1 Timothy

Än Paul kapwong ngeni Timothy

1 Ei taropwe seniei Paul ngang emön nöün Kraist Jesus soukünö, üwa kefilitä ren ewe öllük mi katoowu seni Kot ach Chón Amanaw me ewe Samol Kraist Jesus ach apilükülük.

2Üwa mak ngenuk Timothy, en emön wesewesen neii lón ei angangen lükü. Ümöümöch me tong me kinamwe seni Kot Samach me Kraist Jesus ach Samol repwe nónnnóm reemw.

Än Paul kapasen fön fäniten sókkun käit mi chofona

3Lupwen ngang üwa feilló Masedonia, ngang üwa tungór ngenuk pwe en kopwe chök nómwetiw lón Efisos pwe kopwe öllük ngeni ekkana ekkóch aramas pwe resap esikuula pwal och sókkun käit mi sókkóló, 4repwe pwal ükütiw le olussumwälieló ar fansoun le afalafal usun ekkana tuutulap me kana äwewen tettelin uruwo esap wor ükütiwan. Pün ekkeei sókkun mettóch ra chök efisätä äniini, nge resap älisi aramas pwe repwe manaweni ew manawen lükü lón Kot. 5Nge popun äm ei öüröür pwe ekkewe souleng meinisin mi nóm ikena repwe uren tong mi feitto seni leluk mi limöch me mwelien letip mi fatafatöch me ew lükü esap wor manawen likotupwutup lón. 6Pün mi wor ekkóch chón afalafal ra tókkóló seni ekkeei mettóch, nge ra olussumwälieló ar fansoun le äniini me aporausa poraus mi pöön esap wor lamwoter. 7Ra mochen pwe repwe chón esikuula ekkewe öllükün Moses, nge resap weweiti meet ra kapas usun, inamwo are usun itä nge ra kapas fän wätten ar apilükülük.

8Kich sia silei pwe ekkeei Öllük ra mwirinnö, are emön epwe aea fän pwüngüöchün popun meren Kot. 9Nge ekkeei öllük resap för fäniten aramas mi föri meet mi pwüng, pwe fäniten ekkana aramas mi älleasolap ngeni öllük me chón resap mochen anómwur fän nemenem, pwal fäniten chókana resap meniniti Kot me chón tipis, pwal fäniten chókana resap epini mwo och mettóch me chón turunufasei meet mi pin, pwal fäniten chókana mi nii semeer ika ineer me nii pwal ekkóch aramas. 10Ekkeei öllük ra för fäniten aramas mi tipisin lisowu, pwal fäniten ekkana mwän mi lisowu ngeni pwal mwän me ekkana chón amöömö amanaw, pwal fäniten kana chón chofona me kana chón atai minne ra ääni pwon, pwal fäniten chókana mi öppölüwa le üüngeni ekkana sókkun käit mi efisätä pöchökkülen me mämmääritän manawen ngüün, 11mi feitto seni ewe poraus allim mi ling, iei meet ewe Kot mi unusen feiöch a ewisa ngeniei.

Mwareiti Kot ren an ümöümöch

12Ngang üwa kilisou ngeni Kraist Jesus ach Samol, I ewe mi fang ngeniei äi pöchökkül, pwokiten I a ekieki pwe ngang mi ölükülük o a filiei pwe üpwe angang ngeni, 13inamwo are melóóm ngang emön chón turunufasei iten Kraist. Ngang üwa küttafeili nöün Kraist kewe aramas pwe üpwe eriäfföüür o efeiengawer lón sókkopaaten lapalap üwa tongeni. Nge Kot a pwääri an ümöümöch ngeniei, pwokiten ngang üwa föri meet ngang üwa föri lón äi wewengaw me äi lükülükümang. 14A ifa me kirekiröchün pwal ümöümöchün ewe Samol! I a unusen ouraeiló ren lükü me ewe tongen Kraist Jesus.

