2 Korint

Kapwong

1Ei taropwe seniei ngang Paul, emön nöün Jesus Kraist soukünö fän letipen Kot, pwal seni pwiich ei Timothy. Äm aia mak ngeni kemi ewe mwichefelin Kot mi nóm lón Korint pwal ngeni ekkewe chón pin meinisin mi nómfeil leemelen Akaia.

2Ümöümöch epwe nónnóm reemi pwal kinamwe seni Samach Kot me ewe Samol Jesus Kraist.

Än Kot angangen echipechip lón riäfföü

3Sipwe mwareiti Kot, I Semen ach we Samol Jesus Kraist, I ewe Saam mi ääni kirekiröch me ewe Kot mi ekkechipa kich lón mettóch meinisin. 4I a echipa kich lón ach kana riäfföü meinisin, pwe pwal kich sipwe tongeni echipa ekkóch. Lupwen ekkóch ra nóm lón ar riäfföü, kich sia tongeni echipeer ren ewe chip pwisin kich sia angei meren Kot. 5Pün sia tongeni älleta pwe are sia tolong lón riäfföü mi chómmóng fäniten Kraist, sipwe pwal küna chip mi lapalaap me ren Kraist. 6Iwe, lupwen äm aia tolong lón riäfföü, a fis fäniten ämi öüpwe chip me küna manaw. Nge lupwen Kot a echipa keem, a fis fäniten äm aipwe tongeni echipa kemi. Mwirin, ämi öüwa tongeni mósónóttam le engngiló fän ekkewe chök pwal sókkun riäfföü äm aia fen tolong lón. 7Iwe, äm apilükülüköch fänitemi a fókkun nüküchareló pün aia silei pwe usun chök ämi öüwa fitikeem lón ekkewe riäfföü; iwe, öüpwe pwal fitikeem lón äm küna chip meren Kot.

Än Kot angasakichewu seni lón riäfföü

8Pün ngang üsap mochen pwe ämi pwii kana öüpwe wewengaw ren ekkewe riäfföü ra tori keem me lón Asia. Pün äm aia nóm fän choun ekkewe weires mi selükuló öüküükün me tekian seni äm pöchökkül. Iei minne, äm aia apilükingaw ika äipwe chüen manaw. 9Ewer, aia ösüküsükü pwe äipwe le mäló. Nge ei a fis pwe aipwe käeö äm äisap anómwu äm apilükülük wón pwisin äm, nge i wón Kot chök, ewe mi tongeni amanawsäfäli ekkewe mi mäló. 10I a fen angasa keem seni ew wätten efeiengawen mäló. Iwe, äm aia anómwu äm apilükülük wón pwe I epwe sópweló le angasa keem. 11I epwe chimanü keem, pwokiten öüwa älisi keem ren ämi iótek fänäsengesiim. Iwe, epwe fis pwe chómmóng aramas repwe apasatä ar kilisou ngeni Kot, pwokiten an ümöümöch I a pwääri ngeni keem ren pölüwen än chómmóng aramas iótek.

Paul a penätä usun limöchün ekiekin letipan

12Pün iei meet aia tongeni apasa fän apilükülük me limöchün mwelien letipeem, pwe äm aia wenechchar o föröchüw föfförün manawem lón ei fönüfan. Äm aia anómwu äm apilükülük wón än Kot ümöümöch, nge sap wón pwisin äm tipächchemen fönüfan. Iei usun föfförüüm ngeni aramas meinisin, nge lapalón, ngeni kemi. 13Pün äm äisap mak ngeni kemi usun pwal ekkóch mettóch me lükün chök minne öüwa tongeni älleani o weweiti. Iwe, ngang üwa apilükülük pwe lón ew fansoun epwe unusöch ämi weweitikeem, 14inamwo ika öüsap unusen weweiti keem iei. Mwirin, lón ewe rän lupwen ach Samol Jesus epwe liwinsäfälito, ämi öüpwe eingeing fäniteem, pwal usun chök äm aipwe eingeing fänitemi.

Paul a äwewei popun an ekkesiwili an akkóót

15Iwe, pwokiten ngang üwa apilükülükü ämi wewe me lükü, ngang üwa ekieki pwe üpwe akkomw feitto reemi, pwe öüpwe angei feiöch fän ruu. 16Wewen pwe üpwe chuuto reemi me mwen äi üpwe feilló Masedonia, mwirin, üpwe pwal liwinsäfäl seni Masedonia o chuusäfälito reemi pwe öüpwe älisiei lón äi sääi ngeni Judea. 17Iei minne, lupwen ngang üwa akkóóta pwe üpwe föri ei, ifa usun, öüwa ekieki pwe ngang üwa wiliwilikkis lón äi ekiek, nge esap wor popun? Ifa usun, öüwa ekieki pwe ngang üwa wewe ngeni kana aramasen fönüfan mi apasa ‘Ewer’ nge i wewen pwe ra apasa ‘Apw’?

18Nge usun chök än Kot a ölükülük, iwe pwal ina chök usun äi kapas ngeni kemi esap wiliwilpaat lefiilen ‘Ewer’ me ‘Apw’. 19Pün Jesus Kraist ewe Nöün Kot esap wiliwilpaat lefiilen ewer me apw. I ewe Emön äm aia afalafala leiimi — ngang, Silvanus me Timothy — pün lón Kraist a chök wor Ewer. 20Pün än Kot kewe pwon meinisin ra chök Ewer lón Kraist. Ina pwata sia apasa, “Amen” lupwen sia elingaló Kot ren Kraist. 21Iwe, pwisin Kot ewe a fang ngeni keem me ämi ewe tüfich pwe sipwe tongeni nüküchchar le üütä fäniten Kraist. I a pwal epini kich, 22o impwangei kich pwe kich nöün ren an fangelong lón letipach ewe Ngüünmifel pwe ina ewe ölükülükün pwonen minne sipwe angei me mwirin.

23Iei ngang üwa pwal kööri Kot pwe I epwe chón pwärätä pwe ngang üwa apasätä minne mi let. Popun äi üsap liwinsäfälito Korint, pün üpwe mwo likiti kemiiló äi üsap eletipechou kemi ren äi üpwe öpwüngü kemi. 24Nge sap wewen pwe äm aia mochen nemeni kemi ren lapalapen ämi öüpwe awora föfförün ämi lükü. Äm aia chök mochen pwe sipwe angang fengen pwe öüpwe uren pwapwa lupwen öüpwe üppós lón ämi lükü.

2Nge ngang üwa fiseetä lón ai ekiek pwisin fänäsengesi, pwe ngang üsap mochen pwe öüpwe letipechchou are üpwe chuusäfälito reemi. 2Pün are ngang üpwe popuw ämi letipechchow; iwe, iöön chök epwe chüen apwapwai letipei, nge fen ämi kewe üwa eletipechchowu kemi?

Omwusaló tipisin ewe chón föri mi ngaw me älisi an epwe feffeitä

3Wesewesen iei popun ngang üwa mak ngeni kemi lón neii we taropwe me mwan, pwe lupwen üpwe feitto reemi, ngang üsap mochen pwe epwe wor äi letipechchow ren chókewe itä ürüürün nge iir repwe fen apwapwaei. Pün enletin ämi mi silei pwe äi pwapwa a lóngólóng wón ämi pwapwa. 4A men fókkun weires ngeniei äi üpwe makkei ewe taropwe ngeni kemi. Ngang üwa fókkun letipeta fiti chönün mesei. Pün ngang üsap mochen üpwe emeteki letipemi, nge i üwa mochen pwe öüpwe silei usun öükükün selükülón äi tongei kemi.

5Iwe, üsap tunommóng lupwen üwa apasa pwe ewe aramas mi efisätä ena osukosuk a eletipechchowu unusen mwichefel lap seni an eletipechchowuei. 6Iwe, a naaf ngeni ena aramas minne ämi meinisin öüwa tipeew fengen le öpwüngaló pwe ina chappen an föfför. 7Iwe, iei ótun ämi öüpwe le omwusaló tipisin ätena o echipa i, pwe ete koketiw lón wätten letipeta o esap tongeni ngassäfäl. 8Iei minne ngang üwa tungór maamaw ngeni kemi pwe öüpwe önükünükü säfäli ämi tong ngeni ätena. 9Pün pwal iei popun äi mak ngeni kemi pwe ngang üwa mochen üpwe asóssóta kemi are ämi mi älleasochisiei lón mettóch meinisin. 10Iwe, lupwen öüwa omwusaló tipisin ena aramas ren meet i a föri, pwal ngang üwa omwusaló tipisin. Iwe, lupwen ngang üwa omwusaló tipisin ätena (fäniten ese lifilifil meet i a föri), ngang üwa omwusaló tipisin fän än Kraist pwüüng fänäsengesin ämi feiöch, 11pwe Satan ete ämwäliela kich, pün kich sisap wewengaw ren an kana wiiwisoolä.

