Ezekiel

Poputän künäen Ezekiel

1 Iwe, lón ewe elimuwen ränin ewe örüwänüen maram lón ewe iliiken ierin manawei, lupwen ngang üwa nóm leiin ekkewe chón Judah mi ooló órun ewe chaanpwuupwu Kebar lón Babylon, läng a suukuló ngeniei. Iwe, ngang üwa küna ekkóch künäei seni Kot.

2Lón ewe elimuwen ränin ewe örüwänüen maram, iei ewe elimuwen ierin än King Jehoiachin ooló, 3ew poraus seni ewe SAMOL a toriei, ngang ewe souasór Ezekiel nöün Buzi we mwän me órun ewe chaanpwuupwu Kebar lón fönüen ekkewe chón Kaldea. Me ikenan ngang üwa mengii pöün ewe SAMOL a feiettiw wóói.

4Iwe, üwa attololó nge üwa mäirü pwe üwa küna ew mölümöl a feitto seni efeng. Ei mölümöl iei ew kuchu mi fókkun wätte o pöchökkül äsäpwäälin fiti inefi mi chök fiififóchófóch, nge ew saram mi molupolup a pwellieló ünükkün. Iwe, lukalapen ewe kuchu a wor ew ekkei mi saraara usun chök mächä mi saraara. 5Iwe, a wor fömön mönümanaw ra nóm lukalapen ewe ekkei, ra lapalapeni lapalapen aramas, 6nge iteiten emön me emön leiir a wor rüwänü wón mesan, pwal fófóch pöükässiin. 7Pecheer ra chök wenechcharetiw, nge pachapacheer ra usun chök pachapachen liälifföön kowu o ra molupolup usun chök piraas mi misimis. 8Fän pöükässiir wón lepekiir me rüwänü a wor pöüür mi wewe ngeni pöün aramas. Iir me fömön a wor wón meser me pöükässiir. 9Pöükässin emön me emön kewe mönümanaw ra ökküfengen me pöükässin chiener kewe. Emön me emön a fätäl wenewen, nge resap kul lupwen ra mwöküt.

10Iwe, iei usun lapalapen wón meseer: Wón mesen emön me emön kewe fömön mönümanaw me fän meseer a usun chök wón mesen aramas, nge peliifichin wón meseer a usun chök wón mesen emön laion. Iwe, peliimönün wón meser a usun chök wón mesen emön ätemwänin kowu, nge wón epiniküün emön me emön leiir a usun chök wón mesen emön ikel. 11Iei usun lapalapen wón meseer. Iwe, rüwofóch pöükässiir kewe ra ititä. Efóch a ökküüw pöükässin ewe pwal emön mönümanaw me eppek nge ewe efóch a ökküw pöükässin ewe pwal emön me epeek. Nge ra pwölüweló inisiir ren rüwofóch pöükässiir. 12Emön me emön leiir a chök fätäl weneweneló. Ekis meinisin ia ewe ngüün a feilló ie, iir ra pwal feilló ie, nge resap kul lupwen ra fätäl. 13Iwe, lapalapen ekkewe mönümanaw a usun chök mwolien ekkei mi saraara ika usun chök tööl. Ekkei a mwökütükütfeil leiin ekkewe mönümanaw. Ewe ekkei a saramaram, nge inefi a fiifiwu seni lón. 14Ekkewe mönümanaw ra säfeil usun chök mwittirin fiifin inefi.

15Iwe, lupwen ngang üwa nennengeni ekkewe mönümanaw, üwa küna pwe a wor rüwänü wiil ra nóm faar wón pwül. Ew wiil nge emön mönümanaw. 16Iei usun lapalapen me förün ekkewe wiil: Ra meriweriw, usun chök nge ra för seni ewe faaw öüchchea itan krisolait. Ekkewe rüwänü wiil meinisin ra chök wewe fengen lapalaper. Ew wiil a usun chök nge a nóm lón ew wiil. 17Lupwen ekkewe wiil ra mwöküt, ra tongeni fätäl ngeni ew me leiin ekkewe rüwänü kinikin ia ekkewe mönümanaw ra säpe ngeni, nge ekkewe wiil resap rik lupwen ekkewe mönümanaw ra fätäl. 18A wor fäliel mi tekia o amwaraar ünükkün ekkewe wiil. Iir me rüwänü ekkewe wiil ra kuuló ren föün maas wón ewe fälielin ünükküür.

19Lupwen ekkewe mönümanaw ra mwöküt, ekkewe wiil mi nóm lepekiir ra pwal mwöküt. Pwal lupwen ekkewe mönümanaw ra ässitä seni wón pwül, ekkewe wiil ra pwal fitiir le ässitä. 20Ekis meinisin ia ewe ngüün a feilló ie, ekkewe mönümanaw ra pwal feilló, nge ekkewe wiil ra pwal fitiir le feilló, pwokiten ngünün ekkewe mönümanaw ra nóm lón ekkewe wiil. 21Lupwen ekkewe mönümanaw ra mwöküt, ekkewe wiil ra pwal mwöküt. Lupwen ekkewe mönümanaw ra köüüló, ekkewe wiil ra pwal köüüló. Iwe, lupwen ekkewe mönümanaw ra ässitä seni wón pwül, ekkewe wiil ra pwal fitiir le ässitä, pwokiten ngünün ekkewe mönümanaw ra nóm lón ekkewe wiil.

22Iwe, asen möküren ekkewe mönümanaw a meresiló och mettóch mi wewe ngeni ew läng, a molupolup usun ais o amwaraar. 23Nge fän ewe läng, ekkewe mönümanaw ra emeresawu pöükässiir kewe. Iwe, emön a ökküüw pöükässin ngeni pöükässin pwal emön. Nge emön me emön a wor pwal rüwofóch pöükässin pwe a äeä le pwölüw ngeni inisin. 24Lupwen ekkewe mönümanaw ra mwöküt, ngang üwa rongorong üngüüngün pöükässiir kewe mi wewe ngeni ngüüngün nóó wätte, a pwal wewe ngeni mwelien ewe mi Unusen Manaman, pwal usun ökürangen ew mwiichen sounfiu mi chómmóng. Iwe, lupwen ra köüüló, ra eitietiw pöükässiir kewe.

25Mwirin, ew möngüüngü a feitto seni asen ewe läng mi nóm asen möküreer lupwen ra üütä nge eitietiw pöükässiir. 26Iwe, asen ewe läng mi nóm asen möküreer, a wor och meet mi wewe ngeni ew leenien móótun king mi för seni ewe faaw öüchchea itan sapfaer. Nge a wor emön mi lapalapeni lapalapen emön aramas a móót wón ewe leenien móótun king mi nóm tekiatä asan. 27Iwe, üwa küna pwe feittä seni meet mi usun chök wón wiilan, a wewe ngeni mächä mi saraara mi nóm lón ew ekkei. Nge feittiw seni meet mi usun chök wiilan, a usun chök ekkei, nge ew saram mi saramaram a pwellieló ünükkün. 28Iwe, saramaramen pwellin ünükkün ätewe mi móót wón ewe leenien móótun king a usun lapalapen ew resiim a pwä lón kuchu lupwen a püng üüt.

Iei usun sókkun lapalapen lingen ewe SAMOL. Lupwen üwa küna ei, üwa chappetiw lepwül o üwa rongorong möngüüngün emön mi kapas.

Än Ezekiel kö pwe epwe emön soufós

2 Iwe, ewe möngüüngü a apasa ngeniei, “Nöün aramas, kopwe üütä pün ngang üpwe kapas ngenuk.” 2Iwe, lupwen a kapas ngeniei, ewe Ngüün a tolong lóói o öüütäei. Iwe, üwa rongorong an kapas ngeniei.

3I a apasa: “Nöün aramas, ngang üpwe tiinukoló ren ekkewe chón Israel, ngeni chón ewe mwüü mi üleförea o üüngeniei. Iir me ar kewe leewo ra üüngeniei seni chök lóóm tori ikenäi. 4Ekkewe aramas ngang üpwe tiinukoló reer ra lamalamtekia o tipepöchökkül. Iwe, kopwe apasa ngeniir: ‘Iei meet ewe SAMOL KOT a apasa.’ 5Iwe ese lifilifil ika repwe öüseling ika resap öüseling - pün kopwe chemeni pwe iir ew mwiichen aramas mi üleförea- nge repwe chök silei pwe a fen wor emön soufós mi nóm leiir. 6Nge en, nöün aramas, kosap nuokkusitiir, kosap pwal nuokkusiti ar kapas. Kosap nuokkus, inamwo ika irängaw me iräfölüföl repwe pwellieló ünükkum nge en kopwe nóm leiin inen mönnükam. Kosap nuokkus ren meet ra apasa, kosap pwal rüükö reer, inamwo ika iir ew mwiichen aramas mi üleförea. 7En kopwe fókkun apasa ngeniir äi kewe kapas, ese lifilifil ika repwe öüseling ika resap öüseling, pün iir ra fókkun ülefärea. 8Nge en, nöün aramas, kopwe öüseling ngeni meet ngang üpwe apasa ngenuk. Kosap üleförea usun ena mwiichen aramas mi üleförea. Kopwe suukaló awom o eni meet ngang üpwe ngenuk.”

9Mwirin, ngang üwa attololó o üwa küna efóch paaw a itito ngeniei, nge a wor echö taropwe lón ewe paaw. 10Iwe, ewe minne pöün ewe a äfächchaló ewe taropwe me fän mesei. Iwe, leepekin ewe taropwe me rüwepeek a makketiw wón kapasen kechiw me letipeta me feiengaw.

3 Iwe, i a apasa ngeniei, “Nöün aramas, kopwe mwöngö meet mi nóm mwom, kopwe eni ei taropwe. Mwirin, kopwe feilló o kapas ngeni ekkewe aramasen Israel.” 2Iei popun ngang üwa amasawaló awei, iwe, i a ngeniei ewe taropwe pwe üpwe eni.

3Mwirin, i a pwal apasa ngeniei, “Nöün aramas, kopwe eni ei taropwe ngang üwa ngenuk o amasowa lukom ren.” Iei popun ngang üwa eni ewe taropwe. Iwe, ewe taropwe a nearaar usun chönün chunen me lón awei.

4Mwirin, i a pwal apasa ngeniei, “Nöün aramas, kopwe feilló ren ekkewe chón Israel o apasa ngeniir äi keei kapas. 5Ngang üsap tiinukoló ren ew mwiichen aramas mi kapas lón kapasen ekis ika mi weires ar kapas, nge i ngang üwa tiinukoló ren ekkewe aramasen Israel. 6Ngang üsap tiinukoló ren ew mwiichen aramas mi chómmóng mi kapas lón kapasen ekis ika mi weires ar akapas, en kosap tongeni weweiti ar kapas. Pün enlet ika ngang üpwe tiinukoló reer, iir repwe fen öüseling ngenuk. 7Nge ekkewe aramasen Israel resap mochen öüseling ngenuk, pwokiten iir resap mochen öüseling ngeniei, pün unusen chón Israel meinisin ra tipepöchökkül o tipeweires. 8Nengeni, ngang üpwe föri pwe en kosap afangafang usun chök iir, kopwe pwal mesemaaw usun chök pwal iir. 9Ngang üpwe föri eten mesom pwe epwe pöchökkül usun faaw mi pöchökkül, epwe pöchökkül seni föüchól. Iwe, kosap nuokkusitiir, kosap pwal rüükö ren ar nennengenuk, inamwo ika iir ew mwiichen aramas mi üleförea.”

10Iwe, i a pwal apasa ngeniei, “Nöün aramas, en akkomw, kopwe fókkun öüselingöch o anómwu lón lelukom ekkewe kapas meinisin ngang üwa apasa ngenuk. 11Kopwe feilló iei ren aramasom kewe mi ooló o kapas ngeniir. Kopwe apasa ngeniir, ‘Iei meet ewe SAMOL KOT a apasa,’ ese lifilifil ika repwe öüseling ika resap öüseling.”

12Mwirin, ewe Ngüün a ekiieitä, lupwen lingen ewe SAMOL a feittä seni lón leenian. Iwe, ngang üwa rongorong och ökürang mi leüommóng me lükisöküri, 13iei ökürangen pöükässin ekkewe mönümanaw lupwen ra opowupowu fengeniir, pwal ökürangen ekkewe wiil mi nóm lepekiir, och ökürang mi fókkun wätte. 14Mwirin, ewe Ngüün a ekiieitä o uweeiló, iwe, üwa feilló fän äi weires me soongen lón letipei, nge pöün ewe SAMOL a pöchökkül wóói. 15Iwe, üwa tori ekkewe chón ooló mi nónnóm lón Tel Abib arap ngeni ewe chaanpwuupwu Kebar. Iwe, üwa móót ia ra móót ie o nónnóm leiir ikenan lón üküükün fisu rän fän äi mäirü.

Än Ezekiel angang pwe epwe Chón mas

16Iwe, lesópwólón ekkewe fisu rän, än ewe SAMOL kapas a toriei o apasa ngeniei: 17“Nöün aramas, ngang üwa fen föri pwe en kopwe emön chón mas fäniten ekkewe aramasen Israel. Iei popun, iteiten fansoun kopwe rongorong ew kapas seniei, kopwe mwittir esile ngeni ekkewe aramas o fönöör ren. 18Lupwen ngang üpwe apasa ngeni emön chón föfföringaw, ‘En kopwe fókkun mäló,’ nge en kosap fönöw, kosap pwal kapas ngeni óm kopwe peseei pwe epwe kul seni an kewe föfför mi ngaw pwe epwe küna manaw, ewe chón föfföringaw epwe mäló lón an tipis; nge ngang üpwe ukuni ngenuk chappen chaan. 19Nge are kopwe fönöw ewe aramas mi föfföringaw, nge esap kul seni an kewe föfför mi ngaw ika seni an kewe lapalap mi ngaw, i epwe mäló fäniten an tipis, nge en ka pwisin amanawók.

20“Lupwen emön aramas mi pwüng a kul seni an föfförün pwüng o föri minne a ngaw, ngang üpwe anómwu mwan eföw föün chepetek, i epwe mäló. Pwokiten en kosap fönöw ätewe, i epwe mäló fäniten an tipis. Üsap pwal chüen chechchemeni an kewe föfför mi pwüng, nge ngang üpwe ukuni ngenuk chappen chaan. 21Nge are ka fönöw ewe aramas mi pwüng pwe esap tipis, iwe i esap föri tipis, i epwe fókkun manaw pwokiten i a öüselinga óm fönöw. Iwe, en ka pwisin amanawók.”

22Iwe, pöün ewe SAMOL a nóm wóói me ikenan o a apasa ngeniei, “Kopwe üütä o feilló lón ewe leemól. Iwe, ngang üpwe kapas ngenuk me ikenan.” 23Iei popun ngang üwa üütä o feiliwu ngeni ewe leemól. Iwe, üwa küna lingen ewe SAMOL a üütä ikenan, usun ewe ling üwa fen küna me órun ewe chaanpwuupwu Kebar. Iwe, üwa chappetiw lepwül.

24Mwirin, ewe Ngüün a tolong lóói o a öüütäei. I a kapas ngeniei o apasa, “Kopwe feilló o lókeekelong lón imwom we. 25En nöün aramas, nengeni iir repwe fööti ngenuk sääl pwe kosap tongeni feiliwu leiin ekkewe aramas. 26Iwe, ngang üpwe föri pwe chönnawom epwe pachatä fän fóngóchum pwe kopwe chök fanafanaló nge kosap tongeni öpwüngüür, inamwo ika ra ew mwiichen aramas mi üleförea. 27Nge lupwen ngang üpwe kapas ngenuk, ngang üpwe suuki awom; iwe, en kopwe apasa ngeniir, ‘Iei meet ewe SAMOL KOT a apasa.’ Iwe, iö a mochen epwe öüseling, likiti ngeni epwe öüseling, nge iö esap mochen öüseling, likiti ngeni esap öüseling, pün iir ew mwiichen aramas mi üleförea.

Ezekiel a liossuw me pwomweni än sounfiu repwe pwellieló Jerusalem fän pisekin maun

4 “Iwe, iei, nöün aramas, kopwe angei eföw pilak mi wätte mi för seni pwül. Iwe, kopwe anómwu mwom o kopwe liossuw ewe telinimw Jerusalem wón. 2Mwirin, kopwe pwomweni le pwellieló ewe liossun telinimw ren pisekin maun. Kopwe senätä ew orooren maun o öüüwetä pisekin eppet pwellin ünükkün tittin ewe telinimw. Kopwe anomwu mwiichen sounfiu o iseis pisekin ömökkün tiit pwellin ünükkün. 3Mwirin, kopwe angei och mächä mi chööpöp o anómwu mwom pwe epwe ew tiit mächä lefiilom me ewe telinimw. Iwe, kopwe säpe ngeni o pwomweni usun än ekkewe chón opwuten Jerusalem repwe maun ngeni. Iei epwe ew esissil ngeni ekkewe chón Israel.

4Mwirin, kopwe kóónóló wón pelimööngum o anómwu wóóm tipisin chón Israel. En kopwe mwärelong fän ar tipis lón üküükün ekkewe rän kopwe kóón wón pelimööngum. 5Pün ngang üpwe ewiisa ngenuk pwe en kopwe mwärei än chón Israel tipis lón üküükün 390 rän. Wewen, epwe ew rän fäniten ew me ew ierin ar tipis.

6Nge mwirin óm ka äwesi ekkeei rän, kopwe pwal kóónsäfäliló. Nge lón ei fansoun kopwe le kóón wón peliifichum o mwärei tipisin chón Judah. Pün ngang üpwe ewiisa ngenuk üküükün 40 rän, ew rän fäniten ew me ew ierin ar tipis. 7Mwirin, kopwe säp ngeni Jerusalem, ewe telinimw sounfiu mi pwellieló fän pisekin maun. Iwe, kopwe öüüw pöum ngeni o oosuni usun an feiengaw. 8Iwe, ngang üpwe fööti ngenuk sääl pwe kosap tongeni kul seni eppek ngeni epeek tori óm kopwe äwesi ekkewe ränin óm pwomwen maun ngeni Jerusalem.

9Iwe, kopwe angei föün wiit me parli, pwal föün mame me ekkewe sókkun föün irä iter milet me spelt. Iwe, kopwe iseniir lón ew ruume leenien iseis pwe kopwe föri pilawa seniir. Kopwe mwöngö ei pilawa lón ekkewe üküükün 390 rän ka kóón wón pelimööngum. 10Kopwe kiloni fänitom üküükün rüwe shekela pwe kopwe eni iteiten rän. Nge kopwe chök mwöngö lón ekkewe fansoun mi kefilitä. 11Kopwe pwal öükü üküükün ew na wonuen ew hinb kólik pwe ünümwom lón ew rän, nge kopwe chök wün lón ekkewe fansoun mi kefilitä. 12Iteiten rän, kopwe amollätä onom mwöngö nge epwe usun chök óm amollätä nokop seni parli. Kopwe amwoota ewe mwöngö nge ekkewe aramas meinisin repwe katol en. Kopwe aea kiten mwöngön aramas mi pwasapwas pwe mwüchün ón ekkei.” 13Iwe, ewe SAMOL a apasa, “Epwe iei usun än chón Israel repwe mwöngö sókkun mwöngö mi limengaw ngeniir me leiin chón ekkewe mwüü ia ngang üpwe ösüüreló ie.”

14Mwirin, ngang üwa apasa, “Apwi, esap iei usun, äi SAMOL KOT! Ngang üsap mwo elimengawaei fän ew. Seni äi kükkün tori ikenäi, ngang üsap fókkun ochooch maan mi pwisin mäló ika maanmwacho ra niireló. Esap wor och fituk mi limengaw epwe tolong lón awei.”

15Iwe, i a apasa, “A mwirinnö. Nengeni, ngang üpwe mwüüt ngenuk pwe kopwe aea kiten mwöngön kowu pwe ekkesiwilin kiten mwöngön aramas mi pwasapwas le amwoota onom mwöngö.”

16Mwirin i a pwal apasa ngeniei, “Nöün aramas, ngang üpwe öükätiw seni lón Jerusalem ewe mwöngö aramas ra manaw seni. Aramas repwe mwöngö eneer mwöngö mi köük fän ar öürek o wün ünümeer kólik mi köük fän ar lólilen. 17Ngang üpwe föri ei pwe repwe osupwangen mwöngö me kólik o repwe le chök nennefengen lón ar apilükülükingaw o kinniló pwokiten köpwüngün ar kana tipis.”

Nöün Kot räisön köpwüng

5 “Iwe iei, en nöün aramas, kopwe angei efóch ketilas mi kken o nöünöü le räisöw ngeni meeten mökürom me ölüsom. Mwirin, kopwe angei ew kilo o kiloni ewe öüchimw o inetietiw lón ülüngät kinikin. 2Lupwen ra wes ekkewe ränin óm pwomwen maun ngeni ewe telinimw, kopwe keni ew kinikinin ekkewe meeten mökür lukalapen ewe liossun telinimw. Kopwe angei ewe oruuen kinikin o pöküwetiw pwellin ünükkün ewe telinimw ren noum we ketilas. Mwirin, kopwe angei ewe öülüngätin kinikin o atoropassafeili pwe äsäpwääl epwe ässiireló. Pün ngang üpwe tapweri neii kewe aramas ren ketilas. 3Nge kopwe angei ekkóch ekkewe öüchimw o tukumalong lelumun üfom na. 4Iwe, kopwe angei ekkóch öüchimw seni ekkewe ka tükümi o otururolong lón ekkei pwe repwe karaló. Pün ew ekkei epwe ngetewu seni ikenan o ngeteri unusen chón leimwen Israel meinisin.”

5Iei meet ewe SAMOL KOT a apasa: “Iei liossun meet epwe fis ngeni Jerusalem ewe telinimw ngang üwa anómwu lukalapen ekkewe mwüü, nge ekkewe fönü meinisin ra nóm pwellin ünükkün. 6Nge i a üüngeni äi kewe öllük me pwüüng lap seni chón ekkewe mwüü me fönü mi nóm pwellin ünükkün. I a pöütaló äi kewe öllük o esap älleasochisi äi kewe pwüüng.

7Iei minne, iei meet ngang ewe SAMOL KOT üwa apasa: Ämi öüwa lükümach ngeniei lap seni chón ekkewe mwüü mi nóm ünükkümi. Öüsap älleasochisi äi kewe pwüüng, öüsap pwal öpwönüwetä äi kewe öllük. Nge öüwa fen appirüw öörünien chón ekkewe mwüü mi nóm ünükkümi.

8Iei minne, iei meet ngang ewe SAMOL KOT üwa apasa: Pwisin ngang wón inisi üwa üüngenuk en Jerusalem. Iwe, ngang üpwe awarato köpwüng wóóm me mwen chón ekkewe mwüü. 9Ngang üpwe föri ngenuk meet ngang üsap mwo föri usun fän ew me mwan, nge üsap pwal försäfäli, pwokiten óm kewe uluulun önümwäl mi enniopwut meinisin. 10Iei minne, iei meet epwe fis me lukalapom, pwe ekkewe saam me iin repwe ocheei nöüür, nge ekkewe naaw repwe ocheei semeer me ineer kana. Ngang üpwe awarato köpwüng wóóm o ngang üpwe atoropasafeili chókewe mi chüen manaw me lóóm ngeni ekkewe peekin äsäpwäälin fönüfan meinisin. 11Iei minne, mwo manawei ngang ewe SAMOL KOT üwa apasa: Pwisin ngang wón inisi üpwe angei senuk äi ümöümöch, pwokiten ka elimengawa imwei we mi pin ren óm kewe uluulun önümwäl mi lamwotongaw me óm kewe föfför mi enniopwut. Ngang üsap nennengenuk fän äi tong, usap pwal ächchikók. 12Ew naülüngät me leiin noum kewe aramas repwe mäló ren mätter ika mäfeiengaw ren lengita me lóóm. Ew naülüngät repwe mäló ren ketilas me lükün tittum kewe. Iwe, ngang üpwe atoropasafeili ew naülüngät ngeni ekkewe peekin äsäpwälin fönüfan o tapweriir fän ketilas.

13Mwirin, äi soong epwe ükütiw nge äi lingeringeritiir epwe ätittiniló. Iwe, ngang üpwe kinamweló pün üwa silei pwe iir ra küna köpwüng ren ekkewe föfför mi ngaw iir ra föri ngeniei. Iwe, lupwen üwa wes le ömwüchchü äi soong wóór, iir repwe silei pwe ngang ewe SAMOL üwa kapas ngeniir pwokiten äi luukommóng wóór.

14Iwe, ngang üpwe föri pwe en Jerusalem kopwe ew leeni mi taatakis me och minen turunufas me leiin chón ekkewe mwüü mi nóm ünükkum, pwal meren chókewe mi pwereló ünükkum. 15En kopwe wiliti ew leenien turunufas me och minen ämäängaw, och minen fön me enieniw ngeni chón ekkewe mwüü ünükkum lupwen repwe küna pwe ngang üwa awarato äi köpwüng wóóm lón äi soong me lón äi lingeringer fiti emiriit mi emmetek. Ngang ewe SAMOL üwa kapas. 16Lupwen ngang üpwe pekki ngenuk neii kewe föün esefichin lengita mi efisätä feiengaw me mäló, ngang üpwe pekkiik pwe üpwe efeiengawók. Ngang üpwe awarato chómmóng chómmóng fansoun lengita wóóm o öükätiw senuk ewe mwöngö ka manaw seni. 17Ngang üpwe tiinato lengita me maanmwacho pwe repwe efeiengawók o repwe niieló noum kewe semiriit. Mätter me ninni repwe meresfeil lóóm. Iwe, ngang üpwe awarato ketilasen maun pwe epwe efeiengawók. Ngang ewe SAMOL üwa kapas.”

Ew kapasen oosuni usun köpwüngün ekkewe chukun Israel

6 Iwe, ew poraus seni ewe SAMOL a toriei. A apasa: 2“Nöün aramas, kopwe säp ngeni ekkewe chukun Israel, pwe kopwe oosuni usun ar repwe feiengaw. 3Kopwe apasa: ‘Ämi chukun Israel, öüpwe rongorong ewe kapas än ewe SAMOL KOT. Iei meet ewe SAMOL KOT a apasa ngeni ekkewe chukutekia me chukutekisón, ngeni ekkewe pwokur me ekkewe leemól: Ngang üpwe fókkun awarato wóómi efóch ketilas. Iwe, ngang üpwe ataeló ämi kewe leeni mi tekia ia aramas ra fel ngeni ekkewe uluulun önümwäl ie. 4Ämi kewe róngen asór repwe taatakisitiw, pwal ämi kewe róngen asóren ötüöt repwe mökküló. Iwe, ngang üpwe niieló nöümi kewe aramas me fän mesen ämi kewe uluulun önümwäl. 5Ngang üpwe anómwu soomän ekkewe chón Israel fän mesen ar kewe uluulun önümwäl. Iwe, ngang üpwe atoropasafeili chüümi pwellin ünükkün ämi kewe róngen asór. 6Ekis meinisin ia öüwa nóm ie, ämi kewe telinimw repwe pöönüló, pwal ekkewe leeni mi tekia ia aramas ra fel ngeni ekkewe uluulun önümwäl ie repwe taaló, pwe ämi kewe róngen asór repwe taaló o wiliti ioien faaw, ämi kewe uluulun önümwäl repwe mökküló o taatakisitiw, ämi kewe róngen asóren ötüöt repwe taatiw, nge meet ämi öüwa föri repwe móróló. 7Nöümi kewe aramas repwe ninniiló me leiimi, pwe ämi öüpwe silei pwe ngang ewe SAMOL.

8“ ‘Nge ngang üpwe amanawa ekkóch leiimi, pün ekkóch me leiimi repwe süü seni ewe ketilas o repwe toropasfeil leiin chón ekkewe mwüün fönüfan. 9Mwirin, chókewe mi sü repwe chechchemeniei me lón ekkewe mwüü ia ra ooló ie. Repwe chechchemeni usun an chou letipei ren kirikiringawen letiper mi kul seniei, pwal ren nennen meser mi mocheniäiti ar kewe uluulun önümwäl. Mwirin, iir repwe pwisin opwutäsiniir fäniten ekkewe föfför mi ngaw iir ra föri, pwal fäniten ar kewe föfför mi enniopwut meinisin. 10Iwe, repwe silei pwe ngang ewe SAMOL; ngang üsap kapas pöön lupwen üwa apasa pwe üpwe awarato ei feiengaw wóór.”

11“ ‘Iei meet ewe SAMOL KOT a apasa ngeniei: Kopwe episipis o pwuupwures. Kopwe pwuchöör o apasa, ‘Feiengawen chón Israel pwokiten ar kewe föfför mi ingaw me enniopwut meinisin, pün iir repwe mäló ren ketilas, lengita me mätter. 12Emön mi nóm lón fönü mi toowaw epwe mäló ren mätter, nge emön mi nóm arapato epwe mäló ren ketilas, nge emön mi chüen manaw o nómwetiw epwe mäló ren lengita. Iei usun äi üpwe ömwüchchü äi soong wóór. 13Iwe, iir repwe silei pwe ngang ewe SAMOL, lupwen ar kewe soomä repwe chök itifengen leiin ar kewe uluulun önümwäl pwellin ünükkün ar kewe róngen asór wón iteiten ekkewe chukutekisón, wón ungen ekkewe chukutekia, pwal fän iteiten irä mi mwuresires me fän iteiten ewe irä ook mi palapal, ikkeei ekkewe leeni ia ra ääni asór mettóch mi pwokkus ngeni ar kewe uluulun önümwäl meinisin. 14Iwe, ngang üpwe eitiewu peii pwe üpwe efeiengawer o föri pwe ewe fönü epwe pöönüló, seni ewe fönüapö mi nóm öör tori Dibla - ekis meinisin ia ra nóm ie. Mwirin, repwe silei pwe ngang ewe SAMOL.’ ”

A war sópwólón ewe fönü Israel

7 Iwe, ew poraus seni ewe SAMOL a toriei. A apasa: 2“Nöün aramas, iei meet ngang ewe SAMOL KOT üwa apasa ngeni ewe fönü Israel:

“ ‘A tori sópwólón! Sópwólón ei fönü a wareiti lepwokuukun me rüwänü.

3Iei a tori sópwólóm. Iei üpwe fókkun ömwüchchü äi soong ngenuk. Ngang üpwe öpwünguk wón öüküükün óm kewe föfför; ngang üpwe ukun ngenuk liwinin óm kewe föfför mi enniopwut.

4Ngang üpwe äsepa mesei senuk, üsap pwääri ngenuk äi tong; üsap pwal ächchikók. Ngang üpwe fókkun ukun ngenuk liwinin óm kewe sókósók me ekkewe föfför mi enniopwut ka chök sópweló le föfföriir. “ ‘Mwirin, kopwe silei pwe ngang ewe SAMOL.’

5“Iei meet ewe SAMOL KOT a apasa:

“ ‘Feiengaw epwe war. Ew feiengaw epwe chök tapweto mwirin pwal ew feiengaw. Nengeni, a wareto!

6A tori sópwólón! A tori sópwólón! Nengeni epwe mwittir wareituk sópwólóm.

7Feiengaw epwe feittiw wóómi, ämi chókewe mi nóm lón ewe fönü. Ewe fansoun a war, ewe rän a arapoto. Epwe wor osukosuk nge sap pwapwa me wón ekkewe chuuk.

8Ngang üpwe le niinätiw äi lingeringer wóómw o ömwüchchü äi soong ngenuk. Ngang üpwe öpwünguk wón öüküükün óm föfför o ukun ngenuk liwinin óm kewe föfför mi enniopwut meinisin.

9Ngang üpwe äsepa mesei senuk o üsap tongek, üsap pwal ächchikók; ngang üpwe ukun ngenuk wón öüküükün óm föfför me ekkewe föfför mi enniopwut en ka chök sópweló le föfföriir.

“ ‘Mwirin, en kopwe silei pwe ngang ewe SAMOL, ewe mi efeiengawók.

10“ ‘Nengeni, ewe ränin köpwüng a nóm ikeei! Ewe ränin köpwüng a fen war. Feiengaw a feitto wóómw. Än ekkewe aramas föfföringaw a fasar usun efóch wóók, ar lamalamtekia a sóót.

11Ar föfförün mwänesol epwe pwisin säpeitiir pwe epwe iei köpwüngür fäniten ar kewe föfföringaw. Esap chüen wor emön leiin ekkeei aramas mi lamalamtekia me föfföringaw epwe manaw. Wöwüür mi somwoló meinisin me ar ling esap chüen wor.

12Ewer, a war ewe fansoun, ewe rän a war. Esap wor popun än ekkewe chón kamö repwe pwapwa ren minne ra mööni ika än ekkewe chón amöömö repwe lólilen ren ar luus, pün iir meinisin repwe turulong fän än Kot soong.

13Ewe chón amöömö fönü esap liwinsäfäl ngeni ewe fönü i a amöömöló, inamwo are ewe chón amöömö me chón kamö ra chüen manaw, pün ewe künäen soufós epwe weneiti unusen ewe mwiichen aramas, nge esap siiwil. Pwokiten ar kewe tipis, esap wor emön leiir epwe tongeni kütta minne repwe manaw ren.

14“ ‘Inamwo ika ra ettiki rappwa o amollätä mettóch meinisin, nge esap wor emön epwe feilló maun, pün äi soong a nóm wón unusen ewe mwiichen aramas.

15Ketilas a nóm lükün ewe telinimw, nge mätter me lengita ra nóm lón. Chókana mi nóm lemal repwe mäló ren ketilas, nge chókana mi nóm lón ewe telinimw repwe mäló ren lengita me mätter.

16Nge are mi wor chókana mi chüen manaw ra süüló, repwe nóm wón ekkewe chuuk. Iir meinisin repwe ngüüngü usun ekkewe mwuröön lón ekkewe leemól, emön me emön pwokiten en me an tipis.

17Pöüür meinisin repwe chök ititiw, pwäsukuur meinisin repwe apwangapwang usun chök kólik.

18Repwe üföüf üüf mi för seni tuuk, nge nuokkus wätte epwe pwölüreló. Wón meseer epwe pwölüló ren ar sääw, nge möküreer epwe reipööpöló.

19Repwe móneelong ar kewe silifer lón ekkewe aal, nge ar kewe kolt repwe wiliti och mettóch mi limengaw. Pün ar kewe silifer me kolt resap tongeni amanaweer lón ränin än ewe SAMOL soong. Resap pwal tongeni äwesi ar echik reer ika oura ngeni luukeer. Pün ar echeni silifer me kolt a föri pwe repwe turulong lón tipis.

20Ekkewe aramas ra sikäsini fouteer kewe mi ling mi för seni kolt. Ra pwal äeä ewe kolt le föri ar kewe uluulun önümwäl mi enniopwut; iei minne, ngang üpwe föri pwe wöwüür epwe wiliti och mettóch mi enniopwut fäniter.

21Iwe, ngang üpwe atolonga ekkewe mettóch lepöün chón ekis pwe liäpeer pwal choon wókun ekkewe chón föfföringaw wón fönüfan. Iwe, repwe angei wöwüür meinisin o elimengawa.

22Ngang üpwe äsepa wón mesei seniir lupwen ekkewe chón ekis repwe atai pinin leeniei we mi pin o öüchchea. Chón soolä repwe tolong lón o elimengawa.

23“ ‘Kopwe amollätä kana selimächä fäniten neii kewe aramas! Pün ewe fönü a uren össükü chcha, nge ewe telinimw Jerusalem a uren föfförün mwänesol.

24Ngang üpwe awarato chón ekkewe mwüü mi föfföringaw seni meinisin pwe repwe imweni mweer kana. Ngang üpwe öükätiw än ekkewe chón pwora lamalamtekia o elimengawa ar kewe leeni mi pin.

25Lupwen nuokkus wätte epwe war, repwe kütta kinamwe, nge resap fókkun küna.

26Feiengaw epwe chök sópwósópwóló le war, pwal porausen feiengaw epwe chök sópwósópwóló le wor. Mwirin, repwe kütta och künäen ewe soufós, resap angei och käit usun kewe öllük seni ekkewe souasór, resap pwal angei och kapasen öüröür seni ekkewe souakkomw.

27Ewe king epwe letipeta, ewe samol epwe pwölüló ren an lólilen, nge pöün aramasen ewe fönü repwe chechcheech ren ar nuokkus. Ngang üpwe liwini ngeniir üküükün liwinin ar kewe föfför. Ngang üpwe pwal öpwüngüür wón ewe öüküük iir ra föri ngeni ekkóch.

“ ‘Mwirin, repwe silei pwe ngang ewe SAMOL.’ ”

Fel ngeni önümwäl lón ewe Imwenfel

8 Iwe, lón ewe awonuen ierin äm ooló, lón ewe awonuen maram, lón ewe elimuwen rän, lupwen ngang üwa mómmóót lón imwei we nge ekkewe souakkomwen Judah mi ooló ra móót fän mesei, ngang üwa mengii pöün ewe SAMOL KOT a feittiw wóói me ikenan. 2Iwe, üwa netä o üwa küna emön mi lapalapeni lapalapen emön aramas. Kinikin seni meet mi usun lapalapen wón wiilan feittiw, a usun chök ekkei, nge kinikin seni ikenan feittä, a meriweriw usun chök mächä mi saraara. 3Mwirin, üwa küna och mettóch usun chök lapalapen efóch paaw. Ewe paaw a angowu o turufi meeten mökürei. Iwe, ewe Ngüün a ekiieitä lefiilen fönüfan me läng o a uweeiló Jerusalem lón künäei meren Kot. A uweeiló ngeni ewe asamalap mi nóm efengin ewe leeni mi kinelong ngeni mwen ewe imwenfel. Iwe, a wor ew uluulun önümwäl mi föri pwe Kot a fókkun soong ren, a üütä ren ewe asamalap. 4Nge nengeni, lingen ewe Koten Israel a nóm mwei ikenan, usun ewe üwa küna lón künäei we me lón ewe leemól.

5Mwirin, Kot a apasa ngeniei, “Nöün aramas, kopwe neló efeng.” Iei popun ngang üwa neló efeng, nge nengeni, üwa küna ew uluulun önümwäl mi wätte, Kot a fókkun soong ren, a üütä lón ewe leenien tolong efengin ewe asamalapen tolong ngeni ewe róngen asór.

6Iwe, Kot a pwal apasa ngeniei, “Nöün aramas, ifa usun, ka küna meet ra föri? Ka küna ekkewe föfför mi enniopwut, ekkewe chón Israel ra föri ikeei, ikkeei ekkewe föfför repwe ösüüweiló toowaw seni leeniei mi pin? Nge en kopwe pwal küna ekkóch sókkun föfför mi fókkun enniopwut seni ekkeei.”

7Mwirin, i a uweeiló ngeni asamalapen ewe leeni mi kinewu seni lükün ewe imwenfel. Iwe, lupwen üwa nennefeil, üwa küna ew pwaang lón ewe tiit. 8Iwe, Kot a apasa ngeniei, “Nöün aramas, iei kopwe tuuwolong ew pwaang lón ewe tiit.” Iei popun ngang üwa tuuwolong ew pwaang lón ewe tiit, nge üwa küna pwe a wor ew asamalap a nóm ikenan.

9Iwe, a pwal apasa ngeniei, “Kopwe tolong o nennengeni ekkewe föfför mi ngaw me enniopwut iir ra föri ikeei.” 10Iei popun ngang üwa tolong o nennefeil. Iwe, ngang üwa küna me wón ekkewe etiip meinisin liossun sakkopaaten maantöötö me maan mi enniopwut. Ngang üwa pwal küna ekkewe saakopaaten uluulun önümwäl ekkewe chón Israel ra fel ngeniir. 11Iwe, üwa küna fiik mwän seni ekkewe souakkomwen chón Israel ra üütä fän mesen ekkewe lioos, nge Jaazaniah nöün Shafan we mwän a üütä leiir. A wor lón pöün emön me emön leiir ew sepien asóren ötüöt, nge ötüötüür mi pwokkus a ötütä.

12Mwirin, a apasa ngeniei, “Nöün aramas, ifa usun, ka fen piin küna meet ekkewe souakkomwen chón Israel ra föri lón rochopwaak, pün emön me emön a fel lón leenien en me nöün uluulun önümwäl? Nge iir ra apasa, ‘Ewe SAMOL esap küna kich; ewe SAMOL a likitaló ewe fönü.’ ” 13Iwe, a pwal apasa ngeniei, “Kopwe küneer pwe ra föri ekkewe föfför mi fókkun enniopwut seni ekkeei.”

14Mwirin, Kot a uweeiló ren ewe leenien tolong ngeni imwen ewe SAMOL we. Ei asamalap a nóm peliefeng. Iwe, üwa küna ekkewe fefin ra móót ikenan o kechiweiti ewe kot Tammuz. 15Iwe, a apasa ngeniei, “Nöün aramas, ifa usun, ka küna ei föfför mi enniopwut? Iwe, kopwe küna ekkóch sókkun föfför mi fókkun enniopwut seni ekkeei.”

16Mwirin, Kot a uweeiló lón ewe leeni mwen imwen ewe SAMOL we. Iwe, üwa küna ina epwe rüwe me limmön mwän ra nóm ikenan lükün asamalapen ewe imwenfel lefiilen kengkangan we me ewe róngen asór. Iir ra äsepa sökürüür ngeni än ewe SAMOL we imwenfel, nge meseer a säpe ngeni öötiw. Ra chappetiw o fel ngeni ewe akkar mi töötä me öötiw.

17Iwe, i a apasa ngeniei, “Nöün aramas, ifa usun, ka fen piin küna ei sókkun föfför mi enniopwut? Ifa usun, ekkewe aramasen Judah ra ekieki pwe esap wor öüchchean äi we imwenfel iei popun ra föri ekkewe föfför mi enniopwut ikenan? Ifa usun, repwe pwal ouraló ewe fönü ren föfförün mwänesol o sópweló le asoongaei? Kopwe nengeni pwe iir ra pwal mina ngeni pwötüür palen irä. 18Iei minne, ngang üpwe öpwüngüür lón äi soong; mesei esap nengenir äi üpwe tongeer, üsap pwal ächchikeer. Inamwo ika repwe pwuchöörulong lón selingei, ngang üsap öüseling ngeniir.”

Köpwüngün ekkewe chón fel ngeni önümwäl

9 Mwirin, ngang üwa rongorong än Kot a kökkö fän mwelian mi leüommóng o apasa, “Öüpwe emmwenato ikeei ekkewe chón masa ewe telinimw, emön me emön fän an pisekin maun lepöün.” 2Iwe, üwa küna wonomön mwän ra feitto seni äwenewenen ewe asamalap asan mi säpe ngeni efeng. Emön me emön ekkewe mwän a kömwöch lón pöün pisekin maun mi efeiengaw. Nge mi wor emön mwän a fitiir, a üföüf echö üüf mi pwechepwech o uweei och pisekin mak leepekin. Ra tolong o üütä lükün ewe róngen asór mi för seni piraas.

3Iwe, lingen ewe Koten Israel a feittä seni asen ekkewe kerop, ia a piin nóm ie me mwan. Iwe, a mwökütüló ngeni asamalapen ewe imwenfel. Mwirin, ewe SAMOL a kökkö ngeni ewe mwän mi üföüf ewe üüf mi pwechepwech o uweei och pisekin mak leepekin, 4o apasa ngeni, “Kopwe feilló leemelen ewe telinimw Jerusalem o esissila wón chamwen chókana mi letipeta me kechiw ren ekkewe föfför mi enniopwut meinisin ra fis lón.”

5Iwe, lupwen üwa öüseling, üwa rongorong pwe ewe SAMOL a apasa ngeni ekkewe pwal ekkóch mwän, “Öüpwe tapweló mwirin ätenan leemelen ewe telinimw o niieló ekkewe aramas, nge öüsap ächchikeer ika tongeer. 6Öüpwe fókkun niieló chinlap mwän, ölüwöl me föpwül, fefin me semiriit, nge öüsap attapa emön mi wor reer ewe esissil. Öüpwe poputä me lón leeniei we mi pin.” Iei popun ra poputä me wón ekkewe souakkomw mi nóm mwen ewe imwenfel.

