Än Solomon Kööl
Kööl mi fókkun mwirinnö seni kööl meinisin
1 Iei än Solomon we kööl mi fókkun mwirinnö seni ekkewe kööl meinisin, a fókkun amwaraar mwen ekkewe pwal ekkóch kööl.
Lón ewe Ruumwen King
Ewe föpwül:
2“Kopwe eneen le kissiei ren awom – pün óm tong a men araar lap seni wain.
3A fókkun pwookus epitom we löö. Itom a wewe ngeni löö mi niiniiwu. Iei popun ekkewe fööpwül meinisin ra efich en!
4Kopwe lukiieiló pwe üpwe fituk. Sipwe mwittir feilló! Kopwe uweieilong lón óm we ruumwen möür, en äi king.”
Ekkewe föpwülün Jerusalem:
“A ifa me äm pwapwa o meseikeituk, äm äipwe mwareiti óm tong lap seni wain.”
Ewe föpwül:
“A fókkun pwüng än ekkewe föpwül tongek.
5Ämi kanan föpwülün Jerusalem, ngang üwa liechóchchól, nge üwa liöch. Üwa chól usun ekkewe imw mangaku lón Kedar. Ewer, ngang üwa mwo nge chól usun chök ekkewe kaaten lón imwen Solomon we imw mangaku.
6Öüsap ännefótaei ämi kanan nengnginin telinimw mi liepwechepwech pwokiten ngang üwa liechóchchól, pün ngang üwa chólóló ren ewe akkar. Mwongeei kewe ra soong ngeniei; iwe, ra eriäniei o tiinieiló pwe üpwe wiisen tüttümwünü ekkewe tännipin irän wain fän ewe akkar mi pwichikkar. Iwe, iei öüwa küna meet a fis ngeniei.
7Kopwe üreniei, en ewe ngang üwa tongek, ia kopwe amwöngöni ie nöüm kewe pwiin siip ikenäi? Ia kopwe asösööw ie nöüm kewe siip leólówas? Pün pwata ngang üpwe usun emön fefin mi pwölüweló wón mesan me leiin nöün chiechiom kewe pwiin siip?”
Ewe ölüwöl:
8“Are kosap silei ewe leeni, en ewe mi fókkun liöch me leiin ekkewe fefin; iwe, kopwe chök tapwei leemóón ipwen neii kewe siip tori ünükkün imwen ekkewe chón masen siip imw mangaku. Iwe, kopwe amwöngöni noum kewe liänifföön kuuch ikenan.
9En ewe emön mi ächengicheng, ngang üwa appöön ngenuk emön liäfefinin óris mi fööfö ngeni efóch wään Farao kewe wóóken.
10Sapom kana ra fókkun lingöch ren ofoutan kana. Üwom a fókkun ling ren mwärum na mwärämwär faaw öüchchea. “
Ekkewe föpwülün Jerusalem:
11“Sipwe för iering kolt fänitom me mwärämwär seni silifer.”
Ewe föpwül:
12“Ewe king a kóón wón an we peet nge a umwesiló ren pwokkusun äi we löö.
13Ätewe mi ächengicheng mereei a usun chök ew kükkün tükütükün powder mi pwokkus üwa anómwu lefiilen oupwi kana lupwen üwa kóón lón unusen ewe pwiin.
14Ätewe mi ächengicheng mereei a usun chök eumw pöön irä seni ewe irä itan henna mi nóm arap ngeni ewe tännipin irän wain lón En Kedi.
Ewe ölüwöl:
15A ifa me liöchchum, en neminnewe mi wor tongom mereei! O a ifa me liöchchum! Mesom ra usun mesen ekkan lisóóm.
Ewe föpwül:
16En ewe mi ächengicheng mereei, a ifa me äteöchum äi nennengenuk! O, a ifa me mwungom mereei lupwen ach ei sia kóón wón ei fetil mi möngümöng.
