Esther

Ewe king Ahasuerus a asapwilätiw kiwiin Vashti

1 Iei usun meet a fis lón mwüün King Ahasuerus (iei i Xerxes), iei i ätewe Ahasuerus ewe mi nemeni 127 eif, mi achööwaló seni India tori Ethiopia. 2Lón ena fansoun, King Ahasuerus a nemeni mwüün we seni an we leenien móótun king lón ewe leeni mi pöchökkül tittin lón Susa. 3Iwe, lón öülüngätin ierin an nemenem, i a föri ew kametip fäniten nöün kewe samol me nöün kewe nöüwiis meinisin. Pwal ekkewe souemmwenin sounfiun Persia me Media, ekkewe aramas tekia me ekkewe samolun ekkewe fönü ra nóm.

4Lón üküükün 180 ran ewe king a öküna ngeniir öüküükün chómmóngun wöwün we pwal amwararen me lingen mwüün we. 5Iwe, lupwen ra mwüch ekkewe rän, ewe king a föri ew kametip lón üküükün fisu rän fäniten ekkewe chón angangen lón ewe imwen king me ekkewe nöüwiis meinisin - seni ekkewe mi tekia tori ekkewe mi kis. Ei kametip a fis lón ew leenien iräling mi amassawa o tittiló lükün ewe imwen king mi nóm lón ewe leeni mi pöchökkül tittin lón Susa. 6Ewe leenien iräling mi amassawa a ofout ngeni mangaku mi pwech me arawaraaw nge ra ittiwetä ren sääl mi fókkun pwech me sääl mi parachól o ra fööfö ngeni ekkóch ring seni silifer wón ekkewe üür mi för seni ewe sókkun faaw mi misimis itan marbol. Mi pwal wor ekkewe leenien móót usun peet mi för seni kolt me silifer ra nóm leppwülün ew leeni mi cheech ngeni faaw mi sakkopaat önüweer, faaw mi arawaraaw me ewe faaw mi misimis itan marbol mi pwech me chól. 7Ra öünü aramas wain lón kap mi för seni kolt, nge ew me ew kewe kap a sakkofesen lapalapen ew seni pwal ew. Iwe, ewe wain meren ewe king a somwosomwoló pün ewe king a öllük pwe resap ätitini. 8Fän än ewe king öllük, mi mwüümwütä ngeni emön me emön chón kökkööto pwe epwe wün lón üküükün an mochen, pün ewe king a öüröüra ngeni ekkewe chón köün wain pwe repwe öünü ngeni emön me emön üküükün meet i a mochen nge resap eriäniir.

9Nge lón ei chök fansoun, kiwiin Vashti a pwal awora ew kametip fäniten ekkewe fefin mi nóm lón ewe imwen king, imwen ewe King Ahasuerus.

10Iwe, lón efisuen ränin ewe kametip, lupwen a mwänek letipen ewe king ren ünüman wain, a öllük ngeni Mehuman, Biztha, Harbona, Biktha, Abaktha, Zethar me Karkas iir ekkewe füümön mwän chón angang ätelipich mi wiisen angang ngeni, 11pwe repwe emmwenato fän mesan ewe kiwiin Vashti, nge epwe mwärämwär mwärin we mwärin kiwiin. Ätei a mochen pwe epwe eingaló liäöchchün Vashti ngeni ekkewe aramas me ekkewe nöüwiis, pün neminnewe a fókkun liäöch le katol. 12Nge lupwen nöün ewe king kewe chón angang ätelipcih ra uweato än ewe king we öllük ren Kiwiin Vashti, neminnewe esap mochen epwe feitto. Iei minne ewe king a fókkun lingeringer o a pwuropwur lón letipan ren an soong.

13Iwe, ewe king a mwittir köörato nöün kewe chón öüröür mi weweiti ekkewe öllükün Persia me ekkewe öörüni, pün i a soun eisiniir ar öüröür. 14Ikkeei iten ekkeei mwän: Karshena, Shethar, Admatha, Tarshish, Meres, Marsena me Memukan, iir ekkewe füümön nöüwiis tekian Persia me Media. Ikkeiir chiechien ewe king kewe mi kkan ngeni. A mwüümwütä ngeniir ar repwe tongeni chuuri ewe king iteiten fansoun, pwal iir ra móttäsini wiis mi tekia me lón ewe mwüü.

15Iwe, ewe king a eisiniir, “Meet epwe fis ngeni Kiwiin Vashti? Meet chappen tipis ewe öllük a awora fäniten emön kiwiin esap mochen älleasochisi än ewe king öllük a ökkünöweló ngeni nöün kewe chón angang ätelipich pwe repwe uwealó ren?”

16Mwirin, Memukan a pölüweni ei kapas eiis me fän mesen ewe king me ekkewe nöüwiis, “Kiwiin Vashti a föri minne a mwääl, esap chök ngeni ewe king nge pwal ngeni ekkewe nöüwiis meinisin me aramasen ekkewe fönü meinisin mi nóm fän nemenien King Ahasuerus. 17Pün porausen föfförün ewe kiwiin ei epwe chööüfätäl ngeni fefin meinisin; iwe, iir repwe poputä le lükümmach ngeni pwülüwer o apasa, ‘Ewe King Ahasuerus a öllük ngeni ewe Kiwiin Vashti pwe epwe feitto ren, nge neminnewe esap mochen feitto.’ 18Iwe, seni ei fansoun, ekkewe fiin Persia me Media pwülüwen ekkewe nöüwiis mi rongorong usun föfförün ewe kiwiin ei repwe pwal pölüweni nöün ewe king kewe nöüwiis meinisin lón ei chök sókkun lapalap. Iwe, epwe chök lapaló osuufölüngaw me fitikoko lón mwuum ei.

19Iei minne, are mi öch mereemw en äm king, aia meefätä pwe kopwe föri ew öllük epwe makkelong lón öllükün Persia me Media esap tongeni epwe siiwil. Ei öllük epwe osomänei pwe Vashti esap chüen feitto fän mesom en ewe king. Mwirin, en äm king kopwe pwal angei seni neminnewe wiisan we wiisen kiwiin o ngeni pwal emön fefin mi mwirinnö lap seni i. 20Mwirin, lupwen än ewe king ei öllük epwe esilesilfeil leemelen unusen mwüün mi fókkun wätte, ekkewe fefin meinisin mi pwüpwülü repwe meniniti pwülüwer kewe, ese lifilifil ika iir aramas tekia ika aramas tekisón.”

21Iwe, ewe king me ekkewe nöüwiis ra pwapwa ren ei öüröür. Iei minne ewe king a föri usun minne Memukan a ääni memmeef. 22Iwe, a tiinaló taropwe ngeni ekkewe eifen lón ewe mwüü meinisin, ngeni ew me ew fönü lón en me makken fönüwan, ngeni ew me ew mwiichen aramas lón en me kapasen fönüwan. Ei öllük a esilesil lón än ew me ew mwiichen aramas kapas pwe iteiten emön me emön mwän epwe samolun lón pwisin imwan.

