Habakkuk

1 Iei ewe poraus ewe soufós Habakkuk a angei meren ewe SAMOL lón ew künäan.

Än Habakkuk tunopwen

2Äi SAMOL, epwe ifa üküükün langattamen fansoun äi üpwe siö ngenuk pwe kopwe älillis, nge en kosap öüseling? Ika, epwe ifa langattamen fansoun äi üpwe siö ngenuk fäniten ewe angangen mwänesol, nge en kosap amanawa keem?

3Pwata en ka föri pwe ngang üpwe nennengeni ei föfför mi pwüngingaw pwellin ünükki? Pwata en ka chök fanengeni an epwe fis ei sókkun föfför mi mwääl? Ekis meinisin ia ngang üwa nenneló ie üwa chök küna angangen kata me mwänesol; a wor fiu me äniini.

4Iei minne ewe öllük esap chüen mwökütüküt, a usun chök nge a määmechór ese chüen wor lamwotan, nge minne mi wenechchar a pwal sossor me lón imwen köpwüng. Pün ekkewe chón föfföringaw ra chómmóng seni ekkewe chón pwüng, iei minne pwüngüöch a pwór.

Än ewe SAMOL pölüwen

5Iwe, ewe SAMOL a pölüweni o apasa, “Öüpwe nengeni chón ekkewe pwal ekkóch mwüü. Öüpwe katol iir; iwe, öüpwe fókkun mäirü ren minne öüpwe küna. Pün ngang üpwe föri och mettóch ämi öüpwe mäirü ren lón ränin manawemi. Ämi meinisin öüsap fókkun lükülük ren ika mwo emön epwe ürenikemi.

6Pün nengeni, ngang üpwe le öüütäi ekkewe chón Kaldea, ew mwiichen aramas mi arochongaw o sarawaraw. Ra cheechefeil leemelen unusen fönüfan o angei fän pöchökkül ekkewe leeni esap leenier.

7Iir ew mwiichen aramas mi eniwokkus, aramas ra niweitiir; iir ra pwisin förätä ar öllük fäniten meet repwe föri ngeni pwal ekkóch aramas o öpöchökküla le föri meet iir repwe pwisin iteüöch ren.

8Nöüür kewe óris ra mwittir seni ewe maan itan leopard, ra arochongaw lap seni ekkewe wolif mi küüt ochaar lupwen akkar a tupwutiw. Pachapachen nöüür kewe óris ra faaresi ewe pwül; nöüür kewe mwiichen sounfiu chón waawa óris ra feitto seni toowaaw. Ra mwittir le maun usun mwittirin emön ikel lupwen a ässitiw wón liapan pwe epwe ocheei;

9iir meinisin ra fiseetä pwe repwe feitto o föri angangen mwänesol. Nöüür kewe mwiicheichen pwiin sounfiu ra feilló nge ra wewe ngeni ew äsäpwäälin lón fönüpöön o ra ionifengeni liäpeer mi chómmóng usun föün pi.

10Ra ämängawa ekkewe king o turufasei ekkewe samol. Ra takiri ekkewe telinimw meinisin mi pöchökkül tittiir; ra ochukuchukätä pwül ünükküür pwe repwe liäpeniir.

11Mwirin, ra feilló seniir usun äsäpwääl pwe repwe maun ngeni pwal ekkóch leeni. Iir aramas mi tipis, pün ra ääni kot pwisin ar pöchökkül.”

Oruwen än Habakkuk tunopwen

12Äi SAMOL, ifa usun, sap en ka nóm seni fansoun esepwop tori feilfeilló chök? En äi Kot ewe Emön mi Pin. Äm aisap mäló. Äi SAMOL en ka filätä ekkewe chón Babylon pwe repwe arosakeemiló; en äm Achaw en ka filiretä pwe repwe öpwüngü keem.

13Mesom ra koon limöch óm kopwe nennengeni föfför mi ngaw; kosap pwal tongeni óm kopwe fanengeni föfför mi mwääl. Nge pwata chök ka fanengeni ekkewe chón Babylon mi kirikiringaw? Pwata ka fanafanaló lupwen ekkewe chón föfföringaw ra oromaló chókewe mi koon pwüng lap seniir?

