Exodus
1Jakob a sääiló Egypt fiti nöün kewe mwän. Emön me emön nöün kewe mwän a uweei en me an famili. Iwe, ikkeiir nöün Israel kewe mwän: 2Rueben, Simeon, Levi me Judah, 3Issakar, Zebulun me Benjamin, 4Dan, me Naftali, Kad me Asher. 5A wor üküükün fiik aramas iir mwirimwirin Jakob. Josef i emön leiin nöün Jakob kewe mwän nge a fen nóm Egypt.
6Mwirin, Josef me pwiin kewe pwal ekkewe aramas meinisin lón ena tettelin pilóón aramas ra mäló. 7Nge mwirimwiriir kewe ra nöünöütiw o ra fókkun chómmóngóló nöüür me nöün nöüür kana. Ra fókkun mwittir le chómmóngóló, ina pwata ewe fönü a mwittir uróló reer.
8Mwirin, emön king mi fö a móótuni ewe leenien móótun nemenem lón Egypt esap silei och usun Josef ika meet i a föri. 9Ei king mi fö a apasa ngeni nöün kewe aramas, “Öüpwe nengeni pün ekkewe chón Israel ra wiliti och minen eniuokkus ngeni kich pün ra fókkun chómmóngóló. 10Öü feitto, öüsipwe le kütta ew alen ach sipwe öükätiw ar repwe chómmóngóló. Pün are sisap föri och; iwe, epwe fen lapaló chómmóngur. Iwe, ika maun epwe tori kich, iir repwe pach ngeni chón opwutach kana o repwe fiu ngeni kich. Mwirin, repwe sü seni ei fönü.”
11Iei minne, ekkewe chón Egypt ra nöüni ekkewe chón Israel amanaw, nge ra filätä ekkewe chón nemeni amanaw mi nemenemengaw pwe repwe nemeniir, pün ra ekieki pwe repwe ekisaló pöchökkülen ekkewe chón Israel ren angang weires. Ra eriäniir pwe repwe öüüwetä ekkewe telinimw Pithom me Rameses pwe än Farao leenien iseis. 12Nge lupwen ekkewe chón Egypt re fen alapaló ar eriäfföwü ekkewe chón Israel, nge e fen pwal ina mwittirilón ar chómmóngóló o meresfeil. Iei minne, ekkewe chón Egypt ra poputä le nuokkusiti ekkewe chón Israel. 13Iwe, ekkewe chón Egypt ra ekiekietä pwe repwe le alapaló weiresin ar nöüni ekkewe chón Israel amanaw fän kirikiringaw. 14Ra eweiresi manawen ekkewe chón Israel ren ar ochchowu ar angang o eriäniir pwe repwe för pilak me alöllöl appachen pilak. Ra pwal eriäniir pwe repwe angang weires lón ekkewe tännipi. Ekkewe chón Egypt resap ääni tong lón ekkewe angang weires meinisin ra eriäni ngeni ekkewe chón Israel pwe repwe föri.
15Mwirin, Farao, ewe kingen Egypt esap menemen ren ei, iei minne a atoowu ei öllük ngeni ekkewe fiin Hipru chón afaamw iter Shifrah me Puah o apasa: 16“Lupwen öüpwe älisi ekkewe fiin Hipru le anöünöüür, öüpwe nengeniöchü nöüür me wón ewe leenien anöünöü. Pün ika emön äät epwe upwutiw, iwe, öüpwe mwittir niieló, nge ika emön nengngin epwe upwutiw, öüpwe mwüüt ngeni pwe epwe manaw.” 17Nge pwokiten ekkewe fefin fiin afaamw ra nuokkusiti Kot, iei minne, resap mochen älleasochis ngeni meet ewe kingen Egypt a üreniir pwe repwe föri, pün ra mwüüt ngeni ekkewe äät mi upwutiw pwe repwe pwal manaw. 18Mwirin, ewe kingen Egypt a tiiti ekkewe fefin fiin afaamw o a eisiniir, “Pwata ämi öüwa föri ei? Pwata öüwa mwüüt ngeni ekkewe äät mi upwutiw pwe repwe manaw?”
19Iwe, ekkewe fefin fiin afaamw ra pölüweni Farao o apasa, “Ekkewe fiin Hipru ra fókkun pöchökkül. Me mwen än emön fiin afaamw epwe toriir nge i ra fen pwisin mwittir nöünöüló. Resap mang le nöünöü, resap usun ekkewe fiin Egypt.”
20Iei minne, Kot a efeiöchüw ekkewe fefin fiin afaamw. Iwe, ekkewe aramasen Israel ra sópwósópwóló le chómmóngóló o a fókkun lapaló ar pöchökkül. 21Iwe, pwokiten ekkewe fefin fiin afaamw ra nuokkusiti Kot, iei minne, i a fang ngeniir pwisin ar famili.
22Mwirin, Farao a ngeni nöün kewe aramas meinisin ei öllük: “Öüpwe oturalong ekkewe äät mi upwufö meinisin mi upwutiw ngeni ekkewe chón Hipru lón ewe chaanpwuupwu Nail. Nge öüwa tongeni amanawa ekkewe nengngin.”
Moses a upwutiw
2Lón ei fansoun, a wor emön mwän seni ewe einangen Levi mi pwülüweni emön fefin pwal seni ewe einangen Levi. 2Iwe, ewe fefin a pwoopwo o a nöüni emön äät. Lupwen neminnewe a küna pwe nöün we mönükól a fókkun mwirinnö, a aopaló i lón üküükün ülüngät maram. 3Nge lupwen neminnewe esap chüen tongeni aopaló nöün we äät, a angei ew kükkün paasikit mi för seni och irä itan papirus o a appacha ngeni mastik me asarüto pwe esap lich. Mwirin, neminnewe a isenalong ewe mönükól lón ewe paasikit o a anómwu ewe paasikit leiin ekkewe wölüwöl ünükkün aamen ewe chaanpwuupwu Nail. 4Nge fefinen ewe mönükól we a chök ükküütäto me toowaw o akkatola pwe epwe küna ika meet epwe fis ngeni i.
5Esap mang mwo me mwirin ei, nge emön me leiin nöün Farao kewe föpwül a feittiw pwe epwe tüütü lón ewe chaanpwuupwu Nail, nge nöün kewe chón angang nengngin ra fätäl aroppen ewe chaanpwuupwu. Lupwen neminnewe a küna ewe kükkün paasikit mi nóm leiin ekkewe wölüwöl, a tiinaló emön me leiin nöün kewe chón angang nengngin pwe epwe angei ewe paasikit. 6Iwe, lupwen neminnewe a suukaló ewe paasikit, a küna ewe mönükól äät nge a kechiw. Iei minne, letipen neminnewe a fókkun mwökütüküt ren an müüti ewe mönükól. Iwe, neminnewe a apasa, “Iei i emön me leiin ekkewe mönükólun Hipru.”
7Mwirin, fefinen ewe mönükól we a feitto ren nöün Farao we föpwül o eisini, “Ifa usun, ngang üpwe feilló o kütta emön fiin Hipru pwe epwe oupwu ewe mönükól fänitom o älisuk le tüttümwünü?”
8Nge neminnewe a pölüweni o apasa, “Ewer, kopwe feilló.” Iwe, ewe nengngin a mwittir feilló ren imwan we o köörato pwisin inen ewe mönükól we. 9Iwe, nöün Farao we föpwül a apasa ngeni inen ewe mönükól we, “Kopwe angei ei mönükól o uwealó ngeni imwom we pwe kopwe oupwu fänitei, nge ngang üpwe ngenuk liwinum fäniten óm älillis.” Iei minne, inen ewe mönükól we a uwealó ewe mönükól lón imwan we o a tüttümwünü le okkoupwu. 10Iwe, ekkóch fansoun me mwirin, lupwen ewe semiriit a määritä o wättetä, inan we a uwealó i ren nöün Farao we föpwül. Iwe, nöün Farao we föpwül a ächeelonga ätei pwe nöün. Iwe, neminnei a eita ngeni ewe äät, Moses, pün a apasa, “Ngang üwa ekiiewu ätei seni lón ewe kólik.”
Moses a süüló ngeni Midian
11Chómmóng ier me mwirin, lupwen Moses a wättetä, a feilló pwe epwe äämwa aramasan kewe, ekkewe chón Israel. Iwe, a küna usun weiresin än ekkewe chón Egypt eriäniir pwe repwe angang. Lón ei ótun, a küna emón chón Egypt a wichi emön leiin ekkewe chón Hipru amanaw, emön me leiin pwükütän aramasan kewe. 12Iwe, Moses a nerikirikfeil pwe epwe küna ika mi wor emön a küna, nge esap küna emön. Mwirin, a niieló ewe chón Egypt o ireeló i lón ewe ppi. 13Lón ewe rän mwirin, lupwen Moses a feilló pwe epwe pwal äämwasäfäli aramasan kewe, a küna rüömön chón Hipru ra fiu fengen. Iwe, Moses a eisini ewe emön mi mwääl, “Meet ka föri? Pwata ka wichi chiechiom chón Hipru?”
14Nge ewe mwän a pölüweni o apasa, “Ka kan ekieki pwe en iö? Iö a filuketä pwe kopwe nöüüm samol me souköpwüng? Ka ekieki pwe kopwe pwal niieiló usun óm we niieló ewe chón Egypt nänew?” Mwirin, Moses a nuokkus pün a kkin me wón pwe meinisin repwe le silei meet i a föri.
15Iwe, pwüngün, pün lupwen Farao a rong usun ei, a atoowu an öllük pwe Moses epwe arees o ninniiló. Nge Moses a süü seni Farao o süü ngeni ewe fönü Midian pwe epwe nóm ikenan. Lupwen Moses a tori Midian, a móttiw ünükkün ew chönüttu. 16Iwe, a fis pwe a wor füümön föpwül nöün emön souasóren Midian. Ekkeei föpwül ra soun feitto ren ei chönüttu pwe repwe üfüüf kólik o alölöü ekkewe leenien än maan wün kólik fäniten nöün semer we pwiin siip. 17Nge ekkewe ekkóch chón fóól siip ra kan feitto o ösüüweló ekkewe föpwül me nöüür kewe pwiin siip. Nge lón ei fansoun, Moses a feitto pwe epwe älillis o chimanüw ekkewe föpwül seni ekkewe ekkóch chón fóól siip. Mwirin, a älisiir le üfüüf kólik fäniten nöüür kewe pwiin siip.
18Lupwen ekkewe föpwül ra liwinsäfäl ngeni Reuel semer we, i a eisiniir, “Pwata öüwa liwinikäito ikenäi?”
19Nge iir ra pölüweni, “Emön chón Egypt a chimanükeem seni ekkewe chón fóól siip. Ätewe a mwo nge üfüüf kólik fänitem o öünü ekkewe siip.”
20Iwe, Reuel a eisini nöün kewe föpwül, “Ifa i chök ätena? Pwata öüwa chök likitaló ikenan? Öüpwe feilló o köörato pwe epwe äni ekis mwöngö.”
21Iwe, Moses a pwapwaiti le etiwa ei kökkö o a nómwóló ren Reuel. Mwirin ekkóch fansoun, Reuel a ngeni Moses emön leiin nöün kewe föpwül itan Zipporah pwe epwe pwülüweni. 22Ekiseló chök mwirin, Zipporah a nöüni emön äät. Iwe, Moses a eita ngeni ewe äät, Kershom, pün a apasa, “Ngang üwa emön waasöla lón ew fönüen chón ekis.”
23Ekkóch ier ra luuló, iwe, ewe kingen Egypt a mäló. Nge ekkewe chón Israel ra chüen ngüüngü ren choun än chón Egypt nöüniir amanaw. Ra siö pwe emön epwe älisiir, nge ar siöön älillis pwokiten än chón Egypt nöünir amanaw a tori Kot. 24Kot a rongorong ar siö o a chechchemeni an pwon ngeni Abraham, ngeni Isaak pwal ngeni Jakob. 25Iei minne, Kot a nennetiw wón ekkewe chón Israel o a chüngüw usun nónnómwur.
Moses me ewe irä mi ngetenget
3Lón ew ränin, Moses a tümwünü epwi pwiin siip nöün Jethro semen pwülüwan we, nge ätei Jethro i ewe souasóren Midian. Iwe, Moses a emmwenaló ekkewe pwiin siip peekilón epeek ewe fönüpöön arap ngeni Horeb, ewe chukun Kot. 2Me ikenan, nöün ewe SAMOL we chón läng a pwää ngeni i me lón och pwulopwulen ekkei seni wón efóch irä. Moses a nenneiruk pwokiten a küna pwe ewe irä a nóm lón ewe ngetengeten ekkei nge esap karóló. 3Iei minne, Moses a ekieki, “Üse fókkun lükülük! Pwata enan irä esap karóló. Ngang üpwe feilló o nengeni ei mettóch mi sókkóló ngang üwa küna.”
4Iwe, lupwen ewe SAMOL a küna pwe Moses a feitto pwe epwe pii ei mettóch, Kot a kökkööwu ren seni ewe irä mi pwulopwul, “Moses, Moses!” Nge Moses a pölüweni o apasa, “Ngang iei.”
5Iwe, Kot a üreni, “Kosap kanoto. Kopwe pwiliti ipwom kana sandal pün en ka üütä wón ew pwül mi pin.” 6Mwirin, Kot a pwal apasa, “Ngang ewe Kot, än óm kewe leewo - ewe Kot än Abraham, ewe Kot än Isaak me ewe Kot än Jakob.” Iwe, lupwen Moses a rong ei, a pwölüweló wón mesan lón pöün, pwokiten i a nuokkus an epwe nengeni Kot.
7Mwirin, ewe SAMOL a üreni, “Kopwe fókkun silei pwe ngang üwa küna riäfföün neii kewe aramas me lón Egypt. Ngang üwa rongorong ar siö pwe emön epwe angaseer seni än ekkewe chón nöüniir amanaw eriäfföür. Ewer, ngang üwa chüngüw usun ar riäfföü. 8Iei minne, ngang üwa feitto pwe üpwe chimanür seni lepöün ekkewe chón Egypt o emmwenirewu seni ewe fönü Egypt pwe üpwe emmwenirelong lón ew fönü mi mwirinnö o wäämmóng. Iei ew fönü mi pwuupwu milik me chönün chunen lón - ewe fönü ia ekkewe chón Kanaan, chón Hit, chón Amor, chón Periz, chón Hiv me chón Jebus ra nónnóm ie. 9Iei, än ekkewe aramasen Israel siö a toriei o üwa küna usun än ekkewe chón Egypt eriäfföür ren angang mi chou. 10Iei minne, kopwe feilló iei, pwe ngang üpwe tiinukóló ren Farao. Pün en kopwe emmwenawu neii kewe aramasen Israel seni lón Egypt.”
11Nge Moses a eisini Kot, “Ngang iö pwe üpwe tongeni pwääto fän mesen Farao? Epwe ifa usun óm kopwe ösüküsükü pwe ngang üpwe tongeni emmwenawu ekkewe chón Israel seni lón Egypt?”
12Mwirin, Kot a üreni Moses, “En kopwe tongeni föri ei, pün ngang üpwe fituk. Iwe, epwe iei älelletan pwe ngang üwa tiinuk: Mwirin óm ka emmwenawu ekkewe chón Israel seni Egypt, en kopwe liwinsäfälito ikeei o fel ngeni Kot me wón ei chuuk.”
13Nge Moses a äniicho le apasa ngeni Kot, “Are ngang üpwe feilló ren ekkewe aramasen Israel o apasa ngeniir, ‘Ewe Kot än ämi kewe leewo a tiinieito reemi,’ iwe, ina resap lüküei. Ina repwe eisiniei, ‘Menni na kot en ka kapas usun? ‘Ifa itan?’ Mwirin, meet ngang üpwe tongeni üreniir?”
14Iwe, Kot a pölüweni o apasa ngeni Moses, “NGANG EWE EMÖN MI CHÖK NÓNNÓM FANSOUN MEINISIN. Iir mi fókkun silei ika ngang iö. Iei meet en kopwe apasa ngeni ekkewe chón Israel: NGANG ewe Emön mi chök nónnóm reemi fansoun meinisin a tiinieito reemi.’ ”
15Kot a pwal apasa ngeni Moses, “Kopwe üreni ekkewe chón Israel, ‘YAHWEH, ewe SAMOL, ewe Kot än ämi kewe leewo - ewe Kot än Abraham, ewe Kot än Isaak, ewe Kot än Jakob - a tiinieito reemi.’
“Iei itei YAHWEH iteiten fansoun meinisin tori feilfeilló chök. Iei ewe iit öüpwe nöünöü seni ew pilóón aramas tori pwal ew.
16“Kopwe feilló o emwiicha fengeni ekkewe souakkomwen Israel. Iwe, kopwe üreniir, ‘Ewe SAMOL, ewe Kot än ämi kewe leewo - ewe Kot än Abraham, ewe Kot än Isaak, ewe Kot än Jakob - a pwää ngeniei me wón efóch irä mi ngetenget. Iwe, a apasa: Öüpwe fókkun silei pwe ngang mi chök mammasa kemi o küna meet a fis ngeni kemi me lón Egypt. 17Iwe, ngang üwa pwon pwe üpwe chimanükemiiwu seni ämi riäfföü ren ekkewe chón Egypt. Ngang üpwe emmwenikemiiló ngeni ewe fönü iei mi masow ren ekkewe chón Kanaan, ekkewe chón Hit, ekkewe chón Amor, ekkewe chón Periz, ekkewe chón Hiv me ekkewe chón Jebus - ew fönü ia a pwuupwu ie milik me chönün chunen.’
18“Iwe, ekkewe souemmwenin ekkewe aramasen Israel repwe etiwa óm poraus. Mwirin, en me ekkewe souemmwen öüpwe feilweneweneló ren ewe kingen Egypt o üreni, ‘Ewe SAMOL, ewe Kot än ekkewe chón Hipru, a chuuri keem. Kopwe mwüüt ngeni keem pwe aipwe sääiló lón üküükün ülüngät rän lón ewe fönüpöön pwe aipwe asór ngeni ewe SAMOL äm we Kot.’ 19Nge ngang üwa silei pwe ewe kingen Egypt esap mwüüt ngeni kemi pwe öüpwe feilló, chiilón chök ika och manaman mi lapalaap epwe echchimwa. 20Iei minne, ngang üpwe eitiewu peii o aea äi manaman le efeiengawa ekkewe chón Egypt ren ekkewe sókkun manaman meinisin ngang üpwe föri me leiir. Mwirin ena, i epwe mwüüt ngeni kemi pwe öüpwe feilló.
21“Iwe, ngang üpwe pwal föri pwe ekkewe chón Egypt repwe kirekiröch ngeni kemi. Repwe amasowa kemi ren chómmóng liffang lupwen öüpwe feilló seni Egypt, pün öüsap feilló fän ämi ösöülapö. 22Ekkewe fiin Israel repwe tungór pisek mi för seni silifer me kolt pwal üüf mi mwirinnö seni chón óruur kewe chón Egypt me nöün chón óruur kewe waasöla. Iwe, öüpwe öüföüfa ngeni nöümi kana äät me nengngin ekkewe üüf. Epwe iei usun lapalapen ämi öüpwe liäpenaló pisekin ekkewe chón Egypt!”
Esissilen än ewe SAMOL manaman
4Nge Moses a pölüwenisäfäli o apasa, “Nge meet ika ekkewe chón Israel resap lüküei? Ina resap mochen föri meet ngang üpwe üreniir. Ina repwe fen chök apasa, ‘Ewe SAMOL esap pwää ngenuk.’ ”
2Mwirin, ewe SAMOL a apasa ngeni Moses, “Meet na lón pöum?”
Iwe, Moses a pölüweni, “Efóch wóók wókun chón masen siip.”
3Iwe, ewe SAMOL a apasa ngeni, “Kopwe oturätiw ewe wóók wón ewe pwül.”
Iei minne, Moses a oturätiw ewe wóók wón ewe pwül, iwe, a wiliti emön serepenit. Iwe, Moses a nuokkus, ina minne a kul o sü seni. 4Mwirin, ewe SAMOL a üreni Moses, “Kopwe eitiewu pöum o ömwöchü mechan.” Iei minne, Moses a eitiewu pöun o kömwöch ewe serepenit. Iwe, a wilisäfäliti efóch wókün chón masen siip me lón pöün. 5Iwe, ewe SAMOL a üreni, “Iei ei esissil kopwe föri, iwe, repwe lüküuk. Repwe meefi pwe ewe SAMOL, ewe Kot än ar kewe leewo - ewe Kot än Abraham, ewe Kot än Isaak, ewe Kot än Jakob - a wesewesen pwää ngenuk.”
6Mwirin, ewe SAMOL a pwal apasa ngeni Moses, “Kopwe söökalong pöum lón üfom na.” Iei minne, Moses a söökalong pöün lón üfan we. Nge lupwen a eliwinawu pöün we, a pwechepwech usun sno ren rupwun pwötür.
7Iwe, ewe SAMOL a apasa, “Kopwe pwal sööksäfälielong pöum lón üfom na.” Iei minne, Moses a sööksäfälielong pöün lón üfan we. Nge lupwen a eliwinisäfäliewu, lón ei fansoun, a chikarsäfäl o a usun chök kewe lussun kifetin wón inisin.
8Mwirin, ewe SAMOL a apasa, “Are resap lükuuk lupwen kopwe föri ewe äewin manaman, eli repwe lükuuk ren ewe oruuen manaman. 9Nge are resap lükuuk mwirin óm föri ekkeei ruu manaman ika resap pwal mochen öüseling ngenuk; iwe, kopwe üfi och kólik seni lón ewe chaanpwuupwu Nail o niinätiw wón ewe pwül mi pwasapwas. Iwe, lupwen kopwe föri ei, ewe kólik epwe wiliti chcha me wón ewe pwül.”
10Nge Moses a tungór ngeni ewe SAMOL o apasa, “Äi Samol, sap ngang emön mi angangöch le kapas. Ngang mi lipwäkingaw le kapas me lóóm, ngang mi pwal lipwäkingaw lón ei atun en ka kapas ngeniei ngang noum ei chón angang. Ngang mi mang le kapas, pwal chönnawei mi küümwöchümwöch le kapas.”
11Iwe, ewe SAMOL a eisini Moses, “Iö a föri awen aramas? Iö a föri pwe aramas repwe tongeni kapas ika resap kapas? Iö a föri pwe aramas repwe tongeni rongorong ika resap rongorong? Iö a föri pwe aramas repwe küna mweer ika resap küna mweer? Ifa usun, sap ngang, ewe SAMOL? 12Kopwe feilló iei o föri usun minne ngang üwa ürenuk. Ngang üpwe älisuk pwe kopwe lipwäköch le kapas o üpwe äiti ngenuk meet kopwe apasa.”
13Nge Moses a pwal tungórsäfäl o apasa, “Äi Samol, kose mochen kopwe tiinaló emön me lüki pwe epwe föri ei.”
14Mwirin, ewe SAMOL a soong ngeni Moses o a apasa, “Iwe, ina! Nge meet ren pwiimw we, Aaron, ewe re Levi? Ngang mi silei pwe i emön mi lipwäköch le kapas. Iwe, nengeni, iei i a fen feitto pwe epwe chuuruk. Iwe, lupwen epwe künók, letipan epwe fókkun pwapwa. 15En kopwe kapas ngeni o äiti ngeni ekkewe kapas i epwe apasa. Ngang üpwe älisi kemi me rüömön pwe epwe fatafatöch ämi kapas o ngang üpwe äiti ngeni kemi meet öüpwe föri. 16Aaron epwe wiisen kapas ngeni ekkewe aramas fänitom. En kopwe usun pwe en Kot ngeni, pün kopwe üreni meet epwe apasa. 17Iwe, en kopwe pii pwe kopwe uweei wókum na wókun chón masen siip pwe kopwe tongeni föri ren ekkewe manaman ngang üwa pwääri ngenuk.”
Moses a liwinsäfäliló Egypt
18Mwirin, Moses a liwinsäfäliló ngeni leenian we o a kapas ngeni Jethro semen pwülüwan we. Moses a apasa ngeni Jethro, “Are kopwe mwüüt ngeniei, ngang üwa mochen pwe üpwe liwinsäfäl ngeni Egypt pwe üpwe äämwa äi famili. Ngang üsap silei ika iir mi fen chüen manaw ika ra fen mäló.”
Iwe, Jethro a pölüweni o apasa, “Kopwe feilló fän äi feiöch.”
19Nge me mwen än Moses feilló seni Midian, ewe SAMOL a apasa ngeni, “Kosap nuokkus óm kopwe liwinsäfäl ngeni Egypt, pün chókewe meinisin mi mochen niikeló ra mäló.” 20Iei minne, Moses a angei pwülüwan we me nöün kewe äät, a amóóteretä wón emön dongki o a poputäni an sääi säfäl ngeni Egypt. Iwe, a uweei ewe wókun Kot lón pöün.
21Mwirin, ewe SAMOL a ächchema ngeni Moses, “Lupwen kopwe waresäfäl ngeni Egypt, kopwe pii pwe kopwe feilló ren Farao o föri ekkewe manaman meinisin ngang üwa fang ngenuk óm tüfich fänitan pwe kopwe föri. Nge ngang üpwe öpöchökküla letipan pwe i esap mwüüt ngeni ekkewe aramas pwe repwe feilló. 22Mwirin, en kopwe üreni Farao, ‘Iei meet ewe SAMOL a apasa: Israel i neii mwännichi. 23Iei minne, ngang üwa öllük ngenuk pwe kopwe mwüüt ngeni neii we mwän pwe epwe feilló pwe i epwe fel ngeniei. Nge are kosap mochen mwüüt ngeni i pwe epwe feilló, iwe, kopwe äfälliik! Ngang üpwe niieló noum we mwännichi.’ ”
24Iwe, lupwen Moses me an famili ra köüüló lón ar we sääi pwe repwe asöösö lón ew pwinin, ewe SAMOL a chuuri Moses o a ekiekin epwe le niieló i. 25Mwirin, Zipporah pwülüwan we a angei och sättin föüchól mi kken o a sirkomsaisi nöün we äät. Iwe, neminnewe a móneetiw ünüchchen ewe kükkün inis ren pachapachen Moses o apasa, “Enlet, en emön mwän öpwüpwülü söfö mi chcha ngeniei.” 26(Lupwen neminnewe a kööri ngeni Moses pwe i “emön mwän öpwüpwülü söfö mi chcha”, i a kapas usun ewe angangen sirkomsais.) Mwirin än neminnewe föri ei, ewe SAMOL a emmwen seni an pwe efeiengawa Moses.
27Iwe, ewe SAMOL a apasa ngeni Aaron, “Kopwe feilló lón ewe fönüpöön pwe kopwe chuuri Moses.” Iei minne, Aaron a sääiló ngeni ewe chukun Kot, ia a küna Moses me ie o a kapwong ngeni ren an róómi. 28Mwirin, Moses a aporausa ngeni Aaron meinisin minne ewe SAMOL a öllük ngeniir pwe repwe föri me apasa. A pwal aporausa ngeni usun ekkewe manaman Kot a öllük ngeni i pwe epwe föri.
29Iwe, Moses me Aaron ra liwinsäfäl ngeni Egypt o ra kööri ekkewe souemmwenin Israel pwe repwe mwiich fengen. 30Mwirin, Aaron a aporausa ngeniir meinisin minne ewe SAMOL a üreni Moses. Iwe, Moses a föri ekkewe manaman me mwen ekkewe aramas. 31Iwe, ekkewe souemmwen ra mwittir lükülüküw pwe ewe SAMOL a tiini Moses me Aaron. Iwe, lupwen ra silei pwe ewe SAMOL a küna ar riäfföü o a chüngüw usun nónnómwur, ra appwórotiw o fel ngeni Kot.
Moses me Aaron ra kapas ngeni Farao
5Mwirin än Moses me Aaron kapas ngeni ekkewe souemmwenin Israel, ra feilló pwe repwe chuuri Farao. Iwe, ra üreni, “Iei meet ewe SAMOL, ewe Kot än chón Israel a apasa: ‘Kopwe mwüüt ngeni neii kewe aramas pwe repwe feilló lón ewe fönüpöön pwe repwe föri ew chuulap fäniten ar repwe asamoluei.’ ”
2Nge Farao a pölüweni fän pöchökkül o apasa, “Iön na SAMOL pwe üpwe älleasochis ngeni o mwüüt ngeni Israel pwe epwe feilló? Ngang üsap silei ena SAMOL. Iwe, üsap mwüüt ngeni Israel pwe epwe feilló.”
3Mwirin, Aaron me Moses ra äniicho le apasa, “Ewe Kot än ekkewe chón Hipru a chuuri keem. Kopwe mwüüt ngeni keem pwe äm aipwe sääiló ngeni ewe fönüpöön lón üküükün ülüngät rän pün aipwe tongeni föri äm kana asór ngeni ewe SAMOL äm we Kot. Pün are äisap feilló, iwe, äm aipwe fókkun mäló ren samwaw ika ren ketilas.”
4Nge ewe kingen Egypt a chiwörüwör le apasa, “Moses me Aaron, öüwa kan ekieki pwe ämi iö? Pwata öüwa mochen osukosuka ekkewe aramas. Öüpwe chök likitireló pwe repwe föri ar angang. Öüpwe liwinsäfäliló ngeni ämi angang!” 5Mwirin, Farao a pwal apasa, “Nengeni, a wor chómmóng chón angang ikeei lón Egypt, nge ämi öüwa mochen öüküüretiw seni ar repwe föri ar angang.”
Chón Israel repwe pwisin kütta fetilipwas fäniten ar för pilak
6Lón ewe chök ränin, Farao a tiinaló ei öllük ngeni ekkewe chón nemenemengaw ngeni ekkewe amanaw me ekkewe pwoos mi wiisen tümwünü ekkewe aramasen Israel: 7“Öüsap chüen awora ngeni ekkewe aramasen Israel ar fetilippwas le föri pilak. Iir repwe pwisin feilló o küüt ar fetilippwas. 8Nge öüpwe eriäniir pwe repwe föri üküükün iteiten förier pilak usun chök iteitan me mwan. Öüsap ekisätiw öüküükün iteiten minne wiisen emön me emön epwe föri. A pwääpwäló pwe esap naaf minne ra föri. Ika epwe wor minne repwe föri, iwe, resap kapas usun ar repwe feilló lón ewe fönüpöön pwe repwe asór ngeni ar we Kot. Ra chök chipwang. 9Öüpwe eweiresaló ewe angang fäniten ekkewe mwän pwe repwe chök sópweló le angang. Öüpwe föri pwe repwe moolool. Mwirin, repwe käeö ar resap öüseling ngeni ekkewe chón kapas chofona.”
10Iei minne, ekkewe chón nemenemengaw ngeni ekkewe amanaw me ekkewe pwoosun chón angang ra feilló o ra esile ngeni ekkewe aramas, “Farao a öllük ngeni keem pwe äm aisap chüen awora ngeni kemi fetilippwas. 11Öüpwe feilló o pwisin küütfeil ämi fetilippwas ekis meinisin ia öüpwe tongeni künökün me ie. Nge ämi öüpwe chök fókkun awora ekkewe üküükün iteiten föün pilak usun me mwan.” 12Iei minne, ekkewe aramas ra fätälfeil leemelen ewe fönü Egypt pwe repwe rusfeil pökün waasen fetil pwe repwe aea fäniten ar fetilippwas. 13Iwe, ekkewe chón nemenemengaw ngeni ekkewe amanaw ra fókkun inemouchcher o apasa, “Öüpwe ounusaöchüw le föri üküükün iteiten föriemi föün pilak fäniten iteiten rän usun chök öüwa föri me mwan lupwen a wor chón küüt ämi fetilippwas.” 14Iwe, ra wichii ekkewe chón Israel iir pwoosun chón angang mi kefilitä pwe repwe wiisen nemeni ekkewe mwichen chón angang. Iwe, ra eisiniir, “Pwata öüsap föri öüküükün iteiten föriemi pilak nänew ika ikenäi, epwe usun chök me mwan?”
15Iei minne, ekkewe chón Israel iir pwoosun chón angang, ra feilló o tungór maamaw ngeni Farao. Ra apasa: “Kose mochen kosap iei usun kirikirum ngeni keem äm noum keei chón angang? 16Esap chüen wor epwe küüt ngeni keem fetilippwas, äm noum keei chón angang, nge ra chüen chök ürenikeem pwe äm aipwe för föün pilak usun chök üküükün chómmóngun me mwan! Ra wichikeem äm noum keei chón angang fäniten och mettóch esap äm mwääl. Pün ei pwisin mwälin noum kewe chón nemeni ekkewe amanaw pün ra föri ei sókkun echchimw esap wor popun.”
17Nge Farao a pölüweni o apasa, “Ämi öüwa chök chipwang! A pwääpwäló pwe esap naaf minne öüwa föri. Pün are epwe wor minne öüwa föri, iwe, öüsap apasa: ‘Kopwe mwüüt ngeni keem pwe äm aipwe feilló o ääni äm kewe asór ngeni ewe SAMOL.’ 18Öüpwe liwinsäfäliló angang iei. Esap wor epwe küüt ngeni kemi fetilippwas, nge öüpwe chök föri üküükün unusen iteiten föriemi föün pilak.”
19Iwe, pwokiten Farao esap mochen ekisätiw üküükün iteiten förier pilak mi affat ngeniir fäniten iteiten rän, iei minne ekkewe chón Israel iir pwoosun chón angang ra meefi pwe ra tolong lón osukosuk mi wätte. 20Nge, lupwen ra feilló seni leenien Farao we, ra chuuri Moses me Aaron iir mi chök witiwit lükün fäniter. 21Iwe, ekkewe pwoos iir chón Hipru ra apasa ngeni Moses me Aaron, “Amwo ewe SAMOL epwe öpüwngü kemi ren meet ei ämi öüwa föri ngeni keem! Ämi öüwa föri pwe Farao me nöün kana nöüwiis repwe opwut äm. Ämi öüwa föri pwe epwe wor och popun ar repwe niikeemiló.”
22Iei minne, Moses a liwinsäfäliló ren ewe SAMOL o apasa, “Äi Samol, pwata a iei usun kirikirum ngeni noum kewe aramas? Pwata chök ka tiinieito? 23Seni ewe fansoun ngang üwa feilló ren Farao o esile ngeni óm we poraus, i a fen alapaló an kirikiringaw le eweiresi noum kewe aramas. Nge en kosap föri och ren óm kopwe poputäni pwe kopwe chimanür.”
Kot a pwon pwe epwe angasa chón Israel
6Mwirin, ewe SAMOL a üreni Moses, “Iei kopwe küna meet ngang üpwe föri ngeni Farao. Lupwen epwe meefi peii mi manaman wón, i epwe mwüüt ngeni ekkewe aramas pwe repwe feilló. I epwe fókkun atapwanapwan le ösüüreló, ina minne, i epwe echchimweer pwe repwe toowu seni fönüan.”
2Kot a pwal apasa ngeni Moses, “Ngang ewe SAMOL. 3Ngang üwa pwää ngeni Abraham, ngeni Isaak pwal ngeni Jakob pwe ngang ewe Kot mi Unusen Manaman (El Shaddai), nge ngang üsap mwo pwääri ngeniir itei ei SAMOL (YAHWEH). 4Ngang üwa pwal föri äi pwonen etipeew ngeniir. Lón kapasen ei pwon, ngang üwa pwon fän ökköpöl pwe üpwe ngeniir ewe fönü Kanaan ia iir ra nómwun chón waasöla ie. 5Nge en kopwe fókkun silei pwe ngang üwa rongorong än ekkewe aramasen Israel ngüüngü pün ekkewe chón Egypt ra nöüniir amanaw. Iwe, ngang üwa chechchemeni äi pwon ngeniir.
6“Iei minne, kopwe apasa ngeni ekkewe chón Israel: ‘Ngang ewe SAMOL. Iwe, ngang üpwe angasakemi, pwe ekkewe chón Egypt resap chüen nöüni kemi amanaw. Ngang üpwe angasakemi ren äi manaman mi pöchökkül pwal ren föfförün köpwüng mi lapalaap. 7Ngang üpwe angei kemi pwe ämi öüpwe neii aramas nge ngang üpwe ämi Kot. Mwirin, öüpwe silei pwe ngang ewe SAMOL ämi we Kot mi chimanükemiiwu seni än ekkewe chón Egypt nöüni kemi amanaw. 8Ngang üpwe uweikemiilong lón ewe fönü ngang üwa eitietä peii lón äi pwon fän ökköpöl pwe üpwe ngeni Abraham, Isaak me Jakob. Ngang üpwe ngeni kemi pwe fönüemi. Ngang ewe SAMOL.’ ”
9Iei minne, Moses a esile ngeni ekkewe chón Israel meet ewe SAMOL a apasa, nge resap chüen mochen öüseling ngeni i pwokiten ra fókkun apilüküngaw ren lapalón weiresin än chón Egypt nöüniir amanaw.
10Mwirin, ewe SAMOL a apasa ngeni Moses, 11“Kopwe liwinsäfäliló ren Farao ewe kingen Egypt o üreni pwe epwe mwüüt ngeni ekkewe chón Israel pwe repwe toowu seni fönüwan ei.”
12Nge Moses a pölüweni o apasa ngeni ewe SAMOL, “Ekkewe chón Israel resap mochen öüseling ngeniei. Iwe, itä pwata Farao epwe fen öüseling ngeniei? Sap ngang emön mi silelap kapas.”
13Nge iei ewe SAMOL a öllük ngeni Moses me Aaron pwe repwe liwinsäfäliló ren Farao, ewe kingen Egypt, o echchimwa pwe epwe mwüüt ngeni ekkewe aramasen Israel pwe repwe toowu seni Egypt.
Än Moses me Aaron leewo
14Ikkeiir leewon ekkewe einang mi feitto seni ekkóch kewe einangen Israel.
Reuben i nöün Israel we mwännichi. Iwe ikkeeiir nöün Reuben kewe mwän: Hanok, Pallu, Hezron me Karmi. Mwirimwirin ätekkeei iir chón ewe einangen Reuben.
15Ikkeiir nöün Simeon kewe mwän: Jemuel, Jamin, Ohad, Jakin, Zohar me Shaul (inen Shaul emön fiin Kanaan). Mwirimwirin ätekkeei iir chón ewe einangen Simeon.
16Ikkeiir ekkewe mwirimwirin Levi alóngólóng wón tettelin kinikinin ar kewe famili. Ikkeiir ätekewe mi nóm lón ewe äewin tettelin pilóón aramas: Kershon, Kohat, me Merari. (Levi semeer we a manaw lón üküükün ipwükü iliik me fisu ier.)
17Nöün Kershon kewe mwän: Libni me Shimei. Emön me emön leiir i leewon ew me ew einang.
18Nöün Kohat kewe mwän: Amram, Izhar, Hebron me Uzziel. (Kohat a manaw lón üküükün ipwükü iliik me ülüngät ier.)
19Nöün Merari kewe mwän: Mahli me Mushi.
Ikkeei chón ewe einangen Levi alóngólóng wón tettelin mwirimwiriir.
20Amram a pwülüweni Jokebed fefinen saman we. Iwe, neminnei a nöüni Aaron me Moses me wón Amram. (Amram a manaw lón üküükün ipwükü iliik me fisu ier.)
21Nöün Izhar kewe mwän: Korah, Nefek me Zikri.
22Nöün Uzziel kewe mwän: Mishael, Elzafan me Sithri.
23Aaron a pwülüweni Elisheba, nöün Amminadab we fefin, fefinen Nahshon. Iwe, neminnei a nöüni Nadab, Abihu, Eleazar me Ithamar me wón Aaron.
24Nöün Korah kewe mwän: Assir, Elkanah me Abiasaf. Mwirimwiriir ra wiliti chón ewe einangen Korah.
25Eleazar nöün Aaron we mwän a pwülüweni emön me leiin nöün Putiel kewe fefin. Iwe, neminnei a nöüni Finehas me wón Eleazar.
