Hakkai

Ewe öllük pwe ewe imwen Kot epwe köüüsäfälitä

1 Iwe, lón ewe oruuwen ierin mwüün Darius a kingen Persia, lón äewin ränin ewe awonuwen maram, ewe SAMOL a kapas ngeni ewe soufós Hakkai fäniten Zerubbabel nöün Shealtiel we mwän, ewe kepinan Judah, me Joshua nöün Jehozadak we mwän, ewe souasór mi lap:

2Iei meet ewe SAMOL mi Unusen Manaman a apasa: “Ekkeei aramas ra apasa, ‘Esap mwo tori ewe fansoun an epwe köüüsäfälitä imwen ewe SAMOL we.’ ”

3Iei minne, ewe SAMOL a ökkünöü ngeni ewe soufós Hakkai pwe epwe üreni ekkewe aramas ei poraus: 4“Ifa usun, öüwa ekieki ika mi pwüng pwe a iei fansoun pwe pwisin ämi öüpwe nóm lón imw mi ofout etippan, nge ei imwenfel mi chök chüen taaló?”

5Iei minne, iei meet ewe SAMOL mi Unusen Manaman a apasa: “Öüpwe fókkun ekiekiöchüw ämi kewe föfför. 6Ämi öüwa fótukätiw chómmóng, nge a chök kükkün minne öüwa kinii. A wor enemi mwöngö, nge öüsap kirises ren. A wor ünümemi wain, nge esap naf ämi öüpwe menemenöch ren. A wor üfemi, nge esap naf ren ämi öüpwe meefi pwichikkar. Öüwa angei liwinin ämi angang, nge a usun chök öüwa isenalong lón ew pwees mi wor pwaang lón.”

7Iwe, iei meet ewe SAMOL mi Unusen Manaman a apasa: “Öüpwe fókkun ekiekiöchüw ämi kewe föfför ren minne a fis ngeni kemi. 8Öüpwe feittä wón ekkewe chuuk o uwowtiw irä pwe öüpwe öüüwsäfälietä ewe imwenfel, pün ngang üpwe pwapwa ren o küna ling ren,” ewe SAMOL a apasa. 9“Ämi öüwa ösüküsükü ew fansoun kinikin uwään rääs mi wätte, nge nengeni, a fis pwe a chök kükkün minne öüwa kinii. Minne ämi öüwa uweato lón ämi leenien iseis, ngang üwa usaaló. Pwata? Pwokiten imwei we imwenfel a chüen nóm nge mi taaló, nge emön me emön leiimi a likittiló le köüütä en me iwan mi mwirinnö. 10Iei minne, pwokiten ämi föfför, läng a ömwöchü ewe omwurenipwin, nge fönüfan a pwal ömwöchü ekkewe irän mwömwöngö ar repwe pwükütä. 11Ngang üwa köörato ew fansoun pwasapwas wón ewe fönü, wón ekkewe chukuchukutä me wón ekkewe tännipiin wiit, wón ekkewe tännipiin irän wain me irä olif, pwal wón meinisin minne ra fót wón ewe fönü, pwal wón aramas me maan me wón angangen pöümi.”

12Mwirin, Zerubbabel nöün Shealtiel we mwän me Joshua nöün Jehozadak we mwän, ewe souasór mi lap me meinisin ekkewe lussun aramas mi chüen manaw ra älleasochis ngeni alon ewe SAMOL ar we Kot me ewe poraus ewe soufós Hakkai a aronga ngeniir, pwokiten ewe SAMOL ar we Kot a tiinató i reer. Iwe, ekkewe aramas meinisin ra nuokkusiti ewe SAMOL.

13Mwirin, Hakkai, nöün ewe SAMOL we chón künö, a esile ngeni ekkewe aramas ei poraus meren ewe SAMOL: “Ngang mi nóm reemi,” ewe SAMOL a osomänetiw. 14Ina minne, ewe SAMOL a etipetipätä letipen Zerubbabel nöün Shealtiel we mwän, i ewe kepinan Judah, me letipen Joshua ewe souasór mi lap, pwal letipen ekkewe lussun aramas mi chüen manaw. Iwe, ra feitto o poputä le angang wón imwen ewe SAMOL mi Unusen Manaman ar we Kot, 15lón ewe rüwe me rüwänüwen ränin ewe awonuwen maram lón oruuwen ierin mwüün ewe king Darius.

Wareton lingen ewe imwen Kot mi fö

2 Iwe, lón ewe oruuen ierin än King Darius nemenem, lón rüwe me ewin ränin ewe efisuwen maram, ei poraus seni ewe SAMOL a tori ewe soufós Hakkai. A apasa: 2“Iei kopwe kapas ngeni Zerubbabel nöün Shealtiel we mwän, ewe kepinan Judah, ngeni Joshua nöün Jehozadak we mwän, ewe souasór mi lap, pwal ngeni ekkewe lussun aramas mi chüen manaw lón ewe fönü. Kopwe eisiniir, 3‘Iö me leiimi ekkeei lussun aramas mi chüen manaw a küna ei imwenfel lón lingan melóóm? Iwe, ifa usun mereemi ämi öüwa küna ei imwenfel ikenäi? Ifa usun, ei imwenfel esap lapalapangaw lón ämi nennengeni? 4Nge iei kopwe öpöchökkülók en Zerubbabel,’ ewe SAMOL a osomänetiw. ‘Kopwe öpöchökkülók en Joshua nöün Jehozadak we mwän, ewe souasór mi lap. Öüpwe öpöchökküla kemi o angang ämi ekkewe aramas meinisin mi chüen nómwetiw lón ewe fönü,’ ewe SAMOL a osomänetiw. ‘Pün ngang mi nóm reemi,’ ewe SAMOL mi Unusen Manaman a osomänetiw. 5‘Iei meet ngang üwa ääni pwon ngeni kemi lupwen öüwa toowu seni Egypt pwe ngang üpwe eti kemi. Iwe, Ngüni a nónnóm lefiilemi. Iei minne, öüsap nuokkus.’