15Iei och kapas mi let ach sipwe anómwu ach apilükülük wón o mi fich ngeni ach sipwe unusen etiwa: Kraist Jesus a feitto lón fönüfan pwe epwe amanawa chón tipis kana, nge ngang emön me leiir üwa koon ngaw seniir meinisin. 16Nge iei popun Kot a ääni ümöümöch ngeniei pwe Jesus Kraist epwe nöünöü ngang pwe üpwe och leenien äwewe fäniten an mósónóttam mi lapalaap ngeni ekkana chón tipis mi fókkun ingaw. Mwirin ekkóch repwe meefi pwe pwal iir ra tongeni lükü Kraist o ääni ewe manaw ese mwüch. 17Kot epwe ling me iteüöch tori feilfeilló chök. I ewe King esap wor lepoputän me sópwólón. I ewe Emön sisap tongeni küna ren mesach, esap fókkun tongeni mäló. I chök Kot. Amen.

Ääni ewe maunen lükü mi mwirinnö

18En neii Timothy, ikkeei ekkeei öllük ngang üwa lükü ngenuk pwe kopwe älleasochis ngeni, mi lóngólóng wón ekkewe kapasen oosuni mi katoowu fänäsengesum me mwan, pwe repwe ngenuk óm lipwäköch le fiu lón ewe maun mi mwirinnö. 19Kopwe kömwöchünnük wón óm lükü o tümwünü limöchün mwelien letipom fansoun meinisin. Ekkóch aramas ra üüngeni mwelien letiper, iwe, a fis pwe ra tolong lón feiengawen waata lón ar lükü. 20Hymenaeus me Alexander iir rüwömön leenien äwewe usun ei. Ngang üwa atolonger fän än Satan nemenem pwe repwe käeö ar resap turunufasei Kot.

Iótek fäniten aramas meinisin

2 Iei minne, ngang üwa peseek pwe akkomwan, kopwe iótek fäniten aramas meinisin, kopwe iótekin tungór pwe Kot epwe efeiöchür, kopwe iótek pwe Kot epwe fang ngeniir meet ra ääni osupwang, kopwe pwal iótekin kilisou fäniten aramas meinisin. 2Kopwe iótek fäniten kana king me meinisin ekkewe mi nóm lón wiis, pwe sipwe tongeni nónnóm lón kinamwe me mósónósón lón ach unusen suufóliti Kot me manawen pin.

3Iei meet a mwirinnö me apwapwai Kot ach Chón Amanaw, 4pün I a mochen pwe aramas meinisin repwe küna manaw o silei ewe let. 5Pün mi wor emön chök Kot me emön chök Chón Afföör mi tongeni ächäfengeni Kot me aramas, I ewe Aramas Kraist Jesus. 6I a fanagaló pwisin manawan pwe möön kepichilón tipisin aramas meinisin. Iei ewe poraus Kot a ngeni chón fönüfan lón ewe fansoun mi pwüng ngeni. 7Iwe, ngang üwa kefilitä pwe üpwe emön chón afalafal me soukünö, pwe üpwe esikula ngeni ekkewe Sentail usun lükü me let. (Ngang üwa kapas enlet lón Kraist, üsap kapas chofona).

Mwän me fefin lón mwichefel

8Iei minne, ekis meinisin ia öüwa mwich fengen ie lón ekkewe leenien fel, ngang üwa öllük pwe ekkewe mwän repwe iótek nge repwe eitietä pöüür mi pin ngeni Kot fän limöchün manawer, nge esap fän soong me tipefesen. 9Iwe, ngang üwa öllük pwe ekkewe fefin repwe amollafichi ar repwe üföüföch. Resap üföüf üüf mi ässääw me kana üüf mi aworato mocheniä. Resap äsepa mesen aramas ngeniir ren ar kiniochei förün mökurer ika ren ar ofouta ngeniir kolt ika kana sókkun ofout mi ling ika üföüf kana üüf mi mömmóng. 10Pün ekkana fefin repwe foutei ngeniir föfför mwirinnö usun mi fich ngeni fefin mi apasa pwe ra suföliti Kot.

11Ekkewe fefin repwe öüseling o käeö fän mósónósón o anómwuur fän nemenem. 12Nge ngang üsap mwüüt ngeni fefin pwe repwe chón afalafala mwän ika awora ar nemenem wón mwän, nge repwe chök mósónósón le öüseling. 13Pün Kot a akkomw föri Adam, mwirin, epwap föri Eva. 14Iwe, pwal ewe fefin i e tupwuló ren Satan nge sap Adam. Iwe, iei popun a fis tipis. 15Iwe, iei mwo nge fefin repwe ngasaló seni ei itengaw ren ar nöünöü, are repwe sópweló lón ar manaweni manawen lükü me tong me pin me tipeppós le nemeni mochenin tipeer.