Pwora me wiil lón Kraist

12Iwe, lupwen ngang üwa feitto Troas fäniten äi üpwe afalafala än Kraist we poraus allim, ewe Samol a suuki ngeniei ew asamen fansoun fich. 13Nge esap kinamwe lón letipei, pün Titus pwii we mi ächengicheng esap mwo war fän och poraus seni kemi. Iei popun, üwa likiti ekkewe chón Troas o üwa feilló Masedonia pwe üpwe kütta Titus.

14Nge üwa kilisou ngeni Kot, ewe mi liäpeni kich o emmweni kich lón än Kraist karisin wiil. Iwe, ekis meinisin ia sia feilló ie, Kot a nöünöü kich pwe sipwe aronga feili ngeni aramas usun ewe Samol o emeresifeili ewe poraus allim lón leeni meinisin usun och löö mi pwokkus. 15Manawach a wewe ngeni och mettóch mi pwokkus Kraist a ääni fang ngeni Kot. Nge ei pwokkus a sókkofesen pwollan meren chókana mi küna manaw me chókana mi fätäl ngeni ar repwe määfeiengaw. 16Ngeni chókana mi fätäl ngeni ar repwe määfeiengaw, kich sia och pwollen mäló me feiengaw. Nge ngeni chókana mi küna manaw, kich sia och pwokkusun manaw. Iwe, iö a pwääk ngeni ei sókkun angang? 17Äm äisap usun ekkana chómmóng aramas mi elimengawa le nofiti ewe kapasen Kot ren ar afalafal fäniten chök mooni. Nge äm aia afalafala än Kot kapas fän wenechchar me fän mesen Kot lón Kraist, pwokiten äm aia silei pwe Kot a ökkünökeem o a nennengeni keem.

Ämi nöün Kraist taropwe

3Ifa usun, äm aia pwal poputä le aporausa ngeni kemi usun öchchüüm? Ifa usun, äm äipwe le pwal usun ekkewe ekkóch aramas äm äipwe awora taropwen ölükülük ngeni kemi ika taropwen ölükülük seni kemi? 2Pwisin ämi nöüüm taropwen ölükülük. Manawemi a wewe ngeni echö taropwe mi mak lón letipeem, aramas meinisin ra tongeni älleani o esilla äm angang mi mwirinnö leiimi. 3A fat pwe ämi echö taropwe seni Kraist, nge äm aia wisen chón amollätä. Ei taropwe esap mak ren ingk me pen pwe ren Ngünün ewe Kot mi manaw. Esap makketiw wón faaw mi chööpöp, pwe lón letipen aramas.

Ewe Ngüünmifel nge sap ekkewe öllük mi mak

4A wor reem ei sókkun apilükülük me fän mesen Kot pwokiten Kraist. 5Sap wewen pwe a wor pwisin äm lipwäköch pwe äipwe ekieki pwe mi wor och a pwisin pop seni keem, pün äm tüfich a chök pop seni Kot. 6I ewe a föri pwe äipwe chón angang mi lipwäköch fäniten ewe pwon mi fö. Sap ew pwon mi alóngólóng wón ach sipwe tichchik le öpwönüetä ekkewe öllük mi mak, pwe a alóngólóng wón ewe Ngüünmifel. Pün ekkewe öllük mi mak ra eselipato mäló, nge ewe Ngüünmifel a fang manaw.

Lingen ewe pwon sööfö

7Nge are a ling ewe angang mi eselipato mäló mi alóngólóng wón ekkewe öllük mi chipw ren mesen mak wón ekkewe peekin faaw, ina pwata ekkewe chón Israel resap tongeni nefóchófóch ngeni wón mesen Moses, pwokiten ewe ling mi nóm wón mesan, inamwo ika ewe ling a fen ätittiniló, 8iwe, epwe fen ifa usun ewe angang mi fis seni Ngüünmifel, esap fen koon lapaló lingan? 9Pün are a wor lingen ewe pwon minen lóóm mi atooto liwiningawen tipis wón aramas, iwe, epwe le fen ifa me selükülón lingen ewe pwon mi fö mi atooto ach sipwe küna pwüng meren Kot! 10Pün enletin pwe ewe pwon mi wor lingan me lóóm esap chüen wor lingan iei lupwen sipwe anönnö fengeni me lingen ewe pwon mi fö mi fókkun selüküló lingan. 11Iei popun, are ewe pwon minen lóóm, ewe a kómóróló, a fókkun ling, iwe, ewe pwon mi fö, ewe epwe nónnómwóló tori feilfeilló chök, a fókkun selüküló lingan.

12Iei minne, pwokiten ei pwon mi fö a ngeni keem ei sókkun apilükülük, äm aia fókkun pwora le kapas. 13Äm äisap wewe ngeni Moses, ätewe mi pwölüweló wón mesan pwe ekkewe chón Israel mi nennengeni wón mesan resap küna än ewe ling a kisikiisiló o ükütiw. 14Nge än ekkewe aramas ekiek a chunnoló. Pün tori ikenäi, iteiten fansoun lupwen repwe älleani ewe pwon minen lóóm, och pwölüpwöl a pwölüweló ar ekiek pwe resap tongeni weweiti ewe let. Nge ei pwölüpwöl a chök tongeni särifiló ren ach lükü lón Kraist. 15Tori mwo pwal ikenäi nge lupwen ra älleani minne Moses a makkei, ewe pwölüpwöl a chüen chök pwölüweló letiper, iei popun resap wewe. 16Nge lupwen emön aramas a kul ngeni ewe Samol, mwirin, ewe pwölüpwöl a särifiló seni. 17Iwe, ewe Samol pwal I chök ewe Ngüün. Iwe, ekis meinisin ia Ngünün ewe Samol a nóm ie, a wor ngas. 18Nge, öükich meinisin, a särifiló seni kich ewe pwölüpwöl, iei popun a tongeni usun chök ew kilaas manawach a olupa lingen ewe Samol. Iwe, lupwen Ngünün ewe Samol a angang lón manawach, sia sópwósópwóló le wikkililó seni ew öükükün ling tori pwal ew öükükün ling tori ach sipwe sókkuni sókkun Kraist o alapaló le olupa an ling.

Saramen ewe poraus allim än Kraist

4Iwe, pwokiten Kot a ngeni keem ei angang lón an ümöümöch, ina pwata äm äisap fangatä. 2Nge äm aia opwut ekkewe föfför mi fis lemwónómwón me föfför mi ässääw meinisin. Äm äisap fätäl lón föfförün tipächchem soolä, äm aisap pwal ämwälaló le nofiti ewe kapasen Kot. Äm aia pwärätä minne a let me fän mesen Kot, nge ekkana aramas meinisin mi wenechchar ra silei usun. 3Nge are ei poraus allim äm aia afalafala epwe pwölüló seni emön; iwe, a chök pwölüló ngeni chókana mi fätäl ngeni ar repwe määfeiengaw, 4iir chókewe resap lükü, pün Satan, ewe koten ei fönüfan, a ochunna ekiekin letiper, iei popun resap tongeni küna lingen saramen ewe poraus allim mi tinetiw wóór. Resap weweiti ewe poraus äm aia afalafala ngeniir usun lingen Kraist, I ewe wesewesen uluulun Kot. 5Pün äm äisap fätälfeil o afalafala usun pwisin äm. Nge äm aia afalafal usun Kraist Jesus, ewe Samol. Meinisin minne äm aia apasa usun pwisin fänitem, aia apasa pwe äm nöümi amanaw, pwokiten meet Jesus a fen föri fäniteem. 6Pün Kot, ewe mi apasa: “Saram epwe tinewu seni lón rochopwak”,a pwal I chök ewe Kot mi föri pwe aipwe weweiti pwe ei saram iei saramaramen lingen Kot mi pwä me wón mesen Jesus Kraist.

Turuló mwo nge äisap chök fangata

7Nge ei iseis mi öüchchea, a nóm lón ew sepi mi för seni pwül, wewen, iei inisiim mi apwangapwang, pün epwe pwä pwe ei tüfich mi fókkun somwosomwoló a pop seni Kot, nge esap pop seni keem. 8Äm aia nóm lechach ren chómmóng riäfföü mi nóm pwellin ünükküüm, nge äisap chök sap. Äm aia tilissuk, nge aisap chök fangata. 9Äm aia tolong lón riäfföü ren än aramas kütta keem pwe repwe niikeem, nge äisap chök tamepichiló. Äm aia turuló fän kaweteem, nge äisap chök turufóchóló o mäló. 10Iteiten fansoun meinisin, inisiim keei ra mwärelong fän riäfföün än ewe Samol Jesus mäló, pwe manawen Jesus epwe pwal pwä me wón inisiim. 11Pün lón unusen manawem, äm mi chök nómwun äm äipwe tolong lón feiengawen mäló, pwokiten äm aia angang ngeni Jesus, pwe manawen Jesus epwe pwal pwääpwäló me lón inisiim keei mi tongeni repwe mä. 12Iwe, a iei usun pwe äm mi chök nómwun äm aipwe mäló, nge ei a efisätä manaw ese mwüch fänitemi.