17Ekkewe irä iter sedar ra usun chök nge ach öüchamw me tinöü, ekkewe irä iter saipres ra usun chök nge ach kasso, pün sia nóm fän nürüür.”
Ewe föpwül:
2 Ngang ewe rous seni Sharon,
ewe kiop seni ekkewe leemól.
Ewe ölüwöl:
2“Ewer, alöllö ngeni pwal ekkóch fefin, liewe mi ächengicheng mereei a usun chök efóch kiop leiin irä fölüföl.”
Ewe föpwül:
3“Iwe, alöllö ngeni pwal ekkóch ölüwöl, ätewe mi ächengicheng mereei a usun chök efóch irän apel me leiin ekkewe irän leiin wöllap.”
Ewe föpwül a kapas ngeni ekkewe föpwülün Jerusalem:
“Ngang üwa pwapwa äi üpwe móót fän nürun ätewe mi ächengicheng mereei, uwaan ra araar le ochooch.
4Ätewe a uweieiló ngeni ewe leenien kametip, pwe meinisin repwe küna usun öüküükün an tongeei.
5Öüpwe öpöchökkülaei ren ämi awochocha ngeniei föün irän wain mi appwas, öüpwe pwal öpöchökküla säfäliei ren ämi aochocha ngeniei kana föün apel, pün ngang üwa efisi samwawün ekiekin tongen ätewe mereei.
6Ätewe a anómwu pöüiimöngün fän mökürei, nge pöüiifichin a róómi ei.
7Ngang üwa öllük ngeni kemi ämi kana föpwülün Jerusalem pwe öüpwe pwon ngeniei fän ökköpöl o öpölü ekkewe chia me ekkewe liäfefinin chian lemääl, pwe öüsap föngünätä ika öppwökätä tong tori an epwe pwisin tori ótun an mochen.
8Ah, ngang üwa rongorong ätewe mi ächengicheng mereei. Nengeni, iei i a wareto, a mwetemweteto wón ekkewe chuuk, a lusulusuto wón ekkewe chukutekisón.
9Ätewe mi ächengicheng mereei a wewe ngeni emön chia mi mwittir ika emön liänifföön ätemwänin chia. Nengeni, inan i a ü ünükkün etippen imwach o nennelong me lón ewe asammwacho. A ällämwelong me lefichefichen ekkewe mwüüch mi itinfäiach.
10Ätewe mi ächengicheng mereei a apasa ngeniei, “Kopwe pwätä, en mi ächengicheng mereei, en ewe mi fókkun liöch, kopwe feitto pwe sipwe le feilló.
11Nengeni, ewe fansoun patapat a luuló, ekkewe ótun püngün üüt ra wes o luuló.
12Ekkewe pöön irä ra pichitä seni wón pwül, ewe fansoun än machchang kökkööl a war, sia rong me lón fönüach tikitikin ekkewe lisóóm.
13Ekkewe irä fiik ra soot, nge a meresfeil pwokkusun pöön irän sóótun ekkewe irän wain. Ätewe mi wor tongom mereei, kopwe pwätä o feitto, en ewe mi fókkun äteöch, kopwe feitto pwe sipwe le feilló.”
Ewe ölüwöl:
14“En neii lisóóm mi nóm lón kewe pwangen achaw, ka nóm lón ekkewe leenien op lepökün ekkewe chuuk, kopwe pwääri ngeniei wón mesom, kopwe mwüüt ngeniei pwe üpwe rong mweliom, pün mweliom a fókkun ngiiöch nge wón mesom a fókkun mesemesöch.”
Ewe ölüwöl me ewe föpwül:
15“Sipwe mwittir turufi ekkewe fóks meinisin, ekkewe kükkün fóks me mwen ar repwe ataeló ach kewe tännipin irän wainin ach tong pün ach kewe tännipin irän wain ra pöppöön irä pwe repwe sóót.”
Ewe föpwül:
16“Ese pwal wor emön me lükün ätewe mi ächengicheng mereei, ese pwal wor emön me lüki meren ewe mi ächengicheng mereei. I a usun emön chia mi chök mwöngöfeil leiin ekkewe kiop.