Ikkeiir leewon chón ekkewe familien Levi lón ew me ew ar kewe famili.
26Ikkeiir ätekewe Aaron me Moses mi nóm iter lón ei tettel, ikkeiir ätekewe Aaron me Moses ewe SAMOL a apasa ngeniir, “Öüpwe emmwenawu neii kewe aramasen Israel seni lón ewe fönü Egypt lón kinikinin ar kewe chóó.” 27Ikkeiir chök pwal ätekewe Moses me Aaron mi feilló ren Farao, ewe kingen Egypt, o tungór ngeni pwe epwe mwüütätä ngeniir pwe repwe emmwenawu ekkewe chón Israel seni ewe fönü Egypt.
28Lón ena fansoun, ewe SAMOL a apasa ngeni Moses me lón Egypt, 29“Ngang ewe SAMOL! Kopwe üreni Farao, ewe kingen Egypt, iteiten ekkewe poraus meinisin ngang üwa ürenuk.”
30Iei i chök pwal ätewe Moses mi wiipin ngeni ewe SAMOL o apasa, “Ngang üsap tongeni föri minne ka apasa üpwe föri! Sap ngang emön mi silelap kapas. Iwe, pwata itä Farao epwe öüseling ngeniei?”
Wókun Moses we a wiliti emön serepenit
7Mwirin, ewe SAMOL a apasa ngeni Moses, “Kopwe nengenifichi usun ei, pwe ngang üpwe föri pwe en kopwe usun Kot ngeni Farao. Nge Aaron pwiimw we epwe noum soufós. I epwe wiisen kapas fänitom. 2En kopwe üreni Aaron, pwiimw we iteiten minne ngang üpwe apasa ngenuk, nge i epwe wiisen esile ngeni Farao. I epwe echchimwa Farao pwe epwe mwüüt ngeni ekkewe aramasen Israel pwe repwe toowu seni Egypt. 3Nge ngang üpwe aföreai letipen Farao, pwe ngang üpwe tongeni achómmóngaló äi kewe esissil me manaman mi amwaraar me lón ewe fönü Egypt. 4Iwe, inamwo nge Farao esap mochen epwe öüseling ngeni kemi. Iei minne, ngang üpwe isettiw peii mi manaman wón Egypt pwe üpwe efeiengawa ren ekkóch tettelin feiengaw. Mwirin, ngang üpwe emmwenawu neii kewe aramasen Israel lón tettelin en me an kinikin ren föfförün köpwüng mi lapalaap. 5Lupwen ngang üpwe eitiewu peii o pwääri ngeni ekkewe chón Egypt äi manaman o eriäniir pwe repwe mwüüt ngeni ekkewe chón Israel pwe repwe toowu seni Egypt, mwirin, repwe silei pwe ngang ewe SAMOL.”
6Iei minne, Moses me Aaron ra föri usun chök minne ewe SAMOL a öllük ngeniir. 7Moses a waliik ierin nge Aaron a waliik me ülüngät ierin lupwen ra chuuri Farao o kapas ngeni.
8Mwirin, ewe SAMOL a apasa ngeni Moses me Aaron, 9“Farao ina epwe echchimwa kemi pwe öüpwe pwääri ngeni i ew manaman pwe epwe älletätä pwe Kot a ökkünöw kemi. Lupwen epwe föri ei, mwirin, en kopwe apasa ngeni Aaron, ‘Kopwe angei wókum na wókun chón masen siip o oturätiw fän mesen Farao.’ Iwe, ewe wóók epwe wiliti emön serepenit.”
10Ina pwata, Moses me Aaron ra feilló pwe repwe chuuri Farao. Iwe, ra föri ewe manaman usun chök minne ewe SAMOL a öllük ngeniir. Aaron a oturätiw wókun we me mwen Farao me nöün kewe nöüwiis. Iwe, ewe wóók a wiliti emön serepenit. 11Mwirin, Farao a tiiti nöün kewe mwän mi tipächchem me ekkewe sourong. Iwe, ekkewe sourongen Egypt ra föri ar kewe sókkun angangen roong o ra föri usun chök minne Aaron a föri. 12Emön me emön leiir a oturätiw en me wókun. Iwe, wókuur kewe ra wiliti pwal serepenit. Nge wókun Aaron we mi wiliti serepenit a oromaló wókuur kewe mi wiliti serepenit. 13Nge letipen Farao a chüen chök tipeförea me pöchökkül o esap mochen mwüüt ngeni ekkewe aramas pwe repwe feilló, usun chök minne ewe SAMOL a fen apasa. Iwe, esap mochen öüseling ngeni Moses me Aaron.
Ew määlap pwokiten ewe kólik a wiliti chcha
14Mwirin, ewe SAMOL a apasa ngeni Moses, “Farao a fókkun tipeförea o a chök sópweló an esap mochen epwe mwüüt ngeni ekkewe aramasen Israel pwe repwe feilló. 15Iei minne, lesossor, kopwe feilló ren Farao lupwen epwe feittiw ren ewe chaanpwuupwu. Kopwe üütä ünüppen ewe chaanpwuupwu Nail pwe kopwe chuuri i me ikenan. Iwe, kopwe tümwünü pwe kopwe uweei ewe wóók wókun chón masen siip mi wiliti emön serepenit me mwan. 16Mwirin, kopwe apasa ngeni Farao, ‘Ewe SAMOL, ewe Kot än ekkewe chón Hipru a tiinieto pwe üpwe apasa ngenuk: “Kopwe mwüüt ngeni neii kewe aramas repwe feilló pwe repwe tongeni fel ngeniei me lón ewe fönüpöön.” Nge tori iei en kosap mochen öüseling ngeni i. 17Iwe, iei meet ewe SAMOL a apasa: “Ren ei, en kopwe küna pwe ngang ewe SAMOL. Nengeni, ngang üpwe wichi ewe kólik lón ewe chaanpwuupwu Nail ren ei wóók mi nóm lón peii. Iwe, ewe chaanpwuupwu epwe wiliti chcha. 18Ekkewe iik repwe mäló, nge ewe chaanpwuupwu epwe pwongaw. Iwe, ekkewe chón Egypt resap tongeni repwe ünümi och kólik seni ewe chaanpwuupwu Nail.’ ”
19Mwirin, ewe SAMOL a apasa ngeni Moses, “Kopwe üreni Aaron pwe epwe angei wókun na o eitieló pöun wón ekkewe kólikin Egypt - wón ekkewe chönüpwuupwu meinisin me ekkewe leenien pwuupwun kólik lefiilen fönü me ekkewe ppat me ekkewe leeni ia kólik a iseis ie pwe repwe wiliti chcha. Kólik epwe wiliti chcha ekis meinisin me lón Egypt, pwal mwo nge ekkewe kólik mi iseis lón ekkewe leenien kólik mi för seni mwüüch me faaw lón imwen aramas.”
20Iei minne, Moses me Aaron ra föri usun chök minne ewe SAMOL a öllük ngeniir. Iwe, lupwen Farao me nöün kewe nöüwiis meinisin ra katol, Aaron a eitieló wókun we o a wichi kólikin ewe chaanpwuuwpu Nail. Iwe, esap mang mwo nge unusen ewe kólik lón ewe chaanpwuupwu a wiliti chcha. 21Iwe, ekkewe iik lón ewe chaanpwuupwu Nail ra mäló, nge ewe kólik a fókkun pwongaw, ina pwata ekkewe chón Egypt resap tongeni wün kólikin ewe chaanpwuupwu. A wor chcha ekis meinisin lón ewe fönü Egypt.
22Nge ekkewe sourongen Egypt ra föri ar kewe roong. Iwe, pwal iir ra ewili ewe kólik ngeni chcha. Iei minne, letipen Farao a chüen chök pöchökkül me tipeförea. Iwe, esap mochen öüseling ngeni Moses me Aaron, usun chök minne ewe SAMOL a fen apasa. 23Iwe, Farao a kul o liwinsäfäl ngeni leenian we leenien king, nge esap mwo ekieki och usun ei lón lelukan. 24Mwirin, ekkewe chón Egypt meinisin ra ttu ar chönüttu aroppen ewe chaanpwuupwu Nail pwe repwe küüt ünümer kólik, pwokiten resap tongeni wün ewe kólik seni lón ewe chaanpwuupwu. 25Iwe, ra luuló fisu rän mwirin än ewe SAMOL a ewili kólikin ewe chaanpwuupwu Nail ngeni chcha.
Ew määlap pwokiten käirü
8Mwirin, ewe SAMOL a kapas ngeni Moses, “Kopwe feilló säfäl ren Farao o apasa ngeni i, ‘Iei meet ewe SAMOL a apasa: Kopwe mwüüt ngeni neii kewe aramas pwe repwe feilló pwe repwe tongeni fel ngeniei. 2Nge are kosap mochen mwüüt ngeniir pwe repwe feilló, mwirin, kopwe öüselingöch ngeniei: Ngang üpwe tiinato chómmóng käirü pwe repwe chóóni unusen fönüom ei seni ew kiään tori pwal ew. 3Iwe, ewe chaanpwuupwu Nail epwe uróló ren käirü. Ekkewe käirü repwe toowu seni lón ewe chaanpwuupwu o tölong lón imwom kewe imwen king, repwe pwal tolong lón óm ruumwen möür o töötä wón óm kewe peet. Iteiten imw lón Egypt repwe uroló ren käirü. Repwe tolong lón imwen noum kewe nöüwiis pwal lón imwen noum kewe aramas. Repwe ouraló om kewe leenien uumw me kewe sepien öüwööw pilawa. 4Ekkewe käirü repwe töötä wóm me wón noum kewe aramas pwal wón noum kewe nöüwiis meinisin.’ ”
5Mwirin, ewe SAMOL a apasa ngeni Moses, “Kopwe üreni Aaron pwe epwe eitieló wókun we wókun chón masen siip wón ekkewe chönüpwuupwu meinisin me ekkewe leenien pwuupwun kólik lefiilen fönü me ekkewe ppat lón Egypt pwe epwe wor käirü lón iteiten kinikinin ewe fönü Egypt.”
6Iei minne, Aaron a eitieló wókun we wón ekkewe kólikin Egypt. Iwe, ekkewe käirü ra töötä o pwölüweló unusen ewe fönü Egypt. 7Nge ekkewe sourong ra tongeni föri usun chök ei ren ar kewe sókkun angangen roong. Pwal iir ra föri pwe ekkewe käirü repwe töötä wón ewe fönü Egypt.
8Mwirin, Farao a tiiti Moses me Aaron o tungór ngeniir, “Öüpwe tungór ngeni ewe SAMOL pwe epwe ösüüweló ekkeei käirü seniei pwal seni neii kewe aramas. Iwe, ngang üpwe mwüüt ngeni ekkewe aramas pwe repwe feilló, pwe repwe tongeni föri ar kewe asór ngeni ewe SAMOL.”
9Nge Moses a pölüweni o üreni Farao, “Ngang üwa mwüüt ngenuk pwe en kopwe pwisin filätä ngeniei ewe fansoun. Kopwe üreniei ineet en ka mochen pwe ngang üpwe iótek fänitom me noum kewe nöüwiis me noum kewe aramas. Ngang üpwe iótek pwe ekkewe käirü repwe rosoló senuk pwal seni lón imwom kewe. Nge ekkewe käirü mi nóm lón ewe chaanpwuupwu Nail repwe chök nómwóló nge iir mi manaw.”
10Iwe, Farao a apasa, “Kopwe föri ei lesor.”
Nge Moses a pölüweni, “Iwe, ina. Epwe fis usun meet ka apasa. Mwirin, en kopwe silei pwe esap wor emön mi manaman epwe usun ewe SAMOL äm we Kot. 11Iwe, ekkewe käirü meinisin repwe rosoló, chiilón chök ekkana mi nóm lón ewe chaanpwuupwu Nail.”
12Iei minne, Moses me Aaron ra feilló seni Farao, nge Moses a tungór maamaw ngeni ewe SAMOL usun ekkewe käirü i a tiiniireto. 13Iwe, ewe SAMOL a föri usun meet Moses a pwon ngeni Farao. Ekkewe käirü mi nóm lón ekkewe imw, lón ekkewe leeni lükün ekkewe imw pwal lón ekkewe mälämäl meinisin ra mäló. 14Ra ioni fengeniir o ochukuchukuretä. Iwe, pwongawer a ouraló ewe fönü. 15Nge lupwen Farao a küna pwe ekkewe käirü resap chüen nóm, a öpöchökküla letipan. Iwe, esap mochen epwe öüseling ngeni Moses me Aaron, usun chök minne ewe SAMOL a fen apasa.
Ew määlap pwokiten mönün mwooi
16Mwirin ewe SAMOL a apasa ngeni Moses, “Kopwe üreni Aaron pwe epwe eitieló wókun na o wichi ngeni ewe pwül mworomwor. Iwe, ewe pwül mworomwor leemelen unusen ewe fönü Egypt epwe wiliti pwiin mönün mooi.” 17Iwe, Moses me Aaron ra föri usun minne ewe SAMOL a öllük ngeniir. Aaron a eitieló ewe wóók mi nóm lón pöün o wichi ngeni ewe pwül mworomwor. Iwe, lón ewe chök ótun, mönün mooi ra chóónaló unusen ewe fönü. Iwe, ra pwölüweló ekkewe chón Egypt me nöüür kewe maan. Meinisin ewe pwül mworomwor me lón ewe fönü Egypt ra wiliti mönün mooi. 18Iwe, nöün Farao kewe sourong ra sótuni ar repwe pwal awora mönün mooi ren ar kewe angangen roong, nge lón ei fansoun resap tongeni.
Iwe, ekkewe mönün mooi ra nóm wón ekkewe aramas me maan meinisin. 19Iwe, ekkewe sourong ra apasa ngeni Farao, “Ächefen pöün Kot chök a tongeni föri ei sókkun.” Nge letipen Farao a chüen chök tipeförea o pöchökkül. I esap mochen epwe öüseling ngeni Moses me Aaron, usun chök minne ewe SAMOL a fen apasa.
Ew määlap pwokiten lóóng
20Mwirin, ewe SAMOL a apasa ngeni Moses, “Kopwe pwäätä lesossorusich o feilló chuuri Farao lupwen epwe feittiw ngeni ewe chaanpwuupwu. Iwe, kopwe apasa ngeni, ‘Iei meet ewe SAMOL a apasa: Kopwe mwüüt ngeni neii kewe aramas pwe repwe feilló pwe repwe fel ngeniei. 21Nge are kosap mwüüt ngeni neii kewe aramas pwe repwe feilló, ngang üpwe tiinato pwiin lóóng wóm me noum kewe nöüwiis pwal wón noum kewe aramas. Iwe, imwom me imwen ekkewe chón Egypt repwe uroló ren lóóng. Iwe, pwal ewe pwül epwe pwölüló ren lóóng.
22“ ‘Nge lón ena ränin, ngang üpwe asókkóló minne üpwe föri ngeni ewe fönü Koshen, ia neii kewe aramas ra nónnóm ie, pwe resap künökün lóóng me ikenan. Mwirin, en kopwe silei pwe ngang ewe SAMOL, kopwe pwal silei pwe a wor äi manaman lón fönüom ei. 23Ngang üpwe awora ew sakkofesenin lefiilen neii kewe aramas me noum kewe aramas. Ei esissil mi manaman epwe fis lesor.’ ”
24Iwe, ewe SAMOL a föri usun chök meet a apasa. A wor chómmóng pwiin lóóng ra ässilong lón imwen Farao we me lón imwen nöün kewe nöüwiis. Iwe, unusen ewe fönü Egypt a taatakis ren ekkewe lóóng.
25Mwirin, Farao a mwittir tiiti Moses me Aaron o apasa, “Öüpwe feilló o asór ngeni ämi we Kot. Nge öüpwe chök föri ikeei lón ei fönü. Öüsap feilló lón ewe fönüpöön.”
26Nge Moses a pölüweni o apasa, “Ena esap pwüng. Pün ekkewe chón Egypt repwe opwut ekkewe asór äm aipwe ääni ngeni ewe SAMOL äm we Kot. Are äm aipwe ääni äm kewe asór ikeei ia repwe tongeni künakeem me ie, iwe, ina repwe fókkun móneei ngeni keem faaw. 27Äm aipwe chök sääiló lón üküükün ülüngät rän ngeni ewe fönüpöön pwe aipwe ääni ekkewe asór ngeni ewe SAMOL äm we Kot, usun i a öllük ngenikeem.”
28Iwe, Farao a apasa, “Iwe ina, öüpwe feilló. Ngang üpwe le mwüüt ngeni kemi pwe öüpwe feilló o ääni ämi kewe asór ngeni ewe SAMOL ämi we Kot me lón ewe fönüpöön. Nge öüsap chök koon feilló toowaw. Öüpwe mwittir feilló, nge öüpwe iótek fänitei.”
29Iwe, Moses a apasa, “Nengeni, ngang üpwe le feilló senuk. Iwe, ngang üpwe tungór ngeni ewe SAMOL pwe epwe föri pwe ekkewe pwiin lóóng repwe süüló senuk en Farao pwal seni noum kewe nöüwiis me noum kewe aramas lesor. Nge ngang üpwe esile ngenuk en Farao pwe kosap siwili säfäli óm ekiek ren óm kosap mochen mwüüt ngeni ekkewe aramas ar repwe feilló pwe repwe ääni ekkewe asór ngeni ewe SAMOL.”
30Iei minne, Moses a feilló seni Farao o tungór ngeni ewe SAMOL pwe epwe ösüüweló ekkewe lóóng meinisin. 31Iwe, ewe SAMOL a föri meet Moses a tungór o a föri pwe ekkewe pwiin lóóng repwe süüló seni Farao me nöün kewe nöüwiis pwal seni nöün kewe aramas. Esap fókkun wor emön lóóng a chüen nómwetiw lón ewe fönü. 32Nge Farao a pwal öpöchökküla säfäli letipan o esap mochen mwüüt ngeni ekkewe aramas pwe repwe feilló.
Ew määlap a tori ekkewe maanfesir
9Mwirin, ewe SAMOL a öllük ngeni Moses, “Kopwe liwinsäfäliló ren Farao. Iwe, kopwe üreni, ‘Iei meet ewe SAMOL, ewe Kot än ekkewe chón Hipru a apasa: Kopwe mwüüt ngeni neii kewe aramas repwe feilló, pwe repwe tongeni fel ngeniei. 2Nge are kopwe chök sópweló le eriäfföüür o kosap mochen mwüüt ngeniir pwe repwe feilló, 3pöün ewe SAMOL epwe awarato ew määlap mi efeiengaw pwe epwe niieló noum kewe óris, dongki, kamel, kowu, siip me kuuch. 4Nge ewe SAMOL epwe pwal förisäfäli pwe epwe wor och sakkofesenin lefiilen nöün ekkewe chón Israel kewe maanfesir me nöün ekkewe chón Egypt. Pün esap wor emön maanfesir nöün ekkewe chón Israel epwe mäló.’ ”
5Mwirin, ewe SAMOL a filätä pwe i epwe tiinato ewe määlap lón ewe chök rän mwirin. 6Iwe, lón ewe chök rän mwirin, ewe SAMOL a föri usun meet i a apasa. Lón ewe soran, meinisin ekkewe maanfesir nöün ekkewe chón Egypt ra poputä le mäló, nge esap wor emön maan seni leiin ekkewe pwiin siip me kowu nöün ekkewe chón Israel a mäló. 7Iwe, Farao a tiinaló ekkóch nöüwiis pwe repwe nengeni ika mi pwüng pwe esap wor emön leiin nöün ekkewe chón Israel maan a mäló. Nge mwirin än Farao a silei pwe mi pwüng ei poraus, letipan a chök chüen tipepöchökkül. I esap fókkun mochen mwüüt ngeni ekkewe aramas repwe feilló.
Ew määlap pwokiten mmach
8Mwirin, ewe SAMOL a apasa ngeni Moses me Aaron, “Öüpwe tukeei lón pöümi och falang seni ew leenien uumw. Iwe, Moses epwe wiisen aparasätä ewe falang lón äsäpwääl nge Farao epwe nennengeni. 9Iwe, ewe falang epwe wiliti süüsün pwül o epwe meresfeil wón unusen ewe fönü Egypt. Iwe, epwe efisätä mmach mi lót epwe pwüküwu me wón ekkewe aramas me ekkewe maan leemelen unusen ewe fönü Egypt.”
10Ina minne, ra tukeei och falang seni ew leenien uumw o feilló pwe repwe chuuri Farao. Iwe, Moses a aparasätä ewe falang lón ewe äsäpwääl, nge Farao a katol. Iwe, mmach mi lót ra pwüküwu me wón ekkewe aramas me ekkewe maan leemelen ewe fönü Egypt. 11Ekkewe mwo sourong nge resap tongeni ar repwe üütä me mwen Moses, pwokiten ekkewe mmach ra pwüküwu pwal me wóór. 12Nge ewe SAMOL a föri pwe letipen Farao epwe fen lapaló tipeförean. Iwe, Farao esap mochen öüseling ngeni Moses me Aaron, usun chök meet ewe SAMOL a fen apasa.
Ew määlap pwokiten üüten faaw
13Mwirin, ewe SAMOL a apasa ngeni Moses, “Kopwe pwäätä lesossorusich. Iwe, kopwe feilló chuuri Farao o üreni, ‘Iei meet ewe SAMOL, ewe Kot än ekkewe chón Hipru a apasa: Kopwe mwüüt ngeni neii kewe aramas repwe feilló pwe repwe tongeni fel ngeniei. 14Nge are kosap mwüüt ngeniir pwe repwe feilló; iwe, lón ei fansoun, ngang üpwe aea äi manaman mi unusen pöchökkül. Ngang üpwe tiinato ew määlap pwe üpwe efeiengawók, üpwe pwal efeiengawa noum kewe nöüwiis me ekkewe aramasen Egypt meinisin. Ngang üpwe älelleta ngenuk pwe kopwe silei pwe esap wor pwal emön Kot mi wewe ngeniei me lón unusen fönüfan. 15Itä iei nge öüwa fen rosoló, pün ngang mi tongeni äi üpwe niikemiiló. Ngang mi tongeni eitieló peii o efeiengawók me noum kewe aramas ren ew määlap pwe epwe arosakemiiló seni fönüfan. 16Nge ngang üwa mwüüt ngenuk pwe kopwe manaw fäniten ei popun, pwe ngang üpwe pwääri ngenuk äi manaman, pün äi iteüöch epwe meresfeil lón unusen fönüfan. 17Nge en ka chüen nemenemengaw ngeni neii kewe aramas o kosap mochen mwüüt ngeniir pwe repwe feilló. 18Iei minne, lesor, lón ei chök ótun, ngang üpwe öpwüngätiw üten faaw mi fókkun ngaw seni meinisin ekkewe üten faaw ra pwüngütiw wón Egypt lón unusen uruwon Egypt tori ikenäi. 19Kopwe mwittir atööwu óm öllük pwe noum kewe maanfesir me chón angang meinisin repwe feitto seni lón ekkewe tännipi. Emön me emön aramas ika maan repwe süü ngeni ew leenien op, pwokiten iteiten aramas me maan mi chüen chök nóm lükün nge resap süülong, repwe mäló pün ewe üten faaw epwe püngütiw wóór.’ ”
20Iwe, ekkóch me leiin nöün Farao kewe nöüwiis ra lükü meet ewe SAMOL a apasa. Iwe, ra pochchei le ösüüwelong nöüür kewe maan me chón angang seni lón ekkewe tännipi o atolongeer lón ekkewe leenien op. 21Nge chókana mi asarongorong ngeni än ewe SAMOL kapas ra chök likitaló nöüür kewe chón angang me maanfesir lükün lón ekkewe tännipi.
22Mwirin, ewe SAMOL a apasa ngeni Moses, “Kopwe eitietä pöum ngeni fän läng pwe üten faaw epwe püngütiw wón unusen ewe fönü Egypt - wón aramas me maan pwal wón mettóch meinisin mi määr lón ekkewe tännipi än chón Egypt.” 23Iei minne, Moses a eitietä wókun we ngeni fän läng, iwe, ewe SAMOL a öpüngü chopulap o öpüngätiw üten faaw. Iwe, inefi a fiifitiw wón pwül. Iei usun än ewe SAMOL a öpüngätiw ew üten faaw mi fókkun eniwokkus wón unusen ewe fönü Egypt. 24Esap fän ew mwo an epwe fis ei sókkun üten faaw me lón uruwon Egypt. Üten faaw a püngütiw nge inefi a chök sópwósópwóló le fiichööw. 25Ewe üten faaw a ataaló iteiten mettóch meinisin mi nóm lón ekkewe tännipi leemelen unusen Egypt. A niieló aramas me maan o awatätiw iteiten mettóch mi määr lón ekkewe tännipi. Ekkewe mwo irä mi wätte meinisin nge ra kuputiw. 26Ewe chök kinikin me lón unusen Egypt esap püngütiw üten faaw ie lón ewe ränin, ewe fönü Koshen, ikeweia ekkewe chón Israel ra nónnóm ie.
27Mwirin, Farao a inemouchchei le tiiti Moses me Aaron. Iwe, a apasa ngeniir, “Lón ei fansoun, ngang üwa etiwa pwe ngang üwa mwääl. Ewe SAMOL a pwüng, nge ngang me neii kewe aramas aia mwääl. 28Öüse mochen öüpwe tungór ngeni ewe SAMOL pwe epwe öükätiw ei chopulap me üten faaw mi eniwokkus. Ngang üpwe le mwüüt ngeni kemi pwe öüpwe feilló iei chök. Öüsap chüen nómwottamaló.”
29Nge Moses a pölüweni, “Iwe ina. Lupwen chök ngang üpwe toowu seni ei telinimw, ngang üpwap eitietä peii o iótek ngeni ewe SAMOL. Mwirin, ewe chopulap me ewe üten faaw repwe ükütiw. Ei epwe älelleta ngenuk óm kopwe silei pwe fönüfan fönüen ewe SAMOL. 30Nge ngang mi silei pwe en me noum kewe nöüwiis öüsap mwo nuokkusiti ewe SAMOL Kot.”
31Meinisin ekkewe irä usun wiit iter flaks me barli ra taaló, pwokiten ekkewe barli a maaw uwaar nge ekkewe flaks ra et lón ewe ótun. 32Nge ekkewe wiit me spelt resap ta, pün resap mwo pwükütä seni pwül.
33Mwirin, Moses a feilló seni Farao o a feiliwu lükün ewe telinimw. Iwe, lupwen a eitietä pöün ngeni ewe SAMOL, lón ewe chök ótun, ewe chopulap me ewe üten faaw ra köüüló, pwal ewe üüt a ükütiw le püngütiw wón ewe fönü. 34Nge lupwen Farao a küna pwe ewe üüt me üten faaw me chopulap ra köüüló, i me nöün kewe nöüwiis ra pwal tipis säfäl ren ar tipeförea pwe esap mochen föri usun minne ra ääni pwon. 35Iwe, Farao a tipeförea säfäl o esap mochen mwüüt ngeni ekkewe chón Israel repwe feilló, usun chök minne ewe SAMOL a fen apasa.
Ew määlap pwokiten liffichimas
10 Mwirin, ewe SAMOL a apasa ngeni Moses, “Kopwe liwinsäfäliló ren Farao o echchimwa säfäli. Nge ngang üwa föri pwe i me nöün kewe nöüwiis repwe tipeförea, pün ngang üpwe tongeni sópweló le pwääraló äi manaman ren äi üpwe föri äi kewe esissil mi manaman leiir. 2Iwe, ämi öüpwe tongeni aporausa ngeni nöümi kana me nöün nöümi kana usun ekkewe mettóch mi amwaraar ngang üwa föri me leiin ekkewe chón Egypt ren äi üpwe älelleta pwe ngang ewe SAMOL.”
3Iei minne, Moses me Aaron ra feilló ren Farao a apasa ngeni, “Iei meet ewe SAMOL, ewe Kot än ekkewe chón Hipru a apasa: ‘Epwe ifa üküükün langattamen fansoun óm kosap mochen pwe kopwe pwisin etekisónók me fän mesei? Kopwe mwüüt ngeni neii kewe aramas repwe feilló pwe repwe fel ngeniei. 4Nge are kosap mochen mwüüt ngeniir pwe repwe feilló, iwe, kopwe tümwünuk! Pün lesor, ngang üpwe pwölüweló fönüom ei ren liffichimas. 5Repwe fókkun chómmóng ina pwata kosap tongeni küna ewe pwül an epwe lingetä. Repwe enaló mettóch meinisin mi wor reemi, pwal pacholong ekkewe irä lón ämi kewe tännipi mi määritä lussun mwirimwirin ewe üten faaw. 6Repwe ouraló lón imwom kewe imwen king pwal lón imwen noum kewe nöüwiis me imwen ekkewe chón Egypt meinisin. Esap wor och sókkun määlap sememi kewe me semen sememi kewe ra küna an epwe fis fän ew seni ewe fansoun ra relefönüweló ikeei epwe usun ei ew.” Mwirin ei, Moses a kul o feilló seni Farao.
7Iwe, ekkewe nöüwiis ra feitto ren Farao o tungór ngeni, “Epwe ifa üküükün langattamen óm kopwe mwüüt ngeni ekkeei feiengaw pwe repwe sópwósópwóló le fis? Kose mochen kopwe mwüüt ngeni ekkewe chón Israel pwe repwe feilló pwe repwe angang ngeni ewe SAMOL ar we Kot. Epwe ifa üküükün langattamen fansoun än ei aramas epwe ew likottup ngeni kich? Ifa usun, kosap mwo meefi pwe Egypt a taatakis?”
8Iei minne, ra eliwinisäfälieto Moses me Aaron ren Farao. Iwe, Farao a apasa, “Öüpwe feilló o fel ngeni ewe SAMOL ämi we Kot. Nge öüpwe üreniei ika iö kana ämi öüwa mochen pwe repwe fiti kemi?”
9Iwe, Moses a pölüweni o apasa, “Äm meinisin aipwe feilló, seni chinlap tori kükkün. Äm aipwe uweei nöüüm kewe mwän me fefin, pwal nöüüm kewe pwiin siip me pwiin kowu. Pün äm meinisin aipwe chufengen o föri ew chuulap ngeni ewe SAMOL.”
10Iwe, Farao a pölüweni fän pöchökkül o apasa, “Öüwa fókkun osun än ewe SAMOL epwe etikemi are öüwa mochen öüpwe uweei nöümi kewe kükkün me ekkewe fefin. Ngang üwa nenneló lón ämi ekiek o a fat ngeniei pwe ämi öüwa ekieki och mi ngaw. 11Apwi! Ekkewe chök mwän repwe tongeni feilló o angang ngeni ewe SAMOL, pwokiten ina meet ämi öüwa tuttungór fänitan.” Mwirin, Farao ösüüwóló Moses me Aaron seni lón ewe imwen king.
12Mwirin, ewe SAMOL a apasa ngeni Moses, “Kopwe eitieló pöum wón ewe fönü Egypt pwe pwiin liffichimas repwe pwiito wón ewe fönü. Iwe, repwe pwölüweló unusen ewe fönü o enaló ekkewe irä meinisin mi pwükütä me lón ekkewe tännipi me mwirin ewe üten faaw.”
13Iei minne, Moses a eitieló wókun we wón Egypt. Iwe, ewe SAMOL a föri pwe ewe äsäpwäälin öötiw epwe enito wón ewe fönü lón unusen ewe rän me unusen ewe pwinin. Iwe, lupwen a sorotä ewe soran, ewe äsäpwääl a uweato ekkewe pwiin liffichimas. 14Iwe, ekkewe liffichimas ra pwiito wón unusen Egypt o ra sootiw lón iteiten kinikinin ewe fönü nge ra fókkun chómmóng. Esap wor mwo fän ew pwe ei sókkun määlapen liffichimas mi fókkun ngaw a fis lón uruwon Egypt me mwan, esap pwal wor säfäl ew me mwirin epwe usun ei. 15Pün ekkewe liffichimas ra pwölüwóló unusen ewe fönü o föri pwe unusen ewe pwül a usun chök nge mi chól. Ra enaaló ekkewe irä meinisin me uwään ekkewe irä mi chüen manaw me mwirin ewe üten faaw. Esap wor och mettóch mi önüwen fetil a chüen nóm, esap wor efóch irä kis ika irä wätte a nóm lón unusen ewe fönü Egypt.
16Iwe, Farao a mwittir tiiti Moses me Aaron o apasa ngeniir, “Ngang üwa pwärätä äi tipis ngeni ewe SAMOL ämi we Kot pwal ngeni kemi. 17Iei, öüpwe omwusaló äi tipis pwal lón ei ótun o öüpwe tungór ngeni ewe SAMOL ämi we Kot pwe epwe angealó seniei ei määlap mi efeiengaw.”
18Mwirin, Moses a feilló seni Farao o a tungór ngeni ewe SAMOL. 19Iwe, ewe SAMOL a pölüweni an tungór ren an ekkesiwili ewe äsäpwäälin öötiw ngeni emön äsäpwäälin lotow mi fókkun pöchökkül. Iwe, ei äsäpwääl a pöönawu ekkewe liffichimas lón ewe Setipar. Esap wor emön liffichimas a nómwetiw lón unusen ewe fönü Egypt. 20Nge ewe SAMOL a föri pwe Farao epwe tipeförea säfäl. Iwe, esap mochen mwüüt ngeni ekkewe chón Israel pwe repwe feilló.
Ew määlapen rochopwaak
21Mwirin, ewe SAMOL a apasa ngeni Moses, “Kopwe eitietä pöum ngeni fän läng, iwe, ew rochopwaak mi fókkun rochokkich me eniwokkus epwe feittiw wón Egypt. Iei ew rochopwaak aramas repwe chök attapfeil ren.” 22Iei minne, Moses a eitietä pöün ngeni fän läng; iwe, a wor rochopwaak a pwölüwóló unusen ewe fönü Egypt lón üküükün ülüngät rän. 23Lón unusen ei fansoun, ekkewe aramas resap tongeni mwökütüküt feil, pün resap tongeni küna mweer. Nge a wor saram usun chök me mwan ia ekkewe aramasen Israel ra nónnóm ie.
24Mwirin, Farao a tiiti Moses o a apasa ngeni, “Öüpwe feilló o fel ngeni ewe SAMOL. Öüwa tongeni uweei ekkewe fefin me nöümi kewe semiriit pwe repwe fiti kemi le feilló. Nge öüpwe chök likitätiw nöümi kewe pwiin siip me pwiin kowu ikeei.”
25Nge Moses a apasa, “Apwi! Kopwe fókkun mwüüt ngeni keem pwe äm aipwe uweei nöüüm kewe siip me kowu fäniten ekkewe asór me asóren keek äm aipwe ääni asór ngeni ewe SAMOL äm we Kot. 26Ewer, äm aipwe uweei nöüüm kewe maanfesir meinisin pwe repwe fiti keem le feilló, esap wor efóch pachapachen emön leiir epwe tiwetiw. Pün äm aipwe kefil äm mönün asór fäniten äm fel ngeni ewe SAMOL äm we Kot seni leiin ekkeei maan. Nge äm aisap mwo silei ika menni sókkun mönün asór i a mochen pwe aipwe aea le fel ngeni tori äm aipwe wareiti ikenan.”
27Nge ewe SAMOL a pwal öpöchökküla letipen Farao. Iwe, esap mochen mwüüt ngeniir pwe repwe feilló. 28Iei minne, Farao a chiwörüwör ngeni Moses o apasa, “Kopwe süüló seni fän mesei! Kopwe föröchchuk pwe kosap chüen pwääsäfälito mwei. Lón ewe rän en kopwe küna mesei, kopwe mäló.”
29Iwe, Moses a pölüweni, “Mi pwüng meet na ke apasa. Ngang üsap chüen künasäfäli mesom.”
Ekkewe mwännichien Egypt ra mäló
11Mwirin, ewe SAMOL a apasa ngeni Moses, “Ngang üpwe awarato pwal ew chök määlap wón Farao me ewe fönü Egypt. Mwirin ena, Farao epwe mwüüt ngeni kemi pwe öüpwe feilló seni ikeei. Nge lupwen epwe mwüüt ngeni kemi pwe öüpwe feilló, i epwe fókkun mochen pwe epwe ösüüwkemiiló. Epwe usun chök lapalapan nge epwe echchimwa kemi pwe öüpwe feilló seni ewe fönü. 2Iwe, kopwe üreni ekkewe mwän me ekkewe fefin pwe repwe tungórei chón óruur kewe chón Egypt fäniten ekkewe pisek mi för seni silifer me kolt.” 3(Ewe SAMOL a föri pwe ekkewe chón Egypt repwe tipemecheres o ääni kirekiröch ngeni ekkewe aramasen Israel. Pwal ekkewe aramas ra ekieki pwe Moses emön mwän mi fókkun iteföüló me lón ewe fönü Egypt. A wor suufölün meren nöün Farao kewe nöüwiis pwal meren ekkewe aramasen Egypt.)
4Ina minne, Moses a esile ngeni Farao o apasa, “Iei meet ewe SAMOL a apasa: ‘Ngang üpwe fätälfeil leemelen unusen ei fönü Egypt lukenipwinei. 5Mwännichi meinisin repwe mäló me lón iteiten famili lón Egypt, seni nöün Farao we mwännichi mi móót wón ewe leenien móótun king tori ewe mwännichi nöün nöün we amanaw fefin, ewe mi wiisen pwooni föün wiit. Pwal ekkewe mwo mweinöün maan meinisin nge repwe mäló. 6Mwirin, epwe wor ngüüngüres mi leüommóng leemelen ewe fönü Egypt. Esap wor ei sókkun ngüüngüres me mwan, iwe, esap pwal fissäfäl och usun. 7Nge epwe wor kinamwe leiin ekkewe chón Israel, ina pwata esap mwo nge wor emön kolak epwe owuuwu ngeni emön aramas ika maan. Mwirin, öüpwe silei pwe ewe SAMOL a awora sakkofesenin lefiilen chón Egypt me chón Israel. 8Ekkewe nöüwiisen Egypt meinisin repwe sääto reei o repwe chappetiw me mwei. Iwe, repwe tungór ngeniei o apasa, ‘Kopwe feilló! Kopwe mwittir! Kopwe uweeló ekkewe aramas meinisin pwe repwe tapweló mwirum!’ Mwirin ena, ngang üpwap feilló.” Mwirin, Moses a feilló seni Farao fän pwichikkaren an soong.
9Iwe, ewe SAMOL a apasa ngeni Moses, “Farao esap mochen epwe öüseling ngenuk. Nge ei epwe ngeniei ew fansoun fich pwe üpwe föri pwal ekkóch manaman mi amwaraar me lón ei fönü Egypt.” 10Iwe, inamwo än Moses me Aaron ra föri ekkeei manaman mi amwaraar meinisin me mwen mesen Farao, nge ewe SAMOL a öpöchökküla letipen Farao. Iei minne, esap mochen mwüüt ngeni ekkewe chón Israel pwe repwe toowu seni fönüwan we.
