2 Timothy
Paul a kapwong ngeni Timothy
1Ei taropwe seniei ngang Paul, ngang emön nöün Kraist Jesus soukünö fän letipen Kot, üwa ökkünöló pwe üpwe aronga ngeni ekkóch usun ewe manaw I a pwon pwe epwe tori aramas ren ar lükü lón Kraist Jesus.
2Ngang üwa mak ngenuk Timothy, en neii mi ächengicheng. Ümöümöch me tong me kinamwe seni ewe Kot Sam me Kraist Jesus ach Samol epwe nónnóm reemw.
Paul a kilisou ngeni Kot ren Timothy me an famili wón peekin inan
3Timothy, ngang üwa kilisou ngeni Kot fänitom. I ewe ngang üwa angang ngeni fän limöchün mwelien letipei usun chök minne äi kewe leewo ra föri. Lepwin me lerän ngang üwa chemenifócheek lón äi iótek. 4Ngang üwa pwositi äi üpwe künasäfäliik, pün ngang üwa chemeni supwutiwen chönün mesom lupwen ach we sia äimwüfesen. Iwe, ngang üpwe fókkun uren pwapwa lupwen sipwe chufengensäfäl. 5Pün ngang üwa silei pwe en ka enletin lükü ewe Samol, ei lükü mi akkomwen nóm lón Lois inen inom we me lón Iunis inom we, nge ngang üwa fókkun älleta pwe mi pwal nóm lóóm.
6Iwe, ren ei popun, ngang üwa ächchema ngenuk pwe kopwe chök sópweló le ängeta ewe liffangen ngüün Kot a ngenuk lupwen ngang üwa isettä peii wóóm. 7Pün Kot esap ngeni kich ew ngünün piireir me nuokkus, pwe a ngeni kich ew ngünün manaman, tong me tipeppós le nemeni mochenin tipach. 8Iei minne, kosap fókkun sääwäsini óm kopwe sópweló le pwärätä ach Samol. Kosap pwal sääwäsiniei, inamwo ika ngang üwa nóm lón kalapwuus fäniten Kraist. Kopwe mollotä óm kopwe fitiei le riäfföü fäniten äi arongafeili ewe poraus allim ren ewe tüfich Kot a fang ngenuk. 9I ewe Kot mi amanawa kich o fili kich pwe sipwe manaweni ew manaw mi pin. I a föri ei, sap pwokiten sia fich ngeni ren ach föfför, nge pwokiten ina pwisin an akkóót me mwen än fönüfan a poputä, pwe epwe pwääri an tong me ümöümöch ngeni kich lón Kraist Jesus. 10Iwe, iei I a pwääraló unusen an ei akkóót ngeni kich ren wareton Kraist Jesus ach Chón Amanaw, ewe mi ataeló manamanen mäló o pwääraló ngeni kich ewe alen manaw ese mwüch ren ewe poraus allim. 11Iwe, Kot a filieitä pwe ngang üpwe emön chón afalafal me emön soukünö me emön chón esikuul fäniten ei poraus allim ngeni ekkewe Sentail. 12Iwe, pwal iei popun pwe ngang üwa riäfföü ikeei lón kalapwuus. Iwe, inamwo nge ngang üsap chök sääwäsini, pün ngang üwa silei ewe Emön ngang üwa lükü, o üwa fókkun älleta pwe a wor an manaman an epwe tongeni tümwünü meet ngang üwa lükü ngeni tori ewe rän I epwe liwinsäfälito.
Kómwöchünnük wón óm lükü
13Kopwe kömwöchünnük wón minne ka käeö seniei pwe ina meet kopwe ääni köük fäniten käit mi pwüngüöch. Kopwe chemeni pwe kopwe sópweló le manaweni ewe manawen lükü me tong en ka ääni lón Kraist Jesus. 14Ren manamanen ewe Ngüünmifel mi imweim lóóch, kopwe föröchchüw le tümwünü ewe iseis mi öüchchea Kot a lükü ngenuk.
15En ka fen silei pwe ekkewe chón lükü meinisin mi feitto ikeei seni ekkewe eifen lón Asia ra likitieiló, pwal mwo nge Fikelus me Hermokenes ra ló seniei.
