1 John

Kapas akkomw

1Minne a nóm seni lepoputän, minne äm aia fen rongorong, minne äm aia fen küna ren meseem, minne äm aia nennengeni o attapa ren pöüüm, iei meet äm aia aronga ngeni kemi usun ewe Kapasen manaw. 2Iei ewe manaw a pwä o äm aia küna. Iwe, äm aia pwärätä usun o aronga ngeni kemi pwe I ewe manaw esemwüch. I a nónnóm ren ewe Saam nge mwirin a pwää ngeni keem. 3Minne äm aia küna o rong, äm aia pwal esile ngeni kemi, pwe pwal ämi öüpwe tongeni fiti keem lón äm chiechifengen. Iwe, pwüngün pwe äm chiechifengen, aia fiti ewe Saam me Nöün we Jesus Kraist. 4Iwe, äm aia makkei ngeni kemi ekkeei mettóch pwe äm pwapwa epwe unus.

Lóngólóngun ach chiechi ngeni Kot

5Iwe, iei ewe poraus äm aia fen rong seni I o iei aia pwal esile ngeni kemi pwe Kot I saram. Lón Kot esap fókkun wor och rochopwak. 6Are sia apasa pwe sia chiechi ngeni Kot, nge sia chók sópweló le fätäl lón rochopwak, sia chofona o sisap föri minne a let. 7Nge are sia sópweló le fätäl lón ewe saram, usun chök I a nóm lón ewe saram, sia chiechi fengen me Kot, iwe, chaan Jesus Kraist, Nöün we, a limeti kich seni tipis meinisin.

8Are sia apasa pwe esap wor ach tipis, sia pwisin otupwu kich o ewe let esap nóm lóóch. 9Are sia pwärätä ach kana tipis, I a ölükülük o pwüng pwe epwe omwusaló seni kich ach kana tipis o limeti kich seni ach pwüngingaw meinisin. 10Are sia apasa pwe sisap tipis; iwe, sia föri pwe Kot a emön chón chofona o an kapas esap nóm lóóch.

2Neii kana kükkün semiriit, ngang üwa makkei ngeni kemi ekkeei mettóch pwe öüsap tipis. Nge ika emön a föri tipis, iwe, mi wor emön nöüch Chón Älillis mi nóm ren ewe Saam, I Jesus Kraist ewe Emön mi Pwung. 2I ewe asóren omwusomwusen tipis fäniten ach kana tipis. Nge esap fäniten ach chök, pwe pwal fäniten tipisin unusen chón fönüfan.

Lóngólóngun ach sipwe silei Kot

3Iwe, ren ei, sia silei pwe kich sia silei Kot, are sia älleasochisi an kewe öllük. 4Emön mi apasa: “Ngang üwa silei Kot” nge esap älleasochisi än Kot kewe öllük, i emön chón chofona o ewe let esap nóm lón i. 5Nge emön mi älleasochisi än Kot kapas, än Kot tong a enletin unusöchüló lón manawan. Ren ei, sia tongeni silei pwe sia nónnóm lón Kot. 6Emön mi apasa pwe i a nónnóm lón Kot, epwe fókkun öüchcheani an epwe fätäl lón ewe chök aal I a fätäl lón.

7Ämi ekkana mi ächengicheng, ei öllük ngang üwa makkei ngeni kemi esap ew öllük mi fö nge i ew öllük minen lóóm, ewe a fen nóm reemi seni chök lepopun. Ei öllük minen lóóm, iei ewe kapas ämi öüwa fen rongorong me mwan. 8Iwe, inamwo nge ei öllük üwa makkei ngeni kemi a usun chök nge ew öllük mi fö pün a fen pwääló letan lón Kraist me lóómi, pwokiten rochopwak a süüló, nge ewe enletin saram a fen tittin.

9Emön mi apasa pwe i a nonnom lón ewe saram, nge i mi chök opwut pwiin, i a chüen chök nónnóm lón rochopwak tori iei. 10Emön mi tongei pwiin, a chök nónnóm lón ewe saram o i esap popuw minne emön epwe chepek ren. 11Nge emön mi opwut pwiin, a chök nónnóm lón rochopwak o fäffätäl lón rochopwak. Iwe, esap silei ian i epwe feilló ie pwokiten ewe rochopwak a ochunna mesan.