Ekkewe tüfich epwe wor ren ekkewe soummasen mwichefel

3 Iei ewe kapas mi let o ölükülük: Are emön mwän a mochen epwe emön soummasen mwichefel, a tipeni ew angang mi mwirinnö. 2Ina pwata, emön soummasen mwichefel epwe emön mwän esap wor emön epwe tongeni kapas mi ngaw usun manawan. Epwe pwülüeni emön chök fefin, epwe miriit lón an ekiek, epwe tipeppós le nemeni mochenin tipan, epwe emön mi iteüöch, epwe pwapwa le etiwa waasöla, epwe lipwäköch le esikuul. 3Esap emön mi fööfö ngeni sakaw, esap emön mi mochen fiu, esap tipemmóng wón mooni, nge epwe tipepwetete, esap souäniini, esap mocheniä. 4Epwe emón mi nemeniöchü pwisin chón an famili me masowen leimwan o tümwünüfichi nöün kana pwe repwe sile menin me älleasochis ngeni. 5Pün are emön mwän esap sile an epwe nemeniöchü pwisin chón an famili me masowen leimwan; iwe, epwe ifa usun an epwe tongeni tümwünü än Kot we mwichefel? 6Emön soummasen mwichefel esap pwal emön mi söfö lón an lükü pün ete sikesiketä lón an lamalamtekia ren an mwittir le kefilitä. Iwe, epwe turulong lón köpwung usun chök ewe devil. 7Iwe, pwal ekkana aramasen lükün mwichefel repwe kapas mwirinnö fänitan, pün ete turulong lón än ewe devil likottupw o küna itengaw.

Sókkun tüfich epwe wor ren ekkewe chón älillis lón mwichefel

8Iwe, pwal ina chök usun ren ekkewe mwän iir chón älillis. Iir repwe aramas mi wor meniniir, resap aweruu, resap fööfö ngeni sakaw, resap tipemmóng wón mooni. 9Repwe kömwöchünnük wón ewe mwónómwónen lükü fän limöchün mwelien letipeer. 10Me mwen ar repwe kefilita ngeni ewe wisen chón älillis, repwe akkomwen föri ekkóch sekining lón mwichefel pwe chekin manawer me ar tüfich. Are iir mi lipwäköch ngeni, mwirin, repwap tongeni föri angangen ewe wisen chón älillis.

11Iwe, pwal ina chök usun ren ekkewe chón älillis fefin. Epwe wor meniniir, resap souppwen, repwe tongeni tipeppós le nemeni mochenin tipeer, repwe ölükülük lón mettóch meinisin ra föri.

12Ekkewe chón älillis mwän repwe en me pwülüan emön chök fefin, repwe nemeniöchü nöür kana semiriit me masowen pwisin ar kana famili. 13Pün chókana mi angangöch lón ewe wisen chón älillis repwe aworato meniniir meren chókewe iir ra angang ngeniir, epwe pwal tongeni lapaló ar pwora le kapas usun ar lükü lón Kraist Jesus.

Ewe mwónómwónen lükü

14Ngang üwa apilükülüküw pwe üpwe tongeni mwittir tooruk. Nge üwa makkei ekkeei mettóch ngenuk iei, 15pün are üpwe mangeló; iwe, kopwe silei epwe ifa usun än ekkewe aramas repwe föröchchüw nónnómwun manawer me lón ewe familien Kot. Iei mwichefel, än ewe Kot mi manaw, iei urelapen me lóngólóngun ewe let. 16Esap wor och tipemwaramwar pwe iei ewe mwónómwónen ach lükü mi fökkun lapalaap:

Kraist a pwääló lón fituk o a köpwüngüló meren ewe Ngüün pwe I mi pwüng. Ekkewe chón läng ra nennengeni I, aramas ra arongafeili usun I leiin chón ekkewe mwüü. A wor aramas ra lükü I me lón fönüfan, Kot a angeätä I lón lingan.

