1 Peter

Peter a kapwong ngeni ekkewe mi fil meren Kot iir chóisä

1Ei taropwe seniei ngang Peter, emön nöün Jesus Kraist chón künö. Ngang üwa mak ngeni kemi ämi nöün Kot kewe aramas mi fil mi toropasfeil o wasööla lón Pontus, Kalatia, Kapadosia, Asia me Bithynia. 2Ämi ekkewe ewe Kot Saam a fili kemi chök melóóm alóngólóng wón an tüfichin silei mettóch meinisin me mwen ar fis. Iwe, ewe Ngüünmifel a epinikemiiló, iei popun öüwa älleasochis ngeni Jesus Kraist o limelim ren chaan. Amwo epwe somwosomwoló än Kot fang ngeni kemi an ümöümöch me an kinamwe.

Manaw mi fö me feiöch mi iseis lón läng

3Öüsipwe mwareiti ewe Kot me Semen ach Samol Jesus Kraist, pün lón an kirekiröch mi somwosomwoló, I a fang ngeni kich ei feiöch pwe sipwe upsäfäl. Iwe, iei sia manaw lón ach apilükülük, pwokiten än Jesus Kraist manawsäfäl seni mäló. 4Pün Kot a fen iseni och älemwir mi öüchchea fäniten nöün kana. A iseis lón läng fänitemi, esap tongeni epwe taaló, esap limengaw, esap siiwil esap pwal kirouló. 5Iwe, Kot epwe tümwünü kemi lón an manaman tori öüpwe angei unusen ewe manaw ese mwüch, pwokiten öüwa anómwu ämi apilükülük wón I. Ei manaw ese mwüch epwe pwäaló lón ewe ränin sópwólón pwe meinisin repwe küna. 6Iei meet ämi öüpwe fókkun pwapwa ren, inamwo are öüwa letipeta ren sókkopaaten riäfföün sóssót iei lón fansoun mwochomwoch chök, nge mi wor lamwotan ngeni kemi. 7Ekkeei riäfföün sóssót ra tori kemi pwe repwe älelletafichi ämi lükü, pwe repwe pwääraló pwe ämi lükü a pöchökkül o limöch. Ämi lükü a sóssót usun ekkei a sótuni me limeti kolt. Nge ämi lükü a koon öüchchea meren Kot lap seni kolt. Iei popun, are ämi lükü epwe chök pöchökkül mwirin an tolong lón pwichikkaren sóssót; iwe, epwe awarato wätten mwaar me ling me iteüöch lón ewe rän, lupwen Jesus Kraist epwe pwääló ngeni unusen fönüfan. 8I ewe öüwa tongei, nge öüsap mwo küna. Inamwo are öüsap küna I iei, nge öüwa lükü. Iwe, iei mwo nge öüwa fókkun meseik lón sókkun pwapwa mi uren ling sisap tongeni apasatä lón kapas. 9Pün öüpwe küna liwinin ämi lükü, iei ngasalón ngünümi.

10Ekkewe soufós ra atööpanifichi o ekkeiis tichchik usun ei alen ngasaló. Ra oosuni usun ei alen manaw Kot a amollätä fänitemi lón an ümöümöch. 11Ra kükkütafichi ar repwe silei ika meet ewe, ewe Ngünün Kraist mi nóm lóór a kapas usun lupwen a üreniir me mwan usun än Kraist riäfföü me an ling repwe kukuumwirito mwirin. Ra ereki ika epwe ineet are epwe ngeni iö ekkeei mettóch repwe fis. 12Iwe, a pwä ngeniir pwe ekkeei mettóch resap fis lón ótun fansoun ar manaw, nge i repwapw fis chómmóng ier me mwirin, lón ótun fansoun ämi manaw. Iwe, iei ewe poraus allim a esilesil ngeni kemi meren chókana mi afalafala ngeni kemi lón manamanen ewe Ngüünmifel mi ökkünöto seni läng. Ikkeei ekkewe mettóch mi amwaraar ekkewe mwo chón läng nge ra fókkun witiwiti pwe repwe küna ar repwe fis.