7Mwirin, i a pwal apasa ngeni ekkewe mwän, “Öüpwe elimengawa ewe imwenfel o oura ekkewe leeni lükün ewe imwenfel ren soomän ekkewe aramas mi ninniiló. Öüpwe feilló!” Iei popun ra feilló o poputä le niieló ekkewe aramas leemelen ewe telinimw. 8Iwe, lupwen ra niieló ekkewe aramas, nge ngang üwa chök älämönüló, üwa chappetiw lepwül o kökkö, “Äi SAMOL KOT! Ifa usun, kopwe le arosaló meinisin ekkewe lussun mi chüen manaw lón Israel ren óm niinätiw óm soong wón Jerusalem?”

9Iwe, Kot a pölüweniei o apasa, “Ewe tipis än chón Israel me chón Judah a koon selüküló wätten. Ewe fönü a ur ren össükü chcha, nge ewe telinimw a ur ren pwüngingaw. Ekkewe aramas ra apasa, ‘Ewe SAMOL a likitaló ei fönü; ewe SAMOL esap küna minne sia föri.’ 10Iei popun ngang üsap tongeer, üsap pwal ächchikeer. Nge ngang üpwe awarato wón pwisin möküreer liwinin meet ra föri.”

11Mwirin, ewe mwän mi üföüf üüf mi pwechepwech o uweei och pisekin mak leepekin a liwinsäfälito fän poraus o apasa, “Ngang üwa föri usun minne en ka öllük ngeniei.”

Ewe Lingen Kot a toowu seni lón ewe Imwenfel

10 Mwirin, ngang üwa nennetä o üwa küna och mettóch mi wewe ngeni ew leenien móótun king mi för seni ewe faaw öüchchea itan sapfaer, mi nóm asen fälielin fän läng mi nóm asen möküren ekkewe kerop. 2Iwe, ewe SAMOL a apasa ngeni ewe mwän mi üföüf üüf mi pwechepwech, “Kopwe tolong leiin ekkewe wiil mi kul fän ekkewe kerop. Kopwe tukeei lón pöum mwolien ekkei mi saraara seni leiin ekkewe kerop o atoropasafeiliir wón ewe telinimw.” Iwe, lupwen ngang üwa katol, üwa küna ewe mwän a tolong.

3Ekkewe kerop ra üütä leesópwun ewe imwenfel me peliöör lupwen ewe mwän a tolong, nge ew kuchu a ouraló ewe leeni mi kinelong ngeni mwen ewe imwenfel. 4Mwirin, lingen ewe SAMOL a feittä seni asen ekkewe kerop o mwöküt ngeni asamalapen ewe imwenfel. Iwe, ewe kuchu a ouraló ewe imwenfel, nge ewe leeni mi kinelong ngeni mwen ewe imwenfel a ur ren saramaramen lingen ewe SAMOL. 5Iwe, ngüüngün mwökütükütün pöükässin ekkewe kerop a tori ewe leeni mi kinewu seni lükün ewe imwenfel, nge a usun chök mwelien ewe Kot mi Unusen Manaman lupwen a kapas.

6Lupwen ewe SAMOL a öllük ngeni ewe mwän mi üföüf üüf mi pwechepwech o apasa, “Kopwe feilló o angei mwolien ekkei seni leiin ekkewe wiil seni leiin ekkewe kerop,” ewe mwän a tolong o üütäló leepekin ew kewe wiil. 7Mwirin, emön me leiin ekkewe kerop a eitiewu pöün ngeni ewe ekkei mi nóm leiir. Iwe, i a tukeei ekkóch mwolian o isenalong lón pöün ewe mwän mi üföüf üüf mi pwechepwech. Iwe, ewe mwän a angei ewe mwolien ekkei o toowu lükün. 8(A pwä och mettóch mi wewe ngeni efóch pöün aramas me fän pöükässin emön me emön kewe kerop.)

9Iwe, üwa attololó nge üwa küna rüwänü wiil ra nóm leepekin ekkewe kerop, emön me emön kewe kerop a wor ew wiil leepekin. Nge ekkewe wiil ra meriweriw usun chök meriweriwen ewe faaw öüchea itan krisolait. 10Nge ren lapalapen ekkewe rüwänü wiil, ra chök wewefengen. Usun chök nge ew wiil a nóm lón ew wiil. 11Lupwen iir ra mwöküt, ra tongeni mwöküt ngeni ew me leiin ekkewe rüwänü kinikin ia kewe kerop ra säpe ngeni. Ekkewe wiil resap rik lupwen ekkewe kerop ra fätäl. Ekkewe kerop ra fätäleppök ngeni menni kinikin ra säpe ngeni, nge resap rik lupwen ra fätäl. 12Unusen inisiir, pacholong sökürüür, pöüür me pöükässiir ra unusen kuuló ren föün maas, pwal ina chök usun ren willeer kewe rüwänü. 13Ngang üwa rongorong pwe ekkewe wiil ra iteni “ekkewe wiil mi morokukuul.” 14Emön me emön kewe kerop a wor rüwänü wón mesan. Ewe äewin wón maas a wewe ngeni wón mesen emön kerop, oruuwen wón maas a wewe ngeni wón mesen emön aramas, öülüngätin wón maas a wewe ngeni wón mesen emön laion, nge ewe örüwänüwen wón maas a wewe ngeni wón mesen emön ikel.

15Ikkeiir ekkewe mönümanaw ngang üwa piin küneer me órun ewe chaanpwuupwu Kebar. Mwirin, ekkewe kerop ra ässitä. 16Lupwen ekkewe kerop ra mwöküt, ekkewe wiil mi nóm leepekiir ra pwal mwöküt. Nge lupwen ekkewe kerop ra emeresaló pöükässiir kewe pwe repwe ässitä seni wón pwül, ekkewe wiil resap feil seni leepekiir. 17Lupwen ekkewe kerop ra köüüló, ekkewe wiil ra pwal köüüló. Nge lupwen ekkewe kerop ra ässitä, ekkewe wiil ra pwal fitiir le ässitä, pwokiten ngünün ekkewe mönümanaw ra nóm lón ekkewe wiil.

18Mwirin, lingen ewe SAMOL a feilló seni asen asamalapen ewe imwenfel o köüüló asen ekkewe kerop. 19Iwe, lupwen üwa kakkatol, ekkewe kerop ra emeresaló pöükässiir kewe o ässitä seni wón pwül. Iwe, lupwen ra feilló, ekkewe wiil ra pwal fitiir le feilló. Iwe, ra feilló o köülló ren asamalapen imwen ewe SAMOL we mi säpe ngeni öötiw, nge lingen ewe Koten Israel a nóm aseer.

20Ikkeiir ekkewe mönümanaw ngang üwa piin küneer pwe ra nóm fän ewe Koten Israel me órun ewe chaanpwuupwu Kebar. Iwe, üwa silleniir pwe iir ekkewe kerop. 21Emön me emön leiir a wor rüwänü wón mesan me fófóch pöükässin. Nge fän pökässiir kewe a wor och mettóch mi wewe ngeni pöün aramas. 22Iwe, lapalapen wón meseer kewe ra chök wewe fengen me wón mesen ekkewe mönümanaw ngang üwa fen küneer me órun ewe chaanpwuupwu Kebar. Emön me emön leiir a chök fätäl wenewen ngeni mwan.

Köpwüngün ekkewe samolun Israel mi ngaw

11Mwirin, ewe Ngüün a ekiieitä o uweeiló ngeni asamalapen imwen ewe SAMOL we mi säpe ngeni öötiw. A wor rüwe me limmön mwän ra nóm ikenan lükün ewe asamalap. Nge üwa küna Jaazaniah nöün Azzur we mwän me Pelatiah nöün Benaiah we mwän, iir ekkewe rüwömön samolun chón Israel ra nóm leiir. 2Iwe, ewe SAMOL a apasa ngeniei, “Nöün aramas, ikkeiir ekkewe mwän ra raweei minne a ngaw o ngeni chón ei telinimw öüröür mi ngaw. 3Pün ra apasa, ‘A arapoto ewe fansoun ach sipwe köüütä imwach. Ei telinimw a wewe ngeni ew kamaan kuk, nge kich sia wewe ngeni ewe fituk mi nóm lón.’ 4Iei minne, nöün aramas, kopwe oosuni ngeniir usun ar repwe feiengaw; kopwe fókkun oosuni!”

5Mwirin, Ngünün ewe SAMOL a feittiw wóói o a üreniei pwe üpwe apasa, “Iei meet ewe SAMOL a apasa: Ämi aramasen Israel, ngang üwa silei minne a nóm lón ämi ekiek. 6Ämi öüwa niieló chómmóng aramas lón ei telinimw o ouraló alan kewe ren soomä.

7Iei minne, iei meet ngang ewe SAMOL KOT üwa apasa: Ekkewe soomä ämi öüwa niireló lón ei telinimw iir ewe fituk, nge ei telinimw ina ewe kamaan kuk, nge ngang üpwe ösüükemiiló seni ei telinimw. 8Ämi öüwa nuokkusiti ewe ketilas, nge ewe ketilas ina meet ngang üpwe tiinato pwe epwe efeiengawa kemi. Aloi ngang ewe Samol KOT. 9Ngang üpwe ösüükemiwu seni lón ewe telinimw o atolonga kemi lepöün chón ekis. Iwe, üpwe awarato köpwüng wóómi. 10Ämi öüpwe mäló ren ketilas. Pün ngang üpwe öpwüngü kemi me lón kiänin ewe fönü Israel. Mwirin, öüpwe silei pwe ngang ewe SAMOL. 11Ei telinimw esap wewe ngeni ew kamaan kuk fänitemi, nge ämi öüsap pwal wewe ngeni ewe fituk mi nóm lón. Pün ngang üpwe öpwüngü kemi me lón kiänin ewe fönü Israel. 12Mwirin, ämi öüpwe silei pwe ngang ewe SAMOL, pün ämi öüsap öpwönüwetä äi kewe öllük, öüsap pwal älleasochisi äi kewe pwüüng, nge öüwa fen appirüw öörünien chón ekkewe mwüü mi nóm ünükkümi.”

13Iwe, lupwen ngang üwa oosuni, a fis pwe Pelatiah nöün Benaiah we mwän a mäló. Mwirin, ngang üwa chappetiw lepwül, üwa leüommóng le kökkö o apasa, “Äi SAMOL KOT! Ifa usun, kopwe unusen arosaló ekkewe lussun aramas mi chüen manaw lón Israel?”

Ew pwon fäniten ekkewe chón Israel mi ooló pwe repwe liwinsäfäl

14Iwe, ew poraus seni ewe SAMOL a pwal toriei. A apasa: 15“Nöün aramas, pwiimw kewe, ekkewe aramas mi chök nómwetiw lón Jerusalem ra kapas usun märääriir kewe mi ooló o apasa, ‘Ra toowaw seni ewe SAMOL, iei popun i a ngeni kich fönüwer pwe sipwe fönüweni!’

16Iei minne, kopwe apasa ngeniir: ‘Iei meet ewe SAMOL KOT a apasa: Inamwo are ngang üwa tiiniireló toowaw leiin chón ekkewe mwüü o atoropasafeiliir lón ekkewe fönü lón ew fansoun mi chök mwochomwooch, nge ngang üwa ew leeni mi pin fäniter me lón ekkewe fönü ia ra feilló ie.’

17Iei minne, kopwe apasa: ‘Iei meet ewe SAMOL KOT a apasa: Ngang üpwe ionikemiito seni ekkewe mwüü o emmwenisäfäli kemiito seni ekkewe fönü ia öüwa toropasfeil ie. Iwe, ngang üpwe ngeni säfäli kemi ewe fönü Israel.’

18Iwe, repwe liwinsäfäliti Israel o repwe ömwökütaló an kewe uluulun önümwäl mi ngaw me enniopwut meinisin. 19Ngang üpwe ngeniir ew chök leluuk o fangolong lóór emön ngüün mi fö. Ngang üpwe ömwökütü seni lelukeer ewe leluuk mi pöchökkül usun faaw o fang ngeniir ew leluuken fituk. 20Mwirin, repwe öpwönüwetä äi kewe pwüüng o tümwünüfichi le älleasochisi äi kewe öllük. Iir repwe neii aramas, nge ngang üpwe ar Kot. 21Nge ren chókana letipeer a tipeni pwe repwe angang ngeni ekkewe uluulun önümwäl mi ngaw me enniopwut, ngang üpwe awarato wón möküreer chappen meet iir ra föri. Ngang ewe SAMOL KOT üwa kapas.”

22Mwirin, ekkewe kerop ra emeresaló pöükässiir kewe o ässitä pwal ekkewe wiil mi nóm leepekiir ra fitiir, nge lingen ewe Koten Israel a nóm aseer. 23Iwe, lingen ewe SAMOL a feittä seni lón ewe telinimw o köüüló asen ewe chuuk mi nóm öötiwen ewe telinimw. 24Iwe, lón künäei we ewe Ngünün Kot a ngeniei, ewe Ngüün a ekiieitä o uweeiló ren ekkewe chón ooló lón Kaldea.

Mwirin, künäei we ngang üwa küna a feittä seniei. 25Iwe, üwa aporausa ngeni ekkewe chón ooló ekkewe mettóch meinisin ewe SAMOL a pwääri ngeniei.

Pwomwen än chón Israel ooló

12 Iwe, ew poraus seni ewe SAMOL a pwal toriei. A apasa: 2“Nöün aramas, en ka nónnóm leiin ew mwiichen aramas mi üleförea. A wor meseer pwe repwe küna meet ngang üwa föri fäniter, nge resap küna ekkana mettóch. A wor selinger pwe repwe rongorong meet ngang üwa üreniir pwe repwe föri, nge resap rongorong ngeni äi kewe öllük, pwokiten iir ew mwiichen aramas mi üleförea.

3Iei minne, nöün aramas, kopwe amasowalong pisekum lón óm potow. Kopwe pwomweni pwe itä lapalapan nge ka ooló. Kopwe föri ei lerän pwe ekkewe aramas repwe tongeni künók. Kopwe feilló seni ia ka nóm ie o feilló ngeni pwal ew leeni. Eli repwe künók o weweiti, inamwo ika iir ew mwiichen aramas mi üleförea. 4Lerän kopwe uweawu lükün óm potow ka amollätä pwe usun itä nge en emön chón ooló, pwe ekkewe aramas repwe tongeni künók. Mwirin, lekkuniól, lupwen ra nennengenuk, kopwe feilló seniir usun chókana mi ooló. 5Lupwen ekkewe aramas ra nennengenuk, kopwe pwangeni ew pwaang wón tittin imwom o toowu me lón fän óm pwotow. 6Kopwe mwärei óm pwotow wón afarom lupwen ra nennengenuk o mwäreeló lupwen a pwiniló. Kopwe pwal pwölüweló wón mesom pwe kosap tongeni küna mwom, pün ngang üpwe föri pwe en kopwe ew esissil fäniten ekkewe chón Israel.”

7Iei popun ngang üwa föri usun minne Kot a öllük ngeniei. Lerän, ngang üwa amollätä piseki kewe o atolonger lón äi pwotow, usun itä nge ngang emön chón ooló. Nge lekkuniól, ngang üwa pwangeni tittin imwei we ren pwisin peii. Iwe, lupwen a pwiniló, ngang üwa angei äi we pwotow, üwa mwärei wón afarei o feilló seniir, nge ekkewe aramas ra nennengeniei.

8Iwe, lesossorun ewe rän mwirin, än ewe SAMOL kapas a toriei. A apasa: 9“Nöün aramas, ifa usun, ekkewe aramasen Israel mi üleförea resap eisinuk, ‘Meet na ka föri?’

10Kopwe apasa ngeniir, ‘Iei meet ewe SAMOL KOT a apasa: Ei kapasen oosuni a fäniten ewe samolun Jerusalem me unusen ekkewe chón Israel meinisin mi nóm ikenan.’ 11Kopwe apasa ngeniir, ‘Ngang ew esissil fänitemi.’

Usun minne ngang üwa föri, iei usun meet epwe fis ngeniir. Repwe feilló toowaw pwe repwe chón ooló.

12Ewe samol mi nóm leiir epwe mwärei an pwotow wón afaran o ännifeló lupwen a pwiniló. Ekkewe aramas repwe pwangeni ew pwaang wón ewe tiit fänitan pwe i epwe toowu me lón. I epwe pwölüweló wón mesan pwe aramas resap tongeni silleni. 13Nge ngang üpwe lüwetaló neii toloia wón o liäpeni lón äi we likottup. Ngang üpwe uwealó i Babylon lón fönüen ekkewe chón Kaldea, nge i esap tongeni küna ia a feilló ie. Iwe, i epwe mäló me ikenan. 14Iwe, ngang üpwe atoropasafeili ekis meinisin chókewe meinisin mi nóm ünükkün, nöün kewe nöüwiis me nöün kewe sounfiu meinisin. Iwe, ngang üpwe tapweriir fän efóch ketilas.

15Iwe, repwe silei pwe ngang ewe SAMOL lupwen ngang üpwe atoropasereló leiin chón ekkewe mwüü o atoropasafeiliir leemelen ekkewe fönü. 16Nge ngang üpwe amanawa ekkóch chök me leiir seni ewe ketilas me lengita me mätter pwe repwe pwärätä me leiin chón ekkewe mwüü ia ra ooló ie ar kewe föfför mi enniopwut. Me ikenan, repwe silei pwe ngang ewe SAMOL.”

17Iwe, ew poraus seni ewe SAMOL a toriei. A apasa: 18“Nöün aramas, kopwe chechcheech lupwen kopwe mwöngö onom mwöngö, kopwe pwörükürük ren óm nuokkus lupwen kopwe wün ünümwom kólik. 19Kopwe apasa ngeni aramasen ei fönü: ‘Iei meet ewe SAMOL KOT a apasa fänäsengesin chókewe mi nónnóm lón Jerusalem me lón ewe fönü Israel: Repwe mwöngö eneer mwöngö fän ar öürek, repwe pwal wün ünümeer kólik fän ar apilükingaw, pün fönüer epwe unusen pöönüló, pwokiten ekkewe föfförün mwänesol än chókewe meinisin mi nónnóm ikenan. 20Ekkewe telinimw mi só repwe pöönüló, nge ewe fönü epwe taaló. Mwirin, repwe silei pwe ngang ewe SAMOL.’ ”

Esap chüen mang

21Iwe, ewe poraus seni ewe SAMOL a toriei. A apasa: 22“Nöün aramas, ifa ewe mwiitun öüwa ääni me lón ewe fönü Israel: ‘Ekkewe rän ra ló, nge künäen ekkewe soufós resap pwönüwetä’? 23Iei minne, kopwe apasa ngeniir, ‘Iei meet ewe SAMOL KOT a apasa: Ngang üpwe öükätiw ei mwiitun, pwe iir resap chüen apasasäfäli me lón Israel.’ Nge kopwe pwal apasa ngeniir, ‘Ekkewe rän ra arapoto lupwen iteiten künäen ekkewe soufós repwe pwönüetä. 24Pün esap chüen wor künäen soufós mi otupwutup ika kapasen oosuni mi apaatäi aramas me leiin ekkewe aramasen Israel. 25Nge ngang ewe SAMOL üpwe apasatä meet ngang üwa tipeni; iwe, epwe pwönüwetä, nge esap mang. Pün lón fansoun manawemi, ämi chón üleförea, ngang üpwe öpwönüwetä meet ngang üwa apasa, ngang ewe SAMOL KOT üwa kapas.’ ”

26Iwe, ew poraus a toriei seni ewe SAMOL. A apasa: 27“Nöün aramas, ekkewe chón Israel ra apasa, ‘Minne i a küna lón künäan epwe fis mwirin chómmóng ier seni iei, nge i a oosuni fäniten lón ekkaan fansoun mwach mi toowaw.’

28Iei minne, kopwe apasa ngeniir, ‘Iei meet ewe SAMOL KOT a apasa: Esap wor ew me leiin äi kewe kapas epwe mang le pwönüwetä, pün meet ngang üwa apasa epwe mwittir pwönüwetä, ngang ewe SAMOL üwa kapas.’ ”

Ekkewe soufós chofona repwe köpwüng

13 Iwe, ew poraus seni ewe SAMOL a toriei. A apasa: 2“Nöün aramas, kopwe oosuni feiengawen ekkewe soufósun Israel iir mi apasätä kapasen oosuni iei. Kopwe apasa ngeni chókana mi apasa kapasen oosuni seni minne iir ra pwisin ekiekietä: ‘Öüpwe rongorong än ewe SAMOL kapas! 3Iei meet ewe SAMOL KOT a apasa: Feiengawen ekkewe soufós mi umwes, ra tapweló mwirin minne a pop seni meet pwisin ngünüür a ekiekietä, nge esap wor och künäeer. 4Ämi chón Israel, nöümi kewe soufós ra wewe ngeni ekkewe fóks mi nóm leiin ekkewe imw mi taaló. 5Resap feittä ren ekkewe pwaang wón ewe tiit pün repwe försäfäli fäniten ekkewe aramasen Israel, pwe ewe tiit epwe nüküchchar le üütä lón maun lón ränin ewe SAMOL. 6Künäer kewe ra otupwutup, nge ar kewe pwee ra chofona. Iir ra apasa, “Iei alon ewe SAMOL,” nge i ngang ewe SAMOL üsap ökkünöör. Nge iir ra ekieki pwe i epwe öpwönüwetä kewe kapas. 7Ifa usun, esap otupwutup minne öüwa küna lón künäemi kewe o chofona lón ämi kewe pwee lupwen öüwa apasa, “Iei alon ewe SAMOL,” inamwo ika ngang üsap kapas?

8Iei minne, iei meet ewe SAMOL KOT a apasa: Pwokiten ämi kewe kapas mi otupwutup me künäemi kewe mi chofona, ngang üpwe üüngeni kemi. Ngang ewe SAMOL KOT üwa kapas. 9Peii epwe üüngeni ekkewe soufós mi küna künäer kewe mi otupwutup o apasa ar kewe pwee mi chofona. Iir resap nóm lón än neii kewe aramas mwiich lupwen ra pwüngüpwüng fengen, iteer esap makkolong lón pwuken tettelin chón Israel, resap pwal tolong lón ewe fönü Israel. Mwirin, öüpwe silei pwe ngang ewe SAMOL KOT.

10Ei epwe fis pwokiten ra atókkaló neii kewe aramas ren ar apasa, ‘Epwe wor kinamwe,’ nge i esap wor kinamwe. Iwe, ren ei, a usun chök nge neii kewe aramas ra senätä ew tiit mi apwangapwang fäniten maun, nge ekkeei soufós ra pwölüweló apwangapwangen ewe tiit ren pweech. 11Iei minne, kopwe üreni chókana mi pwölüweló ewe tiit ren pweech pwe ewe tiit epwe taaló. Epwe püngütiw ütommóng wón ewe tiit. Ngang üpwe pwal öpüngätiw üten faaw wón nge äsäpwääl mi pöchökkül epwe ngüsiiti. 12Nge lupwen ewe tiit epwe turuló, ekkewe aramas repwe eisini kemi, ‘Meet chök lamwoten ewe pweech ämi öüwa pwölüw ngeni ewe tiit?’

13Iei minne, iei meet ewe SAMOL KOT a apasa: Lón äi soong, ngang üpwe epichaló ew mölümöl, lón äi lingeringer, ngang üpwe öpüngätiw üten faaw me ütommóng pwe üpwe ataeló ämi we tiit. 14Ngang üpwe ataetiw ewe tiit ämi öüwa pwölüw ngeni pweech o üpwe ataeló tori wón pwül pwe lóngólóngun epwe pwä. Iwe, lupwen ewe tiit epwe turuló, ämi öüpwe mäló lón. Iwe, öüpwe silei pwe ngang ewe SAMOL. 15Iei popun ngang üpwe ömwüchchü äi soong ngeni ewe tiit pwal ngeni chókewe mi pwölüw ngeni pweech. Iwe, ngang üpwe apasa ngeni kemi, ‘Ewe tiit esap chüen wor. Iwe, pwal chókewe mi äpwecha ngeni pweech resap pwal chüen nóm, 16iir ekkewe soufósun Israel mi ääni kapasen oosuni ngeni Jerusalem o küna künäer kewe usun kinamwe fänitan nge i esap wor kinamwe. Ngang ewe SAMOL KOT üwa kapas.’ ”

17Iwe, Kot a apasa, “Nöün aramas, kopwe äsepa mesom ngeni ekkewe fefin leiin noum kewe aramas mi ääni kapasen oosuni seni minne ra pwisin ekiekietä. Kopwe oosuni usun ar repwe feiengaw, 18o apasa, ‘Iei meet ewe SAMOL KOT a apasa: Feiengawen ekkewe fefin mi teeii ekkewe pisekin roong o föötiretä wón kumwuchur, ra pwal föri ekkewe likotupwöl mi sakkopaat langattameer fäniten pwölüpwülün mökürer pwe repwe likottupuuw aramas. Ifa usun, öüwa ekieki pwe öüpwe likottupuw manawen neii kewe aramas nge öüpwe pwisin amanawa kemi? 19Ämi öüwa eitengawaei leiin neii kewe aramas fäniten fite kumwuch parli pwal fäniten ekkóch lussun mworomworen pilawa. Ren ämi chofona ngeni neii kewe aramas mi öüseling ngeni ämi kewe kapas chofona, öüwa niieló chókana ürüürün pwe resap mäló, nge öüwa amanawa chókana ürüürün pwe resap manaw.

20Iei minne, iei meet ngang ewe SAMOL KOT üwa apasa: Ngang üwa opwut ämi kewe pisekin roong öüwa likottupuw ngeni aramas usun nge iir machchang. Iwe, ngang üpwe ettiiretiw seni wón pöümi. Üpwe pwal angasa ekkewe aramas ämi öüwa likottupuur usun machchang. 21Ngang üpwe kamweetiw ämi kewe likotuupwöl o amanawa neii kewe aramas seni lepöümi. Iwe, iir resap chüen oolong fän ämi nemenem. Mwirin, öüpwe silei pwe ngang ewe SAMOL. 22Pwokiten ämi öüwa apwangapwangaló letipen ekkewe chón pwüng ren ämi kewe kapas chofona, nge ngang üsap mochen awarato rer och lólilen, pwal pwokiten ämi öüwa peseei ngeni ekkewe aramasingaw pwe resap kul seni ar kewe föfför mi ngaw pwe repwe amanwa manawer, 23iei minne, ämi öüsap chüen küna künäemi kewe mi otupwutupw, öüsap pwal chüen föri angangen pwee. Ngang üpwe amanawa neii kewe aramas seni lepöümi. Mwirin, öüpwe silei pwe ngang ewe SAMOL.’ ”

Kot a öpwüngü chón fel ngeni uluulun önümwäl

14 Iwe, ekkóch me leiin ekkewe souakkomwen chón Israel ra feitto reei o móttiw fän mesei. 2Mwirin, iei ewe poraus seni ewe SAMOL a toriei. A apasa: 3“Nöün aramas, ekkeei mwän ra asamolu ar kewe uluulun önümwäl lón letiper o anómwu leenien chepetek mi ngaw me mwen meser. Ifa usun, ngang üpwe mwüüt ngeniir pwe repwe angei öüröüreer seniei? 4Iei minne, kopwe kapas ngeniir o üreniir, ‘Iei meet ewe SAMOL KOT a apasa: Lupwen emön chón Israel a asamolu uluulun önümwäl lón letipan o awora och leenien chepetek mwen mesan, nge mwirin a feilló ren emön soufós, pwisin ngang ewe SAMOL üpwe pölüweni i wón üküükün an angangen fel ngeni uluulun önümwäl mi chómmóng. 5Ngang üpwe föri ei pwe üpwe liäpenisäfäli letipen ekkewe aramasen Israel meinisin mi likitieiló fäniten ar kewe uluulun önümwäl.’

6Iei minne, kopwe apasa ngeni ekkewe chón Israel , ‘Iei meet ewe SAMOL KOT a apasa: Öüpwe ekieksäfäl! Öüpwe kul seni ämi kewe uluulun önümwäl o emmwen seni ämi kewe föfför mi enniopwut meinisin.

7Lupwen emön chón Israel ika emön chón ekis mi nónnóm lón Israel a pöütieiló o asamolu uluulun önümwäl lón letipan, are a pwal anómwu ew leenien chepetek mi ngaw me mwen mesan, nge mwirin epwe feilló ren emön soufós pwe epwe angei öüröüran seniei, ngang ewe SAMOL üpwe pwisin pölüweni. 8Ngang üpwe kul o üüngeni ei sókkun aramas. Üpwe pwal föri pwe i epwe och leenien esissil o aramas repwe takiri. Ngang üpwe äärawu me leiin neii aramas. Mwirin, öüpwe silei pwe ngang ewe SAMOL.

9Nge are emön soufós epwe tupwuló ren ewe chón eiis öüröüran pwe a apasa och kapasen oosuni ngeni, ei epwe fis pwe pwisin ngang ewe SAMOL üpwe otupwu ewe soufós. Ngang üpwe eitiewu peii o üüngeni ewe soufós o niieló i me leiin neii kewe aramasen Israel. 10Ei sókkun soufós me ewe sókkun aramas mi otupwun kütta öüröüran seni, repwe angei chappen ar tipis me rüwömön. 11Mwirin, ekkewe aramasen Israel resap chüen tókkóló seniei, resap pwal chüen elimengawer ren ar kewe tipis meinisin. Iir repwe neii aramas, nge ngang üpwe ar Kot. Ngang ewe SAMOL KOT üwa kapas.’ ”

Chón Israel resap tongeni süseni än Kot öpwüngüür

12Iwe, ew poraus seni ewe SAMOL a toriei. A apasa: 13“Nöün aramas, are chón ew fönü repwe tipis ngeniei ren ar resap ölükülük, nge ngang üpwe eitiewu peii pwe üpwe üüngeni ewe fönü o angei seni ewe mwöngö aramas ra manaw seni o tiinato lengita wón ewe fönü o niieló aramasan me nöüür maan, 14ika mwo ekkeei ülümön mwän - Noah, Daniel me Job - repwe nóm lón ewe fönü, ar föfförün pwüng esap amanawa emön aramas nge i epwe chök pwisin amanawer. Iei aloi, ngang ewe SAMOL KOT.

15“Pwal are üpwe tiinato maanmwacho leemelen ena fönü pwe repwe niieló aramas meinisin, iwe, ewe fönü a wiliti ew fönü mi pöön, ina pwata esap wor emön aramas a tongeni pwereló lón pwokiten ekkewe maanmwacho, 16mwo manawei, aloi ngang ewe SAMOL KOT, ika mwo ekkeei ülümön mwän repwe nónnóm lón ewe fönü, resap tongeni amanawa pwisin nöüür mwän ika fefin. Iir chök repwe manaw, nge ewe fönü epwe wiliti ew fönü mi pöön.

17“Pwal are üpwe awarato efóch ketilas pwe epwe efeiengawa ewe fönü o üpwe apasa, ‘Ewe ketilas epwe feilló leemelen ewe fönü o arosaló aramas me maan, 18mwo manawei, aloi ngang ewe SAMOL KOT, ika mwo ekkeei ülümön mwän repwe nóm lón, resap tongeni amanawa nöüür kana mwän ika fefin, nge iir chök repwe manaw.

19“Pwal are üpwe tiinato ew mätter lón ena fönü o niinätiw wón äi soong fiti chcha, pwe üpwe asoraló aramas me maan seni wón, 20mwo manawei, aloi ngang ewe SAMOL KOT, ika mwo Noah, Daniel me Job repwe nóm lón ewe fönü, resap tongeni amanawa nöüür mwän ika fefin. Repwe chök pwisin amanawer ren ar föfförün pwüng.

21“Pün iei meet ewe SAMOL KOT a apasa: Epwe fen ifa me feiengawen Jerusalem lupwen ngang üpwe tiinaló ren äi kewe rüwänü köpwüng mi eniwokkus - ketilas me lengita, maanmwacho me mätter - pwe repwe niieló aramasan me nöüür kewe maan! 22Nge epwe chök wor ekkóch me leiir repwe chüen manaw - nöüür mwän me fefin repwe toowu seni ekkewe feiengaw. Repwe feitto reemi ikeei pwe repwe chuungeni kemi le ooló lón Babylon. Lupwen öüpwe küna ren pwisin mesemi usun manawer me ar föfföringaw, iwe, öüpwe chip fänäsengesin ewe feiengaw ngang üwa awarato wón Jerusalem - iteiten feiengaw ngang üwa awarato wón. 23Öüpwe chip lupwen öüpwe küna manawer me ar kewe föfföringaw, pün öüpwe silei pwe ngang üsap föri och nge esap wor popun. Iei aloi ngang ewe SAMOL KOT.”

Jerusalem a wewe ngeni efóch irän wain mi lamwotongaw

15Mwirin, ei poraus seni ewe SAMOL a toriei. A apasa: 2“Nöün aramas, meet sakkofesenin ewe mwüüch seni efóch irän wain me efóch palen ekkewe irä leiin ewe wöllap? 3Ifa usun, aramas ra angei mwüüchün ewe irän wain pwe repwe föri mettóch mi lamwot? Ifa usun, ra tongeni föri chüföl seni pwe repwe eitiwätä mettóch wón? 4Mwirin an a koturulong lón ewe ekkei, iwe, ewe ekkei a kenaló lesópwun me rüwósóp, nge lukalapan a wiliti mooch; ifa usun, a chüen lamwot fäniten och mettóch? 5Nengeni, lupwen ewe mwüüch a unus, esap wor och lamwotan fäniten och mettóch. Iwe, epwe ifa usun än emön epwe tongeni aea fäniten och mettóch mi lamwot lupwen ewe ekkei a kenaló nge a wiliti mooch?

6Iei minne, iei meet ngang ewe SAMOL KOT üwa apasa: Usun chök äi üwa oturalong mwüchün ewe irän wain leiin mwüchün ekkewe irän leiin wöllap lón ekkei pwe repwe karaló, iei usun meet ngang üpwe föri ngeni ekkewe aramas mi nóm lón Jerusalem. 7Ngang üpwe äsepa wón mesei pwe üpwe üüngeniir. Inamwo ika ra süwu seni lón ewe ekkei, nge ewe ekkei epwe chök keniireló. Iwe, ämi öüpwe silei pwe ngang ewe SAMOL lupwen ngang üwa äsepa wón mesei o üüngeniir. 8Iwe, ngang üpwe föri pwe ewe fönü epwe pöönüló, pwokiten ekkewe aramasen lón resap ölükülük. Iei aloi, ngang ewe SAMOL KOT.”

Jerusalem a wewe ngeni emön fefin mi pwüpwülü mi kirikiringaw

16 Mwirin, pwal ew poraus seni ewe SAMOL a toriei. A apasa: 2“Nöün aramas, kopwe tuwenewen le kapas ngeni Jerusalem ren an kewe föfför mi enniopwut, 3o apasa, ‘Iei meet ewe SAMOL KOT a apasa ngenuk en Jerusalem: Òm leewo a feitto seni fönüwen ekkewe chón Kanaan. En ka upwutiw me ikenan. Semom emön re Amor, nge inom emön fiin Hit. 4Lón ewe rän en ka upwutiw, esap wor emön a pöküüw pwuom, esap wor emön a atüütü ngenuk kólik pwe kopwe limöch, esap pwal wor emön a chenifi ngenuk salt ika filituk lón mangaku. 5Esap wor emön a nennengenuk pwe epwe tongeek ika mwaaren ääni kirekiröch ngenuk an epwe föri och leiin ekkeei föfför ngenuk. Nge i ra fen oturukowu lón ewe mälämäl mi amassawatä, pün ra fen opwut en lón ewe rän en ka upwutiw.

6“ ‘Mwirin, ngang üwa pwereto, nge üwa künók óm ka faresik lón chaóm. Nge lupwen óm ka kóón ikenan lón chaóm, ngang üwa apasa ngenuk, “Kopwe manaw!” 7Ngang üwa älisuk pwe kopwe mämmääritä usun efóch irän lón ewe mälämäl. Iwe, ka määritä o wätteló tori ka wiliti emön föpwül mi fókkun lieöch usun faaw öüchchea. Oupwum ra pwüküwu pwal meeten mökürom ra poputä le määr, nge ka chüen chök seleló o öchchökün.

8“ ‘Ekkóch fansoun me mwirin, üwa pwal pwereto, nge lupwen üwa nennengenuk, üwa küna pwe ka wätten óm kopwe pwüpwülü. Iwe, üwa emeresaló lepwülün üfei we wóóm o pwölüweló óm seleló. Iwe, üwa pwon fän ökköpöl ngenuk o föri ew pwon ngenuk, ngang ewe SAMOL KOT üwa kapas. Mwirin, en ka wiliti pwülüwei.

9“ ‘Mwirin, ngang üwa atüütuk o üwa limetaló senuk ewe chcha o chenifi ngenuk lömmis. 10Iwe, ngang üwa öüföüfa ngenuk üüf mi chchü o eipweipwa ngenuk sandal mi för seni silin maan mi öüchchea. Ngang üwa pwal filiti ngeni inisum mangaku mi pwechepwech o pwölüw ngenuk mangaku mi möömmóng. 11Ngang üwa foute ngenuk chómmóng sókkun fout mi ling: Ngang üwa uwäätä läälä wón pöum me mwärämwär fän üwom. 12Ngang üwa pacheetä efóch ring lón pwöötum, iering wón selingom me epa mwärämwär mi ling wón mökürom. 13Iei usun óm ka fout ren kolt me silifer; üfom kewe ra för seni mangaku mi pwechepwech, silik mi möömmóng me mangaku mi chchü. Ka mwöngö ekkewe mwöngö mi fókkun annö - pilawa mi mwirinnö, chönün chunen me apüra mi för seni föün olif. Iwe, ka fókkun lieöchchüló o ka tolong lón wiisen emön kiwiin. 14Iwe, iteüöchchum a meresefeil leiin ekkewe mwüü fäniten lieöchchum, pwokiten ewe ling ngang üwa ngenuk o föri pwe lieöchchum epwe unus, iei aloi ngang ewe Samol KOT.

15“ ‘Nge en ka poputä le anómwu óm apilükülük wón lieöchchum o aea iteüöchchum pwe kopwe wiliti emön fiin lisowu. En ka eneen le föri föfförün lisowu ngeni iteiten emön me emön mwän mi pwereto, iön chök a mochen. 16Iwe, ka angei ekkóch üfom kewe mi fókkun lingöch ngang üwa ngenuk o ka ääniir le elinga ngeni ekkewe leenien fel wón ekkewe leeni mi tekia, ia ka föri ie óm föfförün lisowu. Ei sókkun föfför esap fókkun öch an a fis, esap pwal öch an epwe fis säfäl. 17En ka pwal angei ekkewe fout mi mwirinnö ngang üwa ngenuk, ekkewe fout mi för seni äi kolt me silifer o ka föri fänitom uluulun mwän; iwe, ka föri föfförün lisowu ngeniir. 18Iwe, ka angei üfom kewe mi chchü ngang üwa ngenuk o ka pwölüw ngeni óm kewe uluulun önümwäl. Mwirin, ka ääni asór me mwen ekkewe uluulun önümwäl äi we apüra me äi we appach mi pwokkus. 19En ka pwal ääni asór me mweer ekkewe mwöngö ngang üwa awora fänitom - ewe pilawa mi mwirinnö, apüra mi för seni föün olif me chönün chunen, ngang üwa ngenuk pwe onom. En ka äänir asór pwe asóren ötüöt mi pwokkus me mwen ekkewe uluulun önümwäl. Iei meet a fis, aloi ngang ewe SAMOL KOT.

20“ ‘Iwe, ka angei noum kewe äät me nengngin, noum kewe en ka nöüniir me wóói o ka ääniir asóren mwöngö ngeni ekkewe uluulun önümwäl. Ifa usun, kosap kuuäsini óm föfförün lisowu? 21En ka niieló neii kewe semiriit o ääniir asór ngeni ekkewe uluulun önümwäl. 22Nge lón óm kewe föfför mi enniopwut meinisin me óm föfförün lisowu, kosap chechchemeni ewe fansoun lekükkünum, lupwen ka seleló o öchchökün o faresiik lón chaóm.

23“ ‘Feiengawom! Feiengawom, aloi ngang ewe SAMOL KOT. Kapach ngeni óm kewe pwal ekkóch föfföringaw meinisin, 24en ka pwal senätä leeni mi ekis tekia fänitom o föri óm kewe leenien fel ngeni uluulun önümwäl lón iteiten ekkewe leenien emwiicheichen aramas. 25En ka öüüwetä óm kewe leenien fel mi tekia ngeni uluulun önümwäl lepwokuukun iteiten ekkewe aal o elimengawaló lieöchchum. Ka alapaló óm angangen lisowu o ääni amöömö inisum ngeni ese lifilifil iö a pwereto reemw. 26En ka föri föfförün lisowu ngeni ekkewe chón Egypt, chón órum kewe mi uren mocheniä o ka asoongaei ren óm alapaló óm angangen lisowu. 27Iei popun ngang üwa eitiewu peii pwe üpwe üüngenuk o ökükkünaló kinikinin fönüwom; ngang üwa mwüüt ngeni chón opwutom kewe, ekkewe chón Filistia pwe repwe föri ngenuk meet iir ra mochen. Iir mwo nge ra weitifengeniir ren ekkewe föfför mi ngaw en ka föri. 28En ka pwal föri föfförün lisowu ngeni ekkewe chón Assyria, pwokiten en kosap tongeni menemen; nge mwirin óm föri föfförün lisowu ikenan, kosap pwal tongeni menemen. 29Mwirin, ka alapaló óm föfförün lisowu pwe ka apachalong ekkewe chón Kaldea, iir seni ewe fönüwen chón amöömö, nge pwal iei mwo nge kosap menemen.

30“ ‘A ifa me apwangapwangen letipom, iei aloi ngang ewe SAMOL KOT. Pün en ka föri ekkeei föfför meinisin usun emön fiin lisowu esap sile sääw. 31Lupwen ka senätä óm kewe leeni mi tekia lepwokuukun iteiten ekkewe aal o föri óm kewe leenien fel ngeni uluulun önümwäl lón iteiten ekkewe leenien emwiicheichen aramas, en kosap usun ekkewe fefin mi ääni amöömö inisir pwokiten kosap angei liwinin óm föfförün lisowu.

32“ ‘En emön fefin mi pwüpwülü ka tipisin lisowu! Ka efich ekkewe chón ekis mwen pwisin pwülüwom we! 33Iteiten fiin lisowu ra angei och liiwin, nge en ka mwöchümwöch ngeni noum kewe kämmwet meinisin, pün ka ngeniir liffangen emichimich pwe repwe feitto reemw seni ekis meinisin ren óm föfför mi üüngeni öllük me öörüni. 34Iei popun lón óm föfförün lisowu en ka sókkóló seni ekkewe ekkóch fiin lisowu. En ka fókkun sókkóló pün en ka ngeni ekkewe mwän liwiniir, nge esap wor emön a ngenuk liwinum.