Nónnómwun ekkewe chón älleani ei taropwe lón peekin ngünür

12Ngang üwa mak ngeni kemi ämi kana kükkün semiriit, pwokiten ämi kewe tipis ra fen mwusóló seni kemi pwokiten iten Kraist. 13Ngang üwa mak ngeni kemi ämi kana saam, pwokiten ämi öüwa fen silei Kraist, ewe Emön mi nóm seni chök lepopun. Ngang üwa mak ngeni kemi ämi kana ölüöl, pwokiten, ämi öüwa fen okkufu ewe emön mi ingaw. Ngang üwa mak ngeni kemi ämi kana kükkün semiriit, pwokiten ämi öüwa silei ewe Saam. 14Ngang üwa mak ngeni kemi ämi kana saam, pwokiten ämi öüwa silei Kraist, ewe Emön mi nóm seni chök lepoputän. Ngang üwa mak ngeni kemi ämi kana ölüöl, pwokiten ämi öüwa pöchökkül o ewe kapasen Kot a nónnóm lóómi, o öüwa fen okkufu ewe emön mi ingaw.

Öusap tongei fönüfan

15Öüsap tongei ei fönüfan mi ngaw me ekkewe mettóchun lón fönüfan meinisin. Are emön a tongei fönüfan; iwe, tongen ewe Saam esap nónnóm lón i. 16Pün meinisin minne a nóm lón fönüfan: mocheniän fituk me mocheniän maas me lamalamtekia ren meet mi wor reech. Ekkeei resap pop seni ewe Saam, pwe ra pop seni ei fönüfan mi ngaw. 17Iwe, ei fönüfan epwe taaló fiti fengen me mocheniän. Nge iö mi föri letipen Kot epwe nónnóm tori feilfeilló chök.

Ekkewe sókkun föfförün otupwutupw lon ewe ömwüchülón fansoun

18Ämi kana kükkün semiriit mi ächengicheng, iei a tori ewe ömwüchchülón kinikinin fansoun. Iwe, usun ämi öüwa fen rong pwe ewe chón üüngeni Kraist epwe war, iei usun a fen wor chómmóng chón üüngeni Kraist ra fen war. Iei minne, sia silei pwe iei a tori ewe sópwólón kinikinin fansoun. 19Ekkeei aramas ra toowu seni leiich, nge iir resap chiechiach. Pün are iir chienach; iwe, repwe chok sopwelo le nónnóm reech. Nge iir ra toowu seni kich pwe epwe leteló pwe iir meinisin resap chienach.

20Nge ami a fen wor epitemi we seni ewe Emön mi Pin, ina popun ämi meinisin öüwa silei mettóch meinisin. 21Ngang üwa mak ngeni kemi, esap pwokiten itä ren ämi öüsap silei ewe let, nge i fen pwokiten ämi mi silei ewe let pwal pwokiten ämi mi silei pwe esap wor och chofona a feitto seni ewe let. 22Iöön ewe chón chofona, sap ewe emön mi amaamäsini pwe Jesus I ewe Kraist? Iei i ewe chón üüngeni Kraist, ewe emön mi amaamäsini ewe Saam me ewe Naaw. 23Esap wor emön mi amaamäsini ewe Naaw a ääni ewe Saam. Ese lifilifil ika iö mi pwärätä ewe Naaw, a pwal ääni ewe Saam.

24Öüpwe mwüüt ngeni meet ämi öüwa rong seni lepoputän epwe nónnóm lóómi. Are meet öüwa rong seni lepoputän a nónnóm lóómi, mwirin, pwal ämi öüpwe nónnóm lón ewe Naaw me lón ewe Saam.

Mwüüt ngeni ewe let epwe nónnóm lóómi

25Iwe, iei ewe pwon I a ääni ngeni kich. I a pwon ngeni kich ewe manaw ese mwüch. 26Ngang üwa makkei ekkeei mettóch ngeni kemi fäniten chókana mi sótuni ar repwe otupwu kemi. 27Nge ewe kepit ämi öüwa angei seni I a nónnóm lóómi. Iwe, öüsap osupwangen än emön epwe äiti ngeni kemi meet mi let. Nge ewe kepit I a ngeni kemi, a äiti ngeni kemi usun mettóch meinisin. Iwe, meet I a äiti ngeni kemi, a let, nge esap och chofona. Iei popun öüpwe sópweló le nónnóm lón Kraist usun chök meet ewe kepit a äiti ngeni kemi.

Ekkewe nöün Kot

28Iwe iei, ämi kana kükkün semiriit mi ächengicheng, öüpwe chök sópweló le nónnóm lón I, pün lupwen I epwe pwä, epwe wor ach apilükülük o sisap opoló seni I lón ach sääw lupwen i epwe war.