Usun pwüngün manawen lefiilach me ewe Kot Sam

13Iei minne, öüpwe amollätä ämi ekiek, öüpwe tipemiriit lón ngünümi o anómwu unusen ämi apilükülük wón ewe ümöümöch epwe tori kemi lupwen Jesus Kraist epwe pwääto. 14Öüpwe älleasochisi Kot, pwokiten ämi nöün. Öüsap liwin säfäliti föfförün ewe manawen mocheniä ämi öüwa manaweni melóóm lón ämi wewengaw. 15Nge iei öüpwe usun ewe Emön mi Pin mi köri kemi. I a pin, iei minne pwal ämi öüpwe pin lón föfförün manawemi meinisin. 16Pün iei meet a mak lón ewe taropwe mi pin: “Öüpwe pin, pün Ngang üwa pin.”a

17Iwe, are öüwa köri ngeni Kot pwe I Sememi lupwen öüwa iótek ngeni, öüpwe chemeni pwe I ewe Emön epwe öpwüngü än emön me emön föfför nge esap lifilifil aramas. Iei popun, öüpwe manaweni manawen nuokkusun menniniti Kot lupwen fansoun ämi nómwun waasöla wón ei fönüfan. 18Pün öüwa silei pwe Kot a möönätiw ew liwinin kepichiló pwe epwe angasa kemi seni ewe manaw mi lamwotongaw öüwa älemwiri seni ämi kewe leewo. Ewe liwinin kepichiló I a möönätiw, esap ekkana mettóch mi tongeni taaló usun silfer ika kolt. 19Nge I a mööni kemi ren ewe chaan Kraist mi öüchchea, i ewe Laamen Kot esap wor an tipis, esap pwal wor terin manawan. 20Kraist a kefilitä fäniten ei popun, seni chök lóóm me mwen än fönüfan esap mwo fis. Nge iei, Kraist a ökkünööto fönüfan lón ekkeei fansoun sópwólón fänäsengesimi, 21ämi chókana öüwa lükü Kot pwokiten Kraist. Iwe, Kot a amanawasäfäli Kraist seni mäló o ngeni I ling mi lapalaap, iei minne öüwa tongeni anómwu ämi lükü me apilükülük lón Kot.

Usun pwüngün manawen lefiilach fengen me pwiich kana chón lükü

22Iwe, a tongeni wenechchar ämi tong fengen lefiilemi ämi pwii kana chón lükü, pwokiten öüwa fen limeti ngünümi ren ämi öüwa älleasochisi minne mi let. Iei popun, öüpwe tümwünüfichi pwe öüpwe esselükaló ämi tong fengen lefiilemi ren unusen limöchün lelukemi, 23pwokiten öüwa fen üpsäfäl, sap seni pwikil mi tongeni taaló, nge i seni ewe pwikil esap tongeni taaló, ren ewe kapasen Kot mi manaw o nónnóm tori feilfeilló chök. 24Pün iei usun minne a mak lón ewe taropwe mi pin:

“Aramas meinisin ra usun fetil. Lingen aramas meinisin ra usun ekkan pöön irä. Ewe fetil a pwaseló, nge ekkewe pöön irä ra mworoló. 25Nge än ewe SAMOL kapas epwe nónnóm tori feilfeilló chök.”a

Ei kapas, iei ewe kapas allim ra afalafala ngeni kemi.

Ewe faaw mi fil me nöün Kot kewe aramas mi fil

2Iei minne, öüpwe pwilitätiw seni kemi sókkun föfför mi ngaw meinisin me föfförün otupwutupw meinisin, pwal ewe sókkun manaw esap pwüng fengen föfför me kapas pwal lólówó me eitengawa aramas. 2Öüpwe usun chök ekkewe monukól mi upwufö ra mwäräräiti ewe chönün oup ren ämi öüpwe mwónneiti ewe milik fäniten ngüün esap nofit ngeni och, iei ewe kapasen Kot, pwe öüpwe tongeni mämmääritä ren lón ewe alen manaw, 3are enletin pwe ämi öüwa fen nenni pwe ewe Samol a mwirinnö.

4Öüpwe feitto ren Kraist, pwokiten I ewe faaw mi manaw, ewe föün lepwokuukun än Kot we imwenfel. I a koturuló meren ekkewe aramas, nge a öüchchea meren Kot ewe mi filätä I. 5Pwal ämi öüwa wewe ngeni faaw mi manaw, Kot a senikemiitä pwe öüpwe ew imwen ngüün fänitan. Pwal ämi nöün Kot souasór mi pin, pwe öüpwe ääni ekkewe asóren ngüün, Kot a etiwa, pwokiten Jesus Kraist.