Esther a tolong lón ewe wiisen kiwiin

2 Iwe, ekkóch fansoun me mwirin, lupwen än ewe king Ahasuerus soong a kisikiisitiw, a chechchemeni Vashti me meet i a föri, a pwal chechchemeni ewe öllük i a atoowu fänitan. 2Mwirin, nöün ewe king kewe chón angang mi wiisen eteneki ra apasa ngeni, “Kopwe mwüüt ngeni keem pwe äm aipwe sacheei lón unusen mwuum o küttato ekkewe föpwül mi fókkun liäöch resap mwo pwüpwülü fänitom en äm king. 3En king, kopwe pwal filätä ekkóch nöüwiis me lón ew me ew fönü mi nóm fän nemeniom pwe repwe uweato ekkewe föpwül meinisin mi fókkun liäöch resap mwo pwüpwülü lón ewe imwen fefin mi nóm lón ewe leeni mi pöchökkül tittin lón Susa. Iwe, kopwe atolonger fän tümwünüen Hekai, nöün ewe king we chón angang ätelipich mi wiisen tümwünü ekkewe fefin. Iwe, repwe föri ngeniir ewe angangen ammol ren apwokkus me kepit. 4Mwirin ena, ewe föpwül en king a koon seilló óm efich me leiir, i epwe siwili Vashti lón ewe wiisen kiwiin.” Iwe, ewe king a pwapwaiti ei ekiek; iei minne i a föri usun minne ra apasa.

5Iwe, a wor emön re Sus seni ewe einangen Benjamin itan Mordekai nöün Jair we mwän, i emön mwirimwirin Shimei me Kish a nóm lón ewe leeni mi pöchökkül tittin lón Susa. 6Ätei i chienen ekkewe chón ooló seni Jerusalem ra fiti Jehoiachin ewe kingen Judah le ooló, Nebukadnezzar ewe kingen Babylon a uweireló. 7Iwe, mi wor emön nöün pwiin semen Mordekai we, emön föpwül mi fókkun lapalapöch me mesemesöch itan Hadasah, nge ra pwal kööri ngeni Esther. Lupwen semen me inen neminnei ra mäló, Mordekai a ächeelonga lón an famili o fólenätä pwe a usun chök wesewesen nöün.

8Iwe, a fis pwe lupwen än ewe king we öllük me osomän a arongorongfeil, ra uweato chómmóng föpwül ngeni än ewe king we imwen fefin mi nóm lón ewe leeni mi pöchökkül tittin lón Susa o ra anómwur fän än Hekai tümwün. Iwe, ra pwal uweato Esther ngeni ewe imwen king o atolonga i fän än Hekai tümwün, ätewe mi wiisen tümwünü ewe imwen fefin. 9Iwe, Hekai a ingeiti Esther o a kirekiröch ngeni. Ina minne, a emwittiri ar repwe föri ngeni neminnewe ewe angangen ammol ren apwokkus me kepit, a pwal ngeni wiisan mwöngö mi sókkóló. Iwe, ätewe a ewiisa füümön föpwül chón angang mi kefil seni lón ewe imwen king pwe repwe angang ngeni Esther. Iwe, a ömwökütaló neminnei me nöün kewe chón angang föwpül ngeni ew leeni mi fókkun mwirinnö me lón ewe imwen fefin.

10Nge Esther esap pwääri ika i fiin menni fönü me ifa leewon an famili, pün Mordekai a öllük ngeni pwe esap akkafat. 11Iwe, iteiten rän, Mordekai a chök ekkeliwin le fätäl arap ngeni ewe leeni mi amassawa lükün ewe imwen fefin, pwe epwe eiis ika a ifa usun Esther o pii ika meet a fis ngeni i.

12Me mwen an epwe tori fansoun än emön föpwül epwe tolong ren King Ahasuerus, ewe föpwül epwe akkomwen äwesi engol me ruu maramen angangen ammol ren apwokkus me kepit, usun mi köpwüngüló fäniten ekkewe föpwül. Lón üküükün wonu maram ewe föpwül epwe kepit ngeni lömmis mi för seni och appach mi pwokkus itan möör, nge lón pwal wonu maram epwe kepit ngeni lö mi pwokkus me kana sakkopaten apwokkusun wón inis. 13Iwe, lupwen a tori fansoun än emön föpwül epwe feilló ren ewe king, epwe iei usun lapalapen an epwe feilló ren ewe king: A mwüümwütä ngeni ewe föpwül an epwe üföüf ese lifilifil meet sókkun üüf ika pisekin ofouten inis mi öüchchea i a mochen epwe pippisek le sópwei lieöchchün. 14Lekkuniól, ewe föpwül epwe tolong ren ewe king, nge lesossor epwe toowu o liwinló lón pwal ew imwen fefin mi nóm fän tümwünüen Shaashkaz, nöün ewe king we chón angang ätelipich mi wiisen tümwünü ünüpwülüwen ewe king kewe. Ewe föpwül esap liwinsäfäl ngeni ewe king chiilón chök ika ewe king a efich neminnewe o tiiti i nge epwe föümännei itan.

15Iwe, lupwen a tori än Esther fansoun pwe epwe feilló ren ewe king, esap tungór och mettóch me lükün chök meet Hekai nöün ewe king we chón angang ätelipich mi wiisen tümwünü ewe imwen fefin a ääni öüröür ngeni. Iwe, chókewe meinisin mi küna Esther ra fókkun efich i. (Esther i ewe nengngin Mordekai a mwüüti, i nöün Abihail tettelin semen Mordekai). 16Iwe, lupwen ra emmwenaló Esther ren King Ahasuerus lón ewe imwen king lón ewe äengolun maram, iei ewe maram Tebeth,a lón efisuen ierin an nemenem, 17ewe king a saani Esther lap seni ekkewe pwal ekkóch föpwül. Iwe, Esther a fókkun mwung me küna chenin meren ewe king lap seni ekkewe föpwül meinisin. Ina minne, ewe king a isettä ewe mwärin kiwiin wón möküran o a ewiisa ngeni ewe wiisen kiwiin pwe epwe siwili Vashti. 18Ren apwaapwan ei fansoun, ewe king a föri ew kametip mi wätte ngeni nöün kewe samol me nöün kewe nöüwiis fäniten Esther. Ewe king a pwal esilefeili pwe epwe wor ew ränin asöösö leemelen ekkewe fönü meinisin o a fangafangöch le fangaló chómmóng liffang mi pwääraló usun nónnómwun emön king.

Mordekai a seretä wón porausen och rawangaw

19Iwe, lupwen a tori oruuen fansoun än ekkewe föpwül meinisin ra chufengen, ina ótun nge Mordekai a emön nöüwiis, iei popun a móót lón ewe leeni mi nóm lón asamalapen tittin ewe imwen king. 20Nge Esther a chüen chök tükümaló leewon an famili me i fiin menni fönü, usun meet Mordekai a öllük ngeni, pün Esther a sópweló le älleasochisi än Mordekai öllük, usun chök minne a föri lupwen a nónnóm ren lón imwan.

