Filipai

Paul a kapwong ngeni ekkewe chón pin lón Filipai

1Ei taropwe seni keem äm Paul me Timothy, äm nöün Kraist Jesus amanaw. Äm aia mak ngeni kemi ämi meinisin kana chón pin lón Kraist Jesus mi nóm Filipai pwal ngeni ekkana souakkomw me kana souälillisin mwichefel.

2Umöümöch me kinamwe seni Samach Kot me ewe Samol Jesus Kraist epwe tori kemi.

Paul a kilisou me mwareiti Kot fänäsengesin ekkewe souleng lón Filipai

3Iteiten fansoun ngang üwa chemeni kemi, ngang üwa kilisou ngeni Kot. 4Lón äi iótek fänitemi meinisin, iteiten fansoun ngang üwa iótek fän uren pwapwan lelukei, 5pwokiten ämi öüwa chiechi ngeniei lón äi arongafeili ewe poraus allim usun Kraist seni chök ewe fansoun öüwa äkkäewin rong ewe poraus allim tori iei. 6Iwe, ngang üwa fókkun apilükülüküw, pwe Kot ewe Emön mi popuetäni ei angang mi mwirinnö lóómi I epwe pwal sópweló tori an epwe unusen wesiló lón ewe rän lupwen Jesus Kraist epwe liwinsäfälito.

7Mi pwüng an epwe iei usun äi ekiek fänitemi meinisin, pwokiten ngang mi öüchcheani kemi lón letipei. Pün kich sia chiechifengen lón än Kot ei ümöümöch lupwen ngang üwa nóm lón föötek pwal lupwen äi üwa toowu seni lón föötek, ämi meinisin öüwa chieneniei le peni ewe let o aronga ngeni pwal ekkóch ewe poraus allim. 8Kot i neii chón pwärätä, pün I a silei usun öüküükün wätten äi tongei kemi me äi pwositi kemi meinisin lón ewe chenin Jesus Kraist.

9Iwe, iei meet ngang mi sópweló chök le iótek usun, pwe ämi tong fengen lefiilemi epwe eneen le säsewu, öüpwe pwal sópweló le mämmääritä lón ämi silelap me weweöch. 10Pün ngang üwa mochen pwe öüpwe tongeni etittinaöchüw le älefiila ekkewe mettóch mi fókkun mwirinnö, fänäsengesin ämi öüpwe manaweni ew manaw mi limöch, esap pwal wor tikingawen manawemi tori ewe rän Kraist epwe liwinsäfälito, 11pokiten ämi öüwa fen ureló ren ekkewe uwään pwüng, ikkeei ekkewe mettóch mi mwirinnö ra fis lón manawemi ren Jesus Kraist, pün iei meet epwe awarato än aramas repwe enlingaló me mwareiti Kot.

Paul a afalafal usun Kraist

12Nge ngang üwa mochen pwe öüpwe silei ämi pwii kana, pwe ekkeei mettóch meinisin mi fis ngeniei me ikeei ra älisi meresilón ewe poraus allim. 13Pün iteiten emön me emön mi nóm ikeei, pwal pacholong ekkewe sounfiu meinisin mi mammasa ewe emperor ra silei pwe ngang üwa föötek ngeni sein fäniten Kraist. 14Iwe, pwokiten äi föötek, chómmóng leiin ekkewe pwiipwi mi lükü ewe Samol a pöchökkületä letiper. Iei minne, ra pwora le afalafala ewe kapasen Kot ngeni ekkóch, nge resap chüen nuokkus.