6Pün iei meet a mak lón ewe taropwe mi pin:

“Nengeni, Ngang üwa isenätiw lón Zion eföw faaw mi kefil, eföw föün lepwokuku mi öüchchea. Iwe iö a lükü I esap fókkun lichippüng ren.”b

7Iei minne, I a öüchchea ngeni kemi ämi kana mi lükü. Nge ngeni chókana resap lükü I,

“I ewe faaw ekkewe chón köwü imw ra pöütaló, nge a fen wiliti ewe föülapen föün lepwokuku.”c

8Iwe, ewe taropwe mi pin a pwal apasa: “I ewe faaw a föri pwe aramas repwe chepetek pwal I ewe achaw epwe föri pwe aramas repwe turuló.”d Aramas ra chepetek ren, pwokiten resap älleasochis ngeni än Kot kapas, usun minne a fen chök köpwüngüló me mwan pwe repwe föri.

9Nge ämi ew mwichen aramas mi fil, ew mwichen souasór mi angang lón imwen ewe King, ämi ew mwüü mi pin, ämi ew mwichen aramas nöün Kot, pwe öüpwe tongeni pwääri ngeni ekkóch usun echchipwörun Kot, I ewe a köörikemiiwu seni lón rochopwak o atolonga kemi lón an saram mi amwaarar. 10“Pün melóóm sap ämi nöün Kot aramas, nge ikenäi öüwa nöün aramas. Melóóm ämi öüsap angei och än Kot ümöümöch, nge ikenäi öüa angei an we ümöümöch.”e

Usun pwüngün lefiilach ngeni fönüfan

11Pwii kana mi ächengicheng, ämi waasöla me chóisä lón ei fönüfan. Iei minne, ngang üwa peseei kemi pwe öüpwe atoowawa seni kemi ekkewe mwocheniän fituk, pwokiten ra fiu ngeni ngünümi. 12Öüpwe tümwünü pwe föfförün manawemi epwe fókkun echchipwör me leiin chón órumi kana Sentail. Pün ika mwo repwe ettipisi mwääli kemi pwe ämi chón föfföringaw, nge lupwen repwe küna föfförün manawemi mi mwirinnö, iwe, repwe lükü o elingaló Kot lón ewe rän I epwe war pwe epwe öpwüngü fönüfan.

Sipwe atolonga kich fän än mwüü nemenem

13Iei minne, fänäsengesin ewe Samol, öüpwe pwisin anómwu kemi fän ekkewe aramas mi wor ar nemenem lón ei fönüfan, ese lifilifil ika i ewe king mi ääni asalapen nemenem. Öüpwe föri ei fänäsengesin ewe Samol. 14Öüpwe älleasochisi ekkewe kepina, pokiten ewe king a ökkünöör pwe repwe öpwüngü chókana mi föri minne mi ngaw, nge repwe mwareiti chókana mi föri minne mi mwirinnö. 15Pün iei letipen Kot pwe ren ämi föri minne mi mwirinnö, öüwa tongeni afanafanalói än ekkewe aramas mi wewemang kapas mi umwes ra apasa usumi. 16Öüpwe manaw usun aramas mi ngas. Nge öüsap aea ämi ngas pwe epwe och pwölüpwöl fäniten ämi föfför mi ngaw. Öüpwe manaw usun nöün Kot amanaw. 17Öüpwe meniniti aramas meinisin. Öüpwe tongei pwiimi kewe chón lükü. Öüpwe nuokkusiti Kot. Öüpwe suuföliti ewe king.

18Ämi kana amanaw, öüpwe anómwu kemi fän än nöümi kana masta nemenem fän unusen mennin, sap chök ngeni ekkewe mi kirekiröch me tipepwetete, nge pwal ngeni ekkewe resap ääni wenechchar. 19Are emön me leiimi a tolong lón riäfföü inamwo ika esap föri och mi mwäl, nge i a ekieki usun Kot o a engngiló fän an letipeta, i a apwapwai letipen Kot. 20Pün epwe meet lamwotan are öüpwe likiitü le engngiló lupwen öüpwe wichiwich ren ämi föfför ese pwüng? Nge lupwen öüwa tolong lón riäfföü fäniten ämi föri minne mi mwirinnö, nge öüwa likiitü le engngiló ngeni, Kot a pwapwa reemi. 21Ei riäfföü pwal iei ew kinikinin meet Kot a kööri kemi ren. Pün Kraist a fen pwal riäfföü fänäsengesimi, o a likiti ngeni kemi och leenien appirü, pwe öüpwe tapweló mwirin lón ipwan.

