Efisos

Än Paul kapwong ngeni ekkewe chón lükü lón Efisos

1Ei taropwe seniei ngang Paul üwa fil meren Kot pwe üpwe emön nöün Jesus Kraist soukünö.

Ngang üwa mak ngeni kemi ämi ekkewe chón pin mi nóm lón Efisos mi likiitü le tapweló mwirin Kraist.

2Ümöümöch me kinamwe seni Samach Kot me ewe Samol Jesus Kraist repwe tori kemi.

Mwareiti lingen Kot

3Sipwe mwareiti Kot pwal I Semen ach we Samol Jesus Kraist, I ewe a efeiöchü ngeni kich ekkewe feiöchün ngüün meinisin mi nóm lón läng, pwokiten kich sia nöün Kraist. 4Melóóm lóóm me mwen an föri fönüfan, I a tongei kich o efili kich lón Kraist pwe sipwe pin o unusöch me mwen mesan. 5Lón an tong, I a fen akkomwen efili kich chök me mwan fäniten ach sipwe mwüümwülong lón tettelin naaw ren Jesus Kraist, alóngólóng wón kirekiröchün mochenin letipan, 6pwe sipwe mwareiti amwararen lingen an ümöümöch I a fangafat ngeni kich lón Nöün we mi ächengicheng. 7Lón Kraist, I a mööni kich ren chaan Nöün we, pwe sipwe ngasewu seni lón föötekin tipis pwe ach kana tipis ra mwusóló alóngólóng wón an ümöümöch mi somwoló. 8I a kisäsew le fangosom ngeni kich an ümöümöch fiti an tipächchem me silelap meinisin. 9Kot a pwääri ngeni kich an akkóót mi mwónómwón pwisin I a ekiekietä fän pwapwan letipan. An ei akkóót I a filätä pwe epwe öpwönüetä lón Kraist. 10Iei än Kot ei akkóót: Lupwen epwe tori unusöchülón ewe kinkinkin fansoun mi pwüng ngeni; I epwe ochufengeni mettóch meinisin pwe repwe nóm fän än Kraist nemenem, ekkana mettóch mi nóm läng me wón fönüfan, pwe repwe le chök ew lón Kraist.

11Lón Kraist, kich sia fen kefilitä pwe sipwe nöün Kot aramas. Kot a fen amollätä lón an akkóót pwe kich sipwe nöün aramas, pwokiten ina meet pwisin i a mochen. I ewe emön mi föri pwe mettóch meinisin repwe tipeew ngeni meet i a ekiekietä me mochen. 12Än Kot akkóót pwe öükich ekkewe chón Sus sia akkomwen lükü lón Kraist. Sia kefilitä pwe sipwe ew leenien mwareiti lingen Kot. 13Iwe, pwal ämi öüwa pacholong lón Kraist lupwen öüwa rong ewe kapasen let, iei ewe poraus allim öüwa küna manaw ren. Pwokiten pwal ämi öüwa lükü lón Kraist; Kot a impwangei kemi pwe ämi nöün ren an ngeni kemi ewe Ngüünmifel I a pwon usun melóóm. 14Ewe Ngüünmifel I ewe Kot a püngütiw pwe ölükülükün an epwe ngeni kich mettóch meinisin I a pwon, pwal ölükülükün pwe I a mööni kich pwe kich sipwe nöün aramas. Iwe, pwal iei och popun ach sipwe sópweló le mwareiti ach ei Kot mi ling.

Paul a iótek fäniten ekkewe chón Efisos

15Iei popun, seni ewe fansoun ngang üwa rong usun ämi lükü ewe Samol Jesus me usun ämi tongei ekkewe chón pin meinisin, 16ngang üsap ükütiw le kilisou ngeni Kot fänitemi lupwen üwa chechchemeni kemi lón äi iótek fansoun meinisin. 17Ngang üwa tungor ngeni ewe Kot än ach we Samol Jesus Kraist, ewe Semen ling, pwe epwe fang ngeni kemi ew ngünün tipächchem me weweöch, pwe epwe sópweló le pwääri ngeni kemi minne letipan pwe öüpwe mämmääritä lón ämi sileöchüw Kot. 18Üwa pwal iótek pwe mesen letipemi epwe sarameló, pün öüpwe tongeni weweiti usun ewe apilükülüköch I a kööri kemi ngeni, öüpwe pwal weweiti usun amwararen ekkewe feiöch mi somwoló I a pwon ngeni ekkewe chón pin, 19öüpwe pwal weweiti usun selükülón tekian an manaman esap wor öüküükün fänitach kich chón lükü. Iei chök pwal ewe manaman, 20I a aea lupwen I a amanawa säfälietä Kraist seni mäló o a amóttätiwa I lón ewe leenien chón tekia lepeliifichin lón läng. 21Iwe, iei Kraist a tekia seni meinisin ekkewe souemmwen me nemenem me manaman me samol. Kot a ngeni Kraist nemenem wón mettóch meinisin mi wor ar manaman, sap chök lón ei kinikinin fansoun nge i pwal lón ewe kinikinin fansoun epwe war. 22Iwe, Kot a anómwu mettóch meinisin fän pecheen Kraist pwe repwe nóm fän nemenian, a pwal ewisa ngeni pwe I epwe möküren mettóch meinisin fäniten tüfichin mwichefel, 23iei ewe inisin Kraist mi ounusaöchüw Kraist. I a ouraló mettóch meinisin lón iteiten lapalap meinisin.

