1 Tessalonika
Än Paul kapwong ngeni ewe mwichefel lón Tessalonika
1 Ei taropwe seni keem äm Paul me Silvanus me Timothy. Äm aia mak ngeni kemi ämi chón ewe mwichefelin Tessalonika ämi nöün ewe Kot Saam me ewe Samol Jesus Kraist. Ümöümöch me kinamwe repwe nónnóm reemi.
Paul a mwareiti ekkewe chón lükü lón Tessalonika ren ar manaweni ew manawen appirü mi mwirinnö
2Äm aia apasa äm kilisou ngeni Kot fansoun meinisin fänitemi meinisin, lupwen äm aia föüni itemi lón äm iótek. 3Pün lupwen äm aia kapas ngeni ach we Kot me Samach usumi, äm aia chemeni ämi ölükülük le angang, ämi föfförün tong, me ämi likiitü le ösüküsükü liwinsäfälin ach we Samol Jesus Kraist.
4Äm mi silei pwe Kot mi echeni kemi, ämi pwiim kana mi ächengicheng, pwal I a fili kemi pwe öüpwe nöün aramas. 5Pün lupwen äm aia uwato reemi ewe porausen manaw, esap chök lón kapas pwe pwal lón manaman, pün ewe Ngüünmifel a ngeni kemi unusen älelletan pwe meet äm aia apasa a let. Iwe, ämi mi silei pwe lapalapen äm nónnóm leiimi a pwal älletätä usun enletin minne äm aia ääni poraus. 6Iei popun ämi öüwa etiwa ewe poraus fän pwapwa seni ewe Ngüünmifel nge öüsap nennengeni üküükün weiresin ewe riäfföü a awarato ngeni kemi. 7Iwe, iei meet a fis, pwe ämi öüwa mwittir wiliti leenien appirü ngeni ekkana chón lükü meinisin lón Masedonia me Akaia. 8Iwe iei, ämi öüwa arongafeili än ewe Samol kapas, esap chök lón Masedonia me Akaia pwe pwal lón ekkewe leeni ekis meinisin. Pün ekis meinisin ia äm aia feilló ie, aia chuuri ekkana aramas ra üreni keem usun ämi lükü lón Kot. Iei popun, äm äisap pwal osun äm äipwe apasa och usun, 9pün pwisin iir ra aporausa ngeni keem usun meet sókkun etiwetiw ämi öüwa föri ngeni keem me usun ämi öüwa kul seni ekkewe uluulun önümwäl pwe öüpwe angang ngeni ewe Kot mi manaw o let. 10Iwe, ra pwal kapas usun ämi witiwiti wareton ewe Nöün Kot seni läng, iei i Jesus ätewe Kot a amanawasäfälietä i seni mäló. Iei i ewe Emön a chimanü kich seni efeiengawen än Kot we soong epwe war.
Än Paul föfför me lón Tessalonika
2Pün pwisin ämi, pwiim kana mi ächengicheng, öüwa silei pwe äm chuuto ngeni kemi esap lamwotmwääl. 2Ämi mi silei usun äm tolong lón riäfföü me küna turunufas me lón Filipai me mwen chök äm feitto reemi. Nge ach we Kot a fang ngeni keem äm pwora pwe aipwe aronga an we poraus allim ngeni kemi fän manat, inamwo are äm aia nóm leiin chómmóng aramas mi pölüweni keem. 3Iei popun öüwa tongeni küna pwe äm afalafal esap fiti och angangen otupwutup ika och ekimwónómwón mi limengaw ika och föfförün emichimich. 4Pün äm aia kapas, pwokiten äm chón arong mi fen köpwüngüló meren Kot pwe epwe lükü ngeni keem pwe äipwe wisen chón uweei ewe poraus allim. Iei minne äm aia kapas pün äipwe apwapwai letipen Kot, nge sap ren äm äipwe apwapwai letipen aramas. I ewe mi etittina ekimwónómwónen letipeem. 5Pün ämi mi pwisin silei usun pwe lupwen äm feitto reemi, esap fän ew mwo äm äipwe sótuni le enliapa kemi ren kapasen ämmärew. Iwe, Kot I nöüüm chón pwärätä pwe äm aisap chök otupwun pwomweni pwe äm chiechiemi pwe öüpwe fang ngeni keem mooni. 6Äm äisap pwal kütta lingem meren aramas; esap meremi, esap pwal meren ekkóch. Inamwo ika äm nöün Kraist chón künö, mi wor äm pwüüng pwe aipwe kapas ngeni kemi fän pöchökkülen ewe wiis, 7nge äm aia angepweteete leiimi, usun chök emön inelap a angepwetete le tümwünöchüw me eteneki nöün kana semiriit.