35“ ‘Iei minne, en ewe fiin lisowu, kopwe öüseling ngeni ei poraus seni ewe SAMOL! 36Iei meet ewe SAMOL KOT a apasa: Pwokiten en ka fangaló wöwum o särifaló selelóm lón óm föfförün lisowu ngeni noum kewe kämmwet, pwal pwokiten óm kewe uluulun önümwäl mi enniopwut meinisin, pwal pwokiten en ka ääni asór ngeniir chaan noum kewe, 37iei minne, nengeni, ngang üpwe ochufengeni noum kewe kämmwet meinisin, chókewe meinisin en ka pwaapwaitir, chókewe meinisin en ka efich me chókewe en ka opwut. Ngang üpwe ochufengeniir seni ekis meinisin pwe repwe üüngenuk. Iwe, ngang üpwe äselelók ngeniir pwe iir repwe küna óm seleló. 38Iwe, ngang üpwe öpwünguk. Ngang üpwe ngenuk liwinin tipisin emön fefin mi föri föfförün lisowu me emön chón össükü chcha. Ngang üpwe pwölüw ngenuk chcha lón äi lingeringer me äi soongen luukommóng. 39Mwirin, ngang üpwe atolongók lepöün noum kewe kämmwet, nge iir repwe ataetiw óm kewe leeni mi tekia o ataeló óm kewe leenien fel ngeni uluulun önümwäl. Iir repwe kamwei senuk üfom kewe o angei senuk foutom kewe mi ling. Iwe, repwe likitukoló lón óm seleló me öchchökün. 40Iwe, repwe ochufengeni ew mwiichen aramas mi chómmóng pwe repwe mónei ngenuk faaw o ataatakisiik ren nöüür ketilas. 41Repwe kenätiw imwom kewe o awarato köpwüng wóóm me fän mesen fefin mi chómmóng. Ngang üpwe öükätiw óm föfförün lisowu, nge en kosap chüen mööni noum kewe kämmwet. 42Mwirin, äi soong ngenuk epwe kisikiisitiw nge äi soongen luukommóng epwe säp senuk. Ngang üpwe kinamweló nge üsap chüen soong.

43“ ‘Iwe, pwokiten en kosap chechchemeni minne üwa föri ngenuk lupwen fansoun óm kükkün, nge ka asoongaei ren ekkeei sókkun föfföringaw meinisin, iei minne ngang üpwe fókkun awarato wón mökürom liwinin meet en ka föri, iei aloi ngang ewe SAMOL KOT. Ifa usun, ka apachatä óm kewe angangen mocheniä ngeni óm kewe pwal ekkóch föfför mi nniopwut meinisin?

44“ ‘Nengeni, iteiten emön me emön mi ääni kapasen mwiitun repwe ääni ei ew kapasen mwiitun usum: ‘Lapalapen emön inelap, pwal ina chök usun lapalapen nöün fefin.’ 45En wesewesen nöün inom we mi pöütaló pwülüwan me nöün kewe. En ka wesewesen mwirii pwiimw kewe mi pöütaló pwülüwer kewe me nöüür kewe. Inomw we i emön fiin Hit, nge semom we i emön re Amor. 46Pwiimw we wätte itan Samaria a nóm peliefengum fiti nöün kewe fefin. Nge pwiimw we mi kükkün itan Sodom a nóm peliöörum fiti nöün kewe fefin. 47En kosap chök fätäl lón ipweer o appirüw ar kewe föfför mi enniopwut, nge lón óm kewe föfför meinisin, en ka mwiitir wiliti emön chón föfföringaw lap seniir. 48Mwo manawei, aloi ngang ewe SAMOL KOT, pwiimw we Sodom me nöün kewe fefin resap mwo nge föri meet en me noum kewe fefin öüwa föri.

49“‘Iei tipisin pwiimw we Sodom: I me nöün kewe fefin ra sikesik, ra mwöngömmóng, o resap mwo nge ekieki usun och mettóch; resap älisi ekkewe mi wöwingaw me mi osupwang. 50Iir ra lamalamtekia o föri föfför mi enniopwut me fän mesei. Iei minne, ngang üwa arosereló, usun en ka küna. 51Samaria esap föri esópwun ewe tipis en ka föri. En ka föri chómmóng föfför mi enniopwut lap seni. Iei popun pwe en ka föri pwe pwiimw kewe repwe usun chök nge iir chón pwüng ren ekkeei föfför mi ngaw en ka föri. 52Kopwe pwisin mwärelong fän óm itengaw, pün en ka awora ekkóch popun mi pwüng än pwiimw kewe repwe mwirinnö lap senuk. Pwokiten óm kewe tipis ra koon ngaw seni ar, en ka föri pwe pwiimw kewe ra usun chök nge iir chón pwüng lap senuk. Iei popun kopwe sääw o mwärelong fän óm itengaw, pün en ka föri pwe pwiimw kewe ra usun chök nge iir chón pwüng.

53“ ‘Iwe nge lón ew rän, ngang üpwe eliwinisäfäli feiöchün Sodom me nöün kewe fefin pwal feiöchün Samaria me nöün kewe fefin. Iwe, ngang üpwe pwal eliwinisäfäli feiöchüm, 54pwe kopwe mwärelong fän óm itengaw o kopwe wesewesen sääw ren meinisin minne ka föri, pün ren óm kewe tipis repwe föri pwe pwiimw kewe repwe meefi ar kinamwe lupwen repwe alöllö fengeni kemi. 55Iwe, pwiimw kewe, Sodom me Samaria me nöüür kewe föpwül meinisin repwe liwiniti meet nónnómwuur me mwan, nge en me noum kewe föpwül öüpwe pwal liwiniti meet nónnómwumi me mwan. 56En kosap mwo nge mochen föüni iten pwiimw we lón fansoun óm lamalamtekia, 57me mwen óm kewe föfföringaw resamwo pwä. Nge iei en ka küna turunufas meren ekkewe föpwülün Edom me chón órun kewe meinisin, pwal meren ekkewe föpwülün Filistia - chókewe meinisin mi nóm ünükküm ra turunufasek. 58En kopwe mwärelong fän eselipäen óm kewe föfförün mocheniä me óm kewe föfför mi enniopwut, iei aloi ngang ewe SAMOL.

59“ ‘Iei meet ngang ewe SAMOL KOT üwa apasa: Ngang üpwe föri ngenuk usun minne a fich ngenuk, pwokiten en ka turunufasei äi we pwon fän ökköpöl ngenuk ren óm atai ewe pwon. 60Nge ngang üpwe chechchemeni ewe pwon ngang üwa ääni ngenuk lupwen fansoun ka kükkün. Iwe, üpwe pwal efisätä ew pwon ese mwüch ngenuk. 61Ngang üpwe emmwenato pwiimw kewe, Sodom me Samaria reemw. Iwe, ngang üpwe föri pwe iir repwe noum föpwül, inamwo ika ei esap nóm lón ach we pwon, nge ngang üpwe föri ei fänitom. Mwirin, en kopwe chechchemeni ekkewe föfföringaw en ka föri o kopwe sääw ren. 62Iei usun ngang üpwe önüküchcharasäfäli äi we pwon ngenuk, nge en kopwe silei pwe ngang ewe SAMOL. 63Mwirin, lupwen ngang üpwe föri omwusomwusen tipis fäniten ekkewe föfför mi ngaw meinisin en ka föri, iwe, en kopwe chechchemeni óm kewe tipis o kopwe sääw reer. Iwe, kosap fókkun chüen suuki awom óm kopwe apasa och pwokiten óm sääw, iei aloi ngang ewe SAMOL KOT.’ ”

Rüwömön ikel me efóch irän wain

17Mwirin, ei poraus seni ewe SAMOL a toriei. A apasa: 2“Nöün aramas kopwe aporausa ew kapas mwönünnür ngeni ekkewe chón Israel. 3Kopwe apasa ngeniir, ‘Iei meet ewe SAMOL KOT a apasa: A wor emön ikel mi wätte, a pöchökkül pöükässin, ülöülan ra langattam o sókósókpaat önüwönüür a ässito Lebanon. Iwe, a felei ülüülen efóch irä sedar, 4o tünüweló palan we mi nóm uluungechikin. Iwe, a uweeló ewe palan ngeni ewe fönüwen chón amöömö pisek ia i a fótukätiw ie lón ewe telinimwen chón amöömö.

5“ ‘Mwirin, ewe ikel a pwal angei efóch ilin irän ewe fönü o fótukätiw lón ew pwül mi mwirinnö. A fótukätiw usun efóch irän lükün kólik itan willow ia a wor ie kólik mi chómmóng. 6Iwe, ewe ilin irä a pwükütä o a wiliti efóch irän wain mi mwochomwooch o mwuresires. Palan kewe ra pwüküwu o wenetä ngeni ewe ikel, nge waaran kewe ra pwükütiw fan. Iei usun än ewe ilin irä a wiliti efóch irän wain mi awora palan me chöön.

7“ ‘Nge a wor pwal emön ikel mi wätte a ässito, pöükässin ra fókkun pöchökkül o chómmóng ülöülan. Iwe, iei ewe irän wain a atööwu waaran kewe seni ewe ia a fótetiw ie o atööreló ngeni ewe ikel, a pwal eitiewu palan kewe ngeni ewe ikel pwe i epwe achöchchönüür ngeni kólik. 8Nge ewe irän wain a fen fót lón ew pwül mi mwirinnö órun ia a wor chómmóng kólik ie pwe epwe tongeni öpwükawu palan kana o uwa, epwe pwal wiliti efóch irän wain mi mwirinnö.’

9“Iwe, kopwe apasa ngeniir, ‘Iei meet ewe SAMOL KOT a apasa: Ifa usun, öüwa ekieki pwe ngang üpwe mwüüt ngeni ewe irän wain pwe epwe manaw o määritä? Apwi! Ngang üpwe wiipopuetä ewe irän wain fiti fengen me waaran. Ngang üpwe pöküwetiw uwaan kana o likitaló chöön kana pwe repwe aiolool o pwasaló. Epwe chök mecheres äi üpwe wiietä. Üsap pwal osun äi üpwe nöünöü efóch paaw mi pöchökkül ika ew mwiichen sounfiu mi chómmóng pwe repwe wiietä. 10Ika mwo ewe irän wain epwe fótsäfäl nge esap tongeni manaw. Epwe wesewesen pwasaló lupwen ewe äsäpwäälin öötiw epwe eniiti. Epwe pwasaló lón ewe pwül mi mwirinnö ia a määritä ie.’ ”

11Mwirin, ew poraus seni ewe SAMOL a toriei. A apasa: 12“Kopwe apasa ngeni ekkeei aramasen Israel mi üleförea, ‘Ifa usun, öüsap weweiti meet wewen ekkeei kapas mönünnür usun ekkewe ikel?’ Iwe, kopwe pwal apasa ngeniir: ‘Ewe kingen Babylon a feilló Jerusalem o liäpenaló an we king me nöün kewe nöüwiis. Iwe, a liwinsäfäl nge a uweiireto ngeni Babylon. 13Mwirin, a angei emön mwän seni chón ewe familien king o föri ew pwon ngeni. A eriääni ewe mwän pwe epwe ääni ew pwon fän ökköpöl pwe epwe ölükülük ngeni. Ewe kingen Babylon a pwal uweeló souemmwen seni ewe fönü, 14pwe ewe mwüün Judah epwe apwangapwangaló, nge esap chüen tongeni pöchökkül säfäl. Ewe mwüü epwe chök tongeni manaw ren an ewe mwän seni ewe familien king epwe tümwünüfichi an pwon ngeni ewe kingen Babylon. 15Nge ei king mi fö seni ewe familien king a üüngeni ewe kingen Babylon ren an tiinaló nöün mwiichen chón künö ngeni Egypt pwe repwe tungór chómmóng óris me ew mwiichen sounfiu mi chómmóng. Ifa usun, meren ewe king pwe epwe fisiöch minne i a föri? Ifa usun, emön aramas mi föri ei sókkun föfför esap angei chappen an föfför? Ifa usun, ätewe epwe ataai ewe pwon nge esap angei chappan?

16“ ‘Mwo manawei, ngang ewe SAMOL KOT üwa kapas, ewe kingen Israel epwe mäló lón Babylon, lón fönüwen ewe king mi amóóta i wón ewe leenien móótun king, pün a turunufasei an we pwon fän ökköpöl o ataai an we pwon. 17Farao me nöün mwiichen sounfiu mi pwora me chómmóng resap tongeni älisi ätewe lón maun, lupwen ekkewe chón Babylón repwe senätä orooren maun o öüüwetä pisekin eppet pwe repwe niieló chómmóng aramas. 18Pün ewe kingen Israel a turunufasei ewe pwon fän ökköpöl ren an ataai ewe pwon. Pwokiten i a angolong lón pöün ewe kingen Babylon o pwon ngeni, nge esap öpwönüwetä an pwon, i esap tongeni pichiwu seni chappen an föfför.

19“ ‘Iei minne, iei meet ewe SAMOL KOT a apasa: Mwo manawei, ngang üpwe ngeni ätewe chappen an ataai ewe pwon me turunufasei ewe pwon fän ökköpöl i a föüni itei wón. 20Ngang üpwe lüwetaló neii we toloia wón, nge i epwe tupw lón äi we likottupw. Ngang üpwe uweeló i Babylon o öpwüngü i me ikenan, pwokiten i esap ölükülük ngeniei. 21Nöün kewe sounfiu meinisin mi süüló repwe mäló ren ketilas, nge ekkewe mi chüen manaw repwe toropasfeil ngeni ekkewe rüwänü peekin äsäpwääl. Mwirin, öüpwe silei pwe ngang ewe SAMOL üwa kapas.

22“ ‘Iei meet ewe SAMOL KOT a apasa: Pwisin ngang üpwe angei efóch fasar seni wón ungen efóch irä sedar o fótukätiw; ngang üpwe kupiieló efóch palan mi pwüküfö seni uluungechikin ekkewe fasar o fótukätiw wón ew chuuk mi tekia o kükkütä. 23Ngang üpwe fótuki wón ewe chukun Israel mi fókkun tekia. Iwe, epwe wiliti efóch irä sedar mi fókkun mwirinnö. Epwe öpwükawu palan o uwa. Iwe, chómmóng sókkun machchang repwe so wón palan kewe o nónnóm fän nürün palan kewe. 24Ekkewe irä meinisin lón ewe mälämäl repwe silei pwe ngang ewe SAMOL üwa oturaló lepwül ewe irä mi langattam o föri pwe ewe irä mi mwochomwooch epwe langattamatä. Ngang üwa appwasaló ewe irä mi manaw o föri pwe ewe irä mi pwas epwe manaw.

“ ‘Ngang ewe SAMOL üwa kapas, nge üpwe pwal föri meet ngang üwa apasa.’ ”

Emön aramas mi tipis epwe mäló

18 Mwirin, pwal ew poraus seni ewe SAMOL a toriei. A apasa: 2“Meet wewen ämi kewe aramas öüwa ääni ei mwittun usun ewe fönü Israel o apasa:

“ ‘Ekkewe saam ra ochooch üwään irän wain mi mwoon, nge nöüür kewe ra niimwoon ren’?

3“Mwo manawei, ngang ewe SAMOL KOT üwa apasa, öüsap chüen ääni ei sókkun mwiitun me lón Israel. 4Pün nengeni, manawen iteiten emön me emön aramas a nóm fän nemeniei, manawen ewe saam pwal usun chök manawen ewe naaw, manaweer me rüwömön ra nóm fän nemeniei. Nge ewe aramas mi tipis, i ewe emön epwe mäló.

5“Iwe, epwe ifa ika a wor emön aramas mi pwüng a föri meet mi pwüng o wenechchar.

6I esap mwöngö föten önü lón ekkewe leenien fel ngeni uluulun önümwäl wón ekkewe chuuk, esap pwal sachchetä ngeni än chón Israel kewe uluulun önümwäl. I esap lisowu ngeni pwülüwen chón órun ika kóón ren emön fefin lupwen än neminnewe a samwawün maram.

7I esap eriäfföwü emön aramas, nge a eliwinisäfäli meet i a angei pwe esissilen än emön pwon fäniten an liwinimmang. I esap soolä, nge a fangaló anan mwöngö ngeni ekkewe chón echik o öüföüfa ekkewe mi seleló.

8Esap tiichik le angei kullun nöün mooni ika alapaló manawan. I a eppeti seni pöün an epwe föri minne a mwääl o a wenechchar lupwen a ääni köpwüng lefiilen ekkóch aramas.

9I a fiti pwüngün äi kewe pwüüng o ölükülük le älleasochisi äi kewe öllük. Ei aramas a pwüng; i epwe fókkun manaw, iei aloi ngang ewe SAMOL KOT.

10“Nge epwe ifa ika a wor emön mwän nöün ei aramas mi pwüng, a mämmääritä o a emön chón soolä ika chón niieló aramas, esap pwal mochen föri meet mi pwüng, 11(inamwo ika ewe saam esap föri och me leiin ekkeei föfför):

“Ewe naaw a mwöngö föten önü lón ekkewe leenien fel ngeni uluulun önümwäl wón ekkewe chuuk o lisowu ngeni pwülüwen chón órun.

12I a pwal eriäfföüwü ekkewe mi wöwingaw me osupwang. I a soolä. I esap eliwinisäfäli meet i a angei pwe esissilen än emön pwon fäniten an liwinimmang. I a sachchetä ngeni ekkewe uluulun önümwäl. I a föri ekkewe föfför mi enniopwut.

13I a tiichik le angei kullun nöün mooni o alapaló manawan.

Ifa usun, ei sókkun aramas epwe manaw? Apwi, esap fókkun manaw! Pwokiten i a föri ekkeei sókkun föfför mi enniopwut meinisin, iei minne i epwe fókkun ninniiló; chaan epwe ina pwisin chappen an tipis.

14“Nge epwe ifa ika nöün ei naaw mi föfföringaw a küna ekkewe tipis meinisin saman we a föri, nge inamwo are i a küneer, nge i esap föri ekkeei sókkun föfför mi ngaw:

15“I esap mwöngö föten önü lón ekkewe leenien fel ngeni uluulun önümwäl wón ekkewe chuuk, esap pwal sachchetä ngeni än chón Israel kewe uluulun önümwäl. I esap lisowu ngeni pwülüwen chón órun.

16I esap eriäfföwü emön aramas ika angei seni emön och esissilen an pwonen liwinimmang. I esap soolä, nge a fangaló anan mwöngö ngeni ekkewe chón echik o öüföüfa ekkewe mi seleló.

17I a eppeti pöün seni an epwe kirikiringaw ngeni ekkewe mi mweleele o esap tichchik le angei kullun nöün mooni ika alapaló manawan. I älleasochisi äi kewe öllük o fiti pwüngün äi kewe pwüüng.

Ätei esap mäló fäniten än saman tipis; i epwe fókkun manaw! 18Nge saman we epwe mäló fäniten pwisin an tipis, pwokiten i a eriäni seni aramas nöüür mooni, a sooläni minne än pwiin o föri meet mi mwääl me leiin aramasan.

19“Nge ämi öüwa eiis, ‘Pwata ewe naaw esap fitilong lón tipisin saman we?’ Pwokiten ewe naaw a föri meet mi pwüng o wenechchar, a pwal tümwünüfichi le öpwönüwetä äi kewe öllük meinisin, iei minne, i epwe fókkun manaw. 20Ewe emön mi tipis, i ewe emön epwe mäló. Ewe naaw esap köpwüng ren tipisin ewe saam me iin, nge ewe saam me ewe iin resap köpwüng ren tipisin ewe naaw. Aramas mi pwüng repwe angei liwiniir fäniten pwisin ar föfförün pwüng, nge aramas mi föföringaw repwe köpwüng fäniten ar föfför mi ngaw.

21“Nge ika emön aramas mi föfföringaw a kul seni ekkewe tipis meinisin i a föri, are i a pwal öpwönüwetä äi kewe öllük meinisin o föri meet mi pwüng o wenechchar, i epwe fókkun manaw; i esap mäló. 22Esap wor ew me leiin an kewe pwuupwungaw i a föriir me mwan üpwe chechchemeni. I epwe manaw, pwokiten ekkewe föfför mi pwüng i a föri. 23Ifa usun, öüwa ekieki pwe ngang üwa pwapwaiti äi üpwe küna pwe emön chón föfföringaw epwe mäló?’ Iei alon ewe SAMOL KOT. Esap fókkun pwüng! Ifa usun, ngang üsap pwapwaiti lupwen ra kul seni ar kewe föfför mi ngaw o manaw?

24“Nge are emön aramas mi pwüng epwe kul seni an föfförün pwüng o föri tipis, are a pwal föri ekkewe chök pwal sókkun föfför mi enniopwut emön aramasingaw a föri, ifa usun, epwe mwüümwütä ngeni pwe epwe manaw? Ngang üsap chehchemeni ew me leiin ekkewe föförün pwüng i a föri me mwan. Pwokiten i esap ölükülük, iei minne i a tipis. Nge pwokiten ekkewe tipis i a föri, iei minne i epwe mäló.

25“Nge öüwa pwal apasa, ‘Än ewe SAMOL föfför esap pwüng.’ Ämi aramasen Israel, öüpwe rongorong! Ifa usun, äi föfför esap pwüng? Ifa usun, sap fen ämi kewe föfför resap pwüng? 26Are emön aramas mi pwüng a kul seni an föfförün pwüng o föri tipis, i epwe mäló fäniten an tipis. I epwe mäló pwokiten ewe tipis i a föri. 27Nge are emön aramasingaw a kul seni ekkewe föfföringaw i a föri o föri meet mi pwüng o wenechchar, i epwe amanawa manawan. 28Pwokiten i a meefi an kewe pwuupwungaw meinisin i a föri o kul seniir, i epwe fókkun manaw. I esap mäló. 29Nge ämi chón Israel öüwa apasa, ‘Än ewe SAMOL föfför esap pwüng.’ Ämi chón Israel, ifa usun, äi kewe föfför resap pwüng? Ifa usun, sap fen ämi kewe föfför resap pwüng?

30“Iei minne, ämi chón Israel, ngang üpwe öpwüngü kemi, emön me emön wón öüküükün en me an föfför, aloi ngang ewe SAMOL KOT. Öüpwe ekieksäfäl! Öüpwe kul seni ämi kewe pwuupwungaw meinisin; mwirin, tipis esap fis pwe ew leenien chepetek ngeni kemi. 31Öüpwe pöütaló seni kemi ämi kewe pwuupwungaw ämi öüwa föriir, nge öüpwe angei ew leluuk mi fö me emön ngüün mi fö. Pün pwata öüpwe mäló, ämi chón Israel? 32Pün ngang üsap mochen pwapwaiti än emön aramas epwe mäló, ngang ewe SAMOL KOT üwa kapas. Iei minne, öüpwe ekieksäfäl pwe öüpwe manaw!

Echö köölün kechiw fäniten ekkewe samolun Israel

19“Kopwe köölüw echö köölün kechiw fänäsengesin ekkewe samolun Israel. 2Kopwe apasa:

‘Mwa meet ren inemi we? I a usun chök emön liäfefinin laion leiin ekkewe ätemwänin laion! I a kóónoló leiin ekkewe liälifföön laion o oupwu nöün kewe.

3I a fólenätä emön leiin nöün kewe; iwe, a wiliti emön laion mi pöchökkül. Iwe, a käeö usun an epwe ttur liapan o a wiliti emön mi ochooch aramas.

4Ekkewe mwüü ünükkün ra rongorong usun; iwe, ra likottupuuw lón ew pwaang iir ra tuuw pwe epwe turulong lón. Ra aköököw lón awan o lukiieló ngeni ewe fönü Egypt.

5Lupwen ewe liäfefinin laion a küna pwe esap pwönüwetä minne i a ääni apilükülük, esap pwal tori minne i a ösüküsükü, a angei pwal emön leiin nöün kewe o fólenätä pwe epwe emön laion mi pöchökkül.

6A fätälfeil leiin ekkewe laion, pün iei, i a emön laion mi pöchökkül. I a käeö usun an epwe ttur liapan o a wiliti emön laion mi ochooch aramas.

7I a maun ngeni ekkewe imwen king o ataeló ekkewe telinimw. Meinisin aramas mi nóm lón ewe fönü ra rüükö lupwen ra rongorong an wörüwör.

8Mwirin, chón ekkewe mwüü ra feitto maun ngeni, chókana mi nóm ünükkün. Iir ra emeresaló nöüür kewe cheew fänitan, iwe, i a ttup lón tuuer pwaang.

9Iir ra aea aköökö le üralong lón ew tittin maan o ra uweeló i ren ewe kingen Babylon. Iir ra atolonga i lón ew imwen föötek, iei popun esap chüen wor emön a rongorong wörüwörün me wón ekkewe chukun Israel.

10Inom we a usun chök efóch irän wain lón óm tännipin irän wain a fót ünükkün ew kólik. A fókkun uwaöch o palapal, pwokiten wätten ewe kólik.

11Palan kewe ra pöchökkül o fich ngeni wókun king. Ewe irän wain a langattamatä o tekiatä asen ekkewe pwal ekkóch. A pwääöch ren tekian pwal ren chómmóngun palan.

12Nge emön a wiietä ewe irän wain fän an soong o oturaló wón pwül. Ewe äsäpwäälin öötiw a eniiti, iei popun a pwasaló, nge uwaan kewe ra mworomworotiw. Palan kewe mi pöchökkül ra pwasaló; iwe, ekkei a keniireló.

13Nge iei, ewe irän wain a fót lón ewe fönüapö, ia ewe pwül a pöchökkül o pwasapwas.

14Iwe, ekkei a ngetewu seni fän efóch palan kewe o kenaló uwaan kewe. Esap chüen wor efóch palan mi pöchökkül a nóm wón a fich ngeni pwe epwe efóch wókun king.’

Iei echö köölün kechiw aramas repwe ääni pwe echö ar köölün kechiw.

Än chón Israel üleförea a elimelim

20Iwe, lón ewe efisuuen ier, lón äengolun ränin ewe elimuwen maram, ekkóch me leiin ekkewe souakkomwen chón Israel ra feitto pwe repwe angei öüröüreer meren ewe SAMOL o ra móót fän mesei.

2Mwirin, ei poraus seni ewe SAMOL a toriei. A apasa: 3“Nöün aramas, kopwe kapas ngeni ekkewe souakkomwen chón Israel o apasa ngeniir: ‘Iei meet ewe SAMOL KOT a apasa: Ifa usun, öüwa feitto pwe öüpwe angei öüröüremi seniei? Mwo manawei, ngang üsap mwüüt ngeni kemi pwe öüpwe angei öüröüremi seniei, ngang ewe SAMOL KOT üwa kapas.’

4“Nöün aramas, ifa usun, kopwe öpwüngüür? Ifa usun, kopwe öpwüngüür? Mwirin, kopwe tuwenewene ngeniir än semelapeer kewe föfför mi enniopwut, 5o apasa ngeniir: ‘Iei meet ewe SAMOL KOT a apasa: Lón ewe rän ngang üwa filätä Israel, ngang üwa eitietä peei o pwon fän ökköpöl ngeni ekkewe mwirimwirin Jakob o pwisin pwäärieiló ngeniir me lón Egypt. Üwa eitietä peii o apasa ngeniir, “Ngang ewe SAMOL ämi we Kot.” 6Lón ewe rän, ngang üwa pwon fän ökköpöl ngeniir pwe ngang üpwe emmweniirewu seni Egypt o emmweniirelong lón ew fönü ngang üwa fen ouwasacha fäniter, ew fönü ia a pwuupwu ie milik me chönün chunen, ew fönü mi fókkun mwirinnö seni fönü meinisin. 7Iwe, üwa apasa ngeniir, “Emön me emön leiimi epwe pöütaló ekkewe uluulun önümwäl mi enniopwut i a pwapwaiti. Öüsap elimengawa kemi ren ekkewe uluulun önümwäl seni Egypt. Ngang ewe SAMOL ämi we Kot.”

8“ ‘Nge iir ra üleförea ngeniei o resap mochen öüseling ngeniei; esap wor emön leiir a pöütaló ekkewe uluulun önümwäl mi enniopwut iir ra afóta meser wón, resap pwal likitaló ekkewe uluulun önümwälin Egypt. Iei popun ngang üwa apasa pwe üpwe niinätiw äi lingeringer wóór o ömwüchchü äi soong ngeniir me lón ewe fönü Egypt. 9Nge ngang üwa ömwöchü peii pwe üsap öpwüngür, fänäsengesin iteüöchchün itei an esap küna turunufas me fän mesen chón ekkewe mwüü iir ra nóm leiir, pün ngang üwa fen esile ngeni chón Israel me fän mesen chón ekkewe mwüü pwe ngang üpwe emmweniirewu seni Egypt. 10Iei minne, ngang üwa emmweniirewu seni Egypt o uweiirelong lón ewe fönüapö. 11Ngang üwa ngeniir äi kewe pwüüng o esile ngeniir äi kewe öllük, pün emön aramas mi älleasochsiir epwe manaw reer. 12Ngang üwa pwal ngeniir äi kewe ränin Sabbat pwe ew esissil lefiileer me ngang, pün epwe ächchema ngeniir ar repwe silei pwe ngang ewe SAMOL üwa äimwüüreló pwe iir repwe pin.

13“ ‘Nge ekkewe aramasen Israel ra üleförea ngeniei me lón ewe fönüapö o resap mochen älleasochis ngeni äi kewe öllük. Resap mochen föri pwüngün äi kewe öüröür ngeniir, inamwo ika ra silei pwe emön aramas mi älleasochis ngeniir epwe manaw reer. Iir ra pwal fókkun atai pinin äi kewe ränin Sabbat. Iei popun ngang üwa apasa ngeniir pwe ngang üpwe niinätiw äi lingeringer wóór o arosereló me lón ewe fönüapö. 14Nge ngang üwa ömwöchü peii pwe üsap öpwüngür, fänäsengesin iteüöchün itei an esap küna turunufas me leiin chón ekkewe mi küna usun äi emmwenirewu seni Egypt. 15Ngang üwa pwal eitietä peii o pwon fän ökköpöl ngeniir me lón ewe fönüapö pwe ngang üsap emmweniirelong lón ewe fönü üwa fen ngeniir, ew fönü ia a pwuuwpu ie milik me chönün chunen, ew fönü mi fókkun mwirinnö seni fönü meinisin, 16pwokiten iir ra pöütaló äi kewe öllük o resap föri pwüngün äi kewe pwüüng, ra pwal atai pinin äi kewe ränin Sabbat. Pün letipeer a chök mochen achoocho le fel ngeni ekkewe uluulun önümwäl. 17Nge ngang üwa nennengeniir fän äi tongeer o üsap arosereló ika ömwüchchüüreló me lón ewe fönüapö. 18Ngang üwa apasa ngeni nöüür kewe me lón ewe fönüapö: “Ämi öüsap föri pwüngün ekkewe öörüni än ämi kewe leewo, ika öpwönüwetä ar kewe öllük ika elimengawa kemi ren ar kewe uluulun önümwäl. 19Ngang ewe SAMOL ämi we Kot; öüpwe föri pwüngün äi kewe pwüüng o tümwünüfichi le öpwönüwetä äi kewe öllük. 20Öüpwe pwal öpwönüwetä pinin äi kewe ränin Sabbat, pün repwe ew esissil lefiilach. Mwirin, öüpwe silei pwe ngang ewe SAMOL ämi we Kot.”

21“ ‘Nge nöüür kewe ra pwal üleförea ngeniei. Resap öpwönüwetä pwüngün äi kewe pwüüng, resap tümwünüfichi le öpwönüwetä äi kewe öllük, inamwo ika ra silei pwe emön aramas mi älleasochsiir epwe manaw reer. Iir ra pwal atai pinin äi kewe ränin Sabbat. Iei popun ngang üwa apasa pwe üpwe niinätiw wóór äi lingeringer o ömwüchchü äi soong ngeniir me lón ewe fönüapö. 22Nge ngang üwa ömwöchü peii pwe üsap öpwüngüür, fänäsengesin iteüöchchün itei an esap küna turunufas me fän mesen chón ekkewe mwüü mi küna usun äi emmweniirewu seni Egypt. 23Iwe, ngang üwa pwal eitietä peii o pwon fän ökköpöl ngeniir me lón ewe fönüapö pwe ngang üpwe atoropaseer leiin chón ekkewe mwüü o atoropasafeiliir leemelen ekkewe fönü, 24pwokiten resap älleasochisi äi kewe öllük nge ra pöütaló äi kewe pwüüng o atai pinin äi kewe ränin Sabbat. Iwe, meseer a mocheniäiti ekkewe uluulun önümwäl än ar kewe leewo. 25Iwe, üwa pwal esechiireló pwe repwe öpwönüwetä ekkana pwüüng resap mwirinnö me ekkana öllük resap tongeni manaw ren. 26Ngang üwa mwüüt ngeniir pwe repwe elimengaweer ren pwisin ar kewe asór, lupwen ra ääni asóren keek nöüür kewe mwännichi ngeni ar kewe uluulun önümwäl. Ren ar föri ei lapalap, ngang üwa efeingawer, pün iir repwe silei pwe ngang ewe SAMOL.’

27“Iei minne, nöün aramas, kopwe kapas ngeni ekkewe aramasen Israel o üreniir: ‘Iei meet ewe SAMOL KOT a apasa: Pwal iei och meet semelapemi kewe ra turunufaseei ren. Iir ra kirikiringaw ngeniei. 28Lupwen ngang üwa emmweniirelong lón ewe fönü ngang üwa pwon fän ökköpöl pwe üpwe ngeniir, iir ra küna ekkewe chukuchukutä mi tekia ika ekkewe irä mi mwuresires, iwe, ra ääni ar kewe asór o keni appach mi pwokkus, ra pwal niinätiw ar kewe asóren wün me ikenan. Iwe, ra asoongaei. 29Mwirin, ngang üwa apasa ngeniir: Meet sókkun leenien fel ei leeni mi tekia ämi öüwa feilló ngeni?’ ” (Iei minne, leenien fel ngeni uluulun önümwäl a iten Bamaa ika leeni mi tekia tori ikenäi.)

Köpwüng me liwinsäfäl

30“Iei minne, kopwe apasa ngeni ekkewe chón Israel: ‘Iei meet ewe SAMOL KOT a apasa: Ifa usun, öüpwe pwal elimengawa kemi usun chök lapalapen minne semelapemi kewe ra föri o mocheniäiti ar kewe uluulun önümwäl mi enniopwut? 31Lupwen öüwa uweato ämi kewe liffang o ääni asóren keek nöümi kewe, öüwa sópweló le pwisin elimengawa kemi ren ämi kewe uluulun önümwäl meinisin tori ikenäi. Ifa usun, ngang üpwe mwüüt ngeni kemi pwe öüpwe angei öüröüremi seniei, ämi chón Israel? Mwo manawei, ngang ewe SAMOL KOT üwa kapas, ngang üsap mwüüt ngeni kemi pwe öüpwe angei öüröüremi seniei.

32“ ‘Iwe, ämi öüwa apasa, “Äm aia mochen pwe aipwe usun chón ekkewe mwüü, usun ekkewe aramasen fönüfan mi fel ngeni mwüüch me faaw.” Nge meet ämi öüwa ekieki, esap fókkun fis. 33Mwo manawei, ngang ewe SAMOL KOT üwa kapas, ngang üpwe nemeni kemi ren efóch paaw mi manaman me pöchökkül fän äi soong. 34Ngang üpwe emmwenikemiiwu seni lón ekkewe mwüü o ionifengeni kemi seni lón ekkewe fönü ia ämi öüwa toropasfeil ie ren efóch paaw mi manaman o pöchökkül fän äi soong. 35Iwe, ngang üpwe emmwenikemiilong lón fönüpöönün ekkewe mwüü. Iwe, me ikenan, ngang üpwe öpwüngü kemi nge sipwe nennefengen. 36Usun äi öpwüngü semelapemi kewe me lón ewe fönüpöönün ewe fönü Egypt, iei usun ngang üpwe öpwüngü kemi, ngang ewe SAMOL KOT üwa kapas. 37Ngang üpwe nengenifichi kemi lupwen öüpwe pwerelong fän wóki we wókun chón fóól siip, iwe, ngang üpwe pii pwe öüpwe öpwönüwetä wiisemi ngeni ewe riirin pwon. 38Ngang üpwe äimwü seni kemi chókewe mi üleförea me üüngeniei. Inamwo ika ngang üpwe emmweniirewu seni ewe fönü ia ra nónnóm ie, nge resap chök tolong lón ewe fönü Israel. Mwirin, öüpwe silei pwe ngang ewe SAMOL.

39“Nge ämi ekkewe aramasen Israel, iei meet ewe SAMOL KOT a apasa: Öüpwe feilló o fel ngeni ämi kewe uluulun önümwäl, emön me emön leimi. Nge mwirin, ämi öüpwe fókkun öüseling ngeniei. Iwe, öüsap chüen epiningawa itei mi pin ren ämi kewe asór me ämi kewe uluulun önümwäl. 40Pün me wón chuki we mi pin, ewe chukun Israel mi tekia, ngang ewe SAMOL KOT üwa kapas, me ikenan ekkewe aramasen Israel meinisin mi nóm lón ewe fönü repwe fel ngeniei pwal me ikenan ngang üpwe etiweer. Me ikenan, ngang üpwe angei ämi kewe asór, ämi kewe liffang mi fókkun mwirinnö, fiti ämi kewe asór mi pin meinisin. 41Ngang üpwe etiwa kemi usun äi etiwa ew asóren ötüöt mi pwokkus mwirin äi emmwenikemiiwu seni ekkewe mwüü o ionifengeni kemi seni ekkewe fönü ia öüwa piin toropasfeil ie. Ngang üpwe äletätä mereemi pwe ngang üwa pin me fän mesen chón ekkewe mwüü. 42Mwirin, ämi öüpwe silei pwe ngang ewe SAMOL, lupwen ngang üpwe emmwenikemiilong lón ewe fönü Israel, ewe fönü ngang üwa eitietä peii o pwon fän ökköpöl pwe üpwe ngeni ämi kewe leewo. 43Me ikenan, öüpwe chechchemeni lapalapen manawemi me ämi kewe föfför meinisin ämi öüwa pwisin elimengawa kemi ren, mwirin, öüpwe pwisin niopwutäsini kemi ren ekkewe föfföringaw meinisin ämi öüwa föriir. 44Mwirin, ämi aramasen Israel, öüpwe silei pwe ngang ewe SAMOL, lupwen ngang üpwe eiteöchüw itei ren äi üpwe ääni kirekiröch ngeni kemi, esap alóngólóng wón ämi kewe lapalap mi ngaw me ämi kewe föfför mi enniopwut, ngang ewe SAMOL KOT üwa kapas.’ ”

Kapasen oosuni usun feiengawen ewe fönü mi nóm öör

45Mwirin, ei poraus seni ewe SAMOL a toriei. A apasa: 46“Nöün aramas, kopwe äsepa wón mesom ngeni öör o kapas ngeni. Kopwe afalafal ngeni öör o ääni kapasen oosuni usun feiengawen wöllapen ewe fönü mi nóm öör. 47Kopwe apasa ngeni ewe wöllap mi nóm öör: ‘Kopwe rongorong än ewe SAMOL kapas. Iei meet ewe SAMOL KOT a apasa: Ngang üpwe keni ngenuk ekkei. Ewe ekkei epwe kenaló óm kewe irä meinisin, ekkewe irä mi manaw me ekkewe irä mi pwas. Ngetengeten ewe ekkei resap kunuló. Unusen ewe fönü, seni öör tori efeng epwe karaló ren ewe ekkei. 48Iwe, iteiten emön me emön epwe küna pwe ngang ewe SAMOL üwa öküüw ewe ekkei; ewe ekkei esap kunuló.’ ”

49“Mwirin, ngang üwa apasa, “Ah, SAMOL KOT! Ekkewe aramas ra apasa usi, ‘Ifa usun, ätei esap chök aporausa ngeni kich ekkóch porausen äwewe?’ ”

Babylon iei nöün Kot ketilasen köpwüng

21Mwirin, ei poraus seni ewe SAMOL a pwal toriei. A apasa: 2“Nöün aramas, kopwe äsepa wón mesom ngeni Jerusalem o ääni kapasen köpwüng ngeni ewe leeni mi pin. Kopwe oosuni usun feiengawen ewe fönü Israel, 3o apasa ngeni: ‘Iei meet ewe SAMOL a apasa: Nengeni, ngang üwa üüngenuk. Ngang üpwe üttawu neii ketilas seni lón tükütükün pwe upwe niieló seni lóóm ekkewe chón pwüng me ekkewe chón föfföringaw meinisin. 4Neii ketilas esap nóm lón tükütükün, pün ngang üpwe niieló ekkewe chón pwüng me ekkewe chón föfföringaw, seni öör tori efeng. 5Mwirin, ekkewe aramas meinisin repwe silei pwe ngang ewe SAMOL üwa üttawu neii ketilas seni lón tükütükün, nge üsap eliwinisäfälielong.’

6“Iei minne, nöün aramas, kopwe ngüüngü. Kopwe ngüüngü me fän meseer fän taatakisin letipom me óm letipeta. 7Nge lupwen repwe eisinuk, ‘Pwata ka ngüüngü?’ Iwe, kopwe apasa, ‘Pwokiten a war ew poraus ämäirü. Iwe, iteiten leluuk epwe kisiló ren nuokkus, pwal iteiten paaw epwe chök ititiw. Iteiten letip epwe apwangapwangaló, nge iteiten pwäsuk mi pöchökkül epwe chechcheech o apwangapwang usun chök kólik.’ Iei a war. Epwe fókkun fis, alon ewe SAMOL KOT.”

8“ ‘Iwe, ew poraus seni ewe SAMOL a toriei. A apasa: 9“Nöün aramas, kopwe oosuni o apasa, ‘Iei meet ewe SAMOL a apasa:

“ ‘Efóch ketilas, efóch ketilas a seisei o emmis-

10a seisei fäniten ewe fansoun ninni, a emmis pwe epwe molupolup usun inefi.

“ ‘Ifa usun, sipwe pwapwa ren ewe wókun nemenem wókun neii we mwän Judah? Neii, en ka süü seni ewe wóók ngang üwa aea le öpwüngük; en kosap mochen pwe üpwe öpwüngük ren efóch wóók mwüüch.

11Iei minne, ewe ketilas a kefilitä pwe epwe emmis, pwe emön epwe kömwöch lón pöün; a seisei o emmis, a mollotä pwe epwe nóm lón pöün ewe chón niieló aramas.

12Nöün aramas, kopwe leüommóng le kechiw o ngüüngüres, pün ewe ketilas epwe efeiengawa neii kewe aramas; epwe efeiengawa ekkewe samolun Israel meinisin. Ekkewe samol repwe ninniiló ren ketilas fiti neii kewe aramas. Iei minne, kopwe pisiri fän mwärum.

13“ ‘Sóssót epwe fókkun war. Iwe meet are ewe wókun nemenem wókun Judah ewe ketilas a opwut esap sópwósópwóló le nemenem ? Iei alon ewe SAMOL KOT.’

14“Iei minne, nöün aramas, kopwe oosuni ngeni ekkewe aramas o episipisi pöum. Mwirin, kopwe angei efóch ketilas o ächewechewa fän ruu ika fen fän ülüngät. Iei efóch ketilas fäniten ninni mi lapalaap mi esissilätä ewe ninni wätte epwe tori neii kewe aramas seni pwellin ünükküür.

15Iei popun leluken ekkewe aramas a kisikiisiló ren ar nuokkus, nge chómmóng repwe mäló ren ewe ketilas. Ngang üwa anómwu ketilas lón asamalapen tittin ar kewe telinimw meinisin pwe repwe niireló. Ewer, a molupolup usun chök inefi, a pwal emmis pwe epwe niieló aramas.

16En ketilas, kopwe pöküpök ngeni peliifich, mwirin, kopwe pöküpök ngeni peliimööng, kopwe pöküpök ekis meinisin ia ka kulluló ie.

17Pwal ngang üpwe episipisi peii; iwe, äi lingeringer epwe wesiló, ngang ewe SAMOL üwa kapas.”

