Ezra

Sairos a mwüüt ngeni ekkewe chón Israel mi ooló pwe repwe liwinsäfäl

1Iwe, lón äewin ierin mwüün Sairos ewe kingen Persia, ewe SAMOL a öpwönüwetä än Jeremiah we kapasen oosuni ren an ömwökütükütü lón letipen Sairos pwe epwe atoowu ew kapasen esilesil o tiinaló ngeni leemelen unusen mwüün we. Ei kapasen esilesil a pwal makketiw nge a iei usun kapasan:

2“Iei meet Sairos ewe kingen Persia a apasa: ‘Ewe SAMOL, ewe Koten läng a ngeniei ekkewe mwüün fönüfan meinisin. Iwe, i a filieitä pwe üpwe öüüetä ew Imwenfel fänitan lón Jerusalem mi nóm lón ewe fönü Judah. 3Ämi meinisin mi iteni nöün Kot aramas, öüwa tongeni liwinsäfäl ngeni Jerusalem mi nóm lón ewe fönü Judah pwe öüpwe öüüwsäfälietä ei Imwenfel än ewe SAMOL, ewe Koten Israel (I chök Kot) mi nóm Jerusalem. Iwe, amwo ämi we Kot epwe fiti kemi! 4Chón ekkana leeni ia mi wor ie chón Sus mi chüen manaw o mochen liwinsäfäl, repwe tupwufengen liwinin ar sääi ren ar repwe awora ngeniir silifer me kolt fiti pisek me maan pwal ewe asór aramas ra fangaló seni pwisin mochenin letiper fäniten ewe Imwenfelin Kot mi nóm lón Jerusalem.’ ”

5Mwirin, Kot a ömwökütükütü letipen ekkewe souasór me ekkewe aramas seni ewe einangen Levi me souemmwenin ekkewe einangen Judah me Benjamin pwe repwe liwinsäfäl ngeni Jerusalem pwe repwe öüüwsäfälietä ewe Imwenfel än ewe SAMOL. 6Iwe, chón óruur kewe meinisin ra älisiir ren ar fang ngeniir pisek mi för seni silifer me kolt, pwal pisek me maan fäniten ar sääi. Ra pwal ngeniir chómmóng liffang mi öüchchea, kapach ngeni ekkewe asór aramas ra fangaló seni pwisin mochenin letiper.

7Iwe, pwisin ewe King Sairos a atoowu ekkewe pisek mi öüchchea King Nebukadnezar a angeiir seni lón ewe Imwenfel än ewe SAMOL mi nóm lón Jerusalem melóóm nge a anómwur lón imwen an kewe kot. 8Iwe, Sairos ewe kingen Persia a öüröüra ngeni Mithredath ewe chón tümwünü mooni lón Persia pwe epwe älleani ekkeei pisek o ngeni Sheshbazzar ewe söüemmwenin ekkewe chón ooló repwe liwinsäfäl ngeni Judah.

9Iwe iei iteiten ekkewe pisek Sairos a tupwuni:

30 opwong mi för seni kolt,

1,000 opwong mi för seni silifer,

29 sepien keek appach mi pwokkus,

1030 kükkün sepi mi för seni kolt,

410 kükkün sepi mi för seni silifer,

1,000 pwal ekkóch sókkun pisek.

11Iwe, ekkewe pisek meinisin mi för seni kolt me silifer, üküükür 5,400. Sheshbazzar a angei ekkeei pisek meinisin o uweisäfälireló ngeni Jerusalem lupwen i me ekkewe chón ooló ra liwinsäfäliló ikenan seni Babylon.

Ekkewe chón ooló mi liwinsäfäl ngeni Jerusalem

2 Iwe, iei iteiten ekkewe chón Sus mi ooló o nónnóm lón ekkewe eifen Babylon ra liwinsäfäl seni ar ooló. Ra liwinsäfäliti Jerusalem me ekkewe ekkóch telinimwen Judah. Ikkeiir chókewe ewe King Nebukadnezzar a uweiireló Babylon melóóm nge iei ra liwiniti en me an telinimw.

2Ikkeiir chókewe mi fitisäfälieló nöüür kewe souemmwen iter Zerubbabel, Jeshua, Nehemiah, Seraiah, Reelaiah, Mordekai, Bilshan, Mispar, Bikvai, Rehum me Baanah. Iwe, iei iteiten ekkewe mwän seni leiin ekkewe aramasen Israel mi liwinsäfäl seni ar ooló:

3Ekkewe mwirimwirin Parosh, 2,172.

4Ekkewe mwirimwirin Shefatia, 372.

5Ekkewe mwirimwirin Ara, 775.

6Ekkewe mwirimwirin Pahath-Moab

(iir mwirimwirin Jeshua me Joab), 2,812.

7Ekkewe mwirimwirin Elam, 1,254.

8Ekkewe mwirimwirin Zattu, 945.

9Ekkewe mwirimwirin Zakkai, 760.

10Ekkewe mwirimwirin Bani, 642.

11Ekkewe mwirimwirin Bebai, 623.

12Ekkewe mwirimwirin Azkad, 1,222.

13Ekkewe mwirimwirin Adonikam, 666.

14Ekkewe mwirimwirin Bikvai, 2,056.

15Ekkewe mwirimwirin Adin, 454.

16Ekkewe mwirimwirin Ater

(iir mwirimwirin Hezekia), 98.

17Ekkewe mwirimwirin Bezai, 323.

18Ekkewe mwirimwirin Jora, 112.

19Ekkewe mwirimwirin Hashum, 223.

20Ekkewe mwirimwirin Kibbar, 95.

21Iwe, iei iteiten ekkewe mwän mi pwal liwinsäfäl seni ar ooló, nge leewor a pop seni ekkeei telinimw:

Ekkewe aramas seni Bethlehem, 123.

22Ekkewe aramas seni Netofah, 56.

23Ekkewe aramas seni Anathot, 128.

24Ekkewe aramas seni Azmaveth, 42.

25Ekkewe aramas seni Kiriath Jearim, Kefira me Beeroth, 743.

26Ekkewe aramas seni Ramah me Keba, 621.

27Ekkewe aramas seni Mikmash, 122.

28Ekkewe aramas seni Bethel me Ai, 223.

29Ekkewe aramas seni Nebo, 52.

30Ekkewe aramas seni Makbish, 156.

31Ekkewe aramas seni pwal ewe ew Elam, 1,254.

32Ekkewe aramas seni Harim, 320.

33Ekkewe aramas seni Lod, Hadid me Ono, 725.

34Ekkewe aramas seni Jeriko, 345.

35Ekkewe aramas seni Senaah, 3,630.

36Iwe, ikkeei iteiten ekkewe souasór mi liwinsäfäl seni ar ooló:

Ekkewe souasór seni mwirimwirin Jedaiah (iir seni ewe tettelin Jeshua), 973.

37Ekkewe souasór seni mwirimwirin Immer, 1,052.

38Ekkewe souasór seni mwirimwirin Pashur, 1,247.

39Ekkewe souasór seni mwirimwirin Harim, 1,017.

40Pwal ikkeei iteiten chón ewe einangen Levi mi liwinsäfäl seni ar ooló:

Ekkewe chón Levi seni familien Jeshua me Kadmiel (iir mwirimwirin Hadoviah), 74.

41Iei iteiten ekkewe chón kööl seni mwirimwirin Asaf, 128.

42Iei iteiten ekkewe chón tümwünü ekkewe asamalapen ewe Imwenfel seni ekkewe mwirimwirin Shallum, Ater, Talmon, Akkub, Hatita me Shobai, 139.

43Ikkeei mwirimwirin ekkewe chón angang ngeni ewe imwenfel mi liwinsäfäl seni ar ooló:

Ekkewe mwirimwirin Ziha, ekkewe mwirimwirin Hasufa, ekkewe mwirimwirin Tabbaoth,

44ekkewe mwirimwirin Keros, ekkewe mwirimwirin Siaha, ekkewe mwirimwirin Padon,

45ekkewe mwirimwirin Lebanah, ekkewe mwirimwirin Hakabah, ekkewe mwirimwirin Akkub,

46ekkewe mwirimwirin Hakab, ekkewe mwirimwirin Shalmai, ekkewe mwirimwirin Hanan,

47ekkewe mwirimwirin Kiddel, ekkewe mwirimwirin Kahar, ekkewe mwirimwirin Reaiah,

48ekkewe mwirimwirin Rezin, ekkewe mwirimwirin Nekoda, ekkewe mwirimwirin Kazzam,

49ekkewe mwirimwirin Uzza, ekkewe mwirimwirin Paseah, ekkewe mwirimwirin Besai,

50ekkewe mwirimwirin Asnah, ekkewe mwirimwirin Meunim, ekkewe mwirimwirin Nefusim,

51ekkewe mwirimwirin Bakbuk, ekkewe mwirimwirin Hakufa, ekkewe mwirimwirin Harhur,

52ekkewe mwirimwirin Bazluth, ekkewe mwirimwirin Mehida, ekkewe mwirimwirin Harsha,

53ekkewe mwirimwirin Barkos, ekkewe mwirimwirin Sisera, ekkewe mwirimwirin Temah,

54ekkewe mwirimwirin Neziah me ekkewe mwirimwirin Hatifa.

