Filimon
Paul a kapwong ngeni Filimon
1Ei taropwe seniei ngang Paul, üwa nóm lón kalapwuus fäniten äi afalafala ewe poraus allim usun Kraist Jesus, pwal seni pwiich ei Timothy. Äm aia mak ngenuk en Filimon chiechieem chón angang mi ächengicheng, 2pwal ngeni fefinach na Affia mi ächengicheng me Arkipus emön chienach sounfiu fäniten ewe iräpenges. Ngang üwa pwal mak ngeni ewe mwichefel mi mwimwiich fengen lón imwom na.
3Ümöümöch me kinamwe repwe tori kemi seni Kot Samach me ewe Samol Jesus Kraist.
Paul a kapas mwirinnö usun än Filimon tong me lükü
4Ngang uwa kilisou ngeni Kot iteiten fansoun meinisin lupwen üwa chechchemenuk lón äi iótek, 5pwokiten ngang üwa sópweló le rong usun óm lükü ewe Samol Jesus me óm tongei ekkewe chón pin meinisin. 6Üwa pwal iótek pwe óm achoocho le chiechi ngeni ekkóch wón minne ka lükü epwe lapaló öüchchean angangan, pwokiten óm silelapei ekkewe mettóch mi mwirinnö meinisin mi nóm lóóm fänäsengesin Kraist. 7Pün ngang wón inisi üwa angei wätten pwapwa me chip seni óm tong, en pwii, pwokiten óm kirekiröch a fókkun angasatä letipen ekkewe chón pin.
Paul a tungór fäniten Onesimus
8Iei popun, ika mwo mi wor äi pwora pwe üpwe osomänei ngenuk lón iten Kraist pwe kopwe föri meet mi pwüng, 9nge pwokiten äi tong, ngang üwa saani äi üpwe tungór ngenuk. Iwe, kopwe chök ekieki ngeni minne üwa apasa pwe ew tungór seniei ngang pwiim ei Paul, ngang emön mi chinlap, nge iei ngang üwa nóm lón kalapwuus fäniten Kraist Jesus. 10Ngang üwa tungór maaw ngenuk pwe kopwe pwääri óm kirekiröch ngeni Onesimus. Ngang üwa ekieki ngeni pwe i wesewesen neii, pwokiten i a wiliti emön chón lükü. Ei a fis pwokiten äi angang lupwen äi ei üwa fööfö ngeni ekkeei sein ikeei lón kalapwuus. 11Onesimus i emön esap wor lamwotan ngenuk me mwan, nge iei a fókkun wor lamwotan ngenuk pwal ngeniei.
12Ngang üwa tiinsäfäliewow i reemw, nge pwisin ngasangasei a pwal fitawow. Iei minne, en kopwe le etiwa i. 13Ngang üwa fókkun mochen pwe üpwe le anómwätiw i reei lupwen äi ei nóm lón kalapwuus o fööfö ngeni sein fänäsengesin ewe poraus allim, pwe i epwe älisiei fänitom. 14Nge ngang üsap mochen pwe üpwe föri och nge esap akkomw mwüümwütä mereemw. Ngang üse pwal mochen pwe óm älisiei, epwe fis fän echchimw óm kopwe föri, nge i epwe seni pwisin mochenin letipom. 15Pün eli epwe iei popun än Onesimus a toowaw senuk lón ekis chök fansoun, pwe kopwe le angeisäfäli pwe epwe le nóm reemw tori feilfeilló. 16I esap chüen emön amanaw, nge i a mwirinnö seni emön amanaw, pün i a emön pwiich chón lükü mi ächengicheng. I a fókkun öüchchea mereei, nge iei epwe le fen ifa usun lapalón öüchchean mereemw, pün i a emön amanaw me pwal emön pwiimw lón ewe Samol.
Paul a peseei Filimon an epwe älleasochis
17Are en mi ekieki ngeniei pwe ngang emön chienóm; iwe, kopwe etiwa Onesimus usun chök óm kopwe etiwaei are üpwe wareituk. 18Nge are i a föri och mi mwäl ngenuk ika liwinimang ngenuk och mettóch, kopwe tikki itei wón. 19Ngang Paul, üwa mak ngenuk ren pwisin peii, ngang üpwe möönisäfäli ngenuk. Nge ngang üsap föüni ngenuk pwe en mi liwinimang ngeniei wesewesen pwisin manawom. 20Ewer, pwii mi ächengicheng, kopwe mwüüt ngeniei an epwe wor äi feiöch senuk lón ewe Samol ren óm kopwe öpöchökkülätä letipei lón Kraist.
21Pwokiten mi wor äi apilükülüküw óm älleasochis, iei popun ngang üwa mak ngenuk pün ngang mi silei pwe en kopwe föri minne epwe fen lap seni meet ngang üwa tungór ngenuk. 22Nge kose mochen kopwe pwal amollätä ew ruumwen wasööla fänitei, pün ngang üwa apilükülük pwe Kot epwe pölüweni óm iótek o epwe mwüüt ngeniei pwe üpwe mwittir liwinsäfäliwow reemw.
Än Paul kapwongen kapwin
23Epafras, chienei ei chón kalapwuus lón Kraist Jesus a tiinawow an kapwong ngenuk. 24Pwal usun chök ren Mark, Aristarkus, Dimas me Luke, iir chienei keei chón angang.
25Ümöümöchün ach Samol Jesus Kraist epwe nónnóm ren ngünum. Amen.