8Äm aia fókkun tongei kemi, iei minne äm aia pwapwa le mochen fangeló ngeni kemi sap chök ewe poraus allim meren Kot pwe pwal pwisin manawem. 9Pün ämi öüwa pwisin chemeni, ämi pwiim kana, usun äm pekkus me angang weires leiimi. Pün äm aia angang lepwin me lerän fäniten an epwe wor älillisiim, pwe äm äisap mochen eweiresi emön leiimi ren liwinin och mettóch lupwen äm afalafala än Kot we poraus allim leiimi. 10Pwisin ämi nöüüm chón pwärätä, pwal pwisin Kot a pwärätä pwe äm aia manaweni manawen limöch, manawen wenechchar me manaw esap wor tikingawan me leiimi, ämi kana chón lükü meinisin. 11Pün ämi öüwa pwal silei pwe äm aia föri ngeni emön me emön leiimi usun minne emön saam a föri ngeni pwükütän nöün kana. Pün äm aia tuttungór pweteete ngeni kemi o öpöchökkülätä letipemi me peseei kemi, 12pwe öüpwe manaweni ewe manaw lón ew lapalap Kot epwe ekieki pwe mi fich ngeni. Pün I a körikemiilong lón pwisin mwüün pwe öüpwe fiti I lón lingan.
Än chón Tessalonika kul seni tipis o kul ngeni Kot
13Ren ei popun, äm äisap ükütiw le kilisou ngeni Kot, pwokiten lupwen äm aia afalafala ngeni kemi ei poraus, ämi öüsap ekieki pwe ekkewe kapas aia apasa ra chök pwisin äm kapas. Ämi öüwa etiwa meet aia apasa pwe ina wesewesen enletin ewe kapasen Kot öüwa rong senikeem. Iwe, ei kapas mi manaman a sópweló le angang lón letipemi ämi kana mi lükü. 14Nge mwirin, ämi pwiim kana, öüwa tolong lón riäfföün ninni seni pwisin chón fönüemi kana. Lón ei lapalap, öüwa wewe ngeni ekkewe chón lükü lón än Kot kewe mwichefel lón Judea mi tolong lón riäfföü meren pwisin aramaser kewe chón Sus, pwokiten ar lükü lón Kraist Jesus. 15Pün ekkóch leiin ekkewe chón Sus ra niieló pwisin nöüür kewe soufós, nge ekkóch ra niieló ewe Samol Jesus. Iwe, iei ra pwal tapweri kich pwe repwe niikich. Iir resap föri minne Kot a pwapwa ren o ra üüngeni aramas meinisin, 16ren ar sótuni le eppeti seni keem äm äipwe afalafala ewe poraus allim ngeni ekkewe Sentail, pün ra nuokkus are ekkóch repwe küna manaw. Ren ar föri ei sókkun, ra chök sópweló le ochukuchukätä ar tipis. Nge, ömwüchchülón, an Kot soong a püngütiw wór.
Paul a pwositi an epwe küna ekkewe chón Tessalonika
17Nge äm, pwiim kana mi ächengicheng, mwirin äm äia toowaweló seni kemi lón fansoun mwochomwooch, (lón chök inisiim, nge letipeem esap fókkun likitikemi), äm äia sótuni le achoocho ngeni äm aipwe liwinsäfälito reemi, pwokiten äm aia fókkun pwositi kemi pwe aipwe künasäfäli kemi. 18Pün äm aia fókkun mochen feilló reemi, ngang Paul, üwa sótuni me sótuni fän fitu, nge Satan a eppeti keem. 19Pün iö a ngeni keem äm apilükülük me äm pwapwa, io liwiniim aipwe eingeing wón me mwäriim mwärämwärin wiil? Ifa usun, sap ämi? Ewer, ämi öüpwe awarato ngeni keem pwapwa mi wätte lupwen sipwe üütäfengen fän mesen ach we Samol Jesus Kraist lupwen epwe waresäfälito. 20Pün ämi, ikkana äm ling me äm pwapwa.
