2 Tessalonika

Paul a kapwong ngeni ewe mwichefel lón Tessalonika

1Ei taropwe seni keem äm Paul me Silvanus me Timothy. Äm äia mak ngeni kemi ämi chón ewe mwichefel Tessalonika ämi nöün Kot Samach me ewe Samol Jesus Kraist.

2Ümöümöch me kinamwe repwe tori kemi seni Kot Samach me ewe Samol Jesus Kraist.

3Iei wiseem pwe äm äipwe kilisou ngeni Kot iteiten fansoun meinisin fänitemi, ämi pwiim kana, pun a fich ngeni kemi, pwokiten ämi lüku a fókkun wätte lapalón, pwal än emön me emön leiimi tong fengen lefiilemi a fen wesewesen wätte mämmäärilón. 4Iei minne, pwisin äm äia kapasen eingeing usumi me leiin chón än Kot kewe mwichefel fäniten ämi sile engngiló me ämi lükü lepwonen ämi nóm lón weiresin ninni me riäfföü ämi mi mwärelong far.

5Nge Kot epwe aea ei riäfföü le älletätä pwe an kopwung a pwüng. Pün iei meet a fis, pwe öüpwe fich ngeni ämi öüpwe ällealong lón ewe mwüün Kot ämi öüwa riäfföü fänitan. 6Iwe, pwokiten Kot a ääni öpwüngüwel, I epwe öpwüngü chókana mi eriäfföwü kemi. 7Iwe, Kot epwe pwal awora asöösö fänitemi ämi chókana mi riäfföü pwe öüpwe ngasaló, epwe pwal angasa keem. Ei epwe fis lupwen ewe Samol Jesus epwe pwääto seni läng lón pwulopwulen ekkei fiti nöün kewe chón läng mi pwora. 8I epwe atoowu chappen tipis ngeni chókana resap silei Kot, pwal ngeni chókana resap mochen älleasochisi ewe poraus allim än ach Samol Jesus. 9Ikkeiir chókewe repwe angei chappen ar tipis lón feiengaw esap tongeni epwe mwüchchüló, repwe kösüüló seni mwen mesen ewe Samol pwal seni an manaman mi ling, 10lón ewe ran I epwe warto lupwen epwe unusen pwäló lingen meet I a öpwönüetä me lón manawen nöün kana aramas mi pin o ekkewe chón läng repwe ingemwareiti lingan epwe pwä me leiin chókana meinisin mi lükü. Pwal ämi öüpwe etiir lón ena fansoun, pwokiten öüwa lükü meet äm äia pwärätä ngeni kemi usun I.

11Iei minne, äm äia sópweló le iótek iteiten fansoun meinisin fänitemi, pwe ach we Kot epwe föri pwe öüpwe fich ngeni ewe manaw I a kööri kemi fänitan. Äm aia pwal iótek pwe Kot epwe öpwönüetä, lón an manaman, meinisin meet mi mwirinnö öüwa ekiekietä, pwal iteiten föfför mi pop seni ämi lükü. 12Mwirin, iteiten aramas meinisin repwe elingaló iten ach we Samol Jesus Kraist pwokitemi, nge ämi öüpwe fiti I le lingeló. Ei a chök tüfich pwokiten ewe ümöümöch än ach we Kot me ewe Samol Jesus Kraist.