18Mwirin, ei poraus seni ewe SAMOL a toriei. A apasa: 19“Nöün aramas, kopwe liossuw liossun rüwofóch aal fäniten ewe ketilas nöün ewe kingen Babylon epwe fätäl wón. Iir me rüwofóch repwe poputä le fätäl seni ew chök fönü. Mwirin, kopwe föri och esissil ia ewe aal a keangfesen me ie. 20Iwe, kopwe liossuw efóch aal fäniten än ewe ketilas epwe feillo wón o efeiengawa Rabba ewe telinimw än chón Ammon. Kopwe pwal liossuw pwal efóch aal fäniten än ewe ketilas epwe feillo o efeiengawa Judah me Jerusalem ewe telinimw mi pöchökkül tittin. 21Pün ewe kingen Babylon epwe köüüló lekeangen ewe aal, ia ekkewe rüwofóch aal ra chufengen me ie, pün epwe pweei ika ia i epwe feilló ie. I epwe föri angangen üttüüt wón nöün kewe föün esefich, epwe angei öüröüran meren nöün kewe uluulun önümwäl o nennengeni ömmünün an mönün asór. 22Iwe, epwe nóm lón pöüiifichin ewe pwee mi weneiti Jerusalem, ia i epwe senätä ie orooren maun, pwe i epwe atoowu an öllük pwe nöün kewe sounfiu repwe poputä le niieló aramas, pwe repwe arükaken maun, pwe repwe anómwu ar kewe pisekin ömökkü tiit mi weneiti ekkewe asamalap, pwe repwe senätä och nittön maun o förätä ar tittin maun. 23Ekkewe aramasen Israel repwe ekieki pwe iei och mettóch mi mwääl, pwokiten iir ra ääni ew pwon fän ökköpöl pwe repwe ölükülük ngeni ewe kingen Babylon. Nge i epwe ächchema ngeniir ar tipis o uweiireló pwe repwe chón ooló.

24“Iei minne, iei meet ewe SAMOL KOT a apasa: Ämi ekkewe aramas öüpwe ooló, pwokiten ämi pwuupwungaw ra pwisin üüngeni kemi pün öüsap sääw ren ämi kewe tipis. Öüsap mwo nge sótuni ämi öüpwe aopaló ämi tipis. Ekis meinisin ia öüwa feilló ie, ese lifilifil meet öüwa föri, ämi föfför meinisin ra uren tipis. Iwe, iei fansoun ämi köpwüng a war.

25“ ‘En ewe samolun Israel mi turunufas me föfföringaw, en ewe ränum a war, óm fansoun köpwüng a tori ömwüchchülón, 26iei meet ewe SAMOL KOT a apasa: Kopwe pwilitaló filifilin mökürom, kopwe pwal pwilitatiw ewe mwärin king. Ewe akkóóten lóóm a siiwil. Iei ekkewe mi tekisón repwe tekiatä, nge ekkewe mi tekia repwe tekisónetiw. 27A taaló! A taaló! Ngang üpwe fókkun ataeló ewe mwüü. Iwe, esap fis säfäl tori epwe war ätewe minne wesewesen pwüngün pwe an ewe mwüü; i ätewe ngang üpwe atolonga lepöün ewe mwüü.’

28“Iwe, en nöün aramas, kopwe oosuni o apasa, ‘Iei meet ewe SAMOL KOT a apasa usun ekkewe chón Ammon me ar kewe kapasen turunufas:

“ ‘Efóch ketilas, efóch ketilas, a mollotä fäniten an epwe niieló aramas, a seim pwe epwe pöküpök, a molupolup usun inefi!

29Nöümi kewe sourong me soufós chofona ra küna künäeer mi otupwutup o üreni kemi minne a chofona usun ewe ketilas. Iwe, iei ewe ketilas epwe pöküw üwen ekkewe chón föfföringaw repwe ninniiló, räniir a war, ar fansoun köpwüng a tori sópwólón.

30Öüpwe eliwinialong nöümi ketilas lón tükütükür. Ngang üpwe öpwüngü kemi me lón poputän fönüwemi, lón ewe leeni ia öüwa upwutiw ie.

31Ngang üpwe niinätiw äi soong wóómi o ngaserawu äi lingeringeriti kemi; ngang üpwe atolonga kemi lepöün aramas mi efeingaw, aramas mi silelap le kata.

32Iwe, ämi öüpwe wewe ngeni mwüchün ekkei, chaami epwe supwutiw me lón pwisin fönüwemi, nge esap wor emön epwe chüen chechchemeni kemi, pün ngang ewe SAMOL üwa kapas.’ ”

Köpwüngün än chón Jerusalem tipis

22 Iwe, ei poraus seni ewe SAMOL a toriei. A apasa:

2“Nöün aramas, ifa usun, ka mollotä óm kopwe öpwüngü ei telinimw Jerusalem? Ifa usun, ka mollotä óm kopwe öpwüngü ei telinimwen chón niieló aramas? Mwirin, kopwe tuwenewen ngeni ren an kewe föfför mi enniopwut meinisin, 3o apasa: ‘Iei meet ewe SAMOL KOT a apasa: En ewe telinimw mi awarato feiengaw wóóm ren angangen niieló aramas a fis lóómw, ka pwal pwisin elimengawók ren óm föri ekkewe uluulun önümwäl. 4En ka tipis pwokiten ewe chcha en ka össükü o ka limengaw ren ekkewe uluulun önümwäl en ka föri. En ka emwittirato ränin óm taaló, a tori sópwólón ierum. Iei minne, ngang üpwe föri pwe en kopwe och pisekin turunufas meren chón ekkewe mwüü me och minen atakirikir ngeni chón ekkewe fönü meinisin. 5Chókewe mi arap ngenuk me chókewe mi toowaw senuk repwe turunufaseek, en ewe telinimw mi itengaw me uren fitikooko.

6“ ‘Kopwe nengeni usun än emön me emön ekkewe samolun Israel mi nóm lóómw ra aea ar nemenem le niieló aramas. 7Ekkewe aramas mi nóm lóómw resap meniniti semeer me ineer. Ekkewe aramas ra eriäfföwü ekkewe chón ekis o kirikiringaw ngeni ekkewe mi mäsen me ekkewe fefin mi mä pwülüweer mi nóm lóómw. 8Iir ra öücheangawei äi kewe mettóch mi pin o atai pinin äi kewe ränin Sabbat. 9A wor ekkóch aramas mi nóm lóómw ra ettipisi mwäli pwal ekkóch pwe repwe ninniiló. A pwal wor chókana mi nóm lóómw ra mwöngö föten önü me lón ekkewe leenien fel ngeni uluulun önümwäl me wón ekkewe chuuk o föri föfförün mocheisou. 10A pwal wor chókana mi nóm lóómw resap suuföliti kien semeer ren ar kóón ren pwülüweer. A pwal wor chókana mi nóm lóómw ra achomanawei fefin ótun ar samwawun maram lupwen ra nóm lón tettelin chón limengaw. 11A pwal wor ekkana mwän mi nóm lóómw ra föri föfför mi enniopwut ren ar lisowu ngeni pwülüwen chón óruur, a wor pwal ekkóch mwän ra föri föfför mi ässääw ren ar turunufasei pwülüwen nöüür mwän, ekkóch ra achomanawei fefineer ika nöün semeer me wón emön. 12A pwal wor aramas mi nóm lóómw ra etiwa liffangen emichimich pwe repwe össükü chcha; pwal iir ra angei willeer seni chón óruur fän pwüngingaw ren ar eriäni seniir nöüür mooni. Iwe, ämi öüwa möllükieiló, iei alon ewe SAMOL KOT.

13“ ‘Ngang üpwe fókkun episipis lon äi soong ngeni kemi, pwokiten ämi öüwa angei willemi fän pwüngingaw pwal pwokiten ewe chcha ämi öüwa össükü me leiimi. 14Ifa usun, epwe ifa üküükün pöchökkülemi me pworami lón ewe rän ngang üpwe öpwüngü kemi? Ngang ewe SAMOL üwa kapas. Iwe, ngang üpwe föri meet üwa apasa. 15Ngang üpwe atoropasa kemi leiin chón ekkewe mwüü o atoropasafeili kemi leemelen ekkewe fönü. Iwe, ngang üpwe limeti seni kemi ämi kewe limengaw. 16Mwirin, öüpwe silei pwe ngang ewe SAMOL, lupwen öüpwe küna itengaw meren chón ekkewe mwüü.’ ”

17Mwirin, ei poraus seni ewe SAMOL a toriei. A apasa: 18“Nöün aramas, ekkewe chón Israel ra lamwotongaw mereei usun sooson mächä mi ketel. Iir meinisin ra usun chök piraas, tiin, mächä me piloom mi ketel lón ew leenien ketel mächä. Iir ra wewe ngeni sooson silifer mi ketel. 19Iei minne, iei meet ewe SAMOL KOT a apasa: ‘Pwokiten ämi öüwa usun chök sooson mächä mi ketel, ngang üpwe ochufengeni kemi lón Jerusalem. 20Usun aramas ra ochufengeni silifer, piraas, mächä, piloom me tiin lón ew leenien ketel pwe repwe eteliir ren ekkei mi ngetenget, iei usun ngang üpwe ochufengeni kemi lón äi soong me äi lingeringer o atolonga kemi lón ewe telinimw pwe üpwe eteli kemi. 21Ngang üpwe ochufengeni kemi o üpwe usi ngeni kemi ngetengeten äi lingeringer. Iwe, ämi öüpwe tel me lón Jerusalem. 22Usun silifer a tel me lón ew leenien ketel, iei usun ämi öüpwe tel me lón Jerusalem. Iwe, öüpwe silei pwe ngang ewe SAMOL üwa niinätiw äi lingeringer wóómi.’ ”

23Mwirin, ew poraus seni ewe SAMOL a pwal toriei. A apasa: 24“Nöün aramas, kopwe apasa ngeni ewe fönü Israel: ‘En kopwe wiliti ew fönü mi limengaw me ew fönü esap püngütiw üüt wón lón ewe ränin äi lingeringer.’ 25Pün ekkewe samol mi nóm lóóm ra föri föfförün rawangaw, ra wörüwör usun emön laion lupwen a turufi liapan. Iir ra ocheei ekkewe aramas ren ar angei seniir wöwüür me pisekiir mi öüchea o föri pwe epwe chómmóngóló fefin mi mä pwülüweer me lón ewe fönü. 26Noum kewe souasór ra pwuurätiw äi kewe öllük o atai pinin äi kewe mettóch mi pin. Iir resap älefiila lefiilen ekkewe mettóch mi pin me ekkewe mettóch resap pin. Iir ra ääni afalafal pwe esap wor sókkofesenin lefiilen ekkewe mettóch mi limengaw me ekkwe mettóch mi limöch. Iwe, ra ömöüraló meseer pwe resap öpwönüwetä pinin äi kewe ränin Sabbat. Iei popun ngang üwa itengaw me leiir. 27Noum kewe nöüwiis mi nóm lóómw ra usun chök wolif mi ocheei liäpeer. Iir ra össükü chcha o niieló aramas pwe repwe angei willeer o pisekisekiló. 28Noum kewe soufós chofona ra eitaöchüw ar kewe föfför, usun chök nge ra penitipwechi och mettóch mi limengaw. Iir ra aporausa künäeer kewe mi otupwutup o ääni kapasen oosuni mi chofona. Iir ra apasa, ‘Iei meet ewe SAMOL KOT a apasa,’ nge i ewe SAMOL esap kapas ngeniir. 29Ekkewe aramasen ewe fönü ra föri föfförün eräni seni ekkóch pisekiir o föri föfförün soolä. Iir ra pwal eriäfföwü ekkewe mi wöwingaw me ekkewe mi osupwang o kirikiringaw ngeni ekkewe chón ekis fän pwüngingaw.

30“Iwe, ngang üwa kütta emön mwän me leiir epwe tongeni senätä ewe tiit o üütä mwei lón ewe pwaang fänäsengesin ewe fönü, pwe ngang üsap ataeló, nge ngang üsap küna emön. 31Iei popun ngang üpwe niinätiw äi soong wóór o arosereló ren ngetengeten äi lingeringer. Üpwe ukun ngeniir liwinin meinisin minne iir ra föri, iei aloi ngang ewe SAMOL KOT.”

Rüwömön pwiipwi fiin lisowu

23 Iei ewe poraus seni ewe SAMOL mi toriei. A apasa: 2“Nöün aramas, mi wor rüwömön fefin, nöün emön chök inelap. 3Iir ra wiliti fiin lisowu me lón Egypt o föri föfförün lisowu seni chök lupwen ar ra föpwül. Me lón ena fönü, ra mwüüt ngeni mwän pwe repwe attapa oupwuur o urumwotiiti leengawer. 4Iten ewe wätte Oholah, nge iten pwiin we kükkün Oholibah. Ngang üwa pwülüweniir; iwe, ra nöünöü mwän me fefin me wóói. Oholah i Samaria, nge Oholibah i Jerusalem.

5“Oholah a föri föfförün lisowu lupwen i a pwüpwülü ngeniei. I a einimwei ngeni nöün kewe kämmwet, ekkewe chón Assyria, 6iir ekkewe sounfiu mi üföüf üüf mi arawaraaw, iir ekkewe kepina me ekkewe meilapen sounfiu. Iir meinisin ölüwöl mi äteöch me chón waawa óris. 7Iwe, Oholah a amöömö inisin usun emön fiin lisowu ngeni ekkewe re Assyria meinisin mi fókkun äteöch o a pwisin elimengawa ren ekkewe uluulun önümwäl än iteiten emön me emön i a mocheniä ngeni. 8I esap likitaló an föfförün lisowu i a poputäni me lón Egypt lupwen a chüen emön föpwül. Iei ótun mwän ra kóón ren, ra attapa oupwun mi tipwük o ömwüchchü wón ar angangen mocheniä.

9“Iei minne, ngang üwa atolonga i lepöün nöün kewe kämmwet, ekkewe chón Assyria, iir chókewe i a mocheniä ngeniir. 10Iwe, iir ra äselelói neminnewe o niieló. Mwirin, ra angealó nöün kewe mwän me fefin pwe repwe nöüniir amanaw. Iwe, fefin ra leaweni neminnewe lón ar fós, lupwen ra küna an köpwüng.

11“Iwe, Oholibah a küna meet a fis ngeni Oholah pwiin we, nge i a fen koon föfföringaw lap seni pwiin we lón an mocheniä me föfförün lisowu. 12Pwal neminnei a mocheniä ngeni ekkewe chón Assyria - ekkewe kepina me ekkewe meilapen sounfiu, ekkewe sounfiu mi üföüf üüf mi mwirinnö, pwal ekkewe chón waawa óris, iir meinisin ölüwöl mi äteöch. 13Iwe, ngang üwa küna pwe pwal neminnewe a pwisin elimengawa. Iir me rüwömön ra feilló lón ew chök aal.

14“Nge Oholibah a koon esselükaló an föfförün lisowu. I a einimwei ngeni ekkewe liossun mwän mi chüngaatä wón ekkewe tiit, liossun ekkewe meilapen sounfiun Kaldea mi üföüf üüf mi par, 15fän ar peelit mi mwirinnö wón wäänüküür me imweer akkaw mi filifil ngeni möküreer, iir meinisin ra usun chök meilapen sounfiun Babylon mi waawa wóóken, iir chón wilipósun Kaldea. 16Lón chök ótun än neminnewe a küna ekkewe lioos, i a mocheniä ngeniir o tiinaló ekkóch chón künö reer lón Kaldea. 17Mwirin, ekkewe chón Babylon ra feitto ren neminnewe wón kian we kiekien einimwei o ra elimengawa neminnewe lón ar mocheniä. Iwe, mwirin än neminnewe a limengaw reer, i a kul seniir o opwut iir. 18Iwe, lupwen neminnewe a sópweló an föfförün lisowu lepwääpwäló o pwääraló an seleló, ngang üwa kul seni o opwut i, usun chök äi kul seni pwiin we. 19Nge neminnewe a fen alapaló an föfförün lisowu, pün i a chechchemeni leföpwülün, lupwen i a amöömö inisin me lón Egypt. 20Me ikenan, neminnewe a mocheniä ngeni nöün kewe kämmwet, kifetin inisiir a usun chök kifetin inisin ätemwänin dongki, nge ewe chaan mwän reer a usun chök chaan ätemwänin óris. 21Iei minne, en Oholibah ka pwositi óm föfförün lisowu en ka föri leföpwülum we, lupwen ekkewe re Egypt ra attapa lengawom o fiefiei oupwum.

22“Iei minne, Oholibah, iei meet ewe SAMOL KOT a apasa: Nengeni, ngang üpwe etipetipätä noum kewe kämmwet pwe repwe üüngenuk, chókewe en ka kul seniir o opwut iir. Iwe, ngang üpwe emmweniireto seni ekis meinisin pwe repwe maun ngenuk, 23ikkeiir ekkewe chón Babylon me chón Kaldea meinisin, ekkewe chón Pekod me chón Koa. Iwe, ekkewe chón Assyria meinisin repwe fitiir le feitto, ikkeiir ekkewe kepina ölüwöl mi äteöch me ekkewe meilapen sounfiu, ekkewe meilapen chón waawa wóóken me ekkewe aramas tekia, iir meinisin ra waawa óris. 24Iir repwe feitto maun ngenuk fän ar pisekin maun, fän war wóókenin maun me wóóken fiti ew mwiichen aramas mi chómmóng. Iir repwe en me nóm lón leenian o pwellieló leepekum meinisin pwe repwe maun ngenuk fän ar pisekin eppetin feiengaw lón maun mi wätte me kükkün, pwal fän imweer akkawen maun. Iwe, ngang üpwe atolongók lepöüür pwe repwe öpwünguk. Iwe, iir repwe öpwünguk wón öküükün minne ra mochen föri ngenuk. 25Iwe, ngang üpwe äwena ngenuk äi soongen luukommóng, nge iir repwe öpwünguk lón ar lingeringer. Iir repwe pöküüweló pwöötum me selingom, nge chókana mi chüen manaw me leiimi repwe mäló ren ketilas. Iir repwe angei senuk noum kewe mwän me fefin, nge chókewe mi chüen manaw me leiir repwe keekiló ren ekkei. 26Iir repwe pwal kamweei senuk üfom o angei senuk foutom kewe mi ling. 27Iei usun äi üpwe öükätiw óm mocheisou me óm angangen lisowu en ka popuetä me lón Egypt. Iwe, kosap chüen nennen mocheniä ngeni ekkeei mettóch ika chemenisäfäli Egypt.

28“Pün iei meet ngang ewe SAMOL KOT üwa apasa: Ngang üpwe le atolongók lepöün chókewe en ka opwut, lepöün chókewe en ka kul seniir o opwut iir. 29Iwe, iir repwe öpwünguk lón ar soong o angei senuk ekkewe mettóch meinisin en ka angang fäniteer. Iir repwe likitukoló lón óm seleló me öchchökün, nge ässäwin óm angangen lisowu epwe pwääpwäló. Òm mocheisou me óm angangen lisowu, 30ra atooto wóóm ei feiengaw, pwokiten ka mocheniä ngeni chón ekkewe mwüü o pwisin elimengawók ren ar kewe uluulun önümwäl. 31En ka chök pwal pwereló lón alen pwiimw we, iei popun ngang üpwe uwalong an we kap lón pöum.

32“Iei meet ngang ewe SAMOL KOT üwa apasa:

“En kopwe ünümi masowen än pwiimw we kap, ew kap mi wätte o ólóllóól. Epwe awarato än chón fönüfan meinisin repwe takiriik o turunufaseek pwokiten óm feiengaw a fókkun wätte.

33En kopwe taroporop usun emön mi uren sakaw ren óm lólilen me riäfföü. Iei ewe kapen nuokkus wätte me taatakis, iei ewe kap än pwiimw we Samaria.

34En kopwe ünümi masowen ei kap o apööló. Mwirin, kopwe ömökkükisi ewe kap o ekinasa oupwum kewe ren mökkün.

Ngang ewe SAMOL KOT üwa kapas.

35“Iei minne, iei meet ngang ewe SAMOL KOT üwa apasa: Pwokiten en ka möllükieiló o pöütieiló lükün sökürum, iei minne en kopwe mwärelong fän eselipäen óm mocheisou me óm ääni amöömö inisum fäniten lisowu.”

36Iwe, ewe SAMOL a apasa ngeniei: “Nöün aramas, ifa usun, kopwe öpwüngü Oholah me Oholibah? Mwirin, kopwe tuwenewen ngeniir ren ar kewe föfför mi enniopwut, 37pün iir ra föri angangen lisowu, nge a wor chcha wón pöüür. Iir ra föri angangen lisowu ren ar fel ngeni ar kewe uluulun önümwäl, nge ra össükü chcha ren ar keni nöüür kewe ra nöüniir me wóói pwe ar asór wón ar kewe róngen asór. 38Iwe, mwirin ar föri ekkeei föfför mi enniopwut, ra pwal föri ei ngeniei: Iir ra elimengawa imwei we mi pin o atai pinin äi kewe ränin Sabbat. 39Lón ewe chök rän iir ra ääni asór nöüür kewe ngeni ar kewe uluulun önümwäl, ra pwal tolong lón imwei we mi pin o atai pinin. Iei meet iir ra föri lón imwei we.

40“Ekkewe rüwömön pwiipwi ra pwal mwo nge tiinaló ekkóch chón künö pwe repwe köörato mwän pwe repwe feitto seni leeni mi toowaw. Iwe, lupwen ekkewe mwän ra feitto, ekkewe rüwömön fefin ra tüütü o teikei öppölün meseer, ra pwal pacheetä fouteer mi ling. 41Iwe, ra móót ren ekkewe mwän wón ew soofa mi foutout o anómwu ew cheepel mwen ewe soofa. Iir ra pwal isenätä wón ewe cheepel äi we appach mi pwokkus me äi we lómmis.

42“A wor och ökürangen ew mwiichen aramas resap ekieki usun och mi pwellieló neminewe; iir ekkewe chón ünüsakaw mi feitto seni ewe fönüapö fiti ekkewe mwän seni ekkewe chón efisätä fitikooko. Iwe, ra isenätä läälä wón kumwuchun ewe fefin me pwiin we o ämwärämwärätä wón möküreer mwärämwär mi ling. 43Mwirin, ngang üwa apasa usun ewe emön mi mölüülü ren an föfförün lisowu: ‘Likitaló pwe repwe turunufasei usun emön fiin lisowu, pün ina usun meet nónnómwun.’ 44Iwe, ina usun meet ekkewe mwän ra föri. Iir ra tolong o kóón ren neminewe. Usun än mwän ra kóón ren emön fiin lisowu, ina usun ar ra kóón ekkewe fefin mi mocheisou, Oholah me Oholibah. 45Nge ekkewe souköpwüng mi pwüng repwe atoowu pwüngün ar köpwüng o ngeniir chappen tipisin fefin mi föri angangen lisowu me össükü chcha, pwokiten iir ra wesewesen fiin lisowu, nge pöüür a limengaw ren chcha.”

46“Iei meet ewe SAMOL KOT a apasa: “Öüpwe emwiichafengeni ew mwiichen aramas mi chómmóng pwe repwe üüngeniir. Iir repwe eniwokkusuur o angei seniir pisekir fän pöchökkül. 47Ewe mwiichen aramas mi chómmóng repwe mónei ngeniir faaw o ataatakisiiretiw ren nöüür kewe ketilas. Iir repwe niieló nöüür kewe mwän me fefin o kenaló imweer kewe.

48“Iei usun äi üpwe öükätiw mocheisou me angangen fel ngeni uluulun önümwäl me lón ewe fönü. Iwe, äi köpwüng epwe och fön ngeni pwal ekkóch pwe resap appirüw ar kewe föfför mi ngaw. 49Iwe, ämi kewe rüwömön pwiipwi öüpwe angei chappen ämi mocheisou o mwärelong fän eselipäen ämi kewe tipisin fel ngeni uluulun önümwäl. Mwirin, öüpwe silei pwe ngang ewe SAMOL KOT.”

Jerusalem a wewe ngeni ew kamaan kuk.

24Iwe, lón ewe ettiuen ierin äm ooló, lón ewe äengolun ränin ewe äengolun maram, än ewe SAMOL kapas a toriei. A apasa: 2“Nöün aramas, kopwe makkeetiw ei fansoun, wesewesen ei rän, maram me ier, pwokiten ewe kingen Babylon a pwellieló Jerusalem fän pisekin maun lón ei rän. 3Iwe, kopwe aporausa ngeni ekkewe chón üleförea ngeniei ew kapas mwönünnür o apasa ngeniir: ‘Iei meet ewe SAMOL KOT a apasa:

“ ‘Kopwe isenättä ewe kama wón ewe ekkei; kopwe isenättä wón ewe ekkei o alöölölong kólik lón.

4Kopwe amasowalong lón ewe kama ekkewe kinikinin fituk meinisin mi mwirinnö, fituken wón peche me fituken wón afar. Kopwe pwal amasowa ewe kama ren chüü mi fókkun mwirinnö.

5Kopwe chök angei fituken ekkewe maan mi mwirinnö me leiin ekkewe pwiin maan. Mwirin, kopwe soonalong mwüüch fän ewe kama. Lupwen ewe kólik a pwur, kopwe kukuw fengeni ekkewe chüü fiti ewe fituk.”

6“ ‘Pün iei meet ewe SAMOL KOT a apasa:

“ ‘Feiengawen ewe telinimwen össükü chcha. Iei ewe telinimw a wewe ngeni ew kama mi pwöröörö lón ren limengaw, nge ewe pwöröörö esap chüen chü! Iei popun kopwe chüürawu me lón ewe kama ew me ew ekkewe kinikinin fituk, nge kosap lifilifil lón menni tettel repwe toowu.

7“ ‘Pün ewe angangen össükü chcha a fis me lón ewe telinimw a pwä ngeni meinisin. Chón ewe telinimw ra akkachofäsä le niieló aramas o likitaló chaar wón ekkewe achaw pwe aramas repwe küna. Ii resap niinätiw ewe chcha wón pwül pwe ewe pwül mworomwor epwe pwölüweló.

8Iei minne, ngang üpwe aparasa chaan chón ewe telinimw o likitaló ewe chcha wón ew achaw pwe esap pwölüló. Ngang üpwe föri ei pwe esissilen äi üpwe pwääraló äi soong me äi ngeniir chappen ar föfför.”

9“ ‘Iei minne, iei meet ewe SAMOL KOT a apasa:

‘Feiengawen ewe telinimwen össükü chcha! Pwisin ngang üpwe ochukuchukätä ekkewe mwüchün ekkei fan.

10Kopwe eneen le soonalong ekkewe mwüüch fan o öküüw ewe ekkei pwe ewe kama epwe pwur. Kopwe kukuw ewe fituk pwe epwe mwootöch, kopwe nofitielong ekkewe nofitin mwöngö; mwirin, kopwe apööwu masowen ewe kama, nge kopwe chök likitaló ekkewe chüü pwe repwe kar.

11Mwirin, kopwe isenätä ewe kama mi pöön wón ekkewe mwolien ekkei tori epwe pwichikkar nge ewe piraas epwe saraara pwe limengawan epwe teliló, nge ewe pwöröörön epwe karaló.

12Nge a soolap mwääl äi achoocho, pün ewe pwöröörön limengaw mi maalüül esap tongeni chü, esap mwo nge chü ren ekkei.

13“ ‘Òm mocheisou me óm fel ngeni uluulun önümwäl iei ewe limengaw. Pwokiten ngang üa sótuni äi üpwe limetuk, nge en kosap mochen kopwe limöchchüló seni óm limengaw, iei minne kosap limelimsäfäl tori epwe wes äi soong ngenuk.

14“ ‘Ngang ewe SAMOL üwa kapas. A war ewe fansoun fäniten äi üpwe öpwönüwetä äi föfför. Ngang üsap piiteló, ngang üsap ääni tong, ngang üsap siwili äi ekiek. Ngang üpwe öpwünguk wón üküükün nónnómwun manawom me óm kewe föfför, aloi ngang ewe SAMOL KOT.’ ”

Pwülüwen Ezekiel we a mäló

15Mwirin, ei poraus seni ewe SAMOL a toriei. A apasa: 16“Nöün aramas, nengeni, ngang üpwe angei senuk pwülüwom we mesom a fókkun pwapwaiti. I epwe mwittir mäló. Nge en kosap letipeta ika kechiw ika össürätiw chönün mesom. 17Kopwe chök leüökükkün le ngüüngü, nge kosap pwääri óm letipeta fäniten ewe mi mäló. Kopwe filiti mökürom o ipweip sandal. Kosap pwölüweló ölüsom ika mwöngö ekkewe mwöngö fäniten chón letipeta.”

18Iei popun ngang üwa kapas ngeni ekkewe aramas lesossor, nge lekkuniól pwülüwei we a mäló. Lesossorun ewe rän mwirin, ngang üwa föri usun minne Kot a öllük ngeniei.

19Mwirin, ekkewe aramas ra eisiniei, “Kose mochen kopwe üreni keem ika meet wewen ekkeei mettóch ngeni keem?”

20Iei popun ngang üwa apasa ngeniir, “Ew poraus seni ewe SAMOL a toriei. A apasa: 21Kopwe apasa ngeni ekkewe chón Israel, ‘Iei meet ewe SAMOL KOT a apasa: Ngang üpwe atai pinin äi we leeni mi pin, ewe leeni mi pöchökkül ämi öüwa öüchcheani o sikäsini, mesemi ra pwapwaiti, iei och mettóch ämi öüwa efich. Nöümi kewe mwän me fefin öüwa likitiiretiw lón ewe fönü Israel repwe mäló ren ketilas. 22Iwe, ämi öüpwe föri usun minne Ezekiel a föri. Öüsap pwölüweló ölüsemi, öüsap pwal mwöngö ekkewe mwöngö fäniten chón letipeta. 23Öüpwe chök anómwu wón möküremi filifilin möküremi o ipweip ipwemi sandal wón pachapachemi. Öüsap letipeta ika kechiw, nge öüpwe chök apwangapwangaló, pwokiten ämi kewe tipis. Öüpwe pwal leüökükkün le ngüüngü lefiilemi fäniten ämi kewe föfför mi ngaw ämi öüwa föriir. 24Ezekiel a chök och leenien öppirü ngeni kemi, pün ämi öüpwe föri usun chök minne i a föri. Iwe, lupwen epwe fis ei, ämi öüpwe silei pwe ngang ewe SAMOL KOT.”

25“Iwe, en nöün aramas, lón ewe rän ngang üpwe angei seniir ar we leeni mi pöchökkül, ar pwapwa me ar ling, minne meseer ra pwapwaiti, minne letiper a tipeni, pwal nöüür kewe mwän me fefin - 26lón ena rän, emön chón sü seni ewe feiengaw lón Jerusalem epwe feitto reemw lón Babylon o aporausa ngenuk meet a fis. 27Lón ena fansoun, awom epwe suukuló pwe kopwe tongeni kapas; en kopwe kapas ngeni ätewe, nge kosap chüen fanafanaló. Iei usun, en Ezekiel kopwe ew esissil ngeni ekkewe aramas, mwirin, iir repwe silei pwe ngang ewe SAMOL.”

Ew kapasen oosuni usun feiengawen Ammon

25Mwirin, ei poraus seni ewe SAMOL a toriei. A apasa: 2“Nöün aramas kopwe äsepa mesom ngeni ekkewe chón Ammon o ääni kapasen oosuni ngeniir usun ar repwe feiengaw. 3Kopwe apasa ngeniir, ‘Öüpwe rongorong än ewe SAMOL KOT kapas. Iei meet ewe SAMOL KOT a apasa: Pwokiten ämi öüwa apasa “Aha!” ngeni äi we leeni mi pin lupwen aramas ra atai pinin, pwal pwokiten öüwa takiri ewe fönü Israel lupwen a taaló o takiri ekkewe chón Judah lupwen ra ooló, 4iei minne, ngang üpwe mwüüt ngeni ekkewe aramasen Öötiw pwe repwe nemeni kemi. Iir repwe öüüwetä ar kewe leenien asóósó o öüüwetä imweer kewe imw mangaku leiimi. Iir repwe ocheei uwään ämi irä o ünümi ünümemi milik. 5Ngang üpwe föri pwe Rabba epwe wiliti ew leenien mwöngö fetil fäniten kamel, üpwe pwal föri pwe Ammon epwe wiliti ew leenien asöösö fäniten siip. Mwirin. ämi öüpwe silei pwe ngang ewe SAMOL. 6Pün iei meet ngang ewe SAMOL KOT üwa apasa: Pwokiten ämi öüwa alopwolopw o pwuupwures lón ämi pwapwa fiti unusen ekingawen lelukemi ngeni ewe fönü Israel, 7iei minne, ngang üpwe eitiewu peii pwe üpwe efeiengawa kemi o mwüüt ngeni chón ekkewe mwüü pwe repwe angei pisekimi fän pöchökkül. Ngang üpwe amóóikemiiwu seni leiin ekkewe mwüü o arosakemiiló seni lón ekkewe fönü. Ngang üpwe efeiengawa kemi, mwirin, öüpwe silei pwe ngang ewe SAMOL.’ ”

Ew kapasen oosuni usun feiengawen Moab

8“Iei meet ewe SAMOL KOT a apasa: ‘Pwokiten chón Moab me Seir ra apasa, “Nengeni, ekkewe chón Judah ra feiengaw usun chök chón ekkewe pwal ekkóch mwüü,” 9iei minne, ngang üpwe särifaló leepekin Moab, poputä seni ekkewe telinimw mi nóm wón kiänin meinisin - Beth Jeshimoth, Baal Meon me Kiriathaim - ikkeei ekkewe telinimw mi ling. 10Ngang üpwe mwüüt ngeni ekkewe aramasen Öötiw pwe repwe nemeni fönüwen chón Moab me chon Ammon, pwe esap wor emön epwe chüen chechchemeni ekkewe chón Ammon me leiin chón ekkewe mwüü; 11iwe, ngang üpwe atooto köpwüng wón Moab. Mwirin, iir repwe silei pwe ngang ewe SAMOL.’ ”

Ew kapasen oosuni usun feiengawen Edom

12“Iei meet ewe SAMOL KOT a apasa: ‘Pwokiten chón Edom ra älemööw än chón Judah föfför o ra tipis ren ar föri iei usun, 13iei minne, iei meet ngang ewe SAMOL KOT üwa apasa: Ngang üpwe eitiewu peii pwe üpwe efeiengawa Edom o niieló aramasen lón me nöüür kewe maan. Ngang üpwe pwal föri pwe ewe fönü epwe wiliti ew fönüapö. Iwe, ekkewe chón Edom repwe mäló ren ketilas, seni Teman tori Dedan. 14Ngang üpwe ukun ngeni chón Edom chappen ar föfför ren äi üpwe nöünöü pöün ekkewe chón Israel. Iwe, chón Israel repwe öpwüngü chón Edom wón öüküükün äi soong me äi lingeringer; iir repwe silei pwe ngang üwa ukun ngeniir chappen ar föfför, ngang ewe SAMOL KOT üwa kapas.’ ”

Ew kapasen oosuni usun feiengawen Filistia

15“Iei meet ewe SAMOL KOT a apasa: ‘Pwokiten chón Filistia ra älemööw än chón Judah föfför o ukun ngeniir chappen ar föfför fän ekingawen lelukeer, ra pwal kütta ar repwe ataeló Judah fäniten ra koum ngeniir seni chök lóóm lóóm, 16iei minne, iei meet ngang ewe SAMOL KOT üwa apasa: Ngang üpwe eitiewu peii pwe üpwe efeiengawa ekkewe chón Filistia. Iwe, ngang üpwe ääraló ekkewe chón Kereth o arosaló chókana mi chüen manaw me lón ekkewe fönü mi nóm arosset. 17Ngang üpwe fókkun ukun ngeni ekkewe chón Filistia chappen ar föfför pwe üpwe öpwüngüür fäniten meet ra föri. Mwirin, iir repwe silei pwe ngang ewe SAMOL.”

Ew kapasen oosuni usun feiengawen Tayer

26Iwe, lón ewe engol me ewin maramen ewe engol me ruuen ierin äm ooló, lón ewe äewin ränin ewe maram, ei poraus seni ewe SAMOL a toriei. A apasa: 2“Nöün aramas, pwokiten än Tayer a takiri än Jerusalem taaló o apasa, ‘Aha! Ewe tiit mi suuk ngeni chón ekkewe mwüü a taaló, nge asaman kewe ra chök suukuló ngeniei; iwe, pwokiten ewe telinimw a taaló, ngang üpwe le pisekisekiló,’ 3iei minne, iei meet ngang ewe SAMOL KOT üwa apasa: Ngang üpwe efeiengawók en Tayer. Ngang üpwe emmwenato chómmóng mwüü pwe repwe maun ngenuk, repwe usun ekkewe nóónón lemataw ra turutä wón arossetum. 4Iir repwe ataeló ekkewe tittin Tayer o ataetiw an kewe imw tekia; ngang üpwe kümetaló pwülün wón o föri pwe epwe wiliti ew achaw mi chök pwääpwätä. 5Iwe, Tayer ewe leeni mi soosowu lemataw epwe wiliti ew leenien appwas cheew, pün ngang ewe SAMOL KOT üwa kapas. Chómmóng mwüü repwe liäpenaló pisekin chón Tayer, 6nge ekkewe sóópw mi nóm wón ewe ioolap repwe taaló ren ketilas. Mwirin, iir repwe silei pwe ngang ewe SAMOL.

7Pün iei meet ewe SAMOL KOT a apasa: Ngang üpwe emmwenato Nebukadnezzar ewe kingen Babylon i ewe king mi lap seni king meinisin pwe epwe feitto seni efeng o maun ngeni Tayer fän óris me wóóken, fän sounfiu mi waawa óris me ew mwiichen sounfiu mi chómmóng. 8Iwe, Nebukadnezzar epwe niieló ren ketilas chón óm kewe telinimw mi nóm wón ewe ioolap. I epwe öüüwetä pisekin eppet ünükkum, epwe senätä ew orooren maun ünükkun tittum kewe o öüütäi an kewe eppetin feiengaw lón maun. 9Epwe pwal äwena an kewe pisekin ömökkü tiit pwe epwe opposuur ngeni tittum kewe o ataeló óm kewe imw mi tekia ren an pisekin maun. 10Nöün kewe óris repwe fókkun chómmóng, iei popun repwe pwölukeló ren süüsün pwül lupwen ra sä. Tittum kewe repwe chechchech ren ökürangen ekkewe órisin maun, pwal ren ökürangen wóóken me wóókenin maun, lupwen repwe tolong lón asamalapen tittum kewe, usun chök än aramas ra tolong lón ew telinimw mi taaló tittin lón maun. 11Pachapachen nöün kewe óris repwe pwuuri óm kewe aal meinisin. I epwe niieló noum kewe aramas ren ketilas, nge óm kewe üür mi pöchökkül repwe turuló wón pwül. 12Ekkewe chón Babylon repwe liäpenaló wöwum, repwe angei óm pisekin amöömö pwe choon wókuur, repwe ömökkätiw tittum kewe o ataeló imwom kewe mi mwirinnö. Iwe, repwe oturalong lón ewe mataw föum me iräämw me ekkewe mettóch mi ta. 13Iwe, ngang üpwe öükätiw ökürangen óm kewe kööl, nge esap chüen wor emön epwe rongorong tikin nöum kewe pisekin likettik itan harp. 14Ngang üpwe föri pwe en kopwe ew achaw mi chök pwääpwätä, kopwe wiliti ew leeni fäniten appwas cheew. Kosap chüen köüütäsäfäl, pün ngang ewe SAMOL üwa kapas, iei aloi ngang ewe SAMOL KOT.

15Iei meet ewe SAMOL KOT a apasa ngeni Tayer: Ifa usun, ekkewe fönü mi nóm arosset resap chechcheech ren püngün óm turuló, lupwen ekkewe chón kinas ra ngüüngü, nge ninni a fis me lóóm? 16Mwirin, ekkewe samolun ekkewe fönü mi nóm arosset meinisin repwe töötiw seni ar kewe leenien móótun samol, repwe pwal pwilitätiw üfeer o pwilitaló üfer mi chchü. Iwe, repwe móttiw wón pwül o chechcheech, repwe fókkun rüükö ren meet ra küna pwe a fis ngenuk, nge resap fókkun ükütiw le chechcheech. 17Mwirin, repwe chietä echö köölün kechiw fänäsengesum o repwe apasa ngenuk:

“ ‘A ifa me taalóm, en ewe telinimw mi iteföüló, aramasen lemataw ra nóm lóómw! En ka nemenem wón ekkewe mataw, en me aramasen lóómw. En ka awarato nuokkus wón chókewe meinisin mi nónnóm ikenan.

18Nge iei ekkewe fönü mi nóm arosset ra chechcheech lón ewe rän en ka turuló. Ekkewe fönü mi nóm lón ewe mataw ra rüükö lupwen ra küna óm turuló.’

19“Iwe, iei meet ewe SAMOL KOT a apasa: Lupwen ngang üpwe föri pwe en kopwe ew telinimw mi taaló, usun ekkewe telinimw esap chüen wor aramas lóór, pwal lupwen ngang üpwe awarato ekkewe nóónón lemataw pwe repwe nütä wóómw, nge ewe säät mi wätte epwe pwölukoló, 20mwirin, ngang üpwe oturuketiw lón ewe pwaang pwe kopwe nóm ren chókewe ra fen feittiw ikenan lóóm lóóm. Òm we telinimw epwe taatakis o ireló fän pwül, usun chök chókewe lón ewe pwaang mi tolong lón ewe leenien chón mäló. Iwe, kosap chüen liwinsäfäl, esap pwal chüen wor leeniom lón fönüwen ekkewe chón manaw. 21Ngang üpwe emmweni ngenuk sópwólóm mi fókkun ömmösök; iwe, kosap chüen nóm. Aramas repwe küttók, nge resap chüen künasäfäliik, iei aloi ngang ewe SAMOL KOT.”

Echö köölün kechiw fäniten Tayer

27Mwirin, ei poraus seni ewe SAMOL a toriei. A apasa: 2“Nöün aramas, kopwe chietä echö köölün kechiw fänäsengesin Tayer. 3Kopwe apasa ngeni Tayer, ewe telinimw mi nóm ren ewe asamalapen tolong ngeni ewe mataw, ewe leenien chón amöömö pisek ngeni aramasen chómmóng fönü mi nóm arosset, ‘Iei meet ewe SAMOL KOT a apasa:

En Tayer ka apasa, “Ngang ewe telinimw mi unusen ling.”

4En ka alapaló kiänum ngeni ewe mataw; ekkewe chón öuuketä ra föruk pwe kopwe fókkun ling.

5Iir ra föri papom kewe meinisin seni ewe irä itan pain irän wón ewe chuuk Hermon. Iir ra pwal angei efóch irä sedar seni Lebanon pwe repwe föri efóch öüü fänitom.

6Iir ra föri óm kewe fötül seni ekkewe irä ook seni Bashan. Ra pwal föri tekkum seni mwüchün ewe irä saipres irän arossetin Saipros, nge ra enlinga ngeni niin älefan.

7Amaróm me filäikom ra för seni mangaku mi pwechepwech o chchü minen Egypt, nge kiimweimwen wóóm ra pwölüpwöl ngeni mangaku mi arawaraaw me parachól minen arossetin Elishah.

8Ekkewe mwän seni Sidon me Arvad iir noum kewe chón fötül. En Tayer, noum kewe mwän mi reepi, iir ekkewe pölü.

9Ekkewe mwän mi silelap angangen wón paaw seni Kebal ra nóm wóómw pwe iir chón älillis le appacha lefiilen ekkewe paap. Ekkewe sein lemataw meinisin me ekkewe sääló mi nóm wóór ra feitto o il ünükkum pwe repwe föri ar angangen soopai ngenuk.

10Ekkewe mwän seni Persia, Lydia me Put ra sounfiu lón óm mwiichen sounfiu. Iir ra eitiwätä ar kewe pisekin eppetin feiengaw lón maun me imweer akkawen maun wón tittum kewe o awarato ngenuk óm iteüöch.

11Ekkewe mwän seni Arvad me Helek ra üütä wón tittum kewe leepekum meinisin pwe iir chón mas, nge ekkewe mwän seni Kammad ra nóm lón óm kewe imw mi tekia. Iir ra eitiwätä ar kewe pisekin eppetin feiengaw lón maun wón pwellin tittum kewe. Ra föri pwe óm ling epwe unusöch.

12Chón Tarshish ra föri ar angangen bisnis ngenuk, pwokiten a fókkun wätte óm wöwün pisek; iir ra ekkesiwili ar silifer, mächä, tiin me piloom ngeni óm pisek.

13Chón Kriis, Tubal me Meshek ra föri ar bisnis ngenuk; iir ra ekkesiwili ekkewe aramas ra nöüniir amanaw me ar kewe pisek mi för seni piraas ngeni óm kewe pisek.