16Amwo ewe Samol epwe pwääri an ümöümöch ngeni Onesiforus me unusen chón an famili, pwokiten i a soun äämwaei o echipaei. I esap fókkun sääwäsiniei pwokiten ngang üwa nóm lón kalapwuus. 17Nge fen lupwen i a feitto Rom, a fókkun achoocho le küttäfeiliei tori i a künaei. 18Amwo ewe Samol epwe fang ngeni i ümöümöch lón ewe rän Kraist epwe liwinsäfälito. En ka fókkun silei fichi usun öüküükün wätten an älisiei me lón Efisos.
Kopwe pöchökkül lón ewe ümöümöch
2 Iei minne, Timothy en neii mi ächengicheng, kopwe pöchökkül lón ewe ümöümöch Kot a fang ngenuk lón Kraist Jesus. 2En ka fen rong ngeniei lupwen ngang üwa esikuula ekkewe mettóch mi chómmóng ra fen ölükülük meren chómmóng chón pwärätä. Kopwe esikuula ekkeei kapasen let mi öüchchea ngeni ekkewe aramas mi ölükülük, iir mi tongeni ar repwe esikuula ngeni pwal ekkóch. 3Iei minne, en kopwe fitiei le engngiló fän riäfföü usun emön nöün Jesus Kraist sounfiu mi mwirinnö. 4Pwokiten en emön nöün Kraist sounfiu, iei minne kosap pwal attawara ngeni lon manawom minne aramas ra föfföri lón ei manaw, pün kopwe chök föri meet ewe Emön mi atolongók lón an mwichen sounfiu epwe pwapwa letipan ren. 5Kopwe pwal fiti pwüngün än ewe Samol kewe öllük fäniten óm kopwe föri an ngang, usun chök emön sensü a fiti pwüngün öllükün okkuf lón och peekin urumwot, pün are esap, iwe, epwe sapwil o esap angei ewe mwärin wiil. 6Emön chón atake mi angang weires epwe akkomw le emeseika wón uwään an angang. 7Kopwe leechüni meet keei ngang üwa apasa. Pün ewe Samol epwe fang ngenuk óm weweöch lón ekkeei mettóch meinisin.
8Kopwe chechchemeni pwe Jesus Kraist ewe mi upwutiw seni ewe mwirimwirin David, a manawsäfäl seni mäló. Iei ei poraus allim ngang üwa afalafala. 9Iwe, pwokiten äi afalafala ei poraus allim, ngang üwa tolong lón riäfföü o üwa mwo nge fööfö ngeni sein lón kalapwuus usun emön aramas ingaw. Iwe, inamwo nge ewe kapasen Kot esap tongeni fööfö ngeni sein. 10Iwe, ren ei popun, ngang üwa engngiló fän mettóch meinisin are epwe awarato ewe alen manaw me ling ese mwüch lón Kraist Jesus ngeni chókana Kot a fen filiiretä.
11Iei ew kapas mi ölükülük o let:
Are sia fiti Kraist le mäló, sipwe pwal fiti I le manaw. 12Are sia likiitü le engngiló fän riäfföü, sipwe pwal fiti I le nemenem. Are sia amaamäsini I, I epwe pwal amaamäsini kich. 13Are sisap ölükülük, I epwe chök sópweló le ölükülük, pün I esap tongeni epwe pwisin amaam I.