15Nge enletin, a wor pwal ekkóch ra afalafal usun Kraist seni lón ar lólówó me ar ekiekin öppölüwaei. Nge pwal ekkóch ra afalafal usun Kraist seni limöchchün ekiekin letiper. 16Ekkewe ra afalafal usun Kraist pwokiten ar lólówó, ra afalafal seni apangawen ekiekin letiper, nge sap fän wenechchar, pün ra ekieki pwe repwe sópwei äi riäfföü lupwen äi ei nóm lón kalapwuus. 17Nge ekkewe ekkóch ra afalafal usun Kraist seni limöchün letiper, ra afalafal pwokiten ra enletin tongeei, pün ra silei pwe ewe Samol a filieitä o emmwenieito ikeei pwe üpwe chón peni ewe poraus allim. 18Iwe, meet a öüchchea? Ese lifilifil ika ra afalafal seni lón apangawen ekiekin letiper ika seni limöchchün ekiekin letiper, och chök a öüchchea pwe ra afalafala ewe poraus usun Kraist. Iwe, ngang üwa pwapwa pwokiten ei.

Ewer, üpwe sópweló le pwapwa, 19pün ngang üwa silei pwe ren ämi iótek fänitei me ren än ewe Ngünün Jesus Kraist a älisiei, meet a fis ngeniei epwe wili ngeni äi üpwe ngasewu. 20Pün ngang mi nóm lón äi ösüküsük me apilükülük allim, pwe ngang üsap föri och minne üpwe säáw ren, nge ngang üpwe unusen pwora fäniten Kraist usun chök minne üwa föri iteiten fansoun meinisin me mwan; pwe manawei epwe enlingaló Kraist fansoun meinisin, ese lifilfil ika ren äi manaw are ren äi mäló.

Kraist iei öüchchean ach manaw

21Pün ngeniei, äi üpwe manaw a öüchchea fäniten Kraist, nge äi üpwe mäló iei ew wiil. 22Nge are ngang üpwe manawattameló lón ei inis; iwe, wewen, epwe chómmóngóló uwään äi angang fäniten Kraist. Iwe, nge ngang üsap chök silei menni leiin a koon lapaló mwirinnöön äi üpwe filätä. 23Pün ngang üwa tiperüwörü lefiilen ruu mochen. Fän ekkóch, ngang üwa mochen üpwe chök manaw, nge fän ekkóch ngang üwa mochen üpwe feilló pwe üpwe nónnóm ren Kraist, pün iei meet epwe koon mwirinnö fänitei. 24Nge ren äi üpwe nómwetiw lón ei inis, a koon lamwot fänitemi. 25Ngang mi lükü pwe meet ei üwa apasa mi pwüng. Iei popun ngang üpwe sópweló le nónnóm reemi pwe öüpwe mämmääritä o ääni pwapwan ämi lükü. 26Mwirin, lupwen ngang üpwe liwinsäfäliti kemi, epwe fen koon lapaló popun ämi öüpwe eingeing usun meet Kraist Jesus a föri fänitei.

Öttüres me riäfföü fäniten Kraist

27Nge ese lifilifil ika meet a fis ngeniei, öüpwe chök manaweni ewe manaw mi fich ngeni ewe poraus allim usun Kraist. Mwirin, ese lifilifil are üpwe war o chuurisäfäli kemi ika üpwe chök rong usun nónnómwumi nge üsap nóm reemi, ngang üpwe silei pwe ämi mi üppós lón ew chök ngüün, pwal ämi mi öttüresippök fengen lón ew chök ekiek fäniten ewe lóngólóngen lükü mi nóm lón ewe poraus allim. 28Nge öüsap nüokkus ren ekkewe chón pölüweni kemi, pün iei och esissil ngeniir pwe iir repwe feil ngeni ar repwe feiengaw, nge ämi öüpwe feil ngeni ämi öüpwe küna manaw, nge ekkeei ra pop seni pwisin Kot. 29Pün a fen mwüümwütä ngeni kemi, sap chök ewe fansoun mi fich ämi öüpwe lükü Kraist, nge i pwal ewe fansoun mi fich ämi öüpwe riäfföü fänitan. 30Kich sia nómoppök lón ei fiu. Ämi öüwa fen künaei pwe ngang üwa nóm lón riäfföü fäniten Kraist melóóm, nge iei öüwa silei pwe ngang mi chök chüen nóm lepwonen ei osukosuk mi lapalaap.