22“I esap föri mwo och tipis fän ew, esap pwal wor emön epwe rong och chofona epwe toowu seni lón awan.”a

23Lupwen ra ääni kapasen turunufas ngeni, nge I esap pölüweni ngeniir och kapasen turunufas. Lupwen a tolong lón riäfföü, esap apasa och kapas an epwe eniwokkusu emön, pwe a lüküolong manawan lón pöün Kot, ewe mi ääni köpwüng fän wenechchar fansoun meinisin. 24Kraist a pwisin mwärei wón inisin ach kana tipis me wón ewe iräpenges, pwe kich sipwe tongeni mä ngeni tipis o manaw ngeni pwüng. Ämi öüwa fen chikarsäfäl ren kinasan kana. 25Pün melóóm ämi öüwa chök mwälechefeil usun chök siip mi pöütüló. Nge iei öüwa liwinsäfäl ngeni nöümi we Chón Fóól me ewe Chón Masen ngünümi kana.b

Fefin repwe anómwur fän än pwülüer kana nemenem

3Pwal ina chök usun reemi, ämi kana fefin mi pwüpwülü, öüpwe anómwu kemi fän än pwülüemi kana nemenem. Pün ika mwo ekkóch mwän resap mochen etiwa ewe poraus allim, nge a tongeni ekkesiwil manawer ren ämwänifichin pwülüer kewe, inamwo ika kewe fefin resap apasa och ngeniir, 2lupwen ra küna ämi manaweni manawen limöch me mennin. 3Öüsap foutei chök lükün inisimi ren ämi kiniochei möküremi, ika mwärämwär kolt, ika üföüf kana sókkun üüf mi ling. 4Nge öüpwe ofouta ewe mönün letipemi mi mwónóló, ngeni ewe fout esap tongeni epwe móróló, iei ewe manawen tipetekisón me mósónósón, pün iei a fókkun öüchchea me mwen mesen Kot. 5Pün iei ei lapalap ekkewe fiin lóóm mi pin iir mi anómwu ar apilükülük wón Kot ra pwal foutei ngeniir, ren ar anómwur fän än pwülüer kewe nemenem. 6Usun chök Sara a rongosich ngeni Abraham pwülüan we, o a kööri ngeni i an samol. Iwe, ämi öüwa nöün Sara fefin are öüwa föri meet mi mwirinnö o öüsap nuokkus ren och mettóch mi eniwokkus.

Ew kapas ngeni ekkewe mwän mi pwüpwülü

7Iwe pwal ina chök usumi ämi kana mwän mi pwüpwülü. Öüpwe nóm fengen me pwülüwemi kana lón ämi weweöch pün inisiir a apwangapwang. Öüpwe pwääraló ämi öüchcheaniir pün iir chiechiemi le älemwiri än Kot we liffangen ümöümöchün manaw. Öüpwe föri ei pwe esap wor och epwe eppeti ämi iótek.

Usun pwüngün manawach lón riäfföü

8Iwe, sópwólón, ämi meinisin, öüpwe ääni ew chök ekiek, öüpwe fiti ekkóch lón ar riäfföü, öüpwe tong fengen lefiilemi lón ewe tongen pwiipwi, öüpwe tipepwetete, öüpwe tipetekisón lón ämi ekiek. 9Öüsap liwini ngaw ngeni ngaw. Öüsap ääni kapas pöchökkül lupwen aramas ra apasa kapas mi ngaw usumi. Nge öüpwe fen ääni kapas mi mwirinnö, pün öüwa silei pwe iei meet Kot a mochen pwe öüpwe föri. Iwe, i epwe efeiöchü kemi fänitan.

