1 Korint

Paul a kapwong ngeni ekkewe chón lükü lón Korint

1Ei taropwe seniei ngang Paul pwal seni pwiich ei Sosthenes. Ngang üwa kö fän letipen Kot pwe üpwe emön nöün Jesus Kraist soukünö.

2Äm aia kapwong ngeni än Kot we mwichefel lón Korint, ämi chókana mi kö meren Kot pwe ämi öüpwe nöün aramas mi pin. I a epini kemi lón Kraist Jesus, usun chök minne I a föri ngeni kana souleng meinisin ekis meinisin, iir chókana mi köri iten Jesus Kraist, ach Samol me ar.

3Ümöümöch me kinamwe seni Samach Kot me ewe Samol Jesus Kraist repwe nónnóm reemi.

Paul a kilisou ngeni Kot ren än ekkewe chón lükü liffangen tüfichin ngüün

4Ngang üwa kilisou ngeni äi Kot fansoun meinisin fänäsengesimi fäniten an we ümöümöch I a fang ngeni kemi pün iei ämi öüwa nöün Kraist Jesus. 5Pün ren ämi öüwa nöün Kraist, Kot a awöwü kemi lón mettóch meinisin ren tüfichin kapas meinisin me sókkopaaten tüfichin silelap meinisin. 6Ei a önüküchchara me lón manawemi pwe meet ngang üwa apasa usun Kraist a let. 7Iei minne, öüsap osun och leiin ekkewe liffangen ngüün, nge öüwa chök ösüküsükü le witiwiti liwinsäfälin ach Samol Jesus Kraist. 8I epwe pwal önüküchchara kemi tori sópwólón, pwe esap wor tikingawemi lón ewe rän mi lapalaap lupwen I, ach Samol Jesus Kraist epwe liwinsäfälito. 9Kot a ölükülük pwe epwe föri ei fänitemi, pün I a föri meet I a apasa. Iwe, I ewe a kööri kemi pwe öüpwe chiechi ngeni Nöün we, Jesus Kraist ach Samol.

A tipis kinikinfesen lón mwichefel

10Ämi pwii kana, ngang üwa tungór ngeni kemi lón iten ach we Samol Jesus Kraist, pwe öüpwe ükütiw le äniini fengen lefiilemi. Ämi meinisin öüpwe tipeew fengen lón minne öüwa ääni kapas, pwe esap wor kinikinfesen lefiilemi lón ewe mwichefel. Ngang üwa tungór ngeni kemi pwe öüpwe unusen seleti le ochufengeni kemi pwe öüpwe ääni ew chök ekiek me ew chök tiip lón minne öüwa öpwüngaló lefiilemi. 11Pün mi wor ekkóch aramas seni chón leimwen Kloe ra fen esile ngeniei usumi, pwe a wor äniini fengen lefiilemi ämi pwii kana mi ächengicheng. 12Iei meet wewen äi apasa pwe mi wor äniinifengen lefiilemi. Pün iei meet emön me emön leiimi a apasa. Emön a apasa: “Ngang emön chón tapweló mwirin Paul,” nge pwal emön a apasa: “Ngang üwa tapweló mwirin Apollos,” nge pwal emön a apasa: “Ngang üwa tapweló mwirin Kefas,” nge pwal emön a apasa: “Ngang üwa tapweló chök mwirin Kraist.”

13Ifa usun, Kraist a tongeni kinikinfesen? Ifa usun, ngang Paul üwa iräpenges fänitemi? Ifa usun, mi wor me leiimi ra papatais lón iten Paul? 14Ngang üwa kilisou ngeni Kot pwe üsap papataisi emön me leiimi, chiilón chök Krispus me Kaios, 15pwe iei esap wor emön a tongeni apasa pwe i a papatais lón itei. 16Ewer, ngang üwa pwal papataisi chón leimwen Stefanas. Nge me lükün ei, üsap silei ika üwa papataisi pwal ekkóch. 17Pün Kraist esap ökkünöwei pwe üpwe papataisi aramas, nge a ökkünöwei pwe üpwe afalafala ewe poraus allim, sap lón tipächchemen än aramas kapas, pün üwa nuokkus are epwe kisiló manamanen ewe iräpengesin Kraist.

Kraist I ewe manamanen me tipächchemen Kot

18Pün ngang üwa fókkun silefichi pwe afalafalen ewe iräpenges a och kapas mi umwes meren chókana mi fätäl ngeni ar repwe määfeiengaw, nge öükich ekkewe mi küna manaw, sia silleni pwe ei afalafal, iei wesewesen ewe manamanen Kot. 19Pün iei usun meet a mak lón ewe taropwe mi pin: “Ngang üpwe ataeló tipächchemen ekkewe mi tipächchem o äwesi silelapen ekkewe mi silelap.”a

20Iwe, ifa i ena aramas mi tipachchem? Ifa i ena mi silelap? Ifa i ena souääk mi angangöch le wiipinepin lón poraus lón ei fansoun? Kot a föri pwe iir meinisin ra usun chök mi umwes o a pwääraló pwe ar tipächchem a lamwotongaw. 21Pün iei usun minne Kot a akkóóta lón an tipächchem pwe aramasen fönüfan resap tongeni silei I ren tipächchemen fönüfan. Nge Kot a pwapwa ren an epwe aea afalafalen ewe kapas ekkóch ra eita ngeni pwe mi umwes pwe epwe amanawa chókewe meinisin mi lükü. 22Pün ekkewe chón Sus ra mochen repwe küna och esissil mi fiti manaman seni läng, nge ekkewe chón Kriik ra kütta tipächchem, 23nge äm aia afalafala Kraist a iräpenges, iei och minen chepetek ngeni ekkewe chón Sus nge a umwes meren ekkewe Sentail. 24Nge ngeni chókana mi kö meren Kot pwe repwe küna manaw, chón Sus ppök me Sentail, Kraist I ewe manamanen Kot mi lapalaap me ewe tipächchemen Kot mi amwaraar. 25Pwokiten ika mwo pwe itä mi tüfich pwe Kot epwe umwes, nge an umwes a tipächchem seni tipächchemen aramas, pwal ika mwo mwo pwe itä Kot epwe apwangapwang, nge an apwangapwang a pöchökkül seni pöchökkülen aramas.

Eingeing wón ewe Samol chök

26Öüpwe chechchemeni usumi lupwen Kot a kööri kem ämi pwii kana. Pün sap chómmóng chón tipächchem lón tipächchemen ei fönüfan, sap chómmóng mi wor maneer, sap pwal chómmóng mi upwutekiai ra fil meren Kot. 27Nge Kot a fen filätä minne chón fönüfan ra ekieki pwe ra umwes pwe epwe äsääwa chókewe mi ekieki pwe ra tipächchem. Kot a pwal filätä chókana mi apwangapwang me fönüfan pwe epwe äsääwa chókana mi pöchökkül. 28Kot a filätä minne esap wor öüchchear meren fönüfan, a pwal filätä ekkewe esap wor ällear pwe epwe nöünöü iir le ataeló minne fönüfan a ekieki pwe mi öüchchea, 29pün esap wor emön aramas epwe tongeni eingeing me fän mesen Kot. 30Nge Kot chök ewe a föri pwe epwe tüfich ngeni kemi pwe öüpwe nóm lón Kraist Jesus. I ewe a wiliti pwe ach tipächchem meren Kot, pwal I ach pwüng me ach pin me ach ngas seni tipis. 31Pün iei usun minne a mak lón ewe taropwe mi pin: “Iö a mochen epwe eingeing, epwe chök eingeing wón meet ewe Samol a fen föri.”a

Minne Paul a aronga usun: än Kraist iräpenges

2Iwe, ämi pwii kana mi ächengicheng, lupwen ngang üwa äkkäewin feitto reemi, ngang usap feitto fän äi angangöch le kapas ika fän tipächchem mi tekia, lupwen üwa aronga ngeni kemi än Kot we kapasen pwärätä. 2Pün ngang üwa fisetä seni lón letipei pwe usap silei och mettóch me leiimi me lükün chök Jesus Kraist me an mäló wón iräpenges. 3Ngang üwa nóm reemi lón äi apwangapwang, lón äi nuokkus pwal lón wätten äi chechchech. 4Iwe, äi kapas me äi afalafal resap fiti angangen pesepes lón sókkun än aramas kapasen tipächchem, pwe lón mwökütükütun ewe Ngüünmifel me manaman. 5Ngang üwa föri ei pwe ämi lükü esap lóngólóng wón än aramas tipächchem pwe wón än Kot manaman.

Än Kot tipächchem fäniten chök chókana ewe Ngüünmifel a nóm lóór

6Nge lupwen ngang üwa nóm leiin ekkana souleng mi mwokos lón ar lükü, üwa kapas lón kapasen tipächchem, nge sap chök ewe sókkun tipächchemen lón ei fönüfan, sap pwal ewe sókkun tipachchem mi pop seni ekkewe chón nemenem lón ei fönüfan, ar nemenem epwe wesiló. 7Nge ei tipächchem sia kapas usun iei än Kot we tipächchem mi mwónómwón mi mwónóló seni chök lón ekkewe fansoun lóóm, ina mwo ika I a fen amollätä chök melóóm fäniten ach ling me mwen än fönüfan esap mwo fis. 8Iei ewe tipächchem esap wor emön leiin ekkewe samol mi wor ar nemenem lón ei fönüfan resap silei, pün are repwe silei; iwe, resap iräpengesi ach we Samol mi ling. 9Nge usun a mak lón ewe taropwe mi pin: “Esap wor mwo mesen emön aramas a küna, esap wor mwo selingen emön a rong, esap pwal wor mwo letipen emön aramas a ekieki usun ekkewe mettóch Kot a fen amollätä fäniten chókana mi tongei I.”b 10Nge kich sia silei ekkeei mettóch, pün Kot a fen pwääriir ngeni kich meren Ngünün we.

Pün ewe Ngüün a tichchik le atööpaani mettóch meinisin o pwääri ngeni kich än Kot kewe mwónómwón mi alóllóól. 11Pün esap wor emön a tongeni silei meet pwal emön aramas a ekeiki, chiilón chök pwisin ngünün ewe aramas mi nóm lón a silei. Iwe, ina chök pwal usun, pün esap wor emön a silei än Kot ekiek, chiilón chök pwisin ewe Ngünün Kot a silei. 12Iwe, Kot a wesewesen ngeni kich Ngünün we, nge sap ewe ngünün fönüfan, iei popun sia tongeni silei ekkewe mettóch mi amwaraar Kot a fen fangefateto ngeni kich. 13Lupwen äm aia afalafala ngeni kemi usun ekkeei mettóch, äm aisap nöünöü kana kapas äitien än aramas tipächchem. Äm aia apasa ekkewe kapas ewe Ngüünmifel a äiti ngeni keem, äm aia nöün än ewe Ngüünmifel kapas le äwewei ekkewe kapasen ngüün mi let. 14Nge ewe aramas esap nóm ewe Ngünün Kot lón i esap tongeni epwe etiwa ekkewe kapas mi let mi feitto seni ewe Ngünün Kot, pün repwe chök ekkóch mettóchun umwes meren. Esap pwal tongeni weweitir, pwokiten chókana chök mi ääni ewe Ngüün ra tongeni weweiti meet wewen än ewe Ngüün kapas. 15Öükich ekkewe mi ääni ewe Ngüün sia weweiti ekkeei mettóch, nge ekkóch resap tongeni weweiti kich. 16Pün “iö a tongeni silei än ewe SAMOL ekiek pwe epwe öüröüra I?”a Nge kich sia weweiti ekkeei mettóch, pün sia ääni än Kraist ekiek.

Kinikinfesen iei manawen fituk

3 Iwe, ämi pwii kana, lupwen ngang üwa nóm reemi, ngang üsap tongeni üpwe kapas ngeni kemi usun äi üpwe kapas ngeni ekkana aramas mi nóm fän nemenien ewe Ngüünmifel, nge ngang üwa kapas ngeni kemi usun nge ämi kana aramas mi nóm fän nemenien fituk, ika usun nge ämi kana monukól lón manawen ar souleng. 2Ngang üwa öünnü kemi milik, nge üsap amwöngö kemi mwöngö mi pöchökkül, pün öüsap mwo pwääk ngeni och mettóch mi pöchökkül. Pwal iei mwo nge öüsap pwal pwääk ngeni, 3pwokiten ämi öüwa chüen nóm fän nemenien fituk. Pün lupwen a wor lólówó fengen me äniini me apaap fengen lefiilemi, ifa usun, esap pwääló pwe ämi öüwa chüen nóm fän nemenien fituk? Ämi öüwa sókkuni sókkun ekkana aramas resap mwo lükü ewe Samol? 4Pün are emön a apasa “Ngang emön chón tapweló mwirin Paul,” nge pwal emön a apasa, “Ngang üwa efich Apollos,” ifa usun, öüsap sókkuni sókkun chókana mi nóm fän nemenien fituk?

Usun ei angang: Atüütü, Angang, Ämäära

5Pün iöön Paul, nge iöön Apollos, pwe repwe popuw ei sókkun äniini fengen lefiilemi? Esap iir chök ekkewe chón atamatam, iir ekkewe Kot a föri pwe öüpwe lükü Kraist reer? Emön me emön leiim aia en me föri ewe angang ewe Samol a ewisa ngeni keem. 6Ngang üwa wisen fótukatiw ewe pwikil lón letipemi, Apollos a wisen chón atüütüw, nge Kot, sap äm, ewe a wisen föri pwe ewe pwikil epwe mämmääritä. 7Esap wor öüchchean ewe chón fótukätiw, esap pwal wor öüchchean ewe chón atüütü, nge Kot chök a wor öüchchean, pwokiten I ewe Emön a föri pwe ewe pwikil epwe määritä. 8Iwe, ewe chón fótukätiw me ewe chón atüütü ra chök löllöfengen, pün ra chök angang fengen ren ew chök popun. Nge emön me emön leiir epwe angei pwisin liwinin, alóngólóng wón än emön me emön leiir angang weires. 9Äm aia angang fengen pün äm chiechi, nöün Kot chón angang. Ämi tännipiin Kot, pwal ämi imwen Kot.