13Nge äm aia chök sópweló le afalafal, pwokiten äm aia ääni ewe chök sókkun lükü ewe chón köölüw ewe köölfel a ääni lupwen a apasa: “Ngang üwa lükü Kot, iei minne ngang üwa kapas.”a Iwe, äm mi pwal lükü, ina minne aia kapas, 14pwokiten äm mi silei pwal ewe chök Kot mi amanawsäfälietä ach Samol Jesus seni mäló epwe pwal amanawasäfäli keemitä fengen me Jesus, pwe i epwe uweikeemiló fiti kemi ngeni mwen mesan. 15Ekkeei mettóch meinisin ra fis fänäsengesin ämi feiöch. Iwe, lupwen ewe ümöümöchün Kot a emmwenato chómmóng chómmóng aramas ren Kraist, epwe efisätä wätten kilisou me än Kot epwe angei chómmóng ling ren.

Küna minne sisap tongeni küna ren mesach

16Iei minne, äm äisap apilükingaw. Pün inamwo are inisim ra fätäl ngeni ar repwe mäló, nge ngünüüm ra fen sössööföló rän me rän. 17Pün ach kana riäfföü lón ei fansoun ra päl o ra fis ngeni kich lón fansoun mi chök mwochomwooch. Nge ra efisätä fänitach ew ling ese mwüch mi fókkun chow chapwür esap wor öüküükün o esap mwüch tori feilfeilló chök! 18Iei popun, sisap nennengeni ekkewe riäfföü sia tongeni küneer iei. Nge sia afóta mesach wón meet sisap mwo küna. Pün ekkewe riäfföü sia küneer repwe mwittir wesiló, nge ewe pwapwa epwe feitto, esap mwüch tori feilfeilló chök.

Ölükülük fäniten ewe manawsäfälin sotup

5Pün sia silei pwe lupwen imwach ei tento, ei imweimwen siamwü sia nóm lón wón ei fönüfan, epwe taaló - lupwen sipwe mäló o likitätiw ekkeei inis - nge mi wor ew imwach mi nóm läng pwisin förien Kot nge sap förien pöün aramas, ew inis epwe nóm tori feilfeilló chök. 2Pün enletin, sia ngüüngü me lón inisich keei iei, ren ach sia pwositi ewe rän lupwen sipwe le tillong lón inisich kewe mi fö minen läng, usun ach tillong lón echö üüf mi fö. 3Sipwe tillong lón och inis mi fö minen läng, pün sisap chök ngüün nge esap wor inisich. Iei minne, sipwe tillong lón ekkewe inis mi fö minen läng. 4Pün enletin, lupwen sia chüen nóm lón ekkeei tento, ikkeei inisich keei minen fönüfan, sia ngüüngü o ngasallap, pwokiten sisap mochen pwe esap wor üfen ngünüch. Sia mochen pwe ngünüch kana repwe tillong lón inisich mi fö minen läng, pwe inisich keei mi tongeni repwe mä repwe le ükütiw, nge manaw ese mwüch epwe le unusen chööchöló. 5Iwe, pwisin Kot a amolla kich fäniten ei popun, a pwal fang ngeni kich ewe Ngüün pwe ina önüküchcharen an pwon ren minne a amollätä fänitach.

6Iei minne, sia apilükülüköch fansoun meinisin, pün sia silei pwe lupwen sia nóm lón ekkeei inis minen fönüfan, sisap nóm lón leeniach ren ewe Samol. 7Iei popun, sia manaw ren ach lükü, nge sap ren meet sia küna. 8Iwe, sia unusen apilükülüköch, ewer, üwa apasa, sia fen koon saani ach sipwe toowu seni ekkeei inis, pün mwirin, sipwe feilló o nóm ren ewe Samol. 9Iei minne, ese lifilifil ika sia nóm lón ei inis ika sia toowu seni ei inis, iei meet kich sia mochen sipwe föri: sipwe föri minne ewe Samol epwe pwapwa ren.

Ewe leenien móótun köpwüng än Kraist

10Pün kich meinisin sipwe fókkun üütä me mwen ewe leenien móótun köpwüng än Kraist pwe epwe öpwüngü kich. Emön me emön leiich epwe angei liwinin ekkewe mettóch i a föri lupwen an nóm lón ei inis, ewe liiwin epwe alóngólóng wón minne i a föri, ese lifilifil ika föfför mi mwirinnö ika föfför mi ngaw.

11Iei minne, pwokiten äm mi silei usun eniwokkusun ewe Samol, iei popun äm aia angang weires le peseei aramas. Pwisin Kot a fen silefichi pwe äm aia wenechchar. Iwe, üwa lükü pwe pwal ämi öüwa silefichi pwe äm aia wenechchar seni meet mwelien letipemi a äiti ngeni kemi. 12Pün äm äisap mochen pwisin kütta iteem meremi, nge aia mochen ngeni kemi och lóngólóngun popun ämi öüpwe sikäsini keem, pün epwe wor minne öüpwe ääni pölüwen ngeni chókana mi sikäsini usun ar ääni och angang mi amwaraar me mwen mesen aramas lap seni ar repwe ääni ew letip mi wenechchar fän mesen Kot. 13Pün are epwe usun itä pwe äm aia umwesiló; iwe, aia umwesiló fänasengesin än Kot epwe lingeló. Nge are pwe äm aia miriit lón äm ekiek; iwe, aia miriit fänäsengesin ämi öüpwe feiöch. 14Ese lifilifil ika meet äm aia föri, äm aia föri pwokiten än Kraist tong a nemeni manaweem. Iwe, pwokiten äm aia lükü pwe Kraist a mäló fäniten aramas meinisin, äm aia pwal lükü pwe äm aia fen mäló ngeni ewe manawen lóóm aia piin manaweni me mwan. 15Kraist a mäló fäniten aramas meinisin, pwe chókana mi etiwa an ei manaw mi fö resap chüen manaw fäniten ar repwe föri minne pwisin iir repwe pwapwa ren, nge repwe le manaw fäniten ar repwe apwapwai Kraist, ewe mi mäló o manawsäfäl fäniter.

16Iei minne, seni ikenäi feilló, äm aisap chüen kütta älelleten manawen emön aramas alóngólóng wón meet fönüfan a ekieki usur. Me mwan, ngang üwa mwäliló lón äi ekieki usun Kriast lón ei lapalap, nge iei esap chüen ina usun lóngólóngun äi silei I. 17Iei minne, are emön aramas a nónnóm lón Kraist, i emön förien Kot mi fö. Ekkewe mettóchun ewe manawen lóóm ra ló, nengeni, ekkewe mettóch meinisin ra sópwósópwóló le ekkesiiwil ngeni mettóch mi fö. 18Iwe, unusen ei manaw mi fö a feitto seni Kot, I ewe mi ächä kich ngeni pwisin I ren meet Jesus Kraist a föri. Iwe, Kot a ngeni kich ewe angangen ächääi aramas ngeni I. 19Iei ei angangen ächäächä: pwe Kot a pwisin ächä ngeni I fönüfan lón Kraist o esap ämwärätä wór chappen ar kana tipis. Iei ei poraus mi amwaraar I a ewisa ngeni kich pwe sipwe aronga ewe kapasen ächäächä. 20Iwe, iei popun äm aia wisen chón tupwuni Kraist le chón arong fänitan. Usun chök nge Kot a nöünöü äm le tungór ngeni kemi. Äm aia fókkun peseei kemi, usun chök nge pwisin Kraist a tungór maaw ngeni kemi, pwe öüpwe chää ngeni Kot! 21Pün Kot a ämwärätä wón Kraist, I ewe emön esap wor an tipis, pwe epwe tipisini tipisich, pwe lón Kraist epwe mwärätä wóóch än Kot we pwüng.

Älelleten nöün Kot chón angang

6Iwe, pwokiten äm chón angang fengen me Kot, iei popun aia pwal tungór maamaw ngeni kemi pwe öüsap alamwotongawa ämi angei ewe ümöümöchün Kot. 2Pün Kot a apasa: “Lón fansoun fich Ngang üwa öüselingók o lón ränin küna manaw Ngang üwa älisuk.”a Nengeni, ikenäi, iei ewe fansoun fich; nengeni, ikenäi iei ewe ränin küna manaw.