Ekkewe sókkun käit mi pop seni ekkewe ngüün mi ngaw

4 Iwe, iei ewe Ngüünmifel a affata le apasa pwe lón ekkewe fansoun sópwólón, ekkóch aramas repwe tókkóló seni masowen minne Kot a pwäri iei met souleng ra lükü. Repwe tipeew ngeni ekkana sókkun ngüün mi otupwutupw me ekkana sókkun käit mi pop seni kana önüün rochopwak. 2Ekkeei sókkun käit repwe feitto seni ekkewe chón likotupwutupw me chón kapas chofona. Ra otupwun pwomweni pwe ra silei lamalam, nge esap chüen wor memmef lón mwelien letiper, usun chök ekkan lemóón kinas mi piin kar ren och mächä mi saraara. 3Ekkeei sókkun aramas ra ääni afalafal pwe mi ngaw pwüpwülü o öllük ngeni aramas pwe mi ngaw ar repwe mwöngö ekkóch sókkun mwöngö. Nge Kot a föri ekkana mwöngö pwe ekkana aramas mi silei o lükü ewe let repwe mwöngö fän kilisou. 4Pün meinisin minne Kot a föri a mwirinnö, nge sisap opwut och, are sipwe etiwa fän pwapwa me kilisoun letipach. 5Pün kich mi silei pwe ewe mwöngö a epinipiniló ren ewe kapasen Kot me iótek.

Emön nöün Jesus Kraist chón angang mi mwirinnö

6Are kopwe äiti ngeni ekkewe pwiipwi chón lükü ekkeei mettóch; iwe, kopwe emön nöün Kraist Jesus chón angang mi mwirinnö. Pün en emön mi pwisin eneen le amwöngöni ngünüm ekkewe kapasen lükü me ekkewe kapasen käit mi mwirinnö en ka fen älleasochis ngeniir tori iei. 7Nge en kosap olussumwälieló óm fansoun le äniini wón kana ekiek mi üüngeni kapasen Kot me ekkana tuutulap mi fich ngeni chök kana fefin mi chinlap. Nge kopwe alamwota óm fansoun me pöchökkül le pwisin esipa manawom lón óm tupwöl wón Kot. 8Pün ach achoocho le esipa pwisin inisich a ätittin öüchchean, nge ach esipa manawach lón ach tupwöl wón Kot a fókkun wätte öüchchean lamwotan fäniten mettóch meinisin, pwokiten a wor ekkewe pwon lón fäniten ei manawen ikenai me pwal fäniten ewe manaw epwe feitto me mwirin. 9Iei ew kapas mi fókkun ölükülük, mi lamwot än aramas repwe unusen etiwa. 10Pün kich sia angang weires o öttüres le riäfföü fäniten än aramas repwe lükü ewe let, pün ach apilükülük a nóm wón ewe Kot mi manaw, I ewe Chön Amanawa aramas meinisin, nge wesewesen lapalón, chökana mi lükü.

Kopwe pwisin tümwünuk me minne ka ääni käit

11Kopwe esikuula me öllük ngeni ekkewe aramas ekkeei mettóch. 12Kosap mwüüt ngeni emön epwe ootiwek fäniten en emön chök ölüöl. Nge kopwe fen pwäärukoló pwe kopwe ew leenien appirü ngeni chökana mi lükü, lón óm kapas, lón föfförün manawom, lón óm tong, lón óm lükü me lón óm limöch. 13Kopwe tupwöl le älleani ekkewe taropwe mi pin ngeni ewe mwichefel lupwen fansoun fel, kopwe pwal öpöchökkülätä letipen ekkewe chón lükü o esikuler tori äi üpwe war. 14Kosap tümwününgaw ngeni ewe liffangen ngüün mi nóm lóóm, en ka angei seni ekkewe kapasen oosuni ra apasa ngenuk, lupwen ekkewe souakkomwen mwichefel ra isettä pöüür wóóm.

15Kopwe ekieköchüw óm kopwe föri pwüngün ekkeei mettóch, kopwe atolonga inisum lón óm kewe angang, pwe óm feffeitä lón manawen ngünum epwe pwääpwäló ngeni meinisin. 16Kopwe tümwünüöchüw pwisin manawom me minne ka ääni käit. Kopwe likiitü wón meet mi pwüng, pün lupwen kopwe föri ei, kopwe awora ölükülükün ewe alen küna manaw pwisin fänitom me pwal fäniten chókana mi öüseling ngenuk.