21Iwe, lón ew ränin, lupwen Mordekai a föri wiisan lón ewe leeni mi nóm lón asamalapen tittin imwen ewe king we, Bikthana me Teresh, rüwömön me leiin nöün ewe king kewe chón angang ätelipich mi wiisen mammasa ewe leenien tolong ngeni ewe imwen king ra soong ren King Ashasuerus o rawei pwe repwe niieló i. 22Nge Mordekai a rongorong usun ewe raaw o a esile ngeni Kiwiin Esther. Mwirin, Esther a esile ngeni ewe king usun nge a apasa pwe a rong seni Mordekai. 23Iwe, lupwen a fis etittin are mi pwüng ei poraus, a pwä pwe mi let. Mwirin, ra fórusaló ekkewe mwän me rüwömön wón och leenien ffór. Iwe, unusen ei poraus a makkelong lón ewe pwuken uruwo me fän mesen ewe king.

Än Haman rawangaw ngeni ekkewe chón Sus

3 Iwe, ekkóch fansoun me mwirin, King Ahasuerus a alapatä Haman nöün Hammedatha we mwän, emön mwirimwirin Akak. A seikätä ätei o ewiisa ngeni i ew wiis mi tekia seni chienan kewe nöüwiis meinisin me lón ewe mwüü, kisitiw chök fän ewe king. 2Iwe, nöün ewe king kewe nöüwiis meinisin mi föri wiiser lón ewe leeni mi nóm lón asamalapen tittin ewe imwen king ra pwarootiw me mwen Haman o pwääri ar suuföl ngeni iteiten fansoun epwe pwereto, pün iei usun meet ewe king a öllük fänäsengesin Haman. Nge Mordekai chök esap mochen pwarootiw ika pwääri an suuföl ngeni.

3Mwirin, nöün ewe king kewe nöüwiis mi föri wiiser lón ewe leeni lón asamalapen tittin ewe imwen king ra eisini Mordekai, “Pwata ka pwuurätiw än ewe king öllük?” 4Ra kapas ngeni Mordekai iteiten rän, nge i esap mochen älleasochis ngeni ewe öllük. Mwirin, ra aporausa ngeni Haman usun, pün ra mochen küna ika Haman epwe tongeni engngiló ngeni föfförün Mordekai, pwokiten Mordekai a fen aporausa ngeniir pwe i emön chón Sus.

5Iwe, lupwen Haman a küna pwe Mordekai esap pwarootiw me mwan o esap pwal pwääri an suuföl ngeni, Haman a fókkun lingeringer. 6Iei minne, Haman a ekiekietä pwe esap niieló Mordekai chök. Nge pwokiten Haman a fen silei pwe Mordekai emön aramasen Sus, iwe, a ekiekietä pwe i epwe kütta alen an epwe arosaló pwal ekkewe chón Sus meinisin mi nóm feil leemelen unusen mwüün Ahasuerus.

7Iwe, lón ewe engol me ruuen ierin mwüün ewe King Ahasuerus, lón ewe äewin maram itan Nisan,a Haman a öllük pwe repwe pweii (wewen, repwe föri ewe angangen ekilekil ra eita ngeni purim) me fän mesan pwe repwe filätä menni rän me maram repwe föri ewe ekiek. Iwe, ewe pwee a esissila ewe engol me ülüngätin rän lón ewe engol me ruuen maram, iei ewe maram itan Adar.b

8Mwirin, Haman a feitto ren King Ahasuerus o apasa ngeni, “A wor ew sókkun mwiichen aramas mi toropasfeil o nómfeil leiin ekkewe aramas lón ekkewe fönü meinisin mi nóm lón mwuum. Ar öllük a sókkóló seni än ekkewe ekkóch sókkun mwiichen aramas, resap pwal mochen älleasochisi än ewe king kewe öllük. Iei minne, esap och mettóch epwe öch ngenuk en ewe king óm kopwe mwüüt ngeniir pwe repwe manaw. 9Nge ika pwe en king kopwe pwapwa ren; iwe, kopwe atoowu ew öllük pwe ekkeei aramas repwe ninniiló. Mwirin, ngang üpwe püngütiw 10,000 talent silifer.c lón pöün chókana mi nemeni angangen mwüün ewe king pwe repwe isenalong lón än ewe king leenien iseis.”

10Iwe, ewe king a tipeew ngeni o önüküchchara an ekiek ren an üttawu nöün we ringen ipwang seni wón ächefen pöün o ngeni Haman nöün Hammedatha we mwän ewe mwirimwirin Akak, ätewe mi opwut ekkewe chón Sus. 11Iwe, ewe king a üreni Haman, “Kopwe chök anómwu ewe mooni, nge ngang üwa mwüütätä ngenuk pwe kopwe föri uwonom ngeni ekkewe aramas.”

12Mwirin, lón ewe engol me ülüngätin ränin ewe äewin maram, Haman a köörato nöün ewe king kewe soummak meinisin. Iwe, a liwoowomönü ngeniir masowen ekkewe taropwe repwe makkei ngeni kepinan ekkewe sakkopaaten fönü me nöüwiisen ew me ew kewe fönü lón makken ew me ew fönü, lón än ew me ew mwiichen aramas kapas meinisin minne i a öllük ngeni nöün ewe king kewe nöüwiis mi tekia. Iwe, ekkewe taropwe ra sain lón iten ewe King Ahasuerus o impwang ren nöün ewe king we ring. 13Iwe, ra tiinaló ekkewe chón künö pwe repwe uwealó ekkewe taropwe ngeni ekkewe fönü meinisin mi nóm fän nemenien ewe king, pwe chón ekkewe fönü repwe efeiengawa, niieló o arosaló ekkewe chón Sus meinisin, seni kükkün tori chinlap, pwal fefin me semiriit, lón ew chök rän. Ra öpwüngaló pwe ei föfför epwe fis lón ewe engol me ülüngätin ränin ewe engol me ruuen maram, iei ewe maram Adar, arapakkan ew ier me mwirin. Iwe, repwe angei pisekin ekkewe chón Sus o ngeni chókewe mi niireló. 14Echö kapiin ei taropwe epwe tori iteiten ew me ew fönü pwe iei ew öllük o epwe esilesil ngeni aramasen ekkewe mwüü meinisin pwe repwe mollotä pwe repwe föri wiiser lón ewe rän mi kefilitä.

15Iwe, fän inemouchchen än ewe king öllük, ekkewe chón künö mi uweei ekkewe taropwe ra mwittir feilló. Iwe, ewe öllük a esilesilfeil lón ewe leeni mi pöchökkül tittin lón Susa. Mwirin, ewe king me Haman ra móttiw pwe repwe wün, nge chón ewe telinimw Susa ra fókkun osukosuk.