Ewe äkkäewin Pasofer
12 Iwe, ewe SAMOL a ngeni Moses me Aaron ekkeei öüröür lupwen ra chüen nóm lón ewe fönü Egypt. A apasa ngeniir, 2“Seni iei feilló, ei maram epwe iei äewin maram mereemi, epwe iei ämi äewin maramen ier. 3Öüpwe esile ngeni unusen ewe mwichen aramasen Israel pwe lón ewe aengolun ränin ei maram, emön me emön mwän epwe angei emön laam (appanen siip) ika emön appanen kuuch fäniten en me an famili, emön laam nge ew famili pwe epwe ew asór. 4Ika pwe chón ew famili ra chókükkün fäniten ar repwe ocheei unusen emön laam; iwe, repwe inetii fengeni ewe laam ngeni pwal ew famili mi chök kaneto óruur, nge epwe chök alóngólóng wón iteiten ekkewe aramas mi wor me ifa üküükün meet emön me emön aramas epwe tongeni ocheei. 5Öüpwe efili ei maan pün epwe emön ätemwän ew ierin, esap lifilifil ika emön siip ika emön kuuch, nge esap wor terin. 6Öüpwe tümwünü ekkewe laam tori leefäfin ewe engol me rüwänüen ränin ei äewin maram. Iei ótun, ew me ew famili me lón ewe mwichen chón Israel meinisin repwe en me niieló nöün laam. 7Mwirin, repwe angei och chaan ewe laam o tóófätä wón asen me leepekin penkasamen ewe imw ia repwe ocheei ie ewe laam. 8Lón ena leefäfin, emön me emön epwe ochooch ewe laam mi kapwich wón ekkei o repwe arosaló. Öüpwe selieni fengeni ewe fituk me wölüwöl mi maras pwal pilawa mi umw nge esap nofit ngeni iis. 9Öüsap ocheamasei ewe fituk ika kukuuw lón kólik. Öüpwe apwichi unusen ewe laam wón ekkei fiti fengen me möküran, pecheen me ekkewe masowen lón. 10Öüsap likiti och lussun tori lesossorun ewe rän mwirin. Are epwe wor och lussun fituk öüsap tongeni ocheei lón ewe pwinin, epwe chök keekiló me mwen lesossor. 11Iwe, lupwen öüpwe mwöngö ei mwöngö, öüpwe üföüf üfemi üföüfen sääi, usun chök nge öüpwe amolläkemiitä fäniten ew sääi mi ttam. Öüpwe ipweipw ipwemi sandal o kömwöch lón pöümi wókumi le fätäl. Öüpwe atapwanapwan le mwöngö. Iei ewe Pasofer än ewe SAMOL.
12“Pün lón ena pwinin, ngang üpwe pwerefeil leemelen ewe fönü Egypt o niieló ekkewe mwännichi meinisin me ekkewe ätemwänin mweinöün maan meinisin me lón ewe fönü Egypt. Ngang üpwe öpwüngü ekkewe koten Egypt meinisin, pün ngang ewe SAMOL. 13Ewe chcha öüpwe tóófätä wón penkasamen imwemi kewe epwe ew esissil fäniten ia öüwa nóm ie. Iwe, lupwen ngang üpwe küna ewe chcha, ngang üpwe luchchang me wómi. Ei määlap mi efeiengaw esap attapa kemi lupwen ngang üpwe efeiengawa ewe fönü Egypt.
14“Öüpwe chechchemeni ei rän tori feilfeilló chök. Iteiten ier, öüpwe efisi ächechchemen ei rän pwe epwe ew ränin chuulap mi öüchche meren ewe SAMOL. Iwe, mwirimwirimi kana repwe afóna ewe SAMOL ren ei chuulap tori feilfeilló chök. 15Lón ewe ótun chuulap, öüpwe chök mwöngö pilawa esap wor iis lón, lón üküükün fisu rän. Lón ewe äewin rän, öüpwe atoowu iis seni lón imwemi kewe. Iö epwe mwöngö pilawa mi för fiti iis, lón ew fansoun lupwen ekkewe fisu ränin chuulap, epwe käimwüwu seni leiin ewe mwichen chón Israel. 16Lón ewe äewin ränin chuulap me ewe efisuen rän, ekkewe aramas meinisin repwe mwiich fengen fäniten ew fansoun fel mi öüchchea. Öüsap föri och sókkun angang lón ekkeei rän, chiilón chök ren ämi öüpwe amollätä mwöngö fäniten emön me emön an epwe mwöngö. Iei chök meet öüwa tongeni föri.
17“Öüpwe fókkun chechchemeni ämi öüpwe efisi ächechchemen ewe Chuulapen Pilawa Esap wor iis lón, pün epwe ächchema ngeni kemi pwe ngang üwa emmwenikemiiwu fän pöchökkül seni ewe fönü Egypt lón wesewesen ei rän. Öüpwe föri pwüngün ei chuulap pwe epwe ew öllük mi nómfóchófóch fänitemi pwe öüpwe tümwünü, seni ew tettelin pilóón aramas tori pwal ew. 18Öüpwe chök mwöngö pilawa mi för nge esap nofit me iis, seni lekuniólupwinin ewe engol me rüänüen ränin ewe äewin maram tori lekuniólupwinin ewe rüwe me äewin ränin pwal ei chök maram. 19Lón ótun ekkeei fisu rän, esap fókkun wor och piipin iis epwe pwä me lón imwemi kana. Iwe, lón ew me leiin ekkeei fisu rän, iö a mwöngö och mettóch mi för fiti iis, epwe fókkun käimwüwu seni leiin ewe mwichen chón Israel. Ekkeei öllük ra weneiti emön me emön, ese lifilifil ika i emön chón Israel ika i emön chón ekis mi nónnóm leiimi. 20Ngang üpwe enliwinsäfäli meet üwa apasa. Öüsap fókkun mwöngö och mettóch mi för fiti iis lón ekkana rän. Ekis meinisin ia öüwa nónnóm ie, öüpwe chök mwöngö pilawa esap wor iis lón.”
21Mwirin, Moses a tiiti ekkewe souakkomwen Israel meinisin o a apasa ngeniir, “Öüpwe feilló iei chök o üreni chón ew me ew ämi kewe famili pwe repwe niieló ekkewe laam ra äimwüreló fäniten ewe Pasofer. 22Iwe, repwe opwuuolong chaan emön me emön ekkewe laam lón ew sepi. Mwirin, repwe angei echchooch ülün ewe irä hysop o ottukalong lón chaan ewe laam mi nóm lón ewe sepi. Mwirin, repwe äsupwu ewe ülün hysop ngeni asen me leepekin ewe penkasam me rüepeek pwe repwe esissila ren ewe chcha. Iwe, repwe chechchemeni pwe esap mwüümwütä ngeni emön me leiimi an epwe toowu seni asamen imwan tori lesossor. 23Pün ewe SAMOL epwe fätälfeil leemelen ewe fönü o niietiw ekkewe chón Egypt. Nge lupwen epwe küna ewe chcha mi nóm wón asen me lepeekin ewe penkasam me rüepeek; iwe, epwe luchchang me wón ena imw. I esap mwüüt ngeni ewe Chón Ninni pwe epwe tolong lón imwemi kana o niietiw nöümi kewe mwännichi.
24“Öüpwe chechchemeni pwe ekkeei öüröür repwe nómfóchófóch pwe ämi me mwirimwirimi kana öüpwe föri pwüngüür tori feilfeilló chök. 25Lupwen öüpwe tolong lón ewe fönü ewe SAMOL a pwon pwe epwe ngeni kemi, öüpwe sópweló le efisi ächechchemen ei chuulap. 26Mwirin, lupwen nöümi kana repwe eisini kemi, ‘Meet wewen ei mettóch? Pwata öüwa föri ei angangen öörüni?’ 27Mwirin, öüpwe pölüweni o üreniir, ‘Iei äm angangen afóna än ewe SAMOL we Pasofer, pün lupwen äm nóm lón Egypt, ewe SAMOL a luchchang me wón imwen ekkewe chón Israel. I a niieló ekkewe chón Egypt, nge a amanawa ach kewe famili o esap niikicheló.’ ” Mwirin, ekkewe aramas meinisin ra appwórotiw möküreer o fel ngeni Kot. 28Iwe, ekkewe chón Israel ra föri meet ewe SAMOL a öllük ngeniir meren Moses me Aaron.
29Iwe, lukenipwin, ewe SAMOL a niietiw ekkewe mwännichi meinisin me lón ewe fönü Egypt, seni nöün Farao we mwännichi, ewe mi móótäsini ewe leenien móótun king, tori ewe mwännichi nöün chón kalapwuus mi nóm lón ewe pwaang leenien kalapwuus. Pwal ina chök usun ren ekkewe ätemwänin mweinöün nöüür kewe maan meinisin. 30Farao me nöün kewe nöüwiis meinisin me ekkewe chón Egypt meinisin ra pwäätä lón ewe pwinin; iwe, a wor ngüüngüres mi leüommóng lón ewe fönü Egypt. Esap wor ew imw epwe tiweló ia esap wor emön mi mäló me lón.
31Iwe, lón chök ewe pwinin, Farao a tiiti Moses me Aaron o apasa ngeniir, “Öüpwe üütä o feilló! Öüpwe feilló seni neii keei aramas, ämi me ekkewe chón Israel meinisin! Öüpwe feilló o fel ngeni ewe SAMOL usun öüwa fen tungór. 32Öüpwe angei nöümi kewe pwiin siip me pwiin kowu, usun öüwa fen apasa o feilló. Nge lupwen öüpwe feilló, öüpwe efeiöchüei.”
33Iwe, ekkewe chón Egypt meinisin ra peseei ekkewe aramasen Israel pwe repwe chök mwittir feilló seni ewe fönü, pün ra ekieki, “Ika resap mwittir feilló; iwe, kich meinisin sipwe mäló!” 34Iei minne, ekkewe chón Israel ra angei o uweei eneer kewe pilawa mi amas o öüwööw nge esap wor iis lón. Ra tükümaló ar kewe sepien öüwööw lón mangaku o ra mwäreer wón afarer. 35Iwe, ekkewe chón Israel ra föri usun minne Moses a ääni öüröür ngeniir o ra tungórei seni ekkewe chón Egypt ekkewe pisek mi för seni silifer me kolt, ra pwal tungór mangaku. 36Nge ewe SAMOL a föri pwe ekkewe chón Egypt repwe tipemecheres le ääni kirekiröch ngeni ekkewe aramasen Israel, ina minne, ra fang ngeniir ese lifilifil meet ra tungórer. Iei usun ra liäpenaló pisekin ekkewe chón Egypt, usun chök ew mwichen sounfiu mi wiil.
37Lón ena pwinin, ekkewe aramasen Israel ra sääi seni Rameses o pwereló ngeni Sukkoth. A wor ina epwe ükükkün wonopwükü ngöröw mwän me lükün ekkewe fefin me semiriit. Iir meinisin ra chök fätäl wón pecheer. 38A pwal wor chómmóng sakkopaaten aramas sap iir chón Israel ra fitiir, fitifengen me chómmóng pwiin siip me pwiin kowu. 39Iwe, iteiten fansoun ra köüüló pwe repwe mwöngö, ra umw eneer pilawa ese wor iis lón seni ewe pilawa mi öüwööw ra uwei seni Egypt. Ewe pilawa mi öüwööw, esap wor iis lón pwokiten ekkewe chón Israel ra chök atapwanapwan le toowu seni Egypt pün ekkewe chón Egypt ra ösüüróló. Iwe, esap wor fansoun ar repwe witiwit pwe ewe pilawa mi öüwööw epwe pwootä.
40Iwe, üküükün langattamen fansoun än ekkewe aramasen Israel ra nónnóm lón Egypt, föpwükü iliik ier. 41Lón wesewesen ewe ömwüchchülón ränin ekkewe föpwükü iliik ier, nöün ewe SAMOL kewe mwicheichen aramas mi chómmóng ra feilló seni Egypt. 42Ei pwinin a käimwüló meren ewe SAMOL pwe i epwe emmwenawu nöün kewe aramasen Israel seni ewe fönü Egypt, iei minne pwal iei ei pwinin, chón Israel meinisin repwe föri ächechcheman iteiter ier seni ew tettelin pilóón aramas tori pwal ew, pwe repwe chechchemeni än ewe SAMOL a angaseer.
43Mwirin, ewe SAMOL a apasa ngeni Moses me Aaron, “Ikeei ekkewe öllük fäniten ewe chuulapen Pasofer:
“Esap wor emön chón ekis epwe mwüümwütä ngeni an epwe ochooch ei laamen Pasofer. 44Nge are emön chón Israel a mööni emön amanaw o sirkomsaisi, mwirin, ewe amanaw a tongeni ochooch ei laamen Pasofer. 45Nge emön chón ekis i emön chón angang mi angei liwinin ika emön chón ekis mi chök nóm lón fönüwemi esap tongeni ochooch ei laamen Pasofer.
46“Chókana meinisin mi ochooch ei laam, repwe fókkun ochooch fengen lón ew imw. Öüsap fókkun uweawu och fituken ei laam lükün ewe imw. Iwe, öüsap kupii efóch me leiin chüün ewe laamen Pasofer.
47“Unusen ewe mwichen aramasen Israel repwe föri pwüngün ächechchemen ei chuulapen Pasofer lón ew chök fansoun.
48“Are mi wor chón ekis mi nónnóm leiimi mi mochen pwe repwe chóóni än ewe SAMOL ei Pasofer, iwe, ekkewe mwän meinisin repwe fókkun akkomwen sirkomsais. Mwirin, ra tongeni feitto o fiti kemi le afóna ächechchemen ewe Pasofer. Iir repwe le usun chök nge iir rewilipós mi upwutiw me lón ei fönü. Nge emön mwän esap sirkomsais, esap tongeni ochooch ewe laamen Pasofer. 49Ei öllük a weneiti emön me emön, ese lifilifil ika i emön upwun wilipós chón Israel ika i emön chón ekis mi relefönüweló leiimi.”
50Iwe, ekkewe aramasen Israel ra föri än ewe SAMOL kewe öüröür meinisin a öllük ngeni Moses me Aaron. 51Iwe, lón ewe chök ränin, ewe SAMOL a emmwenawu ekkewe aramasen Israel seni ewe fönü Egypt lón ar kewe chómmóngun kinikinin mwicheichen aramas.
Epinipinilón ekkewe mwännichi
13 Mwirin, ewe SAMOL a apasa ngeni Moses, 2“Kopwe epinaló fänitei ekkewe mwännichien nöün chón Israel meinisin. Iteiten mwännichi me leiin nöün chón Israel äät me ätemwänin mweinöün nöüür maan, neii.”
3Iei minne, Moses a apasa ngeni ekkewe aramas, “Iei ewe rän öüpwe chechchemeni tori feilfeilló chök, pün iei ewe rän ämi öüwa toowu seni Egypt, ewe fönü ia ra nöüni kemi amanaw me ie. Pün ewe SAMOL a emmwenikemiiwu seni ei fönü ren pöün mi manaman. (Öüpwe chechchemeni pwe öüsap mwöngö och mettóch mi wor iis lón.) 4Ikenäi, lón ei maramen Sööta, (iei ewe maram Abib) epwe iei ewe ränin ächechchemen ämi we öüwa toowu seni Egypt. 5Öüpwe fókkun efisi ächechchemen ei rän lupwen ewe SAMOL epwe emmwenikemiilong lón fönüen ekkewe chón Kanaan, chón Hit, chón Amor, chón Hiv, me chón Jebus. Iei ewe fönü i a pwon fän ökköpöl pwe epwe ngeni ämi kewe leewo, ew fönü ia a pwuupwu ie milik me chönün chunen. Öüpwe föri ächechchemen ei rän iteiten ier lón ei maram. 6Lón üküükün fisu rän, öüpwe chök mwöngö pilawa esap wor iis lón. Mwirin, lón ewe efisuen rän öüpwe efisi ew kametip mi lapalaap ngeni ewe SAMOL. 7Lón ekkewe fisu rän, öüpwe chök mwöngö pilawa esap wor iis lón. Enletin, esap fókkun wor och iis lón imwemi kana ika ekis meinisin me lón kiänin fönüwemi lón ei fansoun. 8Lón ekkeei ränin chuulap iteiten ier, öüpwe äwewe ngeni nöümi semiriit pwata öüwa föri ei ächechchem. Öüpwe apasa ngeniir, ‘Iei ächechchemen meet ewe SAMOL a föri fänitem lupwen äm aia toowu seni Egypt.’ 9Ei chuulapen iteiten ier epwe och minen ächchem ngeni kemi ämi mi tongeni küna ren mesemi, epwe usun chök och esissil mi ichchitä wón pöümi ika wón letenmesemi. Pün ei chuulap epwe chök äkkächchema ngeni kemi iteiten fansoun meinisin ämi öüpwe chök iseni än ewe SAMOL kewe öüröür lón ämi ekiek pwal wón tinnawemi. Pün ewe SAMOL i ewe a chimanü kemiiwu seni ewe fönü Egypt ren pöün mi manaman. 10Iei minne, öüpwe efisi ächechchemen ei chuulap lón ewe fansoun mi weneiti iteiten ier me ier.
11“Iwe, öüpwe chechchemeni ekkeei öüröür lupwen ewe SAMOL epwe emmwenikemiilong lón ewe fönü i a pwon fän ökköpöl melóóm pwe epwe ngeni ämi kewe leewo. Iei ewe fönü ia ekkewe chón Kanaan ra nónnóm ie. 12Öüpwe fangaló ngeni ewe SAMOL ekkewe mwännichi meinisin me ekkewe ätemwänin mweinöün maan meinisin me leiin nöümi kewe maan. 13Öüpwe püngütiw möön ngasalón emön ätemwänin dongki mi akkomwen upwutiw ren ämi öüpwe ekkesiwili ngeni emön laam. Nge are öüwa filätä pwe öüsap föri ewe ekkesiiwil; iwe, öüpwe kupii üwen ewe dongki. Nge öüpwe chök fókkun püngütiw möön ngasalón iteiten emön me emön mwännichi me leiin nöümi kana äät.
14“Iwe, lón ekkan fansoun mwach, nöümi kewe semiriit repwe eisini kemi, ‘Meet wewen ämi föri ei?’ Mwirin, öüpwe üreniir, ‘Ewe SAMOL a emmwenikeemiwu ren pöün mi manaman seni ewe fönü Egypt, seni ewe fönü ia ra nöünikeem amanaw ie. 15Farao a fókkun tipeförea o esap mochen mwüüt ngeni keem pwe aipwe feilló seni Egypt, ina pwata ewe SAMOL a niieló mwännichi meinisin me lón ewe fönü Egypt. A niieló mwännichien aramas me ätemwänin mweinöün maan.’ 16Ngang üpwe apasa säfäli pwe ei chuulap epwe usun chök och esissil mi ichchitä wón pöümi ika wón letenmesemi. Epwe och minen ächechchem ämi mi tongeni küna ren meseni pwe ewe SAMOL a emmwenikemiiwu seni Egypt ren pöün mi manaman.”
Ekkewe chón Israel ra pweliló lón ewe fönüpöön
17Lupwen än Farao a mwüüt ngeni ekkewe aramasen Israel pwe repwe feilló, Kot esap emmwenireló wón ewe aal mi pwerelong lón kinikinin fönüen ekkewe chón Filistia, inamwo ika ina ewe aal mi mwochomwooch lefiilen Egypt me ewe Fönüwen Pwon. Pün Kot a apasa, “Are ekkewe aramas repwe serefengen me ew maun, iwe, repwe tongeni siwili ar ekiek o liwinsäfäl ngeni Egypt.” 18Iei minne, Kot a äpwelaló ekkewe aramas wón pwal efóch aal mi pwerelong lón ewe fönüpöön nge repwe pwereló ngeni ewe Setipar. Ekkewe chón Israel ra toowu seni Egypt nge ra mollotä fän ar pisekin maun usun chök ew mwichen sounfiu.
19Moses a uweei chüün Josef kewe, pwokiten Josef a üreni nöün Israel kewe mwän pwe repwe pwon ngeni i fän ökköpöl pwe repwe uweei chüün lupwen repwe feilló. Pün a apasa, “Kot epwe fókkun chimanükemi seni Egypt. Ina minne öüpwe fókkun uweeló chüüi lupwen öüpwe feilló seni ei leeni.”
20Mwirin än ekkewe chón Israel ra feilló seni Sukkoth, ra mwo chök ekis asóósótiw lón Etam mi nóm lepökütiwen ewe fönüpöön. 21Ewe SAMOL a akkomw mwer ren ew üren kuchu pwe epwe emmweniir wón aler. Nge lepwin, ewe SAMOL a emmweniir ren ew üren ekkei pwe epwe asaramer. Ren ei lapalap, ekkewe aramasen Israel ra tongeni repwe sääi lerän ika lepwin. 22Iwe, ewe SAMOL esap ömwökütü ewe üren kuchu lerän ika ewe üren ekkei lepwin seni leenian an akkomw mwen ekkewe aramasen Israel.
14 Mwirin, ewe SAMOL a ngeni Moses ekkeei kapasen öüröür. A apasa, 2“Kopwe üreni ekkewe chón Israel pwe repwe liwinsäfäl o feilló ngeni Pi Hahirot mi nóm lefiilen Mikdol me ewe mataw. Iwe, repwe mwo chök asóósótiw órun ewe mataw äkkäwenewenen Baal Zefon me epeek. 3Mwirin, Farao epwe ekieki, ‘Ekkewe chón Israel repwe le tilissuk. Repwe le chök róngopwäliel feil o mwöchüló lefiilen ewe fönüpöön me ewe mataw.’ 4Iwe, ngang üpwe pwal öpöchökküla säfäli letipen Farao, mwirin, i epwe tapweri kemi. Nge ngang üwa akkóóta ei pwe ngang üpwe pwisin elingaeiló ren meet ngang üpwe föri ngeni Farao me nöün mwichen sounfiu meinisin. Mwirin ei, ekkewe chón Egypt repwe silei pwe ngang ewe SAMOL.” Ina minne, ekkewe chón Israel ra asóósó ikenan, usun meet Kot a üreniir pwe repwe föri.
Ekkewe chón Egypt ra tapweri chón Israel
5Lupwen emön a esile ngeni ewe kingen Egypt pwe ekkewe aramasen Israel resap anómwu lón ar akkóót pwe repwe liwinsäfäl ngeni Egypt mwirin ülüngät rän, Farao me nöün kewe nöüwiis ra siwili ar ekiek. Iwe, ra apasa, “Meet sia föri? Pwata sia mwüüt ngeni ekkewe amanaw chón Israel pwe repwe süüló? Iwe, sia luus pün resap chüen angang ngeni kich!” 6Iei minne, Farao a amollätä wan wóóken o a lukeii nöün mwichen sounfiu pwe repwe fiti le tapweei ekkewe chón Israel. 7Farao a angei wonopwükü wóókenin Egypt mi fókkun mwirinnö fiti pwal ekkewe lussun wóókenin Egypt meinisin, nge a wor emön me emön meilapen sounfiu mi waawa ekkeei wóóken meinisin pwe repwe fiti Farao. 8Nge ewe SAMOL a sópweló le aföreai letipen Farao ewe kingen Egypt, iei minne a tapweri ekkewe chón Israel mi toowu seni Egypt fän ar pwora. 9Meinisin än Farao we mwichen sounfiu - nöün Farao kewe óris me ekkewe wóóken me ekkewe chón waawa wóóken - ra tapweri ekkewe chón Israel. Iwe, ra tori ekkewe aramasen Israel lupwen ar ra chök nónnómwun asóósó órun ewe mataw arap ngeni Pi Hahiroth äkkäwenewenen Baal Zefon me epeek.
10Iwe, lupwen Farao me nöün mwichen sounfiu ra lingeto, ekkewe chón Israel ra tongeni küneer me toowaw pwe ra telito me mwiriir. Iwe, ekkewe aramasen Israel ra poputä le rüükö o ra siö ngeni ewe SAMOL pwe epwe älisiir. 11Mwirin, ra säp ngeni Moses o lal ngeni. Ra apasa, “Pwata ka emmwenikeemiwu ikeei pwe aipwe mäló lón ei fönüpöön? Ifa usun, esap wor peias fänitem lón Egypt? Pwata ka föri pwe aipwe feilló seni Egypt? 12Esap iei meet ewe äm mi apasa ngenuk lupwen äm we chök chüen nóm lón Egypt pwe kopwe chök likitikeemiló o mwüüt ngeni keem pwe aipwe angang ngeni ekkewe chón Egypt? Epwe fen mwirinnö ngeni keem äm aipwe nöün ekkewe chón Egypt amanaw lap seni äm aipwe mäló ikeei lón ei fönüpöön!”
13Nge Moses a pölüweni o üreni ekkewe aramas, “Öüsap nuokkus. Öüpwe chök üütäló ia öüwa nóm ie pwe öüpwe katol än ewe SAMOL epwe amanawa kemi ikenäi. Ekkewe chón Egypt öüwa küneer ikenäi, öüsap chüen künasäfäliir. 14Pwisin ewe SAMOL epwe fiu fänitemi. Ämi öüpwe chök póssóló o öüsap ömwökütü efóch ächefen pöümi ren ämi öüpwe eppeti seni kemi feiengaw.”
15Mwirin, ewe SAMOL a apasa ngeni Moses, “Pwata ka siö ngeniei? Kopwe üreni ekkewe chón Israel pwe repwe mwökütüló mweer. 16Kopwe aea wókum na wókun chón masen siip. Kopwe eitieló ewe wóók wón ewe kólik, iwe, efóch aal epwe suukuló me mwemi lón ewe mataw. Mwirin, ekkewe aramasen Israel meinisin repwe pwereló lón ewe mataw wón pwül mi pwasapwas. 17Nge ngang üpwe öpöchökküla letipen ekkewe chón Egypt pwe repwe tapwelong mwirin ekkewe aramasen Israel lón ewe mataw. Mwirin, ngang üpwe elingaeiló ren meet epwe fis ngeni Farao me nöün kewe sounfiu meinisin pwal ren meet epwe fis ngeni waan kewe wóóken me nöün kewe chón waawa wóóken. 18Lupwen ngang üpwe wes le okkufu Farao me nöün mwichen sounfiu, ekkewe chón Egypt meinisin repwe silei pwe ngang ewe SAMOL.”
19Mwirin, nöün Kot we chón läng, ewe mi ekkemweni ekkewe aramasen Israel lón ar sääi, a mwöküt o nóm mwiriir. Iwe, pwal ewe üren kuchu a mwöküt seni mweer o a üütä mwiriir. 20Ewe kuchu a nóm lefiilen ewe mwichen sounfiun Egypt me ekkewe chón Israel. Lupwen a pwiniló, ewe üren kuchu a wiliti ew üren ekkei o asarama leenien ekkewe chón Israel. Nge ewe kuchu a ekkirocha leenien ekkewe chón Egypt, ina minne, resap tongeni küna ekkewe chón Israel.
21Mwirin, Moses a eitieló pöün wón ewe mataw; iwe, ewe SAMOL a suukaló efóch aal lón ewe kólik ren enienin och äsäpwäälin öötiw mi pöchökkül. Ewe äsäpwääl a enien lón unusen ewe pwinin o ewe mataw a kinikinfesen. Iwe, fäilólun ewe mataw a wiliti fönü mi pwasapwas. 22Iei minne, ekkewe aramasen Israel ra pwereló lón ewe mataw wón pwül mi pwasapwas, nge ewe löölö a usun chök och tiit mi nóm lepeliifichir me lepelimööngür.
23Mwirin, ekkewe chón Egypt -meinisin nöün Farao kewe óris me wóóken me chón waawa wóóken - ra tapweriireló lón ewe mataw. 24Nge lesossorusichin ewe soran, ewe SAMOL a nennetiw wón ewe mwichen sounfiun Egypt seni ewe üren ekkei me kuchu. Iwe, a atolonger lón osukosuk. 25I a föri pwe willen war kewe wóóken repwe turuwu seni ekkewe wóóken, ina minne, ekkewe wóóken resap chüen tüfichin ar repwe ssä. Iwe, ekkewe chón Egypt ra pwuchöör o apasa, “Öüsipwe süüwu seni ikeei! Ewe SAMOL a fiu fäniten ekkewe chón Israel o efeiengawa kich!”
26Iwe, lupwen, ekkewe aramasen Israel meinisin ra tikeló epeek ewe mataw, ewe SAMOL a apasa ngeni Moses, “Kopwe eitisäfäliewu pöum wón ewe mataw. Mwirin, ewe säät epwe liwinsäfälitiw wón ekkewe chón Egypt me waar kewe wóóken me ekkewe chón waawa wóóken.” 27Iwe, lupwen ewe akkar a töötä, Moses a eitiewu pöün wón ewe mataw. Iwe, ewe säät a liwinsäfäliti pwükütän leenian me mwan. Iwe, ewe SAMOL a föri pwe ekkewe chón Egypt repwe filong lón öüten ewe mataw. 28Iwe, ewe säät a liwinsäfälilong o pwölüwoló ekkewe wóóken me ekkewe chón waawa wóóken meinisin - unusen nöün Farao we mwichen sounfiu. Meinisin ekkewe chón Egypt mi tapwelong mwirin ekkewe chón Israel lón ewe mataw ra mäló. Esap ekkemön mwo emön me leiir e manaw.
29Nge ekkewe chón Israel ra fätäleló lukalapen ewe mataw wón pwül mi pwasapwas, lupwen ewe säät a chök köüüló usun ew tiit leepekin me rüwepeek. 30Iei usun än ewe SAMOL a chimanüw ekkewe aramasen Israel seni lepöün ekkewe chón Egypt lón ewe ränin. Iwe, ekkewe aramasen Israel ra tongeni küna inisin ekkewe chón Egypt mi mäló ra pasatä wón arossetin ewe leeni. 31Iwe, lupwen ekkewe chón Israel ra küna ewe manaman mi lapalaap ewe SAMOL a pwääraló lupwen a efeieingawa ekkewe chón Egypt, ra nuokkusiti ewe SAMOL o ra anómwu ar lükülük wón i pwal wón nöün we chón angang Moses.
Echö kölün ngasaló
15Mwirin, Moses me ekkewe chón Israel ra köölüw ei kööl ngeni ewe SAMOL:
“Ngang üpwe kööl ngeni ewe SAMOL, pün a fókkun amwaraar an wiil. I a oturalong lón ewe mataw ewe óris me ewe chón waawa óris. 2Ewe SAMOL i äi pöchökkül me äi kööl; i popun äi wiil. I äi Kot, ngang üpwe mwareiti i. I än semei we Kot; ngang üpwe etekiatä i. 3Ewe SAMOL i emön soumaun, ewer, itan ewe SAMOL. 4I a oturalong lón ewe mataw wään Farao kewe wóóken me nöün mwichen sounfiu. Nöün Farao kewe meilapen sounfiu mi lipwäköch ra mwalum lón ewe Setipar. 5Ewe säät mi alóllóól a pwölüreló, ra kokotiw usun eföw faaw tori epin ewe mataw. 6Äi SAMOL, pöüifichum a lingeló lón manaman. Äi SAMOL, pöüifichum a ataatakkisi chón opwutom. 7Lón óm manaman mi lapalaap, ka oturätiw chókana mi pölüwenuk. Ka tiinätiw óm soong mi pwichikkar o a keniireló usun ekkei a kenaló fetilipwas. 8Ren enienin lón pwöötum, nöönön ewe mataw a chukuchukutä. Pwuupwun ewe nöönö a chök üütäló usun och tiit; ewe säät mi alóllóól a pöchökkülóló me lukalapen ewe mataw. 9Ewe chón koum a apasa, ‘Ngang üpwe tapweriir pwe üpwe tikeriir o arosereló. Ngang üpwe ineti liäpei. Ngang üpwe emeseikaei wóór. Ngang üpwe üttawu neii ketilas o äi manaman epwe arosereló.’ 10Nge ren chök enienin óm ngasangas; iwe, ewe mataw a pwölüróló. Ra kokotiw usun piloom lón ewe säät mi lapalaap. 11“Iö me leiin ekkewe kot epwe wewe ngenuk, äi SAMOL? Iö epwe wewe ngenuk lón óm pin mi tekia, ka eniwokkus lón óm ling, ka föri föfför mi amwaraar? 12Ka eitietä pöüiifichum; iwe, fönüfan a oromaló ekkewe chón opwutakeem. 13“Lón óm tong enlet, en kopwe emmweni ei mwichen aramas en ka angaseer ren óm mööniir. Lón óm pöchökkül en kopwe emmwenenireló ngeni ewe leeni ia óm pin a imweim ie. 14Chón ekkewe mwüü repwe rongorong usun o repwe chechcheech. Nuokkus mi lapalaap epwe tori ekkewe aramasen Filistia. 15Ekkewe souakkomwen Edom repwe rüükö; ekewe samolun Moap repwe chechcheech. Ekkewe aramasen Kanaan meinisin repwe teliló ren ar nuokkus.
16Mösök me öürek repwe püngütiw wóór. Pwokiten óm manaman mi lapalaap, repwe chök kupachóló usun eföw faaw tori noum kewe aramas repwe pwereló, äi SAMOL, tori ekkewe aramas en ka mööniir repwe pwereló. 17En kopwe emmwenirelong o fótukiretiw wón chukum we - ewe leeni en ka föri pwe iei leeniom, äi SAMOL, iei ewe leeni mi pin, äi Samol, en ka föri ren pöum. 18Ewe SAMOL epwe nemenem tori feilfeilló chök.”
19Lupwen nöün Farao kewe óris me ekkewe wóóken me ekkewe chón waawa wóóken ra sääpwuropwurolong lón ewe mataw, ewe SAMOL a eliwini säfälieto nöönön ewe mataw o öpüngätiw wóór. Nge ekkewe aramasen Israel ra fätäleló lón ewe mataw wón pwül mi pwasapwas. 20Mwirin, Miriam fefinen Aaron we, i emön soufós fefin a angei och pisekin likettik itan tamporiin o a emmweni ekkewe fefin meinisin le ettiki nöüür kewe tamporiin nge pwörük. 21Iwe, Miriam a köölüw ei kööl:
“Ngang üpwe kööl ngeni ewe SAMOL, pün a fókkun amwaraar an wiil.
I a oturalong lón ewe mataw ewe óris me ewe chón waawa óris.”
Kólik mi maras me lón Marah
22Mwirin, Moses a emmwenaló ekkewe aramasen Israel seni ewe Setipar o ra mwökütüwu lón ewe Fönüpöönün Shur. Ra sääi lón ei fönüpöön lón üküükün ülüngät rän nge resap künökün kólik. 23Iwe, lupwen ra tori Marah, ra künökün kólik. Nge ekkewe aramas resap tongeni wün ewe kólik pwokiten ewe kólik a maras. (Iei popun ewe leeni a iteni Marah, wewen “maras”.) 24Ina minne, ekkewe aramas ra lal ngeni Moses o ra echchimwa le apasa, “Meet äm aipwe ünümi?”
25Mwirin, Moses a siö ngeni ewe SAMOL pwe epwe älillis. Iwe, ewe SAMOL a äiti ngeni i efóch palen irä. Iwe, Moses a angei ewe palen irä o oturalong lón ewe kólik.
A föri ei pwe ewe kólik epwe öchchün wün. Iwe, me ikenan lón Marah, ewe SAMOL a isettiw me mwen ekkewe aramas ekkeei öllük pwe epwe sótuni ar ölükülük ngeni. 26A apasa, “Ngang ewe SAMOL ämi we Kot. Are öüpwe tümwünöch le öüseling ngeni mweliei o föri meet mi pwüng me mwen mesei, are öüpwe älleasochis ngeni äi kewe öllük me öüröür meinisin, mwirin, ngang üsap awarato wóómi ekkewe samwaw ngang üwa tiinato wón ekkewe chón Egypt, pün ngang ewe SAMOL mi echikara kemi.”
27Mwirin ar ra feilló seni Marah, ra tori Elim, ikeweia mi wor ie engol me ruu limiror me fiik irä palm usun nüü. Iwe, ra nómwun asóósó ikenan ünükkün ekkewe limiror.
Manna me ewe machchang itan kweel
16 Mwirin, unusen ewe mwichen chón Israel ra feilló seni Elim. Iwe, lón ewe engol me limuen ränin ewe oruuwen maram mwirin ar ra towu seni Egypt, ra tori ewe Fönüpöönun Sin mi nóm lefiilen Elim me Sinai. 2Iwe, unusen ewe mwichen chón Israel ra pwal lal ngeni Moses me Aaron me lón ewe fönüpöön. 3Ekkewe chón Israel ra apasa ngeniir, “Amwo itä aipwe fen chök nóm lón Egypt. Epwe fen mwirinnö are ewe SAMOL epwe chök niikeemiló me ikenan. Pün me ikenan sia móót ngeni pwóóten fituk o mwöngö ekkewe sókkun mwöngö meinisin sia mochen. Nge ämi öüwa emmwenikeemito ikeei lón ei fönüpöön pwe öüpwe ämääkeemiló ren äm echik.”
4Mwirin, ewe SAMOL a apasa ngeni Moses, “Nengeni, ngang üpwe öpwüngätiw mwöngö seni läng fänitemi. Ekkewe aramas repwe toowu iteiten rän pwe repwe ioni üküükün mwöngö mi naaf fäniten ewe chök rän. Ngang üpwe sótuniir wón ei pwe üpwe küna are repwe fiti pwüngün äi kewe öüröür. 5Kopwe üreniir pwe lón ewe awonuen ränin iteiten wiik, repwe alapaló fän ruu minne repwe ioni pwe epwe lap seni öüküükün minne repwe ioni lón ekkewe pwal ekkóch rän.”
6Ina minne, Moses me Aaron ra akökkööw ew mwiich fäniten ekkewe aramasen Israel meinisin. Iwe, ra üreniir, “Lekuniólei, ämi öüpwe küna manamanen ewe SAMOL. Iwe, öüpwe silei pwe i ewe a emmweni kemiiwu seni ewe fönü Egypt. 7Nge lesossorun lesor, öüpwe küna lingen ewe SAMOL. Pwokiten i a rong ämi pweningawei i, nge öüsap pweningawekeem. Pün äm iö pwe öüpwe lal ngeni keem?” 8Iwe, Moses a pwal apasa, “Lekuniólei ewe SAMOL epwe ngeni kemi fituk pwe öüpwe ochooch, nge lesossorun lesor, epwe ngeni kemi pilawa üküükün ämi mochen pwe öüpwe mwöngö, pün i a rong ämi pweningawei. Ewer, ämi öüwa pweni ewe SAMOL, nge sap äm.”
9Mwirin, Moses a üreni Aaron, “Kopwe apasa ei ngeni unusen ewe mwichen chón Israel: ‘Öüpwe feitto fän mesen ewe SAMOL pwe öüpwe rongorong ngeni pölüwen ämi tunopwen.’ ”
10Iwe, lupwen Aaron a chüen chök kakkapas ngeni unusen ewe mwichen chón Israel, ra nenneló ngeni ewe fönüpöön nge ra tongeni küna eniwokkusun lingen ewe SAMOL a pwä me lón ewe kuchu mi ekkemweniir.
11Iwe, ewe SAMOL a apasa ngeni Moses, 12“Ngang üwa rongorong än ekkewe aramasen Israel tunopwen. Iwe, kopwe üreniir, ‘Lefääfei öüpwe ochooch fituk, nge lesossor öüpwe mötüló ren enemi pilawa. Mwirin, öüpwe silei pwe ngang ewe SAMOL ämi we Kot.’ ”
13Iwe, lón ewe kuniólun, chómmóng ekkewe machchang iter kweel ra ässito o pwölüweló ewe leeni ia ra nómwun asóósó ie. Nge lón ewe sorotän, ewe fönüpöön pwellin ünükkün ewe leeni ia ra nómwun asóósó ie a chöchchön ren omwurenipwin. 14Nge ekiseló chök lón ewe soran, lupwen ewe omwurenipwin a móróló, a wor och sässär mi pwechepwech o chächchääk usun ais a pwölüweló wón ewe pwül me lón ewe fönüpöön. 15Iwe, ekkewe chón Israel ra nenneiruk lupwen ra küna ei mettóch. Iwe. ra eiis fengen lefiiler, “Met ei?” Pün resap silei ika meet ewe.
Iwe, Moses a üreniir, “Iei ewe pilawa ewe SAMOL a ngeni kemi pwe öüpwe mwöngö. 16Ewe SAMOL a öllük pwe chón ew me ew imw repwe rusi üküükün minne ra osun. Repwe angei üküükün ew omer (ika ruu kuóóch) fäniten emön me emön aramas mi nóm lón ew imw mangaku.”
17Iei minne, ekkewe aramasen Israel ra toowu o rusi fengeni ei mwöngö. Ekkóch ra rusi chómmóng, nge ekkóch ra rusi chókükkün. 18Ren ar rusi üküükün ruu kuóóch fäniten emön me emön aramas; iwe, a naaf enen emön me emön. Chókana mi rusi chómmóng esap wor lussun, nge chókana mi rusi chókükkün, ra nanaafaló. Ew me ew famili a rusi üküükün chök meet a osupwangan.