55Ikkeiir ekkewe mwirimwirin nöün Solomon kewe chón angang mi liwinsäfäl seni ar ooló:

Ekkewe mwirimwirin Sotai, ekkewe mwirimwirin Hassofereth, ekkewe mwirimwirin Peruda,

56ekkewe mwirimwirin Jaala, ekkewe mwirimwirin Darkon, ekkewe mwirimwirin Kiddel,

57ekkewe mwirimwirin Shefatiah, ekkewe mwirimwirin Hattil, ekkewe mwirimwirin Pokereth-Hazzebaim me ekkewe mwirimwirin Ami.

58Iwe, kapach fengen meinisin ekkewe mwirimwirin chón angang ngeni ewe imwenfel me ekkewe mwirimwirin nöün Solomon kewe chón angang, 392.

59Iwe, mi wor pwal ew mwiichen aramas mi liwinsäfäl ngeni Jerusalem lón ei fansoun, iir seni ekkewe telinimw Tel Melah, Tel Harsha, Kerub, Addon me Immer. Nge resap tongeni älleta pwe iir are ar kewe famili iir mwirimwirin chón Israel.

60Ei mwiichen aramas ra feitto seni ekkewe mwirimwirin Delaiah, Tobiah me Nekoda. Iteiter, 652.

61Mi wor ülüngät familien souasór mi pwal liwinsäfäl ngeni Jerusalem nge esap fat leewor. Iir seni ekkewe mwirimwirin Hobaiah, Hakkoz me Barzillai. (Ei mwän Barzillai a pwülüweni emön nöün Barzillai kewe föpwül seni Kilead. Iwe, ätei a iteni iten än pwülüwan we famili).

62Nge a pöüt seni ätekkeei taropwen uruwor; ina minne esap mwüümwütä ngeniir pwe repwe wiiseni ewe wiisen souasór pün ra nóm lón tettelin chón limengaw. 63Iwe, ewe kepina esap mwüüt ngeniir pwe repwe mwöngö seni inetin ekkewe souasór we mwöngö mi feitto seni ekkewe asór mi unusen pin tori epwe wor emön souasór mi tongeni kütta seni ewe SAMOL usun pwüngün ei mettóch ren ewe Urim me Thummim.

64Iwe, unuselapen iteiten ewe mwiichen aramas mi liwinsäfäl seni ar ooló, 42,360. 65Nge mi wor üküükün 7,337 nöüür kewe chón angang mwän me fefin, me 200 nöüür kewe chón kööl mwän me fefin resap ällealong lón ei iteit. 66Ra pwal uweei üküükün 736 nöüür óris, 245 nöüür ätemwänin dongki upwun wón óris, 67435 nöüür kamel me 6,720 nöüür dongki.

68Iwe, lupwen ekkewe chón liwinsäfäl ra tori än ewe SAMOL we Imwenfel lón Jerusalem, ekkóch me leiin ekkewe souemmwenin ar kewe famili ra fangafangöch le fangoto ar kewe asór seni pwisin mochenin letiper fäniten an epwe köüsäfälitä än Kot we Imwenfel wón poputän sónun we chök melóóm. 69Iwe, iteiten emön me emön souakkomw a fangaló fäniten ewe angang, alóngólóng wón üküükün an tongeni. Üküükün minne ra fangaló fäniten ei angang a tori 61,000 drakma föün kolt (ika engöröw ipwükü paun kolt), 5,000 mina (ika ülüngät ton) silifer me 100 üüf fäniten souasór.

70Iwe, ekkewe souasór me ekkewe chón ewe einangen Levi me ekkewe chón kööl me ekkewe chón tümwünü asamalapen ewe Imwenfel me ekkewe chón angang ngeni ewe Imwenfel me ekkóch leiin ekkewe aramas ra nóm lón Jerusalem me ekkewe sóóp arap ngeni Jerusalem. Nge ekkewe lussun aramasen Israel meinisin ra en me liwiniti an telinimw ia ra piin nónnóm ie me mwan.

Ra försäfäli ewe róngen asór

3 Iwe, lón ewe efisuwen maram, lupwen ekkewe chón Israel ra nómwóló lón ar kewe telinimw, ekkewe aramas meinisin ra tipeew le chufengen lón Jerusalem. 2Mwirin, Jeshua nöün Jozadak we mwän fiti chiechian kewe souasór me Zerubbabel nöün Shealtiel we mwän fiti aramasan kewe ra poputä le senisäfälietä än ewe Koten Israel we róngen asór pwe repwe tongeni ääni asóren keek wón, usun a mak lón ewe öllük än Moses, ewe mwäneilükün Kot. 3Inamwo ika ekkewe aramas ra nuokkusiti chón ewe leeni mi nóm ünükkür, nge ra chök senisäfälietä ewe róngen asór lón sónun we minen lóm. Mwirin, ra mwittir poputä le ääni asóren keek ngeni ewe SAMOL wón ewe róngen asór. Ra föri ei iteiten lesossor me lekkuniól. 4Ra pwal föri apwapwan ewe Chuulapen Imw Mangaku lón akkóóten pwüngün usun a makketiw lón ewe öllükün Moses o ra ääni ekkewe asóren keek mi affataló fäniten iteiten ew me ew ränin ewe fansoun chuulap. 5Mwirin, ra pwal ääni ekkewe asóren keek mi kan fiffis iteiten rän me ekkewe asór mi köpwüngüló fäniten apwapwan lepoputän maram me pwal ekkewe ekkóch chuulap mi fiffis iteiten ier fäniten ewe SAMOL. Ekkewe aramas ra pwal uweato ekkewe asór seni pwisin mochenin letiper pwe repwe ääniir asór ngeni ewe SAMOL. 6Seni lón ewe äewin ränin ewe efisuwen maram, ra popuetä le ääni ekkewe asór ngeni ewe SAMOL, nge resap mwo popuetä le föri lóngólóngun än ewe SAMOL we imwenfel.

7Mwirin, ra ngeni ekkewe chón sees faaw me ekkewe täikü mooni pwe liwinin ar angang. Ra pwal ngeni ekkewe chón Sidon me Tayer mwöngö me wain me apüra pwe liwinin ar repwe uweatiw ekkewe sópwun irä sedar seni wón ewe chuuk Lebanon o apaseretiw ngeni Joppa arossetin ewe Matawen Mediterrane, pün Sairos ewe kingen Persia a fen mwüütätä ngeniir.

A poputä angangen försäfälin ewe Imwenfel

8Iwe, lón ewe oruuwen maramen ewe oruuwen ier mwirin ar ra wareiti ewe imwenfelin Kot lón Jerusalem, Zerubbabel nöün Shealtiel we mwän me Jeshua nöün Jozadak we mwän fiti chiechier kewe, ekkewe souasór me chón ewe einangen Levi me chókewe meinisin mi liwinsäfäl ngeni Jerusalem seni ar ooló, ra popuetä ewe angang. Nge ra filätä ekkewe mwän seni ewe einangen Levi mi tori rüwe ierir ika lap seni pwe repwe wiisen nemeni angangen köüsäfälitän än ewe SAMOL we Imwenfel. 9Ekkewe chón angang wón än ewe SAMOL we Imwenfel ra nóm fän tümwünüwen Jeshua fiti fengen me nöün kewe mwän me määräriir kewe, pwal Kadmiel me nöün kewe mwän (iir meinisin mwirimwirin Hodaviah). Ekkewe re Levi seni ewe familien Henadad ra pwal älillis le nemeni chókewe mi angang wón ewe Imwenfelin Kot.

10Iwe, lupwen ekkewe chón köü imw ra äwesi le föri lóngólóngun än ewe SAMOL we imwenfel, ekkewe souasór ra üföüfolong üfer kewe üföüfen souasór o ra üütäló lón leenier pwe repwe ettiki nöüür kewe rappwa. Iwe, ekkewe mwän seni ewe einangen Levi, ekkewe mwirimwirin Asaf, ra ochopwuchopwu nöüür kewe pisekin likettik itan simpal pwe repwe mwareiti ewe SAMOL, usun chök minne David ewe kingen Israel a fen makketiw me mwan. 11Iwe, ra köölü ei kööl ren ar mwareiti me kilisou ngeni ewe SAMOL: “I a kirekiröch! An tong mi ölükülük ngeni Israel esap mwüch tori feilfeilló chök!” Mwirin, ekkewe aramas meinisin ra leüommóng le mweireir lupwen ra mwareiti ewe SAMOL, pwokiten a tawe le ffót lóngólóngun än ewe SAMOL we Imwenfel. 12Nge chómmóng me leiin ekkewe souasór mi chinlap me ekkewe mwän seni ewe einangen Levi pwal ekkewe ekkóch souemmwenin einang ra chechchemeni ewe äewin Imwenfel. Iwe, ra osommóng le kechiw lupwen ra küna pwe a tawe lóngólóngun ei Imwenfel mi fö. Nge ekkewe pwal ekkóch aramas ra mweireiren pwapwa. 13Mweireiren pwapwa me kechiw ra nofit fengen lón ew ökürang mi fókkun leüommóng. Iwe, aramas ra tongeni rongorong ei ökürang me towaw.