Ew chök lón tekisón

2Iei minne, are mi wor pöchökkületän letipemi lón Kraist, are an tong a echipa kemi, are öüwa chiechifengen me ewe Ngüünmifel, are öüwa ääni kirekiröch me tongfengen lefiilemi, 2mwirin, öüpwe föri pwe äi pwapwa epwe unus, ren ämi öüpwe ääni ew chök ekiek, öüpwe pwal alöllö fengeni chök ämi tong fengen lefiilemi, öüpwe angang fengen ren ew chök letip me ekiek. 3Öüsap föri och mettóch fän ämi apangaw ika fän otupwutup. Öüpwe öüchcheani fengeni kemi lefiilemi, emön epwe etekiatä pwal emön lap seni pwisin i. 4Öüsap chök en me kütta pwisin an feiöch wón inisin, nge i öüpwe pwal kütta minne pwal ekkóch repwe feiöch ren.

Kraist ewe leenien öppirü ren manawen tekisón me tekia

5Öüpwe ääni ewe chök sókósókun ekiek Kraist Jesus a ääni. 6Pün inamwo are I mi chök nónnóm lón an sókkuni sókkun Kot, nge esap ekieki pwe epwe apangawaló le kömwöchüló chök wón an löllö ngeni Kot. 7Esap fen ina usun, pwe I a pwisin apööló manawan. Iwe, a tolong lón nónnómwun emön amanaw mi tekisón o pwääló lón lapalapen aramas. 8Iwe, lón an lapalapeni lapalapen emön aramas, I a älleasochis le pwisin etekisónätiw tori mäló, nge a fókkun määni mään emön chón föfföringaw ren an mäló wón efóch iräpenges. 9Iei minne, Kot a fókkun etekiatä Jesus ngeni läng o ämwärätä wón ew iit mi iteföüló seni iit meinisin, 10pwe ren iten Jesus, pwäsuk meinisin repwe fótopwäsukutiw, pwäsukun chókana mi nóm läng me wón fönüfan me fän fönüfan, 11nge pwal chónnaaw meinisin repwe tipeew ngeni le pwärätä pwe Jesus Kraist I Samol, pwe Kot ewe Saam epwe ling ren.

Kömwöchchünnük wón ewe kapasen manaw

12Ina minne, ämi chiechiei kana mi ächengicheng merei, ämi öüwa fen älleasochis ngeni äi kewe öüröür ngeni kemi fansoun meinisin lupwen äi nóm reemi. Iwe, lón ei ótun ngang üsap nóm reemi, öüpwe le fen alapaló le pwisin anganga ämi küna manaw o älleasochisi Kot fän nuokkus me chechchech, 13pün Kot ewe a angang lóómi o ngeni kemi ewe mochen pwe öüpwe älleasochisi I me ewe tüfich pwe öüpwe föri meet I epwe pwapwa ren.

14Öüsap tunoppwen ika etipächchem lón mettóch meinisin öüpwe föri, 15pwe esap wor emön epwe tongeni apasätä och kapasen tipingeni kemi. Öüpwe manaweni ew manaw mi limöch, esap wor och terin lón manawemi pün ämi nöün Kot lón ei fönüfan mi rochopwak o uren aramas mi rikirik me tókkóló letiper. Öüpwe mwüüt ngeni manawemi epwe tin usun saram me fän meseer, 16pün ämi öüwa chón eiti ngeni aramas ewe kapasen manaw. Ina minne, lón ewe ränin än Kraist epwe liwinsäfäl, epwe wor popun äi üpwe pwapwa, pwokiten esap lamwotmwääl äi ssä, pwal äi angang weires esap lamwotmwääl. 17Nge ika mwo pwe manawei epwe niiniiló pwe epwe usun ew asóren wün epwe niinitiw wón ämi asór me ämi angangen lükü, ngang üwa chengel o üwa mochen pwe ämi meinisin öüpwe fitiei le pwapwa. 18Iwe, pwal ren ei chök popun, pwal ämi öüpwe pwapwa o fitiei le chengel.