3Äm äisap awora och popun minne emön aramas epwe chepetek ren lón och mettóch, pün äisap mochen pwe epwe wor itengawen äm angang. 4Nge lón mettóch meinisin äm aia föri, aia älletätä nónnómwun manawem an epwe fich ngeni pwe äm nöün Kot chón angang ren äm mósónóttam le engngiló lón äm kana riäfföü, lón äm kana weires me lón sókkópaaten osupwang, 5lón äm wichiwich, lón äm tolong lón leenien föötek, lón äm tolong lón feiengaw ren parangarangen mwichen aramas chómmóng, lón äm pekkus le angang weires, lón an esap wor fansoun äm möür me lón äm echik. 6Äm aia pwal älletätä pwe äm nöün Kot chón angang ren äm aia engngiló, ren äm manaweni ew manaw mi limöch, ren äm silelapei meet mi let, ren äm mósónóttam, ren äm kirekiröch, ren äm mwüüt ngeni ewe Ngüünmifel epwe nemeni manawem, ren äm manaweni ewe manawen tong mi wenechchar, 7ren äm afalafala ewe kapas mi let, ren äm afalafal lón manamanen Kot, ren äm ääni pisekin maun ewe manawen pwüng pwe epwe eppeti peliifichiim me peliimööngüüm seni feiengaw. 8Äm aia pwal älletätä pwe äm nöün Kot chón angang ren äm küna iteüöch me itengaw, ren an fis ngeni keem poraus mi mwirinnö me poraus mi ingaw, ren än aramas ekieki pwe äm chón otupwutupw nge i äm chón ääni wenechchar, 9ren äm äisap siil meren aramas, nge i a fen wor chómmóng aramas ra silefichi keem, ren äm nóm lón feiengawen mäló, nge i äm mi chök chüen manaw, ren äm angei köpwüngün wichiwich, nge äisap mwo ninniló, 10ren äm tolong lón letipeta, nge äm mi chök pwapwa, ren äm nóm lón wöwingaw, nge äm mi chök föri pwe chómmóng repwe pisekisekiló, ren an esap wor mwo ekis mettóchuum, nge aia fen ääni mettóch meinisin.

Riiri fengen nge resap nönnö fengen: öüpwe manaweni manawen pin

11Mwa meet ämi chón Korint! Äm aia fókkun suukchööchöló le kapas ngeni kemi, letipeem a suukchööchö ngeni kemi. 12Äm äisap ekisikiisaló öüchchean ekiekimi mereem, nge fen ämi a kisikiisiló ämi tong ngeni keem. 13Iwe iei, öüpwe föri ngeni keem usun chök minne äm aia föri ngeni kemi. Öüpwe pwal suuk chööchöw letipemi ngeni keem. (Ngang üwa kapas ngeni kemi usun nge üwa kapas ngeni pwisin neii semiriit).

14Öüsap öppölüwangawa fengeni kemi ren ämi öüpwe riiri fengen me ekkana sap iir chón lüküw. Pün epwe ifa usun än pwüng epwe tongeni emwinemwin fengen me pwüngingaw? Epwe ifa usun än saram epwe tongeni chiechi ngeni rochopwak? 15Nge meet sókkun tipeew epwe wor lefiilen Kraist me Belial? Epwe ifa usun än emön chón lükü epwe chiechi ngeni emön sap chón lükü?

16Iwe, pwal meet sókkun etipeew fengen a wor lefiilen ewe imwfelin Kot me uluulun önümwäl? Pün ämi ewe imwenfel än ewe Kot mi manaw. Usun chök minne Kot a apasa: “Ngang üpwe imweim reer o fätäl leiir. Ngang üpwe ar Kot nge iir repwe neii aramas.”a

17Iei minne, “öüpwe toowu seni leiir o öüpwe äimwüükemiiló seniir. Öüsap attapa ar kana mettóch mi limengaw; iwe, Ngang üpwe etiwa kemi,”b ewe Samol a apasa.

18“Ngang üpwe emön Saam ngeni kemi, nge ämi öüpwe neii mwän me neii fefin. Iei alon ewe SAMOL mi Unusen Manaman.”c

7Iei minne, ämi chiechiei kana mi ächengicheng, pwokiten a fen wor ekkeei pwon fänitach, sipwe pwisin limeti kich seni mettóch meinisin mi tongeni elimengawa inisich me ngünüch. Iwe, sipwe angang ngeni ach sipwe ounusöchüweló ach manaweni ewe manawen pin, pwokiten sia nuokkusiti Kot.

2Öüse mochen öüpwe suuki letipemi ngeni keem. Äm äisap föri och mi mwääl ngeni emön. Äm äisap pwal föri och an epwe angawaló manawen emön. Äm äisap pwal oumwesimwesi le otupwu emön. 3Ngang üsap apasa ei ren äi üpwe ettipisi kemi; pün ngang üwa fen apasa me mwan pwe ämi öüwa öüchchea me lón letipeem, pwe sipwe mä ppök o sipwe pwal manawöppök. 4A fókkun wätte äi apilükülük lóómi, a pwal fókkun wätte äi eingeing fänitemi. Ämi öüwa fókkun echipaei. Ämi öüwa föri minne ngang üpwe pwapwa ren, inamwo ika aia nóm lón riäfföü.

5Pün enletin, lupwen äm aia feitto Masedonia, inisiim esap kinamwe, nge aia sach lón äm riäfföü. Me lükün, a wor chón efitikoko ngeni keem, nge me lón letipeem, a wor äm nuokkus. 6Iwe, inamwo nge Kot, ewe mi echipa chón tur letiper, a echipakeem ren än Titus wareto. 7Iwe, äm äisap chök chip ren an war, nge aia pwal chip ren an aporausa ngeni keem usun an küna chip reemi. Lupwen an a aporausa ngeniei usun ämi ösüküsükü äi üpwe chuuri kemi me usun ämi letipeta ren meet a fis, pwal usun ämi ekitekiteló lón ämi tongeei, iwe, äi pwapwa a fókkun uroló.

8Iei ngang üsap chüen lemenemeló ren äi tiinawow neii we taropwe ngeni kemi, inamwo ika ngang üwa lemelemeló ren lón ekis chök fansoun, pün ngang üwa silei pwe ewe taropwe a efisätä ämi letipeta lón ekis chök fansoun. 9Iwe, iei ngang üwa pwapwa pwe üwa tiinawow ewe taropwe, sap pwokiten a efisätä ämi letipeta, nge i pwokiten ämi letipeta a emmweni kemi ngeni ämi öüpwe siwili ämi ekiek o kul seni tipis. Pün iei ewe sókkun letipeta Kot a mochen pwe nöün kana aramas repwe ääni, pwe öüsap luus lón och mettóch seni keem. 10Pün Kot a tongeni aea letipeta lón manawach pwe epwe älisi kich ach sipwe kul seni tipis o emmweni ngeni kich ach sipwe küna manaw. Ei sókkun letipeta sisap lemelemeló ren. Nge ewe sókkun letipeta esap wor ekieksäfäl lón, iei ewe sókkun mi efisätä mäló. 11Öüpwe pwisin nengeni meet ei letipeta mi fis seni letipen Kot a efisätä lón manawemi. A efisätä ämi tilikken le kütta minne mi pwüng, a efisätä ämi mochen öüpwe limeti seni kemi itengawen tipis, a efisätä ämi songeiti ässäwin tipis, a efisätä ämi nuokkusiti Kot, a efisätä ämi pwositi pwe öüpwe künaei, a pwal efisätä ämi mochen ekitekit fäniten ämi tongei ekkóch o efisätä ämi mochen pwe öüpwe öpwüngü ewe chón föri meet mi mwääl! Öüwa pwisin älelletätä pwe öüwa föri mettóch meinisin lón üküükün ämi tongeni pwe öüpwe föri meet mi pwüng. 12Iei minne, ika mwo ngang üwa mak ngeni kemi, nge ngang üsap föri fänäsengesin ätewe mi föri ewe mettóch mi mwääl, sap pwal fänäsengesin ätewe ewe mwääl a fis ngeni. Nge ngang üwa mak pün öüpwe tongeni pwääri me fän mesen Kot usun öüküükün ämi wesewesen öüchcheani keem.