Ewe angangen üüngeni köüsäfälitän ewe Imwenfel

4 Iwe, ekkewe chón opwut ekkewe aramasen Judah me Benjamin ra rongorong pwe ekkewe chón ooló mi liwinsäfäl ra öüüsäfälietä ew Imwenfel fäniten ewe SAMOL, ewe Koten Israel. 2Iei minne, ra feitto ren Zerubbabel me ekkewe ekkóch souemmwenin einang o apasa, “Öüpwe mwüüt ngeni keem pwe aipwe älisi kemi le öüüetä ewe imwenfel, pün äm aia fel ngeni ämi we Kot usun chök ämi öüwa föri. Äm aia pwal asór ngeni i seni chök ewe fansoun Esarhaddon ewe kingen Assyria a uweikeemito ikeei.”

3Nge Zerubbabel me Jeshua me ekkewe ekkóch souemmwenin Israel ra pölüweni o apasa ngeniir, “Ese wor wewen ämi öüpwe fiti keem le öüüetä ew imwenfel fäniten äm we Kot. Äm chök aipwe öüüetä ei Imwenfel fäniten ewe SAMOL, ewe Koten Israel, usun King Sairos ewe kingen Persia a öllük ngeni keem.”

4Mwirin, ekkewe aramasen ewe leeni ra sótuni ar repwe föri minne ekkewe aramasen Judah repwe tipemwaramwar ren. Ra föri minne repwe nüokkus ren pwe resap sópweló le öüüetä ewe imwenfel. 5Iwe, ra emichimichi le mööni ekkóch nöüwiisen ewe mwüün Persia pwe repwe üüngeniir o aosukosuka ar akkóót. Ra föri ei lapalap lón unusen fansoun mwüün Sairos ewe kingen Persia pwal tori lón fansoun mwüün Darius ewe kingen Persia.

Ewe angangen üüngeni försäfälin Jerusalem

6Iwe, ekkóch ier me mwirin, lupwen Ahasuerus a poputä le nemenem, ekkewe chón opwut Judah ra makkei ngeni Ahasuerus echö taropwen ettipisi ekkewe aramasen Judah me Jerusalem.

7Iwe, pwal me mwirin, lón fansoun mwüün Artasörksiis ewe kingen Persia, ekkewe chón opwut Judah fän emmwenien Bishlam, Mithredath me Tabel ra makkei echö taropwe o tiinaló ren Artasörksiis. Ewe taropwe a mak lón kapasen Arameik o a afföw fäniten ewe king.

8Rehum ewe kepina me Shimshai ewe soummak ra makkei ewe taropwe o üreni King Artasörksiis usun ewe lapalap lón Jerusalem.

9Ra kapwong ngeni ewe king fäniten chiechier kewe meinisin, iir ekkewe soukopwüng me ekkewe souemmwen, ekkewe aramasen Tripolis, ekkewe chón Persia, ekkewe chón Babylon, ekkewe aramasen Erek me Susa (iei Elam). 10Ra pwal tiinaló kapwong seni ekkewe lussun aramas seni ekkewe mwüü iir chókewe Osnappar (iei i Ashurbanipal) ätewe mi tekia o iteföüló a ösüüreló seni leenier o anómwuur lón ekkewe telinimwen Samaria me pwal lón ekkewe ekkóch fönüwen lón ewe kinikin lotoun ewe Chaanpwuupwu Eufreitis.

11Iwe, iei kapiin ewe taropwe ra tiinaló ren Artasörksiis:

“Ngenuk King Artasörksiis, seni noum kewe chón angang, ekkewe mwän seni ewe kinikin lotoun ewe Chaanpwuupwu Eufreitis: 12Äm aia mochen esile ngenuk en ewe king pwe ekkewe chón Sus mi feitto seni Babylon o feitto ikeei lón Jerusalem, iei ra öüüsäfälietä ei telinimw mi efisätä fitikoko me föfföringaw. Ra fen äwesaló le föri ewe lóngólóng fäniten tittin kewe. Iwe, esap mang mwo nge tittin kewe repwe unusöchchüló le försäfäl. 13Nge äm aia mochen esile ngenuk en king pwe are ei telinimw epwe köüüsäfälitä o tittin kewe repwe unusöchchüló le försäfäl, iwe, epwe fókkun wor wätten peekingawan ngenuk, pün mwirin, ekkewe chón Sus resap chüen mochen püngütiw ar takises me äriä me cheniipw ngenuk. Iwe, än ewe king mooni tolong epwe kisikiisiló. 14Iwe, pwokiten äm aia angei älillisiim seni ewe imwen king, äm aisap mochen pwe aipwe küna óm kopwe itengaw lón ei sókkun lapalap, iei minne äm aia tiinaló ei poraus reemw o esile ngenuk usun, en king. 15Äm aia meefätä pwe kopwe tongeni atööpani le kütta me lón ekkewe pwuken uruwon óm kewe lewo usun porausen ei telinimw. Iwe, ina kopwe küna me lón ekkeei pwuken uruwo pwe ei telinimw ew telinimwen efitikoko mi efisätä osukosuk lón ekkewe fansoun ra ló. Enletin, ei telinimw a taaló pwokiten a üüngeni ekkewe king me ekkewe fönü mi sótuni ar repwe nemeni. 16Äm aia esile ngenuk, en ewe king, pwe ika ei telinimw epwe köüüsäfälitä o tittin kewe repwe unusöchchüló le försäfäl; iwe, wewen pwe en kosap chüen nemenem lón ewe fönü lotoun ewe Chaanpwuupwu Eufreitis.”

17Iwe, iei meet ewe king a tiinaló pwe pölüwen ewe taropwe:

“Ngeni Rehum ewe kepina me Shimshai ewe soummak, pwal ngeni chiechier kana mi nóm lón Samaria me leemelen ewe kinikin mi nóm lotoun ewe Chaanpwuupwu Eufreitis. Äi kapwong ngeni kemi lón ei fansoun.

18Ra afföüw o älleani ngeniei ewe taropwe ämi öüwa tiinato reei. 19Iwe, üwa atoowu ew öllük pwe repwe atööpani le kütta porausen ei telinimw lón ekkewe pwuken uruwo. Iwe, ra küna pwe lón uruwon ei telinimw Jerusalem, iei ew leenien ämäärätä angangen üüngeni chómmóng king seni chök lóómlóóm. A pwal pwä pwe a poputä me lón ei leeni angangen efitikoko me üüngeni mwüü. 20A fen wor king mi pwora ra nemenem lón Jerusalem pwal lón unusen ewe kinikin lotoun ewe Chaanpwuupwu Eufreitis ra angei seni aramas wätten takises, äriä me cheniipw. 21Iei minne, öüpwe föri ew öllük pwe ekeei aramas repwe öükätiw ar angang. Ei telinimw esap köüüsäfälitä, chiilón chök ika ew öllük epwe katoowu seniei. 22Öüpwe tümwünü pwe öüsap tunaló ämi öüpwe föri ei mettóch. Pün sisap mwüüt ngeni ewe osukosuk epwe lapaló o efeiengawa ewe king?”

23Iwe, mwirin an a ällea kapiin ewe taropwe seni King Artasörksiis me fän mesen Rehum me Shimshai ewe soummak me chiechier kewe, ra mwittir feittä Jerusalem ren ekkewe chón Sus pwe repwe öükätiw ar angang fän pöchökkül. Iwe, ra eriäniir fän pöchökkül pwe repwe ükütiw le angang.

24Iei minne, ewe angang wón än Kot imwenfel lón Jerusalem a köüüló. Iwe, esap wor och angang epwe fis wón tori ewe oruuwen ierin än Darius ewe kingen Persia a nemenem.

Angangen försäfälin ewe Imwenfel a sópwósópwóló

5 Lón ei fansoun, ekkewe soufós Hakkai me Zekariah nöün Iddo we mwän ra oosuni lón iten ewe Koten Israel ngeni ekkewe chón Sus mi nóm lón Judah me Jerusalem, pün Ngünün Kot a nóm wór. 2Mwirin, Zerubbabel nöün Shealtiel we mwän me Jeshua nöün Jozadak we mwän ra memmeef o ra popuetä ewe angangen köüsäfälitän ewe Imwenfelin Kot lón Jerusalem. Iwe, nöün Kot kewe soufós ra nóm reer o älisiir.