19Mwirin, Moses a üreniir, “Esap wor emön epwe iseni och lussun tori lesossor.”
20Iwe, inamwo nge ekkóch me leiir resap älleasochis ngeni Moses. Ra iseni och lussun ewe mwöngö tori lesossor. Iwe, lón ena ótun, ewe mwöngö a uren möttö o poputä le pwongaw. Ina minne, Moses a soong ngeniir.
21Ekkewe aramas ra ioni ewe mwöngö iteiten lesossor. Ew me ew famili a ioni üküükün meet a osupwangan. Iwe, lupwen ewe akkar a pwichikkar, ewe manna mi chök nómwóló wón pwül pün resap ioni, a teliló o móróló. 22Lón ewe awonuen rän, ewe manna mi nóm wón ewe pwül a lapaló fän ruu chómmóngun seni mwan. Iei minne, ra rusi ruu omer (ika rüwänü kuóóch) fäniten emön me emön aramas nge sap ruu kuóóch. Iwe, ekkewe souemwenin ewe mwiichen aramas ra feitto o eisini Moses ika pwata a fis ei. 23Iwe, a pölüweni o apasa ngeniir, “Ewe SAMOL a filätä pwe lesor epwe ew ränin asöösö, ew Sabbat mi pin meren ewe SAMOL. Lón ei rän, öüsipwe asöösö seni ach kewe angang sia föfföri iteiten rän. Iei minne, ikenäi öüpwe umwuni meet öüwa mochen umwuni ika kukuuw meet öüwa mochen kukuuw. Nge meet lussun, öüpwe iseni o anómwu fäniten lesossor.”
24Iei minne, ra isenaló lussun ewe mwöngö tori lesossorun ewe rän mwirin, usun Moses a öllük. Iwe, a chüen unus o mwirinnö, nge esap pwongaw ika wor möttö wón. 25Iwe, Moses a apasa, “Öüpwe mwöngö ei manna ikenäi, pwokiten ikenäi iei ew Sabbat ngeni ewe SAMOL. Öüsap küna och manna me wón ewe pwül ikenäi. 26Lón ekkewe wonu rän öüpwe rusi ewe manna, nge lón ewe efisuen rän, iei ewe Sabbat. Esap wor och manna öüpwe küna fänitemi me wón ewe pwül lón ei rän.”
27Iwe, ekkóch ekkewe aramas ra toowu pwe repwe rus manna, inamwo ika lón ewe efisuwen rän, ewe ränin Sabbat. Nge resap küna och manna. 28Mwirin, ewe SAMOL a eisini Moses, “Epwe ifa üküükün langattamen fansoun än ekkeei aramas resap mochen älleasochisi äi kewe öllük me äi kewe öüröür? 29Ifa usun, resap meefi pwe ngang üwa ngeniir ewe efisuwen rän, ewe ränin Sabbat pwe ew ränin asöösö? Iei popun, ngang üwa alapaló le ngeni kemi fän ruu öüküükün ewe mwöngö lón ewe awonuen rän pwe epwe naaf fäniten ruu rän. Pün lón ewe ränin Sabbat, iteiten emön me emön leiimi epwe chök nómwetiw lón en me leenian. Esap wor emön epwe toowu seni leenian pwe epwe rus manna lón ena rän.” 30Ina pwata ekkewe aramas ra asöösö lón ewe efisuen rän.
31Iwe, ekkóch fansoun me mwirin, ekkewe aramasen Israel ra eita ngeni ewe mwöngö, manna. Ei manna a pwechepwech usun föün ewe irä itan koriander, nge nennan a usun chök nennen keik mi nofit ngeni chönün chunen. 32Mwirin, Moses a ngeniir ei öllük seni ewe SAMOL o apasa: “Öüpwe angei ew omer ewe manna o anómwu pwe epwe och minen ächchem tori feilfeilló chök usun än ewe SAMOL awora mwöngö fänitemi. Ren ämi föri ei, ekkewe tettelin pilóón aramasen mwirin repwe tongeni küna ewe pilawa ewe SAMOL a awora fänitemi pwe öüpwe mwöngö me lón ewe fönüpöön lupwen i a emmwenikemiiwu seni ewe fönü Egypt.”
33Iei minne, Moses a apasa ngeni Aaron, “Kopwe angei ew pöör o uwalong ew omer manna lón. Mwirin, kopwe eleenia ewe pöör lón ew leeni mi pin fän mesen ewe SAMOL pwe epwe tümwün fäniten och minen ächechchem fäniten ekkewe tettelin pilóón aramasen mwirin meinisin.”
34Iwe, Aaron a föri ei, usun chök minne ewe SAMOL a öllük ngeni Moses. Feil feil, Aaron a anómwu ewe manna lón ewe Pwórun Pwon pwe epwe tümwün me ie. 35Iwe, ekkewe chón Israel ra mwöngö ewe manna lón üküükün fääik ier, tori ra tikelong lón kiään ewe fönü Kanaan ia mi wor ie irän mwömwöngö pwe repwe möngö seniir.
36(Üküükün masowen ewe pöör ra aea le öükü ewe mana, ew omer, ika ew naengolun ew efa ika ruu kuóóch.)
Kólik a pwuuwu seni ewe achaw
17 Iwe, fän än ewe SAMOL öllük, unusen ewe mwiichen chón Israel ra sääi seni ewe Fönüpöönün Sin o ra mwöküt seni ew leeni tori pwal ew leeni. Feil feil, ra tori Refidim, nge resap künökün kólik me ikenan fäniten än ekkewe aramas repwe wün. 2Iei minne, ekkewe aramas ra pwal äniini ngeni Moses o pweni le apasa, “Kopwe ngeni keem kólik pwe aipwe wün.”
Nge Moses a pölüweni o apasa, “Öüpwe fanafanaló! Pwata öüwa äniini ngeniei? Pwata ämi öüwa sótuni ewe SAMOL?”
3Nge ekkewe aramas ra fókkun riäfföü ren ar kaakan kólik me ikenan, iei popun ra sópweló le lal ngeni Moses o apasa, “Pwata mwo chök ka fen uweikeemiwu seni Egypt? Pwata ka emmwenikeemiwu ikeei? Äm me nöüüm kana semiriit me nöüüm kana maanfesir aipwe le mäló ren äm kaaka!”
4Mwirin, Moses a siö ngeni ewe SAMOL o apasa, “Meet ngang üpwe le föri ngeni ekkeei aramas. Arapakkan chök repwe le mónei ngeniei faaw.”
5Iwe, ewe SAMOL a pölüweni Moses o apasa, “Kopwe angei wókum na wókun chón masen siip, ina ewe wóók en ka wókuwók lupwen ka wichi ewe kólik lón ewe chaanpwuupwu Nail. Mwirin, kopwe kööri ekkóch leiin ekkewe souakkomwen Israel pwe öüpwe fätäleló o akkomwoló mwen ekkewe aramas. 6Ngang üpwe üütä o sounuk ren ewe achaw wón ewe chuuk Horeb. Kopwe wichi ewe achaw; iwe, kólik epwe pwuuwu seni. Mwirin, ekkewe aramas repwe tongeni wün.” Iei minne, Moses a föri usun minne Kot a üreni. Iwe, ekkewe souakkomwen Israel ra katol lupwen ewe kólik a pwuuwu. 7Iwe, Moses a eita ngeni ewe leeni, Massah - “ewe leenien sóssót” me Meribah - “ewe leenien äniini” -pwokiten ekkewe aramasen Israel ra äniini ngeni Moses o sótuni ewe SAMOL ren ar apasa, “Ifa usun, ewe SAMOL mi nóm leiich pwe epwe tümwünü kich ika esap nóm?”
Chón Israel ra okkufu ekkewe chón Amalek
8Lupwen ekkewe aramasen Israel ra chüen nóm lón Refidim, ekkewe sounfiun Amalek ra feitto pwe repwe maun ngeniir 9Nge Moses a öllük ngeni Joshua o apasa, “Kopwe filätä ekkóch mwän me leiich pwe öüpwe feilló o maun ngeni ekkewe sounfiun Amalek. Lesor ngang üpwe üütä wón ungen ewe chuuk fän ewe wókun Kot epwe nóm lón peii.”
10Ina minne, Joshua a föri usun minne Moses a öllük ngeni. Joshua a emmwenaló chienan kewe mwän pwe repwe maun ngeni ewe mwichen sounfiun Amalek. Nge lón ewe fansoun, Moses, Aaron me Hur ra feittä wón ungen ewe chukuchukutä mi chök arapoto. 11Iwe, lón üküükün langattamen fansoun än Moses eitietä ewe wóók mi nóm lón pöün, ekkewe chón Israel ra wiil. Nge iteiten fansoun Moses a uwäätiw pöün, ekkewe chón Amalek ra wiil. 12Iwe, pöün Moses kewe ra fókkun mölüülü an epwe chüen tongeni ömwöchätä ewe wóók. Ina pwata Aaron me Hur ra kütta eföü faaw pwe Moses epwe móót wón. Mwirin, ra üütä ünükkün Moses, emön a nóm epeek nge emön a nóm epeek o ra ömwöchäätä pöün. Ina minne, pöün Moses ra chök itifóchófóchetä tori akkar a tupwutiw. 13Iwe, pwokiten ei, Joshua me an we mwiichen sounfiu ra tongeni okkufu ewe mwiichen sounfiun Amalek ren ketilas.
14Mwirin, ewe SAMOL a öüröüra ngeni Moses o apasa, “Kopwe makkeetiw porausen ei maun. Kopwe makkeetiw ekkeei poraus lón echö taropwe pwe aramas repwe chechchemeni meet a fis ikeei. Iwe, kopwe piipifichi pwe kopwe aronga ngeni Joshua pwe ngang üpwe unusen arosaló ekkewe chón Amalek seni wón fönüfan.”
15Mwirin, Moses a senätä ew róngen asór o eita ngeni, ‘Ewe SAMOL i äi Filäik’ (Yahweh Nissi). 16Iwe, Moses a apasa, “Ekkewe chón Amalek ra ökkölümwü le eitietä pöür pwe repwe üüngeni än ewe SAMOL we leenien móótun nemenem. Iei minne, iei ewe SAMOL epwe chök mammaun ngeni chón Amalek seni ew tettelin pilóón aramas tori pwal ew.”
Jethro a äämwa Moses
18 Iwe, poraus a mwittir tori Jethro, ewe souasór seni Midian pwal i semen pwülüwen Moses we, usun ekkewe mettóch mi amwaraar Kot a föri fäniten Moses me nöün kewe aramas, ekkewe chón Israel. A pwal rongorong usun än ewe SAMOL a emmwenirewu seni Egypt.
2Nge ekkóch fansoun me mwen ei, Moses a fen tiinaló pwülüwan we itan Zipporah me nöün kewe rüwömön äät pwe repwe nónnóm ren Jethro, semen pwülüwan we. 3Iten nöün Moses we mwännichi, Kershom, pün Moses a apasa lupwen nöün we äät a upwutiw, “Ngang üwa emön chón siamwü lón fönüen chón ekis.” 4Nge iten nöün we örüwömönün äät, Eliezer, pün a apasa lupwen an upwutiw, “Än semei we Kot i äi chón älillis, pün i a amanawaei seni nöün Farao ketilas.”
5Iwe, Jethro, semen pwülüwen Moses we, a feitto pwe epwe äämwa Moses, nge a uweei pwülüwen Moses we me nöün kewe rüwömön äät pwe repwe fiti. Iwe, ra war lupwen Moses me ekkewe aramasen Israel ra nómwun asóósó lón ewe fönüpöön arap ngeni ewe chukun Kot. 6Jethro a fen tiinato poraus ren Moses o apasa, “Ngang Jethro, semen pwülüwom ei. Ngang üwa feitto pwe üpwe äämwók, nge üwa uweei pwülüwom ei me nöün keei rüömön äät.”
7Ina minne, Moses a feilló pwe epwe souni semen pwülüwan we. A appwórotiw me mwan o róómi. Ra eiis fengen ika ifa usun emön me emön leiir, mwirin, ra feilló lón imwen Moses we imw mangaku pwe repwe sópweló le kakkapas fengen. 8Iwe, Moses a aporausa ngeni semen pwülüwan we usun iteiten ekkewe mettóch ewe SAMOL a föri pwe epwe angasa ekkewe aramasen Israel seni Farao me ekkewe chón Egypt. A pwal aporausa ngeni usun ekkewe weires meinisin ra sereni me leal lón ar sääi pwal usun än ewe SAMOL a amanawa nöün kewe aramas seni ar kewe weires meinisin.
9Iwe, Jethro a fókkun pwapwa lupwen a rong usun ekkewe mettóch mi mwirinnö meinisin ewe SAMOL a föri fäniten ekkewe chón Israel lupwen a chimanürowu seni lepöün ekkewe chón Egypt. 10Iwe, Jethro a apasa, “Üpwe mwareiti ewe SAMOL, pün i a amanawa kemi seni lepöün ekkewe chón Egypt pwal seni lepöün Farao. I a chimanüw Israel seni lepöün ekkewe chón Egypt. 11Iei ngang üwa silei pwe ewe SAMOL a lapalaap seni ekkewe pwal ekkóch kot meinisin, pwokiten nöün keei aramas ra tongeni tiwewu seni ekkewe chón Egypt mi lamalam tekia o kirikiringaw.” 12Mwirin, Jethro, semen pwülüwen Moses we a ääni och asóren keek o ääni ekkóch asór ngeni ewe SAMOL. Lupwen Jethro a föri ei, Aaron me ekkewe souakkomwen Israel meinisin ra feitto pwe repwe chuuri. Iwe, iir meinisin ra chiechi ngeni Jethro le mwöngö ew mwöngön asór me fän mesen Kot.
Än Jethro kapasen öüröür mi miriit
13Lón ewe rän mwirin, Moses a móót lón leenian pwe epwe föri angangen wiisan wiisen souköpwüng fäniten ekkewe aramas, usun minne i a soun föri. Iwe, ekkewe aramas ra üütä o pwelieló Moses seni lesossor tori lekkuniól. 14Iwe, lupwen semen pwülüwen Moses we a küna meinisin minne Moses a föri fäniten ekkewe aramas, a apasa, “Meet ei ka föri fäniten ekkewe aramas? Pwata en chök ka äkkälämön le móót o föri ei angangen souköpwüng, nge ekkeei aramas meinisin ra chök üüfeil ünükkum seni lesossor tori lekkuniól pwe repwe angei ar älillis senuk?”
15Nge Moses a pölüweni o apasa ngeni, “Üwa föri ei pwokiten ekkewe aramas ra feitto reei o tungór ngeniei pwe üpwe kütta letipen Kot fäniten ar kewe osukosuk. 16Iteiten fansoun lupwen a wor ar fitikoko fengen, ngang ewe emön ra feitto reei pwe üpwe ataweei ar osukosuk. Ngang üwa esilei ngeni ekkewe aramas usun minne Kot a filätä o äiti ngeniir an kewe öllük me öüröür.”
17Iwe, semen pwülüwen Moses we a pölüweni o apasa, “Esap mwirinnö meet ka föri. 18En me ekkeei aramas mi feitto reemw öüpwe chök meefi ämi pekkus. Ei angang a koon chou ngenuk, kosap tongeni óm kopwe chök äkkälämön le föri. 19Iei, kopwe öüseling ngeniei, pün ngang üpwe ngenuk ew kapasen öüröür, nge amwo Kot epwe etuk. En kopwe chök sópweló le tupwuni ekkewe aramas fän mesen Kot o uweato ar kewe fitikoko ren pwe i epwe wiisen filätä pwüngün. 20En kopwe üreniir minne Kot a filätä. Kopwe äiti ngeniir än Kot kewe öllük me öüröür o pwääri ngeniir usun ar repwe föröchchüw nónnómwun manawer me minne repwe wiisen föri. 21Nge kopwe kütta seni leiin ekkewe aramas meinisin ekkóch mwän mi lipwäköch, mwän mi wenechchar o nuokkus Kot, mwän mi tipewen o opwut liffangen emichimich. Iwe, kopwe filiiretä pwe repwe souköpwüng wón engöröw aramas, ipwükü aramas, lime aramas me engol aramas. 22Ekkeei mwän repwe tongeni angang ngeni ekkewe aramas iteiten fansoun meinisin le atawei pwüngün ekkewe köpwüng mi mecheres meinisin. Nge ren och mettóch mi koon weires ika mi koon öüchchea, repwe tongeni uwato reemw. Iir ra tongeni wiisen tümwünü ekkewe mettóch mi kükkün. Iir repwe älisuk le mwärelong fän óm uwochchou, pwe repwe föri pwe ewe angang epwe mecheresiló ngenuk. 23Are en kopwe fiti ei öüröür, pwal are Kot epwe äwenók pwe kopwe föri ei; mwirin, kopwe tongeni engngiló fän choun inemouchchen ei angang. Iwe, ekkeei aramas meinisin repwe feilló lón leenier fän ar menemenöch me kinamwe.”
24Iwe, Moses a öüseling ngeni än semen pwülüwan we öüröür ngeni o a fiti an kewe memmeef i a apasa ngeni. 25Moses a filätä ekkóch mwän mi lipwäköch seni leiin ekkewe chón Israel meinisin. Mwirin, a ewiseer pwe repwe souköpwüng wón ekkewe aramas. Ekkeei mwän ra wiisen chón emmweni engöröw aramas, ipwükü aramas, lime aramas me engol aramas. 26Ra wiisen föri angangen köpwüng fäniten ekkewe aramas iteiten fansoun meinisin. Ra uwato ekkewe köpwüng mi weires ren Moses, nge pwisin iir ra filätä pwüngün ekkewe mettóch mi kükkün.
27Ese mang mwo me mwirin ei nge Moses a apwinaló semen pwülüwan we pwe epwe le feilló. Iwe, Jethro a liwinsäfäliti poputän fönüan.
Ewe SAMOL a pwisin pwääraló i me wón ewe chuuk Sinai
19 Iwe, ekkewe chón Israel ra tori lón ewe fönüapöön Sinai wesewesen ülüngät maram mwirin ar toowu seni Egypt - wesewesen lón ewe rän ra toowu. 2Mwirin ar ra toowu seni Refidim, ra feitto o tori ewe fönüapöön Sinai. Iwe, ra öüüwetä imweer imw mangaku lón ewe fönüpöön arap ngeni ewe chuuk Sinai.
3Mwirin, Moses a feittä wón ewe chuuk pwe epwe pwääto fän mesen Kot. Iwe, ewe SAMOL a kökkö ngeni Moses seni wón ewe chuuk o apasa, “Kopwe ngeni ekkewe mwirimwirin Jakob, ekkewe aramasen Israel, ekkeei kapasen öüröür: 4‘Pwisin ämi öüwa fen küna meet ngang üwa föri ngeni chón Egypt me usun äi üwa uweeikemi wón pöükässin ekkewe ikel o uweikemiito reei. 5Iwe iei, are öüpwe unusen älleasochisiei o öpwönüetä äi pwon, mwirin, ämi öüpwe wesewesen neii aramas mi sókkóló öüchcheami seni leiin aramasen ekkewe mwüün fönüfan meinisin. Pün unusen fönüfan, fönüwei. 6Iwe, nónnómwumi merei, öüpwe ew mwüün souasór me ew mwüü mi pin.’ Kopwe aporausa ei poraus ngeni ekkewe chón Israel.”
7Iei minne, Moses a liwinsäfäl seni wón ewe chuuk o a köörato ekkewe souakkomw me leiin ekkewe aramas. Iwe, a aporausa ngeniir meet ewe SAMOL a öllük ngeni pwe epwe apasa. 8Iwe, iir meinisin ra pölüwenippöküw o apasa, “Äm aipwe fókkun föri iteiten ekkewe mettóch ewe SAMOL a apasa.” Iei minne, Moses a uweisäfälieló minne ra ääni pölüwen ren ewe SAMOL.
9Mwirin, ewe SAMOL a apasa ngeni Moses, “Ngang üpwe feitto reemw lón ew kuchu mi malüül pwe ekkewe aramas repwe tongeni pwisin rongorong ngeniei lupwen ngang üpwe kapas ngenuk. Mwirin, repwe anómwu ar apilükülük wóóm fansoun meinisin.”
Iwe, Moses a üreni ewe SAMOL meet ekkewe aramas ra apasa. 10Mwirin, ewe SAMOL a apasa ngeni Moses, “Kopwe feittiw o amollätä ekkewe aramas fäniten äi üpwe äämweer. Kopwe epiniereló pwe repwe pin ikenäi me lesor. Nge pwisin iir repwe soppwuni üfer. 11Kopwe piipifichi pwe repwe unusen molloöchchütä lón ewe öülüngätin rän, pün ngang üpwe feittiw wón ewe Chuuk Sinai lón ena ränin nge ekkewe aramas meinisin repwe katol. 12Kopwe föri och kiä pwellin ünükkün ewe chuuk pwe ekkewe aramas resap luuseni. Iwe, kopwe esile ngeniir o apasa, ‘Öüpwe äfälli kemi pwe öüsap feittä wón ewe chuuk ika fen pwal mwo nge kineto ren kiään kewe. Ese lifilifil ika iö a kineto ngeni ewe chuuk epwe fókkun mäló. 13Emön aramas ika maan epwe pwereló epeek ewe kiä, epwe fókkun mómmón ngeni faaw ika ppek ngeni föün esefich pwe epwe mäló. Esap wor pöün aramas epwe attapeer.’ Ekkewe aramas repwe kineló seni ewe chuuk tori repwe rong och tikin rappwa mi tikittam, ewe sókkun rappwa mi för seni mächään ätemwanin siip. Mwirin, lón ena ótun, repwap feitto o mwiich fengen lepopun ewe chuuk.”
14Iei minne, Moses a feittiw seni wón ewe chuuk o feittiw ren ekkewe aramas. Iwe, a epinireló fäniten ar repwe fel ngeni Kot, nge ekkewe aramas ra soppwuni üfeer. 15Mwirin, Moses a apasa ngeni ekkewe aramas, “Öüpwe amollakemiitä fäniten ew fansoun mi öüchchea ülüngät rän seni ikenäi. Öüpwe mwo köüüló seni ämi öüpwe lisowu tori mwirin ena fansoun.”
16Iwe, lesossorun ewe öülüngätin rän, a püng chopulap me fiifi inefi, fiti och kuchu mi malüül a feittiw wón ewe chuuk. Iwe, a tik och rappwa mi fókkun tikimmóng o tikittam, ewe sókkun rappwa mi för seni mächään ätemwänin siip. Iwe, ekkewe aramas meinisin mi nóm lón ewe leeni ra chechcheech. 17Mwirin, Moses a emmwenawu ekkewe aramas seni ewe leeni ia ra köüütä imweer imw mangaku ie pwe repwe chuuri Kot. Iwe, ra üütä lepopun ewe chuuk. 18Unusen ewe Chuuk Sinai a pwölüló ren ötüötün ekkei, pwokiten ewe SAMOL a feittiw wón ewe chuuk lón lapalapen och ekkei. Ewe ötüötün ekkei a ötüpwoopwotä seni wón ewe chuuk usun chök ötüötün ew uumw mi wätte, nge unusen ewe chuuk a chepwörükürük ren ew chechchechin fönü mi wätte. 19Iwe, tikin ewe rappwa a tittikimóngóló. Iteiten fansoun Moses a kapas ngeni Kot, Kot a pölüweni i lón möngüüngün usun püngün chopulap pwe meinisin repwe rongorong.
20Ewe SAMOL a feittiw wón ungen ewe Chuuk Sinai o a köörätä Moses wón ungen ewe chuuk. Iei minne Moses a feittä wón ewe chuuk. 21Mwirin, ewe SAMOL a apasa ngeni Moses, “Kopwe feittiw o üreni ekkewe aramas pwe repwe äfälliir pwe resap pöchökkül ngeni ar repwe luuseni ewe kiä. Resap fókkun feittä ikeei pwe repwe nengeniei ngang ewe SAMOL, pün chókana repwe feittä repwe mäló. 22Ekkewe mwo souasór mi soun feitto arap ngeniei ngang ewe SAMOL nge repwe fókkun pwisin epinireló, pün are resap; iwe, ngang ewe SAMOL üpwe efeiengawer.”
23Nge Moses a pölüweni ewe SAMOL o apasa, “Ekkewe aramas resap tongeni feittä wón ewe Chuuk Sinai, pwokiten pwisin en ka fen öüröüra ngeni keem pwe aipwe äfälli kem pwe aisap feittä. En ka üreniei pwe üpwe öükaaló ewe kiä pwellin ewe chuuk o esile ngeni ekkewe aramas pwe resap luuseni ewe kiä.”
24Nge ewe SAMOL a apasa, “Kopwe feittiw ren ekkewe aramas o emmwenätä Aaron pwe epwe fituketä. Nge lón ena ótun, kosap mwüüt ngeni ekkewe souasór ika ekkewe aramas repwe luuseni ewe kiä pwe repwe feittä ikeei. Pün ika repwe feittä ikeei, ngang üpwe efeiengawer.”
25Iei minne Moses a feittiw ren ekkewe aramas o üreniir meet ewe SAMOL a apasa.
Ekkewe Engol Öllük
20 Mwirin, Kot a öüröüra ngeni ekkewe aramas ekkeei kapas meinisin:
2“Ngang ewe SAMOL óm Kot mi emmwenukowu seni ewe fönü Egypt, ewe fönü ia ra nöünuk amanaw ie.
3Kosap fel ngeni pwal ekkóch kot me lüki.
4Kosap föri och sókkun uluulun onümwäl fänitom. Kosap föri uluulun och mettóch, ese lifilifil ika och mettóchun peekitä fän läng ika wón fönüfan ika peekitiw lón ekkewe nöönön fäilól. 5Kosap fókkun fel ngeniir ika angang ngeniir, pün ngang, ewe SAMOL óm Kot, ngang emön Kot mi luukommóng, üsap mochen kopwe ineti óm echeniei ngeni pwal emön kot. Ngang üsap likitaló äi üpwe öpwüngü tipisin chókana mi opwut ngang, pün ngang üpwe öpwüngü ekkewe naaw fäniten tipisin ekkewe saam me iin tori ewe öülüngätin me örüwänüen tettelin pilóón aramas. 6Nge ngang üpwe pwääraló äi tong ngeni chókana mi tongeei o älleasochisi äi kewe öllük lón üküükün ew ngöröwün tettelin pilóón aramas.
7Kosap apasamwäli iten ewe SAMOL óm Kot, pün ewe SAMOL esap likitaló an epwe ngenuk chappen tipisum are kopwe apasamwäli itan.
8Kopwe chechchemeni pwe kopwe afóna ewe ränin Sabbat ren óm kopwe tümwünü pwe epwe pin. 9Wonu rän lón ew wiik ra käimwüló fäniten óm kopwe föri pwüngün wiisom iteiten rän me óm angang meinisin. 10Nge ewe efisuen rän, iei ew ränin asöösö fäniten óm kopwe afóna ewe SAMOL óm Kot. Esap wor emön me leiin chón leimwom epwe föri och sókkun angang lón ei rän. Sap en, sap pwal noum äät are nengngnin, sap noum chón angang mwän ika chón angang fefin, sap noum maanfesir, sap pwal emön chón ekis mi nóm lón kiänin tittin leeniom. 11Pün ewe SAMOL a angang lón wonu rän. I a föri läng me fönüfan me mataw me meinisin minne a wor lóór. Mwirin, i a asöösö lón ewe efisuen rän. Iei popun ewe SAMOL a efeiöchü ewe ränin Sabbat o äimwüeló ei rän pwe epwe pin.
12Kopwe asamolu me afóna semom me inom. Mwirin, kopwe tongeni manawattam me lón ewe fönü ewe SAMOL óm Kot epwe ngenuk.
13Kosap niimanawei aramas.
14Kosap föri tipisin lisowu.
15Kosap soolä.
16Kosap apasatä kapasen pwärätä mi mwääl epwe üüngeni chón órum.
17Kosap mocheniäiti imwen chón órum. Kosap mocheniäiti ewe fefin pwülüwen chón órum. Kosap mocheniäiti nöün chón órum chón angang mwän ika nöün chón angang fefin, nöün ätemwänin kowu ika nöün dongki ika pwal och mettóch chón órum we a ääni.”
18Iwe, lupwen ekkewe aramas ra rong püngün ewe chopulap me tikin ewe rappwa mi tikimmóng, pwal lupwen ra küna fiifin ewe inefi me ewe ötüötün ekkei mi ötütä seni ewe chuuk, iwe, ra chök üütäto me toowaw o chechchech ren ar nuokkus. 19Iwe, ra apasa ngeni Moses, “En kopwe üreni keem meet Kot a apasa, nge äm aipwe öüseling. Nge kosap mwüüt ngeni pwe Kot epwe kapas wenewen ngeni keem. Pün are i epwe kapas ngeni keem, iwe, äm aipwe mäló.”
20Iwe, Moses a apasa ngeni ekkewe aramas, “Öüsap nuokkus, pün Kot a feitto lón ei lapalap pwe epwe pwääri ngeni kemi an manaman mi eniwokkus. Iwe, seni ikenäi feilló, ämi nuokkusiti Kot epwe eppeti seni kemi ämi öüpwe föri tipis.”
21Iwe, ekkewe aramas ra chök üütä toowaw seni ewe chuuk lupwen Moses a tolong lón ewe kuchuchól mi malüül ia Kot a nóm ie.
Pwüngüöchün aean róngen asór
22Mwirin, ewe SAMOL a apasa ngeni Moses, “Kopwe apasa ei ngeni ekkewe aramasen Israel: ‘Ämi öüwa chón pwärätä pwe ngang üwa kapas ngeni kemi seni läng. 23Öüpwe chechchemeni pwe öüsap fókkun föri ika fel ngeni ekkewe uluulun önümwäl mi för seni silifer ika kolt.
24Öüpwe föri fänitei ew róngen asór mi för seni pwül. Iwe, öüpwe ääni wón ei róngen asór ämi kewe asóren keek me asóren kinamwe, nöümi kewe siip me kuuch me nöümi kewe kowu. Öüpwe senätä ewe róngen asór lón iteiten ekkewe leeni ia ngang üpwe ächchema ngeni kemi me ie ika ngang iö. Iwe, ngang üpwe feitto o efeiöchü kemi me ikenan. 25Nge are öüpwe senätä ew róngen asór seni faaw fänitei, öüpwe chök aea ekkana faaw resap fal. Öüsap lecheei ika ouluulu ekkewe faaw ren och pisekin angang, pün ren ena, öüpwe le föri pwe ekkewe faaw resap fich fäniten aean och mi pin. 26Öüsap pwal föri natöön äi we róngen asór ren ämi öüpwe feittä wón, pwe selelóómi esap pwäätiw wón ewe róngen asór.’
Angangen kirekiröch ngeni ekkewe amanaw
21 Mwirin, Kot a apasa ngeni Moses, “Ikkeei ekkewe pwal ekkóch kapasen öüröür kopwe fókkun ngeni ekkewe aramasen Israel:
2“Are kopwe mööni emön chón Hipru amanaw pwe noum chón angang, i epwe angang ngenuk lón üküükün chök wonu ier. Nge lón ewe efisuen ier kopwe angasaló i. Iwe, i esap möönätiw och ngenuk fäniten an ngasaló. 3Are ätewe esap pwüpwülü lupwen a wiliti noum amanaw, nge a pwüpwülü me mwirin, i chök epwe ngasaló lón ewe efisuwen ier. Nge are ätewe mi pwüpwülü me mwen an wiliti emön amanaw, mwirin, pwülüwan we epwe fiti i le ngasaló lupwen epwe tori fansoun an ngasaló. 4Nge are än ewe amanaw we masta epwe ngeni i emön pwülüwan, nge a wor nöüür äät ika nengngin, mwirin, ewe mwän chök wón an epwe ngasaló lón ewe efisuwen ier, nge ewe fefin me nöün kewe repwe nöün ewe masta.
5“Nge are ewe amanaw a filätä pwe i a mochen epwe nómwóló ren an we masta, i a tongeni apasa, ‘Ngang üwa tongei äi we masta. Ngang üwa tongei pwülüwei we me neii kewe. Ina minne, ngang üwa filätä pwe üsap ngasaló.’ 6Are epwe fis ei sókkun, ewe masta epwe uwealó ewe amanaw fän mesen ekkewe souköpwüng. Mwirin, ewe masta epwe uwealó ewe amanw ren ewe asam ika ren üren ewe asam o pwangeni selingan ngeni efóch ööite lepwääpwäló. Mwirin ena, ewe amanaw epwe nöün an we masta chón angang lón unusen ränin manawan.
7“Lupwen emön mwän a filätä pwe epwe amöömöló nöün fefin pwe epwe emön amanaw, neminewe esap ngasaló lesópwólón ekkewe wonu ier, usun ekkewe amanaw mwän. 8Are ewe masta a filätä fänitan pwe epwe pwülüweni ewe amanaw fefin, nge neminewe esap apwapwai letipen an we masta mi mööni; mwirin, ewe masta a tongeni amöömöló neminewe ngeni saman we pwe epwe möönsäfäli. Nge esap mwüümwütä ngeni ewe masta an epwe amöömöló neminewe ngeni chón ekis, pwokiten ewe masta a pwününgaw pün i ewe a atai pwüngün an we pwon ngeni neminewe pwe epwe pwülüweni. 9Iwe, are ewe masta a pwon pwe i epwe mwüüt ngeni ewe amanaw fefin pwe pwülüwen nöün we mwän, ewe masta epwe föri ngeni neminewe pwe epwe usun chök emön nöün fefin nge sap usun emön amanaw. 10Nge are pwisin ewe masta a pwülüweni ewe amanaw fefin, nge mwirin, a angei pwal emön pwülüwan, ätewe esap tongeni epwe ekisaló enen pwülüwan we amanaw mwöngö ika üfan, esap pwal ükütiw le kóón ren. 11Are ätewe epwe ükütiw le awora ngeni neminewe ew me leiin ekkeei mettóch; neminewe a tongeni epwe feilló o wiliti emön fefin mi ngasaló nge esap möönätiw och mooni.
Köpwüngün feiengawen inis
12“Ese lifilifil ika iö a wichi emön aramas o niieló i, epwe fókkun pwal ninniiló. 13Nge are i a niieló emön aramas ren chök an cheechengaw nge esap seni an amollätä lón an ekiek pwe epwe niieló ätewe, nge Kot a mwüütätä pwe epwe fis, ngang üpwe filätä ew leeni ia ätewe mi niieló ewe aramas epwe süü ngeni pwe esap feiengaw. 14Nge are emön aramas a fiseetä lón an ekiek pwe epwe niieló emön aramas, mwirin, öüpwe etekinaló ewe chón ninni seni äi we róngen asor o niieló i.
15“Ese lifilifil ika iö a fiu ngeni saman ika inan, epwe fókkun ninniiló.
16“Emön aramas mi sooläni pwal emön aramas, epwe fókkun ninniiló lupwen epwe wo, ese lifilifil ika a fen amöömöló ewe aramas pwe epwe emön amanaw ika a chüen chök nóm ren.
17“Ese lifilifil ika iö a ótteki saman ika inan, epwe fókkun ninniiló.
18“Are rüwömön mwän ra äniini fengen, nge emön me leiir a angei eföüw faaw o wüsi ngeni ewe pwal emön ika öfölü ngeni kumwuchun o föri pwe a chök feieingaw nge esap mäló, ätewe mi popuw ewe feiengaw esap ninniiló. 19Are ewe aramas mi feiengaw a chök akkanósón lón kian lón ekkóch fansoun, nge mwirin, a pwäätä o wókuukuni le fätälfeil lükün, esap wor meet epwe fis ngeni ätewe mi popuw ewe feiengaw. Nge ewe chón popuw ewe feiengaw epwe chök möön ngeni ewe mi feieingaw liwinin an fansoun a lussuló pwokiten an feiengaw o epwe fókkun püngütiw liwinin än ätewe kütta minne epwe chikarsäfäl ren.
20“Are emön aramas epwe ópwuni nöün amanaw mwän ika amanaw fefin ren efóch wóók, nge ewe amanaw a mäló ren an ópwuni, ewe minne nöün ewe amanaw epwe angei chappen an föfför. 21Nge are ewe amanaw esap mäló o a pöchökkülsäfäl mwirin ew ika ruu rän, än ewe amanaw we masta esap angei chappen an föfför pwokiten ewe amanaw a nóm lón tettelin pisekin ewe masta pün a mööni ren mooni.
22“Are rüwömön mwän ra fiu fengen, nge lupwen ra fiu, ra efeiengawa emön fefin mi pwoopwo ina pwata neminewe a nöünöüló nge esap tori mwo atun an epwe nöünöü. Iwe, are esap fis och feiengaw ngeni ewe fefin, mwirin, ewe aramas mi popuw ewe feiengaw epwe püngütiw liwinin ewe feiengaw wón üküükün meet pwülüwen ewe fefin a mochen fän pöchökkülen an pwüüng me minne ekkewe souköpwüng ra öpwüngaló. 23Nge are epwe fis och feiengaw mi koon chou ngeni ewe fefin; mwirin, ätewe mi popuw ewe feiengaw epwe angei chappen an föfför alóngólóng wón öüküükün ewe feiengaw. Are ewe fefin epwe mäló, ätewe mi popuw ewe feiengaw epwe fókkun ninniiló. Pün liwinin ew manaw pwal ew manaw. 24Liwinin eföü föün maas pwal eföw föün maas. Liwinin efóch nii pwal efóch nii. Liwinin efóch paaw pwal efóch paaw. Liwinin efóch pachapach pwal efóch pachapach. 25Liwinin och kar pwal och kar. Liwinin ew kinas pwal ew kinas. Liwinin och pweaw pwal och pweaw.
26“Are emön chón nöünöü amanaw a ópwuni mesen emön amanaw mwän ika amanaw fefin nge a chuunóló mesan, mwirin, ewe amanaw a tongeni ngasaló pwe ina liwinin mesan we mi feiengaw. 27Iwe, are emön chón nöünöü amanaw a tülüw niin emön amanaw mwän ika amanaw fefin, ewe amanaw epwe ngasaló pwe ina liwinin niin we.
28“Are emön ätemwänin kowu a opwura emön mwän ika emön fefin ina pwata a mäló, ewe ätemwänin kowu epwe mómmón ngeni faaw pwe epwe mäló, nge esap wor epwe ocheei fitukan. Iwe, esap wor och epwe fis ngeni ewe minne nöün ewe ätemwänin kowu. 29Nge are ewe minne nöün ewe ätemwänin kowu a fen silei pwe nöün we ätemwänin kowu a fen pwupwureei aramas me mwan, nge i esap titieló ewe kowu; iwe, are ewe ätemwänin kowu epwe niieló emön mwän ika emön fefin, ewe ätemwänin kowu epwe mómmón ngeni faaw, nge pwal ewe minne nöün ewe ätemwänin kowu epwe pwal fókkun ninniiló. 30Nge määrärin ewe aramas mi mäló ra tongeni etiwa mooni seni ätewe minne nöün ewe ätemwänin kowu pwe liwinin manawen ewe mi mäló. Are repwe etiwa ar repwe angei mooni, mwirin, ätewe minne nöün ewe ätemwänin kowu esap ninniiló. Nge i epwe möönätiw meet üküükün ewe mooni ewe souköpwüng a öpwüngaló pwe epwe möönätiw. 31Öüpwe chök pwal fiti pwüngün ei chök öllük are emön ätemwänin kowu epwe oppwura emön äät ika emön nengnin. 32Nge are emön ätemwänin kowu epwe oppwura emön amanaw, ese lifilifil ika emön mwän ika fefin, ewe minne nöün ewe kowu epwe möönätiw iliik shekel silifer ngeni än ewe amanaw we masta, nge ewe ätemwänin kowu epwe mómmón ngeni faaw.