17En ewe mi ächengicheng mereei, kopwe liwinito reei me mwen an epwe tö ewe mällen rän me ewe nürün kiroch epwe móróló. Kopwe sääto usun emön chia ika usun emön liänifföön ätemwänin chia me wón ekkewe chukutekisón mi sónóngaw.”
Ew pwinin mi osukosuk
Ewe föpwül:
3 “Lón ew pwinin, lupwen üwa kóón wón kiei we, üwa fókkun pwositi äi üpwe küna ewe mi ächengicheng me lón letipei. Üwa tana pwe üwa feilló o kütta ätewe nge üsap küna.
2Iei minne, ngang üwa pwisin apasa ngeniei, Ngang üpwe pwäätä o feilló iei pwe üpwe fätälfeil leemelen ewe telinimw. Üpwe küttafeili ätewe lón ekkewe aal me ekkewe leenien emwiicheich. Ngang üpwe kütta ewe mi ächengicheng me lón letipei. Iei minne, üwa kütta i nge üsap küna.
3Ekkewe chon mas ra künaei lupwen ra raun feil lón ewe telinimw. Iwe, üwa eisiniir, ‘Ämi mi küna ätewe mi ächengicheng me lón letipei?’
4Iwe, üwa chök kärään pwereló seniir, nge üwa küna ätewe mi ächengicheng me lón letipei. Üwa kömwöchüló wón nge üsap likitaló tori äi üwa emmwenaló i ngeni imwen inei we, ngeni rumwen ewe emön mi nöünieitiw.
5Ämi ekkana föpwülün Jerusalem, ngang üwa öllük ngeni kemi pwe öüpwe pwon ngeniei fän ökköpöl me fän mesen ekkewe chia me ekkewe liäfefinin chian lemal pwe öüsap föngünätä ika öppwökätä tong tori an epwe pwisin tori ótun an mochen.”
Föpwülün Jerusalem:
6“Iö ei a feittä seni ewe fönüpöön a usun chök ötüpwoopwon och ötüötün ekkei me wón pwül? I a pwokkus ren ekkóch sókkun appach mi pwokkus iter mör me frankinsens me pwal ekkóch sókkun wölüpwokkus mi nofiti fengen.
7Nengeni inaan wään Solomon we wóóken, nge wone sounfiu, iir ekkewe ätepworan Israel ra emmweni.
8Iir meinisin a wor nöüür ketilas, iir meinisin mi mwokos lón maun, emön me emön leiir a riietä nöün ketilas wón wäänüükün o mollotä chök ngeni ar repwe tümwünü ewe king ika epwe wor feiengaw epwe fis lepwin.
9Ewe King Solomon a pwisin föri ewe wóóken fänitan; i a föri seni mwüüch mi feitto seni Lebanon.
10Üröüren pwölüpwölütiwen wan we wóóken ra för seni silifer, pwölüpwölün we a för seni kolt. Leenien móótun a cheech ngeni mangaku mi parachól. Ofouten lón, iei ew liffangen tong seni ekkewe föpwülün Jerusalem.”
Ewe föpwül:
11“Öüpwe toowu, ämi föpwülün Zion pwe öüpwe katol ewe King Solomon. Öüpwe nengeni ewe mwärämwär ewe mwärin king, iei ewe mwärin king inan we a ämwärämwära ngeni lón an we ränin öpwüpwülü, ewe rän letipan a fókkun pwapwa.”
Ewe ölüwöl:
4 “A ifa me liöchchum, en ewe mi ächengicheng mereei, a ifa me liöchchum! Üwa nelongei föün mesom me fän óm we likotuupwön nge ra usun chök fesiren mesen lisóóm. Meeten mökürom mi rüürü ra sapwilitiw usun epwi pwiin kuuch ra mwetemwet lón ar urumwot wón ewe palapalatän Kilead.