3Nge lón chök pwal ewe fansoun, Tattenai ewe kepinan ewe kinikin lotoun ewe Chaanpwuupwu Eufreitis pwal Shethar-Bozenai me chiechier kewe ra feitto reer lón Jerusalem o apasa ngeniir: “Iö a ngeni kemi mwüümwütän ämi öüpwe öüüsäfälietä ei Imwenfel o försäfäli ekkeei tiit?” 4Mwirin, ra pwal eisiniir ika ikkafa iten ekkewe aramas meinisin mi angang wón ewe Imwenfel. 5Nge pwokiten ar we Kot a mammasa ekkewe souakkomwen chón Sus, ina minne ekkewe nöüwiisen Persia resap eppetir seni ewe angang tori ew repoot epwe tiitiló ren Darius, nge Darius epwe tiinato pölüwen meet i a filätä lón echö taropwe.

6Iwe, iei ewe taropwe Tettenai ewe kepina me Shethar-Bozenai me ekkewe ekkóch nöüwiisen ewe kinikin lotoun ewe Chaanpwuupwu Eufreitis ra tiinaló ren King Darius:

7“Kapwongen unusen kinamwe, ngenuk King Darius.

8Äm aia mochen esile ngenuk en king pwe äm aia feilló ren ewe leeni ia ewe Imwenfel än ewe Kot mi lapalaap a köüütä ie lón ewe kinikinin Judah. Ekkewe aramas ra öüüsäfälietä ewe Imwenfel ren faaw mi fókkun wätte o ra iseis irä lón etippan kewe. Ewe angang a sópwósópwóló le fis fän wätten achoocho o a mwittir le feffeitä.

9Äm aia kapas eiis ngeni ekkewe souakkomw o eisiniir, ‘Iö a ngeni kemi mwüümwütän ämi öüpwe öüüsäfälietä ei Imwenfel o äwesaló le försäfäli ekkeei tiit?’ 10Äm aia pwal eisiniir iteer pwe aipwe tongeni esile ngenuk ika iö kaan nöüür kewe souemmwen.

11Iwe, iei usun minne ra ääni pölüwen ngeni keem, ‘Äm chón angang ngeni ewe Koten läng me fönüfan. Äm aia öüüsäfälietä ewe Imwenfel mi fen piin köüütä ikeei chómmóng ier ra ló meren emön kingen Israel mi lapalaap. 12Nge pwokiten äm kewe leewo ra asoonga ewe Koten läng, iei minne i a likitireló ngeni Nebukadnezzar ewe kingen Babylon, ewe re Kaldea, i ewe a ataeló ei Imwenfel o uwealó ekkewe aramas ngeni Babylonia.

13Nge lón ewe äewin ierin än King Sairos a nemeni Babylon, i a atoowu ew öllük pwe än Kot ei Imwenfel epwe köüüsäfäl. 14King Sairos a pwal eliwinisäfäli ekkewe pisek mi för seni kolt me silifer Nebukadnezzar a angeir seni ewe Imwenfelin Kot lón Jerusalem, a uweireló o anómwur lón ewe imwenfel än an kewe kot lón Babylon. Ekkeei pisek ra katolong fän tümwünüen emön mwän itan Sheshbazzar, iei i ätewe King Sairos a filätä pwe epwe kepinan Judah. 15Iwe, ewe king a öüröüra ngeni Sheshbazzar pwe epwe angei ekkeei pisek o eliwinisäfälireto ngeni ei Imwenfel lón Jerusalem o epwe pwal öüüsäfälietä ewe Imwenfelin Kot wón sónun we melóóm usun chök me mwan.

16Iei minne, ei mwän Sheshbazzar a feitto o fótuki lóngólóngun ewe Imwenfelin Kot mi nóm lón Jerusalem. Seni ena fansoun tori iei ekkewe aramas mi chök chüen akkangang wón ewe Imwenfel, nge esap mwo wesöchchüló.’

17Iei minne, are a öch mereemw, en ewe king, äm aia tungór pwe kopwe kütta lón nöün ewe king pwuken uruwon Babylon pwe kopwe küna ika mi pwüng pwe mi wor ew öllük mi katoowu meren ewe King Sairos pwe ei Imwenfelin Kot lón Jerusalem epwe köüüsäfälitä. Mwirin, en ewe king kopwe tiinato reem minne ka filätä wón ei mettóch.”

Ewe öllük mi katoowu seni Darius

6 Iei minne, King Darius a atoowu ew öllük pwe repwe kütta ei poraus me lón nöün ewe king kewe pwuken uruwo ia ra iseis ie ekkewe pisek öüchchea lón Babylon. 2Nge ra küna ew pwuk me lón ewe imwen samol lón Ekbatana lón ewe kinikin Media. Iwe, iei meet a mak lón ewe pwuk:

3“Lón ewe äewin ierin mwüün King Sairos, iei i ei King Sairos a atoowu ew öllük fänäsengesin ewe Imwenfelin Kot lón Jerusalem:

Ei Imwenfel epwe köüsäfälitä lón ewe leeni ia ekkewe chón Sus ra piin ääni ie ekkewe asór, pün repwe chök sópweló le anómwu wón lóngólongun kewe me lepoputän. Tekian ewe imwenfel epwe üküükün tiwe fiit, nge chöölapan epwe pwal tiwe fiit. 4Etippan kewe repwe för seni ülüngät sässärin faaw mi wätte o fal nge ewe ew sässärin asan epwe för seni irä. Nge liwinin ewe angang meinisin epwe toowu seni än ewe king leenien iseis mooni. 5Ekkewe pisek mi för seni kolt me silifer Nebukadnezzar a angei seni ewe Imwenfelin Kot mi nóm lón Jerusalem o uweiireló Babylon repwe liwinsäfäliló ngeni Jerusalem o katoolong lón ewe Imwenfel lón Jerusalem. Repwe iseni ew me ew lón äwenewenen leenian usun me mwan.”

6Iei minne, King Darius a tiinaló ei poraus: “Ngenuk Tattenai ewe kepinan ewe kinikin lotoun ewe Chaanpwuupwu Eufreitis, ngenuk Shethar-Bozenai pwal ngeni chiechiemi kana me ekkewe ekkóch nöüwiis mi nóm lotoun ewe Chaanpwuupwu Eufreitis: Öüpwe süü seni ikena. 7Öüsap aosukosuka ei angang wón ewe Imwenfelin Kot. Öüpwe mwüüt ngeni ewe Imwenfel pwe epwe köüüsäfälitä lón leenian we me mwan. Öüsap eppeti ewe kepinan Judah me nöün ekkewe chón Sus kana souemmwen lón ar angang.

8Iwe pwal och, ngang üwa pwal atoowu öllük pwe ämi öüpwe älisi ekkeei souemmwen nöün chón Sus fänäsengesin köüüsäfälitän ei Imwenfelin Kot. Öüpwe püngütiw unusen liwinin ei angang nge öüsap ammanga. Öüpwe atoowu seni äi we takises mi ioifengen me lón ämi na kinikin lotoun ewe Chaanpwuupwu Eufreitis pwe ewe angang esap köüüló. 9Iwe, iteiten rän öüpwe ngeni ekkewe souasór lón Jerusalem usun minne ra tungór, nge öüsap ömwüchü seniir. Öüpwe ngeniir minne ra osupwangan, ese lifilifil ika liälifföön ätemwänin kowu, ätemwänin siip me appanen siip fäniten ekkewe asóren keek repwe ääni asór ngeni ewe Koten läng. Öüsap ükütiw ämi öüpwe pwal awora ngeniir wiit, salt, wain me apüra seni föün olif ra aea iteiten rän. 10Mwirin, iir repwe tongeni ääni ekkewe asór mi apwapwai letipen ewe Koten läng o repwe pwal iótek fänitei me neii kewe mwän.

11Iö mi pwuurätiw ei öllük lón och sókkun lapalap, efóch irän imwan epwe üttüütüwu seni imwan. Mwirin, ätewe epwe eitiwätä wón ewe irä o wichiwich, nge imwan epwe kataaló o wiliti ioien piipi pwokiten ei. 12Amwo Kot ewe mi filätä ewe telinimw Jerusalem pwe epwe iei ewe leeni mi enlingaló itan epwe asapwilätiw ese lifilifil iö king ika mwüü mi üüngeni ei öllük o ataeló ei Imwenfel lón Jerusalem. Ngang Darius üwa atoowu ei öllük. Aramas meinisin repwe tichchik le älleasochisi.”

Ewe Imwenfel a wesiló o efiinüün

13Mwirin, Tattenai ewe kepinan ewe kinikin lotoun ewe Chaanpwuupwu Eufreitis me Shethar-Bozenai me chiechier kewe ra mwittir fiti pwüngün än King Darius we öllük. 14Iei minne, ekkewe souemmwen nöün chón Sus ra sópweló le öüüsäfälietä ewe Imwenfel, nge ar angang a fisiöch, pün ekkewe soufós Hakkai me Zekariah emön mwirimwirin Iddo ra peseei le öpöchökkülätä letiper ren ar afalafal. Iwe, ra äwesaló le öüüsäfälietä ewe Imwenfel usun ewe Koten Israel a öllük nge a osomän meren Sairos, Darius me Artasörksiis ekkewe kingen Persia. 15Iwe, ewe Imwenfel a wesiló lón ewe öülüngätin ränin ewe maram Adar, lón awonuwen ierin mwüün King Darius.