33“Are emön aramas a suukaló pwölüpwölün ew pwaang ika tuuw ew pwaang nge esap pwölüweló; iwe, mwirin, are emön ätemwänin kowu ika emön dongki a turulong lón, 34ätewe minne an ewe pwaang epwe püngütiw unusen liwinin ewe maan mi mäló ngeni ewe minne nöün ewe maan, nge i epwe angei ewe maan mi mä fänitan.
35“Are nöün emön mwän ätemwänin kowu a efeiengawa nöün chón órun ätemwänin kowu, nge ewe kowu mi feiengaw a mäló, mwirin, ekkewe rüwömön mwän minne nöüür kewe ätemwänin kowu repwe amöömöló ewe emön mi manaw o repwe ineti ewe mooni lefiiler. Iwe, emön me emön ekkewe mwän epwe angei esóp ewe ätemwänin kowu mi mäló pwe inetin. 36Nge are aramas ra fen silei pwe ewe ätemwänin kowu mi fen piin pwupwuropwur me mwan nge ätewe minne nöün ewe ätemwänin kowu esap titieló ewe kowu, ätewe minne nöün ewe ätemwänin kowu mi manaw epwe püngütiw unusen liwinin ewe ätemwänin kowu mi mä ngeni ätewe minne nöün ewe maan. Epwe liwini ewe kowu mi mä wón emön kowu mi manaw. Nge mwirin, i epwe angei ewe maan mi mä fänitan.
Tümwünün pisekin aramas
22 “Epwe wor pakkingin än emön aramas sooläni emön kowu ika emön siip, nge mwirin, a niieló ika amöömöló ewe maan. Ewe pakking fäniten kowu, epwe limmön kowu fäniten iteiten emön me emön kowu emön a sooläni. Ewe pakking fäniten siip, epwe fömön siip fäniten emön me emön siip a sooläni.
2“Are emön chón soolä a wo lupwen an töömwälilong lón ew imw lepwin, nge emön a wichi o a mäló; ewe aramas mi niieló ewe chón soolä esap tipisin niimanaw. 3Nge are ei a fis lerän, ewe aramas mi niieló ewe chón soolä a tipisin niimanaw.
“Emön chón soolä mi wo epwe fókkun eliwinisäfäli ika püngütiw unusen liwinin meinisin minne i a sooläni. Nge are esap wor och liiwin epwe püngütiw; iwe, ewe chón soolä epwe pwisin amöömöló inisin pwe epwe emön amanw pwe liwinin minne i a sooläni. 4Are emön a sooläni emön kowu ika emön dongki ika emön siip nge a pwä pwe ewe maan mi chüen manaw o nóm ren ewe chón soolä, ewe chón soolä epwe ngeni ätewe minne nöün ewe maan, rüwömön maan fäniten iteiten emön me emön maan i a sooläni.
5“Are emön aramas a amwöngöni nöün pwiin maan fetil lón an mälämäl ika tännipin irän wain nge a mwüüt ngeni nöün kewe maan pwe repwe selong lón pwal än emön aramas mälämäl ika tännipin irän wain pwe repwe mwöngö fetil lón, ätewe minne nöün kewe maan epwe fókkun püngütiw liwinin meet nöün kewe maan ra atai, ngeni ewe minne an ewe tännipi. Epwe püngütiw ewe liiwin seni pwisin an föün wiit ika föün irän wain mi fókkun mwirinnö.
6“Are emön aramas a öküüw ew ekkei pwe epwe keni ekkewe iräfölüföl lón an tännipi, nge ewe ekkei a ngetefeil o ngeteri än pwal emön aramas tännipi o kenaló an pinükün wiit ra fen pöküpök ika irän wiit mi chök chüen üütä ika unusen ewe tännipi, mwirin, ewe aramas mi öküüw ewe ekkei epwe fókkun püngütiw liwinin meinisin minne a karaló.
7“Are emön aramas a ngeni chón órun nöün silifer ika kolt ika pisekin pwe epwe tüttümwünü, nge emön a sooläni me lón imwan we, iwe, are ewe chón soolä a pwä, mwirin, ewe chón soolä epwe möönätiw fän ruu üküükün öüchchean ewe mettóch i a sooläni. 8Nge are ewe chón soolä esap pwä, ewe minne imwan ewe epwe feitto me mwen ekkewe souköpwüng, iwe, repwe wiisen filätä are i a sooläni ewe pisek ika sap i. 9Are epwe wor och äniini lefiilen rüwömön aramas ika epwe nöün iöön leiir emön kowu ika emön dongki ika emön siip ika echö üüf ika och sókkun pisek mi pöütüló, mwirin, iir me ruu ekkewe peekin repwe feitto fän mesen ekkewe souköpwüng pwe iir repwe wiisen filätä ika iö a mwääl. Iwe, ewe aramas iöön ekkewe souköpwüng ra atoowu pwüngün pwe i a mwääl epwe liwinisäfäli ngeni ewe pwal emön mwän fän ruu üküükün öüchchean ewe mettóch.
10“Are emön aramas a tungórei chón órun pwe epwe tümwünü fänitan emön dongki ika emön kowu ika emön siip ika pwal och sókkun maan lón ew chök fansoun mi mwochomwooch, nge ewe maan a mäló ika feiengaw ika emön a süüló fan nge esap wor chón pwärätä a küna pwe epwe repotei meet a fis, 11mwirin, ewe chón tümwün epwe äwewe ngeni ewe minne nöün ewe maan pwe i esap sooläni ewe maan. Iwe, epwe pwon fän ökköpöl me fän mesen ewe SAMOL pwe i esap sooläni ewe maan. Iwe, ätewe minne nöün ewe maan epwe etiwa än ewe chón tümwün kapas, nge ewe chón tümwün esap wiisen püngütiw och liiwin ngeni. 12Nge are emön a sooläni ewe maan seni ewe chón tümwün; iwe, i epwe fókkun püngütiw liwinin ngeni ewe minne nöün ewe maan. 13Are ewe maan a taatakis ren maanmwacho, ewe chón tümwün epwe uweato meet lussun ewe maan pwe an pisekin pwärätä. Iwe, i esap wiisen püngütiw och liiwin fäniten ewe maan mi taatakis.
14“Are emön aramas a paaroni emön maan seni chón órun, nge ewe maan a feiengaw ika mäló lupwen ätewe minne nöün ewe maan esap nóm, ewe chón paaro epwe püngütiw liwinin ewe maan. 15Nge are ätewe minne nöün ewe maan mi nóm lupwen ewe maan a feiengaw ika mäló, iwe, ewe chón paaro esap püngütiw liwinin ewe maan. Nge are ewe maan mi saata, iwe, ewe chón saatani ewe maan esap püngütiw liwinin, pwokiten ewe mooni mi kamöötiw fäniten ewe saata a ina chök pinasen ewe luus.
16“Are emön mwän a otupwu emön fefin esap mwo tori mwän, esap pwal mwo kófót ngeni emön o a kóón ren; ätewe epwe möönätiw ewe kiis fäniten emön fiin öpwüpwülü söfö o epwe etiwa neminewe pwe pwülüwan. 17Nge are semen neminewe we esap fókkun mochen mwüüt ngeni ätewe pwe epwe pwülüweni nöün we, ätewe epwe chök chüen möönätiw unusen ewe kiis fäniten neminewe usun mi affat fäniten ekkana fefin resap mwo tori mwän.
18“Öüsap mwüüt ngeni emön sourong fefin pwe epwe manaw.
19“Ese lifilifil ika iö a lisowu ngeni emön maan, epwe chök fókkun ninniiló.
20“Ese lifilifil ika iö a asór ngeni pwal emön kot me lüki ngang ewe SAMOL, epwe fókkun ninniiló.
21“Öüsap kirikiringaw ngeni emön waasöla ika eriäfföwü i lón och sókkun lapalap, pün pwisin ämi öüwa fen piin waasöla lón ewe fönü Egypt.
22“Öüsap alamwota osupwangen emön fefin mi mäseni pwülüwan ika emön mi määsen. 23Pün are öüpwe föri iei usun nge repwe siö ngeniei, ngang üpwe fókkun öüseling ngeni ar siö o älisiir. 24Ngang üpwe fókkun soong ngeni kemi o üpwe niikemiiló ren ketilas. Iwe, pwülüwemi kewe repwe lipichsäfäl, nge nöümi kewe semiriit repwe määsen.
25“Are kopwe mwüüt ngeni emön chienom chón Hipru mi mwelele pwe epwe liwinimmang mooni senuk, kosap usun emön chón awora moonien liwinimmang, pün kosap apachätä manawen noum we mooni. 26Are kopwe angei seni chón órum üfan aüfölap pwe ina ölükülükün an pwon pwe epwe eliwinisäfäli ewe mooni i a liwinimmang senuk, kopwe eliwinisäfäli ngeni üfan we me mwen än akkar epwe tupwutiw. 27Pün chón órum we epwe osun üfan ei an epwe pwölüw ngeni inisin pwe epwe pwichikkar lupwen a möür lepwin. Nge are kosap eliwinisäfäli ngeni chón órum ufan we; iwe, i epwe siö ngeniei pwe üpwe älisi, mwirin, ngang üpwe rongorong, pün ngang emön mi fókkun kirekiröch.
28“Kosap turunufasei Kot ika ótteki ewe emön mi nemenem wón aramasom.
29“Kosap ömwöchaló och lupwen kopwe fang ngeniei ewe naengol seni óm kewe föün wiit me óm kewe wain.
“Kopwe fókkun ngeniei ewe mwännichi me leiin noum kewe mwän. 30Kopwe pwal ngeniei ewe ätemwänin mweinöün noum kowu me siip. Kopwe likiti ewe ätemwänin mweinöün maan pwe epwe mwo nóm ren inelapan we lón üküükün fisu rän. Mwirin, kopwap ngeniei lón ewe awalüen rän.
31“Ämi öüpwe neii aramas mi pin. Ina minne, öüsap ocheei fituken emön maan mi mäló ren maanmwacho. Öüpwe oturaló inisin ewe maan ngeni ekkewe kolak pwe repwe ocheei.
Kapas usun öpwüngüwen
23 “Kosap emeresifeili och poraus mi mwääl. Kosap tipeew ngeni óm kopwe älisi emön aramas mi föfföringaw ren óm kopwe emön chón pwärätä meet mi chofona fänitan.
2“Kosap chuungeni ew mwiichen aramas chómmóng mi ekiekin föri meet mi ngaw. Lupwen kopwe nóm lón ewe leenien chón pwärätä lón köpwüng, kosap päipäifeil ika wiliwilipaat lón óm pwärätä meet mi pwüng pwe kopwe fiti meefien lap ngeni chómmóng aramas. 3Iwe, kosap lifilifil aramas lón óm pwärätä lón köpwüng ren óm kopwe penätä emön aramas pwokiten chök i emön mi mwelele.
4“Are kopwe seretä wón nöün chón opwutom kowu ika dongki a mwälecheló, kopwe fókkun eliwinisefälieló ren. 5Are kopwe küna emön dongki nöün emön mi opwut en pwe a taroporop fän uwosan wosochchou, kosap fätäl seni. Kopwe köüüló o älisi ätewe ren nöün we dongki.
6“Kosap sorei minne mi wenechchar lón köpwüng an epwe ngaw ngeni ekkana aramas mi mwelele, pwokiten chök iir mi mwelele. 7Kosap ettipisi mwäli emön ren och föfför mi ngaw. Kosap pwal föri pwe emön aramas esap wor an mwääl ika emön aramas mi wenechchar epwe ninniló ren liwinin tipisin och mettóch i esap föri. Pün ngang üsap epichaló tipisin emön mi föri ei sókkun.
8“Kosap etiwa och liffangen emichimich, pün ew liffangen emichimich a tongeni ochunna mesom o föri pwe kopwe ömönüngaw seni och mettóch mi let. Iteiten fansoun, liffangen emichimich a föri pwe aramas mi mwirinnö repwe kapas chofona.
9“Öüsap eriäfföwü ekkewe chón ekis mi nónnóm leiimi, pün ämi öüwa pwisin silei ifa usun nónnómwun emön chón ekis, pwokiten ämi öüwa fen piin waasöla lón ewe fönü Egypt.
10“Öüpwe fóffót lón ämi kewe tännipi o kinikin uwään fótämi lón üküükün wonu ier. 11Nge lón ewe efisuen ier, öüpwe mwüüt ngeni ewe fönü epwe asöösö ren ämi öüsap tuuw ika öüsap aea. Mwirin, ekkewe mi mwelele me leiimi ra tongeni kinii üwään ekkewe irä mi pwisin pwükütä wón ewe fönü. Nge öüpwe likiti ekkewe lussun fäniten ekkewe maan pwe repwe mwöngö. Öüpwe pwal föri iei usun ren ämi kewe tännipin irän wain me ämi kewe tännipin olif.
12“Öüpwe angang lón ekkewe wonu rän, nge öüpwe asöösö lón ewe efisuen rän. Ei epwe awora ngeni nöümi kewe kowu me nöümi kewe dongki ew fansoun ar repwe asöösö. Epwe pwal mwüüt ngeni ekkewe aramas lón imwemi kewe me nöümi kewe amanaw me ekkewe waasöla pwe repwe ngasatä.
13“Öüpwe piipifichi pwe öüpwe älleasochisi äi kewe kapasen öüröür meinisin ngang üwa apasa ngeni kemi. Öüpwe chechchemeni pwe öüsap iótek ngeni ika ääni ökköpöl pwal ekkóch kot. Öüsap mwo nge föüni iteer.
Ekkewe ülüngät chuulap mi fis iteiten ier
14“Iteiten ier, öüpwe föri ächechchemen ekkewe ülüngät chuulap ren ämi öüpwe afónaei.
15“Akkomwan, öüpwe efisi ächechchemen ewe Chuulapen Pilawa esap wor iis lón. Lón üküükün fisu rän öüpwe mwöngö pilawa mi för nge esap wor iis lón, usun ngang üwa öllük ngeni kemi me mwan. Ei chuulap epwe fis iteiten ier lón ewe fansoun mi kefilitä lón ewe maramen mweires, iei ewe maram Abib, pün iei ewe maramen ächechchemen ämi öüwa toowu seni Egypt.
“Iteiten emön me emön epwe uweato reei ew asór lón ena fansoun.
16“Öüpwe pwal efisi ächechchemen ewe Chuulapen Fansoun Kinikin mwenuwa lupwen öüpwe uwato reei ewe mwenuwa öüwa kinii seni minne öüwa fótuki lón ämi kewe tännipi.
“Ömwüchchülón, öüpwe efisi ächechchemen ewe Chuulapen Fansoun Ionalong uwa lesópwólón ewe fansoun kinikin uwa, lupwen öüwa ionalong uwään fótämi irä seni lón tännipimi kewe.
17“Lón ekkeei ülüngät fansoun chuulap iteiten ier, iteiten emön me emön mwän lón Israel epwe pwääto fän mesen ewe SAMOL mi nemeni mettóch meinisin.
18“Lupwen öüpwe nii emön maan o ääni asór chaan, öüsap fókkun ochuu ngeni och mettóch mi wor iis lón.
“Lupwen öüpwe keni ewe kiriis seni äi we mönün asór, öüsap anómwu och lussun ewe kiriis tori lesossor.
19“Lupwen öüpwe kinii uwään ämi kewe irä iteiten fansoun kinikin üwään rääs, öüpwe uwato reei ekkewe mi fókkun mwirinnö seni minne öüwa kinii lón ewe äewin ränin ämi kinikin uwa. Öüpwe fókkun ääni asór ei ngeniei ngang ewe SAMOL ämi we Kot.
“Öüsap fókkun kukuuw emön appanen kuuch lón chönün oupwun inelapan we.
Ewe SAMOL a pwon pwe epwe nónnóm ren chón Israel
20“Nengeni, ngang üwa tiinato neii we chón läng pwe epwe akkomw mwemi pwe epwe emmweni kemi wón ewe aal o emmweni ngeni kemi ewe fönü ngang üwa fen amollätä fänitemi. 21Öüpwe öüseling ngeni i o älleasochisi an kewe kapasen öüröür meinisin. Öüpwe äfälli kemi me fän mesan pwe öüsap üüngeni i pün i esap omwusaló tipisin ämi üüngeni. I chón tupwuniei - iwe, itei a nóm wón. 22Are öüpwe tümwünöch le älleasochis ngeni i o fiti äi kewe kapasen öüröür meinisin, mwirin, ngang üpwe chón opwuta ekkana chón opwuta kemi o üpwe üüngeni chókana mi üüngeni kemi. 23Pün neii we chón läng epwe akkomw mwemi o emmweni kemiilong lón ewe fönü fönüen ekkewe chón Amor, chón Hit, chón Periz, chón Kanaan, chón Hiv me chón Jebus pwe öüpwe nónnóm ikenan. Iwe, ngang üpwe arosereló. 24Öüsap fel ngeni ekkewe kot än chón ekkeei ekkóch mwüü. Öüsap angang ngeniir lón och sókkun lapalap, öüsap pwal öppirüw än ekkewe aramas föfför mi ngaw. Nge öüpwe fen okkufur o ataeló ar kewe uluulun önümwäl mi ässääw, öüpwe pwal ataatakisietiw ar kewe faaw mi pin iir ra fel ngeniir. 25Öüpwe chök fel ngeniei ngang ewe SAMOL ämi we Kot. Are öüpwe föri ei, iwe, ngang üpwe efeiöchüw kemi pwe epwe chómmóng enemi mwöngö me ünümemi kólik. Iwe, ngang üpwe angealó samwaw seni leiimi. 26Iwe, esap wor emön me leiin ekkewe fefin epwe turuló seni nöün ika riit me lón fönüemi. Ngang üpwe fang ngeni kemi unusen öüküükün langattamen ränin manawemi.
27“Lupwen öüpwe maun ngeni chón opwutemi kana, ngang üpwe tiinaló nuokkusi epwe akkomwoló mwemi. Ngang üpwe älisi kemi pwe öüpwe okkufu chón opwutemi kana meinisin. Ngang üpwe föri pwe chón opwutemi kana meinisin repwe rüükö o sü me mwemi. 28Ngang üpwe tiinaló ekkewe achi mwemi pwe repwe tapweeló ekkewe chón Hiv, chón Kanaan me chón Hit. 29Nge ngang üsap tapweereló lón ew chök ier, pwokiten ewe fönü ina epwe wiliti ew fönüapö o ekkewe maan mwacho ina repwe koon chómmóngóló ngeni kemi ämi öüpwe nemeniir. 30Ngang üpwe tapweereló me mwemi ekis me ekis tori ämi öüpwe chómmóngóló pwe öüpwe amasowaló ewe fönü.
31“Iwe, ngang üpwe öükü kiän fönüemi seni ewe Setipar tori ewe Matawen Filistia, pwal seni ewe fönüpöön mi nóm öör tori ewe Chaanpwuupwu Eufreitis. Ngang üpwe älisi kemi pwe öüpwe okkufu ekkewe aramas iir mi nónnóm lón ewe fönü iei. Iwe, öüpwe ösüüroló me mwemi. 32Öüsap ääni ew pwonen etipeew ngeniir ika ngeni ar kewe kot. 33Öüsap mwüüt ngeniir pwe repwe nónnóm leiimi lón fönüemi. Pün are öüpwe mwüüt ngeniir; iwe ina repwe elimengawa kemi ren ar tipisin fel ngeni uluulun önümwäl o popuw pwe öüpwe tipis ngeniei. Iwe, ena epwe fókkun efeiengaw ngeni kemi.”
Chón Israel ra etiwa än Kot we pwon
24 Mwirin, ewe SAMOL a öüröüra Moses o apasa ngeni, “Kopwe feittä reei ikeei, nge kopwe mwineto Aaron, Nadab me Abihu pwal fiik souakkomwen Israel. Iir meinisin repwe chök nóm toowaw o fel ngeniei. 2En chök, Moses epwe mwüümwütä ngenuk pwe kopwe feitto arap ngeniei ngang ewe SAMOL. Nge ekkewe ekkóch resap fókkun arapoto. Iwe, kopwe chechchemeni pwe esap fókkun mwüümwütä ngeni emön me leiin ekkewe aramas epwe feittä wón ewe chuuk.”
3Iwe, lupwen Moses a feilló o esile ngeni ekkewe aramas meinisin ekkewe öüröür me öllük ewe SAMOL a äiti ngeni, iir ra chieppökütä o pölüweni, “Äm aipwe föri ekkewe mettóch meinisin ewe SAMOL a üreni keem pwe aipwe föri.” 4Mwirin, Moses a tümwünöchüw le makkeetiw än ewe SAMOL kewe kapasen öüröür meinisin.
Iwe, lesossorusichin ewe rän mwirin, Moses a pwäätä o senätä ew róngen asór lepopun ewe chuuk. A pwal öüüetä engol me rüöföw üren faaw pwellin ünükkün ewe róngen asór, äkkäeföw fäniten ew me ew ekkewe engol me ruu einangen Israel. 5Mwirin, Moses a tiinaló ekkóch ölüöl seni leiin ekkewe chón Israel o ra ääni ekkewe asóren keek me ekkóch liäliffön ätemwänin kowu pwe asóren kinamwe ngeni ewe SAMOL. 6Iwe, Moses a angei esópwun ewe chcha seni ekkewe mönün asór o niinalong lón ekkóch sepi, nge esópwun ewe chcha, a äsupwu ngeni ewe róngen asór. 7Mwirin a angei ewe Pwuken Pwon o älleani ngeni ekkewe aramas. Iwe, ekkewe aramas meinisin ra pwal pölüweni o apasa, “Äm aipwe föri ekkewe mettóch meinisin ewe SAMOL a öllük. Äm aipwe älleasochisi.”
8Mwirin, Moses a angei ewe chcha lón ewe sepi o äsupwätä wón ekkewe aramas o apasa, “Ei chcha iei önükünükün ewe pwon ewe SAMOL a föri ngeni kemi pwe lóngólóngun an ngeni kemi ekkeei öllük.
9Mwirin, Moses, Aaron, Nadab me Abihu pwal ekkewe fiik souakkomwen Israel ra feittä wón ewe chuuk. 10Iwe, ra küna ewe Koten Israel me ikenan. Fän pachapachan a chök usun och peekiekin ewe faaw öüchche mi saramaram itan sapfaer o arawaraw usun fän läng ren kuruffatan. 11Iwe, inamwo are ekkewe souakkomwen Israel ra küna Kot, nge i esap efeiengawer. Nge fen enletin, ra mwöngö fengen o wün me fän mesen Kot.
12Iwe, ewe SAMOL a apasa ngeni Moses, “Kopwe feittä reei wón ei chuuk. Kopwe nóm wón ei chuuk lupwen ngang üpwe ngenuk ekkewe faaw mi chöpööp ngang üwa fen makkeetä wór äi kewe kapasen öüröür me ekkewe öllük. Mwirin, en kopwe öüröüra ekkewe aramas seni lón ekkewe öllük me öüröür.”
13Ina minne, Moses me Joshua ewe kisitoon fan, ra feittä wón ewe chukun Kot. 14Nge Moses a üreni ekkewe souakkomw, “Öüpwe chök nóm ikeei o witi keem ikeei tori äm aipwe liwinsäfälito reemi. Are a wor än emön osukosuk lupwen ngang üwa feilló, öüpwe chuuri Aaron me Hur mi nóm reemi ikeei.”
15Mwirin, Moses a feittä wón ewe chuuk, nge ewe kuchu a pwölüwóló ewe chuuk. 16Iwe, lingen ewe SAMOL a nóm wón ewe Chuuk Sinai, nge ewe kuchu a pwölüwóló ewe chuuk lón üküükün wonu rän. Iwe, lón ewe efisuen rän, ewe SAMOL a kökkööri Moses seni lón ewe kuchu. 17Ekkewe chón Israel mi nóm lepopun ewe chuuk ra küna och mettóch mi fókkun amwaraar. Ra küna lingen ewe SAMOL mi amwaraar me wón ungen ewe chuuk a usun chök och ekkei mi ngetenget. 18Mwirin, Moses a mwónolong lón ewe kuchu lupwen an a feittä toowawetä wón ewe chuuk. Iwe, a nóm wón ewe chuuk lón üküükün fääik rän me fääik pwiin.
Ekkewe asór fäniten ewe Imwenfel
25 Iwe, ewe SAMOL a apasa ngeni Moses, 2“Kopwe üreni ekkewe chón Israel pwe iteiten emön me emön mi mochen, a tongeni epwe uwato reei ew asór. 3Iei tettelin ekkewe mettóch en ka tongeni etiwa pwe repwe uwato fänitei: kolt, silifer me piraas, 4suwain mi arawaraw, forkeet me parapar, mangaku mi pwechepwech, ünöünen kuuch fäniten mangaku, 5ünüchchen ätemwänin siip mi appwas o kötü lón tuumwu mi par me ünüchchen kuuch mi mwirinnö, mwüüch seni ewe irä akasia, 6apüra seni föün olif fäniten anöönön ekkewe laamp, angas mi pwokkus fäniten ewe löön kepit mi mis pwal fäniten ewe asóren ötüöt mi pwokkus, 7ewe faaw öüchche itan oniks me pwal ekkewe ekkóch faaw öüchche repwe kamasolong lón leenier wón ewe wääwup üfen souasór mi foutout me ewe chechchen leewup.
8“Mwirin, kopwe üreni ekkewe aramasen Israel pwe ngang üwa mochen pwe repwe öüüwetä fänitei ew leeni mi pin ia ngang üpwe tongeni imweimw ie leiir. 9Kopwe fókkun föri ei imw mangaku mi pin me pisekin lón meinisin nge repwe chök wesewesen wewe fengen me ekkewe köük ngang üpwe pwääri ngenuk.
Akkóót fäniten ewe Pwórofel
10“Kopwe üreniir pwe repwe föri ew pwóór seni mwüchün ewe irä akasia. Üküükün langattaman epwe ruu esóp mwalü, chölapan epwe ew esóp mwalü, nge tekian epwe ew esóp mwalü. 11Kopwe finiti lón me lükün ewe pwóór ngeni kolt, kopwe pwal föri och repenin pwellin ünükkün wón seni kolt. 12Iwe, kopwe ouluulu fóffóch ring seni kolt fäniten ewe pwóór o apacheretä wón lepwokukun kewe me rüwänü. Rüofóch ring repwe nóm wón ewe epeek nge rüofóch ring repwe nóm wón pwal ewe epeek. 13Mwirin, kopwe föri ämmwär seni mwüchün ewe irä akasia o finitiir ngeni kolt. 14Iwe, kopwe söökalóng ekkewe ämmwär lón ekkewe ring mi nóm leepekin ewe pwóór me rüepeek pwe repwe aea le ekii ewe pwóór. 15Ekkeei ämmwär resap fókkun katoowu seni lón ekkewe ring. Öüpwe chök likitiireló pwe repwe nómwofóchóló lón ekkewe ring. 16Lupwen ewe Pwórofel epwe wes, mwirin, kopwe isenalong lón ekkewe faaw mi chööpöp mi makketiw wón kapasen ewe pwon ngang üpwe ngenuk.
17“Mwirin, kopwe pwal föri ew pwölüpwölün ewe Pwórofel seni kolt - iei ewe leeni ia a fis ie omwosomwusen tipis. Üküükün langattamen ei pwölüpwöl epwe ruu esóp mwalü, nge cholapan epwe ew esóp mwalü. 18Mwirin, kopwe föri uluulun rüömön kerobim seni kolt mi nechenech o kopwe anómwuur wón leesópwun pwölüpwölün ewe pwórofel me rüósóp. 19Kopwe anómwu emön me emön kerob wón ew me ew leesópwun ewe pwölüpwöl. Kopwe föri ekkewe kerobim nge repwe chök förunus fengen me ewe pwölüpwöl. 20Ekkewe kerobim repwe säpefengen o nennetiw wón ewe pwölüpwöl, nge repwe emeresawu pöükkäsiir kewe pwe repwe öchchülói ngeni wón ewe pwölüpwöl. 21Kopwe eleenialong lón ewe Pwórofel ekkewe faaw mi chööpöp mi makketiw wóór kapasen ewe pwon ngang üpwe ngenuk. Mwirin, kopwe uwätä ewe pwölüpwöl wón ewe pwórofel. 22Iwe, ngang üpwe chuuruk o kapas ngenuk seni asen ewe pwölüpwöl lefiilen ekkewe rüömön kerobim mi nóm asen ewe Pwórun Pwon. Seni ikenan, ngang üpwe ngenuk äi kewe öllük meinisin fäniten ekkewe aramasen Israel.
Akkóót fäniten ewe Cheepel
23“Mwirin, kopwe pwal föri ew cheepel seni mwüchün ewe irä akasia. Üküükün langattaman epwe ruu mwalü, chölapan epwe emwalü, nge tekian epwe ew esóp mwalü. 24Kopwe finiti ewe cheepel ngeni kolt mi mwirinnö o föri och repenin pwellin ünükkün me wón seni kolt. 25Kopwe pwal föri och aamen pwellin ünükkün wón ewe cheepel, epwe üküükün eang chölapan, nge kopwe awora och repenin seni kolt. 26Iwe, kopwe föri fófóch ring seni kolt fäniten ewe cheepel o apacheretä ngeni pwokuukun ewe cheepel me rüwänü, ia pecheen kewe fófóch ra nóm ie, 27arap ngeni aamen pwellin wón ewe cheepel. Ekkeei ring repwe ömwöchü ekkewe ämmwär repwe aea le mwäreei ewe cheepel. 28Kopwe föri ekkeei ämmwär seni mwüchün ewe irä akasia o finitiir ngeni kolt. Iwe, ewe cheepel epwe keki wón ekkeei ämmwär. 29Kopwe föri ekkóch peleich me sepi seni kolt mi mwirinnö pwal ekkewe leenien üfüüf kólik me pwool fäniten ämi öüpwe aea le niini ekkewe asóren wün. 30Iwe, kopwe isettä ewe pilawan esissilen äi nónnóm wón ei cheepel pwe epwe nóm fän mesei iteiten fansoun meinisin.
Akkóót fäniten ewe Leenien Etittin
31“Kopwe pwal föri ew leenien etittin seni kolt mi mwirinnö. Unusen ewe leenien etittin me ekkewe ofouten wón repwe chök necheunus fengen - ewe wäänifótun, ewe waasan, ekkewe kap me laam usun uluulun pöön irä, ekkewe uluulun möür me pöön irä mi mmas. 32Epwe wor wonofóch keangen ewe leenien etittin repwe itiwu seni leepekin ewe waasan. Ülüfóch repwe nóm epeek, nge ülüfóch repwe nóm wón pwal ewe epeek. 33Efóch me efóch ekkewe wónofóch keang mi itiwu seni waasen ewe leenien etittin epwe sapaatä ew kap epwe usun uluulun pöön irän ewe irä itan almond fiti fengen me uluulun möür me pöön irän mi mmas. 34Nge wón ewe waasen leenien etittin epwe ofout ngeni rüwänü kap repwe usun uluulun pöön irän almond fiti uluulun möürün me pöön irän mi mmas. 35Ew uluulun pöön irä epwe nóm fän ewe äewin peean keang mi itiwu seni ewe waasen leenien etittin, ewe oruuwen uluulun pöön irä epwe nóm fän ewe oruuwen peean keang, ewe öülüngätin uluulun pöön irä epwe nóm fän ewe öülüngätin peean keang - ekkewe keang meinisin repwe ku wonofóch. 36Ekkewe uluulun möür me ekkewe keang repwe chök förunus fengen me waasen ewe leenien etittin, repwe nechenech seni kolt mi mwirinnö.
37“Mwirin, kopwe föri fisu laamp fäniten ewe leenien etittin pwe repwe asarama ewe leeni mi nóm mwan. 38Ekkewe fichin wiiken laamp me ekkewe opwong fäniten leenien moochen ekkei repwe för seni kolt mi mwirinnö. 39Kopwe ääni üküükün ew talent (ika fiik me limu paun) kolt mi mwirinnö le föri ewe leenien etittin me pisekin kewe meinisin. 40Kopwe tümwünüfichi pwe kopwe föri ekkeei mettóch meinisin nge repwe chök fiti ewe köük ngang üwa pwääri ngenuk me wón ei chuuk.”
Akkóót fäniten ewe Imwenfel mi för seni mangaku
26“Iwe, kopwe pwal föri ewe Imwenfel mangaku seni engol peekin mangaku mi för seni töör mi pwechepwech o mwirinnö. Ekkeei peekin mangaku repwe ofout ngeni suwain mi arawaraw, forkeet me parapar, nge emön mi mesenipöüfich epwe chüürätä wór liossun kerobim. 2Echö me echö ekkewe peekin mangaku epwe üküükün rüüwe me waluw mwalü langattaman, nge chöölapan epwe rüwänü mwalü. Iir me engol ekkewe peekin mangaku repwe chök löllöfengen langattamer me chöölaper. 3Kopwe ochufengeni limu peekin mangaku lón ew chooch, mwirin, kopwe pwal ochufengeni ekkewe pwal limu peekin lón oruuwen chooch. 4Iwe, kopwe förütä pweken mi arawaraw wón leesópwun ewe ömwüchchülón peekin mangaku lón ew me ew chooch. 5Kopwe föri lime pweken wón leesópwun ewe ew chochchen peekin mangaku pwe repwe chök löllö fengen me ekkewe lime pweken wón leesópwun ewe pwal epeek choochen mangaku pwe repwe tongeni päräpäröch fengen le emeitiwetä. 6Mwirin, kopwe föri lime ökkük seni kolt pwe kopwe aea le ökküküfengeni ekkewe pweken wón ekkewe ruu choochen peekin mangaku, pün ewe Imwenfel mangaku epwe chök chööwfengen.
7“Kopwe pwal föri ekkóch peekin mangaku mi chou seni ünöünen kuuch pwe pwölüpwölütiwen ewe Imwenfel mangaku. Epwe wor üküükün engol me echö ekkeei peekin mangaku seni ünöünen kuuch. 8Echö me echö ekkewe engol me echö peekin mangaku epwe üküükün iliik mwalü langattaman, nge chöölapan epwe rüwänü mwalü. Meinisin ekkeei engol me echö peekin mangaku repwe chök löllö fengen langattamer me chöölaper. 9Kopwe ochufengeni limachö ekkewe peekin mangaku lón ew chooch, nge kopwe pwal ochufengeni ekkewe wonachö lón pwal ew chooch. Nge kopwe lumäätä ewe awonachön peekin mangaku lón ewe oruuwen chooch wón ewe elimachön pwe epwe ku rüwepeek me fän mesen ewe imw mangaku mi pin. 10Kopwe förätä lime pweken wón leesópwun ewe ömwüchchülón peekin mangaku lón ew me ew chooch. 11Mwirin, kopwe föri lime ökkük seni piraas o ökküküfengenir me ekkeei lime pweken. Ren ei lapalap, ekkewe ruu choochen peekin mangaku repwe chufengen o wiliti ew chök imw mangaku mi chööwfengen. 12Nge langattamen ewe pwölüpwöl epwe tamaló seni langattamen ewe imw mangaku wón üküükün esóp peekin mangaku pwe epwe sapwilitiw me lükün sökürün ewe Imwenfel mangaku. 13Iwe, ekkewe pwölüpwölütiwen ewe Imwenfel mangaku repwe tamaló seni lepeekin me rüwepeek wón ew mwalü. Iwe, ewe üküükün mi tamaló seni leepekin ewe Imwenfel mangaku epwe sapwilitiw o pwölüw lepeekin kewe. 14Kopwe pwal föri och sässärin pwölüpwöl seni ünüchchen ätemwänin siip mi kötü lón tuumwu mi par. Iwe, kopwe anómwu ei pwölüpwöl asen ekkewe ekkóch pwölüüpwöl. Kopwe föri pwal echö pwölüpwöl seni ünüchchen kuuch o anómwu asen ei echö. Iei unusen pwölüpwölütiwen wón ewe Imwenfel mangaku.
15“Kopwe föri papen inisin ewe Imwenfel mangaku seni mwüchün ewe irä akasia. Ekkeei paap repwe üwenewenetä. 16Echö me echö ekkewe paap epwe üküükün engol mwalü langattaman, nge chööchön epwe esóp mwalü. 17Iwe, epwe wor ruu oupwun efóch me efóch ekkewe paap pwe repwe tongeni kamas fengen. Kopwe föri papen ewe Imwenfel mangaku meinisin lón ei chök sókkun lapalap. 18Kopwe föri rüwee paap fäniten papen peliöörün ewe Imwenfel mangaku. 19Mwirin, kopwe föri fääik wäänifót seni silifer pwe repwe kamasolong fän ekkewe paap. Epwe wor ruu wäänifót fän echö me echö paap - ew wäänifót epwe kamasolong fän ew oup. 20Kopwe pwal föri rüwee paap fäniten papen peliefengin ewe Imwenfel mangaku, 21fiti fengen me pwal fääik wäänifótur seni silifer - ruu wäänifót fän echö me echö paap. 22Iwe, kopwe föri wonachö paap fäniten pelilotowun ewe Imwenfel mangaku. 23Iwe, kopwe pwal alapaló le föri rüwachö paap fäniten ew me ew kewe pwokuuku. 24Ekkeei paap lón ekkeei pwokuuku repwe kochu fengen me fan nge repwe kömwöch fengen me asan ren efóch chök ring. Iir me ruu ekkeei pwokuuku repwe för lón ei chök sókkun lapalap. 25Ina minne, epwe wor walüchö paap wón ena leesópwun ewe Imwenfel mangaku repwe lóngótä wón engol me wonu wäänifót mi för seni silifer - okkoruu wäänifót fän echö me echö paap.
26“Kopwe pwal föri ekkóch ääpenges seni mwüchün ewe irä akasia. Epwe wor limefóch ääpenges repwe itipenges wón papen peliefengin ewe Imwenfel mangaku, 27pwal limefóch ääpengesin wón papen peliöörün. Kopwe pwal föri limefóch ääpenges fäniten ääpengesin wón papen lükün sökürün ewe Imwenfel mangaku, iei ewe esóp mi säpe ngeni pelilotow. 28Ewe ääpengesin lukalap epwe itipenges lukalapen ekkewe paap seni esóp ewe Imwenfel mangaku tori ewe pwal esóp. 29Kopwe finiti ekkewe paap ngeni kolt o föri ring wór pwe repwe ömwöchü ekkewe ääpenges mi itipengesiló. Kopwe pwal finiti ekkewe ääpenges ngeni kolt.
30“Kopwe öüwetä ewe Imwenfel mangaku nge kopwe chök fiti ewe akkóót ngang üwa pwääri ngenuk me wón ewe chuuk.
31“Iwe, kopwe föri echö cheech seni töör mi pwechepwech o mwrinnö pwe epwe ittiwetä o pesengesiló lón ewe Imwenfel mangaku. Nge emön mi mesenipöüfich epwe chüüri wón ei cheech liossun kerobim nge epwe aea suwain mi arawaraw, forkeet me parapar. 32Kopwe asapatä ei chechchen lón ren ekkóch ökkük mi fótolong wón fófóch üür repwe för seni mwüchün ewe irä akasia o repwe finifin ngeni kolt. Ekkewe üür repwe üütä wón rüwänü wäänifót mi för seni silifer. 33Iwe, mwirin óm kopwe eitiwätä ewe cheech wón ekkewe ökkük, kopwe eleenialong ewe Pwórofel mi nóm ewe pisekin Pwärätä lón, peekilongen ewe cheech. Ewe cheech epwe refiieló ewe Leeni mi Pin seni ewe Leeni mi Unusen Pin. 34Mwirin, kopwe isenätä pwölüpwölün ewe Pwórofel we - iei ewe leenien omwusomwusen tipis - wón ewe Pwórun Pwon mi nóm lón ewe Leeni mi Unusen Pin. 35Iwe, kopwe eleenia ewe cheepel me ewe leenien etittin lón ewe ruumw peekiwun ewe cheech. Ewe leenien etittin epwe nóm peliöörün lón ewe ruumw, nge ewe cheepel epwe nóm peliefeng.