Ewe mwän mi üüngeni öllük me ewe chón eppeti

2Iwe iei, ämi pwiim kana, äm aipwe üreni kemi usun ewe fansoun waresäfälin ach we Samol Jesus Kraist me ach sipwe chufengen pwe sipwe chuuri I. Äm aia tungór ngeni kemi, 2pwe öüsap mwittir mwokütüküt lón ämi ekiek ika osukosuk ren chókana mi apasa pwe ewe ränin ewe Samol a fen poputä. Öüsap lüküür, ika mwo repwe apasa pwe emön ngüün a pwääri ngeniir ika emön a kapas usun lón an afalafal, ika ra silei seni echö taropwe itä wewen nge e feitto seni keem, epwe kapas usun pwe ewe ränin ach Samol a fen war. 3Öüsap mwüüt ngeni emön epwe otupwu kemi ren och sókkun lapalap. Pün ewe rän esap war tori epwe akkomwen fis ewe mwökütükütün tókkóló seni Kot me ewe mwän mi üüngeni öllük epwe pwä, iei i ewe emön epwe fätäl ngeni an epwe feiengaw. 4I ewe epwe üüngeni Kot o epwe pwal pwisin etekiatäi asen meinisin minne a iteni pwe kot. Epwe ataetiw iteiten mettóch meinisin aramas ra epini me fel ngeni. Iwe, epwe pwisin móótóló lón än Kot we imwenfel, o epwe pwisin apasa pwe i Kot.

5Ifa usun, öüsap chechchemeni pwe lupwen äi we chüen chök nóm reemi, ngang mi üreni kemi usun ekkeei mettóch? 6Iwe, iei ämi mi silei meet a eppeti ätei iei, pün i epwe tongeni pwä lupwen chök a mwüümwütä ngeni an fansoun. 7Pün ewe ngünün üüngeni öllük a fen akkangang lemwónómwón iei, nge ewe emön mi eppeti ei ngünün üüngeni öllük epwe chök sópweló le ekkepeti tori i epwe kämäriwu. 8Mwirin, ewe mwän mi üüngeni öllük epwe le pwä, iei i ätewe ewe Samol epwe oturalong lón ewe nómwun ekkei ren chök enienin äsäpwäälin awan o ataeló an manaman ren saramaramen an wareto. 9Ei mwän mi üüngeni öllük epwe war pwe epwe föri än Satan angang, epwe pwääpwäló lón sókkopaaten lipwopwomwen manaman me esissil me föfför mi amwaraar. 10I epwe aea sókkopaaten föfföringaw mi otupwutup pwe epwe otupwaló chókana mi fätäl ngeni ar repwe tolong lón kitetter, pwokiten resap mochen repwe efich ewe let pwe repwe küna manaw. 11Iwe, ren ei popun, Kot epwe tiinato wóór wätten pöchökkülen mwälilón lón ar ekiek, pwe repwe lükü ewe chofona. 12Mwirin, iir meinisin repwe köpwüng, pün resap lükü ewe let, nge ra fen apwapwai manawer lón pwüngingaw.

Kömwöchünnük wón meet öüwa fen käeö

13Nge äm, aia kilisou ngeni Kot iteiten fansoun meinisin fänitemi, ämi pwiim kana mi ächengicheng mi chen meren ewe Samol. Äm aia fókkun kilisou, pwokiten Kot a fili kemi seni chök lepoputän pwe öüpwe pacholong leiin ekkewe mi akkomwen küna manaw, iei ewe manaw a feitto meren ewe Ngüünmifel mi föri pwe öüpwe pin, a pwal feitto ren ämi lükü lón ewe let. 14Kot a öpwönüetä an fili kemi ren an kööri kemi ngeni ewe manaw lupwen äm aia aronga ngeni kemi ewe poraus allim. Iwe, iei öüwa tongeni fiti ach Samol Jesus Kraist lón lingan.

15Ina minne, ämi pwiim kana, öüpwe üppós o kömwöchünnük wón ekkewe mettóch meinisin äm aia äiti ngeni kemi, ese lifilifil ika seni kapasen aweem ika seni lón taropwe seni keem.

16Iwe, amwo pwisin ach Samol Jesus Kraist me Kot Samach, ewe mi tongei kich o fang ngeni kich chipen letipach tori feilfeilló chök lón an ümöümöch me ach apilükülük mi mwirinnö, 17repwe echipa letipemi o fang ngeni kemi ämi pöchökkül lón iteiten mettóch mi mwirinnö ämi öüwa föri me apasa.