Mordekai a tüngórei Esther pwe epwe älillis

4 Iwe, lupwen Mordekai a rong usun meinisin minne a fis, a kamwei üfan fän an letipeta, a üföüf üüf mi för seni tuuk o amworomworotä falangen ekkei wón möküran. A pwal feilló lukalapen ewe telinimw o leüommóng le kechiw me pwuchöör. 2Mwirin, a feilló o üütä ren asamalapen ewe imwen king, nge esap tolong lón, pün esap wor emön a tongeni tolong lón asamalapen imwen ewe king fän üfan mi för seni tuuk üföüfen letipeta. 3Iwe, lón iteiten ekkewe fönü ia än ewe king we öllük a tori ie, a fis letipeta leiin ekkewe chón Sus. Ra öchüün me kechiw me ngüüngüres, nge chómmóng leiir ra üföüf üüf mi för seni tuuk o móót lón falangen ekkei.

4Lupwen nöün Kiwiin Esther kewe chón angang fefin me ekkewe chón angang ätelipich ra feitto o aporausa ngeni usun Mordekai; neminnewe a fókkun riäfföü. Mwirin, a tiinaló ekkóch üüf ren Mordekai pwe epwe üföüf, nge epwe pwilitätiw me wón üfan mi för seni tuuk. Nge Mordekai esap mochen etiwa ekkewe üüf. 5Mwirin, Esther a köörato Hathak, emön me leiin nöün ewe king kewe chón angang ätelipich mi kefilitä pwe epwe tümwünü Esther. Iwe, Esther a öllük ngeni ätewe pwe epwe feilló pii ika meet a aosukosuka Mordekai me pwata a letipeta.

6Iwe, Hathak a feilló ren Mordekai lón ewe leenien chuulap lón ewe telinimw mi nóm mwen asamalapen ewe imwen king. 7Nge Mordekai a aporausa ngeni Hathak meinisin minne a fis ngeni, pwal üküükün ewe mooni Haman a pwon pwe epwe püngülong lón än ewe king leenien iseis fäniten karosolón ekkewe chón Sus meinisin. 8Mordekai a pwal ngeni Hathak echö kapiin ewe öllük mi köpwüngüló me lón Susa fäniten än ekkewe chón Sus meinisin repwe karosoló, pwe epwe pwääri ngeni Esther. Mordekai a pwal üreni Hathak pwe epwe äwewei ngeni Esther ewe taropwe o peseei ngeni Esther pwe epwe feilló fän mesen ewe king pwe epwe tungór ngeni an epwe ümöümöch ngeni, epwe pwal tungór ngeni ewe king fäniten aramasan kewe.

9Iwe, Hathak a liwinló ren Esther o aporausa ngeni än Mordekai kewe kapas. 10Mwirin, Esther a üreni Hathak pwe epwe liwinsäfäliló o aporausa ngeni Mordekai ei poraus: 11“Nöün ewe king kewe chón angang meinisin me aramasen ekkewe fönü meinisin mi nóm fän nemenien ewe king ra silei pwe are emön mwän ika emön fefin epwe tolong fän mesen ewe king lón imwan we, nge ewe king esap kööri i; iwe, mi wor ew chök öllük fänitan: ewe aramas epwe chök ninniiló, chiilón chök, are ewe king epwe eiti ngeni ewe wókun nemenem mi för seni kolt, iwe, ewe aramas epwe manaw. Nge ren ngang wón inisi, e kärään chök luuló üküükün iliik rän me mwirin äi kökkö pwe üpwe feilló ren ewe king.”

12Iwe, Hathak a esile ngeni Mordekai än Esther kewe kapas. 13Nge Mordekai a tiinaló ren Esther minne a ääni pölüwen: “Kosap ekieki lón letipom pwe pwokiten en ka nóm lón ewe imwen king, iwe, en chök me leiin ekkewe chón Sus meinisin kopwe pichiwu seni ewe feiengaw. 14Pün are kopwe chök fanafanaló lón ei fansoun, a tongeni tüfich pwe älillis me ngasaló fäniten ekkewe chón Sus epwe pwäätä seni pwal ew leeni, nge en me chón än semom famili öüpwe mäló. Iwe, iö a silei ika fen iei popun pwe ka tolong lón ewe wiisen kiwiin fänäsengesin ew fansoun usun ei?”

15Mwirin, Esther a tiinaló ren Mordekai minne a ääni pölüwen: 16“Kopwe feilló o emwiicha fengeni ekkewe chón Sus meinisin mi nóm Susa o öüpwe öchüün fänitei. Öüsap mwöngö, öüsap pwal wün lepwin me lerän lón üküükün ülüngät rän. Iwe, ngang me neii kewe chón angang fefin aipwe pwal öchüün usun chök ämi. Mwirin, ngang üpwe feilló ren ewe king, inamwo ika üpwe pwuurätiw ewe öllük. Iwe, ika ngang üwa mäló, iwe, sipwe fetei, üwa mä mäló.”

17Mwirin, Mordekai a feilló o öpwönüwetä meinisin än Esther kewe öüröür ngeni.

Än Esther angangen tolong lefiil

5 Iwe, lón ewe öülüngätin ränin än Esther öchüün, a üföüfolong üfan üfen kiwiin. Mwirin, a tolong lón ewe leeni mi tittiló soosongeni ewe imwen king o üütäló äwenewenen ewe ruumwen king. Nge ewe king a móót wón an we leenien móótun king lón imwan we o säpewu ngeni ewe asamen tolong. 2Iwe, lupwen ewe king a küna Kiwiin Esther pwe a üütä lón ewe leeni mi tittiló soosongeni ewe imwen king, a kööralong Esther o eitawu ren ewe wókun nemenem mi för seni kolt mi nóm lepöün, pün Esther a küna ümöümöch meren. Iei minne, Esther a kineto o attapa ülüülen ewe wókun nemenem.

3Iwe, ewe king a eisini neminnewe, “Meet ka mochen, Kiwiin Esther? Meet óm tungór? Ika mwo kopwe tungór esópwun ewe mwüü, ngang üpwe chök mwüütätä ngenuk!”

4Ina minne, Esther a pölüweni o apasa, “Are a öch mereemw en king, kose mochen en äi king me Haman öüpwe feitto ikenäi ngeni ewe kametip ngang üwa fen amollätä fänitom, en king.”

5Iwe, ewe king a säp ngeni nöün kewe chón angang mi wiisen eteneki o apasa, “Öüpwe üreni Haman pwe epwe mwittir feitto iei chök pwe aipwe fiti ewe kametip usun minne Esther a apasa.” Ina minne ewe king me Haman ra feilló ngeni ewe kametip Esther a amollätä. 6Nge lupwen ar ra ükkün wain lón ewe kametip, ewe king a eisini Esther, “Kopwe üreniei meet ka wesewesen mochen. Meet óm na tungór? Ngang üpwe chök mwittir mwüütätä ngenuk, ika mwo kopwe tungór esóp ewe mwüü!”