14Ekkewe mwän seni Beth Tokarma ra mööni óm kewe pisek wón órisin angang, órisin maun me dongki upwun wón óris.

15Ekkewe mwän seni Rhodes ra amöömö ngenuk, pwal chómmóng aramas seni ekkewe fönü mi nóm arosset, iir noum kewe chón kamö ra mööni senuk óm kewe pisek wón niin älefan me irä mi öüchchea.

16Chón Aram ra föri ar angangen bisnis ngenuk, pwokiten chómmóngun óm pisek; iir ra mööni óm kewe pisek wón faaw öüchchea iter emerald, mangaku mi parachól, mangaku mi chchü, mangaku mi pwechepwech o mwirinnö, föüpar me ewe faaw öüchchea itan ruupi.

17Chón Judah me chón Israel ra amöömö ngenuk; iir ra mööni óm kewe pisek wón wiit seni Minnith me föün olif me föün fiik, apüra me lömmis mi pwokkus.

18Chón Damasikos ra föri angangen bisnis ngenuk pwokiten chómmóngun óm kewe pisek me wätten óm wöwün pisek. Iir ra amöömö ngenuk wain seni Helbon me ülen siip seni Zahar, 19me kaasen wain seni Uzal iir ra ekkesiwili ngeni óm kewe pisek; iir ra mööni óm kewe pisek wón mächä fäniten ofout, pwal kasia me kalamus.

20Chón Dedan ra amöömö ngenuk pilangkeet fäniten leenien móótun wón maan.

21Chón Arabia me ekkewe samolun Kedar meinisin iir noum chón kamö; iir ra föri angangen bisnis ngenuk o amöömö ngenuk appanen siip, ätemwänin siip me kuuch.

22Ekkewe chón amöömö me kamö pisek seni Sheba me Raamah ra amöömö ngenuk; iir ra amöömö ngenuk chómmóng sókkun nofitin mwöngö mi mwirinnö, pwal faaw mi öüchchea me kolt fäniten óm kewe pisek.

23Chón Haran, chón Kanne me chón Eden, pwal ekkewe chón amöömö me kamö pisek seni Asshur me Kilmad ra pwal amöömö ngenuk. 24Me lón óm kewe leenien amöömö pisek, iir ra amöömö ngenuk üüf mi ling, mangaku mi arawaraaw me chchü, pwal karpet mi sakkopaat önüwan, mi riiri o önnük ngeni sääl mi ppit.

25Ekkewe siip seni Tarshish ra fis pwe sein uwouwen óm kewe pisek. Tayer, en ka wewe ngeni efóch ekkewe siip sein uweei pisek. En ka nóm lukalapen mataw o ur ren uwosom pisek mi chou.

26Noum kewe chón fötül ra fötülekeló toowaw wón ekkewe mataw. Nge ewe äsäpwäälin öötiw mi pöchökkül epwe ataatakisik me lukalapen mataw.

27Wöwum, óm kewe pisekin amöömö me ekkewe pisek ka mööni, noum kewe sääló, ekkewe pölü me chón eppinasa lefiilen ekkewe paap wóómw, noum kewe chón amöömö me kamö pisek me noum kewe sounfiu meinisin, pwal meinisin mi nóm wón waa repwe kokotiw lukalapen mataw lón ewe rän ka waata.

28Iwe, ekkewe fönü mi nóm arosset repwe cheech, lupwen noum kewe sääló repwe pwuchöör.

29Chókewe meinisin mi kömwöch fötül repwe likitaló waar kewe siip; ekkewe sääló me ekkewe pölü repwe üütä arosset.

30Iir repwe leüommóng o kechiwengaw wóómw. Repwe amworomworätä pwül wón möküreer o asokopeleer lón falangen ekkei.

31Repwe reipööpöló meeten möküreer ren ar letipeta pwokitom o repwe üföüf üüf mi för seni tuuk. Repwe kechiweituk fän riäfföün letipeer pwal fän marasen ar ngüüngüres.

32Iwe, lupwen ra osommóng le kechiw o ngüüngüres wóómw, repwe chietä echö köölün kechiw fänäsengesum o apasa: “Esap wor emön a wewe ngeni Tayer, a taaló me lukalapen mataw.”

33Lupwen ekkewe siip ra uweeló óm kewe pisekin amöömö lemataw, chómmóng mwüü ra menemenöch reemw; en ka pwal episekiseki ekkewe kingen fönüfan ren wöwum mi lapalaap me pisekum mi chómmóng.

34Nge iei en ka efóch waa mi ta, ka taaló epin ewe mataw; óm kewe pisekin amöömö meinisin me nöum kewe aramas ra fituk le kokotiw.

35Chókewe meinisin mi nónnóm lón ekkewe fönü mi nóm arosset ra mäirü ren óm feiengaw; ar kewe king ra chechcheech ren ar rüükö nge wón meseer a wóówóngaw ren ar nuokkus.

36Ekkewe chón amöömö me kamö pisek me leiin chón ekkewe mwüü ra mäirü reemw; pün ka tori sópwólóm mi efeiengaw, iwe kosap chüen nóm.’ ”

Ew kapasen oosuni usun feiengawen ewe kingen Tayer

28Mwirin, ei poraus seni ewe SAMOL a toriei. A apasa: 2“Nöün aramas, kopwe apasa ngeni ewe samolun Tayer, ‘Iei meet ewe SAMOL KOT a apasa:

En ka apasa lón lamalamtekian lelukom, “Ngang emön kot; ngang üwa móót wón ewe leenien móótun emön kot lukalapen mataw.” Nge en emön aramas, sap emön kot, inamwo ika en ka ekieki pwe ka tipächchem usun emön kot.

3Ifa usun, en ka tipächchem seni Daniel? Ifa usun, esap wor och mwónómwón a mwónóló senuk?

4Ren óm tipächchem me silelap, ka achómmóngaló wöw fänitom o ka ionifengeni kolt me silifer lón óm kewe leenien iseis.

5Ren óm wätten silelap le amöömö, ka alapaló wöwum, nge pwokiten chómmóngun wöwum, ka lamalamtekia lón lelukom.

6“ ‘Iei minne, iei meet ngang ewe SAMOL KOT üwa apasa:

“ ‘Pwokiten en ka ekieki pwe ka tipächchem, ka tipächchem usun emön kot,

7ngang üpwe awarato chón ekis pwe repwe efeiengawók, iir ekkewe resap fókkun sile tong seni ekkewe mwüü. Iir repwe üttawu nöüür ketilas o ataeló ekkewe mettóch mi mwirinnö óm tipächchem a awarato ngenuk. Repwe pwal elimengawa lingom.

8Repwe oturukolong lón ewe pwaang, nge en kopwe mäló wón fönüwom mi nóm lukalapen mataw.

9Iwe, ifa usun, kopwe chüen tongeni apasa, “Ngang emön kot,” me fän mesen chókewe mi niikeló? En kopwe chök emön aramas, nge sap emön kot me lón pöün chókewe mi niikeló.

10En kopwe määni mään chókewe resap sirkomsais ren ekkewe chón ekis.

Ngang ewe SAMOL KOT üwa kapas.’ ”

11Mwirin, pwal ew poraus seni ewe SAMOL a toriei. A apasa: 12“Nöün aramas, kopwe chietä echö köölün kechiw fänäsengesin ewe kingen Tayer o kopwe apasa ngeni:

‘Iei meet ewe SAMOL KOT a apasa: “ ‘En emön mi unusöch, en ka uren tipächchem me unusen ling.

13En ka nóm lón Eden, ewe tännipin Kot; en ka foutei ngenuk iteiten ekkewe faaw mi öüchchea iter: ruupi, topaz me emerald, pwal krisolait, oniks me chasper, sapfaer, turkois me beril. Meinisin ra för mwirinnö fänitom o kamasolong lón leenier mi för seni kolt; ra fen mollotä lón ewe rän Kot a föruk.

14En ka kepit pwe kopwe emön kerop chón tümwün, pün iei usun ngang üwa ewiisa ngenuk. A mwüümwütä ngenuk pwe kopwe nóm wón ewe chukun Kot mi pin; en ka fätäl feil leiin ekkewe faaw mi meriweriw.

15En ka unusöch lón óm kewe föfför seni ewe rän Kot a föruk tori ewe rän a pwä föfföringaw me lóómw.

16Ren lapalón óm angangen amöömö, ka uren föfförün mwänesol, iwe, ka tipis. Iei popun ngang üwa tapweekeló seni wón ewe chukun Kot lón óm itengaw o ösüükoló seni leiin ekkewe faaw mi meriweriw, en ewe kerop chón tümwün.

17Lelukom a lamalamtekia pwokiten óm mwänöch, ka elimengawaló óm tipächchem pwokiten óm ling. Iei popun ngang üwa oturuketiw wón fönüfan; ngang üwa pwääraló ngeni ekkewe king óm feiengaw, pwe repwe ännefótók.

18Ren óm kewe tipis mi chómmóng me óm kosap wenechchar le amöömö, en ka turunufasei pinin óm kewe imw mi pin. Iei popun ngang üwa öküüw ew ekkei me lóómw pwe epwe kenukoló, iwe, ngang üwa föri pwe en kopwe wiliti falangen ekkei wón pwül me fän mesen chókewe meinisin mi nennengenuk.

19Chón ekkewe mwüü meinisin mi sileek ra mäirü reemw; pün ka tori sópwólóm mi eniwokkus, iwe, kosap chüen nóm.”

Ew kapasen oosuni usun feiengawen Sidon

20Mwirin, pwal ew poraus seni ewe SAMOL a toriei. A apasa: 21“Nöün aramas, kopwe äsepa mesom ngeni Sidon o oosuni ngeni usun an feiengaw. 22Iwe, kopwe apasa: ‘Iei meet ewe SAMOL KOT a apasa:

“ ‘Nengeni, iei ngang üpwe üüngenuk, en Sidon. Ngang üpwe pwääraló äi ling me lóóm ren meet epwe fis ngenuk. Mwirin, ekkewe aramas repwe silei pwe ngang ewe SAMOL, lupwen ngang üpwe öpwüngü chókewe mi imweimw lóómw o pwääraló me leiir pwe ngang üwa pin.

23Ngang üpwe tiinato ew mätter wóómw o föri pwe chcha epwe pwuupwuló me wón alom kewe. Chókewe mi maun ngenuk repwe feitto seni ekis meinisin, nge noum kewe aramas repwe ninniiló me lón tittum kewe. Mwirin, en kopwe silei pwe ngang ewe SAMOL KOT.

24“ ‘Mwirin, chón ekkewe mwüü ünükkün Israel mi eriäfföwü ekkewe aramasen Israel, resap chüen wewe ngeni iräfölüföl mi ken o emmetek. Mwirin, iir repwe silei pwe ngang ewe SAMOL KOT.

25“ ‘Iei meet ewe SAMOL KOT a apasa: Lupwen ngang üpwe ionato ekkewe aramasen Israel seni ekkewe mwüü ia ra toropasfeil ie, ngang üpwe pwisin pwäärieiló me leiir me fän mesen chón ekkewe mwüü pwe ngang üwa pin. Mwirin, iir repwe nónnóm lón pwisin fönüwer we, ewe fönü ngang üwa ngeni neii we chón angang Jakob. 26Iwe, repwe nónnóm lón ewe fönü fän kinamwe, repwe pwal köüütä imweer o för ar tännipin irän wain. Ngang üpwe öpwüngü chón ekkewe mwüü ünükküür meinisin mi eriäfföüür. Mwirin, iir repwe silei pwe ngang ewe SAMOL ar we Kot.’ ”

Ew kapasen oosun i usun feiengawen Egypt

29Iwe, lón ewe äengolun ierin äm ooló, lón ewe engol me ruuen ränin ewe äengolun maram, ei poraus seni ewe SAMOL a toriei. A apasa: 2“Nöün aramas, kopwe äsepa mesom ngeni Farao ewe kingen Egypt o oosuni usun feiengawan me feiengawen unusen ewe fönü Egypt. 3Kopwe kapas ngeni o apasa: ‘Iei meet ewe SAMOL KOT a apasa:

“ ‘Ngang üwa üüngenuk, en Farao kingen Egypt, en ewe maan mi fókkun wätte ka kóón lón óm chaanpwuupwu. En ka apasa, “Äi ewe chaanüwuuüwu Nail. Ngang üwa pwisin föri fänitei.”

4Nge ngang üpwe akkööw ngächum o föri pwe ikenen lón ewe chaanpwuupwu repwe pachatä wón fichefichen ünüchchom. Iwe, ngang üpwe etekinukowu seni lón ewe chaanpwuupwu, nge ekkewe iik meinisin repwe pachatä wón fichefichen ünüchchom.

5Iwe, ngang üpwe likitukoló lón ewe fönüapö, en me meinisin ikenen lón óm we chaanpwuupwu pwe öüpwe mäló. En kopwe turuló lón ew leeni mi amassawa, nge esap wor emön epwe angeuk ika peiasenuk. Pün ngang üpwe ngeni ekkewe maanmwacho me ekkewe maansüüsün fän läng pwe repwe ocheek.

6Mwirin, chókana meinisin mi nónnóm lón Egypt repwe silei pwe ngang ewe SAMOL.

“ ‘En ka usun chök efóch silifö mi apwangapwang lupwen chón Israel ra kütta ar älillis senuk. 7Lupwen chón Israel ra kömwöch en pwe kopwe üreniiretä, en ka ssät o posuuw fän pöüür. Lupwen ra eitengesitiw wóóm, en ka kup, iwe a ruongaw chüün sökürüür.

8“ ‘Iei minne, iei meet ngang ewe SAMOL KOT üwa apasa: Ngang üpwe awarato efóch ketilas pwe epwe efeiengawók o niieló noum kewe aramas me nöüür kewe maan. 9Ewe fönü Egypt epwe wiliti ew fönü mi pöön. Mwirin, ekkewe chón Egypt repwe silei pwe ngang ewe SAMOL. “ ‘Pwokiten en ka apasa, “Äi ewe chaanpwuupwu Nail.

Ngang üwa föri,” 10iei minne, ngang üpwe efeiengawók, üpwe efeiengawa óm we chaanpwuupwu, üpwe pwal föri pwe ewe fönü Egypt epwe wiliti ew leeni mi taatakis me ew fönüapö seni Mikdol tori Aswan, pwal achööwaló ngeni kiänin Ethiopia. 11Esap wor pecheen emön aramas ika maan epwe pwerelong lón Egypt; esap pwal wor emön epwe nónnóm ikenan lón üküükün fääik ier. 12Ngang üpwe ataeló ewe fönü Egypt pwe epwe ew leeni mi pöön mi nóm leiin pwal ekkóch fönü mi pöön. An kewe telinimw mi nóm leiin pwal ekkewe ekkóch telinimw mi taatakis repwe taatakis o pöönüló lón üküükün fääik ier. Iwe, ngang üpwe ösüüweló ekkewe chón Egypt leiin chón ekkewe mwüü o atoropasafeiliir leemelen ekkewe fönü.

13“ ‘Nge iei meet ewe SAMOL KOT a apasa: Lesópwólón ekkewe fääik ier, ngang üpwe ionifengeni ekkewe chón Egypt seni ekkewe mwüü ia ra toropasfeil ie. 14Ngang üpwe eliwinisäfäliireto seni ar ooló o eliwiniir ngeni Pathros mi nóm öörün Egypt, iei fönüwen ar kewe leewo. Me ikenan, iir repwe mwüüni ew mwüü mi tekisóssón esap wor öüchchean. 15Ewe mwüün Egypt epwe tekisón seni mwüü meinisin, nge esap chüen etekiatäi asen ekkewe pwal ekkóch mwüü. Ngang üpwe föri pwe ewe mwüü epwe apwangapwang pwe esap chüen nemenisäfäli ekkewe mwüü. 16Iwe, Egypt esap chüen ew leenien apilükülük fäniten ekkewe aramasen Israel, nge epwe och minen ächchem fäniten ar tipis ren ar kul ngeni Egypt pwe epwe älisiir. Mwirin, repwe silei pwe ngang ewe SAMOL KOT.’ ”

17Iwe, lón ewe rüwe me fisuen ierin äm ooló, lón ewe äewin ränin ewe äewin maram, ei poraus seni ewe SAMOL a toriei. A apasa: 18“Nöün aramas, nöün Nebukadnezzar ewe kingen Babylon mwiichen sounfiu ra fókkun weires le maun ngeni Tayer. Iei popun a mworoló meeten möküren iteiten ekkewe sounfiu, a pwal kinas afaren iteiten sounfiu. Nge Nebukadnezzar me nöün mwiichen sounfiu resap willeni och pwe liäpeer pwe liwinin ar angang weires le maun ngeni Tayer. 19Iei minne, iei meet ngang ewe SAMOL KOT üwa apasa: Ngang üpwe ngeni Nebukadnezzar ewe kingen Babylon ewe fönü Egypt. Iwe, i epwe uweeló wöwün Egypt. I epwe angei fän pöchökkül pisekin ewe fönü Egypt pwe liwinin nöün mwichen sounfiu. 20Ngang üwa fen ngeni i ewe fönü Egypt pwe ew liiwin fäniten an achoocho, pwokiten i me nöün mwiichen sounfiu ra föri ei angang fänitei, ngang ewe SAMOL KOT üwa kapas.

21“Iwe, lón ena rän, ngang üpwe föri pwe ewe lingen Israel minen lóóm epwe fis säfäl usun efóch mächään maan epwe pwüküwu. Iwe, ngang üpwe suuki awom Ezekiel me leiir o mwüüt ngenuk pwe kopwe kapas ngeniir. Mwirin, iir repwe silei pwe ngang ewe SAMOL.”

Echö köölün kechiw fäniten Egypt

30Iei pwal ew poraus seni ewe SAMOL a toriei. A apasa: 2“Nöün aramas, kopwe ääni kapasen oosuni o apasa: ‘Iei meet ewe SAMOL a apasa:

“ ‘Öüpwe leüommóng le kechiw o apasa, “Ew ränin feiengaw a chök arapakkan an epwe war!”

3Pün ewe rän a arap, ränin ewe SAMOL a arap, ew ränin kuchuuchu, ew fansoun feiengaw fäniten ekkewe mwüü.

4Efóch ketilas epwe war o efeiengawa Egypt, iwe, ekkewe aramasen Ethiopia repwe chechcheech ren ar nuokkus. Lupwen ekkewe sounfiun Babylon repwe niieló chómmóng aramasen Egypt, repwe uweeló wöwün o ataetiw lóngólóngun kewe.

5Ekkewe chón Ethiopia me Put, chón Lydia me chón Arabia meinisin, chón Lybia pwal ekkewe aramasen ewe fönüwen pwon repwe fiti chón Egypt le mäló ren ketilas.

6‘‘‘Iei meet ewe SAMOL a apasa: “ ‘Pelien Egypt kewe meinisin repwe mäló lón maun, nge an lamalamtekia ren an pöchökkül epwe ükütiw. Ekkewe aramas mi nóm lón Egypt repwe mäló lón maun, seni Mikdol tori Aswan, ngang ewe SAMOL KOT üwa kapas.

7“ ‘Egypt epwe chuungeni ekkewe pwal ekkóch fönü mi taaló, an kewe telinimw repwe fitilong leiin ekkewe telinimw mi taaló.

8Mwirin, repwe silei pwe ngang ewe SAMOL, lupwen ngang üpwe kenaló Egypt o arosaló ekkewe chón älisi Egypt meinisin.

9“ ‘Lón ena rän, ngang üpwe tiinaló ekkóch chón künö wón waa, pwe repwe eniwokkusu ekkewe chón Ethiopia mi tunaló pwokiten ar nónnómöch. Iwe, rüükö epwe toriir lón ewe ränin än Egypt feiengaw, pün ei epwe fókkun fis.”

10“ ‘Iei meet ewe SAMOL KOT a apasa: “ ‘Ngang üpwe arosaló ekkewe pwiin aramasen Egypt ren pöün Nebukadnezzar ewe kingen Babylon.

11I me nöün mwiichen sounfiu, iir ekkewe resap fókkun sile tong me leiin aramas meinisin, repwe tolong pwe repwe ataeló ewe fönü. Iir repwe üttawu nöüür ketilas o maun ngeni Egypt. Iwe, unusen ewe fönü epwe ur ren aramas mi ninniiló.

12Iwe, ngang üpwe appwasätä ewe chaanpwuupwu Nail o amöömöló ewe fönü ngeni aramas mi föfföringaw. Ngang üpwe ataeló ewe fönü me meinisin minne a wor lón ren pöün chón ekis.

Ngang ewe SAMOL üwa kapas.”

13“ ‘Iei meet ewe SAMOL KOT a apasa: “ ‘Ngang üpwe ataeló ekkewe uluulun önümwäl lón Egypt o atoowu seni lón Memfis ekkewe uluulun önümwäl. Iwe, esap chüen wor emön samol lón Egypt, nge ngang üpwe emereisfeili nuokkus pün kókkótongawen mwüü me nemenem epwe chööchöló leemelen ewe fönü.

14Ngang üpwe ataeló Pathros o kenaló Zoan, üpwe pwal öpwüngü Thebes.

15Ngang üpwe niinätiw äi lingeringer wón Pelusium, ewe leeni mi fókkun pöchökkül me lón Egypt, üpwe pwal arosaló ewe pwiin aramasen Thebes.

16Ngang üpwe kenaló Egypt; Pelusium epwe pwóreei ren an metek, nge Thebes epwe ripfesen ren ew mölümöl; Memfis epwe chök nóm lón nuokkus wätte iteiten rän.

17Ekkewe ölüwölün Heliopolis me Bubastis repwe mäló ren ketilas lón maun, nge ekkewe fefin repwe ooló.

18Ewe rän epwe rocholó me lón Tahpanhes, lupwen ngang üpwe ataeló än Egypt nemenem o öükätiw an pöchökkül i a eingeing wón. Iwe, Egypt epwe pwölüló ren kuchu, nge chón wiisópwósópwun kewe meinisin repwe ooló.

19Iei usun äi üpwe öpwüngü Egypt, iwe, iir repwe silei pwe ngang ewe SAMOL.’ ”

Pöün Farao a kup

20Iwe, lón engol me äewin ierin äm ooló, lón ewe efisuwen ränin ewe äewin maram, ei poraus seni ewe SAMOL a toriei. A apasa: 21“Nöün aramas, ngang üwa fen kupii pöün Farao ewe kingen Egypt. Esap wor emön a filiti pwe epwe pöchökkülsäfäl ika atolonga lón ew etiet pwe epwe pöchökkül an epwe kofichin kömwöch efóch ketilas. 22Iei minne, iei meet ngang ewe SAMOL KOT üwa apasa: Ngang üwa üüngeni Farao ewe kingen Egypt. Iwe, ngang üpwe kupii pöün me rüwofóch, ewe efóch mi mwirinnö pwal ewe efóch mi kup o föri pwe ewe ketilas epwe turutiw seni lón pöün. 23Iwe, ngang üpwe ösüüweló ekkewe chón Egypt leiin chón ekkewe mwüü o atoropasafeiliir leemelen ekkewe fönü. 24Ngang üpwe öpöchökküla pöün ewe kingen Babylon o isenalong neii we ketilas lón pöün. Nge ngang üpwe kupii pöün Farao, iwe, i epwe ngüüngü me fän mesen ewe kingen Babylon usun emön aramas mi arap ngeni an epwe mäló ren kinasan. 25Ngang üpwe öpöchökküla pöün ewe kingen Babylon, nge pöün Farao repwe chök ititiw. Mwirin, iir repwe silei pwe ngang ewe SAMOL, lupwen ngang üpwe isenalong neii we ketilas lón pöün ewe kingen Babylon, nge i epwe ätteri ngeni ewe fönü Egypt. 26Ngang üpwe ösüüweló ekkewe chón Egypt leiin chón ekkewe mwüü o atoropasafeiliir leemelen ekkewe fönü. Mwirin, repwe silei pwe ngang ewe SAMOL.”

Farao a wewe ngeni efóch Sedar seni Lebanon mi turuló

31Iwe, lón ewe engol me äewin ierin äm ooló, lón ewe äewin ränin ewe öülüngätin maram, ei poraus seni ewe SAMOL a toriei. A apasa: 2“Nöün aramas, kopwe apasa ngeni Farao ewe kingen Egypt pwal ngeni nöün kewe pwiin aramas meinisin:

“En ka fókkun ling me itetekia! Iö a tongeni wewe ngenuk?”

3Nengeni, en ka usun chök Assyria melóóm. Pün Assyria ew mwüü mi pwal iteföüló. Assyria a usun chök efóch irä sedar lón Lebanon. Palan kewe ra fókkun mwuresires o ra pwölüweló ewe wöllap; ülüünan a kükkütä o tekiatä leiin kuchu.

4Ekkewe kólik ra ämäärätä, ekkewe pwuachchen kólik mi alóllóól ra föri pwe ewe irä epwe langattam; pwuupwun ekkewe kólik ra pwuupwufeil ünükkün popun, nge pwuupwun ekkewe öüwö ra pwuupwuló ngeni ekkewe irä meinisin mi nóm lemal.

5Iwe, ewe irä sedar a kükkütä o tekia seni ekkewe irän lemal meinisin mi nóm ünükkün; a wor chómmóng palan, nge palan kewe ra langattam o meresires pwokiten määriir ren somwosomwolón ewe kólik.

6Ekkewe maansüüsün fän läng meinisin ra fas wón palan kewe; ekkewe mönün lemal meinisin ra nöünöü fän nürün palan kewe. Ekkewe mwüün fönüfan meinisin mi iteföüló ra nónnóm fän nürün.

7Ewe irä sedar a fókkun mwirinnö o ling ren palan kewe mi meresiló, pün waaran kana ra feittiw tori kólik mi chómmóng fan.

8Ekkewe irä sedar lón ewe tännipin Kot resap tongeni wewe ngeni. Palen ekkewe irä saipres resap pwal löllö ngeni palan, pwal palen ekkewe irä plein resap wewe ngeni palan. Esap wor efóch irä lón ewe tännipin Kot epwe tongeni löllö ngeni lingan.

9Ngang üwa föri ewe irä sedar pwe epwe ling o chómmóng palan. Ekkewe irän Eden meinisin lón ewe tännipin Kot ra lólówóiti.

10“ ‘Iei minne, iei meet ngang ewe SAMOL KOT üwa apasa: Pwokiten ewe sedar a fókkun tekiatä o etekiatä ülüülan tori leiin kuchu, pwal pwokiten i a lamalamtekia ren tekian, 11iei minne ngang üwa atolonga i lepöün ew mwüü mi pöchökkül pwe a ataeló usun minne mi fich ngeni an kewe föfföringaw. Pwisin ngang üwa pöütaló ewe irä sedar, 12nge chón ekkewe mwüün ekis resap sile tong ra pöküwetiw o likitaló. Palan kewe ra turutiw wón ekkewe chuuk, ra pwal turutiw lón ekkewe leemól. Palan kewe mi kup ra nóm lón pwokuren ewe fönü meinisin. Iwe, chón ekkewe mwüün fönüfan meinisin ra toowu seni fän nürün ewe irä o likitaló. 13Ekkewe maansüüsün fän läng meinisin ra sootiw wón popun ewe irä mi turuló, nge ekkewe mönün lemal meinisin ra nóm leiin palan kewe. 14Iei minne, esap chüen wor pwal ekkóch irä mi nóm órun ekkewe kólik repwe etekiaretä. Resap sótuni pwe ülüür repwe tekiatä tori leiin kuchu. Esap wor pwal efóch irä me leiin ekkewe irä mi pöchökkül mi nóm ünükkün ekkewe kólik epwe sikäsini usun an langattam. Pün iir meinisin repwe chök fätäl ngeni ar repwe mäló. Iir meinisin repwe feittiw lefaren fönüfan, ngeni ewe pwaang leenien soomä. Iir repwe chuungeni ekkewe pwal ekkóch aramas mi mäló o feittiw lón ewe pwaang mi alóllóól.”

15“ ‘Iei meet ewe SAMOL KOT a apasa: Lón ewe rän lupwen Assyria a feittiw lón ewe leenien söötup, ngang üwa pwölüweló ekkewe pwuachchen kólik mi alóllóól ren letipeta fänitan; ngang üwa pwal pineeló ekkewe öüwö, iwe, kólikin mi chómmóng a köüüló. Pwokiten ei, ngang üwa pwölüweló Lebanon ren rochopwaak, nge ekkewe irän lemal meinisin ra pwasaló. 16Ngang üwa föri pwe chón ekkewe mwüü repwe chechcheech ren üngüüngün an turuló, lupwen ngang üwa oturätiw lón ewe leenien sootup pwe epwe chuungeni ekkewe ekkóch ra fen feittiw lón ewe pwaang mi alóllóól. Mwirin, ekkewe irän Eden meinisin, ekkewe irän Lebanon mi fókkun mwirinnö seni meinisin o lingöch seni meinisin, ikkeei ekkewe irä wareer ra pwükütiw lón ekkewe kólik melóóm nge iei ra nóm lefaren fönüfan, repwe ngasatä lupwen repwe küna ewe irä pwe a nóm reer lón ewe pwaang. 17Iwe, chókewe mi nónnóm fän nürün ewe irä, pelian kewe me leiin ekkewe mwüü, ra fen pwal feittiw lón ewe leenien sootup fiti ewe irä o chuungeni chókewe mi ninniiló ren ketilas.

18“ ‘Menni leiin ekkewe irän Eden epwe tongeni löllö ngenuk lón lingom me óm itetekia? Nge pwal en kopwe koturutiw lón ewe pwaang fiti ekkewe pwal ekkóch irän Eden. En kopwe nóm leiin chókewe resap sirkomsais, ren chókewe mi ninniiló ren ketilas.

“ ‘Ewer, epwe iei usun feiengawen Farao me nöün kewe pwiin aramas, iei aloi ngang ewe SAMOL KOT.’ ”

Echö köölün kechiw fäniten Farao

32Lón engol me ruuen ierin äm ooló, lón ewe äewin ränin ewe engol me ruuen maram, ei poraus seni ewe SAMOLa toriei. A apasa: 2“Nöün aramas, kopwe chietä echö köölün kechiw fänäsengesin Farao ewe kingen Egypt o kopwe apasa ngeni:

“ ‘En ka ekieki usum pwe en emön laion mi pöchökkül me leiin ekkewe mwüü, nge i wesewesen en emön alikitor mi nóm lemataw. Ka kitipöppö lón óm kewe chaanpwuupwu o küpetäätä pwakak ren pachapachom, o ka pwal öpönökäätä ekkewe öüwö.

3“ ‘Iwe, iei aloi ngang ewe SAMOL KOT: “ ‘Ngang üpwe tiinato ew mwiichen aramas mi chómmóng pwe üpwe nöünöü iir le lüwetaló neii toloia wóómw. Mwirin, repwe etekinuketä lón neii we toloia seni lón ewe kólik.

4Iwe, ngang üpwe oturuketiw wón ewe pwül mi pwasapwas o pöütukoló wón ew leeni mi amassawa. Ngang üpwe mwüüt ngeni ekkewe maansüüsün fän läng meinisin pwe repwe sootiw wóómw, pwal ekkewe mönün fönüfan meinisin repwe ssom le ocheek.

5Ngang üpwe atoropasa fitukom wón ekkewe chuuk o oura ekkewe leemól ren chuumw.

6Ngang üpwe achöchchönü ewe fönü ren pwuupwun chaómw atoor ngeni wón ekkewe chuuk, nge ekkewe pwokur repwe ur ren fitukom.

7Lupwen ngang üpwe kunuukóló, ngang üpwe pwölüweló läng o ekkirochaló ekkewe füü; ngang üpwe pwal pwölüweló akkar ren ew kuchu, nge ewe maram esap tin.

8Ngang üpwe arochaló me wóóm ekkewe saram mi tin fän läng; ngang üpwe pwölüweló fönüwom ren rochopwaak, ngang ewe SAMOL KOT üwa kapas.

9Ngang üpwe föri pwe leluken chómmóng mwiichen aramas repwe lólilen o letipengaw lupwen ngang üpwe emmwenato emön chón opwutom pwe epwe efeiengawók. Chón ekkewe mwüü resap sissileek repwe letipengaw.

10Ngang üpwe föri pwe aramasen chómmóng fönü repwe mäirü reemw, nge ar kewe king repwe cheech ren ar rüükö pwokitom, lupwen ngang üpwe ächewechewa neii ketilas me mweer. Lón ewe ränin óm feiengaw, emön me emön leiir epwe chechcheech ren an nuokkus fäniten pwisin en me manawan.

11“ ‘Pün iei meet ngang ewe SAMOL KOT üwa apasa:

“ ‘Ewe ketilas nöün ewe kingen Babylon epwe feitto o efeiengawók.

12Ngang üpwe föri pwe noum kewe pwiin aramas repwe mäló ren ekkewe ketilas nöün ekkewe mwän mi pwora, iir ekkewe resap fókkun sile tong ra ngaw seni sounfiun ekkewe mwüü meinisin. Repwe ataeló ekkewe mettóch en Egypt ka lamalamtekia ren o arosaló noum kewe pwiin aramas meinisin.

13Ngang üpwe arosaló noum kewe pwiin kowu me siip meinisin seni ünükkün ekkewe öüwö lón Egypt. Iwe, ekkewe öüwö resap chüen pölök ren pecheen emön aramas ika pachapachen emön maan ar repwe fätäl lóór.

14Mwirin, ngang üpwe mwüüt ngeni ekkewe kólik pwe repwe lüwaló o föri pwe ekkewe öüwö repwe pwuupwu usun chök apüra, ngang ewe SAMOL KOT üwa kapas.

15Iwe, lupwen ngang üpwe föri pwe Egypt epwe wiliti ew fönüapö o ngang üpwe angealó mettóch meinisin seni lón ewe fönü, pwal lupwen ngang üpwe niieló aramas meinisin mi nónnóm ikenan, mwirin, repwe silei pwe ngang ewe SAMOL.’

16Iei ewe köölün kechiw repwe köölüw lón ar letipeta fäniten Egypt. Föpwülün ekkewe mwüü repwe köölüw ei köölün kechiw, lupwen ar letipeta fäniten Egypt me nöün kewe pwiin aramas, ngang ewe SAMOL KOT üwa kapas.”

Äm Egypt feittiw lón ewe leenien mi mäló

17Iwe, lón ewe engol me ruuen ierin äm ooló, lón ewe engol me elimuwen ränin ewe äewin maram, pwal ew poraus seni ewe SAMOL a toriei. A apasa: 18“Nöün aramas, kopwe leüommóng le kechiw fäniten ekkewe pwiin aramasen Egypt pwal fäniten chón ekkewe pwal ekkóch mwüü mi pöchökkül. Pün ngang üpwe tiiniiretiw ngeni lefaren fönüfan pwe repwe chiechi ngeni chókewe ra fen feittiw o nóm lón ewe pwaang. 19Kopwe apasa ngeniir, ‘Ämi chón Egypt, öüwa ekieki pwe öüwa koon ächengicheng mwen chón ekkewe pwal ekkóch mwüü? Apwi! Iei popun ämi öüpwe feittiw o kóón leiin chókewe resap sirkomsais.’ 20Ekkewe chón Egypt repwe mäló fiti ekkewe mwiichen aramas mi chómmóng ra fen ninniiló ren ketilas lón maun. Ewe ketilas a fen mollotä pwe epwe efeiengawer; epwe etekinaló Egypt ngeni köpwüng fiti nöün kewe pwiin aramas meinisin. 21Iwe, ekkewe meilapen sounfiu mi pwora repwe apasa me lón ewe leenien sootup usun Egypt me pelian kewe, ‘Iir ra feittiw ikeei o ra kóón ren ekkewe aramas resap sirkomsais, ren chókewe mi ninniiló ren ketilas lón maun.’

22“Assyria a pwal nóm ikenan, fiti unusen nöün mwiichen sounfiu. Peiasen nöün kewe sounfiu meinisin mi mäló, iir chókewe mi ninniiló ren ketilas lón maun, ra pwellieló peiasan. 23Peiaseer kewe ra nóm epin ewe pwaang mi alóllóól, nge peiasen nöün pelier kewe sounfiu ra pwellieló ünükkün peiaser kewe. Ekkewe mwän mi pwora mi efisätä nuokkus lón leluken aramas ekis meinisin lupwen ra chüen manaw, iei ra mäló ren nöün chón opwuter ketilas.

24“Elam a pwal nóm ikenan o peiasen unusen nöün pwiin sounfiu meinisin ra pwellieló ünükkün peiasan. Iir meinisin ra ninniiló o mäló ren ketilas lón maun. Iir chókewe resap sirkomsais ra efisätä nuokkus ngeni chón ekkewe fönü lupwen ra chüen manaw, nge iei ra feittiw lefaren fönüfan. Ra mwäreei ar itengaw fiti chókewe ra fen feittiw lón ewe pwaang. 25A wor ew peet a för fäniten Elam leiin ekkewe mi ninniiló, fiti nöün kewe pwiin aramas ra peias ünükkün peiasan. Iir meinisin resap sirkomsais, ra ninniiló ren ketilas lón maun. Ra efisätä nuokkus ngeni chón ekkewe mwüü lupwen ra chüen manaw, nge iei, ra kóón lón ewe pwaang lón ar itengaw fiti chókewe ra fen feittiw lón ewe pwaang.

26“Meshek me Tubal ra pwal peias ikenan, fiti peiasen nöüür kewe pwiin sounfiu ra pwellieló ünükkün peiaseer. Iir meinisin resap sirkomsais, ra ninniiló ren ketilas lón maun, pwokiten ra efisätä nuokkus lón leluken aramas meinisin lupwen ra chüen manaw. 27Iir resap peias lón iteüöch usun ekkewe pwal ekkóch sounfiu resap sirkomsais mi mäló, ra feittiw lón ewe leenien sootup fän ar pisekin maun, ar pisekin eppetin feiengaw a pwlüweló inisir nge nöüür ketilas ra iseiselong fän möküreer. Liwinin ar kewe tipis a nóm wón chüür, inamwo ika iir ra efisätä nuokkus ngeni aramas meinisin lupwen ra chüen manaw.

28“Pwal en Egypt, kopwe mäló o peias leein chókewe resap sirkomsais, fiti chókewe ra ninniiló ren ketilas lón maun.

29“Edom a pwal nóm ikenan fiti an kewe king me nöün kewe samol meinisin; inamwo ika iir sounfiu mi pwora, nge ra chök kóón leiin chókewe mi ninniiló ren ketilas lón maun. Ra kóón leiin chókewe resap sirkomsais, ren chókewe ra fen feittiw lón ewe pwaang.

30“Ekkewe samolun efeng meinisin me ekkewe chón Sidon meinisin ra pwal nóm ikenan. Ra feittiw fiti ekkewe mi ninniiló lón ar itengaw, inamwo ika iir ra efisätä nuokkus ren ar pwora melóóm. Ra kóón lón ewe leenien sootup lón ar resap sirkomsais fiti chókewe mi ninniiló ren ketilas lón maun o mwärei ar itengaw fiti chókewe ra fen feittiw lón ewe pwaang.

31“Ewer, pwal Farao me nöün mwiichen sounfiu meinisin repwe ninniiló ren ketilas lón maun. Nge Farao epwe ngasatä lupwen epwe küna pwe sap i chök me nöün mwiichen sounfiu meinisin ra ninniiló ren ketilas lón maun, ngang ewe SAMOL KOT üwa kapas. 32Inamwo ika ngang üwa föri pwe Farao epwe efisätä nuokkus me lón ewe fönü lupwen a chüen manaw, nge i me nöün kewe pwiin sounfiu meinisin repwe kóón leiin chókewe resap sirkomsais, fiti chókewe mi ninniiló ren ketilas lón maun, ngang ewe SAMOL KOT üwa kapas.”

Ezekiel a kö pwe epwe emön chón mas

33Iwe, ew poraus seni ewe SAMOL a pwal toriei. A apasa: 2“Nöün aramas, kopwe kapas ngeni aramasom kewe o apasa ngeniir: ‘Lupwen ngang üwa awarato ew mwiichen sounfiu pwe epwe maun ngeni ew fönü, ekkewe aramasen ewe fönü ra fen filätä emön me leiin ekkewe mwän o föri pwe ätewe epwe nöüür chón mas, 3iwe, lupwen ewe chón mas a küna pwe ewe mwiichen sounfiu a feitto pwe epwe maun ngeni ewe fönü, i a ettiki rappwa pwe epwe esilesil ngeni ekkewe aramas usun, 4mwirin, are chókana mi rongorong tikin ewe rappwa resap mochen äfälli ewe esilesil, nge ewe chón opwut a war o niireló, a pwisin tipisir are ra mäló. 5Pwokiten iir ra rongorong tikin ewe rappwa, nge resap mochen äfälli ewe esilesil, a pwisin ukeer chök are ra mäló. Pün are repwe mochen äfälli ewe esilesil; iwe, ra tongeni pwisin amanawa manawer. 6Nge are ewe chón mas a küna pwe ewe chón opwut a wareto, nge esap ettiki ewe rappwa pwe epwe esilesil ngeni ekkewe aramas, iwe, uken ewe chón mas are ekkewe aramas repwe mäló. Ekkewe aramas repwe mäló lón ar tipis, nge ngang üpwe ukun ngeni ewe chón mas chappen ar mäló.’

7“Nöün aramas, ngang üwa filuketä pwe en kopwe emön chón mas fäniten ekkewe aramasen Israel. Iei popun en kopwe rongorong ngeni meet ngang üpwe apasa, nge en kopwe esile ngeniir kapasen esilesil fänitei. 8Lupwen ngang üpwe apasa ngeni emön chón föfföringaw, ‘En ewe aramas mi föfföringaw, kopwe fókkun mäló,’ nge en kosap fönööw pwe i epwe kul seni an kewe föfför mi ngaw, mwirin, ewe aramas mi föfföringaw epwe mäló lón an tipis, nge ngang üpwe ukun ngenuk chappen an mäló. 9Nge are en ka fönööw ewe aramas mi föfföringaw pwe epwe kul seni an föfföringaw, nge i esap mochen kul seni an föfföringaw, ena aramas epwe mäló lón an tipis, nge en kopwe pwisin angasa manawom.

10“Nöün aramas, kopwe apasa ngeni ekkewe chón Israel ei poraus, ‘Iei meet ämi öüwa apasa: “Äm kewe pwuupwungaw me äm kewe tipis ra ochchowukeemitiw, nge äm aia apwangapwangaló pwokiteer. Iwe, epwe ifa usun äm aipwe tongeni manaw?’ 11Iwe, kopwe apasa ngeniir pwe iei meet ngang ewe SAMOL KOT üwa apasa: ‘Mwo manawei, ngang üsap pwapwaiti määlón chón föfföringaw, nge üwa fen mochen pwe repwe kul seni ar kewe föfför mi ngaw pwe repwe manaw. Öüpwe kul! Öüpwe kul seni ämi föfföringaw! Pün pwata öüpwe mäló, ämi chón Israel?’

12“Iei minne, nöün aramas, kopwe apasa ngeni aramasom kewe ei poraus, ‘Are emön chón pwüng a älleasolap, an kewe föfförün pwüng me mwan resap amanawa i. Nge are emön chón föfföringaw a kul seni an föfför mi ngaw, an kewe föfför mi ngaw me mwan resap efeiengawa i. Are emön chón pwüng a tipis, esap tongeni küna manaw pwokiten an kewe föfförün pwüng i a föri me mwan.’ 13Are ngang üpwe üreni emön chón pwüng pwe i epwe fókkun manaw, nge mwirin i a föri tipis, pün i a ekieki pwe an kewe föfförün pwüng i a föri me mwan repwe amanawa, mwirin, esap wor ew me leiin an kewe föfför mi mwirinnö i a fen föri me mwan epwe chemeto. I epwe mäló pwokiten an kewe föfför mi ngaw i a föri me mwirin. 14Nge are ngang üpwe apasa ngeni emön aramas mi föfföringaw, ‘En kopwe fókkun mäló,’ nge mwirin, i a kul seni an tipis o föri meet mi pwüng o wenechchar, 15are i epwe eliwinisäfäli meet i a angei seni emön pwe och esissilen pwon fäniten ew liwinimang, are i a pwal eliwinisäfäli meet i a sooläni, are i a älleasochis ngeni äi kewe öllük aramas ra küna manaw ren, nge esap chüen föri och mi ngaw, ewe aramas epwe fókkun manaw, nge esap mäló. 16Esap wor ew me leiin an kewe tipis i a föri me mwan epwe chemeto pwe epwe üüngeni. Ewe aramas a föri meet mi pwüng o wenechchar, i epwe fókkun manaw.