Sia küna manaw ren än Kot ümöümöch pwokiten ach lükü

2Melóóm ämi öüwa mäló lón ngünümi pwokiten ämi pwupwungaw me ekkewe mettóch öüwa föri mi üüngeni Kot. 2Ämi öüwa piin manaweni ewe sókkun manaw usun chök ekkewe lussun aramasen fönüfan, ewe manaw mi uren tipis me älleasochisi Satan, ewe samolun lón längin äsäpwääl mi manaman. I ewe ngüün mi akkangang lón letipen chókana resap mochen älleasochis ngeni Kot. 3Melóóm, öükich meinisin sia pwal manaweni ewe manaw usun chök iir, pün sia föri föfförün manawach lón mocheniän fitukach, o öpwönüetä tipen fitukach me ekiekich. Kich sia upwutiw fän ew manawen fituk mi ngaw o sia nóm fän än Kot soong, usun chök pwal ekkewe ekkóch aramas. 4Nge Kot, ewe mi wöwün ümöümöch, a tongei kich ren an tong mi fókkun lapalaap, 5ina popun, lupwen mwo kich sia mäló lón ach pwupwungaw, nge I a ngeni kich manaw mi fö fiti Kraist. (Ämi öüwa küna manaw ren chök än Kot ümöümöch!) 6Pün I a amanawasäfäli kich seni mäló fiti Kraist o amóóta kich ren Kraist lón ekkewe leeni lón läng, pwokiten sia ew chök me Kraist Jesus. 7Iwe, lón ekkewe fansoun repwe feitto, Kot epwe tongeni pwäärikicheló pwe kich minen öppirü fäniten an ümöümöch mi somwosomwoló ese wor öüküükün lón an kirekiröch ngeni kich lón Kraist Jesus. 8Pün ämi öüwa küna manaw ren än Kot ümöümöch ren ämi lükü. Nge ei manaw esap pwisin efisiemi, pwe iei än Kot we liffang, 9sap pwal liwinin än emön angang, ina minne esap wor emön epwe tongeni eingeing wón. 10Pün kich förien pöün Kot. I a försäfäli kich lón Kraist Jesus pwe sipwe tongeni föri kana föfför mi mwirinnö, I a fen chök amollätä fänitach melóóm.

Sia arap ngeni Kot ren chaan Kraist

11Iei minne, öüpwe chechchemeni pwe ämi Sentail seni ämi upwutiw ren nónnómwumi lón peekin fituk. Ämi öüwa iteni “aramas resap sirkomsais” meren ekkewe chón Sus, iir ekkewe mi sikäsini ar sirkomsais, inamwo are a chök fis ngeni inisir ren angangen pöün aramas nge esap fis ngeni letipeer. 12Öüpwe chemeni pwe lón ena fansoun, ämi öüwa pwal nóm lükün Kraist, öüwa imwuló seni nöün Kot kewe aramas, ekkewe chón Israel, öüsap silei ekkewe pwon Kot a ääni ngeniir. Ämi öüwa nónnóm lón ei fönüfan lükün Kot, esap wor ämi apilükülük. 13Nge iei, öüwa nóm lón Kraist Jesus. Inamwo ika öüwa toowaweló seni Kot melóóm, nge iei öüwa arapeto ngeni I, pwokiten chaan Kraist.