7Iwe, Esther a pölüweni o apasa, “Iei äi ei tungór me äi mochen mi alóllóól: 8Are ngang üwa küna ümöümöch me fän mesom en äi king, o are epwe öch mereemw en king pwe kopwe mwüüt ngeniei äi mochen o öpwönüwetä äi tungór, kose mochen en äi king me Haman öüpwe feitto lesor ngeni ewe kametip ngang üpwe amollätä fänitemi. Mwirin, lesor ngang üpwap äwewei ngenuk meet popun äi föri ei.”

Än Haman lingeringeriti Mordekai

9Iwe, lupwen Haman a feilló seni ewe kametip lón ewe ränin, a uren pwapwa o mwänek lón letipan. Nge lupwen Haman a küna Mordekai pwe a chök móótóló lón asamalapen tittin ewe imwen king, nge esap üütä ika chechcheech ren an nuokkus me mwan, Haman a fókkun lingeringeriti Mordekai. 10Inamwo nge Haman a chök engngiló ngeni o feilló lón imwan. Mwirin, a tiiti o köörato chiechian kewe me pwülüwan we itan Zeresh. 11Iwe, Haman a einga ngeniir usun wätten wöwün me chómmóngun nöün mwän. A pwal einga ngeniir usun meinisin lapalapen än ewe king a asamolu i me an a etekiatä i asen ekkewe ekkóch nöüwiis me souemmwen. 12Mwirin, Haman a pwal sópweló le apasa, “Iwe, sap ikkana chök, pwe mi pwal wor och. Ngang chök ei ewe Kiwiin Esther a kööri pwe üpwe chieneni ewe king ngeni ewe kametip i a amollätä fänitem. Iwe, neminnewe a pwal kööriei pwe üpwe fiti i me ewe king le mwöngö lesor. 13Nge a siiteló äi menemenöch ren ekkeei mettóch meinisin lupwen üwa küna Mordekai ewe re Sus pwe a móót lón asamalapen tittin imwen ewe king we.”

14Mwirin, pwülüwan we itan Zeresh me chiechian kewe meinisin ra apasa ngeni i, “Kopwe öüüetä efóch üür leenien ffór epwe üküükün lime mwalü tekiaan. Iwe, lesossorun lesor kopwe tungórei ewe king pwe repwe fórusi Mordekai wón. Mwirin, kopwe pwapwa le fiti ewe king ngeni ewe kametip.” Ei memmeef a apwaapwai Haman. Ina minne a öllük pwe epwe köüütä ewe üür leenien ffór.

Ewe king a föri pwe Haman epwe asamolu Mordekai

6 Lón ewe pwinin, ewe king a osukosuk lón an möür. Ina minne a öllük pwe nöün kewe chón angang mi wiisen eteneki repwe uwato ewe pwuken uruwo mi makkelong lón ekkewe poraus mi fis lón mwüün. Iwe, ra älleani ewe pwuk me fän mesen ewe king. 2Iwe, a küna me lón ewe pwuken uruwo pwe a makketiw ew poraus usun än Mordekai a akkafat ewe raaw än Bikthana me Teresh. Ekkeei rüwömön mwän iir nöün ewe king chón angang ra wiisen mammasa ewe leenien tolong ngeni ewe imwen king. Ra rawei pwe repwe niieló ewe king.

3Mwirin, ewe king a eiis, “Meet sókkun liiwin sia ngeni Mordekai fäniten ach sipwe eitaöchchüw me esilla minne i a föri?” Nge nöün ewe king kewe chón angang ra pölüweni o apasa, “Esap wor och minne emön a föri fäniten ätei.”

4Iwe, ewe king a eiis, “Iö nan lón ewe leeni lükün?” Nge a fis pwe lón ewe ótun, Haman a chök kärään war o tolong lón ewe leeni lükün ewe imwen king pwe epwe tungórei ewe king an epwe fórusi Mordekai wón ewe leenien ffór i a amollätä fänitan.

5Nge nöün ewe king kewe chón angang mi wiisen eteneki ra üreni, “Haman a nóm ikenan, a üütä lón ewe leeni lükün.” Iwe, ewe king a öllük o apasa, “Öüpwe mwüüt ngeni pwe epwe tolong.”

6Iei minne, Haman a tolong, nge ewe king a eisini, “Meet ngang üpwe föri pwe üpwe eitaöchchüw emön mwän ngang üwa fókkun pwapwaiti?”

Iwe, Haman a ekiekielong lón lelukan, “Itä pwal iö ewe king a pwapwaiti an epwe eitaöchchüw lap seniei?” 7Iei minne, Haman a pölüweni ewe king o apasa, “Are en ewe king ka mochen kopwe eitaöchchüw emön, 8iwe, repwe uwato echö üfen king pwisin en äi king ka üföüf, repwe pwal emmwenato emön óris en king ka piin waawa o repwe ofouta ngeni wón möküren ewe óris sókkun fout mi nóm esissilen ewe king wón. 9Mwirin, kopwe öüröüra ngeni emön me leiin nöum kewe samol mi tekia pwe epwe uwealó ren ewe mwän ewe üüf me ewe óris pwe i epwe wiisen öüföüfa ewe mwän en king ka pwapwaiti óm kopwe eitaöchchüw. Mwirin, ewe mwän epwe móót wón ewe óris nge ewe samol mi tekia epwe emmwenifeili ätewe lón ekkewe aal leemelen ewe telinimw o kökkö me mwan, ‘Iei usun meet a fis fäniten ewe mwän ewe king a pwapwaiti pwe epwe eitaöchchüw.’ ”

10Mwirin, ewe king a öllük ngeni Haman, “Kopwe mwittir feilló iei chök. Kopwe angei ewe üüf me ewe óris o föri usun minne ka meefätä. Iwe, kopwe föri ei lapalap ngeni Mordekai ewe re Sus, ätewe mi móót leasamalapen ewe imwen king. Kosap likiti och minne ka fen apasa pwe kopwe föri meinisin.”

11Ina minne, Haman a angei ewe üüf o öüföüfa Mordekai. A pwal amóótätä Mordekai wón nöün ewe king we óris o emmwenaló i lón ekkewe aal leemelen ewe telinimw nge a kökkö me mwan, “Iei usun meet a fis ngeni ewe mwän ewe king a pwapwa le eitaöchchüw!”

12Mwirin, Mordekai a liwinsäfäl ngeni asamalapen tittin imwen ewe king we. Nge Haman a mwittir le liwinló ngeni imwan we, nge a pwölüweló möküran ren an letipeta me sääw. 13Iwe, Haman a aporausa ngeni Zeresh pwülüwan we me chiechian kewe meinisin usun ekkewe mettóch meinisin ra fis ngeni.

Iwe, nöün kewe souöüröür me Zeresh pwülüwan we ra apasa ngeni i, “Pwokiten Mordekai, ei mwän a äsääwók, i emön re Sus, iei minne esap tongeni pwönüwetä óm kewe akkóót óm kopwe üüngeni i. Epwe fókkun efeiengaw ngenuk óm kopwe sópweló le üüngeni!” 14Iwe, lupwen ra chüen kapas ngeni, nöün ewe king kewe chón angang ätelipich ra war o ra mwittir eweinaló Haman ngeni ewe kametip Esther a fen amollätä.