29Are öüwa silei pwe Kraist a pwüng, iwe, öüwa pwal tongeni silei pwe iö mi föfföri meet mi pwüng a fen up seni Kot.

3Öüpwe nengeni meet sókkun tong ewe Saam a fen fang ngeni kich pwe sipwe iteni nöün Kot, pün kich sia wesewesen nöün Kot! Iwe, popun än fönüfan esap silei kich, pün esap silei Kot. 2Ämi ekkana mi ächengicheng, kich sia nöün Kot iei. Iwe, meet kich sipwe sókkuni esap mwo pwä. Nge sia silei pwe lupwen Kraist epwe pwä; kich sipwe chök wewe ngeni I, pwokiten sipwe le nengeni I lón wesewesen likilikin. 3Iwe, iteiten emön me emön mi iei usun an anómwu an apilükülük lón I, epwe sópweló le elimöchchüw manawan, usun chök Kraist a limöch.

Usun tipis me emön nöün Kot

4Iteiten emön me emön mi chök öörüni le föfföri tipis, a atai än Kot öllük, pün tipis iei atai än Kot öllük. 5Iwe, öüwa silei pwe Kraist a fen pwääto pwe epwe angealó ekkana tipis, nge esap wor och tipis lón manawan. 6Esap wor emön mi nónnóm lón Kraist a sópweló le föfföri tipis. Esap wor emön mi chök sópweló le föfföri tipis a küna Kraist ika silei Kraist.

7Ämi kana kükkün semiriit mi ächengicheng, öüsap mwüüt ngeni emön epwe otupwu kemi usun ei. Ese lifilfil ika iö mi föfföri meet mi pwüng, i a pwüng, usun chök Kraist a pwüng. 8Ese lifilifil ika iö mi chök sópweló le föfföri tipis, i nöün ewe devil, pün ewe devil a föfföri tipis seni chök lepoputän. Iei popun ewe Nöün Kot a pwääto pün epwe ataeló ekkewe angang än ewe devil. 9Esap wor emön mi up seni Kot a sópweló le föfföri tipis, pün ewe pwikilin Kot a nónnóm lón i, iwe, i esap tongeni epwe sópweló chök le föfföri tipis, pwokiten i a fen up seni Kot. 10Ren ei, a pwääpwäló iö kana nöün Kot me iö kana nöün ewe devil. Ese lifilifil ika iö esap föfföri minne mi pwüng me emön esap tongei pwiin, esap up seni Kot.

Öüchchean tong

11Pün iei ewe poraus ämi öüwa fen rong seni chök lepoputän, pwe sipwe tong fengen lefiilach. 12Sisap fókkun usun Kain ewe mi up seni ewe emön mi ingaw o niieló pwiin we. Iwe, pwata a niielo pwiin we? Pwokiten an kana föfför ra ingaw, nge än pwiin we föfför a pwung. 13Öüsap nenneiruk, ämi pwii kana, pwe fönüfan a opwut ämi. 14Sia silei pwe sia fen toowu seni mäló o tolong lón manaw, pwokiten kich sia tongei pwiich kana. Ese lifilifil ika iö esap ääni tong a nónnóm lón mäló. 15Iteiten emön me emön mi opwut pwiin, i emön chón niieló aramas. Iwe, ämi mi silei pwe ewe manaw esemwüch esap nónnóm lón manawen emön chón niieló aramas.

Pwääpwälón tong

16Ren ei, sia silei meet enletin tong, pwe Kraist a pwisin fangaló manawan fänitach. Iwe, mi öüchchea pwe pwal kich sipwe fangaló manawach fäniten pwiich kana. 17Nge are emön mi wor ren mettóchun ei fönüfan a küna pwiin lón an osupwang nge a esipaló letipan pwe esap älisi, iwe, epwe ifa usun än Kot tong epwe nónnóm lón ätei? 18Ämi ekkana kükkün semiriit, öüsisap chök tong lón kapas me meseiaw, nge i sipwe tong lón föfför me let.

19Iei usun ach sia silei pwe kich sia manaw lón ewe let me usun ach öpöchökkülätä letipach me fän mesan: 20Are letipach a ettipisi kich, sia silei pwe Kot a lapalaap seni letipach o a silei mettóch meinisin. 21Ämi chiechiei kana mi ächengicheng, are letipach esap ettipisi kich; iwe, a wor ach apilükülük me fän mesen Kot. 22Iwe, ese lifilifil ika meet kich sia tungór, sipwe angei seni I, pwokiten sia älleasochisi an kewe öllük o föri meet mi apwapwai i. 23Iwe, iei an we öllük, pwe sipwe lükü lón iten Nöün we Jesus Kraist o tong fengen lefiilach, usun chök I a fen öllük ngeni kich.