Paul a pwapwa pwokiten än Titus a pwapwa

13Iei minne, a chip letipeem ren minne a fis ngeni kemi. Nge me lükün an a chip letipeem, a fókkun selüküló äm pwapwa ren än Titus a pwapwa, pwokiten ämi öüwa etiwa o föri pwe epwe kinamwe lón an ekiek. 14Pün ngang üwa üreni usun äi eingeing wóómi, iwe, ämi öüsap eletipengawaei. Iteiten fansoun meinisin, ngang üwa apasa ngeni kemi minne mi let. Iwe iei, äi eingeing ngeni Titus usumi a pwal pwä pwe mi enlet. 15Iwe, an tong fänitemi a fókkun lapaló lupwen a chemeni ämi öüseling ngeni me ämi etiwa i fän menin me tipetekisón. 16Iei minne, ngang üwa fókkun pwapwa, pwokiten ngang üwa unusen apilükülükü kemi lón mettóch meinisin.

Öüpwe ngüló lón ämi sile fäng

8Iwe iei, ämi pwii kana chón lükü, ngang üwa mochen üpwe üreni kemi meet Kot a föri lón an ümöümöch fäniten ekkewe mwichefel lón Masedonia, 2Inawmo are ra tolong lón wätten sóssót ren ekkewe riäfföü mi toriir, nge ar pwapwa a somwosomwoló o a fókkun säsewu öüküükün somwosom-wolón ar fangafangöch, nge i lón alólólen ar wöwingaw. 3Pün ngang üwa wisen chón pwärätä pwe iir ra fangeló seni mochenin letiper. Ra fang wón öüküükün ar tongeni, ewer, fen pwal selüküló seni öüküükün ar tongeni. 4Ra tüngór maamaw ngeni keem fiti ar peseei keem pwe repwe pacholong lón ewe angangen älillis fäniten ekkewe chón pin lón Jerusalem. 5Meet ra föri a selüküló seni meet aia ösüküsükü, pün a fen lap seni. Nge öüchchean meet ra föri: ra akkomwa le fangeló pwisin manawer ngeni ewe Samol me pwal ngeni keem, mwirin repwap pwal fangaló nöüür mooni ren meet Kot a öüröüra ngeniir. 6Iei minne, aia peseei Titus, pwokiten i ewe mi akkomwen popuetä ngeni kemi ei angangen fangeló, pwe epwe liwinsäfäliwow reemi o öpöchökkülätä letipemi pwe öüpwe äwesöchchüeló wisemi lón ei angangen fang. 7Nge pwokiten a somwoló ämi tüfich lón mettóch meinisin - lón ämi lükü, lón ämi lipwäköch lón kapasen käit, lón ämi silelap, lón ämi tilikken lón mettóchun ngüün, me lón ämi tongei keem - iei minne, ngang üwa mochen pwe epwe pwal somwoló ämi tüfich lón ei angangen fangaló mi pop seni än Kot ümöümöch.

Kraist I ach we leenien öppirü fäniten ei manawen fangafangöch

8Ngang üwa apasa ei sapw an epwe ew öllük ngeni kemi, nge i üwa chök mochen äi üpwe älelleta wenechcharen enletin ämi tong ren äi üpwe anönnö fengeni ämi tilikken me pwal än ekkewe ekkóch. 9Pün ämi öüwa silei usun ümöümöchün ach we Samol Jesus Kraist, pwe inamwo are I mi wöw, nge I a pwisin awöwüngawaló fänäsengesimi, pwe öüpwe wiliti chón wöw ren an wöwingaw.

10Iwe, iei üpwe ngeni kemi äi öüröür: Öüpwe äwesaló meet öüwa popuetä lón ewe ier a ló, pün ämi ewe öüwa akkomwen ekiekietä ei ekiek, iwe pwal ämi öüpwe akkomwen poputä le föri och usun. 11Iwe, iei öüpwe sópweló o äwesöchüweló ei angang, usun chök ämi mwasangasang le popuetä. Öüpwe fangeló meet öüwa tongeni, alóngólóng wón meet a wor reemi. 12Pün are öüwa wesewesen fang seni mochenin letipemi, iwe, esap öüchchea ika ifa üküükün ämi öüwa tongeni fangaló. Kot a mochen pwe öüpwe fang meet mi wor reemi, nge sap meet ese wor reemi.

13Ngang üsap apasa ei ren äi mochen pwe ekkóch repwe mecheres nge ämi öüpwe weires le wisen ekii choun, 14nge i ngang üwa mochen pwe epwe wor nönnöppök. Pün lón ei atun, minne a somwoló seni kemi epwe älisi le awora minne iir ra ääni osupwang. Nge lón ew fansoun me mwirin, minne epwe somwoló seniir epwe älisi le awora minne ämi öüwa ääni osupwang, pwe epwe chök wor nönnöppök. 15Pün ina usun minne a mak lón ewe taropwe mi pin: “Iö a wor chómmóng ionian esap wor somwolón, nge iö a chókükkün ionian esap wor naffangawan.”a

Ewe älillis fäniten ekkewe chón pin lón Judea

16Nge kilisou ngeni Kot pün I ewe a atolonga lón letipen Titus pwe epwe usun chök äm ren an achoocho le mochen älisi kemi. 17Pün i esap chök etiwa äm tungór, nge i pwisin i a fókkun mwasangasang ren o pwisin i a filätä seni mochenin lón letipan pwe epwe feilló reemi. 18Iwe, äm aia tiinaló pwal emön pwiich chón lükü pwe epwe fiti Titus. Iei i pwiich we mi iteföüló me lón ekkewe mwichefel meinisin ren an angang fäniten ewe poraus allim. 19Iwe, esap chök ina, nge i a pwal kefilitä seni ekkewe mwichefel pwe epwe fiti keem le sääi ngeni Jerusalem pwe äm äipwe uweei ei liffang mi pop seni än Kot ümöümöch. I epwe älisikeem le tümwünü ei älillis aia ionifengeni, pwe ach Samol epwe ling ren, nge epwe pwal pwääri usun mollotän äm ekiek le mochen älisi ekkewe souleng mi osupwang. 20Äm aia chufengen le sääi pün äisap mochen pwe epwe wor emön epwe tipingeni keem ren lapalapen äm föri angangen ei liffang mi wätte äm aia tümwünü le emmweni angangan, 21pün äm aia anómwu lón äm ekiek öüchchean äm äipwe föri minne mi iteüöch, sap chök me fän mesen ewe Samol, nge pwal me fän mesen aramas.

22Iwe, äm aia pwal tiinaló pwiich we pwe epwe fitiir, ätewe aia fen asóssóta i fän chómmóng o aia küna pwe a fókkun achoocho lón chómmóng mettóch, nge iei a koon fen lapaló an achoocho pwokiten wätten an apilükülükü kemi. 23Iwe, are emön a mochen silei usun Titus; iwe, öüpwe apasa pwe i chiechiei mi fitiei le angang fänitemi. Pwal are epwe wor chón mochen silei usun pwiich kewe ekkóch; iwe, iir chón tupwuni ekkewe mwichefel. Iir leenien öppirü me leiin chókana mi elingaló Kraist. 24Iei minne, öüpwe pwääraló ngeni ekkeei mwän ämi enletin tongeer, mwirin, ekkewe mwichefel meinisin repwe silei pwe mi pwüng äm sikäsini kemi.

Ekkewe pwiipwi chón lükü mi ölükülük ra tümwünü ewe liffang

9Iwe, ren fäniten ewe älillis ngeni ekkewe chón pin lón Jerusalem, ese pwal wor lamwoten äi üpwe mak ngeni kemi usun, 2pün ngang üwa silei pwe ämi öüwa fókkun mochen älillis. Iei meet ngang üwa sikäsini kemi wón ngeni ekkewe chón Masedonia, pwe ämi ekkewe chón Akaia öüwa fen mollotä chök me lón ewe ier a ló ämi öüpwe fang. Fen pwüngün pwe ämi mwasangasangen fang a alóllónätä chómmóng me leiir pwe repwe poputä le älillis. 3Nge ngang üwa tiinawow pwiich kewe chón lükü pwe repwe chök pii are öüwa wesewesen mollotä, pün üwa fen üreniir pwe öüwa mollotä le ionifengeni ämi we älillis. Ngang üsap mochen pwe üpwe mwääl lón äi sikäsini kemi. 4Pün are ekkóch ekkewe chón Masedonia repwe fitiei le feitto reemi o küna kemi pwe öüsap mollotä; iwe ngang üpwe fókkun sääw ren mwäälin äi apilükülük le eingeing wómi (nge usap fen paani kemi pün ämi öüpwe pwal fókkun sääw). 5Iei minne, ngang üwa ekieki pwe epwe lamwot äi üpwe peseei pwiich kewe chón lükü pwe repwe le akkomwoto reemi o atawei le amollatä ämi we liffang mi wätte ämi öüwa fen pwon me mwan pwe öüpwe föri pwe epwe mollotä, pün epwe pwä pwe öüwa fang seni kichiöchün letipemi, nge esap och minen ürüfituk mi fiti echchimw.