10Pün ewe taropwe mi pin a apasa:

“Iö a mochen manaw o efich an epwe küna rän mi mwirinnö, epwe öükätiw chöön mwöngön seni kapas mi ngaw me pwal tinnawan seni kapas chofona. 11Epwe kul seni minne mi ngaw, nge epwe föri minne mi mwirinnö. Epwe kütta o tapweri an epwe kinamwe ngeni ekkóch. 12Pün mesen ewe SAMOL a nennengeni ekkewe chón föri minne mi pwüng, selingan a suuk ngeni ar iótek. Nge I a üüngeni chókana mi föfföringaw.”a

13Iwe, iö epwe mochen efeiengawa kemi are ämi öüwa chón föri meet mi mwirinnö? 14Nge ika mwo öüpwe tolong lón riäfföü ren ämi föri meet mi pwüng, iwe, öüwa feiöch, pün Kot epwe ngeni kemi liwinimi. Iei minne, öüsap nuokkusiti än aramas eniwokkusu kemi, öüsap pwal lólilen ren.b 15Nge öüpwe fókkun fel ngeni Kraist pwe I Samolun manawemi. Iwe, are emön epwe eisini kemi popun ewe apilükülük mi nónnóm lóómi; öüpwe mollotä ämi öüpwe pölüweni fän mósónósón me menin. 16Öüpwe tümwünüfichi limöchün mwelien letipemi pwe öüsap mengiringir ren öch lupwen repwe eitangawa kemi pwe ämi chón föfföringaw, pün chókana mi kapas mi ngaw fäniten ämi föfför mi mwirinnö repwe sääw, pwokiten ämi nöün Kraist. 17Öüpwe chechchemeni pwe mi fen mwirinnnö, are iei fän letipen Kot, pwe öüpwe tolong lón riäfföü fäniten ämi föfför mwirinnö lap seni ämi öüpwe riäfföü fäniten ämi föfför ingaw. 18Pün pwal pwisin Kraist a riäfföü lupwen a mäló fän iten ach kana tipis (fókkun fän ew chök, nge fäniten fansoun meinisin). I ewe chón pwüng nge a mäló fänitach öükich ekkewe chón pwüngingaw, pwe I epwe tongeni uweikicheto ren Kot. Iwe, inamwo ika inisin a mäló, nge i a manaw lón ewe ngüün. 19Iwe, I a feilló lón ngünün o afalafal ngeni ekkewe ngüün mi nóm lón föötek, 20pwokiten resap älleasochis melóóm, lupwen än Kot a engngiló le witiwit lón ekkewe rän Noah a faleei ewe waaimw. Iei ewe waaimw ekkóch chók aramas ra nóm lón, fókkun walümön chök, o ra küna manaw ren ar resap kokotiw lón ewe löölö mi eniwokkus. 21Iwe, ei a eliosunätä papatais mi amanawa kich iei, esap och angangen limetaló limengaw seni inis, nge i iei och tungór ngeni Kot fäniten ew mwelien letip mi mwirinnö ren manamanen än Jesus Kraist manawsäfäl. 22Iwe, Kraist a fen feilló o tolong läng o nóm peliifichin Kot. Iwe, ekkewe chón läng me ekkewe ngüün mi wor ar nemenem me manaman ra chappetiw me mwan.

4Iwe, pwokiten Kraist a riäfföü lón inisin fänitach, iei minne, ämi öüpwe mollotä lón ämi ekiek pwe öüpwe pwal ääni ewe chök sókkun ekiek Kraist a ääni o mollotä pwe pwal ämi öüpwe riäfföü. Pün iö a riäfföü inisin, a ükütiw seni tipis. 2Pün lón lussun ränin manawan esap chüen manaw fäniten mocheniän fituk mi ingaw, nge i fäniten letipen Kot. 3Pün lón ewe fansoun a ló, a naaf ämi fansoun öüwa olussaló le föri meet ekkewe Sentail ra mochen föri, lupwen öüwa manaw lón ewe manawen fangesöröün pwapwan fituk, mocheniä, ünüpwuch, fiti mwichen pwörüküngaw, fiti mwichen ünüsakaw me angangen fel ngeni önümwäl mi enniopwut. 4Chiechiemi kewe melóóm ra fókkun nenneiruk lupwen öüsap chüen chiechi ngeniir lón ekkewe mettóch mi ngaw ra föri. Iwe, ra apasa kapas mi ngaw usumi. 5Nge öüpwe chechchemeni pwe ina repwap pwisin nennefengen me Kot o repwap pwisin tichchik le pwärätä ar kana föfför ngeni ewe Emön mi mollotä pwe epwe öpwüngü ekkewe mi manaw me ekkewe mi mäló. 6Pün iei popun ewe poraus allim a fen arong ngeni chokewe ra rong o lükü nge ra mäló, pün inamwo are ra köpwüng lón inisir usun aramas, nge ra tongeni manaw lón ewe ngüün alóngólóng wón letipen Kot.