Ewe Ngüün mi let me ewe ngüün mi mwääl

24Ese lifilifil ika iö a älleasochisi an Kot kewe öllük, i a nónnóm lón Kot, nge Kot a nónnóm lón i. Iwe, ren ei, sia silei pwe Kot a nónnóm lóóch, ren ewe Ngüün I a fen fang ngeni kich.

4 Ämi chiechiei kana mi ächengicheng, öüsap lükü iteiten ngüün meinisin, nge öüpwe älelletaöchüw ekkewe ngüün pwe öüpwe küna are ra feitto seni Kot, pun a wor chómmóng soufós chofona ra fen fätälfeil lón fönüfan. 2Iei meet ämi öüpwe silei ren ewe Ngünün Kot: iteiten ngüün mi pwärätä pwe Jesus Kraist a fen war lón fituk, i a feitto seni Kot. 3Nge, iteiten ngüün esap pwärätä Jesus, esap feitto seni Kot. Iei i ngünün ewe chón üüngeni Kraist, ewe ämi öüwa rong pwe epwe war, nge iei a fen nóm lón fönüfan.

4Ämi kana kükkün semiriit, ämi öüwa up seni Kot o üwa fen okkufu ekkeei chón üüngeni Kraist, pün ewe Emön mi nónnóm lóómi a lapalaap an manaman seni ewe emön mi nóm lón fönüfan. 5Iir ra pop seni fönüfan, iei minne, iir ra kapas seni ekiekin fönüfan, iwe, fönüfan a öüseling ngeniir. 6Nge kich sia up seni Kot. Iö mi silei Kot, a öüseling ngeni kich. Iö esap up seni Kot, esap öüseling ngeni kich. Ren ei, sia silei ewe Ngünün let me ewe ngünün mwääl.

Sia silei Kot lón let

7Ämi ekkana mi ächengicheng, öüsipwe tong fengen lefiilach, pün tong a pop seni Kot. Iwe, iö mi ääni tong, a up seni Kot o silei Kot. 8Iö esap ääni tong, esap silei Kot, pwokiten Kot I tong. 9Iei usun än Kot a pwääraló an tong leiich. I a tiinato Nöün we Älemön lón fönüfan pwe kich sipwe tongeni manaw ren I. 10Iei ewe enletin tong. Esap pwe kich sia tongei Kot, nge i I a tongei kich o tiinato Nöün we pwe I epwe ew asóren omwusomwusen tipis fäniten ach kana tipis. 11Ämi ekkana mi ächengicheng, are iei usun än Kot tongei kich; iwe, mi fókkun öuchchea pwe pwal kich sipwe tong fengen lefiilach.

Usun ach küna Kot me lon tong

12Esap wor emön a küna Kot fän ew. Are sia tong fengen lefiilach, iwe, Kot a nónnóm lóóch o an we tong a unusöchüló me lón manawach. 13Ren ei, sia silei pwe sia nónnóm lón I, nge I a nónnóm lóóch, pwokiten I a fang ngeni kich Ngünün we. 14Iwe, sia fen küna o pwärätä pwe ewe Saam a fen tiinato Nöün we pwe I epwe ewe Chón Amanawa fönüfan. 15Iö mi pwärätä pwe Jesus I ewe Nöün Kot, Kot a nónnóm lóón i o i a nónnóm lón Kot. 16Iei popun kich sia silei ifa öüküükün än Kot tongei kich o sia anómwu ach apilükülük wón I. Kot I tong; iwe, emön mi nónnóm lón tong, a nónnóm lón Kot, nge Kot a nónnóm lón i.

Unusöchülón tong

17Lón ei lapalap, tong a unusöchüló leiich, pwe kich sipwe ääni apilükülük lón ewe ränin köpwüng, pwokiten kich sia wewe ngeni I lón ei fönüfan. 18Esap wor nuokkus lón tong, nge tong mi unusöch a ösüüeló nüokkus. Pün nuokkus a wor fäniten köpwüng. Iwe, iö a nuokkus, esap mwo unusöch lón an tong. 19Sia ääni tong, pwokiten I a akkomwen tongei kich.

