sipwe anómwu kich fän än Samach we lón peekin ngüün nemenem pwe sipwe manaw feilfeilló chök ren? 10Pün samach kana lón peekin fituk ra fönöw le emiriti kich lón fansoun mi chök mwochomwooch usun meet ra ekieki pwe a pwüng mereer. Nge Kot a fönöw le emiriti kich fäniten an ekieki minne epwe mwirinnö ngeni kich, pwe sipwe chiechi ngeni I lón an pin. 11Iwe, esap wor och köpwüngün emiriit sipwe mefi ach pwapwa ren lón ewe atun sia köpwüng, pün a emmetek. Nge chókana mi angei ewe köpwüngün emiriit ra sipeöch ren. Iwe, mwirin, ra uwääni ewe uwään manawen pwüng mi uren kinamwe.

Asöfösäfäli pöchökkülen ngünümi

12Iei minne, öüpwe öpöchökküla pöümi kana mi apwangapwang o sumwutiw, öüpwe üchcharatä wón pwäsukumi kana mi määmä. 13Öüpwe esissila efóch aal mi wenechar fäniten ia pecheemi repwe fätäl ie. Mwirin, chókana mi tapweto mwirimi resap chepetek o turuló, inamwo are ra apwangapwang o mwöömwö, nge repwe fen pöchökkülsäfäl.

14Öüpwe achoocho ngeni ämi öüpwe manaweni manawen kinamwe ngeni aramas meinisin, öüpwe pwal kütta ämi öüpwe manaweni ew manaw mi limöch me manawen pin, pün are esap wor ekkeei sókkun manaw lón manawemi; iwe, esap wor emön epwe küna ewe Samol. 15Öüpwe tümwünu le masa fengeni kemi lefiilemi pwe esap wor emön me leiimi epwe sipelük me lükün än Kot we ümöümöch. Öüpwe tümwünü kemi pwe esap pwükütä efóch waaren lükülükümang mi maras lefiilemi, pün lupwen epwe pwükütä, epwe efisätä fitikoko o chómmóng repwe limengaweló ren poisonun. 16Öüpwe tümwünüfichi pwe esap wor emön epwe manaweni manawen lisowu ika manaweni manawen osuufölüngawei Kot usun Esau. I ätewe mi amömöló wiisan we wiisen mwänichi fäniten och chök mwöngö. 17Usun öüwa fen silei pwe lupwen a mochen epwe angei feiöchün ewe wiisen mwänichi meren saman we me mwirin, nge esap chüen ketiw, pün esap tongeni föri minne saman we epwe siwili an ekiek ren, inamwo are a resin le kütta an epwe angei ewe feiöch fän chönün mesan.

Ew mwichen aramas mi amwaraar

18Pün ämi öüsap feitto ren ew wesewesen chuuk, öüsap feitto ren ew chuuk mi ngetenget ren ekkei, öüsap feitto ngeni ew leeni mi rochopwak o topwutopw me mölümöl usun minne a fis ngeni ekkewe chón Israel me órun ewe chuuk Sinai, lupwen Kot a ngeniir an kewe öllük. 19Pün iir ra rongorong och tikin rappwa mi tikimmóng me och móngüüngü mi eniwokkus a kakkapas, iei minne ra tuttungór maaw ngeni Kot pwe esap chüen sópwósópwóló le kapas ngeniir, 20pwokiten esap kofichin kii ngeniir meet än Kot we öllük a apasa: “Are mwo pwe emön maan epwe tórii ewe chuuk, epwe fókkun mómmón ngeni faaw ika ppek ngeni föün esefich.”b 21A men fókkun eniwokkus minne ekkewe aramas ra küna, ina pwata Moses mwo nge a apasa: “Ngang üwa fókkun nuokkus o chechcheech.”c

22Nge ämi öüwa feitto ngeni ewe Chuuk Zion, öüwa feitto ngeni ewe telinimw än ewe Kot mi manaw, ewe Jerusalem in läng. Öüwa feitto ngeni ngöröwüröün mwichen chón läng resap lea mi emwicheich fengen fän pwapwa. 23Ämi öüwa feitto ngeni ewe mwichen chón pin, iir chón fiti Kraist le älemwirini ewe wiisen mwänichi, a mak iteer lón läng. Ämi öüwa feitto ren Kot ewe Souköpwüng epwe öpwüngü aramas meinisin. Ämi öüwa feitto ren ngünün ekkewe aramas chón pwüng lón läng nge iei ra unusöchüló. 24Ämi öüwa feitto ren Jesus, ewe chón afföörün ew pwonen etipeew mi fö lefiilen Kot me aramas, öüwa feitto ren ewe chcha mi kkäsupw a ääni kapasen ümöümöch le ömwüsaló tipis nge esap ääni kökköön angei chappen tipis usun minne chaan Abel we a föri.