2Ngiimw kana ra pwechepwech usun pwechen epwi pwiin siip mi chök kärään fichiló ünöüner ra feittä seni ar leenien limelim. Iir meinisin ra unusöch o löllöppök, esap wor efóch a tülüló.
3Tinnawom kana ra wewe ngeni och repen mi parachól. A ifa me lapalapöchchün awom! Sapom ra wóparapar me fän óm na likotuupwön, ra usun chök paren äkkääpeek föün ewe irä pómekränet, ra lingöch o neeannö.
4Üwom a lapalapöch usun än David we leeni mi tekia. Iei ewe imw tekia mi köüütä fäniten leenien iseisen pisekin maun, ia ra emeittiwätä ie ngöröün pisekin eppet lón maun, iir meinisin pisekin ekkewe sounfiu mi ätepwora.
5Oupwum kana me ruu ra wewe ngeni möngümöngün rüömön appanen chia, ra wewe ngeni appanen chia lippwe mi mwömwöngö feil fetil leiin ekkewe kiop.
6Üpwe feittä wón ewe chuuk ia a wor ie ewe irä mi pwokkus appachan itan mör, pwal wón ewe chukutekisón ia a wor ie ewe irä mi pwokkus appachan itan frankinses pwe üpwe nónnóm ie tori an epwe tö ewe mallen rän nge ewe nürün kiroch epwe móróló.
7En ka fókkun liöch, en ewe ka ächengicheng mereei, esap fókkun wor och terum.
8En pwülüwei fiin öpwüpwülüsöfö, kopwe fitiei le feittiw seni Lebanon, kopwe fitiei le feittiw seni Lebanon. Kopwe feittiw seni wón ungen ewe chuuk Amana, seni wón ungen ewe chuuk Senir me ewe chuuk Hermon, ia a wor ie ekkewe pwangen laion pwal seni wón ekkewe chuuk ia ekkewe maanmwacho usun taiker iter lepart ra nómfeil ie.
9En ka fókkun liäpenaló lelukei, en ewe mi usun chök tongen fefinei mereei, en pwülüwei fiin öpwüpwülüsöfö. En ka liäpenaló lelukei ren chök nennen mesom ngeniei, pwal ren ewe faaw mi öüchchea wón mwärum we fän üwom.
10A ifa me ämwäräärän ekiekin tongom mereei, en ewe mi usun chök tongen fefinei mereei, en pwülüwei sia öpwüpwülüfö! A ifa me mwirinnön óm tong lap seni wain! Òm we löö a pwoöch lap seni ekkewe irä mi pwokkus ra nofitifit fengen.
11Pwülüwei fiin öpwüpwülüsöfö, araaren supwun tinnawom a usun chök araaren ewe fasen chunen. Ewer, milik me chönün chunen ra nóm fän chönnawom. Pwokkusun üfom kana ra usun chök pwonnen wón ekkewe chuuk me ekkewe irä sedar seni Lebanon.
12En ka usun chök ew tännipi mi tittiló, en ewe mi usun chök tongen fefinei mereei, en pwülüwei fiin öpwüpwülüsöfö. En ka usun chök ew pwuachchen kólik esap wor pwal emön a tongeni wün seni, ew pwisin äi kólik mi michchitä.
13En ka usun ew tännipin ewe irä pómekranet mi wor uwaan mi fókkun mwirinnö, pwal usun ewe irä itan henna mi pwokkus pöön irän me ewe irä itan nard ra föri lömmis mi pwokkus seni waran,
14pwal ekkewe irä pwokkus iter nard, saffron, kalamus, me sinamon, me iteiten ewe sókkun irä mi pwokkus appachan itan frankinens me ekkewe irä mi pwokkus iter mör me alos me ekkewe sókkun wölüpwokkus meinisin.
15En ka pwal usun ew pwuachchen kólik lón ew tännipi pwal ew chönüttu mi ur ren kólik mi puupwutiw seni ekkewe chukun Lebanon.”