36“Kopwe föri pwal echö cheech seni töör mi pwechepwech o mwirinnö fäniten ewe leenien tolong lón ewe imw mangaku mi pin. Emön chón chü epwe chüüri ekkóch lios wón ei cheech nge epwe aea suwain mi arawaraw, forkeet me parapar. 37Iwe, kopwe eittiwätä ei cheech wón ekkóch ökkük mi fótolong wón limefóch üür mi för seni mwüchün ewe irä akasia. Iwe, kopwe finiti ekkewe üür ngeni kolt. Ekkewe üür repwe üütä wón limu wäänifót mi för seni piraas.
Akkóót fäniten ewe róngen asóren keek
27“Mwirin, kopwe föri ew róóng nge kopwe aea mwüchün ewe irä akasia. Epwe chök löllöpök üküükün langattaman me chöölapan, pün langattaman epwe limu mwalü, chöölapan epwe limu mwalü. Nge üküükün tekian epwe ülüngät mwalü. 2Iwe, kopwe pwal föri äkkäefóch mächä usun mächään maan wón ew me ew kewe rüwänü pwokuukun ewe róóng. Ekkewe mächä usun mächään maan me ewe róngen asór repwe chök förunus fengen. Iwe, kopwe finiti ewe róóng me mächään kewe ngeni piraas. 3Kopwe pwal föri ekkewe pwekit fäniten ar repwe aea le tukeeló falangen ewe róngen asór, ekkewe söföl, ekkewe pwool repwe aea le äsupwu ewe chcha, ekkewe äächipwen fituk me ekkewe leenien ekkei. Kopwe föriir meinisin seni piraas. 4Kopwe föri och póó mi fichepwangapwang fäniten ewe róngen asór, nge epwe för seni piraas. Iwe, kopwe pwal föri äkkäefóch ring seni piraas wón ew me ew kewe rüwänü pwokuukun ewe póó. 5Iwe, kopwe amasätiw ewe póó pwe epwe lóngótä wón ewe repen fäätiwen nesópwun fän aamen lón ewe róngen asór. 6Kopwe föri ekkóch ämmwär seni mwüchün ewe irä akasia fäniten kekiin ewe róóng. Iwe, kopwe finiti ekkewe ämmwär ngeni piraas. 7Ekkewe ämmwär repwe siikilong lón ekkewe ring mi nóm leepekin ewe róóng me rüwepeek lupwen repwe ämmwära. 8Kopwe föri ewe róóng seni paap nge epwe wor pöön lón. Kopwe piipifichi pwe kopwe föri ei róóng usun chök minne üwa äiti ngenuk me wón ewe chuuk.
Akkóótun ewe leeni mi tittiló pwellin ünükkün ewe Imwenfel mangaku
9“Mwirin, kopwe föri tittin ewe leeni pwellin ünükkün ewe Imwenfel mangaku. Üküükün langattamen ewe tiit me peliöör epwe ipwükü mwalü, nge epwe wor kaatenin mi för seni töör mi pwechepwech o mwirinnö. 10Ekkewe kaaten repwe kasapatätä wón rüwe üür repwe för seni piraas, nge ekkewe üür repwe kólóngótä wón rüwe wäänifót repwe pwal för seni piraas. Ekkewe kaaten repwe ökkükütä wón ekkewe wóók repwe för seni silifer ren ekkóch ökkük repwe pwal för seni silifer. Iwe, ekkewe wóók repwe ökkükütä lefiilen ekkewe üür. 11Iwe, epwe pwal ina chök usun ewe tiit me peliefengin lükün ewe Imwenfel mangaku, pün epwe pwal wor kaatenin ewe tiit, epwe pwal üküükün ipwükü mwalü langattaman. Ekkewe kaaten repwe kasapatä wón rüwe üür, nge ekkewe üür repwe kólóngótä wón wäänifótur repwe för seni piraas. Epwe pwal wor ekkewe ökkük me wóók repwe för seni silifer.
12“Kaatenin ewe tiit leesópwun ewe leeni ünükkün ewe Imwenfel mangaku me pelilotow epwe lime mwalü chöölapan. Ewe kaaten epwe kasapatä wón engol üür, nge ekkewe üür repwe kólóngótä wón engol wäänifót. 13Kaatenin ewe tiit me peliöötiw, sässäpengeni töötän akkar, epwe pwal üküükün lime mwalü. 14Ewe leeni mi tittiló ren ewe leenien tolong epwe nóm leesópwun me peliöötiw, nge epwe tittiló ren rüwachö kaaten. Ewe kaaten wón ewe peliifich epwe üküükün engol me limu mwalü langattaman. Epwe kasapatä wón ülüfóch üür, nge ekkewe üür repwe kólóngótä wón ülüngät wäänifót. 15Ewe kaaten wón ewe peliimööng epwe pwal üküükün engol me limu mwalü langattaman, epwe kasapatä wón pwal ülüfóch üür, nge ekkewe üür repwe kólóngótä wón ülüngät wäänifót.
16“Kopwe föri echö kaaten fäniten ewe leenien tolong ngeni ewe leeni mi tittiló pwellin ünükkün ewe Imwenfel mangaku. Langattamen ewe kaaten, epwe üküükün rüwe mwalü. Kopwe föri ei kaaten seni töör mi pwechepwech o mwirinnö, nge epwe chchü wón ren suwain mi arawaraw, forkeet me parapar. Ei kaaten epwe kasapatä wón fófóch üür, nge ekkeei üür repwe kólóngótä wón rüwänü wäänifót. 17Ekkewe üür meinisin pwellin ünükkün ewe leeni lükün ewe Imwenfel mangaku repwe äteete fengen ren ekkewe wóók mi för seni silifer, nge öüpwe aea ekkewe ökkük repwe för seni silifer. Ekkewe üür repwe kólóngótä wón ekkewe wäänifót repwe för seni piraas. 18Iwe, langattamen unusen ewe leeni mi pwellieló ewe Imwenfel mangaku epwe üküükün ipwükü mwalü, nge chöölapan epwe üküükün lime mwalü. Nge kaatenin tittin ei leeni repwe för seni töör mi pwechepwech o mwirinnö, tekian epwe üküükün limu mwalü. Ekkewe wäänifót mi lóngunätä üren ewe tiit repwe för seni piraas. 19Meinisin ekkewe pisek öüpwe aea le föri angangen ewe Imwenfel mangaku, pwal pacholong ekkewe pwurowók meinisin fäniten ewe Imwenfel mangaku me fäniten chechchen tittin ewe leeni pwellin ünükkün, repwe för seni piraas.
Anöönön ewe leenien etittin
20“Kopwe öllük ngeni ekkewe aramasen Israel pwe repwe uwato reemw apüra mi unguung seni föün olif o kuruffat fäniten ekkewe laamp wón ewe leenien etittin pwe repwe chök sópwósópwóló le tittin. 21Ei leenien etittin epwe nóm peekiwun ewe cheech mi refieló ewe Leeni mi Unusen Pin me lón ewe Imwenfel mangaku. Aaron me nöün kewe mwän repwe tümwünü pwe ekkewe laamp repwe chök tittin me mwen mesen ewe SAMOL lerän me lepwin. Iei ew öllük epwe nómfóchófóch fäniten ekkewe aramasen Israel pwe repwe öpwönüwetä lón ekkewe tettelin pilóón aramas me mwirin.
Üfen ekkewe souasór
28 “Kopwe köörato reemw Aaron pwiimw we fiti fengen me nöün kewe mwän iter Nadab, Abihu, Eleazar me Ithamar pwe repwe äimwüreló seni leiin ekkewe chón Israel. Pün iir repwe neii souasór repwe angang ngeniei. 2Iwe, kopwe föri ekkóch üüf fäniten Aaron pwiimw we pwe repwe pwääraló pwe i a käimwüló fäniten Kot. Ekkeei üüf mi fókkun ling repwe ngeni i lingen tekian an angang me iteüöchün. 3Ngang üwa fen fang ngeni ekkóch mwän mi mesenipöüfich le angang ar tipächchem lón ekkewe sókkun mettóch iir ra föri. Kopwe üreni ätekeei pwe repwe föri ekkewe üüf fäniten Aaron. Ekkeei üüf repwe pwääraló pwe Aaron a käimwüló pwe i epwe angang ngeniei lón ewe wiisen souasór. 4Ikkeei ekkewe üüf ekkewe mwän repwe föri: echö chechchen fänimwär, echö wääwup üfen souasór mi foutout, echö litinimwär mi arawaraw o chchü, echö pinu üföüfen lón mi ttür o pwechepwech pwal langattam, ew äfäichimw me echö önükün lukalap. Repwe pwal föri ekkóch üüf fäniten nöün Aaron kewe mwän pwe repwe üföüf lupwen repwe föri ar angangen souasór me fän mesei. 5Ekkeei pisek repwe för seni töör mi pwechepwech o mwirinnö, repwe chchü ren terech kolt me suwain mi arawaraw, forkeet me parapar.
Angangen förün ewe wääup üfen souasór mi ling itan efod
6“Repwe föri ewe wääwup üfen souasór mi foutout seni töör mi pwechepwech o mwirinnö, nge emön mi mesenipöüfich epwe chüüri wón ren tereech kolt me suwain mi arawaraw, forkeet me parapar. 7Epwe wor ruu peekin ei üüf, epeek fän mesan me epeek lükünsökürün. Iwe, repwe kochu fengen me wón afaran ren rüófóch afföün wón afaran. 8Iwe, ewe önükün lukalap epwe ttür seni ekkewe chök pwal sókkun pisek ewe wääwupp üfen souasór mi foutout a för seni - epwe för seni töör mi pwechepwech o mwirinnö, epwe pwal chchü ren tereech kolt me suwain mi arawaraw, forkeet me parapar.
9“Mwirin, kopwe angei rüöföw ewe sókkun faaw öüchche itan oniks o ruputi wór iten nöün Israel kewe mwän. 10Wonu iit repwe makketä wón ewe eföw faaw öüchche, nge ekkewe pwal wonu iit repwe makketä wón pwal ewe eföü. 11Kopwe ruputi iten nöün Israel kewe mwän wón ekkewe rüöföü faaw nge epwe usun chök än emön chón pöküpök faaw oüchche ruputi och impwang. Mwirin, kopwe amasalong ekkewe faaw lón leenien ömmwöchür kewe repwe för seni kolt. 12Iwe, kopwe föötätä ekkewe rüwöföw faaw öüchche wón ekkewe afföün wón afaren ewe wääwup üfen souasór mi foutout pwe repwe föün ächchem fäniten ekkewe aramasen Israel. Aaron epwe mwäreei ekkeei iit wón afaran me fän mesen ewe SAMOL pwe ew pisekin ächchem. 13Kopwe föri ekkewe leenien ömmwöch mi foutout seni kolt, 14me rüöfóch sein mi fires seni kolt mi mwirinnö, epwe usun efóch sääl. Iwe kopwe fööti ekkewe sääl ngeni ekkewe leenien ömmwöch mi nóm wón afaren ewe wääup üfen souasór.
Angangen förün ewe chechchen fänimmwär
15“Mwirin, kopwe pwal föri echö chechchen fänimmwär fäniten ewe angangen kütta letipen Kot. Ei chechchen fänimmwär epwe fäniten ewe souasór mi lap. Emön mi fókkun mesenipöüfich epwe turuni. Kopwe aea ekkewe pisek usun chök ewe wääwup üfen souasór mi foutout: Epwe för seni töör mi pwechepwech o mwirinnö, nge epwe chüü ngeni tereech mi för seni kolt me suwain mi arawaraw, forkeet me parapar. 16Ei chechchen fänimmwär epwe för seni och mangaku epwe lumfengen pwe epwe ku rüwepeek pwe epwe usun lapalapen ew pwotow. Epwe chök löllöpök langattaman me chöölapan, pün epwe eang langattaman pwal eang chöölapan. 17Mwirin, kopwe apachatä rüwänü telin faaw öüchche wón ei chechchen fänimmwär. Wón ewe äewin tettel, epwe wor eföü ruby, eföü topaz me eföü beril. 18Wón ewe oruuwen tettel, epwe wor eföü türkois, eföü sapfaer me eföü emerald. 19Wón ewe öülüngätin tettel, epwe wor eföü iasint, eföü äkät me eföü ämethist. 20Wón ewe örüwänüen tettel, epwe wor eföü krisolait, eföü óniks me eföü chasper. Kopwe fótukalong ekkeei faaw öüchche meinisin lón ekkewe leenien ömmwöch repwe för seni kolt. 21Epwe wor engol me rüwöföü faaw. Eföw me eföü faaw epwe tupwuni ew me ew ekkewe engol me ruu einangen Israel. Iwe, iten ew me ew kewe einang epwe ruputä wón eföü me eföü kewe faaw pwe epwe usun chök nge och impwang.
22“Kopwe föri ekkóch sääl mi fires seni kolt mi mwirinnö pwe kopwe aea le riietä ewe chechchen fänimmwär ngeni ewe wääup üfen souasór. 23Mwirin, kopwe föri rüófóch ring seni kolt o apacheretä ngeni ekkewe ruu pwokuukun ewe chechchen fänimmwär me asan. 24Iwe, ekkewe rüófóch sääl mi för seni kolt repwe ketikilong lón ekkewe ring mi nóm lepwokuukun ewe chechchen fänimmwär. 25Iwe, leesópwun ekkewe rüófóch sääl repwe fööfö ngeni ekkewe ruu leenien ömmwöch mi för seni kolt mi nóm wón ekkewe afföün wón afaren ewe wääwup üfen souasór mi foutout me fän mesan. 26Mwirin, kopwe föri pwal rüófóch ring seni kolt o apacheeretä ngeni ekkewe ruu lepwokuukun lón ewe chechchen fänimmwär me fan, sooso ngeni ewe wääwup üfen souasór mi foutout. 27Iwe, kopwe föri pwal rüófóch ring o apacheeretä ngeni ewe wääwup üfen souasór arap ngeni ewe önükün lukalap. 28Mwirin, kopwe fööti ekkewe ringen ewe chechchen fänimmwär me fan ngeni ekkewe ring wón ewe wääwup üfen souasór ren efóch sääl mi arawaraw pwe epwe ömwöchü ewe chechchen fänimmwär ngeni ewe wääup üfen souasór me asen ewe önük mi foutout.
29“Ren ei lapalap, Aaron epwe mwäreei iten ekkewe einangen Israel wón ewe chechchen fänimmwär asen ngasangasan lupwen epwe tolong fän mesen ewe SAMOL lón ewe Leeni mi Pin. Epwe iei usun an epwe chök sópwósópwóló le ächema ngeni ewe SAMOL nöün kewe aramas. 30Iwe, kopwe isenalong ewe Urim me ewe Thummim lón pwotowun ewe chechchen fänimmwär pwe Aaron epwe mwäreer asen ngasangasan iteiten fansoun lupwen epwe tolong fän mesen ewe SAMOL. Iei usun, Aaron epwe mwäreei ekkewe pisek epwe aea le filätä letipen ewe SAMOL fäniten nöün kewe aramas iteiten fansoun lupwen epwe tolong fän mesen ewe SAMOL.
Pwal ekkóch üfen ekkewe souasór
31“Iwe, kopwe föri ewe litinimwär mi arawaraw o ekis langattam pwe epwe nóm fän ewe wääwup üfen souasór mi foutout. Unusen ei litinimwär epwe för seni mangaku mi arawaraw. 32Nge lukalapen ewe üüf mi langattam epwe för leawan fäniten än Aaron epwe atolonga möküran me ie. Iwe, pwellin ünükkün leawen ei üüf, epwe wor memin usun kalaan pwe esap kamw. 33Iwe, kopwe förätä ekkóch uluulun föün irä mi kukkumos itan pómekränet repwe pwelli lepwulun ewe litinimwär mi arawaraw o ekis langattam, nge repwe föri seni suwain mi arawaraw, forkeet me parapar. Epwe pwal wor peel repwe för seni kolt repwe nóm lefiilen ekkewe uluulun föün pómekränet. 34Iwe, ekkewe peel mi för seni kolt me ekkewe uluulun föün irä mi kukkumos itan pómekränet repwe tikipat wón unusen pwellin lepwülün ewe litinimwär mi arawaraw o ekis langattam. 35Aaron epwe üföüf ei üüf iteiten fansoun lupwen epwe tolong lón ewe Leeni mi Pin pwe epwe föri an angang ngeni ewe SAMOL. Iwe ekkewe peel repwe lech lupwen i epwe tolong pwal lupwen epwe toowu seni fän mesen ewe SAMOL. Esap mäló are epwe üföüf ei üüf.
36“Mwirin, kopwe föri och ofout seni kolt mi mwirinnö o chööpöp. Iwe, kopwe ruputi ei kapas wón, nge epwe usun rupun och impwang: A KÄIMWÜLÓ PÜN A PIN FÄNITEN EWE SAMOL. 37Kopwe föötätä ei ofout kolt mi chööpöp wón letenmesen imwen Aaron we äfäichimw ren efóch sääl mi arawaraaw. 38Epwe nóm wón letenmesen Aaron, pün epwe iei usun än Aaron epwe mwäreei ekkewe pwuupwungaw are mi wor och mettóch mi mwääl ren ekkewe asór mi pin ekkewe chón Israel repwe ngeni Kot. Aaron epwe chök anómwufóchei ewe kolt mi chööpöp wón letenmesan pwe ewe SAMOL epwe etiwa ekkewe aramas.
39“Kopwe türüni üfen Aaron we pinu ewe üföüfen lón mi pwechepwech o langattam seni töör mi pwechepwech o mwirinnö. Kopwe pwal föri ewe äfäichimw seni pwal töör mi pwechepwech o mwirinnö. Kopwe pwal föri fänitan efóch ökkönük, nge epwe chchü. 40Mwirin, kopwe föri ekkewe pinu üföüfen lón mi pwechepwech o langattam me ekkewe ökkönük me ekkewe äfäichimw fäniten nöün Aaron kewe mwän, pwe ekkeei pisek repwe ngeniir lingen tekian wiseer me suufölüür. 41Kopwe öüföüfätä ngeni Aaron pwiimw we me nöün kewe mwän ekkeei üüf. Mwirin, kopwe epitir o epinireló. Kopwe äimwüroló pwe iir repwe pin pün repwe tongeni angang ngeniei pwe repwe neii souasór.
42“Iwe, kopwe pwal föri rausesin lón mi pwechepwech fäniter pwe epwe pwölüweló seleelón inisiir. Ekkana rauses repwe pwölüweló seni lukalaper tori winikaföör. 43Aaron me nöün kewe mwän repwe üföüf ekkeei üüf iteiten fansoun lupwen repwe tolong lón ewe Imwenfel Mangaku Leenien Chufengen pwal lupwen repwe pwäälong ren ewe róngen asór lón ewe Leeni mi Pin pwe repwe föri ar angang. Epwe iei usun pwe resap atoto tipis wór o mäló.
“Ei epwe ew öllük epwe nónnóm fóchófóch fäniten Aaron me mwirimwirin kana.
Epinipinilón ekkewe souasór
29 “Iwe, iei meet kopwe föri fäniten óm kopwe epinaló Aaron me nöün kewe mwän pwe repwe angang ngeniei pwe iir repwe souasór: Kopwe angei emön liäliffön ätemwänin kowu me rüömön ätemwänin siip esap wor terir. 2Mwirin, kopwe aea pilawa mi amas seni föün wiit mi mwirinnö esap wor iis lón o föri rüwofóch pilawa me keik mi tolafengen me apüra seni föün olif me pisikit mi niinitä apüra wóór. 3Iwe, kopwe isenalong ekkeei sakkopaaten pilawa lón ew chök chüük o uweiireló ren ewe leenien tolong mwen ewe Imwenfel Mangaku fiti ewe ätemwänin kowu me ekkewe rüömön ätemwänin siip. 4Iwe, kopwe emmwenato Aaron me nöün kewe mwän ren ewe leenien tolong ngeni ewe Imwenfel Mangaku o atüütür ren kólik. 5Mwirin, kopwe öüföüfa ngeni Aaron üfan we pinu üföüfen lón mi pwechepwech o langattam, fiti ewe litinimwär mi arawaraw o ekis langattam epwe nóm fän ewe wääup. Kopwe pwal öüföüfa ngeni ewe wääup iei ewe üfen souasór mi foutout me ewe chechchen fänimmwär. Mwirin, kopwe föötätä lukalapen Aaron ewe ökkönük mi lingeöch türün. 6Iwe, kopwe isenätä ewe äfäichimw wón möküran o riietä ewe mwärämwär mi pin mi för seni kolt wón ewe äfäichimw. 7Iwe, kopwe angei ewe löön kepit mi mis o niinätiw wón möküren Aaron. 8Mwirin, kopwe emmwenato nöün Aaron kewe mwän o öüföüfa ngeniir üfeer kewe pinu üföüfen lón mi pwechepwech o langattam, 9o isenätä ekkewe äfäichimw wón mökürer. Mwirin, kopwe riietä ekkewe ökkönük wóór. Iwe, iir repwe wiiseni ewe wisen souasór tori feilfeilló chök.
“Kopwe epinaló Aaron me nöün kewe mwän lón ei lapalap.
10“Mwirin, kopwe uweato ewe liäliffön ätemwänin kowu ren ewe leenien tolong mwen ewe Imw Mangaku Leenien Chufengen. Iwe, Aaron me nöün kewe mwän repwe isenätä pöüür wón möküran. 11Mwirin, en kopwe niieló ewe liäliffön ätemwänin kowu me fän mesen ewe SAMOL me lón ewe leenien tolong ngeni ewe Imw Mangaku Leenien Chufengen. 12Iwe, kopwe angei och chaan ewe ätemwänin kowu o aea ächefen pöum le tóófätä ewe chcha wón ekkewe mächään ewe róngen asór mi kenitä usun mächään maan. Nge kopwe niinätiw lussun ewe chcha ren wäänifóten ewe róngen asór. 13Iwe, kopwe angei ekkewe kiriis meinisin mi pwölüweló ekkewe affan, pwal ewe emiemin ömmünün me ekkewe rüwöföü faileewa fiti ekkewe kirisin wóór o keniireló wón ewe róngen asór. 14Mwirin, kopwe angei inisin ewe ätemwänin kowu fiti fengen me ünüchchan me affan o uweiirewu lükün ewe leeni ia aramas ra öüüwetä imweer imw mangaku ie. Iwe, kopwe keniireló pwe epwe ew asóren tipis.
15“Mwirin, Aaron me nöün kewe mwän repwe isenätä pöüür wón möküren emön me leiin ekkewe ätemwänin siip, 16lupwen epwe ninniiló. Mwirin, kopwe ossupwu ewe chcha o äsupwätä wón lepelien ewe róngen asór meinisin. 17Mwirin, kopwe kinikisietiw ewe ätemwänin siip lón fitu kinikin. Iwe, kopwe tölü ekkewe masowen lón me pecheen kewe. Iwe, kopwe anómwur ren ewe möküran me ekkewe pwal ekkóch kinikinin ewe inis. 18Mwirin, kopwe keniireló wón ewe róngen asór. Iei ew asóren keek ngeni ewe SAMOL epwe apwapwai letipan.
19“Kopwe angei ewe pwal emön ätemwänin siip; iwe, Aaron me nöün kewe mwän repwe pwal isenätä pöüür wón möküran, 20lupwen epwe ninniiló. Mwirin, kopwe angei och ewe chcha o tóófi ngeni wón emin peliefichin selingen Aaron me nöün kewe mwän. Kopwe pwal tóófätä wón öütülapen pöüifichiir me wón öütülapen peliifichin pachapacheer. Mwirin, kopwe äsupwätä lussun ewe chcha wón lepelien ewe róngen asór meinisin. 21Mwirin, kopwe angei och ewe chcha seni wón ewe róngen asór o nofiti fengeni me och ewe löön kepit mi mis. Iwe, kopwe äsupwätä wón Aaron me nöün kewe mwän pwal wón üfer kewe. Aaron me nöün kewe mwän me üfeer kewe repwe käimwüló pwe ra pin meren ewe SAMOL lón ei lapalap.
22“Pwokiten iei i ewe ätemwänin siip fäniten epinipinilón Aaron me nöün kewe mwän, iei minne, kopwe angei kirissin ei ätemwänin siip, fiti fengen me ewe ükün mi kiriis me ewe kiriis mi finitaló ekkewe affan. Kopwe pwal angei ewe emiemin ömmünün, ekkewe rüöföü faileewa me kirissin wóór, me ewe peliifichin aföön. 23Mwirin, kopwe angei efóch pilawa ese wor iis lón seni ewe chüük mi nóm fän mesen ewe SAMOL, pwal och keik mi tolafengen me apüra me och pisikit. 24Iwe, kopwe isenalong ekeei mettóch meinisin lepöün Aaron me nöün kewe mwän pwe repwe sapeeretä me fän mesen ewe SAMOL pün iei och liffang ngeni ewe SAMOL. 25Mwirin, kopwe angei ekkewe pilawa seni lepöüür o kenireló wón ewe róngen asór fiti ewe asóren keek, pwe epwe ew asór mi pwoöch me fän mesen ewe SAMOL. Iei ew asóren mwöngö ngeni ewe SAMOL. 26Mwirin, kopwe angei leupwen ewe ätemwänin siip fäniten ewe fansoun än Aaron epwe angei an epinipin. Iwe, kopwe sapaatä me fän mesen ewe SAMOL pwe epwe ew liffang ngeni. Iwe, kopwe isenätiw fänitom pwe iei inetum.
27“Kopwe äimwüoló ekkeei kinikin mi pin seni ewe ätemwänin siip fäniten ewe fansoun epinipin pün ikkana wiisen Aaron me nöün kewe mwän. Ikkeei ekkewe kinikin: ewe leupwan me ewe aföön ra fen sapatä fän mesen ewe SAMOL lón ewe fansoun ar epinipin. 28Lón ekkewe fansoun repwe feitto, iteiten fansoun lupwen ekkewe aramasen Israel repwe ääni ekkewe asóren kinamwe ika ekkewe asóren kilisou ngeni ewe SAMOL, ekkeei kinikin repwe ikkeei inetin Aaron me mwirimwirin kana.
29“Üfen Aaron kewe mi pin repwe iseiseló fäniten mwirimwirin kana repwe siwili i lón ewe wiis me mwirin, pün repwe tongeni kepit o epinipiniló lón ekkeei üüf. 30Iö epwe tapweto le wiiseni ewe wiisen souasór mwirin Aaron epwe üföüf ekkeei üüf lón üküükün fisu rän me mwen an epwe popuetä le föri an angang lón ewe Imwenfel Mangaku me ewe Leeni mi Pin.
31“Kopwe angei ewe ätemwänin siip fäniten ewe fansoun epinipin o kukuuw fitukan me lón ew leeni mi pin. 32Iwe, Aaron me nöün kewe mwän repwe ocheei fituken ewe ätemwänin siip fiti fengen me ewe pilawa mi nóm lón ewe chüük me lón ewe leenien tolong ngeni ewe Imwenfel Mangaku Leenien Chufengen. 33Iir chök repwe tongeni ocheei ewe fituk o mwöngö ewe pilawa ra aea fäniten omwusomwusen ar tipis lón ewe fansoun ra epinipiniló me me käimwüló. Nge ekkewe aramas resap tongeni ochooch ewe fituk me mwöngö ewe pilawa, pün ekkeei mettóch ra käimwüló o pin. 34Nge are epwe wor och lussun fituken ewe ätemwänin siip ika och lussun ewe pilawa fäniten ewe fansoun epinipin repwe nóm tori lesossor, epwe chök keekiló. Esap wor emön epwe äni, pün a pin.
35“Epwe iei usun óm kopwe epinaló Aaron me nöün kewe mwän ngeni wiiser kewe. Kopwe föri ewe fansoun epinipin fäniter lón üküükün fisu rän. 36Ew me ew rän, kopwe ääni asór emön liäliffön ätemwänin kowu pwe ew asór fäniten omwusomwusen tipis. Mwirin, kopwe pwal ääni ew asór pwe kopwe limeti ewe róngen asór. Kopwe limeti ewe róngen asór ren óm kopwe föri omwusomwusen tipis fänitan. Iwe, kopwe epinaló ewe róngen asór ren óm kopwe epiti ngeni löömis. 37Kopwe föri omwusomwusen tipis fäniten ewe róngen asór iteiten rän lón üküükün fisu rän o epinaló. Mwirin ena, ewe rongen asór epwe fókkun pin. Iwe, ese lifilifil meet epwe attapa ei róóng epwe pwal piniló.
38“Iwe, iei meet kopwe ääni asór wón ewe róngen asór: Iteiten rän, kopwe ääni asór rüömön laam ew ieriir. 39Kopwe ääni asór emön lesossor nge kopwe ääni asór ewe pwal emön lekkuniólupwin. 40Lupwen kopwe ääni asór ewe äemönün laam, kopwe pwal ääni asór ew naengolun ew efa ika ruu kuóóch pilawa mi amas o mwirinnö, epwe tolafengen me ew narüwänüen ew hin ika ew kuóóche apüra epwe för seni föün olif mi unguung. Kopwe pwal ääni asór ew narüwänüen ew hin ika ew kuóóche wain pwe epwe ew asóren wün. 41Lekkuniól, kopwe ääni asór ewe pwal emön laam fiti chök pwal ekkewe asór pilawa me wain usun ka ääni asór lesossor, pwe epwe ew asór mi pwoöch ngeni ewe SAMOL, ew asóren mwöngö ngeni ewe SAMOL.
42“Ei epwe ew asóren keek epwe fis iteiten rän seni ew tettelin pilóón aramas tori pwal ew. Öüpwe ääni ei asór me fän mesen ewe SAMOL me lón ewe leenien tolong ngeni ewe Imwenfel Mangaku ia ngang üpwe chuuruk me ie o kapas ngenuk. Ngang üpwe chuuri kemi o kapas ngeni kemi me ikenan. 43Ngang üpwe pwal chuuri ekkewe chón Israel me ikenan, iwe, ewe Imwenfel Mangaku epwe piniló ren äi ling.
44“Iei usun äi üpwe föri pwe ewe Imw Mangakü Leenien Chufengen me ewe róngen asór repwe fókkun pin. Pwal iei usun äi üpwe äimwüweló Aaron me nöün kewe mwän pwe repwe pin, pwe iir repwe angang ngeniei pwe repwe neii souasór. 45Mwirin, ngang üpwe imweimw leiin ekkewe aramasen Israel pwe ngang üpwe ar Kot. 46Iwe, iir repwe silei pwe ngang ewe SAMOL ar Kot. Ngang ewe emön mi emmwenirewu seni Egypt pwe ngang üpwe tongeni imweimw leiir. Ngang ewe SAMOL ar Kot.
Akkóót fäniten ewe róngen asóren ötüöt
30“Mwirin, kopwe föri ew kükkün róóng seni mwüchün ewe irä akasia pwe ewe asóren ötüöt epwe keek wón. 2Ei róóng epwe chök löllöpök langattaman me chöölapan. Pün langattaman epwe üküükün emwalü, chöölapan epwe pwal emwalü, nge tekian epwe ruu mwalü. Epwe wor mächään ei róóng usun mächään maan repwe kenitä seni asen lepwokuukun kewe. Repwe chök pwal för seni mwüchün ewe irä akasia, nge repwe förunus fengen me ewe róóng. 3Kopwe finiti wón ewe róóng pwal lepeekin meinisin me ekkewe mächään usun mächään maan ren kolt mi mwirinnö. Iwe, kopwe pwal föri och repen seni kolt o anwómwu wón unusen pwellin ewe róóng. 4Kopwe pwal föri fófóch ring fäniten ewe róóng o apacheeretä sootiwen chök ewe repen - rüwófóch epeek ewe róóng pwal rüwófóch epeek - pwe leenien kömwöchün ekkewe ämmwär repwe aea le mwäreei. 5Iwe, kopwe föri ekkewe ämmwär seni mwüchün ewe irä akasia o finitiir ngeni kolt. 6Mwirin, kopwe anómwu ewe róóng winiitiwun ewe refiref managku lón ewe Imwenfel Mangaku pwe epwe nom äwenewenen ewe Pwórofel mi nóm ewe pisekin Pwärätä lón - mwen ewe pwölüpwölün omwusomwusen tipis mi nóm wón ewe Pwórun pwon. Iwe, ngang üpwe chuuruk me ikenan.
7“Iteiten lesossor, lupwen Aaron epwe amollätä le limeti wikken ekkewe laamp, epwe fókkun keni ewe asóren ötüöt mi pwokkus wón ewe róóng. 8Nge pwal iteiten lekkuniól lupwen epwe chekii ekkewe laamp, epwe fókkun kenisefäli ewe asóren ötüöt mi pwokkus pwe epwe chök kükkü me fän mesen ewe SAMOL. Iei meet repwe föri seni ew tettelin pilóón aramas tori pwal ew. 9Iwe, öüsap ääni och asóren ötüöt esap pin wón ei róóng, ika och asóren keek, ika och asóren föün wiit ika och asóren wün. 10Fän ew lón ew ier, Aaron epwe limeti ewe róóng ren an epwe tóófätä wón mächään ewe róóng kewe mi kenitä usun mächään maan ewe chcha seni ewe mönün asór a ääni asór fäniten omwusomwusen tipis. Ei epwe ew asór epwe fis iteiten ier seni ew tettelin pilóón aramas tori pwal ew, pün iei än ewe SAMOL we róóng mi fókkun pin.”
Mooni fäniten ewe imw mangaku mi pin
11Mwirin, ewe SAMOL a apasa ngeni Moses, 12“Iteiten fansoun lupwen kopwe älleani iteiten ekkewe aramasen Israel ren óm kopwe silei ika a ifa iteiteer, emön me emön mwän epwe fókkun möönätiw ekkesiwilin möön manawan ngeni ewe SAMOL lón ewe ótun i a ällea. Mwirin, esap wor och mätter epwe fis leiin ekkewe aramas lupwen kopwe älleaniir. 13Iei üküükün meet emön me emön mwän mi ällea epwe möönätiw ngeni ewe SAMOL: esóp shekel ika ew nalimuen ew auns silifer, alóngólóng wón ewe öüküük repwe aea lón ewe imw mi pin. Üküükün choun ew shekel, ruwe kera, iei och öüküükün mi kukkun. Ei esóp shekel epwe ew asór ngeni ewe SAMOL. 14Iteiten emön me emön mwän a tori ruwe ierin ika lap seni epwe fókkun ngeni ewe SAMOL ei asór. 15Lupwen öüpwe ngeni ewe SAMOL ei asór pwe öüpwe föri omwusomwusen tipis fänitemi, ekkewe mi pisekisek resap püngütiw lap seni üküükün esóp shekel nge ekkewe mi wöwingaw resap püngütiw kis seni. 16Iwe, kopwe angei ewe moonien omwusomwusen tipis seni ekkewe chón Israel o kopwe nöünöü fäniten tümwünün ewe Imwenfel Mangaku Leenien Chufengen. Ei mooni epwe och minen ächchechem fäniten än ewe SAMOL epwe chechchemeni kemi ämi ekkewe chón Israel pwe öüwa föri omwusomwusen tipis fäniten manawemi.”
Akkóót fäniten ewe üülong leenien limelim
17Mwirin, ewe SAMOL a apasa ngeni Moses, 18“Kopwe föri ew üülong mi wätte seni piraas nge epwe wor ew uchangan seni piraas fäniten ewe angangen limelim. Iwe, kopwe anómwu ei üülong lefiilen ewe Imwenfel Mangaku Leenien Chufengen me ewe róngen asóren keek. Mwirin, kopwe alöölölong kólik lón. 19Iwe, Aaron me nöün kewe mwän repwe tölü pöüür me pachapacheer ikenan, 20iteiten fansoun me mwen ar repwe tolong lón ewe Imwenfel Mangaku Leenien Chufengen pwe repwe pwääto fän mesen ewe SAMOL pwal mwen ar repwe kkan ngeni ewe róngen asór pwe repwe keni ekkewe asór ngeni ewe SAMOL. Pün repwe fókkun limelim iteiten fansoun me mwen ar repwe föri ar angang. Pün are resap limelim, iwe, repwe mäló. 21Ei epwe ew öllük epwe nóm fóchófóch fäniten Aaron me mwirimwirin kana pwe repwe öpwönüwetä seni ew tettelin pilóón aramas tori pwal ew.”
Ewe löön kepit mi mis
22Mwirin, ewe SAMOL a pwal apasa ngeni Moses, 23“Kopwe kütta ekkeei angas mi fókkun pwokkus. Iwe, kopwe angei engol me ruu esóp paun appach mi pwokus itan mör mi löölö, wonu ew narüwänü paun sinemen mi pwokkus, wonu ew narüwänü paun äsäät mi pwokkus, 24pwal engol me ruu esóp paun akasia me ew kalon apüra mi för seni föün olif. Kopwe aea ewe öüküük ra aea lón ewe imw mi pin fäniten óm kopwe öükü üküükün ekkei mettóch. 25Mwirin, kopwe nofitifengeni ekkeei nofit pwe kopwe föri och löömmis mi pin fäniten kepit, och löömis mi pwokkus usun förien emön chón för lööpwokkus. 26Kopwe aea ei lömmis mi pwokkus le epiti ewe Imwenfel Mangaku Leenien Chufengen me ewe Pwórun pwon mi nóm ewe pisekin Pwärätä lón. 27Kopwe pwal aea ei lömmis le epiti ewe cheepel fiti pisekisekin kewe meinisin me ewe leenien etittin fiti pisekisekin kewe, pwal ewe róngen asóren ötüöt, 28me ewe róngen asóren keek fiti pisekisekin kewe meinisin me ewe üülong fiti uchangan we. 29Kopwe epinireló pwe repwe fókkun pin. Mwirin ei, ese lifilifil ika meet epwe attaper, epwe piniló.
30“Kopwe pwal aea ei löömis le epiti Aaron me nöün kewe mwän o epinireló pwe repwe tongeni angang fän mesei pwe iir repwe souasór. 31Kopwe apasa ngeni ekkewe chón Israel pwe ei löön kepit mi mis a pin. Ei lömmis mi pin epwe chök fänitei. 32Öüsap fókkun aea ei lömmis le epiti ngeni inisin emön aramas. Iwe, öüsap pwal föri och lömmis fänitemi epwe wewe fengen chök köükün förün me ei. Ei lömmis a pin. Iwe, öüpwe awora suufölün pwe mi pin. 33Ese lifilifil ika iö a föri och löö mi usun chök pwonnen ei löö ika epiti ngeni emön aramas ei löö nge esap i emön souasór, epwe katoowu seni leiin ewe mwiichen aramas.”
Angas fäniten ewe asóren ötüöt
34Ikkeei än ewe SAMOL kapasen öüröür ngeni Moses fänäsengesin ewe asóren ötüöt. A apasa: “Ikkeei iten ekkewe minen angas kopwe angei o nofiti fengeniir: appach mi ssür, onika, kalpanum me appach mi pwokkus. Kopwe förfichi pwe epwe chök wewe fengen üküükün chour. 35Iwe, kopwe nofiti fengeni ekkeei minen angas mi pwokkus pwe kopwe föri och minen asóren ötüöt mi pwokkus. Kopwe föri ei asóren ötüöt mi pwokkus pwe epwe usun chök förien emön chón för löö pwokkus. Kopwe nofiti ei minen asóren ötüöt ngeni salt pwe epwe limöch o pin. 36Kopwe fööira ekkóch ekkewe minen angas pwe epwe mworomwor. Iwe, kopwe anómwu mwen ewe Pwórun pwon ia ngang üpwe chuuruk me ie me lón ewe Imwenfel Mangaku Leenien Chufengen. Ei angas minen asóren ötüöt epwe fókkun pin meremi. 37Öüsap föri ei angas minen asóren ötüöt pwisin fänitemi. Ei angas minen asóren ötüöt epwe chök fäniten ewe SAMOL. Iwe, öüpwe awora suufölün pwe mi pin. 38Emön aramas mi föri och usun ei angas minen asóren ötüöt pwe a saani pwokkusun epwe katoowu seni leiin ewe mwiichen aramas.”