Nöün Kot kana chón angang I a tipeew ngeniir me kana I esap tipeew ngeniir
14Kopwe eneen le ächchema ngeni emön me emön ekkeei mettóch o öllüküchow ngeniir lón iten Kot pwe repwe ükütiw le äniini wón kapas. Pün esap wor lamowten ei sókkun äniini, nge a fen chök eselipato feiengawen chókewe mi rongorong ngeniir. 15Kopwe ekitachö le angang weires pwe Kot epwe tongeni etiwók. Kopwe emön chón angang mi mwirinnö, emön esap wor meet epwe sääw ren me emön mi öpwüngöchüw me äwenechchara le äwewei ewe kapasen let. 16Nge kopwe atoowawók seni kana kapas mi umwes me lalapaat mi pöön, pün chókana mi föri ei sókkun repwe chök sópweló le alapaló ar resap meniniti Kot. 17Ei sókkun afalafal epwe mwittir le meresfeil usun chök kanser. Hymenaeus me Filetus, iir minen äwewe usun ei. 18Iir ra tókkóló seni ewe alen let, o ra afalafala minne a chofona pwe a fen luuló ewe fansoun manawsäfäl seni mäló. Iwe, ra efeiengawa än ekkóch aramas lükü. 19Iwe, inamwo nge än Kot ei kapas mi let a chök üppós wón ewe lóngólóng mi nüküchchar, a impwangetiw wón ekkeei kapas: “Ewe Samol a silei chókana iir nöün”, iwe, pwal “Iteiten emön me emön mi apasa pwe i nöün ewe Samol epwe kul seni föfför mi ngaw meinisin.”
20Lón ew imwen chón wöw, a wor ekkóch sepi mi för seni kolt me silifer ra koon öüchchea, nge a pwal wor ekkóch mi för seni mwüüch me pwül resap koon öüchchea. Ekkana sepi mi möömmóng, ra sessepi fäniten ekkana fansoun mi öüchchea, nge ekkewe sepi mi möökükkün, ra sessepi iteiten rän. 21Iei minne, are emön epwe unusen limetiöchchüw manawan seni limengawen nónnómwun manawan me mwan, epwe wewe ngeni ew sepi fäniten fansoun mi öüchchea, a käimwüló o wor lamwotan fäniten än ewe Masta epwe tongeni sessepi fäniten minne I a mochen. Manawan epwe mollotä fäniten angang mi mwirinnö meinisin.
22Kopwe sü seni iteiten kana mettóch mi ämwärärätä mocheniän säräfö, nge kopwe tapweló mwirin minne epwe föri pwe kopwe mochen föri meet mi pwüng. Kopwe tapweri lükü me tong me kinamwe me pwapwaiti óm kopwe chiechi ngeni chókana mi kööri iten ewe Samol fän letip mi limöch. 23Ngang üpwe pwal apasasäfäli: Kosap atolongók lón ekkana kapasen äniini mi umwes me tiparoch, pün kopwe silei pwe ra chök efisätä fitikooko. 24Nöün ewe Samol amanaw esap souäniini, nge epwe kirekiröch ngeni meinisin. Epwe tongeni lipwäköch le esikuul o epwe mósónóttam ngeni ekkana aramas mi tipeweires. 25I epwe pweteete le esikuula chókana mi pölüeni ewe kapas mi let, pün eli epwe fis pwe Kot epwe siwili letipen ekkana aramas o mwüüt ngeniir ar repwe siwili ar ekiek pwe repwe lükü ewe let. 26Mwirin, repwe miriitiló o sü seni än ewe devil sär. Pün iir ra fen ooló ren ewe devil pwe repwe föri ese lifilifil meet i a mochen.
Fansoun efeiengaw me aramas mi efeiengaw
3Nge iei meet en Timothy kopwe silei, pwe lón ekkewe ränin sópwólón, epwe wor fansoun mi fókkun weires. 2Pün aramas repwe echeni chök pwisin iir me nöüür mooni. Repwe pwisin eingeretä o lamalamtekia, repwe turunufasei Kot, repwe älleasolap ngeni semeer me ineer o resap sile kilisou. Resap öüchcheani ar repwe epini och mettóch. 3Resap sile tong lón letiper, resap mochen omwusaló tipisin aramas ngeniir, repwe eitengawa aramas o resap tongeni nemeni mochenin tipeer. Repwe kirikiringaw usun maan o repwe chón opwut minne a mwirinnö. 4Repwe afangamäi pwisin chiechier, repwe üleförea, repwe sikesiketä fän lamalamtekia, repwe efich pwapwan manawer lap seni ar repwe echeni Kot. 5Repwe lapalapeni chök lapalapan pwe itä iir mi silei Kot, nge repwe amamääsini ewe manaman mi tongeni föri pwe repwe sókkuni sókkun Kot. Kosap chiechi ngeni ekkeei sókkun aramas.