14Pün pwisin Kraist wón inisin I ach kinamwe. I ewe a föri pwe epwe wor kinamwe lefiilen ekkewe ruu mwichen aramas, ekkewe chón Sus me ekkewe Sentail, pwe meinisin repwe le ew chök aramas, ren an ataetiw ewe tittin koum fengen mi kinifeseni lefiler. 15Ren an mäló, I a äwesi minne ra koum fengen wón. Ei eppet mi kinifeseni lefiiler, iei än ekkewe chón Sus kewe öllük mi äimwüewu ekkewe Sentail. Kraist a äwesi ewe koum fengen pün a mochen epwe efisätä kinamwe lefiilen ekkewe chón Sus me ekkewe Sentail pwe epwe föri fänitan ew chök mwichen aramas mi fö seni ekkewe ruu mwichen aramas. 16A pwal tongeni ächä fengeni ekkeei ruu mwichen aramas ngeni Kot lón ew chök inis ren an mäló wón ewe iräpenges. Iei meet I a aea le ämälói ewe koum fengen lefiiler. 17I a war o afalafala ei poraus allimen kinamwe ngeni kemi Sentail ämi chókana mi toowaweló seni I pwal ngeni keem chón Sus äm chókana mi arapeto. 18Iwe iei, öükich meinisin chón Sus me Sentail sia tongeni feitto ren ewe Kot Saam, meren ewe chök emön Ngüün, pwokiten meet Kraist a fen föri fänitach.

19Pwokiten ei, iei ämi kana Sentail, öüsap chüen chón ekis me wasööla. Iei ämi öüwa chón wilipós fiti nöün Kot kana chón pin meinisin me chón ewe familien Kot. 20Pwal ämi öüwa wiliti imwen Kot mi köüütä wón ewe lóngólóng, förien ekkewe soukünö me soufos, nge pwisin Jesus Kraist, I ewe föülapen föün lepwokuku. 21Lón Kraist, öükich meinisin ekkewe chón lükü sia wewe ngeni ekkewe pisekin wón ew imw mi kochu fengen pwe sipwe wiliti ew leenien fel mi pin fäniten ewe Samol. 22Lón Kraist, pwal ämi ekkewe Sentail öüwa kochu fengen me nöün kewe pwal ekkóch aramas pwe öüpwe wiliti ew kinikinin ei leeni ia Kot a imweim ie ren ewe Ngüünmifel.

Kot a pwääri ewe mwónómwón

3Iwe, fäniten ei popun, ngang Paul, üwa emön nöün Kraist Jesus chón föötek pwokiten äi afalafal ngeni kemi ämi kana Sentail.

2Usun öüwa fen rong pwe Kot a ngeniei ei angang pwe üpwe chón souwani le aronga an ümöümöch ngeni kemi ekkana Sentail. 3Üwa fen ekis manlapei le föüni usun me mwan lón ei taropwe pwe Kot a särifaló o pwääri ngeniei an we akkóót mi mwónómwón. 4Lupwen öüwa älleani meet ngang üwa makkeei, öüpwe tongeni weweiti meet ngang üwa silei usun ei akkóót mi mwónómwón fänäsengesin Kraist. 5Kot esap pwääri ei akkóót mi mwónómwón ngeni ekkewe pilóón aramas lón ekkewe kinikinin fansoun ra ló, nge iei ewe Ngüünmifel a särifaló o pwääri ngeni nöün kewe soukünö mi pin me kewe soufós mi pin. 6Iei än Kot ei akkóót mi mwónómwón: Ekkewe Sentail ra angei inetiir mi löllöfengen me inetin ekkewe chón Sus lón ekkewe wöw meinisin ra älemwiri seni Kot pün iir meinisin ra nöün Kot. Iir me rüü ekkeei mwichen aramas ra lükü ewe poraus allim, iei popun iir me ruu ra wiliti kifetin wón ewe ew chök inis, ra pwal chufengen le angei ewe pwonen feiöch lón Kraist Jesus.

7Ren än Kot ümöümöch me tüfichin an manaman, I a ewisa ngeniei ei wiis mi fókkun amwaraar pwe üpwe angang ngeni I le emeresifeili ei poraus allim.