16Mwirin, ekkewe aramasen Israel, ekkewe souasór, ekkewe mwän seni ewe einangen Levi me ekkewe lussun chón Israel mi liwinsäfälito seni ar ooló, ra föri apwapwan efiinüünen ewe imwen Kot fän pwapwa. 17Lón ótun ewe efiinüünen ei Imwenfelin Kot, ra ääni asór üküükün 100 liälifföön ätemwänin kowu, 200 ätemwänin siip me 400 liälifföön siip. Ra pwal ääni asór 12 ätemwänin kuuch pwe ew asóren tipis fäniten chón Israel meinisin, emön kuuch fäniten ew me ew kewe einangen Israel. 18Mwirin, ekkewe souasór me ekkewe mwän seni ewe einangen Levi ra inetitiw lón ar kewe kinikin pwe repwe angang lón ewe Imwenfelin Kot lón Jerusalem, nge ra fiti ekkewe öüröür meinisin mi makketiw lón ewe Pwuken Moses.

Ewe Pasofer

19Iwe, lón ewe engol me rüwänüwen ränin ewe äewin maram, chókewe mi liwinsäfälito seni ar ooló ra efisi ächechchemen ewe Pasofer. 20Ekkewe souasór me ekkewe mwän seni ewe einangen Levi ra tipeppök le elimeöchüür. Iwe iir meinisin ra nóm lón tettelin chón limöch. Iwe, ekkewe mwän seni ewe einangen Levi ra nii ewe laam mönün Pasofer fäniten chókewe mi liwinsäfälito seni ar ooló, fäniten chiechier kewe souasór me pwal pwisin fäniter. 21Iwe, ekkewe aramasen Israel mi liwinsäfälito seni ar ooló ra mwöngö ewe mwöngön Pasofer fitifengen me ekkewe ekkóch aramas mi nóm lón ewe fönü ra fen kul seni ar kewe öörüni mi limengaw pwe repwe fel ngeni ewe SAMOL, ewe Koten Israel. 22Ra mwöngö ewe mwöngön Pasofer o föri ächechchemen ewe chuulapen mwöngö pilawa esap wor iis lón, lón üküükün fisu rän. A wor pwapwa leemelen ewe fönü, pwokiten ewe SAMOL a ourer ren pwapwa ren an kulluw leluken ewe kingen Assyria ngeniir, iei popun i a älisiir pwe repwe öüüsäfälietä ewe Imwenfelin Kot, ewe Koten Israel.

Ezra a feitto Jerusalem

7 Iwe, chómmóng ier me mwirin, lón ótun mwüün Artasörksiis ewe kingen Persia, a wor emön mwän itan Ezra. Ätei Ezra i nöün Seraiah mwän, nge Seraiah i nöün Azariah, nge Azariah i nöün Hilkiah. 2Hilkiah nöün Shallum, Shallum nöün Zadok, Zadok nöün Ahitub, 3Ahitub nöün Amariah, Amariah nöün Azariah, Azariah nöün Meraioth, 4Meraioth nöün Zerahiah, Zerahiah nöün Uzzi, Uzzi nöün Bukki, 5Bukki nöün Abishua, Abishua nöün Finehas, Finehas nöün Eleazar, Eleazar nöün Aaron ewe souasór mi lap. 6Ei mwän Ezra i emön soummak mi fókkun silelap lón ewe Öllük än Moses, iei ewe öllük ewe SAMOL ewe Koten Israel a ngeni ekkewe aramasen Israel. Ätei a feittä Jerusalem seni Babylon, nge ewe king a mwüüt ngeni i mettóch meinisin minne a tungór, pokiten ümöümöchün pöün ewe SAMOL an we Kot a emmweni i. 7Iwe, ekkóch me leiin ekkewe chón Israel pwal pacholong ekkóch kewe souasór me ekkewe mwän seni ewe einangen Levi me ekkewe chón kööl me ekkewe chón tümwünü asamen ewe imwenfel me ekkewe chón angang ngeni ewe Imwenfel ra fiti Ezra le feittä Jerusalem lón ewe efisuwen ierin mwüün King Artasörksiis.

8Ezra a tori Jerusalem lón ewe elimuen maramen pwal ewe chök ier. 9Ezra a popuetä an sääi seni Babylon lón ewe äewin ränin ewe äewin maram. Iwe, a wareiti lón Jerusalem lón ewe äewin ränin ewe elimuen maram, pün ümöümöchün pöün an we Kot a emmweni i. 10Ei a fis, pün Ezra a fiseetä seni lón letipan pwe epwe achoocho le käeö o älleasochisi än ewe SAMOL we Öllük, o epwe pwal esikula ekkewe öllük me pwüüng ngeni ekkewe aramasen Israel.

Nöün King Artasörksiis taropwe ngeni Ezra

11Iwe, King Artasörksiis a fen ngeni Ezra echö kapiin ei taropwe. Ezra ewe souasór me sense, i emön mwän mi achoocho le käeö me esikuula ekkewe öllük me pwüüng än ewe SAMOL ngeni chón Israel. Iei masowen ei taropwe:

12“Kapwong seni Artasörksiis, kingen king kana, ngeni Ezra ewe souasór, ewe sensen än ewe Koten läng kewe öllük. Unusen kinamwe ngonuk lón ei fansoun.

13Iei ngang üwa atoowu ai ei öllük pwe ese lifilifil iöön me leiin ekkewe chón Israel mi nóm lón mwüüi, pwal pacholong ekkewe souasór me chón ewe einangen Levi mi mochen epwe fituk le liwiniti Jerusalem, a tongeni feilló. 14Ngang me neii kewe füümön souöüröür aipwe tiinukeló pwe kopwe kütta usun porausen Judah me Jerusalem are iir mi fiti pwüngün ewe Öllük mi nóm reemw än óm we Kot. 15Äm aia pwal ewiisók pwe kopwe uwealó ekkóch silifer me kolt ngang ewe king me neii kewe souöüröür aia fangaló seni mochenin letipeem pwe epwe ew asór ngeni ewe Koten Israel i minne imwan ewe a nóm Jerusalem. 16Kopwe pwal uwealó silifer me kolt ka tongeni angei seni lón ewe eifen Babylon, pwal ekkewe asór seni ekkewe aramasen Israel me ekkewe souasór repwe fangaló seni pwisin mochenin letiper fäniten ewe Imwenfel än ar we Kot lón Jerusalem. 17Repwe nöünöü ekkeei mooni fäniten liwinin ekkewe ätemwänin kowu me ekkewe ätemwänin siip me ekkewe liälifföön siip fitifengen me ekkewe asóren mwöngö me asóren wün. Kopwe äänir asór meinisin wón ewe róngen asór lón ewe Imwenfel än óm we Kot lón Jerusalem.

18En me chiechiom kewe chón Sus öüwa tongeni nöünöü ewe lussun silifer me kolt lón meet sókkun lapalap öüwa meefi pwe ina letipen ämi we Kot. 19Nge ren ekkewe pisek meinisin äm aia atolonga fän óm tümwün fäniten angangen lón ewe Imwenfel än óm we Kot, kopwe uweiireló meinisin ren ewe Koten Jerusalem. 20Are kopwe naffangaw wón mooni fäniten och mettóch mi öüchchea fäniten ewe Imwenfel än óm we Kot ika fäniten och osupwang, en ka tongeni tungór mooni seni än ewe king leenien iseis mooni.

21Ngang Artasörksiis ewe king, üwa tiinaló ei öllük ngeni kemi ämi ekkewe chón iseis mooni meinisin lón ewe kinikin lotoun ewe Chaanpwuupwu Eufreitis: ‘Öüpwe ngeni Ezra ese lifilifil ika meet i epwe tungór seni kemi, pün i emön souasór me sensen ewe Öllük än ewe Koten läng. 22Öüpwe ngeni i üküükün 100 talent silifer,a 100 koor wiit,b 100 bathc wain me 100 bath apüra, nge salt esap wor köükün. 23Öüpwe tümwünüfichi pwe öüpwe awora ese lifilifil meet ewe Koten läng a mochen fäniten an we Imwenfel. Pün pwata sipwe awarato än Kot soong wón mwüüi me neii kewe mwän. 24Ngang üwa pwal atoowu äi öllük pwe esap wor emön souasór ika emön chón ewe einangen Levi ika emön chón kööl ika emön chón tümwünü asamen ewe imwenfel ika emön chón angangen ewe Imwenfel ika pwal emön chón angangen lón ei Imwenfelin Kot epwe püngüütiw ekkewe sakkopaaten takises.’