Haman a ffór nge sap Mordekai

7 Iwe, ewe king me Haman ra feilló fiti än Kiwiin Esther we kametip. 2Iwe, lón ewe ränin, lupwen ra wün wain lón ewe kametip, ewe king a kapas eiis säfäl ngeni Esther o apasa, “Kiwiin Esther, kopwe üreniei ika meet ka mochen. Meet óm na tungór? Ngang üpwe mwüüt ngenuk, ika mwo kopwe tungór esóp ewe mwüü!”

3Mwirin, Kiwiin Esther a pölüweni o apasa, “Are ngang üwa küna ümöümöch me fän mesom, en äi king, are mi pwal öch mereemw en king, kose mochen kopwe mwüüt ngeniei pwe üpwe manaw, iei äi tungór ngenuk fänitei. Iwe, kose mochen kopwe amanawa aramasei kana, iei äi tungór fäniter. 4Pün ngang me aramasei aia fen mööló ngeni chókana repwe efeiengawakeem, repwe niikeemiló o arosakeemiló. Are äm aipwe chök mööló pwe aipwe amanaw mwän me fefin; iwe, üpwe chök fanafanaló, pwokiten ei epwe och sókkun riäfföü mi chök kükkün än ewe king epwe osukosuk ren.”

5Ina minne, King Ahasuerus a pölüweni o apasa ngeni Kiwiin Esther, “Iö ätena, ifa i emön na a ina akkachofäsän an ekieki lón lelukan pwe epwe föri ei sókkun mettóch? Iö epwe ökkönümwüün attapók?”

6Iwe, Esther a apasa, “Ei mwän Haman mi föfföringaw, i ewe chón üüngeni keem me opwuta keem!”

Iwe, wón mesen Haman a örüló ren an nuokkus me fän mesen ewe king me ewe kiwiin. 7Mwirin, ewe king a üütäsini fän an lingeringer, a likitaló ünüman wain o toowu lón ewe leenien iräling lükün ewe imwen king.

Nge Haman a nómwetiw pwe epwe tüngór maamaw ngeni Kiwiin Esther fäniten manawan, pwokiten a kkin me wón pwe ewe king a fen filätä pwe epwe le efeiengawa.

8Nge lupwen ewe king a liwin seni ewe leenien iräling lükün ewe imwen king o tolong lón ewe rumwen kametip, Haman ina a chappaló lón an chöfönö wón ewe leenien móót mi pwetete ia Esther a kóón ie. Iwe, ewe king a chiwörüwör le apasa, “Ifa usun, ätewe epwe achomanawei ewe kiwiin nge i mi nóm reei ikeei lón imwei?”

Lón chök ewe ótun ewe king a apasawu ekkeei kapas seni awan, nöün kewe chón angang mi wiisen eteneki ra pwölüweló wón mesen Haman. Ei a esissilätä pwe epwe le feiengaw. 9Mwirin, Harbonah, emön me leiin nöün ewe king kewe chón angang ätelipich a apasa ngeni ewe king, “Nengeni, Haman a fen öüüwetä och leenien ffór üküükün lime mwalü tekian lón ewe leeni lükün imwan we. I a föri pün a ekiekin aea le fórusaló Mordekai, ewe mwän mi apasätä kapas mi mwirinnö fänäsengesin an epwe amanawók, en ewe king, seni chókewe mi rawei pwe repwe niikeló.”

Mwirin, ewe king a apasa, “Öüpwe fórusätä ätewe wón ewe leenien ffór!” 10Iei minne ra fórusätä Haman wón ewe leenien ffór i a amollätä fäniten Mordekai. Mwirin, än ewe king soong a kisikiisitiw.

Än ewe king öllük fänäsengesin ekkewe chón Sus

8 Lón ewe chök ränin, King Ahasuerus a ngeni Kiwiin Esther unusen minne än Haman, ätewe mi opwut ekkewe chón Sus. Mwirin, ra emmwenato Mordekai fän mesen ewe king, pün Esther a fen üreni ewe king usun lefiilan ngeni Mordekai. 2Iwe, ewe king a üttawu nöün we ringen impwang i a fen angei seni Haman o ngeni Mordekai. Iwe, Esther a filätä Mordekai pwe i epwe wiisen nemenem wón unusen minne än Haman.

3Mwirin, Esther a pwal liwinsäfälito fän mesen ewe king, a chappetiw órun pachapachan o tungór maamaw ngeni fän an kechiw pwe ewe king epwe öükätiw ewe rawangaw än Haman ewe mwirimwirin Akak a raweei pwe epwe arosaló ekkewe chón Sus meinisin. 4Iwe, ewe king a pwal eitiewu ewe wókun nemenem mi för seni kolt ngeni Esther. Iei minne Esther a pwäätä o a üütä fän mesen ewe king.

5Iwe, neminnewe a apasa, “Are mi öch mereemw en äi king, are ka nengeniei lón óm ümöümöch o ekieki pwe iei öch mettóch mi pwüng óm kopwe föri, are ka pwapwa reei, kopwe makkei ew öllük o tiinaló pwe epwe ataelo pöchökkülen ewe taropwen esilesil Haman nöün Hammedatha we mwän ewe mwirimwirin Akak a makkei pwe epwe arosaló ekkewe chón Sus meinisin mi nómfeil lón eifen fönüen ewe king kewe meinisin. 6Pün epwe ifa usun äi üpwe tongeni engngiló ngeni äi üpwe nennengeni än aramasei kewe repwe feiengaw? Epwe ifa usun äi üpwe tongeni engngniló ngeni äi üpwe nennengeni än chón äi famili repwe ninniiló o rosoló?”

7Mwirin, King Ahasuerus a apasa ngeni Kiwiin Esther me Mordekai ewe re Sus, “Mi let pwe ngang üwa fen ngeni Esther unusen minne än Haman. Ra pwal fórusaló i wón ewe leenien ffór pwokiten i a sótuni an epwe arosaló ekkewe chón Sus. 8Nge iei pwisin ämi öüpwe makkei pwal ew öllük o tiinaló ren ekkewe chón Sus lón iten ewe king. Öüpwe üreni ekkewe chón Sus meet öüwa ekieki pwe epwe öch ngeni kemi. Iwe, öüpwe impwangei ren nöün ewe king we ringen impwang. Nge öüpwe chechchemeni pwe ese lifilifil meet a mak lón iten ewe king o impwang ren nöün we ring esap tongeni siiwil pöchökkülan.