Popun ewe mwónómwón

8Inamwo ika üsap fich ngeni, pwal inamwo ika ngang ewe mi fókkun kisifóchófóch me leiin ekkewe chón pin meinisin, nge Kot a filieitä lón an ümöümöch pwe üpwe afalafala leiin ekkewe Sentail usun ewe wöwün ngüün esap wor emön a tongeni epwe ouwasacha le älewooi, mi suuk ngeniir ar repwe ääni lón Kraist. 9Kot a pwal filiei pwe üpwe affataöchüw le äwewei ngeni aramas meinisin usun ei akkóót, pwe I Kot ewe mi föri mettóch meinisin ren Jesus Kraist a amwónómwónóló seni chök lón ekkewe fansoun lepoputän. 10Popun än Kot föri ei, pwe I epwe pwääraló usun mesemesekkisin amwaraaren an tipächchem ngeni ekkewe samol me ekkewe mi wor ar nemenem lón ekkewe kinikinin lón läng. Repwe küna ei lupwen ekkewe chón Sus me ekkewe Sentail repwe chufengen lón an we mwichefel. 11Iei än Kot we akkóót seni chök lón fansoun esepwop, nge iei a öpwönüetä lón Kraist Jesus ach Samol. 12Pwokiten Kraist me ach lükü lón I, a wor ach pwora me mwümwütän ach tolong fän mesen Kot fän apilükülük pwe I epwe etiwa kich. 13Iei minne, ngang üwa tungór ngeni kemi pwe öüsap apilükingaw pwokiten meet ra föri ngeniei me ikeei. Ngang üwa riäfföü fänitemi, pwe öüpwe meefi ämi iteüöch o pöchökkületä lón letipemi.

Kilisou ren ewe mwónómwón

14Iwe, lupwen ngang üwa ekieki usun än Kot tipächchem me alóllóólun an ei akkóót, ngang üwa fótopwäsukutiw o iótek ngeni Semen ach we Samol Jesus Kraist, 15I ewe Saam iteiten familien lón läng me fönüfan ra eiteit seni. 16Ngang üwa iótek ngeni ewe Saam alóngólóng wón somwosomwolón wöün lingan, pwe i epwe ngeni kemi ämi pöchökkül lón letipemi ren manamanen Ngünün we. 17Ngang üwa iótek pwe Kraist epwe chööchöló le wilipós lón lelukemi ren ämi lükü I, pwe waaremi epwe pwükütiw lón pwülün än Kot tong mi amwaraar. 18Iwe, ngang üwa iótek pwe öüpwe pwal tongeni fiti ekkewe chón pin meinisin le tongeni weweiti üküükün chöölapan me langattaman, tekian me alólóólün än Kraist ei tong. 19Än Kraist ei tong a fókkun selüküló seni öüküükün än emön epwe tongeni weweiti. Nge ngang üwa iótek pwe öüpwe mwokos le silei lón manawemi ei tong. Mwirin, öüwa tongeni ureló ren ewe manaw mi unus me ewe tüfich mi feitto seni Kot.

20Iwe, sipwe mwareiti Kot, I ewe Emön mi tongeni föri minne mi selüküló me somwosomwoló seni minne sia tungór ika ekieki, alóngólóng wón an manaman mi akkangang lóóch, 21I ewe Emön sipwe elingaló me lón mwichefel pwal lón Kraist Jesus lón fansoun meinisin tori feilfeilló chök. Amen.

Ew chök lón ewe inis

4Iei minne, ngang ewe chón kalapwuus fäniten äi angang ngeni ewe Samol, üwa tungórmaw ngeni kemi pwe öüpwe manaweni ew manaw mi fich ngeni ämi kö, pün öüwa kö meren Kot. 2Öüpwe tipe tekisón me pwetete. Öüpwe mósónóttam fengen lefiilemi o mökürochchowuló fän än emön me emöm mwääl, pwokiten ämi tong. 3Öüpwe achoocho ngeni le tümwünü ewe tipechu lón ewe Ngünün Kot o pinüküw fengeni kemi ren ewe fööfön kinamwe. 4Kich meinisin sia ew chök inis, sia ääni emön chök Ngüün, pwal kich meinisin sia kö ngeni ew chök apilükülük mi ling. 5A wor emön chök ach Samol, ew chök lükü, ew papatais. 6Mi wor emön chök Kot me Semen meinisin, a nemeni kich meinisin, a pwääri an tüfich me lón manawach meinisin o nónnóm lóóch meinisin.