Paul a kapas mwirinnö usun Timothy

19Are fän letipen ewe Samol Jesus, ngang üwa apilükülük pwe ekiseló chök üpwe tiinawow Timothy reemi. Mwirin, lupwen epwe liwinsäfälito, i a tongeni apwapwai letipei lupwen epwe esilei ngeniei usun nónnómwumi. 20Esap wor emön a wewe ngeni Timothy, pün a wewe fengen ekiekiim, i a pwal wesewesen ekieki usun nónnómwumi. 21Pün ekkewe pwal ekkóch ra chök ekieki usun pwisin iir, nge resap ekieki och fäniten meet mi öüchchea ngeni Kraist Jesus. 22Nge ämi öüwa pwisin silei usun älelleten manawen Timothy, pün i a fitiei le angang lupwen äm aia emeresifeili ewe poraus allim, o a älisiei usun emön naaw a älisi saman. 23Iei minne, ngang üwa apilükülük pwe üpwe mwittir tiinawow i, lupwen chök äi üpwe küna usun meet epwe fis ngeniei me ikeei. 24Nge ngang, a wor äi apilükülük meren ewe Samol, pün ekiseló chök pwisin ngang üpwe feitto pwe üpwe chuuri kemi.

Paul a mwareiti Epafroditus

25Iwe, nge ngang üwa ekieki pwe epwe lamwot äi üpwe tiinsäfäliewow Epafroditus reemi. I pwii, pwal i chienei chón angang mi ölükülük me chienei sounfiu mi pwora. Nge i nöümi chón arong, i a älisiei lón äi osupwang. 26Iwe, iei ngang üpwe tiinsäfäliewow, pwokiten i a fókkun pwositi kemi meinisin. Iwe, i a pwal osukosuk letipan, pwokiten öüwa rong pwe i a samwaw. 27Pün pwüngün pwe i a samwaw, arapakkan ngeni chök epwe mäló. Nge Kot a kirekiröch ngeni, nge esap ngeni chök pwe pwal ngeniei, pwe esap mochen pwe epwe chök aloppotä wón ew äi letipetä. 28Iei minne, ngang üwa fókkun äppächewa äi üpwe tiinawow i, pün ngang mi silei pwe öüpwe pwapwa lupwen öüpwe künasäfäli, nge äi lólilen epwe kisiló. 29Iei minne, öüpwe etiwa i lón ewe Samol fän unusen pwapwa. Iwe, öüpwe awora suufölün ena sókkun aramas, 30pwokiten arapakkan ngeni chök i epwe mäló fäniten än Kraist angang, nge esap ekieki feiengawen manawan, pün i a mochen epwe föri fänitei ekkewe mettóch ämi öüsap tongeni föri, pwokiten öüwa toowaw seniei.

Sirkomsais mi let me sirkomsais mi mwääl

3Iwe, mi pwal wor och meet üpwe apasa ngeni kemi, ämi pwii kana: Ese lifilifil ika meet a fis, ewe Samol epwe ngeni kemi ämi pwapwa. Ngeniei, üsap osukosuk äi üpwe enliwinisäfäli le üreni kemi ekkewe mettóch üwa fen makkei ngeni kemi usun me mwan, pün mi lamwot fänitemi pwe öüsap chepetek. 2Öüpwe äffäli kemi ren ekkana kolak, öüpwe äffäli kemi ren ekkana chón föri föfföringaw, öüpwe äffäli kemi ren ekkana chón reii inis mi apasa pwe öüpwe sirkomsais pwe öüpwe küna manaw. 3Pün öükich ekkewe sia fel ngeni Kot lón ewe Ngüünmifel, öükich ekkewe sia enletin sirkomsais.