Ewe föpwül:
16“Kopwe pwäätä äsäpwäälin efeng! Kopwe feitto äsäpwäälin öör! Öüpwe eniiti äi we tännipi pwe öüpwe pöönaló pwoöchchün ren ätewe mi ächengicheng mereei. Amwo ätewe mi ächengicheng mereei epwe feitto lón an ei tännipi pwe epwe neni uwaan kewe mi mwirinnö.”
Ewe ölüwöl:
5 “En ewe mi usun chök tongen fefinei mereei, en pwülüwei fiin öpwüpwülüsöfö, ngang üwa tolong lón äi we tännipi. Üwa ionifengeni äi kewe appach mi pwokkus itan mör me äi kewe wölüpwokkus. Ngang üwa fen äni änei we fasen chunen fiti fengen me ünümei we chönün chunen. Ngang üwa fen ünümi ünümei we wain me ünümei we milik.”
Ekkewe föpwülün Jerusalem:
“En neminnewe mi wor tongom me ätewe mi ächengicheng, öüpwe mwöngö o wün. Ewer, öüpwe pwucholó ren ei tong.”
Ewe föpwül:
2“Lón ew pwinin, ngang üwa möür, nge letipei mi chök nenneló. Iwe, üwa rong möngüngün ätewe mi ächengicheng mereei. I a fichifich wón asamen äi we ruumwen möür o apasa, ‘Kopwe suuki ngeniei ewe asam, en ewe mi usun chök tongen fefinei mereei, en mi ächengicheng mereei, en neii lisóóm, en chök emön esap wor terum, pün ngang üwa nóm lükün lón ei pwinin. Mökürei a kuuló ren chöchchönün omwurenipwin, meeten mökürei ra lüküchöchchön ren lüküchöchchönün lepwin.’
3Nge ngang üwa apasa, ‘Ngang üwa fen pwilitaló üfei. Ifa usun, üpwe pwal üföüfsäfäl? Ngang üwa fen tölü pachapachei. Ifa usun, üpwe pwal öppwülüsäfäliir?’
4Ewe mi ächengicheng mereei a eitielong pöün lón pwangen lókkun asamen imwei we o sótuni an epwe suuki. Letipei a poputä le püngüpüng ren äi tipefiräiti.
5Iwe, ngang üwa pwäätä pwe üpwe suuki ewe asam ngeni ewe mi ächengicheng mereei. Nge peii kana ra kuuló ren chöchchönün löö mi pwokkus, ächefen peii ra kuuló ren ewe appach mi pwokkus itan mör, lupwen üwa kömwöch ewe lóók.
6Üwa suuki ewe asam ngeni ewe mi ächengicheng mereei, nge i a fen liwin. A fen feilló. Letipei a fókkun tur pokiten an a feilló. Üwa kütta feili ätewe, nge üsap küna. Üwa kökkööri, nge esap pöppölü.
7Iwe, ekkewe chón mas ra künaei lupwen ra raunfätäl lón ewe telinimw. Ra wichiei o ekinasaei. Ekkewe chón mas wón tittin ewe telinimw ra angei seniei üfei we üwa finiti ngeniei.
8Öüpwe pwon ngeniei ämi ekkewe föpwülün Jerusalem pwe are öüwa küna ewe mi ächengicheng mereei, iwe, meet öüpwe üreni? Öüpwe üreni pwe ngang üwa efisi samwawün tongan ei mereei!”
Ekkewe föpwülün Jerusalem:
9“En ewe mi fókkun liöch seni fefin meinisin, ifa usun än ätewe mi ächengicheng mereemw a mwirinnö lap seni pwal ekkewe ekkóch mwän? Meet a fis ngeni ätewe mi ächengicheng mereemw iei ka feitto pwe kopwe üreni keem ei?”
Ewe föpwül:
10“Ätewe mi ächengicheng mereei a misimis o wóparapar, a mwirinnö seni engol ngöröw mwän.