Än Paul öürek me lón Athens
3Iei minne, lupwen äm äisap chüen tongeni engngiló ngeni, äm aia ekieki pwe epwe mwirinnö are ngang üpwe chök äkkälämön le nómwetiw lón Athens, 2nge äipwe tiinaló Timothy pwe epwe äämwa kemi. I chienach chón angang fäniten Kot, pwal i pwiich chón arongafeili ewe poraus allim än Kraist. Äm aia tiinawow i reemi pwe epwe afeffeitäi kemi o öpöchökkülätä letipemi lón ämi lükü, 3epwe pwal tümwünü seni kemi pwe öüsap mwökütüküt ren ekkeei riäfföü öüwa tolong lón. Nge enletin, ämi mi pwisin silei pwe ekkeei sókkun riäfföü repwe chök etingeni ar repwe fis ngeni kich chón lükü. 4Pün lupwen äm we nóm reemi me mwan, äm mi enliwini fän fitu le apasa ngeni kemi pwe sipwe tolong lón riäfföün ninni, usun chök meet ei a fis, ina pwata ämi mi silei. 5Iwe, iei popun, lupwen üsap chüen tongeni engngiló le witiwit, üwa tiinawow Timothy pwe epwe nengeni usun nónnómwun ämi lükü are mi chüen chök pöchökkül. Pün ngang üwa nuokkus are ewe chón otupwutupw a fen otupwukemiiló; iwe, äm angang a lussumwääl.
A chip letipen Paul ren Timothy
6Nge iei, Timothy a chök kärään wareto mereemi o uweato poraus mi mwirinnö pwe ämi lükü me ämi tong mi chök chüen pöchökkül usun me mwan. I a pwal aporausa ngeni keem pwe a fókkun mwirinnö minne öüwa chemenätä fänitem fansoun meinisin. Öüwa pwal fókkun mochen küna keem, usun chök pwal äm mochen küna kemi. 7Iei minne, ämi pwiim kana mi ächengicheng, äm aia fókkun chip lón äm riäfföü me weires meinisin, pwokiten öüwa chüen chök pöchökkül lón ämi lükü. 8Pün a ngeni keem manaw mi fö ren äm silei pwe öüwa chüen üppós lón ewe Samol. 9Pün meet sókkun öükükün kilisou äm äipwe tongeni apasa ngeni Kot fänitemi? Pün äm aia unusen pwapwa me mwen mesen ach Kot fänäsengesimi. 10Lepwin me lerän, äm aia eneen le tilikken lón iótek fänitemi. Aia tungór ngeni Kot pwe epwe mwüüt ngeni keem äm äipwe künasäfäli kemi pwe aipwe ounusöchüweló minne esap mwo fis lón ämi lükü.
Än Paul äneän fäniten chón Tessalonika
11Iwe, amwo pwe pwisin ach Kot me Samach me pwal ach we Samol Jesus Kraist repwe föri an epwe tüfich fäniteem pwe aipwe mwittir feitto reemi. 12Iwe, pwal amwo ewe Samol epwe föri pwe epwe lapaló o säsewu ämi tong fengen lefiilemi me pwal ämi tongei aramas meinisin, usun chök pwal äm tongei kemi a säsewu. 13Iwe, iei meet epwe fis: ewe Samol epwe föri pwe letipemi epwe pöchökkül o unusöch o pin lupwen öüpwe üütä mwen mesen ach Kot me Samach, lón ewe rän lupwen ach we Samol Jesus Kraist epwe war fiti nöün kana chón pin meinisin.
Paul a tungór pwe repwe manaweni manaw mi limöch
4Ömwüchchülón, ämi pwiim kana mi ächengicheng, äm aia tungór pweteete o fönöw kemi lón iten ewe Samol Jesus, pwe öüpwe sópweló le manaweni ew manaw mi apwapwai Kot, usun äm aia fen äiti ngeni kemi. Ämi öüwa fen föri ei, nge äm aia chök mochen peseei kemi pwe öüpwe eneen le föri iei usun. 2Pün ämi mi chechchemeni meet äm aia äiti ngeni kemi lón iten ewe Samol.