10Pwokiten än Kot we ümöümöch I a fang ngeniei, ngang üwa föri ewe lóngólóng usun emön soukköwü imw mi silelap. Iwe, iei ekkóch ra köüütä wón ei lóngólóng. Nge emön me emön epwe fókkun tümwünüfichi usun lapalapen an köüütä wón ei lóngólóng. 11Pün esap wor emön epwe förätä pwal ew lóngólóng me lükün ewe a fen föörütä, ei lóngólóng iei I Jesus Kraist. 12Iwe, ika emön epwe köüütä wón ewe lóngólóng nge epwe aea och leiin kolt, silifer, faaw öüchchea, mwüüch, fetilippwas ika waasen irän wiit, 13än emön me emön angang epwapw pwääpwäló, pün ewe Ränin köpwüng epwapw pwäräló usun, pwokiten ekkei epwe affata le pwääraló meet sókkun angang emön me emön chón köwü a föri. Än emön me emön angang epwe tolong lón ekkei pwe epwe wisen asóssóta ika mi chüen nómwetiw öüchchean. 14Are ewe angang mi köüütä wón ei lóngólóng epwe chök nóm nge esap kareló, ewe chón köwü epwe angei ew liiwin. 15Nge are ewe angang a kareló, epwe wätte än ewe chón köwü luus. Ewe chón köwü chök wón inisin epwe küna manaw, nge epwe usun chök emön aramas mi süüwu seni lón och ekkei mi ngetenget.

16Ifa usun, öüsap silei pwe ämi meinisin än Kot imwenfel, nge Ngünün Kot a nónnóm lóómi? 17Kot epwe awarato feiengaw wón emön mi elimengawa an ei imwenfel. Pün än Kot ei imwenfel a pin. Iwe, ämi ekkana chón lükü, ämi ena imwenfel.

Öüpwe sü seni tipächchemen fönüfan

18Öüpwe ükütiw le pwisin otupwu kemi. Ika emön me leiimi a ekieki pwe i a tipächchem ren öüküükün tipächchemen lón ei fönüfan; iwe, epwe wiliti emön mi umwes pwe epwe tongeni wiliti emön mi tipächchem ren än Kot öüküük. 19Pün tipachchemen ei fönüfan a umwes me ren Kot. Pün a mak lón ewe taropwe mi pin: “Kot a liäpeni chókewe mi ekieki pwe ra tipächchem lón pwisin ar tipächchem soolä.”a 20Pwal och: “Ewe SAMOL a silei än ekkewe chón tipächchem ekiek pwe ra lamwotongngaw.”b 21Iei minne, esap wor emön epwe eingeing wón aramas. Pün mettóch meinisin ämi. 22Ese lifilifil ika Paul are Apollos are Kefas, are unusen ei fönüfan are manaw are mäló are ekkewe mettóchun lón ei fansoun are ekkewe mettóch repwe feitto, mettóch meinisin ämi. 23Iwe ämi öüwa än Kraist, nge Kraist än Kot.

Ekkewe chón angang: iir chón tümwünü än Kot kewe mwónómwón

4Epwe iei usun än emön me emön leiimi meinisin öüpwe ekieki ngeni Apollos me ngang pwe äm chók nöün Kraist chón angang me chón tütümwünü än Kot kewe mwónómwón. 2Iwe, nge mi öüchchea ngeni ekkana chón tümwünü pisekin ar masta pwe repwe fókkun ölükülük. 3Nge ifa usi, ngang emön mi ölükülük? Merei esap koon öüchchea meet ämi öüwa ekieki usun pwüngün nónnómwun manawei ika pwal meet ekkóch aramas ra ekieki. Pün fen pwal pwisin ngang mwo nge üsap tongeni äi üpwe pwisin öpwüngaló pwüngün nónnómwun manawei. 4Ngang üsap meefi pwe mi wor och mi mwääl lón manawei, nge sap wewen pwe esap wor äi mwääl, pwokiten äi üwa pwisin öpwüngaló. Nge ewe Samol chök I epwe tongeni etittina manawei o öpwüngaló pwüngün manawei. 5Iei minne, öüsap wisen filätä pwüngülón are emön a ölükülük ika esap, me mwen ewe fansoun ewe Samol epwe liwinsäfälito. Pün lupwen ewe Samol epwe war, I epwe uwato lón saram ekkewe mettóch mi mwónóló lón rochopwak o epwe pwääraló ekimwónómwónen letipen aramas. Mwirin, Kot epwap ngeni emön me emön meet sókkun iteüöch a fich ngeni pwe epwe angei.

Ekkewe chón künö ra wiliti chón umwes fäniten Kraist

6Iwe, ämi pwii kana, ngang üwa pwisin ääni keem äwewe me Apollos fänäsengesimi ren meet ngang üwa apasa, pwe öüpwe käeö seni keem ämi öüsap esselükaló minne öüwa ekieki fäniten nöün Kot kana chón angang seni meet mi makketiw lón ekkewe taropwe mi pin. Mwirin, esap wor emön leiimi epwe eingeing usun emön nge angngawa pwal emön. 7Pün iö a filätä pwe en ka sókkóló o mwirinnö seni ekkewe ekkóch? Meet a wor reemw nge kosap angei meren emön, Nge are minne a wor reemw en ka angei meren emön, pwata chök en ka eingeing wón usun chök nge itä kosap angei meren emön, pwe pwisin efisiom wón winikaapom?

8Ämi öüwa ekieki pwe a wor reemi meinisin minne öüwa mochen. Öüwa fen pisekisekiló. Öüwa fen nemenem usun kana king nge aisap fiti kemi. Iwe, üwa äneän pwe amwo pwüngün pwe öüwa nemenem pwe aipwe pwal fiti kemi le nemenem. 9Nge fän ekkóch, ngang üwa ekieki pwe Kot a pwäärikeemiló äm ekkewe chón künö pwe aipwe usun ekkana chón ooló lón maun mi nóm mwirichikin än ekkewe chón wiil lón maun tettel a fen köpwüngüló pwe repwe mäló. Pün äm aia fisitiw pwe äm leenien ämecheichó ngeni unusen fönüfan - ngeni aramas me chón läng. 10Äm äia wiliti chón umwes ren äm achoocho fäniten Kraist, nge ämi öüwa chón tipächchem lón Kraist. Äm aia apwangapwang, nge ämi öüwa pöchökkül. Ämi öüwa iteüöch, nge aramas ra takiri keem. 11Tori ei fansoun, äm aia echik me kaaka, esap naaf üfeem pwe aipwe pwichikkar, äm aia engngiló fän chómmóng wichiwich, o esap wor pwükütän imweem. 12Äm aia pekkus le angang weires ren pwisin pöüüm pwe epwe wor minne aipwe manaw seni. Äm aia efeiöchüw chókana mi otteki keem. Äm aia mósónóttam ngeni chókana mi eriäfföwü keem. 13Lupwen aramas ra apasa kapas mi ngaw fäniteem, aia chök pölüweni lón pweteete. Tori ei fansoun, a fisitiw pwe äm kääpichin ei fönüfan, äm än aramas leenien koturuló mettóch mi limengaw.

Än Paul tümwün usun nge i emön saam

14Ngang üsap makkei ekkeei mettóch ren äi üpwe äsääwa kemi, nge üwa mochen üpwe fönöw kemi, pwokiten ämi neii mi ächengicheng. 15Pün ika mwo epwe wor engol ngöröw nöümi chón öüröüra kemi lón Kraist, nge mi wor emön chök sememi lón ngüün. Pün ngang üwa wiliti sememi lón Kraist lupwen ngang üwa afalafala ewe poraus allim ngeni kemi. 16Iei popun, ngang üwa tungórei kemi pwe öüpwe öppirüwei o föri usun minne ngang üwa föri. 17Ina popun ngang üwa tiinawow Timothy reemi, pwe i epwe älisi kemi ämi öüpwe föri ei. Pün i neii mi ächengicheng me ölükülük lón ewe Samol. I epwe ächchema ngeni kemi meet ngang üwa afalafala usun Kraist Jesus lón ekkewe mwichefel meinisin ekis meinisin ia ngang üwa feilló ie.

18Ngang üwa silei pwe ekkóch leiimi ra sikesik, pün merer pwe üsap chüen liwinsäfäliwow reemi. 19Nge epwe ekiseló chök, iwe, üpwe feilló reemi, are fän letipen ewe Samol. Mwirin, ngang üpwe pii are ekkewe aramas mi sikesik ra chök tunosikesik ika pwüngün pwe a wesewesen wor reer än Kot manaman. 20Pün mwüün Kot esap chök pwä lón kapas, nge i lón än Kot manaman. 21Menni leiin ämi öüwa filätä? Ifa usun, üpwe feitto reemi fän efóch wóók pwe üpwe öpwüngü kemi, ika üpwe feitto fän tong mi mósónósón me fän ew ngünün pweteete?

Föfförün lisowu a elimengawa mwichefel

5A wesewesen chööwfeil porausan pwe a fis föfförun lisowu leiimi, nge ew sókkun föfförün lisowu esap mwo nge fis me leiin ekkewe aramas resap silei Kot. Ngang üwa rong pwe mi wor emön mwän lón ewe mwichefel a tipis ngeni pwülüwen saman we. 2Iwe, ämi öüwa chök sópweló le sikesik nge esap fen wor ämi öüpwe letipetä me sääw. Pwata öüsap atoowu ei mwän mi föri ei sókkun föfför seni lón ämi chiechifengen. 3Pün inamwo ika ngang üsap nóm reemi ikena lón inisi, nge ngang üwa nóm reemi lón ngüün. Iwe, ngang üwa fen öpwüngaló chappen tipisin ätena mi föri ei föfför (usun chök itä nge ngang mi nóm reemi), 4lón iten ach we Samol Jesus Kraist. Öüpwe akökkööw ew mwich fäniten ewe mwichefel, nge ngang üpwe nóm reemi lón ngüni, pwal manamanen ach Samol Jesus Kraist epwe nóm reemi lupwen öüpwe mwichfengen. 5Mwirin, öüpwe atoowu ena mwän seni lón mwichefel o atolonga i lepöün Satan pwe i epwe öpwüngü, pün ewe inis mi nóm fän nemenien fituk epwe feiengaw, nge ngünün epwe manaw lón ewe rän lupwen ach Samol Jesus epwe liwinsäfälito.

6Esap fókkun mwirinnö ämi eingeing. Ifa usun, öüsap silei pwe ekis chök iis nge a tongeni ounusaló le chööwfeil lón unusen ewe pilawa mi amas? 7Iei minne, öüpwe limetöchüwowu ewe iis minen lóóm, pwe öüpwe wiliti och öüwööwün pilawa mi fö, pwokiten enletin pwe ämi öüwa usun chök och pilawa mi amas esap wor iis lón. Pün Kraist ach we Laamen Pasofer a fen ninniiló pwe I epwe och asór fänitach. 8Iei minne, sipwe sópweló le efisi ächchemen ewe chuulapen Pasofer, sap ren ach sipwe mwöngö ewe pilawa minen lóóm mi wor iis lón, iei ewe manawen sókósókingaw me föfföringaw, nge ren ach sipwe mwöngö ewe pilawa mi fö esap wor iis lón, iei ewe manawen limöch me let.

Epwe fókkun wor chappen tipisin lisowu

9Lupwen ngang üwa mak ngeni kemi me mwan lón neii we taropwe, ngang üwa üreni kemi pwe öüsap chiechi fengen me ekkana aramas mi tipisin lisowu. 10Nge ngang üsap kapas fäniten ämi öüsap chiechi fengen me ekkewe aramas iir chón lükün mi föri föfförun lisowu, ika ekkewe mi mocheniä ika chón achoomaaw, ika chón fel ngeni önümwäl. Pün are epwe iei usun; iwe, mi fen öch öüpwe le toowu seni ei fönüfan. 11Nge ngang üwa mak ngeni kemi pwe öüsap chiechi fengen me emön mi pwisin apasa pwe i emön mi iteni iten chón lükü, nge a föri tipisin lisowu, ika a mochenia, ika a fel ngeni önümwäl, ika ääni kapas ingaw fäniten ekkóch, ika a ünüpwüch, ika a achoomaaw. Öüsap mwo nge mwöngöfengen me ei sókkun aramas.

12Esap pwal äi sekining pwe üpwe öpwüngü chókana iir mi nóm lükün mwichefel. Nge fókkun iei wisemi pwe öüpwe öpwüngü chókana mi nóm lón mwichefel mi tipis ren ekkeei sókkun lapalap. 13Nge Kot epwe wisen öpwüngü chókana mi nóm lükün mwichefel. Iei minne, ewe taropwe mi pin a apasa: “Öüpwe atoowu ewe aramas mi föfföringaw seni lefiilemi.”a

Chón lükü resap oturu chiener chón lükü lón köpwüng

6 Lupwen a wor än emön leiimi fitikooko ngeni pwal emön chón lükü, pwata a ina me ökkönümwün le uwaló an fitikooko ren ekkewe souköpwüng sap iir chón lükü, nge esap fen feilló ren ekkewe chón pin? 2Öüsap silei pwe lón ew fansoun, öükich ekkewe chón pin sipwe wisen öpwüngü fönüfan? Iwe, are pwe ämi öüpwe öpwüngü fönüfan, ifa usun, öüsap pwääk ngeni ämi öüpwe pwisin filätä pwüngün ekkewe mettóch mi kükkün lefiilemi? 3Öüsap silei pwe öükich souleng sipwe öpwüngü ekkewe chón läng? Iwe, pwata sisap fen tongeni pwisin atawei ekkewe tipefesen lón ei manaw ikeei wón fönüfan? 4Are mi wor ämi tipefesen wón ekkewe mettóchun lón ei manaw, pwata öüwa feilló ren ekkana souköpwüng chón lükün esap wor wiser lón mwichefel pwe repwe wisen öpwüngü? 5Ngang üwa apasa ei pwe üpwe äsääwa kemi. Ina pwüngün pwe esap fókkun wor emön me lón unusen mwichefel a tipächchem pwe epwe tongeni filätä pwüngün ekkeei äniini mi fis lefiilen kana souleng? 6Nge a fen sossor, pün iei emön chón lükü a uweeló ngeni köpwüng emön pwiin chón lükü pwe epwe köpwüng ngeni, nge ena a fis fän mesen ekkana souköpwüng sap iir chón lükü!