Sisap anómwu ach apilükülük wón än aramas achoocho, nge sia eingeing usun meet Kraist Jesus a fen föri fänitach, 4inamwo ika ngang wón inisi mi wor popun äi üpwe tongeni anómwu äi apilükülük wón pwisin inisi, are mi wor emön a tongeni. Are mi wor emön a ekieki pwe mi wor popun an epwe anómwu an apilükülük wón pwisin an achoocho; iwe, fen ngang koon. 5Pün ngang üwa sirkomsais lón ewe awalüen rän mwirin äi upwutiw, ngang emön chón ewe fönü Israel, seni ewe einangen Benjamin. Ngang mi sile kapasen Hipru me örünien chón Hipru pün semei me inei iir chón Sus. Ngang emön mönün ewe mwichen Farisi mi tichchik le älleasochis ngeni än ekkewe chón Sus öllük. 6Nge ren öükükün äi tilikken, ngang emön chón pöchökkül le eriäfföwü mwichefel. Pwal ren öüküükün äi kütta äi pwüng seni minne mi nóm lón öllük, ngang emön esap wor tikingawen manawei.

7Me mwan, ngang üwa mwäliló le ekieki pwe ekkeei mettóch meinisin ra fókkun öüchchea, nge iei, ngang üwa öpwüngaló lón äi ekiek pwe ra lamwotongaw, pwokiten meet Kraist a fen föri. 8Nge fen pwal lapalón, ngang üwa pwal ekieki pwe ekkeei mettóch meinisin ra lamwotongaw pwokiten selükülón öüchchean äi silei Kraist Jesus äi Samol. Pwokiten Kraist, ngang üwa oturaló ekkeei mettóch meinisin o üwa älleaniir pwe iir ra wewe ngeni chök kiten mwöngö, pwe ngang üpwe tongeni willeni Kraist, 9o epwe pwal pwä pwe ngang üwa nóm lón I, sap ren pwisin äi föfförün pwüng ika äi tüfichin älleasochis ngeni än Kot öllük, nge i ngang üwa lükü pwe Kraist a amanawaei. Pün alen än Kot föri pwe kich sipwe küna pwüng me fän mesan a lóngólóng wón lükü. 10Iwe, pwüngülón, ngang üwa tongeni wesewesen silei Kraist o ääni lón manawei tüfichin ewe manaman mi amanawasäfälietä I seni mäló. Ngang üwa pwal tongeni käeö äi üpwe chiechi ngeni I lón an riäfföü o sókkuni sókkun lón an mäló, 11are epwe fis pwe ngang üpwe tongeni chóóni le fiti ewe manawsäfäl seni leiin ekkewe sotup.

Öttures ngeni minne mi nóm mwach

12Ngang üsap apasa pwe üwa fen öpwönüwetä ekkeei mettóch lón manawei ika ngang üwa fen unusöch. Nge ngang üwa chök sópweló le öttures ngeni äi üpwe tongeni kömwöchüló wón pwe äi meet Kraist Jesus a amanawaei ren o mochen pwe ngang üpwe manaweni. 13Ämi pwii kana, ngang wón inisi usap ekieki pwe üwa fen tori unusen meet ngang üwa öttüres fänitan, nge iei och mettóch ngang üwa föri: Üwa möllükaló minne a nóm lükisöküri, nge üwa öttüres ngeni äi üpwe tori meet mi nóm mwei. 14Iei minne, ngang üwa chök ötturesiló le säwenewen ngeni mwei pwe üpwe tori lesópwólón ewe kitir o angei ewe wiil Kot a kööri kich ngeni läng fänitan, lón Kraist Jesus.