Meet sipwe föri ngeni pwal ekkóch chón lükü

5Kosap kapas pöchökkül ngeni emön mwän mi wätte ierin senuk lupwen kopwe öpwüngü, nge kopwe öpöchökkülätä letipan usun chök nge i emön semom. Kopwe fönööw ekkewe mwän mi ier kükkün senuk usun chök nge iir pwiimw. 2Kopwe fönööw ekkewe fefin mi wätte ierir senuk usun chök nge iir inóm, nge kopwe fönööw ekkewe fefin mi ier kükkün senuk usun chök nge iir fefinom fän unusen limöchün letipom.

3Kopwe awora menninin ekkewe fefin, pwüngün pwe ra enletin lipichsäfäl. Mwichefel epwe tümwünü emön fefin mi lipichsäfäl ika esap wor emön a tümwünü. 4Nge are emön fefin mi lipichsäfäl a wor nöün ika nöün nöün kana; iwe, iir repwe akkomwen käeö le pwääri pwüngün ar nuokkus Kot me lón imwer o liwinisäfäli ngeni semeer me ineer liwinin ar tümwün ren ar repwe tümwünür. Iei och mettóch a fókkun apwapwai Kot. 5Nge emön fefin pwüngün pwe i emön mi enletin lipichsäfál, i emön a enletin äkkälämön chök wón an, epwe anómwu an lükülük wón Kot. Lepwin me lerän i epwe tuttungór ngeni Kot fäniten älillisin o eneen le iótek. 6Nge emön fefin mi lipichsäfäl mi fangelong manawan ngeni pwapwan mocheniän fituk, a fen mäló lón ngünün, inamwo ika inisin mi chüen manaw. 7Iwe, kopwe öüröüra ngeni mwichefel ekkeei mettóch, pwe aramas resap eitengawa ekkewe fefin mi lipichsäfäl. 8Nge chókana resap mochen tümwünü pwisin määräriir kana, wesewesen lapalón pwisin chókana mi nóm lón ar famili, ra amaamäsini meet sia lükü. Ekkeei sókkun aramas ra ngaw seni emön sap i chón lükü.

9Emön fefin mi lipichsäfäl epwe nóm wón ewe tettelin iteiten chón repwe angei älillisiir, are i emön fefin esap kis seni wone ierin, are i a piin pwülüeni emön chök mwän, 10are a wor sufölün meren aramas fäniten ekkewe föfför mwirinnö i a föri, are i a föleniöchüw nöün kana, are i a ääni kirekiröch ngeni wasööla, are i a pwal angang ngeni ekkewe chón pin fän tipetekisón, are i a pwal älisi chókana mi nóm lón osupwang o tilikken le föri föfför mi mwirinnö.

Kapasen öüröür fäniten kana föpwül mi lipichsäfäl

11Nge kosap mwüüt ngeni ekkewe föpwül mi lipichsäfäl ar repwe nóm wón ewe iteit are ierir a kis seni wone, pwokiten pöchökkülen mochenin inisiir epwe nemenaló ar ölükülük ngeni Kraist lupwen repwe mochen pwüpwülüsäfäl. 12Mwirin, repwe meefi ar tipis, pwokiten ra ataai minne ra ääni pwon me mwan. 13Iwe, pwal me lükün ei, ina repwe pwal aörün ngeniir ar repwe le chipwang. Mwirin, repwe le chök faapwukosfeil le uweei poraus seni ew imw ngeni pwal ew imw. Iwe, resap chök olussumwälieló ar fansoun, nge repwe pwal luapasfeil o angelong lón mettóch esap pwal äwenewener, repwe pwal apasatä ekkóch mettóch ese pwüng ngeni ar repwe apasa. 14Iei minne, ngang üwa mochen pwe ekkewe fefin mi lipichsäfäl nge iir mi chök chüen ier kükkün repwe pwüpwülüsäfál, pwe repwe nöünöü o tümwünü semiriit, repwe pwal tümwünü akkóóten angangen lón imweer. Mwirin, resap wäsi ngeni ewe chón opwut an fansoun fich pwe epwe eitengawer. 15Pün ngang üwa nuokkus pwe ekkóch leiir ra fen tókkóló, iwe, iei ra tapweló mwirin Satan.

16Are emön fefin i chón lükü a wor määrärin fefin mi lipichsäfäl; iwe, i epwe tümwünü määrärin kewe mi lipichsäfäl, nge esap ochchouwätä chök wón mwichefel an epwe tümwünüür. Mwirin, mwichefel a tongeni älisi ekkewe fefin pwüngün pwe iir ra enletin lipichsäfäl.

