3 John

John ewe souakkomw a kapwon ngeni Kaios

1Ei taropwe seniei ngang John ewe souakkomw. Ngang üwa mak ngenuk en ächengicheng Kaios, ngang üwa tongek lón ewe let.

2En chiechiei mi ächengicheng, ngang üwa iótek pwe mettóch meinisin repwe mwirinnö mereemw, nge lapalón pwe inisum epwe pwal pöchökkül usun chök äi silei pwe ngünüm mi pöchökkül.

Kaios a iteööch ren an fangafangöch

3Pün ngang üwa fókkun pwapwa chapwür lupwen ekkóch leiin pwiich me fefinach keei ra war, nge ra pwärätä usun óm ölükülük ngeni ewe let pwal usun óm sópweló le fätäl lón ewe let. 4Esap tongeni wor och äi pwapwa epwe lap seni pwapwan äi üwa rong pwe neii kana ra fätäl lón ewe let.

5En chiechiei mi ächengicheng, en ka fókkun ölükülük lón meet en ka föri fäniten ekkewe pwiipwi, inamwo are iir ra waasölato reem. 6Iir ekkewe ra pwärätä me mwen ewe mwichefel ikeei usun óm tong. Kose mochen kopwe tiinireló lón ar sääi lón och lapalap mi fichiti Kot. 7Pün iir ra sääifeil fänäsengesin ewe Iit, nge resap mochen etiwa och seni ekkewe Sentail. 8Iei minne, mi öüchchea pwe pwisin öükich sipwe älisi ekkeei sókkun aramas, pwe kich sipwe tongeni chieneniir le chón angang fäniten ewe let.

Diotrefes a itengaw nge Demetrius a iteüöch

9Ngang üwa fen mak ngeni ewe mwichefel usun ei, nge Diotrefes, ätewe mi saani pwe epwe akkomwa chök pwisin i, esap esilla äm nemenem. 10Iei minne, are ngang üpwe war, ngang üpwe ächchemätä meet i a föri ren an ngunungunu keem. Esap menemen ren ei; iwe, pwisin i wón inisin esap mochen etiwa ekkewe pwiipwi. I a pwal öükätiw chókewe mi mochen repwe etiwer o atoorowu seni ewe mwichefel.

11Chiechiei mi ächengicheng, kosap öppirüw meet mi ingaw, nge i meet mi mwirinnö. Iö mi föri minne a mwirinnö, a leteló pwe i nöün Kot, nge emön mi föri minne a ingaw, a leteló pwe i esap küna Kot. 12Iteiten emön me emön a kapas mwirinnö usun Demetrius, pwal pwisin ewe let a pwärätä. Iwe, pwal pwisin äm aia kapas mwirinnö usun ätei, nge ämi öüwa silei pwe äm aia kapas enlet.

Än John kapwongen kósópw

13Mi wor chómmóng mettóch ngang üpwe makewow reemw, nge üsap mochen pwe üpwe mak ren pen me ingk. 14Pün ngang üwa apilükülükü pwe ngang üpwe mwittir chuuruk. Mwirin, sipwap pwisin nennefengen o kapas fengen.

Kinamwe epwe nónnóm reemw. Chiechiom keei mi nóm ikeei ra kapwong ngenuk. Kose mochen kopwe ngeni iteiten emön me emön chiechiach kana mi nóm ikena äi kapwong, nge kopwe föüni ngeni emön me emön itan.