2 Peter

Peter a kapwong ngeni chókewe mi ölükülük me likiitü

1Ei taropwe seniei ngang Simon Peter emön nöün Jesus Kraist amanaw me chón künö. Ngang üwa mak ngeni kemi ämi meinisin mi fiti kich le ääni ewe lükü mi öüchchea, Jesus Kraist ach Kot me Chón Amanaw a ngeni kich, I ewe mi föri pwe sipwe wiliti chón pwüng meren Kot.

2Amwo Kot epwe efeiöchü kemi ren an ümöümöch me kinamwe mi amwaraar pwokiten öüwa silefichi Jesus ach Kot me Chón amanaw.

Uwään ach mämmääritä lón lükü

3Lupwen sia silefichi Kraist, än Kot manaman a fang ngeni kich mettóch meinisin sia osun fäniten ach sipwe manaweni ew manawen tupwöl me meniniti Kot, I ewe mi kööri kich pwe sipwe etiwa an ling me ewe manaw mi unusen echchipwör. 4Pwal ren ei chök manaman, I a fang ngeni kich an kana pwon meinisin mi fókkun lapalaap me öüchchea. I a pwon pwe öüpwe tongeni pichiló seni ewe limengaw mi nóm ünükkümi mi pop seni mocheniä pwe öüpwe fiti Kot le sókkuni sókkun.

5Iwe, iei popun, öüpwe fókkun achoocho le ekita ngeni ämi öüpwe aea feiöchchün ekkeei pwon ngeni manawemi. Mwirin, ämi lükü epwe efisätä ew manaw mi unusen echchipwör, nge manaw mi unusen echchipwör epwe emmweni ngeni kemi ämi silelapei Kot. 6Ämi silelapei Kot epwe emmweni ngeni kemi tüfichin tipeppós, nge tüfichin tipeppós epwe emmweni ngeni kemi mósónóttam le engngniló, nge mósónóttam le engngniló epwe emmweni ngeni kemi manawen tupwöl me meniniti Kot, 7nge manawen tüpwöl me meniniti Kot epwe emmweni ngeni kemi manawen kirekiröch fengen lefiilen pwiipwi chón lükü. Iwe, ömwüchchülón, öüpwe mämääritä lón ämi öüpwe ääni enletin tong ngeni meinisin. 8Pün are öüwa ääni ekkeei manawen lipwäköch o repwe lallapaló me lón manawemi, iwe, repwe eppeti seni kemi ämi öüpwe lamwotongaw are uwangngaw lón ämi enletin silelapei ach Samol Jesus Kraist. 9Nge iö esap ääni ekkeei manawen lipwäköch, i emön mi mesechuun, esap tongeni küna minne mi nóm toowaw, pün i a fen mollükaló pwe Kot a fen limeti seni an kewe tipis i a förir melóóm.

10Iei minne, ämi pwii kana, öüpwe alapaló ämi tilikken le älelletafichi pwe a wesewesen ächiööw usun ämi kö me fil, pün are öüpwe föri ekkeei manawen lipwäkoch, iwe, öüsap fókkun turuló. 11Pün ren ei lapalap, epwe kawor fänitemi ew leenien tolong lón ewe mwüü ese mwüch, mwüün ach we Samol me Chón Amanaw Jesus Kraist.

A arapakkan än Peter epwe mäló

12Ren ei popun, ngang üsap tümwününgaw äi üpwe ächchema ngeni kemi iteiten fansoun meinisin usun ekkeei manawen lipwäköch, inamwo are öüwa silei usur o üppós lón ewe let mi wor reemi iei. 13Ewer, ngang üwa lükü pwe mi pwüng pwe üpwe ämwälekätä letipemi ren äi üpwe äkkächchema ngeni kemi usun ekkeei mettóch lón ei üküükün fansoun ngang mi chüen manaw, usun chök nge ngang mi asóósó lón ew tento, iei inisi. 14Pün ewe Samol Jesus Kraist a fen pwääri ngeniei pwe ränin manawei wón ei fönüfan ra chök mwochomwooch. Iwe, ngang üpwe mwittir atomwäätiw ei tento minen fönüfan. 15Pwal lapalón, ngang üpwe achoocho ngeni pwe mwirin äi mäló, öüpwe tongeni chemeni ekkeei mettóch iteiten fansoun.