11Möküran a usun chök kolt mi limelimöch. Meeten möküran ra rüürü o chól usun chólun emön ängä.
12Föün mesan ra mesefesir usun chök föün mesen lisóóm mi nóm ünükkün ekkewe chönüpwuupwu o ra tüütü lón milik. Ra usun ekkan faaw öüchchea mi kamasolong lón leenier.
13Sapan kana ra wewe ngeni ekkewe leenien fót wölüpwokkus mi pwoöch. Tinnawan ra men möngümöng o lingöch usun pöön irän kiop. Ewe appach mi pwokkus itan mör a supwitiw seni tinnawan.
14Seengen pöün kana ra wewe ngeni fóchun kolt mi kamasolong lón ewe faaw öüchchea itan krisolait. Inisin a motowtow usun niin älefan mi ommwotow o ofout ngeni ewe faaw öüchchea itan säpfair.
15Pecheen kana ra usun ekkana üür mi för seni faaw mi misimis itan alabaster, ra lóngólóng wón kolt mi limelimöch. Ra pöchökkül usun ekkewe irä sedar seni Lebanon. Esap wor emön a tongeni okkufu i.
16Awan a men araar, nge i wón isinin a fókkun äteöch. Iei usun ätewe mi ächengicheng mereei, iei usun chiechiei ei, ämi ekkana föpwülün Jerusalem.”
Ekkewe föpwülün Jerusalem:
6 “Ia ätewe mi ächengicheng mereemw a feilló ie, en ewe mi fókkun liöch seni fefin meinisin? Menni aal ätewe mi ächengicheng mereemw a tókkóló wón pwe äm äipwe fituk le kütta i?”
Ewe föpwül:
2“Ätewe mi ächengicheng mereei a feittiw lón an we tännipi ren ekkewe leenien fót wölüpwokkus pwe epwe chök nennefeil lón ewe tännipi o epwe pwal fichifich pöön irän kiop.
3Ese pwal wor emön me lükün ewe mi ächengicheng mereei, ese pwal wor emön me lüki meren ewe mi ächengicheng mereei. I ätewe mi nennefeil leiin ekkewe kiop.”
Ewe ölüwöl:
4“En ewe mi ächengicheng mereei, ka fókkun liöch usun chök ewe telinimw Tirzah. Ewer, ka fókkun liöch usun chök Jerusalem, ka men eniwokkus usun ew mwiichen sounfiu fän ar kana filäik.
5Kopwe kulluw mesom seniei pün mesom ra nemenaló äi ekiek. Meeten mökürom ra sapwilitiw wón mesom usun chök epwi pwiin kuuch ra mwetemwet le kukkunow wón ekkewe palapalatän Kilead.
6Ngiimw kana ra pwechepwech usun chök epwi pwiin siip ra chök kärään wes le limelim. Iir meinisin ra unusöch o löllöppök, esap wor efóch a tülüló.
7Sapom kana ra wóparapar me fän óm na likotuupwön, ra usun chök paren äkkääpeek föün ewe irä pómekränet, ra lingöch o annö.
8Ngang üwa tongeni angei pwe pwülüwei wonee fefin iir meinisin kiwiin, pwal waliik ülüpwülüwei me chómmóng föpwül resap lea.
9Nge ngang üwa chüen chök filätä neii we lisóóm, ewe emön esap wor terin mereei, esap wor emön me lükün, i chök nöün inan we, i ewe mi ächengicheng meren ewe emön mi nöünätiw. Ekkewe föpwül ra pwapwa lupwen ra küna neminnei. Ekkewe mwo kiwiin me ülüpwülüwen king nge ra köölün mwareiti neminnei.
10Iö ei a pwääto nge a usun chök mallen rän, a tinöch usun ewe maram, a saramaram usun ewe akkar, a lingelingöch usun ekkewe füü lón tetteliir?”