Kot a efich emön chón fang fän uren pwapwa

6Nge iei meet ngang üpwe apasa: Iö a chókükkün fótukian, epwe pwal chókükkün kiniian, nge iö a somwosomwoló fótukian, epwe pwal somwosomwoló kiniian. 7Iei minne, emön me emön leiimi epwe fang usun minne a ekiekietä lón letipan, nge esap fang fän ürüfituk are ekkeriä; pün Kot a tongei emön chón liffang mi fang fän meseiken letipan. 8Iwe, Kot a tongeni föri pwe I epwe fang ngeni kemi feiöch meinisin mi somwoló, pwe iteiten fansoun meinisin ämi öüpwe nannaafeló lón mettóch meinisin o epwe pwal wor somwolón pün öüpwe aea le föri föfför mwirinnö le älisi ekkóch. 9Usun chök minne a mak lón ewe taropwe mi pin: “I a amworafeili an kewe liffang o fangafangöch ngeni ekkewe mi wöwingaw. An pwüng epwe nónnóm tori feilfeilló chök.”a

10Pün Kot, ewe Emön mi awora pwukil ngeni ewe chón fóffót me awora mwöngö pwe sipwe mwöngö, I epwe pwal awora o achómmóngaló ekkewe pwukil öüwa fen fótukatiw o alapaló uwään ämi föfförün pwüng, 11pwe öüpwe wöw lón mettóch meinisin fäniten ämi öüpwe pwal fangafangöch, pün iei meet epwe efisätä än chómmóng aramas repwe kilisou ngeni Kot ren.

12Pün ei angangen älillis esap chök älisi le atawei än ekkewe chón pin kewe osupwang, nge a pwal efisätä pwe chómmóng aramas repwe kilisou ngeni Kot ren. 13Pwokiten a pwä ölükülükün ämi lükü ren ämi ei angangen älillis, iir repwe elingaló le mwareiti Kot fäniten ämi älleasochis ngeni ewe poraus allimen Kraist ämi öüwa pwärätä pwe öüwa lükü, pwal fäniten ämi fanganfangöch ngeniir le awora ämi älillis ngeniir pwal ngeni aramas meinisin. 14Iwe, pwal iir, lón wätten ar pwositi kemi, ra iótek fänitemi, pwokiten ewe ümöümöchün Kot mi fókkun lapalaap a nóm lóómi. 15Kilisou ngeni Kot ren an we liffang esap tüfich ach sipwe tongeni äwewei lón kapas!

Paul a kapas usun woren an pwüüng

10 Iwe, pwisin ngang Paul üwa tungór maamaw ngeni kemi fän tipetekisónen me tipepweteten Kraist, ngang ätewe ekkóch ra apasa pwe ngang ü kan chök tipin etekisónaei äi nóm leiimi, nge üwa ekkeni äi kapas ngeni kemi lón neii kewe taropwe lupwen üsap nóm leiimi. 2Nge ngang üwa tungór ngeni kemi pwe lupwen üpwe nóm reemi, öüsap föri meet popun ngang üpwe ekkeni äi kapas ngeni kemi ren, usun üwa fen amollätä pwe üpwe ekkeni äi kapas ngeni ekkana ekkóch mi ekieki usuum pwe äm aia fätäl lón manawen ekiekin fituk. 3Pün inamwo are kich sia manaw lón ei fituk, nge sisap chök maun lón peekin tüfichin fituk. 4Pün ekkewe pisekin maun kich sia aea lón ach maun resap seni tüfichin fituk, nge i kich sia aea än Kot kewe pisekin maun mi manaman le ataetiw än ewe devil kewe leeni mi pöchökkül. 5Kich sia aea än Kot keei pisekin maun le ataetiw iteiten wiipinepin mi lamalamtekia mi eppeti seni aramas ar repwe silei Kot. Kich sia pwal aea än Kot keei pisekin maun le ataetiw än aramas ekiekin üleförea o sia föötekini iteiten sókkun ekiek meinisin ar repwe älleasochis ngeni Kraist. 6Kich sia mollotä ach sipwe öpwüngü chókana meinisin mi chüen chök nómwun älleasolap mwirin ekkana lussun me leiimi ra ölükülük o älleasochis.

Ächiööün pwe mi wor än Paul pwüüng

7Iei osukosukemi pün ämi öüwa öpwüngaló minne öüwa ekieki usun emön, alóngólóng wón meet öüwa küna ren lapalapan me lükün? Öüpwe fókkun silleni pwe pwal äm nöün Kraist usun chök chókana mi lamalamtekia le ääni arongorong pwe iir nöün Kraist. 8Pün are mwo epwe itä usun lapalapan nge ngang üwa koon alapaló äi eingeing wón äm pwüüng ewe Samol a fang ngeni keem, nge ei pwüüng a fäniten epwe äfeffeitä kemi nge sap fäniten an epwe efeiengawa kemi. Ngang üsap mochen üpwe sääw ren an epwe taaló äi angang leiimi. 9Ngang üsap mochen öüpwe ekieki pwe itä üwa chök mochen eniwokkusu kemi ren neii kewe taropwe. 10Pün ekkóch ra apasa: “Kapasen lón nöün kewe taropwe ra chow me pöchökkül, nge nónnómwun inisin, mi apwangapwang, sise pwal möngüüw an kapas.” 11Ekkewe aramas mi apasa ei sókkun repwe fókkun silei pwe lupwen äm aipwe nóm reemi, aipwe pwääri ngeni kemi äm pöchökkül usun chök minne aia pwääri lón nöüüm kewe taropwe lupwen aisap nóm reemi.

Öükükün än Paul pwüüng

12Pün äm äisap ökkönumwü le pwisin anómwu keem lón tettelin chókana mi pwisin eiteöchüür ika pwisin anönnöfengeni keem me iir. Nge iir ra ääni öüküük pwisin iir fengen lefiiler o pwisin anönnö fengeniir lefiiler. A ifa me umwesiir! 13Nge äm äisap esselükaló äm eingeing wón äm pwüüng, pün aia chök eingeing lón öükükün kiään än Kot akkóót fäniteem, ei akkóót a pacholong äm aipwe angang leiimi. 14Pün äm äisap pwisin esselükaló äm pwüüng lupwen äm aia apasa pwe mi wor äm pwüüng wóómi, pün fen äm ekkewe aia akkomw le uweato reemi ewe poraus allim än Kraist. 15Äm äisap pwal apasa pwe mi wor äm pwüüng wón ekkewe angang ekkóch ra föri. Nge äm aia chök apilükülük pwe lupwen ämi lükü epwe sópwósópwóló le mämmäritä; iwe, öükükün kinikinin leenien äm angang me leiimi epwe lapaló. 16Mwirin, äm aia tongeni feilló o afalafala ewe poraus allim lón ekkewe pwal ekkóch leeni mi toowaw ra nóm peekilómi, ia esap wor emön a angang ie. Mwirin, esap chüen wor pwal och kapas eiis usun iö a nóm lón än pwal emön kinikin. 17Usun minne ewe taropwe mi pin a apasa: “Emön aramas mi mochen epwe eingeing, epwe chök eingeing wón meet ewe SAMOL a föri.”a 18Esap wor ällean lupwen aramas ra eingeing usun pwisin iir. Nge lupwen ewe Samol a eiteöchchüw emön, ina i emön a iteüöch.

Paul a chüngüüw usun än ekkewe chón lükü repwe likiitü

11Ngang üwa äneän pwe amwo öüpwe engngiló ngeniei äi üpwe sópweló le kapas usun nge ngang emön mi umwes. Öüse mochen öüpwe engngiló ngeniei. 2Pün ngang üwa fókkun luukommóng wóómi ren ewe sókkun luukommóng mi pop seni äi öüchcheani Kot, pwokiten ngang üwa akkófóta kemi ngeni emön mwän, iei i Kraist. Iwe, üwa mochen üpwe emmwenikemiito ren Kraist, nge öüpwe usun emön föpwül mi limelimöch esap tori mwo mwän. 3Nge ngang üwa nuokkus are ämi ekiek epwe le tókkóló seni wenechcharen me limöchün ämi likiitü lón Kraist, usun chök än Eva a tupwuló ren än ewe serepenit tipächchem soolä. 4Pün ämi öüwa mwittir le lükü ese lifilifil meet emön a üreni kemi, inamwo ika ra afalafala ngeni kemi usun emön Jesus mi sókkóló seni ewe Emön äm aia afalafala ngeni kemi usun, öüwa pwal etiwa emön ngüün mi sókkóló seni ewe Ngüün öüwa fen angei, öüwa pwal etiwa ew poraus allim mi sókkóló seni ewe ew ämi öüwa fen lükü.