Emön me emön chón lükü a wor an tüfich Ngüünmifel a fang ngeni

7Nge Kot a ngeni emön me emön leiich an liffangen ümöümöch, alóngólóng wón än Kraist fangafangöch ngeni kich. 8Iei popun, ewe taropwe mi pin a apasa: “Lupwen I a feittä läng, a etelato me mwirin epwi pwiin chón ooló pwe liapan; iwe, a ngeni aramas liffanger.”a

9Iwe, ifa wewen ei itiitin kapas: “A feittä”? Wewen pwe Kraist a akkomw le feittiw ngeni ei fönüfan mi tekisóssón kich sia nóm lón. 10Iwe, ewe Emön mi feittiw pwal I chök ewe Emön mi feittä o luuluutä asen ekkewe läng meinisin pwe an nemenem epwe ouraló unusen läng me fönüfan. 11I ewe Emön a fang ekkeei liffang ngeni mwichefel. Pwisin I ewisa ekkóch pwe repwe soukünö, ekkóch repwe soufós, ekkóch repwe chón arongafeili ewe poraus allim, nge pwal ekkóch repwe soummas me chón esikuul, 12fäniten ar repwe amollafichi le ounusaöchüw ekkewe chón pin pwe repwe föri ar angangen älillis o afeffeitäi mwichefel, iei ewe inisin Kraist, 13tori öükich meinisin sipwe mochchu fengen lón ach lükü me ach silelapei ewe Nöün Kot, pwe sipwe maaw o unusen määritä lón ewe Samol pwe sipwe tori ewe öüküükün tettel ach sipwe unusen masowoló ren ekkewe sókkun Kraist.

14Mwirin, sisap chüen usuni usun ekkana semiriit, ren ach wiliwilikkis lón ach ekiek usun meet sia lükü, pwokiten emön a üreni kich och sókkun mettóch mi sókkóló ika pwokiten än emön tipächchem soolä le chofona ngeni kich o föri pwe ewe chofona epwe usun och kapas mi let. 15Nge sipwe apasa ewe kapasen let lón tong, pwe sipwe mämmääritä lón peekin mettóch meinisin o wewe ngeni Kraist, I Möküren ewe inis, iei ewe mwichefel. 16Fän än Kraist emmwen, unusen ewe inis a kamasöch fengen. Lupwen ew me ew ekkewe kifet a föri en me an angang, a älisi ekkewe pwal ekkóch kifet pwe repwe määritä, pwe unusen ewe inis epwe pöchökkül o määritä o uren tong.

Sipwe föri pwüngün ewe manaw mi fö

17Iei minne, iei meet ngang üpwe apasa fän än ewe Samol pwüüng: Öüsap sópweló le manaweni usun manawen ekkewe pwal ekkóch Sentail mi manaw fän emmwenien ar ekiek mi lamwotongaw. 18Ar ekiek mi kesipeló ra uren rochopwak. Ra toowaweló seni ewe manawen Kot, pwokiten ra esipaló ar ekiek o öpöchökkülaló letiper ngeni. 19Iwe, pwokiten letiper a föüló, ina pwata resap chüen ekieki och usun meet mi pwüng me meet mi mwääl. Iwe, ra fangatäni manawer ngeni föfförün lisowu. Manawer a uren sókkun föfför mi limengaw meinisin me tipemmóng.

20Nge ämi, esap iei meet öüwa käeö lupwen öüwa käeö usun Kraist. 21Pwokiten ämi öüwa fen rong usun Kraist o käeö usun I, alóngólóng wón ewe let mi nóm lón Jesus, 22iei minne, öüpwe pwilitätiw sókkun manawen ewe aramas mi mes ewe manawen fituk mi chök ngangaweló o uren mocheniä me otupwutup. 23Nge öüpwe asöfösäfäli ämi ekiek me sókósókumi, 24öüpwe üföüfolong sókkun manawen ewe aramas mi fö, pwokiten öüwa wiliti aramas mi fö mi för lón lapalapen Kot. Ikkeei ekkeei lapalapen Kot: pwüng, pin me let.

25Iei minne, öüpwe likitaló kapas chofona. “Emön me emön leiimi epwe kapas enlet ngeni en me chón órun.”b Pün öükich meinisin sia kifetin wón ewe ew chök inis. 26Iwe, öüsap tipis ren ämi öüpwe mwüüt ngeni ämi soong epwe nemeni kemi. Öüsap ömwöchü ämi soong tori an epwe tupwutiw ewe akkar, 27pün soong a wääsi ngeni ewe devil an fansoun fich. 28Emön chón soolä epwe ükütiw le soolä, nge epwe poputä le aea pöün fäniten an epwe föri angang mi wenechchar. Mwirin, epwe wor minne i epwe ngeni chókana mi osupwang.