17Nge aramasom kewe ra apasa, ‘Än ewe SAMOL föfför esap pwüng.’ Nge i fen ar föfför esap pwüng. 18Are emön chón pwüng a kul seni an föfförün pwüng o föri minne a ngaw, i epwe mäló ren. 19Nge are emön aramas mi föfföringaw a kul seni an kewe föfför mi ngaw o föri meet mi pwüng o wenechchar, i epwe manaw ren an föri iei usun. 20Nge ämi chón Israel, öüwa apasa, ‘Än ewe SAMOL föfför esap pwüng!’ Nge ngang üpwe öpwüngü emön me emön leiimi wón üküükün en me pwisin an föfför.”

Äwewen än Jerusalem taaló

21Iwe, lón ewe engol me ruuen ierin äm ooló, lón ewe elimuwen ränin ewe äengolun maram, emön mwän mi süüló seni Jerusalem a feitto reei o apasa, “Ewe telinimw a taaló!” 22Nge lekkuniólupwinin ewe rän mwen än ewe mwän a war, pöün ewe SAMOL a feittiw wóói. Iwe, a suuki awei pwe üwa tongeni kapas lupwen än ewe mwän a wareitiei lón ewe soran. Iei popun awei a suukuló, nge ngang üsap chüen fanafanaló.

23Mwirin, ei poraus seni ewe SAMOL a toriei. A apasa: 24“Nöün aramas, ekkewe aramas mi nónnóm lón ekkewe telinimw mi taaló me lón ewe fönü Israel ra chök sópweló le akkapasa, ‘Abraham a chök äkkälämön, nge Kot a ngeni unusen ewe fönü pwe epwe fönüweni. Nge iei kich sia chómmóng, iei popun pwe enletin, Kot a ngeni kich ei fönü pwe fönüwach.’ 25Iei minne, kopwe apasa ngeniir, ‘Iei meet ewe SAMOL KOT a apasa: Pwokiten ämi öüwa ochooch fituk ewe chcha a chüen nóm lón, öüwa pwal fel ngeni ämi kewe uluulun önümwäl o össükü chcha, ifa usun ämi öüpwe fönüweni ei fönü? 26Ämi öüwa apilükülüküw nöümi ketilas, öüwa pwal föri föfför mi enniopwut, nge emön me emön leiimi a elimengawa pwülüwen en me chón órun. Ifa usun, ämi öüpwe tongeni fönüweni ewe fönü?’

27“Iwe, iei meet kopwe apasa ngeniir, ‘Iei meet ewe SAMOL KOT a apasa: Mwo manawei, chókewe mi nómwetiw lón ekkewe telinimw mi taaló repwe mäló ren ketilas, nge ekkewe maanmwacho repwe ocheei chókewe mi nóm lemal. Chókewe mi op lón ekkewe leeni mi pöchökkül pwal lón ekkewe fööimw repwe mäló ren ew mätter. 28Ngang üpwe föri pwe ewe fönü epwe pöönüló, ar pöchökkül ra eingeing wón epwe ükütiw, nge ekkewe chukun Israel repwe pöönüló, iei popun esap chüen wor emön epwe pwereló wóór. 29Mwirin, repwe silei pwe ngang ewe SAMOL, lupwen ngang üpwe föri pwe ewe fönü epwe wiliti ew leeni mi pöön, pwokiten ekkewe föfför mi enniopwut meinisin iir ra föri.’

30“Nge en, nöün aramas, aramasom kewe ra kapas fengen lefiiler usum, ünükkün tittin ewe telinimw pwal ren asamen imweer kewe. Ra apasa fengeni lefiiler, ‘Öü feitto, öüsipwe rongorong ewe poraus mi feitto seni ewe SAMOL.’ 31Iwe, neii kewe aramas repwe mwiicheto reemw, usun meet ra soun föri, o repwe móót fän mesom pwe repwe öüseling ngeni óm kewe kapas. Nge iir resap atolonga lón föfför minne iir ra rongorong. Repwe apasatä ren aweer usun ar mochen achoocho, nge iir ra tipemmóng lón lelukeer fäniten ar repwe angei mooni fän pwüngingaw. 32Nengeni, mereer, en ka chök usun emön mi ngiiöch le köölüw kana kööl mi ömüümü o silelap le ettiki och pisekin likettik, pün repwe rongorong ngeni óm kewe kapas, nge resap atolongeer lón föfför.

33“Nge lupwen óm kewe kapas repwe pwönüwetä - nge repwe fókkun pwönüwetä - mwirin, repwe silei pwe a wor emön soufós a fen nóm leiir.”

Chón masen siip me siip

34 Mwirin, ei poraus seni ewe SAMOL a toriei. A apasa: 2“Nöün aramas, kopwe oosuni usun feiengawen ekkewe chón masen Israel. Kopwe oosuni o apasa ngeniir: ‘Iei meet ewe SAMOL KOT a apasa: Feiengawemi, ämi ekkewe chón masen Israel, pün öüwa chök pwisin tümwünü kemi. Ifa usun, sap wiisen ekkewe chón mas pwe repwe tümwünü nöüür pwiin siip? 3Ämi öüwa eni ewe sooson milik, öüwa üfeni ewe ülen siip, öüwa pwal niieló o ocheei ekkewe maan mi öümanaw, nge öüwa likitaló ekkewe pwiin siip pwe repwe echik. 4Ämi öüsap tümwünüw ekkewe mi apwangapwang, öüsap eteneki ekkewe mi samwaw, öüsap pwal filiti kinasen ekkewe mi kinas. Öüsap eliwinisäfälieto ekkewe mi tókkóló, öüsap pwal kütta ekkewe mi mwälecheló. Nge öüwa nemeniir fän echchimw me fän pöchökkül. 5Iei popun, ekkewe siip ra toropasfeil, pwokiten esap wor emön chón mas. Nge lupwen ra toropasfeil, ra fisitiw pwe ochään ekkewe maanmwacho. 6Neii kewe siip ra chök tókótókfeil wón ekkewe chuuuk meinisin pwal wón iteiten ekkewe chukutekisón. Ra toropasfeil wón unusen fönüfan, nge esap wor emön a kütteer ika änenneer.

7“ ‘Iei minne, ämi ekkewe chón mas, öüpwe rongorong äi ei kapas ngang ewe SAMOL. 8Mwo manawei, ngang ewe SAMOL KOT üwa apasa: Pwokiten esap wor emön chón masen neii kewe siip, iei popun ra ooló nge ekkewe maanmwacho ra ocheer. Pwal pwokiten neii kewe chón mas resap kütta neii kewe siip, pün ra chök tümwünü pwisin iir, nge resap tümwünü neii kewe siip, 9iei minne, ämi ekkewe chón mas, öüpwe rongorong äi kewe kapas. 10Iei meet ngang ewe SAMOL KOT üwa apasa: Ngang üwa üüngeni kemi ämi ekkewe chón mas o üpwe ukun ngeni kemi chappen meet a fis ngeni neii kewe siip. Ngang üpwe äwesi seni kemi ewe wiisen chón mas, pwe esap chüen tongeni wor minne öüpwe manaw seni. Iwe, ngang üpwe chimanüw neii kewe siip seni lón awemi, pwe öüsap chüen tongeni ocheer.

11Pün iei meet ngang ewe SAMOL KOT üwa apasa: Pwisin ngang üpwe kütta neii kewe siip o änenneer. 12Ngang üpwe usun emön chón masen siip a kütta nöün siip mi toropasfeil. Iei ngang üpwe kütta neii kewe siip o chimanüür seni ekkewe leeni meinisin ia iir ra toropasfeil ie, lón ewe ränin kuchuuchu me rochopwak. 13Ngang üpwe emmweniirewu seni ekkewe mwüü o ionifengeniir seni ekkewe fönü. Iwe, ngang üpwe emmweniirelong lón poputän fönüwer, ngang üpwe amwöngöniir wón ekkewe chukun Israel, ünükkün ekkewe chaanpwuupwu, pwal lón ekkewe leeni ia aramas ra nóm ie me lón ewe fönü. Me ikenan, iir repwe kóón lón leeni mi mwirinnö fän kinamwe. Repwe pwal kütta eneer mwöngö lón leenien fetil mi mwirinnö me wón ekkewe chukun Israel. 15Pwisin ngang üpwe tümwünü neii kewe siip o kütta ia repwe tongeni kóón ie, ngang ewe SAMOL KOT üwa kapas. 16Ngang üpwe kütta ekkewe mi mwälecheló o eliwinisäfäli ekkewe mi tókkóló. Ngang üpwe filiti kinasen ekkewe mi kinas o öpöchökkülätä ekkewe mi apwangapwang, nge ngang üpwe arosaló ekkewe mi öümanaw me pöchökkül. Ngang üpwe emön chón masen ewe siip fän pwüng.

17“ ‘Nge ämi, neii kana siip, iei meet ngang ewe SAMOL KOT üwa apasa: Ngang üpwe öpwüngü lefiilen emön siip me pwal emön, üpwe pwal äimwüfeseni ekkewe siip seni ekkewe kuuch. 18Ifa usun, öüsap menemenöch ren ämi mwöngö lón ekkewe leenien fetil mi mwirinnö? Ifa usun, öüpwe pwal fókkun pwuurätiw fän pachapachemi ekkewe lussun fetil lón ämi leenien mwöngö fetil? Ifa usun, öüsap menemenöch ren ämi wün ewe kólik mi fat? Ifa usun, öüpwe pwal fókkun öpölökü ngeni pachapachemi ekkewe lussun kólik? 19Ifa usun, neii pwiin siip repwe mwöngö minne ämi öüwa pwuurätiw fän pachapachemi o wün minne ämi öüwa öpölökü ren pachapachemi?

20“ ‘Iei minne iei meet ngang ewe SAMOL KOT üwa apasa ngeni kemi: Nengeni, pwisin ngang üpwe öpwüngü lefiilen ekkewe siip mi kitinnup me ekkewe siip mi kichchüüchü. 21Pün ämi ekkewe siip mi kitinnup öüwa etia ekkewe siip mi apwangapwang ren leepekimi me afaremi, öüwa pwal pureei ekkewe siip mi apwangapwang meinisin ren mächäämi tori öüwa ösüüreló ngeni ekkewe fönü mi toowaw. 22Iei minne, ngang üpwe chimanüw neii kewe siip, nge esap chüen wor emön epwe eriäfföüür o niireló. Ngang üpwe öpwüngü lefiilen emön siip me pwal emön. 23Ngang üpwe ewiisa emön chón mas pwe epwe nemeniir; i neii we chón angang David. I epwe amwöngöniir o i epwe ar chón mas. 24Iwe, ngang ewe SAMOL üpwe ar Kot, nge neii we chón angang David epwe samol me leiir. Ngang ewe SAMOL üwa kapas.

25“ ‘Ngang üpwe föri ew pwonen kinamwe ngeniir o üpwe tapweeló ekkewe maanmwacho seni ewe fönü pwe neii kewe siip repwe tongeni nónnóm lón ewe fönüapö o möür leiin ekkewe wöllap fän kinamwe nge resap nuokkus. 26Ngang üpwe efeiöchüw neii kewe aramas me ekkewe leeni pwellin ünükkün chuki we. Iwe, ngang üpwe öpüngätiw üüt, ewe üten feiöch, pwe epwe püngütiw lón fansoun iir ra osupwangen üüt. 27Ekkewe irän lemal repwe ukkuwa, nge pwülün ewe fönü epwe ämäärätä irän mwömwöngö. Ekkewe aramas repwe nónnómöch lón fönüwer. Iwe, repwe silei pwe ngang ewe SAMOL, lupwen ngang üpwe kupii ewe öüwafar mi nóm wóór o chimanüür seni lepöün chókewe mi nöüniir amanaw. 28Iwe, chón ekkewe mwüü resap chüen liäpeniir, nge ekkewe maanmwacho resap chüen ocheer. Iir repwe nónnóm lón kinamwe, nge esap wor emön epwe eniwokkusuur. 29Ngang üpwe awora fäniter ew fönü mi iteföüló fäniten minne iir ra fótuki wón o kinii seni. Iwe, resap chüen osupwangen echik me lón ewe fönü, resap pwal chüen mwärelong fän itengaw seni chón ekkewe mwüü. 30Mwirin, iir repwe silei pwe ngang ewe SAMOL ar we Kot. Ngang üwa nóm reer, nge iir ekkewe chón Israel, iir neii aramas, aloi ngang ewe SAMOL KOT. 31Ämi neii siip, ämi ekkewe siip lón äi we leenien mwöngö fetil. Ämi neii aramas, nge ngang ämi Kot, iei aloi, ngang ewe SAMOL KOT.”

Ew kapasen oosuni usun feiengawen Edom

35 Mwirin, pwal ew poraus seni ewe SAMOL a toriei. A apasa: 2“Nöün aramas, kopwe äsepa wón mesom ngeni ewe chuuk Seir o apasa kapasen oosuni usun an feiengaw. 3Iwe, kopwe apasa: ‘Iei meet ewe SAMOL KOT a apasa. Ngang üwa üüngenuk en ewe chuuk Seir, iwe, ngang üpwe eitiewu peii pwe üpwe efeiengawók o föri pwe kopwe wiliti ew leeni mi pöön. 4Ngang üpwe ataeló óm kewe telinimw, nge en kopwe wiliti ew fönüapö. Mwirin, en kopwe silei pwe ngang ewe SAMOL.

5“ ‘Pwokiten en ka chüen chök sópweló le anómwu óm ekiekin koum ngeni ekkewe aramasen Israel mi fis seni chök lóóm o ka likitiireló pwe repwe mäló ren ketilas lón fansoun ar feiengaw, lón ewe fansoun ngang üwa öpwüngüür ren ar kewe tipis, 6iei minne, mwo manawei, ngang ewe SAMOL KOT üwa apasa, ngang üpwe amollätä chcha fanitom. Iwe, chcha epwe tapwerifeiliik. Pwokiten en kosap opwut össükü chcha, iei minne össükü chcha epwe tapwerifeiliik. 7Ngang üpwe föri pwe ewe chuuk Seir epwe wiliti ew leeni mi taaló o pöön. Iwe, ngang üpwe niieló chókewe meinisin mi feitto me feilló wón. 8Ngang üpwe ouraló chukum kewe mi tekia ren soomä. Chókewe mi ninniiló ren ketilas repwe turuló me wón chukum kewe mi tekisón, pwal lón óm kewe leemól me lón óm kewe pwokur. 9Ngang üpwe föri pwe kopwe pöönüló feilfeilló chök, pwe óm kewe telinimw resap masow ren aramas. Mwirin, en kopwe silei pwe ngang ewe SAMOL.

10“ ‘En ka apasa, ‘Ekkeei ruu mwüü, nemeniei, ekkeei ruu fönü Judah me Israel, fönüwei. Sipwe angeiir pwe fönüach,’ inamwo ika ngang ewe SAMOL üwa nónnóm ikenan. 11Iei minne, mwo manawei, ngang ewe SAMOL KOT üwa apasa, ‘Ngang üpwe liwinisäfäli ngenuk óm kewe föfförün soong ren äi üpwe soong ngenuk. Ngang üpwe öpwünguk ren óm kewe föfförün soong, lólówó me kopwut. Iwe, pwisin ngang üpwe awarato iteüöchün itei ren meet ngang üpwe föri ngenuk. 12Mwirin, ämi aramasen Edom öüpwe silei pwe ngang ewe SAMOL üwa rongorong ekkewe kapasen turunufas meinisin ämi öüwa apasa fäniten ekkewe chukun Israel. Pün ämi öüwa apasa, “Ra taaló o pöön, ra oolong lepöüch pwe sipwe oromiireló usun chök nge anach mwöngö.” 13Ämi öüwa lamalamtekia lón ämi tunosikesik o achómmónga ämi kapasen üüngeniei. Nge ngang üwa rongorong meinisin minne öüwa apasa. 14Iwe, iei meet ngang ewe SAMOL KOT üwa apasa: Chón unusen fönüfan repwe pwapwa lupwen ngang üpwe föri pwe kopwe wiliti ew leeni mi taaló o pöön. 15Pwokiten en ka pwapwa lupwen fönüwen ekkewe chón Israel a taaló; iwe, epwe ina usun meet ngang üpwe pwal föri ngenuk. En ewe chuuk Seir kopwe pwal taaló, en me unusen ewe fönü Edom. Mwirin, aramas meinisin repwe silei pwe ngang ewe SAMOL.”

Ew kapasen oosuni usun ekkewe chukun Israel

36“Iwe, nöün aramas, kopwe pwal oosuni ngeni ekkewe chukun Israel o apasa, ‘Ämi ekkewe chukun Israel, öüpwe rongorong än ewe SAMOL kapas: 2Iei meet ewe SAMOL KOT a apasa: Chón opwutemi ra apasa usumi, “Aha! Ekkewe leeni tekia mi nóm seni chök lóómlóóm ra wiliti leeniach.’ ” 3Iei minne, kopwe oosuni ngeni ekkewe chukun Israel o apasa, ‘Iei meet ewe SAMOL KOT a apasa: Chón opwutemi kewe ra maun ngeni kemi seni leepekimi meinisin o ataakemi, ina pwata chómmóng mwüü ra fönüweni kemi o öüwa wiliti och minen än aramas kapasen turunufas me eitengaw, 4iei minne, ämi ekkewe chukun Israel, öüpwe rongorong minne ngang ewe SAMOL KOT üwa apasa: Iei meet ngang ewe SAMOL KOT üwa apasa ngeni kemi ämi ekkewe chuuk me ekkewe chukutekisón, ngeni kemi ämi ekkewe pwokur me ekkewe leemól, pwal ngeni kemi ämi ekkewe leeni mi taatakis me ämi ekkewe telinimw mi pöönüló, chón opwutemi ra liäpenaló pisekimi o öüwa küna itengaw meren chón ekkewe lussun mwüü mi nóm ünükkümi - 5iei meet ngang ewe SAMOL KOT üwa apasa: Enlet, ngang üwa kapas lón pwichikkaren äi soong, ngang üwa kapasen üüngeni ekkewe mwüü mi nóm ünükkümi, nge koon wesewesen ngeni chón ewe fönü Edom, pün ra pwääraló ar turunufaseei me ekingawen leluker ren ar angei fönüwei we pwe repwe fönüweni, ra pwal angei pwe liaper ekkewe leeni mi määr fetil lón fäniten enen maan.’ 6Iei minne, kopwe oosuni fänäsengesin ewe fönü Israel o apasa ngeni ekkewe chuuk me ekkewe chukutekisón, ngeni ekkewe pwokur me ekkewe leemól: ‘Iei meet ewe SAMOL KOT a apasa: Nengeni, ngang üwa kapas lón äi lingeringer pwokiten ämi öüwa nóm lón riäfföün turunufas meren chón ekkewe mwüü mi nóm ünükkümi. 7Iei minne, iei meet ngang ewe SAMOL KOT üwa apasa: Ngang üwa eitietä peii lón äi pwon fän ökköpöl, pwe ekkewe mwüü mi nóm ünkkümi repwe pwal tolong lón riäfföün turunufas.

8“ ‘Nge ämi, ekkewe chukun Israel, öüpwe öpwükawu palemi me uwaami pwe öüpwe amollätä fäniten än neii kewe aramasen Israel repwe liwinsäfäl, pün repwe mwittir liwiniti leenier. 9Pün nengeni, ngang üwa chüngüw kemi o üpwe feitto pwe üpwe älisi kemi; iwe, ewe pwül mi nóm wóómi epwe ttu o irä repwe fót wóómi. 10Iwe, ngang üpwe achómmóngaló chóóchón ekkewe aramas mi nóm wóómi, wesewesen iir ekkewe chón Israel. Epwe wor aramas lón ekkewe telinimw, nge ekkewe leeni mi taaló repwe köüsäfälitä. 11Ngang üpwe achómmóngaló aramas me maan mi nóm wóómi; iwe, repwe oupwuuputiw o chómmóngóló. Ngang üpwe awora aramas repwe nóm wóómi usun lón ekkewe fansoun lóóm. Iwe, ngang üpwe föri pwe öüpwe feffeitä o nónnómöch seni me mwan. Miwirn, öüpwe silei pwe ngang ewe SAMOL. 12Iwe, ngang üpwe föri pwe neii kewe aramasen Israel repwe fätäl wóómi. Repwe fönüwemi kemi, nge ämi öüpwe fönüwer; iwe, ämi öüsap chüen angei seniir nöüür kewe.

13“ ‘Iei meet ngang ewe SAMOL KOT üwa apasa: Iei chón ekkewe pwal ekkóch mwüü ra ämängawa kemi o apasa usumi, “Israel ew fönüwen chón ochooch aramas me chón niieló pwisin nöüür,” 14iei minne, ämi öüsap chüen chón ochooch aramas ika chón niieló pwisin nöümi, ngang ewe SAMOL KOT üwa kapas. 15Ngang üpwe föri pwe öüsap chüen rong än chón ekkewe mwüü kapasen ämäängaw, öüsap pwal chüen nóm lón riäfföün än ekkewe mwiichen aramas turunufasei kemi. Ngang üpwe pwal föri pwe chón ekkewe mwüü resap chüen ataeló mwüümi, ngang ewe SAMOL KOT üwa kapas.’ ”

Äleleten än chón Israel repwe liwinsäfäl

16Mwirin, pwal ew poraus seni ewe SAMOL a toriei. A apasa: 17“Nöün aramas, lupwen ekkewe aramasen Israel ra nónnóm lón poputän fönüweer, ra elimengawa ewe fönü ren lapalapeer me ar kewe föfför. Lapalapeer me fän mesei a usun chök limengawen emön fefin lupwen a nóm lón limengawen an samwaün maram. 18Iei popun ngang üwa niinätiw äi lingeringer wóór, pwokiten iir ra össükü chcha me lón ewe fönü, pwal pwokiten iir ra elimengawa ewe fönü ren ar kewe uluulun önümwäl. 19Ngang üwa ösüüreló leiin chón ekkewe mwüü; iwe, ra toropasfeil leemelen ekkewe fönü. Ngang üwa öpwüngüür wón üküükün ar kewe lapalap me ar kewe föfför. 20Iwe, ekis meinisin ia ra feilló ie leein chón ekkewe mwüü, ra turunufasei itei mi pin, pün aramas ra apasa usuur, ‘Ikkeiir nöün ewe SAMOL kewe aramas, nge iir ra toowu seni fönüwan.’ 21Ngang üwa öüchcheani itei we mi pin ekkewe aramasen Israel ra turunufasei me leiin chón ekkewe mwüü ia ra feilló ie.

22“ ‘Iei minne, kopwe apasa ngeni ekkewe aramasen Israel, ‘Iei meet ngang ewe SAMOL KOT üwa apasa: Ämi chón Israel, ngang üpwe föri ekkeei mettóch sap fänäsengesimi, nge i fänäsengesin itei mi pin ämi öüwa turunufasei me leiin chón ekkewe mwüü ia öüwa feilló ie. 23Ngang üpwe pwääraló pinin itei we mi tekia, ewe iit a itengaw me leiin chón ekkkewe mwüü, ewe iit ämi öüwa turunufasei me leiir. Mwirin, chón ekkewe mwüü repwe silei pwe ngang ewe SAMOL, lupwen ngang üpwe pwisin pwäärieiló pwe ngang üwa pin me reemi me fän meseer, ngang ewe SAMOL KOT üwa kapas.

24“ ‘Pün ngang üpwe angeeikemiiwu seni ekkewe mwüü. Ngang üpwe ionifengeni kemi seni ekkewe fönü meinisin o emmwenisäfäli kemiilong lón poputän fönüwemi. 25Ngang üpwe äsupwu kólik mi limöch wóómi pwe öüpwe limöch; ngang üpwe limeti seni kemi ämi kewe limengaw meinisin, üpwe pwal limeti seni kemi ämi kewe uluulun önümwäl meinisin. 26Iwe, ngang üpwe ngeni kemi ew leluk mi fö o isenalong emön ngüün mi fö lóómi. Iwe, üpwe angei seni kemi lelukemi mi pöchökkül usun faaw o ngeni kemi ew leluk mi pweteete usun fituk. 27Iwe, ngang üpwe isenalong Ngüni lóómi o föri pwe ämi öüpwe föri pwüngün äi kewe pwüüng o tümwünüfichi pwe öüpwe öpwönüwetä äi kewe öllük. 28Ämi öüpwe nónnóm lón ewe fönü ngang üwa ngeni ämi kewe leewo; ämi öüpwe neii aramas, nge ngang üpwe ämi Kot. 29Ngang üpwe angasakemi seni ämi kewe limengaw meinisin. Ngang üpwe ngeni kemi föün wiit mi chómmóng o föri pwe epwe fókkun chómmóng. Iwe, ngang üsap awarato lengita wóómi. 30Ngang üpwe achómmóngaló uwään ekkewe irä o asomwaló resin ekkewe tännipi, pwe öüsap chüen nóm lón riäfföün itengaw me leiin chón ekkewe mwüü, pwokiten lengita. 31Mwirin, öüpwe chechchemeni ämi kewe lapalap mi ngaw me ämi kewe föfför mi ngaw; iwe, öüpwe pwisin loow ämi ren ämi kewe tipis me föfför mi enniopwut. 32Ngang üwa mochen pwe öüpwe fókkun silei pwe ngang üsap föri ei fänäsengesimi, ngang ewe SAMOL KOT üwa kapas. Ämi chón Israel, öüpwe sääw o itengaw ren ämi föfför mi ngaw.”

33“ ‘Iei meet ewe SAMOL KOT a apasa: “Lón ewe rän ngang üpwe limeti seni kemi ämi kewe tipis, ngang üpwe aworasäfäli aramas lón ämi kewe telinimw, nge ämi kewe leeni mi taaló repwe köüsäfälitä. 34Iwe, ewe fönü mi taaló o pöön me mwan, nge iei, meinisin chón pwereló lón repwe mäirü ren ar küna pwe a wiliti ew fönü aramas ra äänisäfäli tännipi. 35Iwe, repwe apasa, “Ei fönü mi taaló melóóm, nge iei a wiliti usun chök ewe tännipi Eden. Ekkewe telinimw mi turuló o taattakis, esap pwal chüen wor aramas ra nóm lóór, nge iei tittiir a pöchökkül o a wor aramas ra nóm lóór.” 36Mwirin, ekkewe lussun mwüü mi chüen nóm ünükkümi repwe silei pwe ngang ewe SAMOL üwa öüüwsäfälietä meet a taaló, üwa pwal fótukisäfäli meet a taaló. Ngang ewe SAMOL üwa kapas, nge ngang üpwe pwal föri meet üwa apasa.”

37“Iei meet ewe SAMOL KOT a apasa: “Ngang üwa mollotä äi üpwe pwal ewirisäfäli än chón Israel tungór o föri ei fäniteer: Ngang üpwe achómmóngereló pwe repwe chómmóng usun siip, 38repwe chómmóng usun pwiin siip fäniten asór lón Jerusalem lupwen ar kewe fansoun chuulap mi kefilitä. Iei usun ekkewe telinimw mi taaló repwe ur ren pwiin aramas. Mwirin, iir repwe silei pwe ngang ewe SAMOL.”

Ewe leemólun chüü mi pwasapwas

37 Mwirin, pöün ewe SAMOL a nóm wóói, iwe, Ngünün ewe SAMOL a uweeiwu o isenieitiw lukalapen ew leemól mi uren chüün aramas. 2Iwe, a emmwenifeiliei leiin ekkewe chüü, nge ngang üwa küna chómmóng chüün aramas ra nóm wón pwülün ewe leemól, chüü mi fókkun pwasapwas. 3Iwe, Ngünün ewe SAMOL a eisiniei, “Nöün aramas, ifa usun, ekkeei chüü ra tongeni repwe manaw?”

Nge ngang üwa pölüweni o apasa, “Äi SAMOL KOT, en chök ka silei.”

4Mwirin, i a apasa ngeniei, “Kopwe oosuni ngeni ekkeei chüü o apasa ngeniir, ‘Ämi ekkeei chüü mi pwasapwas, öüpwe rongorong än ewe SAMOL kapas! 5Iei meet ewe SAMOL KOT a apasa ngeni kemi ämi ekkeei chüü: Nengeni, ngang üpwe wusalong lóómi enienin ngasangasen manaw pwe öüpwe manawsäfäl. 6Ngang üpwe apachatä ekkewe selin lesópwun fituk ngeni kemi, üpwe pwal föri pwe fituk epwe määrsäfäl wóómi o pölüw ngeni kemi ünüchchemi. Iwe, ngang üpwe wusalong lóómi enienin ngasangasen manaw pwe öüpwe manaw. Mwirin, öüpwe silei pwe ngang ewe SAMOL.’ ”

7Iei popun ngang üwa oosuni usun minne ia öllük ngeniei. Iwe, lupwen ngang üwa oosuni, a fis och ökürang me och chopwuchop lón unusen ewe leemól. Iwe, chüün ew me ew inis ra chufengen, efóch chüü a pach ngeni pwal efóch chüü. 8Iwe, üwa attololó nge üwa küna pwe ekkewe selin lesópwun fituk me fituk ra pwä me wón ekkewe chüü. Mwirin, a tö ünüchcheer o ra pwölüweló ekkewe inis, nge esap wor mwo enienin ngasangasen manaw lóór.

9Mwirin, ewe SAMOL a apasa ngeniei, “Kopwe oosuni ngeni ewe enieinin ngasangas. Nöün aramas, kopwe oosuni o apasa ngeni ewe enienin ngasangas, ‘Iei meet ewe SAMOL KOT a apasa: En enienin ngasangas, kopwe enito seni ekkewe rüwänü peekin itiitin äsäpwääl o enilong lón ekkeei soomä pwe repwe tongeni manawsäfäl.’ ” 10Iei popun ngang üwa oosuni usun i a öllük ngeniei. Iwe, ewe enienin ngasangas a tolong lón ekkewe soomä, ina pwata ra manawsäfäl o ra üütä wón pecheer. Iei ew mwiichen sounfiu mi fókkun chómmóng.

11Mwirin, ewe SAMOL a apasa ngeniei, “Nöün aramas, ekkeei chüü ra eliosunätä ekkewe aramasen Israel meinisin. Nengeni, iir ra apasa, ‘Kich sia wiliti usun kana chüü ra pwasapwasaló, ach apilükülük a móróló, kich sia äreló.’ 12Iei minne, kopwe oosuni o apasa ngeniir: ‘Iei meet ewe SAMOL KOT a apasa: Ämi neii aramas, ngang üpwe suuki peiasemi o amanawasäfäli kemiitä seni lón ekkewe peias. Ngang üpwe elwinisäfäli kemi ngeni ewe fönü Israel. 13Mwirin, ämi neii aramas, öüpwe silei pwe ngang ewe SAMOL, lupwen ngang üpwe suuki peiasemi o amanawasäfäli kemiitä seni lóór. 14Ngang üpwe isenalong Ngüni we lóómi pwe öüpwe manaw o liwinsäfäliti poputän fönüwemi. Mwirin, öüpwe silei pwe ngang ewe SAMOL üwa kapas, nge ngang üwa föri minne uwa apasa, ngang ewe SAMOL üwa kapas.’ ”

Ew mwüü fän nemenemen emön king

15Mwirin, ew poruas seni ewe SAMOL a pwal toriei. A apasa: 16“Nöün aramas, kopwe angei efóch wóók o makkeetiw wón ekkeei kapas: ‘Fäniten Judah me ekkewe chón Israel mi chiechi ngeni.’ Mwirin, kopwe angei pwal efóch wóók o makkeetiw ekkeei kapas wón: ‘Fäniten Josef (iei wókun Efraim) me ekkewe aramasen Israel meinisin mi chiechi ngeni.’ 17Mwirin, kopwe ömwöchü fengeniir lón pöum pwe repwe usun chök efóch wóók.

18“Iwe, lupwen aramasom kewe repwe eisinuk, ‘Kose mochen kopwe üreni keem ika meet wewen óm ei föfför?’ 19Iwe, kopwe apasa ngeniir, ‘Iei meet ewe SAMOL KOT a apasa: Ngang üpwe angei wókun Josef we (ewe mi nóm lón pöün Efraim) me ekkewe einangen Israel mi chiechi ngeni, iwe, ngang üpwe ochufengeni me wókun Judah we o üpwe föri pwe repwe wiliti efóch chök wóók me lón peii.’ 20Lupwen ekkewe wóók en ka makkei wóór ra nóm lón pöum, 21mwirin, en kopwe apasa ngeniir, ‘Iei meet ewe SAMOL KOT a apasa: Ngang üpwe angeawu ekkewe chón Israel seni leiin chón ekkewe mwüü ia ra feilló ie. Ngang üpwe ionifengeniir seni ekis meinisin ia ra toropasfeil ie o üpwe eliwinisäfäliireló ngeni poputän fönüwer. 22Iwe, ngang üpwe ochufengenir pwe repwe ew chök mwüü me lón ewe fönü, wón ekkewe chukun Israel. Emön chök king epwe nemenem wóór meinisin, iwe, resap chüen ruu mwüü ika kinikinitiw lón ruu mwüü. 23Resap chüen elimengawer ren ar kewe uluulun önümwäl me ekkewe uluulun mi enniopwut, ika ren och ar sókkun pwuupwungaw. Pün ngang üpwe angaseer seni tipisin ar tókkóló seniei, üpwe pwal limeti seniir ar kewe tipis. Iwe, iir repwe neii aramas, nge ngang üpwe ar Kot.

24“ ‘Neii we chón angang David epwe king wóór, pwe iir meinisin repwe ääni emön chök chón mas. Iir repwe föri pwüngün äi kewe öllük o tümwünüfichi le öpwönüwetä äi kewe pwüüng. 25Iwe, iir repwe nónnóm lón ewe fönü ngang üwa ngeni neii we chón angang Jakob, ewe fönü ia ämi kewe leewo ra nónnóm ie. Iir me nöüür kewe pwal nöün nöüür kewe repwe nónnóm ikenan feilfeilló chök, nge neii we chón angang David epwe ar samol feilfeilló chök. 26Ngang üpwe föri ew pwonen kinamwe ngeniir; ew pwonen kinamwe epwe nónnóm tori feilfeilló chök. Ngang üpwe äfeffeitäär o achómmóngereló. Iwe, ngang üpwe anómwu leiir imwei we mi pin tori feilfeilló chök. 27Iwe, ngang üpwe imweimw reer; ngang üpwe ar Kot, nge iir repwe neii aramas. 28Mwirin, chón ekkewe mwüü repwe silei pwe ngang ewe SAMOL üwa föri pwe Israel epwe pin, lupwen imwei mi pin a nónnóm leiir tori feilfeilló chök.’ ”

Än ewe SAMOL win mi lapalaap wón ekkewe mwüü

38Pwal iei ew poraus seni ewe SAMOL a toriei. A apasa: 2“Nöün aramas, kopwe äsepa wón mesom ngeni Kok, seni ewe fönü Makok, ewe samol mi tekia a nemeni ekkewe mwüün Meshek me Tubal. Iwe, kopwe oosuni ngeni usun an epwe feiengaw, 3o apasa: ‘Iei meet ewe SAMOL KOT a apasa: Ngang üwa üüngenuk, en Kok, ewe samol mi tekia ka nemeni ekkewe mwüün Meshek me Tubal. 4Ngang üpwe okullusäfäliik o aköököw ngächum pwe üpwe emmwenukowu ngeni óm feiengaw. Ngang üpwe ochufengeni noum mwiichen sounfiu meinisin - noum óris, ekkewe chón waawa óris mi üföüf üföüfen maun me ew mwiichen sounfiu mi chómmóng fän ar pisekin eppetin feiengaw mi wätte me kükkün, iir meinisin mi ächewechewa nöüür ketilas. 5Chón Persia, chón Ethiopia me chón Put repwe pwal chiechi ngenuk, iir meinisin fän ar pisekin eppetin feiengaw me imweer akkawen maun. 6Komer me nöün mwiichen sounfiu meinisin repwe pwal chiechi ngenuk, pwal Beth Tokarma seni ewe kinikin mi nóm efeng fiti nöün mwiichen sounfiu meinisin repwe fituk. Chómmóng mwüü repwe fituk.

7“ ‘Kopwe mollotä; kopwe amollóketä me ewe mwiicheichen sounfiu meinisin mi mwiichfengen ünükkum o kopwe ar souemmwen. 8Mwirin chómmóng rän, en kopwe kö ngeni wiisom. Lón ekkewe ier repwe feitto, kopwe feilló o maun ngeni ew fönü mi chök kärään ngas seni maun. Aramasen ei fönü ra mwiicheto seni ekkewe mwüü mi chómmóng o liwinsäfälito wón ekkewe chukun Israel mi taaló o pöönüló lón fansoun langattam. Ekkeei aramas ra liwinito seni ekkewe mwüü, nge iei iir meinisin ra nónnóm lón kinamwe. 9Iwe, en me nöum kewe mwiichen sounfiu meinisin, pwal ekkewe mwiicheichen aramas seni chómmóng mwüü mi fituk, öüpwe feittä o tolong lón ewe fönü usun ew mölümöl; öüpwe pwölüweló ewe fönü usun ew kuchu.

10“ ‘Iei meet ewe SAMOL KOT a apasa: Lón ena rän, epwe wor ekiek repwe tolong lón ekiekum; iwe, en kopwe ekiekietä ew raaw mi ngaw. 11Iwe, kopwe apasa, “Ngang üpwe tööki ew fönü esap wor tittin wisópwósópwun kana; ngang üpwe maun ngeni ew mwiichen aramas mi nóm lón kinamwe o resap ösüküsükü pwe epwe wor och feiengaw epwe toriir, iir meinisin ra nónnóm lón telinimw esap wor tittiir, esap wor asamalaper me ammwöchüür. 12Ngang üpwe liäpeni pisekiir o uweereló, ngang üpwe pwal maun ngeni ekkewe leeni mi taaló me lóóm nge ra masowsäfäl ren aramas, üpwe pwal maun ngeni ekkewe aramas mi liwinsäfälito seni ekkewe mwüü, nge iei a wor nöüür pwiin maan me pisekiir, ra nóm lukalapen ewe fönü. 13Chón Sheba me chón Dedan pwal ekkewe chón amöömö me kamö pisek seni Tarshish me chón telinimwan kewe meinisin repwe eisinuk, “Ifa usun, ka feitto pwe kopwe liäpenaló pisek mi öüchea? Ifa usun, ka emwiichafengeni noum kewe mwiichen sounfiu pwe repwe sooläni pisek o uweeló silifer me kolt, repwe pwal angealó pwiin maan me pisek o liäpenaló chómmóng pisek?” ’

14“Iei minne, nöün aramas, kopwe oosuni o apasa ngeni Kok: ‘Iei meet ewe SAMOL KOT a apasa: Lón ena rän, lupwen neii kewe aramasen Israel ra nóonóm lón kinamwe lón fönüweer, ifa usun, kosap silei usun? 15En kopwe feitto seni lón leeniom mi nóm toowawetä efeng, en me chómmóng mwüü mi fituk, iir meinisin repwe waawa óris, ew mwiicheichen aramas mi chómmóng, ew mwiichen sounfiu mi pwora. 16Iwe, kopwe maun ngeni neii kewe aramasen Israel usun ew kuchu mi pwölüweló ewe fönü. Lón ekkewe fansoun repwe feitto, ngang üpwe emmwenukoto en Kok pwe kopwe maun ngeni fönüwei, pwe chón ekkewe mwüü repwe sileei lupwen ngang üpwe pwisin pwäärieiló me mwen meseer pwe ngang üwa pin ren meet epwe fis ngenuk.

17“ ‘Iei meet ewe SAMOL KOT a apasa: Ifa usun, sap en ätewe ngang üwa kapas usun lón ekkewe fansoun lóóm meren neii kewe chón angang ekkewe soufósun Israel? Lón ena fansoun, iir ra oosuni lón chómmóng ier pwe ngang üpwe emmwenukoto pwe kopwe maun ngeniir. 18Iwe, iei meet epwe fis lón ena rän: Lupwen Kok epwe maun ngeni ewe fönü Israel, äi soong mi pwichikkar epwe piitä, aloi ngang ewe SAMOL KOT. 19Pün lón ekimmóngun letipei me lón wätten äi lingeringer, ngang üwa apasa pwe lón na fansoun, epwe fis ew chechchechin fönü mi fókkun lapalaap me lón ewe fönü Israel. 20Ekkewe ikenen leeset, ekkewe maansüüsün fän läng, ekkewe mönün lemal, iteiten mönümanaw mi mwökütüküt wón pwül me aramas meinisin wón fönüfan repwe chechcheech me fän mesei. Ekkewe chuuk repwe söönüló, ekkewe achaw mi säpereper repwe mökkütiw, nge iteiten tiit meinisin repwe turutiw wón pwül. 21Ngang üpwe tiiti efóch ketilas pwe epwe efeiengawa Kok me wón chuki kewe meinisin. Ngang ewe SAMOL KOT üwa kapas. Nöün emön me emön kewe sounfiun Kok ketilas epwe efeiengawa en me pwisin chienan. 22Ngang üpwe awarato äi köpwüng wón Kok ren mätter me össükü chcha; ngang üpwe öpwüngätiw üttommóng me üten faaw pwal primston mi ngetenget wón Kok me nöün mwiichen sounfiu meinisin, pwal wón chón ekkewe mwüü mi chómmóng mi fiti. 23Iwe, epwe iei usun äi üpwe pwääri äi tekia me äi pin. Üpwe pwal föri pwe aramasen chómmóng mwüü repwe sileei lupwen repwe küna äi föri ekkeei mettóch. Mwirin, repwe silei pwe ngang ewe SAMOL.’

39“Nöün aramas, kopwe oosuni usun feiengawen Kok o apasa: ‘Iei meet ewe SAMOL KOT a apasa: Ngang üwa üüngenuk en Kok, ewe samol mi tekia ka nemeni ekkewe mwüün Meshek me Tubal. 2Ngang üpwe okullusäfäliik o etekinuk. Ngang üpwe emmwenukoto seni ewe fönü mi toowawetä efeng o tiinukóló pwe kopwe maun ngeni ekkewe chukun Israel. 3Mwirin, ngang üpwe pööni noum esefich seni pöüiimöngum o föri pwe noum kewe föün esefich repwe turutiw seni pöüiifichum. 4Iwe, kopwe mäló me wón ekkewe chukun Israel, en me noum mwiichen sounfiu meinisin, pwal chón ekkewe mwüü meinisin mi fituk. Iwe, ngang üpwe ngeni ekkewe sókkun machchang mi ochooch fituk me ekkewe maanmwacho pwe repwe ocheei soomämw. 5En kopwe mäló lón ekkewe leeni mi amassawa, pün ngang üwa fen apasa, ngang ewe SAMOL KOT üwa kapas. 6Ngang üpwe öpüngätiw ekkei wón Makok pwal wón peliom kewe mi nónnóm lón kinamwe lón ekkewe fönü mi nóm arosset. Mwirin, repwe silei pwe ngang ewe SAMOL.

7“ ‘Epwe iei usun äi üpwe pwääraló itei mi pin me leiin neii kewe aramasen Israel. Ngang üsap chüen mwüütätä pwe itei mi pin epwe küna turunufas, nge chón ekkewe mwüü repwe silei pwe ngang ewe SAMOL, ewe Emön mi Pin lón Israel. 8Nengeni ewe ränin köpwüng epwe war. Iei ewe ränin köpwüng epwe fókkun pwönüwetä. Iei ewe rän ngang üwa kapas usun. Ngang ewe SAMOL KOT üwa kapas.