25Iwe, en Ezra, kopwe aea ewe tipächchem óm we Kot a fang ngenuk, pwe kopwe filätä ekkewe samol me souköpwüng mi silei ekkewe öllük än óm we Kot pwe repwe nemeni ekkewe aramas meinisin mi nóm lón ewe kinikin lotoun ewe Chaanpwuupwu Eufreitis. Are ekkewe aramas resap silei ekkewe öllük än óm we Kot, iwe, en kopwe esikuula ngeniir. 26Iwe, ese lifilifil ika iö esap mochen epwe älleasochis ngeni ekkewe öllük än óm we Kot me ewe öllük än ewe king, ätena epwe tolong lón köpwüng o mwittir angei pwüngün an köpwüng, ese lifilifil ika epwe mäló ika epwe kösüüló seni fönüwan ika repwe angei seni i pisekin ika epwe kalapwuus.”

27Ngang üwa mwareiti ewe SAMOL, ewe Kot än äm kewe leewo mi atolonga ei sókkun ekiek lón leluken ewe king, pwe epwe mochen enlinga än ewe SAMOL we Imwenfel mi nóm Jerusalem! 28Ngang üwa pwal mwareiti Kot pün a pwääraló an tong ese mwüch ngeniei ren an föri pwe üpwe iteüöch me fän mesen ewe king me nöün kewe souöüröür pwal fän mesen nöün ewe king kewe nöüwiis meinisin mi wor maner. Iwe, ngang üwa meefi äi tipepwora, pwokiten pöün ewe SAMOL äi we Kot a emmweniei. Mwirin, ngang üwa körifengeni ekkóch leiin ekkewe souemmwenin Israel pwe repwe fitiei le liwinsäfäliló ngeni Jerusalem.

Ekkewe meilapen famili mi fiti Ezra le liwinsäfäl

8 Iwe, ikkeiir ekkewe souemmwen seni mwirimwirin semer kewe me iteiten chókewe mi makkelong iter lón ewe iteit ra fitiei le feittä seni Babylon lón ótun mwüün King Artasörksiis:

2Kershom seni ekkewe mwirimwirin Pinehas. Daniel seni ekkewe mwirimwirin Ithamar.

Hattush nöün Shekaniah we mwän seni ekkewe mwirimwirin David.

3Zekariah me pwal 150 mwan seni ekkewe mwirimwirin Parosh.

4Eliehoenai nöün Zerahiah we mwän me pwal 200 mwän seni ekkewe mwirimwirin Pahat-Moab.

5Shekania nöün Jahaziel we mwän me pwal 300 mwän seni ekkewe mwirimwirin Zattu.

6Ebed nöün Jonathan we mwän me pwal 50 mwän seni ekkewe mwirimwirin Adin.

7Jeshaiah nöün Athaliah we mwän me pwal 70 mwän seni ekkewe mwirimwirin Elam.

8Zebadiah nöün Mikael we mwän me pwal 80 mwän seni ekkewe mwirimwirin Shefatiah.

9Obadiah nöün Jehiel we mwän me pwal 218 mwän seni ekkewe mwirimwirin Joab.

10Shelomith nöün Josifiah we mwän me pwal 160 mwän seni ekkewe mwirimwirin Bani.

11Zekariah nöün Bebai we mwän me pwal 28 mwän seni ekkewe mwirimwirin Bebai.

12Johanan nöün Hakkatan we mwän me pwal 110 mwän seni ekkewe mwirimwirin Azkad.

13Iwe, iei iten chókewe seni ekkewe mwirimwirin Adonikam mi liwinsäfäliló Jerusalem lón ew fansoun mwirin: Elifelet, Jeuel me Shemaiah me pwal 60 mwän.

14Pwal Uthai me Zakkur me pwal 70 mwän seni ekkewe mwirimwirin Bikvai.

Ekkewe chón angang ngeni ewe Imwenfel

15Iwe, ngang üwa emwiicha fengeni ekkeei aramas mi liwinsäfäl seni ar ooló me órun ewe chaanpwuupwu mi pwuu ngeni ewe telinimw Ahava o aia asóósó ikenan lón üküükün ülüngät rän. Lupwen üwa nennengeni iteiten ekkewe aramas me ekkewe souasór mi war, üwa küna pwe esap wor emön me leiin chón ewe einangen Levi a filätä pwe epwe fiti keem. 16Iei minne, ngang üwa tiiti Eliezer, Ariel, Shemaiah, Elnathan, Jarib, Elnathan, Nathan, Zekariah me Meshullam iir nöün ekkewe aramas souemmwen. Üwa pwal tiiti Joiarib me Elnathan iir ekkewe mwän mi miriit. 17Iwe, üwa tiiniireló ren Iddo i ewe souemmwen nöün chón ewe einangen Levi mi nóm lón Kasifia pwe repwe tungórei me määrärin kewe me ekkewe chón angangen lón ewe Imwenfel pwe repwe tiinato reem ekkóch chón angang fäniten ewe Imwenfelin Kot lón Jerusalem. 18Iwe, pwokiten ümöümöchün pöün äm we Kot a emmweni keem, iei minne ra tiinato reem emön mwän itan Sherebiah fiti nöün kewe mwän me pwiin kewe, iteiter, 18 mwän. Ätei i emön mwän mi sipeöch le angang me emön mwirimwirin Mahli, nge Mahli i emön mwirimwirin Levi nöün Israel we mwän. 19Ra pwal tiinato Hashabiah fiti fengen me Jeshaiah seni ekkewe mwirimwirin Merari pwal nöün kewe mwän me pwiin kewe, iteiter 20 mwän. 20A pwal wor üküükün 220 mwän seni leiin ekkewe chón angangen ewe Imwenfel, iir chokewe David me nöün kewe nöüwiis ra filiretä pwe repwe älisi ekkewe mwän seni ewe einangen Levi. Iir meinisin a makkelong iter lón ewe iteit.

21Iwe, me ikenan órun ewe pwuupwu Ahava, ngang üwa atoowu ew öllük pwe äm meinisin aipwe öchüün o etekisónäkeem fän mesen äm we Kot. Äm aipwe iótek ngeni pwe epwe fang ngeni keem fisiöchchün äm sääi o tümwünü keem me nöüüm kana pwal pisekim meinisin lupwen äm aia sääi. 22Pün ngang üwa sääw äi üpwe tungórei ewe king fäniten sounfiu me chón waawa óris pwe repwe emmweni keem o tümwünü keem wón aal seni chón opwuta keem, pwokiten äm aia fen kapas ngeni ewe king o apasa, “Pöün äm we Kot epwe tümwünü chókana meinisin mi fel ngeni i, nge an manaman me an soong epwe efeiengawa chókana mi likitaló i.” 23Iei minne, äm aia öchüün o iótek maamaw pwe äm we Kot epwe tumwünü keem. Iwe, i a rongorong äm iótek.

Ekkewe liffang fäniten ewe Imwenfel

24Mwirin, ngang üwa filäwu engol me rüwömön souemmwen seni leiin ekkewe souasór. Üwa filätä Sherebiah me Hashabiah pwal engol seni leiin ekkewe souasór, 25pwe repwe wiisen tümwünü le uweei ewe silifer, ewe kolt, ekkewe sepi kolt me ekkewe pwal ekkóch pisek, ewe king me nöün kewe souöüröür pwal nöün kewe samol me ekkewe aramasen Israel meinisin mi nónnóm ikenan ra fangaló pwe tupwuur fäniten ewe Imwenfelin Kot. 26Ngang üwa kiloni ewe mooni o uwalong lón pöün ekkewe engol me rüwömön souasór. Iwe, üwa küna pwe iei üküükün kapachalapen ekkeei mettóch: 650 talent silifer, 200 talent pisek mi för seni silifer, 100 talent kolt, 27rüwe sepi mi för seni kolt, möör ina epwe üküükün 1,000 föün kolt, pwal 2 sepi mi för seni piraas mi emmis o ling, ra usun chök öüchchean kolt.

28Iwe, üwa apasa ngeni ekkeei souasór, “Ämi me ekkeei pisek mi öüchchea öüwa käimwüló pwe öüwa pin fäniten ewe SAMOL. Ewe silifer me ewe kolt iei ew asór än ekkewe aramas seni pwisin mochen letiper ngeni ewe SAMOL, ewe Kot än ach kewe leewo. 29Öüpwe mammasaöchüw ekkeei pisek mi öüchchea pwe esap tóróló ew aunus seniir tori ämi öüpwe atourer ngeni ekkewe souemmwenin souasór me ekkewe mwän seni ewe einangen Levi pwal ekkewe souemmwenin Israel me lón ekkewe rumwen iseis me lón än ewe SAMOL we Imwenfel lón Jerusalem. 30Iwe, ekkewe souasór me ekkewe mwän seni ewe einangen Levi ra etiwa ewe angang pwe repwe uweei ewe silifer me ewe kolt me ekkewe pisek mi pin ra fen wes le kilo ngeni ewe Imwenfel än ach we Kot lón Jerusalem.”