15Iei minne, öükich meinisin ekkewe sia mwokos lón Kraist, öüsipwe tipeew fengen wón ekkeei mettóch. Nge are epwe wor emön leiimi epwe sókkóló an ekiek lón och mettóch, üwa lükü pwe Kot epwe pwal affataöchchüw le pwääri ngeni kemi. 16Iwe, pwal ew chök mettóch. Öüsipwe sópweló chök le atolonga lón föfför pwüngün ewe let sia fen silei.

Ach leenien wilipós lón läng

17Iwe, ämi pwii kana mi ächengicheng, öüpwe chuungeni ekkewe ekkóch le appirü manawei, o öüpwe käeö seni chókana mi appirüw manaweem. 18Pün ngang üwa fen soun ükküreni kemi me mwan, nge iei üwa pwal üreni kemi lón äi kechiw, pwe chómmóng ra manaweni ewe sókkun manaw mi pwärätä pwe iir wesewesen chón opwut ewe iräpengesin Kraist. 19Sópwólón manawer repwe tolong lón feiengaw ese mwüch. Ra ääni kot minne pwisin luuker a mocheniäiti, ra eingeing wón ekkewe mettóch mi ässääw, meinisin minne ra ekieki usun, ra chök ekieki usun ei manaw wón fönüfan. 20Nge kich sia chón wilipósun läng, ia ewe Samol Jesus Kraist a nóm ie. Sia ösüküsükü o witiwit fänitan pwe I epwe liwinsäfälito pwe ach Chón Amanaw. 21I epwe siwili inisich keei mi apwangapwang repwe fätäl ngeni ar repwe mäló o epwe siwili ngeni inis mi ling mi wewe ngeni pwisin inisin mi ling ren tüfichin an we manaman I epwe aea le atolonga mettóch meinisin fän an nemenem.

4Iei minne, ämi pwii kana mi ächengicheng, ämi kewe ngang üwa tongei kemi o fókkun pwositi kemi äi üpwe küna kemi, pün ämi äi pwapwa me mwäri liwinin äi angang. Iei popun, öüpwe üppós lón ewe Samol, ämi chiechiei kana mi ächengicheng.

Öüpwe tipeew, pwapwa me iótek

2Iwe iei, ngang üwa tungór maw ngenuk Iudia, üwa pwal tungór maw ngenuk Syntyke, pwe öüpwe tipeew fengen le ääni ew chök ekiek, pwokiten ämi nöün ewe Samol. 3Üwa tungórmaw ngenuk pwal en enletin chiechiei, pwe kopwe älisi ekkeei fefin, pün iir ra fitiei le angang weires le aporausa ngeni ekkóch ewe poraus allim. Ra pwal angang fiti Klement me chienei kana lussun chón angang a mak iter lón ewe pwuken manaw.

4Öüpwe uren pwapwa lón ewe Samol fansoun meinisin. Üpwe pwal apasasäfäli, öüpwe pwapwa. 5Öüpwe pwääraló ngeni aramas meinisin pwe öüwa kirekiröch lón meinisin minne öüwa föri. Öüpwe chechchemeni pwe a chök arapakkan än ewe Samol epwe wareto. 6Öüsap öüreki usun och mettóch, nge öüpwe iótek fäniten mettóch meinisin. Öüpwe esile ngeni Kot meet ämi osupwang o kilisou ngeni I fäniten meinisin minne I a föri. 7Are öüpwe föri ei, öüpwe ääni lón manawemi än Kot we kinamwe mi selüküló amwaararan seni än aramas ekiek ach sipwe tongeni weweiti. Än Kot kinamwe epwe mammasa letipemi me ekiekimi lupwen öüwa manaw lón Kraist Jesus.