14En ka föri pwe aramas ra usun ekkewe iik lón ewe säät, ika usun ekkewe maan töötö esap wor ar souemmwen.

15Ekkewe chón Babylon ra efiiretä meinisin ren öö, ra liäpeniir lón nöüür kewe toloia, ra pwal chuunir lón nöüür kewe cheew; mwirin, ra meseik o pwapwa ren liäpeer.

16Iei minne, ra ääni asór ngeni nöüür kewe toloia o keni appach mi pwokkus ngeni nöüür kewe cheew, pün a chómmóng liäpeer pwokiten nöüür kewe cheew, ra pwal pwapwa le mwöngö eneer mwöngö mi chómmóng o annö.

17Ifa usun, repwe sópweló le angei wöwüür ren nöüür kewe toloia? Ifa usun, repwe chök sópweló le niieló chón ekkewe mwüü nge resap ääni tong?

2 Ngang üpwe üütä wón äi leenien mammas, üpwe osousouló wón ewe imwen maun mi tekia o tittiló; ngang üpwe witiwit pwe üpwe küna meet Kot epwe apasa ngeniei, pwal meet ngang üpwe ääni pölüwen lupwen i epwe öpüngüei ren äi tunopwen.

Än ewe SAMOL pölüwen

2Mwirin, ewe SAMOL a pölüweni o apasa, “Kopwe makkeetiw minne ngang üpwe pwääri ngenuk lón künäom. Kopwe makkeetiw wón och leenien mak, nge epwe fókkun fat, pwe aramas repwe weweiti lupwen emön chón esilesil epwe ssä fän o arongafeili.

3Pün ekkeei mettóch üpwe pwääri ngenuk lón künäom epwe witiwitiló ngeni ew fansoun mi kefilitä; ewe fansoun an epwe pwönüwetä epwe fókkun mwittir, nge esap chofona. Nge ika mwo itä epwe mang le pwönüwetä, kopwe chök mónsónóttam le witiwit fänitan; pün epwe wesewesen pwönüwetä, nge esap mang.

4“Nengeni, letipen ätewe a lamalamtekia! A pwisin ikeetä o anómwu an apilükülük pwisin wón, esap wor wenechchar lón letipan. Nge ewe chón pwüng epwe manaw ren an ölükülük wón än ewe SAMOL kapas.

5Enlet, wöwümmóng a tongeni otupwaló emön aramas; emön aramas mi mocheniä a lamalamtekia. I emön mi ekieki pwe a tekia seni meinisin o esap sile an epwe póssetiw. I a fókkun tipemmóng usun ewe leenien sotup o a wewe ngeni mäló pün esap fókkun menemen. I a kütta an epwe angei ekkewe mwüü meinisin fänitan o uwealó ekkewe aramas meinisin pwe repwe chón ooló.

6“Iwe, epwe mwittir war ewe fansoun lupwen ekkewe chón ooló meinisin repwe chietä echö köölün ämängaw, repwe turunufasei ewe chón okkufur o apasa, “ ‘Feiengawom en ätewe mi ochukuchukätä ekkewe pisek ka sooläni o föri pwe kopwe pisekisekiló ren óm eriäni seni aramas minne ra ääni liwinimang. Epwe ifa üküükün langattamen fansoun an epwe sópwósópwóló le fis ei sókkun lapalap?’

7Mwittir chök ekkewe chón liwinimang ngenuk repwe üütä lón ar soong. Repwe säpeituk o angei senuk meinisin minne a wor reemw, nge en kopwe chök üütä fän óm chechcheech me lipwäkingaw. Mwirin, en kopwe wiliti chón kuf reer.

8Pwokiten en ka angei fän pöchökkül pisekin chómmóng mwüü, nge iei ekkewe aramas mi chüen manaw me lón ekkewe mwüü repwe angei senuk pisekum fän pöchökkül. En ka pwal niieló chómmóng aramas. En ka föri angangen mwänesol o ataeló ekkewe fönü me telinimw o niieló chókewe meinisin mi imweimw lóór.