Ewe föpwül:
11“Ngang üwa feittiw ren ewe tännipin irä mi wor föün fäniten mwöngö o üwa feilliwu lón ewe leemólun pwe üpwe nengeni minne mi pwüküföötä lón ewe fansoun mweires. Ngang üwa mochen pwe üpwe küna are ekkewe irän wain ra fasar pwal ika ekkewe pómekränet ra pöppöön irä.
12Iwe, üsap mwo meefiei nge üwa nóm wón äi we peet ren ewe mi ächengicheng mereei.”
Ekkewe föpwülün Jerusalem:
13“Kopwe liwinsäfälito, kopwe liwinsäfälito reem, en ewe föpwülün Shulam. Kopwe liwinito, kopwe liwinito, pwe äm äipwe tongeni künasäfälik fän ew chök!”
Ewe ölüwöl:
14“Pwata öüwa ännefóta ei föpwül seni Shulam, lupwen a nifech mwirinnö le pwörük lefiilen ruu telin mwiichen chón pwörük?”
Ewe ölüwöl:
7 “A ifa me lapöchün pecheemw kana me lón ipwom sandal, en nöün ewe king föpwül! Sengesengöchün afoom ra wewe ngeni chipwechipwen ekkaan faaw öüchchea angangen pöün emön soufalafal mi silelap.
2Puom a wewe ngeni ew kap mi kukkumos mi chök ukkur ren wain mi nofit. Lefilen aföom a wewe ngeni föün wiit mi chukuchukutä, nge kiop ra rokopwänieló.
3Oupwum kana ra wewe ngeni rüömön appanen chia, appanen chia lippwe nöün emön chia.
4Üwom a lapöch usun och leeni mi tekia a för seni niin älefan. Mesom kana ra men ekinamwe usun chök ekkewe nóómwun kólik mi kurufatafat lón Heshbon órun asamalapen tittin Bath Rabbim. Pwötum a wewe ngeni ewe leeni mi tekia lón Lebanon mi sässäpe ngeni Damaskus.
5Mökürom mi nóm wón inisum a usun ewe Chukun Carmel. Meeten mökürom ra misimis usun ekkaan üfen king mi parachól, ewe king a sap lón ren langattaman.
6A ifa me liöchum, a pwal ifa me apwaapwóm, en ewe mi ächengicheng mereei, a ifa me sellükün amwararom!
7Ka langattamatä o pinekükkün usun ewe irä palm usun nüü, nge oupwum kana ra usun umwun föün ewe irä itan deit.
8Iwe, üwa apasa, ‘Ngang üpwe tööki ewe irä usun nüü o kömwöchüló wón palan kana. Ngang üpwe kinii uwaan.’ Oupwum kana ra wewe ngeni ekkaan umwun föün irän wain, nge pwokkusun ngasangasom a usun chök pwollen ekkaan föün apel.
9Òm kana kiis ra men ämwälekelek usun chök wain mi fókkun mwirinnö, a pweteete o araar, a pwuu pwetetetiw wón tinnaw me nii.”
Ewe föpwül:
10“Ese pwal wor emön me lükün ätewe mi ächengicheng mereei, ngang chök ewe i a ekieki usun.
11Kopwe feitto, en ewe mi wor tongom mereei, sipwe feilló lón ekkewe mälämäl pwe sipwe pwinipwin lón ekkewe sóóp.
12Sipwe pwäätä o ukokkäeló lón ekkewe tännipin irän wain pwe sipwe nengeni are ekkewe irän wain ra fasar, are pöön iräär kewe ra sóól, sipwe pwal nengeni are ekkewe irä pómekränet ra pöppöön irä. Iwe, me ikenan ngang üpwe öunusa ngenuk äi tong.
13Me ikenan, ekkewe irän ommwung ra apwoppwola feili pwokkusur, nge ekkewe sakkopaten föün irän ochooch mi fókkun annö ra nóm órun asamen imwach we, ekkewe föün irä minafö me minen lóóm, pün ngang üwa iseniir fän itom, en ewe mi wor tongom mereei.”