Usun ach sipwe osuufölü chókana mi sipeöch lón peekin ngüün

17Mi fich ngeni ekkewe souakkomw mi angang echchipwör le emmweni mwichefel ar repwe angei suufölün ewe wiis me kilisoun ar angang, nge fókkun lapalón chókana mi angang weires le afalafal me esikuul. 18Pün ewe pwuk mi pin a apasa: “Kosap fööti awen ewe ätemwänin kowu lupwen a föri ewe angangen pwuuri ekkewe irän wiit pwe ekkewe föün repwe toowu seni pöön.” A pwal mak: “A fich ngeni emön chón angang an epwe angei liwinin.”a 19Kosap öüseling ngeni och kapasen tipingeni emön souakkomwen mwichefel, chiilón chök are epwe wor rüömön ika ülümön chón pwärätä repwe ettipisi i. 20Kopwe öpwüngü chókana mi sópweló chök le föri tipis me mwen mesen meinisin pwe pwal ekkewe lussun repwe nuokkus ar repwe föri tipis. 21Ngang üwa fókkun öllüküchow ngenuk me mwen mesen Kot me Kraist Jesus me pwal nöün kewe chón läng mi fil, pwe kopwe föri pwüngün ekkeei kapasen öüröür, nge kosap lifilifil aramas, kosap föri och lón ekiekin apaap.

22Kosap atapwanapwan le isettä pöüm wón emön an epwe angei pwonen wisan, pün kose pwal pacholong lón än ekkóch tipis. Kopwe pwisin tümwünuöchuk om kopwe limöch seni tipis.

23Kosap chüen ükkün chök kólik, nge kopwe pwal ünümi ekis wain fänäsengesin luukom, pwokiten óm na soun samwaw.

24Kopwe chechchemeni pwe än ekkóch aramas tipis ra pwääpwäló. Iwe, aramas meinisin ra fen silei pwe repwe köpwüng. Nge mi pwal wor ekkóch aramas, ar tipis repwapw pwä me mwirin lupwen a wor etittin. 25Iwe, pwal ina chök usun, pün än ekkóch aramas föfför mi mwirinnö ra fen pwääpwäló chök me mwan. Nge mi pwal wor ekkóch aramas, ar föfför mi mwirinnö repwap pwääpwäló me mwirin.

Usun ach sipwe osuufölü ekkewe masta

6 Meinisin ekkana chón lükü mi nóm fän nemenem pwokiten iir amanaw repwe öüchcheani ar kewe masta lón unusen suuföl pwe iten Kot me an kewe käit resap küna turunufas ren. 2Nge ekkewe amanaw mi nóm fän nemenien ekkewe masta iir chón lükü, resap osufölüngaw ngeni ar kewe masta, pwokiten iir pwiipwi, nge repwe fen alapaló ar achoocho le angang ngeniir, pwokiten chókewe mi angei feiöchün ar angang iir chón lükü, nge ra pwal ächengicheng merer. Iei meet en kopwe esikuula me üreni emön me emön pwe epwe föri.

Käit mi mwäl me än aramas tipemmóng

3Are emön epwe esikuula pwal och sókkun käit mi sókkóló, esap tipeew ngeni ekkewe kapas mi unusöch me öüchchea än ach we Samol Jesus Kraist, are esap pwal tipeew ngeni ewe sókkun käit mi efisätä ach sipwe sókkuni sókkun Kot ren; 4iwe, i emön mi sikesik o wewengaw. Ei sókkun aramas a chök tipeni an epwe äniini wón kapas eiis mi lamotongaw me efiiui kapas. Iei meet a efisätä lólówó, fitikoko, kapasen eitengaw, öümöüm mi ngaw, 5me likapwalöölön lefiilen aramas. Ekkeei sókkun aramas ra efisätä fitikoko iteiten fansoun meinisin. Ar ekiek a ingawaló o resap apasätä meet mi let. Ra ekieki pwe ar tupwöl wón Kot iei ew alen ar repwe angei ar wiil. Kosap chiechi ngeni ekkeei sókkun aramas.