7Iei minne, ei lapalap a fen pwärätä ämi lipwäkingaw pwe öüwa feilló ngeni köpwüng o köpwüng fengen. Pwata öüsap mochen etiwa än emön epwe föri minne a mwääl ngeni kemi? Pwata öüsap mochen engngiló ngeni än emön sooläni pisekimi? 8Nge fen pwisin ämi öüwa föri minne a mwääl o soolä; ewer, öüwa föri ekkeei mettóch ngeni fen pwiimi kana souleng! 9Ifa usun, öüsap silei pwe ekkewe mi föri minne mi pwüngingaw lón manawer resap mwüüni ewe mwüün Kot? Öüsap pwisin otupwukemi. Pün esap fókkun wor chón föri tipisin lisowu, ika chón fel ngeni önümwäl, ika chón lisowu ngeni mi pwüpwülü, ika kana mwän mi amöömö inisiir, ika kana chón lisowu fengen lefiilen mwän me mwän ika fefin me fefin, 10ika chón soolä, ika aramas mi mocheniä, ika chón ünüpwuch, ika chón kapas mi ngaw fäniten aramas, ika chón achoomaaw repwe mwüüni ewe mwüün Kot. 11Iwe, me lóóm a iei usun ekkóch me leiimi. Nge iei ämi kewe tipis ra fen limelimeló o öüwa fen käimwüüló fäniten Kot. Öüwa fen wiliti chón pwüng me fän mesen Kot, pwokiten meet ewe Samol Jesus Kraist me ewe Ngünün ach we Kot ra föri fänitemi.

Sipwe elingaló Kot lón inisich me ngünüch

12Eli ina öüpwe apasa: “A mwüümwütä ngeniei äi üpwe föri mettóch meinisin.” Nge ngang üpwe pölüweni o apasa: “Mettóch meinisin resap lamwot fänitom.” Iwe, inamwo ika a mwüümwütä ngeniei äi üpwe föri mettóch meinisin, nge ngang üsap wiliti emön amanaw äi üpwe nóm fän nemenien och mettóch. 13Ämi öüwa apasa: “Mwöngö a fäniten ewe luuk, nge ewe luuk a fäniten mwöngö.” Ei a pwüng, nge fän ew Kot epwe ataareló me ruu. Nge inisich esap för fäniten föfförün tipisin lisowu. Inisich ra för fäniten ewe Samol, nge ewe Samol a ekieki usun inisich. 14Iwe, Kot epwe amanawasäfälietä inisich seni mäló ren an manaman mi amwaraar, usun chök an amanawasäfälietä ach Samol seni mäló. 15Ifa usun, öüsap silei pwe inisimi kana ikkana kewe kifetin Kraist? Iwe, ifa usun. epwe tüfich än emön mwän epwe angei inisin, iei kifetin ewe inisin Kraist o ochuungeni inisin emön fiin lisowu? Esap fókkun tüfich! 16Öüsap silei pwe are emön mwän epwe chuu ngeni emön fiin lisowu, i a wiliti ew chök inis me neminewe? Pün ewe taropwe mi pin a apasa: “Ekkewe rüömön ra pachfengen o wiliti ew chök inis.”a17Nge emön aramas mi chuu ngeni ewe Samol, a ngününi chök emön me ach Samol.

18Öüpwe süü seni tipisin lisowu. Ekkewe pwal ekkóch sókkun tipis emön aramas a föri, a föri me lükün inisin. Nge emön mi föri ewe tipisin lisowu a tipis ngeni pwisin inisin. 19Ifa usun, öüsap silei pwe inisin emön me emön leiimi iei ewe imwenfelin Ngüünmifel mi nónnóm lóómi, I ewe öüwa fen angei meren Kot? Iwe, inisimi esap chüen pwisin ämi, 20pün Kot a fen mööni kemi ren ew liiwin mi möömmóng. Iei popun öüpwe elingaló Kot ren inisimi me ngünümi pün iir än Kot.

Lóngólóngun pwüpwülü meren souleng

7 Iwe, iei ngang üpwe kapas fäniten ekkewe kapas eiis ämi öüwa makketo usun rei: A mwirinnö ngeni emön mwän are epwe emön mi lipich. 2Nge pwokiten a fókkun wätte sóssótun tipisin lisowu, ina minne emön me emön mwän epwe wor pwisin pwülüan, pwal emön me emön fefin epwe wor pwisin pwülüan. 3Iwe, ewe mwän mi pwüpwülü esap ömwöchü inisin seni pwülüwan we ar repwe kóón fengen, pün iei an pwüüng lón an emön fefin mi pwüpwülü. Iwe, pwal emön fefin mi pwüpwülü esap ömwöchü inisin seni pwülüwan we ar repwe kóón fengen. 4Ewe fefin mi pwüpwülü a ngeni pwülüwan we nemenemen inisin, nge pwal ewe mwän mi pwüpwülü a ngeni pwülüwan we nemenemen inisin. 5Ämi kana mi pwüpwülü, öüsap ömwöchü seni pwülüwemi inisimi ämi öüpwe kóón fengen. Chiilón chök ika epwe wor etipeew fengen lefiilen ewe mwän me ewe fefin ar resap mwo kóón fengen lón ew fansoun mi chök mwochomwooch fäniten ar repwe fangaló unusen ar fansoun le öchüün me iótek. Nge mwirin, repwe pwal liwinsäfäl fengen pün Satan ete sótuniir, pwokiten ar resap chüen tongeni nemeni mochenin inisiir. 6Ngang üwa apasa ngeni kemi ei seni pwisin chök äi memmef, nge esap ew öllük, pün ngang mi äpereni usun öchchün än emön epwe pwüpwülü me öchchün än emön epwe chök lipich. 7Ngang üwa äneän pwe amwo aramas meinisin repwe tipeew ngeni ar resap pwüpwülü, usi chök. Nge kich meinisin sisap chök löllö fengen. Kot a ngeni ekkóch ewe liffangen ar repwe mochen pwüpwülü. Nge I a ngeni pwal ekkóch ewe liffangen ar repwe chök lipich.

8Iei, ngang üwa üreni ekkewe fefin mi piin pwüpwülü me ekkewe fefin mi mä seniir pwüluer pwe mi mwirinnö ngeniir are repwe le chök nómwóló o resap chüen pwüpwülüsäfäl, usi chök. 9Nge are resap tongeni nemeni mochenin inisir; iwe, repwe pwüpwülüsäfäl. Pün mi fen mwirinnö är repwe pwüpwülü lap seni ar repwe tolong lón sóssót ren pwichikkaren ar mocheniä.

Än Paul öllük ngeni ekkewe mi pwüpwülü

10Iwe, ngang üwa ngeni ekkewe mi pwüpwülü ei öllük, nge sap ngang pwe ewe Samol: Emön fefin mi pwüpwülü esap mwüü seni pwülüwan. 11Nge are neminewe epwe mwüü seni pwülüwan, iwe,och leiin epwe le chök nómwóló, esap chüen pwüpwülüsäfäl, ika epwe chääsäfäl ngeni pwülüwan we. Iwe, emön mwän mi pwüpwülü esap mwüü seni pwülüwan.

12Iei, ngang üpwe kapas ngeni ekkewe pwal ekkóch me leiimi, inamwo ika ngang üsap angei ew öllük mi feitto seni ewe Samol: Are emön mwän chón lükü a pwülüeni emön fefin sap i chón lükü, nge ewe fefin a mochen pwe epwe chök sópweló le nónnóm ren ewe mwän; iwe, ewe mwän esap mwüü seni neminewe. 13Pwal are emön fefin chón lükü a pwülüweni emön mwän sap i emön chón lükü, nge ewe mwän a mochen pwe epwe chök sópweló le nónnóm ren ewe fefin; iwe, ewe fefin esap mwüü seni ewe mwän. 14Pün ewe mwän sap i emön chón lükü a piniló ren pwülüwan we fefin i emön chón lükü, nge ewe fefin sap i emön chón lükü a piniló ren pwülüwan we mwän i chón lükü. Pün are esap iei usun, iwe, nöümi kana semiriit repwe limengaw, nge fäniten ei lapalap, iir ra pin.

15Nge are ewe mwän ika ewe fefin sap i emön chón lükü a chök äniicho pwe epwe mwü; iwe, likiti ngeni epwe mwü. Lón ei sókkun lapalap, emön mwän i chón lükü ika emön fefin i chón lükü esap chüen fööfö lón ewe riirin pwüpwülü. Pün Kot a kööri kich pwe sipwe manaw lón kinamwe. 16En enan fefin chón lükü mi pwüpwülü, kopwe chemeni pwe pwülüwom a tüfichin epwe küna manaw pwokitom. Pwal en enan mwän chón lükü mi pwüpwülü, kopwe chemeni pwe pwülüwom a tüfichin küna manaw pwokitom.

Manaweni ewe manaw Kot a kööri kich fänitan

17Nge emön me emön epwe etiwa ese lifilifil meet sókkun lapalap ewe Samol a ewisa ngeni o sópwósópwóló lón usun chök nónnómwun lupwen Kot a kööri. Iei usun meet ngang üwa ääni öüröür lón ekkewe mwichefel meinisin. 18Äwewe chök. Emön mwän mi fen sirkomsais me mwen an wiliti emön chón lükü, esap föri an epwe usun emön esap sirkomsais. Emön mwän esap mwo sirkomsais lupwen an a wiliti emön chón lükü, esap sirkomsais iei. 19Pün esap wor sakkofesenin are emön a sirkomsais ika esap sirkomsais. Nge meet chök a öüchchea, än emön epwe älleasochis ngeni än Kot kewe öllük. 20Emön me emön epwe chök sópweló le nóm lón sókkun nónnómwun lupwen Kot a kööri.

21Ifa usun, en emön amanaw lupwen ka kö? Kosap ekieki usun. Nge are epwe wor ew fansoun epwe tongeni mwüümwütä ngenuk óm kopwe emön chón ngas; iwe, kopwe alamwota. 22Kopwe chemeni pwe are en emön amanaw lupwen ewe Samol a kööruk, iwe, iei ewe Samol a angasók seni ewe nemenemen tipis. Nge are en emön mi ngas lupwen Kot a kööruk, iwe, iei en ka emön nöün Kraist amanaw. 23Kot a mööni kemi ren ew liiwin mi möömmóng. Iei minne, öüsap wiliti nöün fönüfan amanaw. 24Iei minne, ämi pwii kana, emön me emön leiimi epwe chök nómwóló lón nónnómwun meren Kot lón ewe lapalap i a nóm lón lupwen i a kö meren Kot.

Än Paul kapasen öüröür ngeni ekkewe lipich me ekkewe resap chüen pwüpwülü

25Iwe iei, ngang üpwe kapas fäniten ekkewe föpwül resap mwo pwüpwülü fän ew. Ngang üsap angei ew öllük meren ewe Samol fäniter. Nge ewe Samol lón an ümöümöch a fang ngeniei äi tipächchem üwa tongeni anómwu äi apilükülük wón. Iwe, ngang üpwe ewiseisa ngeni kemi minne ewe Samol a fang ngeniei. 26Iei minne, ngang üwa ekieki pwe epwe mwirinnö än emön aramas epwe chök nómwóló lón minne nónnómwun, pwokiten ekkeei riäfföu mi fis lón ei fansoun. 27Are en emön mwän mi pwüpwülü ngeni emön fefin, kosap mwüü seni. Are esap wor pwülüwom, kosap pwüpwülü. 28Nge are kopwe pwüpwülü, kosap tipis ren. Are emön föpwül esap mwo pwüpwülü a pwüpwülü, esap tipis ren. Nge chókana mi pwüpwülü ra tolong lón chómmóng osukosuken lón ei manaw. Iwe, üwa chök mochen tümwünü seni kemi ekkeei sókkun osukosuk.

29Iwe, ämi pwii kana mi ächengicheng, ngang üpwe apasa ei: Ewe fansoun a chök mwochomwooch. Ina pwata, seni ikenäi, ekkewe mwo mwän mi pwüpwülü nge resap akkomwa ekiekin öüchchean ar pwüpwülü. 30Pwapwa ika letipeta ika wöw esap eppeti emön an epwe föri än Kot angang. 31Chókana mi ääni feiöchün ei fönufan repwe alamwota le aea ekkeei mettóch, nge resap chök mwöchütam reer. Pün ei fönüfan me masowan meinisin repwe móróló.

32Nge lón ekkewe mettóch meinisin öüwa föri, ngang üwa mochen pwe öüpwe ngas seni ämi öüreki nónnómwun lón ei manaw. Emön mwän esap wor pwülüwan a chök ekieki än ewe Samol angang me meet ewe Samol epwe pwapwa ren. 33Nge emön mwän mi pwüpwülü esap tongeni föri ei. Pün i a wisen ekieki minne pwüngün wisan me wón ei fönüfan me usun an epwe föri minne pwülüwan epwe pwapwa ren, 34iei minne a kinikinfesen meet i mochen pwe epwe föri. Emön fefin esap chüen pwüpwülü ika emön föpwül esap mwo pwüpwülü fän ew a chök ekieki usun ekkewe mettóch fäniten ewe Samol, pwe inisin me ngünün epwe pin. Nge emön fefin mi pwüpwülü a ekieki usun minne pwüngün wisan me wón ei fönüfan me usun an epwe föri minne pwülüwan epwe pwapwa ren. 35Ngang üwa apasa ei fäniten ina meet epwe mwirinnö ngeni kemi, nge sap ren äi mochen pwe üpwe eppeti kemi. Ngang üwa mochen pwe öüpwe föri meet epwe älisi kemi pwe öüpwe sipeöch lón ämi angang ngeni ewe Samol, nge esap wor meet epwe aosukosuka kemi.