Paul a sókkóló seni ekkewe soukünö mi chofona

5Nge ngang üwa ekieki usi pwe ngang üsap kisitiw fän ekkewe “asalapen soukünö”. 6Ina mwo are esap wor äi käeö lón tüfichin kapas, nge ngang üsap lipwäkingaw lón äi silelapei ewe poraus allim. Ngang üwa ekieki pwe öüwa fen silei usun ei, pün äm aia fen älelletafichi usun ngeni kemi fän chómmóng. 7Ifa usun, ngang üwa föri och mi mwääl lupwen ngang üwa pwisin etekisónäeitiw, nge üwa etekiakemiitä ren äi afalafala än Kot we poraus allim ngeni kemi, nge esap wor och liiwin üpwe angei seni kemi? 8Usun itä nge üwa sooläni ekkewe pwal ekkóch mwichefel ren äi angei älillis seniir pwe üpwe tongeni angang ngeni kemi nge üsap kamö. 9Iwe, lupwen ngang üwa nóm reemi nge esap naaf minne üpwe manaw seni, ngang üsap tungórei kemi pwe öüpwe älisiei. Pün ekkewe pwiipwi chón lükü mi feitto seni Masedonia ra uweato rei pwal och liffang. Ngang üsap tungórei kemi mwo fän ew fäniten och älillisi. Iwe, iei usun meet ngang üpwe chök sópweló le föri. 10Esap wor emön me lón unusen Akaia epwe öüküeitiw seni äi üpwe eingeing usun ei. Ngang üwa apasa ei fän än Kraist we let mi nóm lóói. 11Iwe, pwata üsap mochen eweiresi kemi? Pwokiten ngang üsap tongei kemi? Kot a silei pwe ngang mi tongei kemi!

12Nge ngang üpwe chök sópweló le föri meet ngang üwa fen föri, pwe üpwe öükätiw seni chókana mi ääni eingeing pwe ar angang a usun chök äm angang. 13Pün iei usun ekkewe soukünö mi chofona, iir chón angang mi otupwutup, ra pwisin otupwun ewilaló sókósókur pwe repwe usun itä nge iir nöün Kraist soukünö. 14Iwe, ngang üsap ruk! Pün pwisin Satan a ewilaló lapalapan pwe epwe usun itä nge i emön chón längin saram. 15Iei minne, esap och mettóch sipwe nenneiruk ren are nöün Satan kewe chón angang ra pwal pwisin ewiliireló ngeni lapalapen ekkewe chón angangen pwüng. Iwe, sópwólón manawer, repwe angei köpwüngün meet mi fich ngeni ar kewe föfför.

Paul a ökkönümwü le eingeing

16Ngang üpwe pwal enliwinisäfäli minne üwa apasa: Esap wor emön epwe ekieki pwe ngang emön mi umwes. Nge are öüwa ekieki pwe ngang emön mi umwes, iwe, öüpwe le chök etiwaei inamwo ika ngang üwa ümwes, pwe ngang üpwe mwo chök pwal ekis eingeing. 17Meet ngang üpwe apasa iei, üsap apasatä usun meet ewe Samol epwe apasa, nge i ngang üpwe eingeing usun ngang emön mi umwes. 18Nge pwokiten üwa küna pwe chómmóng ra eingeing usun ar tüfich lón peekin fituk, iwe, pwal ngang üpwe eingeing. 19Iwe, ämi kana mi ekieki pwe öüwa miriit, öüwa pwapwa le öüseling ngeni ekkana mi umwes. 20Pün ämi öüwa engngiló are emön a nöüni kemi amanaw, are emön a oumwesimwesi kemi, are emön a angei meinisin minne a wor reemi, are emön a pwisin etekiatä, are emön a pösapei kemi. 21Ngang üwa sääw äi üpwe apasa pwe äm aia lipwäkingaw äm äipwe föri ena sókkun! Nge ese lifilifil ika meet emön a ökkönümwü le eingeing usun, pwal ngang mi tongeni äi üpwe eingeing usun — ngang üwa alooni aloon emön mi umwes.

Riäfföü fäniten Kraist

22Iir ra apasa pwe iir re Hipru. Ifa usun, iir re Hipru? Iwe, pwal ngang. Iir ra apasa pwe iir re Israel? Iwe, pwal ngang. Iir mwirimwirin Abraham? Iwe, pwal ngang. 23Iir nöün Kraist chón angang? Ngang üwa alooni aloon emön mi umwes, fen ngang koon emön nöün Kraist chón angang mwer. A somwoló äi angang weires lap seniir, a wätte öükükün äi ninni lap seniir, a fän chómmóng äi tolong lón föötek lap seniir, fän chómmóng üwa arap ngeni äi üpwe mäló. 24Limu fansoun, ekkewe chón Sus ra wichiei, nge iteitan ra wichiei fän faik äimwu ew. 25Fän ülüngät ra wichi ngeniei wóók, fän ew ra mónei ngeniei faaw, fän ülüngät üwa waata lemataw; ew pwiin pwal ew rän üwa pappas lemataw. 26Fän chómmóng, ngang üwa säifeil, üwa tolong lón feiengawen pwuupwun chaanpwupwu, lón feiengaw ren aramas ingaw, lón feiengaw ren pwisin aramasen fönüei, lón feiengaw ren ekkewe Sentail, lón feiengaw me lón telinimw, lón feiengaw me lón fönüpöön, lón feiengaw me lemataw, lón feiengaw me leiin ekkewe aramas mi chofonatä chök le lapalapeni lapalapen chón lükü. 27Üwa nóm lón pekkusun mölülü me angang weires, fän chómmóng üsap möür, üwa nóm lón äi echik me äi kaaka, fän chómmóng üwa öchüün, üwa fööw me osupwangen üfei. 28Mwirin, me lükün ekkeei mettóch mi fis ngeniei, iei meet a chou wói iteiten rän: äi chüngüüw usun än ekkewe mwichefel meinisin repwe tipeew fengen. 29Pün itä iöön leiimi a tolong lón an apwangapwang, nge ngang üse pwal fiti le meefi apwangapwang? Iöön leiimi a püngütiw lón tipis, nge esap pwichikkar ekiekin me lón letipei ren äi soong?

30Ika pwe ngang üpwe eingeing; iwe, üpwe eingeing fänäsengesin ekkewe mettóch mi pwärätä usun äi apwangapwang. 31Ewe Kot me Semen ach we Samol Jesus Kraist, I ewe mi feiöch tori feilfeilló chök, a silei pwe ngang üsap chofona. 32Lupwen äi nóm lón Damaskos, ewe kepina mi nóm fän än ewe king Aretas nemenem, a anómwu ew mwichen sounfiu pwe repwe masa ewe telinimw än chón Damaskos pün a mochen pwe epwe aressiniei. 33Nge ngang üwa köürütiw lón ew paasikit me lón ew asammwachon tittin ewe telinimw. Iwe, ina usun äi üwa tiwewu seni lepöün.

Än Paul küna Paradis mi amwaraar

12 Inamwo ika esap wor lamwotan ngeniei äi üpwe eingeing, nge üpwe chök sópweló. Ngang üpwe aporausa usun minne ewe Samol a öküna ngeniei lón künäei me meet I a pwääri ngeniei. 2Engol me rüänü ier a ló, ngang üwa silei emön mwän lón Kraist, pwe i a pwisipwisitä ngeni lón ewe öülüngätin sässärin läng. Ngang üsap silei ika inisin ätei a feitä ika ngünün chök a toowu seni inisin o feitta. Ngang üsap silei; Kot chök a silei. 3Ngang üwa silei ei aramas — üsap silei ika inisin a pwisipwisitä ika ngünün chök — ngang üsap silei, Kot chök a silei. 4Nge ngang üwa silei pwe ätei a pwisipwisitä lón Paradis o a rongorong sókkun kapas mi ämäirü esap tongeni an epwe apasa lón kapas, esap mwümwütä ngeni emön aramas an epwe kapas usun. 5Iei ei sókkun aramas ngang üpwe eingeing usun, nge ngang üsap chök pwisin eingeing usi, chiilón chök üpwe eingeing wón äi kana apwangapwang. 6Mi wor chómmóng meet üpwe eingeing usun, nge üsap usun emön mi umwes are üpwe eingeing, pwokiten ngang üpwe kapas wón minne mi enlet. Nge ngang üsap eingeing, pün ngang üsap mochen pwe epwe wor emön epwe eitaöchüei lap seni meet i a pwisin küna me lón manawei ika rongorong seniei.