9“Feiengawom en ätewe mi angei óm wiil fäniten chón leimwom fän pwüngingaw o ka sseni fasom wón ew leeni mi tekia pwe esap wor och feiengaw epwe toruk.

10En ka rawangawei chómmóng aramas pwe kopwe niireló. Iwe, ina meet epwe awarato sääw wón chón leimwom. En ka arosaló chómmóng mwiichen aramas, iei minne ka pwisin tipis ngeni manawom.

11Ekkewe föün etippen imwom repwe ääni kökkö ar kapasen üüngenuk, nge ekkewe öüchamw me tinöw repwe enlwinisäfäli ewe kökkö usun tiriis.

12“Feiengawom en ätewe mi öüüwetä ew telinimw ren óm niieló aramas o öpwönüwetä ew sóóp ren angangen mwänesol.

13Ifa usun, ewe SAMOL mi Unusen Manaman esap pwon pwe minne ekkewe aramas ra angang weires fänitan epwe chök karaló ren ekkei, nge minne chón ekkewe mwüü ra pekkus le angang weires fänitan epwe solapmwäl?

14Mwirin, fönüfan epwe uroló ren än aramas repwe silei usun lingen ewe SAMOL, usun chök ewe säät a pwölüweló ewe mataw.

15“Feiengawom en ätewe mi öünü ngeni chón órum wain en ka niinawu seni lón ewe leenien wain mi för seni ünüchchen maan tori ra sakaweló, pwe kopwe nennengeni selelón inisiir.

16Iwe, en kopwe uren sääw nge sap ren ling. Kopwe pwisin wün o pwääraló óm kosap sirkomsais. Kopwe wün seni ewe kap mi nóm lón pöüiifichin ewe SAMOL. Iwe, óm ässääw epwe pwölüweló óm ling.

17Ewe föfförün mwänesol en ka föri ngeni Lebanon ren óm pöküwetiw wöllapan, epwe le säpeituk. En ka eniwokkusu ekkewe maan ka liäpeniir lón óm kewe ssär, iwe iei ekkewe maan repwe fókkun eniwokkusuk. Feiengaw epwe fókkun toruk, pwokiten en ka niieló aramas; en ka pwal ataeló ekkewe fönü me telinimw o niieló chókewe meinisin mi imweim lóór.

18“Meet öüchchean och uluulun önümwäl, nge i och chök mettóch emön aramas a faleei? Ika ifa lamwoten och uluulun önümwäl mi äiti ngenuk minne mi chofona? Pün ätewe mi föri och uluulun önümwäl a anómwu an apilükülük wón minne pwisin i a föri; i a föri ekkewe uluulun önümwäl resap tongeni kapas.

19Feiengawom en ätewe mi tungór ngeni efóch mwüüch esap wor manaw lón pwe epwe amanawók. Ka pwal eisini och uluulun önümwäl mi för seni eföw faaw esap tongeni kapas pwe epwe ürenuk meet kopwe föri. Ifa usun, och uluulun önümwäl a tongeni ngenuk öüröürom? Och uluulun önümwäl a tongeni cheech ngeni kolt me silifer; nge esap wor enienin ngasangasen manaw lón.”

20Nge ewe SAMOL a nóm lón an imwenfel mi pin; chón fönüfan meinisin repwe mósónósónóló me fän mesan.

Än Habakkuk iótek

3Iwe, ewe soufós Habakkuk a ääni ei iótek fiti kööl lón lapalapen ewe Shikionoth.a

2Äi SAMOL, ngang üwa rongorong poruasen óm iteföüló; äi SAMOL, ngang üwä üütä lón äi ingemwareiti óm kewe föfför. Kose mochen kopwe försäfäli óm kewe föfför mi amwaraar lón äm ei fansoun usun en ka föri melóóm. Kopwe esilefeili óm kewe föfför lón äm ei fansoun; lón óm soong, kopwe chechchemeni óm tong mi ölükülük.