Ekkewe chón silelap angangen wón paaw: Bezalel me Oholiab
31Iwe, ewe SAMOL a pwal apasa ngeni Moses, 2“Kopwe nengeni pün ngang üwa fen filätä Bezalel nöün Uri we mwän, nge Uri i nöün Hur, seni ewe einangen Judah. 3Üwa fen ouraló ätei ren ewe Ngünün Kot pwal ren an epwe mesenipöüfich, an epwe tüfich me an epwe silelap lón sókkun angangen wón paaw meinisin, 4pwe epwe tongeni alapalapa le ripwei ekkana sókkun pisek mi ling seni kolt, silifer me piraas, 5epwe pwal mesenipöüfich le lechei ekkana faaw öüchche o amaserelong lón leenier, epwe pwal sile angangen falei irä me föri sókkun angangen wón paaw meinisin. 6Iwe, üwa pwal filätä Oholiab nöün Ahisamak we mwän seni ewe einangen Dan pwe epwe älisi ütei. Üwa pwal fang ngeni ekkewe mi mesenipöüfich meinisin ar repwe supwusupöch le angang pwe repwe föri ekkewe mettóch meinisin ngang üwa öllük ngenuk: 7Ewe Imw Mangaku Leenien Chufengen, ewe pwórofel epwe nóm ewe pisekin Pwärätä lón, fiti fengen me ewe pwölüpwölün omwusomwusen tipis mi nóm wón me pwal ekkewe ekkóch pisekin lón ewe imw mangaku meinisin - 8ewe cheepel fiti ekkewe pisekisekin wón, ewe leenien etittin epwe för seni kolt mi mwirinnö me ekkewe pisekin ataween wón meinisin, ewe róngen asóren ötüöt, 9ewe róngen asóren keek fiti ekkewe pisekin angangen wón meinisin, ewe üülong fiti fengen me uchangan - 10pwal ekkewe üüf mi ttür, ikkeei ekkewe üüf mi pin fäniten Aaron ewe souasór me ekkewe üüf fäniten nöün kewe mwän lupwen repwe föri ar angang pwe iir repwe souasór, 11me ewe löön kepit mi mis me ewe angas minen ewe asóren ötüöt fäniten ewe Leeni mi Pin. Ätekeei repwe föri ekkei mettóch usun chök minne üwa öllük ngenuk.”
Kapasen öüröür fäniten ewe Sabbat
12Mwirin, ewe SAMOL a apasa ngeni Moses, 13“En kopwe üreni ekkewe chón Israel, ‘Ämi öüpwe fókkun tümwünü le öpwönüetä pwüngün äi kewe ränin Sabbat. Ei epwe ew esissil lefiilei me ämi lón ekkewe tettelin pilóón aramas repwe feitto, pwe öüpwe silei pwe ngang ewe SAMOL mi föri kemi pwe öüpwe pin.
14“ ‘Ewer, öüpwe föri pwüngün ewe ränin Sabbat, pwokiten ei rän a pin. Emön mi atai pinin ei rän epwe ninniiló. Ese lifilifil ika iö a föri och angang lón ena rän epwe fókkun katoowu seni leiin aramasan. 15Lón üküükün wonu rän öüpwe föri ämi angang, nge ewe efisuen rän epwe iei ew ränin Sabbat ränin asöösö. Pwokiten ewe SAMOL a öüchcheani ei rän pwe epwe ew rän mi pin, iei minne, ese lifilifil ika iö a föri och angang lón ewe ränin Sabbat epwe fókkun ninniiló. 16Iei minne, ekkewe chón Israel repwe föri pwüngün ewe ränin Sabbat, repwe efisi ächechcheman lón ekkewe tettelin pilóón aramas me mwirin pwe iei ew pwon esap mwüchchüló. 17Ei ränin Sabbat epwe ew esissil lefiilei me ekkewe chón Israel tori feilfeilló chök. Pün lón wonu rän ngang ewe SAMOL üwa föri läng me fönüfan. Nge lón ewe efisuen rän, ngang üwa köüüló seni äi angang o asöösö.’ ”
18Iwe, lupwen ewe SAMOL a wes le kapas ngeni Moses me wón ewe Chuuk Sinai, a ngeni i ekkewe rüöpeek faaw mi chööpöp a makketiw wón ekkewe kapasen Pwärätä mi mak ren ächefen pöün Kot.
Ewe uluulun liäliffön kowu mi för seni kolt
32 Iwe, lupwen ekkewe aramas ra küna pwe Moses a mang le feittiw seni wón ewe chuuk, ra mwicheto ren Aaron o apasa ngeni, “Kole etto, kopwe föri fänitach ekkóch kot repwe tongeni emmweni kich. Pün ren ewe aramas Moses, ewe mi emmwenikichewu seni Egypt, sisap silei ika meet a fis ngeni i.”
2Iwe, Aaron a pölüweniir o apasa, “Öüpwe ettätiw ekkewe ieriing kolt mi nóm wón selingen pwülüwemi kewe me nöümi kewe mwän me nöümi kewe föpwül,iwe, öüpwe uweireto reei.” 3Iei minne, ekkewe aramas meinisin ra älleasochis ngeni Aaron o ra ettätiw ekkewe riing kolt mi nóm wón selingeer o ra uweireto ren. 4Mwirin, Aaron a angei ewe kolt ekkewe aramas ra eiti ngeni, a eteli o föri och uluulun emön önümwäl nge a ouluulu ren och pisekin angang lón lapalapen emön liäliffön kowu. Mwirin, ekkewe aramas ra apasa, “O Israel, ikkeiir óm kewe kot mi emmwenukowu seni Egypt!”
5Iwe, lupwen Aaron a küna usun mwasangasangen ekkewe aramas ren ei föfför, a senätä ew róngen asór me mwen ewe uluulun liäliffön kowu o a kökkö le esile ngeni ekkewe aramas, “Lesor epwe wor ew chuulap ngeni ewe SAMOL.” 6Iei minne, lón ewe rän mwirin, ekkewe aramas ra mwittir pwäätä pwe repwe ääni asóren keek me asóren kinamwe. Mwirin ei, ra móttiw pwe repwe efisi ar apwapwa ren ar mwöngö o wün. Iwe, ra üütä pwe repwe le ässelükaló le föri mochenin letiper ren pwapwa mi ngaw.
7Mwirin, ewe SAMOL a apasa ngeni Moses, “Kopwe mwittir feittiw seni won ei chuuk, pwokiten noum kewe aramas ka emmwenirewu seni Egypt ina ra fen föri och minne repwe pwisin enniopwut ren. 8Ra fen mwittir le kul seni ewe manaw ngang üwa öllük ngeniir pwe repwe manaweni. Ra föri fäniter och uluulun önümwäl seni kolt mi ketel o ouluulu lón lapalapen emön liäliffön kowu. Ra fen fel ngeni ei uluulun o asór ngeni. Iwe, ra apasa, ‘Ikkeiir óm kewe kot, O Israel, mi emmwenukowu seni Egypt.’ ”
9Mwirin, ewe SAMOL a pwal apasa ngeni Moses, “Ngang üwa küna usun ekkeei aramas pwe iir aramas mi üleförea me tipepöchökkül. 10Iwe, iei kopwe likitieiló pwe äi soong epwe ngeteriir pün ngang üpwe le arosereló meinisin. Mwirin, üpwap föri senuk ew mwichen aramas mi lapalaap.”
11Nge Moses a tuttungór maaw ümöümöchün ewe SAMOL an we Kot o apasa, “Äi SAMOL, pwata óm soong epwe kenaló noum kewe aramas, en ka emmwenirewu seni Egypt ren manaman mi chapwür me pöüm mi manaman? 12Pwata ekkewe chón Egypt repwe apasa, ‘Kot a chök otupwur le emmweniireto wón ekkeei chuuk pwe epwe niireló o arosereló seni wón fönüfan’? Kopwe kul seni óm lingeringer. Kopwe siwili óm ekiek usun ei feiengaw mi wätte en ka ekiekin efeiengawa ngeni noum kewe aramas. 13Kopwe chechchemeni óm we pwon ngeni noum kewe chón angang Abraham, Isaak me Israel. En ka äänuk ökköpöl pwisin en ngeniir o apasa, ‘Ngang üpwe föri pwe mwirimwirimi kewe repwe fókkun chómmóng usun ekkewe füün läng. Ewer, ngang üpwe pwal ngeni mwirimwirimi kana meinisin unusen ei fönü ngang üwa pwon ngeniir. Iwe, epwe fönüer tori feilfeilló chök.’ ” 14Iei minne, ewe SAMOL a siwili an ekiek. Iwe, esap awarato wón nöün kewe aramas ewe feiengaw i a ekiekin efeiengawa ngeniir.
15Mwirin, Moses a kul o feittiw me wón ewe chuuk nge a uweei lón pöün ekkewe rüöpeek faaw mi chööpöp mi nóm ekkewe kapasen Pwärätä wón. A rup wón ekkewe faaw me rüöpeek, fän mesan me lükünüppan. 16Ekkewe faaw mi chööpöp förien Kot. Ekkewe kapas mi mak wóór pwisin makkeien Kot.
17Iwe, lupwen Joshua a rongorong ökürangen ekkewe aramas ar ra pwupwuchöör me peekitiwer, a apasa ngeni Moses, “Usun itä ngiingin a wor ökürangen maun lón ewe leenien asóósó.”
18Nge Moses a pölüweni:
“Apwi. Ei ökürang esap ngiingin ökürangen wiil, esap pwal ngiingin ökürangen luus. Ei ökürang ngang üwa rong, ngiingin ökürangen apwapwa.”
19Iwe, lupwen Moses a kkan ngeni ewe leenien asóósó, a küna ewe uluulun liäliffön kowu me än ekkewe aramas ra pwöppwörük. Iwe, lón an lingeringer, a móneetiw seni lón pöün ekkewe faaw mi chööpöp o ra mökkükisitiw me lepopun ewe chuuk. 20Mwirin, a angei ewe uluulun liäliffön kowu ra föri o a eteli lón ewe ekkei. Iwe, lupwen ewe kolt a pataló, a wüsi tori an a chök mworomwor. Iwe, a nofiti ngeni kólik o öünü ngeni ekkewe chón Israel.
21Mwirin ei, Moses a kul ngeni Aaron o apasa, “Meta ekkeei aramas ra föri ngenuk? Pwata ka emmwenirelong lón ei sókkun tipis mi lapalaap?”
22Nge Aaron a pölüweni o apasa, “Äi samol, kosap soong. En ka pwisin silei usun än ekkeei aramas ra mwittir ngeni le föri mi ngaw. 23Ra apasa ngeniei, ‘Kopwe föri fänitem ekkóch kot pwe repwe emmweni keem. Pün ren ewe aramas Moses, ewe mi emmwenikichewu seni Egypt, äm aisap silei meet a fis ngeni i.’ 24Ina minne ngang üwa üreniir, ‘Ese lifilifil ika iö mi wor ren och fout mi för seni kolt epwe ettätiw.’ Lupwen ra uweato reei ekkewe kolt, ngang üwa otururolong lón ewe ekkei. Iwe, a fis ei uluulun liäliffön kowu!”
25Moses a küna pwe ekkewe aramas resap chüen póssetiw pün Aaron a mwüüt ngeniir pwe resap chüen feiään fengen meet ra föri, iei minne ra uren ässääw meren ekkewe chón opwuter. 26Iei minne, Moses a chök üütäló lón ewe leenien tolong ngeni ewe leeni ia ra asóósó ie o kökkö, “Iö mi nóm wón peekin ewe SAMOL epwe feitto reei.” Iwe, meinisin chón ewe einangen Levi ra mwiicheto ren.
27Mwirin, Moses a apasa ngeniir, “Iei meet ewe SAMOL, ewe Koten Israel, a apasa: ‘Emön me emön mwän epwe riietä nöün ketilas wón wäänüükün. Öüpwe ekkeliwin le fätälfeil leemelen ei leeni ia sia asóósó ie seni esóp tori pwal ewe esóp. Emön me emön epwe niieló pwiin me chiechian me chón arun.’ ” 28Iwe, ekkewe chón ewe einangen Levi ra föri usun minne Moses a öllük. Iwe, lón ena ränin, ina epwe üküükün ülüngät ngöröw aramas ra mäló. 29Mwirin, Moses a üreni ekkewe chón ewe einangen Levi, “Ikenäi, ämi öüwa käimwüló fäniten ei angang än ewe SAMOL, pün ämi öüwa älleasochis ngeni, inamwo ika öüwa pwisin niieló nöümi kewe mwän me pwiimi kewe. Iwe, pwokiten ei, iei i epwe fang ngeni kemi ew feiöch mi lapalaap.”
30Iwe, lón ewe rän mwirin, Moses a apasa ngeni ekkewe aramas, “Ämi öüwa föri ew tipis mi lapalaap. Nge iei ngang üpwe liwinsäfälitä ren ewe SAMOL wón ewe chuuk. Eli ngang üpwe tongeni föri omwusomwusen tipis fäniten ämi tipis.”
31Iei minne, Moses a liwinsefäliló ren ewe SAMOL o apasa, “Feiengawei, pün ekkeei aramas ra föri ew tipis mi fókkun ingaw! Ra föri pwisin fäniter ekkóch kot seni kolt. 32Nge iei, kose mochen kopwe omwusaló ar tipis. Nge ika kosap omwusaló ar tipis, mwirin, kopwe tölawu itei seni lón ewe pwuk en ka fen makkei.”
33Iwe, ewe SAMOL a pölüweni Moses o apasa, “Iteiten iö mi tipis ngeniei, ngang üpwe tölawu itan seni lón neii we pwuk. 34Iei kopwe feilló, kopwe emmwenaló ekkewe aramas ngeni ewe leeni ngang üwa fen kapas ngenuk usun, nge neii we chón läng epwe akkomw mwomw o emmwenuk. Nge lupwen epwe tori fansoun pwe üpwe öpwüngü ekkewe aramas fäniten ar tipis, üpwe fókkun öpwüngür.”
35Iwe, ewe SAMOL a awarato och feiengaw wón ekkewe aramas ren och määlap pwokiten ar fel ngeni ewe uluulun liäliffön kowu Aaron a föri.
33Mwirin, ewe SAMOL a apasa ngeni Moses, “Kopwe feilló seni ei leeni, en me ekkewe aramas ka emmwenirewu seni Egypt. Öüpwe feittä ngeni ewe fönü ngang üwa pwon fän ökköpöl ngeni Abraham, Isaak me Jakob o apasa, ‘Ngang üpwe ngeni mwirimwirimi kana ei fönü.’ 2Ngang üpwe tiinaló emön chón läng pwe epwe akkomw mwom pwe epwe tapweewu ekkewe chón Kanaan, chón Amor, Chón Hit, chón Periz, chón Hiv me chón Jebus. 3Kopwe feittä ngeni ewe fönü ia a pwuupwu ie milik me chönün chunen. Nge ngang üsap fitikemi le sääi, pün üte arosakemiiló, pwokiten ämi ew mwiichen aramas mi üleförea.
4Iwe, lupwen ekkewe aramas ra rong ekkeei kapas mi äweires, ra poputä le kechiw. Iwe, esap wor emön aramas a pacheetä foutan. 5Pün ewe SAMOL a apasa ngeni Moses, “Kopwe üreni ekkewe chón Israel, ‘Ämi ew mwiichen aramas mi üleförea. Are ngang üpwe fiti kemi lón ew chök fansoun mwochomwoch, ngang üpwe arosakemiiló. Iei öüpwe ettätiw lioutemi me foutemi kana tori ngang üpwe filätä meet üpwe föri ngeni kemi.’ ” 6Iei minne, ekkewe chón Israel ra ettätiw liouter kewe seni ewe fansoun ra feilló seni ewe Chuuk Horeb.
7Iwe, iei meet Moses a soun föri. A angei ew imw mangaku o öüwetä ekis toowaw seni lükün ewe leeni ia rekan asóósó ie. Iei ewe imw mangaku a eita ngeni pwe “imw mangaku ewe leenien chufengen.” Emön mi mochen epwe chuuri ewe SAMOL a feilló ngeni ewe imw mangaku leenien chufengen mi nóm lükün ewe leeni ia rekan asóósó ie. 8Iwe, iteiten fansoun lupwen Moses epwe feilliwu ren ewe imw mangaku, ekkewe aramas meinisin ra üütäsinir o üütäló leasamen imwer kewe imw mangaku. Iwe, ra chök nennengeni Moses tori an a mwónolong lón ewe imw mangaku. 9Iwe, lupwen Moses a tolong lón ewe imw mangaku, ewe üren kuchu a feittiw o nómwóló leasaman, lupwen ewe SAMOL a kapas ngeni Moses. 10Iteiten fansoun lupwen ekkewe aramas ra küna ewe üren kuchu a üütä ren ewe leenien tolong ngeni ewe imw mangaku, iir meinisin ra chök üütä o fel ngeni Kot, emön me emön leasamen en me imwan imw mangaku. 11Iwe, ewe SAMOL a kapas ngeni Moses me lón ewe Imw mangaku leenien chufengen, nge ra säpefengen, usun emön aramas a kapas ngeni chiechian. Mwirin, Moses a liwiniti ewe leeni ia ra asóósó ie. Nge Joshua nöün Nun we mwän, ewe ölüwöl ekan soun älisi Moses a chök nómwetiw lón ewe imw mangaku leenien chufengen.
Moses a küna lingen ewe SAMOL
12Iwe, Moses a apasa ngeni ewe SAMOL, “En ka fen piin apasa ngeniei: ‘En kopwe emmweni ekkeei aramas ngeni ewe Fönüwen Pwon.’ Nge en kosap mwüüt ngeniei pwe üpwe silei ika iö kopwe tiinaló pwe epwe fitiei. En ka pwal apasa: ‘Ngang üwa köri ngenuk itom pün üwa sileek, ka pwal küna ümöümöch merei.’ 13Are wesewesen iei pwüngün, iwe, kose mochen kopwe äiti ngeniei óm kewe ekiek, pwe epwe unusöch äi weweituk o föri wesewesen meet en ka mochen pwe ngang üpwe föri. Kopwe chechchemeni pwe ei mwiichen aramas iir wesewesen noum aramas.”
14Iwe, ewe SAMOL a pölüweni o apasa, “Pwisin ngang üpwe fituk Moses. Ngang üpwe mwüüt ngenuk óm kopwe asöösö. Mettóch meinisin repwe mwirinnö fänitom.”
15Mwirin, Moses a apasa ngeni ewe SAMOL, “Are en kosap pwisin fitikeem; iwe, kosap mwüüt ngeni keem pwe aipwe mwöküt seni ei leeni. 16Are en kosap fiti keem, iwe, epwe ifa usun än emön epwe silei pwe ngang me noum kewe aramas aia küna ümöümöch mereemw? Pwal meet aramas repwe silei ren pwe äm aia öüchchea me sókkóló seni ekkewe lussun aramas meinisin wón fönüfan?”
17Iwe, ewe SAMOL a pölüweni o apasa ngeni Moses, “Ngang üpwe föri wesewesen ei mettóch en ka tungór, pwokiten en ka küna ümöümöch merei o üwa köri ngenuk itom pün üwa sileek.”
18Mwirin, Moses a pwal tungór säfäl pwal fän ew o apasa, “Kose mochen kopwe pwääri ngeniei óm ling iei.”
19Iwe, ewe SAMOL a apasa, “Ngang üpwe föri pwe äi kirekiröch meinisin repwe pwereló mwomw, ngang üpwe pwal aronga itei ei, ewe SAMOL, me fän mesom. Ngang üpwe pwääri äi kirekiröch ngeni iö üwa filätä pwe üpwe kirekiröch ngeni, üpwe pwal pwääri äi tong ngeni iö üwa filätä pwe üpwe tongei.” 20A pwal apasa, “Nge kosap tongeni nengeni wón mesei, pün esap wor emön epwe küna wón mesei nge epwe manaw.”
21Mwirin, ewe SAMOL a sópweló le apasa, “Mi wor ew leeni mi chök arap ngeniei, ia en ka tongeni üütä ie wón eföü faaw. 22Lupwen äi ling epwe pweretó ren, ngang üpwe atolongók lón pwangen ewe achaw o pwölüw ngenuk peii tori äi üpwe luuló senuk. 23Mwirin, üpwe ömwökütaló peii; iwe, kopwe chök küna lükün söküri, nge kosap tongeni küna wón mesei.”
Och minaföön kapiin ewe pwonen etipeew
34Iwe, ewe SAMOL a apasa ngeni Moses, “Kopwe lecheei rüöpeek faaw mi chööpöp usun chök ekkewe rüöpeek mesemwan. Iwe, ngang üpwe makkei wór ekkewe chök pwal kapas mi mak wón ekkewe akkomwen faaw mi chööpöp en ke ömökküür. 2Kopwe amollóketä lesossorun lesor pwe kopwe feittä wón ewe Chuuk Sinai. Iwe, kopwe atourókoto reei ikenan wón ungen ewe chuuk. 3Esap wor emön epwe fituk. Enletin, esap mwüümwütä ngeni emön an epwe nóm ese lifilifil ia me wón ewe chuuk. Esap mwo nge wor pwiin siip ika pwiin kowu repwe tongeni mwöngö fetil arap ngeni ewe chuuk.”
4Iei minne, Moses a lechei rüöpeek faaw mi chööpöp usun chök ekkewe akkomwan. Iwe, a feittä wón ewe Chuuk Sinai lón ewe lesossorusichin, usun ewe SAMOL a fen öllük ngeni i. Iwe, a uweetä ekkewe rüöpeek faaw mi chööpöp lepöün. 5Mwirin, ewe SAMOL a feittiw lón ew üren kuchu o a aronga itan we, ewe SAMOL lupwen Moses a üütaló ikeweia fän mesan. 6Iwe, ewe SAMOL a pwereló seni fän mesen Moses o aronga le apasa, “Ngang ewe SAMOL, ngang ewe SAMOL, ngang ewe Kot mi kirekiröch o ümöümöch. Ngang üwa songommang o wöwün tong ese mwüch me uren ölükülük. 7Üwa pwääri äi tong ese mwüch ngeni ngöröwün tettelin pilóón aramas ren äi omwusaló föfföringaw, lükümmach me tipis. Iwe, iei mwo nge ngang üsap chök likitaló äi üsap öpwüngü emön mi tipis, pün ngang üwa öpwüngü ekkewe naaw me nöüür kana fäniten tipisin ekkewe saam tori ewe öülüngätin me örüwänuen tettelin pilóón aramas.”
8Iwe, Moses a mwittir chappetiw lepwül o fel ngeni Kot. 9Iwe, a apasa, “Äi Samol, are mi enlet pwe ngang üwa küna ümöümöch me fän mesom; iwe, kose mochen en äm Samol kopwe fiti keem. Ika mwo pwe ei mwiichen aramas ra üleförea, kose mochen omwusaló äm föfföringaw me äm tipis. Kose mochen kopwe etiwa keem pwe äm aipwe älemwirum.”
10Mwirin, ewe SAMOL a pölüweni o apasa, “Ngang üpwe föri ew pwonen etipeew ngenuk. Ngang üpwe föri ekkóch manaman mi amwaraar me mwen noum kewe aramas meinisin. Ekkeei manaman resap fiffis mwo me mwan me lón ew kewe mwüü lón unusen fönüfan. Ekkewe aramas meinisin mi nóm pwellin ünükkum repwe küna manamanei ngang ewe SAMOL - ewe manaman mi eniwokkus ngang ewe SAMOL üpwe föri mereemw. 11Wiisemi pwe ämi öüpwe älleasochisi ekkewe öllük meinisin ngang üpwe ngeni kemi ikenäi. Mwirin, ngang üpwe cheeló chókana meinisin mi üütä mwemi - ekkewe chón Amor, chón Kanaan, chón Hit, chón Periz, chón Hiv me chón Jebus. 12Öüpwe tümwünüfichi pwe öüsap föri och angangen etipeew ngeni ekkewe aramas mi nóm lón ewe fönü ia ämi öüpwe feilló ie. Pün are öüpwe föri och etipeew ngeniir, iwe, ämi öüpwe mwittir föri ar kewe föfför mi ngaw. 13Nge öüpwe fókkun ataietiw ar kewe róngen asór, ömökkükisietiw ar kewe faaw mi pin ra fel ngeniir o pöküwetiw ar kewe üür uluulun ewe önüfefin Asherah. 14Öüsap fel ngeni pwal ekkóch kot, pün ngang ewe SAMOL, iei itei, Luukommóng, pün ngang emön Kot mi öüchcheani usun lefiilei ngeni kemi.
15“Öüpwe tümwünüfichi pwe öüsap föri och sókkun angangen etipeew ngeni ekkewe aramas mi nóm lón ewe fönü. Pün lupwen repwe föri ar angangen fel me asór ngeni ar kewe kot, usun chök nge ra föri föfförün lisowu. Are öüpwe kütta ämi öüpwe kinamwe ngeniir, ina repwe eweinakemi pwe öüpwe fitiir le fel ngeni ar kewe kot. Iwe, epwe chök mecheres ämi öüpwe föri. 16Iwe, lupwen öüpwe etiwa ekkóch nöüür kewe föpwül mi fel ngeni pwal ekkóch kot pwe pwülüwen nöümi kewe mwän, mwirin, ina ekkana föpwül repwe emmweni ngeni nöümi kewe mwän pwe repwe föri föfförün lisowu ren ar repwe fel ngeni pwal ekkóch kot.
17“Öüsap fókkun föri uluulun önümwäl fänitemi.
18“Öüpwe chechchemeni pwe öüpwe efisi ächechchemen ewe Chuulapen Pilawa ese wor Iis lón. Lón üküükün fisu rän öüpwe mwöngö pilawa mi för nge ese wor iis lón, usun ngang üwa öllük ngeni kemi. Öüpwe föri ei lón ewe fansoun mi kefilitä iteiten ier lón ewe maramen Sööta, pün ina ewe maram ämi öüwa toowu seni Egypt.
19“Iteiten ekkewe mweinöü ätemwän meinisin mi upwitiw seni iteiten leenien mönükól, neii, pwal pacholong ekkewe ätemwänin mweinöün nöümi kewe maanfesir, ese lifilifil ika seni pwiin kowu ika pwiin siip. 20Nge ren emön mweinöün dongki, öüwa tongeni mööni seni ewe SAMOL ren ämi öüpwe ekkesiwili ngeni emön appanen siip. Nge are öüsap ekkesiwili; iwe, öüpwe kupii üwan. Öüpwe fókkun püngütiw möön ekkesiwilin nöümi kewe mwännichi.
“Esap mwüümwütä ngeni emön an epwe ämweto mwei fän an ösöülapö.
21“Wonu rän öüpwe föri ämi angang, nge lón ewe efisuen rän öüpwe asöösö. Öüpwe pwal mwo nge asöösö lón ewe efisuen rän lupwen ewe fansoun öüwa ttuw pwülün ämi tännipi me ewe fansoun kinikin uwa.
22“Öüpwe efisi ächechchemen ewe Chuulapen Wiik ren ekkewe mwen uwään kiniiemi föün wiit, pwal ächechchemen ewe Chuulapen Ionalong lesópwólón ewe fansoun kinikin uwa. 23Fän ülüngät iteiten ier ekkewe mwänin Israel meinisin repwe feitto mwen ewe SAMOL, ewe Chón Nemenem mi Tekia, ewe Koten Israel. 24Esap wor emön epwe maun ngeni fönüemi lupwen öüpwe feilló o pwääri kemi me fän mesen ewe SAMOL lón ekkana ülüngät fansoun iteiten ier. Ngang üpwe ösüweló chón ekkewe mwüü seni mwemi o äwätteló kiänin fönüwemi.
25“Öüsap ääni asór ngeniei chaan ewe mönün asór fiti och mettóch mi wor iis lón. Öüsap pwal likiti och seni ewe mönün asóren Chuulapen Pasofer pwe epwe nóm tori lesossor.
26“Öüpwe uweato mwelóón öchchün mwen üwään ämi pwül ngeni imwen ewe SAMOL ämi we Kot.
“Öüsap kukuuw emön appanen kuuch lón chönün oupwun inan.”
27Mwirin, ewe SAMOL a pwal apasa ngeni Moses, “Kopwe makkeetiw ekkeei kapasen öüröür meinisin, pün ikkeei masowen äi pwon ngenuk me chón Israel.” 28Iwe, Moses a nóm wón ewe chuuk ren ewe SAMOL lón üküükün fääik rän me fääik pwiin. Lón unusen ei fansoun esap mwöngö och mwöngö ika wün kólik. Lón ena fansoun a makkeetiw kapasen ewe pwon, ikkeei ekkewe Engol Öllük, wón ekkewe faaw mi chööpöp.
29Iwe, lupwen Moses a feittiw seni wón ewe Chuuk Sinai nge ra nóm lón pöün ekkewe rüöpeek faaw mi chööpöp fäniten ewe kapasen Pwärätä, i esap äpereni pwe wón mesan a saramaram pwokiten i a kapas ngeni ewe SAMOL. 30Iwe, lupwen Aaron me ekkewe aramasen Israel meinisin ra küna saramaramen wón mesen Moses, ra nuokkus ar repwe kanoto ren. 31Nge Moses a kökkörir o üreni Aaron me ewe mwiichen souemmwen pwe repwe feitto pwe repwe kapas fengen. Iwe, ra liwinsefälito ren Moses nge i a kapas ngeniir. 32Mwirin, ekkewe chón Israel meinisin ra arapoto ren Moses. Iwe, a ngeniir ekkewe öllük meinisin ewe SAMOL a fen ngeni i me wón ewe Chuuk Sinai.
33Iwe, lupwen Moses a wes le kapas ngeni ekkewe aramas, a pwölüwetä och pwölüpwöl wón mesan. 34Nge iteiten fansoun lupwen Moses a tolong lón ewe Imw Mangaku leenien chufengen fän mesen ewe SAMOL pwe epwe kapas ngeni i, a särifaló ewe pwölüpwöl tori an epwe toowu. Iwe, lupwen an a toowu o aporausa ngeni ekkewe chón Israel meet kapasen öüröür Kot a öüröüra ngeni, 35ekkewe aramas ra küna pwe wón mesan a saramaram. Mwirin, Moses a pwal pwölüwsefälieló wón mesan tori an epwe liwinsäfäliló pwe epwe kapas ngeni ewe SAMOL.
Ekkewe kapasen öüröür fäniten ewe ränin Sabbat
35Iwe, Moses a emwichafengeni unusen ewe mwiichen chón Israel o apasa ngeniir, “Ikkeei ekkewe mettóch ewe SAMOL a öllük ngeni kemi pwe öüpwe föri: 2Lón üküükün wonu rän öüpwe föri ämi angang, nge lón ewe efisuen rän ew ränin Sabbat, ränin asöösö, ew rän mi pin meren ewe SAMOL. Ese lifilifil ika iö a föri och angang lón ei rän, epwe ninniiló. 3Öüsap öküüw och ekkei me lón leeniemi kewe lón ewe ränin Sabbat.”
Ekkewe liffang fäniten ewe imw mangaku mi pin
4Iwe, Moses a apasa ngeni unusen ewe mwiichen chón Israel, “Iei meet ewe SAMOL a ääni öllük: 5Öüpwe angei ew asór seni meet mi wor reemi fäniten ewe SAMOL. Emön me emön mi mochen seni pwisin letipan epwe uwato ren ewe SAMOL ew asór kolt, silifer me piraas, 6suwain mi arawaraw, forkeet me parapar pwal mangaku mi pwechepwech o mwirinnö, ünöünen kuuch, 7ünüchchen ätemwänin siip mi kötü lón tuumwu mi par pwal ünüchchen kuuch, mwüchün ewe irä akasia, 8apüra mi för seni föün olif fäniten ewe leenien etittin, ekkewe angas fäniten ewe löön kepit mi mis pwal fäniten ewe asóren ötüöt mi pwokkus, 9pwal ekkewe sókkun faaw öüchche itan oniks me pwal ekkewe ekkóch faaw öüchche repwe kamasolong wón ewe wääwup üfen souasór mi foutout me ewe chechchen fänimmwär.
10“Meinisin ekkewe mi mesenipöüfich me leiimi repwe feitto o föri iteiten ekkewe mettóch ewe SAMOL a öllük: 11unusen ewe imw mi pin, wewen: ewe imw mangaku fiti ewe pwölüpwölütiwan, ekkewe ammwöch, ekkewe paap fäniten aróngóróngun ewe imw mi pin, ekkewe ääpenges, ekkewe üür me ekkewe wäänifót; 12ewe pwórofel fiti ämmwärin kewe me ewe pwölüwpölün omwusomwusen tipis me ewe cheech mangaku mi wiisen eppetaló ewe pwórofel; 13ewe cheepel fiti ämmwärin kewe me meinisin pisekisekin wón pwal ewe pilawa mi esissilätä än Kot nóm; 14ewe leenien etittin fäniten an epwe wor saram fiti ekkewe pisekisekin, ekkewe laamp me ewe apüra fäniten alölöön ekkewe laamp pwe repwe ttin; 15ewe róngen asóren ötüöt fiti ämmwärin kewe, ewe löön kepit mi mis me ewe angas mi pwokkus; ewe kaaten mangaku fäniten ewe asam ren ewe leenien tolong lón ewe imw mangaku mi pin; 16ewe róngen asóren keek fiti ewe póón lón epwe för seni piraas, ämmwärin kewe me meinisin pisekisekin angangen wón; ewe üülong epwe för seni piraas fiti uchangan; 17ekkewe kaaten mangaku fäniten aróngóróngen ewe leeni lükün pwellin ewe imw mangaku fiti üran kewe me wäänifótur kewe, pwal ewe kaaten mangaku fäniten ewe asamen tolong ngeni ewe leeni lükün pwellin ewe imw mangaku; 18ekkewe pwurowók fäniten ewe imw mangaku mi pin me aróngóróngen ewe leeni ünükkün pwal seliir kewe; 19ekkewe üüf mi ttür üföüfen angangen lón ewe leeni mi pin, ikkeei ekkewe üüf mi pin fäniten Aaron ewe souasór me ekkewe üüf fäniten nöün kewe mwän lupwen repwe föri ar angang pwe iir repwe souasór.”
20Mwirin, unusen ewe mwiichen chón Israel ra feilló seni fän mesen Moses o liwiniti imwer kewe imw mangaku pwe repwe amollätä ar kewe liffang. 21Iwe, iteiten emön me emön mi mochen pwal letipan mi pwapwaiti, a feitto o uweato och asór ngeni ewe SAMOL fäniten ewe angang wón ewe Imw Mangaku Leenien Chufengen, pwal fäniten ekkewe sakkopaaten angangen lón me ekkewe üüf mi pin. 22Meinisin chókewe iir mi mochen seni letiper, mwän ppök me fefin, ra feitto o uweato sakkopaaten ofout mi för seni kolt: mwärämwär, ieriing, ring me fout mi ling. Iir meinisin ra uweato ar kewe kolt pwe epwe och asóren sapatä ngeni ewe SAMOL. 23Ekkóch ra uweato suwain mi arawaraw, forkeet me parapar ika mangaku mi pwechepwech o mwirinnö ika ünöünen kuuch. Ekkóch ra uweato ünüchchen ätemwänin siip mi kapar ika ünüchchen kuuch. 24Pwal ekkóch ra uweato silifer ika pisek mi för seni piraas pwe ar asór ngeni ewe SAMOL. Nge chókana mi wor rer mwüchün ewe irä akasia ra uwato fäniten meet mi mwirinnö ngeni och kinikinin ewe angang. 25Ekkwe fefin meinisin mi mesenipöüfich le ttur ra uwato meet ra türüni seni suwain mi arawaraw, forkeet me parapar ika mangaku mi pwechepwech o mwirinnö. 26Iwe, ekkewe fefin meinisin mi mochen o iir mi mesenipöüfich ra türüni ekkewe ünöünen kuuch. 27Nge ekkewe souakkomw ra uwato ekkewe sókkun faaw öüchche itan oniks me pwal ekkewe ekkóch faaw öüchche pwe repwe amaserelog lón leenier me wón ewe wääwup üfen souasór mi foutout pwal wón ewe chechchen fänimmwär. 28Ra pwal uwato ekkewe angas me ewe apüra mi för seni föün olif fäniten ekkewe laamp, fäniten ewe löön kepit pwal fäniten ewe asóren ötüöt mi pwokkus. 29Iei minne, meinisin ekkewe chón Israel, mwän me fefin iir mi pwapwaiti, ra uwato ar asór ngeni ewe SAMOL seni pwisin mochenin letiper, fäniten ekkewe angang meinisin ewe SAMOL a öllük ngeniir meren Moses pwe repwe föri.
30Mwirin, Moses a apasa ngeni ekkewe chón Israel, “Nengeni, ewe SAMOL a filätä Bezalel nöün Uri we mwän, nge Uri nöün Hur seni ewe einangen Judah. 31Ewe SAMOL a ouraló Bezalel ren ewe Ngünün Kot o fang ngeni an tüfich me silelap me mesenipöüfich lón sókkun angangen wón paaw meinisin, 32pwe i epwe tongeni föri ripweripwen ekkóch pisek mi ling seni kolt, silifer me piraas. 33I a silelap le falei ekkewe faaw öüchche o amaserelong lón leenier, a pwal mesesnipöüfich le falei irä me föri sókkopaten angangen paaw wón meinisin mi ripweripw. 34Iwe, ewe SAMOL a fangeppök ngeni ätei me Oholiab nöün Ahisamak we mwän seni ewe einangen Dan ar tüfich pwe repwe tongeni äiti pwal ekkewe ekkóch ar silelap. 35Kot a ourer ren ar repwe mesenipöüfich pwe repwe tongeni föri ekkewe sókkun angang meinisin pwe iir repwe chón silelap le föri angangen wón paaw, chón förätä mettóch mi fö, chón chü ren suwain mi arawaraw, forkeet me parapar me mangaku mi pwechepwech o mwirinnö pwal chón ttür. Iir meinisin iir chón mesenipöüfich lón angangen wón paaw me chón förätä mettóch mi fö.
36“Bezalel me Oholiab me ekkewe pwal ekkóch mwän mi silelap angangen wón paaw, iir ätekewe ewe SAMOL a ngeniir ar tipächchem me supwusupwöch me tüfich pwe repwe silei usun ar repwe föri ekkewe angang meinisin pwe repwe öüetä ewe imw mi pin usun chök minne ewe SAMOL a öllük.”
2Iei minne, Moses a üreni Bezalel me Oholiab pwe repwe popuetä ewe angang fiti ekkewe pwal ekkóch aramas mi angei ar mesenipöüfich meren ewe SAMOL pwe repwe föri ewe angang. 3Iwe, iir ra angei seni Moses ekkewe asór meinisin ekkewe chón Israel ra fen uwato fäniten ar repwe föri angangen köüütän ewe imw mi pin. Nge ekkewe aramas ra chök sópwósópwóló le uwato ekkewe asór seni pwisin mochenin letiper. 4Iei minne, ekkewe mwän meinisin mi mesenipöüfich lón angangen wón paaw mi föri ekkewe angang meinisin wón ewe imw mi pin ra likitaló ar angang, 5o ra apasa ngeni Moses, “Minne ekkewe aramas ra uwato, a fókkun nannafaló seni minne äm aipwe aea le föri ewe angang ewe SAMOL a öllük pwe aipwe föri.”
6Mwirin, Moses a atoowu an kapasen osomän. Iwe, iei an ei kapas ra esilefeili leemelen unusen ewe leeni ia ra asóósó ie: “Esap wor emön mwän ika fefin epwe chüen uwató pwal och mettóch pwe an asór fäniten ewe imw mi pin.” Iwe, iei popun ekkewe aramas ra ükütiw le uwato ar kewe asór, 7pwokiten meet a fen wor reer a koon naffaló seni meet repwe aea le äweesi unusen ewe angang.