36Are emön mwän a mefi pwe esap chüen mwirinnö ngeni nöün we föpwün esap mwo pwüpwülü minne i a ääni akkóót fänitan, nge a tori ierin än ewe föpwül a öchchün pwüpwülü, ewe saam a tongeni filätä minne i a mochen föri. I esap tipis are a mwüüt ngeni nöün we föpwül pwe epwe pwüpwülü. 37Nge are ewe saam esap siwili letipan usun minne a ääni pwon, pwokiten nöün we föpwül esap echchimwa, a wor än ewe saam pwüüng are a filätä minne mochenin letipan pwe esap öpwüpwülüwa nöün we föpwül. Ewe saam a föri minne a mwirinnö. 38Iei popun, emön saam a föri minne mi mwirinnö are a öpwüpwülüwa nöün föpwül, nge emön saam a föri minne a fen koon mwirinnö seni are esap öpwüpwüluwa nöün föpwül.

39Emön fefin mi pwüpwülü a riiri ngeni pwülüan lón öllük lón üküükün fansoun än pwülüwan we manaw. Nge are ewe mwän a mäló, neminewe a ngasaló an epwe le pwüpwülü ngeni iöön i a mochen epwe pwülüweni, nge lón chök ewe Samol. 40Nge lón pwisin mefiei, neminewe epwe pwapwa are epwe le chök nómwóló o esap chüen pwüpwülüsäfäl. Iwe, ngang üwa ekieki pwe ngang üwa ngeni kemi ew öüröür seni ewe Ngünün Kot lupwen ngang üwa apasa ei.

Sipwe öüseling ngeni ämefien ewe mwelien letip

8Iwe iei, ngang üpwe kapas fäniten ekkewe mwöngö aramas ra ääni asór ngeni ekkewe uluulun önümwäl. Ämi öüwa ekieki pwe aramas meinisin repwe tipeew ngeni minne öüwa apasa pwokiten a wor ämi silelap. Silelap a efisätä sikesik, nge tong a afeffeitäi mwichefel. 2Iwe, emön aramas mi apasa pwe i a silei pölüwen mettóch meinisin; i emön esap mwo silei och minne a fich ngeni an epwe silei. 3Nge emön aramas mi tongei Kot, i emön aramas Kot a silei o ekieki usun.

4Iwe, meet sipwe föri? Sipwe mwöngö ekkewe mwöngö aramas ra fen ääniir asór ngeni ekkewe uluulun önümwäl? Kich meinisin sia silei pwe och uluulun önümwäl sap i wesewesen emön kot, pün mi wor emön chök Kot, nge esap wor pwal ekkóch kot. 5Meren ekkóch aramas, a wor ekkana chómmóng mettóch ra eita ngeniir pwe iir kot ika samol, ese lifilifil ika lón läng ika wón fönüfan. 6Nge kich sia silei pwe mi wor emön chök Kot, ewe Kot Saam mi föri mettóch meinisin, nge kich sia för fänitan. Iwe, mi pwal wor emön chök Samol, Jesus Kraist, I ewe Kot a föri mettóch meinisin meren, pwal I chök ewe Kot a fang ngeni kich manaw meren.

7Iwe, nge sap chök chón lükü meinisin a wor reer ei sókkun silelap. Pün ekkóch ra chüen öörüni ar repwe ekieki usun ekkewe uluulun önümwäl pwe iir ächiööwün kot. Iei popun, tori iei lupwen ra mwöngö och mwöngö aramas mi piin ääni asór ngeni ekkewe uluulun önümwäl, ra chüen ekieki usun pwe iei ewe angangen fel ngeni ekkewe ächiööwün kot. Iwe, pwokiten mwelien letiper a chüen apwangapwang; iei minne ra meefi pwe ra limengaw o tipis ren. 8Nge mi enlet pwe mwöngö esap föri ach sipwe tiw meren Kot. Ese fókkun lifilifil, pün sisap mwirinnö seni ekkóch ika sia mwöngö, sisap pwal ngaw seni ekkóch ika sisap mwöngö.

9Nge öüpwe chök äfälli kemi ren minne öüwa föri lón ämi ngas pwe ese fen wiliti och leenien chepetek ngeni chókana mi apwangapwang mwelien letiper. 10Pün iei meet a tongeni fis: Emön chón lükü mi apwangapwang lón an lükü a ekieki pwe mi ngaw ngeni an epwe mwöngö ei sókkun mwöngö, nge a künók en ewe mi wor óm silelap pwe ka mwöngö lón ew imwenfelin önümwäl. En ka silei pwe esap wor ngawen óm mwöngö ewe mwöngö, nge ätewe epwe le pöchökkületä le pwuurätiw mwelien letipan ren an epwe le mwöngö ekkana mwöngö aramas ra ääni asór ngeni önümwäl. 11Iwe, pwokiten óm silelap, pwiimw we chón lükü mi apwangapwang lón an lükü, i ewe Kraist a mäló fänitan, epwe le tolong lón tipis. 12Iwe, en ka tipis ngeni Kraist lupwen ka tipis ngeni pwiimw kana chón lükü ren óm peseei ngeniir pwe repwe föri och mettóch iir ra lükü pwe mi ngaw o ka ekinasa mwelien letiper mi apwangapwang. 13Iei minne, are meet ngang üwa mwöngö epwe efisätä än pwii chón lükü epwe chepetek; iwe, ngang üsap liwiniti äi üpwe ochooch fituk aramas mi piin ääni asór ngeni onümwäl, pün ngang üsap mochen föri minne pwal emön pwii chón lükü epwe chepetek ren.

Än Paul esap kütta an epwe angei minne mi pwüng ngeni nónnómwun

9Ifa usun, sap ngang emön mi ngas äi üpwe föri uwenei usun chök pwal ekkana ekkóch? Ifa usun, sap ngang emön soukünö? Sap fen ngang emön mi küna ach Samol Jesus Kraist ren mesei? Sap ämi uwään äi angang fäniten ewe Samol? 2Ika mwo ekkóch ra ekieki pwe ngang sap emön soukünö, nge ngeni kemi, ngang emön soukünö. Pün ämi öüwa fisitiw pwe ina impwangen älelleten pwe ngang nöün ewe Samol soukünö.

3Iei meet üwa pölüweni ngeni chókana mi etittinaei fäniten äi pwüüng are mi let pwe ngang emön soukünö: 4Ifa usun, esap wor äm pwüüng äm äipwe angei eneem me ünümeem seni kemi? 5Ifa usun, esap wor äm pwüüng äm äipwe küüt pwülüwem fefin mi lükü pwe repwe fitifeili keem usun chök pwal minne ekkewe ekkóch soukünö me pwiin ach Samol kewe me Kefas ra föri? 6Ika Barnabas chök me ngang aipwe pwisin angang pwe epwe wor älillisiim?

7Menni sounfiu ekan feilló ngeni maun nge wón pwisin nöün mooni? Menni chón atake ekan fótukätiw ew tännipin irän wain nge esap wor an pwüüng an epwe mwöngö seni uwaan? Ika menni chón fóól maan ekan wisen tümwünü epwi pwiin siip nge esap mwüümwütä ngeni an epwe wün milik seni ewe pwiin siip? 8Ngang üwa apasatä ekkeei mettóch sap chök ren ekiekin aramas. Ifa usun, esap chök wewe ngeni minne än Kot öllük a apasa? 9Pün a mak lón än Moses we öllük: “Kosap föötaló awen emön ätemwänin kowu lupwen an a föri ewe angangen pwuuri kewe umwun wiit pwe ekkewe föün repwe toowu seni pöör.”a Ifa usun, öüwa meefi pwe Kot a chök ekieki usun ekkewe ätemwänin kowu lupwen I a apasa ei? 10Are ifa usun, Kot esap apasa ei fen pwal fänäsengesich? Ewer, ei a makketiw fänitach. Usun chök ewe chón atake mi wisen tuuw ewe pwül me ewe mi wisen föri ewe angangen pwuuri umwun wiit pwe ekkewe föün repwe toowu ra apilükülüküw pwe repwe angei wiiser seni uwään ar angang, iei usun pwal ekkewe chón lükü iir chón angang repwe angei liwiniir seni chókana ra angang ngeniir. 11Iwe, are äm aia amwora pwikilin ngüün leiimi, ifa usun, epwe ngaw äm aipwe tongeni kinii seni kemi ekkóch mettóch fäniten ei manaw? 12Are ekkewe ekkóch mi afalafal ngeni kemi ra aea ar pwüüng pwe repwe angei älillisiir seni kemi, ifa usun, esap fen lapaló äm pwüüng äm äipwe angei älillisiim seni kemi?

Iwe, inamwo nge äm äisap chök aea ei pwüüng. Äm aia chök engngiló fän mettóch meinisin pwe äisap mochen awora och eppetin ewe poraus allimen Kraist.

13Ifa usun, öüsap silei pwe chókana mi angang lón ewe imwenfel ra mwöngö seni ekkewe mwöngö aramas ra uwato ren ewe imwenfel pwe ar asór? Iwe, chókana mi föri angangen ewe róngen asór ra angei wiseer seni ekkewe asór wón ewe róngen asór. 14Iwe, pwal iei chök usun, pün ewe Samol a öllük pwe chókana mi afalafala ewe poraus allim repwe angei älillisiir seni chókana mi angei ar feiöch seni ewe poraus allim.

15Nge ngang üsap aea och me leiin ekkeei pwüüng. Ngang üwa makkei ei ngeni kemi, sap ren äi üpwe ämefi ngeni kemi pwe ngang üwa saani pwe öüpwe poputä le föri ekkeei mettóch ngeniei. Pün mereei, ngang üfen efich äi üpwe mäló lap seni an epwe tur seniei pwapwan äi üpwe eingeing wón äi angang ngeni ewe Samol nge esap fiti liiwin. 16Pün äi afalafala ewe poraus allim, esap och mettóch ngang üpwe eingeing usun, pwokiten ngang mi nóm fän än Kot ökkünö ngeniei pwe ina wisei. Ewer, epwe fókkun efeiengaw ngeniei are üsap afalafala ewe poraus allim! 17Pün are ngang üwa föri ei angang seni pwisin äi filätä; iwe, üpwe ösüküsükü äi üpwe angei liwini. Nge Kot a filieitä o atolonga fän äi tümwün ew wiis mi pin. Iwe, ngang üwa chök föri pwüngün wiisei. 18Iwe, meet chök liwini? Iei chök liwini: Äi pwapwa ngang üwa angei seni äi tongeni afalafala ewe poraus allim usun Kraist, nge esap fiti liiwin ngeni emön, pün üsap mochen üpwe aeangawei äi pwüüng fäniten äi afalafala ewe poraus allim.

Lapalapen än Paul angang ngeni aramas meinisin

19Popun äi föri ei, pun ngang üsap mochen üpwe fööfö äi üpwe älleasochis ngeni aramas, pwokiten iir ra liwiniei. Nge ngang üwa pwisin föri äi üpwe wiliti emön amanaw ngeni meinisin, pwe üwa mochen üpwe tongeni willenato chómmóng aramas ren Kraist. 20Lupwen ngang üwa nóm ren ekkewe chón Sus, ngang usuni usun emön leiir pwe üpwe tongeni willeniireto ren Kraist. Lupwen ngang üwa nóm ren chókana mi fiti pwüngün än ekkewe chón Sus öllük, ngang üwa föri usun chök minne iir ra föri, inamwo ika ngang üsap nóm fän nemenemen ewe öllük, pwe ngang üpwe tongeni willeniireto ren Kraist. 21Lupwen ngang üwa nóm ren ekkewe Sentail esap wor reer ekkewe öllük än chón Sus, ngang apachaeilong leiir lón üküükün äi tongeni. Ren ei lapalap, ngang üwa tongeni liäpeni letipeer o willeniireto ren Kraist. Ngang üsap likitaló än Kot kewe öllük, pwe üwa fen älleasochisi än Kraist öllük. 22Lupwen ngang üwa nóm ren chókana mi riäfföü, ngang üwa fitiir lón ar riäfföü pwe ngang üpwe tüfichin emmweniireto ren Kraist. Ewer, ngang üwa sótuni le kütta meet aipwe nönnö fengen wón me ekkana aramas meinisin, pwe ngang üpwe tüfichin emmweniireto ren Kraist. 23Ngang üwa föri ekkeei mettóch meinisin fänäsengesin äi üpwe emeresifeili ewe poraus allim. Ren äi föri ei, ngang üwa ääni pwapwan feiöchün ewe poraus allim.

Lapalapen an Paul öttüres fäniten epa mwärämwär mwärin chón wiil

24Ifa usun, öüsap silei pwe chókana mi ssä lón ew kitir, iir meinisin ra ssä, nge emön chök aramas a angei ewe wiil? Iwe, pwal ämi öüpwe ssä, nge föröchüw ämi ssä pwe öüpwe angei willemi. 25Ekkana sensü meinisin ra öttüres le essilelapei inisir. Ra föri ei pwe repwe willeni epa mwärämwär mi tongeni an epwe eioloololó. Nge kich sia öttures fäniten epa mwärämwär esap tongeni an epwe eioloololó pwe sipwe willeni. 26Iei minne, ngang üwa ssäwenewen ngeni meet üwa älla pwe ina popun äi ssä. Ngang üsap pwal usun emön chón köfön mi chök köfön pöön, usun chök nge a öfönü äsäpwääl pün esap wen öfönüwan. 27Nge ngang üwa pöchökkül le fiu ngeni mochenin inisi o atolonga inisi fän äi nemenem pwe epwe neii amanaw, pün ngang üwa nuokkus are üpwe afalafal ngeni ekkóch, nge pwisin ngang wón inisi üsap pwääk ngeni meet üwa afalafal ngeni ekkóch usun.