9Iwe, lón ewe chök ótun, lón ewe rüe me ülüngätin ränin ewe öülüngätin maram itan Sivan,a nöün ewe king kewe soummak ra kökkööto. Iwe, Mordekai a wiisen liwowomönüw ngeniir ewe öllük, nge iir ra makkei ngeni ekkewe chón Sus me ekkewe nöüwiis mi tekia me ekkewe kepina me ekkewe samolun ekkewe 127 fönü, äfätela seni India tori Ethiopia. Ei öllük a makketiw lón makken ew me ew fönü pwal lón än ew me ew mwiichen aramas kapas. A pwal mak ngeni ekkewe chón Sus lón makken pwisin fönüer me kapasen fönüer. 10Iwe, Mordekai a makkeelong lón iten King Ahasuerus o impwangei ren nöün ewe king we ringen impwang. Iwe, a tiinaló ekkewe taropwe ngeni nöün ewe king kewe chón künö mi fókkun mwittir, mi waawa ekkewe óris upwun wón dongki mi oupwuuputiw fäniten än ewe king angang.

11Än ewe king we öllük a mwütätä ngeni ekkewe chón Sus lón iteiten telinimw ar pwüüng pwe repwe tongeni ochufengeniir o pwisin tümwünü manawer seni feiengaw. A pwal mwütätä ngeniir pwe repwe efeiengawa, niieló o arosaló meinisin chón üüngeniir seni mwiichen aramas ika fönü mi ekiekin maun ngeniir ika ngeni nöüür semiriit me pwülüwer. Iwe, repwe pwal angei seni chón opwuter kewe pisekiir fän pöchökkül. 12Ewe rän a kefilitä fäniten ekkewe chón Sus pwe repwe föri ei lapalap me lón ekkewe fönü mi nóm fän nemenien King Ahasuerus, iei ewe engol me ülüngätin ränin ewe engol me ruuen maram itan Adar. 13Echö kapiin ei öllük epwe katoowu me lón iteiten fönü meinisin o epwe esilesil ngeni sókkun aramas meinisin. Ren ei lapalap, ekkewe chón Sus repwe mollotä lón ena rän pwe repwe le pwisin älemööw chón opwuter kana.

14Iei minne, fän inemouchchen än ewe king öllük, ekkewe chón künö ra mwittir feilló wón nöün ewe king kewe óris mi oupwuupwutiw fäniten än ewe king angang. Iwe, ewe öllük a pwal esilesilfeil lón ewe leeni mi pöchökkül tittin lón Susa. 15Mwirin, Mordekai a feilló seni fän mesen ewe king, nge a üföüf ekkewe üfen king mi arawaraw me pwechepwech, a pwal üföüf echö üüf mi ttam o parachól. A pwal mwärämwär epa mwärämwär mi för seni kolt. Iwe, aramasen ewe telinimw Susa ra efisi apwaapwan ewe öllük mi fö. 16Fäniten ekkewe chón Sus ekis meinisin, iei ew fansoun pwapwa me chengel me mwänek me iteüöch. 17Iwe, lón iteiten fönü me lón iteiten telinimw, ekis meinisin ia än ewe king we öllük a tori ie, ekkewe chón Sus ra pwapwa o efisi ar angangen apwaapwa mi lapalaap. Ra pwal esilefeili pwe epwe wor ew fansoun apwaapwa me ränin asöösö. Iwe, chómmóng me leiin aramasen ekkewe ekkóch fönü ra pwisin öpwüngaló pwe iir chón Sus, pwokiten ra nuokkusiti meet ekkewe chón Sus repwe föri ngeniir.

Ekkewe chón Sus ra arosaló ekkewe chón eriäfföür

9 Iwe, lón ewe engol me ülüngätin ränin lón ewe engol me ruuen maram, iei ewe maram Adar, a tori fansoun pwe än ewe king we öllük epwe le poputa pöchökkülan. Lón ena rän, ekkewe chón opwut ekkewe chón Sus ra ösüküsükü pwe repwe arosaló ekkewe chón Sus, nge iei a fen sossor pün ekkewe chón Sus ra okkufu ekkewe chón opwut iir. 2Iwe, lón ena ränin, ekkewe chón Sus ra mwiich fengen lón ar kewe telinimw leemelen ekkewe fönü meinisin mi nóm fän nemenien King Ahasuerus pwe repwe niieló chókana mi ekiekin efeiengawer. Nge esap wor emön a tongeni pölüweni ekkewe chón Sus pwokiten ekkewe aramas meinisin ra nuokkusitiir. 3Iwe, ekkewe samolun sounfiu lón ekkewe fönü meinisin, ekkewe samol, ekkewe kepina me ekkewe nöüwiis mi tekia meinisin ra älisi ekkewe chón Sus, pwokiten ra nuokkusiti Mordekai. 4Pün a fen kalapatä wiisen Mordekai me lón ewe imwen king, nge iteüöchchün a chöüfeil leemelen ekkewe fönü meinisin, pün än ei mwän Mordekai nemenem mi chök lallapaló.

5Ina pwata ekkewe chón Sus ra niieló chón opwuter kewe meinisin ren ketilas, ra niireló o arosereló lón ewe rän mi kefilitä. Iwe, ra föri meet ra mochen ngeni chókewe mi opwut iir. 6Ekkewe chón Sus ra niieló 500 mwän me lón ewe leeni mi pöchökkül tittin lón Susa. 7Ra pwal niieló Parshandatha, Dalfon, Aspatha, 8Poratha, Adalia, Aridatha, 9Parmashta, Arisai, Aridai me Vaizatha. 10Ra pwal niieló ekkewe engol mwän nöün Haman nöün Haammedatha we, ewe chón opwut ekkewe chón Sus. Nge resap angei och pisek pwe choon wókur.

11Iwe, lón ewe chök kuniólun, lupwen ra esile ngeni ewe king iteiten chókewe mi ninniiló me lón ewe leeni mi pöchökkül tittin lón Susa, 12ewe king a tiiti Kiwiin Esther o apasa ngeni, “Ekkewe chón Sus ra niieló o arosaló 500 mwän me lón chök ewe leeni mi pöchökkül tittin lón Susa. Ra pwal niieló nöün Haman kewe engol mwän. Ika ra föri ei sókkun me ikeei, iwe, meet epwe fis me lón ekkewe lussun fönü mi nóm fän nemeniei? Iwe, pwal meet ka mochen iei? Ngang üpwe mwütätä ngenuk. Kopwe üreniei meet óm tungór, pün ngang üpwe pwal mwütätä.”

13Iwe, Esther a pölüweni o apasa, “Are mi öch mereemw en äi king, kopwe mwüüt ngeni ekkewe chón Sus mi nóm lón Susa pwe lesor repwe pwal försäfäli usun minne ewe öllük a apasa pwe repwe föri ikenäi. Iwe, kopwe mwütätä pwe soomän nöün Haman kewe engol mwän repwe eittiwetä wón ekkewe leenien ffór!”