Ewe fölüföl lón fituken Paul

7Nge pwokiten lapalaapen amwararen ekkewe mettóch Kot a pwääri ngeniei, iei popun a eppeti seniei äi üpwe pwisin eingäeitä. Iwe, I a uwalong efóch fölüföl lón fitukei, emön nöün Satan chón künö pwe epwe eriäfföüei o eppeti seniei äi üpwe lamalamtekia. 8Ngang üwa tungór maamaw ngeni ewe Samol fän ülüngät fäniten ei mettóch pwe epwe sü seniei. 9Nge ewe Samol a apasa ngeniei: “Äi ümöümöch a naaf ngenuk, pün äi pöchökkül a pwääló unusöchün lón apwangapwang.” Iei minne, ngang üwa fókkun pwapwa pün mi fen öch äi üpwe eingeing lón äi apwangapwang, pwe än Kraist manaman epwe nónnóm lóói. 10Iei minne, ngang üwa menemenöch lón äi kana apwangapwang, lón äi küna turunuffas, lón äi osupwang, lón äi küna riäfföün ninni, lón äi weires fänäsengesin Kraist. Pün lupwen üwa apwangapwang, nge üwa fen pöchökkül.

Ekkewe esissilen emön chón künö

11Ngang üwa wiliti emön mi umwes ren äi eingeing, nge ämi öüwa eriäniei äi üpwe eingeing. Pün enletin pwe itä fen ämi öüpwe wisen älletätä usi, pün esap wor och minne ngang üpwe kisitiw ren fän ekkewe asalapen soukünö, inamwo ika esap wor älleai. 12Lupwen ngang üwa nóm reemi, ngang üwa pwääri ngeni kemi älelletan pwe ngang emön enletin soukünö mi ökkünööto reemi seni Kot. Pün fän wätten mósónóttam ngang üwa föri chómmóng esissil me manaman me föfför mi amwaraar me leiimi. 13Ewe chök och mettóch ngang üsap föri me leiimi, nge üwa föri me lón ekkewe pwal ekkóch mwichefel, äi üsap mochen üpwe eweiresi kemi pwe öüpwe ngeniei och älillis. Öüpwe omwusaeiló fäniten äi ei mwääl!

Än Paul tongei chón ewe mwichefel Korint

14Iwe, a iei öülüngätin fansoun äi üpwe feitto reemi. Nge ngang üsap mochen pwe üpwe eweiresi kemi, pün ngang üsap mochen meet a wor reemi, nge i ämi. Pün pwüngün pwe ekkewe semiriit resap wisen awora iseis fäniten ekkewe saam me iin, nge i ekkewe saam me iin ra awora iseis fäniten ekkewe semiriit. 15Ngang üpwe fókkun pwapwa ren äi üpwe fangeló meet mi wor rei pwal äi üpwe fangeló manawei fäniten ngünümi. Nge inamwo are e fen lapaló äi tongekemi, nge e fen pwal kikkisiló ämi tongeei. 16Ekkóch me leiimi ra tipeew ngeni pwe ngang üsap eweiresi kemi le ochchouwätä och wóómi. Nge ekkóch ra chüen ekieki pwe ngang emön mi tipächchem soolä, pün üwa oumwesimwesi kemi ren äi angangöch le emichimich! 17Ifa usun, mi wor emön me leiin ekkewe mwän ngang üwa tiiniirewow reemi a oumwesimwesi kemi? 18Lupwen ngang üwa peseei Titus pwe epwe feilló reemi o üwa tiinawow pwal emön pwiich keei pwe epwe fiti, ifa usun, Titus a oumwesimwesi kemi? Apwi, esap ina usun! Pün äm aia ääni emön chök Ngüün o fätäl lón ipwen chök emön me emön leiim, ren äm föri ekkewe mettóch lón ew chök lapalap.

19Eli ina öüpwe ekieki pwe äm aia chök apasa ei pwe äm aia pwisin penikeemitä. Esap ina usun. Äm aia üreni kemi ei pün äm nöün Kraist chón angang, nge aia silei pwe Kot mi öüseling. Meinisin minne äm aia föri, aia föri fänäsengesin ämi öüpwe feffeitä, ämi chiechiem kana mi ächengicheng. 20Pün ngang üwa nuokkus, pün lupwen üpwe feitto chuuri kemi, ngang üsap saani meet üpwe küna meremi, nge ämi öüsap saani meet ngang üpwe föri ngeni kemi. Ngang üwa nuokkus pün eli ina üpwe küna pwe epwe wor äniini fengen me lólówó, soong, apaap, luwapas, ngününgün, lamalam tekia, me efitikooko. 21Ngang üwa nuokkus pwe lupwen üpwe war säfäl, äi Kot epwe etekisónaei me fän mesemi. Iwe, ngang üpwe letipeta pwokiten chómmóng me leiimi ra chüen föri ekkewe tipis ra fen föri lón ekkewe fansoun mwan nge resap siwili ar ekiek. Resap kulsäfäl seni ar kewe föfför mi limengaw, föfförün lisowu me ar mwärääräiti pwapwan mocheniän fituk.

Paul epwe war fän an pöchökkülen an pwüüng

13Epwe iei öülüngätin fansoun äi üpwe feitto reemi. Iwe, usun minne ewe taropwe mi pin a apasa: “Pwüngülón iteiten kapas epwe ölükülük ren aloon rüömön ika ülümön chón pwärätä.”a 2Ngang üwa fen üreni kemi me mwan lón ewe oruuwen fansoun äi nóm reemi; iwe, pwal are mwo üsap nóm reemi iei, nge üpwe le chök atawei le apasa ngeni chókana mi föri tipis me mwan me pwal ngeni meinisin kana lussun pwe are üpwe liwinsäfälito reemi, üsap fókkun ätittini meet üpwe föri ngeni emön me emön, 3pwokiten ämi öüwa mochen kütta älelletan pwe Kraist ewe a kapas me lóói. Iwe, Kraist esap apwangapwang lón meet I a föri ngeni kemi, pün I a manaman me leiimi. 4Pün Kraist a iräpenges lón apwangapwang, nge iei I a manaw ren manamanen Kot. Iwe, pwal äm aia apwangapwang, nge aia nónnóm lón Kraist o ääni än Kot manaman, iei ewe manaman aia aea lón äm angang ngeni kemi.

5Öüpwe pwisin etittina kemi pwe öüpwe küna are mi wesewesen enlet ämi lükü. Öüpwe pwisin testini ämi lükü. Ika öüsap silei pwe Jesus Kraist a nóm lóómi, iwe öüwa tur lón ewe test. 6Nge ngang üwa lükü pwe ämi öüwa silei pwe äm äisap tur lón ewe test o äm aia tiw meren Kot.

Paul a efich tipetekisón

7Iwe, iei äm aia iótek ngeni Kot pwe öüsap föri och mi mwääl. Äm aia iótek usun ei, sap fäniten än aramas repwe küna pwe äm angang ngeni kemi a fisiöch, nge i pwokiten äm aia mochen pwe öüpwe föri meet mi pwüng, inamwo ika pwe epwe usun itä nge pwisin äm aia tur lón ewe test. 8Pün wiisem pwe äm äisap tongeni föri och minne epwe üüngeni ewe let, nge i aipwe üütä fäniten ewe let fansoun meinisin. 9Äm aia pwapwa äm aipwe apwangapwang, are ämi öüwa wesewesen pöchökkül. Iwe, pwal iei meet äm aia iótek fänitan: pwe manawemi epwe sööfösäfäl o unusöchchüló. 10Iei minne ngang üwa makkei ngeni kemi ekkeei mettóch me mwen äi üpwe war, pün ngang üwa äneän pwe amwo üsap osun äi üpwe nöünöü kapas mi ken ngeni kemi lupwen üpwe war o nóm reemi. Pün ngang üwa mochen pwe üpwe aea ewe pwüüng ewe Samol a fang ngeniei fäniten äi üpwe afeffeitäi manawen chón lükü nge sap fäniten äi üpwe ataeló.

Kapwong me kapasen efeiöchün kósópw

11Iwe, ömwüchchülón, ämi pwii kana mi ächengicheng, ngang üpwe asópwaló neii ei taropwe ren ekkeei kapas: Öüpwe pwapwa. Öüpwe asööfösäfäli nónnómwun manawemi. Öüpwe echipafengeni kemi lefiilemi. Öüpwe tipeew fengen le ääni ew chök ekiek. Öüpwe manaweni manawen kinamwe. Iwe, ewe Koten tong me kinamwe epwe nónnóm reemi.

12Öüpwe kapwong fengen lefiilemi ren ewe mitimitin tong mi pin. 13Ekkewe chón pin meinisin mi nóm ikeei ra tiinawow ar kapwong ngeni kemi.

14Ümöümöchün ach Samol Jesus Kraist me ewe tongen Kot pwal chiechifengenin ewe Ngüünmifel epwe nónnóm reemi meinisin. Amen.