31Iwe, lón ewe engol me ruuen ränin ewe äewin maram, aia feilló seni ewe pwuupwu Ahava pwe aipwe feilló ngeni Jerusalem. Ümöümöchchün pöün äm we Kot a tümwünü keem o amanawa keem seni ekkewe chón opwuta keem pwal seni ekkewe chón soolä mi nóm älein ewe aal. 32Iwe, aia tori Jerusalem o aia asöösö ikenan lón üküükün ülüngät rän.

33Iwe, lón ewe örüwänüwen rän mwirin äm wareló, aia feilló lón ewe Imwenfel än äm we Kot o aia kiloni ewe silifer me ewe kolt me ekkewe pwal ekkóch pisek mi öüchchea. Iwe, aia atolonger lepöün Meremoth nöün Uria ewe souasór pwal lepöün ewe souasór Eleazar nöün Finehas we mwän, pwal Jozabad nöün Jeshua we mwän me Noadiah nöün Binnui we mwän, iir me rüwömön chón ewe einangen Levi. 34A älleletöch iteiten me choun ekkewe mettóch meinisin. Iwe, a makkelong lón ew pwuk unusen kapachalaper.

35Mwirin, ekkewe aramas mi liwinsäfälito seni ar ooló ra ääni ekkewe asóren keek ngeni ewe Koten Israel. Ra ääni asór 12 ätemwänin kowu fäniten ekkewe aramasen Israel meinisin, pwal 96 ätemwänin siip me 77 liälifföön siip. Ra pwal ääni asór 12 ätemwänin kuuch fäniten asóren tipis. Ra fangeló ekkeei mönün asór meinisin ngeni ewe SAMOL pwe ew asóren keek. 36Iwe, ra pwal atoura än ewe king kewe öllük ngeni ekkewe chón tupwuni ewe king me ekkewe kepina mi nóm lón ewe kinikin lotoun ewe Chaanpwuupwu Eufreitis. Mwirin, iir ra angang fengen le awora ar älillis ngeni ekkewe aramas me ewe Imwenfelin Kot.

Än Ezra iótek

9 Nge mwirin än ekkeei mettóch ra wesiló, ekkewe souemmwenin chón Sus ra feitto reei o apasa, “Chómmóng leiin ekkewe aramasen Israel pwal pacholong ekkewe souasór me ekkewe mwän seni ewe einangen Levi resap äimwüreló seni ekkewe ekkóch aramas mi nónnóm lón ekkewe fönü ünükküür. Pün ra föri ekkewe föfför mi enniopwut än ekkewe chón Kanaan, chón Hit, chón Periz, chón Jebus, chón Ammon, chón Moab, chón Egypt me chón Amor. 2Pün ekkewe re Israel ra angei ekkóch leiin nöüür kewe föpwül pwe pwülüwer me pwülüwen nöüür kewe mwän. Iei minne ewe mwiichen aramas mi pin ra limengaw ren ar ra efitiarfengen me ekkewe aramas mi nóm pwellin ünükküür ren ar ra pwüpwülü fengen. Nge fen lapalón ngawan, ekkewe souakkomw me nöüwiis iir ekkóch me leiin ekkewe mi atai ewe pwonen lefiil mi ölükülük.”

3Iwe, lupwen ngang üwa rong ei poraus, üwa kamwei üfei o üttawu öüchimwen mökürei me ölüsei. Iwe, üwa móttiw lón unusen äi letipetä. 4Mwirin, chókewe meinisin mi chechchech ren ekkewe kapas än ewe Koten Israel ra mwiicheto reei o móttiw ünükki, pwokiten minne ekkewe mi liwinsäfälito seni ar ooló ra föri ren ar atai ewe pwonen lefiil mi ölükülük. Iwe, üwa móót ikenan lón äi letipeta tori ewe fansoun asóren lekkuniól.

5Lón ótun ewe fansoun asóren lekkuniól, ngang üwa üütä seni ewe leeni ia ngang üwa móót ie lón äi letipeta fän üfei kewe mi kamw. Iwe, üwa fótópwäsukutiw o eitietä peii ngeni ewe SAMOL äi Kot. 6Üwa iótek o apasa:

O äi Kot, ngang üwa fókkun sääw o itengaw äi üpwe sachchetä mesei ngenuk, äi Kot. Pün äm kana tipis ra chukuchukutä o tekia seni möküreem, nge äm kana pwuupwungaw ra tori läng. 7Seni fansoun äm kewe leewo tori ikenäi, äm kana pwuupwungaw ra fókkun lapalaap. Iei popun, äm me nöüüm kewe king pwal nöüüm kewe souasór aia nóm fän nemenien kingen ekkewe fönü. Äm aia küna ninni ren ketilas, aia ooló, aramas ra sooläni pisekiim fän pöchökkül, o aia sääw ren äm itengaw usun a fis ikenäi.

8Nge iei, en ewe SAMOL äm Kot, ka ääni ümöümöch ngeni keem lón ei fansoun mi chök mwochomwooch pün en ka mwüüt ngeni ekkóch me leiim pwe repwe manaw pwe epwe wor ew lussun mwiichen aramas mi chüen manaw. En ka mwüüt ngeni keem pwe aipwe liwinsäfälito seni äm ooló o nónnóm lón ei leeni mi pin fän kinamwe. En äm Kot ka asarama meseem o mwüüt ngeni keem pwe aipwe ekis ngasaló seni än aramas nöüni keem amanaw. 9Pün aramas ra nöüni keem amanaw, nge lón óm tong esap mwüch en äm we Kot kosap likitikeemiló lón äm nóm lón föötek. Nge en ka popuw ngeni ekkewe kingen Persia pwe repwe kirekiröch ngeni keem. En ka mwüüt ngeni keem manaw mi fö pwe aipwe tongeni öüüsäfälietä óm we Imwenfel en äm we Kot o försäfäli minne a taatakis me wón. En ka ngeni keem ew tiit pwe epwe tümwünü keem lón Judah me Jerusalem.

10Nge iei, O äm Kot, meet äm aipwe tongeni apasa me mwirin ei lapalap mi fis? Pün äm aia pwal älleasolap säfäl ngeni óm kewe öllük! 11Noum kewe chón angang ekkewe soufós ra fönöw keem melóóm pwe ewe fönü äm aipwe tolong lón pwe aipwe fönüweni a unusen limengaw ren enniopwuten föfförün ekkewe aramas mi nónnóm lón. Seni esóp ewe fönü tori ewe pwal esóp, a uren föfför mi ngaw. 12En ka üreni keem pwe aisap mwüüt ngeni nöüüm kewe föpwül pwe repwe pwülüweni nöüür kewe mwän, aisap pwal mwüüt ngeni nöüüm kewe mwän pwe repwe pwülüweni nöüür kewe föpwül. Ka pwal apasa pwe äm aisap kütta ew angangen etipeewin chiechi fengen me chón ekkewe mwüü. En ka pwon pwe are äm aipwe süü seni ekkeei föfför, äm aipwe wiliti ew mwüü mi feffeitä. En ka pwon pwe äm aipwe pwapwaäsini ekkewe mettóch mi mwirinnö seni ewe fönü o likiti ewe fönü ngeni mwirimwirim kana pwe repwe fönüweni tori feilfeilló chök.

13Iwe, iei äm aia köpwüng, pwokiten äm kana föfföringaw me äm pwuupwungaw mi lapalaap. Iwe, nge en äm Kot, óm öpwüngü keem a fen kis seni minne a fich ngeni keem ren äm kana tipis o ka fen pwal mwüüt ngeni ekkóch me leiim pwe repwe chüen manaw. 14Nge iei, äm aia pwal ataisäfäli óm kewe öllük o pwüpwülü fengen me ekkewe aramas mi föri ekkewe föfför mi enniopwut. Enlet óm soong epwe arosakeemiló tori ei mwo kükkün lussun mwiichen aramas mi chüen manaw nge resap chüen manaw. 15O SAMOL, Koten Israel, en ka pwüng. Äm aia üütä mwom lón äm tipis, nge en ka mwüüt ngeni keem pwe aipwe chüen manaw. Esap tüfich ngeni keem pwe äm aipwe feitto fän mesom.”

Pwärätä tipis fäniten mwällin pwüpwülü

10 Iwe, lupwen Ezra a iótek o pwärätä ekkewe tipis, a kechiw o chappaló wón pwül me mwen ewe Imwenfelin Kot, nge ew wätten mwiichen chón Israel - mwän, fefin, me semiriit - ra mwiicheto o pwellieló i. Iwe, pwal iir meinisin ra fiti Ezra le seningüüngü. 2Mwirin, Shekaniah nöün Jehiel we mwän emön me leiin ekkewe mwirimwirin Elam a apasa ngeni Ezra, “Äm aia pwärätä äm tipis pwe aia atai äm pwonen ölükülük ngeni äm we Kot, pün äm aia pwüpwülü ngeni ekkeei fiin lükün seni ekkewe fönü mi nóm ükükküüm. Nge inamwo are a fis ei, nge mi chök chüen wor apilükülük fäniten Israel.