Ewe kapasen oosuni mi ölükülük

16Pün lupwen äm äia esile ngeni kemi usun manamanen ach Samol Jesus Kraist me usun an waresäfälito, äm äisap liköppirüw ekkewe porausen tipächchem soolä aramas ra chök pwisin efisätä. Pün wesewesen äm äia küna ren pwisin meseem an we ling mi amwaraar. 17Pün I a angei iteüöch me ling seni ewe Kot Saam, lupwen ewe möngüüngü mi feitto ren seni ewe Ling mi Amwaraar o apasa: “Iei i Neii mi ächengicheng, Ngang üwa fókkun pwapwa ren.” 18Iwe, pwisin äm äia rong ei möngüüngü mi feittiw seni läng lupwen äm nóm ren wón ewe chuuk mi pin.

19Pwokiten ei, äia fókkun älleta le apilükülüküw meet ekkewe soufós ra aronga lón ar kapas. Iwe, a fókkun mwirinnö ngeni kemi are öüpwe äfälli minne iir ra makkeetiw, pün ar kapas ra usun chök saram mi ttin lón ew leeni mi rochopwak tori epwe tö ewe mallen rän o ewe füün lesossor epwe töötä, iei ewe rän Kraist epwe pwä o lingan mi saramaram epwe tittin me lón letipemi.

20Nge äkkäewin lapalalón seni meinisin, öüpwe weweiti pwe esap wor ew kapasen oosuni lón ekkewe taropwe mi pin a pop seni pwisin än emön soufós äwewei meet mi mwónómwón. 21Pün esap wor ew kapasen oosuni a pop seni letipen aramas, nge i ekkewe aramas ra kapas seni Kot lupwen ra mwökütüküt ren ewe Ngüünmifel.

Än ekkewe chón afalafal chofona afalafal mi efeiengaw

2Melóóm a wor ekkewe soufós chofona leiin nöün Kot kewe aramas. Iwe, epwe pwal ina chök usun pün epwe pwal wor chón afalafal chofona leiimi, repwe atolonga le mwónómwón ar kana sókkun ekiek mi efeiengaw. Iwe, repwe mwo nge amaamäsini ewe Samol mi möönir o repwe pwisin awarato wór feiengaw mi mwittir. 2Iwe, chómmóng aramas repwe tapweló mwirin ar kewe föfför mi ässääw. Iwe, aramas repwe kapasen turunufasei ewe aal mi let pwokiteer. 3Lón än ekkeei chón afalafal mi chofona tipemmóng, repwe öünöüna kemi pwe repwe angei nöümi mooni ren poraus mi chofona ra chök pwisin efisätä. Esap mang pwüngün ar köpwüng Kot a fen öpwüngaló chök seni melóóm, nge ar feiengaw esap eilessum pün epwe war.

4Pün are Kot esap ächchika ekkewe chón läng lupwen ra tipis, nge a otururelong lón ewe hell o föötekiniir ngeni sein lón ewe pwaang mi rochokkich, pwe repwe nóm lón tori ewe ränin köpwüng, 5are I esap ächchika ewe fönüfanen lóóm, nge a chök amanawa Noah, ewe chón afalafala minne mi pwüng, me ekkewe füümön aramasen lón an famili lupwen a awarato ewe nóóter wón ekkewe aramasen fönüfan resap manaweni manawen meniniti Kot, 6are I a öpwüngü ekkewe telinimw Sodom me Komorrah o keniireló pwe repwe wiliti ioien peas o föri pwe repwe och minen appirü ren meet epwe fis ngeni ekkana aramas resap meniniti Kot, 7pwal are I a chimanüüw Lot emön aramas mi pwüng, a meefi riäfföün lón manawan ren limengawen manawen ekkewe aramas resap silei Kot, 8(pün i emön aramas mi pwüng a nónnóm leiin ekkewe aramas mi üüngeni än Kot öllük, a fókkun riäfföü lón manawan mi pwüng ren ekkewe föfför mi ngaw i a küna me rongorong iteiten rän) 9are iei usun, mwirin, ewe Samol a silei usun an epwe chimanüwewu ekkewe aramas mi meniniti Kot seni lón ar kana riäfföün sóssót, nge a anómwu ekkewe chón pwüngingaw fän liwiningawen ar tipis o souni ngeniir ewe ränin köpwüng. 10Ei a fókkun let ren chókana mi chök ouucho le tapweló mwirin mochenin fituker me mocheniän manawen limengaw me üüngeni nemenem.

Ekkeei sókkun aramas ra lamalamtekia me pöchööw, resap nuokkus ar repwe kapas mi ngaw fäniten ekkewe mönün lón läng mi ling. 11Nge ekkewe chón läng, inawo are a lapalaap ar manaman me pöchökkül seni ekkeei soufós chofona, nge resap apasa och kapasen eitengaw usun ekkeei mönün lón läng me mwen mesen ewe Samol. 12Ekkeei chón afalafal chofona ra kapas mi ngaw fäniten ekkewe mettóch mi wor ar manaman iir resap weweiti usun. Iir ra wewe ngeni kana maan mwacho resap sile ekiek, ra chök fiti meet pwükütän öörünien inisir, ra upwütiw fäniten än aramas repwe liäpeniir o niireló. Iwe, ekkewe chón afalafal chofona repwe pwal ninniiló usun chök ekkewe maan mwacho.