29Öüsap mwüüt ngeni och kapas mi limengaw me pöchökkül epwe toowu seni awemi. Nge meinisin minne öüpwe apasa epwe chök mwirinnö me älillisöch, pwe ämi kapas repwe öpöchökkülätä letipen ekkewe chón rongorong. 30Iwe, öüpwe ükütiw le ochchowaló letipen Ngüünmifel, ewe Ngünün Kot ren föfförün manawemi. Öüpwe chechchemeni pwe I ewe ämi öüwa impwangeló ren pwe ämi nöün o I ölükülükün pwe öüpwe ääni ewe manaw lón ewe rän öüpwe unusen ngasaló lón. 31Öüpwe pöütaló seni kemi killen letip, lingeringer, kopwut, kapas pöchökkül me kapasen eitengaw fiti sókkun föfföringaw meinisin. 32Nge öüpwe kirekiröch fengen lefiilemi o lelukottong fengen, öüpwe omwusomwus fengen lefiilemi usun chök Kot a omwusaló ämi tipis lón Kraist.

Öüpwe manaweni ewe manawen tong

5Iei minne, ämi öüpwe chón öppirüw Kot lón mettóch meinisin öüwa föri, pwokiten ämi nöün Kot mi ächengicheng. 2Öüpwe manaweni ew manaw mi uren tong, usun chök pwal Kraist a tongei kich o a fangeló pwisin manawan fänitach pwe epwe ew asór mi omwusaló ach kana tipis. Iei ew asór ngeni Kot mi pwoöch I a pwapwa ren.

3Öüsap mwüüt ngeni och sókkun föfförün lisowu are föfför mi limengaw are tipemmóng epwe fis leiimi, pwokiten ekkeei sókkun tipis resap pwüng ngeni nónnómwun manawen nöün Kot aramas mi pin. 4Öüsap pwal aporausa sókkun poraus mi ngaw me kapas mi lamwotongaw are kapasen urumwot mi fiti turunufas pün resap fichitikemi. Nge öüpwe chök ääni kapasen kilisou ngeni Kot. 5Pün öüpwe fókkun silei enletin, pwe esap wor emön mi föri sókkun föfförün lisowu, ika emön mi föri föfför mi limengaw, ika emön mi tipemmóng epwe wor inetin me lón ewe mwüün Kraist me Kot. Pün emön aramas mi tipemmóng i wesewesen emön chón fel ngeni önümwäl pün a fel ngeni ekkewe mettóchun ei fönüfan. 6Öüsap tupwuló ren chókana mi apasätä kapasen künetipingen fäniten tipis, pün än Kot soong a püngütiw wón chókana meinisin mi älleasolap ngeni I. 7Iei minne, ämi öüsap chiechi ngeni ekkewe aramas mi föri ekkeei mettóch.

Öüpwe manaweni ewe manawen lón saram

8Pün me mwan, lelukemi ra uren rochopwak, nge iei ämi öüwa sarameni saramen ewe Samol. Iwe, öüpwe manaweni manawen lón saram, pwokiten ämi semiritin lón saram. 9Pün ei saram mi nóm lóómi a efisätä meet mi mwirinnö o pwüng o let. 10Öüpwe pwal achoocho le kütta meet ewe Samol epwe pwapwa ren. 11Öüsap chóóni ekkewe föfför mi ngaw o lamwotongaw me föfförün rochopwak, nge öüpwe fen öpwüngüür o särifiireló. 12Pün mi fókkun ässäw ach sipwe mwo nge kapas usun ekkeei mettóch ekkewe aramas resap meniniti Kot ra föri le mwónómwón. 13Nge mettóch meinisin mi särifiló, ra pwääpwäló lón ewe saram, pün saram a föri pwe mettóch meinisin repwe pwäöchüló. 14Iwe, lupwen saramemi a tin, epwe pwääraló ar kewe föfför mi ngaw. Iei popun ewe taropwe mi pin a apasa:

“Kopwe neló, en ewe chón möür. Kopwe pwäätä seni mäló, pün Kraist epwe tinetiw wóm.”a

Öüpwe manaweni ewe manawen tipächchem

15Iei minne, öüpwe tümwünüfichi usun nónnómwun manawemi, pün öüsap manaweni manawen mi umwes, pwe manawen mi miriit. 16Öüpwe alamwota öchüw fansoun manawemi le föri minne mi mwirinnö, pün ekkeei rän ra ngaw. 17Iei minne, öüsap föri föfförün mi umwes, nge öüpwe weweiti meet ewe Samol a mochen pwe öüpwe föri. 18Iwe, öüsap sakaweló ren wain, pwokiten ina meet epwe efeiengawa manawemi. Nge öüpwe mwüüt ngeni ewe Ngüünmifel epwe chööchöló le nemenem lón manawemi. 19Mwirin, öüpwe kapas fengen lefiilemi lón ekkewe köölfel me köölün mwareiti, me köölün pwärätä. Öüpwe kööl lón awemi pwal wón pisekin likettik lón unusen letipemi ngeni ewe Samol. 20Öüpwe apasa ämi kilisou iteiten fansoun meinisin fäniten mettóch meinisin ngeni ewe Kot Saam, lón iten ach we Samol Jesus Kraist.