14Iei minne, ewe king a tipeew ngeni o öllük pwe epwe iei usun meet epwe fis. Iwe, ewe öllük a esilesil lón Susa. Ra pwal eitiwätä soomän nöün Haman ekkewe engol mwän wón ekkewe leenien ffór. 15Mwirin, ekkewe chón Sus mi nóm lón Susa ra mwiichsäfäl fengen lón ewe engol me rüwänüen ränin ewe maram Adar o ra pwal niieló 300 mwän me lón Susa, nge resap angei och pisek pwe choon wókur.

16Nge pwal lón ewe chök fansoun, ekkewe pwal ekkóch chón Sus mi nóm leemelen ekkewe fönü mi nóm fän nemenien ewe king ra mwiich fengen o eppeti manawer seni feiengaw. Ra ngasatä seni chón opwuter kewe pün ra niieló üküükün 75,000 me leiin ekkewe chón opwut iir, nge resap angei och pisek pwe choon wókur. 17Ei a fis leemelen ekkewe fönü lón ewe engol me ülüngätin ränin ewe maram Adar. Mwirin, lón ewe engol me rüwänüen ränin ewe maram ra asöösö o ra föri ei rän pwe ew ränin kametip me pwapwa.

Ewe chuulapen Purim

18Nge ekkewe chón Sus mi nóm Susa ra sópweló le niieló chón opwuter kewe seni ewe engol me ülüngätin rän tori ewe engol me rüwänüen rän. Nge mwirin, lón ewe engol me limuen ränin ewe maram ra asöösö, o ra föri ei rän pwe ew ränin kametip me pwapwa.

19Iei minne, ekkewe chón Sus mi nóm lón ekkewe sóóp o imweim lón ekkewe kükkün telinimw resap tittiló ra efisi apwaapwan ewe engol me rüwänüen ränin ewe maram Adar pwe ew ränin pwapwa me chuulapen iteiten ier pwal ew rän fäniten ar repwe liffang fengen lefiiler.

20Iwe, Mordekai a makkeetiw ekkeei mettóch mi fis o a makkeló taropwe ngeni ekkewe chón Sus meinisin mi arapoto me ekkewe mi nóm toowaw mi nóm leemelen ekkewe fönü mi nóm fän nemenien King Ahasuerus, 21o a pesei ngeniir pwe iteiten ier repwe efisi lefiiler ächechchemen ewe engol me rüwänüen me engol me limuen ränin ewe maram Adar, 22pwe iei ewe fansoun ekkewe chón Sus ra ngas seni ekkewe chón opwut iir, pwal iei ewe maram ar letipeta a wili ngeni pwapwa o ar lólilen a wili ngeni ränin apwaapwa. Mordekai a mak ngeniir pwe repwe afóna ekkeei rän pwe ar ränin chuulapen kametip me pwapwa pwal ar ränin liffang fengen mwöngö lefiiler me liffang ngeni ekkewe mi wöwingaw.

23Ina minne, ekkewe chón Sus ra tipeew ngeni pwe repwe sópweló le föri meet Mordekai a mak ngeniir usun. Iwe, ra popuetä ei öörüni pwe repwe efisi apwapwaan ei fansoun iteiten ier. 24Pün Haman nöün Hammedatha we mwän, ewe mwirimwirin Akak, ätewe mi opwut ekkewe chón Sus meinisin, a rawei pwe epwe arosaló ekkewe chón Sus lón ei rän me maram. Iwe, a föri angangen pwee ika ekilekil fäniten an epwe silei lón menni rän me maram epwe niireló o arosereló. (Ra eita ngeni ekkewe minen ekilekil, Purim). 25Nge lupwen Esther a feitto fän mesen ewe king o esile ngeni i usun ewe raaw, ewe king a atoowu ew öllük mi mak lón taropwe pwe ewe raaw mi ngaw Haman a rawangawei ngeni ekkewe chón Sus epwe pwisin säpeiti. Iwe, i me nöün kewe mwän ra eittiwetä wón ekkewe leenien ffór. 26(Iei minne, ekkeei rän ra iteni Purim pün a feitto seni ewe kapas Pur ew kapasen lóóm fäniten üttüüt ika ekilekil.) Iwe, pwokiten ekkewe mettóch meinisin Mordekai a makkei lón ei taropwe, pwal pwokiten meet ra küna me meet a fis ngeniir, 27ekkewe chón Sus leemelen ekkewe fönü ra tipeew ngeni pwe repwe önüküchchara ewe öörüni pwe iir me mwirimwirir kana pwal meinisin iö mi chuu ngeniir resap tümwününgaw ngeni ar repwe afóna ekkeei ruu rän iteiten ier, lón ewe lapalap mi makketiw me ewe fansoun mi kefilitä. 28Repwe chechchemeni me afóna ekkeei ruu rän seni ew pilóón aramas tori pwal ew, lón iteiten famili pwal lón iteiten fönü me lón iteiten telinimw. Ekkeei ränin Purim resap ükütiw le fis apwaapwar me leiin ekkewe chón Sus. Pwal ächechchemen meet a fis lón ekkeei rän esap ükütiw me leiin mwirimwiriir kana.

29Mwirin, Kiwiin Esther, nöün Abihail we föpwül, me Mordekai ewe re Sus ra makkei pwal echö taropwe fän unusen pöchökkülen ar nemenem pwe repwe önüküchchara ewe Chuulapen Purim. 30Iwe, Mordekai a tiinaló ekkewe taropwe ngeni ekkewe chón Sus meinisin mi nóm lón ekkewe 127 eifen lón mwüün Ahasuerus, nge a apacholong lón masowen ekkewe taropwe kapasen kinamwe me ölükülük. 31Ekkewe taropwe ra önüküchchara pwüngün ewe Chuulapen Purim pwe repwe efisi ew fansoun apwaapwa iteiten ier lón ekkeei rän lón ewe fansoun mi kefilitä usun minne Mordekai ewe re Sus me Kiwiin Esther ra öllük fäniter. (Ekkewe aramas ra filätä pwe repwe efisi ei chuulap, usun chök ar ra pwisin filätä fäniter me mwirimwiriir kana pwe repwe önüküchchara ar kewe fansoun öchüün me letipeta.) 32Iei usun än Esther we öllük a önüküchchara ekkewe föfförün ei ränin Purim. Iwe, a makketiw lón ewe pwuk.

Mordekai a iteüöch

10 Iwe, King Ahasuerus a atoowu ew öllükun takises leemelen unusen mwüün we pwal lón ekkewe fönü toowaw mi nóm arossetin ewe Mataw. 2Iwe, porausen föfförün ewe king meinisin minne i a föri fän an nemenem me an tüfich me unusen porausen Mordekai ätewe ewe king a alapatä lón wiisan, ra makketiw lón ewe pwuken uruwon ekkewe kingen Media me Persia. 3Pün Mordekai ewe re Sus a nóm lón oruuen tettelin wiis fän King Ahasuerus. A pwal wor suufölün me leiin ekkewe chón Sus o siil meren chómmóng chiechian kewe chón Sus, pwokiten i a angang weires fäniten feiöchün nöün kewe aramas o awarato kinamwe ngeni ekkewe chón Sus meinisin.