Sipwe käeö seni ekkewe poraus lón Testamentin lóóm

10Pün ngang üsap mochen pwe ämi pwii kana, öüpwe möllükaló meet a fis ngeni ach kewe leewo mi fiti Moses lón ewe fönüapö melóóm. Iir meinisin ra nóm fän ewe kuchu mi emmweniir, pwal iir meinisin ra pwereló lón ewe mataw wón pwül mi pwasapwas. 2Iir meinisin ra papataisilong lón Moses, pün ra fiti Moses lón ewe kuchu me lón ewe mataw pün i nöüür souemmwen. 3Pwal iir meinisin ra mwöngö och chök sókkun mwöngö mi manaman, 4o iir meinisin ra wün och chók sókkun kólik mi manaman. Pün iir meinisin ra wün seni ewe Achaw mi manaman mi chök fiffitiir lón ar sääi, nge ewe Achaw ina i Kraist. 5Nge mwirin ekkeei meinisin, Kot esap pwapwa ren chómmóng me leiir. Ina minne, I a arosereló o soomär ra chök taropaasfeil lón ewe fönüapö.

6Iwe, ekkeei mettóch ra fis pwe repwe leenien äwewe me fön ngeni kich fäniten ach sisap mocheniäiti mettóch mi ngaw usun minne iir ra mocheniäiti, 7ika fel ngeni uluulun önümwäl usun minne ekkóch me leiir ra föri. Pün iei usun minne a mak lón ewe taropwe mi pin: “Ekkewe aramas ra móttiw pwe repwe mwömwöngö o ükkün; mwirin, ra üütä o ra pwörüküngaw.”a 8Iwe, kich sisap fókkun föri kana sókkun tipisin lisowu, usun ekkóch me leiir ra föri; iwe, rüwe me ülüngät ngöröw aramas ra mäló me leiir lón ew chök rän. 9Sisap fókkun sótuni ewe Samol, usun ekkóch me leiir ra pwal föri; iwe, ra mäló ren küüen ekkewe serepenit. 10Iwe, sisap pwal tunoppwen usun ekkóch me leiir ra föri; iei minne, Kot a tiinato ewe chón längin ninni pwe epwe arosereló.

11Iwe, ekkeei mettóch meinisin ra fis ngeniir pwe repwe leenien äwewe fänitach. Ra pwal makketiw pwe repwe fönöw kich, öükich ekkewe mi manaw lón ei ótun lupwen ei kinikinin fansoun epwe sópwóló. 12Iei minne, emön mi ekieki pwe a üppós; epwe tümwünüfichi pwe i ese pwal turulong lón ekkewe chök sókkun tipis. 13Nge öüpwe chechchemeni pwe ekkewe sóssót meinisin ra tori lón manawemi, resap sókkóló seni meet ra fiffis ngeni pwal ekkóch aramas. Nge Kot a ölükülük, pün I esap mwüüt ngeni kemi pwe öüpwe tolong lón sóssót mi lap seni ämi tüfich. Nge lupwen öüwa tolong lón sóssót, I a pwal föri ew alen ämi öüpwe ngasewu, pwe öüpwe tongeni engngiló fän ewe sóssót.

Sipwe sü seni angangen fel ngeni önümwäl

14Iei minne, ämi chiechiei kana mi ächengicheng, öüpwe sü seni angangen fel ngeni uluulun önümwäl. 15Ngang üwa kapas ngeni kemi usun äi kapas ngeni kana mi miriit. Pwisin ämi öüpwe etittinafichi ika mi let meet ei ngang üpwe apasa. 16Lupwen sia wün seni ewe kap sia iótekin kilisou ngeni Kot fänitan lupwen sia móót ngeni än ewe Samol Cheepel, ifa usun, esap iei ewe chaan Kraist sia chiechifengen wón? Lupwen sia utuuw ewe pilawa, ifa usun, esap iei ewe inisin Kraist sia chiechifengen wón? 17Iwe, öükich meinisin sia mwöngö seni ewe eföw chök pilawa, pün epwe esissilätä pwe inamwo ika kich sia chómmóng, nge sia ew chök inis.

18Iwe, öüpwe ekieki usun ekkewe aramasen Israel. Ifa usun, sap chókewe meinisin mi mwöngö seni ekkewe asór ra esissilätä pwe ra chiechifengen me Kot, I ewe ekkewe aramas ra uwato ar kewe asór ngeni ren ewe róngen asór? 19Iwe, meet wewen äi keei kapas? Ifa usun, wewen äi ei kapas pwe ekkewe uluulun önümwäl chókewe resap silei Kot ra uwato ar asór ngeni iir wesewesen kot, nge ar kewe asór a wor öüchchear? 20Apwi, ngang üwa apasa pwe ekkewe mettóch ekkewe aramas resap silei Kot ra ääni asór, ra asór ngeni ekkewe ngüün mi ngaw, nge sap ngeni Kot. Iwe, ngang üsap mochen pwe ämi öüpwe chiechifengen me ekkewe ngüün mi ngaw. 21Öüsap tongeni öüpwe wün seni än ewe Samol we kap, nge pwal wün seni än ekkewe ngüün mi ngaw kap. Öüsap pwal tongeni öüpwe mwöngö seni än ewe Samol Cheepel, nge pwal mwöngö seni än ekkewe ngüün mi ngaw cheepel. 22Ika ifa usun, öüwa mochen küpetäätä leluken ewe Samol an epwe soong? Ifa usun, öüwa ekieki pwe sia pöchökkül seni I?

Sipwe föri mettóch meinisin ren ach sipwe elingaló Kot

23Iwe, ina kopwe apasa: “A mwüümwütä ngeniei äi üpwe föri mettóch meinisin.” Nge sap mettóch meinisin ra älillisöch ngenuk. Iwe, ina kopwe pwal apasa: “A mwüümwütä ngeniei äi üpwe föri mettóch meinisin.” Nge sap mettóch meinisin a wor lamwotan ngenuk. 24Öüsap ekieki chök usun minne epwe mwirinnö pwisin fänitemi. Öüpwe ekieki usun pwal ekkóch chón lükü me meet epwe mwirinnö fäniter.

25Iei meet ämi öüpwe föri: Öüwa tongeni ochooch ekkewe fituk ra amöömö lón ekkewe leenien amöömö fituk. Nge öüsap chök kapas eiis paat ika ra ääni asór ewe fituk ngeni ekkewe uluulun önümwäl ika resap. Ika öüsap kapas eiis; iwe, esap mengiringir mwelien letipemi. 26Pün “fönüfan me masowan meinisin än ewe SAMOL.”a

27Are emön me leiin chókewe sap iir chón lükü a kööruk pwe kopwe fiti i le mwöngö lón imwan, kopwe fiti. Kopwe etiwa an kökkö, are ka mochen. Iwe, kopwe mwöngö minne i a isettiw mwomw, nge kosap chök kapas eiis usun ewe mwöngö, pün ete wor mengiringirin mwelien letip. 28Nge are emön chón lükü epwe apasa ngenuk pwe, “Ei mwöngö aramas ra fen ääni asór ngeni uluulun önümwäl.” Iwe, kosap mwöngö ewe mwöngö fän äsengesin óm kopwe ekieki usun ewe emön mi ürenuk usun ewe mwöngö, pwal fänäsengesin ewe mwelien letip. 29Ngang üsap kapas fäniten mwelien letipom nge i mwelien letipan. Pun pwata emön epwe ettipisiei ren minne üwa föri lón äi ngas, pwokiten mwelien letipen ekkóch ren meet repwe ekieki? 30Nge are üpwe kilisou ngeni Kot ren ewe mwöngö o mwöngö fän pwapwa; iwe, pwata ekkóch repwe ettipisiei ren äi mwöngö ewe mwöngö?”

31Ina minne, ese lifilifil ika meet öüpwe mwöngö ika wün, ese lifilifil ika meet öüpwe föri, öüpwe föri meinisin fäniten ämi öüpwe enlingaló Kot. 32Öüsap föri och minne epwe efisätä chepetek ngeni emön; ese lifilifil ika ngeni chón Sus ika ngeni Sentail ika ngeni chón än Kot mwichefel, 33usun chök ngang üwa sótuni äi üpwe föri minne aramas meinisin repwe pwapwa ren lón mettóch meinisin ngang üwa föri. Pün ngang üsap föri meet chök ngang üwa saani ika meet a mwirinnö fänitei, nge ngang üwa föri meet mi mwirinnö fäniten aramas pwe repwe tongeni kuna manaw.

11Öüpwe öppirüei, usun chök ngang üwa öppirüw Kraist.

Wewen pwölüpwölün mökür

2Ngang üwa fókkun pwapwa, ämi chiechiei kana mi ächengicheng, pwe iteiten fansoun meinisin ämi mi chök chechchemeniei lón mettóch meinisin o kömwöchünnük chök wón ewe Kapasen Kot, usun chök lupwen äi we atoureer ngeni kemi. 3Nge mi wor och mettóch ngang üwa mochen pwe öüpwe weweiti: möküren iteiten mwän, Kraist, nge möküren emön fefin, pwülüwan we, iwe, möküren Kraist, Kot. 4Iwe, iteiten mwän mi iótek ika pwärätä ngeni aramas mwónómwónen än Kot kapas nge a pwölüweló möküran, a eitengawa möküran we. 5Nge iteiten fefin mi iótek ika pwärätä minne mi mwónómwón lón än Kot kapas, epwe pwölüweló möküran. Are esap pwölüpwöl möküran, iwe, i a atooto sääw ngeni möküran we, pün neminnei a usun chök emön fefin mi reipööpöló meeten möküran. 6Pün are emön fefin mi pwüpwülü esap mochen pwölüw möküran; iwe, men öch epwe fen fichi meeten möküran pwe epwe mwoch. Nge pwokiten mi ässääw ngeni emön fefin an epwe fichi meeten möküran ika reipööpöló meeten möküran; ina minne, i epwe pwölüw möküran.

7Nge emön mwän esap fókkun pwölüw ngeni möküran och mettóch lupwen an fel, pwokiten mwän i ewe lingen Kot, mi för lón uluulun Kot, nge fefin i ewe lingen mwän. 8Pün mwän esap för seni fefin, nge i fefin a för seni mwän. 9Pwal mwän esap för fäniten ewe fefin, nge i fefin e för fäniten ewe mwän. 10Iwe, ren ei popun, emön fefin mi pwüpwülü epwe pwölüw möküran pwe ew esissilen nemenem wón möküran, pwokiten ekkewe chón läng ra attola. 11Nge ren pwüngün nónnómwun lefiilen nöün Kot aramas, ewe fefin esap imwuló chök wón an le pwisin nemeni inisin, pwal ewe mwän esap imwuló chök wón an le pwisin nemeni inisin. 12Pün are mwo fefin a för seni mwan, nge iei mwän a üpwutiw seni fefin. Iwe, mettóch meinisin ra feitto seni Kot.

13Öüpwe pwisin öpwüngaló usun ei. Ifa usun, mi pwüng ngeni emön fefin pwe epwe iótek ngeni Kot leiin aramas nge esap pwölüw möküran? Öüpwe pwisin etittina usun ei lefiilemi. 14Ifa usun, esap ina usun pwisin pwükütän nónnómwun förütän aramas a äiti ngeni kemi pwe mi ässääw ngeni emön mwän pwe epwe langattam meeten möküran? 15Nge are emön fefin a langattam meeten möküran, iwe, ina lingan. Pün Kot a ngeni fefin meeten möküran pwe ina pwölüpwölün. 16Nge are emön a mochen epwe äniini usun ei, iwe, ngang üwa tongeni apasa pwe esap wor pwal och sókkun öörüni sia ääni me lükün ei. Iwe, pwal ina chök usun minne än Kot kewe mwichefel meinisin ra meefi usun ei.

Ekkewe lapalap mi ngaw ra fis lupwen ra föri ewe mwöngön ach Samol

17Nge iei, ngang üsap ingeiti kemi lupwen ngang üpwe kapas usun ei och mettóch. Pün ngang üwa rong pwe lupwen öüwa mwich fengen fäniten ewe mwöngön ach Samol, öüsap föri meet mi mwirinnö, nge i meet mi fen ingawaló. 18Pün äkkäewin, ngang üwa rong pwe lupwen öüwa chufengen, a wor kinikinfesen lefiilemi ämi chón mwichefel. Nge lón och itiitin ngang üwa lükü pwe mi pwüng ei poraus. 19Nge enletin epwe fókkun wor kinikinfesen lefiilemi, pwe chókana iir wesewesen chón lükü repwe silleló me leiimi. 20Iei minne, lupwen öüwa mwich fengen lón ew leeni, öüsap mwich fengen fäniten ewe Mwöngön ach Samol. 21Pün emön a üreniei pwe iteiten emön me emön a chök osuusungawaló le en me mwöngö enan, nge öüsap ewiseisa pwal ekkóch. Iwe, a fis pwe ekkóch ra echik, nge ekkóch ra sakaweló. 22Meet ei! Ifa usun, a fókkun let ei? Ifa usun, esap wor imwemi fäniten ämi öüpwe mwöngö me wün ie? Are ifa usun, öüwa fókkun mochen eitengawa än Kot we mwichefel o äsääwa ekkewe mi wöwingaw? Meet ngang üpwe tongeni apasa usun ekkeei mettóch? Meremi pwe ngang üpwe mwareiti kemi ren ei sókkun? Ngang üsap mwareiti kemi!

23Pün ngang üwa angei seni ewe Samol meet pwisin I a apasa, nge iei ngang üpwe pwal atoura ngeni kemi: Lón ewe pwinin Judas epwe afangamä ewe Samol Jesus, I a angei ewe pilawa, 24iwe, lupwen a wes le iótekin kilisou, a utufeseni ewe pilawa o apasa: “Iei inisi, a taatakis fänitemi. Öüpwe angei o mwöngö. Öüpwe föri ei, pwe iei ächechchemei.” 25Pwal lón ewe chök lapalap, Jesus a angei ewe kap mwirin ar mwöngö o apasa: “Ei kap, iei ewe pwon mi fö lefiilen Kot me ämi, a ölükülük ren chaai. Öüpwe föri ei, pwe iei ächechchemei, iteiten fansoun ämi öüpwe wün seni ei kap.” 26Pün iteiten fansoun ämi öüpwe mwöngö ei pilawa o wün seni ei kap, öüwa esilefeili määlón ewe Samol tori I epwe waresäfälito.