21Öüpwe anómwu kemi fän än emön me emön nemenem lefiilemi, pwokiten öüwa meniniti Kraist.

Ekkewe mwän me fefin mi pwüpwülü ra eliosuetä Kraist me mwichefel

22Ämi ekkana fefin mi pwüpwülü öüpwe pwisin anómwu kemi fän än pwülüemi kana nemenem, usun chök nge öüwa föri ngeni ewe Samol. 23Pün ewe mwän i möküren ewe fefin, usun chök pwal Kraist i möküren inisin we, iei mwichefel. I a fangaló manawan pwe epwe Chón Amanaw fäniten inisin we. 24Iwe, usun än mwichefel a pwisin anómwu i fän än Kraist nemenem, iei chök usun pwal ämi ekkana fefin mi pwüpwülü öüpwe anómwu kemi fän än pwülüwemi kana nemenem lón mettóch meinisin.

25Ämi ekkana mwän mi pwüpwülü, öüpwe tongei pwülüwemi kana. Öüpwe ääni ewe chök sókkun tong Kraist a ääni ngeni mwichefel. I a fangeló pwisin manawan fänitän, 26pwe epwe epini o limeti mwichefel ren an atüütü ngeni ewe kólikin kapasen Kot. 27Kraist a föri ei pwe I epwe emmwenato mwichefel ren pwisin I, nge mwichefel epwe unusen ling, esap wor tikifüüfün are lüküpwachan are pwal och sókkun terin, pwe mwichefel epwe pin o unusöch. 28Iwe, epwe iei usun än ekkewe mwän repwe pwal tongei pwülüwer kewe, usun chök ar tongei pwisin inisir. Pün emön mwän a wesewesen tongei pwisin inisin lupwen i a tongei pwülüwan. 29Esap wor mwo emön a opwut pwisin inisin, pün a eteneki o tümwünü inisin. Iwe, pwal ina chök usun minne Kraist a föri fäniten inisin we, iei mwichefel. 30Iwe, öükich meinisin kich kifetin inisin Kraist, öükich fitukan me chüün. 31Usun ewe taropwe mi pin a apasa: “Ren ei popun, emön mwän epwe likitaló saman me inan o pach ngeni pwülüan. Iwe, ekkewe rüömön ra wiliti ew chök inis.”a 32Iei ew mwónómwón mi fókkun lapalaap amwararan, nge a eliosunätä lapalapen än Kraist me mwichefel ra ew chök. 33Iei popun, ngang üpwe apasa säfäli pwe emön me emön leiimi kana mwän epwe tongei pwülüan usun chök an tongei pwisin inisin. Nge ewe fefin mi pwüpwülü epwe tümwünüfichi an epwe meniniti pwülüan.

Än naaw suföl me pwüngün wisen saam

6Ämi ekkana naaw, öüpwe älleasochisi sememi me inemi kana lón ewe Samol, pün iei meet mi pwüng ngeni kemi pwe öüpwe föri. 2“Kopwe asamolu somom me inom.” Iei ewe äkkäewin me leiin ekkewe engol öllük a wor ew pwon mi fiti. 3Iei ewe pwon: Are kopwe asamolu semom me inom, “iwe kopwe manawattam wón fönüfan o uren feiöch.”b

4Nge ämi ekkana saam, öüsap asoonga nöümi kana ren meet öüwa föri ngeniir. Nge öüpwe fen fóleniiretä lón ämi öüpwe emiritiir me fönöör lón ewe Samol.

5Ämi kana amanaw, öüpwe älleasochis ngeni ämi kana masta lón ei fönüfan fän suüföl me nuokkus. Öüpwe angang ngeniir fän wenechcharen letipemi, usun chök nge öüwa angang ngeni Kraist. 6Öüpwe älleasochis le angang ngeniir sap chök ren ämi öüpwe kütta itemi merer lupwen ra nennengeni kemi. Nge pwokiten ämi nöün Kraist amanaw, iei minne, öüpwe föri letipen Kot ren unusen letipemi. 7Öüpwe föri ämi angang fän unusen pwapwan letipemi, usun chök nge öüwa angang ngeni ewe Samol, nge sap ngeni aramas. 8Öüpwe chechchemeni pwe ewe Samol epwe ngeni emön me emön leiich liwinin fäniten ekkewe föfför mi mwirinnö sia föri, ese lifilifil are kich amanaw ika kich chón ngas.