9“ ‘Mwirin, ekkewe aramas mi nónnóm lón ekkewe telinimwen Israel repwe toowu o ionifengeni óm kewe pisekin maun - ekkewe pisekin eppetin feiengaw mi wätte me kükkün, ekkewe esefich me föün esefich, ekkewe nifötüföt me ekkewe siles, pwe repwe ääniir ömwüch. Lón üküükün fisu ier, iir repwe ääni ömwüch ekkewe pisekin maun. 10Resap osun ar repwe küüt ömwüch me lemal ika pöküpök ömwüch seni leiin ekkewe wöllap, pwokiten repwe chök ääni ömwüch ekkewe pisekin maun. Iwe, repwe liäpenaló fän pöchökkül pisekin chókewe mi ekieki pwe repwe angealó pisekiir fän pöchökkül, repwe pwal angei pwe choon wókuur pisekin chókewe mi angei pisekiir pwe choon wókuur me lóóm, ngang ewe SAMOL KOT üwa kapas.

11“ ‘Lón ena rän, ngang üpwe föri ew leenien peias mi fókkun wätte, fäniten Kok me nöün kana mwiichen sounfiu mi chómmóng, öötiwen ewe Setin Mäló lón ewe Leemól fäniten chón Sääi. Ei leenien peias epwe eppetaló ewe alen chón sääi ikenan, pwokiten Kok me nöün pwiin sounfiu meinisin repwe peias ikenan. Iei popun repwe siwili iten ewe leeni pwe epwe iteni, ewe Leemólun Hamon Kok.

12“ ‘Lón üküükün fisu maram ekkewe chón Israel repwe peiaseni ekkewe soomä fäniten ar repwe limeti ewe fönü. 13Meinisin aramasen ewe fönü repwe älillis fengen le peiaseniir, pün epwe ew ränin wiil fäniten Israel lupwen ngang üpwe pwääraló äi ling lón ena rän, ngang ewe SAMOL KOT üwa kapas. 14“ ‘Iwe, lesópwólón ekkewe fisu maram, repwe filätä ekkóch mwän pwe repwe limeti ewe fönü. Repwe fätälfeil leemelen ewe fönü o kütta ekkewe chüün soomä mi chüen nóm wón pwül.

Iwe, repwe peiaseniir pwe ewe fönü epwe limöchsäfäl. 15Lupwen repwe fätälfeil leemelen ewe fönü, nge emön me leiir epwe küna chüün emön aramas, iwe, i epwe fótuki och esissil ünükkün ewe chüün aramas tori än ekkewe chón ttu peias repwe feitto o küneer. Iwe, repwe angei ekkewe chüü o peiaseniir lón ewe Leemólun Hamon Kok. 16(Pwal ew telinimw itan Hamonah epwe nóm ikenan. Wewen Hamonah, pwiin aramas mi chómmóng.) Iwe, iei usun ar repwe limeti ewe fönü.’

17“Nöün aramas, iei meet ngang ewe SAMOL KOT üwa apasa: Kopwe kööri iteiten sókkun machchang me maanmwacho meinisin o apasa: ‘Öüpwe mwiichfengen o feitto seni ekis meinisin. Öüpwe feitto ngeni ewe chuulapen asór mi lapalaap ngang üpwe amollätä fänitemi. Ngang üpwe amollätä ew asór mi fókkun wätte wón ekkewe chukun Israel. Me ikenan, öüpwe ochooch fituk me wün chcha. 18Öüpwe ocheei fituken ekkewe mwän mi pwora o ünümi chaan ekkewe samolun fönüfan. Pün iir meinisin repwe ninniiló usun chök nge iir ekkewe ätemwänin siip me ekkewe liänifföön siip, ekkewe kuuch me ekkewe ätemwänin kowu, iir meinisin ekkewe maan mi öümanaw seni Bashan. 19Lón ewe kametipen asór ngang üwa amollätä fänitemi, öüpwe ochooch kiriis tori öüwa likoun, öüpwe pwal wün chcha tori öüwa pwulaas. 20Öüpwe ömötü kemi le ochooch ekkewe óris me ekkewe chón waawa óris, ekkewe mwän mi pwora me sakkopaaten sounfiu me wón äi we cheepel, ngang ewe SAMOL KOT üwa kapas.

21“Ngang üpwe pwääraló äi ling leiin ekkewe mwüü, nge chón ekkewe mwüü meinisin repwe küna ewe köpwüng üpwe awarato wóór, repwe pwal küna peii äi üpwe anómwu wóór. 22Iwe, seni ena rän feilló, chón Israel repwe silei pwe ngang ewe SAMOL ar we Kot. 23Nge chón ekkewe mwüü repwe silei pwe ekkewe aramasen Israel ra ooló fäniten ar tipis, pwokiten resap ölükülük ngeniei. Iei popun ngang üwa aopa wón mesei seniir o atolongeer lepöün chón opwuter kewe. Iwe, iir meinisin ra mäló ren ketilas. 24Ngang üwa öpwüngüür wón üküükün ar kewe limengaw me ar kewe pwuupwungaw, iwe ngang üwa aopa wón mesei seniir.

25“Iei minne, iei meet ngang ewe SAMOL KOT üwa apasa: Iei ngang üpwe eliwinisäfälieto Jakob seni an ooló. Ngang üpwe ääni tong ngeni ekkewe aramasen Israel meinisin, pün ngang üwa luukommóng wón itei we mi pin. 26Iwe, lupwen ekkewe aramasen Israel repwe nónnóm lón fönüwer fän kinamwe, pün esap chüen wor emön epwe eniwokkusuur, repwe möllükaló ar sääw me itengaw pwokiten ar resap ölükülük ngeniei. 27Iwe, lupwen ngang üpwe emmwenisäfäliireto seni ekkewe mwüü o ioniireto seni fönüwen ekkewe chón opwuteer, ngang üpwe pwääraló äi pin ren meet üwa föri fäniteer me fän mesen aramasen chómmóng mwüü. 28Mwirin, iir repwe silei pwe ngang ewe SAMOL ar we Kot, pün inamwo ika ngang üwa ösüüreló pwe repwe ooló leiin chón ekkewe mwüü, ngang üpwe ioniireto ngeni poputän fönüweer, nge üsap likitätiw emön an epwe nómwetiw lón ekkewe mwüü. 29Ngang üsap chüen aopa wón mesei seni ekkewe chón Israel, pün ngang üpwe niinätiw Ngüni wór, ngang ewe SAMOL KOT üwa kapas.”

Ew leenien imwenfel mi fö

40 Iwe, lón ewe rüwe me limuwen ierin äm ooló, lepoputän ewe ier, lón äengolun ränin ewe maram, iei ewe engol me rüwänüen ier, mwirin än ewe telinimw Jerusalem a taaló, lón ena rän, ngang üwa mengii pwe pöün ewe SAMOL a nóm wóói. Iwe, lón künäei we, i uweeiló ikenan ren ewe telinimw. 2Lón künäei we seni Kot, i a uweeiló ngeni ewe fönü Israel o anómwuei wón ew chuuk mi fókkun tekia. Iwe, leepekin ewe chuuk me peliöör, a wor ekkóch imw mi usun chök ew telinimw. 3Iwe, i a uweeiló ikenan, nge ngang üwa küna emön mwän, lapalapen inisin a usun chök piraas. A üütä lükün asamalapen tittin ewe telinimw fän och selippich mi pwech me efóch wókun öüküük i a kömwöch lón pöün. 4Iwe, ewe mwän a apasa ngeniei, “Nöün aramas, kopwe nengeni ren mesom o rong ren selingom o ekieki lón lelukom meinisin minne ngang üpwe pwääri ngenuk, pün iei popun Kot a uweeketo ikeei. Pün en kopwe aporausa ngeni chón Israel meinisin minne en ka küna.”

Asamalapen ewe tiiti mi säpe ngeni öötiw

5Iwe, ngang üwa küna ew tiit mi unusen pwellieló ewe leeni ia ewe imwenfel a nóm ie. Iwe, ewe mwän a angei ewe wókun öüküük, üküükün langattaman wonu mwalü me eang.a Iwe, ewe mwän a öükü ewe tiit; iwe, üküükün malüülün ewe tiit, efóch ewe wókun öüküük, nge üküükün tekian, pwal efóch ewe wókun öüküük.

6Mwirin, ewe mwän a feilló ren asamalapen ewe tiit mi säpe ngeni öötiw. Iwe, a pweretä wón ekkewe fassó o a öükü ewe leenien tolong lón asamalapen ewe tiit. Iwe, üküükün chöölapan, efóch wókun öüküük, nge üküükün ewe pwal ew leenien tolong soosolong pwal efóch wókun öüküük chöölapan. 7Iwe, a pwal öükü iteiten ekkewe kükkün ruumw, ruumwen ekkewe chón masen asamalapen ewe tiit. Iwe, üküükün langattameer me chöölapeer, efóch wókun öüküük, nge toowawen lefiilen etippen ekkewe ruumw, limu mwalü. Nge ükükün chöölapen ewe leenien tolong mi sooso ngeni ewe kengkang mi säpe ngeni ewe imwenfel, efóch wókun öüküük.

8Mwirin, ätewe a pwal öükü chöölapen ewe leenien tolong lón asamalapen ewe tiit me soosolong, üküükün efóch wókun öüküük. 9Mwirin, ätewe a öükü kengkangen ewe asamalap, iwe, üküükün walü mwalü, nge üküükün ökköün üren asamalapen ewe tiit kewe, ruu mwalü. Iwe, kengkangen ewe asamalap a säpe ngeni ewe imwenfel.

10Iwe, lón asamalapen ewe tiit mi säpe ngeni öötiw, a wor ökköülüngät ruumw leepekin me rüwepeek, nge üküükür ra chök wewe fengen. Iwe, etippen ekkewe ruum mi nóm leepekin ewe asamalap me rüepeek ra chök löllö fengen löllöör. 11Mwirin, ewe mwän a pwal öükü chöölapen wääwän ewe leenien tolong; Iwe, a küna pwe üküükün chöölapan, engol mwalü, nge üküükün langattaman, engol me ülüngät mwalü. 12Iwe, fän mesen ew me ew kewe rumwen chón mas, a wor ew me ew etiip, üküükün tekian, ew mwalü. Nge ekkewe ruumwen chón mas ra chök löllö fengen üküükün lanagattameer me chöölapeer, pün ra wonu mwalü. 13Mwirin, ätewe a öükü unusen chöölapen ewe asamalap, seni asen etiippen ew kewe ruumwen chón mas me lükünsökürün tori etiippen pwal ewe ew ruumw mi nóm äwenenewan me epeek. Iwe, üküükün chöölapan, rüwe me limu mwalü. Ew asam a nóm äwenewenen pwal ew asam. 14Ätewe a pwal öükü pwellin ünükkün ewe kengkang mi soosolong ngeni ewe leeni mi wätte lükün ewe imwenfel - wone mwalü. 15Üküükün langattamen unusen asamalapen ewe tiit, lime mwalü, seni esóp tori ewe pwal esóp. 16A wor asammwacho wón etippen ekkewe ruumw me lükün mi tiit ngeni mächä, a pwal wor asammwacho wón etippen ekkewe ruumw me lón. Nge a wor liossun ewe irä palm ra chipw wón etippen lón ekkewe ruumw.

Ewe leeni mi Kinewu seni Lükün ewe Imwenfel

17Mwirin, ewe mwän a emmwenieilong lón ewe leeni mi wätte o kinewu pwellin ünükkün ewe imwenfel. Me ikenan, ngang üwa küna ekkóch ruumw me ew leenien fätäl mi för seni faaw ra nóm ünükkün ewe leeni mi wätte lükün ewe imwenfel. A wor üküükün iliik ruumw leepekin ewe leenien fätäl. 18Ei leenien fätäl a pwereló ünükkün ekkewe asamalap, nge chöölapan a chök öppök ngeni langattamen ekkewe asamalap. Iei ewe leenien fätäl me fan. 19Mwirin, ewe mwän a öükü üküükün toowawan seni lón asamalapen ewe tiit me fan tori lükün ewe leeni mi kükkün o kinelong ngeni mwen ewe imwenfel. Iwe, üküükün toowawan, ipwükü mwalü me peliöötiwan pwal usun chök me peliefengin.

Asamalapen ewe tiit mi säpe ngeni efeng

20Mwirin, ewe mwän a öükü langattamen me chöölapen asamalapen ewe tiit mi säpe ngeni efeng mi pwerelong ngeni ewe leeni mi kinewu seni lükün ewe imwenfel. 21Iwe, lón asamalapen ei tiit mi säpe ngeni efeng, a pwal wor ülüngät ruumwen chón mas ra nóm epeek ewe asamalap pwal ülüngät wón ewe pwal eppek. Üküükün ekkewe etiip mi nóm lefiiler me kengkangan, ra usun chök üküükün ekkewe wón ewe äewin asamalap mi säpe ngeni öötiw. Üküükün langattamen asamalapen ei tiit mi säpe ngeni efeng, lime mwalü, nge üküükün chöölapan, rüwe me limu mwalü. 22Asammwachoon me kengkangan, pwal ekkewe liossun ewe irä palm mi chipw wón ra usun chök öüküükün ekkewe wón asamalapen ewe tiit mi säpe ngeni öötiw. A wor fisuw fassó mi feittä ngeni, a pwal wor kengkangan a nóm peekilongen ekkewe fassó. 23Ikeei wón ei peliefeng, a wor pwal ew asamalap mi säpelong ngeni ewe leeni mi kinelong ngeni mwen ewe imwenfel, usun chök ewe mi nóm wón ewe peliöötiw. Iwe, ewe mwän a öükü seni ew asamalap tori ewe pwal ew. Iwe, üküükün toowawen lefiilen ekkeei asamalap, ipwükü mwalü.

Asamalapen ewe tiit mi säpe ngeni Öör

24Mwirin, ewe mwän a emmwenieiló ngeni peliöörün ewe tiit. Iwe, üwa küna ew asamalap mi säpe ngeni öör. Iwe, ewe mwän a öükü asaman me kengkangan; iwe ra usun chök öüküükün ekkewe pwal ekkóch. 25A wor asammwachoon wón etippan usun chök pwal ekkewe ekkóch, a pwal wor ew kengkang ia ewe asamalap a suukuwu me ie ngeni ewe leeni mi kinewu seni lükün ewe imwenfel. Iwe, üküükün langattamen asamalapen ei tiit mi säpe ngeni öör, lime mwalü, nge üküükün chöölapan, rüwe me limu mwalü, usun chök pwal ekkewe ekkóch asamalapen ewe tiit. 26A pwal wor fisuw fassó mi feittä ngeni ei asamalap mi säpe ngeni öör. A pwal wor liossun ewe irä palm mi chipw wón ekkewe etiip mi refifeseni ekkewe ruumwen chón mas. 27Iwe, äwenewenen ewe asamalapen lükün, a wor pwal ew asamalap mi pwerelong ngeni ewe leeni mi kinelong ngeni mwen ewe imwenfel. Nge üküükün toowawen lefiilen ekkeei ruu asamalap, pwal ipwükü mwalü.

Ekkewe asamalap ngeni ewe Leeni mi kinelong ngeni ewe Imwenfel

28Mwirin, ewe mwän a emmwenieilong lón ewe leeni mi kinelong ngeni mwen ewe imwenfel, nge aia pwerelong me lón asamalapen ewe tiit mi säpe ngeni öör. Iwe, a öükü ei asamalap mi säpe ngeni öör, nge üküükün a usun chök ekkewe pwal ekkóch asamalap. 29Ekkewe ruumwen chón mas lón ei asamalap, ekkewe etiip mi refifeseni ekkewe ruumw me ewe kengkang ra wewe fengen chök üküükür me ekkewe pwal ekkóch. A pwal wor asammwacho pwellin ünükkn ewe kengkang me ewe leenien tolong. Iwe, üküükün langattamen ei asamalap, lime mwalü, nge üküükün chöölapan, rüwe me limu mwalü, usun chök ekkewe pwal ekkóch. 30(Mi wor kengkangen ekkewe asamalap mi säpelong ngeni ewe leeni mwen ewe imwenfel, üküükün langatameer, rüwe me limu mwalü, nge chöölapeer, limu mwalü.) 31Kengkangen ei asamalap a säpewu ngeni ewe leeni mi kinewu seni lükün ewe imwenfel. A wor liossun ewe irä palm ra rup wón üren ekkewe ruumw, nge a wor walüw fassó ra feittä ngeni ei asamalap.

32Mwirin, ewe mwän a emmwenieilong lón ewe leeni mi kinelong ngeni mwen ewe imwenfel mi nóm peliöötiwen ewe imwenfel. Iwe, a pwal öükü ewe asamalap mi säpe ngeni öötiw. Iwe, üküükün ei asamalap a usun chök pwal üküükün ekkewe ekkóch. 33Ekkewe ruumwen chón mas lón ei asamalap, ekkewe etiip mi refifeseni ekkewe ruumw me ewe kengkang ra wewe fengen chök üküükür me ekkewe pwal ekkóch. A pwal wor asammwacho pwellin ünükkn ewe kengkang me ewe leenien tolong. Iwe, üküükün langattamen ei asamalap, lime mwalü, nge üküükün chöölapan, rüwe me limu mwalü, usun chök ekkewe pwal ekkóch. 34Kengkangen ei asamalap a säpewu ngeni ewe leeni mi kinewu seni lükün ewe imwenfel. A wor liossun ewe irä palm ra chipw wón üren ekkewe ruumw, nge a wor walüw fassó ra feittä ngeni ei asamalap.

35Mwirin, ewe mwän a emmwenieiló ren ewe pwal ew asamalap mi säpe ngeni efeng o a pwal öükü ei asamalap. Iwe, üküükün ei asamalap a usun chök üküükün ekkewe pwal ekkóch. 36Ekkewe ruumwen chón mas lón ei asamalap, ekkewe etiip mi refifeseni ekkewe ruumw me ewe kengkang ra wewe fengen chök üküükür me ekkewe pwal ekkóch. A pwal wor asammwacho pwellin ünükkün ewe kengkang me ewe leenien tolong. Iwe, üküükün langattamen ei asamalap, lime mwalü, nge üküükün chöölapan, rüwe me limu, usun chök ekkewe pwal ekkóch. 37Kengkangen ei asamalap a säpewu ngeni ewe leeni mi kinewu seni lükün ewe imwenfel. A wor liossun ewe irä palm ra chipw wón üren ekkewe ruumw, nge a wor walüw fassó ra feittä ngeni ei asamalap.

Ekkewe ruumw fäniten amollätä ekkewe asór

38A wor ew ruumw fiti ew asamalapan ren ewe kengkang ren iteiten ew me ew kewe asamalapen lón, ia ra tölü ie ekkewe mönün asóren keek. 39Lón kengkangen ekkewe asamalap, a wor okkoruu cheepel ra nóm leepekin ewe asamalap me rüwepeek. Ra niieló ekkewe mönün asóren keek, mönün asóren tipis me mönün asóren pwuupwungaw me wón ekkeei cheepel. 40Nge lükün etippen kengkangen ewe asamalap, arap ngeni ekkewe fassó ren ewe asamalap mi säpe ngeni efeng, a wor ruu cheepel ünükkün ekkewe fassó me epeek, a pwal wor ruu me ewe pwal epeek. 41Iei popun a wor rüwänü cheepel lón ewe kengkang, a pwal wor rüwänü lükün ekkewe fassó. Iwe, a wor üküükün walüw cheepel ia ra niieló ie ekkewe mönün asór. 42Iwe, a pwal wor rüwänü cheepel ra för seni faaw mi fal fäniten ekkewe mönün asóren keek. Üküükün langattamen me chöölapen ew me ew ekkeei cheepel, ew esóp mwalü, nge üküükün tekian ew me ew, ew mwalü. Ra iseis wón ekkeei chepel ekkewe pisekin niieló ekkewe mönün asóren keek me ekkewe pwal ekkóch sókkun mönün asór. 43A pwal wor ächchipw mi rüwekeang, üküükün langattamen efóch me efóch, eang, ra ittiwetä wón etippen ewe kengkang. Nge ra iseis fituken ekkewe mönün asór wón ekkewe cheepel.

Ekkewe ruumw fäniten ekkewe Souasór

44Lón ewe leeni mi kinelong ngeni mwen ewe imwenfel, nge lükün ewe asamalapen lón, a wor ruu ruumw. Ew a nóm wón ewe peekin ia ewe asamalapen peliefeng a nóm ie, nge a säpe ngeni öör, nge ewe ew a nóm wón ewe peekin ia ewe asamalapen peliöör a nóm ie, nge a säpe ngeni efeng. 45Iwe, ewe mwän a apasa ngeniei, “Ewe ruumw mi säpe ngeni öör, iei ewe ruumw fäniten ekkewe souasór mi wiisen föri angangen lón ewe imwenfel. 46Nge ewe ruumw mi säpe ngeni efeng, iei ewe ruumw fäniten ekkewe souasór mi wiisen föri angangen ewe róngen asór. Ätekeei, iir nöün Zadok kewe mwän, pün iir chök me leiin ekkewe mwirimwirin Levi ra tongeni arapoto ngeni ewe SAMOL pwe repwe angang fän mesan.”

47Mwirin, ewe mwän a öükü ewe leeni mwen ewe imwenfel. Ei leeni a chök löllöfengen langattaman me chöölapan. Üküükün lanagattaman, ipwükü mwalü, pwal üküükün chöölapan, ipwükü mwalü. Nge ewe róngen asór a nóm mwen ewe imwenfel.

Ewe Imwenfel mi fö

48Iwe, ewe mwän a emmwenieiló ren kengkangen ewe imwenfel o a öükü etiipen fän mesen ewe kengkang. Iwe, a küna pwe ra chök löllö fengen üküükün ekkewe etiip, pün üküükün epeek me epeek, limu mwalü. Iwe, üküükün chöölapen ewe leenien tolong lón ewe imwenfel, engol me rüwänü mwalü, nge üküükün chöölapen etippen leepekin, ülüngät mwalü, epeek me epeek. 49Üküükün chöölapen ewe kengkang, rüwe mwalü, nge üküükün langattaman, engol me ew mwalü seni fän mesan tori lükün sökürün. A wor engol fassó ra feittä ngeni kengkangen ewe imwenfel, nge a pwal wor üür lón ewe asamalap, efóch a nóm epeek, pwal efóch a nóm eppek, ra nóm ren etiipen fän mesen ewe kengkang.

41Mwirin, ewe mwän a emmwenieilong lón ewe Leeni mi Pin, iwe, a öükü üren penkasaman kewe; iwe, üküükün öün efóch me efóch kewe üür, wolu mwalü. Efóch epeek, pwal efóch epeek. 2Nge üküükün wääwän ewe leenien tolong, engol mwalü. Üküükün chöölapen ekkewe etiipen fän mesan, limu mwalü epeek me epeek ewe leeneien tolong. A pwal öükü üküükün unusen ewe Leeni mi Pin. Iwe, üküükün langattaman, fääik mwalü, nge üküükün chöölapan, rüwe mwalü.

3Mwirin, ewe mwän a tolong lón ewe Leeni mi Unusen Pin o öükü üren penkasamen ewe leenien tolong. Iwe, üküükün öün efóch me efóch, ruu mwalü. Üküükün wääwän ewe leenien tolong, wonu mwalü, nge üküükün chöölapen ew me ew kewe etiipen fänmesen ewe leenien tolong, fisu mwalü. 4Mwirin, ewe mwän a öükü üküükün unusen ewe Leeni mi Unusen Pin. Iwe, üküükün langattaman, rüwe mwalü, nge üküükün chöölapan,rüwe mwalü, a refiref fesen me ewe Leeni mi Pin. Iwe, ewe mwän a apasa ngeniei, “Iei ewe Leeni mi Unusen Pin.”

5Mwirin, ewe mwän a pwal öükü üküükün malüülün etippen ewe imwenfel. Iwe, üküükün malüülün, wonu mwalü, nge üküükün chöölapen ew me ew kewe ruumw mi nóm wón ewe pwalang pwellin ükükkün ewe imwenfel, rüwänü mwalü. 6Iwe, a wor ülüngät sässärin ekkewe ruumw mi nóm pwellin lükün etippen ewe imwenfel, ew sässär a nóm wón pwal ew sässär. A wor iliik ruumw wón ew me ew sässär. A pwal wor feriwuun pwellin lükün etiippen ewe imwenfel, ra fis pwe lóngólóngun ekkewe irälap fän ekkewe ruumw, pün ekkewe irälap resap pwurolong lón etippen ewe imwenfel. 7Ewe sässärin asan a chöölap seni ewe ew sässär fan, pün a chök öppök ngeni chöökükkünülón etiipen ewe imwenfel lupwen a kikkinetä asan. A wor ew nattö a feittä leepekin ewe imwenfel, a feittä seni ewe sässärin fan o pweretä lón ewe sässärin lükalapan tori ewe sässärin asan.

8Iwe, üwa küna pwe a wor ew lóngólóng mi tekia a itiwu seni pwellin leepekin lükün ewe imwenfel, a fis pwe lóngólóngun ekkewe ruumw. Üküükün tekian ei lóngólóng, wonu mwalü. 9Iwe, üküükün malüülün etiipen ekkewe ruumw mi nóm leepekin ewe imwenfel, limu mwalü, nge chöölapen ewe leenien fätäl lefiilen ekkewe ruumw leepekin ewe imwenfel, 10me ekkewe ruumw fäniten ekkewe souasór, rüwe mwalü, unusen pwellin ewe imwenfel. 11A pwal wor ruu asam mi suukuwu seni ekkewe ruumw mi nóm leepekin ewe imwenfel. Ra säpewu ngeni ewe leeni mi imwuló leepekin ewe imwenfel. Ew asamalap a nóm peliefengin ewe imwenfel, nge ewe pwal ew a nóm peliöörün. Üküükün chöölapen ewe leenien fätäl lükün ekkewe ruumw, limu mwalü.

12Iwe, a wor ew imw mi säpe ngeni ewe leenien imwenfel me pelilotowun, üküükün chöölapan, fiik mwalü. Üküükün langattamen tittin ewe imw, tiwe mwalü nge üküükün maalülün ewe tiit, limu mwalü.

13Mwirin, ewe mwän a öükü ewe imwenfel; iwe, üküükün langattaman, ipwükü mwalü, nge ewe leeni lükünsökürün lotoun ewe imwenfel me ewe imw fiti fengen me tittin, pwal ipwükü mwalü. 14Iwe, üküükün chöölapen ewe leeni mi imuwló leepekin ewe imwenfel me peliöötiw, pwal pacholong fän mesen ewe imenfel, ipwükü mwalü.

15Mwirin, ewe mwän a öükü ewe imw mi säpe ngeni ewe leeni lükün sökürün ewe imwenfel pwal pacholong pwalangan kewe me rüwosópw. Iwe, üküükün langattaman, ipwükü mwalü. Etiipen ewe Leeni mi Pin me ewe Leeni mi Unusen Pin, pwal etiippen ewe kengkang mi säpe ngeni ewe leeni mwen ewe imwenfel, 16me etiippen ekkewe leenien tolong me ekkewe asammwacho mi tiit ngeni mächä pwal etiippen ekkewe pwalang ünükkün ekkewe ülüngät leeni, meinisin ra cheech ngeni paap mi mwirinnö. Seni fan feittä wón ewe ettip tori ekkewe asammwachcho, meinisin ra cheech ngeni paap mi mwirinnö 17Iwe, lón ewe leeni asen ewe asam mi suukulong ngeni ewe Leeni mi Unusen Pin, pwal wón unusen pwellin etiippen ewe Leeni mi Pin me ewe Leeni mi Unusen Pin, 18a wor liossun kerop me ewe irä palm ra chipw wóór. A wor liossun efóch irä palm a nóm lefiilen liossun rüwömön kerop, nge emön me emön kewe liossun kerop a wor ruu wón mesan. 19Ewe liossun wón mesen aramas a säpe ngeni liossun ewe irä palm me epeek, nge ewe liossun wón mesen emön laion a säpe ngeni pwal och liossun ewe irä palm me epeek. Ekkewe lioos ra chipw wón unusen etiippen lón ewe imwenfel meinisin. 20A wor liossun kerop me ewe irä palm wón etippen ewe Leeni mi Pin seni fan tori ewe leeni asen ewe leenien tolong.

21Asamen ewe Leeni mi Pin a usun lapalapen pwóór, pün a chöökükkün asan nge tekia leepekin. Iwe, pwal ina chök usun ren ewe asam mi nóm fän mesen ewe Leeni mi Unusen Pin, pün ra chök wewe fengen. 22Iwe, a wor ew róngen asór mi för seni mwüüch, üküükün tekian, ülüngät mwalü, nge üküükün chöölapan me langattaman ra chök wewe fengen, pün ra ruu mwalü. Pwokuukun kewe me lóngólóngun we, pwal leepekin kewe ra för seni mwüüch. Iwe, ewe mwän a apasa ngeniei, “Iei ewe cheepel mi nóm fän mesen ewe SAMOL.” 23Iir me ruu, ewe Leeni mi Pin me ewe Leeni mi Unusen Pin a wor asamer mi ku ökkörüwepeek. 24Ew me ew kewe asam a wor rüwepeek asaman mi sukkulong me sukkuwu. Ew asam nge a wor ruu peekin. 25Iwe, a wor liossun kerop me ewe irä palm ra chipw wón asamen ewe Leeni mi Pin, usun chök ekkewe mi chipw wón ekkewe etiip. Nge a wor ew siis mi för seni mwüüch a itiwu seni fän mesen ewe kengkang. 26Iwe, a wor asammawacho wón etippen ewe kengkang me rüwepeek, nge a pwal chipw liossun ewe irä palm leepekiir. A pwal wor siisin ekkewe ruumw mi nóm leepekin ewe imwenfel.

Ekkewe ruumw fäniten ekkewe souasór

42 Mwirin, ewe mwän a emmwenieiló ngeni peliefengin ewe imwenfel lón ewe Leeni mi Kinelong ngeni ewe imwenfel. Iwe, a emmwenieiló ren ekkewe ruumw mi ouwäreer ngeni ewe Leeni mi Kinewu seni lükün ewe imwenfel mi pwal ouwäreer ngeni ewe tittin lükün me peliefeng. 2Iwe, üküükün langattamen ewe imw asaman mi säpe ngeni efeng, ipwükü mwalü, nge üküükün chöölapan, lime mwalü. 3Ew tettelin ruumw ra säpelong ngeni ewe Leeni mi Kinelong ngeni leepekin ewe imwenfel. Üküükün chöölapen ewe Leeni mi Kinelong ngeni leepekin ewe imwenfel, rüwe mwalü. A pwal wor ew tettelin ruumw ra säpewu ngeni ewe leenien fätäl mi för seni faaw lón ewe Leeni mi Kinewu seni lükün ewe imwenfel. Me ruu ekkewe tettelin ruumw a wor pwalangeer me rüwepeek, nge iteiten ekkewe pwalang a wor ülüngät sässärin. 4Mwen ekkewe ruumw, a wor ew leenien fätäl, üküükün chöölapan, engol mwalü, nge üküükün langattaman, ipwükü mwalü. Asamen ekkewe ruumw ra säpe ngeni efeng. 5Iwe, ekkewe ruumwen asan ra chöökisikiis seni chööchön ekkewe ruumwen fan, pün ekkewe pwalang ra chööwätte me asan lap seni ekkewe ruumwen fan me ruumwen lukalapan. 6Esap wor üren ekkewe ruumw mi nóm wón ewe öülüngätin sässär, usun chök ekkewe ruumw mi nóm lón ewe leeni lükün ewe imwenfel. Iei popun ekkewe ruumwen asan ra wääkükkün seni ekkewe ruumw mi nóm wón ewe sässärin fan me sässärin lukalapan. 7A wor ew tittin lükün mi ouwäreer ngeni ekkewe ruumw me ewe Leeni mi Kinewu seni lükün ewe imwenfel. Ei tiit a pengesiló mwen ekkewe ruum wón üküükün lime mwalü. 8Üküükün langattamen ewe telin ruumw mi soosowu ngeni ewe Leeni mi Kinewu seni lükün ewe imwenfel, lime mwalü, nge üküükün langattamen ewe telin ruumw mi soosolong ngeni leepekin ewe imwenfel, ipwükü mwalü. 9A wor ew leenien tolong ngeni ekkewe ruumwen fan, a wene ngeni öötiwen ewe leeni lükün ewe imwenfel, pwe emön a tongeni tolong lón ekkewe ruumw seni ewe Leeni mi Kinewu seni lükün ewe imwenfel.

10A pwal wor telin ruumw mi nóm peliöörün ewe imwenfel ra teliló ünükkün tittin ewe leeni lükün ewe imwenfel. Ekkeei telin ruumw ra sooso ngeni ewe leeni leepekin ewe imwenfel, nge ra ouwäreer ngeni ewe tittin lükün unusen ewe leeni. 11A wor ew leenien fätäl fän mesen ekkewe ruumw. Ekkeei ruumw ra usun chök ekkewe ruumw mi nóm peliefeng. A löllö fengen langattameer me chöölapeer, a pwal wewe fengen ar leenien toowu me tolong, a pwal wewe fengen öüküüküür. Asamen ekkewe ruumw mi nóm peliefeng ra wewe fengen, 12me asamen ekkewe ruumw mi nóm peliöör. Iei usun a wor ew asam a nóm lepoputän ewe leenien fätäl mi ouwäreer ngeni ewe tiit o pwereló ngeni peliöötiw. Iei ei asam emön a tongeni tolong lón ekkewe ruumw me lón.

13Mwirin, ewe mwän a apasa ngeniei, “Ekkewe ruumw mi nóm peliefeng me peliöör o säpe ngeni ewe Leeni mi Kinelong ngeni ewe imwenfel, ikkeei ruumwen ekkewe souasór, ia ekkewe souasór mi angang ngeni ewe SAMOL repwe mwöngö me ie ekkewe asór mi unusen pin. Repwe iseis ikenan ekkewe asór mi unusen pin - ekkewe asóren mwöngö, ekkewe asóren tipis me ekkewe asóren pwuuwungaw, pün ewe leeni a pin. 14Lupwen chök ekkewe souasór ra tolong lón ewe kinikinin leeni mi pin, resap toowu lón ewe Leeni mi Kinewu seni lükün ewe imwenfel tori ar repwe pwilitätiw üfeer kewe mi pin ra üföüf lupwen ra föri ar angang ngeni Kot, pün ekkeei üüf ra pin. Iwe, repwe üföüf pwal ekkóch üüf me mwen ar repwe arap ngeni ekkewe leeni ia aramas ra nóm ie.”

15Iwe, lupwen ewe mwän a wes le öükü meet mi nóm lón kinikinin ewe leeni ia ewe imwenfel a nóm ie, a emmwenieiwu ren asamalapen ewe tiit mi säpe ngeni öötiw, pwe epwe öükü unusen pwellin ewe leeni. 16Iwe, a öükü peliöötiwen ewe Leeni mi Kinewu seni lükün ewe imenfel ren ewe wókun öüküük. Iwe, üküükün langattamen ewe leeni, limöpwükü mwalü. 17Iwe, a pwal öükü ewe Leeni mi Kinewu seni ewe imwenfel me peliefeng. Iwe, üküükün langattaman, limöpwükü mwalü me wón ewe wókun öüküük. 18Iwe, a pwal öükü ewe Leeni mi Kinewu seni ewe imwenfel me peliöör. Iwe, üküükün langattaman, limöpwükü mwalü me wón ewe wókun öüküük. 19Mwirin, ätewe a säpe ngeni pelilotow o a öükü ewe Leeni mi Kinewu seni ewe imwenfel. Iwe, üküükün langattaman, limöpwükü mwalü wón ewe wókun öüküük. 20Iei usun än ewe mwän a öükü leepekin ewe Leeni mi Kinewu seni ewe imwenfel me rüwänü. A wor ew tiit a pwelli ünükkün ewe leeni. Üküükün langattaman, limöpwükü mwalü, nge üküükün chöölapan, limöpwükü mwalü. I a föri ei, pwe epwe refiieló ewe leeni mi pin seni ewe leeni esap pin.

Ewe lingen Kot a liwinsäfäl ngeni ewe Imwenfel

43Mwirin, ewe mwän a emmwenieiló ren asamalapen ewe tiit mi säpe ngeni öötiw. 2Iwe, ngang üwa küna lingen ewe Koten Israel a feitto seni öötiw. Üngüüngün an feitto a usun chök üngüüngün nóónón lemataw, nge unusen ewe fönü a saramaram ren lingan. 3Künäei ei ngang üwa küna a usun chök pwal künäei we üwa küna, lupwen Kot a feitto pwe epwe ataeló ewe telinimw Jerusalem, pwal usun chök künäei we üwa küna me órun ewe chaanpwuupwu Kebar. Iwe, üwa chappetiw leppwül me mwan. 4Iwe. lingen ewe SAMOL a tolong lón ewe imwenfel me lón asamalapen ewe tiit mi säpe ngeni öötiw. 5Mwirin, ewe Ngüün a ekiieitä o uweeilong lón ewe Leeni mi Kinelong ngeni mwen ewe imwenfel, nge lingen ewe SAMOL a ouraaló lón ewe imwenfel.

6Lupwen ewe mwän a üütä ünükki, ngang üwa rongorong än emön a kapas ngeniei seni lón ewe imwenfel. 7Iwe, a apasa: “Nöün aramas, iei ewe leeni fäniten äi we leenien móótun king me ewe leeni fäniten pwuun pecheei. Iei ewe leeni ia ngang üpwe nónnóm ie leiin ekkewe chón Israel tori feilfeilló chök. Ekkewe chón Israel resap chüen elimengawa itei mi pin ren ar föfförün lisowu le fel ngeni ekkewe uluulun önümwäl esap wor manaw lóór, ika ren ar öüüwetä leenien ächchem wón ekkewe leeni mi tekia fäniten ar kewe king mi mäló, 8ika ren ar anómwu imweer lükün imwei, pwe asamalapen imweer me penkasamer ra arap ngeni asamalapen imwei me penkasaman, pwe a wor ew chök tiit mi refifeseni lefiilei me iir. Iir ra elimengawa itei mi pin ren ar kewe föfför mi enniopwut. Iei popun ngang üwa aroseereló lón äi soong. 9Iei, iir repwe pöütaló ar kewe uluulun önümwäl me ar kewe üür mi pin ra öüüretä fäniten ar kewe king esap wor manaw lóór. Mwirin, ngang üpwe nónnóm leiir tori feilfeilló chök.

10“Nöün aramas, kopwe äiti ngeni ekkewe chón Israel lapalapen me liossun ei imwenfel ngang üwa pwääri ngenuk. Kopwe üreniir usun lapalapan me akkóótan pün repwe ekieki usun o repwe sääw ren ar kewe tipis meinisin. 11Mwirin, are repwe sääw ren meinisin minne ra föri, iwe, kopwe äiti ngeniir lapalapen liossun ei imwenfel - usun akkóótan, leenien toowu me leenien tolong - unusen lapalapan, pwüngün me öllükün meinisin. Kopwe makkeetiw ekkeei mettóch me mweer, pwe repwe ölükülük ngeni lapalapen ewe lioos o föri pwüngün ekkewe öllük meinisin.

12Iwe, iei lóngólóngun öllükün ei imwenfel: Epwe unusen pin. Unusen pwellin kinikin leenian me wón ungen ewe chuuk epwe unusen pin. Iei usun öllükün ewe imwenfel.”

Ewe róngen asór a för säfäl

13“Iwe, ikkeei öüküükün ewe róngen asór mi öüküükük wón mwalü (ew mwalü a wewe ngeni ew mwalü me eanga): Mi wor lóngólóngun ewe róngen asór, üküükün tekian, ew mwalü, üküükün chööchön aamen leepekin, pwal ew mwalü, nge üküükün tekiatän lepökün pwellin wón aaman kewe, eang. Iwe, iei üküükün tekian ewe róngen asór: 14Seni ewe lóngólóng wón pwül feittä tori ewe sässärin fan, üküükün tekian, ruu mwalü, nge üküükün chöölapen aamen leepekin, esóp mwalü. Iwe, seni ewe sässärin fan feittä tori ewe sässärin lukalapan mi wätte seni, üküükün tekian, rüwänü mwalü, nge üküükün chöölapen aamen leepekin, ew mwalü. 15Iwe, üküükün tekian ewe róngen asór, iei ewe kinikin ia a nóm ie ewe leenien ekkei, rüwänü mwalü. Iwe, a wor fófóch usun mächään maan ra ititä seni wón ekkewe rüwänü pwokuukun ewe leenien ekkei. 16A chök löllöfengen langattamen me chöölapen ewe róngen asór, ia ewe leenien ekkei a nóm ie, pün üküükün langattaman, engol me ruu mwalü, nge üküükün chöölapan, pwal engol me ruu mwalü. 17Ewe sässärin asen ewe róngen asór a pwal löllöfengen langattaman me chöölapan, pün üküükün langattaman, engol me rüwänü mwalü, nge üküükün chöölapan, pwal engol me rüwänü mwalü. A wor ew aamen pwellin ünükkün, üküükün esóp mwalü, nge üküükün tekiatän leepökün pwellin wón aaman, ew mwalü. A wor natöön ewe róngen asór ra säpe ngeni öötiw.

18Mwirin, i a apasa ngeniei, “Nöün aramas, iei meet ngang ewe SAMOL KOT üwa apasa: ‘Ikkeei ekkewe öllük fäniten angangen ekkewe asóren keek me ewe angangen äsupwu chcha wón ewe róngen asór lupwen epwe wes le för. 19En kopwe angei emön liälifföön ätemwänin kowu pwe ew asóren tipis. Iwe, kopwe ngeni ekkewe souasór seni ewe einangen Levi, iir mwirimwirin Zadok, mi feitto pwe repwe föri ei angang fän mesei. Ngang ewe SAMOL KOT üwa kapas. 20Nge en kopwe angei ekis seni chaan ewe mönün asór o tóófätä wón ekkewe fófóch mächä mi nóm wón pwokuukun ewe róngen asór, pwal wón ekkewe rüwänü pwokuukun ewe sässärin asan, pwal wón unusen pwellin aaman. Epwe iei usun óm kopwe limeti ewe róngen asór o föri omwusomwusen tipis fänitan. 21Mwirin, en kopwe angei ewe ätemwänin kowu fäniten ewe asóren tipis o keni me lón ewe leeni mi kefilitä me lükün ewe imwenfel me lón ewe kinikinin leeni ia ewe imwenfel a nóm ie.

22Iwe, lón ewe oruuwen rän, en kopwe ääni asór emön ätemwänin kuuch esap wor terin fäniten ew asóren tipis. Iwe, ewe róngen asór epwe limelim usun chök an limelim ren ewe ätemwänin kowu. 23Iwe, lupwen kopwe wes le limeti ewe róngen asór, en kopwe ääni asór emön liälifföön ätemwänin kowu me emön ätemwänin siip seni leiin ewe pwiin maan, nge iir me rüwömön esap wor teriir. 24En kopwe uweereto fän mesei ngang ewe SAMOL, nge ekkewe souasór repwe amworomworätä salt wóór o ääniir asór pwe ew asóren keek ngeniei, ngang ewe SAMOL.

25Lón üküükün fisu rän, en kopwe awora emön ätemwänin kuuch iteiten rän pwe ew asóren tipis. En kopwe pwal awora emön liälifföön ätemwänin kowu me emön ätemwänin siip seni ewe pwiin maan, nge iir me rüwömön esap wor teriir. 26Iwe, lón üküükün fisu rän, ekkewe souasór repwe föri asóren omwusomwusen tipis fäniten ewe róngen asór o limeti. Iei usun ar repwe äimwüeló ewe róngen asór pwe epwe pin. 27Iwe, lesópwólón ekkeei rän, seni ewe awalüwen rän feilló, ekkewe souasór repwe poputä le ääni ämi kewe asóren keek me asóren kinamwe. Mwirin, ngang üpwe etiwa kemi, ngang ewe SAMOL KOT üwa kapas.