3Kot a feitto seni Teman, ewe Emön mi Pin a feitto seni ewe chuuk Paran. Lingan a pwölüweló ekkewe läng, nge fönüfan a ureló ren än aramas mwareiti i. Selah.b

4Saramaramen lingan a wewe ngeni töötän akkar; liköütüütün saram ra fiifiwu seni lón pöün, ia an manaman a opoló ie.

5Määlap a akkomwoló mwan; mään pwichikkar a tapweto mwirin ipwan.

6Lupwen i a chök üütäló, a ächechcha fönüfan ren ew chechchechin fönü; lupwen a nennefätäl, chón ekkewe mwüü ra chechcheech. Ekkewe chuuk mi nóm seni chök lóóm ra taatakis, ekkewe chukutekisón minen lóóm ra chaapapetiw. An kewe aal ra nóm seni fansoun esepwop tori feilfeilló chök.

7Ngang üwa küna pwe a wor riäfföü mi pop seni püngingaw lón imwen ekkewe chón Kushan imw mangaku, a pwal wór chechcheech lón imwen ekkewe chón Midian.

8Äi SAMOL, ifa usun, en ka soong ngeni ekkewe chaanpwuupwu? Ka soong ngeni ekkewe öüwö? Ifa usun, ka lingeringeriti ewe mataw lupwen ka ssä wón wóóm kewe óris me wóóm kewe wóókenin pwora.

9En ka pwäärawu noum esefich, ka kökkööri chómmóng föün esefich. En ka asangafeseni fönüfan ren ekkewe chaanpwuupwu; Selah.

10ekkewe chuuk ra künók o ra pöüküük. Üüt a püngümmóngetiw o kólik a öütöüt; ewe mataw mi alóllóól a püngümmóng o ekkewe nóó ra pwootä.

11Akkar me maram ra chök köüüló lón leenieer mi tekia ren märefiifin nöüm kewe föün esefich lupwen ra ääs, pwal ren meriweriwen wókum siles mi moluolup.

12En ka pwusüngüsüng feil leemelen fönüfan lón óm lingeringer, ka pwuurätiw chón ekkewe mwüü lón óm soong.

13En ka feilliwu fäniten óm kopwe angasa noum kewe aramas, pwe kopwe amanawa noum we mi kepit. En ka apachcha ewe souemmwenin chón leimwen ewe chón föfföringaw, en ka angei seni pisekin, seni wón möküran tori fän pachapachan. Selah.

14En ka posuw ngeni möküran pwisin wókun siles, lupwen nöün kewe sounfiu mi pwora ra mwuiti keem usun ew mölümöl pwe repwe atoropasfeili keem. Iir ra meseik le eriäfföwü ekkewe mi mweleele, usun chök emön maanmwacho a meseik le ocheei liäpan lemwónómwón.

15En ka pwuurätiw ewe mataw fän noum kewe óris, ka pwuutiw wón nóónón mi lapalaap.

16Ngang üwa rongorong usun ekkeei mettóch; iwe, inisi a chechcheech o tinnnawei ra sälepwelepw ren ewe möngüüngü; chüüi ra kirouló, nge pecheei ra chechcheech. Nge ngang üpwe chök engngiló le witiwit fäniten ewe ränin feiengaw epwe feitto wón chón ekkewe mwüü mi tööki kem fän nöüür mwiichen sounfiu.

17Inamwo ika ewe irä fiik esap sóót o esap wor föün irän wain wón ekkewe irän wain, inamwo ika ewe irä olif esap uwa o ekkewe tännipi resap awora mwöngö, inamwo ika esap wor siip lón ekkewe tittin siip o esap wor kowu lón ekkewe leenien kowu,

18nge ngang üpwe chök meseik lón ewe SAMOL, üpwe uren pwapwa lón Kot äi Chón Amanaw.

19Ewe SAMOL KOT i äi pöchökkül; i a önüküchchara pachapachei pwe ra wewe ngeni pachapachen emön chia, i a ötüfichiei pwe üpwe fätäl wón ekkewe leeni mi tekia.

Fäniten ewe chón emmweni kööl wón neii kewe pisekin likettik mi wor säiteliir.