3Pün iei meet letipen Kot, pwe I a mochen pwe öüpwe manaweni ewe manawen pin. Iei popun, öüpwe atoowawa kemi seni sókkun tipisin lisowu meinisin, 4pwe emön me emön leiimi epwe käeö ngeni an epwe nemeni pwisin inisin o manaweni ew manawen pin me iteüöch, 5nge sap lón tipefirän mocheniä, usun ekkana chón lükün ra föri lón ar resap silei Kot. 6Esap wor emön chón lükü epwe turunufasei pwal emön pwiin chón lükü lón ei sókkun lapalap an epwe otupwu seni pwülüwan, pwokiten ewe Samol epwe älemööw ekkeei mettóch meinisin, usun chök minne aia fen apasa ngeni kemi me mwan o emmwirichchou le fönöw kemi usun. 7Pün Kot a kööri kich pwe sipwe pin, nge sap ach sipwe manaweni manawen limengaw. 8Iei minne, iö esap mochen manaw fän pwüngün ekkeei öllük, esap älleasolap ngeni än aramas öllük, nge i a opwut Kot, ewe mi fang ngeni kemi Ngünün we Ngüünmifel.
Ewe manawen pwiipwiöch me pwüngüöch
9Nge ngang üsap pwal osun äi üpwe mak ngeni kemi usun ewe tong fengenin lefiilen chón lükü epwe pwä leiin nöün Kot aramas. Pün pwisin Kot a äiti kemi pwe öüpwe tong fengen lefiilemi. 10Iwe, pwüngün pwe ämi tong a fen pöchökkül, pün a pwääló ren minne öüwa föri ngeni ekkewe pwiipwi chón lükü meinisin mi nóm lón unusen Masedonia. Iei mwo, nge äm aia tungor ngeni kemi ämi pwiim kana mi ächengicheng pwe öüpwe eneen le alapaló ämi tongeer. 11Epwe iei meet öüpwe achoocho le ekitacho ngeni: ämi öüpwe manaweni ew manaw mi mósónósón, öüpwe en me pwisin föri an angang o anagang ren pwisin poumi, usun chök minne äm aia fen öllük ngeni kemi me mwan. 12Are öüpwe föri ekkeei mettóch, mwirin, chókana sap iir chón lükü repwe meniniti nónnómwun manawemi. Iwe, öüsap pwal wisen lüküätä wón ekkóch ar repwe atawei ngeni kemi ämi osupwang ren peekin mooni.
Chipen letip ren än Kraist epwe wareto
13Nge ngang usap mochen pwe ämi pwiim kana öüpwe wewengaw fäniten chókewe ra möürüló lón mäló, pwe öüsap letipeta usun ekkewe ekkóch aramas esap wor ar apilükülüköch. 14Pün pwokiten sia lükü pwe Jesus a mäló o manawsäfälitä; iwe, sia pwal lükü pwe lupwen Jesus epwe war, Kot epwe eliwinisäfälieto fiti Jesus chókewe meinisin mi möürüló lón Jesus. 15Pün iei sia apasa ngeni kemi pwisin fän alón ewe Samol, pwe kich ekkana mi chüen manaw o nónnóm lupwen ewe Samol epwe liwinsäfälito, sisap akkomw mwen chókana ra fen möürüló lón mäló. 16Pün pwisin ach Samol epwe feittiw seni läng, fän ew kökköön öllük mi leüommóng, fiti móngüüngün ewe samolun chón läng pwal fiti tikin nöün Kot we rappwa. Iwe, ekkewe mi mäló lón Kraist repwe manawsäfäl akkomw seni peiaser. 17Mwirin, öükich ekkewe mi chüen manaw o nónnóm wón fönüfan sipwe le fitiir le pwisipwisitä ppök lón ekkewe kuchu pwe sipwe chuuri ewe Samol lón ewe längin äsäpwääl. Iwe, epwe iei usun ach sipwe nónnóm fengen me ewe Samol feilfeilló chök. 18Iei minne, öüpwe echipafengeni kemi lefiilemi ren ekkeei kapas.
Ewe ränin ach Samol epwe liwinsäfälito
5Iwe, ämi pwiim kana, öüsap osun äi üpwe mak ngeni kemi fäniten ürüürün ekkewe ótun me ekkewe kinikinin fansoun ekkeei mettóch repwe fisitä. 2Pün pwisin ämi öüwa fen unusen silei pwe ewe ränin ach Samol epwe war lón ew fansoun sisap ösüküsükü, usun chök emön chón soolä lepwin. 3Pün lupwen aramas repwe apasa: “Meinisin a mwirinnö. A wor kinamwe me nónnómöch!” Mwirin chök nge wätten feiengawen taatakis epwe mwittir püngütiw wóór, usun chök emön fefin mi pwoopwo a cheeri an cheuchen faamw. Iwe, resap tongeni süüseni.