9Iwe epwe pwal iei chök usun reemi ämi ekkana masta, pwe öüpwe föri meet mi pwüng ngeni nöümi kana amanaw. Öüpwe emwen le eniwokkusur. Öüpwe chechchemeni pwe ämi me iir öüwa ääni emön chök Masta mi nóm läng; nge I esap lifilifil aramas.

Öüpwe pippisek än Kot kewe pisekin maun

10Iwe, iei sópwólón minne üpwe apasa: Öüpwe eneen le öpöchökkülakemi lón ewe Samol me lón tüfichin pöchökkülen an we manaman. 11Öüpwe üföüfolong unusen än Kot kewe pisekin maun pwe öüpwe tongeni nüküchchar o üppós lón ämi üüngeni än ewe devil kewe wiiwin rawangaw me wiisoolä. 12Pün ach ei fiu, sisap fiu ngeni aramas mi för seni fituk me chcha, nge i sia fiu ngeni ekkewe önusamol mi ngaw, ngeni ekkewe önüsór sisap tongeni küneer ren mesach mi wor ar nemenem, ngeni ekkewe önüroch mi manaman lón mwökütükütün ei fänüfan, pwal ngeni ekkewe mwichen ngüün mi ngaw mi peseei föfföringaw ra nóm lón ekkewe leeni lón läng. 13Iei minne, öüpwe angei ngeni kemi unusen än Kot kewe pisekin maun iei chök, pwe lupwen ewe fansoun mi ngaw epwe war, öüpwe tongeni nüküchchar le üppós. Nge mwirin ämi maun, öüpwe chüen chök üppósóló. 14Ina minne, öüpwe üppós o öüröüreló, nge öüwa fen föötaló lukalapemi ngeni ewe pelitin let, öüwa fen pwal anómwu lón leenian ewe eppetin fänimmwär itan pwüng. 15Öüwa pwal mollotä le föötinüküetä ngeni pachapachemi ewe kinamwe mi feitto seni ewe poraus allim pwe ina ipwemi sandal. 16Lón iteiten ämi maun meinisin, öüpwe angei ngeni kemi ewe pisekin eppetin inis lón maun itan lükü pwe iei meet öüpwe tongeni eppeti le kunuw ngeni ekkewe föün esefich meinisin mi pwulopwul ewe emön mi ingaw a pekki ngeni kemi. 17Iwe, öüpwe pwal imweimwetä ewe akkawen maun itan manaw ese mwüch o angei ewe ketilas meren ewe Ngüünmifel, iei ewe kapasen Kot.

18Öüpwe iótek iteiten fansoun meinisin ren sókkun iótek meinisin me iótekin tungór lón manamanen ewe Ngüünmifel. Iwe, öüpwe mammasafichi o öüsap achaanü le iótek fäniten ekkana chón pin meinisin ekis meinisin. 19Iwe, öüpwe pwal iótek fänitei. Öüpwe tungór ngeni Kot pwe iteiten fansoun üpwe suukaló awei, I epwe fang ngeniei kapas mi pwüng pwe üpwe pwora le esilefeili ei mwónómwón pwe ei poraus allim a pwal fäniten ekkewe Sentail. 20Iei ei poraus allim ngang üwa emön nöün Kot chón arong mi föötek iei fäniten äi afalafal usun. Öüpwe iótek pwe ngang üpwe pwora le sópweló le kapas fänitan lón üküükün äi tongeni.

21Tykikos, i emön pwiipwi chón lükü mi ächengicheng me chón angang mi ölükülük lón ewe Samol epwe esile ngeni kemi mettóch meinisin, pwe pwal ämi öüpwe tongeni silei usun nónnómwi me usun minne üwa föri. 22Ngang üwa tiinawow i reemi ren ei popun, pwe i epwe esile ngeni kemi usun nónnómwum o epwe pwal echipa letipemi.

23Kinamwe epwe tori kemi ämi kana pwiipwi chón lükü mi ächengicheng me tong mi fiti lükü seni ewe Kot Sam me ewe Samol Jesus Kraist. 24Än Kot ümöümöch epwe nónnóm ren chókana meinisin mi tongei ach Samol Jesus Kraist lón ewe tong esap ükütiw. Amen.