Angang fäniten lingen Kot

7Sópwólón mettóch meinisin a arapoto. Iei minne, öüpwe affata öchüw ämi ekiek o tipeppós lón ämi iótek. 8Nge koon lapalón seni meinisin, öüpwe sópweló le öttüres lón ämi tong fengen lefiilemi, pün “tong a pwölüeló chómmóng tipis”c 9Öüpwe pwapwa le etiwetiwöch fengen lefiilemi, nge öüsap tunopwen ren. 10Kot a fang an kewe liffang ngeni emön me emön leiimi seni an kewe mesemesekisin liffangen ngüün. Iei minne, öüpwe aea en me pwisin liffangan le angang fengen lefiilemi, pwe ämi öüwa chón souwaan mi mwirinnö fäniten än Kot kewe ümöümöch mi sókósókpaat. 11Ifa usun, en ka kö pwe kopwe emön chón kapas? Iwe, kopwe kapas, usun chök nge Kot a kapas me reemw. Ifa usun, en ka kö pwe kopwe chón älisi ekkóch? Iwe, kopwe föri ren unusen ewe pöchökkül me tüfich Kot a awora ngenuk. Mwirin, Kot epwe lingeló lón mettóch meinisin ren Jesus Kraist. A pwüng ngeni pwe an chök ling me manaman meinisin esap mwüchüló tori feilfeilló chök. Amen.

Riäfföü fäniten lingen Kot

12Ämi chiechiei kana mi ächengicheng, öüsap nenneirukäsini pwichikkaren ewe sóssótun riäfföü öüwa tolong lón, an epwe usun itä nge och mettóch mi sókkóló e kärään fis ngeni kemi. 13Nge öüpwe sópweló le pwapwa lón ena öüküükün riäfföü öüwa nóm lón, pwokiten ekkeei riäfföü ra föri pwe öüwa chiechien Kraist lón an kewe riäfföü. Iwe, mwirin, epwe pwal wor ämi pwapwa mi fókkun somwosomwoló lupwen öüpwe fiti I lón an ling lupwen epwe pwääló ngeni unusen fönüfan. 14Are öüwa küna turunufas fänäsengesin iten Kraist; iwe, öüwa feiöch, pün ewe Ngünün ling me Ngünün Kot a so wóómi. Kraist a turunufas mereer, nge meremi I a lingeló. 15Nge öüpwe tümwünü pwe esap wor emön me leiimi epwe tolong lón riäfföü fäniten an i emön chón niieló aramas, ika emön chón soolä, ika emön chón föfför ingaw ika emön chón etileepat le angelong lón än pwal ekkóch aramas föfför. 16Iwe, nge ika pwe emön epwe riäfföü pwokiten i emön chiechien Kraist; iwe, esap sääw ren, nge epwe elingaló Kot, pwokiten a föw wón itan mi amwaarar. 17Pün a fen tori ewe fansoun köpwüng, nge epwe fókkun poputä me leiin nöün Kot kana. Iwe, are ewe köpwüng epwe akkomw le poputä me wóóch, iwe, epwe fen ifä me efeiengawen ewe köpwüng mi souni chókana resap lükü än Kot we porausen manaw? 18Pün iei meet a mak lón ewe taropwe mi pin:

“Ika mi weires än emön chón pwüng epwe küna manaw; iwe, meet epwe fen fis ngeni ekkewe resap meniniti Kot me chón tipis?”a

19Iei minne, chókana mi tolong lón riäfföü pwokiten iei fän letipen Kot ngeniir, repwe sópweló le föri meet mi pwüng o lüküwelong manawer ngeni Kot, ewe Chón Föriir, pün I esap fókkun tümwününgaw ngeniir.