4Nge ämi pwiim kana, öüsap oppuroch fäniten ekkeei mettóch, ina pwata öüsap serengaw lupwen ewe ränin ach Samol epwe war usun emön chón soolä, 5pün ämi meinisin ätin lón saram me ätin lerän. Sap öükich aramasen lepwin me chón lekkiroch. 6Iei minne, sipwe mammasafichi, nge sisap möür usun kana ekkóch aramas. Sipwe nómwun tümwünöch o afatafatöchü ach ekiek. 7Pün chókana mi möür ra wisen möür lepwin, pwal chókana mi ünüpwuch ra ünüpwuch lepwin. 8Nge öükich ekkewe chón lerän epwe fatafatöch ach ekiek, sipwe eppeti ngeni inisich lükü me tong pwe ach pisekin eppetin feiengaw lón maun, sipwe pwal eimweimwa ngeni kich ach apilükülük me ewe alen küna manaw pwe ina imwach akkawen maun. 9Pün Kot a filätä pwe epwe amanawa kich lón ach Samol Jesus Kraist, nge sap ren an epwe niinätiw an soong wóóch. 10I a mäló fänitach pwe sipwe tongeni nónnóm ren tori feilfeilló chök, ese lifilifil are kich sia fen möürüló lón mäló ika kich mi chök chüen manaw lón ewe fansoun i epwe liwinsäfälito. 11Iei minne, öüpwe echipafengen kemi lefilemi o älillis fengen le afeffeitäfengeni kemi lefilemi, usun chök minne öüwa fen föfföri.
Pwal ekkoch kapasen öüröür
12Nge äm aia pwal tungór ngeni kemi ämi pwiim kana mi ächengicheng, pwe öüpwe öüchcheani ämi öüpwe suuföliti chókana mi wisen emmweni kemi lón än ewe Samol angang. Iir ra chófó le angang weires leiimi o fönööw kemi ren minne mi mwääl meinisin. 13Öüpwe pwal fókkun esselükaló ämi ekiekin afóneer o öüpwe tonger ren unusen letipemi, fänäsengesin ar angang. Iwe, öüpwe chechchemeni pwe öüpwe manaweni manawen kinamwe fengen lefiilemi. 14Ämi pwiim kana, äm aia peseei kemi, pwe öüpwe fönööw chókana mi chipwang ren ar resap mochen föri wiser. Öüpwe öpöchökkülätä letipen ekkana mi kisikiis letiper. Öüpwe ääni pweteete le tümwünü chókana mi apwangapwang lón ar lükü. Öüpwe mósónóttam ngeni emön me emön. 15Öüpwe föröchüw pwe esap wor emön epwe liwinisäfäli än emön föfför ingaw ngeni pwal föfför ingaw. Nge iteiten fansoun meinisin öüpwe sótuni le föri minne mi mwirinnö ngeni emön me emön lefiilemi me pwal ngeni aramas meinisin.
16Öüpwe pwapwa iteiten fansoun meinisin. 17Öüpwe tupwöl le iótek fóchófóch. 18Ese lifilifil ika meet a fis, öüpwe kilisou iteiten fansoun meinisin, pün iei letipen Kot fänäsengesimi ämi nöün Kraist Jesus.
19Öüsap kunuweló ewe Ngüünmifel. 20Öüsap turunufasei ekkewe kapasen oosuni, 21nge öüpwe etittinafichi ekkewe mettóch meinisin minne ewe kapasen oosuni a apasa. Iwe, öüpwe kömwöchünnüküló wón meet mi mwirinnö. 22Öüpwe atoowawakemiiló seni iteiten sókkun meet mi ngaw meinisin.
Än Paul kapwongen ümöümöch
23Iwe, amwo pwe pwisin ewe Koten kinamwe epwe epinikemiiló lón sókkun lapalap meinisin, amwo pwe unusen ngünümi me letipemi me inisimi repwe tümwün pwe esap wor teriir tori ewe rän lupwen ach we Samol Jesus Kraist epwe waresäfälito. 24Kot, ewe Emön mi kööri kemi a ölükülük, I epwe pwal öpwönüetä ei.
25Ämi pwiim kana mi ächengicheng, öüpwe iótek fänitem. 26Öüpwe kapwong ngeni kana pwiipwi chón lükü meinisin ren ew kapwong lón mitimit mi pin. 27Ngang üwa öllük ngeni kemi lón iten ewe Samol pwe öüpwe älleani ei taropwe ngeni ekkewe pwiipwi chón lükü meinisin.
28Ümöümöchün ach Samol Jesus Kraist epwe nónnóm reemi meinisin. Amen.