Kopwe pwisin etittina manawom me mwen óm kopwe chóóni ewe mwöngön ach Samol

27Iei minne, are emön aramas a mwöngö ei pilawa ika wün seni ei kap än ewe Samol lón och lapalap esap fich ngeni; iwe, ena aramas a tipisin epiningawa inisin me chaan ewe Samol. 28Ina popun, emön me emön aramas epwe pwisin etittina fichi manawan me mwen an epwe mwöngö ewe pilawa me wün seni ewe kap. 29Pün emön mi mwöngö ewe pilawa o wün seni ewe kap nge esap weweiti öüchchean inisin ach Samol, i a pwisin äni me ünümi än Kot köpwüngun emiriit. 30Iei popun, chómmóng me leiimi ra apwangapwang o samwaw, nge ekkóch ra fen möürün mäló. 31Nge are sia pwisin etittinafichi manawach; iwe, sisap tolong lón köpwüng meren Kot. 32Nge lupwen sia tolong lón köpwüngun emiriit meren ewe Samol, kich sia küna emiriit pwe sisap fiti fönüfan le tolong lón köpwüngün chappen tipis.

33Iei minne, ämi pwii kana mi ächengicheng, lupwen öüpwe mwich fengen pwe öüpwe mwöngö, öüpwe awitiwit fengen lefiilemi. 34Nge are emön a echik; iwe, epwe mwöngó me lón imwan, pün lupwen öüwa mwich fengen, ete pwisin awarato köpwüng wón. Iwe, ngang üpwap ngeni kemi öüröüremi usun ekkewe pwal ekkóch mettóch mwirin äi wareiti kemi.

Ekkewe liffang seni Ngüünmifel: ra sókósópaat nge ra tipeew fengen

12 Iwe, iei ämi pwii kana mi ächengicheng, ngang üwa mak ngeni kemi usun ekkewe tüfich ewe Ngüünmifel a ngeni emön me emön leiich, pün ngang üwa mochen üpwe äwena ämi wewengaw usur. 2Ämi öüwa silei pwe lupwen öüwa chüen chón lükün, öüwa tókkóló o etekitekiló pwe öüpwe fel ngeni ekkewe uluulun önümwäl resap tongeni kapas. 3Iei minne, ngang üwa mochen pwe öüpwe silei usun ämi öüpwe tongeni älefiila meet mi wesewesen feitto seni Kot. Pün esap wor emön mi kapas fän emmwenien ewe Ngünün Kot epwe tongeni apasa pwe Jesus mi önümaamaw. Iwe, ese pwal wor emön epwe tongeni apasa pwe Jesus I Samol chiilón chök ika epwe feitto seni ewe Ngüünmifel.

4Mi wor ekkewe sókkopaaten liffangen ngüün, nge iir meinisin ra pop seni ewe chök emön Ngüün. 5Mi wor ekkewe sókkopaaten angang lón mwichefel, nge sia angang ngeni ewe chök emön Samol. 6Mi wor ekkewe sókkopaaten lapalap Kot a föri lón manawach, nge pwal I chök ewe Kot a aea manawach le föri an kewe angang.

7Nge ewe Ngüünmifel a pwääpwäló ren ekkewe liffangen ngüün mi einet ngeni emön me emön leiich fäniten feiöchün unusen mwichefel. 8Pün ewe Ngüün a ngeni emön aramas ewe tüfich an epwe awora kapasen öüröür mi miriit, pwal ewe chök Ngüün a ngeni pwal emön ewe liffang an epwe silelapei wewen kapasen Kot. 9Ewe chök pwal Ngüün a ngeni emön ewe tüfichin lükü, a pwal ngeni emön ewe tüfich pwe epwe echikaratä chón samwaw. 10Ewe Ngüün a ngeni emön aramas ewe tüfich pwe epwe föri manaman, a ngeni pwal emön ewe tüfich pwe epwe arongafeili än Kot kapas. A ngeni pwal emön ewe tüfich an epwe silei are wesewesen ewe Ngünün Kot a kapas ika pwal emön ngüün a kapas. A ngeni pwal emön aramas ewe tüfich an epwe kapas lón sókkopaaten kapasen ekis, nge a pwal ngeni emön ewe tüfich pwe epwe afföüw meet emön a apasa lón kapasen ekis. 11Nge ewe chök emön Ngüün a eineti ekkeei liffang. I chök a filätä ika menni liffang emön me emön aramas epwe ääni.

Ew chök inis nge sókkopaat kifetin wón

12Pün usun chök inisin aramas a ew chök, nge a wor chómmóng kewe kifetin, iwe, inamwo are ekkewe kifet ra chómmóng, nge iir meinisin ra nóm wón ewe chök ew inis. Iwe, ina chök pwal usun ren ewe inisin Kraist. 13Pün ekkóch me leiich sia chón Sus, ekkóch iir Sentail, ekkóch iir amanaw, nge ekkóch iir chón ngas. Nge kich meinisin sia papataisilong lón ewe inisin Kraist ren emön chök Ngüün. Kich meinisin sia etiwa ewe chök emön Ngüün mi imweim lóóch. 14Pün pwüngün pwe ewe inis esap ew chök kifet, pün a wor chómmóng sókkopaaten kifetin.

15Are ewe peche epwe apasa: “Sap ngang kifetin wón ewe inis, pwokiten sap ngang efóch paaw.” Ifa usun, ina pwüngün pwe sap i kifetin wón ewe inis? 16Iwe, are ewe seling epwe apasa: “Sap ngang kifetin wón ewe inis, pwokiten sap ngang eföü föün maas.” Ifa usun, ina pwüngün pwe sap i kifetin wón ewe inis? 17Iwe, epwe ifa usun are unusen ewe inis epwe chök eföü föün maas? Iwe, epwe ifa usun an epwe tongeni rongorong? Nge ika unusen ewe inis epwe ew chök seling; iwe, epwe ifa usun an epwe tongeni tini pwollen och mettóch? 18Nge Kot a föri inisich fiti chómmóng kifetin, iwe, I a eleenia ew me ew ekkewe kifet lón en me leenian me wón ewe inis usun minne I a mochen. 19Epwe iei och mettóch mi sókkóló are unusen ew inis epwe chök ew kifet! 20Nge iei wesewesen pwüngün pwe a wor chómmóng kifet, nge ew chök inis.

21Iwe, ewe föün maas esap tongeni apasa ngeni ewe paaw, “Esap wor lamwotom ngeniei.” Pwal usun chök ren ewe mökür, pün esap tongeni epwe apasa ngeni ekkewe pachapach, “Esap wor lamwotemi ngeniei.” 22Apwi, fen iei enletin. Ekkewe ekkóch kifet sia ekieki pwe itä resap koon lamwot me wón ewe inis, ra wesewesen fókkun lamwot. 23Pwal ekkewe kifet me wón ewe inis sia ekieki pwe esap koon wor öüchchear, ikkana ekkewe kifet sia fen koon alapa ach öüchcheani le tümwünür pwe sipwe finitiir. Iei usun sia tümwünöchchüw ekkana kifet resap lapalapöch, 24nge ekkewe ekkóch kifet mi fen lapalapöch, sisap koon öüchcheani ach sipwe etenekir. Nge Kot ewe a ochufengeni ewe inis a fen alapa an elinga me tümwünü ekkana kifet esap wor linger. 25A föri ei fäniten an epwe wor älillisfengen lefiilen ekkewe kifet, pwe ekkewe kifet meinisin repwe chök alöllö fengeni ar tümwünü fengenir lefiiler. 26Are ew me leiin ekkewe kifet a riäfföü; ekkewe kifet meinisin ra fiti ewe ew le riäfföü, nge are ew me leiin ekkewe kifet a iteüöch, ekkewe kifet meinisin ra fiti le pwapwa.

27Ämi meinisin ewe inisin Kraist, nge emön me emön leiimi ew kifet mi sókkóló o wor lamwotan me wón ewe inis. 28Iwe, ikkeiir ekkóch me leiin ekkewe kifet Kot a eleenieer lón ewe inisin Kraist, iei mwichefel: akkomwan, ekkewe chón künö, oruuwan, ekkewe chón afalafala än Kot kapas, öülüngätin, ekkewe chón esikuula än Kot kapas. Mwirin, ekkewe chón föri manaman me chókewe mi ääni ewe liffangen echikaratä chón samwaw me chókewe mi tüfichin älisi aramas me chókewe mi tüfichin wisen emmweni aramas pwe repwe angang fengen me chókewe mi tüfichin kapas lón sókkopaaten kapasen ekis. 29Iwe, ifa usun, iir meinisin ra soukünö? Apwi! Iir meinisin ra chón afalafala än Kot kapas? Apw! Iir meinisin ra chón esikuula än Kot kapas? Iir meinisin ra chón föri manaman? 30Ifa usun, iir meinisin ra ääni ewe liffangen echikaratä chón samwaw? Ifa usun, iir meinisin ra kapas lón kapasen ekis? Iir meinisin ra tongeni afföüw kapasen ekis? 31Ämi öüwa tipefiräiti ämi öüpwe ääni ekkewe liffang mi koon lingelingeló. Nge ngang üpwe äiti ngeni kemi och sókkun manaw mi fókkun echchipwör seni meinisin.

Än Paul kapasen etekiatä tong

13 Are ngang üpwe tongeni kapas lón än aramas sakkopaaten kapas me än kana chón läng kapas, nge üsap tongei ekkóch; iwe, ngang üwa chök ökürang usun ew peel mi osommóng ika och mächäwich mi achorong. 2Are ngang üwa ääni ewe liffangen afalafala ewe Kapasen Kot, pwal are ngang üwa silei ekkewe mwónómwónun lón fansoun mwach o silei usun mettóch meinisin, nge üsap tongei ekkóch, iwe, esap wor lamwotei. Iwe, are ngang üwa ääni ewe liffangen lükü pwe üwa tongeni kapas ngeni ew chuuk o föri pwe epwe mwöküt, nge üsap ääni tong; iwe, esap wor lamwotei. 3Iwe, are üpwe fangeló piseki meinisin ngeni ekkewe mi wöwingaw o ääni asór inisi pwe üpwe eingeing usun, nge üsap tongei ekkóch; iwe, esap wor öüchchean ngeniei.

4Tong a mósónóttam o kirekiröch. Tong esap lólówó, esap eingeing, esap lamalamtekia, 5esap osuufölüngaw. Tong esap kütta pwisin an. Tong esap soongokkäi, esap ömwöchü lón letipan minne mi ngaw emön a föri ngeni. 6Tong esap pwapwa ren minne ese pwüng, nge a pwapwa ren minne mi let. 7Tong a engngniló fän mettóch meinisin, a lükü mettóch meinisin, a apilükülüküw mettóch meinisin, a mósónóttam fän mettóch meinisin.

8Tong esap tongeni epwe mwüchchüló. Nge ewe tüfichin afalafala ewe kapasen Kot epwe wesiló, ewe tüfichin kapas lón kapasen ekis epwe ükütiw, pwal ewe tüfichin silelap epwe wesiló. 9Pün ach sile esap unus, pwal ach oosuni esap unus. 10Nge lupwen ewe mi unus epwe war, mwirin, minne esap unus epwe wesiló. 11Lupwen ngang üwa emön semiriit, ngang üwa ääni än semiriit kapas, üwa weweiti mettóch usun emön semiriit, üwa ekiekini ekiekin emön semiriit, nge lupwen üwa mwän, üwa pöütäló ekkewe sókósókun semiriit. 12Pün iei, usun chök nge sia nelong lón ew kilaas mi topwutop, nge mwirin sipwe nennefengen me ach Samol. Iei esap unus minne üwa silei, nge mwirin epwe unus äi sile usun chök än Kot a unusen sileei iei.

13Iwe, ikkeei ekkewe sókkun manaw mi mwirinnö repwe nónnómwóló: lükü, apilükülüköch me tong. Nge tong ewe a koon lap me leiin ekkeei.

Sókkofesenin lefiilen afalafala kapasen Kot me kapas lón kapasen ekis

14 Iwe, öüpwe achoocho le kütta ämi öüpwe ääni tong, nge öüpwe pwal tipeni ekkewe liffang seni ewe Ngüünmifel, nge fókkun lapalón ämi öüpwe afalafala ewe kapasen Kot. 2Pün emön mi kapas lón och sókkun kapas esap föüwööw, esap kapas ngeni aramas, nge i a kapas ngeni emön kot, pün esap wor emön a weweiti minne a apasa, inamwo are a apasatä kapas mi mwónómwón lón tüfichin pwisin ngünün. 3Nge emön mi afalafala kapasen Kot a kapas ngeni aramas fäniten an epwe afeffeitar ren kapasen öüröür o öpöchökküleretä ren kapasen emiriit me echipa letiper ren kapasen echipechip. 4Ewe emön mi kapas lón och sókkun kapas esap föüwööw, a föri meet i epwe pwisin feffeitä ren, nge ewe emön mi afalafala ewe kapasen Kot a föri minne mwichefel epwe feffeitä ren. 5Ngang üwa äneän pwe amwo ämi meinisin öüpwe tongeni kapas lón ekkóch kapasen ekis, nge fen lapalón, üwa äneän pwe amwo pwe ämi meinisin öüpwe tüfichin afalafala ewe kapasen Kot; pün emön mi afalafala ewe kapasen Kot a lap lamwotan seni emön mi kapas lón kapasen ekis, chiilón chök are epwe wor chón afföüw minne i a apasa pwe epwe fis än ewe mwichefel epwe feffeitä ren.