13Iwe, repwe angei feiengaw pwe ina liwinin ar föfför mi pwüngingaw ra föri. Ra saani ar emeseiker le pwisin föri mochenin letiper fän tinen akkar lerän. Ra wewe ngeni och oreinü me och mettóch mi wor terin me leiimi. Ra föri pwisin pwapwan mochenin letiper mi otupwutup, lupwen ra fiti kemi lón ämi chiechi fengen le föri ewe kametipen tong. 14Meseer kana ra chök uren nennen mesen lisowu, nge ar mocheniä esap sile an epwe menemenöch. Ra saani ar repwe paanalong lón tipis ekkana aramas resap nüküchchar. Ra aöörüni ngeni letipeer pwe repwe tipemmóng. Iir chón feiengaw me önümaamaw. 15Ra tókkóló seni ewe aal mi pwüng o ra fitaaló le appirüw föfförun Balaam nöün Beor we, i ewe mi saani an epwe angei mooni ren an föri föfför mi pwüngingaw. 16Nge Baalam a ükütiw seni an föfför mi umwes lupwen nöün we dongki esap sile kapas a öpwüngü i le emengiringiri o kapas ngeni i lón möngüüngün emön aramas.

17Ekkeei chón afalafal chofona ra lamwotongaw usun chök ekkana chönüttu resap löölö ren kólik, ika usun ekkana kuchu, äsäpwääl wätte a chök pööniireló, pün ra achómmónga minne ra ääni pwon, nge esap wor och minne ra awora. Ra chök ossow ngeni ewe leeni mi kirochorochen rochopwaak tori feilfeilló chök. 18Pün aweer a apasatä kapas mi tunommóng usun pwisin iir me kapas mi pöön me kapasen eingeing mi umwes. Ra ääni ammóón ekkewe mettóch mi amwäräärä ngeni mocheniän fituk me föfförün sikeppwach pwe repwe paanisäfälielong lón tipis chókewe re kärän chök tiwewu seni ei sókkun manawen föfföringaw. 19Ra pwon ngeni aramas ar repwe ngasaló, nge pwisin iir wón inisiir ra nóm fän nemenien tipis me ekkewe föfför mi limengngaw. Pün ese lifilifil ika meet a okkufu emön aramas; iwe, ina meet i a nóm fän nemenian. 20Iwe, lupwen ekkóch aramas ra tiwewu seni ekkewe limengngawen ei fönüfan ren ar silei ewe Samol me Chón Amanaw Jesus Kraist, nge mwirin, ra pwal likäfiif säfäl lón tipis o wiliti nöün tipis amanaw säfäl, iwe, nónnómwun manawer me mwirin epwe fókkun ngaw lap seni nónnómwun manawer me mwan. 21Pün epwe fen mwirinnö ngeniir are resap silei ewe aal mi pwüng, lap seni ar repwe silei usun, nge mwirin ra kul seni ewe öllük mi pin a fen katooto reer. 22Iwe, a fis ngeniir usun enletin minne ewe mwiitun e apasa: “Emön kolak a liwinsäfäliti mwusan o äni” pwal “emön piik mi fen limöch a liwinisäfälilong lón móchór o asokopela lón.”a

Kot esap tunaaló an pwon

3 Iei ewe örüwachöön taropwe ngang üwa makkei ngeni kemi, ämi chiechiei kana mi ächengicheng. Lón ekkeei taropwe me ruächö, ngang üwa sótuni äi üpwe ämwäsangatä lón ämi ekiek ren äi ächchema ngeni kemi, 2pwe öüpwe chechchemeni ekkewe kapasen oosuni meren ekkewe soufós mi pin ra apasa melóóm me ewe öllük ewe Samol me Chón Amanaw a ngeni keem, äm nöümi kewe soukünö.