6Pün ikkeei ekkewe sókkun aramas ra angangöch le föri meet repwe tolong ren lón imwen aramas o otupwaló ekkewe sókkun fefin mi apwangapwang lón manaweer me ar silei ewe let o ra nóm fän choun ar kana tipis me fän nemenien sókkopaaten mocheniä. 7Ekkeei sókkun fefin ra resin le käeö kana sókkun käit mi fö, nge resap tongeni repwe weweiti ewe let. 8Iwe, ekkeei chón esikuul ra üüngeni ewe let, usun chök än Jannes me Jambres ra üüngeni Moses. Iir ekkewe aramas a fókkun ingawaló ar ekiek, nge ar lükü a och chök pwomwen lükü mi otupwutup. 9Nge resap chök sópweló minne ra föri lón fansoun langattam, pün lón ew fansoun, aramas meinisin repwe silleni pwe iir aramas mi umwes, usun chök meet a fis ngeni Jannes me Jambres.
Ewe aramas nöün Kot me ewe kapasen Kot
10Nge en ka silei meet ngang üwa ääni esikuul me nónnómwun manawei, pwal meet popun äi manaw. En ka silei äi lükü me usun langattamen fansoun äi riäfföü. En ka silei äi tong me äi mósónóttam le engngiló. 11En ka silei usun äi tolong lón ninni me usun äi riäfföü üwa engngiló fän. En ka silei usun unusen öüküükün ekkewe riäfföü ngang üwa nóm lón me lón Antiok, lón Ikonium me lón Lystra, nge ngang üwa chök engngiló far. Nge ewe Samol a chimanüweiwu seniir meinisin. 12Ewer, iei pwüngün pwe meinisin mi mochen repwe manaweni ewe manawen tupwöl lón Kraist Jesus, repwe tolong lón riäfföün ninni. 13Nge ekkewe aramas ingaw me chón otupwutupw mi ämwälaló ewe kapasen Kot repwe fen esselükaló ngawer seni mwan. Repwe otupwu ekkóch, nge pwal pwisin iir repwe tupwuló. 14Nge en, kopwe chök sópwósópwóló lón óm ölükülük ngeni ekkewe mettóch ka fen käeö. En ka silei pwe ra let, pün en ka silei pwe ka tongeni lükü chókewe en ka käeö seniir. 15Pwal seni chök lekükkünum ka fen käeö ekkewe taropwe mi pin iir mi tongeni etipächchema ngenuk óm kopwe etiwa ewe manaw mi feitto seni óm lükü lón Kraist Jesus. 16Unusen makken lón ekkewe taropwe mi pin a pop seni enienin ngasangasen Kot. Iwe, a lamwot fäniten an epwe äiti ngeni kich meet mi let o fönöw kich ren meet mi mwääl lón manawach. A pwal lamwot fäniten an epwe äwenasäfäli kich lupwen sia mwäliló o sópweló le öüröürä kich o emiriiti kich pwe sipwe föri meet mi pwüng, 17pwe nöün Kot we chón aronga an kapas epwe unusen supwusupwöch o pwonolengin fäniten an epwe föri iteiten angang mi mwirinnö meinisin.
Kopwe afalafala ewe kapasen Kot
4 Ngang üwa fókkun öllüküchow ngenuk me mwen mesen Kot pwal mwen mesen Kraist Jesus, ewe epwe öpwüngü ekkewe mi manaw me ekkewe mi mäló lupwen epwe liwinsäfälito pwe epwe öpwönüetä mwün we: 2Kopwe afalafala ewe Kapasen Kot. Kopwe chök osousouló le mollotä, ese lifilifil ika lón fansoun mi fich ika lón fansoun esap fich. Kopwe mósónóttam le föri ewe angangen emiriit me angangen öpwüngü meet mi mwääl me angangen öpöchökkülatä letipen noum kewe aramas ren käit mi mwirinnö. 3Pün epwe war ewe fansoun lupwen aramas resap mochen repwe engngiló le öüseling ngeni käit mi pwüng. Nge pwokiten repwe mochen ekinamweii lón selinger ren än emön epwe aronga ngeniir minne chök ra mochen repwe rong, repwe kütta chómmóng nöür sense mi mochen repwe afalafala ngeniir minne ra mochen pwe repwe rong. 4Iwe, repwe okkullaló selinger seni ewe let, nge repwe kul o öüseling ngeni ekkewe tuutulap. 5Nge en, kopwe sópweló le affata óm ekiek lón ei sókkun lapalap. Kosap nuokkusiti óm kopwe riäfföü fäniten ewe Samol. Kopwe föri ewe angang än emön chón aronga ewe porausen manaw usun Kraist. Kopwe ounusaöchüw le öpwönüetä ewe angang Kot a ewisa ngenuk.