Köüütän ewe Imwenfel mangaku(Exodus 26:1-37)
8Ekkewe mwän mi mesenipöüfich le föri töör ra akkomwen föri engol peekin mangaku seni töör mi pwechepwech o mwirinnö. Mwirin, emön me leiin ekkewe mwän mi silelap angangen wón paaw a chüürätä liossun keropim wóór seni suwain mi arawaraw, forkeet me parapar. 9Echö me echö ekkewe peekin mangaku ra chök löllöfengen öüküükür, pün langattamer, rüwe me wälü mwalü nge chöölaper rüwänü mwalü. 10Limachö me leiin ekkeei peekin mangaku ra kochufengen pwe repwe förätä ew chooch. Iwe, ekkewe pwal limachö ra kochufengen o förätä ewe oruuwen chooch. 11Mwirin, ra förätä lime pweken mi arawaraw wón ünükkün leesópwun ewe peekin mangaku mi nóm ömwüchchülón ewe ew chooch. Iwe, pwal ina chök usun meet ra föri ngeni wón ünükkün leesópwun ewe peekin mangaku mi nóm ömwüchchülón pwal ewe ew chooch. 12Ra pwal föri lime pweken wón ewe ew choochen peekin mangaku pwal lime pweken wón leesópwun pwal ewe ew chooch peekin mangaku. Iwe, ekkewe pweken leesópwun ekkewe peekin mangaku ra äwenewen fengen. 13Mwirin, ra föri lime ökkük seni kolt o ra aea ekkeei ökkük le ochu fengeni ekkewe ruu choochchen peekin mangaku pwe ewe imw mangaku mi pin a chök ew unus.
14Iwe, ra pwal föri engol me echö peekin mangaku seni ünöünen kuuch fäniten pwölüpwölütiwen wón ewe imw mangaku mi pin. 15Meinisin ekkewe engol me echö peekin mangaku ra chök löllöfengen öüküükür, pün langattamer, ilik mwalü, nge chölaper, rüwänü mwalü. 16Ekkewe chón silelap angangen wón paaw ra ochufengeni limachö ekkewe peekin mangaku lón ew chooch, nge ekkewe wonachö ra ochufengenir pwal lón ew chooch. 17Mwirin ra förätä lime pweken wón ünükkün leesópwun ewe peekin mangaku mi nóm ömwüchchülón ewe ew chooch; pwal ünükkün leesópwun ewe cheech mi nóm ömwüchchülón pwal ewe ew chooch. 18Iwe, ra pwal föri lime ökkük mi kükkün seni piraas pwe repwe aea le ökükkü fengeni ekkewe pweken, pwe ekkewe ruu chochchen peekin mangaku repwe nüküchchar le chufengen. Ren ei lapalap, pwölüpwölütiwen ewe imw mangaku epwe chök ew unus. 19Mwirin, ra pwal föri pwal ruu sässärin pwölüpwöl fäniten pwölüpwölütiwen ewe Immwenfel mangaku. Ewe äewin sässärin pwölüpwöl ra föri seni ünüchchen ätemwänin siip mi kapar. Nge ewe oruuwen sässärin pwölüpwöl a för seni ünüchchen kuuch.
20Ra för paap mi wenechchar seni mwüchün ewe irä akasia fäniten ewe imw mangaku mi pin. 21Üküükün langattamen echö me echö ekkewe paap, engol mwalü, nge chööchön, ew esóp mwalü. 22A wor ruu oupwun echö me echö ekkewe paap mi chök ouwäreer fengen pwe repwe tongeni kamas fengen. Ra föri meinisin ekkewe papen ewe imw mangaku mi pin lón ei chök lapalap. 23Ra föri rüwe paap fäniten peliöörün ewe imw mangaku mi pin, 24ra pwal föri fääik wäänifót seni silifer pwe ekkewe paap repwe fótetiw wóór. A wor ruu wäänifót fäniten lóngólóngun fän echö me echö paap. 25Ra pwal föri rüwe paap fäniten peliefengin ewe imw mangaku mi pin, 26fiti fääik wäänifótur seni silifer - ruu wäänifót fäniten lóngólóngun fän echö me echö paap. 27Iwe, ra pwal föri wonachö paap fäniten leesópwun ewe imw mangaku me esóp, iei pelilotowen ewe imw mangaku mi pin. 28Nge ra alapaló le föri ökkörüwachö paap fäniten ekkewe pwokuuku leesópwun ewe imw mangaku mi pin. 29Ekkeei papen lepwokuuku ra kamas fengen me fan nge ra kochu fengen me asan ren efóch ring. Iwe, ra usun chök nge efóch seni asan tori fan. Ra föri ruu ei sókkun, efóch fäniten ew me ew kewe pwokuuku leesópwun ewe imw mangaku me esóp. 30Iei minne, ra föri walüchö paap fäniten pelilotowen ewe imw mangaku mi pin fiti engol me wonu wäänifót mi för seni silifer mi ketel - ruu wäänifót fän echö me echö paap.
31Ra pwal föri limefóch ääpenges seni mwüchün ewe irä akasia pwe repwe ömwöchü fengeni papen peliöörün ewe imw mangaku mi pin, 32pwal limefóch fäniten papen peliefengjn ewe imw mangaku mi pin, iwe, pwal limefóch fäniten ekkewe papen pelilotow, iei ökkömwüchchülón leesópwun ewe imw mangaku mi pin. 33Ra föri ewe ääpengesin lukalap pwe a itipengesiló wón lukalapen ekkewe paap seni esóp ewe imwenfel tori esóp. 34Iwe, ra finiti ekkewe paap ngeni kolt o ra för ring seni kolt pwe repwe ömwöchü ekkewe ääpenges. Ra pwal finiti ekkewe ääpenges ngeni kolt.
35Iwe, ra föri ewe kaatenin lón seni suwain mi arawaraw, forkeet me parapar pwal seni töör mi pwechepwech o mwirinnö, nge emön mi mesenipöüfich a chüüri liossun kerobim wón. 36Ei kaaten a kasapatä wón fófóch ökkük mi nóm wón fófóch üür mi för seni mwüchün ewe irä akasia. Ra finiti ekkewe üür ngeni kolt o föri wäänifótur kewe rüwänü seni silifer mi ketel. 37Mwirin, ra föri pwal echö kaaten fäniten ewe leenien tolong ngeni ewe imw mangaku mi pin. Ei kaaten a för seni töör mi pwechepwech o mwirinnö, nge emön chón chü a chüüri wón ren suwain mi arawaraw, forkeet me parapar. 38Iwe, ra pwal föri limefóch üür fiti limefóch ökkük pwe repwe ömwöchätä ewe kaaten wón ekkewe üür. Iwe, ra finiti ngeni kolt ülüülen ekkewe üür me fööför kewe, nge ra föri seni piraas mi ketel ekkewe limu wäänifót fäniten ekkewe üür.
Förün ewe pwórofel(Exodus 25:10-20)
37Iwe, Bezalel a föri ewe pwórofel seni mwüchün ewe irä akasia. Üküükün langattaman, ruu esóp mwalü, chöölapan, ew esóp mwalü, nge tekian, ew esóp mwalü. 2Iwe, a finiti lón me lükün ewe pwórofel ngeni kolt mi mwirinnö, a pwal föri och repenin pwellin wón seni kolt. 3A pwal föri fófóch ring seni kolt fäniten ewe pwórofel o apacheeretä ngeni pecheen kewe me fófóch, rüwófóch ring wón epeek, pwal rüwófóch wón pwal ewe epeek. 4Mwirin, a föri ekkóch ämmwär seni mwüchün ewe irä akasia o a finiti ngeniir kolt. 5Iwe, a siikalong ekkewe ämmwär lón ekkewe ring mi nóm leepekin ewe pwórofel pwe repwe aea le mwärei.
6A föri ewe pwölüpwölün omwusomwus-en tipis seni kolt. Üküükün langattaman, ruu esóp mwalü, nge chöölapan, ew esóp mwalü. 7Mwirin, a föri uluulun rüwömön keropim seni kolt mi lechelech ra nóm wón lesópwun ewe öppwüng me rüosóp. 8A föri uluulun emön kerop wón ewe esóp, nge ewe örüwömönün uluulun kerop a nóm wón pwal ewe esóp. A anómwu ekkewe uluulun keropim wón leesópwun ewe öppüng me rüösóp nge a för unusei fengeni me ewe öppwüng. 9A föri pwe pöükassin ekkewe uluulun keropim repwe meresiló mweer o öchchülói ewe öppüng ngenir. Ekkewe uluulun keropim ra säpefengen nge ra nennetiw wón ewe öppüng.
Förün ewe cheepel(Exodus 25:23-29)
10Mwirin, a pwal föri ewe cheepel seni mwüchün ewe irä akasia. Üküükün langattaman, ruu mwalü, chöölapan, ew mwalü, nge tekian, ew esóp mwalü. 11Mwirin, a finiti ewe cheepel ngeni kolt mi mwirinnö, a pwal föri och repenin pwellin wón seni kolt. 12Iwe, a pwal föri och aaman wón pwellin ünükkün, üküükün chöölapan, eang. Iwe, ra uwätä och poupou mi för seni kolt wón ewe aaman. 13A pwal föri fófóch ring seni kolt fäniten ewe cheepel o ra apacheeretä wón ekkewe rüwänü pwokuuku, ia ekkewe fófóch pecheen ewe cheepel ra nóm ie. 14Ekkewe fófóch ring ra chök nóm kan ngeni aamen ewe cheepel we pün repwe ömwöchü ekkewe ämmwär repwe aea le mwärei ewe cheepel. 15Ekkewe ämmwär fäniten ämmwärin ewe cheepel ra för seni mwüchün ewe irä akasia nge ra finifin ngeni kolt. 16Iwe, a föri seni kolt mi mwirinnö ekkewe pisek fäniten ewe cheepel: ekkewe opwong me sepi me pwool me ekkewe wään kólik repwe aea le niini ewe asóren wün.
Förün ewe leenien etittin(Exodus 25:31-39)
17Iwe, a föri ewe leenien etittin seni kolt mi mwirinnö, nge ra lechei wäänipwuun me waasan, pwal ekkewe kap usun lapalapen pöön irä, ekkewe uluulun möür fiti pöön irär mi masaló ra chök för unus fengen. 18A wor wonofóch keangen ewe leenien etittin ra itiwu seni leepekin ewe waasan. Ülüfóch ra nóm wón ewe epeek, nge ülüfóch ra nóm wón pwal ewe epeek. 19A wor ülüngät kap usun lapalapen pöön irän ewe irä almond fiti möürün me pöön irän mi masaló ra nóm wón efóch keang, pwal ülüngät wón pwal ewe efóch keang. Iei chök usun ren ekkewe wonofóch keang meinisin mi itiwu seni ewe leenien etittin. 20Iwe, wón waasen ewe leenien etittin a wor rüwänü kap usun lapalapen pöön irän ewe irä almond fiti möürün me ewe pöön irän mi masaló. 21Ewe äewin pöön möür a nóm fän ewe äewin peaan keang mi itiwu seni ewe leenien etittin. Ewe örüwapöön möür a pwal nóm fän ewe oruuwen peaan keang, pwal ewe öülüpöön möür a nóm fän ewe öülüngätin peaan keang - wonofóch keang fengen meinisin. 22Ekkewe uluulun möür me ekkewe keang ra chök för unus fengen meinisin fiti ewe leenien etittin, ra lechelech seni kolt mi mwirinnö.
23A pwal föri ekkewe fisu laampen wón ewe leenien etittin fiti fengen me ekkewe fichin wiik me ekkewe leenien moochen ekkei seni kolt mi mwirinnö. 24A föri ewe leenien etittin me meinisin ekkewe pisekin atawen wón seni ew talent ika fiik me limu paun kolt mi mwirinnö.
Förün ewe róngen asóren ötüöt(Exodus 30:1-5)
25Mwirin, a föri ewe róngen asóren ötüöt seni mwüchün ewe irä akasia. Ei róóng a chök löllöfengen langattaman me chöölapan, pün üküükün langattaman, ew mwalü, pwal chöölapan, ew mwalü, nge tekian, ruu mwalü. Mächään ewe róngen asóren ötüöt kewe mi kenitä usun mächään maan ra chök för unus fengen me inisin ewe róóng. 26Iwe, a finiti ngeni kolt mi mwirinnö wón ewe róóng me winipelian meinisin tori pwal ekkewe mächään mi kenitä usun mächään maan. A pwal föri och repenin pwellin ünükkun seni kolt. 27Mwirin, a föri rüofóch ring seni kolt o anómwur fän ewe repen, a pwal anómwu rüofóch pölüwer me wón pwal ewe epeek, pwe repwe ömwöchü ekkewe ämmwär repwe aea le mwärei ewe róóng. 28Iwe, a föri ekkewe ämmwär seni mwüchün ewe irä akasia o finitir ngeni kolt.
29Mwirin, a pwal föri ewe apüra löön kepit mi pin fäniten kepitin ekkewe souasór me ewe asóren ötüöt mi pwokkus o mwirinnö, nge a aea ewe sókkun lapalap än emön chón silelap för appach mi pwokkus.
Förün ewe róngen asóren keek(Exodus 27:1-8)
38 Iwe, a föri ewe róngen asóren keek seni mwüchün ewe irä akasia. Ei róóng a chök löllöfengen langattaman me chöölapan, pün üküükün langattaman, limu mwalü, pwal chöölapan, limu mwalü, nge tekian, ülüngät mwalü. 2A pwal föri äkkäefóch mächään ewe róngen asór usun mächään maan repwe ititä seni ew me ew ekkewe rüwänü pwokuuku, pün ekkewe mächä me ewe róóng ra chök för unus fengen. Iwe, a finiti ewe róóng ngeni piraas. 3Iwe, a pwal föri seni piraas ekkewe pisek meinisin repwe aea wón ewe róng: ekkewe nape, ekkewe söföl, ekkewe pwool repwe aea le äsupwu ewe chcha, ekkewe tipwen fituk me ekkewe paan fäniten mwolien ekkei. 4Mwirin, a pwal föri ewe póó fäniten ewe róóng. Ei póó a för seni piraas mi lullut usun cheew. Iwe, a anómwu ei póó wón och ferilong fäätiwen nesópwun lón ewe róóng. 5Iwe, a föri ekkóch ring seni piraas o anómwur ren ew me ew ekkewe rüwänü pwokuukun ewe póó pwe leenien kömwöchün ekkewe ämmwär. 6A pwal föri ekkewe ämmwär seni mwüchün ewe irä akasia o finitir ngeni piraas. 7Mwirin, a siikalong ekkewe ämmwär lón ekkewe ring pwe repwe nóm lepelien ewe róngen asór me rüwepeek fäniten ämmwärin ewe róóng. A föri ewe róngen asór seni paap nge a pöön lón.
Förün ewe üülong
8Iwe, a föri ewe üülong me uchangan we seni piraas a angei seni ekkewe minen oori nöün ekkewe fefin mi wiisen angang lón ewe leenien tolong ngeni ewe Imw Mangaku Leenien Chufengen.
Ewe leeni lükün ewe Imwenfel mangaku(Exodus 27:9-19)
9Mwirin, a föri ewe leeni lükün ewe Imwenfel mangaku. Üküükün langattamen tittin aróngóróngen ei leeni me peliöör, ipwükü mwalü, nge a wor kaatenin töör mi pwechepwech o mwirinnö. 10A pwal wor rüwe üran me rüwe wäänipwuur mi för seni piraas pwal ökkük me fööfö mi för seni silifer ra nóm wón chimwen ekkewe üür. 11Üküükün langattamen ewe tiit me peliefeng, pwal ipwükü mwalü. A pwal wor rüwe üran me rüwe wäänipwuur mi för seni piraas, pwal ökkük me fööfö mi för seni silifer ra nóm wón chimwen ekkewe üür.
12Üküükün chöölapen leesópwun ewe tiit me pelilotou, lime mwalü. A pwal wor kaatenin fiti fengen me engol üran me engol wäänipwuur, pwal ekkewe ökkük me fööfö mi för seni silifer ra nóm wón chimwen ekkewe üür. 13Nge üküükün chöölapen leesópwun ewe tiit me peliöötiw, sässäpengeni töötän akkar, pwal lime mwalü. 14Üküükün langattamen ekkewe kaaten mi nóm wón epeek ewe leenien tolong, engol me limu mwalü, nge ra eittiwetä wón ülüfóch üür mi wor ülüngät wäänipwuur. 15Pwal üküükün langattamen ekkewe kaaten mi nóm wón pwal epeek ewe leenien tolong ngeni ewe leeni lükün ewe imwenfel mangaku, engol me limu mwalü, nge ra eittiwetä ren ülüfóch üür mi wor ülüngät wäänipwuur. 16Meinisin ekkewe kaaten wón aróngóróngen ewe tiit pwellin ünükkün ewe leeni lükün ewe imwenfel mangaku ra för seni töör mi pwechepwech o mwirinnö. 17Ekkewe wäänipwuun ekkewe üür ra för seni piraas. Ekkewe ökkük me ekkewe fööfö mi nóm wón ülüülen ekkewe üür ra för seni silifer, nge wón ülüülen ekkewe üür ra finifin ngeni silifer. Iwe, meinisin üren aróngóróngen tittin ewe leeni lükün ewe imwenfel mangaku a wor fööför mi för seni silifer.
18Ewe kaaten fäniten ewe asamen tolong ngeni ewe leeni lükün ewe imwenfel mangaku a för seni töör mi pwechepwech o mwirinnö nge a chü ren suwain mi arawaraw, forkeet me parapar. Üküükün langattaman, rüwe mwalü, nge a usun chök üküükün tekian ekkewe kaatenin aróngóróngen tittin ewe leeni lükün ewe imwenfel mangaku, pün a limu mwalü, 19nge ra eittiwetä ren fófóch üür mi wor wäänipwuur mi för seni piraas. Ökkükür me fööför kewe ra för seni silifer, nge wón ülüülen ekkewe üür ra finifin ngeni silifer. 20Meinisin ekkewe pwurowókun ewe imw mangaku mi pin me aróngóróngen ewe tiit mi pwelli ewe leeni lükün ra för seni piraas.
Iteiten pisek ra aea
21Iwe, ikkeei iteiten ekkewe pisek ra aea fäniten ewe imw mangaku mi pin, iei ewe imw mangaku mi pin leenien ewe pisekin Pwärätä, Moses a öllük ngeni ekkewe mwän chón ewe einangen Levi pwe repwe makkeretiw fän emmwenien Ithamar nöün ewe souasór Aaron we mwän. 22Bezalel, nöün Uri we mwän, nge Uri nöün Hur seni ewe einangen Judah, a föri iteiten mettóch meinisin ewe SAMOL a öllük ngeni Moses. 23Nge Oholiab nöün Ahisamak we mwän seni ewe einangen Dan a fiti i. Ätei emön chón silelap angangen wón paaw me emön mi mesenipöüfich le ouluulu mettóch mi fö, pwal i emön chón türüni suwain mi arawaraw, forkeet me parapar me töör mi pwechepwech o mwirinnö. 24Iwe, unuselapen üküükün ewe kolt ra angei seni ewe asóren assaw o ra aea fäniten meinisin angangen wón ewe imw mi pin, rüwe me tiu talent (ika ruu ngöröw ipwükü fiik me limu paun) me füüpwükü iliik shekel (ika engol me walü paun), alóngólóng wón ewe öüküük ra aea lón ewe imw mi pin.
25Pwal üküükün ewe silifer ra angei seni chókewe me lón ewe mwiichen aramas mi ällealong lón ewe ällean iteit, ipwükü talent (ika fisu ngöröw limöpwükü paun) me engöröw füüpwükü fiik me limu shekel (ika fääik me rüwänü paun), alóngólóng wón ewe öüküük ra aea lón ewe imw mi pin. 26Wewen, emön aramas nge ew beka (ika ew nalimu aunus), iei esóp shekel, alóngólóng wón ewe öüküük ra aea lón ewe imw mi pin. Ra ioni ei üküükün silifer seni iteiten emön me emön mwän mi makkolong itan lón ewe ällea, seni ier rüwe ika lap seni. Iwe, üküükün unuselapen iteiten ekkewe mwän, wonopwükü ülüngät ngöröw, limöpwükü lime. 27Iwe, a aea ewe üküükün ipwükü talent silifer (ika fisu ngöröw limöpwükü paun) fäniten ekkewe wäänipwüün papen etiipen ewe imw mi pin pwal fäniten wäänipwuun üren ewe kaaten lón ewe imw mi pin. A föri ipwükü wäänipwu seni ewe ipwükü talent, wewen, ew talent (ika fiik me limu paun) fäniten ew wäänipwu. 28A aea ewe üküükün engöröw füüpwükü fiik me limu shekel silifer (ika fääik me limu paun) le föri ekkewe ökkük fäniten ekkewe üür, a pwal aea le finiti ngeni ülüülen ekkewe üür; a pwal aea le föri ekkewe fööfö fäniten ekkewe üür.
29Üküükün ewe piraas a angei seni ewe asóren assaw, fiik talent (ika limu ngöröw rüwöpwükü lime paun) me ruu ngöröw föpwükü shekel (ika wone paun). 30Iwe, a aea ei piraas le föri ekkewe wäänipwu fäniten üren ewe leenien tolong lón ewe Imw Mangaku Leenien Chufengen, pwal fäniten ewe róngen asóren keek mi för seni piraas fiti fengen me póón we me meinisin ekkewe pisekin angangen wón. 31A pwal aea ewe piraas fäniten ekkewe wäänipwuun üren aróngóróngen ewe tiit mi pwellifeili ewe leeni lükün ewe imw mangaku mi pin me pwal wäänipwuun üren ewe leenien tolong me meinisin ekkewe pwurowók fäniten ewe imwenfel mangaku me pwurowókun üküróngóróngen ewe tiit mi pwellifeili ewe leeni lükün.
Ekkewe üüf fäniten ekkewe souasór
39Iwe, ekkewe chón silelap angangen wón paaw ra pwal türüni ekkewe üüf mi ling seni suwain mi arawaraw, forkeet me parapar fäniten ekkewe souasór pwe repwe üföüf lupwen repwe föri ar angang lón ewe Leeni mi pin. Ra pwal föri ekkewe üüf mi pin fäniten Aaron, usun minne ewe SAMOL a öllük ngeni Moses.
Ewe üfen souasór mi ling itan efod(Exodus 28:6-14)
2Iwe, a föri ewe wääwup üfen souasór mi foutout seni töör mi pwechepwech o mwirinnö nge a chü ren tereech kolt me suwain mi arawaraw, forkeet me parapar. 3Emön chón silelap angangen wón paaw mi mesenipöüfich a lecheei ewe kolt pwe epwe chööpöp o chächchääk. Mwirin a fichietiw pwe epwe wor meetan. Iwe, a chüürätä ekkewe meeten kolt wón ewe töör mi pwechepwech o mwirinnö fiti suwain mi arawaraw, forkeet me parapar. 4Iwe, ra föri ekkewe afföün wón afaren ewe wääwup üfen souasór mi foutout o apacheretä ngeni ekkewe ruu pwokuukun wón pwe epwe tongeni fööfö fengen. 5Ra pwal föri ewe ökkönük mi emesekkis türün usun chök ewe wääwup üfen souasór. Ra för seni ekkeei chök pwal sókkun pisek: töör mi pwechepwech o mwirinnö me suwain mi arawaraw, forkeet me parapar pwal meeten kolt, usun minne ewe SAMOL a öllük ngeni Moses.
6Iwe, ra amasalong ekkewe rüwöföw faaw öüche itan oniks lón leenien ömmwöchür mi för seni kolt o ra ruputi wór iten nöün Israel kewe mwän usun rupun och impwang. 7Mwirin, a föötiretä wón ekkewe afföün wón afaren ewe wääwup üfen souasór mi foutout pwe repwe föün ächchem fäniten nöün Israel kewe mwän. A föri ekkeei mettóch meinisin usun minne ewe SAMOL a öllük ngeni Moses.
Ewe chechchen fänimmwär(Exodus 28:15-28)
8Iwe, a föri ewe chechchen fänimmwär, usun chök förün ewe üfen souasór mi ling. A föri ei chechchen fänimmwär seni töör mi pwechepwech o mwirinnö nge a chü ren meeten kolt me suwain mi arawaraw, forkeet me parapar. 9Ei chechchen fänimmwär a chök löllö fengen langattaman me chöölapan nge a lumfengen o ku rüöpeek usun ew pwotow. Iwe, üküükün langattaman, eang; pwal üküükün chöölapan, eang. 10Mwirin ra amasätä rüwänü telitiwen faaw öüchche wón ewe chechchen fänimmwär. Wón ewe äewin tettel, a wor eföü ruby, eföü topaz me eföü beril. 11Wón ewe oruuwen tettel, a wor eföü turkois, eföü sapfaer me eföü emerald. 12Wón ewe öülüngätin tettel, a wor eföü iasinth, eföü äkät me eföü ämethist. 13Iwe, wón ewe örüwänüen tettel, a wor eföü krisolait, eföü oniks me eföü chasper. Ekkeei faaw öüche ra kamasolong lón leenien ömmwöchür kewe mi för seni kolt. 14A wor ekkewe engol me rüwöföü faaw öüchche; eföü me eföü fäniten ew me ew iten nöün Israel kewe mwän. Eföü me eföü kewe faaw öüchche a rup wón usun och impwang, iten ew me ew kewe engol me ruu einang.
15Ra föri ekkóch sääl seni kolt mi mwirinnö usun lüül mi ólóól fäniten ewe chechchen fänimmwär an epwe fööfö ngeni ewe üfen souasór mi foutout. 16Iwe, ra pwal föri ruu leenien ömmwöch seni kolt pwal ruofóch ring seni kolt o ra föötätä ekkewe ring ngeni ekkewe ruu pwokuukun ewe chechchen fänimmwär me asan. 17Mwirin, ra fööti ekkewe ruofóch sääl mi för seni kolt ngeni ekkewe ring mi nóm wón ekkewe pwokuukun ewe chechchen fänimmwär. 18Iwe, ra fööti leesópwun ekkewe sääl me rüosóp ngeni ekkewe ruu leenien ömmwöch o föötiretä ngeni ekkewe afföün wón afaren ewe wääwup üfen souasór mi foutout me fän mesan. 19Iwe, ra pwal föri rüofóch ring seni kolt o apacheeretä ngeni pwal ekkewe ruu pwokuukun ewe chechchen fänimmwär me fan, soosolong ngeni ewe wääwup üfen souasór. 20Mwirin, ra föri pwal rüofóch ring o apacheeretä ngeni leesópwun ekkewe afföün wón afaren ewe chechchen fänimmwär me fan, mi nóm fänmesen ewe wääwup üfen souasór mi foutout sooso ngeni ewe lekaföwün lukalapan, asatän chök ewe önükün lukalapen ewe wääup. 21Iwe, ra aea sääl mi arawaraw le fööti ekkewe ringen lepwülün ewe chechchen fänimmwär ngeni ekkewe ring wón ewe wääwup üfen souasór mi foutout. Ren ei lapalap, ewe chechchen fänimwär a fööfö nüküchchar ngeni ewe wääup üfen souasór asen ewe önükün lukalap mi ling. Ekkeei mettóch meinisin ra för usun minne ewe SAMOL a öllük ngeni Moses.
Pwal ekkóch üüf fäniten ekkewe souasór(Exodus 28:31-43)
22Iwe, ra föri ewe üüf litinimwär mi arawaraw o ekis langattam epwe nóm fän ewe wääwup üfen souasór, nge unusan meinisin a ttur seni suwain mi arawaraw. 23Nge lukalapen ewe üüf litinimwär mi arawaraw o ekis langattam a wor leawan fäniten leenien katolongen möküren Aaron. Iwe, pwellin leawen ei üüf a wor memin usun kalaan pwe esap tongeni kamw. 24Mwirin, ra pwal kapachätä ekkewe uluulun föün ewe irä itan pómekränet mi kukkumos lepwülün ei üüf. Ekkeei uluulun föün irä ra för seni suwain mi arawaraw, forkeet me parapar. 25Iwe, ra pwal föri ekkewe peel seni kolt mi mwirinnö o apacheretä pwellin lepwülün ewe üüf mi arawaraw o langattam nge ra anómwur lefiilen ekkewe uluulun föün ewe irä itan pómekränet mi kukkumos. 26Ekkewe peel me ekkewe uluulun föün ewe irä itan pómekränet mi kukkumos ra tikipat wón pwellin lepwülün ewe üüf litinimwär mi arawaraw o ekis langattam. Aaron epwe üföüf ei üüf lupwen epwe föri an angang ngeni ewe SAMOL, usun minne ewe SAMOL a öllük ngeni Moses.
27Mwirin, ra pwal föri ekkewe pinu üföüfen lón mi langattam o pwechepwech seni töör mi pwechepwech o mwirinnö fäniten Aaron me nöün kewe mwän. 28Iwe, ra föri ewe äfäichimw seni töör mi pwechepwech o mwirinnö, ra pwal föri ekkewe riirin wón mökür me ekkewe rausesin lón seni töör mi pwechepwech o mwirinnö. 29Ra pwal föri ekkewe ökkönük seni töör mi pwechepwech o mwirinnö nge ra chü ren suwain mi arawaraw, forkeet me parapar, usun minne ewe SAMOL a öllük ngeni Moses.
30Ömwüchchülón, ra föri ewe kolt mi chööpöp, iei ewe mwärämwär mi pin, ra föri seni kolt mi mwirinnö, nge ra ruputätä ei kapas wón usun rupun wón impwang: A KÄIMWÜLÓ FÄNITEN EWE SAMOL. 31Mwirin, ra föötätä efóch lüül mi arawaraw wón ewe mwärämwär pwe epwe riiritä wón ewe äfäichimw, usun minne ewe SAMOL a öllük ngeni Moses.
Moses a äämwa le cheki ewe angang
32Iei usun, a wesöchüló meinisin angangen wón ewe imw mangaku mi pin, iei ewe Imw Mangaku Leenien Chufengen. Ekkewe chón Israel ra föri iteiten mettóch meinisin usun chök minne ewe SAMOL a öllük ngeni Moses. 33Mwirin, ra uweato unusen ewe imw mangaku mi pin ren Moses. Ra uweato ewe imw mangaku me ekkewe pisekin lón meinisin, ekkewe ömmwöch, ekkewe paap, ekkewe ääpenges, ekkewe üür me ekkewe wäänipwu. 34Ra pwal uweato ewe pwölüwpöl mi för seni ünüchchen ätemwänin siip mi kapar, ewe pwölüpwöl mi för seni ünüchchen kuuch me ewe chechchen refirefin lón, 35pwal ewe pwórofel mi nóm ewe pisekin Pwärätä lón fiti ämmwärin kewe me ewe pwölüpwölün omwusomwusen tipis, 36ewe cheepel fiti ekkewe pisekin wón meinisin me ewe pilawa mi esissilätä pwe Kot a nóm, 37ewe leenien etittin mi för seni kolt mi mwirinnö fiti ekkewe telin laamp mi nóm wón me ekkewe pisekin atawen wón meinisin, pwal ewe apüra fäniten alöölön ekkewe laamp pwe repwe tin, 38ewe róngen asór mi för seni kolt, ewe löön kepit mi mis, ewe angas fäniten ewe asóren ötüöt mi pwokkus me ewe kaaten fäniten ewe asamen tolong lón ewe imw mangaku, 39ewe róngen asór mi för seni piraas fiti ewe póón lón mi för seni piraas, ämmwärin kewe me ekkewe sakkopaaten pisekin meinisin, pwal ewe üülong fiti uchangan we, 40ekkewe kaaten fäniten aróngóróngen tittin ewe leeni lükün fiti ürer me wäänifótur kewe, pwal ewe kaaten fäniten ewe asamen tolong lón ewe leeni lükün, ekkewe sääl me ekkewe pwurowók fäniten aróngóróngen tittin ewe leeni lükün, meinisin ekkewe sakkopaaten pisek fäniten ewe imw mangaku mi pin, iei ewe Imw Mangaku Leenien Chufengen. 41Ra pwal uweato ekkewe mangaku mi tür fäniten üföüfen angangen lón ewe imwenfel mangaku, ikkeei ekkewe üüf mi pin fäniten ewe souasór Aaron pwal ekkewe üüf fäniten nöün kewe mwän lupwen repwe angang pwe iir souasór.
42Ekkewe chón Israel ra äwesi le föri ekkewe angang meinisin usun chök minne ewe SAMOL a öllük ngeni Moses. 43Iwe, Moses a äämwa le cheki ewe angang o küna pwe ekkewe aramas ra äwesi le föri usun chök minne ewe SAMOL a öllük. Iei minne, Moses a efeiöchür.
Ewe Imwenfel mangaku a köüütä
40Mwirin, ewe SAMOL a apasa ngeni Moses: 2“Kopwe öüüwetä ewe imwenfel mangaku, iei ewe Imw Mangaku Leenien Chufengen, lón ewe äewin ränin ewe äewin maram. 3Kopwe anómwu ewe pwórofel mi nóm ewe pisekin Pwärätä lón, lón ewe imwenfel mangaku nge kopwe awora eppetin lón pwe epwe refiieló ewe pwórofel ren ewe cheech mangaku. 4Iwe, kopwe uwalong ewe cheepel o isenätä meet kewe repwe nóm wón. Mwirin, kopwe uwalong ewe leenien etittin o isettä ekkewe laamp wón. 5Kopwe pwal eleenia ewe róóng mi för seni kolt fäniten ewe asóren ötüöt pwe epwe nóm peekiwuun ewe refiref äwenewenen ewe pwórofel mi nóm ewe pisekin Pwärätä lón. Iwe, kopwe pwal eittiwätä ewe cheech mangaku ren ewe leenien tolong lón ewe imwenfel managku.
6Kopwe eleenia ewe róngen asóren keek pwe epwe nóm mwen ewe leenien tolong lón ewe imwenfel mangaku, iei ewe Imw Mangaku Leenien Chufengen. 7Iwe, kopwe anómwu ewe üülong lefiilen ewe Imw Mangaku Leenien Chufengen me ewe róngen asóren keek. Mwirin, kopwe alöölölong kólik lón ei üülong. 8Mwirin, kopwe öüüwetä aróngóróngen tiitin pwellin ünükkün ewe leeni lükün ewe imwenfel mangaku o eittiwätä ewe kaaten mangaku ren ewe leenien tolong lón ewe leeni lükün.
9Iwe, kopwe angei ewe löön kepit mi mis o epiti ewe imwenfel mangaku me iteiten mettóch meinisin mi nóm lón. Kopwe epinaló ewe imwenfel mangaku me pisekin lón meinisin. Iwe, epwe pin. 10Mwirin, kopwe pwal epiti ewe róngen asóren keek me pisekin meinisin. Kopwe epinaló ewe róóng; iwe, epwe fókkun pin. 11Iwe, kopwe pwal epiti ewe üülong me uchangan we o epinireló.
12Iwe, kopwe emmwenato Aaron me nöün kewe mwän ren ewe leenien tolong lón ewe Imw Mangaku Leenien Chufengen o limetir ren kólik. 13Mwirin, kopwe öüföüfa ngeni Aaron ekkewe üüf mi pin. Kopwe pwal epiti i o epinaló pwe epwe angang ngeniei pün i souasór. 14Iwe, kopwe pwal emmwenato nöün kewe mwän o öüföüfa ngeniir ekkewe pinu üföüfen lón mi pwechepwech o langattam. 15Iwe, kopwe epitir usun chök óm epiti semer we pwe repwe angang ngeniei pün iir souasór. Ar kepit epwe atolonger lón ewe wiisen souasór epwe sópwósópwóló fäniten ekkewe tettelin pilóón aramas meinisin repwe feitto me mwirin.” 16Iwe, Moses a föri iteiten ekkewe mettóch meinisin usun chök minne Kot a öllük ngeni i.
17Ina minne, ewe imwenfel mangaku a köüütä lón ewe äewin ränin ewe äewin maram lón ewe oruuwen ier. 18Lupwen Moses a öüüwetä ewe imwenfel mangaku, a fótuki ekkewe wäänipwu lón leenier o öüüwetä ekkewe paap. Iwe, a siikalong ekkewe ääpenges o öüüwetä ekkewe üür. 19Mwirin, a emeresaló ewe mangaku wón aróngóróngun ewe imwenfel o isettä ekkewe sässärin pwölüpwölün asan, usun minne ewe SAMOL a öllük ngeni i.
20Iwe, a angei ewe pisekin Pwärätä o isenalong lón ewe pwórofel, a pwal siikalong ekkewe ämmwär lón ekkewe ring wón ewe pwórofel o isettä ewe pwölüpwölün omwusomwusen tipis wón. 21Mwirin, a uwealong ewe pwórofel lón ewe imwenfel mangaku o eittiwätä ewe refiref mangaku pwe epwe refiieló ewe pwórofel mi nóm ewe pisekin Pwärätä lón, usun minne ewe SAMOL a öllük ngeni i.
22Iwe, Moses a eleenia ewe cheepel lón ewe Imw Mangaku Leenien Chufengen peliefengin lón ewe imwenfel mangaku peekiwun ewe refiref. 23Mwirin, a isettä ekkewe pilawa o etettelöchchür wón ewe cheepel me fän mesen ewe SAMOL, usun minne ewe SAMOL a öllük ngeni i.
24Iwe, a pwal eleenia ewe leenien etittin lón ewe Imw Mangaku Leenien Chufengen nge a anómwu äwenewenen ewe cheepel me peliöörün lón ewe imwenfel mangaku. 25Iwe, a isettä ekkewe laamp wón leenier kewe me mwen ewe SAMOL, usun minne ewe SAMOL a öllük ngeni i.
26Iwe, Moses a pwal eleenia ewe róóng mi för seni kolt lón ewe Imw Mangaku Leenien Chufengen sooso ngeni fän mesen ewe refiref. 27Iwe, a keni ewe asóren ötüöt mi pwokkus wón ewe róóng, usun minne ewe SAMOL a öllük ngeni i.
28Mwirin, a eittiwätä ewe kaaten ren ewe leenien tolong lón ewe imwenfel mangaku. 29Iwe, a pwal anómwu ewe róngen asóren keek arap ngeni ewe leenien tolong ngeni ewe imwenfel mangaku, iei ewe Imw Mangaku Leenien Chufengen. Iwe, a ääni ekkewe asóren keek me asóren föün wiit wón, usun minne ewe SAMOL a öllük ngeni i.
30A pwal eleenia ewe üülong lefiilen ewe Imw Mangaku Leenien Chufengen me ewe róngen asóren keek o alöölölong kólik lón fäniten limelim. 31Iwe, Moses me Aaron me nöün Aaron kewe mwän ra aea ei üülong le limeti pöüür me pecheer. 32Ra limetir iteiten fansoun lupwen ra tolong lón ewe Imw Mangaku Leenien Chufengen ika pwal lupwen ra ämweto ngeni ewe róngen asór, usun minne ewe SAMOL a öllük ngeni Moses.
33Mwirin, Moses a förätä aróngóróngen tiitin ewe leeni lükün ewe imwenfel mangaku me ewe róngen asór. Iwe, a pwal eittiwätä ewe kaaten ren ewe leenien tolong lón ewe leeni lükün. Iei usun, Moses a äwesaló ewe angang.
Lingen ewe SAMOL a ouraló lón ewe Imwenfel mangaku
34Mwirin, ewe kuchu a pwölüwoló ewe Imw Mangaku Leenien Chufengen, o lingen ewe SAMOL a ouraló ewe imwenfel mangaku. 35Iwe, Moses esap tongeni tolong lón ewe Imw Mangaku Leenien Chufengen pwokiten ewe kuchu a chök nómwóló wón o lingen ewe SAMOL a ouraló ewe imwenfel mangaku.
36Lón unusen fansoun än ekkewe chón Israel sässääi, iteiten fansoun lupwen ewe kuchu a langatä seni asen ewe imwenfel mangaku o mwöküt, ra pwal önükünükür o sópweló ar sääi. 37Nge are ewe kuchu esap langatä, resap önükünükün sääi tori ewe rän ewe kuchu epwe langatä o mwöküt. 38Ewe kuchuun ewe SAMOL a nóm asen ewe imwenfel managku lerän, nge lepwin, a wor ekkei a nóm lón ewe kuchu pwe ekkewe aramasen Israel meinisin ra tongeni küna. Ei a sópwósópwóló le fis lón unusen ar sässääi.