A öüchchea an epwe wor chón afföüw än emön kapas lón kapasen ekis

6Nge iei, ämi pwii kana, are ngang üpwe feitto reemi o kapas ngeni kemi lón ekkóch kapasen ekis; iwe epwe meet lamwoten äi kapas ngeni kemi? Nge are üpwe pwääri ngeni kemi minne ekiekin Kot, ika ekkóch kapasen silelap ika ekkóch kapasen oosuni ika ekkóch kapasen käit, ina meet epwe älisi kemi. 7Pwal mwo ekkewe pisekin likettik usun likaangün ika kitar, inamwo ika esap wor manaw lóór, nge ra pwärätä usun öüchchean ach sipwe kapas lón kapas sipwe wewe ren. Pün epwe ifa usun än emön epwe silei ika ifa ewe ngiingi ika kööl, are esap föüwööw fengen ekkewe sókkun ngiingi lupwen ra tik? 8Pwal usun chök are ewe rappwa a ttik, nge esap fatöch ngiingin tikin, iwe epwe ifa usun än ekkewe sounfiu repwe silei ar repwe mollotä ngeni maun? 9Iwe, pwal ina chök usun reemi. Pün are öüpwe kapas ngeni aramas lón och sókkun kapas resap weweiti; iwe, epwe ifa usun ar repwe silei wewe meet öüwa apasa? Wewen pwe öüwa chök kapas ngeni äsäpwääl. 10Pwüngün pwe mi wor chómmóng sókkopaaten än aramas kapas lón fönüfan, nge iir meinisin ra echchipwör fäniten chókana mi weweitiir, 11nge ngeniei, esap wor och weweer. Are üsap silei wewen kapasen ew fönü; iwe ngang üpwe emön chón ekis ngeni ewe mi ääni ei kapas, nge i epwe emön chón ekis ngeniei. 12Iwe, iei usun reemi. Pwokiten ämi öüwa tipefiräiti pwe öüpwe ääni ekkewe liffangen ngüün; iei minne, öüpwe tungór ngeni Kot fäniten ekkana liffangen ngüün repwe äfeffeitäi unusen mwichefel.

13Iei minne, are emön a ääni ewe liffangen kapas lón och sókkun kapas esap föüwööw, epwe iótek pwal fäniten ewe liffangen afföüw kapasen ekis pwe epwe tongeni affata le üreni aramas meet i a apasa. 14Pün are ngang üwa iótek lón pwal och sókkun kapas esap föüwööw, üwa chök iótek ren enienin awei, nge üsap weweiti meet üwa apasa. 15Iwe, meet chök ngang üpwe föri? Üpwe iótek ren enienin awei, nge üpwe pwal iótek lón kapas üpwe weweiti. Ngang üpwe kööl ren enienin awei, nge üpwe pwal kööl fiti äi ekiek. 16Pün are öüpwe mwareiti Kot ren chök meet sókkun mwelieli esap föüwööw a towu seni awemi; iwe epwe ifa usun än emön esap wewe mi nóm lón ewe leeni epwe tongeni apasa “Amen” lupwen öüwa iótekin kilisou, nge i esap weweiti minne öüwa apasa? 17Pün eli ämi öüwa wesewesen iótekin kilisou ngeni Kot, nge esap älisi ekkewe ekkóch resap wewe mi nóm reemi ar repwe feffeitä lón manaweer.

18Ngang üwa kilisou ngeni Kot, pün ngang üwa tongeni kapas lón ekkóch sókkun kapasen ekis lap seni kemi meinisin. 19Nge me lón mwichefel, ngang üwa fen efich äi üpwe apasa limu chök kapas nge mi fiti äi ekiek epwe älisi ekkóch, lap seni äi üpwe apasa engol ngöröw kapas lón pwal och sókkun kapas esap föüwööw.

Kapas lón kapasen ekis esissilen chón resap lükü

20Ämi pwii kana mi ächengicheng, öüsap usun chök kana semiriit lón ämi weweiti ekkeei mettóch. Öüpwe usun kana mönükól lón föfför mi ngaw, nge öüpwe tipeni tipen mei mwuk lón ämi ekiek. 21Pün a mak lón ewe pwuken öllük:“Ngang üpwe kapas ngeni ei mwichen aramas ren och sókkun kapas mi sókkóló mi toowu seni awen ekkóch chón ekis. Iwe, ina mwo nge resap mochen öüseling ngeniei,” alon ewe Samol.”a

22Iei minne, öüwa küna pwe kapas lón ekkóch sókkun kapasen ekis ra och esissil fäniten chókana resap lükü, nge sap fäniten chókana mi lükü. Nge afalafala kapasen Kot a fäniten feiöchün chókana mi lükü nge sap chókana resap lükü. 23Iei minne, are unusen ewe mwichefel a mwichfengen lón ew leeni o iir meinisin ra kapas lón ekkóch sókkun kapasen ekis, nge a wor ekkóch aramas resap weweiti ekkeei mettóch ika pwal chókana sap iir chón lükü ra tolong lón ämi mwich, ifa usun, resap apasa pwe öüwa umwes? 24Nge are emön aramas sap i chón lükü ika emön esap weweiti ekkeei mettóch epwe tolong lón ämi mwich lupwen öüwa afalafala ewe kapasen Kot, epwe mengiringir o meefi pwe i emön chón tipis, epwe pwal el letipan lupwen epwe rong meet öüwa apasa. 25Lupwen a öüseling, eki mwónómwónen letipan repwe le pwääpwäló; iwe, epwe le chappetiw o fel ngeni Kot. Epwe pwal aporausafeili pwe Kot a enletin nónnóm lefiilemi.

Pwüngüöchün kókkóóten lón mwichefel

26Iwe, ämi pwii kana, meet sipwe öpwüngaló ren meet keei ngang üwa apasa? Iteiten fansoun lupwen öüpwe mwich fengen, emön leiimi epwe chietä echö kööl seni kewe köölfel, emön epwe esikuula ewe kapasen Kot, emön epwe aporausa minne Kot a pwääri ngeni, emön epwe kapas lón och sókkun kapas esap föüwööw, nge emön epwe wisen afföüw meet i a apasa. Öüpwe föri ekkeei mettóch meinisin fäniten an epwe lamwot ngeni meinisin o afeffeitäi mwichefel lón ewe Samol. 27Are epwe wor iöön epwe kapas lón pwal och sókkun kapas esap föüwööw; iwe, epwe chök rüömön, nge ika epwe lapaló; iwe, ülümön repwe kapas. Repwe kapas, emön mwirin pwal emön, nge epwe wor emön mi mollotä pwe epwe afföüw meet ra apasa. 28Nge are esap wor emön chón afföü mi nóm; iwe, epwe chök fanafaneló me lón mwichefel, nge epwe le chök kapas ngeni pwisin i me Kot le mwónómwón.

29Rüömön ika ülümön chón afalafala ewe kapasen Kot ra tongeni kapas, nge ekkewe pwal ekkóch repwe wisen etittina fän tipemiriit minne ra ääni afalafal. 30Nge are Kot epwe pwääri och mettóch mi fö ngeni emön leiin ekkewe mi mómmóót; iwe, ewe mi kapas epwe mwo fanafanaló le kapas. 31Epwe iei usun, pün ekkewe chón tüfichin afalafala kapasen Kot meinisin repwe afalafal emön mwirin emön, pwe ekkewe aramas meinisin repwe tongeni käeö, pwal meinisin repwe tongeni pöchökkületä lón ar lükü. 32Chechchemeni pwe ekkewe aramas mi tüfichin afalafala ewe kapasen Kot repwe tongeni pworaiti le nemeni pwisin ekiekin letiper ar repwe tongeni witiwit ar fansoun le kapas. 33Pün Kot esap I emön Koten kókkóótóngaw, pwe I emön Koten kinamwe.

Usun minne a fis lón ekkewe mwichen chón pin kana

34Ekkewe fefin repwe chök fanafaneló me lón ekkewe mwichefel, pün esap mwüümwütä ngeniir pwe repwe kapas. Nge repwe anómwur fän nemenem, usun ewe öllük a pwal apasa. 35Iwe, are ra mochen repwe kapas eiis usun och, repwe eisini pwülüwer kewe me lón imwer. Pün mi fókkun ässääw ngeni fefin ar repwe afalafal ótun fel me lón mwichefel.

36Ifa usun, öüwa ekieki pwe silelapeei än Kot kapas a pop seni kemi, ämi ekkana chón Korint? Ika ämi chök ekkewe ewe kapasen Kot a tori kemi? Ika ina usun ämi ekieki, iwe, öüwa mwääl! 37Are emön a ekieki pwe i emön chón afalafala än Kot kapas ika i emön mi wor an liffangen tüfichin ngüün; iwe, i epwe tipeew ngeni le pwärätä pwe ekkeei mettóch ngang üwa makkei ngeni kemi, ikkeei än ewe Samol öllük. 38Nge are emön esap mochen esilla ewe pwüüng me nemenem lón ekkeei kapas; iwe, i esap pwal siil pwe i emön mi wor an tüfich meren Kot.

Mettóch meinisin epwe pwüngüöch tettelir me akkóóter

39Iei minne, ämi pwii kana, öüpwe fókkun tipefiräiti ämi öüpwe tüfichin afalafala än Kot kapas, nge öüsap chök pwal pinei än ekkóch repwe kapas lón ekkóch sókkun kapasen ekis. 40Nge öüpwe tümwünüöchüw pwe öüpwe föri mettóch meinisin lón pwüngüöchün tettel me akkóótöch.

Än Kraist manawsäfäl seni mäló iei öüchechan lóngólóngun ach lükü

15 Iwe, ämi pwii kana, iei üwa mochen üpwe ächchema ngeni kemi ewe poraus allim ngang üwa fen afalafala ngeni kemi me mwan. Ämi öüwa fen etiwa o öüwa chüen etiwa iei pün ämi lükü a lóngólóng wón ei poraus mi amwaraar. 2Pwal iei ewe poraus allim mi amanawa kemi, are ämi mi kömwöchünnük wón ewe kapas ngang üwa afalafala ngeni kemi. Nge are öüsap kömwöchünnük wón; iwe, ämi lükü mi pöön.

3Pün ngang üwa atoura ngeni kemi ewe poraus mi fókkun öüchchea, meet pwal ngang üwa angei: pwe Kraist a mäló fäniten ach kana tipis, usun chök minne ewe taropwe mi pin a apasa, 4pwe I a peiaseló, pwe I a manawsäfäl seni mäló lón ewe öülüngätin rän, usun minne ewe taropwe mi pin a apasa, 5pwe I a pwää ngeni Kefas, nge mwirin a pwal pwää ngeni ekkewe engol me rüömön chón künö. 6Mwirin ena, I a pwää ngeni lap seni limöpwükü pwiipwi chón lükü fän ew chök, chómmóng me leiir ra chüen manaw tori ikenäi, nge ekkóch leiir ra möürüló lón mäló. 7Pwal mwirin ena, a pwää ngeni James, mwirin, a pwal pwää ngeni ekkewe soukünö meinisin. 8Iwe, ömwüchchülón I a pwal pwää ngeniei, a ineet me pwongian me mwirin an pwää ngeni ekkewe ekkóch, usun chök nge ngang üwa upwutiw lón ew fansoun esap pwüng ngeni ótun äi üpwe upwutiw.

9Pün ngang üwa kisifóchófóch me leiin ekkewe soukünö, ese fich ngeniei äi üpwe iteni emön soukünö, pwokiten ngang üwa eriäfföwü ewe mwichefelin Kot le tapwerifeiliir. 10Nge pwokiten ümöümöchün Kot, ngang üwa iei usun nónnómwi. Iwe, a pwääló pwe än Kot ümöümöch ngeniei esap lamwot mwääl, pün ngang üwa angang weires lap seni ekkewe ekkóch soukünö meinisin. Iwe, nge sap chök ngang, nge i Kot ewe mi angang lóói ren an ümöümöch. 11Iei minne, ese lifilifil ika ngang üwa afalafala ewe poraus allim ika iir. A chök öüchchea pwe ämi öüwa lükü meet äm aia afalafala ngeni kemi.

Än Kraist manawsäfäl seni mäló iei öüchchean lóngólóngun ach epilükülük

12Pwokiten äm aia afalafala pwe Kraist a manawsäfäl seni mäló, iwe, pwata ekkóch me leiimi ra apasa pwe ekkewe mi mäló resap manawsäfäl? 13Nge ika ekkewe mi mäló resap manawsäfäl; mwirin, Kraist esap pwal manawsäfäl seni mäló. 14Iwe, are Kraist esap manawsäfäl seni mäló; mwirin, äm afalafal a chök pöön, nge ämi lükü a pwal pöön. 15Nge fen lapalón, epwe le pwääló pwe äm ekkewe soukünö, äm nöün Kot chón pwärätä mi chofona, pwokiten äm aia pwärätä pwe Kot a amanawasäfäli Kraist seni peias. Nge ika wesewesen pwüngün pwe Kraist esap manawsäfäl, iwe, ekkewe mi mäló resap pwal manawsäfäl seni mäló. 16Pün are ekkewe mi mäló resap manawsäfäl; iwe, Kraist ese pwal manawsäfäl. 17Iwe, are Kraist esap manawsäfäl seni mäló; iwe, esap wor lamwoten ämi lükü; nge ämi öüwa chüen nóm fän önümaamaw fäniten ämi kewe tipis. 18Mwirin, pwal chókana ra fen möürün mäló lón ar lükü Kraist ra määfeiengaw feilfeilló chök. 19Nge are sia apilükülüküw Kraist fäniten chök ei manaw; iwe, kich aramas mi attong me leiin aramasen fönüfan meinisin.