Än Paul tungórun iotek

3Me lükün ei, ämi pwiim kana, ngang üwa tungór ngeni kemi pwe öüpwe iótek fäniteem. Äkkäewin, öüpwe iótek pwe än ewe Samol ei kapas epwe mwittir le meresfeil o lingeló ekis meinisin ia epwe tori ie, usun chök lupwen a tori kemi. 2Öüpwe pwal iótek pwe äm äipwe ngasaló seni ekkeei aramas mi föfföringaw me kirikiringaw, pün sap meinisin ra lükü lón ewe Samol. 3Nge ewe Samol a ölükülük pwe I epwe öpöchökküla kemi o eppeti seni kemi ewe emön mi ingaw. 4Iwe, a wor äm apilükülük lón ewe Samol fänäsengesimi, pwe öüpwe sópweló le föri meet äm äia öllük ngeni kemi, nge ämi mi pwal tipeni pwe öüpwe föri fansoun meinisin. 5Amwo ewe Samol epwe emmweni letipemi ngeni än Kot we tong me ewe tipeppós mi feitto seni Kraist.

Än Paul kapasen fön fäniten chipwang

6Nge iei, ämi pwiim kana mi ächengicheng, äm aia ngeni kemi ei öllük lón iten ach we Samol Jesus Kraist: Öüpwe äimwü kemi seni emön pwiipwi chón lükü mi manaweni manawen chipwang, nge esap fiti pwüngün ewe öörüni fäniten angang weires äm aia äiti ngeni kemi. 7Pün ämi mi silei pwe mi öüchchea ämi öüpwe appirü keem, pwokiten äm äisap manaweni ei manawen chipwang lupwen äm aia nóm reemi. 8Äm äisap etiwa och mwöngö seni emön, are äm äisap mööni. Esap ina usuum, pün äm aia öttüres le angang weires lepwin me lerän pwe äisap mochen pwe äipwe och osochchow ngeni emön me leiimi. 9Sap itä fäniten an esap wor äm pwüüng pwe äipwe angei älilisiim seni kemi, nge pwokiten äm aia mochen pwe äipwe ew leenien appirü ngeni kemi, pwe öüpwe appirü keem. 10Iwe, fen pwal lupwen äm we nóm reemi, iei ewe öllük äm aia soun üreni kemi: “Are emön esap mochen epwe angang; iwe, esap pwal mwöngö.”

11Pün äm aia rong me rong pwe mi wor ekkóch leiimi ra chök nómomwäl, resap mochen föri och angang, nge ra olussumwälieló ar fansoun le osukosukolong lón än pwal ekkóch aramas angang. 12Iwe, lón iten ach we Samol Jesus Kraist, äm aia fönööw ekkeei sókkun aramas o öllük ngeniir pwe repwe appóseretiw o pwisin angang, pwe repwe tori meet repwe manaw seni. 13Nge ngang üwa apasa ngeni kemi ämi lussun pwiim kana mi ächengicheng, öüsap ekiekin achaanü le föri minne mi mwirinnö.

14Öüpwe nengeniöchüw chókana resap mochen älleasochisi äm keei öüröür lón ei taropwe. Iwe, öüsap chüen chiechi ngeniir pwe repwe sääw. 15Nge öüsap chök ekieki ngeniir pwe iir chón oputemi, pwe öüpwe fen fönöör pwokiten iir pwiimi chón lükü.

Kapasen efeiöchun ümöümöch

16Iwe, amwo pwe pwisin ewe Samolun kinamwe epwe sópweló le fang ngeni kemi kinamwe iteiten fansoun meinisin, ese lifilifil ika meet a fis ngeni kemi. Ewe Samol epwe nónnóm reemi meinisin!

17Ngang Paul, üwa makkei äi ei kapwong ren pwisin peii. Ngang üwa föri ei lesópwólón neii kewe taropwe meinisin, pwe epwe älletätä pwe ekkewe taropwe ra wesewesen feitto seniei.

18Ümöümöchün ach we Samol Jesus Kraist epwe nónnóm reemi meinisin. Amen