3Äkkäewin, ämi öüpwe fókkun weweiti pwe lón ekkewe ränin sópwólón epwe wor chón turunufas repwe war. Repwe takiri kemi o fiti pwisin ar mochen mi ngaw. 4Iei meet repwe ääni wiipinepin le apasa: “Iwe, kan ifa chök än Jesus we pwon pwe I epwe liwinsäfäl? Iwe, ifa i chök? Pün seni chök ewe fansoun ach kewe leewo ra möürüló, mettóch meinisin mi chök sópwósópwóló usun chök seni lepoputän än Kot föri förian kana.” 5Pün ra fiseetä seni lón letipeer pwe repwe möllükaló pwe Kot a föri ekkewe läng ren än kapas, pwal fönüfan a pwääwu me lón ewe löölö o nóm lefiilen ekkewe löölö ren än Kot kapas. 6Mwirin, Kot a aea ewe löölö me an kapas le ataeló ewe fönüfan mi nóm melóóm ren ew nóóter mi lapalaap. 7Nge ren chök pwal ewe kapas, ei läng me ei fönüfan mi nóm ikenäi ra iseiseló o ammol ngeni ar repwe keekiló ren ekkei lón ewe ränin köpwüng me feiengaw esap mwüchchüló, lupwen ekkewe aramas resap silei me meniniti Kot repwe määfeiengaw.

8Nge ämi chiechiei kana mi ächengicheng, öüsap fókkun möllükaló ei och mettóch, pwe meren ewe Samol, ew rän a usun chök engorow ier, nge engöröw ier, a usun chök ew rän. 9Ewe Samol esap wesewesen mang an epwe öpwönüetä an pwon pwe epwe liwinsäfälito, usun ekkóch aramas ra ekieki pwe a mang. Apwi, nge I a chök mósónóttam ngeni kemi, pün esap mochen pwe emön epwe määfeiengaw feilfeilló chök, nge a mochen pwe meinisin repwe siwili ar ekiek, kul seni tipis o kul ngeni Kot.

Ewe ränin ach Samol epwe war

10Nge ewe ränin ach Samol epwe war lón fansoun sisap ösüküsükü, usun emön chón soolä lepwin. Lón ei atun, läng epwe móróló ren och sókkun ökürang mi lapalaap, nge ekkewe sókkopaaten minen fän läng repwe teliló ren pwichchikkar mi fókkun selüküló. Iwe, fönüfan me mettóch meinisin mi nóm wón repwe karaló.

11Iwe, pwokiten mettóch meinisin repwe iei usun ar repwe teliló, iwe, epwe ifa sókkun aramas ämi öüpwe sókkuni? Öüpwe fökkun manaweni manawen pin me nuokkus Kot, 12lón ämi witiwiti me atapwanato wareton ewe ränin Kot, pwokiten lón ei rän Kot epwe kenaló ekkewe läng ren ekkei. Iwe, ekkewe minen fän läng repwe teliló ren pwichikkaren ngetengeten ekkei. 13Iwe, iei mwo, nge alóngólóng wón an pwon, kich sia ösüküsükü ew lang mi fö me ew fönüfan mi fö, ia ekkewe chón pwüng repwe nónnóm ie.

Sipwe likiitü tori än Kraist epwe war

14Iei minne, ämi chiechiei kana mi ächengicheng, pwokiten öüwa ösüküsükü ekkeei mettóch pwe repwe fis, öüpwe ekitacho ngeni ämi öüpwe pwä me mwen mesen Kot nge esap wor tikipwülümi me itengawemi o epwe wor ämi kinamwe. 15Iwe, öüpwe anómwu lón ämi ekiek pwe än ach Samol mósónóttam iei alen än aramas repwe küna manaw. Iei chök pwal minne pwiich we mi ächengicheng Paul a fen mak ngeni kemi usun, ren ewe tipächchem Kot a fang ngeni i. 16Pün i a kapas usun ekkeei mettóch lón nöün kewe taropwe meinisin. Nge a wor ekkóch mettóch i a kapas usun lón ekkeei taropwe ra weires än aramas repwe weweiti. Ikkeei ekkewe mettóch ekkana aramas mi tiparoch me tipewiliwilikkis ra efitteki le soreei wewen o asókkaaló seni meet wewen meren Paul, usun chök minne ra pwal föri ngeni ekkewe pwal ekkóch kinikin mi makketiw lón ekkewe taropwe mi pin. Iwe, ra pwisin föri minne repwe feiengaw ren.

17Iei minne, ämi chiechiei kana mi ächengicheng, ngang üwa ataweei chök me mwan le fönöw kemi, pwe öüpwe äffäli kemi pwe öüsap tókkóló ren ekkewe mettóch mi mwääl än ekkewe aramas mi föfföringaw. Ngang üsap mochen pwe öüpwe tur seni ämi nüküchchar. 18Nge öüpwe mämmääritä lón ewe ümöümöch me silelapei ach we Samol me Chon Amanaw Jesus Kraist. I epwe ling ikenäi pwal tori feilfeilló chök. Amen.