Ekieki usun ekkeei mettóch

8Iwe, iei ämi pwii kana mi ächengicheng, üpwe apasa och mettóch me mwen äi üpwe asópwaló ei taropwe. Öüpwe anómwu ämi ekiek wón meet mi let, wón meet mi tongeni wor meniinin, wón meet mi pwüng, wón meet mi limöch, wón meet mi kirekiröch, wón meet mi mwirinnö porausan. Öüpwe ekieki usun ekkewe mettóch mi echchipwör me fich ngeni ach sipwe mwareiti. 9Öüpwe sópweló le atolonga lón föfför ekkewe mettóch meinisin öüwa käeö seniei me rongorong seniei me künaei äi föri. Iwe, ewe Koten kinamwe epwe nónnóm reemi.

Än Paul kilisou ren än ekkewe chón lükü lón Filipai fangafangöch

10Ngang üwa fókkun kilisou o üwa mwareiti ewe Samol pwe ämi öüwa pwal pwäärisäfäli ämi ekieki usi. Ngang mi silei pwe ämi mi ekieki usi fansoun meinisin, nge lón ew fansoun mi chök mwochomwooch esap wor ämi fansoun fich pwe öüpwe älisiei. 11Ngang üsap apasa ei itä ren an a wor äi osupwang, pün ngang üwa käeö äi üpwe menemenöch ren meet sókkun lapalap ngang üwa nóm lón, ese lifilifil ika a chómmóng minne a wor reei ika a chök kükkün. 12Ngang üwa sile usun äi üpwe nóm lón wöwingaw me pwal äi üpwe nóm lón wöw. Ngang üwa käeö mwónómwónun äi üpwe manaw lón fansoun meinisin ekis meinisin, ese lifilifil ika ren äi möt are ren äi echik, ren chómmóng ika ren ekis. 13Pün ngang üwa tongeni föri mettóch meinisin ren Kraist ewe mi ngeniei äi pöchökkül.

14Iwe, inamwo nge a fókkun mwirinnö minne ämi öüwa föri pwe öüwa awora ämi älillis ngeniei lón äi ei riäfföü. 15Öüwa fen pwisin silei, pwe ämi kana chón Filipai öüwa ngeniei älillisi lón peekin mooni lón ewe poputän fansoun lupwen üwa kärään uwato reemi ewe poraus allim, nge mwirin, üwa toowu seni Masedonia. Esap wor ew mwichefel a föri ei sókkun pwe fókkun ämi chök. 16Pün pwal mwo lupwen äi nóm Tessalonika, ämi öüwa tiinato ämi älillis lap seni fän ew lupwen a wor äi osupwang. 17Ngang üwa apasa ei esap pwokiten ngang üwa mochen ew liffang seni kemi. Iei meet ngang üwa mochen fänitemi: Ngang üwa mochen pwe öüpwe angei ew liiwin, pwokiten ämi kirekiröch. 18Enletin, lón ei fansoun a wor rei meinisin minne ngang üwa osupwangan, ewer, a fen somwosomwoló seni. Üwa fókkun nannafaló ren minne a wor rei, pün üwa angei seni Epafroditus ewe liffang ämi öüwa tiinato rei. Ekkeei liffang ra och asór mi pwooöch, a tiw meren Kot o apwapwai letipan. 19Iwe, äi ei Kot mi tümwünüei epwe awora ngeni kemi meinisin minne öüwa osupwang fänitan seni lón wöwün mi somwoló lón an ling I a ngeni kich lón Kraist Jesus.

20Iwe, ach Kot me Samach epwe ling lón fansoun esap mwüch tori feilfeilló chök. Amen.

Än Paul ömwüchchülón kapwong

21Öüpwe ngeni ekkewe chón pin meinisin lón Kraist Jesus mi nóm ikena äi kapwong. Pwiimi keei chón lükü mi nóm rei ikeei ra tiinawow ar kapwong ngeni kemi. 22Pwal ekkewe chón pin meinisin ra tiinawow ar kapwong ngeni kemi, nge lapalón än chókewe mi angang lón imwen Siisär we imwen king.

23Ümöümöchün ewe Samol Jesus Kraist epwe nónnóm ren ngünümi meinisin. Amen.