3Iei minne, iei kopwe mwüüt ngeni keem pwe aipwe föri ew pwon fän mesen äm we Kot pwe äm aipwe mwüüseni pwülüweem keei fiin ekis meinisin o tiinireló fengen me nöüür kewe. Äm aipwe tapweló mwirin ewe kapasen öüröür mereem en äm samol pwal mereen ekkewe ekkóch mi suuföliti ekkewe öllük än ach we Kot. Äm aipwe älleasochisi ewe öllükün Kot. 4Kopwe tipepwora, pün iei wiisom pwe en kopwe üreni keem usun äm aipwe sópweló le äwenechchara ekkeei mettóch. Iwe, äm aipwe unusen älisuketä.”

5Iei minne, Ezra a üütä o a peseei ngeni ekkewe souemmwen me leiin ekkewe souasór me ekkewe mwän seni ewe einangen Levi pwal ekkewe aramasen Israel meinisin pwe repwe pwon fän ökköpöl pwe repwe föri usun minne Shekania a apasa. Iwe, iir meinisin ra pwon fän ökköpöl. 6Mwirin, Ezra a üütä o feilló seni mwen ewe Imwenfelin Kot. Iwe, a tolong lón ruumwen Jehohanan nöün Eliashib we mwän o a nóm ikenan lón ewe pwinin, nge esap äni och mwöngö ika wün. Pün i a chüen letipeta, pwokiten ekkewe tipis chókewe mi liwinsäfälito seni ar ooló ra föri.

7Mwirin, ew kapasen esilesil a arongorongfeil leemelen unusen Judah me Jerusalem pwe meinisin chókewe mi liwinsäfälito seni ar ooló repwe mwiichfengen lón Jerusalem. 8Nge iö esap war lón üküükün ülüngät rän, repwe angei seni pisekin meinisin, nge i ewe aramas wón inisin epwe kösüüló seni leiin ewe mwiichen chón liwinsäfälito seni ar ooló, are ekkewe souemmwen me ekkewe souakkomw repwe öpwüngaló pwe epwe iei usun.

9Iwe, lón üküükün ülüngät rän, ekkewe aramasen Judah me Benjamin meinisin ra mwiichfengen lón Jerusalem. Ei atun, iei rüween ränin ewe ettiuwen maram. Iwe, ekkewe aramas meinisin ra móót lón ewe leeni mi amassawa mwen ewe Imwenfelin Kot. Nge ra chechcheech ren ar nuokkus pwokiten alólilenin ei mettóch mi fis, pwal pwokiten pwüngüwätten ewe üüt. 10Mwirin, ewe souasór Ezra a üütä o apasa ngeniir, “Ämi öüwa tipis pün öüwa atai ewe pwonen lefiil mi ölükülük. Pün ämi öüwa pwüpwülü ngeni ekkewe fiin ekis. Iwe, iei a fen lapaló ach nóm fän önümamaw lap seni me mwan. 11Iei minne, iei öüpwe pwärätä ämi tipis ngeni ewe SAMOL, ewe Kot än ämi kewe leewo o öüpwe föri meet i a mochen. Öüpwe äimwükemiiló seni aramasen ekkewe fönü mi nóm ünükkümi pwal seni pwülüwemi keei fiin ekis.”

12Mwirin, unusen ewe mwiichen aramas meinisin ra pölüeni o leüommóng le apasa, “Ewer, mi pwüng reemw. Äm aipwe fókkun föri usun minne en ka apasa!” 13Mwirin, ra pwal apasa, “Ei esap och mettóch aipwe tongeni föri lón ew ika ruu rän, pün a fókkun wor chómmóng me leeim ra pacholong lón ei föfför mi wesewesen uren tipis. Pwal iei fansoun püngüwätten üüt, iei minne äm aisap tongeni üütätam lükün. 14Kose mochen kopwe mwüüt ngeni ekkewe souemmwen seni unusen äm ei mwiich pwe repwe föri ei föfför fänitem meinisin. Chókana meinisin seni lón äm kewe telinimw mi pwüpwülü ngeni ekkewe fiin ekis repwe feitto lón ewe fansoun mi pwonoló, fiti fengen me ekkewe souemmwen me ekkewe souköpwüng seni ar kewe telinimw. Epwe iei usun pwe än ach we Kot soong mi lapalaap fänäsengesin ei föfför epwe kul seni kich.” 15Nge Jonathan nöün Asahel we mwän me Jahaziah nöün Tikvah we mwän, iir chök ra opwut ei lapalap, pwal Meshullam me Shabbethai seni ewe einangen Levi ra älisiiretä. 16Iei minne, iei ewe akkóót ekkewe chón ooló mi liwinsäfälito ra föri. Ezra ewe souasór a filätä ekkewe souemmwen pwe repwe tupwuni ew me ew kinikinin ar kewe famili o a föünawu iten emön me emön leiir. Iwe, lón äewin ränin ewe äengolun maram, ekkewe souemmwen ra móótiw o popuetä le etittina ewe mettóch.

17Iwe, lón ewe äewin ränin ewe äewin maram lón ewe ier mwirin, ra äwesaló ar angangen etittina ekkewe mwän meinisin mi pwüpwülü ngeni ekkewe fiin ekis.

Chókewe ra mwüüseni pwülüwer kewe fiin ekis

18Iwe, ikkeiir ekkewe mi pwüpwülü ngeni ekkewe fiin ekis me leiin ekkewe souasór:

Seni leiin ekkewe mwirimwirin Jeshua nöün Jozadak we mwän me pwiin kewe:Maaseiah, Eliezer, Jarib me Kedaliah

19(Iir meinisin ra pwon pwe repwe mwüüseni pwülüwer kewe. Iwe, emön me emön leiir a pwärätä en me an tipis o a ääni asór emön ätemwänin siip seni leiin nöün pwiin siip pwe ew asóren tipis.)

20Seni leiin ekkewe mwirimwirin Immer:

Hanani me Zebadiah.

21Seni leiin ekkewe mwirimwirin Harim:

Maaseiah, Elijah, Shemaiah, Jehiel me Uzziah.

22Seni leiin ekkewe mwirimwirin Pashhur:

Elioenai, Maaseiah, Ishmael, Nethanel, Jozabad me Elasah.

23Ekkewe mwän ra tipis seni leiin chón ewe einangen Levi:

Jozabad, Shimei, Kelaiah (iei i Kelita), Pethahiah, Judah me Eliezer.

24Ätewe a tipis me leiin ekkewe chón kööl: Eliashib.

Ekkewe ra tipis me leiin kewe chón tümwünü asamalapen ewe Imwenfel: Shallum, Telem me Uri.

25Ekkewe ra tipis me leiin ekkewe pwal ekkóch chón Israel:

Seni leiin ekkewe mwirimwirin Parosh:

Ramiah, Izziah, Malkijah, Mijamin, Eleazar, Hashabia me Benaiah.

26Seni leiin ekkewe mwirimwirin Elam: Mattaniah, Zekariah, Jehiel, Abdi, Jeremoth me Eliah.

27Seni leiin ekkewe mwirimwirin Zattu: Elioenai, Eliashib, Mattaniah, Jeremoth, Zabad me Aziza.

28Seni leiin ekkewe mwirimwirin Bebai:

Jehohanan, Hananiah, Zabbai me Athlai.

29Seni leiin ekkewe mwirimwirin Bani: Meshullam, Malluk, Adaiah, Jashub, Sheal me Jeremoth.

30Seni leiin ekkewe mwirimwirin Pahath-Moab:

Adna, Kelal, Benaiah, Maaseiah, Mattaniah, Bezalel, Binnui me Manassah.

31Seni leiin ekkewe mwirimwirin Harim: Eliezer, Ishijah, Malkijah, Shemaiah, Shimeon,

32Benjamin, Malluk me Shemariah.

33Seni leiin ekkewe mwirimwirin Hashum:

Mattenai, Mattattah, Zabad, Elifelet, Jeremai, Manassah me Shimei.

34Seni leiin ekkewe mwirimwirin Bani:Maadai, Amram, Uel,

35Benaiah, Bedeiah, Keluhi,

36Vaniah, Meremoth, Eliashib,

37Mattaniah, Mattenai me Jaasu.

38Seni leiin ekkewe mwirimwirin Binnui:

Shimei,

39Shelemiah, Nathan, Adaiah,

40Maknadebai, Shashai, Sharai,

41Azarel, Shelemia, Shemariah,

42Shallum, Amariah me Josef.

43Seni leiin ekkewe mwirimwirin Nebo:

Jeiel, Mattithiah, Zabad, Zebina, Jaddai, Joel me Benaiah.

44Meinisin ekkeei mwän ra pwüpwülü ngeni ekkewe fiin ekis, nge ekkóch me leiir a wor nöüür me wón pwülüwer kewe.