Än Kraist manawsäfäl a älleta pwe chón lükü meinisin repwe pwal manawsäfäl

20Nge a wesewesen pwüng pwe Kraist a manawasäfäl seni mäló, I a wiliti ewe mwen üwa a mweii chókana mi möurün mäló nge repwe manawsäfäl. 21Pün usun chök mäló a tolong lón fönüfan ren ewe emön chök aramas, Adam; iwe, iei manawsäfäl seni mäló a poputä ren ewe pwal emön aramas, Kraist. 22Pün lón Adam, aramas meinisin ra mäló; iwe pwal ina chök usun, pün lón Kraist, aramas meinisin mi lükü repwe manaw. 23Nge mi wor tettelin ei manawsäfäl: Kraist ewe mwenuwa a akkomw le manawsäfäl, mwirin, lupwen Kraist epwe liwinsäfäl, chókana iir nöün Kraist repwap manawsäfäl. 24Mwirin ei, epwap war ewe fansoun sópwólón lupwen Kraist epwe angei ewe mwüü o ngeni ewe Kot Saam, mwirin an ounusöchchüoló le okkufu ekkewe nemenem meinisin me pwüüng meinisin me manaman mi üüngeni Kot. 25Pün Kraist epwe fókkun nemenem tori an epwe anómwu chón opwutan kana meinisin fän pecheen. 26Iwe, ewe ömwüchchülón chón opwutan epwe kataaló, iei i mäló. 27Pün ewe taropwe mi pin a apasa: “Kot a atolonga mettóch meinisin fän pecheen Kraist pwe repwe nóm fän an nemenem.” Nge lupwen a apasa pwe “mettóch meinisin” ra nóm fän än Kraist nemenem, a fókkun fat pwe Kot esap apachalong pwisin I, pün I ewe mi wisen atolonga mettóch meinisin fän än Kraist nemenem. 28Iwe, lupwen ekkewe mettóch meinisin repwe nóm fän än ewe Naaw nemenem, mwirin, pwisin ewe Naaw epwe anómwu I fän än ewe Kot Saam nemenem, ewe mi anómwu mettóch meinisin fän än ewe Naaw nemenem, pwe Kot ewe Ülümön-lón-Emön chök Kot epwe unusen nemeni mettóch meinisin.

Minne epwe fis are sisap lükü pwe mi wor manawsäfäl

29Iwe, are pwüngün pwe ekkewe mi mäló resap fókkun manawsäfäl, iwe, meet chök popun ekkewe aramas ra papatais fäniten ekkewe mi mäló? Pwata ra föri ika ekkewe mi mäló resap manawsäfäl? 30Nge meet chök popun pwisin äm äipwe atolonga manaweem lón feiengaw iteiten fansoun meinisin? 31Pün ngang üwa ökköpöl, ämi pwii kana, pwe ngang mi chök nóm lón feiengawen mäló iteiten rän. Ei a fókkun enlet usun chök äi sikäsini meet ewe Samol Jesus Kraist a föri lón manawemi. 32Are ngang üwa fiu ngeni ekkewe maan mwacho me lón Efisos fäniten chök och sókkun ekiekin aramas; iwe, epwe meet lamwotan ngeniei, are esap wor manawsäfäl seni mäló? Pün are esap wor manawsäfäl seni mäló; iwe, mi fen mwirinnö “sipwe le mwömwöngö o ükkün pün lesor sipwe mäló!”a 33Öüte chök tupwutä ren chókana mi apasa ei sókkun kapas, pün: “Chiechi ngeni aramas mi föfför ingaw a angawaló och manaw mi nwirinnö.” 34Öüpwe miriitiló ngeni minne mi pwüng o ükütiw le föri tipis, pün mi wor ekkóch me leiimi resap mwo silei Kot. Üwa apasa ei pwe öüpwe sääw ren.

Ewe inis mi manawsäfäl epwe fókkun ling

35Nge, eli ina emön epwe apasa: “Epwe ifa usun än ekkewe mi mäló repwe manawsäfäl? Meet sókkun inis repwe inisini? 36En emön mi umwes! Lupwen ka fótukätiw eföw föün irä lón pwül, esap pwükütä an epwe wiliti efóch irä are esap mwo akkomwen mäló. 37Iwe, meet ka pisenätiw lón ewe pwül, kosap piseni ewe inisin irä, pwe ka amwora kewe föün, eli föün wiit ika föün pwal ekkóch sókkun irä mi wor föüür. 38Mwirin, Kot a wisen ngeni och me och kewe sókkun irä en me inisin usun chök minne pwisin I a mochen. Och sókkun irä a pwükütä seni ew me ew sókkun pwikil. 39Iwe, usun chök an a wor sókkopaaten sókkun föün irä me irä, iwe, pwal ina chök usun an a wor sókkopaaten sókkun fituk. Pün fituk meinisin resap wewe fengen, pün a wor och sókkun fituken aramas, pwal och sókkun fituken maan, pwal och sókkun fituken iik, nge pwal och sókkun fituken määnsüüsü. 40A wor ekkewe sókkun inis inisin chón läng me ekkewe inis inisin chón fönüfan. Ewe sókkun inis inisin chón läng a sókkóló lingan seni lingen ewe sókkun inis inisin chón fönüfan. 41A och sókkun lingen ewe akkar, nge pwal och sókkun lingen ewe maram, pwal och sókkun lingen ekkewe füü. Pwal mwo eföw füü nge a sókkóló lingan seni pwal eföw füü.

42Iwe, epwe pwal iei chök usun lupwen sipwe manawsäfäl. Inisich minen fönüfan mi tongeni ar epwe mä o kirow, repwe sókkóló lupwen sipwe manawsäfäl, pün resap chüen tongeni ar repwe mä o kirow. 43Ewe inis a fótutiw lón lingengaw, nge lupwen epwe manawsäfäl epwe le wiliti ew inis mi uren ling. A fótutiw lón apwangapwang, nge lupwen epwe manawsäfäl epwe le wiliti ew inis mi uren tüfich. 44Ei inis a fótutiw nge a sókkuni sókkun fituk me chcha, nge lupwen epwe manawsäfäl epwe le wiliti ew inis mi sókkuni sókkun ngüün.

A wor ew inis a sókkuni sókkun fituk me chcha, nge a pwal wor ew inis a sókkuni sókkun ngüün. 45Pün iei usun minne a mak lón ewe taropwe mi pin: “Ewe äemönün aramas, Adam a wiliti emön aramas mi manaw.”a Nge ewe ömwüchchülón Adam, iei i Kraist i emön Ngüün mi efisätä manaw. 46Iwe, nge ewe inis mi sókkuni sókkun ngüün esap akkomw, pwe ewe mi sókkuni sókkun fituk me chcha a akkomw, mwirin ewe mi sókkuni sókkun ngüün. 47Adam, ewe äemönün aramas, i seni fönüfan, a för seni pwülün fönüfan. Nge Kraist, ewe örüömönün Aramas, iei i ewe Samol, a feitto seni läng. 48Iteiten aramas meinisin a wor inisiir minen fönüfan usun chök inisin Adam, nge inisich minen läng repwe usun chök inisin Kraist. 49Iei kich sia för usun chök Adam, ewe mwän seni fönüfan, nge lón ew rän, kich sipwe pwal för pwe sipwe usun chök Kraist, ewe Mwän seni läng.

Än Kraist liwinsäfälito, iei ömwüchchülón än mäló a kuf rech

50Iwe, ämi pwii kana, iei meet ei ngang ü apasa: Minne a pop seni fituk me chcha esap tongeni epwe mwüüni ewe mwüün Kot. Inisich keei mi tongeni ar repwe mä me kirow, resap tongeni manaw tori feilfeilló chök. 51Nge nengeni, ngang üpwe üreni kemi och mwónómwón mi amwaraar Kot a fen pwääri ngeni kich: Sap kich meinisin sipwe möürüló lón mäló, nge kich meinisin sipwe wililó. 52Ei epwe fis lón ew chök fansoun mi mwittir, lón ew chök morupen maas, lupwen ewe ömwüchchülón rappwa epwe ttik. Pün lupwen ewe rappwa epwe ttik; iwe, ekkewe chón lükü mi mäló repwe manawsäfäl, nge inisiir epwe le wililó. Mwirin, öükich ekkewe mi chüen manaw sipwe pwal wililó pün sisap chüen tongeni mäló. 53Pün inisich keei minen fönüfan mi tongeni ar epwe kirow, repwe le wililó ngeni inis minen läng resap tongeni mäló. 54Iwe, lupwen epwe fis ei - lupwen inisich keei minen fönüfan mi tongeni ar repwe kirow, repwe wililó ngeni inis minen läng resap tongeni mäló, mwirin epwe le pwönüetä ewe kapas mi mak lón ewe taropwe mi pin a apasa: “Mäló a kuf ren pworan ewe SAMOL.”b 55En mäló, ifa óm leenien kükkük? En leenien sotup, ifa óm pwora?c 56Pün tipis iei än mäló leenien kükkük, nge ekkewe öllük ra ngeni tipis än pöchökkül. 57Nge kilisou ngeni Kot, I ewe a fang ngeni kich ach pwora ngeni tipis me mäló lón ach we Samol Jesus Kraist.

58Iei minne, ämi pwii kana mi ächengicheng, öüpwe likiitü o appósakemi, öüpwe esselükaló ämi achoocho iteiten fansoun meinisin lón än ewe Samol ei angang, pün öüpwe silei pwe ämi pekkus le angang weires fäniten ewe Samol esap fókkun lussumwäl.

Angangen ionifengeni ewe älillis fäniten ekkewe chón pin

16 Iwe, fänäsengesin ewe älillis öüwa ionifengeni fäniten ekkewe chón pin lón Jerusalem, öüpwe öppirüw usun minne ngang üwa ääni öüröür ngeni ekkewe mwichefelin Kalatia. 2Lón ewe äewin ränin iteiten wiik, emön me emön leiimi epwe äimwueló och üküükün mooni alóngólóng wón minne i a tüfich ngeni, iwe, öüpwe isenaló. Öüsap witiwit tori äi üpwe war, mwirin öüpwap ionifengeni ei älillis. 3Iwe, lupwen üpwe war, ngang üpwe makkei echö taropwen ölükülük fäniten ekkewe chón künö ämi öüwa filiiretä pwe repwe uweeló ämi na liffang Jerusalem. 4Nge are epwe öch ngeniei äi üpwe pwal feilló; iwe, äm aipwe tongeni sääippök.

Än Paul akkóót

5Iwe, iei ngang üpwe le feitto reemi, mwirin äi üpwe pwereto leemelen Masedonia (pün ngang üwa akkóóta pwe üpwe pwereto leemelen Masedonia). 6Ika epwe tüfich, iwe, üpwe nónnómwottam reemi, eli lón ewe fansoun patapaten leefen, pwe öüpwe tongeni osuuweiló äi üpwe sópweló äi sääi ngeni iaan ngang üpwe feilló ie. 7Pün lón ei fansoun, ngang üsap mochen äi üpwe chök chuuri kemi lón fansoun mwochomwooch; nge mwirin, üpwe mwittir feilló seni kemi. Pün üwa apilükülüküw pwe üpwe war o nómwóló mwo reemi lón ekkóch fansoun, are ewe Samol mi mwüüt ngeniei. 8Nge lón ei fansoun, ngang üpwe mang me ikeei lón Efisos, pün üpwe nóm tori ewe chuulapen Pentikost, 9pwokiten a wor ew asam mi suuk chööchöló ngeniei fäniten och angang mi öüchchea ikeei. Nge mi pwal wor chómmóng ra üüngeniei.

10Iwe, lupwen Timothy epwe war, öüpwe tümwünüfichi pwe esap wor minne epwe nuokkus ren lupwen epwe nóm reemi, pün i a föri än ewe Samol angang, usun chök pwal ngang. 11Iei minne, esap wor leiimi esap mochen epwe etiwa Timothy. Nge öüpwe älisi i pwe epwe sópweló an sääi lón kinamwe pwe i epwe tongeni liwinsäfälito rei. Pün ngang üwa chök ösüküsükü pwe epwe liwinsäfälito fiti ekkewe pwal ekkóch pwiipwi chón lükü.

12Iwe, fänäsengesin pwiich we Apollos, ngang üwa fókkun eneen le peseei i pwe epwe fiti ekkewe pwiipwi chón lükü le feillo reemi. Nge i esap nien mochen an epwe feillo lón ei fansoun. Iwe, ina epwap feillo reemi mwirin, lón ew ótun lupwen a wor an fansoun epwe tawe ngeni.

Än Paul ömwüchchülón kapasen öüröür

13Öüpwe mammasafichi, öüpwe üppós lón ämi lükü, öüpwe tipepwora usun tipen mwän, öüpwe pöchökkül. 14Meinisin minne öüpwe föri, öüpwe föri lón tong.

15Ämi pwii kana, ämi mi silei pwe Stefanas me chón an famili, iir ekkewe äkkäewin mwenuwa ra akkomwen lükü me lón Akaia, pwal iir ekkewe ra fangelong manawer pwe repwe chón atamatam le angang ngeni ekkewe pwal ekkóch chón pin. Ngang üwa tungór ngeni kemi, ämi pwii kana, 16pwe öüpwe unusen suufölitiir me ekkewe pwal ekkóch mi wewe ngeniir, ra älillis le angang o fiti kich le pekkus le angang weires. 17Ngang üwa pwapwa pwe Stefanas me Fortunatus me Akaikus ra wareto, pün iir ra tupwuni kemi le föri ngeniei minne ämi öüsap tongeni föri, pün öüsap nóm rei. 18Pün iir ra öpöchökkülätä letipei usun chök ar pwal öpöchökkülätä letipemi. Iei minne öüpwe esiller ren ämi öüpwe suuföliti ekkeei sókkun aramas mi älillisöch.

Än Paul kapwongen kapwin

19Ekkewe mwichefel ikeei lón ekkewe eifen Asia ra kapwong ngeni kemi lón ewe Samol ren unusen letiper, fiti Akwila me Priscilla me pwal ewe mwichefel mi mwimwich fengen lón imwer we. 20Ekkewe pwiipwi chón lükü meinisin ra üreniei pwe üpwe uweei ar kapwong ngeni kemi. Öüpwe kapwong fengen lefiilemi ren ew mitimit mi pin.

21Ngang Paul üwa makkei äi ei kapwong ren pwisin peii.

22Are emön aramas esap tongei ewe Samol Jesus Kraist; ena aramas epwe önümamaaw. Äm Samol, kopwe feitto!

23Ümöümöchün ach Samol Jesus Kraist epwe nónnóm reemi.

24Äi tong epwe nónnóm reemi meinisin lón Kraist Jesus. Amen.