Ewe föpwül:
8 “Amwo itä fisefisan pwe en kopwe emön mwongeei mi wün seni oupwun inei! Mwirin, ngang üpwe tongeni kisiik nge üsap ekieki ika iö a atolaei, iwe, esap wor emön epwe esiitaei.
2Ngang üpwe emmwenukoló o uweekoló ngeni imwen inei we. Iwe, en kopwe esikulaei me ikenan. Iwe, ngang üpwe öünuk wain mi nofit ngeni wölüpwokkus pwal chönün moonen pöön irän äi kewe irä pómekränet.
3Pöüiimöngüm epwe nóm fän mökürei, nge pöüiifichum epwe róómiei.
4Ämi kana föpwülün Jerusalem, ngang üwa mochen pwe öüpwe pwon pwe öüsap ämwänekätä ika öppwökätä tong tori an epwe pwisin tori ótun.”
Ekkewe föpwülün Jerusalem:
5“Iö ei a feittä seni ewe fönüpöön nge a üllütä wón ätewe mi ächengicheng mereen?”
Ewe föpwül:
“Ngang üwa föngünuk me fän ewe apel, ikeweia inomw we a nöünuk me ie, fän cheuch mi wätte i a nöünuketiw.
6Kopwe anómwuei wón ngasangasom pwe üpwe usun och impwang, üpwe pwal usun och impwang me wón poum. Pün tong a pöchökkül usun chök mäló, pwal luukommóng esap fangafangääs usun chök ewe leenien sootup. Tong a pwichikkar usun chök ekkei mi ngetenget, usun chök och sókkun ngeten ekkei mi ngetemmóng.
7Chómmóng kólik esap tongeni kunuweló tong, kana chaanpwuupwu resap tongeni amwopwu tong. Are emön mwän a sótuni an epwe mööni tong ren meinisin minne i a ääni, minne i epwe fangaló repwe chök uren kopwut.”
Mongeen ewe föpwül:
8“Mi wor emön fefineem mi chök kükkün, esap mwo pwük oupwun kana. Meet äipwe föri fäniten fefineem we lupwen emön epwe tungór i pwe epwe pwülüweni?
9Are i emön föpwül esap mwo tori mwän, äm aipwe tümwünü i ren äm aipwe usun ew tiit mi för seni silifer ünükkün ew imw tekia. Nge are i emön föpwül mi sikeppwach, usun ew asam mi suukuló nge suukuto, äm aipwe pineeló asaman ren eppet mi för seni ewe irä sedar. Äm aipwe eppeti i seni mwän.”
Ewe föpwül:
10“Ngang üsap tori mwo mwän usun ew tiit, nge oupwi kana ra wewe ngeni leeni mi tekia pün ra fókkun wätte. Iei minne, ätewe mi ächengicheng mereei a menemenöch reei.
11Mi wor ew än Solomon tännipin irän wain lón Baal Hamon. Iwe, i a mwüütawu an we tännipin irän wain ngeni ekkóch chón tümwün; emön me emön leiir a uwato engöröw sekel mooni silifer fäniten uwään ekkewe irän wain.
12Nge ren äi we tännipin irän wain wón winikaapei, äi chök pwe üpwe föri uwenei wón.
En Solomon, kopwe chök anómwu ngenuk noum kewe engöröw sekel silifer, nge chókewe mi tümwünü ekkewe uwään irän wain repwe chök anómwu nöüür kewe rüwöpwükü sekel silifer.”
Ewe ölüwöl:
13“En ewe mi ächengicheng mereei, ka nóm lón ekkewe tännipi. Chiechiom kewe ra feiöch pün ra tongeni öüseling ngeni mweliom. Kopwe mwüüt ngeniei pwe pwal ngang üpwe rong ngeni mweliom.”
Ewe föpwül:
14“En ewe mi ächengicheng mereei, kopwe mwittir feitto. Kopwe mwöküt usun emön chia mi mwittir ika usun emön liälifföön ätemwänin chia me wón ekkewe chukun wölüpokkus.”