6Pün iei meet ewe SAMOL mi Unusen Manaman a apasa: ‘Mwirin ew chök fansoun mi mwochomwooch, ngang üpwe ächechchasäfäli läng me fönüfan, pwal mataw me fönüpwas. 7Ngang üpwe ömwökütükütü chón ekkewe mwüü pwe repwe feitto ren ei leeni fän wöwüür. Iwe, ngang üpwe ouraló ei imwenfel ren ling,’ ewe SAMOL mi Unusen Manaman a apasa. 8‘Ewe silifer äi, pwal ewe kolt äi,’ ewe SAMOL mi Unusen Manaman a osomänetiw. 9‘Lingen ei imwenfel lón ei fansoun epwe lapalaap seni lingen ewe imwenfel melóóm,’ ewe SAMOL mi Unusen Manaman a apasa. ‘Iwe, ngang üpwe mwüütätä pwe epwe wor kinamwe lón ei leeni,’ ewe SAMOL mi Unusen Manaman a osomänetiw.

Ekkewe feiöch fäniten ew mwichen aramas mi limengaw

10Iwe, lón rüwe me rüwänüwen ränin ewe ettiuwen maram, lón oruuwen ierin än Darius a kingen Persia, iei än ewe SAMOL kapas a tori ewe soufós Hakkai: 11“Iei meet ngang ewe SAMOL mi Unusen Manaman üwa öllük ngenuk: ‘Kopwe eisini ekkewe souasór ika meet ewe öllük a apasa usun ekkeei mettóch: 12‘Epwe ifa usun ika emön me leiimi a uweei och asóren fituk mi pin lón lumun üfan, nge üfan we a ökküüw och pilawa ika och mwöngö mi mwoot, ika och wain ika apüra ika pwal och mwöngö, ifa usun, epwe le pin ewe mettóch ewe üüf a ökküüw?’ ”

Iwe, ekkewe souasór ra pölüweni o apasa, “Apw!”

13Mwirin, Hakkai a apasa, “Are emön aramas a nóm lón tettelin chón limengaw pwokiten an attapa emön soomä, nge a pwal attapa och me leiin ekkeei mettóch; ifa usun, ewe mettóch epwe le limengaw?”

Iwe, ekkewe souasór ra pölüweni o apasa, “Ewer, ewe mettóch epwe limengaw.”

14Mwirin, Hakkai a apasa, “ ‘Iwe, pwal iei chök usun ren ei mwiichen aramas me chón ei mwüü me fän mesei,’ ewe SAMOL a osomänetiw. ‘Ese lifilifil meet iir ra föri, ese pwal lifilifil meet iir ra ääni asór, a limengaw.

15“ ‘Ina minne öüpwe fókkun ekiekiöchüw usun ei seni ei rän feilló - öüpwe fókkun ekiekiöchüw usun minne a fis ngeni kemi me mwen ämi öüwa senätä föün lóngólóngun än ewe SAMOL we imwenfel. 16Lupwen emön aramas a ösüküsükü pwe epwe angei rüwe öüküükün föün wiit, nge a chök wor engol. Pwal lupwen emön a ösüküsükü pwe epwe angei lime ruumen wain seni lón ewe leenien üchüüch föün irän wain, nge a chök wor rüwe. 17Ngang üwa efeiengawa meinisin angangen pöümi ren mwooi me mesenipik me üten faaw, nge ämi öüsap kul ngeniei,’ ewe SAMOL a osomänetiw. 18‘Seni ei rän feilló, seni ei rüwe me rüwänüwen ränin ei ettiuwen maram, öüpwe fókkun ekiekiöchüw usun ewe rän lupwen ewe lóngólóngun än ewe SAMOL we imwenfel a tawe. Iei meet öüpwe fókkun ekiekiöchüw usun: 19Ifa usun, mi chüen wor föün wiit ra nóm lón ämi kewe imwen iseis? Tori iei, ekkewe irän wain me irä fiik me pómwokänet me ira olif resap mwo uwa.

“ ‘Seni ei rän feilló, ngang üpwe efeiöchükemi.’ ”

Zerubbabel a kefilitä pwe epwe usun nöün ewe SAMOL ringen impwang

20Iwe, än ewe SAMOL kapas a pwal tori Hakkai fän oruuwan lón ewe rüwe me rüwänüwen ränin ewe chök pwal maram. A apasa: 21“Kopwe üreni Zerubbabel ewe kepinan Judah pwe ngang üpwe ächechcha läng me fönüfan. 22Ngang üpwe asapwlätiw ekkewe king mi móót wón ar leenien móótun king o ataeló manamanen ekkewe mwüün ekis. Ngang üpwe olupaaló ekkewe wóóken fiti ekkewe chón waawa; ekkewe óris me ekkewe chón wääniir repwe turuló. Ekkewe sounfiu repwe säpe fengen o pwisin niifengeniir.

23“ ‘Nge lón ewe rän lupwen epwe fis ei,’ ewe SAMOL mi Unusen Manaman a osomänetiw, ‘ngang üpwe awora suufölum, en neii chón angang Zerubbabel nöün Shealtiel we mwän,’ ewe SAMOL a osomänetiw, ‘iwe, ngang üpwe föri pwe en kopwe wewe ngeni neii ringen impwang wón ächefen peii, pün en ätewe ngang üwa fen filuketä,’ ngang ewe SAMOL mi Unusen Manaman üwa osomänetiw.”