Ewe angangen wiisen souasór a fis säfäl

44Mwirin, ewe mwän a emmweni-säfälieiló ngeni asamalapen tittin ewe Leeni mi Kinewu seni lükün ewe imwenfel, ewe ew mi säpe ngeni öötiw, nge ewe asamalap a kesip. 2Iwe, ewe SAMOL a apasa ngeniei, “Ei asamalap epwe chök kesipeló; esap fókkun suuk, pün esap wor emön epwe tongeni tolong me lón. Epwe chök kesipeló pwokiten ngang ewe SAMOL, ewe Koten Israel, üwa fen tolong me lón. 3Nge ewe samol chök wón an epwe tongeni móót lón asamalapen ewe tiit pwe epwe mwöngö me mwei ngang ewe SAMOL. Ewe Samol epwe tolong me lón kengkangen asamalapen ewe tiit o epwe pwal chök toowu me lón.”

4Mwirin, ewe mwän a emmwenieiló ngeni mwen ewe imwenfel, nge äm aia pwerelong me lón asamalapen ewe tiit mi säpe ngeni efeng. Iwe, ngang üwa attololó nge üwa küna lingen ewe SAMOL a ouraaló än ewe SAMOL we imwenfel. Iwe, üwa chappetiw lepwül.

5Iwe, ewe SAMOL a apasa ngeniei, “Nöün aramas, kopwe nengeni fichi ren mesom, kopwe öüselingöch ren selingom, kopwe pwal tümwünüfichi ekkewe mettóch meinisin ngang üpwe ürenuk fänäsengesin ekkewe öllük meinisin fäniten äi we imwenfel. Pün kopwe tümwünüfichi óm kopwe silei ika iö epwe tüfichin tolong lón ewe imwenfel ika iö esap tüfichin tolong. 6Kopwe apasa ngeni ekkewe chón Israel mi üleförea, ‘Iei meet ewe SAMOL KOT a apasa: Ämi chón Israel, ngang üwa ku ren ämi kewe föfför mi enniopwut. 7Kapachetä ngeni ämi kewe föfför mi enniopwut meinisin, ämi öüwa mwüüt ngeni ekkewe chón ekis resap sirkomsais pwe repwe tolong lón äi we leeni mi pin. Iir ekkewe resap öüchcheani Kot lón leluker. Ren ei lapalap, ämi öüwa epiningawa äi we imwenfel o atai äi we pwon, inamwo ika ämi öüwa ääni asór ngeniei mwöngö, kiriis me chcha. 8Ämi öüwa ewiisa ngeni ekkóch pwe repwe föri angangen lón äi we leeni mi pin, nge fen ämi öüsap föri wiisemi fänäsengesin äi kewe mettóch mi pin. 9Iwe, iei meet ngang ewe SAMOL KOT üwa apasa: Esap wor emön chón ekis seni leiin chókana mi nónnóm leiin ekkewe aramasen Israel, epwe tongeni tolong lón äi we leeni mi pin, are resap mwo sirkomsais o resap echeni ewe SAMOL.

10“ ‘Nge ekkewe mwän seni ewe einangen Levi mi likitieiló melóóm lupwen ekkewe chón Israel ra tókkóló seniei o angang ngeni ar kewe uluulun önümwäl, iir repwe mwärelong fän chappen ar tipis. 11Iir ra chüen tongeni kefilitä pwe repwe chón mas lón äi we imwenfel me chón masen ekkewe asamalap o angang lón ewe imwenfel. Iir ra pwal chüen tongeni niieló ekkewe mönün asór fäniten ekkewe asór me ekkewe asóren keek fäniten ekkewe aramas. Iir ra pwal tongeni nóm pwe repwe wiisen älisi ekkewe aramas o angang ngeniir. 12Nge pwokiten ekkewe mwän seni ewe einangen Levi ra peseei ekkewe aramasen Israel pwe repwe fel ngeni pwal ekkóch kot o föri pwe repwe turulong lón tipis mi alóllóól; ra pwal älisi ekkewe aramas pwe repwe fel ngeni ar kewe uluulun önümwäl, iei popun ngang üwa eitietä peii o pwon fän ökköpöl pwe iir repwe mwärelong fän chappen ar tipis. 13Iir resap fókkun kaneto pwe repwe angang ngeniei lón wiiser wiisen souasór, resap pwal kkan ngeni och me leiin äi kewe mettóch mi pin ika äi kewe asór mi pin. Iir repwe fókkun mwärelong fän sääwin ar kewe föfför mi enniopwut. 14Nge ngang üpwe mwüüt ngeniir pwe repwe wiisen tümwünü ewe imwenfel. Iir repwe chón tümwünü ewe imwenfel o föri ekkewe mettóch repwe för me lón o älisi ekkewe aramas.

15“ ‘Nge ekkewe souasór, iir ekkewe mwän seni ewe einangen Levi me mwirimwirin Zadok, iir ekkewe mi ölükülük le föri angangen lón leeniei we mi pin lupwen ekkewe chón Israel ra tókkóló seniei, iir repwe feitto pwe repwe angang me mwei. Iir repwe üütä mwei pwe repwe asór ngeniei kirissin me chaan ekkewe mönün asór, ngang ewe SAMOL KOT üwa kapas. 16Iir chök repwe tongeni tolong lón äi we leeni mi pin. Iir chök repwe tongeni kaneto ngeni äi we cheepel pwe repwe angang me mwei o föri äi kewe angang.

17“ ‘Iwe, lupwen repwe tolong lón asamalapen ewe Leeni mi Kinelong ngeni mwen ewe imwenfel, repwe üföüf üüf mi pwechepwech, nge resap fókkun üföüf och üüf mi för seni ünen siip lupwen repwe föri ar angang lón ewe Leeni mi Kinelong ngeni mwen ewe imwenfel ika lón ewe imwenfel. 18Iir repwe imweimw akkaw mi för seni mangaku mi pwechepwech wón möküreer, repwe pwal aea rasuses mi för seni mangaku mi pwechepwech. Nge iir resap fókkun üföüf och üüf epwe efisätä ar repwe moolool. 19Nge me mwen ar repwe toowu lón ewe Leeni mi Kinewu seni lükün ewe imwenfel ia ekkewe aramas ra nóm ie, repwe pwilitätiw ekkewe üüf ra üföüf lupwen ra föri ar angang. Iwe, repwe likitätiw ekkewe üüf lón ekkewe ruumw mi pin o üföüfolong ekkóch üüf. Ren ei, resap efeiengawa ekkewe aramas ika repwe attapa ekkewe üüf mi pin.

20“ ‘Ekkewe souasór resap räisööló meeten möküreer ika alangattama meeten möküreer, nge repwe chök ätääriochei fichin möküreer. 21Esap wor emön souasór epwe wün wain me mwen an tolong lón ewe Leeni mi Kinelong ngeni mwen ewe imwenfel. 22Ekkewe souasór resap pwülüweni ekkewe fefin mi mä pwülüweer ika mwüü seni pwülüweer. Repwe chök tongeni pwülüweni ekkewe föpwül resamwo tori mwän iir mwirimwirin chón Israel ika emön fefin mi mä pwülüwan nge i emön souasór. 23Iir repwe äiti ngeni neii kewe aramas ar repwe älefiila lefiilen minne mi pin me minne esap pin. Repwe pwal pwääri ngeniir usun ar repwe tongeni älefiila lefiilen minne mi limengaw me minne mi limöch.

24“ ‘Ekkewe souasór repwe fis pwe iir souköpwüng lón och fitikoko o repwe wiisen filätä pwüngün köpwüng alóngólóng wón äi kewe öllük. Iir repwe tümwünüfichi le öpwönüwetä äi kewe öllük me äi kewe pwüüng fäniten äi kewe fansoun chuulap meinisin mi kefilitä. Iwe, repwe pwal öpwönüwetä pinin äi kewe ränin Sabbat.

25“ ‘Emön souasór esap elimengawa pwisin i ren an epwe kkan ngeni emön aramas mi mäló. Nge are ewe aramas mi mäló i saman ika inan, nöün mwän ika nöün fefin, pwiin ika fefinan esap mwo pwüpwülü, mwirin, i a tongeni an epwe pwisin elimengawa. 26Nge mwirin an epwe limöchsäfäl, i epwe fókkun witiwit lón üküükün fisu rän. 27Iwe, lón ewe rän i epwe tolong lón ewe Leeni mi Kinelong ngeni mwen ewe imwenfel pwe epwe föri an angang lón, i epwe ääni asóren tipis pwisin fänitan, ngang ewe SAMOL KOT üwa kapas.

28“ ‘Iwe, ngang üpwe fis pwe ina chök inetin ekkewe souasór. Öüsap ngeniir och fönüwer me lón Israel, pün ngang üpwe fis pwe ina fönüweer. 29Iir repwe mwöngö seni ekkewe asóren mwöngö, asóren tipis, pwal seni ekkewe asóren pwuupwungaw. Iwe, meinisin mettóch mi käimwüüló me lón Israel fänitei ngang ewe SAMOL, epwe än ekkewe souasór. 30Minne a koon mwirinnö seni meinisin me lón ämi kewe mwen uwa me ämi kewe sókkun liffang meinisin repwe än ekkewe souasór. Öüpwe ngeni ekkewe souasór ewe akkomwen kinikinin pwooniemi föün wiit, pwe ew feiöch epwe sootiw wón chón leimwemi. 31Ekkewe souasór resap fókkun ochooch fituken och mettóch, ese lifilifil ika emön machchang ika emön maan iir ra küna nge a mäló ika maanmwacho a niieló.”

Inetin ewe fönü

45“‘Iwe, lupwen öüpwe eineti ewe fönü ren pwüngün ütüüt pwe fönüwen ekkewe einangen Israel, öüpwe ngeni ewe SAMOL ew kinikinin ewe fönü pwe epwe ew kinikinin fönü mi pin. Üküükün langattamen ei kinikin, 25,000 mwalü, nge üküükün chöölapan, 20,000 mwalü.a Unusen ei leeni epwe pin. 2Nge öüpwe äimwüeló och kinikin mi amassawa seni lón ei kinikinin fönü mi pin fäniten ewe imwenfel. Üküükün langattaman me chöölapan repwe chök löllöfengen, pün epwe 500 mwalü.b Iwe, epwe pwal wor och kinikinin fönü mi amassawa pwellin ünükkün epwe kapachetä me lükün, üküükün chöölapan, 50 mwalü. 3Lón ewe kinikinin fönü wätte mi pin, öüpwe öükaló pwal och kinikin, üküükün langattaman, 25,000 mwalü, nge üküükün chöölapan, 10,000 mwalü.c Ewe imwenfel, ia ewe Leeni mi Unusen Pin epwe nóm ie epwe nóm lón ei kinikin. 4Ei kinikinin epwe käimwüló pwe iei ew kinikinin fönü mi pin fäniten ekkewe souasór mi föri angangen lón ewe leeni mi pin o kaneto pwe repwe föri ar angang mwei, ngang ewe SAMOL. Ei kinikinin fönü epwe ew leeni fäniten imwen ekkewe souasór, epwe pwal ew leeni mi pin fäniten ewe imwenfel. 5Pwal ew kinikinin ewe leeni ünükkün ei epwe fönüwen chón ewe einangen Levi mi angang lón ewe imwenfel. Epwe iei fönüweer fäniten ar telinimw pwe repwe nónnóm lón. Üküükün langattamen ei kinikin, 25,000 mwalü, nge üküükün chöölapan, 10,000 mwalü.

6“ ‘Iwe, öüpwe pwal äimwüeló ew kinikinin fönü leepekin ewe leeni mi pin fäniten ewe telinimw. Üküükün chöölapan, 5,000 mwalü, nge üküükün langattaman, 25,000 mwalü. Ei kinikin epwe ew telinimw fäniten ese lifilifil iö chón Israel a tongeni feitto o nóm ie.

7“ ‘Iwe, ewe samol epwe fönüweni ekkewe ruu kinikinin fönü mi nóm leepekin me rüwepeek kiään ewe kinikinin fönü mi pin me ewe kinikinin fönü fäniten ewe telinimw. Ew kinikinin fönüwen ewe samol epwe keiiló ngeni lotow seni pelilotowun kiänin ewe fönü mi pin me ewe fönü fäniten ewe telinimw. Nge ewe pwal ew kinikin epwe keiiló ngeni öötiw seni peliöötiwen kiänin ewe fönü mi pin me ewe fönü fäniten ewe telinim. Iwe, kiänin aseer epwe sä seni lotow ngeni öötiw nge epwe ouwäreer fengen me kiänin fönüwen ew kewe einangen Israel, pwal usun chök ren kiänin me fan pün epwe pwal ouwäreer fengen me kiänin fönüwen ew kewe einang. 8Ei kinikinin fönü epwe iei fönüwen ewe samol me lón Israel. Iwe, neii kewe samol resap chüen eriäfföwü neii kewe aramas, nge repwe mwüüt ngeni ekkewe chón Israel pwe repwe fönüweni ewe fönü alóngólóng wón inetin ar kewe einang.”

9“ ‘Pün iei meet ewe SAMOL KOT a apasa: Ämi ekkewe samolun Israel, a koon selüküló ämi kewe föfför mi ngaw. Öüpwe emmwen seni ämi kewe föfförün mwänesol me ämi angangen eriäfföwü aramas, nge öüpwe föri meet mi pwüng o wenechchar. Öüpwe ükütiw le ösüüweló neii kewe aramas seni fönüweer, ngang ewe SAMOL KOT üwa kapas. 10Öüpwe nöünöü kilo mi pwüngüöch, öüpwe aea öüküük mi pwüngüöch fäniten mettóch mi pwasapwas me mettóch mi nöönö. 11Ewe öüküükün mettóch mi pwasapwas me ewe öüküükün mettóch mi nöönö repwe chök wewe fengen üküüküür. Ewe leenien öüküükün mettóch mi pwasapwas epwe masoweni üküükün ew naengolun ew homer, nge ewe leenien öüküükün mettóch mi nöönö epwe masoweni üküükün ew naengolun ew homer. Ewe öüküük homer epwe iei lóngólóngun ämi öüküük fäniter me ruu. 12Ewe shekel epwe masoweni üküükün rüwe kera. Nge rüwe shekel kapach rüwe me limuw shekel kapach engol me limuw shekel epwe wewe ngeni ew mina.”

13Iei üküükün ewe och sókkun asór öüpwe ääni: ew nawonuwen ew efaa seni iteiten ew homerb kiniiemi wiit, pwal ew nawonuwen ew efa seni iteiten ew homer kiniiemi parli. 14Ewe üküükün apüra mi för seni föün olif öüpwe ääni asór epwe öüküük wón bath.c Öüpwe ääni asór ew naengolun ew bath apüra mi för seni föün olif seni iteiten ew koor.d (Chechchemeni pwe ew koor a förätä engol bath ika ew homer, pwal engol bath ra löllöfengen chök me ew homer.) 15Öüpwe pwal angei emön laam seni iteiten ökkörüwöpwükü siip seni än ekkewe chón Israel leenien fetil mi mwirinnö fäniten amwöngö maan. Repwe aea ekkeei siip fäniten ekkewe asóren mwöngö, ekkewe asóren keek me ekkewe asóren kinamwe pwe repwe föri omwusomwusen tipis fäniten ekkewe aramas mi uweeto ekkewe siip, ngang ewe SAMOL KOT üwa kapas. 16Iwe, ekkewe aramasen Israel meinisin repwe tupwuto ekkeei asór fäniten ewe samolun Israel. 17Pün epwe iei wiisen ewe samol fäniten an epwe awora ekkewe asóren keek, asóren mwöngö me asóren wün mi fis lupwen ekkewe chuulap, ewe chuulapen popun maram me ekkewe ränin Sabbat - ekkewe ränin chuulap meinisin mi kefilitä fäniten chón Israel. Ewe samol epwe awora ekkewe asóren tipis, ekkewe asóren mwöngö, ekkewe asóren keek me ekkewe asóren kinamwe pwe epwe föri omwusomwusen tipis fäniten ekkewe chón Israel.”

18“ ‘Iwe, iei meet ewe SAMOL KOT a apasa: Lón ewe äewin maram, lón ewe äewin rän iteiten ier, öüpwe ääni asór emön liälifföön ätemwänin kowu esap wor terin pwe öüpwe limeti ewe imwenfel. 19Ewe souasór epwe angei ekis chaan ewe mönün asóren tipis o tóófätä wón üren penkasamen ewe imwenfel, wón ekkewe rüwänü pwokuukun ewe sässärin asen ewe róngen asór, pwal wón üren asamalapen tittin ewe Leeni mi Kinelong ngeni mwen ewe imwenfel. 20Iei chök usun minne öüpwe pwal föri lón ewe efisuwen ränin ewe ier mi fö, fäniten emön aramas mi tipis ren an cheechengaw ika ren an wewengaw. Iei usun ämi öüpwe föri omwusomwusen tipis fäniten ewe imwenfel.

21“ ‘Iwe, lón engol me rüwänüwen ränin ewe äewin maram lón ewe ier mi fö, öüpwe föri ächechchemen ewe Pasofer, ew chuulap epwe fis lón üküükün fisu rän. Lón ekkeei fisu rän, ämi öüpwe mwöngö pilawa esap wor iis lón. 22Lón ewe äewin rän, ewe samol epwe awora emön ätemwänin kowu pwe ew asóren tipis pwisin fänitan me fäniten aramasen ewe fönü meinisin. 23Iteiten rän, lupwen ekkewe fisu ränin chuulap, ewe samol epwe awora füümön ätemwänin kowu me füümön ätemwänin siip esap wor teriir pwe ew asóren keek ngeni ewe SAMOL. Epwe pwal awora emön ätemwänin kuuch fäniten ew asóren tipis. 24Ewe samol epwe awora pwe ew asóren mwöngö ew efa pilawa mi amas fäniten emön me emön kewe ätemwänin kowu, pwal ew efa pilawa mi amas fäniten emön me emön kewe ätemwänin siip, fiti pwal ew hine apüra mi för seni föün olif fäniten ew me ew efa pilawa mi amas.

25“ ‘Ewe samol epwe awora ekkewe chök pwal sókkun mettóch lón ekkewe fisuw ränin ewe chuulapen likachooch. Ei chuulap epwe poputä lón engol me limuwen ränin ewe efisuwen maram iteiten ier. I epwe awora ekkewe mettóch fäniten ekkewe asóren tipis, asóren keek me asóren mwöngö fiti ewe apüra mi för seni föün olif.”

46 Iei meet ewe SAMOL KOT a apasa: “Ewe asamalapen tittin ewe Leeni mi Kinelong ngeni mwen ewe imwenfel mi säpe ngeni öötiw epwe kesipeló lón ekkewe wónuw ränin angang. Nge lón ewe ränin Sabbat me ewe ränin popun maram, ewe asamalap epwe suuk. 2Ewe samol epwe tolong me lükün o pwerelong me lón kengkangen ewe asamalap. Iwe, i epwe üütäló ren üren ewe asamalap, nge ekkewe souasór repwe ääni än ewe samol asóren keek me an asóren kinamwe. Iwe, ewe samol epwe fel ngeni Kot lón ewe leenien tolong me lón ewe asamalap, mwirin, epwe toowu. Nge asamen ewe tiit esap kesip tori lekkuniólupwin. 3Iwe, lón ekkewe ränin Sabbat me ewe ränin chuulapen popun maram, ekkewe aramasen ewe fönü repwe fel me fän mesen ewe SAMOL lón ewe leenien tolong ngeni asamalapen ewe tiit. 4Nge lón ewe ränin Sabbat, ewe samol epwe uweeto ngeni ewe SAMOL wonomön liälifföön ätemwänin siip me emön ätemwänin siip esap wor teriir pwe an asóren keek. 5Ewe asóren mwöngö ewe samol epwe apacha ngeni ewe ätemwänin siip epwe ew efa pilawa mi amas, nge ewe asóren mwöngö epwe apacha ngeni ekkewe liälifföön siip epwe üküükün an mochen, fiti ew hin apüra mi för seni föün olif fäniten ew me ew efa pilawa mi amas. 6Lón ewe ränin chuulapen popun maram, ewe samol epwe ääni asór emön liälifföön ätemwänin kowu, wonomön liälifföön siip me emön ätemwänin siip, iir meinisin esap wor teriir. 7Ewe samol epwe awora pwe ew asóren mwöngö ew efa pilawa mi amas fiti ewe ätemwänin kowu, ew efa pilawa mi amas fiti ewe ätemwänin siip, nge ren ekkewe liälifföön siip, i epwe awora pilawa mi amas üküükün an mochen, fiti pwal ew hin apüra mi för seni föün olif fäniten ew me ew efa pilawa mi amas. 8Iwe, lupwen ewe samol epwe tolong, i epwe tolong me lón kengkangen ewe asamalap. Iwe, epwe pwal chök toowu me lón ei asamalap.

9“ ‘Iwe, lupwen aramasen ewe fönü repwe feitto fän mesei, ngang ewe SAMOL, pwe repwe fel ngeniei lón ekkewe fansoun chuulap mi kefilitä, esap lifilifil ika iö a tolong me lón asamalapen ewe tiit mi säpe ngeni efeng pwe epwe fel ngeniei, epwe toowu me lón asamalapen ewe tiit mi säpe ngeni öör. Nge iö a tolong me lón asamalapen ewe tiit mi säpe ngeni öör, epwe toowu me lón asamalapen ewe tiit mi säpe ngeni efeng. Esap wor emön aramas epwe liwinsäfäliwu me lón ewe asamalap i a tolong me lón. Emön me emön epwe toowu me lón ewe asamalap mi äwenewen fengen me ewe i a tolong me lón. 10Ewe samol epwe nóm leiin ekkewe aramas, epwe feillong lupwen ekkewe aramas ra tolong, epwe pwal toowu lupwen ekkewe aramas ra toowu. 11Iwe, lón ekkewe rän mi pin me ekkewe ränin chuulap mi kefilitä, epwe iei usun masowen ewe asóren mwöngö: Epwe ew efa pilawa mi amas fiti emön ätemwänin kowu, ew efa pilawa mi amas fiti emön ätemwänin siip, nge ren ekkewe liälifföön siip, emön aramas a tongeni awora pilawa mi amas üküükün an mochen, fiti ew hin apüra mi för seni föün olif fäniten ew me ew efa pilawa mi amas.

12“ ‘Lupwen ewe samol epwe awora ew asór ngeni ewe SAMOL seni pwisin mochenin letipan, ese lifilifil ika ew asóren keek ika ew asóren kinamwe, asamalapen ewe tiit mi säpe ngeni öötiw epwe suuk fänitan. Ewe samol epwe ääni an asóren keek ika an asóren kinamwe usun minne i a föfföri lón ewe ränin Sabbat. Mwirin, ewe samol epwe toowu. Nge mwirin an a toowu, ewe asamalap epwe kesipeló.

13“ ‘Iteiten rän, öüpwe awora emön liälifföön siip, ew ierin, esap wor terin fäniten ew asóren keek ngeni ewe SAMOL. Iteiten lesossor öüpwe awora ei mönün asór. 14Pwal iteiten lesossor, öüpwe pwal awora ew asóren mwöngö, masowan epwe ew nawonuwen ew efa pilawa mi amas fiti ew naülüngätin ew hin apüra mi för seni föün olif pwe epwe achöchchönü ewe pilawa mi amas. Ei angangen ääni asór fäniten ei asóren mwöngö ngeni ewe SAMOL epwe fis iteiten rän tori feilfeilló chök. 15Iei usun öüpwe ääni asóren keek emön liälifföön siip fiti ewe pilawa mi amas me ewe apüra mi för seni föün olif iteiten lesossor. Ei asóren keek epwe fis fansoun meinisin.” 16“ ‘Iei met ewe SAMOL KOT a apasa: Are ewe samol epwe fang ew fönü ngeni nöün mwän seni wiisan, ei fönü epwe fönüwen nöün we me mwirimwirin kana tori feilfeilló chök. 17Nge are ewe samol epwe fang ew fönü ngeni emön nöün kewe chón angang, ewe chón angang epwe fönüweni ewe fönü tori ewe ierin ngasaló. Mwirin, ewe fönü epwe liwinsäfäl ngeni ewe samol. Pün fönüwen ewe samol repwe chök fönüwen nöün kana, pwokiten fönüweer me wón semeer. 18Ewe samol esap tongeni angei ew fönüwen nöün kewe aramas ika ösüüreló seni fönüweer. Ewe samol epwe ngeni nöün kana mwän fönüweer seni pwisin fönüwan. Iei usun esap wor emön me leiin neii aramas epwe toowu seni fönüwan.”

19Mwirin, ewe mwän a emmwenieilong lón ewe leenien tolong leepekin asamalapen tittin ekkewe ruumw mi pin mi säpe ngeni efeng. Ekkeei ruumw ruumwen ekkewe souasór. Iwe, a pwääri ngeniei ew leeni mi nóm leesópwun ekkewe ruumw me pelilotow. 20Iwe, ewe mwän a apasa ngeniei, “Iei ewe leeni ia ekkewe souasór repwe kukuuw ie fituken ekkewe mönün asóren pwuupwungaw me fituken ekkewe mönün asóren tipis. Pwal iei ewe leeni ia repwe umwuni ie ewe pilawa mi amas seni ekkewe asóren mwöngö. Iir repwe föri ei angang me ikeei, pun resap mochen repwe pwerelóng lón ewe leeni lükün ewe imwenfel fän ekkewe asór. Iei usun resap uweawu ekkewe mettóch mi pin ia ekkewe aramas ra nóm ie pün resap feiengaw.”

21Mwirin, ewe mwän a pwal emmwenieiló ngeni ewe Leeni mi Kinewu seni lükün ewe imwenfel o emmweniei ngeni ekkewe rüwänü pwokuukun ei leeni. Iwe, lón iteiten ekkewe pwokuuku, ngang üwa küna pwal ew kükkün leeni. 22Iwe, lón ekkewe rüwänü pwokuukun ewe Leeni mi Kinewu seni lükün ewe imwenfel a wor leeni mi tiitiló. Üküükün langattamen ew me ew kewe leeni mi tittiló, fääik mwalü, nge üküükün chöölapen ew me ew, iliik mwalü. 23Lón pwellin ew me ew kewe rüwänü leeni mi tittiló, a wor ew sälif mi för seni faaw nge a wor leenien ekkei fän unusen pwellin ewe sälif. 24Iwe, ewe mwän a apasa ngeniei, “Ikkeei ekkewe leenien kuk ia chókana mi angang lón ewe imwenfel repwe kukuuw ie ekkewe mönü asór, ekkewe aramas ra uweeto pwe ar asór.”

Ewe chaanpwuupwu mi pwuupwu seni ewe Imwenfel

47 Mwirin, ewe mwän a emmweni-säfälieiló ren asamalapen ewe imwenfel. Iwe, ngang üwa küna pwe a wor kólik a pwuupwuwu seni fän ewe leenien tolong lón ewe imwenfel o a pwuupwuló ngeni öötiw (pün ewe imwenfel a säpe ngeni öötiw). Ewe kólik a pwuutiw seni fän peliöörün ewe imwenfel, peliöörün ewe róngen asór. 2Mwirin, ewe mwän a emmwenieiwu lón asamalapen ewe tiit mi säpe ngeni efeng o emmwenieiló lükün ngeni asamalapen ewe tittin lükün mi säpe ngeni öötiw. Iwe, üwa küna pwe ewe kólik a pwuuwu seni peliöörün asamalapen ewe tiit mi säpe ngeni öötiw.

3Iwe, lupwen ewe mwän a feilló ngeni peliöötiw fän efóch selin öüküük lón pöün, a öükaaló üküükün engöröw mwalü. Mwirin, a emmwenieiwu lón ewe kólik, üküükün alóllóólun, a tori wón kipwinin pachapachei. 4Mwirin, a pwal öükaaló üküükün engöröw mwalü o sópweló le emmwenieiwu lón ewe kólik, nge üküükün alóllóólun, a tori wón pwäsukun pecheei. Iwe, a öükaaló pwal üküükün engöröw mwalü o a pwal emmwenieiwu lón ewe kólik, nge iei üküükün alóllóólun a toota tori wón wiilai. 5Mwirin, ewe mwän a pwal öükaaló üküükün engöröw mwalü, nge iei ewe kólik a wiliti ew chaanpwuupwu üsap tongeni äi üpwe pwereló epeek, pwokiten ewe kólik a feffeitä o a alóllóól pwe a chök öchchün äi üpwe ä lón, iei ew chaanpwuupwu esap wor emön a tongeni pwereleó epeek. 6Iwe, ewe mwän a eisiniei, “Nöün aramas, ifa usun, ka küna ei?”

Mwirin, a emmwenisäfälieló ngeni leepekin ewe chaanpwuupwu. 7Iwe, lupwen üwa tori leepekin ewe chaanpwuupwu, ngang üwa küna chómmóng irä ra nóm leepekin ewe chaanpwuupwu me rüwepeek. 8Iwe, a apasa ngeniei, “Ewe kólik a pwuuló ngeni ewe fönü mi nóm öötiw, nge a pwuuló lón ewe leemólun Jordan o pwuulong lón ewe Setin Mäló. Nge lupwen a pwuulong lón ei Setin Mäló, ewe kólik a wiliti kólik mi mwirinnö. 9Iwe, ekis meinisin ia ewe chaanpwuupwu a pwuuló ie, epwe wor sakkopaaten pwiin mönümanaw repwe nónnóm ie. Epwe pwal wor chómmóng iik lón ewe Setin Mäló, pwokiten ewe kólik a pwuuló ikenan o föri pwe ewe kólik a mwirinnö. Iei popun, ia ewe kólik a pwuuló ie, mettóch meinisin repwe manaw. 10Chón attaw repwe üütä aróórun ewe Setin Mäló o attaw. Seni En Kedi tori En Eklaim epwe wor ekkewe leeni ia chón attaw repwe appwasa ie nöüür kewe cheew. Epwe wor chómmóng sókkun iik, usun ikenen lón ewe Mataw Wätte. 11Nge ekkewe pwakak me pwöön resap limöchüló, pün repwe chök nómw pwe fäniten salt. 12Iwe, leepekin ewe chaanpwuupwu me rüwepeek, epwe määritä chómmóng sókkun irän mwöngö. Chöör resap pwasaló, uwaar esap pwal iteló. Iteiten maram repwe chök ukkuwa, pwokiten ewe kólik seni ewe leeni mi pin a pwuupwuló reer. Uwaar epwe fis pwe enen aramas, nge chöör repwe fäniten än aramas repwe chikar seni ar samwaw.”

Kiään ewe fönü

13Iei meet ewe SAMOL KOT a apasa: “Ikeei ekkewe kiä öüpwe aea le kiäni ewe fönü fäniten ämi öüpwe eineti wón ekkewe engol me ruu einangen Israel pwe fönüweer, nge ruu kinikin epwe fäniten Josef. 14Öüpwe chök alöllöpöküw inetin ewe fönü wón ekkewe einang. Pwokiten ngang üwa eitietä peii o pwon fän ökköpöl ngeni ämi kewe leewo pwe üpwe ngeniir ei fönü, iei minne ei fönü epwe fönüwemi.

15“Iwe, epwe iei usun kiään ewe fönü:

“Ewe kiä epwe poputä seni leepelien ewe fönü me efeng. Ewe kiä epwe sä seni ewe Mataw mi Wätte meren ewe alen Hethlon o pwereló ngeni Lebo Hamath tori Zedad.

16Mwirin, epwe sä ngeni Berothat me Sibraim (mi nóm wón ewe kiä lefilen Damaskos me Hamath) o pwereló ngeni Hazer Hattikon mi nóm wón kiän Huran.

17Iei usun ewe kiä me peliefeng epwe sä seni ewe Mataw mi Wätte tori Hazar Enan, ouwäreer fengen me peliefengin kiään Damaskos. Iei kiään ewe fönü me efeng.

18“Iwe, kiään ewe fönü me öötiw epwe ewe chaanpwuupwu Jordan. Ewe kiä me peliöötiw epwe poputä seni lefiilen Hauran me Damaskos. Iwe, epwe säätiw ngeni öör nge epwe ouwäreer fengen me ewe chaanpwuupwu Jordan lefiilen Kilead me ewe fönü Israel. Iwe, epwe säätiw seni ewe Setin Mäló o feittiw öör ngeni Tamar. Iei kiään ewe fönü me öötiw.

19“Iwe, kiään ewe fönü me öör, epwe sä seni Tamar o keiiló ngeni ekkewe kólikin Meribah lón Kadesh. Mwirin, epwe fitaló ewe öüwöön Egypt tori ewe Mataw mi Wätte. Iei kiään ewe fönü me öör.

20“Nge kiään ewe fönü me pelilotow epwe ewe Mataw mi Wätte. Epwe poputä seni ia ewe kiään öör a mwüchchütiw me ie o a feittä tori ia ewe kiä me efeng a poputä me ie, äwenewenen Lebo Hamath. Iei kiään ewe fönü me lotow.

21“Öüpwe ineti ei fönü leiimi alóngólóng wón ekkewe einangen Israel. 22Öüpwe eineti ewe fönü ren pwüngün ütüüt, pwe öüpwe fönüweni, ämi me ekkewe chón ekis mi nóm leiimi, pwal nöüür kewe mi upwutiw ngeniir. Iir repwe usun chök nge iir poputän chón wilipósun Israel mereemi, pün repwe angei inetiir fönü me leiin ekkewe einangen Israel. 23Ese lifilifil ika lón menni einang emön chón etto a nónnóm ie, öüpwe ngeni i inetin fönü me ikenan,” ewe SAMOL KOT a osomänetiw.

Inetin ewe fönü

48“Ikkeei iten ekkewe einangen Israel me ekkewe kinikinin fönü repwe fönüweni ra tettelitiw: Dan epwe fönüweni ew kinikin me soosotä efeng; kiään fönüwan epwe poputä seni ewe Mataw mi Wätte ren ewe ale ngeni Hethlon o feilló ngeni Lebo Hamath. Mwirin, epwe sääló ngeni Hazar Enan o feilló ngeni peliefengin kiään Damaskos, nge Hamath epwe nóm peliefengin. Fönüwen Dan a achööwü seni öötiw tori lotow.

2“Asher epwe pwal fönüweni ew kinikin. Epwe nóm öörün kiän fönüwen Dan, nge epwe pwal achööwü seni öötiw tori lotow.

3“Naftali epwe pwal fönüweni ew kinikin. Fönüweni Naftali epwe nóm öörün kiään fönüwen Asher. Epwe pwal achööwü seni öötiw tori lotow.

4“Manassah epwe fönüweni pwal ew kinikin. Fönüwan epwe nóm öörün kiään fönüwen Naftali. Epwe achööwü seni öötiw tori lotow.

5“Efraim epwe fönüweni ew kinikin. Fönüwen Efraim epwe nóm öörün kiään fönüwen Manassah. Epwe achööwü seni öötiw tori lotow.

6“Reuben epwe pwal fönüweni ew kinikin. Fönüwen Reuben epwe nóm öörün kiään fönüwen Efraim. Epwe achööwü seni öötiw tori lotow.

7“Judah epwe fönüweni ew kinikin. Fönüwen Judah epwe nóm öörün kiään fönüwen Reuben. Epwe achööwü seni öötiw tori lotow.

8Iwe, öörün kiään fönüwen Judah, achööwü seni öötiw tori lotow, iei ewe kinikin öüpwe äimwüeló fäniten iei och kinikin mi pin. Üküükün chöölapen ei kinikinin fönü epwe 25,000 mwalü leepekin me rüwepeek seni efeng tori öör, nge üküükün langattaman seni öötiw tori lotow, epwe usun chök langattamen fönüwen ewe einang mi nóm efengin me fönüwen ewe einang mi nóm öörün. Iwe, ewe imwenfel epwe nóm lukalapen ei fönü.

9Iwe, ewe kinikin öüpwe äimwüeló fäniten ewe SAMOL, üküükün langattaman epwe 25,000 mwalü, nge üküükün chöölapan, 20,000 mwalü. 10Iwe, epwe iei usun ewe kinikin mi pin fäniten ekkewe souasór. Üküükün langattaman me peliefeng, epwe 25,000 mwalü, nge üküükün chöölapan me pelilotow, 10,000 mwalü, pwal ükkükün chöölapan me peliöötiw, pwal 10,000 mwalü, nge üküükün langattaman me peliöör, 25,000 mwalü. Iwe, lukalapen ei kinikin epwe nóm än ewe SAMOL we imwenfel. 11Ei kinikin epwe käimwüüló pwe leenien ekkewe souasór mi kefilitä seni mwirimwirin Zadok, iir chókewe mi likiitü le angang ngeniei nge resap tókkóló seniei usun ekkewe chón ewe einangen Levi ra föri lupwen ekkewe chón Israel ra tókkóló seniei. 12Ei kinikin epwe ew liffang ngeni ekkewe souasór seni lón kinikinin ewe fönü mi pin, mi nóm ünükkün fönüwen chón ewe einangen Levi. Ei kinikin epwe ew kinikin mi fókkun pin.

13Epwe wor pwal ew kinikin fäniten chón ewe einangen Levi epwe nóm peliefengin ei kinikin fäniten ekkewe souasór. Epwe iei üküükün ewe kinikin fäniten chón ewe einangen Levi: Üküükün langanttaman, 25,000 mwalü, nge üküükün chöölapan 10,000 mwalü. Iei üküükün ei fönü mi pin. Üküükün langattamer me ruu, 25,000 mwaalü, nge üküükün chöölaper, 20,000 mwalü. 14Ei fönü a fókkun mwirinnö seni meinisin. Esap wor emön epwe tongeni amöömöló ika ekkesiwili och kinikinin ei fönü. Esap pwal wor emön epwe fókkun tongeni fangaló ngeni emön ew kinikinin ei fönü, pwokiten ei fönü a pin fäniten ewe SAMOL.

15Iei üküükün ewe lussun fönü mi pin a nóm órun ewe leeni ia ewe Imwenfel a nóm ie. Üküükün langattaman, 25,000 mwalü, nge üküükün chöölapan, 5,000 mwalü. Ei fönü epwe fäniten än chón ewe telinimw repwe äeä, fäniten imw, pwal fäniten leenien fóleni maan. Ewe telinimw epwe nóm lukalapen ei fönü. 16Epwe iei üküükün ewe telinimw: Üküükün langattamen ewe telinimw me peliefeng, 4,500 mwalü, pwal üküükün langattaman me peliöör, 4,500 mwalü. Iwe, üküükün langattaman me peliöötiw, 4,500 mwalü, nge üküükün langattaman me pelilotow, pwal 4,500 mwalü. 17Epwe wor ew leeni mi amassawa pwellin ünükkün ewe telinimw fäniten leenien fóleni maan. Üküükün langattaman me peliefeng, 250 mwalü, üküükün langattaman me peliöör, 250 mwalü, pwal üküüküng langattaman me peliöötiw, 250 mwalü, nge üküükün langattaman me pelilotow, 250 mwalü. 18Nge leepekin ewe fönü fäniten ewe telinimw me rüwepeek a wor fönü fäniten tännipi mi kiäfesen me peliöörün ewe kinikin mi pin. Üküükün langattamen ei fönü me peliöötiw, 10,000 mwalü, nge üküükün langattaman me pelilotow, pwal 10,000 mwalü. Uwään ei fönü epwe awora mwöngö fäniten ekkewe chón angangen ewe telinimw. Ekkewe chón angang seni lón ewe telinimw mi wiisen tännipini ewe fönü repwe feitto seni ekkewe einangen Israel meinisin. 20Unusen ewe kinikinin fönü mi pin öüpwe äimwüeló, epwe chök löllö fengen langattaman me chöölapan, pün epwe üküükün 25,000 mwalü leepekin me rüwänü. Iei ewe kinikinin fönü ia ewe kinikin mi pin me ewe kinikin fäniten ewe telinimw repwe nóm lón.

21Meet lussun ewe fönü mi nóm leepekin ewe kinikin mi pin me ewe kinikin fäniten ewe telinimw me rüwepeek repwe fönüwen ewe samol. Epeek epwe keiiló ngeni öötiw seni peliöötiwen kiään ewe 25,000 mwalü kinikinin fönü mi pin, nge ewe pwal epeek epwe keiiló ngeni lotow seni pelilotowun kiään ewe 25,000 mwalü kinikinin fönü mi pin. Me ruu ekkeei kinikin mi ouwäreer ngeni langattamen fönüwen ekkewe einang me efen pwal me öör, repwe fönüwen ewe samol. Iwe, ewe kinikin mi pin fiti ewe imwenfel mi nóm lón ei kinikin repwe nóm lukalapen kewe ruu kinikin fäniten ewe samol. 22Iei usun fönüwen chón ewe einangen Levi me ewe fönü fäniten ewe telinimw repwe nóm lukalapen ekkewe ruu kinikinin fönü fönüwen ewe samol. Ewe kinikinin fönü fäniten ewe samol epwe nóm lefiilen kiään fönüwen Judah me kiään fönüwen Benjamin.

23“Iwe, ikkeei fönüwen ekkewe lussun einangen Israel: Benjamin epwe fönüweni ew kinikin me lón Israel. Epwe fönüweni ewe kinikin öörün kiään ewe kinikinin fönü mi pin. Epwe achööwü seni kiään ewe fönü Israel me öötiw tori kiään me lotow.

24“Simeon epwe pwal fönüweni ew kinikin. Epwe fönüweni ewe kinikin öörün kiään fönüwen Benjamin. Epwe achööwü seni kiään ewe fönü Israel me öötiw tori kiään me lotow.

25“Issakar epwe fönüweni ew kinikin. Epwe fönüweni ewe kinikin öörün kiään fönüwen Simeon. Epwe achööwü seni kiään ewe fönü Israel me öötiw tori kiään me lotow.

26“Zebulun epwe fönüweni pwal ew kinikin. Epwe fönüweni ewe kinikin öörün kiään fönüwen Issakar. Epwe achööwü seni kiään ewe fönü Israel me öötiw tori kiään me lotow.

27“Kad epwe fönüweni ewe kinikin öörün kiään fönüwen Zebulun. Nge kiään seni öötiw tori lotow epwe pwal usun chök ekkewe ekkóch.

28Kiään öörün fönüwen Kad epwe sääló seni Tamar tori ekkewe kólikin Meribah lón Kadesh. Mwirin, epwe fitaaló órun ewe öüwön Egypt tori ewe Mataw mi Wätte.

29Iei ewe fönü öüpwe eineti ngeni ekkewe einangen Israel pwe repwe fönüweni. Iwe, epwe ikkeei usun kinikiniir, ngang ewe SAMOL KOT üwa kapas.”

Ekkewe asamalapen tittin ewe telinimw mi fö

30“Iwe, epwe ikkeei ekkewe leenien toowu seni lón ewe telinimw: Poputä seni ewe tiit mi nóm peliefeng, üküükün langattaman epwe 4,500 mwalü, 31epwe wor ülüngät asamalapan. Ew me ew ekkeei ülüngät asamalap repwe eiteit seni iten ekkewe einangen Israel. Ekkewe ülüngät asamalapen ewe tiit mi nóm peliefeng repwe iteni ewe asamalapen Reuben, ewe asamalapen Judah me ewe asamalapen Levi.

32“Tittin ewe telinimw me peliöötiw, epwe pwal 4,500 mwalü üküükün langattaman. Epwe pwal wor ülüngät asamalapan: ewe asamalapen Josef, ewe asamalapen Benjamin me ewe asamalapen Dan.

33“Tittin ewe telinimw me peliöör, epwe pwal üküükün 4,500 mwalü langattaman. Epwe pwal wor ülüngät asamalapan: ewe asamalapen Simeon, ewe asamalapen Issakar me ewe asamalapen Zebulun.

34“Tittin ewe telinimw me pelilotow, epwe pwal üküükün 4,500 mwalü langattaman. Epwe pwal wor ülüngät asamalapan: ewe asamalapen Kad, ewe asamalapen Asher me ewe asamalapen Naftali.

35Iwe, üküükün langattamen unusen pwellin tittin ewe telinimw epwe 18,000 mwalü.

Iwe, seni lón ena fansoun, ewe telinimw epwe iteni:

“EWE SAMOL A NÓMW IKENAN.”