Öüseling ngeni ewe möngüüngu seni läng

25Iwe, öüpwe tümwünüfichi pwe öüsap asarongorong ngeni Kot ewe mi kapas ngeni kemi. Pün are ekkewe aramasen Israel resap tongeni sü seni chappen tipisin ar resap mochen öüseling ngeni Moses, nöün Kot we chón künö mi fönöör me wón ei fönüfan; iwe, epwe le fen ifa me efeiengawan ngeni kich, are sipwe asarongorong ngeni ewe Emön mi kapas ngeni kich seni läng! 26Lón ewe atun, lupwen Kot a kapas seni wón ewe chuuk Sinai, möngüüngün a ächechcha fönüfan. Nge iei I a ääni pwal ew pwon o apasa: “Pwal fän ew, Ngang üpwe ächechcha sap chök fönüfan, nge i pwal läng.”a 27Wewen ei itiitin kapas “pwal fän ew” a esissilätä pwe iteiten mettóch meinisin mi för repwe taaló, ikkana ekkewe mettóch mi tongeni cheech, pwe ekkewe chök mettóch resap tongeni cheech repwe nómwóló tori feilfeilló chök.

28Iei minne, pwokiten sipwe mwuuni ew Mwüü esap tongeni taaló, sipwe pwääri ach kilisou o apwapwai Kot ren ach sipwe fel ngeni I fän nuokkus mi pin me suuföl. 29Pün ach ei Kot, I och ekkei mi unusen kenaló minne a keni.

Öüröürach fäniten lapalapen ach sipwe manawöch

13 Öüpwe sópweló le ääni ewe tongen lefiilen pwiipwi fengen lefiilemi. 2Öüsap tümwününgaw ngeni ämi öüpwe etiwa waasöla, pün ren än ekkóch ra etiwa waasöla; iwe ra awasölai chón läng nge resap silei. 3Öüpwe chemeni ekkewe chón kalapwuus. Öüpwe fitiir le riäfföü usun chök itä nge ämi mi nóm reer lón imwen föötek. Öüpwe pwal chiechi ngeni chókana mi letipeta pwokiten aramas ra eriäfföüür, usun chök itä nge ämi mi meefi lón inisimi ar metek.

4Epwe wor suufölün öpwüpwülü me leiin aramas meinisin. Ekkewe chök mi öpwüpwülü fengen ra limöch ar repwe kóón fengen lón kieer, pün Kot epwe öpwüngü ekkana aramas mi föri föfförün lisowu me chókana mi lisowu ngeni mi pwüpwülü. 5Öüpwe äfälli kemi pwe manawemi epwe ngas seni mocheniän pisek me mooni, nge öüpwe menemenöch ren ekkewe mettóch ra wor reemi. Pün pwisin Kot a apasa:

“Ngang üsap likitukóló, üsap pwal pöütukóló.”b

6Iei minne sia tongeni apilüköch le apasa:

“Ewe SAMOL, I äi Chón Älillis, ngang üsap nuokkus. Meet aramas epwe tongeni föri ngeniei?”c

Öüröürach fäniten pwüngün föfförün ach lamalam

7Öüpwe chechchemeni chókana ra wiisen emmweni kemi, iir ekkewe ra afföüw ngeni kemi le apasa ewe kapasen Kot. Öüpwe ekiekifichi usun ekkewe mettóch mi mwirinnö ra feitto seni manawer. Iwe, öüpwe appirüw ar lükü ewe Samol. 8Jesus Kraist a usun we chök lóóm, ikenäi o tori feilfeilló chök.