Ekkewe souakkomwen mwichefel repwe wiisen chón fóóleni nöün Kot kewe pwiin siip

5Iwe, iei ngang üwa kapas ngeni ekkewe souakkomw me leiimi lón ekkewe mwichefel. Ngang pwal emön chienemi souakkomw me emön chón pwärätä än Kraist riäfföü. Pwal ngang emön üpwe fiti I lón an ling me itetekia lupwen i epwe liwinsäfälito. Iwe, pwokiten ngang emön chiechiemi souakkomw, iei minne, iei äi tungór ngeni kemi: 2Öüpwe chón fóóleni nöün Kot we pwiin siip I a lüküelong fän ämi tümwün. Öüpwe etenekiir pün ämi chón wiisen tümwünür le nennengeniir, sapw fän echchimw nge i pwokiten öüwa mochen seni letipemi, pün ina meet Kot a mochen pwe öüpwe föri. Esap fäniten ämi tipemmóngun mooni, nge i seni fän mwasangasangen ämi mochen. 3Öüsap pwal nemenemengaw ngeni chókana mi nóm fän ämi tümwün, nge i öüpwe fen leenien appirü ngeni ewe pwiin siip. 4Iwe, lupwen ewe Meilapen Chón Fóól epwe pwääto, öüpwe angei ewe mwärämwär mi ling esap fókkun tongeni epwe eioloololó pwe ina liwinimi.

Sipwe atolonga kich fän än Kot nemenem o üüngeni devil, ewe souotuttur

5Iwe, pwal ina chök usun reemi, ämi ekkana ölüwöl, öüpwe pwisin anómwu kemi fän än ekkewe mi lap ierir seni kemi nemenem. Ewer, ämi meinisin öüpwe öüföüfa ngeni kemi tipetekisón o angang fengen lefiilemi, pün a mak lón ewe taropwe mi pin:

“Kot a üüngeni chón lamalamtekia kana, nge a fang an ümöümöch ngeni ekkewe chón tipetekisón”b

6Iei minne, öüpwe pwisin etekisónakemiitiw fän pöün Kot mi manaman, pwe I epwe etekiakemiitä lón fansoun mi fich ngeni. 7Öüpwe oturätä wón Kot ämi öürek me lólilen meinisin, pün I a ekieki usun meet mi fis ngeni kemi.

8Öüpwe affataöchüw ämi ekiek o tümwünöch, pün devil ewe souotuttur i ewe chón oputakemi a fätälfeil usun emön laion mi wörüwör, a küttafeili iö i epwe oromaló. 9Öüpwe üppós le üüngeni i, öüpwe nüküchchar lón ämi lükü, pün öüwa silei pwe pwiimi kana chón lükü lón unusen fönüfan ra tolong lón ekkeei chök pwal sókkun riäfföü ämi öüwa tolong lón.

10Nge mwirin ämi tolong lón riäfföü lón chök fansoun mwochomwooch, ewe Kot mi ääni ümöümöch meinisin, I ewe mi kööri kich ngeni än ling ese mwüch ren Kraist Jesus, epwe pwisin ounusaöchchü kemi, önüküchara kemi, öpöchökküla kemi o anómwu kemi wón ew lóngólóng mi nnük. 11An chök ling me nemenem esap mwüch tori feilfeilló chök. Amen.

Än Peter kapwongen kósópw lón kinamwe

12Silvanus ewe a makkei ngeniei neii ei taropwe ngeni kemi, i ätewe ngang üwa ekieki pwe i emön pwiich mi ölükülük. Popun äi makkei neii ei taropwe mi chök mwochomwooch masowan, pün ngang üwa mochen öpöchökkülätä letipemi o älleta ngeni kemi pwe än Kot ümöümöch a nónnóm reemi, ese lifilifil ika meet mi fis. Öüpwe üppós lón!

13Neminewe mi nóm ikeei lón Babylon, pwal i emön mi fil usun chök ämi, a tiinawow an kapwong ngeni kemi. Neii ei mwän Mark a pwal tiinawow an kapwong ngeni kemi. 14Öüpwe pwisin kapwong fengen lefiilemi ren ewe mitimitin tong.

Kinamwe ngeni kemi ämi meinisin mi nóm lón Kraist Jesus. Amen.