Tümwünü än Kot öllük ren lükü

20Are emön a apasa: “Ngang mi tongei Kot” nge i mi opwut pwiin; i emön chón chofona. Pün emön esap tongei pwiin, ewe i mi fen kükküna, iwe, epwe ifa usun an epwe tongei Kot, ewe i esap kükküna. 21Iwe, iei ewe öllük sia angei seni Kot: Iö mi tongei Kot epwe pwal fókkun tongei pwiin.

5Iteiten emön me emön mi lükü pwe Jesus I ewe Kraist, i a up seni Kot. Iwe, iteiten emön me emön mi tongei ewe Saam a tongei iö mi up seni Kot. 2Ren ei, sia silei pwe sia tongei nöün Kot kana, lupwen sia tongei Kot o älleasochisi an kewe öllük? 3Pün iei ewe tongen Kot, pwe sia älleasochisi an kewe öllük. Iwe, an kewe öllük resap chou ngeni kich. 4Pün iteiten emön me emön mi up seni Kot a okkufu fönüfan. Iwe, ach lükü iei ach wiil a okkufu fönüfan. 5Iwe, iö ewe mi okkufu fönüfan? Ewe chök emön mi lükü pwe Jesus i ewe Nöün Kot.

Minne Kot pwärätä, a let

6Iei i ewe mi feitto ren kólik me chcha, i Jesus Kraist - esap ren kólik chök, nge i ren ewe kólik me ewe chcha. Iwe, ewe Ngüün i ewe emön mi pwärätä, pwokiten ewe Ngüün i ewe let. 7Pün mi wor ülümön ra pwärätä: 8ewe Ngüün me ewe kólik me ewe chcha. Ekkeei ülüngät peekin pwärätä ra tipeew fengen. 9Sia etiwa än aramas pwärätä, nge än Kot pwärätä a lap seni än aramas, pün iei än Kot pwärätä i a ngeni kich fänäsengesin Nöün we. 10Iö a lükü ewe Nöün Kot a ääni ei pwärätä lón letipan. Iö esap lükü Kot, a föri pwe Kot epwe emön chón chofona, pwokiten i esap lükü lón ewe kapasen pwärätä Kot a ngeni kich fänäsengesin Nöün we. 11Iwe, iei ewe kapasen pwärätä, pwe Kot a fang ngeni kich manaw ese mwüch, nge ei manaw a nónnóm lón Nöün we. 12Iö a ääni ewe Nöün Kot, a ääni manaw. Iö esap ääni ewe Nöün Kot, esap ääni manaw.

13Ngang üwa makkei ekkeei mettóch ngeni kemi ämi kana mi lükü lón iten ewe Nöün Kot, pwe öüpwe tongeni silei pwe ämi öüwa ääni manaw ese mwüch.

Epilükülük me tong lón iótek

14Iwe, iei ewe apilükülük sia ääni lupwen sia arapeto ren Kot; pwe are sia tungór och mettóch alóngólóng wón letipan, i epwe rongorong ngeni kich. 15Iwe, are sia silei pwe I a rongorong ngeni kich lón meet kich sia tungór, sia silei pwe sia ääni meet sia tungórei.

16Are emön a küna pwiin a föri och tipis esap emmweni i ngeni mäló; iwe, i epwe iótek fänitan, nge Kot pwe epwe fang ngeni ewe aramas manaw - ngeni chókana mi föri tipis esap emmweniir ngeni mäló. Mi wor tipis mi emmweni aramas ngeni mäló. Ngang üsap apasa pwe emön epwe iótek fäniten ena. 17Sókkun föfför mi ngaw meinisin, tipis, nge mi wor tipis esap emmweni aramas ngeni mäló.

Kapasen kósopw: silei minne mi let, opwut önümwääl

18Kich sia silei pwe iteiten emön me emön mi fen up seni Kot esap chüen sópweló chök le föfföri tipis, nge ewe Emön mi up seni Kot a tümwünü i. Iwe, ewe emön mi ingaw esap tongeni epwe attapa i. 19Kich sia silei pwe kich sia up seni Kot, nge unusen fönüfan a nom fän manamanen ewe emön mi ingaw. 20Iwe, kich sia pwal silei pwe ewe Nöün Kot a fen feitto o fang ngeni kich weweöch, pwe sipwe tongeni silei ewe Emön mi let. Iwe, kich sia nónnóm lón ewe Emön mi let, iei i ewe Naaw, Jesus Kraist. I ewe Kot mi enlet me ewe manaw esemwüch.

21Ämi kana kükkün semiriit, öüpwe pwisin atoowawa kemi seni ekkewe uluulun önümwääl. Amen.