Än Paul kapwongen kósópw
6Pün ngang üwa fen mollotä äi üpwe fangaló manawei pwe epwe niiniló usun ew asóren wün ngeni Kot. Ewe fansoun äi üpwe kepichiló a arap. 7Ngang üwa fen ääni ew fiiu mi mwirinnö, ngang üwa äwesöchüeló ewe kitir, ngang üwa tupwöl lón äi lükü. 8Iwe, iei a fen iseiseló fänitei ew liffangen wiil, iei ewe mwärämwärin pwüng ewe Samol, ewe Souköpwüng mi pwüng, epwe ämwära ngeniei lón ewe Rän mi lapalaap lupwen epwe liwinsäfälito. Nge ewe liffangen wiil esap chök fänitei, nge i pwal fäniten chókana meinisin mi echeni le ösüküsükü än Kraist epwe liwinsäfälito lón lingan.
Paul a peseei Timothy pwe epwe feitto
9Kose mochen kopwe achoocho ngeni óm kopwe mwittir feitto rei; 10pün Dimas a likitieiló o feilló Tessalonika, pwokiten a efich ekkewe mettóchun lón ei fönüfanen ikenäi. Kresens a fen feilló Kalatia, Titus a feilló Dalmatia. 11Luke chök ei a nóm rei. Kopwe angei Mark pwe epwe fituk lupwen kopwe feitto, pün i mi lamwot ngeniei fäniten ei angang. 12Nge ngang üwa tiinaló Tykikos ngeni Efisos. 13Lupwen kopwe war, kopwe mwineto ewe pinu ngang üwa likitaló ren Karpus lón Troas. Kopwe pwal mwineto neii kewe taropwe, nge wesewesen koon neii kewe chöön taropwe mi för seni ülüchchen maan.
14Alexander, ewe chón fóri pisek seni mächä a föri ngeniei angangen feiengaw mi wätte. Nge ewe Samol epwapw öpwüngü i fäniten meet a föri. 15Kopwe pwisin äfälliik ren, pün i a fókkun pöchökkül le üüngeni meinisin minne äm aia apasa.
Ewe Samol a uren ölükülük
16Lón ewe äewin fansoun a fis äi upwe pwisin peniei lón köpwüng, esap ekkemön mwo a nóm rei. Iir meinisin ra likitieiló. Amwo itä esap toriir chappen ar föfför. 17Nge ewe Samol a ü rei o öpöchökkülaei, pwe ngang üpwe tongeni afalafala ewe poraus allim lón unusan, pwe ekkewe Sentail meinisin repwe tongeni rong. Iwe, I a angasaei seni lón awen ewe laion. 18Ewer, ewe Samol epwe chimanüei seni ekkewe angang ingaw mi efeiengaw meinisin o epwe uweieiló fän kinamwe ngeni mwüün we lón läng. Kot epwe ling tori feilfeilló chök. Amen.
19Kopwe uwei äi kapwong ngeni Prisilla me Akwila, pwal ngeni chókana mi nónnóm lón än Onesiforus famili. 20Erastus a nómwóló lón Korint, nge ngang üwa likitätiw Trofimus lón Miletus pün a samwaw. 21Kopwe achoocho ngeni óm kopwe käito pwe kopwe tongeni wareto me mwen ewe fansoun patapaten leefen. Än Eubulus kapwong ngenuk, pwal än Pudens me Linus me Klaudia me ekkewe pwiipwi meinisin kapwong ngenuk.
22Ewe Samol epwe nónnóm ren ngünum. Ümöümöch epwe nónnóm reemi meinisin. Amen.