6Nge enletin tupwöl wón Kot mi fiti menemenöch iei wesewesen ew wiil mi lapalaap. 7Pün pwüngün pwe sisap uwalong och mettóch lupwen sia tolong lón fönüfan, iwe, enletin sisap pwal tongeni uweei och mettóch lupwen sipwe mäló. 8Iei popun, are a chök wor anach mwöngö me üfach; iwe, sipwe menemenöch ren ekkeei. 9Nge ekkana aramas mi mochen kütta ar repwe pisekisek, ra turulong lón sóssót me ew likottupw ren chómmóng sókkun mocheniä mi umwes me efeiengaw mi akokeretiw lón feiengaw me kitetter. 10Pün echeni mooni iei efóch waaren sókkun mettóch mi ngaw meinisin. Ekkóch aramas ra tipemmóng le kütta mooni; iwe, ra mwälech seni ewe alen lükü o ra pwisin posuw ngeni manawer chómmóng letipeta.

Nöün Kot chón kapas fänitan

11Nge en Timothy, en ewe aramas chón kapas fäniten Kot, kopwe chök sópweló le suu seni ekkeei mettóch mi ngaw meinisin, nge kopwe chök eneen le tapweló mwirin meet mi pwüng o mwirinnö. Kopwe tapweló mwirin ewe manawen tupwöl wón Kot fiti lükü, tong, mósónóttam me mósónósón. 12Kopwe öttures le ääni ewe maun mi mwirinnö fäniten meet sia lükü. Kopwe kömwöchünnük wón ewe manaw ese mwüch Kot a fen kööri ngenuk, nge en ka pwääraló usun lón óm kapasen pwärätä me mwen mesen chómmóng chón pwärätä. 13Ngang üwa öllük ngenuk me mwen mesen Kot, ewe mi fang manaw ngeni mettóch meinisin, me pwal mwen mesen Kraist Jesus, ewe mi apasätä ew kapasen pwärätä mi mwirinnö me mwen Pontius Pailet, 14pwe kopwe älleasochisi an kewe öllük fän unusen limöchün manawom. Mwirin, esap wor emön epwe tongeni küna och mwällin manawom seni iei tori än ach Samol Jesus Kraist epwe liwinsäfälito. 15Pün ei fansoun Kraist epwe pwääto seni läng, epwe pwisin kefilitä meren ewe chök emön Kot mi uren feiöch me unusen manaman, I ewe King asalapen king kana me Samol asalapen samol kana. 16I chök ewe Emön esap tongeni mäló, I a nónnóm lón saram mi fókkun saramaram pwe esap wor emön aramas a tongeni epwe kaneto ren. Esap wor emön aramas a fen küna I ika epwe tongeni küna I. I chök epwe ling me manaman tori feilfeilló chök! Amen.

Öüröür ngeni chón pisekisek

17Kopwe üreni chókana mi pisekisek me lón ei fönüfan pwe resap lamalamtekia lón ar ekiek, resap pwal anómwu ar apilükülük wón nöüür mooni epwe mwittir iteló. Nge repwe anómwu ar apilükülük wón ewe Kot mi manaw mi fangesom ngeni kich mettóch meinisin sia osun fäniten ach sipwe apwapwa kich. 18Kopwe üreniir pwe repwe nöünöü nöüür mooni le föri föfför mi mwirinnö. Repwe wöwün föfför mi mwirinnö o repwe fangafangöch ngeni chókana mi osupwang. Repwe mollota fansoun meinisin ar repwe ewiseisa ngeni pwal ekkóch ese lifilifil meet Kot a fang ngeniir. 19Ren ar föri ei sókkun lapalap, repwe pwisin ochukuchukätä wöwür pwe epwe ew lóngólóng mi nüküchchar fäniten ewe fansoun epwe feitto, pwe repwe kömwöchüló wón ewe enletin manaw.

Tümwünü meet a lükülük ngenuk

20Iwe, en Timothy, kopwe mammasaöchchüw meet Kot a atolonga fän óm tümwün. Kopwe atoowawók seni chókana mi wiipinepin ngenuk ren kapas mi turunufas me lamwotongaw ra mwäliló le eita ngeni “tipächchem”. 21Ekkóch aramas ra tókkóló seni ewe alen lükü ren ar tapweló mwirin ei sókkun kapas mi umwes.

Än Kot ümöümöch epwe nónnóm reemi meinisin. Amen.