9Öüsap tupwutä ren kana sókkopaaten käit mi sókkóló. Pün pöchökkülen ngünümi a feitto seni än Kot ümöümöch, nge sap seni ach älleasochis ngeni sókkun öllükün öörünien lamalam usun öllükün mwöngö esap wor lamwoter ngeni chókana mi föri pwüngüür. 10Mi wor ew ach róngen asór, ekkewe souasór mi angang ngeni ewe imwenfel mangaku wón fönüfan resap tongeni ar repwe mwöngö seni ewe asór mi nóm wón pün esap wor ar pwüüng.

11Fän pwüngün än ekkewe chón Sus kewe öllük, ewe souasór mi lap a uwealong chaan ekkewe maanün asór lón ewe Leeni mi Unusen Pin pwe asóren omwusomwusen tipis. Nge inisin ekkewe maan, ra keekiló lón ewe leeni ünükkün ewe leeni ia aramas ra imweim ie. 12Iei minne, pwal Jesus a riäfföü o mäló lükün asamen tittin ewe telinimw, pwe epwe epinaló ekkewe aramas ren pwisin chaan. 13Iei minne, öüsipwe feiliwu ren Jesus lükün ewe leeni ia aramas ra imweimw ie o sipwe mwärelong fän ewe itengaw I a mwärelong fan. 14Pün ei fönüfan esap iei ach leenien wilipós, nge sia ösüküsükü ach we telinimw lón läng epwe wareto.

15Ina minne, ren än Jesus älillis, sipwe sópweló le ääni asór ach mwareiti Kot, wewen, iei üwään tinnawach ach sipwe pwärätä ach kilisou le elingaló itan. 16Nge öüsap mollükaló ämi öüpwe föri minne mi mwirinnö me ämi awora wiisen chókana mi osupwang seni meet mi wor reemi, pün ikkeei sókkun asór Kot a fókkun pwapwa ren.

17Öüpwe älleasochis ngeni nöümi kana souemwen o anómwu kemi fän ar nemenem ren ämi föri meet ra apasa. Pün iir ra wiisen mammasa fichi manawen ngünümi, nge iir ra silei pwe repwe küna etittin me fän mesen Kot ren meet ra föri fänitemi. Öüpwe awora ngeniir popun ar repwe föri wiseer fän pwapwa, nge sap fän efitengngün weiresin letiper, pün ei esap wor lamwotan ngeni kemi

Tungór fäniten iótek

18Öüpwe iótek fäniteem; pün äm aia älleta pwe a limöch mwelien letipeem, pwokiten äm aia mochen pwe äipwe iteüöch lón föfförun manaweem lón mettóch meinisin. 19Ngang uwa koon wesewesen peseei kemi pwe öüpwe iótek pwe ngang üpwe tongeni mwittir liwinsäfäliti kemi.

Kapasen efeiöch. Ömwüchchülón kapasen fön. Kapwongen kósópw

20Iwe, amwo ewe Koten kinamwe, ewe mi amanawa säfälietä ach we Samol Jesus seni mäló epwe amollafichi kemi pwe öüwe sipeöch le föri minne letipan, lón sókkun angang mi mwirinnö meinisin. 21Amwo epwe pwal föri lón manawemi minne a fich me fän mesan ren manamanen Jesus Kraist, I ewe Chón Masen siip mi Lapalaap ren ewe pwonen etipeew esap mwüch mi sain ren pwisin chaan. I epwe ling lón fansoun ese mwüch tori feilfeilló chök. Amen.

22Iwe, ngang üwa tungór ngeni kemi ämi pwii kana, pwe öüpwe engngiló ngeni le etiwa äi kewe kapasen fön ngang üwa makkei ngeni kemi lón ei taropwe mi chök mwochomwooch.

23Ngang üwa mochen pwe öüpwe pwal silei pwe iei pwiich we Timothy a mwusowu seni lón föötek. Are epwe mwittir feitto ikeei, i epwe fitiei le feilló ämwa kemi.

24Öüpwe uwei äi kapwong ngeni nöümi kana souemwen meinisin me kana pwal ekkóch chón pin mi nóm ikena. Ekkewe chón lükü seni Italy ra tiinawow ar kapwong ngeni kemi.

25Än Kot ümöümöch epwe nónnóm reemi meinisin. Amen.